(੧੨) ੨. ਆਪਾਯਿਕਵਗ੍ਗੋ

੧. ਆਪਾਯਿਕਸੁਤ੍ਤਵਣ੍ਣਨਾ

੧੧੪. ਦੁਤਿਯਸ੍ਸ ਪਠਮੇ ਅਪਾਯੇਸੁ ਨਿਬ੍ਬਤ੍ਤਨਸੀਲਤਾਯ ਅਪਾਯੂਪਗਾ ਆਪਾਯਿਕਾਤਿ ਆਹ ‘‘ਅਪਾਯਂ ਗਚ੍ਛਿਸ੍ਸਨ੍ਤੀਤਿ ਆਪਾਯਿਕਾ’’ਤਿ. ਅਞ੍ਞੇ ਬ੍ਰਹ੍ਮਚਾਰਿਨੋ ਸੁਨਿਵਤ੍ਥੇ ਸੁਪਾਰੁਤੇ ਸੁਮ੍ਭਕਪਤ੍ਤਧਰੇ ਗਾਮਨਿਗਮਰਾਜਧਾਨੀਸੁ ਪਿਣ੍ਡਾਯ ਚਰਿਤ੍ਵਾ ਜੀਵਿਕਂ ਕਪ੍ਪੇਨ੍ਤੇ ਦਿਸ੍ਵਾ ਸਯਮ੍ਪਿ ਤਾਦਿਸੇਨ ਆਕਾਰੇਨ ਤਥਾਪਟਿਪਜ੍ਜਨਤੋ ‘‘ਅਹਂ ਬ੍ਰਹ੍ਮਚਾਰੀ’’ਤਿ ਪਟਿਞ੍ਞਂ ਦੇਨ੍ਤੋ ਵਿਯ ਹੋਤੀਤਿ ਆਹ ‘‘ਬ੍ਰਹ੍ਮਚਾਰਿਪਟਿਞ੍ਞੋਤਿ ਬ੍ਰਹ੍ਮਚਾਰਿਪਟਿਰੂਪਕੋ’’ਤਿ. ‘‘ਅਹਮ੍ਪਿ ਭਿਕ੍ਖੂ’’ਤਿ ਵਤ੍ਵਾ ਉਪੋਸਥਙ੍ਗਾਦੀਨਿ ਪਵਿਸਨ੍ਤੋ ਪਨ ਬ੍ਰਹ੍ਮਚਾਰਿਪਟਿਞ੍ਞੋ ਹੋਤਿਯੇਵ, ਤਥਾ ਸਙ੍ਘਿਕਂ ਲਾਭਂ ਗਣ੍ਹਨ੍ਤੋ. ਤੇਨਾਹ ‘‘ਤੇਸਂ ਵਾ…ਪੇ… ਏਵਂਪਟਿਞ੍ਞੋ’’ਤਿ. ਅਕ੍ਕੋਸਤੀਤਿ ‘‘ਅਸ੍ਸਮਣੋਸਿ, ਸਮਣਪਟਿਞ੍ਞੋਸੀ’’ਤਿਆਦਿਨਾ ਅਕ੍ਕੋਸਤਿ. ਪਰਿਭਾਸਤੀਤਿ ‘‘ਸੋ ਤ੍ਵਂ ‘ਹੋਤੁ, ਮੁਣ੍ਡਕਸਮਣੋ ਅਹ’ਨ੍ਤਿ ਮਞ੍ਞਸਿ, ਇਦਾਨਿ ਤੇ ਅਸ੍ਸਮਣਭਾਵਂ ਆਰੋਪੇਸ੍ਸਾਮੀ’’ਤਿਆਦਿਨਾ ਵਦਨ੍ਤੋ ਪਰਿਭਾਸਤਿ.

