(੧੪) ੪. ਪੁਗ੍ਗਲਵਗ੍ਗੋ

੧. ਸਂਯੋਜਨਸੁਤ੍ਤਵਣ੍ਣਨਾ

੧੩੧. ਚਤੁਤ੍ਥਸ੍ਸ ਪਠਮੇ ਉਪਪਤ੍ਤਿਪ੍ਪਟਿਲਾਭਂ ਸਂਵਤ੍ਤਨਿਕਾਨੀਤਿ ਉਪਪਤ੍ਤਿਪਟਿਲਾਭਿਯਾਨਿ. ਭਵਪਟਿਲਾਭਿਯਾਨੀਤਿ ਏਤ੍ਥਾਪਿ ਏਸੇਵ ਨਯੋ. ਯੇਹੀਤਿ ਯੇਹਿ ਸਂਯੋਜਨੇਹਿ ਹੇਤੁਭੂਤੇਹਿ, ਕਰਣਭੂਤੇਹਿ ਵਾ. ਨਨੁ ਚ ਸੋਤਾਪਨ੍ਨਸ੍ਸਪਿ ਓਰਮ੍ਭਾਗਿਯਾਨਿ ਸਂਯੋਜਨਾਨਿ ਅਪ੍ਪਹੀਨਾਨਿ, ਕਸ੍ਮਾ ਪਨ ਸਕਦਾਗਾਮੀਯੇਵ ਇਧ ਗਹਿਤੋਤਿ ਆਹ ‘‘ਸਕਦਾਗਾਮਿਸ੍ਸਾਤਿ ਇਦਂ ਅਪ੍ਪਹੀਨਸਂਯੋਜਨੇਸੁ ਅਰਿਯੇਸੁ ਉਤ੍ਤਮਕੋਟਿਯਾ ਗਹਿਤ’’ਨ੍ਤਿ. ਤਤ੍ਥ ਅਪ੍ਪਹੀਨਸਂਯੋਜਨੇਸੂਤਿ ਅਪ੍ਪਹੀਨਓਰਮ੍ਭਾਗਿਯਸਂਯੋਜਨੇਸੁ. ਉਤ੍ਤਮਕੋਟਿਯਾ ਗਹਿਤਨ੍ਤਿ ਉਕ੍ਕਟ੍ਠਪਰਿਚ੍ਛੇਦੇਨ ਗਹਿਤਂ. ਸਕਦਾਗਾਮਿਤੋ ਪਰਞ੍ਹਿ ਅਪ੍ਪਹੀਨਓਰਮ੍ਭਾਗਿਯਸਂਯੋਜਨੋ ਅਰਿਯੋ ਨਾਮ ਨਤ੍ਥਿ. ਨਨੁ ਚ ਸਕਦਾਗਾਮਿਸ੍ਸ ਪਹੀਨਾਨਿਪਿ ਓਰਮ੍ਭਾਗਿਯਾਨਿ ਸਂਯੋਜਨਾਨਿ ਅਤ੍ਥਿ ਦਿਟ੍ਠਿਵਿਚਿਕਿਚ੍ਛਾਸੀਲਬ੍ਬਤਪਰਾਮਾਸਸਂਯੋਜਨਾਨਂ ਪਹੀਨਤ੍ਤਾ, ਤਸ੍ਮਾ ‘‘ਓਰਮ੍ਭਾਗਿਯਾਨਿ ਸਂਯੋਜਨਾਨਿ ਅਪ੍ਪਹੀਨਾਨੀ’’ਤਿ ਕਸ੍ਮਾ ਵੁਤ੍ਤਨ੍ਤਿ ਆਹ ‘‘ਓਰਮ੍ਭਾਗਿਯੇਸੁ ਚ ਅਪ੍ਪਹੀਨਂ ਉਪਾਦਾਯਾ’’ਤਿਆਦਿ. ਯਸ੍ਮਾ ਕਾਮਰਾਗਬ੍ਯਾਪਾਦਸਂਯੋਜਨਾਨਿ ਸਕਦਾਗਾਮਿਸ੍ਸ ਅਪ੍ਪਹੀਨਾਨਿ, ਤਸ੍ਮਾ ਤਾਨਿ ਅਪ੍ਪਹੀਨਾਨਿ ਉਪਾਦਾਯ ‘‘ਓਰਮ੍ਭਾਗਿਯਾਨਿ ਸਂਯੋਜਨਾਨਿ ਅਪ੍ਪਹੀਨਾਨੀ’’ਤਿ ਵੁਤ੍ਤਂ, ਨ ਸਬ੍ਬੇਸਂ ਅਪ੍ਪਹੀਨਤ੍ਤਾਤਿ ਅਧਿਪ੍ਪਾਯੋ.

ਸਂਯੋਜਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਪਟਿਭਾਨਸੁਤ੍ਤਵਣ੍ਣਨਾ

੧੩੨. ਦੁਤਿਯੇ ਪਟਿਭਾਨਂ ਵੁਚ੍ਚਤਿ ਞਾਣਮ੍ਪਿ ਞਾਣਸ੍ਸ ਉਪਟ੍ਠਿਤਵਚਨਮ੍ਪਿ, ਤਂ ਇਧ ਅਧਿਪ੍ਪੇਤਂ, ਅਤ੍ਥਯੁਤ੍ਤਂ ਕਾਰਣਯੁਤ੍ਤਞ੍ਚ ਪਟਿਭਾਨਮਸ੍ਸਾਤਿ ਯੁਤ੍ਤਪ੍ਪਟਿਭਾਨੋ. ਪੁਚ੍ਛਾਨਨ੍ਤਰਮੇਵ ਸੀਘਂ ਬ੍ਯਾਕਾਤੁਂ ਅਸਮਤ੍ਥਤਾਯ ਨੋਮੁਤ੍ਤਪ੍ਪਟਿਭਾਨਮਸ੍ਸਾਤਿ ਨੋਮੁਤ੍ਤਪ੍ਪਟਿਭਾਨੋ. ਇਮਿਨਾ ਨਯੇਨ ਸੇਸਾ ਵੇਦਿਤਬ੍ਬਾ. ਏਤ੍ਥ ਪਨ ਪਠਮੋ ਕਞ੍ਚਿ ਕਾਲਂ ਵੀਮਂਸਿਤ੍ਵਾ ਯੁਤ੍ਤਮੇਵ ਪੇਕ੍ਖਤਿ ਤਿਪਿਟਕਚੂਲ਼ਨਾਗਤ੍ਥੇਰੋ ਵਿਯ. ਸੋ ਪਨ ਪਞ੍ਹਂ ਪੁਟ੍ਠੋ ਪਰਿਗ੍ਗਹੇਤ੍ਵਾ ਯੁਤ੍ਤਪ੍ਪਤ੍ਤਕਾਰਣਮੇਵ ਕਥੇਤਿ. ਦੁਤਿਯੋ ਪੁਚ੍ਛਾਨਨ੍ਤਰਮੇਵ ਯੇਨ ਵਾ ਤੇਨ ਵਾ ਵਚਨੇਨ ਪਟਿਬਾਹਤਿ, ਵੀਮਂਸਿਤ੍ਵਾਪਿ ਚ ਯੁਤ੍ਤਂ ਨ ਪਕ੍ਖੇਤਿ ਚਤੁਨਿਕਾਯਿਕਪਿਣ੍ਡਤਿਸ੍ਸਤ੍ਥੇਰੋ ਵਿਯ. ਸੋ ਪਨ ਪਞ੍ਹਂ ਪੁਟ੍ਠੋ ਪਞ੍ਹਪਰਿਯੋਸਾਨਮ੍ਪਿ ਨਾਗਮੇਤਿ, ਯਂ ਵਾ ਤਂ ਵਾ ਕਥੇਤਿਯੇਵ, ਵਚਨਤ੍ਥਂ ਪਨਸ੍ਸ ਵੀਮਂਸਿਯਮਾਨਂ ਕਤ੍ਥਚਿ ਨ ਲਗਤਿ. ਤਤਿਯੋ ਪੁਚ੍ਛਾਸਮਕਾਲਮੇਵ ਯੁਤ੍ਤਂ ਪੇਕ੍ਖਤਿ, ਤਂਖਣਂਯੇਵ ਚ ਨਂ ਬ੍ਯਾਕਰੋਤਿ ਤਿਪਿਟਕਚੂਲ਼ਾਭਯਤ੍ਥੇਰੋ ਵਿਯ. ਸੋ ਪਨ ਪਞ੍ਹਂ ਪੁਟ੍ਠੋ ਸੀਘਮੇਵ ਕਥੇਤਿ, ਯੁਤ੍ਤਪ੍ਪਤ੍ਤਕਾਰਣੋ ਚ ਹੋਤਿ. ਚਤੁਤ੍ਥੋ ਪੁਟ੍ਠੋ ਸਮਾਨੋ ਨੇਵ ਯੁਤ੍ਤਂ ਪੇਕ੍ਖਤਿ, ਨ ਯੇਨ ਵਾ ਤੇਨ ਵਾ ਪਟਿਬਾਹਿਤੁਂ ਸਕ੍ਕੋਤਿ, ਤਿਬ੍ਬਨ੍ਧਕਾਰਨਿਮੁਗ੍ਗੋ ਵਿਯ ਹੋਤਿ ਲਾਲ਼ੁਦਾਯਿਤ੍ਥੇਰੋ ਵਿਯ.

ਪਟਿਭਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩-੪. ਉਗ੍ਘਟਿਤਞ੍ਞੂਸੁਤ੍ਤਾਦਿਵਣ੍ਣਨਾ

੧੩੩-੪. ਤਤਿਯੇ ਉਗ੍ਘਟਿਤਞ੍ਞੂਤਿ ਏਤ੍ਥ ਉਗ੍ਘਟਨਂ ਨਾਮ ਞਾਣੁਗ੍ਘਟਨਂ, ਞਾਣੇਨ ਉਗ੍ਘਟਿਤਮਤ੍ਤੇਯੇਵ ਜਾਨਾਤੀਤਿ ਅਤ੍ਥੋ. ਸਹ ਉਦਾਹਟਵੇਲਾਯਾਤਿ ਉਦਾਹਾਰੇ ਉਦਾਹਟਮਤ੍ਤੇਯੇਵ. ਧਮ੍ਮਾਭਿਸਮਯੋ ਹੋਤੀਤਿ ਚਤੁਸਚ੍ਚਧਮ੍ਮਸ੍ਸ ਞਾਣੇਨ ਸਦ੍ਧਿਂ ਅਭਿਸਮਯੋ. ਅਯਂ ਵੁਚ੍ਚਤੀਤਿ ਅਯਂ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿਆਦਿਨਾ (ਵਿਭ. ੩੫੫) ਨਯੇਨ ਸਂਖਿਤ੍ਤੇਨ ਮਾਤਿਕਾਯ ਠਪਿਯਮਾਨਾਯ ਦੇਸਨਾਨੁਸਾਰੇਨ ਞਾਣਂ ਪੇਸੇਤ੍ਵਾ ਅਰਹਤ੍ਤਂ ਗਣ੍ਹਿਤੁਂ ਸਮਤ੍ਥੋ ਪੁਗ੍ਗਲੋ ‘‘ਉਗ੍ਘਟਿਤਞ੍ਞੂ’’ਤਿ ਵੁਚ੍ਚਤਿ. ਵਿਪਞ੍ਚਿਤਂ ਵਿਤ੍ਥਾਰਿਤਮੇਵ ਅਤ੍ਥਂ ਜਾਨਾਤੀਤਿ ਵਿਪਞ੍ਚਿਤਞ੍ਞੂ. ਅਯਂ ਵੁਚ੍ਚਤੀਤਿ ਅਯਂ ਸਂਖਿਤ੍ਤੇਨ ਮਾਤਿਕਂ ਠਪੇਤ੍ਵਾ ਵਿਤ੍ਥਾਰੇਨ ਅਤ੍ਥੇ ਭਾਜਿਯਮਾਨੇ ਅਰਹਤ੍ਤਂ ਪਾਪੁਣਿਤੁਂ ਸਮਤ੍ਥੋ ਪੁਗ੍ਗਲੋ ‘‘ਵਿਪਞ੍ਚਿਤਞ੍ਞੂ’’ਤਿ ਵੁਚ੍ਚਤਿ. ਉਦ੍ਦੇਸਾਦੀਹਿ ਨੇਤਬ੍ਬੋਤਿ ਨੇਯ੍ਯੋ. ਅਨੁਪੁਬ੍ਬੇਨ ਧਮ੍ਮਾਭਿਸਮਯੋਤਿ ਅਨੁਕ੍ਕਮੇਨ ਅਰਹਤ੍ਤਪ੍ਪਤ੍ਤਿ. ਬ੍ਯਞ੍ਜਨਪਦਮੇਵ ਪਰਮਂ ਅਸ੍ਸਾਤਿ ਪਦਪਰਮੋ. ਨ ਤਾਯ ਜਾਤਿਯਾ ਧਮ੍ਮਾਭਿਸਮਯੋ ਹੋਤੀਤਿ ਤੇਨ ਅਤ੍ਤਭਾਵੇਨ ਝਾਨਂ ਵਾ ਵਿਪਸ੍ਸਨਂ ਵਾ ਮਗ੍ਗਂ ਵਾ ਫਲਂ ਵਾ ਨਿਬ੍ਬਤ੍ਤੇਤੁਂ ਨ ਸਕ੍ਕੋਤੀਤਿ ਅਤ੍ਥੋ. ਚਤੁਤ੍ਥਂ ਉਤ੍ਤਾਨਮੇਵ.

