੫. ਪਞ੍ਚਮੋ ਪਰਿਚ੍ਛੇਦੋ

ਨਿਬ੍ਬਾਨਪਞ੍ਞਤ੍ਤਿਪਰਿਦੀਪਨੋ

੩੦੪. ਰਾਗਾਦੀਨਂ ਖਯਂ ਵੁਤ੍ਤਂ, ਨਿਬ੍ਬਾਨਂ ਸਨ੍ਤਿਲਕ੍ਖਣਂ;

ਸਂਸਾਰਦੁਕ੍ਖਸਨ੍ਤਾਪਤਤ੍ਤਸ੍ਸਾਲਂ ਸਮੇਤਵੇ.

੩੦੫. ਖਯਮਤ੍ਤਂ ਨ ਨਿਬ੍ਬਾਨਂ, ਸਗਮ੍ਭੀਰਾਦਿਵਾਚਤੋ;

ਅਭਾਵਸ੍ਸ ਹਿ ਕੁਮ੍ਮਾਨਂ, ਲੋਮਸ੍ਸੇਵ ਨ ਵਾਚਤਾ.

੩੦੬. ਖਯੋਤਿ ਵੁਚ੍ਚਤੇ ਮਗ੍ਗੋ, ਤਪ੍ਪਾਪਤ੍ਤਾ ਇਦਂ ਖਯਂ;

ਅਰਹਤ੍ਤਂ ਵਿਯੁਪ੍ਪਾਦ-ਵਯਾਭਾਵਾ ਧੁਵਞ੍ਚ ਤਂ.

੩੦੭. ਸਙ੍ਖਤਂ ਸਮ੍ਮੁਤਿਞ੍ਚਾਪਿ, ਞਾਣਮਾਲਮ੍ਬ ਨੇਵ ਹਿ;

ਛਿਨ੍ਦੇ ਮਲੇ ਤਤੋ ਵਤ੍ਥੁ, ਇਚ੍ਛਿਤਬ੍ਬਮਸਙ੍ਖਤਂ.

੩੦੮. ਪਤ੍ਤੁਕਾਮੇਨ ਤਂ ਸਨ੍ਤਿਂ, ਛਬ੍ਬਿਸੁਦ੍ਧਿਂ ਸਮਾਦਿਯ;

ਞਾਣਦਸ੍ਸਨਸੁਦ੍ਧੀ ਤੁ, ਸਾਧੇਤਬ੍ਬਾ ਹਿਤਤ੍ਥਿਨਾ.

੩੦੯. ਚੇਤਨਾਦਿਵਿਧਾ ਸੀਲ-ਸੁਦ੍ਧਿ ਤਤ੍ਥ ਚਤੁਬ੍ਬਿਧਾ;

ਸੋਪਚਾਰਸਮਾਧੀ ਤੁ, ਚਿਤ੍ਤਸੁਦ੍ਧੀਤਿ ਵੁਚ੍ਚਤੇ.

੩੧੦. ਸਮ੍ਪਾਦੇਤ੍ਵਾਦਿਦ੍ਵੇਸੁਦ੍ਧਿਂ, ਨਮਨਾ ਨਾਮਂ ਤੁ ਰੁਪ੍ਪ-

ਤੋ ਰੂਪਂ ਨਤ੍ਥਿ ਅਤ੍ਤਾਦਿਵਤ੍ਥੂਤਿ ਚ ਵਵਤ੍ਥਪੇ.

੩੧੧. ਮਣਿਨ੍ਧਨਾਤਪੇ ਅਗ੍ਗਿ, ਅਸਨ੍ਤੋਪਿ ਸਮਾਗਮੇ;

ਯਥਾ ਹੋਤਿ ਤਥਾ ਚਿਤ੍ਤਂ, ਵਤ੍ਥਾਲਮ੍ਬਾਦਿਸਙ੍ਗਮੇ.

