੧੪. ਏਤਦਗ੍ਗਵਗ੍ਗੋ

(੧੪) ੬. ਛਟ੍ਠਏਤਦਗ੍ਗਵਗ੍ਗਵਣ੍ਣਨਾ

ਤਪੁਸ੍ਸ-ਭਲ੍ਲਿਕਵਤ੍ਥੁ

੨੪੮. ਉਪਾਸਕਪਾਲ਼ਿਸਂਵਣ੍ਣਨਾਯ ਪਠਮੇ ਸਬ੍ਬਪਠਮਂ ਸਰਣਂ ਗਚ੍ਛਨ੍ਤਾਨਨ੍ਤਿ ਸਬ੍ਬੇਸਂ ਪਠਮਂ ਹੁਤ੍ਵਾ ਸਰਣਂ ਗਚ੍ਛਨ੍ਤਾਨਂ. ਇਤੋ ਪਰਨ੍ਤਿ ਸਤ੍ਤਸਤ੍ਤਾਹਤੋ ਪਰਂ. ਗਮਨੂਪਚ੍ਛੇਦਂ ਅਕਾਸੀਤਿ ਗਮਨਵਿਚ੍ਛੇਦਂ ਅਕਾਸਿ. ਯਥਾ ਤੇ ਗੋਣਾ ਧੁਰਂ ਛਡ੍ਡੇਤ੍ਵਾ ਪੋਥਿਯਮਾਨਾਪਿ ਨ ਗਚ੍ਛਨ੍ਤਿ, ਤਥਾ ਅਕਾਸੀਤਿ ਅਤ੍ਥੋ. ਤੇਸਨ੍ਤਿ ਤਪੁਸ੍ਸਭਲ੍ਲਿਕਾਨਂ. ਅਧਿਮੁਚ੍ਚਿਤ੍ਵਾਤਿ ਆਵਿਸਿਤ੍ਵਾ. ਯਕ੍ਖਸ੍ਸ ਆਵਟ੍ਟੋ ਯਕ੍ਖਾਵਟ੍ਟੋ. ਏਵਂ ਸੇਸੇਸੁਪਿ. ਅਤੀਤਬੁਦ੍ਧਾਨਂ ਆਚਿਣ੍ਣਂ ਓਲੋਕੇਸੀਤਿ ਅਤੀਤਬੁਦ੍ਧਾ ਕੇਨ ਭਾਜਨੇਨ ਪਟਿਗ੍ਗਣ੍ਹਿਂਸੂਤਿ ਬੁਦ੍ਧਾਚਿਣ੍ਣਂ ਓਲੋਕੇਸਿ. ਦ੍ਵੇਵਾਚਿਕੇ ਸਰਣੇ ਪਤਿਟ੍ਠਾਯਾਤਿ ਸਙ੍ਘਸ੍ਸ ਅਨੁਪ੍ਪਨ੍ਨਤ੍ਤਾ ਬੁਦ੍ਧਧਮ੍ਮਵਸੇਨ ਦ੍ਵੇਵਾਚਿਕੇ ਸਰਣੇ ਪਤਿਟ੍ਠਹਿਤ੍ਵਾ. ਚੇਤਿਯਨ੍ਤਿ ਪੂਜਨੀਯਵਤ੍ਥੁਂ. ਜੀਵਕੇਸਧਾਤੁਯਾਤਿ ਜੀਵਮਾਨਸ੍ਸ ਭਗਵਤੋ ਕੇਸਧਾਤੁਯਾ.

ਅਨਾਥਪਿਣ੍ਡਿਕਸੇਟ੍ਠਿਵਤ੍ਥੁ

੨੪੯. ਦੁਤਿਯੇ ਤੇਨੇਵ ਗੁਣੇਨਾਤਿ ਤੇਨੇਵ ਦਾਯਕਭਾਵਸਙ੍ਖਾਤੇਨ ਗੁਣੇਨ. ਸੋ ਹਿ ਸਬ੍ਬਕਾਮਸਮਿਦ੍ਧਤਾਯ ਵਿਗਤਮਚ੍ਛੇਰਤਾਯ ਕਰੁਣਾਦਿਗੁਣਸਮਙ੍ਗਿਤਾਯ ਚ ਨਿਚ੍ਚਕਾਲਂ ਅਨਾਥਾਨਂ ਪਿਣ੍ਡਮਦਾਸਿ. ਤੇਨ ਸਬ੍ਬਕਾਲਂ ਉਪਟ੍ਠਿਤੋ ਅਨਾਥਾਨਂ ਪਿਣ੍ਡੋ ਏਤਸ੍ਸ ਅਤ੍ਥੀਤਿ ਅਨਾਥਪਿਣ੍ਡਿਕੋਤਿ ਸਙ੍ਖਂ ਗਤੋ. ਯੋਜਨਿਕਵਿਹਾਰੇ ਕਾਰੇਤ੍ਵਾਤਿ ਯੋਜਨੇ ਯੋਜਨੇ ਏਕਮੇਕਂ ਵਿਹਾਰਂ ਕਾਰੇਤ੍ਵਾ. ‘‘ਏਵਰੂਪਂ ਦਾਨਂ ਪਵਤ੍ਤੇਸੀ’’ਤਿ ਵਤ੍ਵਾ ਤਮੇਵ ਦਾਨਂ ਵਿਭਜਿਤ੍ਵਾ ਦਸ੍ਸੇਨ੍ਤੋ ‘‘ਦੇਵਸਿਕਂ ਪਞ੍ਚ ਸਲਾਕਭਤ੍ਤਾਨਿ ਹੋਨ੍ਤੀ’’ਤਿਆਦਿਮਾਹ. ਤਤ੍ਥ ਸਲਾਕਾਯ ਗਾਹੇਤਬ੍ਬਂ ਭਤ੍ਤਂ ਸਲਾਕਭਤ੍ਤਂ. ਏਕਸ੍ਮਿਂ ਪਕ੍ਖੇ ਏਕਦਿਵਸਂ ਦਾਤਬ੍ਬਂ ਭਤ੍ਤਂ ਪਕ੍ਖਿਕਭਤ੍ਤਂ. ਧੁਰਗੇਹੇ ਠਪੇਤ੍ਵਾ ਦਾਤਬ੍ਬਂ ਭਤ੍ਤਂ ਧੁਰਭਤ੍ਤਂ. ਆਗਨ੍ਤੁਕਾਨਂ ਦਾਤਬ੍ਬਂ ਭਤ੍ਤਂ ਆਗਨ੍ਤੁਕਭਤ੍ਤਂ. ਏਵਂ ਸੇਸੇਸੁਪਿ. ਪਞ੍ਚ ਆਸਨਸਤਾਨਿ ਗੇਹੇ ਨਿਚ੍ਚਪਞ੍ਞਤ੍ਤਾਨੇਵ ਹੋਨ੍ਤੀਤਿ ਗੇਹੇ ਨਿਸੀਦਾਪੇਤ੍ਵਾ ਭੁਞ੍ਜਨ੍ਤਾਨਂ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਪਞ੍ਚ ਆਸਨਸਤਾਨਿ ਨਿਚ੍ਚਪਞ੍ਞਤ੍ਤਾਨਿ ਹੋਨ੍ਤਿ.

