੧੪. ਏਤਦਗ੍ਗਵਗ੍ਗੋ

(੧੪) ੫. ਪਞ੍ਚਮਏਤਦਗ੍ਗਵਗ੍ਗਵਣ੍ਣਨਾ

ਮਹਾਪਜਾਪਤਿਗੋਤਮੀਥੇਰੀਵਤ੍ਥੁ

੨੩੫. ਥੇਰਿਪਾਲ਼ਿਸਂਵਣ੍ਣਨਾਯ ਪਠਮੇ ਯਦਿਦਂ ਮਹਾਗੋਤਮੀਤਿ ਏਤ੍ਥ ‘‘ਯਦਿਦਂ ਮਹਾਪਜਾਪਤਿ ਗੋਤਮੀ’’ਤਿ ਚ ਪਠਨ੍ਤਿ. ਤਤ੍ਥ ਗੋਤਮੀਤਿ ਗੋਤ੍ਤਂ. ਨਾਮਕਰਣਦਿਵਸੇ ਪਨਸ੍ਸਾ ਲਦ੍ਧਸਕ੍ਕਾਰਾ ਬ੍ਰਾਹ੍ਮਣਾ ਲਕ੍ਖਣਸਮ੍ਪਤ੍ਤਿਂ ਦਿਸ੍ਵਾ ‘‘ਸਚੇ ਅਯਂ ਧੀਤਰਂ ਲਭਿਸ੍ਸਤਿ, ਚਕ੍ਕਵਤ੍ਤਿਰਞ੍ਞੋ ਮਹੇਸੀ ਭਵਿਸ੍ਸਤਿ. ਸਚੇ ਪੁਤ੍ਤਂ ਲਭਿਸ੍ਸਤਿ, ਚਕ੍ਕਵਤ੍ਤਿਰਾਜਾ ਭਵਿਸ੍ਸਤੀ’’ਤਿ ਉਭਯਥਾਪਿ ‘‘ਮਹਤੀਯੇਵਸ੍ਸਾ ਪਜਾ ਭਵਿਸ੍ਸਤੀ’’ਤਿ ਬ੍ਯਾਕਰਿਂਸੁ, ਤਸ੍ਮਾ ਪੁਤ੍ਤਪਜਾਯ ਚੇਵ ਧੀਤੁਪਜਾਯ ਚ ਮਹਨ੍ਤਤਾਯ ‘‘ਮਹਾਪਜਾਪਤੀ’’ਤਿ ਵੋਹਰਿਂਸੁ. ਤਦੁਭਯਂ ਪਨ ਸਂਸਨ੍ਦੇਤ੍ਵਾ ‘‘ਮਹਾਪਜਾਪਤਿਗੋਤਮੀ’’ਤਿ ਵੁਤ੍ਤਂ. ਵਾਰਭਿਕ੍ਖਨ੍ਤਿ ਵਾਰੇਨ ਦਾਤਬ੍ਬਂ ਭਿਕ੍ਖਂ. ਨਾਮਂ ਅਕਂਸੂਤਿ ਗੋਤ੍ਤਂਯੇਵ ਨਾਮਂ ਅਕਂਸੁ. ਮਾਤੁਚ੍ਛਨ੍ਤਿ ਚੂਲ਼ਮਾਤਰਂ. ਮਾਤੁਭਗਿਨੀ ਹਿ ਮਾਤੁਚ੍ਛਾਤਿ ਵੁਚ੍ਚਤਿ. ਕਲਹਵਿਵਾਦਸੁਤ੍ਤਪਰਿਯੋਸਾਨੇਤਿ ‘‘ਕੁਤੋਪਹੂਤਾ ਕਲਹਾ ਵਿਵਾਦਾ’’ਤਿਆਦਿਨਾ ਸੁਤ੍ਤਨਿਪਾਤੇ ਆਗਤਸ੍ਸ ਕਲਹਵਿਵਾਦਸੁਤ੍ਤਸ੍ਸ (ਸੁ. ਨਿ. ੮੬੮ ਆਦਯੋ) ਪਰਿਯੋਸਾਨੇ. ਇਦਞ੍ਚ ਅਙ੍ਗੁਤ੍ਤਰਭਾਣਕਾਨਂ ਕਥਾਮਗ੍ਗਾਨੁਸਾਰੇਨ ਵੁਤ੍ਤਂ. ਅਪਰੇ ਪਨ ‘‘ਤਸ੍ਮਿਂਯੇਵ ਸੁਤ੍ਤਨਿਪਾਤੇ ‘ਅਤ੍ਤਦਣ੍ਡਾਭਯਂ ਜਾਤ’ਨ੍ਤਿਆਦਿਨਾ ਆਗਤਸ੍ਸ ਅਤ੍ਤਦਣ੍ਡਸੁਤ੍ਤਸ੍ਸ (ਸੁ. ਨਿ. ੯੪੧ ਆਦਯੋ) ਪਰਿਯੋਸਾਨੇ’’ਤਿ ਵਦਨ੍ਤਿ. ਨਿਕ੍ਖਮਿਤ੍ਵਾ ਪਬ੍ਬਜਿਤਾਨਨ੍ਤਿ ਏਤ੍ਥ ਏਹਿਭਿਕ੍ਖੁਪਬ੍ਬਜ੍ਜਾਯ ਏਤੇ ਪਬ੍ਬਜਿਤਾਤਿ ਵਦਨ੍ਤਿ. ਤੇਨੇਵ ਸੁਤ੍ਤਨਿਪਾਤੇ ਅਤ੍ਤਦਣ੍ਡਸੁਤ੍ਤਸਂਵਣ੍ਣਨਾਯ (ਸੁ. ਨਿ. ਅਟ੍ਠ. ੨.੯੪੨ ਆਦਯੋ) ਵੁਤ੍ਤਂ – ‘‘ਦੇਸਨਾਪਰਿਯੋਸਾਨੇ ਪਞ੍ਚਸਤਾ ਸਾਕਿਯਕੁਮਾਰਾ ਕੋਲ਼ਿਯਕੁਮਾਰਾ ਚ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਤਾ. ਤੇ ਗਹੇਤ੍ਵਾ ਭਗਵਾ ਮਹਾਵਨਂ ਪਾਵਿਸੀ’’ਤਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਖੇਮਾਥੇਰੀਵਤ੍ਥੁ

੨੩੬. ਦੁਤਿਯੇ ਪਰਪਰਿਯਾਪਨ੍ਨਾ ਹੁਤ੍ਵਾਤਿ ਪਰੇਸਂ ਦਾਸੀ ਹੁਤ੍ਵਾ. ਸੁਵਣ੍ਣਰਸਪਿਞ੍ਜਰੋ ਅਹੋਸੀਤਿ ਸੁਵਣ੍ਣਰਸਪਿਞ੍ਜਰੋ ਵਿਯ ਅਹੋਸਿ.

