(੮) ੩. ਆਨਨ੍ਦਵਗ੍ਗੋ

੧. ਛਨ੍ਨਸੁਤ੍ਤਵਣ੍ਣਨਾ

੭੨. ਤਤਿਯਸ੍ਸ ਪਠਮੇ ਛਨ੍ਨਪਰਿਬ੍ਬਾਜਕੋਤਿ ਨ ਨਗ੍ਗਪਰਿਬ੍ਬਾਜਕੋ. ਬਾਹਿਰਕਸਮਯਂ ਲੁਞ੍ਚਿਤ੍ਵਾ ਹਰਨ੍ਤੋਤਿ ਬਾਹਿਰਕਾਨਂ ਸਮਯਂ ਨਿਸੇਧੇਤ੍ਵਾ ਆਪਨ੍ਨੋ.

ਪਞ੍ਞਾਚਕ੍ਖੁਸ੍ਸ ਵਿਬਨ੍ਧਨਤੋ ਅਨ੍ਧਂ ਕਰੋਤੀਤਿ ਅਨ੍ਧਕਰਣੋਤਿ ਆਹ ‘‘ਯਸ੍ਸ ਰਾਗੋ ਉਪ੍ਪਜ੍ਜਤੀ’’ਤਿਆਦਿ. ਅਚਕ੍ਖੁਕਰਣੋਤਿ ਅਸਮਤ੍ਥਸਮਾਸੋਯਂ ‘‘ਅਸੂਰਿਯਪਸ੍ਸਾਨਿ ਮੁਖਾਨੀ’’ਤਿਆਦੀਸੁ ਵਿਯਾਤਿ ਆਹ ‘‘ਪਞ੍ਞਾਚਕ੍ਖੁਂ ਨ ਕਰੋਤੀਤਿ ਅਚਕ੍ਖੁਕਰਣੋ’’ਤਿ. ਪਞ੍ਞਾਨਿਰੋਧਿਕੋਤਿ ਅਨੁਪ੍ਪਨ੍ਨਾਯ ਲੋਕਿਯਲੋਕੁਤ੍ਤਰਾਯ ਪਞ੍ਞਾਯ ਉਪ੍ਪਜ੍ਜਿਤੁਂ ਨ ਦੇਤਿ, ਲੋਕਿਯਪਞ੍ਞਂ ਪਨ ਅਟ੍ਠਸਮਾਪਤ੍ਤਿਪਞ੍ਚਾਭਿਞ੍ਞਾਵਸੇਨ ਉਪ੍ਪਨ੍ਨਮ੍ਪਿ ਸਮੁਚ੍ਛਿਨ੍ਦਿਤ੍ਵਾ ਖਿਪਤੀਤਿ ਪਞ੍ਞਾਨਿਰੋਧਿਕੋਤਿ ਏਵਮ੍ਪੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਅਨੁਪ੍ਪਨ੍ਨਾਨੁਪ੍ਪਾਦਉਪ੍ਪਨ੍ਨਪਰਿਹਾਨਿਨਿਮਿਤ੍ਤਤਾਯ ਹਿ ਪਞ੍ਞਂ ਨਿਰੋਧੇਤੀਤਿ ਪਞ੍ਞਾਨਿਰੋਧਿਕੋ. ਵਿਹਨਤਿ ਵਿਬਾਧਤੀਤਿ ਵਿਘਾਤੋ, ਦੁਕ੍ਖਨ੍ਤਿ ਆਹ ‘‘ਦੁਕ੍ਖਸਙ੍ਖਾਤਸ੍ਸ ਵਿਘਾਤਸ੍ਸਾ’’ਤਿ. ਕਿਲੇਸਨਿਬ੍ਬਾਨਨ੍ਤਿ ਇਮਿਨਾ ਅਸਙ੍ਖਤਨਿਬ੍ਬਾਨਮੇਵ ਵਦਤਿ. ਅਸਙ੍ਖਤਞ੍ਹਿ ਨਿਬ੍ਬਾਨਂ ਨਾਮ, ਤਂ ਪਚ੍ਚਕ੍ਖਂ ਕਾਤੁਂ ਨ ਦੇਤੀਤਿ ਅਨਿਬ੍ਬਾਨਸਂਵਤ੍ਤਨਿਕੋ. ਲੋਕੁਤ੍ਤਰਮਿਸ੍ਸਕੋ ਕਥਿਤੋ ਪੁਬ੍ਬਭਾਗਿਯਸ੍ਸਪਿ ਅਰਿਯਮਗ੍ਗਸ੍ਸ ਕਥਿਤਤ੍ਤਾ.