ਚਿਤ੍ਤਗਹਪਤਿਵਤ੍ਥੁ

੨੫੦. ਤਤਿਯੇ ਮਿਗਾ ਏਵ ਮਿਗਰੂਪਾਨਿ. ਭਿਕ੍ਖਂ ਸਮਾਦਾਪੇਤ੍ਵਾਤਿ, ‘‘ਭਨ੍ਤੇ, ਮਯ੍ਹਂ ਅਨੁਗ੍ਗਹਂ ਕਰੋਥ, ਇਧ ਨਿਸੀਦਿਤ੍ਵਾ ਭਿਕ੍ਖਂ ਗਣ੍ਹਥਾ’’ਤਿ ਭਿਕ੍ਖਾਗਹਣਤ੍ਥਂ ਸਮਾਦਾਪੇਤ੍ਵਾ. ਵਿਵਟ੍ਟਂ ਉਦ੍ਦਿਸ੍ਸ ਉਪਚਿਤਂ ਨਿਬ੍ਬੇਧਭਾਗਿਯਕੁਸਲਂ ਉਪਨਿਸ੍ਸਯੋ. ਸਲ਼ਾਯਤਨਵਿਭਤ੍ਤਿਮੇਵ ਦੇਸੇਸੀਤਿ ਸਲ਼ਾਯਤਨਵਿਭਾਗਪ੍ਪਟਿਸਂਯੁਤ੍ਤਮੇਵ ਧਮ੍ਮਕਥਂ ਕਥੇਸਿ. ਥੇਰੇਨਾਤਿ ਤਤ੍ਥ ਸਨ੍ਨਿਹਿਤਾਨਂ ਸਬ੍ਬੇਸਂ ਜੇਟ੍ਠੇਨ ਮਹਾਥੇਰੇਨ. ਪਞ੍ਹਂ ਵਿਸ੍ਸਜ੍ਜੇਤੁਂ ਅਸਕ੍ਕੋਨ੍ਤੇਨਾਤਿ ਚਿਤ੍ਤੇਨ ਗਹਪਤਿਨਾ ‘‘ਯਾ ਇਮਾ, ਭਨ੍ਤੇ ਥੇਰ, ਅਨੇਕਵਿਹਿਤਾ ਦਿਟ੍ਠਿਯੋ ਲੋਕੇ ਉਪ੍ਪਜ੍ਜਨ੍ਤਿ, ‘ਸਸ੍ਸਤੋ ਲੋਕੋ’ਤਿ ਵਾ, ‘ਅਸਸ੍ਸਤੋ ਲੋਕੋ’ਤਿ ਵਾ, ‘ਅਨ੍ਤਵਾ ਲੋਕੋ’ਤਿ ਵਾ, ‘ਅਨਨ੍ਤਵਾ ਲੋਕੋ’ਤਿ ਵਾ, ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਵਾ, ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾ, ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ, ‘ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ, ‘ਹੋਤਿ ਚ ਨ ਹੋਤਿ ਚ ਤਥਾਗਤੋ ਪਰਂ ਮਰਣਾ’ਤਿ ਵਾ, ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ ਯਾਨਿ ਚਿਮਾਨਿ ਦ੍ਵਾਸਟ੍ਠਿ ਦਿਟ੍ਠਿਗਤਾਨਿ ਬ੍ਰਹ੍ਮਜਾਲੇ ਗਣਿਤਾਨਿ, ਇਮਾ ਨੁ ਖੋ, ਭਨ੍ਤੇ, ਦਿਟ੍ਠਿਯੋ ਕਿਸ੍ਮਿਂ ਸਤਿ ਹੋਨ੍ਤਿ, ਕਿਸ੍ਮਿਂ ਅਸਤਿ ਨ ਹੋਨ੍ਤੀ’’ਤਿ ਏਵਮਾਦਿਨਾ (ਸਂ. ਨਿ. ੪.੩੪੫) ਪਞ੍ਹੇ ਪੁਟ੍ਠੇ ਤਂ ਪਞ੍ਹਂ ਵਿਸ੍ਸਜ੍ਜੇਤੁਂ ਅਸਕ੍ਕੋਨ੍ਤੇਨ. ਇਮਂ ਕਿਰ ਪਞ੍ਹਂ ਯਾਵਤਤਿਯਂ ਪੁਟ੍ਠੋ ਮਹਾਥੇਰੋ ਤੁਣ੍ਹੀ ਅਹੋਸਿ. ਅਥ ਇਸਿਦਤ੍ਤਤ੍ਥੇਰੋ ਚਿਨ੍ਤੇਸਿ – ‘‘ਅਯਂ ਥੇਰੋ ਨੇਵ ਅਤ੍ਤਨਾ ਬ੍ਯਾਕਰੋਤਿ, ਨ ਅਞ੍ਞਂ ਅਜ੍ਝੇਸਤਿ, ਉਪਾਸਕੋ ਚ ਭਿਕ੍ਖੁਸਙ੍ਘਂ ਵਿਹੇਸਤਿ, ਅਹਮੇਤਂ ਬ੍ਯਾਕਰਿਤ੍ਵਾ ਫਾਸੁਵਿਹਾਰਂ ਕਤ੍ਵਾ ਦਸ੍ਸਾਮੀ’’ਤਿ. ਏਵਂ ਚਿਨ੍ਤੇਤ੍ਵਾ ਚ ਆਸਨਤੋ ਵੁਟ੍ਠਾਯ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਬ੍ਯਾਕਰੋਮਹਂ, ਭਨ੍ਤੇ, ਚਿਤ੍ਤਸ੍ਸ ਗਹਪਤਿਨੋ ਏਤਂ ਪਞ੍ਹ’’ਨ੍ਤਿ (ਸਂ. ਨਿ. ੪.੩੪੫) ਆਹ. ਏਵਂ ਵੁਤ੍ਤੇ ਥੇਰੋ ‘‘ਬ੍ਯਾਕਰੋਹਿ ਤ੍ਵਂ, ਆਵੁਸੋ ਇਸਿਦਤ੍ਤ, ਚਿਤ੍ਤਸ੍ਸ ਗਹਪਤਿਨੋ ਏਤਂ ਪਞ੍ਹ’’ਨ੍ਤਿ ਇਸਿਦਤ੍ਤਂ ਅਜ੍ਝੇਸਿ. ਤੇਨ ਵੁਤ੍ਤਂ – ‘‘ਪਞ੍ਹਂ ਵਿਸ੍ਸਜ੍ਜੇਤੁਂ ਅਸਕ੍ਕੋਨ੍ਤੇਨ ਅਜ੍ਝਿਟ੍ਠੋ’’ਤਿ.

