ਚਤੁਤ੍ਥੋ ਪਰਿਚ੍ਛੇਦੋ

੪. ਵੀਥਿਪਰਿਕਮ੍ਮਕਥਾ

੧੨੬. ਪਠਮਾਵਜ੍ਜਨਂ ਪਞ੍ਚ-ਦਸਨ੍ਨਂ ਪਰਤੋ ਭਵੇ;

ਦੁਤਿਯਾਵਜ੍ਜਨਂ ਹੋਤਿ, ਏਕਵੀਸਤਿਤੋ ਪਰਂ.

੧੨੭. ਏਕਮ੍ਹਾ ਪਞ੍ਚਵਿਞ੍ਞਾਣਂ, ਪਞ੍ਚਮ੍ਹਾ ਸਮ੍ਪਟਿਚ੍ਛਨਂ;

ਸੁਖਸਨ੍ਤੀਰਣਂ ਹੋਤਿ, ਪਞ੍ਚਵੀਸਤਿਤੋ ਪਰਂ.

੧੨੮. ਸਤ੍ਤਤਿਂਸਤਿਤੋ ਹੋਤਿ, ਉਪੇਕ੍ਖਾਤੀਰਣਦ੍ਵਯਂ;

ਵੋਟ੍ਠਬ੍ਬਨਸਰੂਪਾਨਂ, ਦ੍ਵਿਨ੍ਨਂ ਕਾਮਜਵਾ ਪਰਂ.

੧੨੯. ਮਗ੍ਗਾਭਿਞ੍ਞਾ ਪਰਂ ਦ੍ਵਿਨ੍ਨਂ, ਤਿਣ੍ਣਨ੍ਨਂ ਲੋਕਿਯਪ੍ਪਨਾ;

ਫਲਾ ਚਤੁਨ੍ਨਂ ਪਞ੍ਚਨ੍ਨਂ, ਉਪਰਿਟ੍ਠਫਲਦ੍ਵਯਂ.

੧੩੦. ਭਵਨ੍ਤਿ ਚਤ੍ਤਾਲੀਸਮ੍ਹਾ, ਸੁਖਪਾਕਾ ਦ੍ਵਿਹੇਤੁਕਾ;

ਤਥੇਕਚਤ੍ਤਾਲੀਸਮ੍ਹਾ, ਉਪੇਕ੍ਖਾਯ ਸਮਾਯੁਤਾ.

੧੩੧. ਹੋਨ੍ਤਿ ਸਤ੍ਤਤਿਤੋ ਕਾਮੇ, ਸੁਖਪਾਕਾ ਤਿਹੇਤੁਕਾ;

ਦ੍ਵਾਸਤ੍ਤਤਿਮ੍ਹਾ ਜਾਯਨ੍ਤਿ, ਉਪੇਕ੍ਖਾਸਹਿਤਾ ਪਨ.

੧੩੨. ਏਕੂਨਸਟ੍ਠਿਤੋ ਰੂਪ-ਪਾਕਾ ਪਾਕਾ ਅਰੂਪਿਨੋ;

ਕਮਾਟ੍ਠਚਤ੍ਤਾਲੀਸਮ੍ਹਾ, ਤਥੇਕਦ੍ਵਿਤਿਹੀਨਤੋ.

੧੩੩. ਪੁਬ੍ਬਸਙ੍ਗਹਮਿਚ੍ਚੇਵਂ, ਵਿਗਣੇਤ੍ਵਾ ਵਿਚਕ੍ਖਣੋ;

ਪਰਸਙ੍ਗਹਸਙ੍ਖ੍ਯਾਦਿਂ, ਵਿਭਾਵੇਯ੍ਯ ਵਿਸਾਰਦੋ.

੧੩੪. ਪਞ੍ਚਦ੍ਵਾਰਾਵਜ੍ਜਨਤੋ, ਦਸ ਚਿਤ੍ਤਾਨਿ ਦੀਪਯੇ;

ਸੇਸਾਵਜ੍ਜਨਤੋ ਪਞ੍ਚਚਤ੍ਤਾਲੀਸਨ੍ਤਿ ਭਾਸਿਤਂ.

