ਪਞ੍ਚਮੋ ਪਰਿਚ੍ਛੇਦੋ
੫. ਭੂਮਿਪੁਗ੍ਗਲਕਥਾ
੧੮੦. ਇਤੋ ਪਰਂ ਪਵਕ੍ਖਾਮਿ, ਭੂਮਿਪੁਗ੍ਗਲਭੇਦਤੋ;
ਚਿਤ੍ਤਾਨਂ ਪਨ ਸਬ੍ਬੇਸਂ, ਕਮਤੋ ਸਙ੍ਗਹਂ ਕਥਂ.
੧੮੧. ਨਿਰਯਞ੍ਚ ਤਿਰਚ੍ਛਾਨਯੋਨਿ ਪੇਤਾਸੁਰਾ ਤਥਾ;
ਚਤੁਰਾਪਾਯਭੂਮੀਤਿ, ਕਾਮੇ ਦੁਗ੍ਗਤਿਯੋ ਮਤਾ.
੧੮੨. ਚਾਤੁਮਹਾਰਾਜਿਕਾ ਚ, ਤਾਵਤਿਂਸਾ ਚ ਯਾਮਕਾ;
ਤੁਸਿਤਾ ਚੇਵ ਨਿਮ੍ਮਾਨਰਤਿਨੋ ਵਸਵਤ੍ਤਿਨੋ.
੧੮੩. ਛਲ਼ੇਤੇ ਦੇਵਲੋਕਾ ਚ, ਮਾਨਵਾਤਿ ਚ ਸਤ੍ਤਧਾ;
ਕਾਮਸੁਗਤਿਯੋ ਚੇਕਾਦਸਧਾ ਕਾਮਭੂਮਿਯੋ.
੧੮੪. ਬ੍ਰਹ੍ਮਾਨਂ ਪਾਰਿਸਜ੍ਜਾ ਚ, ਤਥਾ ਬ੍ਰਹ੍ਮਪੁਰੋਹਿਤਾ;
ਮਹਾਬ੍ਰਹ੍ਮਾ ਚ ਤਿਵਿਧਾ, ਪਠਮਜ੍ਝਾਨਭੂਮਿਯੋ.
੧੮੫. ਪਰਿਤ੍ਤਾਭਾਪ੍ਪਮਾਣਾਭਾ, ਤਥੇਵਾਭਸ੍ਸਰਾਤਿ ਚ;
ਦੁਤਿਯਜ੍ਝਾਨਭੂਮਿ ਚ, ਤਿਵਿਧਾਵ ਪਕਾਸਿਤਾ.
੧੮੬. ਪਰਿਤ੍ਤਸੁਭਾਪ੍ਪਮਾਣਾਸੁਭਾ ਚ ਸੁਭਕਿਣ੍ਹਕਾ;
ਤਿਵਿਧਾਪਿ ਪਵੁਚ੍ਚਨ੍ਤਿ, ਤਤਿਯਜ੍ਝਾਨਭੂਮਿਯੋ.
੧੮੭. ਵੇਹਪ੍ਫਲਾ ਅਸਞ੍ਞੀ ਚ, ਸੁਦ੍ਧਾਵਾਸਾ ਚ ਪਞ੍ਚਧਾ;
ਇਚ੍ਚੇਤਾ ਪਨ ਸਤ੍ਤਾਪਿ, ਚਤੁਤ੍ਥਜ੍ਝਾਨਭੂਮਿਯੋ.
੧੮੮. ਅਵਿਹਾ ਚ ਅਤਪ੍ਪਾ ਚ, ਸੁਦਸ੍ਸਾ ਚ ਸੁਦਸ੍ਸਿਨੋ;
ਅਕਨਿਟ੍ਠਾਤਿ ਪਞ੍ਚੇਤੇ, ਸੁਦ੍ਧਾਵਾਸਾ ਪਕਾਸਿਤਾ.
੧੮੯. ਇਤਿ ਸੋਲ਼ਸਧਾ ਭਿਨ੍ਨਾ, ਬ੍ਰਹ੍ਮਲੋਕਾ ਪਵੁਚ੍ਚਰੇ;
ਰੂਪਿਬ੍ਰਹ੍ਮਾਨਮਾਵਾਸਾ, ਰੂਪਾਵਚਰਭੂਮਿਯੋ.
੧੯੦. ਆਕਾਸਾਨਞ੍ਚਾਯਤਨਨਾਮਾਦੀਹਿ ਪਕਾਸਿਤਾ;
ਅਰੂਪਿਬ੍ਰਹ੍ਮਲੋਕਾ ਚ, ਚਤੁਧਾਰੂਪਭੂਮਿਯੋ.