੩੧੨. ਪਙ੍ਗੁਲਨ੍ਧਾ ਯਥਾ ਗਨ੍ਤੁਂ, ਪਚ੍ਚੇਕਮਸਮਤ੍ਥਕਾ;

ਯਨ੍ਤਿ ਯੁਤ੍ਤਾ ਯਥਾ ਏਵਂ, ਨਾਮਰੂਪਵ੍ਹਯਾ ਕ੍ਰਿਯਾ.

੩੧੩. ਨ ਨਾਮਰੂਪਤੋ ਅਞ੍ਞੋ, ਅਤ੍ਤਾਦਿ ਇਤਿ ਦਸ੍ਸਨਂ;

ਸੋਧਨਤ੍ਤਾ ਹਿ ਦੁਦ੍ਦਿਟ੍ਠਿਂ, ਦਿਟ੍ਠਿਸੁਦ੍ਧੀਤਿ ਵੁਚ੍ਚਤਿ.

੩੧੪. ਅਵਿਜ੍ਜਾਤਣ੍ਹੁਪਾਦਾਨ-ਕਮ੍ਮੇਨਾਦਿਮ੍ਹਿ ਤਂ ਦ੍ਵਯਂ;

ਰੂਪਂ ਕਮ੍ਮਾਦਿਤੋ ਨਾਮਂ, ਵਤ੍ਥਾਦੀਹਿ ਪਵਤ੍ਤਿਯਂ.

੩੧੫. ਸਦਾ ਸਬ੍ਬਤ੍ਥ ਸਬ੍ਬੇਸਂ, ਸਦਿਸਂ ਨ ਯਤੋ ਤਤੋ;

ਨਾਹੇਤੁਨਾਞ੍ਞੋ ਅਤ੍ਤਾਦਿਨਿਚ੍ਚਹੇਤੂਤਿ ਪਸ੍ਸਤਿ.

੩੧੬. ਏਵਂ ਤੀਰਯਤੇ ਕਙ੍ਖਾ, ਯਾਯ ਪਞ੍ਞਾਯ ਪਚ੍ਚਯੇ;

ਦਿਟ੍ਠਤ੍ਤਾ ਸੁਦ੍ਧਿ ਸਾ ਕਙ੍ਖਾਤਰਣਂ ਇਤਿ ਵੁਚ੍ਚਤਿ.

੩੧੭. ਪਤ੍ਤਞ੍ਞਾਤਪਰਿਞ੍ਞੋ ਸੋ, ਅਤ੍ਰਟ੍ਠੋ ਯਤਤੇਯਤਿ;

ਤੀਰਣਵ੍ਹਪਰਿਞ੍ਞਾਯ, ਵਿਸੁਦ੍ਧਤ੍ਥਂ ਸਦਾਦਰੋ.

੩੧੮. ਤਿਕਾਲਾਦਿਵਸਾ ਖਨ੍ਧੇ, ਸਮਾਸੇਤ੍ਵਾ ਕਲਾਪਤੋ;

ਅਨਿਚ੍ਚਾ ਦੁਕ੍ਖਾਨਤ੍ਤਾਤਿ, ਆਦੋ ਏਵਂ ਵਿਪਸ੍ਸਤਿ.

੩੧੯. ਖਨ੍ਧਾਨਿਚ੍ਚਾ ਖਯਟ੍ਠੇਨ, ਭਯਟ੍ਠੇਨ ਦੁਖਾਵ ਤੇ;

ਅਨਤ੍ਤਾਸਾਰਕਟ੍ਠੇਨ, ਇਤਿ ਪਸ੍ਸੇ ਪੁਨਪ੍ਪੁਨਂ.

੩੨੦. ਆਕਾਰੇਹਿ ਅਨਿਚ੍ਚਾਦਿਚਤ੍ਤਾਲੀਸੇਹਿ ਸਮ੍ਮਸੇ;

ਲਕ੍ਖਣਾਨਂ ਵਿਭੂਤਤ੍ਥਂ, ਖਨ੍ਧਾਨਂ ਪਨ ਸਬ੍ਬਸੋ.

