੪. ਚਤੁਤ੍ਥੋ ਪਰਿਚ੍ਛੇਦੋ

ਵਿਞ੍ਞਾਣਕ੍ਖਨ੍ਧਪਕਿਣ੍ਣਕਨਯਸਙ੍ਖੇਪੋ

੧੯੨. ਏਕਧਾਦਿਨਯੋਦਾਨਿ, ਪਟੁਵਡ੍ਢਾਯ ਯੋਗਿਨਂ;

ਵੁਚ੍ਚਤੇ ਵਿਸਯਗ੍ਗਾਹਾ, ਸਬ੍ਬਮੇਕਵਿਧਂ ਮਨਂ.

੧੯੩. ਏਕਾਸੀਤਿ ਤਿਭੂਮਟ੍ਠਂ, ਲੋਕਿਯਂ ਸੁਤ੍ਤਰਞ੍ਚ ਤਂ;

ਸੇਸਂ ਲੋਕੁਤ੍ਤਰਂ ਅਟ੍ਠ, ਅਨੁਤ੍ਤਰਞ੍ਚਿਤੀ ਦ੍ਵਿਧਾ.

੧੯੪. ਲੋਕਪਾਕਕ੍ਰਿਯਾਹੇਤੂ, ਚੇਕਹੇਤੂਤਿ ਸਤ੍ਤਹਿ;

ਤਿਂਸ ਨਾਧਿਪਤਿ ਸਾਧਿ-ਪਤਿ ਸੇਸਾਤਿਪੀ ਦ੍ਵਿਧਾ.

੧੯੫. ਛਨ੍ਦਚਿਤ੍ਤੀਹਵੀਮਂਸਾ-ਸ੍ਵੇਕੇਨ ਮਤਿਮਾ ਯੁਤਂ;

ਵਿਨਾ ਵੀਮਂਸਮੇਕੇਨ, ਞਾਣਹੀਨਮਨਂ ਯੁਤਂ.

੧੯੬. ਪਰਿਤ੍ਤਾਨਪ੍ਪਮਾਣਾਨਿ, ਮਹਗ੍ਗਤਮਨਾਨਿਤਿ;

ਤਿਧਾ ਛਨਵ ਚਟ੍ਠ ਚ, ਤਿਨਵਾ ਚ ਯਥਾਕ੍ਕਮਂ.

੧੯੭. ਦ੍ਵਿਪਞ੍ਚ ਚਿਤ੍ਤਂ ਵਿਞ੍ਞਾਣਂ, ਤਿਸ੍ਸੋ ਹਿ ਮਨੋਧਾਤੁਯੋ;

ਛਸਤ੍ਤਤਿ ਮਨੋਞਾਣ-ਧਾਤੂਤਿ ਤਿਵਿਧਾ ਪੁਨ.

੧੯੮. ਏਕਾਰਮ੍ਮਣਚਿਤ੍ਤਾਨਿ, ਅਨਭਿਞ੍ਞਂ ਮਹਗ੍ਗਤਂ;

ਅਮਲਂ ਪਞ੍ਚਵਿਞ੍ਞਾਣਂ, ਨਵਪਞ੍ਚ ਭਵਨ੍ਤਿਮੇ.

੧੯੯. ਪਞ੍ਚਾਲਮ੍ਬਂ ਮਨੋਧਾਤੁ, ਸਾਭਿਞ੍ਞਂ ਕਾਮਧਾਤੁਜਂ;

ਸੇਸਂ ਛਾਰਮ੍ਮਣਂ ਤਂ ਹਿ, ਤੇਚਤ੍ਤਾਲੀਸ ਸਙ੍ਖ੍ਯਤੋ.

੨੦੦. ਕਾਮਪਾਕਦੁਸਾ ਚਾਦਿ-ਮਗ੍ਗੋ ਚਾਦਿਕ੍ਰਿਯਾ ਦੁਵੇ;

ਰੂਪਾ ਸਬ੍ਬੇਤਿਰੂਪੇ ਨ, ਤੇਚਤ੍ਤਾਲੀਸ ਹੋਨ੍ਤਿਮੇ.

੨੦੧. ਵਿਨਾਵ ਰੂਪੇਨਾਰੁਪ੍ਪ-ਵਿਪਾਕਾ ਚਤੁਰੋ ਸਿਯੁਂ;

ਦ੍ਵੇਚਤ੍ਤਾਲੀਸ ਸੇਸਾਨਿ, ਵਤ੍ਤਨ੍ਤੁਭਯਥਾਪਿ ਚ.

੨੦੨. ਚਤੁਧਾਪਿ ਅਹੇਤ੍ਵੇਕਦ੍ਵਿਹੇਤੁਕਤਿਹੇਤੁਤੋ;

ਅਟ੍ਠਾਰਸ ਦ੍ਵੇ ਬਾਵੀਸ, ਸਤ੍ਤਚਤ੍ਤਾਲਿਸਂ ਭਵੇ.

੨੦੩. ਕਾਮੇ ਜਵਾ ਸਵੋਟ੍ਠਬ੍ਬਾ, ਅਭਿਞ੍ਞਾਦ੍ਵਯਮੇਵ ਚ;

ਰੂਪਿਰਿਯਾਪਥਵਿਞ੍ਞਤ੍ਤਿਕਰਾਮੇ ਚਤੁਰਟ੍ਠਕਾ.

੨੦੪. ਛਬ੍ਬੀਸਤਿ ਜਵਾ ਸੇਸਾ, ਕਰਾ ਰੂਪਿਰਿਯਾਪਥੇ;

ਦ੍ਵਿਪਞ੍ਚਮਨਵਜ੍ਜਾਨਿ, ਕਾਮਰੂਪਫਲਾਨਿ ਚ.

੨੦੫. ਆਦਿਕ੍ਰਿਯਾਤਿ ਚੇਕੂਨ-ਵੀਸ ਰੂਪਕਰਾ ਇਮੇ;

ਸੇਸਾ ਚੁਦ੍ਦਸ ਭਿਨ੍ਨਾਵਚੁਤਿ ਸਨ੍ਧਿ ਨ ਤੀਣਿਪਿ.

੨੦੬. ਏਕਕਿਚ੍ਚਾਦਿਤੋ ਪਞ੍ਚ-ਵਿਧਾ ਤਤ੍ਥੇਕਕਿਚ੍ਚਕਾ;

ਦ੍ਵਿਪਞ੍ਚਚਿਤ੍ਤਂ ਜਵਨਂ, ਮਨੋਧਾਤੁਟ੍ਠਸਟ੍ਠਿਮੇ.

੨੦੭. ਦ੍ਵਿਕਿਚ੍ਚਾਦੀਨਿ ਵੋਟ੍ਠਬ੍ਬਂ, ਸੁਖਤੀਰਂ ਮਹਗ੍ਗਤੇ;

ਪਾਕਾ ਕਾਮਮਹਾਪਾਕਾ, ਸੇਸਾ ਤੀਰਾ ਯਥਾਕ੍ਕਮਂ.

੨੦੮. ਦਸ੍ਸਨਂ ਸਵਨਂ ਦਿਟ੍ਠਂ, ਸੁਤਂ ਘਾਯਨਕਾਦਿਕਂ;

ਤਯਂ ਮੁਤਂ ਮਨੋਧਾਤੁਤ੍ਤਯਂ ਦਿਟ੍ਠਂ ਸੁਤਂ ਮੁਤਂ.

੨੦੯. ਦਿਟ੍ਠਂ ਸੁਤਂ ਮੁਤਂ ਞਾਤਂ, ਸਾਭਿਞ੍ਞਂ ਸੇਸਕਾਮਿਕਂ;

ਵਿਞ੍ਞਾਤਾਰਮ੍ਮਣਂ ਸੇਸਮੇਵਂ ਛਬ੍ਬਿਧਮੀਰਯੇ.