ਮਕ੍ਕਟਕੋਵ ਜਾਲਨ੍ਤਿ ਯਥਾ ਨਾਮ ਮਕ੍ਕਟਕੋ ਸੁਤ੍ਤਜਾਲਂ ਕਤ੍ਵਾ ਮਜ੍ਝਟ੍ਠਾਨੇ ਨਾਭਿਮਣ੍ਡਲੇ ਨਿਪਨ੍ਨੋ ਪਰਿਯਨ੍ਤੇ ਪਤਿਤਂ ਪਟਙ੍ਗਂ ਵਾ ਮਕ੍ਖਿਕਂ ਵਾ ਵੇਗੇਨ ਗਨ੍ਤ੍ਵਾ ਵਿਜ੍ਝਿਤ੍ਵਾ ਤਸ੍ਸ ਰਸਂ ਪਿਵਿਤ੍ਵਾ ਪੁਨਾਗਨ੍ਤ੍ਵਾ ਤਸ੍ਮਿਂਯੇਵ ਠਾਨੇ ਨਿਪਜ੍ਜਤਿ, ਏਵਮੇਵ ਯੇ ਸਤ੍ਤਾ ਰਾਗਰਤ੍ਤਾ ਦੋਸਪਦੁਟ੍ਠਾ ਮੋਹਮੂਲ਼੍ਹਾ ਸਯਂਕਤਂ ਤਣ੍ਹਾਸੋਤਂ ਅਨੁਪਤਨ੍ਤਿ, ਤੇ ਤਂ ਸਮਤਿਕ੍ਕਮਿਤੁਂ ਨ ਸਕ੍ਕੋਨ੍ਤਿ, ਏਵਂ ਦੁਰਤਿਕ੍ਕਮਂ. ਏਤਮ੍ਪਿ ਛੇਤ੍ਵਾਨ ਵਜਨ੍ਤਿ ਧੀਰਾਤਿ ਪਣ੍ਡਿਤਾ ਏਤਂ ਬਨ੍ਧਨਂ ਛਿਨ੍ਦਿਤ੍ਵਾ ਅਨਪੇਕ੍ਖਿਨੋ ਨਿਰਾਲਯਾ ਹੁਤ੍ਵਾ ਅਰਹਤ੍ਤਮਗ੍ਗੇਨ ਸਬ੍ਬਂ ਦੁਕ੍ਖਂ ਪਹਾਯ ਵਜਨ੍ਤਿ ਗਚ੍ਛਨ੍ਤੀਤਿ ਅਤ੍ਥੋ.

ਉਪ੍ਪਲਵਣ੍ਣਾਥੇਰੀਵਤ੍ਥੁ

੨੩੭. ਤਤਿਯਂ ਉਤ੍ਤਾਨਤ੍ਥਮੇਵ.

ਪਟਾਚਾਰਾਥੇਰੀਵਤ੍ਥੁ

੨੩੮. ਚਤੁਤ੍ਥੇ ਪਟਿਹਾਰਸਤੇਨਪੀਤਿ ਦ੍ਵਾਰਸਤੇਨਪਿ. ਪਟਿਹਾਰਸਦ੍ਦੋ ਹਿ ਦ੍ਵਾਰੇ ਦੋਵਾਰਿਕੇ ਚ ਦਿਸ੍ਸਤਿ. ਕੁਲਸਭਾਗਨ੍ਤਿ ਅਤ੍ਤਨੋ ਗੇਹਸਮੀਪਂ.

ਤਾਣਾਯਾਤਿ ਤਾਣਭਾਵਾਯ ਪਤਿਟ੍ਠਾਨਤ੍ਥਾਯ. ਬਨ੍ਧਵਾਤਿ ਪੁਤ੍ਤੇ ਚ ਪਿਤਰੋ ਚ ਠਪੇਤ੍ਵਾ ਅਵਸੇਸਾ ਞਾਤਿਸੁਹਜ੍ਜਾ. ਅਨ੍ਤਕੇਨਾਧਿਪਨ੍ਨਸ੍ਸਾਤਿ ਮਰਣੇਨ ਅਭਿਭੂਤਸ੍ਸ. ਪਵਤ੍ਤਿਯਞ੍ਹਿ ਪੁਤ੍ਤਾਦਯੋ ਅਨ੍ਨਪਾਨਾਦਿਦਾਨੇਨ ਚੇਵ ਉਪ੍ਪਨ੍ਨਕਿਚ੍ਚਨਿਤ੍ਥਰਣੇਨ ਚ ਤਾਣਾ ਹੁਤ੍ਵਾਪਿ ਮਰਣਕਾਲੇ ਕੇਨਚਿ ਉਪਾਯੇਨ ਮਰਣਂ ਪਟਿਬਾਹਿਤੁਂ ਅਸਮਤ੍ਥਤਾਯ ਤਾਣਤ੍ਥਾਯ ਲੇਣਤ੍ਥਾਯ ਨ ਸਨ੍ਤਿ ਨਾਮ. ਤੇਨੇਵ ਵੁਤ੍ਤਂ – ‘‘ਨਤ੍ਥਿ ਞਾਤੀਸੁ ਤਾਣਤਾ’’ਤਿ.

ਏਤਮਤ੍ਥਵਸਨ੍ਤਿ ਏਤਂ ਤੇਸਂ ਅਞ੍ਞਮਞ੍ਞਸ੍ਸ ਤਾਣਂ ਭਵਿਤੁਂ ਅਸਮਤ੍ਥਭਾਵਸਙ੍ਖਾਤਂ ਕਾਰਣਂ ਜਾਨਿਤ੍ਵਾ ਪਣ੍ਡਿਤੋ ਚਤੁਪਾਰਿਸੁਦ੍ਧਿਸੀਲੇਨ ਸਂਵੁਤੋ ਰਕ੍ਖਿਤਗੋਪਿਤੋ ਹੁਤ੍ਵਾ ਨਿਬ੍ਬਾਨਗਮਨਂ ਅਟ੍ਠਙ੍ਗਿਕਂ ਮਗ੍ਗਂ ਸੀਘਂ ਸੋਧੇਯ੍ਯਾਤਿ ਅਤ੍ਥੋ.

