(੯) ੪. ਸਮਣਵਗ੍ਗੋ

੧-੫. ਸਮਣਸੁਤ੍ਤਾਦਿਵਣ੍ਣਨਾ

੮੨-੮੬. ਚਤੁਤ੍ਥਸ੍ਸ ਪਠਮੇ ਸਮ੍ਮਾ ਆਦਾਨਂ ਗਹਣਂ ਸਮਾਦਾਨਨ੍ਤਿ ਆਹ ‘‘ਸਮਾਦਾਨਂ ਵੁਚ੍ਚਤਿ ਗਹਣ’’ਨ੍ਤਿ. ਅਧਿਕਂ ਵਿਸਿਟ੍ਠਂ ਸੀਲਨ੍ਤਿ ਅਧਿਸੀਲਂ. ਲੋਕਿਯਸੀਲਸ੍ਸ ਅਧਿਸੀਲਭਾਵੋ ਪਰਿਯਾਯੇਨਾਤਿ ਨਿਪ੍ਪਰਿਯਾਯਮੇਵ ਤਂ ਦਸ੍ਸੇਤੁਂ ‘‘ਅਪਿਚ ਸਬ੍ਬਮ੍ਪਿ ਲੋਕਿਯਸੀਲ’’ਨ੍ਤਿਆਦਿ ਵੁਤ੍ਤਂ. ਸਿਕ੍ਖਿਤਬ੍ਬਤੋਤਿ ਆਸੇਵਿਤਬ੍ਬਤੋ. ਪਞ੍ਚਪਿ ਦਸਪਿ ਵਾ ਸੀਲਾਨਿ ਸੀਲਂ ਨਾਮ, ਪਾਤਿਮੋਕ੍ਖਸਂਵਰੋ ਅਧਿਸੀਲਂ ਨਾਮ ਅਨਵਸੇਸਕਾਯਿਕਚੇਤਸਿਕਸਂਵਰਭਾਵਤੋ ਮਗ੍ਗਸੀਲਸ੍ਸ ਪਦਟ੍ਠਾਨਭਾਵਤੋ ਚ. ਅਟ੍ਠ ਸਮਾਪਤ੍ਤਿਯੋ ਚਿਤ੍ਤਂ, ਵਿਪਸ੍ਸਨਾਪਾਦਕਜ੍ਝਾਨਂ ਅਧਿਚਿਤ੍ਤਂ ਮਗ੍ਗਸਮਾਧਿਸ੍ਸ ਅਧਿਟ੍ਠਾਨਭਾਵਤੋ. ਕਮ੍ਮਸ੍ਸਕਤਞਾਣਂ ਪਞ੍ਞਾ, ਵਿਪਸ੍ਸਨਾ ਅਧਿਪਞ੍ਞਾ ਮਗ੍ਗਪਞ੍ਞਾਯ ਅਧਿਟ੍ਠਾਨਭਾਵਤੋ. ਅਪਿਚ ਨਿਬ੍ਬਾਨਂ ਪਤ੍ਥਯਨ੍ਤੇਨ ਸਮਾਦਿਨ੍ਨਂ ਪਞ੍ਚਸੀਲਂ ਦਸਸੀਲਮ੍ਪਿ ਅਧਿਸੀਲਮੇਵ ਨਿਬ੍ਬਾਨਾਧਿਗਮਸ੍ਸ ਪਚ੍ਚਯਭਾਵਤੋ. ਨਿਬ੍ਬਾਨਂ ਪਤ੍ਥਯਨ੍ਤੇਨ ਸਮਾਪਨ੍ਨਾ ਅਟ੍ਠ ਸਮਾਪਤ੍ਤਿਯੋਪਿ ਅਧਿਚਿਤ੍ਤਮੇਵ.

‘‘ਕਲ੍ਯਾਣਕਾਰੀ ਕਲ੍ਯਾਣਂ, ਪਾਪਕਾਰੀ ਚ ਪਾਪਕਂ;

ਅਨੁਭੋਤਿ ਦ੍ਵਯਮੇਤਂ, ਅਨੁਬਨ੍ਧਞ੍ਹਿ ਕਾਰਣ’’ਨ੍ਤਿ. –

ਏਵਂ ਅਤੀਤੇ ਅਨਾਗਤੇ ਚ ਵਟ੍ਟਮੂਲਕਦੁਕ੍ਖਸਲ੍ਲਕ੍ਖਣਵਸੇਨ ਸਂਵੇਗਵਤ੍ਥੁਤਾਯ ਵਿਮੁਤ੍ਤਿਆਕਙ੍ਖਾਯ ਪਚ੍ਚਯਭੂਤਾ ਕਮ੍ਮਸ੍ਸਕਤਪਞ੍ਞਾਪਿ ਅਧਿਪਞ੍ਞਾਤਿ ਵਦਨ੍ਤਿ. ਦੁਤਿਯਤਤਿਯਚਤੁਤ੍ਥਪਞ੍ਚਮਾਨਿ ਉਤ੍ਤਾਨਤ੍ਥਾਨੇਵ.

ਸਮਣਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੬. ਪਠਮਸਿਕ੍ਖਾਸੁਤ੍ਤਵਣ੍ਣਨਾ

੮੭. ਛਟ੍ਠੇ ਸਮਤ੍ਤਕਾਰੀਤਿ ਅਨੂਨੇਨ ਪਰਿਪੂਰੇਨ ਆਕਾਰੇਨ ਸਮਨ੍ਨਾਗਤੋ. ਸਿਕ੍ਖਾਪਦਾਨਂ ਖੁਦ੍ਦਾਨੁਖੁਦ੍ਦਕਤ੍ਤਂ ਅਪੇਕ੍ਖਾਸਿਦ੍ਧਨ੍ਤਿ ਆਹ ‘‘ਤਤ੍ਰਾਪਿ ਸਙ੍ਘਾਦਿਸੇਸਂ ਖੁਦ੍ਦਕ’’ਨ੍ਤਿਆਦਿ. ਅਙ੍ਗੁਤ੍ਤਰਮਹਾਨਿਕਾਯਵਲ਼ਞ੍ਜਨਕਆਚਰਿਯਾਤਿ ਅਙ੍ਗੁਤ੍ਤਰਨਿਕਾਯਂ ਪਰਿਹਰਨ੍ਤਾ ਆਚਰਿਯਾ, ਅਙ੍ਗੁਤ੍ਤਰਭਾਣਕਾਤਿ ਵੁਤ੍ਤਂ ਹੋਤਿ. ਲੋਕਵਜ੍ਜਂ ਨਾਪਜ੍ਜਤਿ ਲੋਕਵਜ੍ਜਸਿਕ੍ਖਾਪਦਾਨਂ ਵੀਤਿਕ੍ਕਮਸਾਧਕਸ੍ਸ ਕਿਲੇਸਗਹਨਸ੍ਸ ਸਬ੍ਬਸੋ ਪਹੀਨਤ੍ਤਾ. ਪਣ੍ਣਤ੍ਤਿਵਜ੍ਜਮੇਵ ਆਪਜ੍ਜਤਿ ਪਣ੍ਣਤ੍ਤਿਵੀਤਿਕ੍ਕਮਂ ਵਾ ਅਜਾਨਤੋਪਿ ਆਪਤ੍ਤਿਸਮ੍ਭਵਤੋ. ਚਿਤ੍ਤੇਨ ਆਪਜ੍ਜਨ੍ਤੋ ਰੂਪਿਯਪ੍ਪਟਿਗ੍ਗਹਣਂ ਆਪਜ੍ਜਤੀਤਿ ਉਪਨਿਕ੍ਖਿਤ੍ਤਸਾਦਿਯੇਨ ਆਪਜ੍ਜਤਿ.