ਛਨ੍ਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਆਜੀਵਕਸੁਤ੍ਤਵਣ੍ਣਨਾ

੭੩. ਦੁਤਿਯੇ ਨ ਅਞ੍ਞਾਤੁਕਾਮੋਤਿ ਨ ਆਜਾਨਿਤੁਕਾਮੋਯੇਵਾਤਿ ਅਤ੍ਥੋ. ਤੇਨਾਹ ‘‘ਪਰਿਗ੍ਗਣ੍ਹਨਤ੍ਥਂ ਪਨ ਆਗਤੋ’’ਤਿ, ਪਞ੍ਞਾਯ ਪਰਿਚ੍ਛਿਨ੍ਦਿਤ੍ਵਾ ਉਪਪਰਿਕ੍ਖਿਤ੍ਵਾ ਗਣ੍ਹਨਤ੍ਥਨ੍ਤਿ ਅਤ੍ਥੋ. ਕਾਰਣਾਪਦੇਸੋਤਿ ਕਾਰਣਨਿਦ੍ਦੇਸੋ. ਸੇਸਮੇਤ੍ਥ ਉਤ੍ਤਾਨਮੇਵ.

ਆਜੀਵਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਮਹਾਨਾਮਸਕ੍ਕਸੁਤ੍ਤਵਣ੍ਣਨਾ

੭੪. ਤਤਿਯੇ ਗਿਲਾਨਸ੍ਸ ਭਾਵੋ ਗੇਲਞ੍ਞਨ੍ਤਿ ਆਹ ‘‘ਗਿਲਾਨਭਾਵਤੋ’’ਤਿ. ਦੀਪੇਤੀਤਿ ਦੇਸਨਾਕ੍ਕਮੇਨੇਵ ਪਞ੍ਞਾਪੇਤਿ. ਪਠਮਞ੍ਹਿ ਸੇਖਸੀਲਸਮਾਧਿਪਞ੍ਞਾਯੋ ਵਤ੍ਵਾ ਪਚ੍ਛਾ ਅਸੇਖਸੀਲਾਦੀਨਿ ਵਦਨ੍ਤੋ ਇਮਮਤ੍ਥਂ ਦੀਪੇਤਿ.

ਮਹਾਨਾਮਸਕ੍ਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਨਿਗਣ੍ਠਸੁਤ੍ਤਵਣ੍ਣਨਾ

੭੫. ਚਤੁਤ੍ਥੇ ਹਂਸਵਟ੍ਟਕਚ੍ਛਨ੍ਨੇਨਾਤਿ ਹਂਸਵਟ੍ਟਕਪਰਿਚ੍ਛਨ੍ਨੇਨ, ਹਂਸਮਣ੍ਡਲਾਕਾਰੇਨਾਤਿ ਅਤ੍ਥੋ. ਨਤ੍ਥਿ ਏਤਸ੍ਸ ਪਰਿਸੇਸਨ੍ਤਿ ਅਪਰਿਸੇਸਂ. ਤੇਨਾਹ ‘‘ਅਪ੍ਪਮਤ੍ਤਕਮ੍ਪਿ ਅਸੇਸੇਤ੍ਵਾ’’ਤਿ. ਅਪਰਿਸੇਸਧਮ੍ਮਜਾਨਨਤੋ ਵਾ ਅਪਰਿਸੇਸਸਙ੍ਖਾਤਂ ਞਾਣਦਸ੍ਸਨਂ ਪਟਿਜਾਨਾਤੀਤਿ ਏਵਮ੍ਪੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਸਤਤਨ੍ਤਿ ਨਿਚ੍ਚਂ. ਸਮਿਤਨ੍ਤਿ ਤਸ੍ਸੇਵ ਵੇਵਚਨਨ੍ਤਿ ਆਹ ‘‘ਸਤਤਂ ਸਮਿਤਨ੍ਤਿ ਸਬ੍ਬਕਾਲਂ ਨਿਰਨ੍ਤਰ’’ਨ੍ਤਿ. ਅਥ ਵਾ ਨਿਚ੍ਚਟ੍ਠੇਨ ਸਤਤ-ਸਦ੍ਦੇਨ ਅਭਿਣ੍ਹਪ੍ਪਵਤ੍ਤਿ ਜੋਤਿਤਾ ਸਿਯਾਤਿ ‘‘ਸਮਿਤ’’ਨ੍ਤਿ ਵੁਤ੍ਤਂ. ਤੇਨ ਨਿਰਨ੍ਤਰਪ੍ਪਵਤ੍ਤਿਂ ਦਸ੍ਸੇਤੀਤਿ ਆਹ ‘‘ਸਬ੍ਬਕਾਲਂ ਨਿਰਨ੍ਤਰ’’ਨ੍ਤਿ.