ਕਿਲੇਸਕਾਮੋਪਿ ਅਸ੍ਸਾਦਿਯਮਾਨੋ ਵਤ੍ਥੁਕਾਮਨ੍ਤੋਗਧੋਯੇਵ, ਕਿਲੇਸਕਾਮਵਸੇਨ ਚ ਤੇਸਂ ਅਸ੍ਸਾਦਨਂ ਸਿਯਾਤਿ ਆਹ ‘‘ਕਿਲੇਸਕਾਮੇਨ ਵਤ੍ਥੁਕਾਮੇ ਸੇਵਨ੍ਤਸ੍ਸਾ’’ਤਿ. ਕਿਲੇਸਕਾਮੇਨਾਤਿ ਕਰਣਤ੍ਥੇ ਕਰਣਵਚਨਂ. ਨਤ੍ਥਿ ਦੋਸੋਤਿ ਅਸ੍ਸਾਦੇਤ੍ਵਾ ਵਿਸਯਪਰਿਭੋਗੇ ਨਤ੍ਥਿ ਆਦੀਨਵੋ, ਤਪ੍ਪਚ੍ਚਯਾ ਨ ਕੋਚਿ ਅਨ੍ਤਰਾਯੋਤਿ ਅਧਿਪ੍ਪਾਯੋ. ਪਾਤਬ੍ਬਤਂ ਆਪਜ੍ਜਤੀਤਿ ਪਰਿਭੁਞ੍ਜਨਕਤਂ ਉਪਗਚ੍ਛਤਿ. ਪਰਿਭੋਗਤ੍ਥੋ ਹਿ ਅਯਂ ਪਾ-ਸਦ੍ਦੋ, ਕਤ੍ਤੁਸਾਧਨੋ ਚ ਤਬ੍ਬ-ਸਦ੍ਦੋ, ਯਥਾਰੁਚਿ ਪਰਿਭੁਞ੍ਜਤੀਤਿ ਅਤ੍ਥੋ. ਪਿਵਿਤਬ੍ਬਤਂ ਪਰਿਭੁਞ੍ਜਿਤਬ੍ਬਤਨ੍ਤਿ ਏਤ੍ਥਾਪਿ ਕਤ੍ਤੁਵਸੇਨੇਵ ਅਤ੍ਥੋ ਵੇਦਿਤਬ੍ਬੋ.

ਆਪਾਯਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਦੁਲ੍ਲਭਸੁਤ੍ਤਵਣ੍ਣਨਾ

੧੧੫. ਦੁਤਿਯੇ ਪਰੇਨ ਕਤਸ੍ਸ ਉਪਕਾਰਸ੍ਸ ਅਨੁਰੂਪਪ੍ਪਵਤ੍ਤਿ ਅਤ੍ਤਨਿ ਕਤਂ ਉਪਕਾਰਂ ਉਪਕਾਰਤੋ ਜਾਨਨ੍ਤੋ ਵੇਦਿਯਨ੍ਤੋ ਕਤਞ੍ਞੂ ਕਤਵੇਦੀਤਿ ਆਹ ‘‘ਇਮਿਨਾ ਮਯ੍ਹਂ ਕਤ’’ਨ੍ਤਿਆਦਿ.

ਦੁਲ੍ਲਭਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਅਪ੍ਪਮੇਯ੍ਯਸੁਤ੍ਤਵਣ੍ਣਨਾ

੧੧੬. ਤਤਿਯੇ ਸੁਖੇਨ ਮੇਤਬ੍ਬੋਤਿ ਯਥਾ ਪਰਿਤ੍ਤਸ੍ਸ ਉਦਕਸ੍ਸ ਸੁਖੇਨ ਪਮਾਣਂ ਗਯ੍ਹਤਿ, ਏਵਮੇਵ ‘‘ਉਦ੍ਧਤੋ’’ਤਿਆਦਿਨਾ ਯਥਾਵੁਤ੍ਤੇਹਿ ਅਗੁਣਙ੍ਗੇਹਿ ਸਮਨ੍ਨਾਗਤਸ੍ਸ ਸੁਖੇਨ ਪਮਾਣਂ ਗਯ੍ਹਤੀਤਿ, ਸੁਖੇਨ ਮੇਤਬ੍ਬੋ. ਦੁਕ੍ਖੇਨ ਮੇਤਬ੍ਬੋਤਿ ਯਥਾ ਮਹਾਸਮੁਦ੍ਦਸ੍ਸ ਦੁਕ੍ਖੇਨ ਪਮਾਣਂ ਗਯ੍ਹਤਿ, ਏਵਮੇਵ ‘‘ਅਨੁਦ੍ਧਤੋ’’ਤਿਆਦਿਨਾ ਦਸ੍ਸਿਤੇਹਿ ਗੁਣਙ੍ਗੇਹਿ ਸਮਨ੍ਨਾਗਤਸ੍ਸ ਦੁਕ੍ਖੇਨ ਪਮਾਣਂ ਗਯ੍ਹਤਿ, ‘‘ਅਨਾਗਾਮੀ ਨੁ ਖੋ ਖੀਣਾਸਵੋ ਨੁ ਖੋ’’ਤਿ ਵਤ੍ਤਬ੍ਬਤਂ ਗਚ੍ਛਤਿ, ਤੇਨੇਸ ਦੁਕ੍ਖੇਨ ਮੇਤਬ੍ਬੋ. ਪਮੇਤੁਂ ਨ ਸਕ੍ਕੋਤੀਤਿ ਯਥਾ ਆਕਾਸਸ੍ਸ ਨ ਸਕ੍ਕਾ ਪਮਾਣਂ ਗਹੇਤੁਂ, ਏਵਂ ਖੀਣਾਸਵਸ੍ਸ, ਤੇਨੇਸ ਪਮੇਤੁਂ ਨ ਸਕ੍ਕਾਤਿ ਅਪ੍ਪਮੇਯ੍ਯੋ.

