੧੪. ਏਤਦਗ੍ਗਵਗ੍ਗੋ
(੧੪) ੪. ਚਤੁਤ੍ਥਏਤਦਗ੍ਗਵਗ੍ਗਵਣ੍ਣਨਾ
ਆਨਨ੍ਦਤ੍ਥੇਰਵਤ੍ਥੁ
੨੧੯-੨੨੩. ਚਤੁਤ੍ਥਵਗ੍ਗਸ੍ਸ ਪਠਮੇ ਹੇਟ੍ਠਾ ਵੁਤ੍ਤਪ੍ਪਮਾਣਨ੍ਤਿ ਹੇਟ੍ਠਾ ਕੋਣ੍ਡਞ੍ਞਤ੍ਥੇਰਸ੍ਸ ਵਤ੍ਥੁਮ੍ਹਿ ‘‘ਤਸ੍ਸ ਧੁਰਪਤ੍ਤਾਨਿ ਨਵੁਤਿਹਤ੍ਥਾਨਿ ਹੋਨ੍ਤਿ, ਕੇਸਰਂ ਤਿਂਸਹਤ੍ਥਂ, ਕਣ੍ਣਿਕਾ ਦ੍ਵਾਦਸਹਤ੍ਥਾ, ਪਾਦੇਨ ਪਤਿਟ੍ਠਿਤਟ੍ਠਾਨਂ ਏਕਾਦਸਹਤ੍ਥ’’ਨ੍ਤਿ ਏਵਂ ਵੁਤ੍ਤਪ੍ਪਮਾਣਂ. ਰਞ੍ਞੋ ਪੇਸੇਸੀਤਿ ਪਚ੍ਚਨ੍ਤਸ੍ਸ ਕੁਪਿਤਭਾਵਂ ਆਰੋਚੇਤ੍ਵਾ ਪੇਸੇਸਿ. ਥੇਰਗਾਥਾਸਂਵਣ੍ਣਨਾਯਂ (ਥੇਰਗਾ. ਅਟ੍ਠ. ੨.੧੦੧੬ ਆਨਨ੍ਦਤ੍ਥੇਰਗਾਥਾਵਣ੍ਣਨਾ) ਪਨ ‘‘ਪਚ੍ਚਨ੍ਤਸ੍ਸ ਕੁਪਿਤਭਾਵਂ ਰਞ੍ਞੋ ਅਨਾਰੋਚੇਤ੍ਵਾ ਸਯਮੇਵ ਤਂ ਵੂਪਸਮੇਸਿ, ਤਂ ਸੁਤ੍ਵਾ ਰਾਜਾ ਤੁਟ੍ਠਮਾਨਸੋ ਪੁਤ੍ਤਂ ਪਕ੍ਕੋਸਾਪੇਤ੍ਵਾ ‘ਵਰਂ ਤੇ, ਸੁਮਨ, ਦਮ੍ਮਿ, ਗਣ੍ਹਾਹੀ’ਤਿ ਆਹਾ’’ਤਿ ਵੁਤ੍ਤਂ. ਨ ਮੇਤਂ ਚਿਤ੍ਤਂ ਅਤ੍ਥੀਤਿ ਮਮ ਏਵਰੂਪਂ ਚਿਤ੍ਤਂ ਨਤ੍ਥਿ. ਅਵਞ੍ਝਨ੍ਤਿ ਅਤੁਚ੍ਛਂ. ਅਞ੍ਞਂ ਵਰੇਹੀਤਿ ਅਞ੍ਞਂ ਪਤ੍ਥੇਹਿ, ਅਞ੍ਞਂ ਗਣ੍ਹਾਹੀਤਿ ਵੁਤ੍ਤਂ ਹੋਤਿ. ਉਦਕਂ ਅਧਿਟ੍ਠਾਯਾਤਿ ‘‘ਉਦਕਂ ਹੋਤੂ’’ਤਿ ਅਧਿਟ੍ਠਹਿਤ੍ਵਾ. ਗਤੇਨਾਤਿ ਗਮਨੇਨ. ਨ ਆਮਿਸਚਕ੍ਖੁਕਾਤਿ ਚੀਵਰਾਦਿਪਚ੍ਚਯਸਙ੍ਖਾਤਂ ਆਮਿਸਂ ਨ ਓਲੋਕੇਨ੍ਤਿ.
ਵਸਨਟ੍ਠਾਨਸਭਾਗੇਯੇਵਾਤਿ ਵਸਨਟ੍ਠਾਨਸਮੀਪੇਯੇਵ. ਏਕਨ੍ਤਵਲ੍ਲਭੋਤਿ ਉਪਟ੍ਠਾਕਟ੍ਠਾਨੇ ਏਕਨ੍ਤੇਨ ਵਲ੍ਲਭੋ. ਏਤਸ੍ਸੇਵਾਤਿ ਏਤਸ੍ਸੇਵ ਭਿਕ੍ਖੁਸ੍ਸ. ਦ੍ਵੇਜ੍ਝਕਥਾ ਨ ਹੋਨ੍ਤੀਤਿ ਦ੍ਵਿਧਾਭੂਤਕਥਾ ਨ ਹੋਨ੍ਤਿ, ਅਨੇਕਨ੍ਤਿਕਕਥਾ ਨ ਹੋਨ੍ਤੀਤਿ ਵੁਤ੍ਤਂ ਹੋਤਿ. ਅਨਿਬਦ੍ਧਾਤਿ ਅਨਿਯਤਾ. ਲੋਹਿਤੇਨ ਗਲਨ੍ਤੇਨਾਤਿ ਇਤ੍ਥਮ੍ਭੂਤਕ੍ਖਾਨੇ ਕਰਣਵਚਨਂ, ਗਲਨ੍ਤੇਨ ਲੋਹਿਤੇਨ ਯੁਤ੍ਤੋਤਿ ਅਤ੍ਥੋ. ਅਨ੍ਵਾਸਤ੍ਤੋਤਿ ਅਨੁਗਤੋ. ਉਟ੍ਠੇਹਿ, ਆਵੁਸੋ ਆਨਨ੍ਦ, ਉਟ੍ਠੇਹਿ, ਆਵੁਸੋ ਆਨਨ੍ਦਾਤਿ ਤੁਰਿਤੇ ਇਦਮਾਮੇਡਿਤਵਚਨਂ. ਦੁਵਿਧੇਨ ਉਦਕੇਨਾਤਿ ਸੀਤੁਦਕੇਨ ਉਣ੍ਹੁਦਕੇਨ ਚ. ਤਿਵਿਧੇਨ ਦਨ੍ਤਕਟ੍ਠੇਨਾਤਿ ਖੁਦ੍ਦਕਂ ਮਹਨ੍ਤਂ ਮਜ੍ਝਿਮਨ੍ਤਿ ਏਵਂ ਤਿਪ੍ਪਕਾਰੇਨ ਦਨ੍ਤਕਟ੍ਠੇਨ. ਨਵ ਵਾਰੇ ਅਨੁਪਰਿਯਾਯਤੀਤਿ ਸਤ੍ਥਰਿ ਪਕ੍ਕੋਸਨ੍ਤੇ ਪਟਿਵਚਨਦਾਨਾਯ ਥਿਨਮਿਦ੍ਧਵਿਨੋਦਨਤ੍ਥਂ ਨਵਕ੍ਖਤ੍ਤੁਂ ਅਨੁਪਰਿਯਾਯਤਿ. ਤੇਨੇਵਾਹ – ‘‘ਏਵਞ੍ਹਿਸ੍ਸ ਅਹੋਸੀ’’ਤਿਆਦਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.
ਉਰੁਵੇਲਕਸ੍ਸਪਤ੍ਥੇਰਵਤ੍ਥੁ
੨੨੪. ਦੁਤਿਯੇ ਯਂ ਵਤ੍ਤਬ੍ਬਂ, ਤਂ ਵਿਤ੍ਥਾਰਤੋ ਵਿਨਯਪਾਲ਼ਿਯਂ ਆਗਤਮੇਵ.
ਕਾਲ਼ੁਦਾਯਿਤ੍ਥੇਰਵਤ੍ਥੁ
੨੨੫. ਤਤਿਯੇ ਗਮਨਾਕਪ੍ਪਨ੍ਤਿ ਗਮਨਾਕਾਰਂ. ਸੇਸਮੇਤ੍ਥ ਉਤ੍ਤਾਨਮੇਵ.