ਪਞ੍ਹਂ ਵਿਸ੍ਸਜ੍ਜੇਤ੍ਵਾਤਿ ‘‘ਯਾ ਇਮਾ, ਗਹਪਤਿ, ਅਨੇਕਵਿਹਿਤਾ ਦਿਟ੍ਠਿਯੋ ਲੋਕੇ ਉਪ੍ਪਜ੍ਜਨ੍ਤਿ ‘ਸਸ੍ਸਤੋ ਲੋਕੋ’ਤਿ ਵਾ, ‘ਅਸਸ੍ਸਤੋ ਲੋਕੋ’ਤਿ ਵਾ…ਪੇ… ਯਾਨਿ ਚਿਮਾਨਿ ਦ੍ਵਾਸਟ੍ਠਿ ਦਿਟ੍ਠਿਗਤਾਨਿ ਬ੍ਰਹ੍ਮਜਾਲੇ ਗਣਿਤਾਨਿ, ਇਮਾ ਖੋ, ਗਹਪਤਿ, ਦਿਟ੍ਠਿਯੋ ਸਕ੍ਕਾਯਦਿਟ੍ਠਿਯਾ ਸਤਿ ਹੋਨ੍ਤਿ, ਸਕ੍ਕਾਯਦਿਟ੍ਠਿਯਾ ਅਸਤਿ ਨ ਹੋਨ੍ਤੀ’’ਤਿਆਦਿਨਾ ਨਯੇਨ ਪਞ੍ਹਂ ਵਿਸ੍ਸਜ੍ਜੇਤ੍ਵਾ. ਗਿਹਿਸਹਾਯਕਭਾਵੇ ਞਾਤੇਤਿ ਥੇਰਸ੍ਸ ਗਿਹਿਸਹਾਯਕਭਾਵੇ ਚਿਤ੍ਤੇਨ ਗਹਪਤਿਨਾ ਞਾਤੇ. ਚਿਤ੍ਤੋ ਕਿਰ, ਗਹਪਤਿ, ਤਸ੍ਸ ਪਞ੍ਹਵੇਯ੍ਯਾਕਰਣੇ ਤੁਟ੍ਠੋ ‘‘ਕੁਤੋ, ਭਨ੍ਤੇ, ਅਯ੍ਯੋ ਇਸਿਦਤ੍ਤੋ ਆਗਚ੍ਛਤੀ’’ਤਿ ਵਤ੍ਵਾ ‘‘ਅਵਨ੍ਤਿਯਾ ਖੋ ਅਹਂ, ਗਹਪਤਿ, ਆਗਚ੍ਛਾਮੀ’’ਤਿ ਵੁਤ੍ਤੋ ‘‘ਅਤ੍ਥਿ, ਭਨ੍ਤੇ, ਅਵਨ੍ਤਿਯਾ ਇਸਿਦਤ੍ਤੋ ਨਾਮ ਕੁਲਪੁਤ੍ਤੋ ਅਮ੍ਹਾਕਂ ਅਦਿਟ੍ਠਸਹਾਯੋ ਪਬ੍ਬਜਿਤੋ, ਦਿਟ੍ਠੋ ਸੋ ਆਯਸ੍ਮਤਾ’’ਤਿ ਪੁਚ੍ਛਿ. ਥੇਰੋ ਚ ‘‘ਏਵਂ, ਗਹਪਤੀ’’ਤਿ ਵਤ੍ਵਾ ‘‘ਕਹਂ ਨੁ ਖੋ, ਭਨ੍ਤੇ, ਸੋ ਆਯਸ੍ਮਾ ਏਤਰਹਿ ਵਿਹਰਤੀ’’ਤਿ ਪੁਨ ਪੁਟ੍ਠੋ ਤੁਣ੍ਹੀ ਅਹੋਸਿ. ਅਥ ਚਿਤ੍ਤੋ ਗਹਪਤਿ ‘‘ਅਯ੍ਯੋ ਨੋ, ਭਨ੍ਤੇ, ਇਸਿਦਤ੍ਤੋ’’ਤਿ ਪੁਚ੍ਛਿਤ੍ਵਾ ‘‘ਏਵਂ, ਗਹਪਤੀ’’ਤਿ ਵੁਤ੍ਤੇ ਅਤ੍ਤਨੋ ਗਿਹਿਸਹਾਯਭਾਵਂ ਅਞ੍ਞਾਸਿ.

ਤੇਜੋਸਮਾਪਤ੍ਤਿਪਾਟਿਹਾਰਿਯਂ ਦਸ੍ਸੇਤ੍ਵਾਤਿ ਏਕਸ੍ਮਿਂ ਕਿਰ ਦਿਵਸੇ ਚਿਤ੍ਤੋ ਗਹਪਤਿ ‘‘ਸਾਧੁ ਮੇ, ਭਨ੍ਤੇ, ਅਯ੍ਯੋ ਉਤ੍ਤਰਿਮਨੁਸ੍ਸਧਮ੍ਮਾ ਇਦ੍ਧਿਪਾਟਿਹਾਰਿਯਂ ਦਸ੍ਸੇਤੂ’’ਤਿ ਮਹਾਥੇਰਂ ਯਾਚਿ. ਥੇਰੋ ‘‘ਤੇਨ ਹਿ ਤ੍ਵਂ, ਗਹਪਤਿ, ਆਲ਼ਿਨ੍ਦੇ ਉਤ੍ਤਰਾਸਙ੍ਗਂ ਪਞ੍ਞਾਪੇਤ੍ਵਾ ਤਤ੍ਥ ਤਿਣਕਲਾਪਂ ਓਕਿਰਾ’’ਤਿ ਵਤ੍ਵਾ ਤੇਨ ਚ ਤਥਾ ਕਤੇ ਸਯਂ ਵਿਹਾਰਂ ਪਵਿਸਿਤ੍ਵਾ ਚ ਘਟਿਕਂ ਦਤ੍ਵਾ ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਾਰੇਸਿ, ਯਥਾ ਤਾਲ਼ਚ੍ਛਿਗ੍ਗਲ਼ੇਨ ਚ ਅਗ੍ਗਲ਼ਨ੍ਤਰਿਕਾਯ ਚ ਅਚ੍ਚਿ ਨਿਕ੍ਖਮਿਤ੍ਵਾ ਤਿਣਾਨਿ ਝਾਪੇਤਿ, ਉਤ੍ਤਰਾਸਙ੍ਗਂ ਨ ਝਾਪੇਤਿ. ਅਥ ਚਿਤ੍ਤੋ ਗਹਪਤਿ ਉਤ੍ਤਰਾਸਙ੍ਗਂ ਪਪ੍ਫੋਟੇਤ੍ਵਾ ਸਂਵਿਗ੍ਗੋ ਲੋਮਹਟ੍ਠਜਾਤੋ ਏਕਮਨ੍ਤਂ ਠਿਤੋ ਥੇਰਂ ਬਹਿ ਨਿਕ੍ਖਮਨ੍ਤਂ ਦਿਸ੍ਵਾ ‘‘ਅਭਿਰਮਤੁ, ਭਨ੍ਤੇ, ਅਯ੍ਯੋ ਮਚ੍ਛਿਕਾਸਣ੍ਡੇ, ਰਮਣੀਯਂ ਅਮ੍ਬਾਟਕਵਨਂ, ਅਹਂ ਅਯ੍ਯਸ੍ਸ ਉਸ੍ਸੁਕ੍ਕਂ ਕਰਿਸ੍ਸਾਮਿ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾਨ’’ਨ੍ਤਿ ਆਹ. ਤਤੋ ਥੇਰੋ ‘‘ਨ ਦਾਨਿ ਇਧ ਵਸਿਤੁਂ ਸਕ੍ਕਾ’’ਤਿ ਤਮ੍ਹਾ ਵਿਹਾਰਾ ਪਕ੍ਕਾਮਿ. ਤਂ ਸਨ੍ਧਾਯੇਤਂ ਵੁਤ੍ਤਂ – ‘‘ਤੇਜੋਸਮਾਪਤ੍ਤਿ ਪਾਟਿਹਾਰਿਯਂ ਦਸ੍ਸੇਤ੍ਵਾ ‘ਇਦਾਨਿ ਇਧ ਵਸਿਤੁਂ ਨ ਯੁਤ੍ਤ’ਨ੍ਤਿ ਯਥਾਸੁਖਂ ਪਕ੍ਕਾਮੀ’’ਤਿ. ਦ੍ਵੇ ਅਗ੍ਗਸਾਵਕਾਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਵਿਤ੍ਥਾਰਤੋ ਵਿਨਯਪਾਲ਼ਿਯਂ ਆਗਤਮੇਵ.

ਸਦ੍ਧੋਤਿ ਲੋਕਿਯਲੋਕੁਤ੍ਤਰਾਯ ਸਦ੍ਧਾਯ ਸਮਨ੍ਨਾਗਤੋ. ਸੀਲੇਨਾਤਿ ਅਗਾਰਿਯਸੀਲਂ ਅਨਗਾਰਿਯਸੀਲਨ੍ਤਿ ਦੁਵਿਧਂ ਸੀਲਂ, ਤੇਸੁ ਇਧ ਅਗਾਰਿਯਂ ਸੀਲਂ ਅਧਿਪ੍ਪੇਤਂ, ਤੇਨ ਸਮਨ੍ਨਾਗਤੋਤਿ ਅਤ੍ਥੋ. ਯਸੋਭੋਗਸਮਪ੍ਪਿਤੋਤਿ ਯਾਦਿਸੋ ਅਨਾਥਪਿਣ੍ਡਿਕਾਦੀਨਂ ਪਞ੍ਚਉਪਾਸਕਸਤਪਰਿਵਾਰਸਙ੍ਖਾਤੋ ਅਗਾਰਿਯੋ ਯਸੋ, ਤਾਦਿਸੇਨੇਵ ਯਸੇਨ, ਯੋ ਚ ਧਨਧਞ੍ਞਾਦਿਕੋ ਚੇਵ ਸਤ੍ਤਵਿਧਅਰਿਯਧਨਸਙ੍ਖਾਤੋ ਚਾਤਿ ਦੁਵਿਧੋ ਭੋਗੋ, ਤੇਨ ਚ ਸਮਨ੍ਨਾਗਤੋਤਿ ਅਤ੍ਥੋ. ਯਂ ਯਂ ਪਦੇਸਨ੍ਤਿ ਪੁਰਤ੍ਥਿਮਾਦੀਸੁ ਦਿਸਾਸੁ ਏਵਰੂਪੋ ਕੁਲਪੁਤ੍ਤੋ ਯਂ ਯਂ ਪਦੇਸਂ ਭਜਤਿ, ਤਤ੍ਥ ਤਤ੍ਥ ਏਵਰੂਪੇਨ ਲਾਭਸਕ੍ਕਾਰੇਨ ਪੂਜਿਤੋਵ ਹੋਤੀਤਿ ਅਤ੍ਥੋ.

