(੧੪) ੪. ਯੋਧਾਜੀਵਵਗ੍ਗੋ

੧. ਯੋਧਾਜੀਵਸੁਤ੍ਤਵਣ੍ਣਨਾ

੧੩੪. ਚਤੁਤ੍ਥਸ੍ਸ ਪਠਮੇ ਯੁਜ੍ਝਨਂ ਯੋਧੋ, ਸੋ ਆਜੀਵੋ ਏਤਸ੍ਸਾਤਿ ਯੋਧਾਜੀਵੋ. ਯੁਦ੍ਧਮੁਪਜੀਵਤੀਤਿ ਵਾ ਏਤਸ੍ਮਿਂ ਅਤ੍ਥੇ ਯੋਧਾਜੀਵੋਤਿ ਨਿਰੁਤ੍ਤਿਨਯੇਨ ਪਦਸਿਦ੍ਧਿ ਵੇਦਿਤਬ੍ਬਾ. ਤੇਨਾਹ ‘‘ਯੁਦ੍ਧਂ ਉਪਜੀਵਤੀਤਿ ਯੋਧਾਜੀਵੋ’’ਤਿ. ਸਹ…ਪੇ… ਪਸ੍ਸਤੀਤਿ ਪੁਬ੍ਬਭਾਗੇ ਵਿਪਸ੍ਸਨਾਪਞ੍ਞਾਯ ਸਮ੍ਮਸਨਵਸੇਨ, ਮਗ੍ਗਕ੍ਖਣੇ ਅਭਿਸਮਯਵਸੇਨ ਅਤ੍ਤਪਚ੍ਚਕ੍ਖੇਨ ਞਾਣੇਨ ਪਸ੍ਸਤਿ.

ਯੋਧਾਜੀਵਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਪਰਿਸਾਸੁਤ੍ਤਵਣ੍ਣਨਾ

੧੩੫. ਦੁਤਿਯੇ ਅਪ੍ਪਟਿਪੁਚ੍ਛਿਤ੍ਵਾ ਵਿਨੀਤਾਤਿ ‘‘ਤਂ ਕਿਂ ਮਞ੍ਞਥ, ਭਿਕ੍ਖਵੇ, ਰੂਪਂ ਨਿਚ੍ਚਂ ਵਾ ਅਨਿਚ੍ਚਂ ਵਾ’’ਤਿਆਦਿਨਾ ਅਪ੍ਪਟਿਪੁਚ੍ਛਿਤ੍ਵਾ ਕੇਵਲਂ ਧਮ੍ਮਦੇਸਨਾਵਸੇਨੇਵ ਵਿਨੀਤਪਰਿਸਾ. ਦੁਬ੍ਬਿਨੀਤਪਰਿਸਾਤਿ ਦੁਕ੍ਖੇਨ ਵਿਨੀਤਪਰਿਸਾ. ਪੁਚ੍ਛਿਤ੍ਵਾ ਵਿਨੀਤਾਤਿ ‘‘ਤਂ ਕਿਂ ਮਞ੍ਞਥ, ਭਿਕ੍ਖਵੇ’’ਤਿਆਦਿਨਾ ਪੁਚ੍ਛਿਤ੍ਵਾ ਅਨੁਮਤਿਗ੍ਗਹਣਵਸੇਨ ਵਿਨੀਤਾ. ਸੁਵਿਨੀਤਪਰਿਸਾਤਿ ਸੁਖੇਨ ਵਿਨੀਤਪਰਿਸਾ. ਅਨੁਮਤਿਗ੍ਗਹਣਵਸੇਨ ਵਿਨਯਨਞ੍ਹਿ ਨ ਦੁਕ੍ਕਰਂ ਹੋਤਿ.

ਪਰਿਸਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਉਪ੍ਪਾਦਾਸੁਤ੍ਤਵਣ੍ਣਨਾ

੧੩੭. ਚਤੁਤ੍ਥੇ ਉਪ੍ਪਾਦਾ ਵਾ ਤਥਾਗਤਾਨਨ੍ਤਿ ਤਥਾਗਤਾਨਂ ਉਪ੍ਪਾਦੇਪਿ ਵੇਨੇਯ੍ਯਪੁਗ੍ਗਲਾਨਂ ਮਗ੍ਗਫਲੁਪ੍ਪਤ੍ਤਿ ਵਿਯ ਸਙ੍ਖਾਰਾਨਂ ਅਨਿਚ੍ਚਾਦਿਸਭਾਵੋ ਨ ਤਥਾਗਤੁਪ੍ਪਾਦਾਯਤ੍ਤੋ, ਅਥ ਖੋ ਤਥਾਗਤਾਨਂ ਉਪ੍ਪਾਦੇਪਿ ਅਨੁਪ੍ਪਾਦੇਪਿ ਹੋਤਿਮੇਵਾਤਿ ਵੁਤ੍ਤਂ ਹੋਤਿ. ਠਿਤਾਵ ਸਾ ਧਾਤੂਤਿ ਠਿਤੋ ਏਵ ਸੋ ਅਨਿਚ੍ਚਸਭਾਵੋ ਬ੍ਯਭਿਚਾਰਾਭਾਵਤੋ ਨ ਕਦਾਚਿ ਸਙ੍ਖਾਰਾ ਅਨਿਚ੍ਚਾ ਨ ਹੋਤਿ. ਕਾਮਂ ਅਸਙ੍ਖਤਾ ਵਿਯ ਧਾਤੁ ਨ ਨਿਚ੍ਚੋ ਸੋ ਸਭਾਵੋ, ਤਥਾਪਿ ਸਬ੍ਬਕਾਲਿਕੋਯੇਵਾਤਿ ਅਧਿਪ੍ਪਾਯੋ.

ਅਪਰੋ ਨਯੋ – ਠਿਤਾਵ ਸਾ ਧਾਤੂਤਿ ‘‘ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ’’ਤਿ ਏਸਾ ਧਾਤੁ ਏਸ ਸਭਾਵੋ ਤਥਾਗਤਾਨਂ ਉਪ੍ਪਾਦਤੋ ਪੁਬ੍ਬੇ ਉਦ੍ਧਞ੍ਚ ਅਪ੍ਪਟਿਵਿਜ੍ਝਿਯਮਾਨੋ ਨ ਤਥਾਗਤੇਹਿ ਉਪ੍ਪਾਦਿਤੋ, ਅਥ ਖੋ ਸਬ੍ਬਕਾਲਂ ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ, ਠਿਤਾਵ ਸਾ ਧਾਤੁ, ਕੇਵਲਂ ਪਨ ਸਯਮ੍ਭੁਞਾਣੇਨ ਅਭਿਸਮ੍ਬੁਜ੍ਝਨਤੋ ‘‘ਅਯਂ ਧਮ੍ਮੋ ਤਥਾਗਤੇਨ ਅਭਿਸਮ੍ਬੁਦ੍ਧੋ’’ਤਿ ਪਵੇਦਨਤੋ ਚ ਤਥਾਗਤੋ ਧਮ੍ਮਸ੍ਸਾਮੀਤਿ ਵੁਚ੍ਚਤਿ ਅਪੁਬ੍ਬਸ੍ਸ ਤਸ੍ਸ ਉਪ੍ਪਾਦਨਤੋ. ਤੇਨ ਵੁਤ੍ਤਂ ‘‘ਠਿਤਾਵ ਸਾ ਧਾਤੂ’’ਤਿ.

