(੧੩) ੩. ਭਯਵਗ੍ਗੋ

੧. ਅਤ੍ਤਾਨੁਵਾਦਸੁਤ੍ਤਵਣ੍ਣਨਾ

੧੨੧. ਤਤਿਯਸ੍ਸ ਪਠਮੇ ਅਤ੍ਤਾਨਂ ਅਨੁਵਦਨ੍ਤਸ੍ਸ ਉਪ੍ਪਜ੍ਜਨਕਭਯਨ੍ਤਿ ਅਤ੍ਤਾਨਂ ਅਨੁਵਦਨ੍ਤਸ੍ਸ ਪਾਪਕਮ੍ਮਿਨੋ ਉਪ੍ਪਜ੍ਜਨਕਭਯਂ. ਦ੍ਵਤ੍ਤਿਂਸਕਮ੍ਮਕਾਰਣੇ ਪਟਿਚ੍ਚ ਉਪ੍ਪਜ੍ਜਨਕਭਯਨ੍ਤਿ ਅਗਾਰਿਕਾਨਂ ਵਸੇਨ ਵੁਤ੍ਤਂ, ਅਨਗਾਰਿਕਾਨਂ ਪਨ ਵਿਨਯਦਣ੍ਡਂ ਪਟਿਚ੍ਚ ਉਪ੍ਪਜ੍ਜਨਕਭਯਮ੍ਪਿ ਦਣ੍ਡਭਯਨ੍ਤੇਵ ਸਙ੍ਖਂ ਗਚ੍ਛਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਅਤ੍ਤਾਨੁਵਾਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਊਮਿਭਯਸੁਤ੍ਤਵਣ੍ਣਨਾ

੧੨੨. ਦੁਤਿਯੇ ਕੋਧੂਪਾਯਾਸਸ੍ਸੇਤਂ ਅਧਿਵਚਨਨ੍ਤਿ ਏਤ੍ਥ ਕੁਜ੍ਝਨਟ੍ਠੇਨ ਕੋਧੋ, ਸ੍ਵੇਵ ਚਿਤ੍ਤਸ੍ਸ ਕਾਯਸ੍ਸ ਚ ਅਤਿਪ੍ਪਮਦ੍ਦਨਮਥਨੁਪ੍ਪਾਦਨੇਹਿ ਦਲ਼੍ਹਆਯਾਸਟ੍ਠੇਨ ਉਪਾਯਾਸੋ. ਅਨੇਕਵਾਰਂ ਪਵਤ੍ਤਿਤ੍ਵਾ ਅਤ੍ਤਨਾ ਸਮਵੇਤਂ ਸਤ੍ਤਂ ਅਜ੍ਝੋਤ੍ਥਰਿਤ੍ਵਾ ਸੀਸਂ ਉਕ੍ਖਿਪਿਤੁਂ ਅਦਤ੍ਵਾ ਊਮਿਸਦਿਸਤਾ ਦਟ੍ਠਬ੍ਬਾ. ਯਥਾ ਹਿ ਬਾਹਿਰਂ ਉਦਕਂ ਓਤਿਣ੍ਣੋ ਊਮੀਸੁ ਓਸੀਦਿਤ੍ਵਾ ਮਰਤਿ, ਏਵਂ ਇਮਸ੍ਮਿਂ ਸਾਸਨੇ ਕੋਧੂਪਾਯਾਸੇ ਓਸੀਦਿਤ੍ਵਾ ਵਿਬ੍ਭਮਤਿ, ਤਸ੍ਮਾ ਕੋਧੂਪਾਯਾਸੋ ‘‘ਊਮਿਭਯ’’ਨ੍ਤਿ ਵੁਤ੍ਤੋ. ਓਦਰਿਕਤ੍ਤਸ੍ਸੇਤਂ ਅਧਿਵਚਨਨ੍ਤਿ ਯਥਾ ਹਿ ਬਾਹਿਰਂ ਉਦਕਂ ਓਤਿਣ੍ਣੋ ਕੁਮ੍ਭੀਲੇਨ ਖਾਦਿਤੋ ਮਰਤਿ, ਏਵਂ ਇਮਸ੍ਮਿਂ ਸਾਸਨੇ ਓਦਰਿਕਤ੍ਤੇਨ ਓਦਰਿਕਭਾਵੇਨ ਆਮਿਸਗੇਧੇਨ ਮਿਚ੍ਛਾਜੀਵੇਨ ਜੀਵਿਕਕਪ੍ਪਨੇਨ ਨਾਸਿਤਸੀਲਾਦਿਗੁਣਤਾਯ ਖਾਦਿਤਧਮ੍ਮਸਰੀਰੋ ਵਿਬ੍ਭਮਤਿ, ਤਸ੍ਮਾ ਓਦਰਿਕਤ੍ਤਂ ‘‘ਕੁਮ੍ਭੀਲਭਯ’’ਨ੍ਤਿ ਵੁਤ੍ਤਂ.

ਅਨੁਪਟ੍ਠਿਤਾਯ ਸਤਿਯਾਤਿ ਕਾਯਗਤਂ ਸਤਿਂ ਅਨੁਟ੍ਠਾਪੇਤ੍ਵਾ. ਅਸਂਵੁਤੇਹੀਤਿ ਅਪਿਹਿਤੇਹਿ. ਪਞ੍ਚਨ੍ਨੇਤਂ ਕਾਮਗੁਣਾਨਂ ਅਧਿਵਚਨਨ੍ਤਿ ਯਥਾ ਹਿ ਬਾਹਿਰਂ ਉਦਕਂ ਓਤਿਣ੍ਣੋ ਆਵਟ੍ਟੇ ਨਿਮੁਜ੍ਜਿਤ੍ਵਾ ਮਰਤਿ, ਏਵਂ ਇਮਸ੍ਮਿਂ ਸਾਸਨੇ ਪਬ੍ਬਜਿਤੋ ਪਞ੍ਚਕਾਮਗੁਣਾਵਟ੍ਟੇ ਨਿਮੁਜ੍ਜਿਤ੍ਵਾ ਵਿਬ੍ਭਮਤਿ. ਕਾਮਰਾਗਾਭਿਭੂਤੋ ਹਿ ਸਤ੍ਤੋ ਇਤੋ ਚ ਏਤ੍ਤੋ, ਏਤ੍ਤੋ ਚ ਇਤੋਤਿ ਏਵਂ ਮਨਾਪਿਯਰੂਪਾਦਿਵਿਸਯਸਙ੍ਖਾਤੇ ਆਵਟ੍ਟੇ ਅਤ੍ਤਾਨਂ ਸਂਸਾਰੇਤ੍ਵਾ ਯਥਾ ਤਤੋ ਬਹਿਭੂਤੇ ਨੇਕ੍ਖਮ੍ਮੇ ਚਿਤ੍ਤਮ੍ਪਿ ਨ ਉਪ੍ਪਾਦੇਤਿ, ਏਵਂ ਆਵਟ੍ਟੇਤ੍ਵਾ ਬ੍ਯਸਨਾਪਾਦਨੇਨ ਕਾਮਗੁਣਾਨਂ ਆਵਟ੍ਟਸਦਿਸਤਾ ਦਟ੍ਠਬ੍ਬਾ.

