੧੩. ਤੇਰਸਮੋ ਪਰਿਚ੍ਛੇਦੋ
ਨਿਸ੍ਸਨ੍ਦਫਲਵਿਭਾਗੋ
੧੭੯੨. ਵਿਪਸ੍ਸਨਾਯ ਨਿਸ੍ਸਨ੍ਦਮਿਤਿ ਵੁਤ੍ਤਮਿਤੋ ਪਰਂ;
ਸਚ੍ਚਾਨਂ ਪਟਿਵੇਧਾਦਿਂ, ਪਵਕ੍ਖਾਮਿ ਯਥਾਕ੍ਕਮਂ.
੧੭੯੩. ਪਰਿਞ੍ਞਾ ਚ ਪਹਾਨਞ੍ਚ, ਸਚ੍ਛਿਕਿਰਿਯਾ ਚ ਭਾਵਨਾ;
ਇਤਿ ਦੁਕ੍ਖਾਦਿਸਚ੍ਚੇਸੁ, ਕਿਚ੍ਚਮਾਹੁ ਚਤੁਬ੍ਬਿਧਂ.
੧੭੯੪. ਤਂ ਸਬ੍ਬਂ ਮਗ੍ਗਕਾਲਮ੍ਹਿ, ਕਰਿਸ੍ਸਤਿ ਤਤੋ ਪਰਂ;
ਪਟਿਪਸ੍ਸਦ੍ਧਕਿਚ੍ਚਤ੍ਤਾ, ਕਤਂ ਹੋਤਿ ਫਲੇ ਕਥਂ.
੧੭੯੫. ਛਿਨ੍ਨਤਾਲੋ ਫਲਸ੍ਸੇਵ, ਛਿਨ੍ਨਾਨੁਸਯਮੂਲਕਾ;
ਖਨ੍ਧਾ ਨਾਲਮਧਿਟ੍ਠਾਨਂ, ਵਿਪਲ੍ਲਾਸਪਵਤ੍ਤਿਯਾ.
੧੭੯੬. ਅਚ੍ਚਨ੍ਤਪਟਿਪਕ੍ਖਤ੍ਤਾ, ਚਤੁਮਗ੍ਗਪਵਤ੍ਤਿਯਾ;
ਪਰਂ ਕ੍ਲੇਸਾ ਨ ਜਾਯਨ੍ਤਿ, ਦਡ੍ਢਬੀਜਙ੍ਕੁਰਂ ਯਥਾ.
੧੭੯੭. ਨਿਯ੍ਯਾਨਟ੍ਠਵਿਸੇਸੇਨ, ਅਞ੍ਞਮਞ੍ਞਸ੍ਸ ਪਚ੍ਚਯੋ;
ਮਗ੍ਗੋਵ ਮਗ੍ਗਂ ਭਾਵੇਤਿ, ਜਾਯਮਾਨੋਥ ਵਾ ਪੁਨ.
੧੭੯੮. ਮਗ੍ਗਪ੍ਪਵਤ੍ਤਿਸਨ੍ਤਾਨੇ, ਭਾਵਨਾਤਿ ਪਵੁਚ੍ਚਤਿ;
ਵਤ੍ਤਮਾਨੇਨ ਤਂ ਕਿਚ੍ਚਂ, ਨਿਪ੍ਫਾਦਿਤਮਸੇਸਤੋ.
੧੭੯੯. ਇਤਿ ਤੀਣਿਪਿ ਸਚ੍ਚਾਨਿ, ਕਿਚ੍ਚਤੋ ਪਟਿਵਿਜ੍ਝਤਿ;
ਨਿਬ੍ਬਾਨਂ ਸਚ੍ਛਿਕੁਬ੍ਬਨ੍ਤੋ, ਮਗ੍ਗੋ ਏਕਕ੍ਖਣੇ ਸਹ.
੧੮੦੦. ਕਿਚ੍ਚਪ੍ਪਵਤ੍ਤਿਤੋ ਚੇਤ੍ਥ, ਪਟਿਵੇਧੋਤਿ ਵੁਚ੍ਚਤਿ;
ਤਞ੍ਚ ਸਾਧੇਤਿ ਮਗ੍ਗੋਯਂ, ਨਿਯ੍ਯਨ੍ਤੋ ਸਨ੍ਤਿਗੋਚਰੋ.