੨੧੦. ਸਤ੍ਤਧਾ ਸਤ੍ਤਵਿਞ੍ਞਾਣਧਾਤੂਨਂ ਤੁ ਵਸਾ ਭਵੇ;

ਵੁਚ੍ਚਤੇਦਾਨਿ ਤਸ੍ਸੇਵ, ਅਨਨ੍ਤਰਨਯਕ੍ਕਮੋ.

੨੧੧. ਪੁਞ੍ਞੇਸ੍ਵਾਦਿਦ੍ਵਯਾ ਕਾਮੇ, ਰੂਪਪੁਞ੍ਞਮਨਨ੍ਤਕਂ;

ਤਪ੍ਪਾਦਕੁਤ੍ਤਰਾਨਨ੍ਤਂ, ਭਵਙ੍ਗਞ੍ਚਾਦਿਤੀਰਣਂ.

੨੧੨. ਦੁਤਿਯਨ੍ਤਦ੍ਵਯਾ ਤੀਰਂ, ਭਵਙ੍ਗਂ ਤਤਿਯਦ੍ਵਯਾ;

ਤੇ ਅਨਨ੍ਤਾਮਲਂ ਪੁਞ੍ਞਂ, ਮਜ੍ਝਤ੍ਤਞ੍ਚ ਮਹਗ੍ਗਤਂ.

੨੧੩. ਸਬ੍ਬਵਾਰੇ ਸਯਞ੍ਚੇਤਿ, ਤੇਪਞ੍ਞਾਸ ਤਿਸਤ੍ਤ ਚ;

ਤੇਤ੍ਤਿਂਸ ਚ ਭਵਨ੍ਤੇਤੇ, ਰੂਪੇਸੁ ਪਨ ਪੁਞ੍ਞਤੋ.

੨੧੪. ਤਪ੍ਪਾਕਾ ਚ ਮਤਿਯੁਤ੍ਤ-ਕਾਮਪਾਕਾ ਸਯਂ ਦਸ;

ਆਰੁਪ੍ਪਪੁਞ੍ਞਤੋ ਤੇ ਚ, ਸਕੋ ਪਾਕੋ ਸਯਂ ਪੁਨ.

੨੧੫. ਅਧੋਪਾਕਾ ਚ ਅਨ੍ਤਮ੍ਹਾ, ਤਤਿਯਞ੍ਚ ਫਲਨ੍ਤਿਮੇ;

ਦਸੇਕਦ੍ਵਿਤਿਪਞ੍ਚਾਹਿ, ਮਗ੍ਗਾ ਚੇਕਂ ਸਕਂ ਫਲਂ.

੨੧੬. ਲੋਭਮੂਲੇਕਹੇਤੂਹਿ, ਅਨ੍ਤਕਾਮਸੁਭਾ ਵਿਯ;

ਸਤ੍ਤ ਦੋਸਦ੍ਵਯਾ ਕਾਮ-ਭਵਙ੍ਗਪੇਕ੍ਖਵਾ ਸਯਂ.

੨੧੭. ਮਹਾਪਾਕਤਿਹੇਤੂਹਿ, ਸਾਵਜ੍ਜਾ ਸਬ੍ਬਸਨ੍ਧਿਯੋ;

ਕਾਮਚ੍ਚੁਤੀਹਿ ਸੇਸਾਹਿ, ਸਾਵਜ੍ਜਾ ਕਾਮਸਨ੍ਧਿਯੋ.

੨੧੮. ਕਾਮਚ੍ਚੁਤਿ ਚ ਵੋਟ੍ਠਬ੍ਬਂ, ਸਯਞ੍ਚ ਸੁਖਤੀਰਤੋ;

ਪਟਿਚ੍ਛਾ ਤੀਰਣਾਨਿ ਦ੍ਵੇ, ਇਤਰਾ ਸਕਤੀਰਣਂ.