੩੨੧. ਏਵਞ੍ਚਾਪਿ ਅਸਿਜ੍ਝਨ੍ਤੇ, ਨਵਧਾ ਨਿਸਿਤਿਨ੍ਦ੍ਰਿਯੋ;

ਸਤ੍ਤਕਦ੍ਵਯਤੋ ਸਮ੍ਮਾ, ਰੂਪਾਰੂਪੇ ਵਿਪਸ੍ਸਯੇ.

੩੨੨. ਰੂਪਮਾਦਾਨਨਿਕ੍ਖੇਪਾ, ਵਯੋਵੁਦ੍ਧਤ੍ਤਗਾਮਿਤੋ;

ਸਮ੍ਮਸੇਵਨ੍ਨਜਾਦੀਹਿ, ਧਮ੍ਮਤਾਰੂਪਤੋਪਿ ਚ.

੩੨੩. ਨਾਮਂ ਕਲਾਪਯਮਤੋ, ਖਣਤੋ ਕਮਤੋਪਿ ਚ;

ਦਿਟ੍ਠਿਮਾਨਨਿਕਨ੍ਤੀਨਂ, ਪਸ੍ਸੇ ਉਗ੍ਘਾਟਨਾਦਿਤੋ.

੩੨੪. ਅਵਿਜ੍ਜਾਤਣ੍ਹਾਕਮ੍ਮਨ੍ਨ-ਹੇਤੁਤੋ ਰੂਪਂ ਉਬ੍ਭਵੇ;

ਵਿਨਾਹਾਰਂ ਸਫਸ੍ਸੇਹਿ, ਵੇਦਨਾਦਿਤ੍ਤਯਂ ਭਵੇ.

੩੨੫. ਤੇਹਿਯੇਵ ਵਿਨਾ ਫਸ੍ਸਂ,

ਨਾਮਰੂਪਾਧਿਕੇਹਿ ਤੁ;

ਚਿਤ੍ਤਂ ਹੇਤੁਕ੍ਖਯਾ ਸੋ ਸੋ,

ਵੇਤਿ ਵੇ ਤਸ੍ਸ ਤਸ੍ਸ ਤੁ.

੩੨੬. ਹੇਤੁਤੋਦਯਨਾਸੇਵਂ, ਖਣੋਦਯਵਯੇਨਪਿ;

ਇਤਿ ਪਞ੍ਞਾਸਾਕਾਰੇਹਿ, ਪਸ੍ਸੇ ਪੁਨੂਦਯਬ੍ਬਯਂ.

੩੨੭. ਯੋਗਿਸ੍ਸੇਵਂ ਸਮਾਰਦ੍ਧਉਦਯਬ੍ਬਯਦਸ੍ਸਿਨੋ;

ਪਾਤੁਭੋਨ੍ਤਿ ਉਪਕ੍ਲੇਸਾ, ਸਭਾਵਾ ਹੇਤੁਤੋਪਿ ਚ.

੩੨੮. ਤੇ ਓਭਾਸਮਤੁਸ੍ਸਾਹਪਸ੍ਸਦ੍ਧਿਸੁਖੁਪੇਕ੍ਖਨਾ;

ਸਤਿ ਪੀਤਾਧਿਮੋਕ੍ਖੋ ਚ, ਨਿਕਨ੍ਤਿ ਚ ਦਸੀਰਿਤਾ.

੩੨੯. ਤਣ੍ਹਾਦਿਟ੍ਠੁਨ੍ਨਤਿਗ੍ਗਾਹਵਤ੍ਥੁਤੋ ਤਿਂਸਧਾ ਤੇ ਚ;

ਤਦੁਪ੍ਪਨ੍ਨੇ ਚਲੇ ਬਾਲੋ, ਅਮਗ੍ਗੇ ਮਗ੍ਗਦਸ੍ਸਕੋ.

੩੩੦. ਵਿਪਸ੍ਸਨਾ ਪਥੋਕ੍ਕਨ੍ਤਾ, ਤਦਾਸਿ ਮਤਿਮਾਧੁਨਾ;

ਨ ਮਗ੍ਗੋ ਗਾਹਵਤ੍ਥੁਤ੍ਤਾ, ਤੇਸਂ ਇਤਿ ਵਿਪਸ੍ਸਤਿ.