ਅਨੁਦ੍ਧਂਸੇਤੀਤਿ ਕਿਲਮੇਤਿ ਵਿਲੋਲਤਿ. ਰਾਗਾਨੁਦ੍ਧਂਸਿਤੇਨਾਤਿ ਰਾਗੇਨ ਅਨੁਦ੍ਧਂਸਿਤੇਨ. ਮਾਤੁਗਾਮਸ੍ਸੇਤਂ ਅਧਿਵਚਨਨ੍ਤਿ. ਯਥਾ ਹਿ ਬਾਹਿਰਂ ਉਦਕਂ ਓਤਿਣ੍ਣੋ ਚਣ੍ਡਮਚ੍ਛਂ ਆਗਮ੍ਮ ਲਦ੍ਧਪ੍ਪਹਾਰੋ ਮਰਤਿ, ਏਵਂ ਇਮਸ੍ਮਿਂ ਸਾਸਨੇ ਮਾਤੁਗਾਮਂ ਆਰਬ੍ਭ ਉਪ੍ਪਨ੍ਨਕਾਮਰਾਗੋ ਵਿਬ੍ਭਮਤਿ, ਤਸ੍ਮਾ ਮਾਤੁਗਾਮੋ ‘‘ਸੁਸੁਕਾਭਯ’’ਨ੍ਤਿ ਵੁਤ੍ਤੋ. ਮਾਤੁਗਾਮੋ ਹਿ ਯੋਨਿਸੋਮਨਸਿਕਾਰਰਹਿਤਂ ਅਧੀਰਪੁਰਿਸਂ ਇਤ੍ਥਿਕੁਤ੍ਤਭੂਤੇਹਿ ਅਤ੍ਤਨੋ ਹਾਸਭਾਵਵਿਲਾਸੇਹਿ ਅਭਿਭੁਯ੍ਯ ਗਹੇਤ੍ਵਾ ਧੀਰਜਾਤਿਕਮ੍ਪਿ ਅਤ੍ਤਨੋ ਰੂਪਾਦੀਹਿ ਸਮ੍ਪਲੋਭਨਵਸੇਨ ਅਨਵਸੇਸਂ ਅਤ੍ਤਨੋ ਉਪਕਾਰਧਮ੍ਮੇ ਸੀਲਾਦਿਕੇ ਸਮ੍ਪਾਦੇਤੁਂ ਅਸਮਤ੍ਥਂ ਕਰੋਨ੍ਤੋ ਅਨਯਬ੍ਯਸਨਂ ਪਾਪੇਤਿ.

ਇਮਾਨਿ ਪਨ ਚਤ੍ਤਾਰਿ ਭਯਾਨਿ ਭਾਯਿਤ੍ਵਾ ਯਥਾ ਉਦਕਂ ਅਨੋਰੋਹਨ੍ਤਸ੍ਸ ਉਦਕਂ ਨਿਸ੍ਸਾਯ ਉਦਕਪਿਪਾਸਾਵਿਨਯਨਂ ਸਰੀਰਸੁਦ੍ਧਿਪਰਿਲ਼ਾਹੂਪਸਮੋ ਕਾਯਉਤੁਗ੍ਗਾਹਾਪਨਨ੍ਤਿ, ਏਵਮਾਦਿ ਆਨਿਸਂਸੋ ਨਤ੍ਥਿ, ਏਵਮੇਵਂ ਇਮਾਨਿ ਚਤ੍ਤਾਰਿ ਭਯਾਨਿ ਭਾਯਿਤ੍ਵਾ ਸਾਸਨੇ ਅਪਬ੍ਬਜਨ੍ਤਸ੍ਸਪਿ ਇਮਂ ਸਾਸਨਂ ਨਿਸ੍ਸਾਯ ਸਙ੍ਖੇਪਤੋ ਵਟ੍ਟਦੁਕ੍ਖੂਪਸਮੋ, ਵਿਤ੍ਥਾਰਤੋ ਪਨ ਸੀਲਾਨਿਸਂਸਾਦਿਵਸੇਨ ਅਨੇਕਵਿਧੋ ਆਨਿਸਂਸੋ ਨਤ੍ਥਿ. ਯਥਾ ਪਨ ਇਮਾਨਿ ਚਤ੍ਤਾਰਿ ਭਯਾਨਿ ਅਭਾਯਿਤ੍ਵਾ ਉਦਕਂ ਓਰੋਹਨ੍ਤਸ੍ਸ ਵੁਤ੍ਤਪ੍ਪਕਾਰੋ ਆਨਿਸਂਸੋ ਹੋਤਿ, ਏਵਂ ਇਮਾਨਿ ਅਭਾਯਿਤ੍ਵਾ ਸਾਸਨੇ ਪਬ੍ਬਜਨ੍ਤਸ੍ਸਪਿ ਵੁਤ੍ਤਪ੍ਪਕਾਰੋ ਆਨਿਸਂਸੋ ਹੋਤਿ. ਮਹਾਧਮ੍ਮਰਕ੍ਖਿਤਤ੍ਥੇਰੋ ਪਨਾਹ ‘‘ਚਤ੍ਤਾਰਿ ਭਯਾਨਿ ਭਾਯਿਤ੍ਵਾ ਉਦਕਂ ਅਨੋਤਰਨ੍ਤੋ ਸੋਤਂ ਛਿਨ੍ਦਿਤ੍ਵਾ ਪਰਤੀਰਂ ਪਾਪੁਣਿਤੁਂ ਨ ਸਕ੍ਕੋਤਿ, ਅਭਾਯਿਤ੍ਵਾ ਓਤਰਨ੍ਤੋ ਸਕ੍ਕੋਤਿ, ਏਵਮੇਵਂ ਭਾਯਿਤ੍ਵਾ ਸਾਸਨੇ ਅਪਬ੍ਬਜਨ੍ਤੋਪਿ ਤਣ੍ਹਾਸੋਤਂ ਛਿਨ੍ਦਿਤ੍ਵਾ ਨਿਬ੍ਬਾਨਪਾਰਂ ਦਟ੍ਠੁਂ ਨ ਸਕ੍ਕੋਤਿ, ਅਭਾਯਿਤ੍ਵਾ ਪਬ੍ਬਜਨ੍ਤੋ ਸਕ੍ਕੋਤੀ’’ਤਿ.

ਊਮਿਭਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਪਠਮਨਾਨਾਕਰਣਸੁਤ੍ਤਵਣ੍ਣਨਾ

੧੨੩. ਤਤਿਯੇ ਬ੍ਰਹ੍ਮਕਾਯਿਕਾਨਂ ਦੇਵਾਨਨ੍ਤਿ ਏਤ੍ਥ ਬ੍ਰਹ੍ਮਾਨਂ ਕਾਯੋ ਸਮੂਹੋਤਿ ਬ੍ਰਹ੍ਮਕਾਯੋ, ਤਪ੍ਪਰਿਯਾਪਨ੍ਨਤਾਯ ਤਤ੍ਥ ਗਤਾਤਿ ਬ੍ਰਹ੍ਮਕਾਯਿਕਾ. ਏਤਾਯ ਚ ਸਬ੍ਬਸ੍ਸਪਿ ਬ੍ਰਹ੍ਮਕਾਯਸ੍ਸ ਸਮਞ੍ਞਾਯ ਭਵਿਤਬ੍ਬਂ. ਆਭਸ੍ਸਰਾਨਂ ਦੇਵਾਨਨ੍ਤਿਆਦਿਨਾ ਪਨ ਦੁਤਿਯਜ੍ਝਾਨਭੂਮਿਕਾਦੀਨਂ ਉਪਰਿ ਗਹਿਤਤ੍ਤਾ ਗੋਬਲੀਬਦ੍ਦਞ੍ਞਾਯੇਨ ਤਦਵਸਿਟ੍ਠਾਨਂ ਅਯਂ ਸਮਞ੍ਞਾ, ਤਸ੍ਮਾ ‘‘ਬ੍ਰਹ੍ਮਕਾਯਿਕਾਨਂ ਦੇਵਾਨ’’ਨ੍ਤਿ ਪਠਮਜ੍ਝਾਨਭੂਮਿਕਾਨਂਯੇਵ ਗਹਣਂ ਵੇਦਿਤਬ੍ਬਂ. ਸਹ ਬ੍ਯਯਤਿ ਗਚ੍ਛਤੀਤਿ ਸਹਬ੍ਯੋ, ਸਹਵਤ੍ਤਨਕੋ. ਤਸ੍ਸ ਭਾਵੋ ਸਹਬ੍ਯਤਾ, ਸਹਪਵਤ੍ਤੀਤਿ ਆਹ ‘‘ਸਹਭਾਵਂ ਉਪਗਚ੍ਛਤੀ’’ਤਿ. ਕਪ੍ਪੋ ਆਯੁਪ੍ਪਮਾਣਨ੍ਤਿ ਏਤ੍ਥ ਯਦਿਪਿ ਬ੍ਰਹ੍ਮਪਾਰਿਸਜ੍ਜਾਦੀਨਂ ਆਯੁਨੋ ਅਨ੍ਤਰਂ ਅਤ੍ਥਿ, ਉਕ੍ਕਟ੍ਠਪਰਿਚ੍ਛੇਦੇਨ ਪਨੇਤਂ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਪਠਮਜ੍ਝਾਨਂ ਅਤ੍ਥਿ ਹੀਨ’’ਨ੍ਤਿਆਦਿਮਾਹ.

ਦ੍ਵੇ ਕਪ੍ਪਾ ਆਯੁਪ੍ਪਮਾਣਨ੍ਤਿ ਏਤ੍ਥ ਪਨ ਹੀਨਜ੍ਝਾਨੇਨ ਨਿਬ੍ਬਤ੍ਤਾਨਂ ਵਸੇਨ ਅਯਂ ਪਰਿਚ੍ਛੇਦੋ ਕਤੋਤਿ ਦਸ੍ਸੇਤੁਂ ‘‘ਦੁਤਿਯਜ੍ਝਾਨਂ ਵੁਤ੍ਤਨਯੇਨੇਵ ਤਿਵਿਧਂ ਹੋਤੀ’’ਤਿਆਦਿ ਆਰਦ੍ਧਂ. ਚਤ੍ਤਾਰੋ ਕਪ੍ਪਾਤਿ ਏਤ੍ਥ ਪਨ ਉਕ੍ਕਟ੍ਠਪਰਿਚ੍ਛੇਦੇਨ ਚਤੁਸਟ੍ਠਿ ਕਪ੍ਪਾ ਵਤ੍ਤਬ੍ਬਾਤਿ ਦਸ੍ਸੇਨ੍ਤੋ ‘‘ਯਂ ਹੇਟ੍ਠਾ ਵੁਤ੍ਤਂ ‘ਕਪ੍ਪੋ ਦ੍ਵੇ ਕਪ੍ਪਾ’ਤਿ, ਕਮ੍ਪਿ ਆਹਰਿਤ੍ਵਾ ਅਤ੍ਥੋ ਵੇਦਿਤਬ੍ਬੋ’’ਤਿ ਆਹ. ਕਥਂ ਪਨੇਤ੍ਥ ਅਯਮਤ੍ਥੋ ਲਬ੍ਭਤੀਤਿ ਆਹ ‘‘ਕਪ੍ਪੋਤਿ ਚ ਗੁਣਸ੍ਸਪਿ ਨਾਮ’’ਨ੍ਤਿ. ਤਤ੍ਥ ਪਠਮਂ ਵੁਤ੍ਤੋ ਕਪ੍ਪੋ, ਤਤੋ ਏਕੇਨ ਗੁਣੇਨ, ਏਕਸ੍ਮਿਂ ਵਾਰੇ ਗਣਨਾਯਾਤਿ ਅਤ੍ਥੋ. ਦ੍ਵੇ ਕਪ੍ਪਾ ਹੋਨ੍ਤੀਤਿ ਏਕਵਾਰਗਣਨਾਯ ਕਪ੍ਪਸ੍ਸ ਦ੍ਵਿਗੁਣਿਤਤ੍ਤਾ ਦ੍ਵੇ ਮਹਾਕਪ੍ਪਾ ਹੋਨ੍ਤੀਤਿ ਅਤ੍ਥੋ. ਦੁਤਿਯੇਨਾਤਿ ਦੁਤਿਯਵਾਰਗਣਨਾਯ. ਚਤ੍ਤਾਰੋਤਿ ਦੁਤਿਯਵਾਰਗਣਨਾਯ ਦ੍ਵੀਸੁ ਕਪ੍ਪੇਸੁ ਦ੍ਵਿਗੁਣਿਤੇਸੁ ਚਤ੍ਤਾਰੋ ਮਹਾਕਪ੍ਪਾ ਹੋਨ੍ਤੀਤਿ ਅਤ੍ਥੋ. ਪੁਨ ਤੇ ਚਤ੍ਤਾਰੋ ਕਪ੍ਪਾਤਿ ਵੁਤ੍ਤਨਯੇਨ ਦ੍ਵੇ ਵਾਰੇ ਗੁਣੇਤ੍ਵਾ ਯੇ ਚਤ੍ਤਾਰੋ ਕਪ੍ਪਾ ਦਸ੍ਸਿਤਾ, ਪੁਨ ਤੇ ਚਤ੍ਤਾਰੋ ਕਪ੍ਪਾ ਚਤੁਗ੍ਗੁਣਾ ਹੋਨ੍ਤੀਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਦ੍ਵੇ ਵਾਰੇ ਗੁਣੇਤ੍ਵਾ ਯੇ ਚਤ੍ਤਾਰੋ ਕਪ੍ਪਾ ਦਸ੍ਸਿਤਾ, ਤੇਸੁ ਚਤੁਕ੍ਖਤ੍ਤੁਂ ਗੁਣਿਤੇਸੁ ਚਤੁਸਟ੍ਠਿ ਕਪ੍ਪਾ ਸਮ੍ਪਜ੍ਜਨ੍ਤੀਤਿ. ਤਥਾ ਹਿ ਚਤ੍ਤਾਰੋ ਏਕਸ੍ਮਿਂ ਵਾਰੇ ਗੁਣਿਤਾ ਅਟ੍ਠ ਹੋਨ੍ਤਿ, ਪੁਨ ਤੇ ਅਟ੍ਠ ਦੁਤਿਯਵਾਰੇ ਗੁਣਿਤਾ ਸੋਲ਼ਸ ਹੋਨ੍ਤਿ, ਪੁਨ ਤੇ ਸੋਲ਼ਸ ਤਤਿਯਵਾਰੇ ਗੁਣਿਤਾ ਦ੍ਵਤ੍ਤਿਂਸ ਹੋਨ੍ਤਿ, ਪੁਨ ਤੇ ਦ੍ਵਤ੍ਤਿਂਸ ਚਤੁਤ੍ਥਵਾਰੇ ਗੁਣਿਤਾ ਚਤੁਸਟ੍ਠਿ ਹੋਨ੍ਤਿ. ਤੇਨੇਵਾਹ ‘‘ਇਮੇਹਿ ਚਤੂਹਿ ਗੁਣੇਹਿ ਗੁਣਿਤਾ ਏਕੇਨ ਗੁਣੇਨ ਅਟ੍ਠ ਹੋਨ੍ਤੀ’’ਤਿਆਦਿ. ਏਤ੍ਥ ਚ ਹੇਟ੍ਠਾ ਉਪੋਸਥਸੁਤ੍ਤੇ (ਅ. ਨਿ. ੩.੭੧) –