ਧਮ੍ਮਦਿਨ੍ਨਾਥੇਰੀਵਤ੍ਥੁ

੨੩੯. ਪਞ੍ਚਮੇ ਪਰਾਯਤ੍ਤਟ੍ਠਾਨੇਤਿ ਪਰੇਸਂ ਦਾਸਿਟ੍ਠਾਨੇ. ਸੁਜਾਤਤ੍ਥੇਰਸ੍ਸ ਅਧਿਕਾਰਕਮ੍ਮਂ ਕਤ੍ਵਾਤਿ ਸਾ ਕਿਰ ਅਤ੍ਤਨੋ ਕੇਸੇ ਵਿਕ੍ਕਿਣਿਤ੍ਵਾ ਸੁਜਾਤਤ੍ਥੇਰਸ੍ਸ ਨਾਮ ਅਗ੍ਗਸਾਵਕਸ੍ਸ ਦਾਨਂ ਦਤ੍ਵਾ ਪਤ੍ਥਨਂ ਅਕਾਸਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਹਤ੍ਥੇ ਪਸਾਰਿਤੇਤਿ ਤਸ੍ਸ ਹਤ੍ਥਾਵਲਮ੍ਬਨਤ੍ਥਂ ਪੁਬ੍ਬਾਚਿਣ੍ਣਵਸੇਨ ਹਤ੍ਥੇ ਪਸਾਰਿਤੇ. ਸੋ ਕਿਰ ਅਨਾਗਾਮੀ ਹੁਤ੍ਵਾ ਗੇਹਂ ਆਗਚ੍ਛਨ੍ਤੋ ਯਥਾ ਅਞ੍ਞੇਸੁ ਦਿਵਸੇਸੁ ਇਤੋ ਚਿਤੋ ਚ ਓਲੋਕੇਨ੍ਤੋ ਸਿਤਂ ਕੁਰੁਮਾਨੋ ਹਸਮਾਨੋ ਆਗਚ੍ਛਤਿ, ਏਵਂ ਅਨਾਗਨ੍ਤ੍ਵਾ ਸਨ੍ਤਿਨ੍ਦ੍ਰਿਯੋ ਸਨ੍ਤਮਾਨਸੋ ਹੁਤ੍ਵਾ ਅਗਮਾਸਿ. ਧਮ੍ਮਦਿਨ੍ਨਾ ਸੀਹਪਞ੍ਜਰਂ ਉਗ੍ਘਾਟੇਤ੍ਵਾ ਵੀਥਿਂ ਓਲੋਕਯਮਾਨਾ ਤਸ੍ਸ ਆਗਮਨਾਕਾਰਂ ਦਿਸ੍ਵਾ ‘‘ਕਿਂ ਨੁ ਖੋ ਏਤ’’ਨ੍ਤਿ ਚਿਨ੍ਤੇਤ੍ਵਾ ਤਸ੍ਸ ਪਚ੍ਚੁਗ੍ਗਮਨਂ ਕੁਰੁਮਾਨਾ ਸੋਪਾਨਸੀਸੇ ਠਤ੍ਵਾ ਓਲਮ੍ਬਨਤ੍ਥਂ ਹਤ੍ਥਂ ਪਸਾਰੇਸਿ. ਉਪਾਸਕੋ ਅਤ੍ਤਨੋ ਹਤ੍ਥਂ ਸਮਿਞ੍ਜੇਸਿ. ਸਾ ‘‘ਪਾਤਰਾਸਭੋਜਨਕਾਲੇ ਜਾਨਿਸ੍ਸਾਮੀ’’ਤਿ ਚਿਨ੍ਤੇਸਿ. ਉਪਾਸਕੋ ਪੁਬ੍ਬੇ ਤਾਯ ਸਦ੍ਧਿਂ ਏਕਤੋ ਭੁਞ੍ਜਤਿ. ਤਂ ਦਿਵਸਂ ਪਨ ਤਂ ਅਨਪਲੋਕੇਤ੍ਵਾ ਯੋਗਾਵਚਰਭਿਕ੍ਖੁ ਵਿਯ ਏਕਕੋਵ ਭੁਞ੍ਜਿ. ਤੇਨਾਹ – ‘‘ਭੁਞ੍ਜਮਾਨੋਪਿ ਇਮਂ ਦੇਥ, ਇਮਂ ਹਰਥਾਤਿ ਨ ਬ੍ਯਾਹਰੀ’’ਤਿ. ਤਤ੍ਥ ਇਮਂ ਦੇਥਾਤਿ ਇਮਂ ਖਾਦਨੀਯਂ ਵਾ ਭੋਜਨੀਯਂ ਵਾ ਦੇਥ. ਇਮਂ ਹਰਥਾਤਿ ਇਮਂ ਖਾਦਨੀਯਂ ਵਾ ਭੋਜਨੀਯਂ ਵਾ ਅਪਹਰਥ. ਸਨ੍ਥਵਵਸੇਨਾਤਿ ਕਿਲੇਸਸਨ੍ਥਵਵਸੇਨ. ਚਿਰਕਾਲਪਰਿਭਾਵਿਤਾਯ ਘਟਦੀਪਜਾਲਾਯ ਵਿਯ ਅਬ੍ਭਨ੍ਤਰੇ ਦਿਬ੍ਬਮਾਨਾਯ ਹੇਤੁਸਮ੍ਪਤ੍ਤਿਯਾ ਚੋਦਿਯਮਾਨਾ ਆਹ – ‘‘ਏਵਂ ਸਨ੍ਤੇ…ਪੇ… ਮਯ੍ਹਂ ਪਬ੍ਬਜ੍ਜਂ ਅਨੁਜਾਨਾਥਾ’’ਤਿ.

ਅਯਂ ਤਾਵ ਸੇਟ੍ਠਿ ਘਰਮਜ੍ਝੇ ਠਿਤੋਵ ਦੁਕ੍ਖਸ੍ਸਨ੍ਤਂ ਅਕਾਸੀਤਿ ਸਾ ਕਿਰ ‘‘ਧਮ੍ਮਦਿਨ੍ਨੇ ਤੁਯ੍ਹਂ ਦੋਸੋ ਨਤ੍ਥਿ, ਅਹਂ ਪਨ ਅਜ੍ਜ ਪਟ੍ਠਾਯ ਸਨ੍ਥਵਵਸੇਨ…ਪੇ… ਕੁਲਘਰਂ ਗਚ੍ਛਾ’’ਤਿ ਵੁਤ੍ਤੇ ਏਵਂ ਚਿਨ੍ਤੇਸਿ – ‘‘ਪਕਤਿਪੁਰਿਸੋ ਏਵਂ ਵਤ੍ਤਾ ਨਾਮ ਨਤ੍ਥਿ, ਅਦ੍ਧਾ ਏਤੇਨ ਲੋਕੁਤ੍ਤਰਧਮ੍ਮੋ ਨਾਮ ਪਟਿਵਿਦ੍ਧੋ’’ਤਿ. ਤੇਨਸ੍ਸਾ ਅਯਂ ਸਙ੍ਕਪ੍ਪੋ ਅਹੋਸਿ ‘‘ਅਯਂ ਤਾਵ ਸੇਟ੍ਠਿ ਘਰਮਜ੍ਝੇ ਠਿਤੋਵ ਦੁਕ੍ਖਸ੍ਸਨ੍ਤਂ ਅਕਾਸੀ’’ਤਿ. ਮਜ੍ਝਿਮਨਿਕਾਯਟ੍ਠਕਥਾਯਂ (ਮ. ਨਿ. ਅਟ੍ਠ. ੧.੪੬੦) ਪਨ ‘‘ਅਥ ਕਸ੍ਮਾ ਮਯਾ ਸਦ੍ਧਿਂ ਯਥਾਪਕਤਿਯਾ ਆਲਾਪਸਲ੍ਲਾਪਮਤ੍ਤਮ੍ਪਿ ਨ ਕਰੋਥਾਤਿ ਸੋ ਚਿਨ੍ਤੇਸਿ – ‘ਅਯਂ ਲੋਕੁਤ੍ਤਰਧਮ੍ਮੋ ਨਾਮ ਗਰੁ ਭਾਰਿਯੋ ਨ ਪਕਾਸੇਤਬ੍ਬੋ; ਸਚੇ ਖੋ ਪਨਾਹਂ ਨ ਕਥੇਸ੍ਸਾਮਿ, ਅਯਂ ਹਦਯਂ ਫਾਲੇਤ੍ਵਾ ਏਤ੍ਥੇਵ ਕਾਲਂ ਕਰੇਯ੍ਯਾ’ਤਿ ਤਸ੍ਸਾ ਅਨੁਗ੍ਗਹਤ੍ਥਾਯ ਕਥੇਸਿ – ‘ਧਮ੍ਮਦਿਨ੍ਨੇ ਅਹਂ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਲੋਕੁਤ੍ਤਰਧਮ੍ਮਂ ਨਾਮ ਅਧਿਗਤੋ, ਤਂ ਅਧਿਗਤਸ੍ਸ ਏਵਰੂਪਾ ਲੋਕਿਯਕਿਰਿਯਾ ਨ ਵਟ੍ਟਤੀ’’’ਤਿ ਵੁਤ੍ਤਂ.

ਪਞ੍ਚਕ੍ਖਨ੍ਧਾਦਿਵਸੇਨ ਪਞ੍ਹੇ ਪੁਚ੍ਛੀਤਿ ‘‘ਸਕ੍ਕਾਯੋ ਸਕ੍ਕਾਯੋਤਿ ਅਯ੍ਯੇ ਵੁਚ੍ਚਤਿ, ਕਤਮੋ ਨੁ ਖੋ ਅਯ੍ਯੇ ਸਕ੍ਕਾਯੋ ਵੁਤ੍ਤੋ ਭਗਵਤਾ’’ਤਿਆਦਿਨਾ ਚੂਲ਼ਵੇਦਲ੍ਲਸੁਤ੍ਤੇ (ਮ. ਨਿ. ੧.੪੬੦ ਆਦਯੋ) ਆਗਤਨਯੇਨ ਪੁਚ੍ਛਿ. ਪੁਚ੍ਛਿਤਂ ਪੁਚ੍ਛਿਤਂ ਵਿਸ੍ਸਜ੍ਜੇਸੀਤਿ ‘‘ਪਞ੍ਚ ਖੋ ਇਮੇ, ਆਵੁਸੋ ਵਿਸਾਖ, ਉਪਾਦਾਨਕ੍ਖਨ੍ਧਾ ਸਕ੍ਕਾਯੋ ਵੁਤ੍ਤੋ ਭਗਵਤਾ’’ਤਿਆਦਿਨਾ (ਮ. ਨਿ. ੧.੪੬੦ ਆਦਯੋ) ਤਤ੍ਥੇਵ ਆਗਤਨਯੇਨ ਵਿਸ੍ਸਜ੍ਜੇਸਿ. ਸੂਰਭਾਵਨ੍ਤਿ ਤਿਕ੍ਖਭਾਵਂ. ਅਨਧਿਗਤਅਰਹਤ੍ਤਮਗ੍ਗਸ੍ਸ ਉਗ੍ਗਹੇਨ ਵਿਨਾ ਤਤ੍ਥ ਪਞ੍ਹੋ ਨ ਉਪਟ੍ਠਾਤੀਤਿ ਆਹ – ‘‘ਉਗ੍ਗਹਵਸੇਨ ਅਰਹਤ੍ਤਮਗ੍ਗੇਪਿ ਪੁਚ੍ਛੀ’’ਤਿ. ਤਂ ਨਿਵਤ੍ਤੇਨ੍ਤੀਤਿ ‘‘ਵਿਮੁਤ੍ਤਿਯਾ ਪਨਾਯ੍ਯੇ ਕਿਂ ਪਟਿਭਾਗੋ’’ਤਿ ਪੁਚ੍ਛਿਤੇ ‘‘ਵਿਮੁਤ੍ਤਿਯਾ ਖੋ, ਆਵੁਸੋ ਵਿਸਾਖ, ਨਿਬ੍ਬਾਨਂ ਪਟਿਭਾਗੋ’’ਤਿ (ਮ. ਨਿ. ੧.੪੬੬) ਵੁਤ੍ਤੇ ‘‘ਨਿਬ੍ਬਾਨਸ੍ਸ, ਪਨਾਯ੍ਯੇ, ਕਿਂ ਪਟਿਭਾਗੋ’’ਤਿ ਪੁਨ ਪੁਚ੍ਛਿਤੇ ਤਂ ਨਿਵਤ੍ਤੇਨ੍ਤੀ ‘‘ਅਚ੍ਚਸਰਾਵੁਸੋ ਵਿਸਾਖਾ’’ਤਿਆਦਿਮਾਹ. ਤਤ੍ਥ ਅਚ੍ਚਸਰਾਤਿ ਅਪੁਚ੍ਛਿਤਬ੍ਬਂ ਪੁਚ੍ਛਨ੍ਤੋ ਪਞ੍ਹਂ ਅਤਿਕ੍ਕਾਮਿਤਾ ਅਹੋਸੀਤਿ ਅਤ੍ਥੋ. ਨਾਸਕ੍ਖਿ ਪਞ੍ਹਾਨਂ ਪਰਿਯਨ੍ਤਂ ਗਹੇਤੁਨ੍ਤਿ ਪਞ੍ਹਾਨਂ ਪਰਿਚ੍ਛੇਦਪ੍ਪਮਾਣਂ ਗਹੇਤੁਂ ਨਾਸਕ੍ਖਿ. ਪਞ੍ਹਾਨਞ੍ਹਿ ਪਰਿਚ੍ਛੇਦਂ ਗਹੇਤੁਂ ਯੁਤ੍ਤਟ੍ਠਾਨੇ ਅਟ੍ਠਤ੍ਵਾ ਤਤੋ ਪਰਂ ਪੁਚ੍ਛਨ੍ਤੋ ਨਾਸਕ੍ਖਿ ਪਞ੍ਹਾਨਂ ਪਰਿਯਨ੍ਤਂ ਗਹੇਤੁਂ. ਅਪ੍ਪਟਿਭਾਗਧਮ੍ਮਸ੍ਸ ਚ ਪਟਿਭਾਗਂ ਪੁਚ੍ਛਿ. ਨਿਬ੍ਬਾਨਂ ਨਾਮੇਤਂ ਅਪ੍ਪਟਿਭਾਗਂ, ਨ ਸਕ੍ਕਾ ਨੀਲਂ ਵਾ ਪੀਤਕਂ ਵਾਤਿ ਕੇਨਚਿ ਧਮ੍ਮੇਨ ਸਦ੍ਧਿਂ ਪਟਿਭਾਗਂ ਕਤ੍ਵਾ ਦਸ੍ਸੇਤੁਂ, ਤਞ੍ਚ ਤ੍ਵਂ ਇਮਿਨਾ ਅਧਿਪ੍ਪਾਯੇਨ ਪੁਚ੍ਛਸੀਤਿ ਅਤ੍ਥੋ. ਨਿਬ੍ਬਾਨੋਗਧਨ੍ਤਿ ਨਿਬ੍ਬਾਨਂ ਓਗਾਹੇਤ੍ਵਾ ਠਿਤਂ, ਨਿਬ੍ਬਾਨਨ੍ਤੋਗਧਂ ਨਿਬ੍ਬਾਨਂ ਅਨੁਪ੍ਪਵਿਟ੍ਠਨ੍ਤਿ ਅਤ੍ਥੋ. ਨਿਬ੍ਬਾਨਪਰਾਯਣਨ੍ਤਿ ਨਿਬ੍ਬਾਨਂ ਪਰਂ ਅਯਨਮਸ੍ਸ ਪਰਾਗਤਿ, ਨ ਤਤੋ ਪਰਂ ਗਚ੍ਛਤੀਤਿ ਅਤ੍ਥੋ. ਨਿਬ੍ਬਾਨਂ ਪਰਿਯੋਸਾਨਂ ਅਵਸਾਨਂ ਅਸ੍ਸਾਤਿ ਨਿਬ੍ਬਾਨਪਰਿਯੋਸਾਨਂ.

