੧੪. ਏਤਦਗ੍ਗਵਗ੍ਗੋ

(੧੪) ੭. ਸਤ੍ਤਮਏਤਦਗ੍ਗਵਗ੍ਗਵਣ੍ਣਨਾ

ਸੁਜਾਤਾਵਤ੍ਥੁ

੨੫੮. ਉਪਾਸਿਕਾਪਾਲ਼ਿਸਂਵਣ੍ਣਨਾਯ ਪਠਮਂ ਸੁਵਿਞ੍ਞੇਯ੍ਯਮੇਵ.

ਵਿਸਾਖਾਵਤ੍ਥੁ

੨੫੯. ਦੁਤਿਯੇ ਮਹਾਲਤਾਪਸਾਧਨਸ੍ਸਾਤਿ ਮਹਾਲਤਾਪਿਲ਼ਨ੍ਧਨਸ੍ਸ. ਤਸ੍ਮਿਞ੍ਚ ਪਿਲ਼ਨ੍ਧਨੇ ਚਤਸ੍ਸੋ ਵਜਿਰਨਾਲ਼ਿਯੋ ਉਪਯੋਗਂ ਅਗਮਂਸੁ. ਮੁਤ੍ਤਾਨਂ ਏਕਾਦਸ ਨਾਲ਼ਿਯੋ, ਪਵਾਲ਼ਸ੍ਸ ਦ੍ਵਾਵੀਸਤਿ ਨਾਲ਼ਿਯੋ, ਪਦੁਮਰਾਗਮਣੀਨਂ ਤੇਤ੍ਤਿਂਸ ਨਾਲ਼ਿਯੋ. ਇਤਿ ਏਤੇਹਿ ਚ ਅਞ੍ਞੇਹਿ ਚ ਇਨ੍ਦਨੀਲਾਦੀਹਿ ਨੀਲਪੀਤਲੋਹਿਤੋਦਾਤਮਞ੍ਜਿਟ੍ਠਸਾਮਕਬਰਵਣ੍ਣਵਸੇਨ ਸਤ੍ਤਵਣ੍ਣੇਹਿ ਵਰਰਤਨੇਹਿ ਨਿਟ੍ਠਾਨਂ ਅਗਮਾਸਿ, ਤਂ ਸੀਸੇ ਪਟਿਮੁਕ੍ਕਂ ਯਾਵ ਪਾਦਪਿਟ੍ਠਿਯਾ ਭਸ੍ਸਤਿ, ਪਞ੍ਚਨ੍ਨਂ ਹਤ੍ਥੀਨਂ ਬਲਂ ਧਾਰਯਮਾਨਾਵ ਨਂ ਇਤ੍ਥੀ ਧਾਰੇਤੁਂ ਸਕ੍ਕੋਤਿ. ਅਨ੍ਤੋਅਗ੍ਗਿ ਬਹਿ ਨ ਨੀਹਰਿਤਬ੍ਬੋਤਿਆਦੀਨਂ ਅਤ੍ਥੋ ਉਪਰਿ ਆਵਿ ਭਵਿਸ੍ਸਤਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਖੁਜ੍ਜੁਤ੍ਤਰਾ-ਸਾਮਾਵਤੀਵਤ੍ਥੁ