‘‘ਯਾਨਿ ਮਾਨੁਸਕਾਨਿ ਪਞ੍ਞਾਸ ਵਸ੍ਸਾਨਿ, ਚਾਤੁਮਹਾਰਾਜਿਕਾਨਂ ਦੇਵਾਨਂ ਏਸੋ ਏਕੋ ਰਤ੍ਤਿਨ੍ਦਿਵੋ’’ਤਿ –

ਆਦਿਨਾ ਕਾਮਾਵਚਰਦੇਵਾਨਮੇਵ ਆਯੁਪ੍ਪਮਾਣਂ ਦਸ੍ਸਿਤਂ. ਹੇਟ੍ਠਾਯੇਵ –

‘‘ਤਯੋਮੇ, ਭਿਕ੍ਖਵੇ, ਪੁਗ੍ਗਲਾ ਸਨ੍ਤੋ ਸਂਵਿਜ੍ਜਮਾਨਾ ਲੋਕਸ੍ਮਿਂ. ਕਤਮੇ ਤਯੋ? ਇਧ, ਭਿਕ੍ਖਵੇ, ਏਕਚ੍ਚੋ ਪੁਗ੍ਗਲੋ ਸਬ੍ਬਸੋ ਰੂਪਸਞ੍ਞਾਨਂ ਸਮਤਿਕ੍ਕਮਾ…ਪੇ… ਆਕਾਸਾਨਞ੍ਚਾਯਤਨੂਪਗਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਤਿ. ਆਕਾਸਾਨਞ੍ਚਾਯਤਨੂਪਗਾਨਂ, ਭਿਕ੍ਖਵੇ, ਦੇਵਾਨਂ ਵੀਸਤਿ ਕਪ੍ਪਸਹਸ੍ਸਾਨਿ ਆਯੁਪ੍ਪਮਾਣ’’ਨ੍ਤਿ (ਅ. ਨਿ. ੩.੧੧੭) –

ਆਦਿਨਾ ਅਰੂਪਾਵਚਰਾਨਂਯੇਵ ਆਯੁਪ੍ਪਮਾਣਂ ਵੁਤ੍ਤਂ. ਇਧ ਪਨ ਰੂਪਾਵਚਰਾਨਮੇਵ ਆਯੁਪ੍ਪਮਾਣਂ ਦਸ੍ਸਿਤਂ. ਵਿਭਙ੍ਗਪਾਲ਼ਿਯਂ (ਵਿਭ. ੧੦੨੨) ਪਨ ‘‘ਮਨੁਸ੍ਸਾਨਂ ਕਿਤ੍ਤਕਂ ਆਯੁਪ੍ਪਮਾਣਂ, ਵਸ੍ਸਸਤਂ ਅਪ੍ਪਂ ਵਾ ਭਿਯ੍ਯੋ’’ਤਿਆਦਿਨਾ ਦੇਵਮਨੁਸ੍ਸਾਨਞ੍ਚੇਵ ਰੂਪਾਰੂਪਾਵਚਰਸਤ੍ਤਾਨਞ੍ਚ ਆਯੁਪ੍ਪਮਾਣਂ ਦਸ੍ਸਿਤਂ.

