੮. ਪੋਤ੍ਥਕਸੁਤ੍ਤਵਣ੍ਣਨਾ

੧੦੦. ਅਟ੍ਠਮੇ ਨਵੋਤਿ ਨਵਵਾਯਿਮੋ. ਤੇਨਾਹ ‘‘ਕਰਣਂ ਉਪਾਦਾਯ ਵੁਚ੍ਚਤੀ’’ਤਿ. ਵਾਕਮਯਵਤ੍ਥਨ੍ਤਿ ਸਾਣਾਦਿਵਾਕਸਾਟਕਂ. ਦੁਬ੍ਬਣ੍ਣੋਤਿ ਵਿਵਣ੍ਣੋ. ਦੁਕ੍ਖਸਮ੍ਫਸ੍ਸੋਤਿ ਖਰਸਮ੍ਫਸ੍ਸੋ. ਅਪ੍ਪਂ ਅਗ੍ਘਤੀਤਿ ਅਪ੍ਪਗ੍ਘੋ. ਅਤਿਬਹੁਂ ਅਗ੍ਘਨ੍ਤੋ ਕਹਾਪਣਗ੍ਘਨਕੋ ਹੋਤਿ. ਪਰਿਭੋਗਮਜ੍ਝਿਮੋਤਿ ਪਰਿਭੋਗਕਾਲਵਸੇਨ ਮਜ੍ਝਿਮੋ. ਸੋ ਹਿ ਨਵਭਾਵਂ ਅਤਿਕ੍ਕਮਿਤ੍ਵਾ ਜਿਣ੍ਣਭਾਵਂ ਅਪ੍ਪਤ੍ਤੋ ਮਜ੍ਝੇ ਪਰਿਭੋਗਕਾਲੇਪਿ ਦੁਬ੍ਬਣ੍ਣੋ ਚ ਦੁਕ੍ਖਸਮ੍ਫਸ੍ਸੋ ਚ ਅਪ੍ਪਗ੍ਘੋਯੇਵ ਹੋਤਿ. ਅਤਿਬਹੁਂ ਅਗ੍ਘਨ੍ਤੋ ਅਡ੍ਢਂ ਅਗ੍ਘਤਿ, ਜਿਣ੍ਣਕਾਲੇ ਪਨ ਅਡ੍ਢਮਾਸਕਂ ਵਾ ਕਾਕਣਿਕਂ ਵਾ ਅਗ੍ਘਤਿ. ਉਕ੍ਖਲਿਪਰਿਪੁਞ੍ਛਨਨ੍ਤਿ ਕਾਲ਼ੁਕ੍ਖਲਿਪਰਿਪੁਞ੍ਛਨਂ. ਨਵੋਤਿਪਿ ਉਪਸਮ੍ਪਦਾਯ ਪਞ੍ਚਵਸ੍ਸਕਾਲਤੋ ਹੇਟ੍ਠਾ ਜਾਤਿਯਾ ਸਟ੍ਠਿਵਸ੍ਸੋਪਿ ਨਵੋਯੇਵ. ਦੁਬ੍ਬਣ੍ਣਤਾਯਾਤਿ ਸਰੀਰਵਣ੍ਣੇਨਪਿ ਗੁਣਵਣ੍ਣੇਨਪਿ ਦੁਬ੍ਬਣ੍ਣਤਾਯ. ਦੁਸ੍ਸੀਲਸ੍ਸ ਹਿ ਪਰਿਸਮਜ੍ਝੇ ਨਿਤ੍ਤੇਜਤਾਯ ਸਰੀਰਵਣ੍ਣੋਪਿ ਨ ਸਮ੍ਪਜ੍ਜਤਿ, ਗੁਣਵਣ੍ਣੇਨ ਵਤ੍ਤਬ੍ਬਮੇਵ ਨਤ੍ਥਿ. ਅਟ੍ਠਕਥਾਯਂ ਪਨ ਸਰੀਰਵਣ੍ਣੇਨ ਦੁਬ੍ਬਣ੍ਣਤਾਪਿ ਗੁਣਵਣ੍ਣਸ੍ਸ ਅਭਾਵੇਨ ਦੁਬ੍ਬਣ੍ਣਤਾਯਾਤਿ ਵੁਤ੍ਤਂ.