੧੩੫. ਪਞ੍ਚਵਿਞ੍ਞਾਣਤੋ ਪਾਪਵਿਪਾਕਾ ਸਮ੍ਪਟਿਚ੍ਛਨਾ;

ਪਰਮੇਕਂ ਦ੍ਵਯਂ ਪੁਞ੍ਞਵਿਪਾਕਾ ਸਮ੍ਪਟਿਚ੍ਛਨਾ.

੧੩੬. ਸਨ੍ਤੀਰਣਾ ਦ੍ਵਿਹੇਤੁਮ੍ਹਾ, ਪਾਕਾ ਦ੍ਵਾਦਸ ਜਾਯਰੇ;

ਤਿਹੇਤੁਕਾਮਪਾਕਮ੍ਹਾ, ਏਕਵੀਸਤਿ ਲਬ੍ਭਰੇ.

੧੩੭. ਰੂਪਾਵਚਰਪਾਕਮ੍ਹਾ, ਪਰਮੇਕੂਨਵੀਸਤਿ;

ਨਵਟ੍ਠਾਰੂਪਪਾਕਮ੍ਹਾ, ਸਤ੍ਤ ਛਾਪਿ ਯਥਾਕ੍ਕਮਂ.

੧੩੮. ਪਟਿਘਮ੍ਹਾ ਤੁ ਸਤ੍ਤੇਵ, ਸਿਤਮ੍ਹਾ ਤੇਰਸੇਰਿਤਾ;

ਪਾਪਪੁਞ੍ਞਦ੍ਵਿਹੇਤੁਮ੍ਹਾ, ਏਕਵੀਸਤਿ ਭਾਵਯੇ.

੧੩੯. ਦ੍ਵਿਹੇਤੁਕਾਮਕ੍ਰਿਯਤੋ, ਅਟ੍ਠਾਰਸ ਉਪੇਕ੍ਖਕਾ;

ਸਤ੍ਤਰਸ ਸੁਖੋਪੇਤਾ, ਵਿਭਾਵੇਯ੍ਯ ਵਿਚਕ੍ਖਣੋ.

੧੪੦. ਕਾਮਪੁਞ੍ਞਤਿਹੇਤੁਮ੍ਹਾ, ਤੇਤ੍ਤਿਂਸੇਵ ਉਪੇਕ੍ਖਕਾ;

ਤੇਪਞ੍ਞਾਸ ਸੁਖੋਪੇਤਾ, ਭਵਨ੍ਤੀਤਿ ਪਕਾਸਿਤਂ.

੧੪੧. ਤਿਹੇਤੁਕਾਮਕ੍ਰਿਯਤੋ, ਚਤੁਵੀਸਤਿਪੇਕ੍ਖਕਾ;

ਸੁਖਿਤਮ੍ਹਾ ਤੁ ਦੀਪੇਯ੍ਯ, ਪਞ੍ਚਵੀਸਤਿ ਪਣ੍ਡਿਤੋ.

੧੪੨. ਦਸਰੂਪਜਵਮ੍ਹੇਕਾ-ਦਸਦ੍ਵਾਦਸ ਤੇਰਸ;

ਯਥਾਕ੍ਕਮਂ ਪਞ੍ਚਦਸ, ਆਰੁਪ੍ਪਾ ਪਰਿਦੀਪਯੇ.

੧੪੩. ਫਲਮ੍ਹਾ ਚੁਦ੍ਦਸੇਵਾਹੁ, ਮਗ੍ਗਮ੍ਹਾ ਤੁ ਸਕਂ ਫਲਂ;

ਪਰਂ ਸਙ੍ਗਹਮਿਚ੍ਚੇਵਂ, ਵਿਗਣੇਯ੍ਯ ਵਿਸਾਰਦੋ.