ਅਭਿਸਮ੍ਬੁਜ੍ਝਤੀਤਿ ਞਾਣੇਨ ਅਭਿਸਮ੍ਬੁਜ੍ਝਤਿ. ਅਭਿਸਮੇਤੀਤਿ ਞਾਣੇਨ ਅਭਿਸਮਾਗਚ੍ਛਤਿ. ਆਚਿਕ੍ਖਤੀਤਿ ਕਥੇਤਿ. ਦੇਸੇਤੀਤਿ ਦਸ੍ਸੇਤਿ. ਪਞ੍ਞਾਪੇਤੀਤਿ ਜਾਨਾਪੇਤਿ. ਪਟ੍ਠਪੇਤੀਤਿ ਞਾਣਮੁਖੇ ਠਪੇਤਿ. ਵਿਵਰਤੀਤਿ ਵਿਵਰਿਤ੍ਵਾ ਦਸ੍ਸੇਤਿ. ਵਿਭਜਤੀਤਿ ਵਿਭਾਗਤੋ ਦਸ੍ਸੇਤਿ. ਉਤ੍ਤਾਨੀਕਰੋਤੀਤਿ ਪਾਕਟਂ ਕਰੋਤਿ.

ਅਥ ਵਾ ਅਭਿਸਮ੍ਬੁਜ੍ਝਤੀਤਿ ਪਚ੍ਚਕ੍ਖਕਰਣੇਨ ਅਭਿਮੁਖਂ ਬੁਜ੍ਝਤਿ, ਯਾਥਾਵਤੋ ਪਟਿਵਿਜ੍ਝਤਿ. ਤਤੋ ਏਵ ਅਭਿਸਮੇਤਿ ਅਭਿਮੁਖਂ ਸਮਾਗਚ੍ਛਤਿ. ਆਦਿਤੋ ਕਥੇਨ੍ਤੋ ਆਚਿਕ੍ਖਤਿ, ਉਦ੍ਦਿਸਤੀਤਿ ਅਤ੍ਥੋ. ਤਮੇਵ ਉਦ੍ਦੇਸਂ ਪਰਿਯੋਸਾਪੇਨ੍ਤੋ ਦੇਸੇਤਿ. ਯਥਾਉਦ੍ਦਿਟ੍ਠਮਤ੍ਥਂ ਨਿਦਸ੍ਸਨਵਸੇਨ ਪਕਾਰੇਹਿ ਞਾਪੇਨ੍ਤੋ ਪਞ੍ਞਾਪੇਤਿ. ਪਕਾਰੇਹਿ ਏਤਮਤ੍ਥਂ ਪਤਿਟ੍ਠਪੇਨ੍ਤੋ ਪਟ੍ਠਪੇਤਿ. ਯਥਾਉਦ੍ਦਿਟ੍ਠਂ ਪਟਿਨਿਦਸ੍ਸਨਵਸੇਨ ਵਿਵਰਤਿ ਵਿਭਜਤਿ. ਵਿਵਟਂ ਵਿਭਤ੍ਤਞ੍ਚ ਅਤ੍ਥਂ ਹੇਤੂਦਾਹਰਣਦਸ੍ਸਨੇਹਿ ਪਾਕਟਂ ਕਰੋਨ੍ਤੋ ਉਤ੍ਤਾਨੀਕਰੋਤਿ.

ਉਪ੍ਪਾਦਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫-੧੦. ਕੇਸਕਮ੍ਬਲਸੁਤ੍ਤਾਦਿਵਣ੍ਣਨਾ

