੩. ਤਤਿਯੋ ਪਰਿਚ੍ਛੇਦੋ
ਚਿਤ੍ਤਪਵਤ੍ਤਿਪਰਿਦੀਪਨੋ
੧੧੬. ਚਿਤ੍ਤਂ ਵਿਸਯਗ੍ਗਾਹਂ ਤਂ, ਪਾਕਾਪਾਕਦਤੋ ਦੁਧਾ;
ਕੁਸਲਾਕੁਸਲਂ ਪੁਬ੍ਬਂ, ਪਰਮਬ੍ਯਾਕਤਂ ਮਤਂ.
੧੧੭. ਕੁਸਲਂ ਤਤ੍ਥ ਕਾਮਾਦਿਭੂਮਿਤੋ ਚਤੁਧਾ ਸਿਯਾ;
ਅਟ੍ਠ ਪਞ੍ਚ ਚਤ੍ਤਾਰਿ ਚ, ਚਤ੍ਤਾਰਿ ਕਮਤੋ ਕਥਂ.
੧੧੮. ਸੋਮਨਸ੍ਸਮਤਿਯੁਤ੍ਤਮਸਙ੍ਖਾਰਮਨਮੇਕਂ;
ਸਸਙ੍ਖਾਰਮਨਞ੍ਚੇਕਂ, ਤਥਾ ਹੀਨਮਤਿਦ੍ਵਯਂ.
੧੧੯. ਤਥੋਪੇਕ੍ਖਾਮਤਿਯੁਤ੍ਤਂ, ਮਤਿਹੀਨਨ੍ਤਿ ਅਟ੍ਠਧਾ;
ਕਾਮਾਵਚਰਪੁਞ੍ਞੇਤ੍ਥ, ਭਿਜ੍ਜਤੇ ਵੇਦਨਾਦਿਤੋ.
੧੨੦. ਦਾਨਂ ਸੀਲਞ੍ਚ ਭਾਵਨਾ, ਪਤ੍ਤਿਦਾਨਾਨੁਮੋਦਨਾ;
ਵੇਯ੍ਯਾਵਚ੍ਚਾਪਚਾਯਞ੍ਚ, ਦੇਸਨਾ ਸੁਤਿ ਦਿਟ੍ਠਿਜੁ.
੧੨੧. ਏਤੇਸ੍ਵੇਕਮਯਂ ਹੁਤ੍ਵਾ, ਵਤ੍ਥੁਂ ਨਿਸ੍ਸਾਯ ਵਾ ਨ ਵਾ;
ਦ੍ਵਾਰਹੀਨਾਦਿਯੋਨੀਨਂ, ਗਤਿਯਾਦਿਪ੍ਪਭੇਦਵਾ.
੧੨੨. ਤਿਕਾਲਿਕਪਰਿਤ੍ਤਾਦਿਗੋਚਰੇਸ੍ਵੇਕਮਾਦਿਯ;
ਉਦੇਤਿ ਕਾਲਮੁਤ੍ਤਂ ਵਾ, ਮਤਿਹੀਨਂ ਵਿਨਾਮਲਂ.
੧੨੩. ਛਗੋਚਰੇਸੁ ਰੂਪਾਦਿਪਞ੍ਚਕਂ ਪਞ੍ਚ ਗੋਚਰਾ;
ਸੇਸਂ ਰੂਪਮਰੂਪਞ੍ਚ, ਪਞ੍ਞਤ੍ਤਿ ਛਟ੍ਠਗੋਚਰੋ.
੧੨੪. ਞਾਣਯੁਤ੍ਤਵਰਂ ਤਤ੍ਥ, ਦਤ੍ਵਾ ਸਨ੍ਧਿਂ ਤਿਹੇਤੁਕਂ;
ਪਚ੍ਛਾ ਪਚ੍ਚਤਿ ਪਾਕਾਨਂ, ਪਵਤ੍ਤੇ ਅਟ੍ਠਕੇ ਦੁਵੇ.
੧੨੫. ਤੇਸੁਯੇਵ ਨਿਹੀਨਂ ਤੁ, ਦਤ੍ਵਾ ਸਨ੍ਧਿਂ ਦੁਹੇਤੁਕਂ;
ਦੇਤਿ ਦ੍ਵਾਦਸ ਪਾਕੇ ਚ, ਪਵਤ੍ਤੇ ਧੀਯੁਤਂ ਵਿਨਾ.
