੧. ਪਠਮੋ ਪਰਿਚ੍ਛੇਦੋ
ਰੂਪਸਙ੍ਖੇਪੋ
੩. ਸਚ੍ਚਾਨਿ ਪਰਮਤ੍ਥਞ੍ਚ, ਸਮ੍ਮੁਤਿਞ੍ਚਾਤਿ ਦ੍ਵੇ ਤਹਿਂ;
ਥਦ੍ਧਭਾਵਾਦਿਨਾ ਞੇਯ੍ਯਂ, ਸਚ੍ਚਂ ਤਂ ਪਰਮਤ੍ਥਕਂ.
੪. ਸਨ੍ਨਿਵੇਸਵਿਸੇਸਾਦਿਞੇਯ੍ਯਂ ਸਮ੍ਮੁਤਿ ਤਂ ਦ੍ਵਯਂ;
ਭਾਵਸਙ੍ਕੇਤਸਿਦ੍ਧੀਨਂ, ਤਥਤ੍ਤਾ ਸਚ੍ਚਮੀਰਿਤਂ.
੫. ਪਰਮਤ੍ਥੋ ਸਨਿਬ੍ਬਾਨਪਞ੍ਚਕ੍ਖਨ੍ਧੇਤ੍ਥ ਰਾਸਿਤੋ;
ਖਨ੍ਧਤ੍ਥੋ ਚ ਸਮਾਸੇਤ੍ਵਾ, ਵੁਤ੍ਤੋਤੀਤਾਦਿਭੇਦਨਂ.
੬. ਵੇਦਨਾਦੀਸੁਪੇਕਸ੍ਮਿਂ, ਖਨ੍ਧਸਦ੍ਦੋ ਤੁ ਰੁਲ਼੍ਹਿਯਾ;
ਸਮੁਦ੍ਦਾਦੇਕਦੇਸੇ ਤੁ, ਸਮੁਦ੍ਦਾਦਿਰਵੋ ਯਥਾ.
੭. ਤਤ੍ਥ ਸੀਤਾਦਿਰੁਪ੍ਪਤ੍ਤਾ, ਰੂਪਂ ਭ੍ਵਾਪਾਨਲਾਨਿਲਂ;
ਭੂਤਂ ਕਥਿਨਦਵਤਾਪਚਨੀਰਣਭਾਵਕਂ.
੮. ਚਕ੍ਖੁ ਸੋਤਞ੍ਚ ਘਾਨਞ੍ਚ, ਜਿਵ੍ਹਾ ਕਾਯੋ ਪਭਾ ਰਵੋ;
ਗਨ੍ਧੋ ਰਸੋਜਾ ਇਤ੍ਥੀ ਚ, ਪੁਮਾ ਵਤ੍ਥੁ ਚ ਜੀਵਿਤਂ.
੯. ਖਂ ਜਾਤਿ ਜਰਤਾ ਭਙ੍ਗੋ, ਰੂਪਸ੍ਸ ਲਹੁਤਾ ਤਥਾ;
ਮੁਦੁਕਮ੍ਮਞ੍ਞਤਾ ਕਾਯਵਚੀਵਿਞ੍ਞਤ੍ਤਿ ਭੂਤਿਕਂ.
੧੦. ਚਕ੍ਖਾਦੀ ਦਟ੍ਠੁਕਾਮਾਦਿਹੇਤੁਕਮ੍ਮਜਭੂਤਿਕਾ;
ਪਸਾਦਾ ਰੂਪਸਦ੍ਦਾਦੀ, ਚਕ੍ਖੁਞਾਣਾਦਿਗੋਚਰਾ.
੧੧. ਓਜਾ ਹਿ ਯਾਪਨਾ ਇਤ੍ਥਿਪੁਮਲਿਙ੍ਗਾਦਿਹੇਤੁਕਂ;
ਭਾਵਦ੍ਵਯਂ ਤੁ ਕਾਯਂਵ, ਬ੍ਯਾਪਿ ਨੋ ਸਹਵੁਤ੍ਤਿਕਂ.
੧੨. ਨਿਸ੍ਸਯਂ ਵਤ੍ਥੁ ਧਾਤੂਨਂ, ਦ੍ਵਿਨ੍ਨਂ ਕਮ੍ਮਜਪਾਲਨਂ;
ਜੀਵਿਤਂ ਉਪ੍ਪਲਾਦੀਨਂ, ਉਦਕਂਵ ਠਿਤਿਕ੍ਖਣੇ.