੨੬੦-੨੬੧. ਤਤਿਯਚਤੁਤ੍ਥੇਸੁ ਪਾਯਾਸਸ੍ਸਾਤਿ ਬਹਲਤਰਸ੍ਸ ਪਾਯਾਸਸ੍ਸ. ਤਂ ਪਾਯਾਸਂ ਭੁਞ੍ਜਨ੍ਤੇਸੂਤਿ ਤਂ ਬਹਲਤਰਂ ਗਰੁਸਿਨਿਦ੍ਧਂ ਪਾਯਾਸਂ ਭੁਞ੍ਜਨ੍ਤੇਸੁ. ਜੀਰਾਪੇਤੁਂ ਅਸਕ੍ਕੋਨ੍ਤੋਤਿ ਅਨ੍ਤਰਾਮਗ੍ਗੇ ਅਪ੍ਪਾਹਾਰਤਾਯ ਮਨ੍ਦਗਹਣਿਕਤ੍ਤਾ ਜੀਰਾਪੇਤੁਂ ਅਸਕ੍ਕੋਨ੍ਤੋ. ਵਾਲ਼ਮਿਗਟ੍ਠਾਨੇਤਿ ਵਾਲ਼ਮਿਗੇਹਿ ਅਧਿਟ੍ਠਿਤਟ੍ਠਾਨੇ. ਅਨੁਵਿਜ੍ਜਨ੍ਤੋਤਿ ਵਿਚਾਰੇਨ੍ਤੋ. ਸਾਲਾਤਿ ਨਲ਼ਕਾਰਸਾਲਾ. ਮੁਧਾ ਨ ਕਰਿਸ੍ਸਤੀਤਿ ਮੂਲ੍ਯਂ ਵਿਨਾ ਨ ਕਰਿਸ੍ਸਤਿ. ਆਲਿਮ੍ਪੇਸੀਤਿ ਅਗ੍ਗਿਂ ਅਦਾਸਿ, ਅਗ੍ਗਿਂ ਜਾਲੇਸੀਤਿ ਅਤ੍ਥੋ. ਪੇਕ੍ਖਾਤਿ ਆਗਮੇਹਿ. ਉਪਧਿਸਮ੍ਪਦਾਤਿ ਸਰੀਰਸਮ੍ਪਤ੍ਤਿ. ਵਟਰੁਕ੍ਖਂ ਪਤ੍ਵਾਤਿ ਨਿਗ੍ਰੋਧਰੁਕ੍ਖਂ ਪਤ੍ਵਾ. ਸੁਵਣ੍ਣਕਟਕੇਤਿ ਸੁਵਣ੍ਣਵਲਯੇ. ਅਬ੍ਭੁਂ ਮੇਤਿ ਮੇ ਅਵਡ੍ਢੀਤਿ ਅਤ੍ਥੋ. ਅਨ੍ਤੋ ਅਸੋਧੇਤ੍ਵਾਤਿ ਪਣ੍ਣਸਾਲਾਯ ਅਨ੍ਤੋ ਕਸ੍ਸਚਿ ਅਤ੍ਥਿਭਾਵਂ ਵਾ ਨਤ੍ਥਿਭਾਵਂ ਵਾ ਅਨੁਪਧਾਰੇਤ੍ਵਾ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਉਤ੍ਤਰਾਨਨ੍ਦਮਾਤਾਵਤ੍ਥੁ

੨੬੨. ਪਞ੍ਚਮੇ ਉਪਨਿਸ੍ਸਯਂ ਦਿਸ੍ਵਾਤਿ ਇਮਿਨਾ ਯਥਾ ਵਿਸੇਸਾਧਿਗਮਸ੍ਸ ਸਤਿਪਿ ਪਚ੍ਚੁਪ੍ਪਨ੍ਨਪਚ੍ਚਯਸਮਵਾਯੇ ਅਵਸ੍ਸਂ ਉਪਨਿਸ੍ਸਯਸਮ੍ਪਦਾ ਇਚ੍ਛਿਤਬ੍ਬਾ, ਏਵਂ ਦਿਟ੍ਠਧਮ੍ਮਵੇਦਨੀਯਭਾਵੇਨ ਵਿਪਚ੍ਚਨਕਸ੍ਸ ਕਮ੍ਮਸ੍ਸਪਿ ਪਚ੍ਚੁਪ੍ਪਨ੍ਨਸਮਵਾਯੋ ਵਿਯ ਉਪਨਿਸ੍ਸਯਸਮ੍ਪਦਾਪਿ ਸਵਿਸੇਸਾ ਇਚ੍ਛਿਤਬ੍ਬਾਤਿ ਦਸ੍ਸੇਤਿ. ਤਥਾ ਹਿ ਉਕ੍ਕਂਸਗਤਸਪ੍ਪੁਰਿਸੂਪਨਿਸ੍ਸਯਯੋਨਿਸੋਮਨਸਿਕਾਰੇਸੁ ਲਬ੍ਭਮਾਨੇਸੁਪਿ ਉਪਨਿਸ੍ਸਯਰਹਿਤਸ੍ਸ ਵਿਸੇਸਾਧਿਗਮੋ ਨ ਸਮ੍ਪਜ੍ਜਤੇਵਾਤਿ. ਕਪ੍ਪਿਯਂ ਕਤ੍ਵਾਤਿ ਯਥਾ ਕਪ੍ਪਿਯਂ ਹੋਤਿ, ਤਥਾ ਕਤ੍ਵਾ. ਪਤ੍ਤੇ ਪਤਿਟ੍ਠਪੇਯ੍ਯਾਤਿ ਆਹਾਰਂ ਦਾਨਮੁਖੇ ਵਿਸ੍ਸਜ੍ਜੇਯ੍ਯ. ਤੀਹਿ ਚੇਤਨਾਹੀਤਿ ਪੁਬ੍ਬਭਾਗਮੁਞ੍ਚਅਨੁਮੋਦਨਾਚੇਤਨਾਹਿ. ਵੁਤ੍ਤਞ੍ਹੇਤਂ –