੩੩੧. ਉਪਕ੍ਲੇਸੇ ਅਨਿਚ੍ਚਾਦਿ-ਵਸਗੇ ਸੋਦਯਬ੍ਬਯੇ;

ਪਸ੍ਸਤੋ ਵੀਥਿਨੋਕ੍ਕਨ੍ਤਦਸ੍ਸਨਂ ਵੁਚ੍ਚਤੇ ਪਥੋ.

੩੩੨. ਮਗ੍ਗਾਮਗ੍ਗੇ ਵਵਤ੍ਥੇਤ੍ਵਾ, ਯਾ ਪਞ੍ਞਾ ਏਵਮੁਟ੍ਠਿਤਾ;

ਮਗ੍ਗਾਮਗ੍ਗਿਕ੍ਖਸਙ੍ਖਾਤਾ, ਸੁਦ੍ਧਿ ਸਾ ਪਞ੍ਚਮੀ ਭਵੇ.

੩੩੩. ਪਹਾਨਵ੍ਹਪਰਿਞ੍ਞਾਯ, ਆਦਿਤੋ ਸੁਦ੍ਧਿਸਿਦ੍ਧਿਯਾ;

ਤੀਰਣਵ੍ਹਪਰਿਞ੍ਞਾਯ, ਅਨ੍ਤਗੋ ਯਤਤੇਧੁਨਾ.

੩੩੪. ਜਾਯਤੇ ਨਵਞਾਣੀ ਸਾ, ਵਿਸੁਦ੍ਧਿ ਕਮਤੋਦਯ-

ਬ੍ਬਯਾਦੀ ਘਟਮਾਨਸ੍ਸ, ਨਵ ਹੋਨ੍ਤਿ ਪਨੇਤ੍ਥ ਹਿ.

੩੩੫. ਸਨ੍ਤਤੀਰਿਯਤੋ ਚੇਵ, ਘਨੇਨਾਪਿ ਚ ਛਨ੍ਨਤੋ;

ਲਕ੍ਖਣਾਨਿ ਨ ਖਾਯਨ੍ਤੇ, ਸਂਕਿਲਿਟ੍ਠਾ ਵਿਪਸ੍ਸਨਾ.

੩੩੬. ਤਤੋਤ੍ਰ ਸਮ੍ਮਸੇ ਭਿਯ੍ਯੋ, ਪੁਨਦੇਵੁਦਯਬ੍ਬਯਂ;

ਤੇਨਾਨਿਚ੍ਚਾਦਿਸਮ੍ਪਸ੍ਸਂ, ਪਟੁਤਂ ਪਰਮਂ ਵਜੇ.

੩੩੭. ਆਵਟ੍ਟੇਤ੍ਵਾ ਯਦੁਪ੍ਪਾਦਟ੍ਠਿਤਿਆਦੀਹਿ ਪਸ੍ਸਤੋ;

ਭਙ੍ਗੇਵ ਤਿਟ੍ਠਤੇ ਞਾਣਂ, ਤਦਾ ਭਙ੍ਗਮਤੀ ਸਿਯਾ.

੩੩੮. ਏਵਂ ਪਸ੍ਸਯਤੋ ਭਙ੍ਗਂ, ਤਿਭਵੋ ਖਾਯਤੇ ਯਦਾ;

ਸੀਹਾਦਿਵ ਭਯਂ ਹੁਤ੍ਵਾ, ਸਿਯਾ ਲਦ੍ਧਾ ਭਯਿਕ੍ਖਣਾ.

੩੩੯. ਸਾਦੀਨਵਾ ਪਤਿਟ੍ਠਨ੍ਤੇ, ਖਨ੍ਧਾਦਿਤ੍ਤਘਰਂ ਵਿਯ;

ਯਦਾ ਤਦਾ ਸਿਯਾ ਲਦ੍ਧਾ, ਆਦੀਨਵਾਨੁਪਸ੍ਸਨਾ.