ਤਤ੍ਥ ਸਮ੍ਮਾਸਮ੍ਬੁਦ੍ਧੇਨ ਮਨੁਸ੍ਸਾਨਂ ਦੇਵਾਨਞ੍ਚ ਆਯੁਂ ਪਰਿਚ੍ਛਿਨ੍ਦਮਾਨੇਨ ਚਤੂਸੁ ਅਪਾਯੇਸੁ ਭੁਮ੍ਮਦੇਵੇਸੁ ਚ ਆਯੁ ਨ ਪਰਿਚ੍ਛਿਨ੍ਨਂ. ਤਂ ਕਸ੍ਮਾਤਿ? ਨਿਰਯੇ ਤਾਵ ਕਮ੍ਮਮੇਵ ਪਮਾਣਂ. ਯਾਵ ਕਮ੍ਮਂ ਨ ਖੀਯਤਿ, ਤਾਵ ਪਚ੍ਚਨ੍ਤਿ. ਤਥਾ ਸੇਸਅਪਾਯੇਸੁ. ਭੁਮ੍ਮਦੇਵਾਨਮ੍ਪਿ ਕਮ੍ਮਮੇਵ ਪਮਾਣਂ. ਤਤ੍ਥ ਨਿਬ੍ਬਤ੍ਤਾ ਹਿ ਕੇਚਿ ਸਤ੍ਤਾਹਮਤ੍ਤਂ ਤਿਟ੍ਠਨ੍ਤਿ, ਕੇਚਿ ਅਡ੍ਢਮਾਸਂ, ਕਪ੍ਪਂ ਤਿਟ੍ਠਮਾਨਾਪਿ ਅਤ੍ਥਿਯੇਵ. ਤਤ੍ਥ ਮਨੁਸ੍ਸੇਸੁ ਗਿਹਿਭਾਵੇ ਠਿਤਾਯੇਵ ਸੋਤਾਪਨ੍ਨਾਪਿ ਹੋਨ੍ਤਿ, ਸਕਦਾਗਾਮਿਫਲਂ ਅਨਾਗਾਮਿਫਲਂ ਅਰਹਤ੍ਤਮ੍ਪਿ ਪਾਪੁਣਨ੍ਤਿ, ਤੇਸੁ ਸੋਤਾਪਨ੍ਨਾਦਯੋ ਯਾਵਜੀਵਂ ਤਿਟ੍ਠਨ੍ਤਿ, ਖੀਣਾਸਵਾ ਪਨ ਪਰਿਨਿਬ੍ਬਾਯਨ੍ਤਿ ਵਾ ਪਬ੍ਬਜਨ੍ਤਿ ਵਾ. ਕਸ੍ਮਾ? ਅਰਹਤ੍ਤਂ ਨਾਮ ਸੇਟ੍ਠਗੁਣਂ, ਗਿਹਿਲਿਙ੍ਗਂ ਹੀਨਂ, ਤਂ ਹੀਨਤਾਯ ਉਤ੍ਤਮਂ ਗੁਣਂ ਧਾਰੇਤੁਂ ਨ ਸਕ੍ਕੋਤਿ, ਤਸ੍ਮਾ ਤੇ ਪਰਿਨਿਬ੍ਬਾਤੁਕਾਮਾ ਵਾ ਹੋਨ੍ਤਿ ਪਬ੍ਬਜਿਤੁਕਾਮਾ ਵਾ. ਭੁਮ੍ਮਦੇਵਾ ਪਨ ਅਰਹਤ੍ਤਂ ਪਤ੍ਤਾਪਿ ਯਾਵਜੀਵਂ ਤਿਟ੍ਠਨ੍ਤਿ, ਛਸੁ ਕਾਮਾਵਚਰੇਸੁ ਦੇਵੇਸੁ ਸੋਤਾਪਨ੍ਨਸਕਦਾਗਾਮਿਨੋ ਯਾਵਜੀਵਂ ਤਿਟ੍ਠਨ੍ਤਿ, ਅਨਾਗਾਮਿਨਾ ਰੂਪਭਵਂ ਗਨ੍ਤੁਂ ਵਟ੍ਟਤਿ ਖੀਣਾਸਵੇਨ ਪਰਿਨਿਬ੍ਬਾਤੁਂ. ਕਸ੍ਮਾ? ਨਿਲੀਯਨੋਕਾਸਸ੍ਸ ਅਭਾਵਾ. ਰੂਪਾਵਚਰਾਰੂਪਾਵਚਰੇਸੁ ਸਬ੍ਬੇਪਿ ਯਾਵਜੀਵਂ ਤਿਟ੍ਠਨ੍ਤਿ, ਤਤ੍ਥ ਰੂਪਾਵਚਰੇ ਨਿਬ੍ਬਤ੍ਤਾ ਸੋਤਾਪਨ੍ਨਸਕਦਾਗਾਮਿਨੋ ਨ ਪੁਨ ਇਧਾਗਚ੍ਛਨ੍ਤਿ, ਤਤ੍ਥੇਵ ਪਰਿਨਿਬ੍ਬਾਯਨ੍ਤਿ. ਏਤੇ ਹਿ ਝਾਨਅਨਾਗਾਮਿਨੋ ਨਾਮ.

ਅਟ੍ਠਸਮਾਪਤ੍ਤਿਲਾਭੀਨਂ ਪਨ ਕਿਂ ਨਿਯਮੇਤਿ? ਪਗੁਣਜ੍ਝਾਨਂ. ਯਦੇਵਸ੍ਸ ਪਗੁਣਂ ਹੋਤਿ, ਤੇਨ ਉਪਪਜ੍ਜਤਿ. ਸਬ੍ਬੇਸੁ ਪਗੁਣੇਸੁ ਕਿਂ ਨਿਯਮੇਤਿ? ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿ. ਏਕਂਸੇਨੇਵ ਹਿ ਸੋ ਨੇਵਸਞ੍ਞਾਨਾਸਞ੍ਞਾਯਤਨੇ ਉਪਪਜ੍ਜਤਿ. ਨਵਸੁ ਬ੍ਰਹ੍ਮਲੋਕੇਸੁ ਨਿਬ੍ਬਤ੍ਤਅਰਿਯਸਾਵਕਾਨਂ ਤਤ੍ਰੂਪਪਤ੍ਤਿਪਿ ਉਪਰੂਪਪਤ੍ਤਿਪਿ, ਨ ਹੇਟ੍ਠੂਪਪਤ੍ਤਿ. ਪੁਥੁਜ੍ਜਨਾਨਂ ਪਨ ਤਤ੍ਰੂਪਪਤ੍ਤਿਪਿ ਹੋਤਿ, ਉਪਰੂਪਪਤ੍ਤਿਪਿ, ਹੇਟ੍ਠੂਪਪਤ੍ਤਿਪਿ. ਪਞ੍ਚਸੁ ਸੁਦ੍ਧਾਵਾਸੇਸੁ ਚਤੂਸੁ ਚ ਅਰੂਪੇਸੁ ਅਰਿਯਸਾਵਕਾਨਂ ਤਤ੍ਰੂਪਪਤ੍ਤਿਪਿ ਹੋਤਿ ਉਪਰੂਪਪਤ੍ਤਿਪਿ. ਪਠਮਜ੍ਝਾਨਭੂਮਿਯਂ ਨਿਬ੍ਬਤ੍ਤੋ ਅਨਾਗਾਮੀ ਨਵ ਬ੍ਰਹ੍ਮਲੋਕੇ ਸੋਧੇਤ੍ਵਾ ਮਤ੍ਥਕੇ ਠਿਤੋ ਪਰਿਨਿਬ੍ਬਾਤਿ. ਵੇਹਪ੍ਫਲਂ, ਅਕਨਿਟ੍ਠਂ, ਨੇਵਸਞ੍ਞਾਨਾਸਞ੍ਞਾਯਤਨਨ੍ਤਿ ਇਮੇ ਤਯੋ ਦੇਵਲੋਕਾ ਸੇਟ੍ਠਭਵਾ ਨਾਮ. ਇਮੇਸੁ ਤੀਸੁ ਠਾਨੇਸੁ ਨਿਬ੍ਬਤ੍ਤਅਨਾਗਾਮਿਨੋ ਨੇਵ ਉਦ੍ਧਂ ਗਚ੍ਛਨ੍ਤਿ, ਨ ਅਧੋ, ਤਤ੍ਥ ਤਤ੍ਥੇਵ ਪਰਿਨਿਬ੍ਬਾਯਨ੍ਤੀਤਿ ਇਦਂ ਪਕਿਣ੍ਣਕਂ ਵੇਦਿਤਬ੍ਬਂ.

ਪਠਮਨਾਨਾਕਰਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪-੬. ਦੁਤਿਯਨਾਨਾਕਰਣਸੁਤ੍ਤਾਦਿਵਣ੍ਣਨਾ

੧੨੪-੬. ਚਤੁਤ੍ਥੇ ਤੇ ਧਮ੍ਮੇਤਿ ਤੇ ‘‘ਰੂਪਗਤ’’ਨ੍ਤਿਆਦਿਨਾ ਨਯੇਨ ਵੁਤ੍ਤੇ ਰੂਪਾਦਯੋ ਧਮ੍ਮੇ. ਅਨਿਚ੍ਚਤੋਤਿ ਇਮਿਨਾ ਨਿਚ੍ਚਪ੍ਪਟਿਕ੍ਖੇਪਤੋ ਤੇਸਂ ਅਨਿਚ੍ਚਤਮਾਹ, ਤਤੋ ਏਵ ਚ ਉਦਯਵਯਵਨ੍ਤਤੋ ਵਿਪਰਿਣਾਮਤੋ ਤਾਵਕਾਲਿਕਤੋ ਚ ਤੇ ਅਨਿਚ੍ਚਾਤਿ ਜੋਤਿਤਂ ਹੋਤਿ. ਯਞ੍ਹਿ ਨਿਬ੍ਬਤ੍ਤਂ ਹੋਤਿ, ਤਂ ਉਦਯਵਯਪਰਿਚ੍ਛਿਨ੍ਨਂ. ਜਰਾਯ ਮਰਣੇਨ ਚ ਤਦੇਵ ਵਿਪਰੀਤਂ, ਇਤ੍ਤਰਕ੍ਖਣਮੇਵ ਚ ਹੋਤੀਤਿ. ਦੁਕ੍ਖਤੋਤਿ ਇਮਿਨਾ ਸੁਖਪ੍ਪਟਿਕ੍ਖੇਪਤੋ ਤੇਸਂ ਦੁਕ੍ਖਤਮਾਹ. ਤਤੋ ਏਵ ਚ ਅਭਿਣ੍ਹਪ੍ਪਟਿਪੀਲ਼ਨਤੋ ਦੁਕ੍ਖਵਤ੍ਥੁਤੋ ਚ ਤੇ ਦੁਕ੍ਖਾਤਿ ਜੋਤਿਤਂ ਹੋਤਿ. ਉਦਯਵਯਵਨ੍ਤਤਾਯ ਹਿ ਤੇ ਅਭਿਣ੍ਹਪ੍ਪਟਿਪੀਲ਼ਨਤੋ ਨਿਰਨ੍ਤਰਦੁਕ੍ਖਤਾਯ ਦੁਕ੍ਖਸ੍ਸੇਵ ਚ ਅਧਿਟ੍ਠਾਨਭੂਤਾ. ਪਚ੍ਚਯਯਾਪਨੀਯਤਾਯ ਰੋਗਮੂਲਤਾਯ ਚ ਰੋਗਤੋ. ਦੁਕ੍ਖਤਾਸੂਲਯੋਗਤੋ ਕਿਲੇਸਾਸੁਚਿਪਗ੍ਘਰਣਤੋ ਉਪ੍ਪਾਦਜਰਾਭਙ੍ਗੇਹਿ ਉਦ੍ਧੁਮਾਤਪਰਿਪਕ੍ਕਪਭਿਨ੍ਨਤੋ ਚ ਗਣ੍ਡਤੋ. ਪੀਲ਼ਾਜਨਨਤੋ, ਅਨ੍ਤੋਤੁਦਨਤੋ, ਦੁਨ੍ਨੀਹਰਣਤੋ ਚ ਸਲ੍ਲਤੋ. ਅਵਡ੍ਢਿਆਵਹਨਤੋ ਅਘਵਤ੍ਥੁਤੋ ਚ ਅਘਤੋ. ਅਸੇਰਿਭਾਵਜਨਨਤੋ ਆਬਾਧਪਦਟ੍ਠਾਨਤਾਯ ਚ ਆਬਾਧਤੋ. ਅਵਸਵਤ੍ਤਨਤੋ ਅਵਿਧੇਯ੍ਯਤਾਯ ਚ ਪਰਤੋ. ਬ੍ਯਾਧਿਜਰਾਮਰਣੇਹਿ ਪਲੁਜ੍ਜਨੀਯਤਾਯ ਪਲੋਕਤੋ. ਸਾਮਿਨਿਵਾਸਿਕਾਰਕਵੇਦਕਅਧਿਟ੍ਠਾਯਕਵਿਰਹਤੋ ਸੁਞ੍ਞਤੋ. ਅਤ੍ਤਪ੍ਪਟਿਕ੍ਖੇਪਟ੍ਠੇਨ ਅਨਤ੍ਤਤੋ. ਰੂਪਾਦਿਧਮ੍ਮਾ ਹਿ ਨ ਏਤ੍ਥ ਅਤ੍ਤਾ ਅਤ੍ਥੀਤਿ ਅਨਤ੍ਤਾ. ਏਵਂ ਸਯਮ੍ਪਿ ਅਤ੍ਤਾ ਨ ਹੋਨ੍ਤੀਤਿ ਅਨਤ੍ਤਾ. ਤੇਨ ਅਬ੍ਯਾਪਾਰਤੋ ਨਿਰੀਹਤੋ ਤੁਚ੍ਛਤੋ ਅਨਤ੍ਤਾਤਿ ਦੀਪਿਤਂ ਹੋਤਿ. ਲਕ੍ਖਣਤ੍ਤਯਮੇਵ ਸੁਖਾਵਬੋਧਨਤ੍ਥਂ ਏਕਾਦਸਹਿ ਪਦੇਹਿ ਵਿਭਜਿਤ੍ਵਾ ਗਹਿਤਨ੍ਤਿ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿ ਵੁਤ੍ਤਂ. ਪਞ੍ਚਮਛਟ੍ਠਾਨਿ ਉਤ੍ਤਾਨਤ੍ਥਾਨੇਵ.