੧੪੪. ਪੁਬ੍ਬਾਪਰਸਮੋਧਾਨ-ਮਿਤਿ ਞਤ੍ਵਾ ਤਤੋ ਪਰਂ;

ਵਤ੍ਥੁਵੀਥਿਸਮੋਧਾਨਂ, ਯਥਾਸਮ੍ਭਵਮੁਦ੍ਦਿਸੇ.

੧੪੫. ਪਞ੍ਚ ਵਤ੍ਥੂਨਿ ਨਿਸ੍ਸਾਯ, ਕਮਤੋ ਪਞ੍ਚਮਾਨਸਾ;

ਤੇਤ੍ਤਿਂਸ ਪਨ ਨਿਸ੍ਸਾਯ, ਹਦਯਂ ਮਾਨਸਾ ਸਿਯੁਂ.

੧੪੬. ਕਾਮਪਾਕਮਨੋਧਾਤੁ-ਹਸਿਤੁਪ੍ਪਾਦਮਾਨਸਾ;

ਦੋਸਮੂਲਾਨਿ ਮਗ੍ਗੋ ਚ, ਰੂਪਜ੍ਝਾਨਾਵ ਸਬ੍ਬਥਾ.

੧੪੭. ਦਸਾਵਸੇਸਾਪੁਞ੍ਞਾਨਿ, ਕਾਮਪੁਞ੍ਞਮਹਾਕ੍ਰਿਯਾ;

ਵੋਟ੍ਠਬ੍ਬਾਰੂਪਜਵਨਂ, ਸਤ੍ਤ ਲੋਕੁਤ੍ਤਰਾਨਿ ਚ.

੧੪੮. ਦ੍ਵੇਚਤ੍ਤਾਲੀਸ ਚਿਤ੍ਤਾਨਿ, ਪਞ੍ਚਵੋਕਾਰਭੂਮਿਯਂ;

ਨਿਸ੍ਸਾਯ ਹਦਯਂ ਹੋਨ੍ਤਿ, ਅਰੂਪੇ ਨਿਸ੍ਸਯਂ ਵਿਨਾ.

੧੪੯. ਆਰੁਪ੍ਪਪਾਕਾ ਚਤ੍ਤਾਰੋ, ਅਨਿਸ੍ਸਾਯੇਤਿ ਸਬ੍ਬਥਾ;

ਵਿਤ੍ਥਾਰੇਨਟ੍ਠਧਾ ਭਿਨ੍ਨਂ, ਸਙ੍ਖੇਪਾ ਤਿਵਿਧਂ ਭਵੇ.

੧੫੦. ਤੇਚਤ੍ਤਾਲੀਸ ਨਿਸ੍ਸਾਯ, ਅਨਿਸ੍ਸਾਯ ਚਤੁਬ੍ਬਿਧਂ;

ਨਿਸ੍ਸਿਤਾਨਿਸ੍ਸਿਤਾ ਸੇਸਾ, ਦ੍ਵੇਚਤ੍ਤਾਲੀਸ ਮਾਨਸਾ.

੧੫੧. ਪਞ੍ਚ ਚਿਤ੍ਤਪ੍ਪਨਾ ਹੋਨ੍ਤਿ, ਕਮੇਨੇਕੇਕਵੀਥਿਯਂ;

ਮਨੋਧਾਤੁਤ੍ਤਿਕਂ ਨਾਮ, ਪਞ੍ਚਦ੍ਵਾਰਿਕਮੀਰਿਤਂ.

੧੫੨. ਸੁਖਤੀਰਣਵੋਟ੍ਠਬ੍ਬ-ਪਰਿਤ੍ਤਜਵਨਾ ਪਨ;

ਏਕਤਿਂਸਾਪਿ ਜਾਯਨ੍ਤੇ, ਛਸੁ ਵੀਥੀਸੁ ਸਮ੍ਭਵਾ.