ਬ੍ਰਹ੍ਮਚਰਿਯਸ੍ਸ ਆਦਿਭੂਤਾਨਿ ਆਦਿਬ੍ਰਹ੍ਮਚਰਿਯਾਨਿ, ਤਾਨਿ ਏਵ ਆਦਿਬ੍ਰਹ੍ਮਚਰਿਯਕਾਨਿ ਯਥਾ ‘‘ਵਿਨਯੋ ਏਵ ਵੇਨਯਿਕੋ’’ਤਿ ਆਹ ‘‘ਮਗ੍ਗਬ੍ਰਹ੍ਮਚਰਿਯਸ੍ਸਾ’’ਤਿਆਦਿ. ਚਤ੍ਤਾਰਿ ਮਹਾਸੀਲਸਿਕ੍ਖਾਪਦਾਨੀਤਿ ਚਤ੍ਤਾਰਿ ਪਾਰਾਜਿਕਾਨਿ ਸਨ੍ਧਾਯ ਵਦਤਿ. ਪਟਿਪਕ੍ਖਧਮ੍ਮਾਨਂ ਅਨਵਸੇਸਤੋ ਸਵਨਤੋ ਪਗ੍ਘਰਣਤੋ ਸੋਤੋ, ਅਰਿਯਮਗ੍ਗੋਤਿ ਆਹ ‘‘ਸੋਤਸਙ੍ਖਾਤੇਨ ਮਗ੍ਗੇਨਾ’’ਤਿ. ਵਿਨਿਪਾਤੇਤਿ ਵਿਰੂਪਂ ਸਦੁਕ੍ਖਂ ਸਉਪਾਯਾਸਂ ਨਿਪਾਤੇਤੀਤਿ ਵਿਨਿਪਾਤੋ, ਅਪਾਯਦੁਕ੍ਖੇ ਖਿਪਨਕੋ. ਧਮ੍ਮੋਤਿ ਸਭਾਵੋ. ਨਾਸ੍ਸ ਵਿਨਿਪਾਤੋ ਧਮ੍ਮੋਤਿ ਅਵਿਨਿਪਾਤਧਮ੍ਮੋ, ਨ ਅਤ੍ਤਾਨਂ ਅਪਾਯੇਸੁ ਵਿਨਿਪਾਤਨਸਭਾਵੋਤਿ ਵੁਤ੍ਤਂ ਹੋਤਿ. ਕਸ੍ਮਾ? ਯੇ ਧਮ੍ਮਾ ਅਪਾਯਗਮਨੀਯਾ, ਤੇਸਂ ਪਹੀਨਤ੍ਤਾ. ਤੇਨਾਹ ‘‘ਅਵਿਨਿਪਾਤਧਮ੍ਮੋਤਿ ਚਤੂਸੁ ਅਪਾਯੇਸੁ ਅਪਤਨਸਭਾਵੋ’’ਤਿ. ਤਤ੍ਥ ਅਪਤਨਸਭਾਵੋਤਿ ਅਨੁਪ੍ਪਜ੍ਜਨਸਭਾਵੋ. ਸੋਤਾਪਤ੍ਤਿਮਗ੍ਗਨਿਯਾਮੇਨ ਨਿਯਤੋਤਿ ਉਪਰਿਮਗ੍ਗਾਧਿਗਮਸ੍ਸ ਅਵਸ੍ਸਂਭਾਵੀਭਾਵਤੋ ਨਿਯਤੋ. ਤੇਨੇਵਾਹ ‘‘ਸਮ੍ਬੋਧਿਪਰਾਯਣੋ’’ਤਿ. ਹੇਟ੍ਠਿਮਨ੍ਤਤੋ ਸਤ੍ਤਮਭਵਤੋ ਉਪਰਿ ਅਨੁਪ੍ਪਜ੍ਜਨਧਮ੍ਮਤਾਯ ਵਾ ਨਿਯਤੋ. ਸਮ੍ਬੁਜ੍ਝਤੀਤਿ ਸਮ੍ਬੋਧਿ, ਅਰਿਯਮਗ੍ਗੋ. ਸੋ ਪਨ ਪਠਮਮਗ੍ਗਸ੍ਸ ਅਧਿਗਤਤ੍ਤਾ ਅਵਸਿਟ੍ਠੋ ਚ ਅਧਿਗਨ੍ਤਬ੍ਬਭਾਵੇਨ ਇਚ੍ਛਿਤਬ੍ਬੋਤਿ ਉਪਰਿਮਗ੍ਗਤ੍ਤਯਸਙ੍ਖਾਤਾ ਸਮ੍ਬੋਧਿ ਪਰਂ ਅਯਨਂ ਪਰਾ ਗਤਿ ਅਸ੍ਸਾਤਿ ਸਮ੍ਬੋਧਿਪਰਾਯਣੋ. ਤੇਨਾਹ ‘‘ਉਪਰਿਮਗ੍ਗਤ੍ਤਯਸਮ੍ਬੋਧਿਪਰਾਯਣੋ’’ਤਿ.