ਹਤ੍ਥਕਆਲ਼ਵਕਵਤ੍ਥੁ

੨੫੧. ਚਤੁਤ੍ਥੇ ਚਤੁਬ੍ਬਿਧੇਨ ਸਙ੍ਗਹਵਤ੍ਥੁਨਾਤਿ ਦਾਨਪਿਯਵਚਨਅਤ੍ਥਚਰਿਯਾਸਮਾਨਤ੍ਤਤਾਸਙ੍ਖਾਤੇਨ ਚਤੁਬ੍ਬਿਧੇਨ ਸਙ੍ਗਹਵਤ੍ਥੁਨਾ. ‘‘ਸ੍ਵੇ ਭਤ੍ਤਚਾਟਿਯਾ ਸਦ੍ਧਿਂ ਆਲ਼ਵਕਸ੍ਸ ਪੇਸੇਤਬ੍ਬੋ ਅਹੋਸੀ’’ਤਿ ਵੁਤ੍ਤਮਤ੍ਥਂ ਪਾਕਟਂ ਕਤ੍ਵਾ ਦਸ੍ਸੇਤੁਂ – ‘‘ਤਤ੍ਰਾਯਂ ਅਨੁਪੁਬ੍ਬਿਕਥਾ’’ਤਿਆਦਿਮਾਹ. ਮਿਗਵਤ੍ਥਾਯ ਅਰਞ੍ਞਂ ਗਨ੍ਤ੍ਵਾਤਿ ਆਲ਼ਵਕੋ ਰਾਜਾ ਵਿਵਿਧਨਾਟਕੂਪਭੋਗਂ ਛਡ੍ਡੇਤ੍ਵਾ ਚੋਰਪ੍ਪਟਿਬਾਹਨਤ੍ਥਞ੍ਚ ਪਟਿਰਾਜਨਿਸੇਧਨਤ੍ਥਞ੍ਚ ਬ੍ਯਾਯਾਮਕਰਣਤ੍ਥਞ੍ਚ ਸਤ੍ਤਮੇ ਸਤ੍ਤਮੇ ਦਿਵਸੇ ਮਿਗਵਂ ਗਚ੍ਛਨ੍ਤੋ ਏਕਦਿਵਸਂ ਬਲਕਾਯੇਨ ਸਦ੍ਧਿਂ ‘‘ਯਸ੍ਸ ਪਸ੍ਸੇਨ ਮਿਗੋ ਪਲਾਯਤਿ, ਤਸ੍ਸੇਵ ਸੋ ਭਾਰੋ’’ਤਿ ਕਤਕਤਿਕਵਤ੍ਤੋ ਮਿਗਵਤ੍ਥਾਯ ਅਰਞ੍ਞਂ ਗਨ੍ਤ੍ਵਾ. ਏਕਂ ਮਿਗਨ੍ਤਿ ਅਤ੍ਤਨੋ ਠਿਤਟ੍ਠਾਨੇਨ ਪਲਾਤਂ ਏਣਿਮਿਗਂ. ਅਨੁਬਨ੍ਧਿਤ੍ਵਾਤਿ ਤਿਯੋਜਨਮਗ੍ਗਂ ਏਕਕੋਵ ਅਨੁਬਨ੍ਧਿਤ੍ਵਾ. ਜਵਸਮ੍ਪਨ੍ਨੋ ਹਿ ਰਾਜਾ ਧਨੁਂ ਗਹੇਤ੍ਵਾ ਪਤ੍ਤਿਕੋਵ ਤਿਯੋਜਨਂ ਤਂ ਮਿਗਮਨੁਬਨ੍ਧਿ. ਘਾਤੇਤ੍ਵਾਤਿ ਯਸ੍ਮਾ ਏਣਿਮਿਗਾ ਤਿਯੋਜਨਵੇਗਾ ਏਵ ਹੋਨ੍ਤਿ, ਤਸ੍ਮਾ ਪਰਿਕ੍ਖਿਣਜਵਂ ਤਂ ਮਿਗਂ ਉਦਕਂ ਪਵਿਸਿਤ੍ਵਾ ਠਿਤਂ ਘਾਤੇਤ੍ਵਾ. ਦ੍ਵਿਧਾ ਛੇਤ੍ਵਾ ਧਨੁਕੋਟਿਯਂ ਲਗੇਤ੍ਵਾ ਨਿਵਤ੍ਤੇਤ੍ਵਾ ਆਗਚ੍ਛਨ੍ਤੋਤਿ ਅਨਤ੍ਥਿਕੋਪਿ ਮਂਸੇਨ ‘‘ਨਾਸਕ੍ਖਿ ਮਿਗਂ ਗਹੇਤੁ’’ਨ੍ਤਿ ਅਪਵਾਦਮੋਚਨਤ੍ਥਂ ਦ੍ਵਿਧਾ ਛਿਨ੍ਨਂ ਧਨੁਕੋਟਿਯਂ ਲਗੇਤ੍ਵਾ ਆਗਚ੍ਛਨ੍ਤੋ. ਸਨ੍ਦਚ੍ਛਾਯਨ੍ਤਿ ਘਨਚ੍ਛਾਯਂ ਬਹਲਪਤ੍ਤਪਲਾਸਂ.