੧੫੩. ਮਹਾਪਾਕਾ ਪਨਟ੍ਠਾਪਿ, ਉਪੇਕ੍ਖਾਤੀਰਣਦ੍ਵਯਂ;

ਛਸੁ ਦ੍ਵਾਰੇਸੁ ਜਾਯਨ੍ਤਿ, ਦਸ ਮੁਤ੍ਤਾ ਚ ਵੀਥਿਯਾ.

੧੫੪. ਚੁਤਿਸਨ੍ਧਿਭਵਙ੍ਗਾਨਂ, ਵਸਾ ਪਾਕਾ ਮਹਗ੍ਗਤਾ;

ਨਵ ਵੀਥਿਵਿਮੁਤ੍ਤਾਤਿ, ਦਸਧਾ ਵੀਥਿਸਙ੍ਗਹੋ.

੧੫੫. ਏਕਦ੍ਵਾਰਿਕਚਿਤ੍ਤਾਨਿ, ਪਞ੍ਚਛਦ੍ਵਾਰਿਕਾ ਤਥਾ;

ਛਦ੍ਵਾਰਿਕਵਿਮੁਤ੍ਤਾ ਚ, ਵਿਮੁਤ੍ਤਾਤਿ ਚ ਸਬ੍ਬਥਾ.

੧੫੬. ਛਤ੍ਤਿਂਸ ਤਯੇਕਤਿਂਸ, ਦਸ ਚੇਵ ਨਵੇਤਿ ਚ;

ਞਤ੍ਵਾ ਵੀਥਿਸਮੋਧਾਨਂ, ਗੋਚਰਞ੍ਚ ਸਮੁਦ੍ਦਿਸੇ.

੧੫੭. ਕਮਤੋ ਪਞ੍ਚਵਿਞ੍ਞਾਣਾ, ਲੋਕੁਤ੍ਤਰਮਹਗ੍ਗਤਾ;

ਅਭਿਞ੍ਞਾਵਜ੍ਜਿਤਾ ਸਬ੍ਬਾ, ਪਞ੍ਚਤਾਲੀਸ ਮਾਨਸਾ.

੧੫੮. ਯਥਾਸਮ੍ਭਵਤੋ ਹੋਨ੍ਤਿ, ਰੂਪਾਦੇਕੇਕਗੋਚਰਾ;

ਪਞ੍ਚਗੋਚਰਮੀਰੇਨ੍ਤਿ, ਮਨੋਧਾਤੁਤ੍ਤਿਕਂ ਪਨ.

੧੫੯. ਸਨ੍ਤੀਰਣਮਹਾਪਾਕਾ, ਪਰਿਤ੍ਤਜਵਨਾਨਿ ਚ;

ਵੋਟ੍ਠਬ੍ਬਨਮਭਿਞ੍ਞਾ ਚ, ਤੇਚਤ੍ਤਾਲੀਸ ਸਮ੍ਭਵਾ.

੧੬੦. ਛਾਰਮ੍ਮਣੇਸੁ ਹੋਨ੍ਤੀਤਿ, ਅਟ੍ਠਧਾ ਤਿਵਿਧਾ ਪੁਨ;

ਏਕਾਰਮ੍ਮਣਚਿਤ੍ਤਾਨਿ, ਪਞ੍ਚਛਾਰਮ੍ਮਣਾਨਿ ਚ.

੧੬੧. ਸਙ੍ਖੇਪਾ ਮਾਨਸਾ ਪਞ੍ਚ-ਚਤ੍ਤਾਲੀਸ ਤਯੋ ਤਥਾ;

ਤੇਚਤ੍ਤਾਲੀਸ ਚੇਵੇਤਿ, ਸਤ੍ਤਧਾਪਿ ਸਿਯੁਂ ਕਥਂ.

੧੬੨. ਕਾਮਪਾਕਮਨੋਧਾਤੁ-ਹਸਿਤੁਪ੍ਪਾਦਮਾਨਸਾ;

ਪਞ੍ਚਵੀਸ ਯਥਾਯੋਗਂ, ਪਰਿਤ੍ਤਾਰਮ੍ਮਣਾ ਮਤਾ.