ਵਿਸੁਦ੍ਧਿਸਮ੍ਪਾਪਨਤ੍ਥਾਯਾਤਿ ਰਾਗਾਦੀਹਿ ਮਲੇਹਿ ਅਭਿਜ੍ਝਾਵਿਸਮਲੋਭਾਦੀਹਿ ਚ ਉਪਕ੍ਕਿਲਿਟ੍ਠਚਿਤ੍ਤਾਨਂ ਸਤ੍ਤਾਨਂ ਵਿਸੁਦ੍ਧਿਪਾਪਨਤ੍ਥਾਯ. ਸਮਤਿਕ੍ਕਮਨਤ੍ਥਾਯਾਤਿ ਸੋਕਸ੍ਸ ਚ ਪਰਿਦੇਵਸ੍ਸ ਚ ਪਹਾਨਤ੍ਥਾਯ. ਅਤ੍ਥਂ ਗਮਨਤ੍ਥਾਯਾਤਿ ਕਾਯਿਕਦੁਕ੍ਖਸ੍ਸ ਚ ਚੇਤਸਿਕਦੋਮਨਸ੍ਸਸ੍ਸ ਚਾਤਿ ਇਮੇਸਂ ਦ੍ਵਿਨ੍ਨਂ ਅਤ੍ਥਙ੍ਗਮਨਾਯ, ਨਿਰੋਧਾਯਾਤਿ ਅਤ੍ਥੋ. ਞਾਯਤਿ ਨਿਚ੍ਛਯੇਨ ਕਮਤਿ ਨਿਬ੍ਬਾਨਂ. ਤਂ ਵਾ ਞਾਯਤਿ ਪਟਿਵਿਜ੍ਝਤਿ ਏਤੇਨਾਤਿ ਞਾਯੋ, ਅਰਿਯਮਗ੍ਗੋਤਿ ਆਹ ‘‘ਮਗ੍ਗਸ੍ਸ ਅਧਿਗਮਨਤ੍ਥਾਯਾ’’ਤਿ. ਅਪਚ੍ਚਯਨਿਬ੍ਬਾਨਸ੍ਸ ਸਚ੍ਛਿਕਰਣਤ੍ਥਾਯਾਤਿ ਪਚ੍ਚਯਰਹਿਤਤ੍ਤਾ ਅਪਚ੍ਚਯਸ੍ਸ ਅਸਙ੍ਖਤਸ੍ਸ ਤਣ੍ਹਾਵਾਨਵਿਰਹਿਤਤ੍ਤਾ ਨਿਬ੍ਬਾਨਨ੍ਤਿ ਲਦ੍ਧਨਾਮਸ੍ਸ ਅਮਤਸ੍ਸ ਸਚ੍ਛਿਕਿਰਿਯਾਯ, ਅਤ੍ਤਪਚ੍ਚਕ੍ਖਤਾਯਾਤਿ ਵੁਤ੍ਤਂ ਹੋਤਿ. ਫੁਸਿਤ੍ਵਾ ਫੁਸਿਤ੍ਵਾਤਿ ਪਤ੍ਵਾ ਪਤ੍ਵਾ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਨਿਗਣ੍ਠਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਨਿਵੇਸਕਸੁਤ੍ਤਵਣ੍ਣਨਾ