ਰੁਕ੍ਖੇ ਅਧਿਵਤ੍ਥਾ ਦੇਵਤਾਤਿ ਆਲ਼ਵਕਂ ਯਕ੍ਖਂ ਸਨ੍ਧਾਯ ਵਦਤਿ. ਸੋ ਹਿ ਮਹਾਰਾਜੂਨਂ ਸਨ੍ਤਿਕਾ ਵਰਂ ਲਭਿਤ੍ਵਾ ਮਜ੍ਝਨ੍ਹਿਕਸਮਯੇ ਤਸ੍ਸ ਰੁਕ੍ਖਸ੍ਸ ਛਾਯਾਯ ਫੁਟ੍ਠੋਕਾਸਂ ਪਵਿਟ੍ਠੇ ਪਾਣਿਨੋ ਖਾਦਨ੍ਤੋ ਤਤ੍ਥ ਪਟਿਵਸਤਿ. ਆਲ਼ਵਕਸ੍ਸ ਨਿਸੀਦਨਪਲ੍ਲਙ੍ਕੇ ਨਿਸੀਦੀਤਿ ਯਤ੍ਥ ਅਭਿਲਕ੍ਖਿਤੇਸੁ ਮਙ੍ਗਲਦਿਵਸਾਦੀਸੁ ਆਲ਼ਵਕੋ ਨਿਸੀਦਿਤ੍ਵਾ ਸਿਰਿਂ ਅਨੁਭੋਤਿ, ਤਸ੍ਮਿਂਯੇਵ ਦਿਬ੍ਬਰਤਨਪਲ੍ਲਙ੍ਕੇ ਨਿਸੀਦਿ. ਅਤ੍ਤਨੋ ਗਮਨੇ ਅਸਮ੍ਪਜ੍ਜਮਾਨੇ ‘‘ਕਿਂ ਨੁ ਖੋ ਕਾਰਣ’’ਨ੍ਤਿ ਆਵਜ੍ਜੇਨ੍ਤਾਤਿ ਤਦਾ ਕਿਰ ਸਾਤਾਗਿਰਹੇਮਵਤਾ ਭਗਵਨ੍ਤਂ ਜੇਤਵਨੇਯੇਵ ਵਨ੍ਦਿਤ੍ਵਾ ‘‘ਯਕ੍ਖਸਮਾਗਮਂ ਗਮਿਸ੍ਸਾਮਾ’’ਤਿ ਸਪਰਿਵਾਰਾ ਨਾਨਾਯਾਨੇਹਿ ਆਕਾਸੇਨ ਗਚ੍ਛਨ੍ਤਿ, ਆਕਾਸੇ ਚ ਯਕ੍ਖਾਨਂ ਨ ਸਬ੍ਬਤ੍ਥ ਮਗ੍ਗੋ ਅਤ੍ਥਿ, ਆਕਾਸਟ੍ਠਾਨਿ ਵਿਮਾਨਾਨਿ ਪਰਿਹਰਿਤ੍ਵਾ ਮਗ੍ਗਟ੍ਠਾਨੇਨੇਵ ਮਗ੍ਗੋ ਹੋਤਿ, ਆਲ਼ਵਕਸ੍ਸ ਪਨ ਵਿਮਾਨਂ ਭੂਮਟ੍ਠਂ ਸੁਗੁਤ੍ਤਂ ਪਾਕਾਰਪਰਿਕ੍ਖਿਤ੍ਤਂ ਸੁਸਂਵਿਹਿਤਦ੍ਵਾਰਟ੍ਟਾਲਕਗੋਪੁਰਂ ਉਪਰਿ ਕਂਸਜਾਲਸਞ੍ਛਨ੍ਨਮਞ੍ਜੂਸਾਸਦਿਸਂ ਤਿਯੋਜਨਂ ਉਬ੍ਬੇਧੇਨ, ਤਸ੍ਸ ਉਪਰਿ ਮਗ੍ਗੋ ਹੋਤਿ, ਤੇ ਤਂ ਪਦੇਸਮਾਗਮ੍ਮ ਗਨ੍ਤੁਮਸਮਤ੍ਥਾ ਅਹੇਸੁਂ. ਬੁਦ੍ਧਾਨਞ੍ਹਿ ਨਿਸਿਨ੍ਨੋਕਾਸਸ੍ਸ ਉਪਰਿਭਾਗੇਨ ਯਾਵ ਭਵਗ੍ਗਾ ਕੋਚਿ ਗਨ੍ਤੁਮਸਮਤ੍ਥੋ, ਤਸ੍ਮਾ ਅਤ੍ਤਨੋ ਗਮਨੇ ਅਸਮ੍ਪਜ੍ਜਮਾਨੇ ‘‘ਕਿਂ ਨੁ ਖੋ ਕਾਰਣ’’ਨ੍ਤਿ ਆਵਜ੍ਜੇਸੁਂ. ਤੇਸਂ ਕਥਂ ਸੁਤ੍ਵਾ ਚਿਨ੍ਤੇਸੀਤਿ ਯਸ੍ਮਾ ਅਸ੍ਸਦ੍ਧਸ੍ਸ ਸਦ੍ਧਾਕਥਾ ਦੁਕ੍ਕਥਾ ਹੋਤਿ ਦੁਸ੍ਸੀਲਾਦੀਨਂ ਸੀਲਕਥਾਦਯੋ ਵਿਯ, ਤਸ੍ਮਾ ਤੇਸਂ ਯਕ੍ਖਾਨਂ ਸਨ੍ਤਿਕਾ ਭਗਵਤੋ ਪਸਂਸਂ ਸੁਤ੍ਵਾ ਏਵ ਅਗ੍ਗਿਮ੍ਹਿ ਪਕ੍ਖਿਤ੍ਤਲੋਣਸਕ੍ਖਰਾ ਵਿਯ ਅਬ੍ਭਨ੍ਤਰੇ ਉਪ੍ਪਨ੍ਨਕੋਪੇਨ ਪਟਪਟਾਯਮਾਨਹਦਯੋ ਹੁਤ੍ਵਾ ਚਿਨ੍ਤੇਸਿ. ਪਬ੍ਬਤਕੂਟਨ੍ਤਿ ਕੇਲਾਸਪਬ੍ਬਤਕੂਟਂ.