‘‘ਪੁਬ੍ਬੇਵ ਦਾਨਾ ਸੁਮਨੋ, ਦਦਂ ਚਿਤ੍ਤਂ ਪਸਾਦਯੇ;

ਦਤ੍ਵਾ ਅਤ੍ਤਮਨੋ ਹੋਤਿ, ਏਸਾ ਪੁਞ੍ਞਸ੍ਸ ਸਮ੍ਪਦਾ’’ਤਿ. (ਅ. ਨਿ. ੬.੩੭; ਪੇ. ਵ. ੩੦੫);

ਤਵ ਮਨਂ ਸਨ੍ਧਾਰੇਹੀਤਿ ‘‘ਅਜ੍ਜ ਭਤ੍ਤਂ ਚਿਰਾਯਿਤ’’ਨ੍ਤਿ ਕੋਧਤੋ ਤਵ ਚਿਤ੍ਤਂ ਸਨ੍ਧਾਰੇਹਿ, ਮਾ ਕੁਜ੍ਝੀਤਿ ਅਤ੍ਥੋ. ਓਲੋਕਿਤੋਲੋਕਿਤਟ੍ਠਾਨਂ…ਪੇ… ਸਮ੍ਪਰਿਕਿਣ੍ਣਂ ਵਿਯ ਅਹੋਸੀਤਿ ਤੇਨ ਕਸਿਤਟ੍ਠਾਨਂ ਸਬ੍ਬਂ ਸੁਵਣ੍ਣਭਾਵਾਪਤ੍ਤਿਯਾ ਮਹਾਕੋਸਾਤਕਿਪੁਪ੍ਫੇਹਿ ਸਞ੍ਛਨ੍ਨਂ ਵਿਯ ਅਹੋਸਿ. ਤਾਦਿਸੇਤਿ ਤਯਾ ਸਦਿਸੇ. ਨ ਕੋਪੇਮੀਤਿ ਨ ਵਿਨਾਸੇਮਿ, ਜਾਤਿਯਾ ਨ ਹੀਲ਼ੇਮਿ. ਪੂਜਂ ਕਰੋਤੀਤਿ ਸਮ੍ਮਾਸਮ੍ਬੁਦ੍ਧਸ੍ਸ ਪੂਜਂ ਕਰੋਤਿ. ਅਨ੍ਤਰਵਤ੍ਥੁਨ੍ਤਿ ਗੇਹਙ੍ਗਣਂ. ਭੋਤਿ ਸਮ੍ਬੋਧਨੇ ਨਿਪਾਤੋ. ਜੇਤਿ ਅਵਞ੍ਞਾਲਪਨਂ. ਸਯਂ ਅਰਿਯਸਾਵਿਕਾਭਾਵਤੋ ਸਤ੍ਥੁਵਸੇਨ ‘‘ਸਪਿਤਿਕਾ ਧੀਤਾ’’ਤਿ ਵਤ੍ਵਾ ਸਤ੍ਥੁ ਸਮ੍ਮੁਖਾ ਧਮ੍ਮਸ੍ਸਵਨੇਨ ਤਸ੍ਸਾ ਵਿਸੇਸਾਧਿਗਮਂ ਪਚ੍ਚਾਸੀਸਨ੍ਤੀ ‘‘ਦਸਬਲੇ ਖਮਨ੍ਤੇਯੇਵ ਖਮਿਸ੍ਸਾਮੀ’’ਤਿ ਆਹ. ਕਦਰਿਯਨ੍ਤਿ ਥਦ੍ਧਮਚ੍ਛਰਿਂ.