੧੮੦੧. ਪਰਿਚ੍ਚਜਿਤ੍ਵਾ ਸਙ੍ਖਾਰੇ, ਮਗ੍ਗਸ੍ਸਾਰਬ੍ਭ ਨਿਬ੍ਬੁਤਿਂ,
ਨਿਯ੍ਯਾਨਮੇਵ ਸਚ੍ਚੇਸੁ, ਕਿਚ੍ਚਸਾਧਨਮੀਰਿਤਂ.
੧੮੦੨. ਮਗ੍ਗੋ ਏਵ ਹਿ ਨਿਯ੍ਯਾਤਿ, ਸੇਸਾ ਤਸ੍ਸੋਪਕਾਰਕਾ;
ਅਪ੍ਪੇਨ੍ਤਾ ਝਾਨਧਮ੍ਮਾ ਚ, ਬੁਜ੍ਝਨ੍ਤਾ ਬੋਧਿਪਕ੍ਖਿਯਾ.
੧੮੦੩. ਤਸ੍ਮਾ ਤਸ੍ਸੇਵ ਵੁਟ੍ਠਾਨਂ, ਪਕਾਸੇਨ੍ਤਿ ਵਿਸੇਸਤੋ;
ਖਨ੍ਧੇਹਿ ਚ ਕਿਲੇਸੇਹਿ, ਵਿਮੋਕ੍ਖਤ੍ਤਯਤੋ ਕਥਂ.
੧੮੦੪. ਕਤ੍ਵਾਨਾਭਿਨਿਵੇਸਂ ਤੁ, ਯਤ੍ਥ ਤਤ੍ਥ ਯਥਾ ਤਥਾ;
ਭੂਮਿਧਮ੍ਮਂ ਪਰਿਗ੍ਗਯ੍ਹ, ਵਿਪਸ੍ਸਿਤ੍ਵਾ ਤਤੋ ਪਰਂ.
੧੮੦੫. ਯਤੋ ਕੁਤੋਚਿ ਵੁਟ੍ਠਾਨਂ, ਯਦਿ ਹੋਤਿ ਅਨਿਚ੍ਚਤੋ;
ਹੁਤ੍ਵਾਧਿਮੋਕ੍ਖਬਹੁਲੋ, ਸਦ੍ਧਿਨ੍ਦ੍ਰਿਯਵਿਸੇਸਤੋ.
੧੮੦੬. ਅਨਿਮਿਤ੍ਤਵਿਮੋਕ੍ਖੇਨ, ਨਿਯ੍ਯਨ੍ਤੋ ਸਤ੍ਤਪੁਗ੍ਗਲੋ;
ਸਦ੍ਧਾਨੁਸਾਰੀ ਪਠਮੇ, ਮਜ੍ਝੇ ਸਦ੍ਧਾਵਿਮੁਤ੍ਤਕੋ.
੧੮੦੭. ਅਨ੍ਤੇ ਪਞ੍ਞਾਵਿਮੁਤ੍ਤੋਤਿ, ਤਮੀਰੇਨ੍ਤਿ ਤਥਾਗਤਾ;
ਸਙ੍ਖਾਰੇ ਦੁਕ੍ਖਤੋ ਦਿਸ੍ਵਾ, ਵੁਟ੍ਠਹਨ੍ਤੋ ਸ ਪੁਗ੍ਗਲੋ.
੧੮੦੮. ਪਸ੍ਸਦ੍ਧਿਬਹੁਲੋ ਹੁਤ੍ਵਾ, ਸਮਾਧਿਨ੍ਦ੍ਰਿਯਲਾਭਤੋ;
ਤਥੇਵਾਪ੍ਪਣਿਹਿਤੇਨ, ਨਿਯ੍ਯਨ੍ਤੋ ਤਿਵਿਧੋ ਭਵੇ.
੧੮੦੯. ਅਨਤ੍ਤਤੋ ਵੁਟ੍ਠਹਿਤ੍ਵਾ, ਵੇਦਬਾਹੁਲ੍ਯਯੋਗਤੋ;
ਸੁਞ੍ਞਤੇਨਾਥ ਨਿਯ੍ਯਨ੍ਤੋ, ਪਞ੍ਞਿਨ੍ਦ੍ਰਿਯਵਿਸੇਸਤੋ.