੧੬੩. ਕਸਿਣੁਗ੍ਘਾਟਿਮਾਕਾਸਂ, ਪਠਮਾਰੁਪ੍ਪਮਾਨਸਂ;

ਤਸ੍ਸੇਵ ਨਤ੍ਥਿਭਾਵਂ ਤੁ, ਤਤਿਯਾਰੁਪ੍ਪਕਂ ਤਥਾ.

੧੬੪. ਆਲਮ੍ਬਿਤ੍ਵਾ ਪਵਤ੍ਤਨ੍ਤਿ, ਆਰੁਪ੍ਪਾ ਕਮਤੋ ਤਤੋ;

ਦੁਤਿਯਞ੍ਚ ਚਤੁਤ੍ਥਞ੍ਚ, ਛ ਮਹਗ੍ਗਤਗੋਚਰਾ.

੧੬੫. ਅਪ੍ਪਮਾਣਸਮਞ੍ਞਾ ਤੇ, ਨਿਬ੍ਬਾਨੇ ਪਨ ਗੋਚਰੇ;

ਅਟ੍ਠ ਲੋਕੁਤ੍ਤਰਾ ਧਮ੍ਮਾ, ਨਿਯਮੇਨ ਵਵਤ੍ਥਿਤਾ.

੧੬੬. ਕਸਿਣਾਸੁਭਕੋਟ੍ਠਾਸੇ,

ਆਨਾਪਾਨੇ ਚ ਯੋਗਿਨੋ;

ਪਟਿਭਾਗਨਿਮਿਤ੍ਤਮ੍ਹਿ,

ਅਪ੍ਪਮਞ੍ਞਾਨੁਯੁਞ੍ਜਤੋ.

੧੬੭. ਸਤ੍ਤਪਣ੍ਣਤ੍ਤਿਯਞ੍ਚੇਵ, ਰੂਪਜ੍ਝਾਨਂ ਪਵਤ੍ਤਤਿ;

ਯਥਾਵੁਤ੍ਤਨਿਮਿਤ੍ਤਮ੍ਹਿ, ਸੇਸਮਾਰੁਪ੍ਪਕਨ੍ਤਿ ਚ.

੧੬੮. ਅਭਿਞ੍ਞਾਵਜ੍ਜਿਤਾ ਏਕਵੀਸ ਮਹਗ੍ਗਤਾ ਸਬ੍ਬਾ;

ਸਬ੍ਬੇ ਪਣ੍ਣਤ੍ਤਿਸਙ੍ਖਾਤੇ, ਨਵਤ੍ਤਬ੍ਬੇ ਪਵਤ੍ਤਰੇ.

੧੬੯. ਜਾਯਨ੍ਤਾਕੁਸਲਾ ਞਾਣਵਿਪ੍ਪਯੁਤ੍ਤਜਵਾ ਤਥਾ;

ਅਪ੍ਪਮਾਣਂ ਵਿਨਾ ਵੀਸ, ਪਰਿਤ੍ਤਾਦੀਸੁ ਤੀਸੁਪਿ.

੧੭੦. ਤਿਹੇਤੁਕਾਮਪੁਞ੍ਞਾਨਿ, ਪੁਞ੍ਞਾਭਿਞ੍ਞਾ ਚ ਪਞ੍ਚਿਮੇ;

ਚਤੂਸੁਪਿ ਪਵਤ੍ਤਨ੍ਤਿ, ਅਰਹਤ੍ਤਦ੍ਵਯਂ ਵਿਨਾ.

੧੭੧. ਕ੍ਰਿਯਾਭਿਞ੍ਞਾ ਚ ਵੋਟ੍ਠਬ੍ਬਂ, ਕ੍ਰਿਯਾਕਾਮੇ ਤਿਹੇਤੁਕਾ;

ਛ ਸਬ੍ਬਤ੍ਥਾਪਿ ਹੋਨ੍ਤੀਤਿ, ਸਤ੍ਤਧਾ ਮਾਨਸਾ ਠਿਤਾ.