੧੩. ਖਂ ਰੂਪਾਨਂ ਪਰਿਚ੍ਛੇਦੋ, ਜਾਤਿਆਦਿਤ੍ਤਯਂ ਪਨ;
ਰੂਪਨਿਬ੍ਬਤ੍ਤਿ ਪਾਕੋ ਚ, ਭੇਦੋ ਚੇਵ ਯਥਾਕ੍ਕਮਂ.
੧੪. ਲਹੁਤਾਦਿਤ੍ਤਯਂ ਤਂ ਹਿ, ਰੂਪਾਨਂ ਕਮਤੋ ਸਿਯਾ;
ਅਦਨ੍ਧਥਦ੍ਧਤਾ ਚਾਪਿ, ਕਾਯਕਮ੍ਮਾਨੁਕੂਲਤਾ.
੧੫. ਅਭਿਕ੍ਕਮਾਦਿਜਨਕਚਿਤ੍ਤਜਸ੍ਸਾਨਿਲਸ੍ਸ ਹਿ;
ਵਿਕਾਰੋ ਕਾਯਵਿਞ੍ਞਤ੍ਤਿ, ਰੂਪਤ੍ਥਮ੍ਭਾਦਿਕਾਰਣਂ.
੧੬. ਵਚੀਭੇਦਕਚਿਤ੍ਤੇਨ, ਭੂਤਭੂਮਿਵਿਕਾਰਤਾ;
ਵਚੀਵਿਞ੍ਞਤ੍ਤੁਪਾਦਿਨ੍ਨਘਟ੍ਟਨਸ੍ਸੇਵ ਕਾਰਣਂ.
੧੭. ਰੂਪਮਬ੍ਯਾਕਤਂ ਸਬ੍ਬਂ, ਵਿਪ੍ਪਯੁਤ੍ਤਮਹੇਤੁਕਂ;
ਅਨਾਲਮ੍ਬਂ ਪਰਿਤ੍ਤਾਦਿ, ਇਤਿ ਏਕਵਿਧਂ ਨਯੇ.
੧੮. ਅਜ੍ਝਤ੍ਤਿਕਾਨਿ ਚਕ੍ਖਾਦੀ, ਪਞ੍ਚੇਤੇਵ ਪਸਾਦਕਾ;
ਵਤ੍ਥੁਨਾ ਵਤ੍ਥੁ ਤਾਨੇਵ, ਦ੍ਵਾਰਾ ਵਿਞ੍ਞਤ੍ਤਿਭੀ ਸਹ.
੧੯. ਸੇਸਂ ਬਾਵੀਸਤਿ ਚੇਕਵੀਸ ਵੀਸਤਿ ਬਾਹਿਰਂ;
ਅਪ੍ਪਸਾਦਮਵਤ੍ਥੁਂ ਚ, ਅਦ੍ਵਾਰਞ੍ਚ ਯਥਾਕ੍ਕਮਂ.
੨੦. ਪਸਾਦਾ ਪਞ੍ਚ ਭਾਵਾਯੁ, ਇਨ੍ਦ੍ਰਿਯਨਿਨ੍ਦ੍ਰਿਯੇਤਰਂ;
ਵਿਨਾਪਂ ਆਦਿਤੋ ਯਾਵ, ਰਸਾ ਥੂਲਂ ਨ ਚੇਤਰਂ.
੨੧. ਅਟ੍ਠਕਂ ਅਵਿਨਿਬ੍ਭੋਗਂ, ਵਣ੍ਣਗਨ੍ਧਰਸੋਜਕਂ;
ਭੂਤਂ ਤਂ ਤੁ ਵਿਨਿਬ੍ਭੋਗਮਿਤਰਨ੍ਤਿ ਵਿਨਿਦ੍ਦਿਸੇ.
੨੨. ਅਟ੍ਠਾਰਸਾਦਿਤੋ ਰੂਪਾ, ਨਿਪ੍ਫਨ੍ਨਂ ਤੁ ਨ ਚੇਤਰਂ;
ਫੋਟ੍ਠਬ੍ਬਮਾਪਵਜ੍ਜਂ ਤੁ, ਭੂਤਂ ਕਾਮੇ ਨ ਚੇਤਰਂ.
