੨. ਦੁਤਿਯੋ ਪਰਿਚ੍ਛੇਦੋ

ਖਨ੍ਧਤ੍ਤਯਸਙ੍ਖੇਪੋ

੭੩. ਵੇਦਨਾਨੁਭਵੋ ਤੇਧਾ, ਸੁਖਦੁਕ੍ਖਮੁਪੇਕ੍ਖਯਾ;

ਇਟ੍ਠਾਨਿਟ੍ਠਾਨੁਭਵਨਮਜ੍ਝਾਨੁਭਵਲਕ੍ਖਣਾ.

੭੪. ਕਾਯਿਕਂ ਮਾਨਸਂ ਦੁਕ੍ਖਂ, ਸੁਖੋਪੇਕ੍ਖਾ ਚ ਵੇਦਨਾ;

ਏਕਂ ਮਾਨਸਮੇਵੇਤਿ, ਪਞ੍ਚਧਿਨ੍ਦ੍ਰਿਯਭੇਦਤੋ.

੭੫. ਯਥਾ ਤਥਾ ਵਾ ਸਞ੍ਞਾਣਂ, ਸਞ੍ਞਾ ਸਤਿਨਿਬਨ੍ਧਨਂ;

ਛਧਾ ਛਦ੍ਵਾਰਸਮ੍ਭੂਤਫਸ੍ਸਜਾਨਂ ਵਸੇਨ ਸਾ.

੭੬. ਸਙ੍ਖਾਰਾ ਚੇਤਨਾ ਫਸ੍ਸੋ,

ਮਨਕ੍ਕਾਰਾਯੁ ਸਣ੍ਠਿਤਿ;

ਤਕ੍ਕੋ ਚਾਰੋ ਚ ਵਾਯਾਮੋ,

ਪੀਤਿ ਛਨ੍ਦੋਧਿਮੋਕ੍ਖਕੋ.

੭੭. ਸਦ੍ਧਾ ਸਤਿ ਹਿਰੋਤ੍ਤਪ੍ਪਂ, ਚਾਗੋ ਮੇਤ੍ਤਾ ਮਤਿ ਪੁਨ;

ਮਜ੍ਝਤ੍ਤਤਾ ਚ ਪਸ੍ਸਦ੍ਧੀ, ਕਾਯਚਿਤ੍ਤਵਸਾ ਦੁਵੇ.

੭੮. ਲਹੁਤਾ ਮੁਦੁਕਮ੍ਮਞ੍ਞਪਾਗੁਞ੍ਞਮੁਜੁਤਾ ਤਥਾ;

ਦਯਾ ਮੁਦਾ ਮਿਚ੍ਛਾਵਾਚਾ, ਕਮ੍ਮਨ੍ਤਾਜੀਵਸਂਵਰੋ.

੭੯. ਲੋਭੋ ਦੋਸੋ ਚ ਮੋਹੋ ਚ, ਦਿਟ੍ਠਿ ਉਦ੍ਧਚ੍ਚਮੇਵ ਚ;

ਅਹਿਰੀਕਂ ਅਨੋਤ੍ਤਪ੍ਪਂ, ਵਿਚਿਕਿਚ੍ਛਿਤਮੇਵ ਚ.

੮੦. ਮਾਨੋ ਇਸ੍ਸਾ ਚ ਮਚ੍ਛੇਰਂ, ਕੁਕ੍ਕੁਚ੍ਚਂ ਥਿਨਮਿਦ੍ਧਕਂ;

ਇਤਿ ਏਤੇਵ ਪਞ੍ਞਾਸ, ਸਙ੍ਖਾਰਕ੍ਖਨ੍ਧਸਞ੍ਞਿਤਾ.

੮੧. ਬ੍ਯਾਪਾਰੋ ਚੇਤਨਾ ਫਸ੍ਸੋ, ਫੁਸਨਂ ਸਰਣਂ ਤਹਿਂ;

ਮਨਕ੍ਕਾਰੋ ਪਾਲਨਾਯੁ, ਸਮਾਧਿ ਅਵਿਸਾਰਤਾ.

੮੨. ਆਰੋਪਨਾਨੁਮਜ੍ਜਟ੍ਠਾ, ਤਕ੍ਕਚਾਰਾ ਪਨੀਹਨਾ;

ਵੀਰਿਯਂ ਪੀਨਨਾ ਪੀਤਿ, ਛਨ੍ਦੋ ਤੁ ਕਤ੍ਤੁਕਾਮਤਾ.