ਬਾਕੁਲਤ੍ਥੇਰਵਤ੍ਥੁ
੨੨੬. ਚਤੁਤ੍ਥੇ ਨਿਰਾਬਾਧਾਨਨ੍ਤਿ ਆਬਾਧਰਹਿਤਾਨਂ. ਯਥਾ ‘‘ਦ੍ਵਾਵੀਸਤਿ ਦ੍ਵਤ੍ਤਿਂਸਾ’’ਤਿਆਦਿਮ੍ਹਿ ਵਤ੍ਤਬ੍ਬੇ ‘‘ਬਾਵੀਸਤਿ ਬਾਤ੍ਤਿਂਸਾ’’ਤਿਆਦੀਨਿ ਵੁਚ੍ਚਨ੍ਤਿ, ਏਵਮੇਵਂ ਦ੍ਵੇ ਕੁਲਾਨਿ ਅਸ੍ਸਾਤਿ ਦ੍ਵਿਕੁਲੋ, ਦ੍ਵੇਕੁਲੋਤਿ ਵਾ ਵਤ੍ਤਬ੍ਬੇ ਬਾਕੁਲੋਤਿ ਵੁਤ੍ਤਨ੍ਤਿ ਆਹ – ‘‘ਬਾਕੁਲੋਤਿ ਦ੍ਵੀਸੁ ਕੁਲੇਸੁ ਵਡ੍ਢਿਤਤ੍ਤਾ ਏਵਂਲਦ੍ਧਨਾਮੋ’’ਤਿ. ਉਪਯੋਗੇਨਾਤਿ ਆਨੁਭਾਵੇਨ. ਫਾਸੁਕਕਾਲੇਤਿ ਅਰੋਗਕਾਲੇ. ਗਦ੍ਦੁਹਨਮਤ੍ਤਮ੍ਪੀਤਿ ਗੋਦੁਹਨਮਤ੍ਤਮ੍ਪਿ ਕਾਲਂ. ਇਧ ਪਨ ਨ ਸਕਲੋ ਗੋਦੁਹਨਕ੍ਖਣੋ ਅਧਿਪ੍ਪੇਤੋ, ਅਥ ਖੋ ਗਾਵਿਂ ਥਨੇ ਗਹੇਤ੍ਵਾ ਏਕਖੀਰਬਿਨ੍ਦੁਦੁਹਨਕਾਲਮਤ੍ਤਂ ਅਧਿਪ੍ਪੇਤਂ. ਆਰੋਗ੍ਯਸਾਲਨ੍ਤਿ ਆਤੁਰਾਨਂ ਅਰੋਗਭਾਵਕਰਣਤ੍ਥਾਯ ਕਤਸਾਲਂ.
ਨਿਮੁਜ੍ਜਨੁਮ੍ਮੁਜ੍ਜਨਵਸੇਨਾਤਿ ਜਾਣੁਪ੍ਪਮਾਣੇ ਉਦਕੇ ਥੋਕਂਯੇਵ ਨਿਮੁਜ੍ਜਨੁਮ੍ਮੁਜ੍ਜਨਵਸੇਨ. ਛਡ੍ਡੇਤ੍ਵਾ ਪਲਾਯੀਤਿ ਮਚ੍ਛਸ੍ਸ ਮੁਖਸਮੀਪੇਯੇਵ ਛਡ੍ਡੇਤ੍ਵਾ ਪਲਾਯਿ. ਦਾਰਕਸ੍ਸ ਤੇਜੇਨਾਤਿ ਦਾਰਕਸ੍ਸ ਪੁਞ੍ਞਤੇਜੇਨ. ਮਾਰਿਯਮਾਨਾਵ ਮਰਨ੍ਤੀਤਿ ਦਣ੍ਡਾਦੀਹਿ ਪੋਥੇਤ੍ਵਾ ਮਾਰਿਯਮਾਨਾਵ ਮਰਨ੍ਤਿ, ਨ ਜਾਲੇਨ ਬਦ੍ਧਤਾਮਤ੍ਤੇਨ ਅਮਾਰਿਯਮਾਨਾ. ਨੀਹਟਮਤ੍ਤੋਵ ਮਤੋਤਿ ਨੀਹਟਕ੍ਖਣੇਯੇਵ ਮਤੋ. ਤੇਨਸ੍ਸ ਮਾਰਣਤ੍ਥਂ ਉਪਕ੍ਕਮੋ ਨ ਕਤੋ, ਯੇਨ ਉਪਕ੍ਕਮੇਨ ਦਾਰਕਸ੍ਸ ਆਬਾਧੋ ਸਿਯਾ. ਤਨ੍ਤਿ ਮਚ੍ਛਂ. ਸਕਲਮੇਵਾਤਿ ਅਵਿਕਲਮੇਵ ਪਰਿਪੁਣ੍ਣਾਵਯਵਮੇਵ. ਨ ਕੇਲ਼ਾਯਤੀਤਿ ਨ ਨਨ੍ਦਤਿ, ਕਿਸ੍ਮਿਞ੍ਚਿ ਨ ਮਞ੍ਞਤਿ. ਪਿਟ੍ਠਿਤੋ ਫਾਲੇਨ੍ਤੀਤਿ ਦਾਰਕਸ੍ਸ ਪੁਞ੍ਞਤੇਜੇਨ ਪਿਟ੍ਠਿਤੋ ਫਾਲੇਨ੍ਤੀ. ਭੇਰਿਂ ਚਰਾਪੇਤ੍ਵਾਤਿ ‘‘ਪੁਤ੍ਤਂ ਲਭਿ’’ਨ੍ਤਿ ਉਗ੍ਘੋਸਨਵਸੇਨ ਭੇਰਿਂ ਚਰਾਪੇਤ੍ਵਾ. ਪਕਤਿਂ ਆਚਿਕ੍ਖੀਤਿ ਅਤ੍ਤਨੋ ਪੁਤ੍ਤਭਾਵਂ ਕਥੇਸਿ. ਕੁਚ੍ਛਿਯਾ ਧਾਰਿਤਤ੍ਤਾ ਅਮਾਤਾ ਕਾਤੁਂ ਨ ਸਕ੍ਕਾਤਿ ਜਨਨੀਭਾਵਤੋ ਅਮਾਤਾ ਕਾਤੁਂ ਨ ਸਕ੍ਕਾ. ਮਚ੍ਛਂ ਗਣ੍ਹਨ੍ਤਾਪੀਤਿ ਮਚ੍ਛਂ ਵਿਕ੍ਕਿਣਿਤ੍ਵਾ ਗਣ੍ਹਨ੍ਤਾਪਿ. ਤਥਾ ਗਣ੍ਹਨ੍ਤਾ ਚ ਤਪ੍ਪਰਿਯਾਪਨ੍ਨਂ ਸਬ੍ਬਂ ਗਣ੍ਹਨ੍ਤਿ ਨਾਮਾਤਿ ਆਹ – ‘‘ਵਕ੍ਕਯਕਨਾਦੀਨਿ ਬਹਿ ਕਤ੍ਵਾ ਗਣ੍ਹਨ੍ਤਾ ਨਾਮ ਨਤ੍ਥੀ’’ਤਿ. ਅਯਮ੍ਪਿ ਅਮਾਤਾ ਕਾਤੁਂ ਨ ਸਕ੍ਕਾਤਿ ਦਿਨ੍ਨਪੁਤ੍ਤਭਾਵਤੋ ਨ ਸਕ੍ਕਾ.
ਸੋਭਿਤਤ੍ਥੇਰਵਤ੍ਥੁ
੨੨੭. ਪਞ੍ਚਮਂ ਉਤ੍ਤਾਨਤ੍ਥਮੇਵ.
ਉਪਾਲਿਤ੍ਥੇਰਵਤ੍ਥੁ
੨੨੮. ਛਟ੍ਠੇ ਭਾਰੁਕਚ੍ਛਕਵਤ੍ਥੁਨ੍ਤਿ ਅਞ੍ਞਤਰੋ ਕਿਰ ਭਾਰੁਕਚ੍ਛਦੇਸਵਾਸੀ ਭਿਕ੍ਖੁ ਸੁਪਿਨਨ੍ਤੇ ਪੁਰਾਣਦੁਤਿਯਿਕਾਯ ਮੇਥੁਨਂ ਧਮ੍ਮਂ ਪਟਿਸੇਵਿਤ੍ਵਾ ‘‘ਅਸ੍ਸਮਣੋ ਅਹਂ ਵਿਬ੍ਭਮਿਸ੍ਸਾਮੀ’’ਤਿ ਭਾਰੁਕਚ੍ਛਂ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਆਯਸ੍ਮਨ੍ਤਂ ਉਪਾਲਿਂ ਪਸ੍ਸਿਤ੍ਵਾ ਏਤਮਤ੍ਥਂ ਆਰੋਚੇਸਿ. ਆਯਸ੍ਮਾ ਉਪਾਲਿ, ਏਵਮਾਹ – ‘‘ਅਨਾਪਤ੍ਤਿ, ਆਵੁਸੋ, ਸੁਪਿਨਨ੍ਤੇਨਾ’’ਤਿ. ਯਸ੍ਮਾ ਸੁਪਿਨਨ੍ਤੇ ਅਵਿਸਯਤ੍ਤਾ ਏਵਂ ਹੋਤਿ. ਤਸ੍ਮਾ ਉਪਾਲਿਤ੍ਥੇਰੋ ਭਗਵਤਾ ਅਵਿਨਿਚ੍ਛਿਤਪੁਬ੍ਬਮ੍ਪਿ ਇਮਂ ਵਤ੍ਥੁਂ ਨਯਗ੍ਗਾਹੇਨ ਏਵਂ ਵਿਨਿਚ੍ਛਿਨਿ. ਗਹਪਤਿਨੋ ਦ੍ਵੇ ਦਾਰਕਾ ਹੋਨ੍ਤਿ ਪੁਤ੍ਤੋ ਚ ਭਾਗਿਨੇਯ੍ਯੋ ਚ. ਅਥ ਸੋ ਗਹਪਤਿ ਗਿਲਾਨੋ ਹੁਤ੍ਵਾ ਆਯਸ੍ਮਨ੍ਤਂ ਅਜ੍ਜੁਕਂ ਏਤਦਵੋਚ – ‘‘ਇਮਂ, ਭਨ੍ਤੇ, ਓਕਾਸਂ ਯੋ ਇਮੇਸਂ ਦਾਰਕਾਨਂ ਸਦ੍ਧੋ ਹੋਤਿ ਪਸਨ੍ਨੋ, ਤਸ੍ਸ ਆਚਿਕ੍ਖੇਯ੍ਯਾਸੀ’’ਤਿ. ਤੇਨ ਚ ਸਮਯੇਨ ਤਸ੍ਸ ਚ ਗਹਪਤਿਨੋ ਭਾਗਿਨੇਯ੍ਯੋ ਸਦ੍ਧੋ ਹੋਤਿ ਪਸਨ੍ਨੋ. ਅਥਾਯਸ੍ਮਾ ਅਜ੍ਜੁਕੋ ਤਂ ਓਕਾਸਂ ਤਸ੍ਸ ਦਾਰਕਸ੍ਸ ਆਚਿਕ੍ਖਿ. ਸੋ ਤੇਨ ਸਾਪਤੇਯ੍ਯੇਨ ਕੁਟੁਮ੍ਬਞ੍ਚ ਸਣ੍ਠਪੇਸਿ, ਦਾਨਞ੍ਚ ਪਟ੍ਠਪੇਸਿ. ਅਥ ਤਸ੍ਸ ਗਹਪਤਿਨੋ ਪੁਤ੍ਤੋ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ ਆਨਨ੍ਦ, ਪਿਤੁਨੋ ਦਾਯਜ੍ਜੋ ਪੁਤ੍ਤੋ ਵਾ ਭਾਗਿਨੇਯ੍ਯੋ ਵਾ’’ਤਿ. ਪੁਤ੍ਤੋ ਖੋ, ਆਵੁਸੋ, ਪਿਤੁਨੋ ਦਾਯਜ੍ਜੋਤਿ. ਆਯਸ੍ਮਾ, ਭਨ੍ਤੇ, ਅਯ੍ਯੋ ਅਜ੍ਜੁਕੋ ਅਮ੍ਹਾਕਂ ਸਾਪਤੇਯ੍ਯਂ ਅਮ੍ਹਾਕਂ ਮੇਥੁਨਕਸ੍ਸ ਆਚਿਕ੍ਖੀਤਿ. ਅਸ੍ਸਮਣੋ, ਆਵੁਸੋ, ਸੋ ਅਜ੍ਜੁਕੋਤਿ. ਅਥਾਯਸ੍ਮਾ ਅਜ੍ਜੁਕੋ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚ – ‘‘ਦੇਹਿ ਮੇ, ਆਵੁਸੋ ਆਨਨ੍ਦ, ਵਿਨਿਚ੍ਛਯ’’ਨ੍ਤਿ. ਤੇ ਉਭੋਪਿ ਉਪਾਲਿਤ੍ਥੇਰਸ੍ਸ ਸਨ੍ਤਿਕਂ ਅਗਮਂਸੁ. ਅਥਾਯਸ੍ਮਾ ਉਪਾਲਿ, ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚ – ‘‘ਯੋ ਨੁ ਖੋ, ਆਵੁਸੋ ਆਨਨ੍ਦ, ਸਾਮਿਕੇਨ ‘ਇਮਂ ਓਕਾਸਂ ਇਤ੍ਥਨ੍ਨਾਮਸ੍ਸ ਆਚਿਕ੍ਖਾ’ਤਿ ਵੁਤ੍ਤੋ, ਤਸ੍ਸ ਆਚਿਕ੍ਖਤਿ, ਕਿਂ ਸੋ ਆਪਜ੍ਜਤੀ’’ਤਿ? ਨ, ਭਨ੍ਤੇ, ਕਿਞ੍ਚਿ ਆਪਜ੍ਜਤਿ ਅਨ੍ਤਮਸੋ ਦੁਕ੍ਕਟਮਤ੍ਥਮ੍ਪੀਤਿ. ਅਯਂ, ਆਵੁਸੋ, ਆਯਸ੍ਮਾ ਅਜ੍ਜੁਕੋ ਸਾਮਿਕੇਨ ‘‘ਇਮਂ ਓਕਾਸਂ ਇਤ੍ਥਨ੍ਨਾਮਸ੍ਸ ਆਚਿਕ੍ਖਾ’’ਤਿ ਵੁਤ੍ਤੋ ਤਸ੍ਸ ਆਚਿਕ੍ਖਤਿ, ਅਨਾਪਤ੍ਤਿ, ਆਵੁਸੋ, ਆਯਸ੍ਮਤੋ ਅਜ੍ਜੁਕਸ੍ਸਾਤਿ. ਭਗਵਾ ਤਂ ਸੁਤ੍ਵਾ ‘‘ਸੁਕਥਿਤਂ, ਭਿਕ੍ਖਵੇ, ਉਪਾਲਿਨਾ’’ਤਿ ਵਤ੍ਵਾ ਸਾਧੁਕਾਰਮਦਾਸਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਕੁਮਾਰਕਸ੍ਸਪਵਤ੍ਥੁ (ਅ. ਨਿ. ਅਟ੍ਠ. ੧.੧.੨੧੭) ਪਨ ਹੇਟ੍ਠਾ ਆਗਤਮੇਵ.
ਛਨ੍ਨਂ ਖਤ੍ਤਿਯਾਨਨ੍ਤਿ ਭਦ੍ਦਿਯੋ ਸਕ੍ਯਰਾਜਾ ਅਨੁਰੁਦ੍ਧੋ ਆਨਨ੍ਦੋ ਭਗੁ ਕਿਮਿਲੋ ਦੇਵਦਤ੍ਤੋਤਿ ਇਮੇਸਂ ਛਨ੍ਨਂ ਖਤ੍ਤਿਯਾਨਂ. ਪਸਾਧਕੋਤਿ ਮਣ੍ਡਯਿਤਾ. ਪਾਲ਼ਿਯਨ੍ਤਿ ਸਙ੍ਘਭੇਦਕ੍ਖਨ੍ਧਕਪਾਲ਼ਿਯਨ੍ਤਿ (ਚੂਲ਼ਵ. ੩੩੦ ਆਦਯੋ).
ਨਨ੍ਦਕਤ੍ਥੇਰਵਤ੍ਥੁ
੨੨੯. ਸਤ੍ਤਮੇ ਏਕਸਮੋਧਾਨੇਤਿ ਏਕਸ੍ਮਿਂ ਸਮੋਧਾਨੇ, ਏਕਸ੍ਮਿਂ ਸਨ੍ਨਿਪਾਤੇਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਨਨ੍ਦਤ੍ਥੇਰਵਤ੍ਥੁ
੨੩੦. ਅਟ੍ਠਮੇ ਨ ਤਂ ਚਤੁਸਮ੍ਪਜਞ੍ਞਵਸੇਨ ਅਪਰਿਚ੍ਛਿਨ੍ਦਿਤ੍ਵਾ ਓਲੋਕੇਤੀਤਿ ਸਾਤ੍ਥਕਸਪ੍ਪਾਯਗੋਚਰਅਸਮ੍ਮੋਹਸਮ੍ਪਜਞ੍ਞਸਙ੍ਖਾਤਾਨਂ ਚਤੁਨ੍ਨਂ ਸਮ੍ਪਜਞ੍ਞਾਨਂ ਵਸੇਨ ਅਪਰਿਚ੍ਛਿਨ੍ਦਿਤ੍ਵਾ ਤਂ ਦਿਸਂ ਨ ਓਲੋਕੇਤਿ. ਸੋ ਹਿ ਆਯਸ੍ਮਾ ‘‘ਯਮੇਵਾਹਂ ਇਨ੍ਦ੍ਰਿਯੇਸੁ ਅਗੁਤ੍ਤਦ੍ਵਾਰਤਂ ਨਿਸ੍ਸਾਯ ਸਾਸਨੇ ਅਨਭਿਰਤਿਆਦਿਵਿਪ੍ਪਕਾਰਪ੍ਪਤ੍ਤੋ, ਤਮੇਵ ਸੁਟ੍ਠੁ ਨਿਗ੍ਗਹੇਸ੍ਸਾਮੀ’’ਤਿ ਉਸ੍ਸਾਹਜਾਤੋ ਬਲਵਹਿਰੋਤ੍ਤਪ੍ਪੋ, ਤਤ੍ਥ ਚ ਕਤਾਧਿਕਾਰਤ੍ਤਾ ਇਨ੍ਦ੍ਰਿਯਸਂਵਰੋ ਉਕ੍ਕਂਸਪਾਰਮਿਪ੍ਪਤ੍ਤੋ ਚਤੁਸਮ੍ਪਜਞ੍ਞਂ ਅਮੁਞ੍ਚਿਤ੍ਵਾਵ ਸਬ੍ਬਦਿਸਂ ਆਲੋਕੇਤਿ. ਵੁਤ੍ਤਞ੍ਚੇਤਂ ਭਗਵਤਾ –
‘‘ਸਚੇ, ਭਿਕ੍ਖਵੇ, ਨਨ੍ਦਸ੍ਸ ਪੁਰਤ੍ਥਿਮਾ ਦਿਸਾ ਆਲੋਕੇਤਬ੍ਬਾ ਹੋਤਿ, ਸਬ੍ਬਂ ਚੇਤਸੋ ਸਮਨ੍ਨਾਹਰਿਤ੍ਵਾ ਨਨ੍ਦੋ ਪੁਰਤ੍ਥਿਮਂ ਦਿਸਂ ਆਲੋਕੇਤਿ ‘ਏਵਂ ਮੇ ਪੁਰਤ੍ਥਿਮਂ ਦਿਸਂ ਆਲੋਕਯਤੋ ਨਾਭਿਜ੍ਝਾਦੋਮਨਸ੍ਸਾ ਪਾਪਕਾ ਅਕੁਸਲਾ ਧਮ੍ਮਾ ਅਨ੍ਵਾਸਵਿਸ੍ਸਨ੍ਤੀ’ਤਿ. ਇਤਿਹ ਤਤ੍ਥ ਸਮ੍ਪਜਾਨੋ ਹੋਤਿ. ਸਚੇ, ਭਿਕ੍ਖਵੇ, ਨਨ੍ਦਸ੍ਸ ਪਚ੍ਛਿਮਾ ਦਿਸਾ, ਉਤ੍ਤਰਾ ਦਿਸਾ, ਦਕ੍ਖਿਣਾ ਦਿਸਾ, ਉਦ੍ਧਂ, ਅਧੋ, ਅਨੁਦਿਸਾ ਅਨੁਵਿਲੋਕੇਤਬ੍ਬਾ ਹੋਤਿ, ਸਬ੍ਬਂ ਚੇਤਸੋ ਸਮਨ੍ਨਾਹਰਿਤ੍ਵਾ ਨਨ੍ਦੋ ਅਨੁਦਿਸਂ ਅਨੁਵਿਲੋਕੇਤਿ ‘ਏਵਂ ਮੇ ਅਨੁਦਿਸਂ ਅਨੁਵਿਲੋਕਯਤੋ…ਪੇ… ਸਮ੍ਪਜਾਨੋ ਹੋਤੀ’’’ਤਿ (ਅ. ਨਿ. ੮.੯).