ਪੁਰੇਤਿ ਅਤੀਤੇਸੁ ਖਨ੍ਧੇਸੁ. ਪਚ੍ਛਾਤਿ ਅਨਾਗਤੇਸੁ ਖਨ੍ਧੇਸੁ. ਮਜ੍ਝੇਤਿ ਪਚ੍ਚੁਪ੍ਪਨ੍ਨੇਸੁ ਖਨ੍ਧੇਸੁ. ਅਕਿਞ੍ਚਨਨ੍ਤਿ ਯਸ੍ਸ ਏਤੇਸੁ ਤੀਸੁ ਤਣ੍ਹਾਗਾਹਸਙ੍ਖਾਤਂ ਕਿਞ੍ਚਨਂ ਨਤ੍ਥਿ, ਤਮਹਂ ਰਾਗਕਿਞ੍ਚਨਾਦੀਹਿ ਅਕਿਞ੍ਚਨਂ ਕਸ੍ਸਚਿ ਗਹਣਸ੍ਸ ਅਭਾਵੇਨ ਅਨਾਦਾਨਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

ਪਣ੍ਡਿਤਾਤਿ ਧਾਤੁਆਯਤਨਾਦਿਕੁਸਲਤਾਸਙ੍ਖਾਤੇਨ ਪਣ੍ਡਿਚ੍ਚੇਨ ਸਮਨ੍ਨਾਗਤਾ. ਵੁਤ੍ਤਞ੍ਹੇਤਂ –

‘‘ਕਿਤ੍ਤਾਵਤਾ ਨੁ ਖੋ, ਭਨ੍ਤੇ, ਪਣ੍ਡਿਤੋ ਹੋਤਿ? ਯਤੋ ਖੋ, ਆਨਨ੍ਦ, ਭਿਕ੍ਖੁ ਧਾਤੁਕੁਸਲੋ ਚ ਹੋਤਿ ਆਯਤਨਕੁਸਲੋ ਚ ਪਟਿਚ੍ਚਸਮੁਪ੍ਪਾਦਕੁਸਲੋ ਚ ਠਾਨਾਟ੍ਠਾਨਕੁਸਲੋ ਚ, ਏਤ੍ਤਾਵਤਾ ਖੋ, ਆਨਨ੍ਦ, ਭਿਕ੍ਖੁ ਪਣ੍ਡਿਤੋ ਹੋਤੀ’’ਤਿ.

ਮਹਾਪਞ੍ਞਾਤਿ ਮਹਨ੍ਤੇ ਅਤ੍ਥੇ ਮਹਨ੍ਤੇ ਧਮ੍ਮੇ ਮਹਨ੍ਤਾ ਨਿਰੁਤ੍ਤਿਯੋ ਮਹਨ੍ਤਾਨਿ ਪਟਿਭਾਨਾਨਿ ਪਰਿਗ੍ਗਹਣੇ ਸਮਤ੍ਥਾਯ ਪਞ੍ਞਾਯ ਸਮਨ੍ਨਾਗਤਾ. ਇਮਿਸ੍ਸਾ ਹਿ ਥੇਰਿਯਾ ਅਸੇਕ੍ਖਪ੍ਪਟਿਸਮ੍ਭਿਦਾਪ੍ਪਤ੍ਤਤਾਯ ਪਟਿਸਮ੍ਭਿਦਾਯੋ ਪੂਰੇਤ੍ਵਾ ਠਿਤਤਾਯ ਪਞ੍ਞਾਮਹਤ੍ਤਂ. ਯਥਾ ਤਂ ਧਮ੍ਮਦਿਨ੍ਨਾਯਾਤਿ ਯਥਾ ਧਮ੍ਮਦਿਨ੍ਨਾਯ ਭਿਕ੍ਖੁਨਿਯਾ ਬ੍ਯਾਕਤਂ, ਅਹਂ ਏਵਮੇਵ ਬ੍ਯਾਕਰੇਯ੍ਯਨ੍ਤਿ ਅਤ੍ਥੋ. ਤਨ੍ਤਿ ਨਿਪਾਤਮਤ੍ਥਂ.