੮੩. ਅਧਿਮੋਕ੍ਖੋ ਨਿਚ੍ਛਯੋ ਸਦ੍ਧਾ,

ਪਸਾਦੋ ਸਰਣਂ ਸਤਿ;

ਹਿਰੀ ਪਾਪਜਿਗੁਚ੍ਛਾ ਹਿ,

ਓਤ੍ਤਪ੍ਪਂ ਤਸ੍ਸ ਭੀਰੁਤਾ.

੮੪. ਅਲਗ੍ਗੋ ਚ ਅਚਣ੍ਡਿਕ੍ਕਂ, ਚਾਗੋ ਮੇਤ੍ਤਾ ਮਤਿ ਪਨ;

ਯਾਥਾਵਬੋਧੋ ਮਜ੍ਝਤ੍ਤਂ, ਸਮਵਾਹਿਤਲਕ੍ਖਣਂ.

੮੫. ਛ ਯੁਗਾਨਿ ਕਾਯਚਿਤ੍ਤਦਰਗਾਰਵਥਦ੍ਧਤਾ-

ਅਕਮ੍ਮਞ੍ਞਤ੍ਤਗੇਲਞ੍ਞਕੁਟਿਲਾਨਂ ਵਿਨੋਦਨਾ.

੮੬. ਤਾਨੁਦ੍ਧਤਾਦਿਥਿਨਾਦਿਦਿਟ੍ਠਾਦੀਨਂ ਯਥਾਕ੍ਕਮਂ;

ਸੇਸਕਾਦਿਅਸਦ੍ਧਾਦਿਮਾਯਾਦੀਨਂ ਵਿਪਕ੍ਖਿਨੋ.

੮੭. ਦੁਕ੍ਖਾਪਨਯਨਕਾਮਾ, ਦਯਾ ਮੋਦਾ ਪਮੋਦਨਾ;

ਵਚੀਦੁਚ੍ਚਰਿਤਾਦੀਨਂ, ਵਿਰਾਮੋ ਵਿਰਤਿਤ੍ਤਯਂ.

੮੮. ਲੋਭੋ ਦੋਸੋ ਚ ਮੋਹੋ ਚ,

ਗੇਧਚਣ੍ਡਮਨਨ੍ਧਨਾ;

ਕਮੇਨ ਦਿਟ੍ਠਿ ਦੁਗ੍ਗਾਹੋ,

ਉਦ੍ਧਚ੍ਚਂ ਭਨ੍ਤਤਂ ਮਤਂ.

੮੯. ਅਹਿਰੀਕਮਲਜ੍ਜਤ੍ਤਂ, ਅਨੋਤ੍ਤਪ੍ਪਮਤਾਸਤਾ;

ਸਂਸਯੋ ਵਿਚਿਕਿਚ੍ਛਾ ਹਿ, ਮਾਨੋ ਉਨ੍ਨਤਿਲਕ੍ਖਣੋ.

੯੦. ਪਰਸ੍ਸਕਸਮ੍ਪਤ੍ਤੀਨਂ,

ਉਸੂਯਾ ਚ ਨਿਗੂਹਨਾ;

ਇਸ੍ਸਾਮਚ੍ਛੇਰਕਾ ਤਾਪੋ,

ਕਤਾਕਤਸ੍ਸ ਸੋਚਨਾ.

੯੧. ਥਿਨਂ ਚਿਤ੍ਤਸ੍ਸ ਸਙ੍ਕੋਚੋ, ਅਕਮ੍ਮਞ੍ਞਤ੍ਤਤਾ ਪਨ;

ਮਿਦ੍ਧਮਿਚ੍ਚੇਵਮੇਤੇਸਂ, ਲਕ੍ਖਣਞ੍ਚ ਨਯੇ ਬੁਧੋ.

੯੨. ਵੇਦਨਾਦਿਸਮਾਧਨ੍ਤਾ, ਸਤ੍ਤ ਸਬ੍ਬਗਸਞ੍ਞਿਤਾ;

ਤਕ੍ਕਾਦਿਅਧਿਮੋਕ੍ਖਨ੍ਤਾ, ਛ ਪਕਿਣ੍ਣਕਨਾਮਕਾ.

੯੩. ਸਦ੍ਧਾਦਯੋ ਵਿਰਮਨ੍ਤਾ, ਅਰਣਾ ਪਞ੍ਚਵੀਸਤਿ;

ਲੋਭਾਦਿਮਿਦ੍ਧਕਨ੍ਤਾਨਿ, ਸਰਣਾਨਿ ਚਤੁਦ੍ਦਸ.

੯੪. ਇਸ੍ਸਾਮਚ੍ਛੇਰਕੁਕ੍ਕੁਚ੍ਚਦੋਸਾ ਕਾਮੇ ਦਯਾ ਮੁਦਾ;

ਕਾਮੇ ਰੂਪੇ ਚ ਸੇਸਾ ਛ-ਚਤ੍ਤਾਲੀਸ ਤਿਧਾਤੁਜਾ.