ਤਨੁਭਾਵਾਤਿ ਪਰਿਯੁਟ੍ਠਾਨਮਨ੍ਦਤਾਯ ਚ ਕਦਾਚਿ ਕਰਹਚਿ ਉਪ੍ਪਤ੍ਤਿਯਾ ਚ ਤਨੁਭਾਵੇਨ. ਤਨੁਤ੍ਤਞ੍ਹਿ ਦ੍ਵੀਹਿ ਕਾਰਣੇਹਿ ਵੇਦਿਤਬ੍ਬਂ ਅਧਿਚ੍ਚੁਪ੍ਪਤ੍ਤਿਯਾ ਚ ਪਰਿਯੁਟ੍ਠਾਨਮਨ੍ਦਤਾਯ ਚ. ਸਕਦਾਗਾਮਿਸ੍ਸ ਹਿ ਵਟ੍ਟਾਨੁਸਾਰਿਮਹਾਜਨਸ੍ਸ ਵਿਯ ਕਿਲੇਸਾ ਅਭਿਣ੍ਹਂ ਨ ਉਪ੍ਪਜ੍ਜਨ੍ਤਿ, ਕਦਾਚਿ ਕਰਹਚਿ ਉਪ੍ਪਜ੍ਜਨ੍ਤਿ ਵਿਰਲ਼ਾਕਾਰਾ ਹੁਤ੍ਵਾ ਵਿਰਲ਼ਵਾਪਿਤੇ ਖੇਤ੍ਤੇ ਅਙ੍ਕੁਰਾ ਵਿਯ. ਉਪ੍ਪਜ੍ਜਮਾਨਾਪਿ ਚ ਵਟ੍ਟਾਨੁਸਾਰਿਮਹਾਜਨਸ੍ਸੇਵ ਮਦ੍ਦਨ੍ਤਾ ਫਰਨ੍ਤਾ ਛਾਦੇਨ੍ਤਾ ਅਨ੍ਧਕਾਰਂ ਕਰੋਨ੍ਤਾ ਨ ਉਪ੍ਪਜ੍ਜਨ੍ਤਿ, ਮਨ੍ਦਮਨ੍ਦਾ ਉਪ੍ਪਜ੍ਜਨ੍ਤਿ ਤਨੁਕਾਕਾਰਾ ਹੁਤ੍ਵਾ ਅਬ੍ਭਪਟਲਮਿਵ ਮਕ੍ਖਿਕਾਪਤ੍ਤਮਿਵ ਚ. ਤਤ੍ਥ ਕੇਚਿ ਥੇਰਾ ਭਣਨ੍ਤਿ ‘‘ਸਕਦਾਗਾਮਿਸ੍ਸ ਕਿਲੇਸਾ ਕਿਞ੍ਚਾਪਿ ਚਿਰੇਨ ਉਪ੍ਪਜ੍ਜਨ੍ਤਿ, ਬਹਲਾਵ ਉਪ੍ਪਜ੍ਜਨ੍ਤਿ. ਤਥਾ ਹਿਸ੍ਸ ਪੁਤ੍ਤਾ ਚ ਧੀਤਰੋ ਚ ਦਿਸ੍ਸਨ੍ਤੀ’’ਤਿ. ਏਤਂ ਪਨ ਅਪ੍ਪਮਾਣਂ. ਪੁਤ੍ਤਧੀਤਰੋ ਹਿ ਅਙ੍ਗਪਚ੍ਚਙ੍ਗਪਰਾਮਸਨਮਤ੍ਤੇਨਪਿ ਹੋਨ੍ਤੀਤਿ. ਦ੍ਵੀਹਿਯੇਵ ਕਾਰਣੇਹਿਸ੍ਸ ਕਿਲੇਸਾਨਂ ਤਨੁਤ੍ਤਂ ਵੇਦਿਤਬ੍ਬਂ ਅਧਿਚ੍ਚੁਪ੍ਪਤ੍ਤਿਯਾ ਚ ਪਰਿਯੁਟ੍ਠਾਨਮਨ੍ਦਤਾਯ ਚਾਤਿ.

ਹੇਟ੍ਠਾਭਾਗਿਯਾਨਨ੍ਤਿ ਏਤ੍ਥ ਹੇਟ੍ਠਾਤਿ ਮਹਗ੍ਗਤਭੂਮਿਤੋ ਹੇਟ੍ਠਾ, ਕਾਮਭੂਮਿਯਨ੍ਤਿ ਅਤ੍ਥੋ. ਤੇਸਂ ਪਚ੍ਚਯਭਾਵੇਨ ਹੇਟ੍ਠਾਭਾਗਸ੍ਸ ਹਿਤਾਤਿ ਹੇਟ੍ਠਾਭਾਗਿਯਾ, ਤੇਸਂ ਹੇਟ੍ਠਾਭਾਗਿਯਾਨਂ, ਹੇਟ੍ਠਾਭਾਗਸ੍ਸ ਕਾਮਭਵਸ੍ਸ ਪਚ੍ਚਯਭਾਵੇਨ ਗਹਿਤਾਨਨ੍ਤਿ ਅਤ੍ਥੋ. ਸਂਯੋਜੇਨ੍ਤਿ ਬਨ੍ਧਨ੍ਤਿ ਖਨ੍ਧਗਤਿਭਵਾਦੀਹਿ ਖਨ੍ਧਗਤਿਭਵਾਦਯੋ, ਕਮ੍ਮਂ ਵਾ ਫਲੇਨਾਤਿ ਸਂਯੋਜਨਾਨੀਤਿ ਆਹ ‘‘ਸਂਯੋਜਨਾਨਨ੍ਤਿ ਬਨ੍ਧਨਾਨ’’ਨ੍ਤਿ. ਅਸਮੁਚ੍ਛਿਨ੍ਨਰਾਗਾਦਿਕਸ੍ਸ ਹਿ ਏਤਰਹਿ ਖਨ੍ਧਾਦੀਨਂ ਆਯਤਿਂ ਖਨ੍ਧਾਦੀਹਿ ਸਮ੍ਬਨ੍ਧੋ, ਸਮੁਚ੍ਛਿਨ੍ਨਰਾਗਾਦਿਕਸ੍ਸ ਪਨ ਤਂ ਨਤ੍ਥਿ, ਕਤਾਨਮ੍ਪਿ ਕਮ੍ਮਾਨਂ ਅਸਮਤ੍ਥਭਾਵਾਪਤ੍ਤਿਤੋ ਰਾਗਾਦੀਨਂ ਅਨ੍ਵਯਤੋ ਬ੍ਯਤਿਰੇਕਤੋ ਚ ਸਂਯੋਜਨਟ੍ਠੋ ਸਿਦ੍ਧੋ. ਪਰਿਕ੍ਖਯੇਨਾਤਿ ਸਮੁਚ੍ਛੇਦੇਨ.