ਨਨ੍ਦਾਥੇਰੀਵਤ੍ਥੁ

੨੪੦. ਛਟ੍ਠੇ ਅਞ੍ਞਂ ਮਗ੍ਗਂ ਅਪਸ੍ਸਨ੍ਤੀਤਿ ਅਞ੍ਞਂ ਉਪਾਯਂ ਅਪਸ੍ਸਨ੍ਤੀ. ਵਿਸ੍ਸਤ੍ਥਾਤਿ ਨਿਰਾਸਙ੍ਕਾ. ਇਤ੍ਥਿਨਿਮਿਤ੍ਤਨ੍ਤਿ ਇਤ੍ਥਿਯਾ ਸੁਭਨਿਮਿਤ੍ਤਂ, ਸੁਭਾਕਾਰਨ੍ਤਿ ਵੁਤ੍ਤਂ ਹੋਤਿ. ਧਮ੍ਮਪਦੇ ਗਾਥਂ ਵਤ੍ਵਾਤਿ –

‘‘ਅਟ੍ਠੀਨਂ ਨਗਰਂ ਕਤਂ, ਮਂਸਲੋਹਿਤਲੇਪਨਂ;

ਯਤ੍ਥ ਜਰਾ ਚ ਮਚ੍ਚੁ ਚ, ਮਾਨੋ ਮਕ੍ਖੋ ਚ ਓਹਿਤੋ’’ਤਿ. (ਧ. ਪ. ੧੫੦) –

ਇਮਂ ਗਾਥਂ ਵਤ੍ਵਾ. ਤਤ੍ਰਾਯਮਧਿਪ੍ਪਾਯੋ – ਯਥੇਵ ਹਿ ਪੁਬ੍ਬਣ੍ਣਾਪਰਣ੍ਣਾਦੀਨਂ ਓਦਹਨਤ੍ਥਾਯ ਕਟ੍ਠਾਨਿ ਉਸ੍ਸਾਪੇਤ੍ਵਾ ਵਲ੍ਲੀਹਿ ਬਨ੍ਧਿਤ੍ਵਾ ਮਤ੍ਤਿਕਾਯ ਵਿਲਿਮ੍ਪਿਤ੍ਵਾ ਨਗਰਸਙ੍ਖਾਤਂ ਬਹਿਦ੍ਧਾ ਗੇਹਂ ਕਰੋਨ੍ਤਿ, ਏਵਮਿਦਂ ਅਜ੍ਝਤ੍ਤਿਕਮ੍ਪਿ ਤੀਣਿ ਅਟ੍ਠਿਸਤਾਨਿ ਉਸ੍ਸਾਪੇਤ੍ਵਾ ਨ੍ਹਾਰੁਵਿਨਦ੍ਧਂ ਮਂਸਲੋਹਿਤਲੇਪਨਂ ਤਚਪਟਿਚ੍ਛਨ੍ਨਂ ਜੀਰਣਲਕ੍ਖਣਾਯ ਜਰਾਯ ਮਰਣਲਕ੍ਖਣਸ੍ਸ ਮਚ੍ਚੁਨੋ ਆਰੋਗ੍ਯਸਮ੍ਪਦਾਦੀਨਿ ਪਟਿਚ੍ਚ ਉਪ੍ਪਜ੍ਜਨਲਕ੍ਖਣਸ੍ਸ ਮਾਨਸ੍ਸ ਸੁਕਤਕਾਰਣਵਿਨਾਸਨਲਕ੍ਖਣਸ੍ਸ ਮਕ੍ਖਸ੍ਸ ਚ ਓਦਹਨਤ੍ਥਾਯ ਨਗਰਂ ਕਤਂ. ਏਵਰੂਪੋ ਏਵ ਹਿ ਏਤ੍ਥ ਕਾਯਿਕਚੇਤਸਿਕੋ ਆਬਾਧੋ ਓਹਿਤੋ, ਇਤੋ ਉਦ੍ਧਂ ਕਿਞ੍ਚਿ ਗਯ੍ਹੂਪਗਂ ਨਤ੍ਥੀਤਿ.

ਸੁਤ੍ਤਂ ਅਭਾਸੀਤਿ –

‘‘ਚਰਂ ਵਾ ਯਦਿ ਵਾ ਤਿਟ੍ਠਂ, ਨਿਸਿਨ੍ਨੋ ਉਦ ਵਾ ਸਯਂ;

ਸਮਿਞ੍ਜੇਤਿ ਪਸਾਰੇਤਿ, ਏਸਾ ਕਾਯਸ੍ਸ ਇਞ੍ਜਨਾ.

‘‘ਅਟ੍ਠਿਨਹਾਰੁਸਂਯੁਤ੍ਤੋ, ਤਚਮਂਸਾਵਲੇਪਨੋ;

ਛਵਿਯਾ ਕਾਯੋ ਪਟਿਚ੍ਛਨ੍ਨੋ, ਯਥਾਭੂਤਂ ਨ ਦਿਸ੍ਸਤੀ’’ਤਿ. (ਸੁ. ਨਿ. ੧੯੫-੧੯੬) –

ਆਦਿਨਾ ਸੁਤ੍ਤਮਭਾਸਿ.