੨੧੯. ਸਕਂ ਸਕਂ ਪਟਿਚ੍ਛਂ ਤੁ, ਵਿਞ੍ਞਾਣੇਹਿ ਦ੍ਵਿਪਞ੍ਚਹਿ;

ਰੂਪਪਾਕੇਹਿ ਸਾਵਜ੍ਜਾ, ਸਨ੍ਧਿਯੋਹੇਤੁਵਜ੍ਜਿਤਾ.

੨੨੦. ਅਰੂਪਪਾਕੇਸ੍ਵਾਦਿਮ੍ਹਾ, ਕਾਮਪਾਕਾ ਤਿਹੇਤੁਕਾ;

ਅਨ੍ਤਾਵਜ੍ਜਮ੍ਪਿ ਚਾਰੁਪ੍ਪ-ਪਾਕਾ ਚ ਨਵ ਹੋਨ੍ਤਿਮੇ.

੨੨੧. ਦੁਤਿਯਾਦੀਹਿ ਤੇਯੇਵ, ਅਧੋਪਾਕਂ ਵਿਨਾ ਵਿਨਾ;

ਫਲਾ ਤਿਹੇਤੁਕਾ ਪਾਕਾ, ਸਯਞ੍ਚੇਤਿ ਚਤੁਦ੍ਦਸ.

੨੨੨. ਦ੍ਵਿਪਞ੍ਚਾਦਿਕ੍ਰਿਯਾ ਹਾਸਾ, ਸਯਞ੍ਚਾਰੁਪ੍ਪਵਜ੍ਜਿਤਾ;

ਞਾਣਯੁਤ੍ਤਭਵਙ੍ਗਾਤਿ, ਦਸ ਵੋਟ੍ਠਬ੍ਬਤੋ ਪਨ.

੨੨੩. ਕਾਮੇ ਜਵਾ ਭਵਙ੍ਗਾ ਚ, ਕਾਮਰੂਪੇ ਸਯਮ੍ਪਿ ਵਾ;

ਨਵਪਞ੍ਚ ਸਹੇਤਾਦਿ-ਕਿਰਿਯਦ੍ਵਯਤੋ ਪਨ.

੨੨੪. ਸਯਂ ਭਵਙ੍ਗਮਤਿਮਾ, ਰੂਪੇ ਸਾਤਕ੍ਰਿਯਾਪਿ ਚ;

ਤਪ੍ਪਾਦਕਨ੍ਤਿਮਞ੍ਚੇਤਿ, ਬਾਵੀਸ ਤਤਿਯਾ ਪਨ.

੨੨੫. ਤੇ ਚ ਪਾਕਾ ਸਯਞ੍ਚਨ੍ਤੇ, ਫਲਂ ਮਜ੍ਝਾ ਮਹਗ੍ਗਤਾ;

ਕ੍ਰਿਯਾਤਿ ਵੀਸਤਿ ਹੋਨ੍ਤਿ, ਸੇਸਦ੍ਵੀਹਿ ਦੁਕੇਹਿ ਤੁ.

੨੨੬. ਵੁਤ੍ਤਪਾਕਾ ਸਯਞ੍ਚੇਤਿ, ਚੁਦ੍ਦਸੇਵਂ ਕ੍ਰਿਯਾਜਵਾ;

ਤਦਾਰਮ੍ਮਣਂ ਮੁਞ੍ਚਿਤ੍ਵਾ, ਪਟ੍ਠਾਨਨਯਤੋ ਨਯੇ.

੨੨੭. ਅਥ ਸਾਤਕ੍ਰਿਯਾ ਸਾਤਂ, ਸੇਸਂ ਸੇਸਕ੍ਰਿਯਾਪਿ ਚ;

ਤਦਾਲਮ੍ਬਂ ਯਥਾਯੋਗਂ, ਵਦੇ ਅਟ੍ਠਕਥਾਨਯਾ.