੧੨੬. ਏਵਂ ਧੀਹੀਨਮੁਕ੍ਕਟ੍ਠਂ, ਸਨ੍ਧਿਯਞ੍ਚ ਪਵਤ੍ਤਿਯਂ;
ਹੀਨਂ ਪਨੁਭਯਤ੍ਥਾਪਿ, ਹੇਤੁਹੀਨੇਵ ਪਚ੍ਚਤਿ.
੧੨੭. ਕਾਮਸੁਗਤਿਯਂਯੇਵ, ਭਵਭੋਗਦਦਂ ਇਦਂ;
ਰੂਪਾਪਾਯੇ ਪਵਤ੍ਤੇਵ, ਪਚ੍ਚਤੇ ਅਨੁਰੂਪਤੋ.
੧੨੮. ਵਿਤਕ੍ਕਚਾਰਪੀਤੀਹਿ, ਸੁਖੇਕਗ੍ਗਯੁਤਂ ਮਨਂ;
ਆਦਿ ਚਾਰਾਦਿਪੀਤਾਦਿਸੁਖਾਦੀਹਿ ਪਰਂ ਤਯਂ.
੧੨੯. ਉਪੇਕ੍ਖੇਕਗ੍ਗਤਾਯਨ੍ਤਮਾਰੁਪ੍ਪਞ੍ਚੇਵਮਙ੍ਗਤੋ;
ਪਞ੍ਚਧਾ ਰੂਪਪੁਞ੍ਞਂ ਤੁ, ਹੋਤਾਰਮ੍ਮਣਤੋ ਪਨ.
੧੩੦. ਆਦਿਸ੍ਸਾਸੁਭਮਨ੍ਤਸ੍ਸੁ-
ਪੇਕ੍ਖਾ ਮੇਤ੍ਤਾਦਯੋ ਤਯੋ;
ਆਦੋ ਚਤੁਨ੍ਨਂ ਪਞ੍ਚਨ੍ਨਂ,
ਸਸ੍ਸਾਸਕਸਿਣਾਨਿ ਤੁ.
੧੩੧. ਨਭਤਮ੍ਮਨਤਸ੍ਸੁਞ੍ਞਤਚ੍ਚਿਤ੍ਤਚਤੁਗੋਚਰੇ;
ਕਮੇਨਾਤਿਕ੍ਕਮਾਰੁਪ੍ਪਪੁਞ੍ਞਂ ਹੋਤਿ ਚਤੁਬ੍ਬਿਧਂ.
੧੩੨. ਅਮਲਂ ਸਨ੍ਤਿਮਾਰਬ੍ਭ, ਹੋਤਿ ਤਂ ਮਗ੍ਗਯੋਗਤੋ;
ਚਤੁਧਾ ਪਾਦਕਜ੍ਝਾਨਭੇਦਤੋ ਪੁਨ ਵੀਸਤਿ.
੧੩੩. ਦਿਟ੍ਠਿਕਙ੍ਖਾਨੁਦਂ ਆਦਿ, ਕਾਮਦੋਸਤਨੂਕਰਂ;
ਪਰਂ ਪਰਂ ਤਦੁਚ੍ਛੇਦੀ, ਅਨ੍ਤਂ ਸੇਸਕਨਾਸਕਂ.
੧੩੪. ਏਵਂ ਭੂਮਿਤ੍ਤਯਂ ਪੁਞ੍ਞਂ, ਭਾਵਨਾਮਯਮੇਤ੍ਥ ਹਿ;
ਪਠਮਂ ਵਤ੍ਥੁਂ ਨਿਸ੍ਸਾਯ, ਦੁਤਿਯਂ ਉਭਯੇਨਪਿ.
੧੩੫. ਤਤਿਯੇ ਆਦਿ ਨਿਸ੍ਸਾਯ,
ਸੇਸਾ ਨਿਸ੍ਸਾਯ ਵਾ ਨ ਵਾ;
ਹੋਨ੍ਤਿ ਆਦਿਦ੍ਵਯਂ ਤਤ੍ਥ,
ਸਾਧੇਤਿ ਸਕਭੂਭਵਂ.
੧੩੬. ਸਾਧੇਤਾਨੁਤ੍ਤਰਂ ਸਨ੍ਤਿਂ, ਅਭਿਞ੍ਞਾ ਪਨਿਧੇਵ ਤੁ;
ਝਾਨੂਦਯਫਲਤ੍ਤਾ ਨ, ਫਲਦਾਨਾਪਿ ਸਮ੍ਭਵਾ.