੯੫. ਛਨ੍ਦਨਿਚ੍ਛਯਮਜ੍ਝਤ੍ਤਮਨਕ੍ਕਾਰਾ ਸਉਦ੍ਧਵਾ;

ਦਯਾਦੀ ਪਞ੍ਚ ਮਾਨਾਦੀ, ਛ ਯੇਵਾਪਨ ਸੋਲ਼ਸ.

੯੬. ਛਨ੍ਦਾਦੀ ਪਞ੍ਚ ਨਿਯਤਾ, ਤਤ੍ਥੇਕਾਦਸ ਨੇਤਰਾ;

ਅਹਿਰੀਕਮਨੋਤ੍ਤਪ੍ਪਂ, ਲੋਕਨਾਸਨਕਂ ਦ੍ਵਯਂ.

੯੭. ਏਤੇ ਦ੍ਵੇ ਮੋਹੁਦ੍ਧਚ੍ਚਾਤਿ, ਚਤ੍ਤਾਰੋ ਪਾਪਸਬ੍ਬਗਾ;

ਲੋਕਪਾਲਦੁਕਂ ਵੁਤ੍ਤਂ, ਹਿਰਿਓਤ੍ਤਪ੍ਪਨਾਮਕਂ.

੯੮. ਆਰਮ੍ਮਣੂਪਨਿਜ੍ਝਾਨਾ, ਝਾਨਙ੍ਗਾ ਤਕ੍ਕਚਾਰਕਾ;

ਪੀਤਿ ਏਕਗ੍ਗਤਾ ਚੇਤਿ, ਸਤ੍ਤ ਵਿਤ੍ਤਿਤ੍ਤਯੇਨ ਵੇ.

੯੯. ਸਦ੍ਧਾ ਸਤਿ ਮਤੇਕਗ੍ਗ-ਧਿਤਿ ਲੋਕਵਿਨਾਸਕਾ;

ਪਾਲਕਾ ਨਵ ਚੇਤਾਨਿ, ਬਲਾਨਿ ਅਵਿਕਮ੍ਪਤੋ.

੧੦੦. ਏਤ੍ਥ ਸਦ੍ਧਾਦਿਪਞ੍ਚਾਯੁ, ਕਤ੍ਵਾਤ੍ਰ ਚਤੁਧਾ ਮਤਿਂ;

ਵੇਦਨਾਹਿ ਦ੍ਵਿਸਤ੍ਤੇਤੇ, ਇਨ੍ਦ੍ਰਿਯਾਨਾਧਿਪਚ੍ਚਤੋ.

੧੦੧. ਮਨਰੂਪਿਨ੍ਦ੍ਰਿਯੇਹੇਤੇ, ਸਬ੍ਬੇ ਇਨ੍ਦ੍ਰਿਯਨਾਮਕਾ;

ਬਾਵੀਸਤਿ ਭਵਨ੍ਤਾਯੁਦ੍ਵਯਂ ਕਤ੍ਵੇਕਸਙ੍ਗਹਂ.

੧੦੨. ਦਿਟ੍ਠੀਹੇਕਗ੍ਗਤਾਤਕ੍ਕਸਤੀਵਿਰਤਿਯੋ ਪਥਾ;

ਅਟ੍ਠ ਨਿਯ੍ਯਾਨਤੋ ਆਦਿਚਤੁਰੋ ਭਿਤ੍ਵਾਨ ਦ੍ਵਾਦਸ.

੧੦੩. ਫਸ੍ਸੋ ਚ ਚੇਤਨਾ ਚੇਵ,

ਦ੍ਵੇਵੇਤ੍ਥਾਹਾਰਣਤ੍ਤਤੋ;

ਆਹਾਰਾ ਮਨਵੋਜਾਹਿ,

ਭਵਨ੍ਤਿ ਚਤੁਰੋਥਵਾ.

੧੦੪. ਹੇਤੁ ਮੂਲਟ੍ਠਤੋ ਪਾਪੇ,

ਲੋਭਾਦਿਤ੍ਤਯਮੀਰਿਤਂ;

ਕੁਸਲਾਬ੍ਯਾਕਤੇ ਚਾਪਿ,

ਅਲੋਭਾਦਿਤ੍ਤਯਂ ਤਥਾ.

੧੦੫. ਦਿਟ੍ਠਿਲੋਭਦੁਸਾ ਕਮ੍ਮਪਥਾਪਾਯਸ੍ਸ ਮਗ੍ਗਤੋ;

ਤਬ੍ਬਿਪਕ੍ਖਾ ਸੁਗਤਿਯਾ, ਤਯੋਤਿ ਛ ਪਥੀਰਿਤਾ.