੩੪੦. ਸਙ੍ਖਾਰਾਦੀਨਵਂ ਦਿਸ੍ਵਾ, ਰਮਤੇ ਨ ਭਵਾਦਿਸੁ;

ਮਤਿ ਯਦਾ ਤਦਾ ਲਦ੍ਧਾ, ਸਿਯਾ ਨਿਬ੍ਬਿਦਪਸ੍ਸਨਾ.

੩੪੧. ਞਾਣਂ ਮੁਚ੍ਚਿਤੁਕਾਮਂ ਤੇ, ਸਬ੍ਬਭੂਸਙ੍ਖਤੇ ਯਦਾ;

ਜਾਲਾਦੀਹਿ ਚ ਮਚ੍ਛਾਦੀ, ਤਦਾ ਲਦ੍ਧਾ ਚਜ੍ਜਮਤਿ.

੩੪੨. ਸਙ੍ਖਾਰੇ ਅਸੁਭਾਨਿਚ੍ਚਦੁਕ੍ਖਤੋਨਤ੍ਤਤੋ ਮਤਿ;

ਪਸ੍ਸਨ੍ਤੀ ਚਤ੍ਤੁਮੁਸ੍ਸੁਕ੍ਕਾ, ਪਟਿਸਙ੍ਖਾਨੁਪਸ੍ਸਨਾ.

੩੪੩. ਵੁਤ੍ਤਾਤ੍ਰ ਪਟੁਭਾਵਾਯ, ਸਬ੍ਬਞਾਣਪਵਤ੍ਤਿਯਾ;

ਮੀਨਸਞ੍ਞਾਯ ਸਪ੍ਪਸ੍ਸ, ਗਾਹਲੁਦ੍ਦਸਮੋਪਮਾ.

੩੪੪. ਅਤ੍ਤਤ੍ਤਨਿਯਤੋ ਸੁਞ੍ਞਂ, ਦ੍ਵਿਧਾ ‘‘ਨਾਹਂ ਕ੍ਵਚਾ’’ਦਿਨਾ;

ਚਤੁਧਾ ਛਬ੍ਬਿਧਾ ਚਾਪਿ, ਬਹੁਧਾ ਪਸ੍ਸਤੋ ਭੁਸਂ.

੩੪੫. ਆਵਟ੍ਟਤਿਗ੍ਗਿਮਾਸਜ੍ਜ,

ਨ੍ਹਾਰੂਵ ਮਤਿ ਸਙ੍ਖਤਂ;

ਚਤ੍ਤਭਰਿਯੋ ਯਥਾ ਦੋਸੇ,

ਤਥਾ ਤਂ ਸਮੁਪੇਕ੍ਖਤੇ.

੩੪੬. ਤਾਵ ਸਾਦੀਨਵਾਨਮ੍ਪਿ, ਲਕ੍ਖਣੇ ਤਿਟ੍ਠਤੇ ਮਤਿ;

ਨ ਪਸ੍ਸੇ ਯਾਵ ਸਾ ਤੀਰਂ, ਸਾਮੁਦ੍ਦਸਕੁਣੀ ਯਥਾ.

੩੪੭. ਸਙ੍ਖਾਰੁਪੇਕ੍ਖਾਞਾਣਾਯਂ, ਸਿਖਾਪਤ੍ਤਾ ਵਿਪਸ੍ਸਨਾ;

ਵੁਟ੍ਠਾਨਗਾਮਿਨੀਤਿ ਚ, ਸਾਨੁਲੋਮਾਤਿ ਵੁਚ੍ਚਤਿ.

੩੪੮. ਪਤ੍ਵਾ ਮੋਕ੍ਖਮੁਖਂ ਸਤ੍ਤ, ਸਾਧੇਤਿਰਿਯਪੁਗ੍ਗਲੇ;

ਝਾਨਙ੍ਗਾਦਿਪ੍ਪਭੇਦੇ ਚ, ਪਾਦਕਾਦਿਵਸੇਨ ਸਾ.