੧੯੧. ਸੋਤਾਪਨ੍ਨਾਦਿਭੇਦੇਨ, ਚਤੁਧਾਨੁਤ੍ਤਰਾ ਮਤਾ;
ਪਞ੍ਚਤਿਂਸ ਪਨਿਚ੍ਚੇਵਂ, ਸਬ੍ਬਥਾਪਿ ਚ ਭੂਮਿਯੋ.
੧੯੨. ਜਾਯਨ੍ਤਿ ਚਤੁਰਾਪਾਯੇ, ਪਾਪਪਾਕਾਯ ਸਨ੍ਧਿਯਾ;
ਕਾਮਾਵਚਰਦੇਵੇਸੁ, ਮਹਾਪਾਕੇਹਿ ਜਾਯਰੇ.
੧੯੩. ਅਹੇਤੁਕਾ ਪੁਞ੍ਞਪਾਕਾਹੇਤੁਕੇਨ ਤੁ ਜਾਯਰੇ;
ਭੁਮ੍ਮਦੇਵਮਨੁਸ੍ਸੇਸੁ, ਮਹਾਪਾਕੇਹਿ ਚੇਤਰੇ.
੧੯੪. ਵਿਪਾਕਂ ਪਠਮਜ੍ਝਾਨਂ, ਪਠਮਜ੍ਝਾਨਭੂਮਿਯਂ;
ਦੁਤਿਯਂ ਤਤਿਯਞ੍ਚੇਵ, ਦੁਤਿਯਜ੍ਝਾਨਭੂਮਿਯਂ.
੧੯੫. ਤਤਿਯਮ੍ਹਿ ਚਤੁਤ੍ਥਂ ਤੁ, ਚਤੁਤ੍ਥਮ੍ਹਿ ਚ ਪਞ੍ਚਮਂ;
ਆਰੁਪ੍ਪਾ ਚ ਕਮੇਨੇਵ, ਆਰੁਪ੍ਪੇ ਹੋਨ੍ਤਿ ਸਨ੍ਧਿਯੋ.
੧੯੬. ਕਾਯਵਾਚਾਮਨੋਦ੍ਵਾਰੇ, ਕਮ੍ਮਂ ਪਾਣਵਧਾਦਿਕਂ;
ਕਤ੍ਵਾ ਪਾਪਕਚਿਤ੍ਤੇਹਿ, ਜਾਯਨ੍ਤਾਪਾਯਭੂਮਿਯਂ.
੧੯੭. ਕਾਯਵਾਚਾਮਨੋਦ੍ਵਾਰੇ, ਦਾਨਂ ਸੀਲਞ੍ਚ ਭਾਵਨਂ;
ਕਾਮਪੁਞ੍ਞੇਹਿ ਕਤ੍ਵਾਨ, ਕਾਮਸੁਗਤਿਯਂ ਸਿਯੁਂ.
੧੯੮. ਪਰਿਤ੍ਤਂ ਮਜ੍ਝਿਮਂ ਝਾਨਂ, ਪਣੀਤਞ੍ਚ ਯਥਾਕ੍ਕਮਂ;
ਭਾਵੇਤ੍ਵਾ ਤਿਵਿਧਾ ਹੋਨ੍ਤਿ, ਤੀਸੁ ਭੂਮੀਸੁ ਯੋਗਿਨੋ.
੧੯੯. ਵੇਹਪ੍ਫਲੇਸੁ ਜਾਯਨ੍ਤਿ, ਭਾਵੇਤ੍ਵਾ ਪਞ੍ਚਮਂ ਤਥਾ;
ਸਞ੍ਞਾਵਿਰਾਗਤਞ੍ਚੇਵ, ਭਾਵੇਤ੍ਵਾਸਞ੍ਞਿਭੂਮਿਯਂ.
੨੦੦. ਸੁਦ੍ਧਾਵਾਸੇਸੁ ਜਾਯਨ੍ਤਿ, ਅਨਾਗਾਮਿਕਪੁਗ੍ਗਲਾ;
ਆਰੁਪ੍ਪਾਨਿ ਚ ਭਾਵੇਤ੍ਵਾ, ਅਰੂਪੇਸੁ ਯਥਾਕ੍ਕਮਂ.