੧੭੨. ਏਕਤਿਚ੍ਚਤੁਕੋਟ੍ਠਾਸਗੋਚਰਾ ਤਿਵਿਧਾ ਪਨ;

ਸਮਸਟ੍ਠਿ ਤਥਾ ਵੀਸ, ਕਮੇਨੇਕਾਦਸੇਤਿ ਚ.

੧੭੩. ਪਞ੍ਚਦ੍ਵਾਰੇਸੁ ਪਞ੍ਚਾਪਿ, ਪਚ੍ਚੁਪ੍ਪਨ੍ਨਾਵ ਗੋਚਰਾ;

ਤੇਕਾਲਿਕਾ ਨਵਤ੍ਤਬ੍ਬਾ, ਮਨੋਦ੍ਵਾਰੇ ਯਥਾਰਹਂ.

੧੭੪. ਅਜ੍ਝਤ੍ਤਾ ਚ ਬਹਿਦ੍ਧਾ ਚ, ਪਞ੍ਚਦ੍ਵਾਰੇਸੁ ਗੋਚਰਾ;

ਮਨੋਦ੍ਵਾਰੇ ਨਵਤ੍ਤਬ੍ਬੋ, ਨਤ੍ਥਿਭਾਵੋਪਿ ਲਬ੍ਭਤਿ.

੧੭੫. ਪਞ੍ਚਦ੍ਵਾਰੇਸੁ ਪਞ੍ਚਨ੍ਨ-ਮੇਕਮੇਕੋ ਚ ਗੋਚਰੋ;

ਛਾਪਿ ਆਰਮ੍ਮਣਾ ਹੋਨ੍ਤਿ, ਮਨੋਦ੍ਵਾਰਮ੍ਹਿ ਸਬ੍ਬਥਾ.

੧੭੬. ਪਞ੍ਚਦ੍ਵਾਰੇਸੁ ਗਹਿਤਂ, ਤਦਞ੍ਞਮ੍ਪਿ ਚ ਗੋਚਰਂ;

ਮਨੋਦ੍ਵਾਰੇ ਵਵਤ੍ਥਾਨਂ, ਗਚ੍ਛਤੀਤਿ ਹਿ ਦੇਸਿਤਂ.

੧੭੭. ਅਤੀਤਾ ਵਤ੍ਤਮਾਨਾ ਚ, ਸਮ੍ਭਵਾ ਕਾਮਸਨ੍ਧਿਯਾ;

ਛਦ੍ਵਾਰਗਹਿਤਾ ਹੋਨ੍ਤਿ, ਤਿਵਿਧਾ ਤੇਪਿ ਗੋਚਰਾ.

੧੭੮. ਕਮ੍ਮਨਿਮਿਤ੍ਤਮੇਵੇਕਂ, ਮਨੋਦ੍ਵਾਰੇ ਉਪਟ੍ਠਿਤਂ;

ਨਵਤ੍ਤਬ੍ਬਮਤੀਤਞ੍ਚ, ਧਮ੍ਮਾਰਮ੍ਮਣਸਙ੍ਗਹਂ.

੧੭੯. ਆਲਮ੍ਬਿਤ੍ਵਾ ਯਥਾਯੋਗਂ, ਪਟਿਸਨ੍ਧਿਮਹਗ੍ਗਤਾ;

ਅਨ੍ਤੇ ਚੁਤਿ ਭਵੇ ਮਜ੍ਝੇ, ਭਵਙ੍ਗਮ੍ਪਿ ਪਵਤ੍ਤਤੀਤਿ.

ਇਤਿ ਚਿਤ੍ਤਵਿਭਾਗੇ ਵੀਥਿਪਰਿਕਮ੍ਮਕਥਾ ਨਿਟ੍ਠਿਤਾ.

ਚਤੁਤ੍ਥੋ ਪਰਿਚ੍ਛੇਦੋ.