(੧੩) ੩. ਕੁਸਿਨਾਰਵਗ੍ਗੋ
੧-੨. ਕੁਸਿਨਾਰਸੁਤ੍ਤਾਦਿਵਣ੍ਣਨਾ
੧੨੪-੧੨੫. ਤਤਿਯਸ੍ਸ ਪਠਮੇ ਤਣ੍ਹਾਗੇਧੇਨ ਗਥਿਤੋਤਿ ਤਣ੍ਹਾਬਨ੍ਧਨੇਨ ਬਦ੍ਧੋ. ਤਣ੍ਹਾਮੁਚ੍ਛਨਾਯਾਤਿ ਤਣ੍ਹਾਯ ਵਸੇਨ ਮੁਚ੍ਛਾਪਤ੍ਤਿਯਾ. ਮੁਚ੍ਛਿਤੋਤਿ ਮੁਚ੍ਛਂ ਮੋਹਂ ਪਮਾਦਂ ਆਪਨ੍ਨੋ. ਅਜ੍ਝੋਪਨ੍ਨੋਤਿ ਅਧਿਓਪਨ੍ਨੋ. ਤਣ੍ਹਾਯ ਅਧਿਭਵਿਤ੍ਵਾ ਅਜ੍ਝੋਤ੍ਥਟੋ ਗਿਲਿਤ੍ਵਾ ਪਰਿਨਿਟ੍ਠਪੇਤ੍ਵਾ ਵਿਯ ਠਿਤੋ. ਤੇਨਾਹ ‘‘ਅਜ੍ਝੋਪਨ੍ਨੋਤਿ ਤਣ੍ਹਾਯ ਗਿਲਿਤ੍ਵਾ ਪਰਿਨਿਟ੍ਠਪੇਤ੍ਵਾ ਪਵਤ੍ਤੋ’’ਤਿ. ਅਨਾਦੀਨਵਦਸ੍ਸਾਵੀਤਿ ਗਥਿਤਾਦਿਭਾਵੇਨ ਪਰਿਭੋਗੇ ਆਦੀਨਵਮਤ੍ਤਮ੍ਪਿ ਨ ਪਸ੍ਸਤਿ. ਨਿਸ੍ਸਰਣਪਞ੍ਞੋਤਿ ਅਯਮਤ੍ਥੋ ਆਹਾਰਪਰਿਭੋਗੇਤਿ ਤਤ੍ਥ ਪਯੋਜਨਪਰਿਚ੍ਛੇਦਿਕਾ ‘‘ਯਾਵਦੇਵ ਇਮਸ੍ਸ ਕਾਯਸ੍ਸ ਠਿਤਿਯਾ’’ਤਿਆਦਿਨਾ (ਮ. ਨਿ. ੧.੨੩; ੨.੨੪; ੩.੭੫; ਸਂ. ਨਿ. ੪.੧੨੦; ਅ. ਨਿ. ੬.੫੮; ੮.੯) ਪਵਤ੍ਤਾ ਆਹਾਰਪਟਿਬਦ੍ਧਛਨ੍ਦਰਾਗਨਿਸ੍ਸਰਣਭੂਤਾ ਪਞ੍ਞਾ ਅਸ੍ਸ ਅਤ੍ਥੀਤਿ ਨਿਸ੍ਸਰਣਪਞ੍ਞੋ. ਸੇਸਮੇਤ੍ਥ ਉਤ੍ਤਾਨਮੇਵ. ਦੁਤਿਯੇ ਨਤ੍ਥਿ ਵਤ੍ਤਬ੍ਬਂ.
ਕੁਸਿਨਾਰਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੩. ਗੋਤਮਕਚੇਤਿਯਸੁਤ੍ਤਵਣ੍ਣਨਾ
੧੨੬. ਤਤਿਯੇ ਸਮ੍ਬਹੁਲਾਤਿ ਪਞ੍ਚਸਤਮਤ੍ਤਾ. ਪਞ੍ਚਸਤਾ ਕਿਰ ਬ੍ਰਾਹ੍ਮਣਾ ਤਿਣ੍ਣਂ ਵੇਦਾਨਂ ਪਾਰਗੂ ਅਪਰਭਾਗੇ ਭਗਵਤੋ ਧਮ੍ਮਦੇਸਨਂ ਸੁਤ੍ਵਾ ਕਾਮੇਸੁ ਆਦੀਨਵਂ ਨੇਕ੍ਖਮ੍ਮੇ ਚ ਆਨਿਸਂਸਂ ਪਸ੍ਸਮਾਨਾ ਭਗਵਤੋ ਸਨ੍ਤਿਕੇ ਪਬ੍ਬਜਿਤ੍ਵਾ ਨ ਚਿਰਸ੍ਸੇਵ ਸਬ੍ਬਂ ਬੁਦ੍ਧਵਚਨਂ ਉਗ੍ਗਣ੍ਹਿਤ੍ਵਾ ਪਰਿਯਤ੍ਤਿਂ ਨਿਸ੍ਸਾਯ ਮਾਨਂ ਉਪ੍ਪਾਦੇਸੁਂ – ‘‘ਯਂ ਯਂ ਭਗਵਾ ਕਥੇਤਿ, ਤਂ ਤਂ ਮਯਂ ਖਿਪ੍ਪਮੇਵ ਜਾਨਾਮ. ਭਗਵਾ ਹਿ ਇਤ੍ਥਿਲਿਙ੍ਗਾਦੀਨਿ ਤੀਣਿ ਲਿਙ੍ਗਾਨਿ, ਨਾਮਾਦੀਨਿ ਚਤ੍ਤਾਰਿ ਪਦਾਨਿ, ਪਠਮਾਦਯੋ ਸਤ੍ਤ ਵਿਭਤ੍ਤਿਯੋ ਮੁਞ੍ਚਿਤ੍ਵਾ ਨ ਕਿਞ੍ਚਿ ਕਥੇਤਿ, ਏਵਂ ਕਥਿਤੇ ਚ ਅਮ੍ਹਾਕਂ ਗਣ੍ਠਿਪਦਂ ਨਾਮ ਨਤ੍ਥੀ’’ਤਿ, ਤੇ ਭਗਵਤਿ ਅਗਾਰਵਾ ਹੁਤ੍ਵਾ ਤਤੋ ਪਟ੍ਠਾਯ ਭਗਵਤੋ ਉਪਟ੍ਠਾਨਮ੍ਪਿ ਧਮ੍ਮਸ੍ਸਵਨਮ੍ਪਿ ਅਭਿਣ੍ਹਂ ਨ ਗਚ੍ਛਨ੍ਤਿ. ਤੇ ਸਨ੍ਧਾਯ ਵੁਤ੍ਤਂ ‘‘ਸਮ੍ਬਹੁਲਾ ਕਿਰ ਬ੍ਰਾਹ੍ਮਣਪਬ੍ਬਜਿਤਾ…ਪੇ… ਧਮ੍ਮਸ੍ਸਵਨਂ ਨ ਗਚ੍ਛਨ੍ਤੀ’’ਤਿ. ਮੁਖਪਟਿਞ੍ਞਂ ਗਹੇਤ੍ਵਾਤਿ ‘‘ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ’’ਤਿਆਦਿਨਾ ਤਮਤ੍ਥਂ ਪਟਿਪੁਚ੍ਛਿਤ੍ਵਾ ‘‘ਸਚ੍ਚਂ ਭਗਵਾ’’ਤਿ ਤੇਹਿ ਭਿਕ੍ਖੂਹਿ ਵੁਤ੍ਤਂ ਪਟਿਵਚਨਂ ਗਹੇਤ੍ਵਾ. ਤਞ੍ਹਿ ਅਤ੍ਤਨੋ ਮੁਖੇਨੇਵ ਪਟਿਞ੍ਞਾਤਤ੍ਤਾ ‘‘ਮੁਖਪਟਿਞ੍ਞਾ’’ਤਿ ਵੁਚ੍ਚਤਿ.