੧੩੭. ਨਾਞ੍ਞਭੂਫਲਦਂ ਕਮ੍ਮਂ, ਰੂਪਪਾਕਸ੍ਸ ਗੋਚਰੋ;
ਸਕਮ੍ਮਗੋਚਰੋਯੇਵ, ਨ ਚਞ੍ਞੋਯਮਸਮ੍ਭਵੋ.
੧੩੮. ਪਾਪਂ ਕਾਮਿਕਮੇਵੇਕਂ, ਹੇਤੁਤੋ ਤਂ ਦ੍ਵਿਧਾ ਪੁਨ;
ਮੂਲਤੋ ਤਿਵਿਧਂ ਲੋਭ-ਦੋਸਮੋਹਵਸਾ ਸਿਯਾ.
੧੩੯. ਸੋਮਨਸ੍ਸਕੁਦਿਟ੍ਠੀਹਿ, ਯੁਤ੍ਤਮੇਕਮਸਙ੍ਖਰਂ;
ਸਸਙ੍ਖਾਰਮਨਞ੍ਚੇਕਂ, ਹੀਨਦਿਟ੍ਠਿਦ੍ਵਯਂ ਤਥਾ.
੧੪੦. ਉਪੇਕ੍ਖਾਦਿਟ੍ਠਿਯੁਤ੍ਤਮ੍ਪਿ, ਤਥਾ ਦਿਟ੍ਠਿਵਿਯੁਤ੍ਤਕਂ;
ਵੇਦਨਾਦਿਟ੍ਠਿਆਦੀਹਿ, ਲੋਭਮੂਲੇਵਮਟ੍ਠਧਾ.
੧੪੧. ਸਦੁਕ੍ਖਦੋਸਾਸਙ੍ਖਾਰਂ, ਇਤਰਂ ਦੋਸਮੂਲਕਂ;
ਮੋਹਮੂਲਮ੍ਪਿ ਸੋਪੇਕ੍ਖਂ, ਕਙ੍ਖੁਦ੍ਧਚ੍ਚਯੁਤਂ ਦ੍ਵਿਧਾ.
੧੪੨. ਤਤ੍ਥ ਦੋਸਦ੍ਵਯਂ ਵਤ੍ਥੁਂ, ਨਿਸ੍ਸਾਯੇਵਿਤਰੇ ਪਨ;
ਨਿਸ੍ਸਾਯ ਵਾ ਨ ਵਾ ਹੋਨ੍ਤਿ, ਵਧਾਦਿਸਹਿਤਾ ਕਥਂ.
੧੪੩. ਫਰੁਸ੍ਸਵਧਬ੍ਯਾਪਾਦਾ, ਸਦੋਸੇਨ ਸਲੋਭਤੋ;
ਕੁਦਿਟ੍ਠਿਮੇਥੁਨਾਭਿਜ੍ਝਾ, ਸੇਸਾ ਕਮ੍ਮਪਥਾ ਦ੍ਵਿਭਿ.
੧੪੪. ਸਨ੍ਧਿਂ ਚਤੂਸ੍ਵਪਾਯੇਸੁ, ਦੇਤਿ ਸਬ੍ਬਤ੍ਥ ਵੁਤ੍ਤਿਯਂ;
ਪਚ੍ਚਤੇ ਗੋਚਰਂ ਤਸ੍ਸ, ਸਕਲਂ ਅਮਲਂ ਵਿਨਾ.
੧੪੫. ਅਬ੍ਯਾਕਤਂ ਦ੍ਵਿਧਾ ਪਾਕ-ਕ੍ਰਿਯਾ ਤਤ੍ਥਾਦਿ ਭੂਮਿਤੋ;
ਚਤੁਧਾ ਕਾਮਪਾਕੇਤ੍ਥ, ਪੁਞ੍ਞਪਾਕਾਦਿਤੋ ਦੁਧਾ.
੧੪੬. ਪੁਞ੍ਞਪਾਕਾ ਦ੍ਵਿਧਾਹੇਤੁ-ਸਹੇਤੂਤਿ ਦ੍ਵਿਰਟ੍ਠਕਾ;
ਅਹੇਤੂ ਪਞ੍ਚ ਞਾਣਾਨਿ, ਗਹਣਂ ਤੀਰਣਾ ਉਭੋ.