੩੪੯. ਅਨਿਚ੍ਚਤੋ ਹਿ ਵੁਟ੍ਠਾਨਂ, ਯਦਿ ਯਸ੍ਸਾਸਿ ਯੋਗਿਨੋ;

ਸੋਧਿਮੋਕ੍ਖਸ੍ਸ ਬਾਹੁਲ੍ਲਾ, ਤਿਕ੍ਖਸਦ੍ਧਿਨ੍ਦ੍ਰਿਯੋ ਭਵੇ.

੩੫੦. ਦੁਕ੍ਖਤੋਨਤ੍ਤਤੋ ਤਞ੍ਚੇ, ਸਿਯਾ ਹੋਨ੍ਤਿ ਕਮੇਨ ਤੇ;

ਪਸ੍ਸਦ੍ਧਿਵੇਦਬਾਹੁਲ੍ਲਾ, ਤਿਕ੍ਖੇਕਗ੍ਗਮਤਿਨ੍ਦ੍ਰਿਯਾ.

੩੫੧. ਪਞ੍ਞਾਧੁਰਤ੍ਤਮੁਦ੍ਦਿਟ੍ਠਂ, ਵੁਟ੍ਠਾਨਂ ਯਦਿਨਤ੍ਤਤੋ;

ਸਦ੍ਧਾਧੁਰਤ੍ਤਂ ਸੇਸੇਹਿ, ਤਂ ਵਿਯਾਭਿਨਿਵੇਸਤੋ.

੩੫੨. ਦ੍ਵੇ ਤਿਕ੍ਖਸਦ੍ਧਸਮਥਾ, ਸਿਯੁਂ ਸਦ੍ਧਾਨੁਸਾਰਿਨੋ;

ਆਦੋ ਮਜ੍ਝੇਸੁ ਠਾਨੇਸੁ, ਛਸੁ ਸਦ੍ਧਾਵਿਮੁਤ੍ਤਕਾ.

੩੫੩. ਇਤਰੋ ਧਮ੍ਮਾਨੁਸਾਰੀਦੋ, ਦਿਟ੍ਠਿਪ੍ਪਤ੍ਤੋ ਅਨਨ੍ਤਕੇ;

ਪਞ੍ਞਾਮੁਤ੍ਤੋਭਯਤ੍ਥਨ੍ਤੇ, ਅਝਾਨਿਝਾਨਿਕਾ ਚ ਤੇ.

੩੫੪. ਤਿਕ੍ਖਸਦ੍ਧਸ੍ਸ ਚਨ੍ਤੇਪਿ, ਸਦ੍ਧਾਮੁਤ੍ਤਤ੍ਤਮੀਰਿਤਂ;

ਵਿਸੁਦ੍ਧਿਮਗ੍ਗੇ ਮਜ੍ਝਸ੍ਸ, ਕਾਯਸਕ੍ਖਿਤ੍ਤਮਟ੍ਠਸੁ.

੩੫੫. ਵੁਤ੍ਤਂ ਮੋਕ੍ਖਕਥਾਯਂ ਯਂ, ਤਿਕ੍ਖਪਞ੍ਞਾਰਹਸ੍ਸ ਤੁ;

ਦਿਟ੍ਠਿਪਤ੍ਤਤ੍ਤਂ ਹੇਤਞ੍ਚ, ਤਞ੍ਚ ਨਤ੍ਥਾਭਿਧਮ੍ਮਿਕੇ.

੩੫੬. ਤੇ ਸਬ੍ਬੇ ਅਟ੍ਠਮੋਕ੍ਖਾਨਂ, ਲਾਭੀ ਚੇ ਛਸੁ ਮਜ੍ਝਸੁ;

ਕਾਯਸਕ੍ਖੀ ਸਿਯੁਂ ਅਨ੍ਤੇ, ਉਭਤੋਭਾਗਮੁਤ੍ਤਕਾ.

੩੫੭. ਅਨੁਲੋਮਾਨਿ ਚਤ੍ਤਾਰਿ, ਤੀਣਿ ਦ੍ਵੇ ਵਾ ਭਵਨ੍ਤਿ ਹਿ;

ਮਗ੍ਗਸ੍ਸ ਵੀਥਿਯਂ ਮਨ੍ਦਮਜ੍ਝਤਿਕ੍ਖਮਤਿਬ੍ਬਸਾ.