ਓਪਪਾਤਿਕੋਤਿ ਉਪਪਾਤਿਕਯੋਨਿਕੋ ਉਪਪਤਨੇ ਸਾਧੁਕਾਰੀ. ਸੇਸਯੋਨਿਪਟਿਕ੍ਖੇਪਵਚਨਮੇਤਂ. ਤੇਨ ਗਬ੍ਭਵਾਸਦੁਕ੍ਖਾਭਾਵਮਾਹ. ਤਤ੍ਥ ਪਰਿਨਿਬ੍ਬਾਯੀਤਿ ਇਮਿਨਾ ਸੇਸਦੁਕ੍ਖਾਭਾਵਂ. ਤਤ੍ਥ ਪਰਿਨਿਬ੍ਬਾਯਿਤਾ ਚਸ੍ਸ ਕਾਮਲੋਕੇ ਖਨ੍ਧਬੀਜਸ੍ਸ ਅਪੁਨਾਗਮਨਵਸੇਨੇਵਾਤਿ ਦਸ੍ਸੇਤੁਂ ‘‘ਅਨਾਵਤ੍ਤਿਧਮ੍ਮੋ’’ਤਿ ਵੁਤ੍ਤਂ. ਉਪਰਿਯੇਵਾਤਿ ਬ੍ਰਹ੍ਮਲੋਕੇਯੇਵ. ਅਨਾਵਤ੍ਤਿਧਮ੍ਮੋਤਿ ਤਤੋ ਬ੍ਰਹ੍ਮਲੋਕਾ ਪੁਨਪ੍ਪੁਨਂ ਪਟਿਸਨ੍ਧਿਵਸੇਨ ਨ ਆਵਤ੍ਤਨਧਮ੍ਮੋ. ਤੇਨਾਹ ‘‘ਯੋਨਿਗਤਿਵਸੇਨ ਅਨਾਗਮਨਧਮ੍ਮੋ’’ਤਿ.

ਪਦੇਸਂ ਪਦੇਸਕਾਰੀ ਆਰਾਧੇਤੀਤਿ ਸੀਲਕ੍ਖਨ੍ਧਾਦੀਨਂ ਪਾਰਿਪੂਰਿਯਾ ਏਕਦੇਸਭੂਤਂ ਹੇਟ੍ਠਿਮਮਗ੍ਗਤ੍ਤਯਂ ਪਦੇਸੋ, ਤਂ ਕਰੋਨ੍ਤੋ ਪਦੇਸਂ ਏਕਦੇਸਭੂਤਂ ਹੇਟ੍ਠਿਮਂ ਫਲਤ੍ਤਯਮੇਵ ਆਰਾਧੇਤਿ, ਨਿਪ੍ਫਾਦੇਤੀਤਿ ਅਤ੍ਥੋ. ਤੇਨਾਹ ‘‘ਪਦੇਸਕਾਰੀ ਪੁਗ੍ਗਲੋ ਨਾਮ ਸੋਤਾਪਨ੍ਨੋ’’ਤਿਆਦਿ. ਪਰਿਪੂਰਂ ਪਰਿਪੂਰਕਾਰੀਤਿ ਸੀਲਕ੍ਖਨ੍ਧਾਦੀਹਿ ਸਦ੍ਧਿਨ੍ਦ੍ਰਿਯਾਦੀਹਿ ਚ ਪਰਿਤੋ ਪੂਰਣੇਨ ਪਰਿਪੂਰਸਙ੍ਖਾਤਂ ਅਰਹਤ੍ਤਮਗ੍ਗਂ ਕਰੋਨ੍ਤੋ ਨਿਬ੍ਬਤ੍ਤੇਨ੍ਤੋ ਪਰਿਪੂਰਂ ਅਰਹਤ੍ਤਫਲਂ ਆਰਾਧੇਤਿ, ਨਿਪ੍ਫਾਦੇਤੀਤਿ ਅਤ੍ਥੋ. ਤੇਨਾਹ ‘‘ਪਰਿਪੂਰਕਾਰੀ ਨਾਮ ਅਰਹਾ’’ਤਿਆਦਿ.

ਪਠਮਸਿਕ੍ਖਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭-੧੦. ਦੁਤਿਯਸਿਕ੍ਖਾਸੁਤ੍ਤਾਦਿਵਣ੍ਣਨਾ

੮੮-੯੧. ਸਤ੍ਤਮੇ ਕੁਲਾ ਕੁਲਂ ਗਮਨਕੋਤਿ ਕੁਲਤੋ ਕੁਲਂ ਗਚ੍ਛਨ੍ਤੋ. ਦ੍ਵੇ ਵਾ ਤਯੋ ਵਾ ਭਵੇਤਿ ਦੇਵਮਨੁਸ੍ਸਵਸੇਨ ਦ੍ਵੇ ਵਾ ਤਯੋ ਵਾ ਭਵੇ. ਮਿਸ੍ਸਕਭਵਵਸੇਨ ਹੇਤਂ ਵੁਤ੍ਤਂ. ਦੇਸਨਾਮਤ੍ਤਮੇਵ ਚੇਤਂ ‘‘ਦ੍ਵੇ ਵਾ ਤੀਣਿ ਵਾ’’ਤਿ. ਯਾਵ ਛਟ੍ਠਭਵਾ ਸਂਸਰਨ੍ਤੋਪਿ ਕੋਲਂਕੋਲੋਵ ਹੋਤਿ. ਤੇਨੇਵਾਹ ‘‘ਅਯਞ੍ਹਿ ਦ੍ਵੇ ਵਾ ਭਵੇ…ਪੇ… ਏਵਮੇਤ੍ਥ ਵਿਕਪ੍ਪੋ ਦਟ੍ਠਬ੍ਬੋ’’ਤਿ. ਉਲ਼ਾਰਕੁਲਵਚਨੋ ਵਾ ਏਤ੍ਥ ਕੁਲਸਦ੍ਦੋ, ਕੁਲਤੋ ਕੁਲਂ ਗਚ੍ਛਤੀਤਿ ਕੋਲਂਕੋਲੋ. ਸੋਤਾਪਤ੍ਤਿਫਲਸਚ੍ਛਿਕਿਰਿਯਤੋ ਪਟ੍ਠਾਯ ਹਿ ਨੀਚਕੁਲੇ ਉਪ੍ਪਤ੍ਤਿ ਨਾਮ ਨਤ੍ਥਿ, ਮਹਾਭੋਗਕੁਲੇਸੁ ਏਵ ਨਿਬ੍ਬਤ੍ਤਤੀਤਿ ਅਤ੍ਥੋ. ਕੇਵਲੋ ਹਿ ਕੁਲਸਦ੍ਦੋ ਮਹਾਕੁਲਮੇਵ ਵਦਤਿ ‘‘ਕੁਲਪੁਤ੍ਤੋ’’ਤਿਆਦੀਸੁ ਵਿਯ. ਏਕਬੀਜੀਤਿ ਏਤ੍ਥ ਖਨ੍ਧਬੀਜਂ ਨਾਮ ਕਥਿਤਂ, ਖਨ੍ਧਬੀਜਨ੍ਤਿ ਚ ਪਟਿਸਨ੍ਧਿਵਿਞ੍ਞਾਣਂ ਵੁਚ੍ਚਤਿ. ਯਸ੍ਸ ਹਿ ਸੋਤਾਪਨ੍ਨਸ੍ਸ ਏਕਂ ਖਨ੍ਧਬੀਜਂ ਅਤ੍ਥਿ, ਏਕਂ ਭਵਗ੍ਗਹਣਂ, ਸੋ ਏਕਬੀਜੀ ਨਾਮ. ਤੇਨਾਹ ‘‘ਏਕਸ੍ਸੇਵ ਭਵਸ੍ਸ ਬੀਜਂ ਏਤਸ੍ਸ ਅਤ੍ਥੀਤਿ ਏਕਬੀਜੀ’’ਤਿ. ‘‘ਮਾਨੁਸਕਂ ਭਵ’’ਨ੍ਤਿ ਇਦਂ ਪਨੇਤ੍ਥ ਦੇਸਨਾਮਤ੍ਤਮੇਵ, ‘‘ਦੇਵਭਵਂ ਨਿਬ੍ਬਤ੍ਤੇਤੀ’’ਤਿਪਿ ਪਨ ਵਤ੍ਤੁਂ ਵਟ੍ਟਤਿਯੇਵ.