ਅਭਿਸੇਕਗੇਹਪਵੇਸਨਆਵਾਹਮਙ੍ਗਲੇਸੁ ਵਤ੍ਤਮਾਨੇਸੂਤਿ ਇਧ ਤੀਣਿ ਮਙ੍ਗਲਾਨਿ ਵੁਤ੍ਤਾਨਿ, ਵਿਨਯਟ੍ਠਕਥਾਯਂ ਪਨ ‘‘ਤਂ ਦਿਵਸਮੇਵ ਨਨ੍ਦਕੁਮਾਰਸ੍ਸ ਕੇਸਵਿਸ੍ਸਜ੍ਜਨਂ, ਪਟ੍ਟਬਨ੍ਧੋ, ਘਰਮਙ੍ਗਲਂ, ਛਤ੍ਤਮਙ੍ਗਲਂ, ਆਵਾਹਮਙ੍ਗਲਨ੍ਤਿ ਪਞ੍ਚ ਮਙ੍ਗਲਾਨਿ ਹੋਨ੍ਤੀ’’ਤਿ ਵੁਤ੍ਤਂ. ਤਤ੍ਥ ਕੁਲਮਰਿਯਾਦਵਸੇਨ ਕੇਸੋਰੋਪਨਂ ਕੇਸਵਿਸ੍ਸਜ੍ਜਨਂ. ਯੁਵਰਾਜਪਟ੍ਟਬਨ੍ਧਨਂ ਪਟ੍ਟਬਨ੍ਧੋ. ਅਭਿਨਵਘਰਪ੍ਪਵੇਸਨਮਹੋ ਘਰਮਙ੍ਗਲਂ. ਵਿਵਾਹਕਰਣਮਹੋ ਆਵਾਹਮਙ੍ਗਲਂ. ਯੁਵਰਾਜਛਤ੍ਤਮਹੋ ਛਤ੍ਤਮਙ੍ਗਲਂ.
ਨਨ੍ਦਕੁਮਾਰਂ ਅਭਿਸੇਕਮਙ੍ਗਲਂ ਨ ਤਥਾ ਪੀਲ਼ੇਸਿ, ਯਥਾ ਜਨਪਦਕਲ੍ਯਾਣਿਯਾ ਵੁਤ੍ਤਵਚਨਨ੍ਤਿ ਅਜ੍ਝਾਹਰਿਤਬ੍ਬਂ. ਤਦੇਵ ਪਨ ਵਚਨਂ ਸਰੂਪਤੋ ਦਸ੍ਸੇਤੁਂ – ‘‘ਪਤ੍ਤਂ ਆਦਾਯ ਗਮਨਕਾਲੇ’’ਤਿਆਦਿ ਵੁਤ੍ਤਂ. ਜਨਪਦਕਲ੍ਯਾਣੀਤਿ ਜਨਪਦਮ੍ਹਿ ਕਲ੍ਯਾਣੀ ਉਤ੍ਤਮਾ ਛ ਸਰੀਰਦੋਸਰਹਿਤਾ ਪਞ੍ਚ ਕਲ੍ਯਾਣਸਮਨ੍ਨਾਗਤਾ. ਸਾ ਹਿ ਯਸ੍ਮਾ ਨਾਤਿਦੀਘਾ ਨਾਤਿਰਸ੍ਸਾ ਨਾਤਿਕਿਸਾ ਨਾਤਿਥੂਲਾ ਨਾਤਿਕਾਲ਼ੀ ਨਾਚ੍ਚੋਦਾਤਾਤਿ ਅਤਿਕ੍ਕਨ੍ਤਾ ਮਾਨੁਸਵਣ੍ਣਂ, ਅਸਮ੍ਪਤ੍ਤਾ ਦਿਬ੍ਬਵਣ੍ਣਂ, ਤਸ੍ਮਾ ਛ ਸਰੀਰਦੋਸਰਹਿਤਾ. ਛਵਿਕਲ੍ਯਾਣਂ ਮਂਸਕਲ੍ਯਾਣਂ ਨ੍ਹਾਰੁਕਲ੍ਯਾਣਂ ਅਟ੍ਠਿਕਲ੍ਯਾਣਂ ਵਯਕਲ੍ਯਾਣਨ੍ਤਿ ਇਮੇਹਿ ਪਨ ਕਲ੍ਯਾਣੇਹਿ ਸਮਨ੍ਨਾਗਤਤ੍ਤਾ ਪਞ੍ਚ ਕਲ੍ਯਾਣਸਮਨ੍ਨਾਗਤਾ ਨਾਮ. ਤਸ੍ਸਾ ਹਿ ਆਗਨ੍ਤੁਕੋਭਾਸਕਿਚ੍ਚਂ ਨਤ੍ਥਿ, ਅਤ੍ਤਨੋ ਸਰੀਰੋਭਾਸੇਨੇਵ ਦ੍ਵਾਦਸਹਤ੍ਥੇ ਠਾਨੇ ਆਲੋਕਂ ਕਰੋਤਿ, ਪਿਯਙ੍ਗੁਸਾਮਾ ਵਾ ਹੋਤਿ ਸੁਵਣ੍ਣਸਾਮਾ ਵਾ, ਅਯਮਸ੍ਸਾ ਛਵਿਕਲ੍ਯਾਣਤਾ. ਚਤ੍ਤਾਰੋ ਪਨਸ੍ਸਾ ਹਤ੍ਥਪਾਦਾ ਮੁਖਪਰਿਯੋਸਾਨਞ੍ਚ ਲਾਖਾਰਸਪਰਿਕਮ੍ਮਕਤਂ ਵਿਯ ਰਤ੍ਤਪਵਾਲ਼ਰਤ੍ਤਕਮ੍ਬਲਸਦਿਸਂ ਹੋਤਿ, ਅਯਮਸ੍ਸਾ ਮਂਸਕਲ੍ਯਾਣਤਾ. ਵੀਸਤਿ ਪਨ ਨਖਪਤ੍ਤਾਨਿ ਮਂਸਤੋ ਅਮੁਤ੍ਤਟ੍ਠਾਨੇ ਲਾਖਾਰਸਪੂਰਿਤਾਨਿ ਵਿਯ, ਮੁਤ੍ਤਟ੍ਠਾਨੇ ਖੀਰਧਾਰਾਸਦਿਸਾਨਿ ਹੋਨ੍ਤਿ, ਅਯਮਸ੍ਸਾ ਨ੍ਹਾਰੁਕਲ੍ਯਾਣਤਾ. ਦ੍ਵਤ੍ਤਿਂਸ ਦਨ੍ਤਾ ਸੁਫੁਸਿਤਾ ਸੁਧੋਤਵਜਿਰਪਨ੍ਤਿ ਵਿਯ ਖਾਯਨ੍ਤਿ, ਅਯਮਸ੍ਸਾ ਅਟ੍ਠਿਕਲ੍ਯਾਣਤਾ. ਵੀਸਂਵਸ੍ਸਸਤਿਕਾਪਿ ਸਮਾਨਾ ਸੋਲ਼ਸਵਸ੍ਸੁਦ੍ਦੇਸਿਕਾ ਵਿਯ ਹੋਤਿ ਨਿਪ੍ਪਲਿਤੇਨ, ਅਯਮਸ੍ਸਾ ਵਯਕਲ੍ਯਾਣਤਾ. ਇਤਿ ਇਮੇਹਿ ਪਞ੍ਚਹਿ ਕਲ੍ਯਾਣੇਹਿ ਸਮਨ੍ਨਾਗਤਤ੍ਤਾ ‘‘ਜਨਪਦਕਲ੍ਯਾਣੀ’’ਤਿ ਵੁਚ੍ਚਤਿ. ਤੁਵਟਨ੍ਤਿ ਸੀਘਂ.