੨੩. ਸੇਕ੍ਖਸਪ੍ਪਟਿਘਾਸੇਕ੍ਖਪਟਿਘਂ ਦ੍ਵਯਵਜ੍ਜਿਤਂ;
ਵਣ੍ਣਂ ਤਦਿਤਰਂ ਥੂਲਂ, ਸੁਖੁਮਞ੍ਚੇਤਿ ਤਂ ਤਿਧਾ.
੨੪. ਕਮ੍ਮਜਾਕਮ੍ਮਜਂਨੇਵਕਮ੍ਮਾਕਮ੍ਮਜਤੋ ਤਿਧਾ;
ਚਿਤ੍ਤੋਜਉਤੁਜਾਦੀਨਂ, ਵਸੇਨਾਪਿ ਤਿਧਾ ਤਥਾ.
੨੫. ਦਿਟ੍ਠਂ ਸੁਤਂ ਮੁਤਞ੍ਚਾਪਿ, ਵਿਞ੍ਞਾਤਂ ਵਤ ਚੇਤਸਾ;
ਏਕਮੇਕਞ੍ਚ ਪਞ੍ਚਾਪਿ, ਵੀਸਤਿ ਚ ਕਮਾ ਸਿਯੁਂ.
੨੬. ਹਦਯਂ ਵਤ੍ਥੁ ਵਿਞ੍ਞਤ੍ਤਿ, ਦ੍ਵਾਰਂ ਚਕ੍ਖਾਦਿਪਞ੍ਚਕਂ;
ਵਤ੍ਥੁ ਦ੍ਵਾਰਞ੍ਚ ਸੇਸਾਨਿ, ਵਤ੍ਥੁ ਦ੍ਵਾਰਞ੍ਚ ਨੋ ਸਿਯਾ.
੨੭. ਨਿਪ੍ਫਨ੍ਨਂ ਰੂਪਰੂਪਂ ਖਂ, ਪਰਿਚ੍ਛੇਦੋਥ ਲਕ੍ਖਣਂ;
ਜਾਤਿਆਦਿਤ੍ਤਯਂ ਰੂਪਂ, ਵਿਕਾਰੋ ਲਹੁਤਾਦਿਕਂ.
੨੮. ਯਥਾ ਸਙ੍ਖਤਧਮ੍ਮਾਨਂ, ਲਕ੍ਖਣਂ ਸਙ੍ਖਤਂ ਤਥਾ;
ਪਰਿਚ੍ਛੇਦਾਦਿਕਂ ਰੂਪਂ, ਤਜ੍ਜਾਤਿਮਨਤਿਕ੍ਕਮਾ.
੨੯. ਕਮ੍ਮਚਿਤ੍ਤਾਨਲਾਹਾਰਪਚ੍ਚਯਾਨਂ ਵਸੇਨਿਧ;
ਞੇਯ੍ਯਾ ਪਵਤ੍ਤਿ ਰੂਪਸ੍ਸ, ਪਿਣ੍ਡਾਨਞ੍ਚ ਵਸਾ ਕਥਂ.
੩੦. ਕਮ੍ਮਜਂ ਸੇਨ੍ਦ੍ਰਿਯਂ ਵਤ੍ਥੁ, ਵਿਞ੍ਞਤ੍ਤਿ ਚਿਤ੍ਤਜਾ ਰਵੋ;
ਚਿਤ੍ਤਗ੍ਗਿਜੋ ਲਹੁਤਾਦਿਤ੍ਤਯਂ ਚਿਤ੍ਤਾਨਲਨ੍ਨਜਂ.
੩੧. ਅਟ੍ਠਕਂ ਜਾਤਿ ਚਾਕਾਸੋ, ਚਤੁਜਾ ਜਰਤਾ ਖਯਂ;
ਕੁਤੋਚਿ ਨੇਵ ਜਾਤਂ ਤਪ੍ਪਾਕਭੇਦਂ ਹਿ ਤਂ ਦ੍ਵਯਂ.
੩੨. ਜਾਤਿਯਾਪਿ ਨ ਜਾਤਤ੍ਤਂ, ਕੁਤੋਚਿਟ੍ਠਕਥਾਨਯਾ;
ਲਕ੍ਖਣਾਭਾਵਤੋ ਤਸ੍ਸਾ, ਸਤਿ ਤਸ੍ਮਿਂ ਨ ਨਿਟ੍ਠਿਤਿ.