੧੪੭. ਕਾਯਞਾਣਂ ਸੁਖੀ ਤਤ੍ਥ, ਸੋਮਨਸ੍ਸਾਦਿ ਤੀਰਣਂ;
ਸੋਪੇਕ੍ਖਾਨਿ ਛ ਸੇਸਾਨਿ, ਸਪੁਞ੍ਞਂਵ ਸਹੇਤੁਕਂ.
੧੪੮. ਕੇਵਲਂ ਸਨ੍ਧਿਭਵਙ੍ਗ-ਤਦਾਲਮ੍ਬਚੁਤਿਬ੍ਬਸਾ;
ਜਾਯਤੇ ਸੇਸਮੇਤਸ੍ਸ, ਪੁਬ੍ਬੇ ਵੁਤ੍ਤਨਯਾ ਨਯੇ.
੧੪੯. ਮਨੁਸ੍ਸਵਿਨਿਪਾਤੀਨਂ, ਸਨ੍ਧਾਦਿ ਅਨ੍ਤਤੀਰਣਂ;
ਹੋਤਿ ਅਞ੍ਞੇਨ ਕਮ੍ਮੇਨ, ਸਹੇਤੁਪਿ ਅਹੇਤੁਨਂ.
੧੫੦. ਪਾਪਜਾ ਪੁਞ੍ਞਜਾਹੇਤੁ-ਸਮਾ ਤੀਰਂ ਵਿਨਾਦਿਕਂ;
ਸਦੁਕ੍ਖਂ ਕਾਯਵਿਞ੍ਞਾਣਂ, ਅਨਿਟ੍ਠਾਰਮ੍ਮਣਾ ਇਮੇ.
੧੫੧. ਤੇ ਸਾਤਗੋਚਰਾ ਤੇਸੁ, ਦ੍ਵਿਟ੍ਠਾਨਂ ਆਦਿਤੀਰਣਂ;
ਪਞ੍ਚਟ੍ਠਾਨਾਪਰਾ ਦ੍ਵੇ ਤੇ, ਪਰਿਤ੍ਤਵਿਸਯਾਖਿਲਾ.
੧੫੨. ਸਮ੍ਪਟਿਚ੍ਛਦ੍ਵਿਪਞ੍ਚਨ੍ਨਂ, ਪਞ੍ਚ ਰੂਪਾਦਯੋ ਤਹਿਂ;
ਪਚ੍ਚੁਪ੍ਪਨ੍ਨਾਵ ਸੇਸਾਨਂ, ਪਾਕਾਨਂ ਛ ਤਿਕਾਲਿਕਾ.
੧੫੩. ਰੂਪਾਰੂਪਵਿਪਾਕਾਨਂ, ਸਬ੍ਬਸੋ ਸਦਿਸਂ ਵਦੇ;
ਸਕਪੁਞ੍ਞੇਨ ਸਨ੍ਧਾਦਿ-ਸਕਿਚ੍ਚਤ੍ਤਯਤਂ ਵਿਨਾ.
੧੫੪. ਸਮਾਨੁਤ੍ਤਰਪਾਕਾਪਿ, ਸਕਪੁਞ੍ਞੇਨ ਸਬ੍ਬਸੋ;
ਹਿਤ੍ਵਾ ਮੋਕ੍ਖਮੁਖਂ ਤਂ ਹਿ, ਦ੍ਵਿਧਾ ਮਗ੍ਗੇ ਤਿਧਾ ਫਲੇ.
੧੫੫. ਕ੍ਰਿਯਾ ਤਿਧਾਮਲਾਭਾਵਾ,
ਭੂਮਿਤੋ ਤਤ੍ਥ ਕਾਮਿਕਾ;
ਦ੍ਵਿਧਾ ਹੇਤੁਸਹੇਤੂਤਿ,
ਤਿਧਾਹੇਤੁ ਤਹਿਂ ਕਥਂ.
੧੫੬. ਆਵਜ੍ਜਹਸਿਤਾਵਜ੍ਜਾ, ਸੋਪੇਕ੍ਖਸੁਖੁਪੇਕ੍ਖਵਾ;
ਪਞ੍ਚਛਕਾਮਾਵਚਰਾ, ਸਕਲਾਰਮ੍ਮਣਾ ਚ ਤੇ.
