੩-੪. ਚਿਨ੍ਤੀਸੁਤ੍ਤਾਦਿਵਣ੍ਣਨਾ

੩-੪. ਤਤਿਯੇ ਏਤੇਹੀਤਿ ਦੁਚ੍ਚਿਨ੍ਤਿਤਚਿਨ੍ਤਿਤਾਦੀਹਿ. ਏਤੇਨ ਲਕ੍ਖਣਸਦ੍ਦਸ੍ਸ ਸਰਣਤ੍ਥਤਮਾਹ. ਤਾਨੇਵਾਤਿ ਲਕ੍ਖਣਾਨਿ ਏਵ. ਅਸ੍ਸਾਤਿ ਬਾਲਸ੍ਸ. ਬਾਲੋ ਅਯਨ੍ਤਿ ਨਿਮੀਯਤਿ ਸਞ੍ਜਾਨੀਯਤਿ ਏਤੇਹੀਤਿ ਬਾਲਨਿਮਿਤ੍ਤਾਨਿ. ਅਪਦਾਨਂ ਵੁਚ੍ਚਤਿ, ਵਿਖ੍ਯਾਤਂ ਕਮ੍ਮਂ, ਦੁਚ੍ਚਿਨ੍ਤਿਤਚਿਨ੍ਤਿਤਾਦੀਨਿ ਚ ਬਾਲੇ ਵਿਖ੍ਯਾਤਾਨਿ ਅਸਾਧਾਰਣਭਾਵੇਨ. ਤਸ੍ਮਾ ‘‘ਬਾਲਸ੍ਸ ਅਪਦਾਨਾਨੀ’’ਤਿ. ਅਭਿਜ੍ਝਾਦੀਹਿ ਦੁਟ੍ਠਂ ਦੂਸਿਤਂ ਚਿਨ੍ਤਿਤਂ ਦੁਚ੍ਚਿਨ੍ਤਿਤਂ, ਤਂ ਚਿਨ੍ਤੇਤੀਤਿ ਦੁਚ੍ਚਿਨ੍ਤਿਤਚਿਨ੍ਤੀ. ਲੋਭਾਦੀਹਿ ਦੁਟ੍ਠਂ ਭਾਸਿਤਂ ਮੁਸਾਵਾਦਾਦਿਂ ਭਾਸਤੀਤਿ ਦੁਬ੍ਭਾਸਿਤਭਾਸੀ. ਤੇਸਂਯੇਵ ਵਸੇਨ ਕਤ੍ਤਬ੍ਬਤੋ ਦੁਕ੍ਕਟਕਮ੍ਮਂ ਪਾਣਾਤਿਪਾਤਾਦਿਂ ਕਰੋਤੀਤਿ ਦੁਕ੍ਕਟਕਮ੍ਮਕਾਰੀ. ਤੇਨਾਹ ‘‘ਚਿਨ੍ਤਯਨ੍ਤੋ’’ਤਿਆਦਿ. ਵੁਤ੍ਤਾਨੁਸਾਰੇਨਾਤਿ ‘‘ਬਾਲੋ ਅਯ’’ਨ੍ਤਿਆਦਿਨਾ ਵੁਤ੍ਤਸ੍ਸ ਅਤ੍ਥਵਚਨਸ੍ਸ ‘‘ਪਣ੍ਡਿਤੋ ਅਯਨ੍ਤਿ ਏਤੇਹਿ ਲਕ੍ਖੀਯਤੀ’’ਤਿਆਦਿਨਾ ਅਨੁਸ੍ਸਰਣੇਨ. ਮਨੋਸੁਚਰਿਤਾਦੀਨਂ ਵਸੇਨਾਤਿ ‘‘ਚਿਨ੍ਤਯਨ੍ਤੋ ਅਨਭਿਜ੍ਝਾਬ੍ਯਾਪਾਦਸਮ੍ਮਾਦਸ੍ਸਨਵਸੇਨ ਸੁਚਿਨ੍ਤਿਤਮੇਵ ਚਿਨ੍ਤੇਤੀ’’ਤਿਆਦਿਨਾ ਮਨੋਸੁਚਰਿਤਾਦੀਨਂ ਤਿਣ੍ਣਂ ਸੁਚਰਿਤਾਨਂ ਵਸੇਨ ਯੋਜੇਤਬ੍ਬਾਨਿ. ਚਤੁਤ੍ਥਂ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵ.

ਚਿਨ੍ਤੀਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.