੩੩. ਕਮ੍ਮਚਿਤ੍ਤਾਨਲਨ੍ਨੇਹਿ, ਪਿਣ੍ਡਾ ਨਵ ਚ ਸਤ੍ਤ ਚ;
ਚਤ੍ਤਾਰੋ ਦ੍ਵੇ ਚ ਵਿਞ੍ਞੇਯ੍ਯਾ, ਸਜੀਵੇ ਦ੍ਵੇ ਅਜੀਵਕੇ.
੩੪. ਅਟ੍ਠਕਂ ਜੀਵਿਤੇਨਾਯੁਨਵਕਂ ਭਾਵਵਤ੍ਥੁਨਾ;
ਚਕ੍ਖਾਦੀ ਪਞ੍ਚ ਦਸਕਾ, ਕਲਾਪਾ ਨਵ ਕਮ੍ਮਜਾ.
੩੫. ਸੁਦ੍ਧਟ੍ਠਵਿਞ੍ਞਤ੍ਤਿਯੁਤ੍ਤਨਵਕੋਪਿ ਚ ਦਸਕੋ;
ਸੁਦ੍ਧਸਦ੍ਦੇਨ ਨਵਕੋ, ਲਹੁਤਾਦਿਦਸੇਕਕੋ.
੩੬. ਵਿਞ੍ਞਤ੍ਤਿਲਹੁਤਾਦੀਹਿ, ਪੁਨ ਦ੍ਵਾਦਸ ਤੇਰਸ;
ਚਿਤ੍ਤਜਾ ਇਤਿ ਵਿਞ੍ਞੇਯ੍ਯਾ, ਕਲਾਪਾ ਸਤ੍ਤ ਵਾ ਛ ਵਾ.
੩੭. ਸੁਦ੍ਧਟ੍ਠਂ ਸਦ੍ਦਨਵਕਂ, ਲਹੁਤਾਦਿਦਸੇਕਕਂ;
ਸਦ੍ਦੇਨਲਹੁਤਾਦੀਹਿ, ਚਤੁਰੋਤੁਜਕਣ੍ਣਿਕਾ.
੩੮. ਸੁਦ੍ਧਟ੍ਠਲਹੁਤਾਦੀਹਿ, ਅਨ੍ਨਜਾ ਦ੍ਵੇਤਿਮੇ ਨਵ;
ਸਤ੍ਤ ਚਤ੍ਤਾਰਿ ਦ੍ਵੇ ਚੇਤਿ, ਕਲਾਪਾ ਵੀਸਤੀ ਦ੍ਵਿਭਿ.
੩੯. ਤਯਟ੍ਠਕਾ ਚ ਚਤ੍ਤਾਰੋ, ਨਵਕਾ ਦਸਕਾ ਨਵ;
ਤਯੋ ਦ੍ਵੇਕੋ ਚ ਏਕੇਨ, ਦਸ ਦ੍ਵੀਹਿ ਚ ਤੀਹਿ ਚ.
੪੦. ਚਤੁਨ੍ਨਮ੍ਪਿ ਚ ਧਾਤੂਨਂ, ਅਧਿਕਂਸਵਸੇਨਿਧ;
ਰੂਪਭੇਦੋਥ ਵਿਞ੍ਞੇਯ੍ਯੋ, ਕਮ੍ਮਚਿਤ੍ਤਾਨਲਨ੍ਨਜੋ.
੪੧. ਕੇਸਾਦਿਮਤ੍ਥਲੁਙ੍ਗਨ੍ਤਾ, ਪਥਵਂਸਾਤਿ ਵੀਸਤਿ;
ਪਿਤ੍ਤਾਦਿਮੁਤ੍ਤਕਨ੍ਤਾ ਤੇ, ਜਲਂਸਾ ਦ੍ਵਾਦਸੀਰਿਤਾ.
੪੨. ਯੇਨ ਸਨ੍ਤਪ੍ਪਨਂ ਯੇਨ, ਜੀਰਣਂ ਦਹਨਂ ਤਥਾ;
ਯੇਨਸਿਤਾਦਿਪਾਕੋਤਿ, ਚਤੁਰਂਸਾਨਲਾਧਿਕਾ.