੧੩੮-੧੪੩. ਪਞ੍ਚਮੇ ਤਨ੍ਤਾਵੁਤਾਨਂ ਵਤ੍ਥਾਨਨ੍ਤਿ ਇਦਂ ‘‘ਯਾਨਿ ਕਾਨਿਚੀ’’ਤਿ ਇਮਿਨਾ ਸਮਾਨਾਧਿਕਰਣਨ੍ਤਿ ਆਹ ‘‘ਪਚ੍ਚਤ੍ਤੇ ਸਾਮਿਵਚਨ’’ਨ੍ਤਿ. ਵਾਯਿਤਾਨਨ੍ਤਿ ਵੀਤਾਨਂ. ਲਾਮਕੋਤਿ ਨਿਹੀਨੋ, ਮਕ੍ਖਲਿ ਮੋਘਪੁਰਿਸੋਤਿ ਏਤ੍ਥ ਮਕ੍ਖਲੀਤਿ ਤਸ੍ਸ ਨਾਮਂ. ਤਂ ਕਿਰ ਸਕਦ੍ਦਮਾਯ ਭੂਮਿਯਾ ਤੇਲਘਟਂ ਗਹੇਤ੍ਵਾ ਗਚ੍ਛਨ੍ਤਂ, ‘‘ਤਾਤ, ਮਾ ਖਲੀ’’ਤਿ ਸਾਮਿਕੋ ਆਹ. ਸੋ ਪਮਾਦੇਨ ਖਲਿਤ੍ਵਾ ਪਤਿਤ੍ਵਾ ਸਾਮਿਕਸ੍ਸ ਭਯੇਨ ਪਲਾਯਿਤੁਂ ਆਰਦ੍ਧੋ. ਸਾਮਿਕੋ ਉਪਧਾਵਿਤ੍ਵਾ ਨਂ ਦੁਸ੍ਸਕਣ੍ਣੇ ਅਗ੍ਗਹੇਸਿ, ਸਾਟਕਂ ਛਡ੍ਡੇਤ੍ਵਾ ਅਚੇਲਕੋ ਹੁਤ੍ਵਾ ਪਲਾਯਿ. ਸੋ ਪਣ੍ਣੇਨ ਵਾ ਤਿਣੇਨ ਵਾ ਪਟਿਚ੍ਛਾਦੇਤੁਮ੍ਪਿ ਅਜਾਨਨ੍ਤੋ ਜਾਤਰੂਪੇਨੇਵ ਏਕਂ ਗਾਮਂ ਪਾਵਿਸਿ. ਮਨੁਸ੍ਸਾ ਤਂ ਦਿਸ੍ਵਾ ‘‘ਅਯਂ ਸਮਣੋ ਅਰਹਾ ਅਪ੍ਪਿਚ੍ਛੋ, ਨਤ੍ਥਿ ਇਮਿਨਾ ਸਦਿਸੋ’’ਤਿ ਪੂਵਭਤ੍ਤਾਦੀਨਿ ਗਹੇਤ੍ਵਾ ਉਪਸਙ੍ਕਮਨ੍ਤਿ. ਸੋ ‘‘ਮਯ੍ਹਂ ਸਾਟਕਂ ਅਨਿਵਤ੍ਥਭਾਵੇਨ ਇਦਂ ਉਪ੍ਪਨ੍ਨ’’ਨ੍ਤਿ ਤਤੋ ਪਟ੍ਠਾਯ ਸਾਟਕਂ ਲਭਿਤ੍ਵਾਪਿ ਨ ਨਿਵਾਸੇਸਿ, ਤਦੇਵ ਚ ਪਬ੍ਬਜ੍ਜਂ ਅਗ੍ਗਹੇਸਿ. ਤਸ੍ਸ ਸਨ੍ਤਿਕੇ ਅਞ੍ਞੇਪਿ ਅਞ੍ਞੇਪੀਤਿ ਪਞ੍ਚਸਤਾ ਮਨੁਸ੍ਸਾ ਪਬ੍ਬਜਿਂਸੁ. ਤਂ ਸਨ੍ਧਾਯਾਹ ‘‘ਮਕ੍ਖਲਿ ਮੋਘਪੁਰਿਸੋ’’ਤਿ. ਛਟ੍ਠਾਦੀਨਿ ਉਤ੍ਤਾਨਤ੍ਥਾਨਿ ਏਵ.