੨੦੧. ਲੋਕੁਤ੍ਤਰਂ ਤੁ ਭਾਵੇਤ੍ਵਾ, ਯਥਾਸਕਮਨਨ੍ਤਰਂ;
ਸਮਾਪਤ੍ਤਿਕ੍ਖਣੇ ਚੇਵ, ਅਪ੍ਪੇਤਿ ਫਲਮਾਨਸਂ.
੨੦੨. ਅਪਾਯਮ੍ਹਾ ਚੁਤਾ ਸਤ੍ਤਾ, ਕਾਮਧਾਤੁਮ੍ਹਿ ਜਾਯਰੇ;
ਸਬ੍ਬਟ੍ਠਾਨੇਸੁ ਜਾਯਨ੍ਤਿ, ਕਾਮਸੁਗਤਿਤੋ ਚੁਤਾ.
੨੦੩. ਚੁਤਾ ਜਾਯਨ੍ਤਿ ਰੂਪਮ੍ਹਾ, ਸਬ੍ਬਤ੍ਥਾਪਾਯਵਜ੍ਜਿਤੇ;
ਕਾਮਸੁਗਤਿਯਂ ਹੋਨ੍ਤਿ, ਅਰੂਪਾਸਞ੍ਞਤੋ ਚੁਤਾ.
੨੦੪. ਤਥਾਰੂਪਚੁਤਾ ਹੋਨ੍ਤਿ, ਤਤ੍ਥੇਵੋਪਰਿਮੇਵ ਚ;
ਵਟ੍ਟਮੂਲਸਮੁਚ੍ਛੇਦਾ, ਨਿਬ੍ਬਾਯਨ੍ਤਿ ਅਨਾਸਵਾ.
੨੦੫. ਸੁਦ੍ਧਾਵਾਸੇਸ੍ਵਨਾਗਾਮਿ-ਪੁਗ੍ਗਲਾਵੋਪਪਜ੍ਜਰੇ;
ਕਾਮਧਾਤੁਮ੍ਹਿ ਜਾਯਨ੍ਤਿ, ਅਨਾਗਾਮਿਵਿਵਜ੍ਜਿਤਾ.
੨੦੬. ਹੇਟ੍ਠੁਪਪਤ੍ਤਿਬ੍ਰਹ੍ਮਾਨਂ, ਅਰਿਯਾਨਂ ਨ ਕਤ੍ਥਚਿ;
ਅਸਞ੍ਞਸਤ੍ਤਾਪਾਯੇਸੁ, ਨਤ੍ਥੇਵਾਰਿਯਪੁਗ੍ਗਲਾ.
੨੦੭. ਵੇਹਪ੍ਫਲੇ ਅਕਨਿਟ੍ਠੇ, ਭਵਗ੍ਗੇ ਚ ਪਤਿਟ੍ਠਿਤਾ;
ਨ ਪੁਨਾਞ੍ਞਤ੍ਥ ਜਾਯਨ੍ਤਿ, ਸਬ੍ਬੇ ਅਰਿਯਪੁਗ੍ਗਲਾ.
੨੦੮. ਛਸੁ ਦੇਵੇਸ੍ਵਨਾਗਾਮੀ, ਵੀਤਰਾਗਾ ਨ ਤਿਟ੍ਠਰੇ;
ਨ ਚਿਰਟ੍ਠਾਯਿਨੋ ਤਤ੍ਥ, ਲੋਕਿਯਾਪਿ ਚ ਯੋਗਿਨੋ.
੨੦੯. ਗਿਹਿਲਿਙ੍ਗੇ ਨ ਤਿਟ੍ਠਨ੍ਤਿ, ਮਨੁਸ੍ਸੇਸੁ ਅਨਾਸਵਾ;
ਪਬ੍ਬਜ੍ਜਾਯਞ੍ਚ ਭੁਮ੍ਮੇ ਚ, ਬ੍ਰਹ੍ਮਤ੍ਤੇਪਿ ਚ ਤਿਟ੍ਠਰੇ.
੨੧੦. ਯਾਨਿ ਪਞ੍ਞਾਸ ਵਸ੍ਸਾਨਿ,
ਮਨੁਸ੍ਸਾਨਂ ਸ ਪਿਣ੍ਡਿਤੋ;
ਏਕੋ ਰਤ੍ਤਿਦਿਵੋ ਤੇਨ,
ਮਾਸੇਕੋ ਤਿਂਸ ਰਤ੍ਤਿਯੋ.
੨੧੧. ਦ੍ਵਾਦਸਮਾਸਿਯੋ ਵਸ੍ਸੋ, ਤੇਨ ਪਞ੍ਚਸਤਂ ਭਵੇ;
ਚਾਤੁਮਹਾਰਾਜਿਕਾਨਂ, ਪਮਾਣਮਿਦਮਾਯੁਨੋ.