ਨੇਵ ਆਗਤਟ੍ਠਾਨਂ ਨ ਗਤਟ੍ਠਾਨਂ ਅਦ੍ਦਸਂਸੁ. ਕਸ੍ਮਾ? ਅਞ੍ਞਾਣਤੋ. ਤੇ ਕਿਰ ਤਸ੍ਸ ਸੁਤ੍ਤਸ੍ਸ ਅਤ੍ਥਂ ਨ ਜਾਨਿਂਸੁ. ਤੇਸਞ੍ਹਿ ਤਸ੍ਮਿਂ ਸਮਯੇ ਵਿਚਿਤ੍ਰਨਯਂ ਦੇਸਨਾਵਿਲਾਸਯੁਤ੍ਤਮ੍ਪਿ ਤਂ ਸੁਤ੍ਤਂ ਘਨਪੁਥੁਲੇਨ ਦੁਸ੍ਸਪਟ੍ਟੇਨ ਮੁਖਂ ਬਦ੍ਧਂ ਕਤ੍ਵਾ ਪੁਰਤੋ ਠਪਿਤਮਨੁਞ੍ਞਭੋਜਨਂ ਵਿਯ ਅਹੋਸਿ. ਨਨੁ ਚ ਭਗਵਾ ਅਤ੍ਤਨਾ ਦੇਸਿਤਂ ਧਮ੍ਮਂ ਪਰੇ ਞਾਪੇਤੁਂ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖੇਯ੍ਯਾਨਿ ਪਾਰਮਿਯੋ ਪੂਰੇਤ੍ਵਾ ਸਬ੍ਬਞ੍ਞੁਤਂ ਪਤ੍ਤੋ, ਸੋ ਕਸ੍ਮਾ ਯਥਾ ਤੇ ਨ ਜਾਨਨ੍ਤਿ, ਤਥਾ ਦੇਸੇਤੀਤਿ? ਤੇਸਂ ਮਾਨਭਞ੍ਜਨਤ੍ਥਂ. ਭਗਵਾ ਹਿ ‘‘ਅਭਬ੍ਬਾ ਇਮੇ ਇਮਂ ਮਾਨਖਿਲਂ ਅਨੁਪਹਚ੍ਚ ਮਗ੍ਗਂ ਵਾ ਫਲਂ ਵਾ ਸਚ੍ਛਿਕਾਤੁ’’ਨ੍ਤਿ ਤੇਸਂ ਸੁਤਪਰਿਯਤ੍ਤਿਂ ਨਿਸ੍ਸਾਯ ਉਪ੍ਪਨ੍ਨਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਦੇਸਨਾਕੁਸਲੋ ਮਾਨਭਞ੍ਜਨਤ੍ਥਂ ‘‘ਸਬ੍ਬਧਮ੍ਮਮੂਲਪਰਿਯਾਯ’’ਨ੍ਤਿਆਦਿਨਾ ਮੂਲਪਰਿਯਾਯਸੁਤ੍ਤਂ (ਮ. ਨਿ. ੧.੧) ਅਭਾਸਿ.
ਸਮ੍ਮਾਸਮ੍ਬੁਦ੍ਧੋ ‘‘ਮਯ੍ਹਂ ਕਥਾ ਨਿਯ੍ਯਾਤੀ’’ਤਿ ਮੁਖਸਮ੍ਪਤ੍ਤਮੇਵ ਕਥੇਤੀਤਿ ਚਿਨ੍ਤਯਿਂਸੂਤਿ ਇਦਂ ਅਙ੍ਗੁਤ੍ਤਰਭਾਣਕਾਨਂ ਵਲ਼ਞ੍ਜਨਕਤਨ੍ਤਿਨੀਹਾਰੇਨ ਵੁਤ੍ਤਂ. ਮਜ੍ਝਿਮਭਾਣਕਾ ਪਨ ਏਵਂ ਵਦਨ੍ਤਿ – ਏਵਂ ਮਾਨਭਞ੍ਜਨਤ੍ਥਂ ਦੇਸਿਤਞ੍ਚ ਪਨ ਤਂ ਸੁਤ੍ਤਂ ਸੁਤ੍ਵਾ ਤੇ ਭਿਕ੍ਖੂ ‘‘ਤਂਯੇਵ ਕਿਰ ਪਥਵਿਂ ਦਿਟ੍ਠਿਗਤਿਕੋ ਸਞ੍ਜਾਨਾਤਿ, ਸੇਖੋਪਿ ਅਰਹਾਪਿ ਤਥਾਗਤੋਪਿ ਅਭਿਜਾਨਾਤਿ, ਕਿ ਨਾਮਿਦਂ ਕਥਂ ਨਾਮਿਦ’’ਨ੍ਤਿ ਚਿਨ੍ਤੇਨ੍ਤਾ ‘‘ਪੁਬ੍ਬੇ ਮਯਂ ਭਗਵਤਾ ਕਥਿਤਂ ਯਂਕਿਞ੍ਚਿ ਖਿਪ੍ਪਮੇਵ ਜਾਨਾਮ, ਇਦਾਨਿ ਪਨਿਮਸ੍ਸ ਮੂਲਪਰਿਯਾਯਸ੍ਸ ਅਨ੍ਤਂ ਵਾ ਕੋਟਿਂ ਵਾ ਨ ਜਾਨਾਮ ਨ ਪਸ੍ਸਾਮ, ਅਹੋ ਬੁਦ੍ਧਾ ਨਾਮ ਅਪ੍ਪਮੇਯ੍ਯਾ ਅਤੁਲਾ’’ਤਿ ਉਦ੍ਧਤਦਾਠਾ ਵਿਯ ਸਪ੍ਪਾ ਨਿਮ੍ਮਦਾ ਹੁਤ੍ਵਾ ਬੁਦ੍ਧੂਪਟ੍ਠਾਨਞ੍ਚ ਧਮ੍ਮਸ੍ਸਵਨਞ੍ਚ ਸਕ੍ਕਚ੍ਚਂ ਅਗਮਂਸੁ. ਤੇਨ ਸਮਯੇਨ ਧਮ੍ਮਸਭਾਯਂ ਸਨ੍ਨਿਸਿਨ੍ਨਾ ਭਿਕ੍ਖੂ ‘‘ਅਹੋ ਬੁਦ੍ਧਾਨਂ ਆਨੁਭਾਵੋ, ਤੇ ਨਾਮਬ੍ਰਾਹ੍ਮਣਪਬ੍ਬਜਿਤਾ ਤਥਾ ਮਾਨਮਦਮਤ੍ਤਾ ਭਗਵਤਾ ਮੂਲਪਰਿਯਾਯਦੇਸਨਾਯ ਨਿਹਤਮਾਨਾ ਕਤਾ’’ਤਿ ਕਥਂ ਸਮੁਟ੍ਠਾਪੇਸੁਂ. ਤਂ ਸੁਤ੍ਵਾ ਭਗਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਅਹਂ ਏਵਂ ਇਮੇ ਮਾਨਪਗ੍ਗਹਿਤਸੀਸੇ ਚਰਨ੍ਤੇ ਨਿਹਤਮਾਨੇ ਅਕਾਸਿ’’ਨ੍ਤਿ ਵਤ੍ਵਾ ਅਤੀਤਂ ਆਹਰਨ੍ਤੋ ‘‘ਭੂਤਪੁਬ੍ਬਂ, ਭਿਕ੍ਖਵੇ, ਅਞ੍ਞਤਰੋ ਦਿਸਾਪਾਮੋਕ੍ਖੋ ਬ੍ਰਾਹ੍ਮਣੋ ਬਾਰਾਣਸਿਯਂ ਪਟਿਵਸਤਿ ਤਿਣ੍ਣਂ ਵੇਦਾਨਂ ਪਾਰਗੂ ਸਨਿਘਣ੍ਟੁਕੇਟੁਭਾਨਂ ਸਾਕ੍ਖਰਪ੍ਪਭੇਦਾਨਂ ਇਤਿਹਾਸਪਞ੍ਚਮਾਨਂ ਪਦਕੋ ਵੇਯ੍ਯਾਕਰਣੋ ਲੋਕਾਯਤਮਹਾਪੁਰਿਸਲਕ੍ਖਣੇਸੁ ਅਨਵਯੋ, ਸੋ ਪਞ੍ਚਮਤ੍ਤਾਨਿ ਮਾਣਵਕਸਤਾਨਿ ਮਨ੍ਤੇ ਵਾਚੇਤਿ. ਪਣ੍ਡਿਤਮਾਣਵਕਾ ਬਹੁਞ੍ਚ ਗਣ੍ਹਨ੍ਤਿ ਲਹੁਞ੍ਚ, ਸੁਟ੍ਠੁ ਚ ਉਪਧਾਰੇਨ੍ਤੀ’’ਤਿਆਦਿਨਾ ਜਾਤਕਂ ਕਥੇਸਿ.
ਤਂ ਸੁਤ੍ਵਾ ਤੇ ਭਿਕ੍ਖੂ ‘‘ਪੁਬ੍ਬੇਪਿ ਮਯਂ ਮਾਨੇਨੇਵ ਉਪਹਤਾ’’ਤਿ ਭਿਯ੍ਯੋਸੋਮਤ੍ਤਾਯ ਨਿਹਤਮਾਨਾ ਹੁਤ੍ਵਾ ਅਤ੍ਤਨੋ ਉਪਕਾਰਕਮ੍ਮਟ੍ਠਾਨਪਰਾਯਣਾ ਅਹੇਸੁਂ. ਤਤੋ ਭਗਵਾ ਏਕਂ ਸਮਯਂ ਜਨਪਦਚਾਰਿਕਂ ਚਰਨ੍ਤੋ ਵੇਸਾਲਿਂ ਪਤ੍ਵਾ ਗੋਤਮਕੇ ਚੇਤਿਯੇ ਵਿਹਰਨ੍ਤੋ ਇਮੇਸਂ ਪਞ੍ਚਸਤਾਨਂ ਭਿਕ੍ਖੂਨਂ ਞਾਣਪਰਿਪਾਕਂ ਵਿਦਿਤ੍ਵਾ ਇਦਂ ਗੋਤਮਕਸੁਤ੍ਤਂ ਕਥੇਸਿ. ਇਦਞ੍ਚ ਸੁਤ੍ਤਂ ਸੁਤ੍ਵਾ ਤੇ ਪਞ੍ਚਸਤਾ ਭਿਕ੍ਖੂ ਤਸ੍ਮਿਂਯੇਵ ਆਸਨੇ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿਂਸੂਤਿ.