ਇਮਸ੍ਮਿਂ ਠਾਨੇ ਨਿਵਤ੍ਤੇਸ੍ਸਤਿ, ਇਮਸ੍ਮਿਂ ਠਾਨੇ ਨਿਵਤ੍ਤੇਸ੍ਸਤੀਤਿ ਚਿਨ੍ਤੇਨ੍ਤਮੇਵਾਤਿ ਸੋ ਕਿਰ ਤਥਾਗਤੇ ਗਾਰਵਵਸੇਨ ‘‘ਪਤ੍ਤਂ ਵੋ, ਭਨ੍ਤੇ, ਗਣ੍ਹਥਾ’’ਤਿ ਵਤ੍ਤੁਂ ਅਵਿਸਹਨ੍ਤੋ ਏਵਂ ਚਿਨ੍ਤੇਸਿ – ‘‘ਸੋਪਾਨਸੀਸੇ ਪਤ੍ਤਂ ਗਣ੍ਹਿਸ੍ਸਤੀ’’ਤਿ. ਸਤ੍ਥਾ ਤਸ੍ਮਿਮ੍ਪਿ ਠਾਨੇ ਨ ਗਣ੍ਹਿ. ਇਤਰੋ ‘‘ਸੋਪਾਨਪਾਦਮੂਲੇ ਗਣ੍ਹਿਸ੍ਸਤੀ’’ਤਿ ਚਿਨ੍ਤੇਸਿ. ਸਤ੍ਥਾ ਤਤ੍ਥਾਪਿ ਨ ਗਣ੍ਹਿ. ਇਤਰੋ ‘‘ਰਾਜਙ੍ਗਣੇ ਗਣ੍ਹਿਸ੍ਸਤੀ’’ਤਿ ਚਿਨ੍ਤੇਸਿ. ਸਤ੍ਥਾ ਤਤ੍ਥਾਪਿ ਨ ਗਣ੍ਹਿ. ਏਵਂ ‘‘ਇਧ ਗਣ੍ਹਿਸ੍ਸਤਿ, ਏਤ੍ਥ ਗਣ੍ਹਿਸ੍ਸਤੀ’’ਤਿ ਚਿਨ੍ਤੇਨ੍ਤਮੇਵ ਸਤ੍ਥਾ ਵਿਹਾਰਂ ਨੇਤ੍ਵਾ ਪਬ੍ਬਾਜੇਸਿ.
ਮਹਾਕਪ੍ਪਿਨਤ੍ਥੇਰਵਤ੍ਥੁ
੨੩੧. ਨਵਮੇ ਸੁਤਵਿਤ੍ਤਕੋਤਿ ਧਮ੍ਮਸ੍ਸਵਨਪਿਯੋ. ਪਟਿਹਾਰਕਸ੍ਸਾਤਿ ਦੋਵਾਰਿਕਸ੍ਸ. ਸਚ੍ਚਕਾਰੇਨਾਤਿ ਸਚ੍ਚਕਿਰਿਯਾਯ. ਸਤ੍ਥਾ ‘‘ਉਪ੍ਪਲਵਣ੍ਣਾ ਆਗਚ੍ਛਤੂ’’ਤਿ ਚਿਨ੍ਤੇਸਿ. ਥੇਰੀ ਆਗਨ੍ਤ੍ਵਾ ਸਬ੍ਬਾ ਪਬ੍ਬਾਜੇਤ੍ਵਾ ਭਿਕ੍ਖੁਨੀਉਪਸ੍ਸਯਂ ਗਤਾਤਿ ਇਦਂ ਅਙ੍ਗੁਤ੍ਤਰਭਾਣਕਾਨਂ ਕਥਾਮਗ੍ਗਂ ਦਸ੍ਸੇਨ੍ਤੇਨ ਵੁਤ੍ਤਂ. ਤੇਨੇਵ ਧਮ੍ਮਪਦਟ੍ਠਕਥਾਯਂ (ਧ. ਪ. ਅਟ੍ਠ. ੧.ਮਹਾਕਪ੍ਪਿਨਤ੍ਥੇਰਵਤ੍ਥੁ) ਵੁਤ੍ਤਂ –
‘‘ਤਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤਾ ਪਬ੍ਬਜ੍ਜਂ ਯਾਚਿਂਸੁ. ਏਵਂ ਕਿਰ ਵੁਤ੍ਤੇ ਸਤ੍ਥਾ ਉਪ੍ਪਲਵਣ੍ਣਾਯ ਆਗਮਨਂ ਚਿਨ੍ਤੇਸੀਤਿ ਏਕਚ੍ਚੇ ਵਦਨ੍ਤਿ. ਸਤ੍ਥਾ ਪਨ ਤਾ ਉਪਾਸਿਕਾਯੋ ਆਹ – ‘ਸਾਵਤ੍ਥਿਂ ਗਨ੍ਤ੍ਵਾ ਭਿਕ੍ਖੁਨੀਉਪਸ੍ਸਯੇ ਪਬ੍ਬਾਜੇਥਾ’ਤਿ. ਤਾ ਅਨੁਪੁਬ੍ਬੇਨ ਜਨਪਦਚਾਰਿਕਂ ਚਰਮਾਨਾ ਅਨ੍ਤਰਾਮਗ੍ਗੇ ਮਹਾਜਨੇਨ ਅਭਿਹਟਸਕ੍ਕਾਰਸਮ੍ਮਾਨਾ ਪਦਸਾਵ ਵੀਸਯੋਜਨਸਤਿਕਂ ਮਗ੍ਗਂ ਗਨ੍ਤ੍ਵਾ ਭਿਕ੍ਖੁਨੀਉਪਸ੍ਸਯੇ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਂਸੂ’’ਤਿ.
ਧਮ੍ਮਪੀਤੀਤਿ ਧਮ੍ਮਪਾਯਕੋ, ਧਮ੍ਮਂ ਪਿਵਨ੍ਤੋਤਿ ਅਤ੍ਥੋ. ਧਮ੍ਮੋ ਚ ਨਾਮੇਸ ਨ ਸਕ੍ਕਾ ਭਾਜਨੇਨ ਯਾਗੁਆਦੀਨਿ ਵਿਯ ਪਾਤੁਂ, ਨਵਵਿਧਂ ਪਨ ਲੋਕੁਤ੍ਤਰਧਮ੍ਮਂ ਨਾਮਕਾਯੇਨ ਫੁਸਨ੍ਤੋ ਆਰਮ੍ਮਣਤੋ ਸਚ੍ਛਿਕਰੋਨ੍ਤੋ ਪਰਿਞ੍ਞਾਭਿਸਮਯਾਦੀਹਿ ਦੁਕ੍ਖਾਦੀਨਿ ਅਰਿਯਸਚ੍ਚਾਨਿ ਪਟਿਵਿਜ੍ਝਨ੍ਤੋ ਧਮ੍ਮਂ ਪਿਵਤਿ ਨਾਮ. ਸੁਖਂ ਸੇਤੀਤਿ ਦੇਸਨਾਮਤ੍ਤਮੇਤਂ, ਚਤੂਹਿਪਿ ਇਰਿਯਾਪਥੇਹਿ ਸੁਖਂ ਵਿਹਰਤੀਤਿ ਅਤ੍ਥੋ. ਵਿਪ੍ਪਸਨ੍ਨੇਨਾਤਿ ਅਨਾਵਿਲੇਨ ਨਿਰੁਪਕ੍ਕਿਲੇਸੇਨ. ਅਰਿਯਪ੍ਪਵੇਦਿਤੇਤਿ ਬੁਦ੍ਧਾਦੀਹਿ ਅਰਿਯੇਹਿ ਪਵੇਦਿਤੇ ਸਤਿਪਟ੍ਠਾਨਾਦਿਭੇਦੇ ਬੋਧਿਪਕ੍ਖਿਯਧਮ੍ਮੇ. ਸਦਾ ਰਮਤੀਤਿ ਏਵਰੂਪੋ ਧਮ੍ਮਪੀਤਿ ਵਿਪ੍ਪਸਨ੍ਨੇਨ ਚੇਤਸਾ ਵਿਹਰਨ੍ਤੋ ਪਣ੍ਡਿਚ੍ਚੇਨ ਸਮਨ੍ਨਾਗਤੋ ਸਦਾ ਰਮਤਿ ਅਭਿਰਮਤਿ. ਬਾਹਿਤਪਾਪਤ੍ਤਾ ‘‘ਬ੍ਰਾਹ੍ਮਣਾ’’ਤਿ ਥੇਰਂ ਆਲਪਤਿ.