ਸਾਰਾਭਾਵੇਨ ਤੁਚ੍ਛਤ੍ਤਾ ਨਲ਼ੋ ਵਿਯ ਨਲ਼ੋ, ਮਾਨੋਤਿ ਆਹ ‘‘ਉਨ੍ਨਲ਼ੋਤਿ ਉਗ੍ਗਤਨਲ਼ੋ’’ਤਿ, ਉਟ੍ਠਿਤਤੁਚ੍ਛਮਾਨੋਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਤੁਚ੍ਛਮਾਨਂ ਉਕ੍ਖਿਪਿਤ੍ਵਾ ਠਿਤੋਤਿ ਅਤ੍ਥੋ’’ਤਿ. ਮਨੋ ਹਿ ਸੇਯ੍ਯਸ੍ਸ ਸੇਯ੍ਯੋਤਿ ਸਦਿਸੋਤਿ ਚ ਪਵਤ੍ਤਿਯਾ ਵਿਸੇਸਤੋ ਤੁਚ੍ਛੋ. ਚਾਪਲ੍ਲੇਨਾਤਿ ਚਪਲਭਾਵੇਨ, ਤਣ੍ਹਾਲੋਲੁਪ੍ਪੇਨਾਤਿ ਅਤ੍ਥੋ. ਮੁਖਰੋਤਿ ਮੁਖੇਨ ਫਰੁਸੋ, ਫਰੁਸਵਾਚੋਤਿ ਅਤ੍ਥੋ. ਵਿਕਿਣ੍ਣਵਾਚੋਤਿ ਵਿਸਟਵਚਨੋ ਸਮ੍ਫਪ੍ਪਲਾਪਿਤਾਯ ਅਪਰਿਯਨ੍ਤਵਚਨੋ. ਤੇਨਾਹ ‘‘ਅਸਞ੍ਞਤਵਚਨੋ’’ਤਿ, ਦਿਵਸਮ੍ਪਿ ਨਿਰਤ੍ਥਕਵਚਨਂ ਪਲਾਪੀਤਿ ਵੁਤ੍ਤਂ ਹੋਤਿ. ਚਿਤ੍ਤੇਕਗ੍ਗਤਾਰਹਿਤੋਤਿ ਉਪਚਾਰਪ੍ਪਨਾਸਮਾਧਿਰਹਿਤੋ ਚਣ੍ਡਸੋਤੇ ਬਦ੍ਧਨਾਵਾ ਵਿਯ ਅਨਵਟ੍ਠਿਤਕਿਰਿਯੋ. ਭਨ੍ਤਚਿਤ੍ਤੋਤਿ ਅਨਵਟ੍ਠਿਤਚਿਤ੍ਤੋ ਪਣ੍ਣਾਰੁਲ਼੍ਹਵਾਲਮਿਗਸਦਿਸੋ. ਵਿਵਟਿਨ੍ਦ੍ਰਿਯੋਤਿ ਸਂਵਰਾਭਾਵੇਨ ਗਿਹਿਕਾਲੇ ਵਿਯ ਅਸਂਵੁਤਚਕ੍ਖਾਦਿਇਨ੍ਦ੍ਰਿਯੋ.