ਉਦ੍ਧਂਵਾਹਿਭਾਵੇਨ ਉਦ੍ਧਮਸ੍ਸ ਤਣ੍ਹਾਸੋਤਂ ਵਟ੍ਟਸੋਤਂ ਵਾਤਿ ਉਦ੍ਧਂਸੋਤੋ, ਉਦ੍ਧਂ ਵਾ ਗਨ੍ਤ੍ਵਾ ਪਟਿਲਭਿਤਬ੍ਬਤੋ ਉਦ੍ਧਮਸ੍ਸ ਮਗ੍ਗਸੋਤਨ੍ਤਿ ਉਦ੍ਧਂਸੋਤੋ. ਪਟਿਸਨ੍ਧਿਵਸੇਨ ਅਕਨਿਟ੍ਠਭਵਂ ਗਚ੍ਛਤੀਤਿ ਅਕਨਿਟ੍ਠਗਾਮੀ. ਯਤ੍ਥ ਕਤ੍ਥਚੀਤਿ ਅਵਿਹਾਦੀਸੁ ਯਤ੍ਥ ਕਤ੍ਥਚਿ. ਸਪ੍ਪਯੋਗੇਨਾਤਿ ਵਿਪਸ੍ਸਨਾਞਾਣਾਭਿਸਙ੍ਖਾਰਸਙ੍ਖਾਤੇਨ ਪਯੋਗੇਨ ਸਹ, ਮਹਤਾ ਵਿਪਸ੍ਸਨਾਪਯੋਗੇਨਾਤਿ ਅਤ੍ਥੋ. ਉਪਹਚ੍ਚਾਤਿ ਏਤਸ੍ਸ ਉਪਗਨ੍ਤ੍ਵਾਤਿ ਅਤ੍ਥੋ. ਤੇਨ ਵੇਮਜ੍ਝਾਤਿਕ੍ਕਮੋ ਕਾਲਕਿਰਿਯਾਪਗਮਨਞ੍ਚ ਸਙ੍ਗਹਿਤਂ ਹੋਤਿ, ਤਸ੍ਮਾ ਆਯੁਵੇਮਜ੍ਝਂ ਅਤਿਕ੍ਕਮਿਤ੍ਵਾ ਪਰਿਨਿਬ੍ਬਾਯਨ੍ਤੋ ਉਪਹਚ੍ਚਪਰਿਨਿਬ੍ਬਾਯੀ ਨਾਮ ਹੋਤੀਤਿ ਆਹ ‘‘ਯੋ ਪਨ ਕਪ੍ਪਸਹਸ੍ਸਾਯੁਕੇਸੁ ਅਵਿਹੇਸੂ’’ਤਿਆਦਿ. ਸੋ ਤਿਵਿਧੋ ਹੋਤੀਤਿ ਞਾਣਸ੍ਸ ਤਿਕ੍ਖਮਜ੍ਝਮੁਦੁਭਾਵੇਨ ਤਿਵਿਧੋ ਹੋਤਿ. ਤੇਨਾਹ ‘‘ਕਪ੍ਪਸਹਸ੍ਸਾਯੁਕੇਸੂ’’ਤਿਆਦਿ.

ਸਦ੍ਧਾਧੁਰੇਨ ਅਭਿਨਿਵਿਸਿਤ੍ਵਾਤਿ ‘‘ਸਚੇ ਸਦ੍ਧਾਯ ਸਕ੍ਕਾ ਨਿਬ੍ਬਤ੍ਤੇਤੁਂ, ਨਿਬ੍ਬਤ੍ਤੇਸ੍ਸਾਮਿ ਲੋਕੁਤ੍ਤਰਮਗ੍ਗ’’ਨ੍ਤਿ ਏਵਂ ਸਦ੍ਧਾਧੁਰਵਸੇਨ ਅਭਿਨਿਵਿਸਿਤ੍ਵਾ ਵਿਪਸ੍ਸਨਂ ਪਟ੍ਠਪੇਤ੍ਵਾ. ਪਞ੍ਞਾਧੁਰੇਨ ਅਭਿਨਿਵਿਟ੍ਠੋਤਿ ‘‘ਸਚੇ ਪਞ੍ਞਾਯ ਸਕ੍ਕਾ, ਨਿਬ੍ਬਤ੍ਤੇਸ੍ਸਾਮਿ ਲੋਕੁਤ੍ਤਰਮਗ੍ਗ’’ਨ੍ਤਿ ਏਵਂ ਪਞ੍ਞਾਧੁਰਂ ਕਤ੍ਵਾ ਅਭਿਨਿਵਿਟ੍ਠੋ. ਯਥਾਵੁਤ੍ਤਮੇਵ ਅਟ੍ਠਵਿਧਤ੍ਤਂ ਕੋਲਂਕੋਲਸਤ੍ਤਕ੍ਖਤ੍ਤੁਪਰਮੇਸੁ ਅਤਿਦਿਸਨ੍ਤੋ ‘‘ਤਥਾ ਕੋਲਂਕੋਲਾ ਸਤ੍ਤਕ੍ਖਤ੍ਤੁਪਰਮਾ ਚਾ’’ਤਿ ਆਹ. ਵੁਤ੍ਤਨਯੇਨੇਵ ਅਟ੍ਠ ਕੋਲਂਕੋਲਾ, ਅਟ੍ਠ ਸਤ੍ਤਕ੍ਖਤ੍ਤੁਪਰਮਾਤਿ ਵੁਤ੍ਤਂ ਹੋਤਿ.