ਸਾਗਤਤ੍ਥੇਰਵਤ੍ਥੁ
੨੩੨. ਦਸਮੇ ਛਬ੍ਬਗ੍ਗਿਯਾਨਂ ਵਚਨੇਨਾਤਿ ਕੋਸਮ੍ਬਿਕਾ ਕਿਰ ਉਪਾਸਕਾ ਆਯਸ੍ਮਨ੍ਤਂ ਸਾਗਤਂ ਉਪਸਙ੍ਕਮਿਤ੍ਵਾ ਅਭਿਵਾਦੇਤ੍ਵਾ ਏਕਮਨ੍ਤਂ ਠਿਤਾ ਏਵਮਾਹਂਸੁ – ‘‘ਕਿਂ, ਭਨ੍ਤੇ, ਅਯ੍ਯਾਨਂ ਦੁਲ੍ਲਭਞ੍ਚ ਮਨਾਪਞ੍ਚ, ਕਿਂ ਪਟਿਯਾਦੇਮਾ’’ਤਿ? ਏਵਂ ਵੁਤ੍ਤੇ ਛਬ੍ਬਗ੍ਗਿਯਾ ਭਿਕ੍ਖੂ ਕੋਸਮ੍ਬਿਕੇ ਉਪਾਸਕੇ ਏਤਦਵੋਚੁਂ – ‘‘ਅਤ੍ਥਾਵੁਸੋ ਕਾਪੋਤਿਕਾ, ਨਾਮ ਪਸਨ੍ਨਾ ਭਿਕ੍ਖੂਨਂ ਦੁਲ੍ਲਭਾ ਚ ਮਨਾਪਾ ਚ, ਤਂ ਪਟਿਯਾਦੇਥਾ’’ਤਿ. ਅਥ ਕੋਸਮ੍ਬਿਕਾ ਉਪਾਸਕਾ ਘਰੇ ਘਰੇ ਕਾਪੋਤਿਕਂ ਪਸਨ੍ਨਂ ਪਟਿਯਾਦੇਤ੍ਵਾ ਆਯਸ੍ਮਨ੍ਤਂ ਸਾਗਤਂ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਏਤਦਵੋਚੁਂ – ‘‘ਪਿਵਤੁ, ਭਨ੍ਤੇ, ਅਯ੍ਯੋ ਸਾਗਤੋ ਕਾਪੋਤਿਕਂ ਪਸਨ੍ਨਂ, ਪਿਵਤੁ, ਭਨ੍ਤੇ, ਅਯ੍ਯੋ ਸਾਗਤੋ ਕਾਪੋਤਿਕਂ ਪਸਨ੍ਨ’’ਨ੍ਤਿ. ਅਥਾਯਸ੍ਮਾ ਸਾਗਤੋ ਘਰੇ ਘਰੇ ਕਾਪੋਤਿਕਂ ਪਸਨ੍ਨਂ ਪਿਵਿਤ੍ਵਾ ਨਗਰਮ੍ਹਾ ਨਿਕ੍ਖਮਨ੍ਤੋ ਨਗਰਦ੍ਵਾਰੇ ਪਤਿ. ਤੇਨ ਵੁਤ੍ਤਂ – ‘‘ਛਬ੍ਬਗ੍ਗਿਯਾਨਂ ਵਚਨੇਨ ਸਬ੍ਬਗੇਹੇਸੁ ਕਾਪੋਤਿਕਂ ਪਸਨ੍ਨਂ ਪਟਿਯਾਦੇਤ੍ਵਾ’’ਤਿਆਦਿ. ਤਤ੍ਥ ਕਾਪੋਤਿਕਾ ਨਾਮ ਕਪੋਤਪਾਦਸਮਾਨਵਣ੍ਣਾ ਰਤ੍ਤੋਭਾਸਾ. ਪਸਨ੍ਨਾਤਿ ਸੁਰਾਮਣ੍ਡਸ੍ਸੇਤਂ ਅਧਿਵਚਨਂ. ਵਿਨਯੇ ਸਮੁਟ੍ਠਿਤਨ੍ਤਿ ਸੁਰਾਪਾਨਸਿਕ੍ਖਾਪਦੇ (ਪਾਚਿ. ੩੨੬ ਆਦਯੋ) ਆਗਤਂ.
ਰਾਧਤ੍ਥੇਰਵਤ੍ਥੁ
੨੩੩. ਏਕਾਦਸਮੇ ਸਤ੍ਥਾ ਸਾਰਿਪੁਤ੍ਤਤ੍ਥੇਰਸ੍ਸ ਸਞ੍ਞਂ ਅਦਾਸੀਤਿ ਬ੍ਰਾਹ੍ਮਣਂ ਪਬ੍ਬਾਜੇਤੁਂ ਸਞ੍ਞਂ ਅਦਾਸਿ, ਆਣਾਪੇਸੀਤਿ ਵੁਤ੍ਤਂ ਹੋਤਿ. ਭਗਵਾ ਕਿਰ ਤਂ ਬ੍ਰਾਹ੍ਮਣਂ ਪਬ੍ਬਜ੍ਜਂ ਅਲਭਿਤ੍ਵਾ ਕਿਸਂ ਲੂਖਂ ਦੁਬ੍ਬਣ੍ਣਂ ਉਪ੍ਪਣ੍ਡੁਪ੍ਪਣ੍ਡੁਕਜਾਤਂ ਦਿਸ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਕੋ, ਭਿਕ੍ਖਵੇ, ਤਸ੍ਸ ਬ੍ਰਾਹ੍ਮਣਸ੍ਸ ਅਧਿਕਾਰਂ ਸਰਤੀ’’ਤਿ. ਏਵਂ ਵੁਤ੍ਤੇ ਆਯਸ੍ਮਾ ਸਾਰਿਪੁਤ੍ਤੋ ਭਗਵਨ੍ਤਂ ਏਤਦਵੋਚ – ‘‘ਅਹਂ ਖੋ, ਭਨ੍ਤੇ, ਤਸ੍ਸ ਬ੍ਰਾਹ੍ਮਣਸ੍ਸ ਅਧਿਕਾਰਂ ਸਰਾਮੀ’’ਤਿ. ਕਿਂ ਪਨ ਤ੍ਵਂ, ਸਾਰਿਪੁਤ੍ਤ, ਬ੍ਰਾਹ੍ਮਣਸ੍ਸ ਅਧਿਕਾਰਂ ਸਰਸੀਤਿ. ਇਧ ਮੇ, ਭਨ੍ਤੇ, ਸੋ ਬ੍ਰਾਹ੍ਮਣੋ ਰਾਜਗਹੇ ਪਿਣ੍ਡਾਯ ਚਰਨ੍ਤਸ੍ਸ ਕਟਚ੍ਛੁਭਿਕ੍ਖਂ ਦਾਪੇਸਿ, ਇਮਂ ਖੋ ਅਹਂ, ਭਨ੍ਤੇ, ਤਸ੍ਸ ਬ੍ਰਾਹ੍ਮਣਸ੍ਸ ਅਧਿਕਾਰਂ ਸਰਾਮੀ’’ਤਿ. ਸਾਧੁ ਸਾਧੁ, ਸਾਰਿਪੁਤ੍ਤ. ਕਤਞ੍ਞੁਨੋ ਹਿ, ਸਾਰਿਪੁਤ੍ਤ, ਸਪ੍ਪੁਰਿਸਾ ਕਤਵੇਦਿਨੋ, ਤੇਨ ਹਿ ਤ੍ਵਂ, ਸਾਰਿਪੁਤ੍ਤ, ਤਂ ਬ੍ਰਾਹ੍ਮਣਂ ਪਬ੍ਬਾਜੇਹਿ ਉਪਸਮ੍ਪਾਦੇਹੀਤਿ. ਅਟ੍ਠੁਪ੍ਪਤ੍ਤਿਯਂ ਆਗਤੋਤਿ ਅਲੀਨਚਿਤ੍ਤਜਾਤਕਸ੍ਸ (ਜਾ. ੧.੨.੧੧-੧੨) ਅਟ੍ਠੁਪ੍ਪਤ੍ਤਿਯਂ (ਜਾ. ਅਟ੍ਠ. ੨.੨.ਅਲੀਨਚਿਤ੍ਤਜਾਤਕਵਣ੍ਣਨਾ) ਆਗਤੋ.
ਨਿਧੀਨਨ੍ਤਿ ਤਤ੍ਥ ਤਤ੍ਥ ਨਿਦਹਿਤ੍ਵਾ ਠਪਿਤਾਨਂ ਹਿਰਞ੍ਞਸੁਵਣ੍ਣਾਦਿਪੂਰਾਨਂ ਨਿਧਿਕੁਮ੍ਭੀਨਂ. ਪਵਤ੍ਤਾਰਨ੍ਤਿ ਕਿਚ੍ਛਜੀਵਿਕੇ ਦੁਗ੍ਗਤਮਨੁਸ੍ਸੇ ਅਨੁਕਮ੍ਪਂ ਕਤ੍ਵਾ ‘‘ਏਹਿ, ਤੇ ਸੁਖੇਨ ਜੀਵਨੁਪਾਯਂ ਦਸ੍ਸੇਸ੍ਸਾਮੀ’’ਤਿ ਨਿਧਿਟ੍ਠਾਨਂ ਨੇਤ੍ਵਾ ਹਤ੍ਥਂ ਪਸਾਰੇਤ੍ਵਾ ‘‘ਇਮਂ ਗਹੇਤ੍ਵਾ ਸੁਖਂ ਜੀਵਾ’’ਤਿ ਆਚਿਕ੍ਖਿਤਾਰਂ ਵਿਯ. ਵਜ੍ਜਦਸ੍ਸਿਨਨ੍ਤਿ ਦ੍ਵੇ ਵਜ੍ਜਦਸ੍ਸਿਨੋ ‘‘ਇਮਿਨਾ ਨਂ ਅਸਾਰੁਪ੍ਪੇਨ ਵਾ ਖਲਿਤੇਨ ਵਾ ਸਙ੍ਘਮਜ੍ਝੇ ਨਿਗ੍ਗਣ੍ਹਿਸ੍ਸਾਮੀ’’ਤਿ ਰਨ੍ਧਗਵੇਸਕੋ ਚ, ਅਨਞ੍ਞਾਤਂ ਞਾਪਨਤ੍ਥਾਯ ਞਾਤਂ ਅਨੁਗ੍ਗਣ੍ਹਨਤ੍ਥਾਯ ਸੀਲਾਦੀਨਮਸ੍ਸ ਵੁਦ੍ਧਿਕਾਮਤਾਯ ਤਂ ਤਂ ਵਜ੍ਜਂ ਓਲੋਕਨੇਨ ਉਲ੍ਲੁਮ੍ਪਨਸਭਾਵਸਣ੍ਠਿਤੋ ਚ. ਅਯਂ ਇਧ ਅਧਿਪ੍ਪੇਤੋ. ਯਥਾ ਹਿ ਦੁਗ੍ਗਤਮਨੁਸ੍ਸੋ ‘‘ਇਮਂ ਗਣ੍ਹਾਹੀ’’ਤਿ ਤਜ੍ਜੇਤ੍ਵਾਪਿ ਪੋਥੇਤ੍ਵਾਪਿ ਨਿਧਿਂ ਦਸ੍ਸੇਨ੍ਤੇ ਕੋਪਂ ਨ ਕਰੋਤਿ, ਪਮੁਦਿਤੋਵ ਹੋਤਿ, ਏਵਮੇਵਂ ਏਵਰੂਪੇ ਪੁਗ੍ਗਲੇ ਅਸਾਰੁਪ੍ਪਂ ਵਾ ਖਲਿਤਂ ਵਾ ਦਿਸ੍ਵਾ ਆਚਿਕ੍ਖਨ੍ਤੇ ਕੋਪੋ ਨ ਕਾਤਬ੍ਬੋ, ਤੁਟ੍ਠੇਨੇਵ ਭਵਿਤਬ੍ਬਂ. ‘‘ਭਨ੍ਤੇ, ਮਹਨ੍ਤਂ ਵੋ ਕਮ੍ਮਂ ਕਤਂ ਮਯ੍ਹਂ ਆਚਰਿਯੁਪਜ੍ਝਾਯਟ੍ਠਾਨੇ ਠਤ੍ਵਾ ਓਵਦਨ੍ਤੇਹਿ, ਪੁਨਪਿ ਮਂ ਵਦੇਯ੍ਯਾਥਾ’’ਤਿ ਪਵਾਰੇਤਬ੍ਬਮੇਵ.