੭੬. ਪਞ੍ਚਮੇ ਕਿਚ੍ਚਕਰਣੀਯੇਸੁ ਸਹਭਾਵਟ੍ਠੇਨ ਅਮਾ ਹੋਨ੍ਤੀਤਿ ਅਮਚ੍ਚਾ. ‘‘ਅਯਂ ਅਜ੍ਝਤ੍ਤਿਕੋ’’ਤਿ ਏਵਂ ਜਾਨਨ੍ਤਿ, ਞਾਯਨ੍ਤਿ ਵਾਤਿ ਞਾਤੀ. ਸਸ੍ਸੁਸਸੁਰਪਕ੍ਖਿਕਾਤਿ ਸਸ੍ਸੁਸਸੁਰਾ ਚ ਤਪ੍ਪਕ੍ਖਿਕੋ ਚ ਸਸ੍ਸੁਸਸੁਰਪਕ੍ਖਿਕਾ. ਲੋਹਿਤੇਨ ਸਮ੍ਬਦ੍ਧਾਤਿ ਸਾਲੋਹਿਤਾ. ਪਿਤੁਪਕ੍ਖਿਕਾ ਵਾ ਞਾਤੀ, ਮਾਤੁਪਕ੍ਖਿਕਾ ਸਾਲੋਹਿਤਾ. ਮਾਤੁਪਿਤੁਪਕ੍ਖਿਕਾ ਵਾ ਞਾਤੀ, ਸਸ੍ਸੁਸਸੁਰਪਕ੍ਖਿਕਾ ਸਾਲੋਹਿਤਾ. ਅਵੇਚ੍ਚ ਰਤਨਸ੍ਸ ਗੁਣੇ ਯਾਥਾਵਤੋ ਞਤ੍ਵਾ ਪਸਾਦੋ ਅਵੇਚ੍ਚਪ੍ਪਸਾਦੋ. ਸੋ ਪਨ ਯਸ੍ਮਾ ਮਗ੍ਗੇਨਾਗਤਤ੍ਤਾ ਕੇਨਚਿ ਅਕਮ੍ਪਨੀਯੋ ਚ ਅਪ੍ਪਧਂਸਿਯੋ ਚ ਹੋਤਿ, ਤਸ੍ਮਾ ਏਵਂ ਵੁਤ੍ਤਂ ‘‘ਅਚਲਪ੍ਪਸਾਦੋ’’ਤਿ. ਭਾਵਞ੍ਞਥਤ੍ਤਨ੍ਤਿ ਸਭਾਵਸ੍ਸ ਅਞ੍ਞਥਤ੍ਤਂ.

ਵੀਸਤਿਯਾ ਕੋਟ੍ਠਾਸੇਸੂਤਿ ਕੇਸਾਦਿਮਤ੍ਥਲੁਙ੍ਗਪਰਿਯਨ੍ਤੇਸੁ. ਦ੍ਵਾਦਸਸੁ ਕੋਟ੍ਠਾਸੇਸੂਤਿ ਪਿਤ੍ਤਾਦਿਮੁਤ੍ਤਪਰਿਯਨ੍ਤੇਸੁ. ਚਤੂਸੁ ਕੋਟ੍ਠਾਸੇਸੂਤਿ ‘‘ਯੇਨ ਚ ਸਨ੍ਤਪ੍ਪਤਿ, ਯੇਨ ਚ ਜੀਰੀਯਤਿ, ਯੇਨ ਚ ਪਰਿਦਯ੍ਹਤਿ, ਯੇਨ ਚ ਅਸਿਤਪੀਤਖਾਯਿਤਸਾਯਿਤਂ ਸਮ੍ਮਾ ਪਰਿਣਾਮਂ ਗਚ੍ਛਤੀ’’ਤਿ (ਮ. ਨਿ. ੧.੩੦੪) ਏਵਂ ਵੁਤ੍ਤੇਸੁ ਚਤੂਸੁ ਕੋਟ੍ਠਾਸੇਸੁ. ਛਸੁ ਕੋਟ੍ਠਾਸੇਸੂਤਿ ‘‘ਉਦ੍ਧਙ੍ਗਮਾ ਵਾਤਾ, ਅਧੋਗਮਾ ਵਾਤਾ, ਕੁਚ੍ਛਿਸਯਾ ਵਾਤਾ, ਕੋਟ੍ਠਾਸਯਾ ਵਾਤਾ, ਅਙ੍ਗਮਙ੍ਗਾਨੁਸਾਰਿਨੋ ਵਾਤਾ, ਅਸ੍ਸਾਸੋ ਪਸ੍ਸਾਸੋ’’ਤਿ (ਮ. ਨਿ. ੨.੩੦੫) ਏਵਂ ਵੁਤ੍ਤੇਸੁ ਛਸੁ ਕੋਟ੍ਠਾਸੇਸੁ. ਵਿਤ੍ਥਮ੍ਭਨਂ ਸੇਸਭੂਤਤ੍ਤਯਸਨ੍ਥਮ੍ਭਿਤਤਾਪਾਦਨਂ, ‘‘ਉਪਕੀਲ਼ਨ’’ਨ੍ਤਿ ਏਕੇ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਨਿਵੇਸਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬-੭. ਪਠਮਭਵਸੁਤ੍ਤਾਦਿਵਣ੍ਣਨਾ

੭੭-੭੮. ਛਟ੍ਠੇ ਅਭਿਸਙ੍ਖਾਰਵਿਞ੍ਞਾਣਨ੍ਤਿ ਕਮ੍ਮਸਹਜਾਤਂ ਵਿਞ੍ਞਾਣਂ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ. ਸਤ੍ਤਮੇ ਨਤ੍ਥਿ ਵਤ੍ਤਬ੍ਬਂ.

ਪਠਮਭਵਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੮. ਸੀਲਬ੍ਬਤਸੁਤ੍ਤਵਣ੍ਣਨਾ

੭੯. ਅਟ੍ਠਮੇ ਦੁਕ੍ਕਰਕਾਰਿਕਾਨੁਯੋਗੋਤਿ ਦੁਕ੍ਕਰਕਿਰਿਯਾਯ ਅਨੁਯੋਗੋ. ਉਪਟ੍ਠਾਨੇਨ ਸਾਰਨ੍ਤਿ ਉਪਟ੍ਠਾਨਾਕਾਰੇਨ ਸਾਰਂ. ‘‘ਇਦਂ ਵਰ’’ਨ੍ਤਿਆਦਿਨਾ ਉਪਟ੍ਠਾਨਾਕਾਰਂ ਵਿਭਾਵੇਤਿ. ਏਤ੍ਥਾਤਿ ਏਤਸ੍ਮਿਂ ਸਤ੍ਥਾਰਾ ਪੁਚ੍ਛਿਤੇ ਪਞ੍ਹੇ.

ਸੀਲਬ੍ਬਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਗਨ੍ਧਜਾਤਸੁਤ੍ਤਵਣ੍ਣਨਾ

੮੦. ਨਵਮੇ ਮੂਲੇ, ਮੂਲਸ੍ਸ ਵਾ ਗਨ੍ਧੋ ਮੂਲਗਨ੍ਧੋਤਿ ਆਹ ‘‘ਮੂਲਵਤ੍ਥੁਕੋ ਗਨ੍ਧੋ’’ਤਿ. ਮੂਲਂ ਵਤ੍ਥੁ ਏਤਸ੍ਸਾਤਿ ਮੂਲਵਤ੍ਥੁਕੋ. ਇਦਾਨਿ ਮੂਲਂ ਗਨ੍ਧਯੋਗਤੋ ਗਨ੍ਧੋਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਗਨ੍ਧਸਮ੍ਪਨ੍ਨਂ ਵਾ ਮੂਲਮੇਵ ਮੂਲਗਨ੍ਧੋ’’ਤਿ ਆਹ. ਪਚ੍ਛਿਮੋਯੇਵੇਤ੍ਥ ਅਤ੍ਥਵਿਕਪ੍ਪੋ ਯੁਤ੍ਤਤਰੋਤਿ ਦਸ੍ਸੇਤੁਂ ‘‘ਤਸ੍ਸ ਹਿ ਗਨ੍ਧੋ’’ਤਿਆਦਿਮਾਹ. ਵਸ੍ਸਿਕਪੁਪ੍ਫਾਦੀਨਨ੍ਤਿ ਸੁਮਨਪੁਪ੍ਫਾਦੀਨਂ.

ਗਨ੍ਧਜਾਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਚੂਲ਼ਨਿਕਾਸੁਤ੍ਤਵਣ੍ਣਨਾ

੮੧. ਦਸਮੇ ਅਰੁਣਵਤਿਸੁਤ੍ਤਨ੍ਤਅਟ੍ਠੁਪ੍ਪਤ੍ਤਿਯਨ੍ਤਿ ‘‘ਭੂਤਪੁਬ੍ਬਂ, ਭਿਕ੍ਖਵੇ, ਰਾਜਾ ਅਹੋਸਿ ਅਰੁਣਵਾ ਨਾਮ. ਰਞ੍ਞੋ ਖੋ ਪਨ, ਭਿਕ੍ਖਵੇ, ਅਰੁਣਵਤੋ ਅਰੁਣਵਤੀ ਨਾਮ ਰਾਜਧਾਨੀ ਅਹੋਸਿ. ਅਰੁਣਵਤਿਂ ਖੋ ਪਨ, ਭਿਕ੍ਖਵੇ, ਰਾਜਧਾਨਿਂ ਸਿਖੀ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਉਪਨਿਸ੍ਸਾਯ ਵਿਹਾਸਿ. ਸਿਖਿਸ੍ਸ ਖੋ ਪਨ, ਭਿਕ੍ਖਵੇ, ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਅਭਿਭੂਸਮ੍ਭਵਂ ਨਾਮ ਸਾਵਕਯੁਗਂ ਅਹੋਸਿ ਅਗ੍ਗਂ ਭਦ੍ਦਯੁਗਂ. ਅਥ ਖੋ, ਭਿਕ੍ਖਵੇ, ਸਿਖੀ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਅਭਿਭੁਂ ਭਿਕ੍ਖੁਂ ਆਮਨ੍ਤੇਸੀ’’ਤਿਆਦਿਨਾ ਬ੍ਰਹ੍ਮਸਂਯੁਤ੍ਤੇ (ਸਂ. ਨਿ. ੧.੧੮੫) ਆਗਤਸ੍ਸ ਅਰੁਣਵਤਿਸੁਤ੍ਤਨ੍ਤਸ੍ਸ ਅਟ੍ਠੁਪ੍ਪਤ੍ਤਿਯਂ. ਅਤਿਪ੍ਪਗੋਤਿ ਅਤਿਵਿਯ ਪਗੋ, ਅਤਿਵਿਯ ਪਾਤੋਤਿ ਅਤ੍ਥੋ, ਨ ਤਾਵ ਕੁਲੇਸੁ ਭਤ੍ਤਂ ਨਿਟ੍ਠਾਤੀਤਿ ਵੁਤ੍ਤਂ ਹੋਤਿ.