੧੫੭. ਸਹੇਤੁਰੂਪਰੂਪਾ ਚ, ਸਕਪਞ੍ਞਂਵਾਰਹਤੋ;
ਵੁਤ੍ਤਿਯਾ ਨ ਫਲੇ ਪੁਪ੍ਫਂ, ਯਥਾ ਛਿਨ੍ਨਲਤਾ ਫਲਂ.
੧੫੮. ਅਨਾਸੇਵਨਯਾਵਜ੍ਜ-ਦ੍ਵਯਂ ਪੁਥੁਜ੍ਜਨਸ੍ਸ ਹਿ;
ਨ ਫਲੇ ਵਤ੍ਤਮਾਨਮ੍ਪਿ, ਮੋਘਪੁਪ੍ਫਂ ਫਲਂ ਯਥਾ.
੧੫੯. ਤਿਸਤ੍ਤ ਦ੍ਵਿਛ ਛਤ੍ਤਿਂਸ, ਚਤੁਪਞ੍ਚ ਯਥਾਕ੍ਕਮਂ;
ਪੁਞ੍ਞਂ ਪਾਪਂ ਫਲਂ ਕ੍ਰਿਯਾ, ਏਕੂਨਨਵੁਤੀਵਿਧਂ.
੧੬੦. ਸਨ੍ਧਿ ਭਵਙ੍ਗਮਾਵਜ੍ਜਂ, ਦਸ੍ਸਨਾਦਿਕਪਞ੍ਚਕਂ;
ਗਹਤੀਰਣਵੋਟ੍ਠਬ੍ਬ-ਜਵਤਗ੍ਗੋਚਰਂ ਚੁਤਿ.
੧੬੧. ਇਤਿ ਏਸਂ ਦ੍ਵਿਸਤ੍ਤਨ੍ਨਂ, ਕਿਚ੍ਚਵੁਤ੍ਤਿਵਸਾਧੁਨਾ;
ਚਿਤ੍ਤਪ੍ਪਵਤ੍ਤਿ ਛਦ੍ਵਾਰੇ, ਸਙ੍ਖੇਪਾ ਵੁਚ੍ਚਤੇ ਕਥਂ.
੧੬੨. ਕਾਮੇ ਸਰਾਗਿਨਂ ਕਮ੍ਮ-ਨਿਮਿਤ੍ਤਾਦਿ ਚੁਤਿਕ੍ਖਣੇ;
ਖਾਯਤੇ ਮਨਸੋਯੇਵ, ਸੇਸਾਨਂ ਕਮ੍ਮਗੋਚਰੋ.
੧੬੩. ਉਪਟ੍ਠਿਤਂ ਤਮਾਰਬ੍ਭ, ਪਞ੍ਚਵਾਰਂ ਜਵੋ ਭਵੇ;
ਤਦਾਲਮ੍ਬਂ ਤਤੋ ਤਮ੍ਹਾ, ਚੁਤਿ ਹੋਤਿ ਜਵੇਹਿ ਵਾ.
੧੬੪. ਅਵਿਜ੍ਜਾਤਣ੍ਹਾਸਙ੍ਖਾਰ-ਸਹਜੇਹਿ ਅਪਾਯਿਨਂ;
ਵਿਸਯਾਦੀਨਵਚ੍ਛਾਦਿ-ਨਮਨਕ੍ਖਿਪਕੇਹਿ ਤੁ.
੧੬੫. ਅਪ੍ਪਹੀਨੇਹਿ ਸੇਸਾਨਂ, ਛਾਦਨਂ ਨਮਨਮ੍ਪਿ ਚ;
ਖਿਪਕਾ ਪਨ ਸਙ੍ਖਾਰਾ, ਕੁਸਲਾਵ ਭਵਨ੍ਤਿਹ.
੧੬੬. ਕਿਚ੍ਚਤ੍ਤਯੇ ਕਤੇ ਏਵਂ, ਕਮ੍ਮਦੀਪਿਤਗੋਚਰੇ;
ਤਜ੍ਜਂ ਵਤ੍ਥੁਂ ਸਹੁਪ੍ਪਨ੍ਨਂ, ਨਿਸ੍ਸਾਯ ਵਾ ਨ ਵਾ ਤਹਿਂ.