ਅਪ੍ਪਮੇਯ੍ਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਆਨੇਞ੍ਜਸੁਤ੍ਤਵਣ੍ਣਨਾ

੧੧੭. ਚਤੁਤ੍ਥੇ ਸਹ ਬ੍ਯਯਤਿ ਗਚ੍ਛਤੀਤਿ ਸਹਬ੍ਯੋ, ਸਹਪਵਤ੍ਤਨਕੋ. ਤਸ੍ਸ ਭਾਵੋ ਸਹਬ੍ਯਤਾ, ਸਹਪਵਤ੍ਤੀਤਿ ਆਹ ‘‘ਸਹਭਾਵਂ ਉਪਪਜ੍ਜਤੀ’’ਤਿ. ‘‘ਯਾਵਤਕਂ ਤੇਸਂ ਦੇਵਾਨਂ ਆਯੁਪ੍ਪਮਾਣਂ, ਤਂ ਸਬ੍ਬਂ ਖੇਪੇਤ੍ਵਾ ਨਿਰਯਮ੍ਪਿ ਗਚ੍ਛਤੀ’’ਤਿਆਦਿਵਚਨਤੋ ਅਰੂਪਭਵਤੋ ਚੁਤਸ੍ਸ ਅਪਾਯੂਪਪਤ੍ਤਿ ਵੁਤ੍ਤਾ ਵਿਯ ਦਿਸ੍ਸਤੀਤਿ ਤਨ੍ਨਿਵਤ੍ਤਨਤ੍ਥਂ ਭਗਵਤੋ ਅਧਿਪ੍ਪਾਯਂ ਵਿਵਰਨ੍ਤੋ ‘‘ਸਨ੍ਧਾਯਭਾਸਿਤਮਿਦਂ ਵਚਨ’’ਨ੍ਤਿ ਦੀਪੇਤਿ ‘‘ਨਿਰਯਾਦੀਹਿ ਅਵਿਪ੍ਪਮੁਤ੍ਤਤ੍ਤਾ’’ਤਿਆਦਿਨਾ. ਨ ਹਿ ਤਸ੍ਸ ਉਪਚਾਰਜ੍ਝਾਨਤੋ ਬਲਵਤਰਂ ਅਕੁਸਲਂ ਅਤ੍ਥੀਤਿ. ਇਮਿਨਾ ਤਤੋ ਚਵਨ੍ਤਾਨਂ ਉਪਚਾਰਜ੍ਝਾਨਮੇਵ ਪਟਿਸਨ੍ਧਿਜਨਕਂ ਕਮ੍ਮਨ੍ਤਿ ਦੀਪੇਤਿ. ਅਧਿਕਂ ਪਯਸਤਿ ਪਯੁਜ੍ਜਤਿ ਏਤੇਨਾਤਿ ਅਧਿਪ੍ਪਯਾਸੋ, ਸਵਿਸੇਸਂ ਇਤਿਕਤ੍ਤਬ੍ਬਕਿਰਿਯਾ. ਤੇਨਾਹ ‘‘ਅਧਿਕਪ੍ਪਯੋਗੋ’’ਤਿ. ਸੇਸਮੇਤ੍ਥ ਉਤ੍ਤਾਨਮੇਵ.

ਆਨੇਞ੍ਜਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਵਿਪਤ੍ਤਿਸਮ੍ਪਦਾਸੁਤ੍ਤਵਣ੍ਣਨਾ