੪੩. ਉਦ੍ਧਾਧੋਗਮਕੁਚ੍ਛਿਟ੍ਠਾ, ਕੋਟ੍ਠਾਸੇਯ੍ਯਙ੍ਗਸਾਰਿ ਚ;
ਅਸ੍ਸਾਸੋਤਿ ਚ ਵਿਞ੍ਞੇਯ੍ਯਾ, ਛਲ਼ਂਸਾ ਵਾਯੁਨਿਸ੍ਸਿਤਾ.
੪੪. ਪੁਬ੍ਬਮੁਤ੍ਤਕਰੀਸਞ੍ਚੁਦਰਿਯਂ ਚਤੁਰੋਤੁਜਾ;
ਕਮ੍ਮਾ ਪਾਚਗ੍ਗਿ ਚਿਤ੍ਤਮ੍ਹਾ-ਸ੍ਸਾਸੋਤਿ ਛਪਿ ਏਕਜਾ.
੪੫. ਸੇਦਸਿਙ੍ਘਾਨਿਕਸ੍ਸੁ ਚ, ਖੇਲ਼ੋ ਚਿਤ੍ਤੋਤੁਸਮ੍ਭਵਾ;
ਦ੍ਵਿਜਾ ਦ੍ਵਤ੍ਤਿਂਸ ਕੋਟ੍ਠਾਸਾ, ਸੇਸਾ ਏਵ ਚਤੁਬ੍ਭਵਾ.
੪੬. ਏਕਜੇਸ੍ਵਾਦਿਚਤੂਸੁ, ਉਤੁਜਾ ਚਤੁਰਟ੍ਠਕਾ;
ਜੀਵੀਤਨਵਕੋ ਪਾਚੇਸ੍ਸਾਸੇ ਚਿਤ੍ਤਭਵਟ੍ਠਕੋ.
੪੭. ਦ੍ਵਿਜੇਸੁ ਮਨਤੇਜੇਹਿ, ਦ੍ਵੇ ਦ੍ਵੇ ਹੋਨ੍ਤਿ ਪਨਟ੍ਠਕਾ;
ਸੇਸਤੇਜਾਨਿਲਂਸੇਸੁ, ਏਕੇਕਮ੍ਹਿ ਤਯੋ ਤਯੋ.
੪੮. ਅਟ੍ਠਕੋਜਮਨਗ੍ਗੀਹਿ, ਹੋਨ੍ਤਿ ਅਟ੍ਠਸੁ ਕਮ੍ਮਤੋ;
ਅਟ੍ਠਾਯੁਨਵਕਾ ਏਵਂ, ਇਮੇ ਅਟ੍ਠ ਚਤੁਬ੍ਭਵਾ.
੪੯. ਚਤੁਵੀਸੇਸੁ ਸੇਸੇਸੁ, ਚਤੁਜੇਸੁਟ੍ਠਕਾ ਤਯੋ;
ਏਕੇਕਮ੍ਹਿ ਚ ਵਿਞ੍ਞੇਯ੍ਯਾ, ਪਿਣ੍ਡਾ ਚਿਤ੍ਤਾਨਲਨ੍ਨਜਾ.
੫੦. ਕਮ੍ਮਜਾ ਕਾਯਭਾਵਵ੍ਹਾ, ਦਸਕਾਪਿ ਸਿਯੁਂ ਤਹਿਂ;
ਚਤੁਵੀਸੇਸੁ ਅਂਸੇਸੁ, ਏਕੇਕਮ੍ਹਿ ਦੁਵੇ ਦੁਵੇ.
੫੧. ਪਞ੍ਚਾਪਿ ਚਕ੍ਖੁਸੋਤਾਦੀ, ਪਦੇਸਦਸਕਾ ਪੁਨ;
ਨਵਕਾ ਸਦ੍ਦਸਙ੍ਖਾਤਾ, ਦ੍ਵੇਤਿਚ੍ਚੇਵਂ ਕਲਾਪਤੋ.
੫੨. ਤੇਪਞ੍ਞਾਸ ਦਸੇਕਞ੍ਚ, ਨਵੁਤ੍ਤਰਸਤਾਨਿ ਚ;
ਦਸਕਾ ਨਵਕਾ ਚੇਵ, ਅਟ੍ਠਕਾ ਚ ਸਿਯੁਂ ਕਮਾ.
੫੩. ਸੇਕਪਞ੍ਚਸਤਂ ਕਾਯੇ, ਸਹਸ੍ਸਂ ਤਂ ਪਵਤ੍ਤਤਿ;
ਪਰਿਪੁਣ੍ਣਿਨ੍ਦ੍ਰਿਯੇ ਰੂਪਂ, ਨਿਪ੍ਫਨ੍ਨਂ ਧਾਤੁਭੇਦਤੋ.