ਅਭਿਞ੍ਞਾਯਾਤਿ ਕੁਸਲਾਦਿਭੇਦਂ ਖਨ੍ਧਾਦਿਭੇਦਞ੍ਚ ਦੇਸੇਤਬ੍ਬਂ ਧਮ੍ਮਂ, ਵੇਨੇਯ੍ਯਾਨਞ੍ਚ ਆਸਯਾਨੁਸਯਚਰਿਯਾਧਿਮੁਤ੍ਤਿਆਦਿਭੇਦਂ, ਤਸ੍ਸ ਚ ਨੇਸਂ ਦੇਸੇਤਬ੍ਬਪ੍ਪਕਾਰਂ ਯਾਥਾਵਤੋ ਅਭਿਜਾਨਿਤ੍ਵਾਤਿ ਅਤ੍ਥੋ. ਇਮੇ ਪਞ੍ਚਕ੍ਖਨ੍ਧਾ ਦ੍ਵਾਦਸਾਯਤਨਾਨੀਤਿਆਦਿ ਪਨੇਤ੍ਥ ਨਿਦਸ੍ਸਨਮਤ੍ਤਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਸਪ੍ਪਚ੍ਚਯਨ੍ਤਿ ਸਕਾਰਣਂ, ਵੇਨੇਯ੍ਯਾਨਂ ਅਜ੍ਝਾਸਯੇਨ ਵਾ ਪੁਚ੍ਛਾਯ ਵਾ ਅਟ੍ਠੁਪ੍ਪਤ੍ਤਿਯਾ ਵਾ ਸਨਿਮਿਤ੍ਤਂ ਹੇਤੂਦਾਹਰਣਸਹਿਤਞ੍ਚਾਤਿ ਅਤ੍ਥੋ. ਰਾਗਾਦੀਨਂ ਪਟਿਹਰਣਂ ਪਟਿਹਾਰਿਯਂ, ਤਦੇਵ ਪਾਟਿਹਾਰਿਯਂ, ਸਹ ਪਾਟਿਹਾਰਿਯੇਨਾਤਿ ਸਪ੍ਪਾਟਿਹਾਰਿਯਂ. ਰਾਗਾਦਿਪ੍ਪਟਿਸੇਧਨਵਸੇਨੇਵ ਹਿ ਸਤ੍ਥਾ ਧਮ੍ਮਂ ਦੇਸੇਤਿ. ਤੇਨਾਹ ‘‘ਪਚ੍ਚਨੀਕਪਟਿਹਰਣੇਨ ਸਪ੍ਪਾਟਿਹਾਰਿਯਮੇਵ ਕਤ੍ਵਾ’’ਤਿ. ਅਪਰੇ ਪਨ ‘‘ਯਥਾਰਹਂ ਇਦ੍ਧਿਆਦੇਸਨਾਨੁਸਾਸਨਿਪਾਟਿਹਾਰਿਯਸਹਿਤ’’ਨ੍ਤਿ ਵਦਨ੍ਤਿ ਅਨੁਸਾਸਨਿਪਾਟਿਹਾਰਿਯਰਹਿਤਾ ਦੇਸਨਾ ਨਤ੍ਥੀਤਿ ਕਤ੍ਵਾ. ਸੇਸਮੇਤ੍ਥ ਉਤ੍ਤਾਨਮੇਵ.
ਗੋਤਮਕਚੇਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਭਰਣ੍ਡੁਕਾਲਾਮਸੁਤ੍ਤਵਣ੍ਣਨਾ
੧੨੭. ਚਤੁਤ੍ਥੇ ਆਲ਼ਾਰਕਾਲਾਮਕਾਲੇਤਿ ਆਲ਼ਾਰਕਾਲਾਮਾਨਂ ਧਰਮਾਨਕਾਲੇ. ਪਰਿਞ੍ਞਨ੍ਤਿ ਪਹਾਨਪਰਿਞ੍ਞਂ. ਸਾ ਹਿ ਸਮਤਿਕ੍ਕਮੋ, ਨ ਇਤਰਾ. ਤੇਨਾਹ ‘‘ਪਰਿਞ੍ਞਾ ਨਾਮ ਸਮਤਿਕ੍ਕਮੋ’’ਤਿ. ਏਤ੍ਥ ਚ ਪਠਮੋ ਸਤ੍ਥਾ ਰੂਪਾਵਚਰਸਮਾਪਤ੍ਤਿਲਾਭੀ ਦਟ੍ਠਬ੍ਬੋ, ਦੁਤਿਯੋ ਅਰੂਪਾਵਚਰਸਮਾਪਤ੍ਤਿਲਾਭੀ, ਤਤਿਯੋ ਸਮ੍ਮਾਸਮ੍ਬੁਦ੍ਧੋ ਦਟ੍ਠਬ੍ਬੋ. ਵੁਤ੍ਤਞ੍ਹੇਤਂ ਪੁਗ੍ਗਲਪਞ੍ਞਤ੍ਤਿਯਂ (ਪੁ. ਪ. ੧੩੦) –
‘‘ਯ੍ਵਾਯਂ ਸਤ੍ਥਾ ਕਾਮਾਨਂ ਪਰਿਞ੍ਞਂ ਪਞ੍ਞਾਪੇਤਿ, ਨ ਰੂਪਾਨਂ ਪਰਿਞ੍ਞਂ ਪਞ੍ਞਾਪੇਤਿ, ਨ ਵੇਦਨਾਨਂ ਪਰਿਞ੍ਞਂ ਪਞ੍ਞਾਪੇਤਿ, ਰੂਪਾਵਚਰਸਮਾਪਤ੍ਤਿਯਾ ਲਾਭੀ ਸਤ੍ਥਾ ਤੇਨ ਦਟ੍ਠਬ੍ਬੋ. ਯ੍ਵਾਯਂ ਸਤ੍ਥਾ ਕਾਮਾਨਞ੍ਚ ਪਰਿਞ੍ਞਂ ਪਞ੍ਞਾਪੇਤਿ, ਰੂਪਾਨਞ੍ਚ ਪਰਿਞ੍ਞਂ ਪਞ੍ਞਾਪੇਤਿ, ਨ ਵੇਦਨਾਨਂ ਪਰਿਞ੍ਞਂ ਪਞ੍ਞਾਪੇਤਿ, ਅਰੂਪਾਵਚਰਸਮਾਪਤ੍ਤਿਯਾ ਲਾਭੀ ਸਤ੍ਥਾ ਤੇਨ ਦਟ੍ਠਬ੍ਬੋ. ਯ੍ਵਾਯਂ ਸਤ੍ਥਾ ਕਾਮਾਨਞ੍ਚ ਪਰਿਞ੍ਞਂ ਪਞ੍ਞਾਪੇਤਿ, ਰੂਪਾਨਞ੍ਚ ਪਰਿਞ੍ਞਂ ਪਞ੍ਞਾਪੇਤਿ, ਵੇਦਨਾਨਞ੍ਚ ਪਰਿਞ੍ਞਂ ਪਞ੍ਞਾਪੇਤਿ, ਸਮ੍ਮਾਸਮ੍ਬੁਦ੍ਧੋ ਸਤ੍ਥਾ ਤੇਨ ਦਟ੍ਠਬ੍ਬੋ’’ਤਿ.