੧੮੧੦. ਧਮ੍ਮਾਨੁਸਾਰੀ ਪਠਮੇ, ਦਿਟ੍ਠਿਪ੍ਪਤ੍ਤੋ ਤਤੋ ਪਰਂ;
ਅਨ੍ਤੇ ਪਞ੍ਞਾਵਿਮੁਤ੍ਤੋਤਿ, ਤਮ੍ਪਿ ਦੀਪੇਨ੍ਤਿ ਪਣ੍ਡਿਤਾ.
੧੮੧੧. ਆਨੇਞ੍ਜਪਾਦਕਜ੍ਝਾਨ-ਨਾਮਕਾਯਵਿਸੇਸਤੋ;
ਸਚ੍ਛਿਕਤ੍ਵਾਨ ਨਿਬ੍ਬਾਨਂ, ਮਜ੍ਝੇ ਛ ਕਾਯਸਕ੍ਖਿਨੋ.
੧੮੧੨. ਅਰੂਪਤੋ ਚ ਮਗ੍ਗੇਨ, ਆਨੇਞ੍ਜੇਨ ਚ ਰੂਪਤੋ;
ਵਿਮੁਤ੍ਤੋ ਉਭਤੋਭਾਗ-ਵਿਮੁਤ੍ਤੋ ਅਰਹਾ ਭਵੇ.
੧੮੧੩. ਤਿਵਿਮੋਕ੍ਖਮੁਖੀਭੂਤਾ, ਇਤਿ ਵੁਟ੍ਠਾਨਸਾਧਿਕਾ;
ਸਤ੍ਤਪੁਗ੍ਗਲਭੇਦਞ੍ਚ, ਸਮ੍ਪਾਦੇਤਿ ਵਿਪਸ੍ਸਨਾ.
੧੮੧੪. ਅਧਿਮੁਚ੍ਚਤਿ ਸਦ੍ਧਾ ਚ, ਯਥਾਵਤ੍ਥੁਸਭਾਵਤੋ;
ਞੇਯ੍ਯਧਮ੍ਮੇਸੁ ਸਬ੍ਬਤ੍ਥ, ਪਞ੍ਞਾ ਚ ਪਟਿਵਿਜ੍ਝਤਿ.
੧੮੧੫. ਤਸ੍ਮਾ ਸਦ੍ਧਾ ਚ ਪਞ੍ਞਾ ਚ, ਵਤ੍ਥੁਨਿਚ੍ਛਯਲਕ੍ਖਣਾ;
ਵਤ੍ਥੁਪ੍ਪਤਿਟ੍ਠਿਤਾ ਚਾਯਂ, ਤਿਲਕ੍ਖਣਵਿਪਸ੍ਸਨਾ.
੧੮੧੬. ਤਸ੍ਮਾ ਸਦ੍ਧਾਧੁਰੋ ਯੋਗੀ, ਦਿਸ੍ਵੋਲ਼ਾਰਿਕਲਕ੍ਖਣਂ;
ਤਤੋ ਪਰਮਨਤ੍ਤਾਤਿ, ਸੁਖੁਮੇ ਅਧਿਮੁਚ੍ਚਤਿ.
੧੮੧੭. ਤਸ੍ਸੇਵਮਧਿਮੁਤ੍ਤਸ੍ਸ, ਸਦ੍ਧਾ ਵਾ ਪਨ ਕੇਵਲਾ;
ਸਮਾਧਿਨ੍ਦ੍ਰਿਯਾਧਿਕਾ ਚ, ਵੁਟ੍ਠਾਨਘਟਿਕਾ ਭਵੇ.
੧੮੧੮. ਥੂਲਲਕ੍ਖਣਮੋਹਾਯ, ਪਞ੍ਞਾਧੁਰੇ ਵਿਪਸ੍ਸਤੋ;
ਧਮ੍ਮਸਭਾਵਮਾਹਚ੍ਚ, ਸੁਖੁਮਂ ਪਟਿਵਿਜ੍ਝਤਿ.
੧੮੧੯. ਤਸ੍ਮਾ ਸਦ੍ਧਾਧੁਰਸ੍ਸੇਵ, ਵੁਟ੍ਠਾਨਦ੍ਵਯਮਾਦਿਤੋ;
ਅਨ੍ਤੇ ਸਦ੍ਧਾਨੁਗਤਸ੍ਸ, ਪਞ੍ਞਾ ਸੁਪਰਿਪੂਰਤਿ.