੧੧੮. ਪਞ੍ਚਮੇ ਦਿਨ੍ਨਨ੍ਤਿ ਦੇਯ੍ਯਧਮ੍ਮਸੀਸੇਨ ਦਾਨਂ ਵੁਤ੍ਤਨ੍ਤਿ ਆਹ ‘‘ਦਿਨ੍ਨਸ੍ਸ ਫਲਾਭਾਵਂ ਸਨ੍ਧਾਯ ਵਦਤੀ’’ਤਿ. ਦਿਨ੍ਨਂ ਪਨ ਅਨ੍ਨਾਦਿਵਤ੍ਥੁਂ ਕਥਂ ਪਟਿਕ੍ਖਿਪਤਿ. ਏਸ ਨਯੋ ‘‘ਯਿਟ੍ਠਂ ਹੁਤ’’ਨ੍ਤਿ ਏਤ੍ਥਾਪਿ. ਮਹਾਯਾਗੋਤਿ ਸਬ੍ਬਸਾਧਾਰਣਂ ਮਹਾਦਾਨਂ. ਪਹੇਣਕਸਕ੍ਕਾਰੋਤਿ ਪਾਹੁਨਕਾਨਂ ਕਾਤਬ੍ਬਸਕ੍ਕਾਰੋ. ਫਲਨ੍ਤਿ ਆਨਿਸਂਸਫਲਂ ਨਿਸ੍ਸਨ੍ਦਫਲਞ੍ਚ. ਵਿਪਾਕੋਤਿ ਸਦਿਸਫਲਂ. ਪਰਲੋਕੇ ਠਿਤਸ੍ਸ ਅਯਂ ਲੋਕੋ ਨਤ੍ਥੀਤਿ ਪਰਲੋਕੇ ਠਿਤਸ੍ਸ ਕਮ੍ਮੁਨਾ ਲਦ੍ਧਬ੍ਬੋ ਅਯਂ ਲੋਕੋ ਨ ਹੋਤਿ. ਇਧਲੋਕੇ ਠਿਤਸ੍ਸਪਿ ਪਰਲੋਕੋ ਨਤ੍ਥੀਤਿ ਇਧਲੋਕੇ ਠਿਤਸ੍ਸ ਕਮ੍ਮੁਨਾ ਲਦ੍ਧਬ੍ਬੋ ਪਰਲੋਕੋ ਨ ਹੋਤਿ. ਤਤ੍ਥ ਕਾਰਣਮਾਹ ‘‘ਸਬ੍ਬੇ ਤਤ੍ਥ ਤਤ੍ਥੇਵ ਉਚ੍ਛਿਜ੍ਜਨ੍ਤੀ’’ਤਿ. ਇਮੇ ਸਤ੍ਤਾ ਯਤ੍ਥ ਯਤ੍ਥ ਭਵਯੋਨਿਗਤਿਆਦੀਸੁ ਠਿਤਾ, ਤਤ੍ਥ ਤਤ੍ਥੇਵ ਉਚ੍ਛਿਜ੍ਜਨ੍ਤਿ, ਦ੍ਵਯਵਿਨਾਸੇਨ ਵਿਨਸ੍ਸਨ੍ਤਿ.

ਫਲਾਭਾਵਵਸੇਨਾਤਿ ਮਾਤਾਪਿਤੂਸੁ ਸਮ੍ਮਾਪਟਿਪਤ੍ਤਿਮਿਚ੍ਛਾਪਟਿਪਤ੍ਤੀਨਂ ਫਲਸ੍ਸ ਅਭਾਵਵਸੇਨ ‘‘ਨਤ੍ਥਿ ਮਾਤਾ, ਨਤ੍ਥਿ ਪਿਤਾ’’ਤਿ ਵਦਤਿ, ਨ ਮਾਤਾਪਿਤੂਨਂ, ਨਾਪਿ ਤੇਸੁ ਸਮ੍ਮਾਪਟਿਪਤ੍ਤਿਮਿਚ੍ਛਾਪਟਿਪਤ੍ਤੀਨਂ ਅਭਾਵਵਸੇਨ ਤੇਸਂ ਲੋਕਪਚ੍ਚਕ੍ਖਤ੍ਤਾ. ਪੁਬ੍ਬੁਲ਼ਕਸ੍ਸ ਵਿਯ ਇਮੇਸਂ ਸਤ੍ਤਾਨਂ ਉਪ੍ਪਾਦੋ ਨਾਮ ਕੇਵਲੋ, ਨ ਚ ਖਨਪੁਬ੍ਬਕੋਤਿ ਦਸ੍ਸਨਤ੍ਥਂ ‘‘ਨਤ੍ਥਿ ਸਤ੍ਤਾ ਓਪਪਾਤਿਕਾ’’ਤਿ ਵੁਤ੍ਤਨ੍ਤਿ ਆਹ ‘‘ਚਵਿਤ੍ਵਾ ਉਪ੍ਪਜ੍ਜਨਕਾ ਸਤ੍ਤਾ ਨਾਮ ਨਤ੍ਥੀਤਿ ਵਦਤੀ’’ਤਿ. ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦੇਨ੍ਤੀਤਿ ਯੇ ਇਮਞ੍ਚ ਲੋਕਂ ਪਰਞ੍ਚ ਲੋਕਂ ਅਭਿਵਿਸਿਟ੍ਠਾਯ ਪਞ੍ਞਾਯ ਸਯਂ ਪਚ੍ਚਕ੍ਖਂ ਕਤ੍ਵਾ ਪਵੇਦੇਨ੍ਤਿ, ਤੇ ਨਤ੍ਥੀਤਿ ਸਬ੍ਬਞ੍ਞੁਬੁਦ੍ਧਾਨਂ ਅਭਾਵਂ ਦੀਪੇਤਿ.