ਤਤ੍ਥ ਤਿਤ੍ਥਿਯਾ ਸਮਯਂ ਜਾਨਨ੍ਤਾ ਕਾਮਾਨਂ ਪਰਿਞ੍ਞਂ ਪਞ੍ਞਾਪੇਯ੍ਯੁਂ ਪਠਮਜ੍ਝਾਨਂ ਵਦਮਾਨਾ. ਰੂਪਾਨਂ ਪਰਿਞ੍ਞਂ ਪਞ੍ਞਾਪੇਯ੍ਯੁਂ ਅਰੂਪਰਾਗਂ ਵਦਮਾਨਾ. ਵੇਦਨਾਪਰਿਞ੍ਞਂ ਪਞ੍ਞਾਪੇਯ੍ਯੁਂ ਅਸਞ੍ਞਾਰਾਗਂ ਵਦਮਾਨਾ. ਤੇ ਪਨ ‘‘ਇਦਂ ਨਾਮ ਪਠਮਜ੍ਝਾਨਂ, ਅਯਂ ਰੂਪਭਵੋ, ਅਯਂ ਅਸਞ੍ਞਾਭਵੋ’’ਤਿਪਿ ਨ ਜਾਨਨ੍ਤਿ. ਤੇ ਪਞ੍ਞਾਪੇਤੁਂ ਅਸਕ੍ਕੋਨ੍ਤਾਪਿ ਕੇਵਲਂ ‘‘ਪਞ੍ਞਾਪੇਮਾ’’ਤਿ ਵਦਨ੍ਤਿ. ਤਥਾਗਤੋ ਪਨ ਕਾਮਾਨਂ ਪਰਿਞ੍ਞਂ ਅਨਾਗਾਮਿਮਗ੍ਗੇਨ ਪਞ੍ਞਾਪੇਤਿ, ਰੂਪਵੇਦਨਾਨਂ ਅਰਹਤ੍ਤਮਗ੍ਗੇਨ. ਏਵਮੇਤ੍ਥ ਦ੍ਵੇ ਜਨਾ ਬਾਹਿਰਕਾ, ਏਕੋ ਸਮ੍ਮਾਸਮ੍ਬੁਦ੍ਧੋਤਿ ਇਮਸ੍ਮਿਂ ਲੋਕੇ ਤਯੋ ਸਤ੍ਥਾਰੋ ਨਾਮ.
ਭਰਣ੍ਡੁਕਾਲਾਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਹਤ੍ਥਕਸੁਤ੍ਤਵਣ੍ਣਨਾ
੧੨੮. ਪਞ੍ਚਮੇ ਅਭਿਕ੍ਕਨ੍ਤਾਤਿ ਅਤਿਕ੍ਕਨ੍ਤਾ, ਵਿਗਤਾਤਿ ਅਤ੍ਥੋਤਿ ਆਹ ‘‘ਖਯੇ ਦਿਸ੍ਸਤੀ’’ਤਿ. ਤੇਨੇਵ ਹਿ ‘‘ਨਿਕ੍ਖਨ੍ਤੋ ਪਠਮੋ ਯਾਮੋ’’ਤਿ ਅਨਨ੍ਤਰਂ ਵੁਤ੍ਤਂ. ਅਭਿਕ੍ਕਨ੍ਤਤਰੋਤਿ ਅਤਿਵਿਯ ਕਨ੍ਤਤਰੋ. ਤਾਦਿਸੋ ਚ ਸੁਨ੍ਦਰੋ ਭਦ੍ਦਕੋ ਨਾਮ ਹੋਤੀਤਿ ਆਹ ‘‘ਸੁਨ੍ਦਰੇ ਦਿਸ੍ਸਤੀ’’ਤਿ. ਕੋਤਿ ਦੇਵਨਾਗਯਕ੍ਖਗਨ੍ਧਬ੍ਬਾਦੀਸੁ ਕੋ ਕਤਮੋ? ਮੇਤਿ ਮਮ. ਪਾਦਾਨੀਤਿ ਪਾਦੇ. ਇਦ੍ਧਿਯਾਤਿ ਇਮਾਯ ਏਵਰੂਪਾਯ ਦੇਵਿਦ੍ਧਿਯਾ. ਯਸਸਾਤਿ ਇਮਿਨਾ ਏਦਿਸੇਨ ਪਰਿਵਾਰੇਨ ਪਰਿਚ੍ਛੇਦੇਨ. ਜਲਨ੍ਤਿ ਵਿਜ੍ਜੋਤਮਾਨੋ. ਅਭਿਕ੍ਕਨ੍ਤੇਨਾਤਿ ਅਤਿਵਿਯ ਕਨ੍ਤੇਨ ਕਮਨੀਯੇਨ ਅਭਿਰੂਪੇਨ. ਵਣ੍ਣੇਨਾਤਿ ਛਵਿਵਣ੍ਣੇਨ ਸਰੀਰਵਣ੍ਣਨਿਭਾਯ. ਸਬ੍ਬਾ ਓਭਾਸਯਂ ਦਿਸਾਤਿ ਦਸ ਦਿਸਾ ਪਭਾਸੇਨ੍ਤੋ, ਚਨ੍ਦੋ ਵਿਯ ਸੂਰਿਯੋ ਵਿਯ ਚ ਏਕੋਭਾਸਂ ਏਕਾਲੋਕਂ ਕਰੋਨ੍ਤੋਤਿ ਗਾਥਾਯ ਅਤ੍ਥੋ. ਅਭਿਰੂਪੇਤਿ ਉਲ਼ਾਰਰੂਪੇ ਸਮ੍ਪਨ੍ਨਰੂਪੇ. ਅਬ੍ਭਨੁਮੋਦਨੇਤਿ ਸਮ੍ਪਹਂਸਨੇ. ਇਧ ਪਨਾਤਿ ‘‘ਅਭਿਕ੍ਕਨ੍ਤਾਯ ਰਤ੍ਤਿਯਾ’’ਤਿ ਏਤਸ੍ਮਿਂ ਪਦੇ. ਤੇਨਾਤਿ ਸੁਨ੍ਦਰਪਰਿਯਾਯਤ੍ਤਾ. ਖਯੇ ਵਾ ਇਧ ਅਭਿਕ੍ਕਨ੍ਤਸਦ੍ਦੋ ਦਟ੍ਠਬ੍ਬੋ, ਤੇਨ ‘‘ਅਭਿਕ੍ਕਨ੍ਤਾਯ ਪਰਿਕ੍ਖੀਣਾਯ ਰਤ੍ਤਿਯਾ’’ਤਿ ਵੁਤ੍ਤਂ ਹੋਤਿ.