ਕੇਸਕਮ੍ਬਲਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੧੧-੧੩. ਪਠਮਮੋਰਨਿਵਾਪਸੁਤ੍ਤਾਦਿਵਣ੍ਣਨਾ

੧੪੪-੧੪੬. ਏਕਾਦਸਮੇ ਅਕੁਪ੍ਪਧਮ੍ਮਤਾਯ ਖਯਵਯਸਙ੍ਖਾਤਂ ਅਨ੍ਤਂ ਅਤੀਤਾਤਿ ਅਚ੍ਚਨ੍ਤਾ, ਏਵਂ ਅਪਰਿਹਾਯਨਸਭਾਵਤ੍ਤਾ ਅਚ੍ਚਨ੍ਤਾ ਨਿਟ੍ਠਾ ਅਸ੍ਸਾਤਿ ਅਚ੍ਚਨ੍ਤਨਿਟ੍ਠੋ. ਤੇਨਾਹ ‘‘ਅਨ੍ਤਂ ਅਤਿਕ੍ਕਨ੍ਤਨਿਟ੍ਠੋ’’ਤਿਆਦਿ. ਨ ਹਿ ਪਟਿਵਿਦ੍ਧਸ੍ਸ ਲੋਕੁਤ੍ਤਰਧਮ੍ਮਸ੍ਸ ਦਸ੍ਸਨਂ ਕੁਪ੍ਪਨਂ ਨਾਮ ਅਤ੍ਥਿ. ਧੁਵਨਿਟ੍ਠੋਤਿ ਸਤਤਨਿਟ੍ਠੋ. ਅਚ੍ਚਨ੍ਤਮੇਵ ਚਤੂਹਿ ਯੋਗੇਹਿ ਖੇਮੋ ਏਤਸ੍ਸ ਅਤ੍ਥੀਤਿ ਅਚ੍ਚਨ੍ਤਯੋਗਕ੍ਖੇਮੀ, ਨਿਚ੍ਚਯੋਗਕ੍ਖੇਮੀਤਿ ਅਤ੍ਥੋ. ਮਗ੍ਗਬ੍ਰਹ੍ਮਚਰਿਯਸ੍ਸ ਵੁਸਿਤਤ੍ਤਾ ਤਸ੍ਸ ਅਵਿਹਾਯਨਸਭਾਵਤ੍ਤਾ ਅਚ੍ਚਨ੍ਤਂ ਬ੍ਰਹ੍ਮਚਾਰੀਤਿ ਅਚ੍ਚਨ੍ਤਬ੍ਰਹ੍ਮਚਾਰੀ, ਨਿਚ੍ਚਬ੍ਰਹ੍ਮਚਾਰੀਤਿ ਅਤ੍ਥੋ. ਪਰਿਯੋਸਾਨਨ੍ਤਿ ਬ੍ਰਹ੍ਮਚਰਿਯਪਰਿਯੋਸਾਨਂ ਵਟ੍ਟਦੁਕ੍ਖਪਰਿਯੋਸਾਨਞ੍ਚ. ਅਚ੍ਚਨ੍ਤਂ ਪਰਿਯੋਸਾਨਮਸ੍ਸਾਤਿ ਅਚ੍ਚਨ੍ਤਪਰਿਯੋਸਾਨੋ. ਦ੍ਵਾਦਸਮਤੇਰਸਮਾਨਿ ਉਤ੍ਤਾਨਤ੍ਥਾਨੇਵ.

ਪਠਮਮੋਰਨਿਵਾਪਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਯੋਧਾਜੀਵਵਗ੍ਗਵਣ੍ਣਨਾ ਨਿਟ੍ਠਿਤਾ.

੧੪੭-੧੫੬. ਮਙ੍ਗਲਵਗ੍ਗੋ ਉਤ੍ਤਾਨਤ੍ਥੋਯੇਵ.

ਤਤਿਯਪਣ੍ਣਾਸਕਂ ਨਿਟ੍ਠਿਤਂ.