੧੮੨੦. ਪਞ੍ਞਾਧੁਰਸ੍ਸ ਸੇਸਨ੍ਤਿ, ਕੇਚਿ ਆਚਰਿਯਾ ਪਨ;
ਧੁਰਸਂਸਨ੍ਦਨਂ ਨਾਮ, ਵੁਟ੍ਠਾਨੇਸੁ ਵਿਭਾਵਯੁਂ.
੧੮੨੧. ਸਤ੍ਤਕ੍ਖਤ੍ਤੁਪਰਮੋ ਚ,
ਕੋਲਂਕੋਲੋ ਤਥਾਪਰੋ;
ਏਕਬੀਜੀਤਿ ਤਿਵਿਧੋ,
ਸੋਤਾਪਨ੍ਨੋ ਪਵੁਚ੍ਚਤਿ.
੧੮੨੨. ਸਕਿਂਦੇਵ ਇਮਂ ਲੋਕਂ, ਆਗਨ੍ਤ੍ਵਾ ਪੁਨ ਪੁਗ੍ਗਲੋ;
ਸਕਦਾਗਾਮਿਨਾਮੇਨ, ਦੁਤਿਯੋਪਿ ਪਕਾਸਿਤੋ.
੧੮੨੩. ਅਨ੍ਤਰਾਪਰਿਨਿਬ੍ਬਾਯੀ, ਉਪਹਚ੍ਚਾਪਰੋ ਤਥਾ;
ਅਸਙ੍ਖਾਰਂ ਸਸਙ੍ਖਾਰਂ, ਉਦ੍ਧਂਸੋਤੋਤਿ ਪਞ੍ਚਧਾ.
੧੮੨੪. ਅਨਾਗਾਮੀ ਚ ਤਤਿਯੋ, ਚਤੁਤ੍ਥੋ ਅਰਹਾਤਿ ਚ;
ਇਤ੍ਥਂ ਫਲਟ੍ਠਾ ਚਤ੍ਤਾਰੋ, ਮਗ੍ਗਟ੍ਠਾ ਚ ਤਤੋਪਰੇ.
੧੮੨੫. ਭਾਵਨਾਪਰਿਯਾਯੇਨ, ਪਟਿਵੇਧਾਨੁਰੂਪਤੋ;
ਚਤ੍ਤਾਰੋ ਚ ਯੁਗਾ ਹੋਨ੍ਤਿ, ਅਟ੍ਠ ਚਾਰਿਯਪੁਗ੍ਗਲਾ.
੧੮੨੬. ਦਿਟ੍ਠਿਕਙ੍ਖਾ ਪਹੀਯਨ੍ਤਿ, ਆਦਿਮਗ੍ਗੇਨ ਸਬ੍ਬਥਾ;
ਅਪਾਯਗਮਨੀਯਮ੍ਪਿ, ਪਾਪਮਞ੍ਞਂ ਪਹੀਯਤਿ.
੧੮੨੭. ਸਕਦਾਗਾਮਿਮਗ੍ਗੇਨ, ਖੀਯਨ੍ਤੋਲ਼ਾਰਿਕਾ ਤਥਾ;
ਅਨਾਗਾਮਿਕਮਗ੍ਗੇਨ, ਕਾਮਦੋਸਾਵ ਸਬ੍ਬਥਾ.
੧੮੨੮. ਅਰਹਤ੍ਤੇਨ ਸਬ੍ਬੇਪਿ, ਕ੍ਲੇਸਾ ਖੀਯਨ੍ਤਿ ਸਬ੍ਬਥਾ;
ਕ੍ਲੇਸਹਾਨਿ ਯਥਾਯੋਗ-ਮਿਤਿ ਞੇਯ੍ਯਾ ਵਿਭਾਵਿਨਾ.
੧੮੨੯. ਪਟਿਸਮ੍ਭਿਦਾ ਚਤਸ੍ਸੋ, ਅਤ੍ਥੇ ਧਮ੍ਮੇ ਨਿਰੁਤ੍ਤਿਯਂ;
ਪਟਿਭਾਨੇ ਚ ਭਾਸਨ੍ਤਿ, ਞਾਣਂ ਭੇਦਗਤਂ ਬੁਧਾ.