ਉਜ੍ਝਾਯਨ੍ਤੀਤਿ ਅਵਝਾਯਨ੍ਤਿ, ਹੇਟ੍ਠਾ ਕਤ੍ਵਾ ਚਿਨ੍ਤੇਨ੍ਤਿ, ਲਾਮਕਤੋ ਚਿਨ੍ਤੇਨ੍ਤਿ. ਅਨੇਕਵਿਹਿਤਂ ਇਦ੍ਧਿਵਿਕੁਬ੍ਬਨਂ ਕਤ੍ਵਾਤਿ ‘‘ਪਕਤਿਵਣ੍ਣਂ ਵਿਜਹਿਤ੍ਵਾ ਨਾਗਵਣ੍ਣਂ ਵਾ ਦਸ੍ਸੇਤਿ, ਸੁਪਣ੍ਣਵਣ੍ਣਂ ਵਾ ਦਸ੍ਸੇਤੀ’’ਤਿਆਦਿਨਾ (ਪਟਿ. ਮ. ੩.੧੩) ਨਯੇਨ ਆਗਤਂ ਅਨੇਕਪ੍ਪਕਾਰਂ ਇਦ੍ਧਿਵਿਕੁਬ੍ਬਨਂ ਕਤ੍ਵਾ. ਸਹਸ੍ਸਿਲੋਕਧਾਤੁਨ੍ਤਿ ਚਕ੍ਕਵਾਲ਼ਸਹਸ੍ਸਂ. ਗਾਥਾਦ੍ਵਯਂ ਅਭਾਸੀਤਿ ਥੇਰੋ ਕਿਰ ‘‘ਕਥਂ ਦੇਸਿਤਾ ਖੋ ਧਮ੍ਮਦੇਸਨਾ ਸਬ੍ਬੇਸਂ ਪਿਯਾ ਮਨਾਪਾ’’ਤਿ ਚਿਨ੍ਤੇਤ੍ਵਾ ‘‘ਸਬ੍ਬੇਪਿ ਪਾਸਣ੍ਡਾ ਸਬ੍ਬੇ ਦੇਵਮਨੁਸ੍ਸਾ ਅਤ੍ਤਨੋ ਅਤ੍ਤਨੋ ਸਮਯੇ ਪੁਰਿਸਕਾਰਂ ਵਣ੍ਣਯਨ੍ਤਿ, ਵੀਰਿਯਸ੍ਸ ਅਵਣ੍ਣਵਾਦੀ ਨਾਮ ਨਤ੍ਥਿ, ਵੀਰਿਯਪ੍ਪਟਿਸਂਯੁਤ੍ਤਂ ਕਤ੍ਵਾ ਦੇਸੇਸ੍ਸਾਮਿ. ਏਵਮਸ੍ਸ ਧਮ੍ਮਦੇਸਨਾ ਸਬ੍ਬੇਸਂ ਪਿਯਾ ਭਵਿਸ੍ਸਤਿ ਮਨਾਪਾ’’ਤਿ ਞਤ੍ਵਾ ਤੀਸੁ ਪਿਟਕੇਸੁ ਵਿਚਿਨਿਤ੍ਵਾ ‘‘ਆਰਮ੍ਭਥ ਨਿਕ੍ਕਮਥਾ’’ਤਿ (ਸਂ. ਨਿ. ੧.੧੮੬) ਇਦਂ ਗਾਥਾਦ੍ਵਯਂ ਅਭਾਸਿ.