੨੨੮. ਮਹਗ੍ਗਤਾ ਕ੍ਰਿਯਾ ਸਬ੍ਬਾ, ਸਕਪੁਞ੍ਞਸਮਾ ਤਹਿਂ;

ਅਨ੍ਤਾ ਫਲਨ੍ਤਿਮਂ ਹੋਤਿ, ਅਯਮੇਵ ਵਿਸੇਸਤਾ.

੨੨੯. ਇਮਸ੍ਸਾਨਨ੍ਤਰਾ ਧਮ੍ਮਾ, ਏਤ੍ਤਕਾਤਿ ਪਕਾਸਿਤਾ;

ਇਮਂ ਪਨੇਤ੍ਤਕੇਹੀਤਿ, ਵੁਚ੍ਚਤੇਯਂ ਨਯੋਧੁਨਾ.

੨੩੦. ਦ੍ਵੀਹਿ ਕਾਮਜਵਾ ਤੀਹਿ, ਰੂਪਾਰੂਪਾ ਚਤੂਹਿ ਤੁ;

ਮਗ੍ਗਾ ਛਹਿ ਫਲਾਦਿ ਦ੍ਵੇ, ਸੇਸਾ ਦ੍ਵੇ ਪਨ ਸਤ੍ਤਹਿ.

੨੩੧. ਏਕਮ੍ਹਾ ਦਸ ਪਞ੍ਚਹਿ, ਪਟਿਚ੍ਛਾ ਸੁਖਤੀਰਣਂ;

ਕਾਮੇ ਦੋਸਕ੍ਰਿਯਾਹੀਨ-ਜਵੇਹਿ ਗਹਤੋ ਸਕਾ.

੨੩੨. ਕਾਮੇ ਜਵਾ ਕ੍ਰਿਯਾਹੀਨਾ, ਤਦਾਲਮ੍ਬਾ ਸਵੋਟ੍ਠਬ੍ਬਾ;

ਸਗਹਞ੍ਚੇਤਿ ਤੇਤ੍ਤਿਂਸਚਿਤ੍ਤੇਹਿ ਪਰਤੀਰਣਾ.

੨੩੩. ਕਾਮਪੁਞ੍ਞਸੁਖੀਤੀਰਕਣ੍ਹਵੋਟ੍ਠਬ੍ਬਤੋ ਦ੍ਵਯਂ;

ਮਹਾਪਾਕਨ੍ਤਿਮਂ ਹੋਤਿ, ਅਨਾਰੁਪ੍ਪਚੁਤੀਹਿ ਚ.

੨੩੪. ਸਤ੍ਤਤਿਂਸ ਪਨੇਤਾਨਿ, ਏਤ੍ਥ ਹਿਤ੍ਵਾ ਦੁਸਦ੍ਵਯਂ;

ਏਤੇਹਿ ਪਞ੍ਚਤਿਂਸੇਹਿ, ਜਾਯਤੇ ਦੁਤਿਯਦ੍ਵਯਂ.

੨੩੫. ਸੁਖਤੀਰਾਦਿ ਸਤ੍ਤੇਤੇ, ਕ੍ਰਿਯਤੋ ਚਾਪਿ ਸਮ੍ਭਵਾ;

ਞੇਯ੍ਯਾ ਸੇਸਾਨਿ ਚਤ੍ਤਾਰਿ, ਭਵਙ੍ਗੇਨ ਚ ਲਬ੍ਭਰੇ.

੨੩੬. ਮਗ੍ਗਵਜ੍ਜਾ ਸਵੋਟ੍ਠਬ੍ਬਸੁਖਿਤੀਰਜਵਾਖਿਲਾ;

ਚੁਤੀਤਿ ਨਵਕਟ੍ਠਾਹਿ, ਤਤਿਯਦ੍ਵਯਮਾਦਿਸੇ.