ਵਿਪਤ੍ਤਿਸਮ੍ਪਦਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬-੭. ਅਪਣ੍ਣਕਸੁਤ੍ਤਾਦਿਵਣ੍ਣਨਾ

੧੧੯-੧੨੦. ਛਟ੍ਠੇ ਛਹਿ ਤਲੇਹਿ ਸਮਨ੍ਨਾਗਤੋ ਪਾਸਕੋਤਿ ਚਤੂਸੁ ਪਸ੍ਸੇਸੁ ਚਤ੍ਤਾਰਿ ਤਲਾਨਿ, ਦ੍ਵੀਸੁ ਕੋਟੀਸੁ ਦ੍ਵੇ ਤਲਾਨੀਤਿ ਏਵਂ ਛਹਿ ਤਲੇਹਿ ਸਮਨ੍ਨਾਗਤੋ ਪਾਸਕਕੀਲ਼ਾਪਸੁਤਾਨਂ ਮਣਿਸਦਿਸੋ ਪਾਸਕਵਿਸੇਸੋ. ਸਤ੍ਤਮਂ ਉਤ੍ਤਾਨਮੇਵ.

ਅਪਣ੍ਣਕਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੮. ਪਠਮਸੋਚੇਯ੍ਯਸੁਤ੍ਤਵਣ੍ਣਨਾ

੧੨੧. ਅਟ੍ਠਮੇ ਸੁਚਿਭਾਵੋਤਿ ਕਿਲੇਸਾਸੁਚਿਵਿਗਮੇਨ ਸੁਦ੍ਧਭਾਵੋ ਅਸਂਕਿਲਿਟ੍ਠਭਾਵੋ, ਅਤ੍ਥਤੋ ਕਾਯਸੁਚਰਿਤਾਦੀਨਿ.

ਪਠਮਸੋਚੇਯ੍ਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਦੁਤਿਯਸੋਚੇਯ੍ਯਸੁਤ੍ਤਵਣ੍ਣਨਾ

੧੨੨. ਨਵਮੇ ਸਮੁਚ੍ਛੇਦਵਸੇਨ ਪਹੀਨਸਬ੍ਬਕਾਯਦੁਚ੍ਚਰਿਤਤਾਯ ਕਾਯੇ, ਕਾਯੇਨ ਵਾ ਸੁਚਿ ਕਾਯਸੁਚਿ. ਤੇਨਾਹ ‘‘ਕਾਯਦ੍ਵਾਰੇ’’ਤਿਆਦਿ. ਸੋਚੇਯ੍ਯਸਮ੍ਪਨ੍ਨਨ੍ਤਿ ਪਟਿਪ੍ਪਸ੍ਸਦ੍ਧਕਿਲੇਸਤ੍ਤਾ ਪਰਿਸੁਦ੍ਧਾਯ ਸੋਚੇਯ੍ਯਸਮ੍ਪਤ੍ਤਿਯਾ ਉਪੇਤਂ. ਨਿਨ੍ਹਾਤਾ ਅਗ੍ਗਮਗ੍ਗਸਲਿਲੇਨ ਵਿਕ੍ਖਾਲਿਤਾ ਪਾਪਾ ਏਤੇਨਾਤਿ ਨਿਨ੍ਹਾਤਪਾਪਕੋ, ਖੀਣਾਸਵੋ. ਤੇਨਾਹ ‘‘ਖੀਣਾਸਵੋਵ ਕਥਿਤੋ’’ਤਿ.