ਕਿਂ ਆਲੋਕੋ ਅਯਨ੍ਤਿ ਕਸ੍ਸ ਨੁ ਖੋ ਅਯਂ ਆਲੋਕੋਤਿ. ਵਿਚਿਨਨ੍ਤਾਨਨ੍ਤਿ ਚਿਨ੍ਤੇਨ੍ਤਾਨਂ. ਸਬ੍ਬੇਤਿ ਲੋਕਧਾਤੁਯਂ ਸਬ੍ਬੇ ਦੇਵਾ ਚ ਮਨੁਸ੍ਸਾ ਚ. ਓਸਟਾਯ ਪਰਿਸਾਯਾਤਿ ਧਮ੍ਮਸ੍ਸਵਨਤ੍ਥਂ ਸਮੋਸਟਾਯ ਪਰਿਮਿਤਪਰਿਚ੍ਛਿਨ੍ਨਾਯ ਪਰਿਸਾਯ. ਅਤ੍ਥੋਪਿ ਨੇਸਂ ਪਾਕਟੋ ਅਹੋਸੀਤਿ ਨ ਕੇਵਲਂ ਤੇ ਸਦ੍ਦਮੇਵ ਅਸ੍ਸੋਸੁਂ, ਅਥ ਖੋ ਅਤ੍ਥੋਪਿ ਤੇਸਂ ਪਕਤਿਸਵਨੂਪਚਾਰੇ ਵਿਯ ਪਾਕਟੋ ਅਹੋਸਿ. ਤੇਨ ਸਹਸ੍ਸਂ ਲੋਕਧਾਤੁਂ ਵਿਞ੍ਞਾਪੇਤੀਤਿ ਅਧਿਪ੍ਪਾਯੋ.

ਪਰਿਹਰਨ੍ਤੀਤਿ ਸਿਨੇਰੁਂ ਦਕ੍ਖਿਣਤੋ ਕਤ੍ਵਾ ਪਰਿਵਤ੍ਤੇਨ੍ਤਿ. ਵਿਰੋਚਮਾਨਾਤਿ ਅਤ੍ਤਨੋ ਜੁਤਿਯਾ ਦਿਬ੍ਬਮਾਨਾ, ਸੋਭਮਾਨਾ ਵਾ. ਤਾਵ ਸਹਸ੍ਸਧਾ ਲੋਕੋਤਿ ਯਤ੍ਤਕੋ ਚਨ੍ਦਿਮਸੂਰਿਯੇਹਿ ਓਭਾਸਿਯਮਾਨੋ ਲੋਕਧਾਤੁਸਙ੍ਖਾਤੋ ਏਕੇਕੋ ਲੋਕੋ, ਤਤ੍ਤਕੇਨ ਪਮਾਣੇਨ ਸਹਸ੍ਸਧਾ ਲੋਕੋ, ਇਮਿਨਾ ਚਕ੍ਕਵਾਲ਼ੇਨ ਸਦ੍ਧਿਂ ਚਕ੍ਕਵਾਲ਼ਸਹਸ੍ਸਨ੍ਤਿ ਅਤ੍ਥੋ. ਕਸ੍ਮਾ ਪਨੇਸਾ ਆਨੀਤਾਤਿ ਏਸਾ ਚੂਲ਼ਨਿਕਾ ਲੋਕਧਾਤੁ ਕਸ੍ਮਾ ਭਗਵਤਾ ਆਨੀਤਾ, ਦੇਸਿਤਾਤਿ ਅਤ੍ਥੋ. ਮਜ੍ਝਿਮਿਕਾਯ ਲੋਕਧਾਤੁਯਾ ਪਰਿਚ੍ਛੇਦਦਸ੍ਸਨਤ੍ਥਨ੍ਤਿ ਦ੍ਵਿਸਹਸ੍ਸਿਲੋਕਧਾਤੁਯਾ ਪਰਿਮਾਣਦਸ੍ਸਨਤ੍ਥਂ.