੧੬੭. ਤਜ੍ਜਾ ਸਨ੍ਧਿ ਸਿਯਾ ਹਿਤ੍ਵਾ, ਅਨ੍ਤਰਤ੍ਤਂ ਭਵਨ੍ਤਰੇ;
ਅਨ੍ਤਰਤ੍ਤਂ ਵਿਨਾ ਦੂਰੇ, ਪਟਿਸਨ੍ਧਿ ਕਥਂ ਭਵੇ.
੧੬੮. ਇਹੇਵ ਕਮ੍ਮਤਣ੍ਹਾਦਿ-ਹੇਤੁਤੋ ਪੁਬ੍ਬਚਿਤ੍ਤਤੋ;
ਚਿਤ੍ਤਂ ਦੂਰੇ ਸਿਯਾ ਦੀਪ-ਪਟਿਘੋਸਾਦਿਕਂ ਯਥਾ.
੧੬੯. ਨਾਸਞ੍ਞਾ ਚਵਮਾਨਸ੍ਸ, ਨਿਮਿਤ੍ਤਂ ਨ ਚੁਤੀ ਚ ਯਂ;
ਉਦ੍ਧਂ ਸਨ੍ਧਿਨਿਮਿਤ੍ਤਂ ਕਿਂ, ਪਚ੍ਚਯੋਪਿ ਕਨਨ੍ਤਰੋ.
੧੭੦. ਪੁਬ੍ਬਭਵੇ ਚੁਤਿ ਦਾਨਿ, ਕਾਮੇ ਜਾਯਨਸਨ੍ਧਿਯਾ;
ਅਞ੍ਞਚਿਤ੍ਤਨ੍ਤਰਾਭਾਵਾ, ਹੋਤਾਨਨ੍ਤਰਕਾਰਣਂ.
੧੭੧. ਭਵਨ੍ਤਰਕਤਂ ਕਮ੍ਮਂ, ਯਮੋਕਾਸਂ ਲਭੇ ਤਤੋ;
ਹੋਤਿ ਸਾ ਸਨ੍ਧਿ ਤੇਨੇਵ, ਉਪਟ੍ਠਾਪਿਤਗੋਚਰੇ.
੧੭੨. ਯਸ੍ਮਾ ਚਿਤ੍ਤਵਿਰਾਗਤ੍ਤਂ, ਕਾਤੁਂ ਨਾਸਕ੍ਖਿ ਸਬ੍ਬਸੋ;
ਤਸ੍ਮਾ ਸਾਨੁਸਯਸ੍ਸੇਵ, ਪੁਨੁਪ੍ਪਤ੍ਤਿ ਸਿਯਾ ਭਵੇ.
੧੭੩. ਪਞ੍ਚਦ੍ਵਾਰੇ ਸਿਯਾ ਸਨ੍ਧਿ, ਵਿਨਾ ਕਮ੍ਮਂ ਦ੍ਵਿਗੋਚਰੇ;
ਭਵਸਨ੍ਧਾਨਤੋ ਸਨ੍ਧਿ, ਭਵਙ੍ਗਂ ਤਂ ਤਦਙ੍ਗਤੋ.
੧੭੪. ਤਮੇਵਨ੍ਤੇ ਚੁਤਿ ਤਸ੍ਮਿਂ, ਗੋਚਰੇ ਚਵਨੇਨ ਤੁ;
ਏਕਸਨ੍ਤਤਿਯਾ ਏਵਂ, ਉਪ੍ਪਤ੍ਤਿਟ੍ਠਿਤਿਭੇਦਕਾ.
੧੭੫. ਅਥਞ੍ਞਾਰਮ੍ਮਣਾਪਾਥ-ਗਤੇ ਚਿਤ੍ਤਨ੍ਤਰਸ੍ਸ ਹਿ;
ਹੇਤੁਸਙ੍ਖ੍ਯਂ ਭਵਙ੍ਗਸ੍ਸ, ਦ੍ਵਿਕ੍ਖਤ੍ਤੁਂ ਚਲਨਂ ਭਵੇ.
੧੭੬. ਘਟ੍ਟਿਤੇ ਅਞ੍ਞਵਤ੍ਥੁਮ੍ਹਿ, ਅਞ੍ਞਨਿਸ੍ਸਿਤਕਮ੍ਪਨਂ;
ਏਕਾਬਦ੍ਧੇਨ ਹੋਤੀਤਿ, ਸਕ੍ਖਰੋਪਮਯਾ ਵਦੇ.