ਸੁਪ੍ਪਵਾਸਾਵਤ੍ਥੁ

੨੬੩. ਛਟ੍ਠੇ ਪਣੀਤਦਾਯਿਕਾਨਨ੍ਤਿ ਪਣੀਤਰਸਵਤ੍ਥੂਨਂ ਦਾਯਿਕਾਨਂ. ਆਯੁਨੋ ਠਿਤਿਹੇਤੁਂ ਭੋਜਨਂ ਦੇਨ੍ਤੀ ਆਯੁਂ ਦੇਤਿ ਨਾਮ. ਏਸ ਨਯੋ ਵਣ੍ਣਂ ਦੇਤੀਤਿਆਦੀਸੁ. ਤੇਨਾਹ – ‘‘ਪਞ੍ਚ ਠਾਨਾਨੀ’’ਤਿ. ਕਮ੍ਮਸਰਿਕ੍ਖਕਞ੍ਚੇਤਂ ਫਲਨ੍ਤਿ ਦਸ੍ਸੇਨ੍ਤੋ ‘‘ਆਯੁਂ ਖੋ ਪਨ ਦਤ੍ਵਾ’’ਤਿਆਦਿਮਾਹ. ਤਤ੍ਥ ਦਤ੍ਵਾਤਿ ਦਾਨਹੇਤੁ. ਭਾਗਿਨੀਤਿ ਭਾਗਵਤੀ ਲਦ੍ਧੁਂ ਭਬ੍ਬਾ.