ਨਿਗ੍ਗਯ੍ਹਵਾਦਿਨ੍ਤਿ ਏਕਚ੍ਚੋ ਹਿ ਸਦ੍ਧਿਵਿਹਾਰਿਕਾਦੀਨਂ ਅਸਾਰੁਪ੍ਪਂ ਵਾ ਖਲਿਤਂ ਵਾ ਦਿਸ੍ਵਾ ‘‘ਅਯਂ ਮੇ ਮੁਖੋਦਕਦਾਨਾਦੀਹਿ ਸਕ੍ਕਚ੍ਚਂ ਉਪਟ੍ਠਹਤਿ, ਸਚੇ ਨਂ ਵਕ੍ਖਾਮਿ, ਨ ਮਂ ਉਪਟ੍ਠਹਿਸ੍ਸਤਿ, ਏਵਂ ਮੇ ਪਰਿਹਾਨਿ ਭਵਿਸ੍ਸਤੀ’’ਤਿ ਤਂ ਵਤ੍ਤੁਂ ਅਵਿਸਹਨ੍ਤੋ ਨ ਨਿਗ੍ਗਯ੍ਹਵਾਦੀ ਨਾਮ ਹੋਤਿ, ਸੋ ਇਮਸ੍ਮਿਂ ਸਾਸਨੇ ਕਚਵਰਂ ਆਕਿਰਤਿ. ਯੋ ਪਨ ਤਥਾਰੂਪਂ ਵਜ੍ਜਂ ਦਿਸ੍ਵਾ ਵਜ੍ਜਾਨੁਰੂਪਂ ਤਜ੍ਜੇਨ੍ਤੋ ਪਣਾਮੇਨ੍ਤੋ ਦਣ੍ਡਕਮ੍ਮਂ ਕਰੋਨ੍ਤੋ ਵਿਹਾਰਾ ਨੀਹਰਨ੍ਤੋ ਸਿਕ੍ਖਾਪੇਤਿ, ਅਯਂ ਨਿਗ੍ਗਯ੍ਹਵਾਦੀ ਨਾਮ ਸੇਯ੍ਯਥਾਪਿ, ਸਮ੍ਮਾਸਮ੍ਬੁਦ੍ਧੋ. ਵੁਤ੍ਤਞ੍ਹੇਤਂ – ‘‘ਨਿਗ੍ਗਯ੍ਹ ਨਿਗ੍ਗਯ੍ਹਾਹਂ, ਆਨਨ੍ਦ, ਵਕ੍ਖਾਮਿ, ਪਵਯ੍ਹ ਪਵਯ੍ਹ, ਆਨਨ੍ਦ, ਵਕ੍ਖਾਮਿ, ਯੋ ਸਾਰੋ, ਸੋ ਠਸ੍ਸਤੀ’’ਤਿ (ਮ. ਨਿ. ੩.੧੯੬). ਮੇਧਾਵਿਨ੍ਤਿ ਧਮ੍ਮੋਜਪਞ੍ਞਾਯ ਸਮਨ੍ਨਾਗਤਂ. ਤਾਦਿਸਨ੍ਤਿ ਏਵਰੂਪਂ ਪਣ੍ਡਿਤਂ ਭਜੇਯ੍ਯ ਪਯਿਰੁਪਾਸੇਯ੍ਯ. ਤਾਦਿਸਞ੍ਹਿ ਆਚਰਿਯਂ ਭਜਮਾਨਸ੍ਸ ਅਨ੍ਤੇਵਾਸਿਕਸ੍ਸ ਸੇਯ੍ਯੋ ਹੋਤਿ ਨ ਪਾਪਿਯੋ, ਵਡ੍ਢਿਯੇਵ ਹੋਤਿ, ਨੋ ਪਰਿਹਾਨੀਤਿ.
ਮੋਘਰਾਜਤ੍ਥੇਰਵਤ੍ਥੁ
੨੩੪. ਦ੍ਵਾਦਸਮੇ ਕਟ੍ਠਵਾਹਨਨਗਰੇਤਿ ਕਟ੍ਠਵਾਹਨੇਨ ਗਹਿਤਤ੍ਤਾ ਏਵਂਲਦ੍ਧਨਾਮਕੇ ਨਗਰੇ. ਅਤੀਤੇ ਕਿਰ ਬਾਰਾਣਸਿਵਾਸੀ ਏਕੋ ਰੁਕ੍ਖਵਡ੍ਢਕੀ ਸਕੇ ਆਚਰਿਯਕੇ ਅਦੁਤਿਯੋ. ਤਸ੍ਸ ਸੋਲ਼ਸ ਸਿਸ੍ਸਾ ਏਕਮੇਕਸ੍ਸ ਸਹਸ੍ਸਂ ਅਨ੍ਤੇਵਾਸਿਕਾ. ਏਵਂ ਤੇ ਸਤ੍ਤਰਸਾਧਿਕਾ ਸੋਲ਼ਸ ਸਹਸ੍ਸਾ ਆਚਰਿਯਨ੍ਤੇਵਾਸਿਕਾ ਸਬ੍ਬੇਪਿ ਬਾਰਾਣਸਿਂ ਉਪਨਿਸ੍ਸਾਯ ਜੀਵਿਕਂ ਕਪ੍ਪੇਨ੍ਤਾ ਪਬ੍ਬਤਸਮੀਪਂ ਗਨ੍ਤ੍ਵਾ ਰੁਕ੍ਖੇ ਗਹੇਤ੍ਵਾ ਤਤ੍ਥੇਵ ਨਾਨਾਪਾਸਾਦਵਿਕਤਿਯੋ ਨਿਟ੍ਠਾਪੇਤ੍ਵਾ ਕੁਲ੍ਲਂ ਬਨ੍ਧਿਤ੍ਵਾ ਗਙ੍ਗਾਯ ਬਾਰਾਣਸਿਂ ਆਨੇਤ੍ਵਾ ਸਚੇ ਰਾਜਾ ਅਤ੍ਥਿਕੋ ਹੋਤਿ, ਰਞ੍ਞੋ ਏਕਭੂਮਕਂ ਵਾ ਸਤ੍ਤਭੂਮਕਂ ਵਾ ਪਾਸਾਦਂ ਯੋਜੇਤ੍ਵਾ ਦੇਨ੍ਤਿ. ਨੋ ਚੇ, ਅਞ੍ਞੇਸਮ੍ਪਿ ਵਿਕ੍ਕਿਣਿਤ੍ਵਾ ਪੁਤ੍ਤਦਾਰਂ ਪੋਸੇਨ੍ਤਿ. ਅਥ ਨੇਸਂ ਏਕਦਿਵਸਂ ਆਚਰਿਯੋ ‘‘ਨ ਸਕ੍ਕਾ ਵਡ੍ਢਕਿਕਮ੍ਮੇਨ ਨਿਚ੍ਚਂ ਜੀਵਿਤੁਂ, ਦੁਕ੍ਕਰਞ੍ਹਿ ਜਰਾਕਾਲੇ ਏਤਂ ਕਮ੍ਮ’’ਨ੍ਤਿ ਚਿਨ੍ਤੇਤ੍ਵਾ ਅਨ੍ਤੇਵਾਸਿਕੇ ਆਮਨ੍ਤੇਸਿ – ‘‘ਤਾਤਾ, ਉਦੁਮ੍ਬਰਾਦਯੋ ਅਪ੍ਪਸਾਰਰੁਕ੍ਖੇ ਆਨੇਥਾ’’ਤਿ. ਤੇ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਆਨਯਿਂਸੁ. ਸੋ ਤੇਹਿ ਕਟ੍ਠਸਕੁਣਂ ਕਤ੍ਵਾ ਤਸ੍ਸਬ੍ਭਨ੍ਤਰਂ ਪਵਿਸਿਤ੍ਵਾ ਵਾਤੇਨ ਯਨ੍ਤਂ ਪੂਰੇਸਿ. ਕਟ੍ਠਸਕੁਣੋ ਸੁਵਣ੍ਣਹਂਸਰਾਜਾ ਵਿਯ ਆਕਾਸੇ ਲਙ੍ਘਿਤ੍ਵਾ ਵਨਸ੍ਸ ਉਪਰਿ ਚਰਿਤ੍ਵਾ ਅਨ੍ਤੇਵਾਸੀਨਂ ਪੁਰਤੋ ਓਰੁਹਿ.