੨੧੨. ਤਂ ਨਵੁਤਿਵਸ੍ਸਸਤ-ਸਹਸ੍ਸਂ ਪਨ ਪਿਣ੍ਡਿਤਂ;
ਗਣਨਾਯ ਮਨੁਸ੍ਸਾਨਂ, ਚਤੁਭਾਗੂਪਰੂਪਰਿ.
੨੧੩. ਯਂ ਮਨੁਸ੍ਸਵਸ੍ਸਸਤਂ, ਤਦੇਕੋ ਦਿਵਸੋ ਕਤੋ;
ਤੇਨ ਵਸ੍ਸਸਹਸ੍ਸਾਯੁ, ਤਾਵਤਿਂਸੇਸੁ ਦੇਸਿਤੋ.
੨੧੪. ਕੋਟਿਤ੍ਤਯਂ ਸਟ੍ਠਿਸਤਸਹਸ੍ਸਞ੍ਚਾਧਿਕਂ ਭਵੇ;
ਗਣਨਾਯ ਮਨੁਸ੍ਸਾਨਂ, ਤਾਵਤਿਂਸੇਸੁ ਪਿਣ੍ਡਿਤਂ.
੨੧੫. ਆਯੁਪ੍ਪਮਾਣਮਿਚ੍ਚੇਵਂ, ਦੇਵਾਨਮੁਪਰੂਪਰਿ;
ਦ੍ਵਿਕ੍ਖਤ੍ਤੁਂ ਦ੍ਵਿਗੁਣਂ ਕਤ੍ਵਾ, ਚਤੁਭਾਗਮੁਦਾਹਟਂ.
੨੧੬. ਗਣਨਾਯ ਮਨੁਸ੍ਸਾਨਂ, ਤਤ੍ਥ ਚੁਦ੍ਦਸ ਕੋਟਿਯੋ;
ਚਤ੍ਤਾਲੀਸਸਤਸਹਸ੍ਸਾਧਿਕਾ ਯਾਮਭੂਮਿਯਂ.
੨੧੭. ਤੁਸਿਤਾਨਂ ਪਕਾਸੇਨ੍ਤਿ, ਸਤ੍ਤਪਞ੍ਞਾਸ ਕੋਟਿਯੋ;
ਸਟ੍ਠਿਸਤਸਹਸ੍ਸਾਨਿ, ਵਸ੍ਸਾਨਿ ਅਧਿਕਾਨਿ ਚ.
੨੧੮. ਨਿਮ੍ਮਾਨਰਤਿਦੇਵਾਨਂ, ਦ੍ਵਿਸਤਂ ਤਿਂਸ ਕੋਟਿਯੋ;
ਚਤ੍ਤਾਲੀਸਵਸ੍ਸਸਤਸਹਸ੍ਸਾਨਿ ਚ ਸਬ੍ਬਥਾ.
੨੧੯. ਨਵਕੋਟਿਸਤਞ੍ਚੇਕਵੀਸਤਿਵਸ੍ਸਕੋਟਿਯੋ;
ਸਟ੍ਠਿਵਸ੍ਸਸਤਸਹਸ੍ਸਾਧਿਕਾ ਵਸਵਤ੍ਤਿਸੁ.
੨੨੦. ਕਪ੍ਪਸ੍ਸ ਤਤਿਯੋ ਭਾਗੋ, ਉਪਡ੍ਢਞ੍ਚ ਯਥਾਕ੍ਕਮਂ;
ਕਪ੍ਪੇਕੋ ਦ੍ਵੇ ਚ ਚਤ੍ਤਾਰੋ, ਅਟ੍ਠ ਕਪ੍ਪਾ ਚ ਸੋਲ਼ਸ.
੨੨੧. ਦ੍ਵਤ੍ਤਿਂਸ ਚਤੁਸਟ੍ਠੀ ਚ, ਨਵਸੁ ਬ੍ਰਹ੍ਮਭੂਮਿਸੁ;
ਵੇਹਪ੍ਫਲਾ ਅਸਞ੍ਞੀ ਚ, ਪਞ੍ਚਕਪ੍ਪਸਤਾਯੁਕਾ.