ਦੁਤਿਯਨਾਨਾਕਰਣਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੭. ਪਠਮਤਥਾਗਤਅਚ੍ਛਰਿਯਸੁਤ੍ਤਵਣ੍ਣਨਾ

੧੨੭. ਸਤ੍ਤਮੇ ਵਤ੍ਤਮਾਨਸਮੀਪੇ ਵਤ੍ਤਮਾਨੇ ਵਿਯ ਵੋਹਰਿਤਬ੍ਬਨ੍ਤਿ ‘‘ਓਕ੍ਕਮਤੀ’’ਤਿ ਆਹ ‘‘ਓਕ੍ਕਨ੍ਤੋ ਹੋਤੀਤਿ ਅਤ੍ਥੋ’’ਤਿ. ਦਸਸਹਸ੍ਸਚਕ੍ਕਵਾਲ਼ਪਤ੍ਥਰਣੋ ਸਮੁਜ੍ਜਲਭਾਵੇਨ ਉਲ਼ਾਰੋ. ਦੇਵਾਨੁਭਾਵਨ੍ਤਿ ਦੇਵਾਨਂ ਪਭਾਨੁਭਾਵਂ. ਦੇਵਾਨਞ੍ਹਿ ਪਭਂ ਸੋ ਓਭਾਸੋ ਅਧਿਭਵਤਿ, ਨ ਦੇਵੇ. ਤੇਨਾਹ ‘‘ਦੇਵਾਨ’’ਨ੍ਤਿਆਦਿ. ਰੁਕ੍ਖਗਚ੍ਛਾਦਿਨਾ ਕੇਨਚਿ ਨ ਹਞ੍ਞਤੀਤਿ ਅਘਾ, ਅਸਮ੍ਬਾਧਾ. ਤੇਨਾਹ ‘‘ਨਿਚ੍ਚਵਿਵਰਾ’’ਤਿ. ਅਸਂਵੁਤਾਤਿ ਹੇਟ੍ਠਾ ਉਪਰਿ ਕੇਨਚਿ ਅਪਿਹਿਤਾ. ਤੇਨਾਹ ‘‘ਹੇਟ੍ਠਾਪਿ ਅਪ੍ਪਤਿਟ੍ਠਾ’’ਤਿ. ਤਤ੍ਥ ਪਿ-ਸਦ੍ਦੇਨ ਯਥਾ ਹੇਟ੍ਠਾ ਉਦਕਸ੍ਸ ਪਿਧਾਯਿਕਾ ਸਨ੍ਧਾਰਿਕਾ ਪਥਵੀ ਨਤ੍ਥਿ ਅਸਂਵੁਤਾ ਲੋਕਨ੍ਤਰਿਕਾ, ਏਵਂ ਉਪਰਿਪਿ ਚਕ੍ਕਵਾਲ਼ੇਸੁ ਦੇਵਵਿਮਾਨਾਨਂ ਅਭਾਵਤੋ ਅਸਂਵੁਤਾ ਅਪ੍ਪਤਿਟ੍ਠਾਤਿ ਦਸ੍ਸੇਤਿ. ਅਨ੍ਧਕਾਰੋ ਏਤ੍ਥ ਅਤ੍ਥੀਤਿ ਅਨ੍ਧਕਾਰਾ. ਚਕ੍ਖੁਵਿਞ੍ਞਾਣਂ ਨ ਜਾਯਤਿ ਆਲੋਕਸ੍ਸ ਅਭਾਵਤੋ, ਨ ਚਕ੍ਖੁਨੋ. ਤਥਾ ਹਿ ‘‘ਤੇਨੋਭਾਸੇਨ ਅਞ੍ਞਮਞ੍ਞਂ ਸਞ੍ਜਾਨਨ੍ਤੀ’’ਤਿ ਵੁਤ੍ਤਂ. ਜਮ੍ਬੁਦੀਪੇ ਠਿਤਮਜ੍ਝਨ੍ਹਿਕਵੇਲਾਯ ਪੁਬ੍ਬਵਿਦੇਹਵਾਸੀਨਂ ਅਤ੍ਥਙ੍ਗਮਵਸੇਨ ਉਪਡ੍ਢਂ ਸੂਰਿਯਮਣ੍ਡਲਂ ਪਞ੍ਞਾਯਤਿ, ਅਪਰਗੋਯਾਨਵਾਸੀਨਂ ਉਗ੍ਗਮਨਵਸੇਨ. ਏਵਂ ਸੇਸਦੀਪੇਸੁਪੀਤਿ ਆਹ ‘‘ਏਕਪ੍ਪਹਾਰੇਨੇਵ ਤੀਸੁ ਦੀਪੇਸੁ ਪਞ੍ਞਾਯਨ੍ਤੀ’’ਤਿ. ਇਤੋ ਅਞ੍ਞਥਾ ਦ੍ਵੀਸੁ ਏਵ ਦੀਪੇਸੁ ਪਞ੍ਞਾਯਨ੍ਤਿ. ਏਕੇਕਾਯ ਦਿਸਾਯ ਨਵਨਵਯੋਜਨਸਤਸਹਸ੍ਸਾਨਿ ਅਨ੍ਧਕਾਰਵਿਧਮਨਮ੍ਪਿ ਇਮਿਨਾਵ ਨਯੇਨ ਦਟ੍ਠਬ੍ਬਂ. ਪਭਾਯ ਨਪ੍ਪਹੋਨ੍ਤੀਤਿ ਅਤ੍ਤਨੋ ਪਭਾਯ ਓਭਾਸਿਤੁਂ ਨਾਭਿਸਮ੍ਭੁਣਨ੍ਤਿ. ਯੁਗਨ੍ਧਰਪਬ੍ਬਤਮਤ੍ਥਕਸਮਪ੍ਪਮਾਣੇ ਆਕਾਸੇ ਵਿਚਰਣਤੋ ‘‘ਚਕ੍ਕਵਾਲ਼ਪਬ੍ਬਤਸ੍ਸ ਵੇਮਜ੍ਝੇਨ ਚਰਨ੍ਤੀ’’ਤਿ ਵੁਤ੍ਤਂ.