ਇਤੋ ਪਟ੍ਠਾਯ ਆਲ਼ਵਕਯੁਦ੍ਧਂ ਵਿਤ੍ਥਾਰੇਤਬ੍ਬਨ੍ਤਿ ਸੋ ਕਿਰ ਮਨੋਸਿਲਾਤਲੇ ਵਾਮਪਾਦੇਨ ਠਤ੍ਵਾ ‘‘ਪਸ੍ਸਥ ਦਾਨਿ ਤੁਮ੍ਹਾਕਂ ਵਾ ਸਤ੍ਥਾ ਮਹਾਨੁਭਾਵੋ, ਅਹਂ ਵਾ’’ਤਿ ਦਕ੍ਖਿਣਪਾਦੇਨ ਸਟ੍ਠਿਯੋਜਨਮਤ੍ਤਂ ਕੇਲਾਸਕੂਟਪਬ੍ਬਤਂ ਅਕ੍ਕਮਿ, ਤਂ ਅਯੋਕੂਟਪ੍ਪਹਤੋ ਵਿਯ ਨਿਦ੍ਧਨ੍ਤਅਯਪਿਣ੍ਡੋ ਪਪਟਿਕਾਯੋ ਮੁਞ੍ਚਿ. ਸੋ ਤਤ੍ਰ ਠਤ੍ਵਾ ‘‘ਅਹਂ ਆਲ਼ਵਕੋ’’ਤਿ ਉਗ੍ਘੋਸੇਸਿ, ਸਕਲਜਮ੍ਬੁਦੀਪਂ ਸਦ੍ਦੋ ਫਰਿ. ਤਿਯੋਜਨਸਹਸ੍ਸਵਿਤ੍ਥਤਹਿਮਵਾਪਿ ਸਮ੍ਪਕਮ੍ਪਿ ਯਕ੍ਖਸ੍ਸਾਨੁਭਾਵੇਨ. ਸੋ ਵਾਤਮਣ੍ਡਲਂ ਸਮੁਟ੍ਠਾਪੇਸਿ ‘‘ਏਤੇਨੇਵ ਸਮਣਂ ਪਲਾਪੇਸ੍ਸਾਮੀ’’ਤਿ. ਤੇ ਪੁਰਤ੍ਥਿਮਾਦਿਭੇਦਾ ਵਾਤਾ ਸਮੁਟ੍ਠਹਿਤ੍ਵਾ ਅਡ੍ਢਯੋਜਨਯੋਜਨਦ੍ਵਿਯੋਜਨਤਿਯੋਜਨਪ੍ਪਮਾਣਾਨਿ ਪਬ੍ਬਤਕੂਟਾਨਿ ਪਦਾਲੇਤ੍ਵਾ ਵਨਗਚ੍ਛਰੁਕ੍ਖਾਦੀਨਿ ਉਮ੍ਮੂਲੇਤ੍ਵਾ ਆਲ਼ਵਿਨਗਰਂ ਪਕ੍ਖਨ੍ਦਾ ਜਿਣ੍ਣਹਤ੍ਥਿਸਾਲਾਦੀਨਿ ਚੁਣ੍ਣੇਨ੍ਤਾ ਛਦਨਿਟ੍ਠਕਾ ਆਕਾਸੇ ਭਮੇਨ੍ਤਾ. ਭਗਵਾ ‘‘ਮਾ ਕਸ੍ਸਚਿ ਉਪਰੋਧੋ ਹੋਤੂ’’ਤਿ ਅਧਿਟ੍ਠਾਸਿ. ਤੇ ਵਾਤਾ ਦਸਬਲਂ ਪਤ੍ਵਾ ਚੀਵਰਕਣ੍ਣਮਤ੍ਤਮ੍ਪਿ ਚਾਲੇਤੁਂ ਨਾਸਕ੍ਖਿਂਸੁ. ਤਤੋ ਮਹਾਵਸ੍ਸਂ ਸਮੁਟ੍ਠਾਪੇਸਿ ‘‘ਉਦਕੇਨ ਅਜ੍ਝੋਤ੍ਥਰਿਤ੍ਵਾ ਸਮਣਂ ਮਾਰੇਸ੍ਸਾਮੀ’’ਤਿ. ਤਸ੍ਸਾਨੁਭਾਵੇਨ ਉਪਰੂਪਰਿ ਸਤਪਟਲਸਹਸ੍ਸਪਟਲਾਦਿਭੇਦਾ ਵਲਾਹਕਾ ਉਟ੍ਠਹਿਤ੍ਵਾ ਪਵਸ੍ਸਿਂਸੁ. ਵੁਟ੍ਠਿਧਾਰਾਵੇਗੇਨ ਪਥਵੀ ਛਿਦ੍ਦਾ ਅਹੋਸਿ. ਵਨਰੁਕ੍ਖਾਦੀਨਂ ਉਪਰਿ ਮਹੋਘੋ ਆਗਨ੍ਤ੍ਵਾ ਦਸਬਲਸ੍ਸ ਚੀਵਰੇ ਉਸ੍ਸਾਵਬਿਨ੍ਦੁਮਤ੍ਤਮ੍ਪਿ ਤੇਮੇਤੁਂ ਨਾਸਕ੍ਖਿ. ਤਤੋ ਪਾਸਾਣਵਸ੍ਸਂ ਸਮੁਟ੍ਠਾਪੇਸਿ. ਮਹਨ੍ਤਾਨਿ ਮਹਨ੍ਤਾਨਿ ਪਬ੍ਬਤਕੂਟਾਨਿ ਧੂਮਾਯਨ੍ਤਾਨਿ ਪਜ੍ਜਲਨ੍ਤਾਨਿ ਆਕਾਸੇਨਾਗਨ੍ਤ੍ਵਾ ਦਸਬਲਂ ਪਤ੍ਵਾ ਦਿਬ੍ਬਮਾਲਾਗੁਲ਼ਾਨਿ ਸਮ੍ਪਜ੍ਜਿਂਸੁ. ਤਤੋ ਪਹਰਣਵਸ੍ਸਂ ਸਮੁਟ੍ਠਾਪੇਸਿ. ਏਕਤੋਧਾਰਾ ਉਭਤੋਧਾਰਾ ਅਸਿਸਤ੍ਤਿਖੁਰਪ੍ਪਾਦਯੋ ਧੂਮਾਯਨ੍ਤਾ ਪਜ੍ਜਲਨ੍ਤਾ ਆਕਾਸੇਨਾਗਨ੍ਤ੍ਵਾ ਦਸਬਲਸ੍ਸ ਪਾਦਮੂਲੇ ਦਿਬ੍ਬਪੁਪ੍ਫਾਨਿ ਅਹੇਸੁਂ.

ਤਤੋ ਅਙ੍ਗਾਰਵਸ੍ਸਂ ਸਮੁਟ੍ਠਾਪੇਸਿ. ਕਿਂਸੁਕਵਣ੍ਣਾ ਅਙ੍ਗਾਰਾ ਆਕਾਸੇਨਾਗਨ੍ਤ੍ਵਾ ਦਸਬਲਸ੍ਸ ਪਾਦਮੂਲੇ ਦਿਬ੍ਬਪੁਪ੍ਫਾਨਿ ਹੁਤ੍ਵਾ ਵਿਕਿਰਿਂਸੁ. ਤਤੋ ਕੁਕ੍ਕੁਲ਼ਵਸ੍ਸਂ ਸਮੁਟ੍ਠਾਪੇਸਿ. ਅਚ੍ਚੁਣ੍ਹੋ ਕੁਕ੍ਕੁਲ਼ੋ ਆਕਾਸੇਨਾਗਨ੍ਤ੍ਵਾ ਦਸਬਲਸ੍ਸ ਪਾਦਮੂਲੇ ਚਨ੍ਦਨਚੁਣ੍ਣਂ ਹੁਤ੍ਵਾ ਨਿਪਤਿ. ਤਤੋ ਵਾਲਿਕਵਸ੍ਸਂ ਸਮੁਟ੍ਠਾਪੇਸਿ. ਅਤਿਸੁਖੁਮਾ ਵਾਲਿਕਾ ਧੂਮਾਯਨ੍ਤਾ ਪਜ੍ਜਲਨ੍ਤਾ ਆਕਾਸੇਨਾਗਨ੍ਤ੍ਵਾ ਦਸਬਲਸ੍ਸ ਪਾਦਮੂਲੇ ਦਿਬ੍ਬਪੁਪ੍ਫਾਨਿ ਹੁਤ੍ਵਾ ਨਿਪਤਿਂਸੁ. ਤਤੋ ਕਲਲਵਸ੍ਸਂ ਸਮੁਟ੍ਠਾਪੇਸਿ. ਤਂ ਧੂਮਾਯਨ੍ਤਂ ਪਜ੍ਜਲਨ੍ਤਂ ਆਕਾਸੇਨਾਗਨ੍ਤ੍ਵਾ ਦਸਬਲਸ੍ਸ ਪਾਦਮੂਲੇ ਦਿਬ੍ਬਗਨ੍ਧਂ ਹੁਤ੍ਵਾ ਨਿਪਤਿ. ਤਤੋ ਅਨ੍ਧਕਾਰਂ ਸਮੁਟ੍ਠਾਪੇਸਿ ‘‘ਭਿਂਸੇਤ੍ਵਾ ਸਮਣਂ ਪਲਾਪੇਸ੍ਸਾਮੀ’’ਤਿ. ਚਤੁਰਙ੍ਗਸਮਨ੍ਨਾਗਤਂ ਅਨ੍ਧਕਾਰਸਦਿਸਂ ਹੁਤ੍ਵਾ ਦਸਬਲਂ ਪਤ੍ਵਾ ਸੂਰਿਯਪ੍ਪਭਾਵਿਹਤਮਿਵਨ੍ਧਕਾਰਂ ਅਨ੍ਤਰਧਾਯਿ. ਏਵਂ ਯਕ੍ਖੋ ਇਮਾਹਿ ਨਵਹਿ ਵਾਤਵਸ੍ਸਪਾਸਾਣਪਹਰਣਙ੍ਗਾਰਕੁਕ੍ਕੁਲ਼ਵਾਲਿਕਕਲਲਨ੍ਧਕਾਰਵੁਟ੍ਠੀਹਿ ਭਗਵਨ੍ਤਂ ਪਲਾਪੇਤੁਮਸਕ੍ਕੋਨ੍ਤੋ ਨਾਨਾਵਿਧਪ੍ਪਹਰਣਹਤ੍ਥਅਨੇਕਪ੍ਪਕਾਰਰੂਪਭੂਤਗਣਸਮਾਕੁਲਾਯ ਚਤੁਰਙ੍ਗਿਨਿਯਾ ਸੇਨਾਯ ਸਯਮੇਵ ਭਗਵਨ੍ਤਂ ਅਭਿਗਤੋ. ਤੇ ਭੂਤਗਣਾ ਅਨੇਕਪ੍ਪਕਾਰਵਿਕਾਰੇ ਕਤ੍ਵਾ ‘‘ਗਣ੍ਹਥ ਹਨਥਾ’’ਤਿ ਭਗਵਤੋ ਉਪਰਿ ਆਗਚ੍ਛਨ੍ਤਾ ਵਿਯ ਚ ਹੋਨ੍ਤਿ. ਅਪਿਚ ਖੋ ਨਿਦ੍ਧਨ੍ਤਲੋਹਪਿਣ੍ਡਂ ਵਿਯ ਮਕ੍ਖਿਕਾ ਭਗਵਨ੍ਤਂ ਅਲ੍ਲੀਯਿਤੁਮਸਮਤ੍ਥਾ ਏਵ ਅਹੇਸੁਂ.