੨੩੭. ਏਤੇਹਿ ਦੋਸਵਜ੍ਜੇਹਿ, ਸਤ੍ਤਤੀਹਿਤਰਦ੍ਵਯਂ;

ਰੂਪਪਾਕਾ ਵਿਨਾਰੁਪ੍ਪਪਾਕਾਹੇਤੁਦੁਹੇਤੁਕੇ.

੨੩੮. ਤੇਹੇਵੇਕੂਨਸਟ੍ਠੀਹਿ, ਹੋਨ੍ਤਿਰੁਪ੍ਪਾਦਿਕਂ ਵਿਨਾ;

ਹਾਸਾਵਜ੍ਜੇ ਜਵੇ ਰੂਪੇ, ਅਟ੍ਠਛਕ੍ਕੇਹਿ ਤੇਹਿ ਤੁ.

੨੩੯. ਸਾਧੋਪਾਕੇਹਿ ਤੇਹੇਵ, ਦੁਤਿਯਾਦੀਨਿ ਅਤ੍ਤਨਾ;

ਅਧੋਧੋਜਵਹੀਨੇਹਿ, ਏਕੇਕੂਨੇਹਿ ਜਾਯਰੇ.

੨੪੦. ਸੁਖਤੀਰਭਵਙ੍ਗਾਨਿ, ਸਯਞ੍ਚਾਤਿ ਤਿਸਤ੍ਤਹਿ;

ਅਨ੍ਤਾਵਜ੍ਜਂ ਅਨਾਰੁਪ੍ਪਭਵਙ੍ਗੇਹਿ ਪਨੇਤਰਂ.

੨੪੧. ਵੁਤ੍ਤਾਨਨ੍ਤਰਸਙ੍ਖਾਤੋ, ਨਯੋ ਦਾਨਿ ਅਨੇਕਧਾ;

ਪੁਗ੍ਗਲਾਦਿਪ੍ਪਭੇਦਾਪਿ, ਪਵਤ੍ਤਿ ਤਸ੍ਸ ਵੁਚ੍ਚਤੇ.

੨੪੨. ਪੁਥੁਜ੍ਜਨਸ੍ਸ ਜਾਯਨ੍ਤੇ, ਦਿਟ੍ਠਿਕਙ੍ਖਾਯੁਤਾਨਿ ਵੇ;

ਸੇਕ੍ਖਸ੍ਸੇਵਾਮਲਾ ਸਤ੍ਤ, ਅਨਨ੍ਤਾਨਿਤਰਸ੍ਸ ਤੁ.

੨੪੩. ਅਨ੍ਤਾਮਲਂ ਅਨਾਵਜ੍ਜਕ੍ਰਿਯਾ ਚੇਕੂਨਵੀਸਤਿ;

ਕੁਸਲਾਕੁਸਲਾ ਸੇਸਾ, ਹੋਨ੍ਤਿ ਸੇਕ੍ਖਪੁਥੁਜ੍ਜਨੇ.

੨੪੪. ਇਤਰਾਨਿ ਪਨਾਵਜ੍ਜਦ੍ਵਯਂ ਪਾਕਾ ਚ ਸਾਸਵਾ;

ਤਿਣ੍ਣਨ੍ਨਮ੍ਪਿ ਸਿਯੁਂ ਏਵਂ, ਪਞ੍ਚਧਾ ਸਤ੍ਤਭੇਦਤੋ.

੨੪੫. ਕਾਮੇ ਸੋਲ਼ਸ ਘਾਨਾਦਿਤ੍ਤਯਂ ਦੋਸਮਹਾਫਲਾ;

ਰੂਪਾਰੂਪੇ ਸਪਾਕੋਤਿ, ਪਞ੍ਚਵੀਸਤਿ ਏਕਜਾ.