ਬ੍ਯਾਵਟਾਤਿ ਖਾਦਨਤ੍ਥਂ ਗਣ੍ਹਿਤੁਂ ਉਪਕ੍ਕਮਨ੍ਤਾ. ਵਿਪਰਿਵਤ੍ਤਿਤ੍ਵਾਤਿ ਵਿਵਟ੍ਟਿਤ੍ਵਾ. ਛਿਜ੍ਜਿਤ੍ਵਾਤਿ ਮੁਚ੍ਛਾਪਵਤ੍ਤਿਯਾ ਠਿਤਟ੍ਠਾਨਤੋ ਮੁਚ੍ਚਿਤ੍ਵਾ, ਅਙ੍ਗਪਚ੍ਚਙ੍ਗਛੇਦਨਵਸੇਨ ਵਾ ਛਿਜ੍ਜਿਤ੍ਵਾ. ਅਚ੍ਚਨ੍ਤਖਾਰੇਤਿ ਆਤਪਸਨ੍ਤਪਾਭਾਵੇਨ ਅਤਿਸੀਤਭਾਵਂ ਸਨ੍ਧਾਯ ਅਚ੍ਚਨ੍ਤਖਾਰਤਾ ਵੁਤ੍ਤਾ ਸਿਯਾ. ਨ ਹਿ ਤਂ ਕਪ੍ਪਸਣ੍ਠਾਨਉਦਕਂ ਸਮ੍ਪਤ੍ਤਿਕਰਮਹਾਮੇਘਵੁਟ੍ਠਂ ਪਥਵਿਸਨ੍ਧਾਰਕਂ ਕਪ੍ਪਵਿਨਾਸਕਉਦਕਂ ਵਿਯ ਖਾਰਂ ਭਵਿਤੁਮਰਹਤਿ, ਤਥਾ ਸਤਿ ਪਥਵੀਪਿ ਵਿਲੀਯੇਯ੍ਯ, ਤੇਸਂ ਵਾ ਪਾਪਕਮ੍ਮਫਲੇਨ ਪੇਤਾਨਂ ਪਕਤਿਉਦਕਸ੍ਸ ਪੁਬ੍ਬਖੇਲ਼ਭਾਵਾਪਤ੍ਤਿ ਵਿਯ ਤਸ੍ਸ ਉਦਕਸ੍ਸ ਖਾਰਭਾਵਾਪਤ੍ਤਿ ਹੋਤੀਤਿ ਵੁਤ੍ਤਂ ‘‘ਅਚ੍ਚਨ੍ਤਖਾਰੇ ਉਦਕੇ’’ਤਿ.

ਪਠਮਤਥਾਗਤਅਚ੍ਛਰਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਦੁਤਿਯਤਥਾਗਤਅਚ੍ਛਰਿਯਸੁਤ੍ਤਵਣ੍ਣਨਾ

੧੨੮. ਅਟ੍ਠਮੇ ਆਲੀਯਨ੍ਤਿ ਆਰਮਿਤਬ੍ਬਟ੍ਠੇਨ ਸੇਵੀਯਨ੍ਤੀਤਿ ਆਲਯਾ, ਪਞ੍ਚ ਕਾਮਗੁਣਾ. ਆਰਮਨ੍ਤੀਤਿ ਰਤਿਂ ਵਿਨ੍ਦਨ੍ਤਿ ਕੀਲ਼ਨ੍ਤਿ ਲਲ਼ਨ੍ਤਿ. ਆਲੀਯਨ੍ਤਿ ਵਾ ਅਲ੍ਲੀਯਨ੍ਤਾ ਅਭਿਰਮਣਵਸੇਨ ਸੇਵਨ੍ਤੀਤਿ ਆਲਯਾ, ਤਣ੍ਹਾਵਿਚਰਿਤਾਨਿ. ਤੇਹਿ ਆਲਯੇਹਿ ਰਮਨ੍ਤੀਤਿ ਆਲਯਾਰਾਮਾ. ਯਥੇਵ ਹਿ ਸੁਸਜ੍ਜਿਤਂ ਪੁਪ੍ਫਫਲਭਰਿਤਰੁਕ੍ਖਾਦਿਸਮ੍ਪਨ੍ਨਉਯ੍ਯਾਨਂ ਪਵਿਟ੍ਠੋ ਰਾਜਾ ਤਾਯ ਸਮ੍ਪਤ੍ਤਿਯਾ ਰਮਤਿ, ਸਮ੍ਮੁਦਿਤੋ ਆਮੋਦਿਤਪ੍ਪਮੋਦਿਤੋ ਹੋਤਿ, ਨ ਉਕ੍ਕਣ੍ਠੇਤਿ, ਸਾਯਮ੍ਪਿ ਨਿਕ੍ਖਮਿਤੁਂ ਨ ਇਚ੍ਛਤਿ, ਏਵਮਿਮੇਹਿ ਕਾਮਾਲਯਤਣ੍ਹਾਲਯੇਹਿ ਸਤ੍ਤਾ ਰਮਨ੍ਤਿ, ਸਂਸਾਰਵਟ੍ਟੇ ਪਮੁਦਿਤਾ ਅਨੁਕ੍ਕਣ੍ਠਿਤਾ ਵਸਨ੍ਤਿ. ਤੇਨ ਤੇਸਂ ਭਗਵਾ ਦੁਵਿਧਮ੍ਪਿ ਆਲਯਂ ਉਯ੍ਯਾਨਭੂਮਿਂ ਵਿਯ ਦਸ੍ਸੇਨ੍ਤੋ ‘‘ਆਲਯਾਰਾਮਾ’’ਤਿਆਦਿਮਾਹ. ਸੇਸਮੇਤ੍ਥ ਉਤ੍ਤਾਨਮੇਵ.

ਦੁਤਿਯਤਥਾਗਤਅਚ੍ਛਰਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯-੧੦. ਆਨਨ੍ਦਅਚ੍ਛਰਿਯਸੁਤ੍ਤਾਦਿਵਣ੍ਣਨਾ

੧੨੯-੧੩੦. ਨਵਮੇ ਪਟਿਸਨ੍ਥਾਰਧਮ੍ਮਨ੍ਤਿ ਪਕਤਿਚਾਰਿਤ੍ਤਵਸੇਨ ਵੁਤ੍ਤਂ, ਉਪਗਤਾਨਂ ਪਨ ਭਿਕ੍ਖੂਨਂ ਭਿਕ੍ਖੁਨੀਨਞ੍ਚ ਪੁਚ੍ਛਾਵਿਸ੍ਸਜ੍ਜਨਵਸੇਨ ਚੇਵ ਚਿਤ੍ਤਰੁਚਿਵਸੇਨ ਚ ਯਥਾਕਾਲਂ ਧਮ੍ਮਂ ਦੇਸੇਤਿਯੇਵ, ਉਪਾਸਕਉਪਾਸਿਕਾਨਂ ਪਨ ਉਪਨਿਸਿਨ੍ਨਕਕਥਾਵਸੇਨ. ਦਸਮਂ ਉਤ੍ਤਾਨਮੇਵ.

ਆਨਨ੍ਦਅਚ੍ਛਰਿਯਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਭਯਵਗ੍ਗਵਣ੍ਣਨਾ ਨਿਟ੍ਠਿਤਾ.