ਸੁਪ੍ਪਿਯਾਵਤ੍ਥੁ

੨੬੪. ਸਤ੍ਤਮੇ ਊਰੁਮਂਸਂ ਛਿਨ੍ਦਿਤ੍ਵਾ ਦਾਸਿਯਾ ਅਦਾਸੀਤਿ ਆਗਤਫਲਾ ਵਿਞ੍ਞਾਤਸਾਸਨਾ ਅਰਿਯਸਾਵਿਕਾ ਅਤ੍ਤਨੋ ਸਰੀਰਦੁਕ੍ਖਂ ਅਚਿਨ੍ਤੇਤ੍ਵਾ ਤਸ੍ਸ ਭਿਕ੍ਖੁਨੋ ਰੋਗਵੂਪਸਮਮੇਵ ਪਚ੍ਚਾਸੀਸਨ੍ਤੀ ਅਤ੍ਤਨੋ ਊਰੁਮਂਸਂ ਛਿਨ੍ਦਿਤ੍ਵਾ ਦਾਸਿਯਾ ਅਦਾਸਿ. ਸਤ੍ਥਾਪਿ ਤਸ੍ਸਾ ਤਥਾਪਵਤ੍ਤਂ ਅਜ੍ਝਾਸਯਸਮ੍ਪਤ੍ਤਿਂ ਦਿਸ੍ਵਾ ‘‘ਮਮ ਸਮ੍ਮੁਖੀਭਾਵੂਪਗਮਨੇਨੇਵਸ੍ਸਾ ਵਣੋ ਰੁਹਿਤ੍ਵਾ ਸਞ੍ਛਵਿ ਜਾਯਤਿ, ਫਾਸੁਭਾਵੋ ਹੋਤੀ’’ਤਿ ਚ ਦਿਸ੍ਵਾ ‘‘ਪਕ੍ਕੋਸਥ ਨ’’ਨ੍ਤਿ ਆਹ. ਸਾ ਚਿਨ੍ਤੇਸੀਤਿ ‘‘ਸਬ੍ਬਲੋਕਸ੍ਸ ਹਿਤਾਨੁਕਮ੍ਪਕੋ ਸਤ੍ਥਾ ਨ ਮਂ ਦੁਕ੍ਖਾਪੇਤੁਂ ਪਕ੍ਕੋਸਤਿ, ਅਤ੍ਥੇਤ੍ਥ ਕਾਰਣ’’ਨ੍ਤਿ ਚਿਨ੍ਤੇਸਿ. ਅਤ੍ਤਨਾ ਕਤਕਾਰਣਂ ਸਬ੍ਬਂ ਕਥੇਸੀਤਿ ਬੁਦ੍ਧਾਨੁਭਾਵਵਿਭਾਵਨਤ੍ਥਂ ਕਥੇਸਿ, ਨ ਅਤ੍ਤਨੋ ਦਲ਼੍ਹਜ੍ਝਾਸਯਤਾਯ ਵਿਭਾਵਨਤ੍ਥਂ. ਗਿਲਾਨੁਪਟ੍ਠਾਕੀਨਂ ਅਗ੍ਗਟ੍ਠਾਨੇ ਠਪੇਸੀਤਿ ਅਗਣਿਤਤ੍ਤਦੁਕ੍ਖਾ ਗਿਲਾਨਾਨਂ ਭਿਕ੍ਖੂਨਂ ਗੇਲਞ੍ਞਵੂਪਸਮਨੇ ਯੁਤ੍ਤਪ੍ਪਯੁਤ੍ਤਾਤਿ ਗਿਲਾਨੁਪਟ੍ਠਾਕੀਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਕਾਤਿਯਾਨੀਵਤ੍ਥੁ

੨੬੫. ਅਟ੍ਠਮੇ ਅਵੇਚ੍ਚਪ੍ਪਸਨ੍ਨਾਨਨ੍ਤਿ ਰਤਨਤ੍ਤਯਗੁਣੇ ਯਾਥਾਵਤੋ ਞਤ੍ਵਾ ਪਸਨ੍ਨਾਨਂ, ਸੋ ਪਨਸ੍ਸ ਪਸਾਦੋ ਮਗ੍ਗੇਨਾਗਤਤ੍ਤਾ ਕੇਨਚਿ ਅਕਮ੍ਪਨੀਯੋ. ਅਧਿਗਤੇਨਾਤਿ ਮਗ੍ਗਾਧਿਗਮੇਨੇਵ ਅਧਿਗਤੇਨ. ‘‘ਅਵਿਗਤੇਨਾ’’ਤਿ ਵਾ ਪਾਠੋ, ਤਸ੍ਸਤ੍ਥੋ ‘‘ਕਦਾਚਿ ਅਵਿਗਚ੍ਛਨ੍ਤੇਨਾ’’ਤਿ. ਸੋ ਅਪ੍ਪਧਂਸਿਯੋ ਚ ਹੋਤਿ, ਤਸ੍ਮਾ ਵੁਤ੍ਤਂ – ‘‘ਅਧਿਗਤੇਨ ਅਚਲਪ੍ਪਸਾਦੇਨਾ’’ਤਿ. ਤਤ੍ਥ ਕਾਯਸਕ੍ਖਿਂ ਕਤ੍ਵਾਤਿ ਪਮੁਖਂ ਕਤ੍ਵਾ, ਵਚਨਤ੍ਥਤੋ ਪਨ ਨਾਮਕਾਯੇਨ ਦੇਸਨਾਯ ਸਮ੍ਪਟਿਚ੍ਛਨਵਸੇਨ ਸਕ੍ਖਿਭੂਤਂ ਕਤ੍ਵਾਤਿ ਅਤ੍ਥੋ. ਉਮ੍ਮਗ੍ਗਂ ਖਨਿਤ੍ਵਾਤਿ ਘਰਸਨ੍ਧਿਚ੍ਛੇਦਨੇਨ ਅਨ੍ਤੋਪਵਿਸਨਮਗ੍ਗਂ ਖਨਿਤ੍ਵਾ. ਦੁਲ੍ਲਭਸ੍ਸਵਨਨ੍ਤਿ ਦੁਲ੍ਲਭਸਦ੍ਧਮ੍ਮਸ੍ਸਵਨਂ. ਮਹਾਪਥਵੀ ਪਵਿਸਿਤਬ੍ਬਾ ਭਵੇਯ੍ਯਾਤਿ ਅਵੀਚਿਪ੍ਪਵੇਸਨਂ ਵਦਤਿ.