ਸੋਣਾਥੇਰੀਵਤ੍ਥੁ

੨੪੧. ਸਤ੍ਤਮੇ ਸਬ੍ਬੇਪਿ ਵਿਸੁਂ ਵਿਸੁਂ ਘਰਾਵਾਸੇ ਪਤਿਟ੍ਠਾਪੇਸੀਤਿ ਏਤ੍ਥ ਸਬ੍ਬੇਪਿ ਵਿਸੁਂ ਵਿਸੁਂ ਘਰਾਵਾਸੇ ਪਤਿਟ੍ਠਾਪੇਤ੍ਵਾ ‘‘ਪੁਤ੍ਤਾਵ ਮਂ ਪਟਿਜਗ੍ਗਿਸ੍ਸਨ੍ਤਿ, ਕਿਂ ਮੇ ਵਿਸੁਂ ਕੁਟੁਮ੍ਬੇਨਾ’’ਤਿ ਸਬ੍ਬਂ ਸਾਪਤੇਯ੍ਯਮ੍ਪਿ ਵਿਭਜਿਤ੍ਵਾ ਅਦਾਸੀਤਿ ਵੇਦਿਤਬ੍ਬਂ. ਤੇਨੇਵ ਹਿ ਤਤੋ ਪਟ੍ਠਾਯ ‘‘ਅਯਂ ਅਮ੍ਹਾਕਂ ਕਿਂ ਕਰਿਸ੍ਸਤੀ’’ਤਿ ਅਤ੍ਤਨੋ ਸਨ੍ਤਿਕਂ ਆਗਤਂ ‘‘ਮਾਤਾ’’ਤਿ ਸਞ੍ਞਮ੍ਪਿ ਨ ਕਰਿਂਸੁ. ਤਥਾ ਹਿ ਨਂ ਕਤਿਪਾਹਚ੍ਚਯੇਨ ਜੇਟ੍ਠਪੁਤ੍ਤਸ੍ਸ ਭਰਿਯਾ ‘‘ਅਹੋ ਅਮ੍ਹਾਕਂ ਅਯਂ ਜੇਟ੍ਠੇਪੁਤ੍ਤੋ ਮੇਤਿ ਦ੍ਵੇ ਕੋਟ੍ਠਾਸੇ ਦਤ੍ਵਾ ਵਿਯ ਇਮਮੇਵ ਗੇਹਂ ਆਗਚ੍ਛਤੀ’’ਤਿ ਆਹ. ਸੇਸਪੁਤ੍ਤਾਨਂ ਭਰਿਯਾਯੋਪਿ ਏਵਮੇਵਂ ਵਦਿਂਸੁ. ਜੇਟ੍ਠਧੀਤਰਂ ਆਦਿਂ ਕਤ੍ਵਾ ਤਾਸਂ ਗੇਹਂ ਗਤਕਾਲੇ ਤਾਪਿ ਨਂ ਏਵਮੇਵ ਵਦਿਂਸੁ. ਸਾ ਅਵਮਾਨਪ੍ਪਤ੍ਤਾ ਹੁਤ੍ਵਾ ‘‘ਕਿਂ ਮੇ ਇਮੇਸਂ ਸਨ੍ਤਿਕੇ ਵੁਤ੍ਥੇਨ, ਭਿਕ੍ਖੁਨੀ ਹੁਤ੍ਵਾ ਜੀਵਿਸ੍ਸਾਮੀ’’ਤਿ ਭਿਕ੍ਖੁਨੀਉਪਸ੍ਸਯਂ ਗਨ੍ਤ੍ਵਾ ਪਬ੍ਬਜ੍ਜਂ ਯਾਚਿ, ਤਾ ਨਂ ਪਬ੍ਬਾਜੇਸੁਂ. ਇਮਮੇਵ ਵਤ੍ਥੁਂ ਦਸ੍ਸੇਨ੍ਤੋ ‘‘ਬਹੁਪੁਤ੍ਤਿਕਸੋਣਾ ਤੇਸਂ ਅਤ੍ਤਨਿ ਅਗਾਰਵਭਾਵਂ ਞਤ੍ਵਾ ‘ਘਰਾਵਾਸੇਨ ਕਿਂ ਕਰਿਸ੍ਸਾਮੀ’ਤਿ ਨਿਕ੍ਖਮਿਤ੍ਵਾ ਪਬ੍ਬਜੀ’’ਤਿ ਆਹ.

ਵਿਹਾਰਂ ਗਚ੍ਛਨ੍ਤਿਯੋਤਿ ਭਿਕ੍ਖੁਵਿਹਾਰਂ ਗਚ੍ਛਨ੍ਤਿਯੋ. ਧਮ੍ਮਮੁਤ੍ਤਮਨ੍ਤਿ ਨਵਵਿਧਲੋਕੁਤ੍ਤਰਧਮ੍ਮਂ. ਸੋ ਹਿ ਉਤ੍ਤਮਧਮ੍ਮੋ ਨਾਮ ਯੋ ਹਿ ਤਂ ਨ ਪਸ੍ਸਤਿ, ਤਸ੍ਸ ਵਸ੍ਸਸਤਮ੍ਪਿ ਜੀਵਨਤੋ ਤਂ ਧਮ੍ਮਂ ਪਸ੍ਸਨ੍ਤਸ੍ਸ ਪਟਿਵਿਜ੍ਝਨ੍ਤਸ੍ਸ ਏਕਾਹਮ੍ਪਿ ਏਕਕ੍ਖਣਮ੍ਪਿ ਜੀਵਿਤਂ ਸੇਯ੍ਯੋ. ਆਗਨ੍ਤੁਕਜਨੋਤਿ ਵਿਹਾਰਗਤਂ ਭਿਕ੍ਖੁਨੀਜਨਂ ਸਨ੍ਧਾਯ ਵਦਤਿ. ਅਨੁਪਧਾਰੇਤ੍ਵਾਤਿ ਅਸਲ੍ਲਕ੍ਖੇਤ੍ਵਾ.

ਬਕੁਲਾਥੇਰੀਵਤ੍ਥੁ

੨੪੨. ਅਟ੍ਠਮਂ ਉਤ੍ਤਾਨਤ੍ਥਮੇਵ.

ਕੁਣ੍ਡਲਕੇਸਾਥੇਰੀਵਤ੍ਥੁ

੨੪੩. ਨਵਮੇ ਚਤੁਕ੍ਕੇਤਿ ਵੀਥਿਚਤੁਕ੍ਕੇ. ਚਤੁਨ੍ਨਂ ਸਮਾਹਾਰੋ ਚਤੁਕ੍ਕਂ. ਚਾਰਕਤੋਤਿ ਬਨ੍ਧਨਾਗਾਰਤੋ. ਉਬ੍ਬਟ੍ਟੇਤ੍ਵਾਤਿ ਉਦ੍ਧਰਿਤ੍ਵਾ.

ਮੁਹੁਤ੍ਤਮਪਿ ਚਿਨ੍ਤਯੇਤਿ ਮੁਹੁਤ੍ਤਂ ਤਙ੍ਖਣਮ੍ਪਿ ਠਾਨੁਪ੍ਪਤ੍ਤਿਕਪਞ੍ਞਾਯ ਤਙ੍ਖਣਾਨੁਰੂਪਂ ਅਤ੍ਥਂ ਚਿਨ੍ਤਿਤੁਂ ਸਕ੍ਕੁਣੇਯ੍ਯ. ਸਹਸ੍ਸਮਪਿ ਚੇ ਗਾਥਾ, ਅਨਤ੍ਥਪਦਸਂਹਿਤਾਤਿ ਅਯਂ ਗਾਥਾ ਦਾਰੁਚੀਰਿਯਤ੍ਥੇਰਸ੍ਸ ਭਗਵਤਾ ਭਾਸਿਤਾ, ਇਧਾਪਿ ਚ ਸਾਯੇਵ ਗਾਥਾ ਦਸ੍ਸਿਤਾ. ਥੇਰਿਗਾਥਾਸਂਵਣ੍ਣਨਾਯਂ ਆਚਰਿਯਧਮ੍ਮਪਾਲਤ੍ਥੇਰੇਨਪਿ ਕੁਣ੍ਡਲਕੇਸਿਤ੍ਥੇਰਿਯਾ ਵਤ੍ਥੁਮ੍ਹਿ ਅਯਮੇਵ ਗਾਥਾ ਵੁਤ੍ਤਾ. ਧਮ੍ਮਪਦਟ੍ਠਕਥਾਯਂ ਪਨ ਕੁਣ੍ਡਲਕੇਸਿਤ੍ਥੇਰਿਯਾ ਵਤ੍ਥੁਮ੍ਹਿ –