੩੫੮. ਵਿਸੁਦ੍ਧਿਮਗ੍ਗੇ ਚਤ੍ਤਾਰਿ, ਪਟਿਸਿਦ੍ਧਾਨਿ ਸਬ੍ਬਥਾ;

ਏਵਮਟ੍ਠਸਾਲਿਨਿਯਾ, ਵੁਤ੍ਤਤ੍ਤਾ ਏਵਮੀਰਿਤਂ.

੩੫੯. ਭਵਙ੍ਗਾਸਨ੍ਨਦੋਸੋਪਿ, ਨਪ੍ਪਨਾਯ ਥਿਰਤ੍ਤਤੋ;

ਸੁਦ੍ਧਿਂ ਪਟਿਪਦਾਞਾਣਦਸ੍ਸਨੇਵਂ ਲਭੇ ਯਤਿ.

੩੬੦. ਆਵਜ੍ਜਂ ਵਿਯ ਮਗ੍ਗਸ੍ਸ, ਛਟ੍ਠਸਤ੍ਤਮਸੁਦ੍ਧਿਨਂ;

ਅਨ੍ਤਰਾ ਸਨ੍ਤਿਮਾਰਬ੍ਭ, ਤੇਹਿ ਗੋਤ੍ਰਭੁ ਜਾਯਤੇ.

੩੬੧. ਸਂਯੋਜਨਤ੍ਤਯਚ੍ਛੇਦੀ, ਮਗ੍ਗੋ ਉਪ੍ਪਜ੍ਜਤੇ ਤਤੋ;

ਫਲਾਨਿ ਏਕਂ ਦ੍ਵੇ ਤੀਣਿ, ਤਤੋ ਵੁਤ੍ਤਮਤਿਕ੍ਕਮਾ.

੩੬੨. ਤਥਾ ਭਾਵਯਤੋ ਹੋਤਿ, ਰਾਗਦੋਸਤਨੂਕਰਂ;

ਦੁਤਿਯੋ ਤਪ੍ਫਲਂ ਤਮ੍ਹਾ, ਸਕਦਾਗਾਮਿ ਤਪ੍ਫਲੀ.

੩੬੩. ਏਵਂ ਭਾਵਯਤੋ ਰਾਗਦੋਸਨਾਸਕਰੁਬ੍ਭਵੇ;

ਤਤਿਯੋ ਤਪ੍ਫਲਂ ਤਮ੍ਹਾ, ਤਪ੍ਫਲਟ੍ਠੋਨਾਗਾਮਿਕੋ.

੩੬੪. ਏਵਂ ਭਾਵਯਤੋ ਸੇਸਦੋਸਨਾਸਕਰੁਬ੍ਭਵੇ;

ਚਤੁਤ੍ਥੋ ਤਪ੍ਫਲਂ ਤਮ੍ਹਾ, ਅਰਹਾ ਤਪ੍ਫਲਟ੍ਠਕੋ.

੩੬੫. ਕਤਕਿਚ੍ਚੋ ਭਵਚ੍ਛੇਦੋ, ਦਕ੍ਖਿਣੇਯ੍ਯੋਪਧਿਕ੍ਖਯਾ;

ਨਿਬ੍ਬੁਤਿਂ ਯਾਤਿ ਦੀਪੋਵ, ਸਬ੍ਬਦੁਕ੍ਖਨ੍ਤਸਞ੍ਞਿਤਂ.

੩੬੬. ਏਵਂ ਸਿਦ੍ਧਾ ਸਿਯਾ ਸੁਦ੍ਧਿ, ਞਾਣਦਸ੍ਸਨਸਞ੍ਞਿਤਾ;

ਵੁਤ੍ਤਂ ਏਤ੍ਤਾਵਤਾ ਸਚ੍ਚਂ, ਪਰਮਤ੍ਥਂ ਸਮਾਸਤੋ.