ਤਤ੍ਥ ਸਤ੍ਤਕ੍ਖਤ੍ਤੁਂ ਪਰਮਾ ਭਵੂਪਪਤ੍ਤਿ ਅਤ੍ਤਭਾਵਗ੍ਗਹਣਂ ਅਸ੍ਸ, ਤਤੋ ਪਰਂ ਅਟ੍ਠਮਂ ਭਵਂ ਨਾਦਿਯਤੀਤਿ ਸਤ੍ਤਕ੍ਖਤ੍ਤੁਪਰਮੋ. ਭਗਵਤਾ ਗਹਿਤਨਾਮਵਸੇਨੇਵ ਚੇਤਾਨਿ ਅਰਿਯਾਯ ਜਾਤਿਯਾ ਜਾਤਾਨਂ ਤੇਸਂ ਨਾਮਾਨਿ ਜਾਤਾਨਿ ਕੁਮਾਰਾਨਂ ਮਾਤਾਪਿਤੂਹਿ ਗਹਿਤਨਾਮਾਨਿ ਵਿਯ. ਏਤ੍ਤਕਞ੍ਹਿ ਠਾਨਂ ਗਤੋ ਏਕਬੀਜੀ ਨਾਮ ਹੋਤਿ, ਏਤ੍ਤਕਂ ਕੋਲਂਕੋਲੋ, ਏਤ੍ਤਕਂ ਸਤ੍ਤਕ੍ਖਤ੍ਤੁਪਰਮੋਤਿ ਭਗਵਤਾ ਏਤੇਸਂ ਨਾਮਂ ਗਹਿਤਂ. ਨਿਯਮਤੋ ਪਨ ਅਯਂ ਏਕਬੀਜੀ, ਅਯਂ ਕੋਲਂਕੋਲੋ, ਅਯਂ ਸਤ੍ਤਕ੍ਖਤ੍ਤੁਪਰਮੋਤਿ ਨਤ੍ਥਿ. ਕੋ ਪਨ ਨੇਸਂ ਏਤਂ ਪਭੇਦਂ ਨਿਯਮੇਤੀਤਿ? ਕੇਚਿ ਤਾਵ ਥੇਰਾ ‘‘ਪੁਬ੍ਬਹੇਤੁ ਨਿਯਮੇਤੀ’’ਤਿ ਵਦਨ੍ਤਿ, ਕੇਚਿ ਪਠਮਮਗ੍ਗੋ, ਕੇਚਿ ਉਪਰਿ ਤਯੋ ਮਗ੍ਗਾ, ਕੇਚਿ ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾਤਿ.

ਤਤ੍ਥ ‘‘ਪੁਬ੍ਬਹੇਤੁ ਨਿਯਮੇਤੀ’’ਤਿ ਵਾਦੇ ਪਠਮਮਗ੍ਗਸ੍ਸ ਉਪਨਿਸ੍ਸਯੋ ਕਤੋ ਨਾਮ ਹੋਤਿ, ‘‘ਉਪਰਿ ਤਯੋ ਮਗ੍ਗਾ ਨਿਰੁਪਨਿਸ੍ਸਯਾ ਉਪ੍ਪਨ੍ਨਾ’’ਤਿ ਵਚਨਂ ਆਪਜ੍ਜਤਿ. ‘‘ਪਠਮਮਗ੍ਗੋ ਨਿਯਮੇਹੀ’’ਤਿ ਵਾਦੇ ਉਪਰਿ ਤਿਣ੍ਣਂ ਮਗ੍ਗਾਨਂ ਨਿਰਤ੍ਥਕਤਾ ਆਪਜ੍ਜਤਿ. ‘‘ਉਪਰਿ ਤਯੋ ਮਗ੍ਗਾ ਨਿਯਮੇਨ੍ਤੀ’’ਤਿ ਵਾਦੇ ਪਠਮਮਗ੍ਗੇ ਅਨੁਪ੍ਪਨ੍ਨੇਯੇਵ ਉਪਰਿ ਤਯੋ ਮਗ੍ਗਾ ਉਪ੍ਪਨ੍ਨਾਤਿ ਆਪਜ੍ਜਤੀਤਿ. ‘‘ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾ ਨਿਯਮੇਤੀ’’ਤਿ ਵਾਦੋ ਪਨ ਯੁਜ੍ਜਤਿ. ਸਚੇ ਹਿ ਉਪਰਿ ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾ ਬਲਵਤੀ ਹੋਤਿ, ਏਕਬੀਜੀ ਨਾਮ ਹੋਤਿ, ਤਤੋ ਮਨ੍ਦਤਰਾਯ ਕੋਲਂਕੋਲੋ, ਤਤੋ ਮਨ੍ਦਤਰਾਯ ਸਤ੍ਤਕ੍ਖਤ੍ਤੁਪਰਮੋਤਿ.