ਰੂਪਾਯਤਨਾਦੀਸੂਤਿ ਆਦਿਸਦ੍ਦੇਨ ਅਕ੍ਖਰਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਸੁਵਣ੍ਣਵਣ੍ਣੋਤਿ ਸੁਵਣ੍ਣਚ੍ਛਵੀਤਿ ਅਯਮੇਤ੍ਥ ਅਤ੍ਥੋਤਿ ਆਹ ‘‘ਛਵਿਯ’’ਨ੍ਤਿ. ਤਥਾ ਹਿ ਵੁਤ੍ਤਂ ‘‘ਕਞ੍ਚਨਸਨ੍ਨਿਭਤ੍ਤਚੋ’’ਤਿ (ਮ. ਨਿ. ੨.੩੯੯; ਸੁ. ਨਿ. ੫੫੬). ਸਞ੍ਞੂਲ਼੍ਹਾਤਿ ਸਮ੍ਬਨ੍ਧਿਤਾ, ਗਨ੍ਥਿਤਾਤਿ ਅਤ੍ਥੋ. ਵਣ੍ਣਾਤਿ ਗੁਣਵਣ੍ਣਾਤਿ ਆਹ ‘‘ਥੁਤਿਯ’’ਨ੍ਤਿ, ਥੋਮਨਾਯਨ੍ਤਿ ਅਤ੍ਥੋ. ਕੁਲਵਗ੍ਗੇਤਿ ਖਤ੍ਤਿਯਾਦਿਕੁਲਕੋਟ੍ਠਾਸੇ. ਤਤ੍ਥ ‘‘ਅਚ੍ਛੋ ਵਿਪ੍ਪਸਨ੍ਨੋ’’ਤਿਆਦਿਨਾ ਵਣ੍ਣਿਤਬ੍ਬਟ੍ਠੇਨ ਵਣ੍ਣੋ, ਛਵਿ. ਵਣ੍ਣਨਟ੍ਠੇਨ ਅਭਿਤ੍ਥਵਟ੍ਠੇਨ ਵਣ੍ਣੋ, ਥੁਤਿ. ਅਞ੍ਞਮਞ੍ਞਂ ਅਸਙ੍ਕਰਤੋ ਵਣ੍ਣੇਤਬ੍ਬਤੋ ਠਪੇਤਬ੍ਬਤੋ ਵਣ੍ਣੋ, ਖਤ੍ਤਿਯਾਦਿਕੁਲਵਗ੍ਗੋ. ਵਣ੍ਣੀਯਤਿ ਞਾਪੀਯਤਿ ਏਤੇਨਾਤਿ ਵਣ੍ਣੋ, ਞਾਪਕਕਾਰਣਂ. ਵਣ੍ਣਨਤੋ ਥੂਲਰਸ੍ਸਾਦਿਭਾਵੇਨ ਉਪਟ੍ਠਾਨਤੋ ਵਣ੍ਣੋ, ਸਣ੍ਠਾਨਂ. ਮਹਨ੍ਤਂ ਖੁਦ੍ਦਕਂ ਮਜ੍ਝਿਮਨ੍ਤਿ ਵਣ੍ਣੇਤਬ੍ਬਤੋ ਪਮਿਤਬ੍ਬਤੋ ਵਣ੍ਣੋ, ਪਮਾਣਂ. ਵਣ੍ਣੀਯਤਿ ਚਕ੍ਖੁਨਾ ਪਸ੍ਸੀਯਤੀਤਿ ਵਣ੍ਣੋ, ਰੂਪਾਯਤਨਨ੍ਤਿ ਏਵਂ ਤਸ੍ਮਿਂ ਤਸ੍ਮਿਂ ਅਤ੍ਥੇ ਵਣ੍ਣਸਦ੍ਦਸ੍ਸ ਪਵਤ੍ਤਿ ਵੇਦਿਤਬ੍ਬਾ. ਸੋਤਿ ਵਣ੍ਣਸਦ੍ਦੋ. ਛਵਿਯਾ ਦਟ੍ਠਬ੍ਬੋ ਰੂਪਾਯਤਨੇ ਗਯ੍ਹਮਾਨਸ੍ਸਪਿ ਛਵਿਮੁਖੇਨੇਵ ਗਹੇਤਬ੍ਬਤੋ. ਛਵਿਗਤਾ ਪਨ ਵਣ੍ਣਧਾਤੁ ਏਵ ‘‘ਸੁਵਣ੍ਣਵਣ੍ਣੋ’’ਤਿ ਏਤ੍ਥ ਵਣ੍ਣਗ੍ਗਹਣੇਨ ਗਹਿਤਾਤਿ ਅਪਰੇ.
ਕੇਵਲਪਰਿਪੁਣ੍ਣਨ੍ਤਿ ਏਕਦੇਸਮ੍ਪਿ ਅਸੇਸੇਤ੍ਵਾ ਨਿਰਵਸੇਸਤੋਵ ਪਰਿਪੁਣ੍ਣਨ੍ਤਿ ਅਯਮੇਤ੍ਥ ਅਤ੍ਥੋਤਿ ਆਹ ‘‘ਅਨਵਸੇਸਤਾ ਅਤ੍ਥੋ’’ਤਿ. ਕੇਵਲਕਪ੍ਪਾਤਿ ਕਪ੍ਪ-ਸਦ੍ਦੋ ਨਿਪਾਤੋ ਪਦਪੂਰਣਮਤ੍ਤਂ, ‘‘ਕੇਵਲਂ’’ਇਚ੍ਚੇਵ ਅਤ੍ਥੋ. ਕੇਵਲਸਦ੍ਦੋ ਚ ਬਹੁਲਵਾਚੀਤਿ ਆਹ ‘‘ਯੇਭੁਯ੍ਯਤਾ ਅਤ੍ਥੋ’’ਤਿ. ਕੇਚਿ ਪਨ ‘‘ਈਸਕਂ ਅਸਮਤ੍ਤਂ ਕੇਵਲਂ ਕੇਵਲਕਪ੍ਪ’’ਨ੍ਤਿ ਵਦਨ੍ਤਿ. ਅਨਵਸੇਸਤ੍ਥੋ ਏਤ੍ਥ ਕੇਵਲਸਦ੍ਦੋ ਸਿਯਾ, ਅਨਤ੍ਥਨ੍ਤਰੇਨ ਪਨ ਕਪ੍ਪਸਦ੍ਦੇਨ ਪਦਵਡ੍ਢਨਂ ਕਤਂ ‘‘ਕੇਵਲਾ ਏਵ ਕੇਵਲਕਪ੍ਪਾ’’ਤਿ. ਤਥਾ ਵਾ ਕਪ੍ਪਨੀਯਤ੍ਤਾ ਪਞ੍ਞਪੇਤਬ੍ਬਤ੍ਤਾ ਕੇਵਲਕਪ੍ਪਾ. ਅਬ੍ਯਾਮਿਸ੍ਸਤਾ ਵਿਜਾਤਿਯੇਨ ਅਸਙ੍ਕਰੋ ਸੁਦ੍ਧਤਾ. ਅਨਤਿਰੇਕਤਾ ਤਂਪਰਮਤਾ ਵਿਸੇਸਾਭਾਵੋ. ਕੇਵਲਕਪ੍ਪਨ੍ਤਿ ਕੇਵਲਂ ਦਲ਼੍ਹਂ ਕਤ੍ਵਾਤਿ ਅਤ੍ਥੋ. ਕੇਵਲਂ ਵੁਚ੍ਚਤਿ ਨਿਬ੍ਬਾਨਂ ਸਬ੍ਬਸਙ੍ਖਤਵਿਵਿਤ੍ਤਤ੍ਤਾ, ਤਂ ਏਤਸ੍ਸ ਅਧਿਗਤਂ ਅਤ੍ਥੀਤਿ ਕੇਵਲੀ, ਸਚ੍ਛਿਕਤਨਿਰੋਧੋ ਖੀਣਾਸਵੋ.