੩੬੭. ਸਚ੍ਚਂ ਸਮ੍ਮੁਤਿ ਸਤ੍ਤਾਦਿਅਵਤ੍ਥੁ ਵੁਚ੍ਚਤੇ ਯਤੋ;

ਨ ਲਬ੍ਭਾਲਾਤਚਕ੍ਕਂਵ, ਤਂ ਹਿ ਰੂਪਾਦਯੋ ਵਿਨਾ.

੩੬੮. ਤੇਨ ਤੇਨ ਪਕਾਰੇਨ, ਰੂਪਾਦਿਂ ਨ ਵਿਹਾਯ ਤੁ;

ਤਥਾ ਤਥਾਭਿਧਾਨਞ੍ਚ, ਗਾਹਞ੍ਚ ਵਤ੍ਤਤੇ ਤਤੋ.

੩੬੯. ਲਬ੍ਭਤੇ ਪਰਿਕਪ੍ਪੇਨ, ਯਤੋ ਤਂ ਨ ਮੁਸਾ ਤਤੋ;

ਅਵੁਤ੍ਤਾਲਮ੍ਬਮਿਚ੍ਚਾਹੁ, ਪਰਿਤ੍ਤਾਦੀਸ੍ਵਵਾਚਤੋ.

੩੭੦. ਪਾਪਕਲ੍ਯਾਣਮਿਤ੍ਤੋਯਂ, ਸਤ੍ਤੋਤਿ ਖਨ੍ਧਸਨ੍ਤਤਿ;

ਏਕਤ੍ਤੇਨ ਗਹੇਤ੍ਵਾਨ, ਵੋਹਰਨ੍ਤੀਧ ਪਣ੍ਡਿਤਾ.

੩੭੧. ਪਥਵਾਦਿ ਵਿਯੇਕੋਪਿ, ਪੁਗ੍ਗਲੋ ਨ ਯਤੋ ਤਤੋ;

ਕੁਦਿਟ੍ਠਿਵਤ੍ਥੁਭਾਵੇਨ, ਪੁਗ੍ਗਲਗ੍ਗਹਣਂ ਭਵੇ.

੩੭੨. ਏਤਂ ਵਿਸਯਤੋ ਕਤ੍ਵਾ, ਸਙ੍ਖਾਦੀਹਿ ਪਦੇਹਿ ਤੁ;

ਅਵਿਜ੍ਜਮਾਨਪਞ੍ਞਤ੍ਤਿ, ਇਤਿ ਤਞ੍ਞੂਹਿ ਭਾਸਿਤਾ.

੩੭੩. ਪਞ੍ਞਤ੍ਤਿ ਵਿਜ੍ਜਮਾਨਸ੍ਸ, ਰੂਪਾਦਿਵਿਸਯਤ੍ਤਤੋ;

ਕਾਯਂ ਪਞ੍ਞਤ੍ਤਿ ਚੇ ਸੁਟ੍ਠੁ, ਵਦਤੋ ਸੁਣ ਸਚ੍ਚਤੋ.

੩੭੪. ਸਵਿਞ੍ਞਤ੍ਤਿਵਿਕਾਰੋ ਹਿ, ਸਦ੍ਦੋ ਸਚ੍ਚਦ੍ਵਯਸ੍ਸ ਤੁ;

ਪਞ੍ਞਾਪਨਤ੍ਤਾ ਪਞ੍ਞਤ੍ਤਿ, ਇਤਿ ਤਞ੍ਞੂਹਿ ਭਾਸਿਤਾ.

੩੭੫. ਪਚ੍ਚੁਪ੍ਪਨ੍ਨਾਦਿਆਲਮ੍ਬਂ, ਨਿਰੁਤ੍ਤਿਪਟਿਸਮ੍ਭਿਦਾ-

ਞਾਣਸ੍ਸਾਤਿ ਇਦਞ੍ਚੇਵਂ, ਸਤਿ ਯੁਜ੍ਜਤਿ ਨਾਞ੍ਞਥਾ.