ਏਕਚ੍ਚੋ ਹਿ ਸੋਤਾਪਨ੍ਨੋ ਵਟ੍ਟਜ੍ਝਾਸਯੋ ਹੋਤਿ ਵਟ੍ਟਾਭਿਰਤੋ, ਪੁਨਪ੍ਪੁਨਂ ਵਟ੍ਟਸ੍ਮਿਂਯੇਵ ਚਰਤਿ ਸਨ੍ਦਿਸ੍ਸਤਿ. ਅਨਾਥਪਿਣ੍ਡਿਕੋ ਸੇਟ੍ਠਿ, ਵਿਸਾਖਾ ਉਪਾਸਿਕਾ, ਚੂਲ਼ਰਥਮਹਾਰਥਾ ਦੇਵਪੁਤ੍ਤਾ, ਅਨੇਕਵਣ੍ਣੋ ਦੇਵਪੁਤ੍ਤੋ, ਸਕ੍ਕੋ ਦੇਵਰਾਜਾ, ਨਾਗਦਤ੍ਤੋ ਦੇਵਪੁਤ੍ਤੋਤਿ ਇਮੇ ਹਿ ਏਤ੍ਤਕਾ ਜਨਾ ਵਟ੍ਟਜ੍ਝਾਸਯਾ ਵਟ੍ਟਾਭਿਰਤਾ ਆਦਿਤੋ ਪਟ੍ਠਾਯ ਛ ਦੇਵਲੋਕੇ ਸੋਧੇਤ੍ਵਾ ਅਕਨਿਟ੍ਠੇ ਠਤ੍ਵਾ ਪਰਿਨਿਬ੍ਬਾਯਿਸ੍ਸਨ੍ਤਿ, ਇਮੇ ਇਧ ਨ ਗਹਿਤਾ. ਨ ਕੇਵਲਞ੍ਚਿਮੇਵ, ਯੋਪਿ ਮਨੁਸ੍ਸੇਸੁਯੇਵ ਸਤ੍ਤਕ੍ਖਤ੍ਤੁਂ ਸਂਸਰਿਤ੍ਵਾ ਅਰਹਤ੍ਤਂ ਪਾਪੁਣਾਤਿ, ਯੋਪਿ ਦੇਵਲੋਕੇ ਨਿਬ੍ਬਤ੍ਤੋ ਦੇਵੇਸੁਯੇਵ ਸਤ੍ਤਕ੍ਖਤ੍ਤੁਂ ਅਪਰਾਪਰਂ ਸਂਸਰਿਤ੍ਵਾ ਅਰਹਤ੍ਤਂ ਪਾਪੁਣਾਤਿ. ਇਮੇਪਿ ਇਧ ਨ ਗਹਿਤਾ, ਕਾਲੇਨ ਦੇਵੇ, ਕਾਲੇਨ ਮਨੁਸ੍ਸੇ ਸਂਸਰਿਤ੍ਵਾ ਪਨ ਅਰਹਤ੍ਤਂ ਪਾਪੁਣਨ੍ਤੋਵ ਇਧ ਗਹਿਤੋ, ਤਸ੍ਮਾ ‘‘ਸਤ੍ਤਕ੍ਖਤ੍ਤੁਪਰਮੋ’’ਤਿ ਇਦਂ ਇਧਟ੍ਠਕਵੋਕਿਣ੍ਣਭਵੂਪਪਤ੍ਤਿਕਸੁਕ੍ਖਵਿਪਸ੍ਸਕਸ੍ਸ ਨਾਮਂ ਕਥਿਤਨ੍ਤਿ ਵੇਦਿਤਬ੍ਬਂ.

‘‘ਸਕਿਦੇਵ ਇਮਂ ਲੋਕਂ ਆਗਨ੍ਤ੍ਵਾ’’ਤਿ (ਪੁ. ਪ. ੩੪) ਵਚਨਤੋ ਪਞ੍ਚਸੁ ਸਕਦਾਗਾਮੀਸੁ ਚਤ੍ਤਾਰੋ ਵਜ੍ਜੇਤ੍ਵਾ ਏਕੋਵ ਗਹਿਤੋ. ਏਕਚ੍ਚੋ ਹਿ ਇਧ ਸਕਦਾਗਾਮਿਫਲਂ ਪਤ੍ਵਾ ਇਧੇਵ ਪਰਿਨਿਬ੍ਬਾਯਤਿ, ਏਕਚ੍ਚੋ ਇਧ ਪਤ੍ਵਾ ਦੇਵਲੋਕੇ ਪਰਿਨਿਬ੍ਬਾਯਤਿ, ਏਕਚ੍ਚੋ ਦੇਵਲੋਕੇ ਪਤ੍ਵਾ ਤਤ੍ਥੇਵ ਪਰਿਨਿਬ੍ਬਾਯਤਿ, ਏਕਚ੍ਚੋ ਦੇਵਲੋਕੇ ਪਤ੍ਵਾ ਇਧੂਪਪਜ੍ਜਿਤ੍ਵਾ ਪਰਿਨਿਬ੍ਬਾਯਤਿ. ਇਮੇ ਚਤ੍ਤਾਰੋਪਿ ਇਧ ਨ ਗਹਿਤਾ. ਯੋ ਪਨ ਇਧ ਪਤ੍ਵਾ ਦੇਵਲੋਕੇ ਯਾਵਤਾਯੁਕਂ ਵਸਿਤ੍ਵਾ ਪੁਨ ਇਧੂਪਪਜ੍ਜਿਤ੍ਵਾ ਪਰਿਨਿਬ੍ਬਾਯਿਸ੍ਸਤਿ, ਅਯਂ ਏਕੋਵ ਇਧ ਗਹਿਤੋਤਿ ਵੇਦਿਤਬ੍ਬੋ.

ਇਦਾਨਿ ਤਸ੍ਸ ਪਭੇਦਂ ਦਸ੍ਸੇਨ੍ਤੋ ‘‘ਤੀਸੁ ਪਨ ਵਿਮੋਕ੍ਖੇਸੂ’’ਤਿਆਦਿਮਾਹ. ਇਮਸ੍ਸ ਪਨ ਸਕਦਾਗਾਮਿਨੋ ਏਕਬੀਜਿਨਾ ਸਦ੍ਧਿਂ ਕਿਂ ਨਾਨਾਕਰਣਨ੍ਤਿ? ਏਕਬੀਜਿਸ੍ਸ ਏਕਾਵ ਪਟਿਸਨ੍ਧਿ, ਸਕਦਾਗਾਮਿਸ੍ਸ ਦ੍ਵੇ ਪਟਿਸਨ੍ਧਿਯੋ, ਇਦਂ ਤੇਸਂ ਨਾਨਾਕਰਣਂ. ਸੁਞ੍ਞਤਵਿਮੋਕ੍ਖੇਨ ਵਿਮੁਤ੍ਤਖੀਣਾਸਵੋ ਪਟਿਪਦਾਵਸੇਨ ਚਤੁਬ੍ਬਿਧੋ ਹੋਤਿ, ਤਥਾ ਅਨਿਮਿਤ੍ਤਅਪ੍ਪਣਿਹਿਤਵਿਮੋਕ੍ਖੇਹੀਤਿ ਏਵਂ ਦ੍ਵਾਦਸ ਅਰਹਨ੍ਤਾ ਹੋਨ੍ਤੀਤਿ ਆਹ ‘‘ਯਥਾ ਪਨ ਸਕਦਾਗਾਮਿਨੋ, ਤਥੇਵ ਅਰਹਨ੍ਤੋ ਦ੍ਵਾਦਸ ਵੇਦਿਤਬ੍ਬਾ’’ਤਿ. ਅਟ੍ਠਮਨਵਮਦਸਮਾਨਿ ਉਤ੍ਤਾਨਤ੍ਥਾਨੇਵ.