੫੪. ਚਿਤ੍ਤੁਪ੍ਪਾਦੇ ਸਿਯੁਂ ਰੂਪ-ਹੇਤੂ ਕਮ੍ਮਾਦਯੋ ਪਨ;
ਠਿਤਿ ਨ ਪਾਠੇ ਚਿਤ੍ਤਸ੍ਸ, ਨ ਭਙ੍ਗੇ ਰੂਪਸਮ੍ਭਵੋ.
੫੫. ‘‘ਅਞ੍ਞਥਤ੍ਤਂ ਠਿਤਸ੍ਸਾ’’ਤਿ, ਵੁਤ੍ਤਤ੍ਤਾਵ ਠਿਤਿਕ੍ਖਣਂ;
ਅਤ੍ਥੀਤਿ ਚੇ ਪਬਨ੍ਧੇਨ, ਠਿਤਿ ਤਤ੍ਥ ਪਵੁਚ੍ਚਤਿ.
੫੬. ਅਥ ਵਾ ਤਿਕ੍ਖਣੇ ਕਮ੍ਮਂ, ਚਿਤ੍ਤਮਤ੍ਤੁਦਯਕ੍ਖਣੇ;
ਉਤੁਓਜਾਤ੍ਤਨੋ ਠਾਨੇ, ਰੂਪਹੇਤੂ ਭਵਨ੍ਤਿ ਹਿ.
੫੭. ਸੇਯ੍ਯਸ੍ਸਾਦਿਕ੍ਖਣੇ ਕਾਯ-
ਭਾਵਵਤ੍ਥੁਵਸਾ ਤਯੋ;
ਦਸਕਾ ਹੋਨ੍ਤਿਭਾਵਿਸ੍ਸ,
ਵਿਨਾ ਭਾਵਂ ਦੁਵੇ ਸਿਯੁਂ.
੫੮. ਤਤੋ ਪਰਞ੍ਚ ਕਮ੍ਮਗ੍ਗਿਚਿਤ੍ਤਜਾ ਤੇ ਚ ਪਿਣ੍ਡਿਕਾ;
ਅਟ੍ਠਕਾ ਚ ਦੁਵੇ ਪੁਬ੍ਬੇ, ਵੁਤ੍ਤਵੁਤ੍ਤਕ੍ਖਣੇ ਵਦੇ.
੫੯. ਕਾਲੇਨਾਹਾਰਜਂ ਹੋਤਿ, ਚਕ੍ਖਾਦਿਦਸਕਾਨਿ ਚ;
ਚਤੁਪਚ੍ਚਯਤੋ ਰੂਪਂ, ਸਮ੍ਪਿਣ੍ਡੇਵਂ ਪਵਤ੍ਤਤਿ.
੬੦. ਤਂ ਸਤ੍ਤਰਸਚਿਤ੍ਤਾਯੁ, ਵਿਨਾ ਵਿਞ੍ਞਤ੍ਤਿਲਕ੍ਖਣਂ;
ਸਨ੍ਤਤਾਮਰਣਾ ਰੂਪਂ, ਜਰਾਦਿਫਲਮਾਵਹਂ.
੬੧. ਭਙ੍ਗਾ ਸਤ੍ਤਰਸੁਪ੍ਪਾਦੇ, ਜਾਯਤੇ ਕਮ੍ਮਜਂ ਨ ਤਂ;
ਤਦੁਦ੍ਧਂ ਜਾਯਤੇ ਤਸ੍ਮਾ, ਤਕ੍ਖਯਾ ਮਰਣਂ ਭਵੇ.
੬੨. ਆਯੁਕਮ੍ਮੁਭਯੇਸਂ ਵਾ, ਖਯੇਨ ਮਰਣਂ ਭਵੇ;
ਉਪਕ੍ਕਮੇਨ ਵਾ ਕੇਸਞ੍ਚੁਪਚ੍ਛੇਦਕਕਮ੍ਮੁਨਾ.
੬੩. ਓਪਪਾਤਿਕਭਾਵਿਸ੍ਸ, ਦਸਕਾ ਸਤ੍ਤ ਕਮ੍ਮਜਾ;
ਕਾਮੇ ਆਦੋ ਭਵਨ੍ਤਗ੍ਗਿਜਾਹਿ ਪੁਬ੍ਬੇਵ ਭੂਯਤੇ.