ਏਵਂ ਸਬ੍ਬਰਤ੍ਤਿਂ ਅਨੇਕਪ੍ਪਕਾਰਵਿਭਿਂਸਾਕਾਰਦਸ੍ਸਨੇਨਪਿ ਭਗਵਨ੍ਤਂ ਚਾਲੇਤੁਮਸਕ੍ਕੋਨ੍ਤੋ ਆਲ਼ਵਕੋ ਚਿਨ੍ਤੇਸਿ – ‘‘ਯਂਨੂਨਾਹਂ ਕੇਨਚਿ ਅਜੇਯ੍ਯਂ ਦੁਸ੍ਸਾਵੁਧਂ ਮੁਞ੍ਚੇਯ੍ਯ’’ਨ੍ਤਿ. ਸਚੇ ਹਿ ਸੋ ਦੁਟ੍ਠੋ ਆਕਾਸੇ ਤਂ ਦੁਸ੍ਸਾਵੁਧਂ ਮੁਞ੍ਚੇਯ੍ਯ, ਦ੍ਵਾਦਸ ਵਸ੍ਸਾਨਿ ਦੇਵੋ ਨ ਵਸ੍ਸੇਯ੍ਯ. ਸਚੇ ਪਥਵਿਯਂ ਮੁਞ੍ਚੇਯ੍ਯ, ਸਬ੍ਬਰੁਕ੍ਖਤਿਣਾਦੀਨਿ ਸੁਸ੍ਸਿਤ੍ਵਾ ਦ੍ਵਾਦਸਵਸ੍ਸਨ੍ਤਰਂ ਨ ਪੁਨ ਰੁਹੇਯ੍ਯੁਂ. ਸਚੇ ਸਮੁਦ੍ਦੇ ਮੁਞ੍ਚੇਯ੍ਯ, ਤਤ੍ਤਕਪਾਲੇ ਉਦਕਬਿਨ੍ਦੁ ਵਿਯ ਸਬ੍ਬਂ ਸੁਸ੍ਸੇਯ੍ਯ. ਸਚੇ ਸਿਨੇਰੁਪਬ੍ਬਤੇ ਮੁਞ੍ਚੇਯ੍ਯ, ਖਣ੍ਡਾਖਣ੍ਡਂ ਹੁਤ੍ਵਾ ਵਿਕਿਰੇਯ੍ਯ. ਸੋ ਏਵਂਮਹਾਨੁਭਾਵਂ ਦੁਸ੍ਸਾਵੁਧਂ ਉਤ੍ਤਰਿਸਾਟਕਂ ਮੁਞ੍ਚਿਤ੍ਵਾ ਅਗ੍ਗਹੇਸਿ. ਯੇਭੁਯ੍ਯੇਨ ਦਸਸਹਸ੍ਸਿਲੋਕਧਾਤੁਦੇਵਤਾ ਵੇਗੇਨ ਸਨ੍ਨਿਪਤਿਂਸੁ ‘‘ਅਜ੍ਜ ਭਗਵਾ ਆਲ਼ਵਕਂ ਦਮੇਸ੍ਸਤਿ, ਤਤ੍ਥ ਧਮ੍ਮਂ ਸੋਸ੍ਸਾਮਾ’’ਤਿ. ਯੁਦ੍ਧਦਸ੍ਸਨਕਾਮਾਪਿ ਦੇਵਤਾ ਸਨ੍ਨਿਪਤਿਂਸੁ. ਏਵਂ ਸਕਲਮ੍ਪਿ ਆਕਾਸਂ ਦੇਵਤਾਹਿ ਪਰਿਪੁਣ੍ਣਂ ਅਹੋਸਿ. ਅਥਾਲ਼ਵਕੋ ਭਗਵਤੋ ਸਮੀਪੇ ਉਪਰੂਪਰਿ ਵਿਚਰਿਤ੍ਵਾ ਵਤ੍ਥਾਵੁਧਂ ਮੁਞ੍ਚਿ. ਤਂ ਅਸਨਿਚਕ੍ਕਂ ਵਿਯ ਆਕਾਸੇ ਭੇਰਵਸਦ੍ਦਂ ਕਰੋਨ੍ਤਂ ਧੂਮਾਯਨ੍ਤਂ ਪਜ੍ਜਲਨ੍ਤਂ ਭਗਵਨ੍ਤਂ ਪਤ੍ਵਾ ਯਕ੍ਖਸ੍ਸ ਮਾਨਮਦ੍ਦਨਤ੍ਥਂ ਪਾਦਪੁਞ੍ਛਨਚੋਲ਼ਂ ਹੁਤ੍ਵਾ ਪਾਦਮੂਲੇ ਨਿਪਤਿ. ਆਲ਼ਵਕੋ ਤਂ ਦਿਸ੍ਵਾ ਛਿਨ੍ਨਵਿਸਾਣੋ ਵਿਯ ਉਸਭੋ, ਉਦ੍ਧਟਦਾਠੋ ਵਿਯ ਸਪ੍ਪੋ ਨਿਤ੍ਤੇਜੋ ਨਿਮ੍ਮਦੋ ਨਿਪਾਤਿਤਮਾਨਦ੍ਧਜੋ ਅਹੋਸਿ. ਏਵਮਿਦਂ ਆਲ਼ਵਕਯੁਦ੍ਧਂ ਵਿਤ੍ਥਾਰੇਤਬ੍ਬਂ.

ਅਟ੍ਠ ਪਞ੍ਹੇ ਪੁਚ੍ਛੀਤਿ –

‘‘ਕਿਂ ਸੂਧ ਵਿਤ੍ਤਂ ਪੁਰਿਸਸ੍ਸ ਸੇਟ੍ਠਂ,

ਕਿਂ ਸੁ ਸੁਚਿਣ੍ਣਂ ਸੁਖਮਾਵਹਾਤਿ;

ਕਿਂ ਸੁ ਹਵੇ ਸਾਦੁਤਰਂ ਰਸਾਨਂ,

ਕਥਂ ਜੀਵਿਂ ਜੀਵਿਤਮਾਹੁ ਸੇਟ੍ਠ’’ਨ੍ਤਿ. (ਸਂ. ਨਿ. ੧.੨੪੬; ਸੁ. ਨਿ. ੧੮੩) –

ਆਦਿਨਾ ਅਟ੍ਠ ਪਞ੍ਹੇ ਪੁਚ੍ਛਿ. ਸਤ੍ਥਾ ਵਿਸ੍ਸਜ੍ਜੇਸੀਤਿ –

‘‘ਸਦ੍ਧੀਧ ਵਿਤ੍ਤਂ ਪੁਰਿਸਸ੍ਸ ਸੇਟ੍ਠਂ,

ਧਮ੍ਮੋ ਸੁਚਿਣ੍ਣੋ ਸੁਖਮਾਵਹਾਤਿ;

ਸਚ੍ਚਂ ਹਵੇ ਸਾਦੁਤਰਂ ਰਸਾਨਂ,

ਪਞ੍ਞਾਜੀਵਿਂ ਜੀਵਿਤਮਾਹੁ ਸੇਟ੍ਠ’’ਨ੍ਤਿ. (ਸਂ. ਨਿ. ੧.੨੪੬; ਸੁ. ਨਿ. ੧੮੪) –

ਆਦਿਨਾ ਵਿਸ੍ਸਜ੍ਜੇਸਿ. ਵਿਕ੍ਕਨ੍ਦਮਾਨਾਯਾਤਿ ਅਚ੍ਚਨ੍ਤਂ ਪਰਿਦੇਵਮਾਨਾਯ.