ਦੁਤਿਯਸਿਕ੍ਖਾਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੧੧. ਸਙ੍ਕਵਾਸੁਤ੍ਤਵਣ੍ਣਨਾ

੯੨. ਏਕਾਦਸਮੇ ਵਿਹਾਰਪਟਿਬਦ੍ਧਨਵਕਮ੍ਮਾਦਿਭਾਰਂ ਹਰਤਿ ਪਵਤ੍ਤੇਤੀਤਿ ਭਾਰਹਾਰੋ. ਤੇਨੇਵਾਹ ‘‘ਨਵੇ ਆਵਾਸੇ ਸਮੁਟ੍ਠਾਪੇਤਿ, ਪੁਰਾਣੇ ਪਟਿਜਗ੍ਗਤੀ’’ਤਿ. ਸਿਕ੍ਖਿਤਬ੍ਬਤੋ ਸਿਕ੍ਖਾ, ਪਜ੍ਜਿਤਬ੍ਬਤੋ, ਪਜ੍ਜਨ੍ਤਿ ਏਤੇਹੀਤਿ ਵਾ ਪਦਾਨਿ, ਸਿਕ੍ਖਾਯੇਵ ਪਦਾਨਿ ਸਿਕ੍ਖਾਪਦਾਨੀਤਿ ਆਹ ‘‘ਸਿਕ੍ਖਾਸਙ੍ਖਾਤੇਹਿ ਪਦੇਹੀ’’ਤਿ. ਦਸ੍ਸੇਤੀਤਿ ਪਚ੍ਚਕ੍ਖਤੋ ਦਸ੍ਸੇਤਿ, ਹਤ੍ਥਾਮਲਕਂ ਵਿਯ ਪਾਕਟੇ ਵਿਭੂਤੇ ਕਤ੍ਵਾ ਵਿਭਾਵੇਤਿ. ਗਣ੍ਹਾਪੇਤੀਤਿ ਤੇ ਧਮ੍ਮੇ ਮਨਸਾ ਅਨੁਪਕ੍ਖਿਤੇ ਦਿਟ੍ਠਿਯਾ ਸੁਪ੍ਪਟਿਵਿਦ੍ਧੇ ਕਾਰੇਨ੍ਤੋ ਉਗ੍ਗਣ੍ਹਾਪੇਤਿ. ਸਮੁਸ੍ਸਾਹੇਤੀਤਿ ਸਮਾਧਿਮ੍ਹਿ ਉਸ੍ਸਾਹਂ ਜਨੇਤਿ. ਪਟਿਲਦ੍ਧਗੁਣੇਹੀਤਿ ਤਾਯ ਦੇਸਨਾਯ ਤਨ੍ਨਿਸ੍ਸਯਪਚ੍ਚਤ੍ਤਪੁਰਿਸਕਾਰੇਨ ਚ ਤੇਸਂ ਪਟਿਵਿਦ੍ਧਗੁਣੇਹਿ. ਵੋਦਾਪੇਤੀਤਿ ਤੇਸਂ ਚਿਤ੍ਤਸਨ੍ਤਾਨਂ ਅਸ੍ਸਦ੍ਧਿਯਾਦਿਕਿਲੇਸਮਲਾਪਗਮਨੇਨ ਪਭਸ੍ਸਰਂ ਕਰੋਤਿ. ਸਣ੍ਹਂ ਸਣ੍ਹਂ ਕਥੇਤੀਤਿ ਅਤਿਵਿਯ ਸੁਖੁਮਂ ਕਤ੍ਵਾ ਕਥੇਤਿ.

ਅਚ੍ਚਯਨਂ ਸਾਧੁਮਰਿਯਾਦਂ ਮਦ੍ਦਿਤ੍ਵਾ ਵੀਤਿਕ੍ਕਮਨਂ ਅਚ੍ਚਯੋਤਿ ਆਹ ‘‘ਅਪਰਾਧੋ’’ਤਿ. ਅਚ੍ਚੇਤਿ ਅਤਿਕ੍ਕਮਤਿ ਏਤੇਨਾਤਿ ਵਾ ਅਚ੍ਚਯੋ, ਵੀਤਿਕ੍ਕਮਸ੍ਸ ਪਵਤ੍ਤਨਕੋ ਅਕੁਸਲਧਮ੍ਮੋ. ਸੋ ਏਵ ਅਪਰਜ੍ਝਤਿ ਏਤੇਨਾਤਿ ਅਪਰਾਧੋ. ਸੋ ਹਿ ਅਪਰਜ੍ਝਨ੍ਤਂ ਪੁਰਿਸਂ ਅਧਿਭਵਿਤ੍ਵਾ ਪਵਤ੍ਤਤਿ. ਤੇਨਾਹ ‘‘ਅਤਿਕ੍ਕਮ੍ਮ ਅਧਿਭਵਿਤ੍ਵਾ ਪਵਤ੍ਤੋ’’ਤਿ. ਪਟਿਗ੍ਗਣ੍ਹਾਤੂਤਿ ਅਧਿਵਾਸਨਵਸੇਨ ਸਮ੍ਪਟਿਚ੍ਛਤੂਤਿ ਅਤ੍ਥੋਤਿ ਆਹ ‘‘ਖਮਤੂ’’ਤਿ. ਸਦੇਵਕੇਨ ਲੋਕੇਨ ਨਿਸ੍ਸਰਣਨ੍ਤਿ ਅਰਣੀਯਤੋ ਅਰਿਯੋ, ਤਥਾਗਤੋਤਿ ਆਹ ‘‘ਅਰਿਯਸ੍ਸ ਵਿਨਯੇਤਿ ਬੁਦ੍ਧਸ੍ਸ ਭਗਵਤੋ ਸਾਸਨੇ’’ਤਿ. ਪੁਗ੍ਗਲਾਧਿਟ੍ਠਾਨਂ ਕਰੋਨ੍ਤੋਤਿ ਕਾਮਂ ‘‘ਵੁਦ੍ਧਿ ਹੇਸਾ’’ਤਿ ਧਮ੍ਮਾਧਿਟ੍ਠਾਨਵਸੇਨ ਵਾਕ੍ਯਂ ਆਰਦ੍ਧਂ, ਤਥਾਪਿ ਦੇਸਨਂ ਪਨ ਪੁਗ੍ਗਲਾਧਿਟ੍ਠਾਨਂ ਕਰੋਨ੍ਤੋ ‘‘ਸਂਵਰਂ ਆਪਜ੍ਜਤੀ’’ਤਿ ਆਹਾਤਿ ਯੋਜਨਾ.

ਸਙ੍ਕਵਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਸਮਣਵਗ੍ਗਵਣ੍ਣਨਾ ਨਿਟ੍ਠਿਤਾ.