ਕਪ੍ਪ-ਸਦ੍ਦੋ ਪਨਾਯਂ ਸਉਪਸਗ੍ਗੋ ਅਨੁਪਸਗ੍ਗੋ ਚਾਤਿ ਅਧਿਪ੍ਪਾਯੇਨ ਓਕਪ੍ਪਨਿਯਪਦੇ ਲਬ੍ਭਮਾਨਂ ਓਕਪ੍ਪਸਦ੍ਦਮਤ੍ਤਂ ਨਿਦਸ੍ਸੇਤਿ, ਅਞ੍ਞਥਾ ਕਪ੍ਪਸਦ੍ਦਸ੍ਸ ਅਤ੍ਥੁਦ੍ਧਾਰੇ ਓਕਪ੍ਪਨਿਯਪਦਂ ਅਨਿਦਸ੍ਸਨਮੇਵ ਸਿਯਾ. ਸਮਣਕਪ੍ਪੇਹੀਤਿ ਵਿਨਯਸਿਦ੍ਧੇਹਿ ਸਮਣਵੋਹਾਰੇਹਿ. ਨਿਚ੍ਚਕਪ੍ਪਨ੍ਤਿ ਨਿਚ੍ਚਕਾਲਂ. ਪਞ੍ਞਤ੍ਤੀਤਿ ਨਾਮਂ. ਨਾਮਞ੍ਹੇਤਂ ਤਸ੍ਸ ਆਯਸ੍ਮਤੋ, ਯਦਿਦਂ ਕਪ੍ਪੋਤਿ. ਕਪ੍ਪਿਤਕੇਸਮਸ੍ਸੂਤਿ ਕਤ੍ਤਰਿਯਾ ਛੇਦਿਤਕੇਸਮਸ੍ਸੁ. ਦ੍ਵਙ੍ਗੁਲਕਪ੍ਪੋਤਿ ਮਜ੍ਝਨ੍ਹਿਕਵੇਲਾਯ ਵੀਤਿਕ੍ਕਨ੍ਤਾਯ ਦ੍ਵਙ੍ਗੁਲਤਾਵਿਕਪ੍ਪੋ. ਲੇਸੋਤਿ ਅਪਦੇਸੋ. ਅਨਵਸੇਸਂ ਫਰਿਤੁਂ ਸਮਤ੍ਥਸ੍ਸ ਓਭਾਸਸ੍ਸ ਕੇਨਚਿ ਕਾਰਣੇਨ ਏਕਦੇਸਫਰਣਮ੍ਪਿ ਸਿਯਾ, ਅਯਂ ਪਨ ਸਬ੍ਬਸ੍ਸੇਵ ਫਰਤੀਤਿ ਦਸ੍ਸੇਤੁਂ ਸਮਨ੍ਤਤ੍ਥੋ ਕਪ੍ਪਸਦ੍ਦੋ ਗਹਿਤੋਤਿ ਆਹ ‘‘ਅਨਵਸੇਸਂ ਸਮਨ੍ਤਤੋ’’ਤਿ.
ਆਭਾਯ ਫਰਿਤ੍ਵਾਤਿ ਵਤ੍ਥਮਾਲਾਲਙ੍ਕਾਰਸਰੀਰਸਮੁਟ੍ਠਿਤਾਯ ਆਭਾਯ ਫਰਿਤ੍ਵਾ. ਦੇਵਤਾਨਞ੍ਹਿ ਸਰੀਰੋਭਾਸਂ ਦ੍ਵਾਦਸਯੋਜਨਮਤ੍ਤਂ ਠਾਨਂ. ਤਤੋ ਭਿਯ੍ਯੋਪਿ ਫਰਿਤ੍ਵਾ ਤਿਟ੍ਠਤਿ, ਤਥਾ ਵਤ੍ਥਾਭਰਣਾਦਿਸਮੁਟ੍ਠਿਤਾ ਪਭਾ.
ਹਤ੍ਥਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੬. ਕਟੁਵਿਯਸੁਤ੍ਤਵਣ੍ਣਨਾ
੧੨੯. ਛਟ੍ਠੇ ਗਾਵੀਨਂ ਕਯਵਿਕ੍ਕਯਵਸੇਨ ਯੋਗੋ ਏਤ੍ਥਾਤਿ ਗੋਯੋਗੋ, ਕਯਵਿਕ੍ਕਯਂ ਕਰੋਨ੍ਤੋ ਗਾਵੀਹਿ ਯੁਜ੍ਜਨ੍ਤਿ ਏਤ੍ਥਾਤਿ ਵਾ ਗੋਯੋਗੋ, ਗਾਵੀਨਂ ਵਿਕ੍ਕਯਟ੍ਠਾਨਂ. ਤਤ੍ਥ ਜਾਤੋ ਪਿਲਕ੍ਖਰੁਕ੍ਖੋ ਗੋਯੋਗਪਿਲਕ੍ਖੋ, ਤਸ੍ਮਿਂ. ਸਮੀਪਤ੍ਥੇ ਚੇਤਂ ਭੁਮ੍ਮਵਚਨਂ. ਤੇਨਾਹ ‘‘ਗਾਵੀਨਂ ਵਿਕ੍ਕਯਟ੍ਠਾਨੇ ਉਟ੍ਠਿਤਪਿਲਕ੍ਖਸ੍ਸ ਸਨ੍ਤਿਕੇ’’ਤਿ. ਰਿਤ੍ਤੋ ਅਸ੍ਸਾਦੋ ਏਤਸ੍ਸਾਤਿ ਰਿਤ੍ਤਸ੍ਸਾਦੋ. ਤੇਨਾਹ ‘‘ਝਾਨਸੁਖਾਭਾਵੇਨ ਰਿਤ੍ਤਸ੍ਸਾਦ’’ਨ੍ਤਿ. ਸੇਸਮੇਤ੍ਥ ਉਤ੍ਤਾਨਮੇਵ.
ਕਟੁਵਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮. ਦੁਤਿਯਅਨੁਰੁਦ੍ਧਸੁਤ੍ਤਵਣ੍ਣਨਾ
੧੩੧. ਅਟ੍ਠਮੇ ਇਦਂ ਤੇ ਮਾਨਸ੍ਮਿਨ੍ਤਿ ਏਤ੍ਥ ਮਾਨਸ੍ਮਿਨ੍ਤਿ ਪਚ੍ਚਤ੍ਤੇ ਭੁਮ੍ਮਵਚਨਂ. ਇਦਨ੍ਤਿ ਚ ਲਿਙ੍ਗਵਿਪਲ੍ਲਾਸੇਨ ਨਪੁਂਸਕਨਿਦ੍ਦੇਸੋ ਕਤੋਤਿ ਆਹ ‘‘ਅਯਂ ਤੇ ਨਵਵਿਧੇਨ ਵਡ੍ਢਿਤਮਾਨੋ’’ਤਿ. ਸੇਸੇਸੁਪਿ ਏਸੇਵ ਨਯੋ.
ਦੁਤਿਯਅਨੁਰੁਦ੍ਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯. ਪਟਿਚ੍ਛਨ੍ਨਸੁਤ੍ਤਵਣ੍ਣਨਾ
੧੩੨. ਨਵਮੇ ਅਸਾਧਾਰਣਸਿਕ੍ਖਾਪਦਨ੍ਤਿ ਭਿਕ੍ਖੁਨੀਨਂ ਅਸਾਧਾਰਣਂ ਭਿਕ੍ਖੂਨਂਯੇਵ ਪਞ੍ਞਤ੍ਤਸਿਕ੍ਖਾਪਦਂ ਸਾਧਾਰਣਸਿਕ੍ਖਾਪਦਨ੍ਤਿ ਭਿਕ੍ਖੂਨਂ ਭਿਕ੍ਖੁਨੀਨਞ੍ਚ ਸਾਧਾਰਣਂ ਉਭਤੋਪਞ੍ਞਤ੍ਤਿਸਿਕ੍ਖਾਪਦਂ.
ਪਟਿਚ੍ਛਨ੍ਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਲੇਖਸੁਤ੍ਤਵਣ੍ਣਨਾ
੧੩੩. ਦਸਮੇ ਥਿਰਟ੍ਠਾਨਤੋਤਿ ਥਿਰਟ੍ਠਾਨਤੋਵ. ਪਾਸਾਣੇ ਲੇਖਸਦਿਸਾ ਪਰਾਪਰਾਧਨਿਬ੍ਬਤ੍ਤਾ ਕੋਧਲੇਖਾ ਯਸ੍ਸ ਸੋ ਪਾਸਾਣਲੇਖੂਪਮਸਮਨ੍ਨਾਗਤੋ ਪਾਸਾਣਲੇਖੂਪਮੋਤਿ ਵੁਤ੍ਤੋ. ਏਵਂ ਇਤਰੇਪਿ. ਅਨੁਸੇਤੀਤਿ ਅਪ੍ਪਹੀਨਤਾਯ ਅਨੁਸੇਤਿ. ਨ ਖਿਪ੍ਪਂ ਲੁਜ੍ਜਤੀਤਿ ਨ ਅਨ੍ਤਰਾ ਨਸ੍ਸਤਿ ਕਮ੍ਮਟ੍ਠਾਨੇਨੇਵ ਨਸ੍ਸਨਤੋ. ਏਵਮੇਵਨ੍ਤਿ ਏਵਂ ਤਸ੍ਸਪਿ ਪੁਗ੍ਗਲਸ੍ਸ ਕੋਧੋ ਨ ਅਨ੍ਤਰਾ ਪੁਨਦਿਵਸੇ ਵਾ ਅਪਰਦਿਵਸੇ ਵਾ ਨਿਟ੍ਠਾਤਿ, ਅਦ੍ਧਨਿਯੋ ਪਨ ਹੋਤਿ, ਮਰਣੇਨੇਵ ਨਿਟ੍ਠਾਤੀਤਿ ਅਤ੍ਥੋ. ਕਕ੍ਖਲ਼ੇਨਾਤਿ ਅਤਿਕਕ੍ਖਲ਼ੇਨ ਧਮ੍ਮਚ੍ਛੇਦਕੇਨ ਥਦ੍ਧਵਚਨੇਨ. ਸਂਸਨ੍ਦਤੀਤਿ ਏਕੀਭਵਤਿ. ਸਮ੍ਮੋਦਤੀਤਿ ਨਿਰਨ੍ਤਰੋ ਹੋਤੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.
ਅਥ ਵਾ ਸਨ੍ਧਿਯਤੀਤਿ ਠਾਨਗਮਨਾਦੀਸੁ ਕਾਯਕਿਰਿਯਾਸੁ ਕਾਯੇਨ ਸਮੋਧਾਨਂ ਗਚ੍ਛਤਿ, ਤਿਲਤਣ੍ਡੁਲਾ ਵਿਯ ਮਿਸ੍ਸੀਭਾਵਂ ਉਪੇਤੀਤਿ ਅਤ੍ਥੋ. ਸਂਸਨ੍ਦਤੀਤਿ ਚਿਤ੍ਤਕਿਰਿਯਾਸੁ ਚਿਤ੍ਤੇਨ ਸਮੋਧਾਨਂ ਗਚ੍ਛਤਿ, ਖੀਰੋਦਕਂ ਵਿਯ ਏਕੀਭਾਵਂ ਉਪੇਤੀਤਿ ਅਤ੍ਥੋ. ਸਮ੍ਮੋਦਤੀਤਿ ਉਦ੍ਦੇਸਪਰਿਪੁਚ੍ਛਾਦੀਸੁ ਵਚੀਕਿਰਿਯਾਸੁ ਵਾਚਾਯ ਸਮੋਧਾਨਂ ਗਚ੍ਛਤਿ, ਵਿਪ੍ਪਵਾਸਾਗਤੋਪਿ ਪਿਯਸਹਾਯਕੋ ਵਿਯ ਪਿਯਤਰਭਾਵਂ ਉਪੇਤੀਤਿ ਅਤ੍ਥੋ. ਅਪਿਚ ਕਿਚ੍ਚਕਰਣੀਯੇਸੁ ਤੇਹਿ ਸਦ੍ਧਿਂ ਆਦੀਤੋਵ ਏਕਕਿਰਿਯਾਭਾਵਂ ਉਪਗਚ੍ਛਨ੍ਤੋ ਸਨ੍ਧਿਯਤਿ, ਯਾਵ ਮਜ੍ਝਾ ਪਵਤ੍ਤਨ੍ਤੋ ਸਂਸਨ੍ਦਤਿ, ਯਾਵ ਪਰਿਯੋਸਾਨਾ ਅਨਿਵਤ੍ਤਨ੍ਤੋ ਸਮ੍ਮੋਦਤੀਤਿ ਵੇਦਿਤਬ੍ਬੋ.
ਲੇਖਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਕੁਸਿਨਾਰਵਗ੍ਗਵਣ੍ਣਨਾ ਨਿਟ੍ਠਿਤਾ.