ਮਹਾਨਾਮਸਕ੍ਕਵਤ੍ਥੁ

੨੫੨. ਪਞ੍ਚਮੇ ਸਤ੍ਥਾ ਤਤੋ ਪਰਂ ਪਟਿਞ੍ਞਂ ਨਾਦਾਸੀਤਿ ਸਂਵਚ੍ਛਰਤੋ ਪਰਂ ਸਿਕ੍ਖਾਪਦਪਞ੍ਞਤ੍ਤਿਯਾ ਪਚ੍ਚਯਪ੍ਪਵਾਰਣਾਸਾਦਿਯਨਸ੍ਸ ਵਾਰਿਤਤ੍ਤਾ ‘‘ਪਟਿਞ੍ਞਂ ਨਾਦਾਸੀ’’ਤਿ ਵੁਤ੍ਤਂ. ਤਥਾ ਹਿ ਭਗਵਾ ਤਤਿਯਵਾਰੇਪਿ ਮਹਾਨਾਮੇਨ ਸਕ੍ਕੇਨ ‘‘ਇਚ੍ਛਾਮਹਂ, ਭਨ੍ਤੇ, ਸਙ੍ਘਂ ਯਾਵਜੀਵਂ ਭੇਸਜ੍ਜੇਨ ਪਵਾਰੇਤੁ’’ਨ੍ਤਿ (ਪਾਚਿ. ੩੦੪-੩੦੫) ਵੁਤ੍ਤੇ ‘‘ਸਾਧੁ ਸਾਧੁ, ਮਹਾਨਾਮ, ਤੇਨ ਹਿ ਤ੍ਵਂ, ਮਹਾਨਾਮ, ਸਙ੍ਘਂ ਯਾਵਜੀਵਂ ਭੇਸਜ੍ਜੇਨ ਪਵਾਰੇਹੀ’’ਤਿ ਪਟਿਞ੍ਞਂ ਅਦਾਸਿਯੇਵ. ਏਵਂ ਪਟਿਞ੍ਞਂ ਦਤ੍ਵਾ ਪਚ੍ਛਾ ਛਬ੍ਬਗ੍ਗਿਯੇਹਿ ਭਿਕ੍ਖੂਹਿ ਮਹਾਨਾਮਸ੍ਸ ਸਕ੍ਕਸ੍ਸ ਵਿਹੇਠਿਤਭਾਵਂ ਸੁਤ੍ਵਾ ਛਬ੍ਬਗ੍ਗਿਯੇ ਭਿਕ੍ਖੂ ਵਿਗਰਹਿਤ੍ਵਾ ਸਿਕ੍ਖਾਪਦਂ ਪਞ੍ਞਪੇਸਿ ‘‘ਅਗਿਲਾਨੇਨ ਭਿਕ੍ਖੁਨਾ ਚਾਤੁਮਾਸਪ੍ਪਚ੍ਚਯਪਵਾਰਣਾ ਸਾਦਿਤਬ੍ਬਾ ਅਞ੍ਞਤ੍ਰ ਪੁਨਪ੍ਪਵਾਰਣਾਯ ਅਞ੍ਞਤ੍ਰ ਨਿਚ੍ਚਪ੍ਪਵਾਰਣਾਯ. ਤਤੋ ਚੇ ਉਤ੍ਤਰਿ ਸਾਦਿਯੇਯ੍ਯ, ਪਾਚਿਤ੍ਤਿਯ’’ਨ੍ਤਿ. ਤਸ੍ਮਾ ਪਠਮਂ ਅਨੁਜਾਨਿਤ੍ਵਾਪਿ ਪਚ੍ਛਾ ਸਿਕ੍ਖਾਪਦਬਨ੍ਧਨੇਨ ਵਾਰਿਤਤ੍ਤਾ ‘‘ਪਟਿਞ੍ਞਂ ਨਾਦਾਸੀ’’ਤਿ ਵੁਤ੍ਤਂ.

ਉਗ੍ਗਗਹਪਤ੍ਯਾਦਿਵਤ੍ਥੁ

੨੫੩-੨੫੬. ਛਟ੍ਠਸਤ੍ਤਮਅਟ੍ਠਮਨਵਮਾਨਿ ਸੁਵਿਞ੍ਞੇਯ੍ਯਾਨੇਵ.

ਨਕੁਲਪਿਤੁਗਹਪਤਿਵਤ੍ਥੁ

੨੫੭. ਦਸਮੇ ਸੁਸੁਮਾਰਗਿਰਿਨਗਰੇਤਿ ਏਵਂਨਾਮਕੇ ਨਗਰੇ. ਤਸ੍ਸ ਕਿਰ ਨਗਰਸ੍ਸ ਵਤ੍ਥੁਪਰਿਗ੍ਗਹਦਿਵਸੇ ਅਵਿਦੂਰੇ ਉਦਕਰਹਦੇ ਸੁਸੁਮਾਰੋ ਸਦ੍ਦਮਕਾਸਿ, ਗਿਰਂ ਨਿਚ੍ਛਾਰੇਸਿ. ਅਥ ਨਗਰੇ ਅਨਨ੍ਤਰਾਯੇਨ ਮਾਪਿਤੇ ਤਮੇਵ ਸੁਸੁਮਾਰਗਿਰਕਰਣਂ ਸੁਭਨਿਮਿਤ੍ਤਂ ਕਤ੍ਵਾ ‘‘ਸੁਸੁਮਾਰਗਿਰੀ’’ਤ੍ਵੇਵਸ੍ਸ ਨਾਮਂ ਅਕਂਸੁ. ਕੇਚਿ ਪਨ ‘‘ਸੁਸੁਮਾਰਸਣ੍ਠਾਨਤ੍ਤਾ ਸੁਸੁਮਾਰੋ ਨਾਮ ਏਕੋ ਗਿਰਿ, ਸੋ ਤਸ੍ਸ ਨਗਰਸ੍ਸ ਸਮੀਪੇ, ਤਸ੍ਮਾ ਤਂ ਸੁਸੁਮਾਰਗਿਰਿ ਏਤਸ੍ਸ ਅਤ੍ਥੀਤਿ ਸੁਸੁਮਾਰਗਿਰੀਤਿ ਵੁਚ੍ਚਤੀ’’ਤਿ ਵਦਨ੍ਤਿ. ਭੇਸਕਲ਼ਾਵਨੇਤਿ ਭੇਸਕਲ਼ਾਨਾਮਕੇ ਵਨੇ. ‘‘ਭੇਸਕਲਾਵਨੇ’’ਤਿਪਿ ਪਾਠੋ. ਕਥਂ ਪਨ ਭਗਵਤਿ ਨੇਸਂ ਪੁਤ੍ਤਸਞ੍ਞਾ ਪਤਿਟ੍ਠਾਸੀਤਿ ਆਹ – ‘‘ਅਯਂ ਕਿਰਾ’’ਤਿਆਦਿ. ਦਹਰਸ੍ਸੇਵ ਦਹਰਾ ਆਨੀਤਾਤਿ ਮੇ ਦਹਰਸ੍ਸੇਵ ਸਤੋ ਦਹਰਾ ਆਨੀਤਾਤਿ ਅਤ੍ਥੋ. ਅਤਿਚਰਿਤਾਤਿ ਅਤਿਕ੍ਕਮਿਤ੍ਵਾ ਚਰਨ੍ਤੋ.

(ਛਟ੍ਠਏਤਦਗ੍ਗਵਗ੍ਗਵਣ੍ਣਨਾ ਨਿਟ੍ਠਿਤਾ.)

ਉਪਾਸਕਪਾਲ਼ਿਸਂਵਣ੍ਣਨਾ ਨਿਟ੍ਠਿਤਾ.