੬੪. ਆਦਿਕਪ੍ਪਨਰਾਨਞ੍ਚ, ਅਪਾਯੇ ਅਨ੍ਧਕਸ੍ਸ ਚ;
ਬਧਿਰਸ੍ਸਾਪਿ ਆਦੋ ਛ, ਪੁਬ੍ਬੇਵੇਤਰਜਾ ਸਿਯੁਂ.
੬੫. ਤਤ੍ਥੇਵਨ੍ਧਬਧਿਰਸ੍ਸ, ਪਞ੍ਚ ਹੋਨ੍ਤਿ ਅਭਾਵਿਨੋ;
ਯੁਤ੍ਤਿਯਾ ਇਧ ਵਿਞ੍ਞੇਯ੍ਯਾ, ਪਞ੍ਚ ਵਾ ਚਤੁਰੋਪਿ ਵਾ.
੬੬. ਚਕ੍ਖਾਦਿਤ੍ਤਯਹੀਨਸ੍ਸ, ਚਤੁਰੋਵ ਭਵਨ੍ਤਿਤਿ;
ਵੁਤ੍ਤਂ ਉਪਪਰਿਕ੍ਖਿਤ੍ਵਾ, ਗਹੇਤਬ੍ਬਂ ਵਿਜਾਨਤਾ.
੬੭. ਰੂਪੇ ਜੀਵਿਤਛਕ੍ਕਞ੍ਚ, ਚਕ੍ਖਾਦਿਸਤ੍ਤਕਤ੍ਤਯਂ;
ਪਞ੍ਚ ਛ ਉਤੁਚਿਤ੍ਤੇਹਿ, ਪਞ੍ਚ ਛਾਸਞ੍ਞਿਨਂ ਭਵੇ.
੬੮. ਪਞ੍ਚਧਾਤ੍ਵਾਦਿਨਿਯਮਾ, ਪਾਠੇ ਗਨ੍ਧਰਸੋਜਨਂ;
ਨੁਪ੍ਪਤ੍ਤਿ ਤਤ੍ਥ ਭੂਤਾਨਂ, ਅਫੋਟ੍ਠਬ੍ਬਪਵਤ੍ਤਿਨਂ.
੬੯. ਥਦ੍ਧੁਣ੍ਹੀਰਣਭਾਵੋਵ, ਨਤ੍ਥਿ ਧਾਤ੍ਵਾਦਿਕਿਚ੍ਚਤੋ;
ਅਞ੍ਞਂ ਗਨ੍ਧਾਦੀਨਂ ਤੇਸਂ, ਤਕ੍ਕਿਚ੍ਚੇਨੋਪਲਦ੍ਧਿਤੋ.
੭੦. ਰੂਪੇ ਸਪ੍ਪਟਿਘਤ੍ਤਾਦਿ, ਤਤ੍ਥ ਰੁਪ੍ਪਨਤਾ ਵਿਯ;
ਘਟ੍ਟਨਞ੍ਚ ਰਵੁਪ੍ਪਾਦਸ੍ਸਞ੍ਞਤ੍ਥਸ੍ਸੇਵ ਹੇਤੁਤਾ.
੭੧. ਇਚ੍ਛਿਤਬ੍ਬਮਿਮੇਕਨ੍ਤਮੇਵਂ ਪਾਠਾਵਿਰੋਧਤੋ;
ਅਥ ਵਾ ਤੇਹਿ ਵਿਞ੍ਞੇਯ੍ਯਂ, ਦਸਕਂ ਨਵਕਟ੍ਠਕਂ.
੭੨. ਸਬ੍ਬਂ ਕਾਮਭਵੇ ਰੂਪਂ, ਰੂਪੇ ਏਕੂਨਵੀਸਤਿ;
ਅਸਞ੍ਞੀਨਂ ਦਸ ਗਨ੍ਧਰਸੋਜਾਹਿ ਚ ਬ੍ਰਹ੍ਮੁਨਂ.
ਇਤਿ ਸਚ੍ਚਸਙ੍ਖੇਪੇ ਰੂਪਸਙ੍ਖੇਪੋ ਨਾਮ
ਪਠਮੋ ਪਰਿਚ੍ਛੇਦੋ.