੨੪੬. ਕਾਮਪਾਕਾ ਚ ਸੇਸਾਦਿਮਗ੍ਗੋ ਆਦਿਕ੍ਰਿਯਾ ਦੁਵੇ;

ਰੂਪੇ ਜਵਾਤਿ ਬਾਵੀਸ, ਦ੍ਵਿਜਾ ਸੇਸਾ ਤਿਧਾਤੁਜਾ.

੨੪੭. ਵਿਤ੍ਥਾਰੋਪਿ ਚ ਭੂਮੀਸੁ, ਞੇਯ੍ਯੋ ਕਾਮਸੁਭਾਸੁਭਂ;

ਹਾਸਵਜ੍ਜਮਹੇਤੁਞ੍ਚ, ਅਪਾਯੇ ਸਤ੍ਤਤਿਂਸਿਮੇ.

੨੪੮. ਹਿਤ੍ਵਾ ਮਹਗ੍ਗਤੇ ਪਾਕੇ, ਅਸੀਤਿ ਸੇਸਕਾਮਿਸੁ;

ਚਕ੍ਖੁਸੋਤਮਨੋਧਾਤੁ, ਤੀਰਣਂ ਵੋਟ੍ਠਬ੍ਬਮ੍ਪਿ ਚ.

੨੪੯. ਦੋਸਹੀਨਜਵਾ ਸੋ ਸੋ, ਪਾਕੋ ਰੂਪੇ ਅਨਾਰਿਯੇ;

ਪਞ੍ਚਸਟ੍ਠਿ ਛਸਟ੍ਠੀ ਤੁ, ਪਰਿਤ੍ਤਾਭਾਦੀਸੁ ਤੀਸੁ.

੨੫੦. ਆਦਿਪਞ੍ਚਾਮਲਾ ਕਙ੍ਖਾਦਿਟ੍ਠਿਯੁਤ੍ਤੇ ਵਿਨਾ ਤਹਿਂ;

ਤੇਯੇਵ ਪਞ੍ਚਪਞ੍ਞਾਸ, ਜਾਯਰੇ ਸੁਦ੍ਧਭੂਮਿਸੁ.

੨੫੧. ਆਦਿਮਗ੍ਗਦੁਸਾਹਾਸਰੂਪਹੀਨਜਵਾ ਸਕੋ;

ਪਾਕੋ ਵੋਟ੍ਠਬ੍ਬਨਞ੍ਚਾਤਿ, ਤਿਤਾਲੀਸਂ ਸਿਯੁਂ ਨਭੇ.

੨੫੨. ਅਧੋਧੋਮਨਵਜ੍ਜਾ ਤੇ,

ਪਾਕੋ ਚੇਵ ਸਕੋ ਸਕੋ;

ਦੁਤਿਯਾਦੀਸੁ ਜਾਯਨ੍ਤੇ,

ਦ੍ਵੇ ਦ੍ਵੇ ਊਨਾ ਤਤੋ ਤਤੋ.

੨੫੩. ਅਰੂਪੇਸ੍ਵੇਕਮੇਕਸ੍ਮਿਂ, ਰੂਪੇਸ੍ਵਾਦਿਤ੍ਤਿਕੇਪਿ ਚ;

ਤਿਕੇ ਚ ਤਤਿਯੇ ਏਕਂ, ਦ੍ਵੇ ਹੋਨ੍ਤਿ ਦੁਤਿਯਤ੍ਤਿਕੇ.

੨੫੪. ਅਨ੍ਤਿਮਂ ਰੂਪਪਾਕਂ ਤੁ, ਛਸੁ ਵੇਹਪ੍ਫਲਾਦਿਸੁ;

ਕਾਮਸੁਗਤਿਯਂਯੇਵ, ਮਹਾਪਾਕਾ ਪਵਤ੍ਤਰੇ.