ਉਗ੍ਘਟਿਤਞ੍ਞੂਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੫-੮. ਸਾਵਜ੍ਜਸੁਤ੍ਤਾਦਿਵਣ੍ਣਨਾ

੧੩੫-੮. ਪਞ੍ਚਮੇ ਸਾਵਜ੍ਜੋਤਿ ਸਦੋਸੋ. ਸਾਵਜ੍ਜੇਨ ਕਾਯਕਮ੍ਮੇਨਾਤਿ ਸਦੋਸੇਨ ਪਾਣਾਤਿਪਾਤਾਦਿਨਾ ਕਾਯਕਮ੍ਮੇਨ. ਇਤਰੇਸੁਪਿ ਏਸੇਵ ਨਯੋ. ਅਯਂ ਵੁਚ੍ਚਤੀਤਿ ਅਯਂ ਪੁਗ੍ਗਲੋ ਤੀਹਿ ਦ੍ਵਾਰੇਹਿ ਆਯੂਹਨਕਮ੍ਮਸ੍ਸ ਸਦੋਸਤ੍ਤਾ ਗੂਥਕੁਣਪਾਦਿਭਰਿਤੋ ਪਦੇਸੋ ਵਿਯ ‘‘ਸਾਵਜ੍ਜੋ’’ਤਿ ਵੁਚ੍ਚਤਿ. ਸਾਵਜ੍ਜੇਨ ਬਹੁਲਨ੍ਤਿ ਯਸ੍ਸ ਸਾਵਜ੍ਜਮੇਵ ਕਾਯਕਮ੍ਮਂ ਬਹੁਲਂ ਹੋਤਿ, ਅਪ੍ਪਂ ਅਨਵਜ੍ਜਂ. ਸੋ ‘‘ਸਾਵਜ੍ਜੇਨ ਬਹੁਲਂ ਕਾਯਕਮ੍ਮੇਨ ਸਮਨ੍ਨਾਗਤੋ ਅਪ੍ਪਂ ਅਨਵਜ੍ਜੇਨਾ’’ਤਿ ਵੁਚ੍ਚਤਿ. ਇਤਰੇਸੁਪਿ ਏਸੇਵ ਨਯੋ. ਕੋ ਪਨ ਏਵਰੂਪੋ ਹੋਤੀਤਿ? ਯੋ ਗਾਮਧਮ੍ਮਤਾਯ ਵਾ ਨਿਗਮਧਮ੍ਮਤਾਯ ਵਾ ਕਦਾਚਿ ਕਰਹਚਿ ਉਪੋਸਥਂ ਸਮਾਦਿਯਤਿ, ਸੀਲਾਨਿ ਪੂਰੇਤਿ. ਅਯਂ ਵੁਚ੍ਚਤੀਤਿ ਅਯਂ ਪੁਗ੍ਗਲੋ ਤੀਹਿ ਦ੍ਵਾਰੇਹਿ ਆਯੂਹਨਕਮ੍ਮੇਸੁ ਸਾਵਜ੍ਜਸ੍ਸੇਵ ਬਹੁਲਤਾਯ ਅਨਵਜ੍ਜਸ੍ਸ ਅਪ੍ਪਤਾਯ ‘‘ਵਜ੍ਜਬਹੁਲੋ’’ਤਿ ਵੁਚ੍ਚਤਿ. ਯਥਾ ਹਿ ਏਕਸ੍ਮਿਂ ਪਦੇਸੇ ਦੁਬ੍ਬਣ੍ਣਾਨਿ ਦੁਗ੍ਗਨ੍ਧਾਨਿ ਪੁਪ੍ਫਾਨਿ ਰਾਸਿਕਤਾਨਸ੍ਸੁ, ਤੇਸਂ ਉਪਰਿ ਤਹਂ ਤਹਂ ਅਧਿਮੁਤ੍ਤਕਵਸ੍ਸਿਕਪਾਟਲਾਨਿ ਪਤਿਤਾਨਿ ਭਵੇਯ੍ਯੁਂ, ਏਵਰੂਪੋ ਅਯਂ ਪੁਗ੍ਗਲੋ ਵੇਦਿਤਬ੍ਬੋ. ਯਥਾ ਪਨ ਏਕਸ੍ਮਿਂ ਪਦੇਸੇ ਅਧਿਮੁਤ੍ਤਕਵਸ੍ਸਿਕਪਾਟਲਾਨਿ ਰਾਸਿਕਤਾਨਸ੍ਸੁ, ਤੇਸਂ ਉਪਰਿ ਤਹਂ ਤਹਂ ਦੁਗ੍ਗਨ੍ਧਾਨਿ ਬਦਰਪੁਪ੍ਫਾਦੀਨਿ ਪਤਿਤਾਨਿ ਭਵੇਯ੍ਯੁਂ. ਏਵਰੂਪੋ ਤਤਿਯੋ ਪੁਗ੍ਗਲੋ ਵੇਦਿਤਬ੍ਬੋ. ਚਤੁਤ੍ਥੋ ਪਨ ਤੀਹਿ ਦ੍ਵਾਰੇਹਿ ਆਯੂਹਨਕਮ੍ਮਸ੍ਸ ਨਿਦ੍ਦੋਸਤ੍ਤਾ ਚ ਚਤੁਮਧੁਰਭਰਿਤਸੁਵਣ੍ਣਵਾਤਿ ਵਿਯ ਦਟ੍ਠਬ੍ਬੋ. ਛਟ੍ਠਾਦੀਨਿ ਉਤ੍ਤਾਨਤ੍ਥਾਨੇਵ.