ਅਥਾਚਰਿਯੋ ਸਿਸ੍ਸੇ ਆਹ – ‘‘ਤਾਤਾ ਈਦਿਸਾਨਿ ਕਟ੍ਠਵਾਹਨਾਨਿ ਕਤ੍ਵਾ ਸਕ੍ਕਾ ਸਕਲਜਮ੍ਬੁਦੀਪੇ ਰਜ੍ਜੇ ਗਹੇਤੁਂ, ਤੁਮ੍ਹੇਪਿ ਤਾਤਾ ਏਤਾਨਿ ਕਰੋਥ, ਰਜ੍ਜਂ ਗਹੇਤ੍ਵਾ ਜੀਵਿਸ੍ਸਾਮ, ਦੁਕ੍ਕਰਂ ਵਡ੍ਢਕਿਸਿਪ੍ਪੇਨ ਜੀਵਿਤੁ’’ਨ੍ਤਿ. ਤੇ ਤਥਾ ਕਤ੍ਵਾ ਆਚਰਿਯਸ੍ਸ ਪਟਿਵੇਦੇਸੁਂ. ਤਤੋ ਨੇ ਆਚਰਿਯੋ ਆਹ – ‘‘ਕਤਮਂ ਤਾਤਾ ਰਜ੍ਜਂ ਗਣ੍ਹਾਮਾ’’ਤਿ? ਬਾਰਾਣਸਿਰਜ੍ਜਂ ਆਚਰਿਯਾਤਿ. ਅਲਂ ਤਾਤਾ, ਮਾ ਏਤਂ ਰੁਚਿਤ੍ਥ, ਮਯਞ੍ਹਿ ਤਂ ਗਹੇਤ੍ਵਾਪਿ ‘‘ਵਡ੍ਢਕਿਰਾਜਾ, ਵਡ੍ਢਕਿਯੁਵਰਾਜਾ’’ਤਿ ਵਡ੍ਢਕਿਵਾਦਾ ਨ ਮੁਚ੍ਚਿਸ੍ਸਾਮ, ਮਹਨ੍ਤੋ ਜਮ੍ਬੁਦੀਪੋ, ਅਞ੍ਞਤ੍ਥ ਗਚ੍ਛਾਮਾਤਿ. ਤਤੋ ਸਪੁਤ੍ਤਦਾਰਕਾ ਕਟ੍ਠਵਾਹਨਾਨਿ ਅਭਿਰੁਹਿਤ੍ਵਾ ਸਜ੍ਜਾਵੁਧਾ ਹੁਤ੍ਵਾ ਹਿਮਵਨ੍ਤਾਭਿਮੁਖਾ ਗਨ੍ਤ੍ਵਾ ਹਿਮਵਤਿ ਅਞ੍ਞਤਰਂ ਨਗਰਂ ਪਵਿਸਿਤ੍ਵਾ ਰਞ੍ਞੋ ਨਿਵੇਸਨੇਯੇਵ ਪਚ੍ਚੁਟ੍ਠਂਸੁ. ਤੇ ਤਤ੍ਥ ਰਜ੍ਜਂ ਗਹੇਤ੍ਵਾ ਆਚਰਿਯਂ ਰਜ੍ਜੇ ਅਭਿਸਿਞ੍ਚਿਂਸੁ. ਸੋ ‘‘ਕਟ੍ਠਵਾਹਨੋ ਰਾਜਾ’’ਤਿ ਪਾਕਟੋ ਅਹੋਸਿ, ਤਂ ਨਗਰਂ ਤੇਨ ਗਹਿਤਤ੍ਤਾ ‘‘ਕਟ੍ਠਵਾਹਨਨਗਰ’’ਨ੍ਤੇਵ ਨਾਮਂ ਲਭਿ.
ਤਪਚਾਰਨ੍ਤਿ ਤਪਚਰਣਂ. ਪਾਸਾਣਚੇਤਿਯੇ ਪਿਟ੍ਠਿਪਾਸਾਣੇ ਨਿਸੀਦੀਤਿ ਪਾਸਾਣਕਚੇਤਿਯਨ੍ਤਿ ਲਦ੍ਧਵੋਹਾਰੇ ਪਿਟ੍ਠਿਪਾਸਾਣੇ ਸਕ੍ਕੇਨ ਮਾਪਿਤੇ ਮਹਾਮਣ੍ਡਪੇ ਨਿਸੀਦਿ. ਤਤ੍ਥ ਕਿਰ ਮਹਤੋ ਪਾਸਾਣਸ੍ਸ ਉਪਰਿ ਪੁਬ੍ਬੇ ਦੇਵਟ੍ਠਾਨਂ ਅਹੋਸਿ, ਉਪ੍ਪਨ੍ਨੇ ਪਨ ਭਗਵਤਿ ਵਿਹਾਰੋ ਜਾਤੋ, ਸੋ ਤੇਨੇਵ ਪੁਰਿਮਵੋਹਾਰੇਨ ‘‘ਪਾਸਾਣਚੇਤਿਯ’’ਨ੍ਤਿ ਵੁਚ੍ਚਤਿ.
ਤੇਨ ਪੁਚ੍ਛਿਤੇ ਦੁਤਿਯੋ ਹੁਤ੍ਵਾ ਸਤ੍ਥਾਰਂ ਪਞ੍ਹਂ ਪੁਚ੍ਛੀਤਿ –
‘‘ਮੁਦ੍ਧਂ ਮੁਦ੍ਧਾਧਿਪਾਤਞ੍ਚ, ਬਾਵਰੀ ਪਰਿਪੁਚ੍ਛਤਿ;
ਤਂ ਬ੍ਯਾਕਰੋਹਿ ਭਗਵਾ, ਕਙ੍ਖਂ ਵਿਨਯ ਨੋ ਇਸੇ’’ਤਿ. (ਸੁ. ਨਿ. ੧੦੩੧) –
ਏਵਂ ਤੇਨ ਪਞ੍ਹੇ ਪੁਚ੍ਛਿਤੇ ਭਗਵਤਾ ਚ –
‘‘ਅਵਿਜ੍ਜਾ ਮੁਦ੍ਧਾਤਿ ਜਾਨਾਹਿ, ਵਿਜ੍ਜਾ ਮੁਦ੍ਧਾਧਿਪਾਤਿਨੀ;
ਸਦ੍ਧਾਸਤਿਸਮਾਧੀਹਿ, ਛਨ੍ਦਵੀਰਿਯੇਨ ਸਂਯੁਤਾ’’ਤਿ. (ਸੁ. ਨਿ. ੧੦੩੨) –
ਪਞ੍ਹੇ ਵਿਸ੍ਸਜ੍ਜਿਤੇ ਦੁਤਿਯੋ ਹੁਤ੍ਵਾ ਪਞ੍ਹਂ ਪੁਚ੍ਛਿ.
ਅਥਸ੍ਸ…ਪੇ… ਪਞ੍ਹਂ ਕਥੇਸੀਤਿ –
‘‘ਕਥਂ ਲੋਕਂ ਅਵੇਕ੍ਖਨ੍ਤਂ, ਮਚ੍ਚੁਰਾਜਾ ਨ ਪਸ੍ਸਤੀ’’ਤਿ. (ਸੁ. ਨਿ. ੧੧੨੪) –
ਤੇਨ ਪਞ੍ਹੇ ਪੁਚ੍ਛਿਤੇ –
‘‘ਸੁਞ੍ਞਤੋ ਲੋਕਂ ਅਵੇਕ੍ਖਸ੍ਸੁ, ਮੋਘਰਾਜ ਸਦਾ ਸਤੋ;
ਅਤ੍ਤਾਨੁਦਿਟ੍ਠਿਂ ਊਹਚ੍ਚ, ਏਵਂ ਮਚ੍ਚੁਤਰੋ ਸਿਯਾ;
ਏਵਂ ਲੋਕਂ ਅਵੇਕ੍ਖਨ੍ਤਂ, ਮਚ੍ਚੁਰਾਜਾ ਨ ਪਸ੍ਸਤੀ’’ਤਿ. (ਸੁ. ਨਿ. ੧੧੨੫) –
ਪਞ੍ਹਂ ਵਿਸ੍ਸਜ੍ਜੇਸਿ.
ਸੇਸਜਨਾਤਿ ਤਸ੍ਮਿਂ ਸਮਾਗਮੇ ਸਨ੍ਨਿਪਤਿਤਾ ਸੇਸਜਨਾ. ਨ ਕਥੀਯਨ੍ਤੀਤਿ ‘‘ਏਤ੍ਤਕਾ ਸੋਤਾਪਨ੍ਨਾ’’ਤਿਆਦਿਨਾ ਨ ਵੁਚ੍ਚਨ੍ਤਿ. ਏਵਂ ਪਾਰਾਯਨੇ ਵਤ੍ਥੁ ਸਮੁਟ੍ਠਿਤਨ੍ਤਿ ਪਾਰਾਯਨਵਗ੍ਗੇ ਇਦਂ ਵਤ੍ਥੁ ਸਮੁਟ੍ਠਿਤਂ.
ਚਤੁਤ੍ਥਏਤਦਗ੍ਗਵਗ੍ਗਵਣ੍ਣਨਾ ਨਿਟ੍ਠਿਤਾ.
ਥੇਰਪਾਲ਼ਿਸਂਵਣ੍ਣਨਾ ਨਿਟ੍ਠਿਤਾ.