੯. ਲੋਣਕਪਲ੍ਲਸੁਤ੍ਤਵਣ੍ਣਨਾ

੧੦੧. ਨਵਮੇ ਯਥਾ ਯਥਾ ਕਮ੍ਮਂ ਕਰੋਤੀਤਿ ਯੇਨ ਯੇਨ ਪਕਾਰੇਨ ਪਾਣਘਾਤਾਦਿਪਾਪਕਮ੍ਮਂ ਕਰੋਤਿ. ਵਿਪਾਕਂ ਪਟਿਸਂਵੇਦਿਯਤੇਵਾਤਿ ਅਵਧਾਰਣੇਨ ਕਮ੍ਮਸਿਦ੍ਧਿਯਂ ਤਬ੍ਬਿਪਾਕਸ੍ਸ ਅਪ੍ਪਵਤ੍ਤਿ ਨਾਮ ਨਤ੍ਥੀਤਿ ਦੀਪੇਤਿ. ਤੇਨੇਵਾਹ ‘‘ਨ ਹਿ ਸਕ੍ਕਾ’’ਤਿਆਦਿ. ਏਵਂ ਸਨ੍ਤਨ੍ਤਿ ਭੁਮ੍ਮਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਏਵਂ ਸਨ੍ਤੇ’’ਤਿ. ਅਭਿਸਙ੍ਖਾਰਵਿਞ੍ਞਾਣਨਿਰੋਧੇਨਾਤਿ ਕਮ੍ਮਵਿਞ੍ਞਾਣਸ੍ਸ ਆਯਤਿਂ ਅਨੁਪ੍ਪਤ੍ਤਿਧਮ੍ਮਤਾਪਜ੍ਜਨੇਨ.

‘‘ਅਯਮ੍ਪਿ ਖੋ ਕਾਯੋ ਏਵਂਧਮ੍ਮੋ ਏਵਂਭਾਵੀ ਏਵਂਅਨਤੀਤੋ’’ਤਿਆਦਿਨਾ ਕਾਯਸ੍ਸ ਅਸੁਭਾਨਿਚ੍ਚਾਦਿਆਕਾਰਅਨੁਪਸ੍ਸਨਾ ਕਾਯਭਾਵਨਾਤਿ ਆਹ ‘‘ਕਾਯਾਨੁਪਸ੍ਸਨਾਸਙ੍ਖਾਤਾਯ ਤਾਯ ਭਾਵਨਾਯਾ’’ਤਿ. ਰਾਗਾਦੀਨਨ੍ਤਿ ਆਦਿ-ਸਦ੍ਦੇਨ ਦੋਸਮੋਹਾਨਂ ਸਙ੍ਗਹੋ ਦਟ੍ਠਬ੍ਬੋ. ‘‘ਰਾਗੋ ਖੋ, ਆਵੁਸੋ, ਪਮਾਣਕਰਣੋ, ਦੋਸੋ ਪਮਾਣਕਰਣੋ, ਮੋਹੋ ਪਮਾਣਕਰਣੋ, ਤੇ ਖੀਣਾਸਵਸ੍ਸ ਭਿਕ੍ਖੁਨੋ ਪਹੀਨਾ ਉਚ੍ਛਿਨ੍ਨਮੂਲਾ ਤਾਲਾਵਤ੍ਥੁਕਤਾ ਅਨਭਾਵਂਕਤਾ ਆਯਤਿਂ ਅਨੁਪ੍ਪਾਦਧਮ੍ਮਾ’’ਤਿ (ਮ. ਨਿ. ੧.੪੫੯) ਹਿ ਵੁਤ੍ਤਂ.

ਯਥਾ ਹਿ ਪਬ੍ਬਤਪਾਦੇ ਪੂਤਿਪਣ੍ਣਸ੍ਸ ਉਦਕਂ ਨਾਮ ਹੋਤਿ, ਕਾਲ਼ਵਣ੍ਣਂ ਓਲੋਕੇਨ੍ਤਾਨਂ ਬ੍ਯਾਮਸਤਂ ਗਮ੍ਭੀਰਂ ਵਿਯ ਖਾਯਤਿ, ਯਟ੍ਠਿਂ ਵਾ ਰਜ੍ਜੁਂ ਵਾ ਗਹੇਤ੍ਵਾ ਮਿਨਨ੍ਤਸ੍ਸ ਪਿਟ੍ਠਿਪਾਦੋਦ੍ਧਰਣਮਤ੍ਤਮ੍ਪਿ ਨ ਹੋਤਿ, ਏਵਮੇਵ ਏਕਚ੍ਚਸ੍ਸ ਯਾਵ ਰਾਗਾਦਯੋ ਨੁਪ੍ਪਜ੍ਜਨ੍ਤਿ, ਤਾਵ ਤਂ ਪੁਗ੍ਗਲਂ ਸਞ੍ਜਾਨਿਤੁਂ ਨ ਸਕ੍ਕਾ ਹੋਤਿ, ਸੋਤਾਪਨ੍ਨੋ ਵਿਯ ਸਕਦਾਗਾਮੀ ਵਿਯ ਅਨਾਗਾਮੀ ਵਿਯ ਚ ਖਾਯਤਿ. ਯਦਾ ਪਨਸ੍ਸ ਰਾਗਾਦਯੋ ਉਪ੍ਪਜ੍ਜਨ੍ਤਿ, ਤਦਾ ਰਤ੍ਤੋ ਦੁਟ੍ਠੋ ਮੂਲ਼੍ਹੋਤਿ ਪਞ੍ਞਾਯਤਿ. ਇਤਿ ਤੇ ਰਾਗਾਦਯੋ ‘‘ਏਤ੍ਤਕੋ ਅਯ’’ਨ੍ਤਿ ਪੁਗ੍ਗਲਸ੍ਸ ਪਮਾਣਂ ਦਸ੍ਸੇਨ੍ਤਾਵ ਉਪ੍ਪਜ੍ਜਨ੍ਤੀਤਿ ਪਮਾਣਕਰਣਾ ਨਾਮ ਵੁਤ੍ਤਾ.

ਜਾਪੇਤੁਨ੍ਤਿ ਜਿਨਧਨਂ ਕਾਤੁਂ. ਸੋਤਿ ਰਾਜਾ, ਮਹਾਮਤ੍ਤੋ ਵਾ. ਅਸ੍ਸਾਤਿ ਅਞ੍ਜਲਿਂ ਪਗ੍ਗਹੇਤ੍ਵਾ ਯਾਚਨ੍ਤਸ੍ਸ. ਸੇਸਮੇਤ੍ਥ ਉਤ੍ਤਾਨਮੇਵ.

ਲੋਣਕਪਲ੍ਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.