੧੮੩੦. ਹੇਤੁਪ੍ਫਲਞ੍ਚ ਨਿਬ੍ਬਾਨਂ, ਭਾਸਿਤਤ੍ਥੋ ਤਥਾਪਰੋ;
ਪਾਕਾਕ੍ਰਿਯਾਤਿ ਪਞ੍ਚੇਤੇ, ਅਤ੍ਥਨਾਮੇਨ ਭਾਸਿਤਾ.
੧੮੩੧. ਹੇਤੁ ਚਾਰਿਯਮਗ੍ਗੋ ਚ, ਭਾਸਿਤਞ੍ਚ ਤਥਾਪਰਂ;
ਕੁਸਲਾਕੁਸਲਞ੍ਚੇਤਿ, ਪਞ੍ਚ ਧਮ੍ਮੋ ਪਕਾਸਿਤੋ.
੧੮੩੨. ਤਤ੍ਥੇਵਂ ਦਸਧਾ ਭੇਦੇ, ਅਤ੍ਥਧਮ੍ਮੇ ਯਥਾਰਹਂ;
ਯੋ ਵੋਹਾਰੋ ਸਭਾਵੇਨ, ਸਾ ਨਿਰੁਤ੍ਤੀਤਿ ਸਮ੍ਮਤਾ.
੧੮੩੩. ਤਂਤਂਗੋਚਰਕਿਚ੍ਚਾਦਿ-ਭੇਦਭਿਨ੍ਨਂ ਤਹਿਂ ਤਹਿਂ;
ਪਵਤ੍ਤਮਾਨਂ ਯਂ ਞਾਣਂ, ਪਟਿਭਾਨਂ ਤਮੀਰਿਤਂ.
੧੮੩੪. ਪੁਬ੍ਬਯੋਗੋ ਬਾਹੁਸ੍ਸਚ੍ਚਂ,
ਦੇਸਭਾਸਾ ਤਥਾਗਮੋ;
ਪਰਿਪੁਚ੍ਛਾ ਚਾਧਿਗਮੋ,
ਨਿਸ੍ਸਯੋ ਮਿਤ੍ਤਸਮ੍ਪਦਾ.
੧੮੩੫. ਇਚ੍ਚੂਪਨਿਸ੍ਸਯਂ ਲਦ੍ਧਾ, ਭਿਜ੍ਜਤਿ ਪਟਿਸਮ੍ਭਿਦਾ;
ਅਸੇਕ੍ਖਭੂਮਿਯਂ ਵਾਥ, ਸੇਕ੍ਖਭੂਮਿਯਮੇਵ ਵਾ.
੧੮੩੬. ਸਰਸ੍ਸਤੋ ਆਗਮਤੋ, ਤਥਾਲਮ੍ਬਣਤੋਪਿ ਚ;
ਨਾਮੁਪ੍ਪਤ੍ਤਿਂ ਪਕਾਸੇਨ੍ਤਿ, ਫਲਸ੍ਸ ਤਿਵਿਧਂ ਬੁਧਾ.
੧੮੩੭. ਤਿਧਾ ਤਤੋ ਸਮਾਪਤ੍ਤਿ, ਸੋਤਾਪਤ੍ਤਿਫਲਾਦਿਕਾ;
ਸੁਞ੍ਞਤਾ ਚਾਨਿਮਿਤ੍ਤਾ ਚ, ਤਥਾਪ੍ਪਣਿਹਿਤਾਤਿ ਚ.
੧੮੩੮. ਤਞ੍ਚ ਵੁਤ੍ਤਨਯੇਨੇਵ, ਸਮਾਪਜ੍ਜਿਤੁਮਿਚ੍ਛਤੋ;
ਵਿਪਸ੍ਸਨ੍ਤਸ੍ਸ ਸਙ੍ਖਾਰੇ, ਫਲਮਪ੍ਪੇਤਿ ਅਤ੍ਤਨੋ.
੧੮੩੯. ਨਿਰੋਧਂ ਤੁ ਸਮਾਪਤ੍ਤਿਂ, ਰੂਪਾਰੂਪਸ੍ਸ ਲਾਭਕੋ;
ਸਮਾਪਜ੍ਜਤਾਨਾਗਾਮੀ, ਅਰਹਾ ਚ ਯਥਾ ਤਥਾ.