ਯੇ ਖੋ ਪਨਸ੍ਸਾਤਿ ਯੇ ਖੋ ਪਨ ਤਸ੍ਸ ਉਪਟ੍ਠਾਕਾ ਵਾ ਞਾਤਿਮਿਤ੍ਤਾਦਯੋ ਵਾ ਏਤਂ ਪੁਗ੍ਗਲਂ ਸੇਵਨ੍ਤਿ. ਤੇਸਨ੍ਤਿ ਤੇਸਂ ਪੁਗ੍ਗਲਾਨਂ ਛ ਸਤ੍ਥਾਰੇ ਸੇਵਨ੍ਤਾਨਂ ਮਿਚ੍ਛਾਦਿਟ੍ਠਿਕਾਨਂ ਵਿਯ. ਦੇਵਦਤ੍ਤੇ ਸੇਵਨ੍ਤਾਨਂ ਕੋਕਾਲਿਕਾਦੀਨਂ ਵਿਯ ਚ ਤਂ ਸੇਵਨਂ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯ ਹੋਤਿ. ਮਜ੍ਝਿਮੋਤਿ ਪਞ੍ਚਵਸ੍ਸਕਾਲਤੋ ਪਟ੍ਠਾਯ ਯਾਵ ਨਵਵਸ੍ਸਕਾਲਾ ਮਜ੍ਝਿਮੋ ਨਾਮ. ਥੇਰੋਤਿ ਦਸਵਸ੍ਸਤੋ ਪਟ੍ਠਾਯ ਥੇਰੋ ਨਾਮ. ਏਵਮਾਹਂਸੂਤਿ ਏਵਂ ਵਦਨ੍ਤਿ. ਕਿਂ ਨੁ ਖੋ ਤੁਯ੍ਹਨ੍ਤਿ ਤੁਯ੍ਹਂ ਬਾਲਸ੍ਸ ਭਣਿਤੇਨ ਕੋ ਅਤ੍ਥੋਤਿ ਵੁਤ੍ਤਂ ਹੋਤਿ. ਤਥਾਰੂਪਨ੍ਤਿ ਤਥਾਜਾਤਿਕਂ ਤਥਾਸਭਾਵਂ ਉਕ੍ਖੇਪਨੀਯਕਮ੍ਮਸ੍ਸ ਕਾਰਣਭੂਤਂ.

ਤੀਹਿ ਕਪ੍ਪਾਸਅਂਸੂਹਿ ਸੁਤ੍ਤਂ ਕਨ੍ਤਿਤ੍ਵਾ ਕਤਵਤ੍ਥਨ੍ਤਿ ਤਯੋ ਕਪ੍ਪਾਸਅਂਸੂ ਗਹੇਤ੍ਵਾ ਕਨ੍ਤਿਤਸੁਤ੍ਤੇਨ ਵਾਯਿਤਂ ਸੁਖੁਮਵਤ੍ਥਂ, ਤਂ ਨਵਵਾਯਿਮਂ ਅਨਗ੍ਘਂ ਹੋਤਿ, ਪਰਿਭੋਗਮਜ੍ਝਿਮਂ ਵੀਸਮ੍ਪਿ ਤਿਂਸਮ੍ਪਿ ਸਹਸ੍ਸਾਨਿ ਅਗ੍ਘਤਿ, ਜਿਣ੍ਣਕਾਲੇ, ਅਟ੍ਠਪਿ ਦਸਪਿ ਸਹਸ੍ਸਾਨਿ ਅਗ੍ਘਤਿ.

ਤੇਸਂ ਤਂ ਹੋਤੀਤਿ ਤੇਸਂ ਸਮ੍ਮਾਸਮ੍ਬੁਦ੍ਧਾਦਯੋ ਸੇਵਨ੍ਤਾ ਵਿਯ ਤਂ ਸੇਵਨਂ ਦੀਘਰਤ੍ਤਂ ਹਿਤਾਯ ਸੁਖਾਯ ਹੋਤਿ. ਸਮ੍ਮਾਸਮ੍ਬੁਦ੍ਧਞ੍ਹਿ ਏਕਂ ਨਿਸ੍ਸਾਯ ਯਾਵਜ੍ਜਕਾਲਾ ਮੁਚ੍ਚਨਕਸਤ੍ਤਾਨਂ ਪਮਾਣਂ ਨਤ੍ਥਿ, ਤਥਾ ਸਾਰਿਪੁਤ੍ਤਤ੍ਥੇਰਮਹਾਮੋਗ੍ਗਲ੍ਲਾਨਤ੍ਥੇਰੇ ਅਵਸੇਸੇ ਚ ਅਸੀਤਿ ਮਹਾਸਾਵਕੇ ਨਿਸ੍ਸਾਯ ਸਗ੍ਗਗਤਸਤ੍ਤਾਨਂ ਪਮਾਣਂ ਨਤ੍ਥਿ, ਯਾਵਜ੍ਜਕਾਲਾ ਤੇਸਂ ਦਿਟ੍ਠਾਨੁਗਤਿਂ ਪਟਿਪਨ੍ਨਸਤ੍ਤਾਨਮ੍ਪਿ ਪਮਾਣਂ ਨਤ੍ਥਿਯੇਵ. ਆਧੇਯ੍ਯਂ ਗਚ੍ਛਤੀਤਿ ਤਸ੍ਸ ਮਹਾਥੇਰਸ੍ਸ ਤਂ ਅਤ੍ਥਨਿਸ੍ਸਿਤਂ ਵਚਨਂ ਯਥਾ ਗਨ੍ਧਕਰਣ੍ਡਕੇ ਕਾਸਿਕਵਤ੍ਥਂ ਆਧਾਤਬ੍ਬਤਂ ਠਪੇਤਬ੍ਬਤਂ ਗਚ੍ਛਤਿ, ਏਵਂ ਉਤ੍ਤਮਙ੍ਗੇ ਸਿਰਸ੍ਮਿਂ ਹਦਯੇ ਚ ਆਧਾਤਬ੍ਬਤਂ ਠਪੇਤਬ੍ਬਤਂ ਗਚ੍ਛਤਿ.

ਪੋਤ੍ਥਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.