੨੫੫. ਘਾਯਨਾਦਿਤ੍ਤਯਂ ਕਾਮੇ, ਪਟਿਘਦ੍ਵਯਮੇਵ ਚ;

ਸਤ੍ਤਰਸੇਸੁ ਪਠਮਂ, ਅਮਲਂ ਮਾਨਵਾਦਿਸੁ.

੨੫੬. ਅਰਿਯਾਪਾਯਵਜ੍ਜੇਸੁ, ਚਤੁਰੋਦਿਪ੍ਫਲਾਦਿਕਾ;

ਅਪਾਯਾਰੁਪ੍ਪਵਜ੍ਜੇਸੁ, ਹਾਸਰੂਪਸੁਭਕ੍ਰਿਯਂ.

੨੫੭. ਅਪਾਯੁਦ੍ਧਤ੍ਤਯਂ ਹਿਤ੍ਵਾ, ਹੋਤਾਕਾਸਸੁਭਕ੍ਰਿਯਂ;

ਤਥਾਪਾਯੁਦ੍ਧਦ੍ਵੇ ਹਿਤ੍ਵਾ, ਵਿਞ੍ਞਾਣਕੁਸਲਕ੍ਰਿਯਂ.

੨੫੮. ਭਵਗ੍ਗਾਪਾਯਵਜ੍ਜੇਸੁ, ਆਕਿਞ੍ਚਞ੍ਞਸੁਭਕ੍ਰਿਯਂ;

ਦਿਟ੍ਠਿਕਙ੍ਖਾਯੁਤਾ ਸੁਦ੍ਧੇ, ਵਿਨਾ ਸਬ੍ਬਾਸੁ ਭੂਮਿਸੁ.

੨੫੯. ਅਮਲਾਨਿ ਚ ਤੀਣਨ੍ਤੇ,

ਭਵਗ੍ਗੇ ਚ ਸੁਭਕ੍ਰਿਯਾ;

ਮਹਾਕ੍ਰਿਯਾ ਚ ਹੋਨ੍ਤੇਤੇ,

ਤੇਰਸੇਵਾਨਪਾਯਿਸੁ.

੨੬੦. ਅਨਾਰੁਪ੍ਪੇ ਮਨੋਧਾਤੁ, ਦਸ੍ਸਨਂ ਸਵਤੀਰਣਂ;

ਕਾਮੇ ਅਨਿਟ੍ਠਸਂਯੋਗੇ, ਬ੍ਰਹ੍ਮਾਨਂ ਪਾਪਜਂ ਫਲਂ.

੨੬੧. ਵੋਟ੍ਠਬ੍ਬਂ ਕਾਮਪੁਞ੍ਞਞ੍ਚ, ਦਿਟ੍ਠਿਹੀਨਂ ਸਉਦ੍ਧਵਂ;

ਚੁਦ੍ਦਸੇਤਾਨਿ ਚਿਤ੍ਤਾਨਿ, ਜਾਯਰੇ ਤਿਂਸਭੂਮਿਸੁ.

੨੬੨. ਇਨ੍ਦ੍ਰਿਯਾਨਿ ਦੁਵੇ ਅਨ੍ਤਦ੍ਵਯਵਜ੍ਜੇਸ੍ਵਹੇਤੁਸੁ;

ਤੀਣਿ ਕਙ੍ਖੇਤਰਾਹੇਤੁਪਾਪੇ ਚਤ੍ਤਾਰਿ ਤੇਰਸ.

੨੬੩. ਛ ਞਾਣਹੀਨੇ ਤਬ੍ਬਨ੍ਤਸਾਸਵੇ ਸਤ੍ਤ ਨਿਮ੍ਮਲੇ;

ਚਤ੍ਤਾਲੀਸੇ ਪਨਟ੍ਠੇਵਂ, ਞੇਯ੍ਯਮਿਨ੍ਦ੍ਰਿਯਭੇਦਤੋ.