੧੮੪੦. ਰੂਪਾਰੂਪਸਮਾਪਤ੍ਤਿਂ, ਸਮਾਪਜ੍ਜ ਯਥਾਕ੍ਕਮਂ;
ਵੁਟ੍ਠਹਿਤ੍ਵਾ ਵਿਪਸ੍ਸਨ੍ਤੋ, ਤਤ੍ਥ ਤਤ੍ਥੇਵ ਸਙ੍ਖਤੇ.
੧੮੪੧. ਯੁਗਨਨ੍ਧਂ ਪਵਤ੍ਤੇਤ੍ਵਾ, ਸਮਥਞ੍ਚ ਵਿਪਸ੍ਸਨਂ;
ਯਾਵਾਕਿਞ੍ਚਞ੍ਞਾਯਤਨ-ਮਿਤ੍ਥਂ ਪਤ੍ਵਾ ਤਤੋ ਪਰਂ.
੧੮੪੨. ਅਧਿਟ੍ਠੇਯ੍ਯਮਧਿਟ੍ਠਾਯ, ਕਤ੍ਵਾਭੋਗਂ ਯਥਾਰਹਂ;
ਮਗ੍ਗਾਰੂਪਸਮਾਪਤ੍ਤਿਂ, ਸਮਾਪਜ੍ਜਤਿ ਪਣ੍ਡਿਤੋ.
੧੮੪੩. ਤਤੋ ਨਿਰੋਧਂ ਫੁਸਤਿ, ਚਿਤ੍ਤੁਪ੍ਪਾਦਦ੍ਵਯਾ ਪਰਂ;
ਤਸ੍ਸੇਵਂ ਮਨਸਾਭਾਵੋ, ਨਿਰੋਧੋਤਿ ਪਵੁਚ੍ਚਤਿ.
੧੮੪੪. ਫਲਚਿਤ੍ਤਸਮੁਪ੍ਪਾਦਾ, ਵੁਟ੍ਠਾਨਂ ਤਸ੍ਸ ਦੀਪਿਤਂ;
ਤਤੋ ਭਵਙ੍ਗਂ ਛੇਤ੍ਵਾਨ, ਪਚ੍ਚਵੇਕ੍ਖਤਿ ਬੁਦ੍ਧਿਮਾ.
੧੮੪੫. ਇਚ੍ਚਾਨੇਕਗੁਣਾਧਾਰਂ, ਪਞ੍ਞਾਭਾਵਨਮੁਤ੍ਤਮਂ;
ਭਾਵੇਯ੍ਯ ਮਤਿਮਾ ਯੋਗੀ, ਪਤ੍ਥੇਨ੍ਤੋ ਹਿਤਮਤ੍ਤਨੋ.
੧੮੪੬. ਇਤ੍ਥਂ ਸੁਸਮ੍ਪਾਦਿਤਸੀਲਚਿਤ੍ਤ-
ਪਞ੍ਞਾਵਿਸੁਦ੍ਧੀ ਪਟਿਪਾਦਯਨ੍ਤਾ;
ਪਤ੍ਵਾਨ ਸਮ੍ਬੋਧਿਮਪੇਤਸੋਕਾ,
ਪਾਲੇਨ੍ਤਿ ਸੋਤ੍ਥਿਂ ਪਰਮਂ ਚਿਰਾਯ.
੧੮੪੭. ਤੇ ਪਤ੍ਤਿਪਤ੍ਤਾ ਪਰਮਪ੍ਪਤੀਤਾ,
ਪਕ੍ਖਾਲਿਤਕ੍ਲੇਸਮਲਾ ਮਹੇਸੀ;
ਅਚ੍ਚਨ੍ਤਵੋਦਾਤਗੁਣੋਦਿਤਤ੍ਤਾ,
ਲੋਕਸ੍ਸ ਹੋਨ੍ਤੁਤ੍ਤਮਦਕ੍ਖਿਣੇਯ੍ਯਾ.
ਇਤਿ ਨਾਮਰੂਪਪਰਿਚ੍ਛੇਦੇ ਨਿਸ੍ਸਨ੍ਦਫਲਵਿਭਾਗੋ ਨਾਮ
ਤੇਰਸਮੋ ਪਰਿਚ੍ਛੇਦੋ.
ਨਿਟ੍ਠਿਤੋ ਚ ਸਬ੍ਬਥਾਪਿ ਵਿਪਸ੍ਸਨਾਵਿਭਾਗੋ.