ਦੁਤਿਯਸੋਚੇਯ੍ਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਮੋਨੇਯ੍ਯਸੁਤ੍ਤਵਣ੍ਣਨਾ

੧੨੩. ਦਸਮੇ ਮੁਨਿਨੋ ਭਾਵਾ ਮੋਨੇਯ੍ਯਾਨਿ, ਯੇਹਿ ਧਮ੍ਮੇਹਿ ਉਭਯਹਿਤਮੁਨਨਤੋ ਮੁਨਿ ਨਾਮ ਹੋਤਿ, ਤੇ ਮੁਨਿਭਾਵਕਰਾ ਮੋਨੇਯ੍ਯਾ ਪਟਿਪਦਾ ਧਮ੍ਮਾ ਏਵ ਵੁਤ੍ਤਾ. ਮੁਨਿਨੋ ਵਾ ਏਤਾਨਿ ਮੋਨੇਯ੍ਯਾਨਿ, ਯਥਾਵੁਤ੍ਤਧਮ੍ਮਾ ਏਵ. ਤਤ੍ਥ ਯਸ੍ਮਾ ਕਾਯੇਨ ਅਕਤ੍ਤਬ੍ਬਸ੍ਸ ਅਕਰਣਂ, ਕਤ੍ਤਬ੍ਬਸ੍ਸ ਚ ਕਰਣਂ, ‘‘ਅਤ੍ਥਿ ਇਮਸ੍ਮਿਂ ਕਾਯੇ ਕੇਸਾ’’ਤਿਆਦਿਨਾ (ਦੀ. ਨਿ. ੨.੩੭੭; ਮ. ਨਿ. ੧.੧੧੦; ਸਂ. ਨਿ. ੪.੧੨੭; ਖੁ. ਪਾ. ੩.ਦ੍ਵਤ੍ਤਿਂਸਾਕਾਰ) ਕਾਯਸਙ੍ਖਾਤਸ੍ਸ ਆਰਮ੍ਮਣਸ੍ਸ ਜਾਨਨਂ, ਕਾਯਸ੍ਸ ਚ ਸਮੁਦਯਤੋ ਅਤ੍ਥਙ੍ਗਮਤੋ ਅਸ੍ਸਾਦਤੋ ਆਦੀਨਵਤੋ ਨਿਸ੍ਸਰਣਤੋ ਚ ਯਾਥਾਵਤੋ ਪਰਿਜਾਨਨਤਾ, ਤਥਾ ਪਰਿਜਾਨਨਵਸੇਨ ਪਨ ਪਵਤ੍ਤੋ ਵਿਪਸ੍ਸਨਾਮਗ੍ਗੋ, ਤੇਨ ਚ ਕਾਯੇ ਛਨ੍ਦਰਾਗਸ੍ਸ ਪਜਹਨਂ, ਕਾਯਸਙ੍ਖਾਰਂ ਨਿਰੋਧੇਤ੍ਵਾ ਪਤ੍ਤਬ੍ਬਸਮਾਪਤ੍ਤਿ ਵਾ, ਸਬ੍ਬੇ ਏਤੇ ਕਾਯਮੁਖੇਨ ਪਵਤ੍ਤਾ ਮੋਨੇਯ੍ਯਪ੍ਪਟਿਪਦਾ ਧਮ੍ਮਾ ਕਾਯਮੋਨੇਯ੍ਯਂ ਨਾਮ. ਤਸ੍ਮਾ ਤਮਤ੍ਥਂ ਦਸ੍ਸੇਤੁਂ ‘‘ਕਤਮਂ ਕਾਯਮੋਨੇਯ੍ਯਂ? ਤਿਵਿਧਕਾਯਦੁਚ੍ਚਰਿਤਸ੍ਸ ਪਹਾਨਂ ਕਾਯਮੋਨੇਯ੍ਯਂ, ਤਿਵਿਧਕਾਯਸੁਚਰਿਤਮ੍ਪਿ ਕਾਯਮੋਨੇਯ੍ਯ’’ਨ੍ਤਿਆਦਿਨਾ (ਮਹਾਨਿ. ੧੪) ਪਾਲ਼ਿ ਆਗਤਾ. ਇਧਾਪਿ ਤੇਨੇਵ ਪਾਲ਼ਿਨਯੇਨ ਅਤ੍ਥਂ ਦਸ੍ਸੇਨ੍ਤੋ ‘‘ਤਿਵਿਧਕਾਯਦੁਚ੍ਚਰਿਤਪ੍ਪਹਾਨਂ ਕਾਯਮੋਨੇਯ੍ਯਂ ਨਾਮਾ’’ਤਿਆਦਿਮਾਹ.