੧੦੬. ਪਸ੍ਸਦ੍ਧਾਦਿਯੁਗਾਨਿ ਛ, ਵਗ੍ਗਤ੍ਤਾ ਯੁਗਲ਼ਾਨਿ ਤੁ;

ਉਪਕਾਰਾ ਸਤਿ ਧੀ ਚ, ਬਹੂਪਕਾਰਭਾਵਤੋ.

੧੦੭. ਓਘਾਹਰਣਤੋ ਯੋਗਾ,

ਯੋਜਨੇਨਾਭਵਗ੍ਗਤੋ;

ਸਵਨੇਨਾਸਵਾ ਦਿਟ੍ਠਿ-

ਮੋਹੇਜੇਤ੍ਥ ਦੁਧਾ ਲੁਭੋ.

੧੦੮. ਦਲ਼੍ਹਗ੍ਗਾਹੇਨ ਦਿਟ੍ਠੇਜਾ, ਉਪਾਦਾਨਂ ਤਿਧਾ ਤਹਿਂ;

ਦਿਟ੍ਠਿ ਦੋਸੇਨ ਤੇ ਗਨ੍ਥਾ, ਗਨ੍ਥਤੋ ਦਿਟ੍ਠਿਹ ਦ੍ਵਿਧਾ.

੧੦੯. ਪਞ੍ਚਾਵਰਣਤੋ ਕਾਮ-ਕਙ੍ਖਾਦੋਸੁਦ੍ਧਵਂ ਤਪੋ;

ਥਿਨਮਿਦ੍ਧਞ੍ਚ ਮੋਹੇਨ, ਛ ਵਾ ਨੀਵਰਣਾਨਿਥ.

੧੧੦. ਕਤ੍ਵਾ ਤਾਪੁਦ੍ਧਵਂ ਏਕਂ, ਥਿਨਮਿਦ੍ਧਞ੍ਚ ਵੁਚ੍ਚਤਿ;

ਕਿਚ੍ਚਸ੍ਸਾਹਾਰਤੋ ਚੇਵ, ਵਿਪਕ੍ਖਸ੍ਸ ਚ ਲੇਸਤੋ.

੧੧੧. ਦਿਟ੍ਠੇਜੁਦ੍ਧਵਦੋਸਨ੍ਧ-

ਕਙ੍ਖਾਥਿਨੁਣ੍ਣਤੀ ਦਸ;

ਲੋਕਨਾਸਯੁਗੇਨੇਤੇ,

ਕਿਲੇਸਾ ਚਿਤ੍ਤਕ੍ਲੇਸਤੋ.

੧੧੨. ਲੋਭਦੋਸਮੂਹਮਾਨ-ਦਿਟ੍ਠਿਕਙ੍ਖਿਸ੍ਸਮਚ੍ਛਰਾ;

ਸਂਯੋਜਨਾਨਿ ਦਿਟ੍ਠੇਜਾ, ਭਿਤ੍ਵਾ ਬਨ੍ਧਨਤੋ ਦੁਧਾ.

੧੧੩. ਤਾਨਿ ਮੋਹੁਦ੍ਧਵਂਮਾਨਕਙ੍ਖਾਦੋਸੇਜਦਿਟ੍ਠਿਯੋ;

ਦੁਧਾਦਿਟ੍ਠਿ ਤਿਧਾ ਲੋਭਂ, ਭਿਤ੍ਵਾ ਸੁਤ੍ਤੇ ਦਸੀਰਿਤਾ.

੧੧੪. ਦਿਟ੍ਠਿਲੋਭਮੂਹਮਾਨਦੋਸਕਙ੍ਖਾ ਤਹਿਂ ਦੁਧਾ;

ਕਤ੍ਵਾ ਲੋਭਮਿਮੇ ਸਤ੍ਤਾਨੁਸਯਾ ਸਮੁਦੀਰਿਤਾ.

੧੧੫. ਦਿਟ੍ਠਿ ਏਵ ਪਰਾਮਾਸੋ, ਞੇਯ੍ਯੋ ਏਵਂ ਸਮਾਸਤੋ;

ਅਤ੍ਥੋ ਸਙ੍ਖਾਰਕ੍ਖਨ੍ਧਸ੍ਸ, ਵੁਤ੍ਤੋ ਵੁਤ੍ਤਾਨੁਸਾਰਤੋ.

ਇਤਿ ਸਚ੍ਚਸਙ੍ਖੇਪੇ ਖਨ੍ਧਤ੍ਤਯਸਙ੍ਖੇਪੋ ਨਾਮ

ਦੁਤਿਯੋ ਪਰਿਚ੍ਛੇਦੋ.