ਨਿਗਮਨਕਥਾ
੧੮੪੮. ਏਤ੍ਤਾਵਤਾ ਪਟਿਞ੍ਞਾਤੋ, ਪਵਕ੍ਖਾਮੀਤਿ ਆਦਿਤੋ;
ਨਾਮਰੂਪਪਰਿਚ੍ਛੇਦੋ, ਪਰਿਨਿਟ੍ਠਾਪਿਤੋ ਮਯਾ.
੧੮੪੯. ਤੇਰਸੇਵ ਪਰਿਚ੍ਛੇਦਾ, ਵਿਭਤ੍ਤਾ ਸਤ੍ਤ ਸਾਧਿਕਾ;
ਨਾਮਰੂਪਪਰਿਚ੍ਛੇਦੇ, ਭਾਣਵਾਰਾ ਪਕਾਸਿਤਾ.
੧੮੫੦. ਅਭਿਧਮ੍ਮਪਰਮਤ੍ਥਾ, ਸਮਥੋ ਚ ਵਿਪਸ੍ਸਨਾ;
ਵਿਸੁਂ ਵਿਸੁਂ ਵਿਭਤ੍ਤਾਤਿ, ਵਿਭਾਗੇਤ੍ਥ ਤਿਧਾ ਮਤਾ.
੧੮੫੧. ਸੋਯਂ ਵਿਜ੍ਜਾਵਿਮੋਕ੍ਖਾ ਚ, ਹਦਯੇਸੁ ਵਿਭਾਵਿਨਂ;
ਵਲ੍ਲਭਤ੍ਤਮਧਿਟ੍ਠਾਯ, ਸਾਸਨੇਤ੍ਥ ਗਵੇਸਿਨਂ.
੧੮੫੨. ਮਨੋਗਤਤਮੁਦ੍ਧਂਸੀ, ਰਵਿਰਂਸੀਵ ਪਣ੍ਡਿਤੋ;
ਦਸ੍ਸੇਤੁ ਚਿਰਮਾਲੋਕਂ, ਸਦ੍ਧਮ੍ਮਰਤਨਾਲਯੇ.
੧੮੫੩. ਪਣ੍ਡਿਚ੍ਚਂ ਪਰਮਤ੍ਥੇਸੁ, ਪਾਟਵਂ ਪਟਿਪਤ੍ਤਿਯਂ;
ਪਤ੍ਥਯਨ੍ਤੇਨ ਭਿਕ੍ਖੂਨ-ਮਿਤ੍ਥਂ ਸੁਗਤਸਾਸਨੇ.
੧੮੫੪. ਨਾਮਰੂਪਪਰਿਚ੍ਛੇਦ-ਮਸਂਕਿਣ੍ਣਮਨਾਕੁਲਂ;
ਕੁਬ੍ਬਤਾ ਹਿਤਕਾਮੇਨ, ਸੁਕਤੇਨ ਕਤੇਨ ਮੇ.
੧੮੫੫. ਮਹਾਮੇਰੁਨਿਭਂ ਗੇਹਂ, ਮਹਾਚੇਤਿਯਭੂਸਿਤਂ;
ਮਹਾਵਿਹਾਰਮਾਰੁਲ਼੍ਹ-ਮਹਾਬੋਧਿਮਹੁਸ੍ਸਵਂ.
੧੮੫੬. ਅਲਙ੍ਕਾਤੁਂ ਪਹੋਨ੍ਤਾਲਂ, ਚਿਰਕਾਲਂ ਤਪੋਧਨਾ;
ਲਙ੍ਕਾਦੀਪਸ੍ਸਲਙ੍ਕਾਰਂ, ਕਲਙ੍ਕਾਪਗਤਾਲਯਂ.
੧੮੫੭. ਨਾਮਰੂਪਪਰਿਚ੍ਛੇਦੋ,
ਅਨ੍ਤਰਾਯਂ ਵਿਨਾ ਯਥਾ;
ਨਿਟ੍ਠਿਤੋਯਂ ਤਥਾ ਲੋਕੇ,
ਨਿਟ੍ਠਨ੍ਤਜ੍ਝਾਸਯਾ ਸੁਭਾ.
ਇਤਿ ਅਨੁਰੁਦ੍ਧਾਚਰਿਯੇਨ ਵਿਰਚਿਤਂ
ਨਾਮਰੂਪਪਰਿਚ੍ਛੇਦਪਕਰਣਂ ਨਿਟ੍ਠਿਤਂ.