ਨਕੁਲਮਾਤਾਵਤ੍ਥੁ

੨੬੬. ਨਵਮੇ ਵਿਸ੍ਸਾਸਕਥਨੇਨੇਵ ਨਕੁਲਮਾਤਾ ਨਕੁਲਪਿਤਾ ਚ ਸਤ੍ਥੁਵਿਸ੍ਸਾਸਿਕਾ ਨਾਮ ਜਾਤਾਤਿ ਵੁਤ੍ਤਂ – ‘‘ਵਿਸ੍ਸਾਸਿਕਾਨਨ੍ਤਿ ਵਿਸ੍ਸਾਸਕਥਂ ਕਥੇਨ੍ਤੀਨਂ ਉਪਾਸਿਕਾਨ’’ਨ੍ਤਿ. ਗਹਪਤਾਨੀਤਿ ਗੇਹਸਾਮਿਨੀ. ਵੁਤ੍ਤਮੇਵਾਤਿ ਉਪਾਸਕਪਾਲ਼ਿਯਂ ਨਕੁਲਪਿਤੁਕਥਾਯਂ ਵੁਤ੍ਤਨਯਮੇਵ.

ਕਾਲ਼ੀਕੁਰਰਘਰਿਕਾਵਤ੍ਥੁ

੨੬੭. ਦਸਮੇ ਅਨੁਸ੍ਸਵੇਨੇਵਾਤਿ ਪਚ੍ਚਕ੍ਖਤੋ ਰੂਪਦਸ੍ਸਨੇਨ ਸਤ੍ਥੁ ਸਮ੍ਮੁਖਾ ਧਮ੍ਮਸ੍ਸਵਨੇਨ ਚ ਵਿਨਾ ਕੇਵਲਂ ਅਨੁਸ੍ਸਵਨੇਨੇਵ ਪਰਸ੍ਸ ਵਚਨਂ ਅਨੁਗਤਸ੍ਸਵਨੇਨੇਵ ਉਪ੍ਪਨ੍ਨੇਨ ਪਸਾਦੇਨ. ਅਨੁਸ੍ਸਵਿਕਪ੍ਪਸਾਦਨ੍ਤਿ ਅਨੁਸ੍ਸਵਤੋ ਆਗਤਪ੍ਪਸਾਦਂ.

(ਸਤ੍ਤਮਏਤਦਗ੍ਗਵਗ੍ਗਵਣ੍ਣਨਾ ਨਿਟ੍ਠਿਤਾ.)

ਉਪਾਸਿਕਾਪਾਲ਼ਿਸਂਵਣ੍ਣਨਾ ਸਮਤ੍ਤਾ.

ਨਿਟ੍ਠਿਤਾ ਚ ਮਨੋਰਥਪੂਰਣਿਯਾ

ਅਙ੍ਗੁਤ੍ਤਰਨਿਕਾਯ-ਅਟ੍ਠਕਥਾਯ

ਏਤਦਗ੍ਗਵਗ੍ਗਵਣ੍ਣਨਾਯ ਅਨੁਤ੍ਤਾਨਤ੍ਥਦੀਪਨਾ.