ਸਹਸ੍ਸਿਲੋਕਧਾਤੁਯਾ ਸਹਸ੍ਸੀ ਦ੍ਵਿਸਹਸ੍ਸਿਲੋਕਧਾਤੁ, ਸਾ ਚਕ੍ਕਵਾਲ਼ਗਣਨਾਯ ਦਸਸਤਸਹਸ੍ਸਚਕ੍ਕਵਾਲ਼ਪਰਿਮਾਣਾ. ਤੇਨਾਹ ‘‘ਸਹਸ੍ਸਚਕ੍ਕਵਾਲ਼ਾਨਿ ਸਹਸ੍ਸਭਾਗੇਨ ਗਣੇਤ੍ਵਾ’’ਤਿਆਦਿ. ਕਮ੍ਪਨਦੇਵਤੂਪਸਙ੍ਕਮਨਾਦਿਨਾ ਜਾਤਚਕ੍ਕਵਾਲ਼ੇਨ ਸਹ ਯੋਗਕ੍ਖੇਮਂ ਠਾਨਂ ਜਾਤਿਕ੍ਖੇਤ੍ਤਂ. ਤਤ੍ਤਕਾਯ ਏਵ ਜਾਤਿਕ੍ਖੇਤ੍ਤਭਾਵੋ ਧਮ੍ਮਤਾਵਸੇਨੇਵ ਵੇਦਿਤਬ੍ਬੋ, ‘‘ਪਰਿਗ੍ਗਹਵਸੇਨਾ’’ਤਿ ਕੇਚਿ. ਸਬ੍ਬੇਸਮ੍ਪਿ ਬੁਦ੍ਧਾਨਂ ਏਵਂ ਜਾਤਿਕ੍ਖੇਤ੍ਤਂ ਤਨ੍ਨਿਵਾਸੀਨਂਯੇਵ ਚ ਦੇਵਤਾਨਂ ਧਮ੍ਮਾਭਿਸਮਯੋਤਿ ਵਦਨ੍ਤਿ. ਪਟਿਸਨ੍ਧਿਗ੍ਗਹਣਾਦੀਨਂ ਸਤ੍ਤਨ੍ਨਂਯੇਵ ਗਹਣਂ ਨਿਦਸ੍ਸਨਮਤ੍ਤਂ ਮਹਾਭਿਨੀਹਾਰਾਦਿਕਾਲੇਪਿ ਤਸ੍ਸ ਪਕਮ੍ਪਨਸ੍ਸ ਲਬ੍ਭਨਤੋ.

ਸਹਸ੍ਸਂ ਸਹਸ੍ਸਧਾ ਕਤ੍ਵਾ ਗਣਿਤਂ ਮਜ੍ਝਿਮਿਕਨ੍ਤਿਆਦਿਨਾ ਮਜ੍ਝਿਮਿਕਾਯ ਲੋਕਧਾਤੁਯਾ ਸਹਸ੍ਸਂ ਤਿਸਹਸ੍ਸਿਲੋਕਧਾਤੁ, ਸਾਯੇਵ ਚ ਮਹਾਸਹਸ੍ਸਿਲੋਕਧਾਤੂਤਿ ਦਸ੍ਸੇਤਿ. ਸਰਸੇਨੇਵ ਆਣਾਪਵਤ੍ਤਨਂ ਆਣਾਕ੍ਖੇਤ੍ਤਂ, ਯਂ ਏਕਜ੍ਝਂ ਸਂਵਟ੍ਟਤਿ ਵਿਵਟ੍ਟਤਿ ਚ. ਆਣਾ ਫਰਤੀਤਿ ਤਨ੍ਨਿਵਾਸਿਦੇਵਤਾਨਂ ਸਿਰਸਾ ਸਮ੍ਪਟਿਚ੍ਛਨੇਨ ਵਤ੍ਤਤਿ, ਤਞ੍ਚ ਖੋ ਕੇਵਲਂ ਬੁਦ੍ਧਾਨੁਭਾਵੇਨੇਵ, ਅਧਿਪ੍ਪਾਯਵਸੇਨ ਚ ਪਨ ‘‘ਯਾਵਤਾ ਪਨ ਆਕਙ੍ਖੇਯ੍ਯਾ’’ਤਿ (ਅ. ਨਿ. ੩.੮੧) ਵਚਨਤੋ ਬੁਦ੍ਧਾਨਂ ਅਵਿਸਯੋ ਨਾਮ ਨਤ੍ਥਿ, ਵਿਸਯਕ੍ਖੇਤ੍ਤਸ੍ਸ ਪਮਾਣਪਰਿਚ੍ਛੇਦੋ ਨਾਮ ਨਤ੍ਥਿ. ਵਿਸਮੋਤਿ ਸੂਰਿਯੁਗ੍ਗਮਨਾਦੀਨਂ ਵਿਸਮਭਾਵਤੋ ਵਿਸਮੋ. ਤੇਨੇਵਾਹ ‘‘ਏਕਸ੍ਮਿਂ ਠਾਨੇ ਸੂਰਿਯੋ ਉਗ੍ਗਤੋ ਹੋਤੀ’’ਤਿਆਦਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਚੂਲ਼ਨਿਕਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਆਨਨ੍ਦਵਗ੍ਗਵਣ੍ਣਨਾ ਨਿਟ੍ਠਿਤਾ.