ਇਦਾਨਿ ‘‘ਕਤਮਂ ਵਚੀਮੋਨੇਯ੍ਯਂ? ਚਤੁਬ੍ਬਿਧਵਚੀਦੁਚ੍ਚਰਿਤਸ੍ਸ ਪਹਾਨਂ ਵਚੀਮੋਨੇਯ੍ਯਂ, ਚਤੁਬ੍ਬਿਧਂ ਵਚੀਸੁਚਰਿਤਂ, ਵਾਚਾਰਮ੍ਮਣੇ ਞਾਣਂ, ਵਾਚਾਪਰਿਞ੍ਞਾ, ਪਰਿਞ੍ਞਾਸਹਗਤੋ ਮਗ੍ਗੋ, ਵਾਚਾਯ ਛਨ੍ਦਰਾਗਸ੍ਸ ਪਹਾਨਂ, ਵਚੀਸਙ੍ਖਾਰਨਿਰੋਧੋ ਦੁਤਿਯਜ੍ਝਾਨਸਮਾਪਤ੍ਤਿ ਵਚੀਮੋਨੇਯ੍ਯ’’ਨ੍ਤਿ ਇਮਾਯ ਪਾਲ਼ਿਯਾ ਵੁਤ੍ਤਮਤ੍ਥਂ ਅਤਿਦੀਪੇਨ੍ਤੋ ‘‘ਵਚੀਮੋਨੇਯ੍ਯੇਪਿ ਏਸੇਵ ਨਯੋ’’ਤਿਆਦਿਮਾਹ. ਤਤ੍ਥ ਚੋਪਨਵਾਚਞ੍ਚੇਵ ਸਦ੍ਦਵਾਚਞ੍ਚ ਆਰਬ੍ਭ ਪਵਤ੍ਤਾ ਪਞ੍ਞਾ ਵਾਚਾਰਮ੍ਮਣੇ ਞਾਣਂ. ਤਸ੍ਸਾ ਵਾਚਾਯ ਸਮੁਦਯਾਦਿਤੋ ਪਰਿਜਾਨਨਂ ਵਾਚਾਪਰਿਞ੍ਞਾ.

‘‘ਕਤਮਂ ਮਨੋਮੋਨੇਯ੍ਯਂ? ਤਿਵਿਧਮਨੋਦੁਚ੍ਚਰਿਤਸ੍ਸ ਪਹਾਨਂ ਮਨੋਮੋਨੇਯ੍ਯਂ, ਤਿਵਿਧਂ ਮਨੋਸੁਚ੍ਚਰਿਤਂ, ਮਨਾਰਮ੍ਮਣੇ ਞਾਣਂ, ਮਨਪਰਿਞ੍ਞਾ, ਪਰਿਞ੍ਞਾਸਹਗਤੋ ਮਗ੍ਗੋ, ਮਨਸ੍ਮਿਂ ਛਨ੍ਦਰਾਗਸ੍ਸ ਪਹਾਨਂ, ਚਿਤ੍ਤਸਙ੍ਖਾਰਨਿਰੋਧੋ ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਮਨੋਮੋਨੇਯ੍ਯ’’ਨ੍ਤਿ ਇਮਾਯ ਪਾਲ਼ਿਯਾ ਆਗਤਨਯੇਨ ਅਤ੍ਥਂ ਵਿਭਾਵੇਨ੍ਤੋ ‘‘ਮਨੋਮੋਨੇਯ੍ਯੇਪਿ ਇਮਿਨਾਵ ਨਯੇਨ ਅਤ੍ਥਂ ਞਤ੍ਵਾ’’ਤਿਆਦਿਮਾਹ. ਤਤ੍ਥ ਚ ਏਕਾਸੀਤਿਵਿਧਂ ਲੋਕਿਯਚਿਤ੍ਤਂ ਆਰਬ੍ਭ ਪਵਤ੍ਤਞਾਣਂ ਮਨਾਰਮ੍ਮਣੇ ਞਾਣਂ. ਤਸ੍ਸ ਸਮੁਦਯਾਦਿਤੋ ਪਰਿਜਾਨਨਂ ਮਨਪਰਿਞ੍ਞਾਤਿ ਅਯਂ ਵਿਸੇਸੋ.

ਮੋਨੇਯ੍ਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਆਪਾਯਿਕਵਗ੍ਗਵਣ੍ਣਨਾ ਨਿਟ੍ਠਿਤਾ.