ਸਾਵਜ੍ਜਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੯-੧੦. ਧਮ੍ਮਕਥਿਕਸੁਤ੍ਤਾਦਿਵਣ੍ਣਨਾ

੧੩੯-੧੪੦. ਨਵਮੇ ਅਪ੍ਪਞ੍ਚ ਭਾਸਤੀਤਿ ਸਮ੍ਪਤ੍ਤਪਰਿਸਾਯ ਥੋਕਮੇਵ ਕਥੇਤਿ. ਅਸਹਿਤਞ੍ਚਾਤਿ ਕਥੇਨ੍ਤੋ ਚ ਪਨ ਨ ਅਤ੍ਥਯੁਤ੍ਤਂ ਕਾਲਯੁਤ੍ਤਂ ਕਥੇਤਿ. ਪਰਿਸਾ ਚਸ੍ਸ ਨ ਕੁਸਲਾ ਹੋਤੀਤਿ ਸੋਤੁਂ ਨਿਸਿਨ੍ਨਪਰਿਸਾ ਚਸ੍ਸ ਯੁਤ੍ਤਾਯੁਤ੍ਤਂ ਕਾਰਣਾਕਾਰਣਂ ਸਿਲਿਟ੍ਠਾਸਿਲਿਟ੍ਠਂ ਨ ਜਾਨਾਤੀਤਿ ਅਤ੍ਥੋ. ਏਵਰੂਪੋਤਿ ਅਯਂ ਏਵਂਜਾਤਿਕੋ ਬਾਲਧਮ੍ਮਕਥਿਕੋ ਏਵਂਜਾਤਿਕਾਯ ਬਾਲਪਰਿਸਾਯ ਧਮ੍ਮਕਥਿਕੋਤ੍ਵੇਵ ਨਾਮਂ ਲਭਤਿ. ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਏਤ੍ਥ ਚ ਦ੍ਵੇਯੇਵ ਜਨਾ ਸਭਾਵਧਮ੍ਮਕਥਿਕਾ, ਨ ਇਤਰੇ. ਇਤਰੇ ਪਨ ਧਮ੍ਮਕਥਿਕਾਨਂ ਅਨ੍ਤੋ ਪਵਿਟ੍ਠਤ੍ਤਾ ਏਵਂ ਵੁਤ੍ਤਾ. ਦਸਮਂ ਉਤ੍ਤਾਨਮੇਵ.

ਧਮ੍ਮਕਥਿਕਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਪੁਗ੍ਗਲਵਗ੍ਗਵਣ੍ਣਨਾ ਨਿਟ੍ਠਿਤਾ.