‘‘ਯੋ ਚ ਗਾਥਾਸਤਂ ਭਾਸੇ, ਅਨਤ੍ਥਪਦਸਂਹਿਤਾ;

ਏਕਂ ਧਮ੍ਮਪਦਂ ਸੇਯ੍ਯੋ, ਯਂ ਸੁਤ੍ਵਾ ਉਪਸਮ੍ਮਤੀ’’ਤਿ. (ਧ. ਪ. ਅਟ੍ਠ. ੧.੧੦੨) –

ਅਯਂ ਗਾਥਾ ਆਗਤਾ. ਤਂਤਂਭਾਣਕਾਨਂ ਕਥਾਮਗ੍ਗਾਨੁਸਾਰੇਨ ਤਤ੍ਥ ਤਤ੍ਥ ਤਥਾ ਵੁਤ੍ਤਨ੍ਤਿ ਨ ਇਧ ਆਚਰਿਯਸ੍ਸ ਪੁਬ੍ਬਾਪਰਵਿਰੋਧੋ ਸਙ੍ਕਿਤਬ੍ਬੋ.

ਭਦ੍ਦਾਕਾਪਿਲਾਨੀਥੇਰੀ-ਭਦ੍ਦਾਕਚ੍ਚਾਨਾਥੇਰੀਵਤ੍ਥੁ

੨੪੪-੨੪੫. ਦਸਮਂ ਏਕਾਦਸਮਞ੍ਚ ਉਤ੍ਤਾਨਤ੍ਥਮੇਵ.

ਕਿਸਾਗੋਤਮੀਥੇਰੀਵਤ੍ਥੁ

੨੪੬. ਦ੍ਵਾਦਸਮੇ ਤੀਹਿ ਲੂਖੇਹੀਤਿ ਵਤ੍ਥਲੂਖਸੁਤ੍ਤਲੂਖਰਜਨਲੂਖਸਙ੍ਖਾਤੇਹਿ ਤੀਹਿ ਲੂਖੇਹਿ. ਸਿਦ੍ਧਤ੍ਥਕਨ੍ਤਿ ਸਾਸਪਬੀਜਂ.

ਤਂ ਪੁਤ੍ਤਪਸੁਸਮ੍ਮਤ੍ਤਨ੍ਤਿ ਤਂ ਰੂਪਬਲਾਦਿਸਮ੍ਪਨ੍ਨੇ ਪੁਤ੍ਤੇ ਚ ਪਸੂ ਚ ਲਭਿਤ੍ਵਾ ‘‘ਮਮ ਪੁਤ੍ਤਾ ਅਭਿਰੂਪਾ ਬਲਸਮ੍ਪਨ੍ਨਾ ਪਣ੍ਡਿਤਾ ਸਬ੍ਬਕਿਚ੍ਚਸਮਤ੍ਥਾ, ਮਮ ਗੋਣੋ ਅਰੋਗੋ ਅਭਿਰੂਪੋ ਮਹਾਭਾਰਵਹੋ, ਮਮ ਗਾਵੀ ਬਹੁਖੀਰਾ’’ਤਿ ਏਵਂ ਪੁਤ੍ਤੇਹਿ ਚ ਪਸੂਹਿ ਚ ਸਮ੍ਮਤ੍ਤਂ ਨਰਂ. ਬ੍ਯਾਸਤ੍ਤਮਨਸਨ੍ਤਿ ਚਕ੍ਖੁਵਿਞ੍ਞੇਯ੍ਯਾਦੀਸੁ ਆਰਮ੍ਮਣੇਸੁ ਹਿਰਞ੍ਞਸੁਵਣ੍ਣਾਦੀਸੁ ਪਤ੍ਤਚੀਵਰਾਦੀਸੁ ਵਾ ਯਂ ਯਂ ਲਦ੍ਧਂ ਹੋਤਿ, ਤਤ੍ਥ ਤਤ੍ਥੇਵ ਲਗ੍ਗਨਾਯ ਸਤ੍ਤਮਾਨਸਂ. ਸੁਤ੍ਤਂ ਗਾਮਨ੍ਤਿ ਨਿਦ੍ਦਂ ਉਪਗਤਂ ਸਤ੍ਤਕਾਯਂ. ਮਹੋਘੋਵਾਤਿ ਯਥਾ ਏਵਰੂਪਂ ਗਾਮਂ ਗਮ੍ਭੀਰਤੋ ਵਿਤ੍ਥਾਰਤੋ ਚ ਮਹਨ੍ਤੋ ਮਹਾਨਦਿਓਘੋ ਅਨ੍ਤਮਸੋ ਸੁਨਖਮ੍ਪਿ ਅਸੇਸੇਤ੍ਵਾ ਸਬ੍ਬਂ ਆਦਾਯ ਗਚ੍ਛਤਿ, ਏਵਂ ਵੁਤ੍ਤਪ੍ਪਕਾਰਂ ਨਰਂ ਮਚ੍ਚੁ ਆਦਾਯ ਗਚ੍ਛਤੀਤਿ ਅਤ੍ਥੋ. ਅਮਤਂ ਪਦਨ੍ਤਿ ਮਰਣਰਹਿਤਂ ਕੋਟ੍ਠਾਸਂ, ਅਮਤਂ ਮਹਾਨਿਬ੍ਬਾਨਨ੍ਤਿ ਅਤ੍ਥੋ. ਸੇਸਮੇਤ੍ਥ ਉਤ੍ਤਾਨਮੇਵ.

ਸਿਙ੍ਗਾਲਕਮਾਤਾਥੇਰੀਵਤ੍ਥੁ

੨੪੭. ਤੇਰਸਮਂ ਉਤ੍ਤਾਨਤ੍ਥਮੇਵ.

(ਪਞ੍ਚਮਏਤਦਗ੍ਗਵਗ੍ਗਵਣ੍ਣਨਾ ਨਿਟ੍ਠਿਤਾ.)

ਥੇਰਿਪਾਲ਼ਿਸਂਵਣ੍ਣਨਾ ਨਿਟ੍ਠਿਤਾ.