੧੭੭. ਮਨੋਧਾਤੁਕ੍ਰਿਯਾਵਜ੍ਜਂ, ਤਤੋ ਹੋਤਿ ਸਕਿਂ ਭਵੇ;
ਦਸ੍ਸਨਾਦਿ ਸਕਦ੍ਵਾਰ-ਗੋਚਰੋ ਗਹਣਂ ਤਤੋ.
੧੭੮. ਸਨ੍ਤੀਰਣਂ ਤਤੋ ਤਮ੍ਹਾ, ਵੋਟ੍ਠਬ੍ਬਞ੍ਚ ਸਕਿਂ ਤਤੋ;
ਸਤ੍ਤਕ੍ਖਤ੍ਤੁਂ ਜਵੋ ਕਾਮੇ, ਤਮ੍ਹਾ ਤਦਨੁਰੂਪਤੋ.
੧੭੯. ਤਦਾਲਮ੍ਬਦ੍ਵਿਕਂ ਤਮ੍ਹਾ, ਭਵਙ੍ਗਂਤਿਮਹਨ੍ਤਰਿ;
ਜਵਾ ਮਹਨ੍ਤੇ ਵੋਟ੍ਠਬ੍ਬਾ, ਪਰਿਤ੍ਤੇ ਨਿਤਰੇ ਮਨਂ.
੧੮੦. ਵੋਟ੍ਠਬ੍ਬਸ੍ਸ ਪਰਿਤ੍ਤੇ ਤੁ, ਦ੍ਵਤ੍ਤਿਕ੍ਖਤ੍ਤੁਂ ਜਵੋ ਵਿਯ;
ਵਦਨ੍ਤਿ ਵੁਤ੍ਤਿਂ ਤਂ ਪਾਠੇ, ਅਨਾਸੇਵਨਤੋ ਨ ਹਿ.
੧੮੧. ਨਿਯਮੋਪਿਧ ਚਿਤ੍ਤਸ੍ਸ, ਕਮ੍ਮਾਦਿਨਿਯਮੋ ਵਿਯ;
ਞੇਯ੍ਯੋ ਅਮ੍ਬੋਪਮਾਦੀਹਿ, ਦਸ੍ਸੇਤ੍ਵਾ ਤਂ ਸੁਦੀਪਯੇ.
੧੮੨. ਮਨੋਦ੍ਵਾਰੇਤਰਾਵਜ੍ਜਂ, ਭਵਙ੍ਗਮ੍ਹਾ ਸਿਯਾ ਤਤੋ;
ਜਵੋਕਾਮੇ ਵਿਭੂਤੇ ਤੁ, ਕਾਮਵ੍ਹੇ ਵਿਸਯੇ ਤਤੋ.
੧੮੩. ਕਾਮੀਨਂ ਤੁ ਤਦਾਲਮ੍ਬਂ, ਭਵਙ੍ਗਂ ਤੁ ਤਤੋ ਸਿਯਾ;
ਅਵਿਭੂਤੇ ਪਰਿਤ੍ਤੇ ਚ, ਭਵਙ੍ਗਂ ਜਵਤੋ ਭਵੇ.
੧੮੪. ਅਵਿਭੂਤੇ ਵਿਭੂਤੇ ਚ, ਪਰਿਤ੍ਤੇ ਅਪਰਿਤ੍ਤਕੇ;
ਜਵਾਯੇਵ ਭਵਙ੍ਗਂ ਤੁ, ਬ੍ਰਹ੍ਮਾਨਂ ਚਤੁਗੋਚਰੇ.
੧੮੫. ਮਹਗ੍ਗਤਂ ਪਨਾਰਬ੍ਭ, ਜਵਿਤੇ ਦੋਸਸਂਯੁਤੇ;
ਵਿਰੁਦ੍ਧਤ੍ਤਾ ਭਵਙ੍ਗਂ ਨ, ਕਿਂ ਸਿਯਾ ਸੁਖਸਨ੍ਧਿਨੋ.
੧੮੬. ਉਪੇਕ੍ਖਾਤੀਰਣਂ ਹੋਤਿ, ਪਰਿਤ੍ਤੇਨਾਵਜ੍ਜਂ ਕਥਂ.
ਨਿਯਮੋ ਨ ਵਿਨਾਵਜ੍ਜਂ, ਮਗ੍ਗਤੋ ਫਲਸਮ੍ਭਵਾ.