੨੨੨. ਕਪ੍ਪਸਹਸ੍ਸਂ ਦ੍ਵੇ ਚਤ੍ਤਾਰਿ, ਅਟ੍ਠ ਸੋਲ਼ਸ ਚਕ੍ਕਮਾ;
ਸਹਸ੍ਸਾਨਿ ਚ ਕਪ੍ਪਾਨਂ, ਸੁਦ੍ਧਾਵਾਸਾਨਮੁਦ੍ਦਿਸੇ.
੨੨੩. ਵੀਸਕਪ੍ਪਸਹਸ੍ਸਾਨਿ, ਚਤ੍ਤਾਲੀਸਞ੍ਚ ਸਟ੍ਠਿ ਚ;
ਚਤੁਰਾਸੀਤਿਸਹਸ੍ਸਾ, ਕਪ੍ਪਾ ਚਾਰੁਪ੍ਪਕੇ ਕਮਾ.
੨੨੪. ਆਯੁਪ੍ਪਮਾਣਨਿਯਮੋ, ਨਤ੍ਥਿ ਭੁਮ੍ਮੇ ਚ ਮਾਨਵੇ;
ਵਸ੍ਸਾਨਂ ਗਣਨਾ ਨਤ੍ਥਿ, ਚਤੁਰਾਪਾਯਭੂਮਿਯਂ.
੨੨੫. ਪੁਥੁਜ੍ਜਨਾਰਿਯਾ ਚੇਤਿ, ਦੁਵਿਧਾ ਹੋਨ੍ਤਿ ਪੁਗ੍ਗਲਾ;
ਤਿਹੇਤੁਕਾਦਿਭੇਦੇਨ, ਤਿਵਿਧਾ ਚ ਪੁਥੁਜ੍ਜਨਾ.
੨੨੬. ਮਗ੍ਗਟ੍ਠਾ ਚ ਫਲਟ੍ਠਾ ਚ,
ਅਟ੍ਠੇਵਾਰਿਯਪੁਗ੍ਗਲਾ;
ਆਦਿਤੋ ਸਤ੍ਤ ਸੇਕ੍ਖਾ ਚ,
ਅਸੇਕ੍ਖੋ ਚਾਰਹਾਪਰੋ.
੨੨੭. ਅਹੇਤੁਕਾਵ ਲਬ੍ਭਨ੍ਤਿ, ਸਤ੍ਤਾ ਦੁਗ੍ਗਤਿਯਂ ਪਨ;
ਤਿਹੇਤੁਕਾਵ ਲਬ੍ਭਨ੍ਤਿ, ਰੂਪਾਰੂਪੇ ਸਚਿਤ੍ਤਕਾ.
੨੨੮. ਕਾਮਾਵਚਰਦੇਵੇਸੁ, ਅਹੇਤੁਕਵਿਵਜ੍ਜਿਤਾ;
ਵਿਨਿਪਾਤਾਸੁਰੇ ਚੇਵ, ਮਾਨਵੇ ਚ ਤਯੋਪਿ ਚ.
੨੨੯. ਅਰਿਯਾ ਨਾਮ ਲਬ੍ਭਨ੍ਤਿ, ਅਸਞ੍ਞਾਪਾਯਵਜ੍ਜਿਤੇ;
ਪੁਥੁਜ੍ਜਨਾ ਤੁ ਲਬ੍ਭਨ੍ਤਿ, ਸੁਦ੍ਧਾਵਾਸਵਿਵਜ੍ਜਿਤੇ.
੨੩੦. ਸੁਦ੍ਧਾਵਾਸਮਪਾਯਞ੍ਚ, ਹਿਤ੍ਵਾਸਞ੍ਞਿਭਵਂ ਤਿਧਾ;
ਸੋਤਾਪਨ੍ਨਾਦਯੋ ਦ੍ਵੇਪਿ, ਸੇਸਟ੍ਠਾਨੇਸੁ ਲਬ੍ਭਰੇ.
੨੩੧. ਇਤਿ ਸਬ੍ਬਪ੍ਪਭੇਦੇਨ, ਭੂਮਿਪੁਗ੍ਗਲਸਙ੍ਗਹਂ;
ਞਤ੍ਵਾ ਵਿਞ੍ਞੂ ਵਿਭਾਵੇਯ੍ਯ, ਤਤ੍ਥ ਚਿਤ੍ਤਾਨਿ ਸਮ੍ਭਵਾਤਿ.
ਇਤਿ ਚਿਤ੍ਤਵਿਭਾਗੇ ਭੂਮਿਪੁਗ੍ਗਲਕਥਾ ਨਿਟ੍ਠਿਤਾ.
ਪਞ੍ਚਮੋ ਪਰਿਚ੍ਛੇਦੋ.