ਤਤਿਯੋ ਪਰਿਚ੍ਛੇਦੋ

੩. ਵੀਥਿਸਙ੍ਗਹਕਥਾ

੮੫. ਚਕ੍ਖੁਸੋਤਘਾਨਜਿਵ੍ਹਾ-ਕਾਯਾਯਤਨ ਪਞ੍ਚਧਾ;

ਪਸਾਦਾ ਹਦਯਞ੍ਚੇਤਿ, ਛ ਵਤ੍ਥੂਨਿ ਵਿਨਿਦ੍ਦਿਸੇ.

੮੬. ਚਕ੍ਖੁਸੋਤਘਾਨਜਿਵ੍ਹਾ-ਕਾਯਦ੍ਵਾਰਾ ਚ ਪਞ੍ਚਧਾ;

ਮਨੋਦ੍ਵਾਰਂ ਭਵਙ੍ਗਨ੍ਤਿ, ਛ ਦ੍ਵਾਰਾ ਚਿਤ੍ਤਵੀਥਿਯਾ.

੮੭. ਰੂਪਸਦ੍ਦਗਨ੍ਧਰਸ-ਫੋਟ੍ਠਬ੍ਬਾ ਪਞ੍ਚ ਗੋਚਰਾ;

ਧਮ੍ਮਾਰਮ੍ਮਣਪਞ੍ਞਤ੍ਤਿ, ਛ ਦ੍ਵਾਰਾਰਮ੍ਮਣਕ੍ਕਮਾ.

੮੮. ਨਿਮਿਤ੍ਤਗਤਿਕਮ੍ਮਾਨਿ, ਕਮ੍ਮਮੇਵਾਥ ਗੋਚਰਾ;

ਪਟਿਸਨ੍ਧਿਭਵਙ੍ਗਾਨਂ, ਚੁਤਿਯਾ ਚ ਯਥਾਰਹਂ.

੮੯. ਮਰਣਾਸਨ੍ਨਸਤ੍ਤਸ੍ਸ, ਯਥੋਪਟ੍ਠਿਤਗੋਚਰਂ;

ਛਦ੍ਵਾਰੇਸੁ ਤਮਾਰਬ੍ਭ, ਪਟਿਸਨ੍ਧਿ ਭਵਨ੍ਤਰੇ.

੯੦. ਏਕਚਿਤ੍ਤਕ੍ਖਣਾ ਹੋਤਿ, ਯਾਵਜੀਵਂ ਤਤੋ ਪਰਂ;

ਭਵਙ੍ਗਂ ਪਰਿਯੋਸਾਨੇ, ਚੁਤਿ ਚੇਕਕ੍ਖਣਾ ਭਵੇ.

੯੧. ਦੁਹੇਤਾਹੇਤੁਚੁਤਿਯਾ, ਕਾਮਾਵਚਰਸਨ੍ਧਿਯੋ;

ਤਿਹੇਤੁਕਾਮਚੁਤਿਯਾ, ਸਬ੍ਬਾਪਿ ਪਟਿਸਨ੍ਧਿਯੋ.

੯੨. ਰੂਪਾਵਚਰਚੁਤਿਯਾ, ਸਹੇਤੁਪਟਿਸਨ੍ਧਿਯੋ;

ਆਰੁਪ੍ਪਤੋਪਰਿ ਕਾਮੇ, ਤਤ੍ਥ ਵਾਪਿ ਤਿਹੇਤੁਕਾ.

੯੩. ਪਟਿਸਨ੍ਧਿ ਭਵਙ੍ਗਞ੍ਚ, ਏਕਮੇਵੇਕਜਾਤਿਯਂ;

ਚੁਤਿ ਚਾਰਮ੍ਮਣਞ੍ਚਸ੍ਸ, ਏਵਮੇਵ ਯਥਾਰਹਂ.

੯੪. ਰੂਪਾਦਾਰਮ੍ਮਣੇ ਚਕ੍ਖੁ-ਪ੍ਪਸਾਦਾਦਿਮ੍ਹਿ ਘਟ੍ਟਿਤੇ;

ਮਜ੍ਝੇ ਭਵਙ੍ਗਂ ਛਿਨ੍ਦਿਤ੍ਵਾ, ਵੀਥਿ ਨਾਮ ਪਵਤ੍ਤਤਿ.

੯੫. ਆਵਜ੍ਜਪਞ੍ਚਵਿਞ੍ਞਾਣਸਮ੍ਪਟਿਚ੍ਛਨਤੀਰਣਾ;

ਵੋਟ੍ਠਬ੍ਬਕਾਮਜਵਨਤਦਾਰਮ੍ਮਣਨਾਮਕਾ.

੯੬. ਸਤ੍ਤੇਵ ਠਾਨਸਙ੍ਖੇਪਾ, ਪਞ੍ਚਦ੍ਵਾਰਿਕਮਾਨਸਾ;

ਚਤੁਪਞ੍ਞਾਸ ਸਬ੍ਬੇਪਿ, ਵਿਤ੍ਥਾਰੇਨ ਸਰੂਪਤੋ.

੯੭. ਆਵਜ੍ਜਸਬ੍ਬਜਵਨਤਦਾਰਮ੍ਮਣਨਾਮਕਾ;

ਸਤ੍ਤਸਟ੍ਠਿ ਸਰੂਪੇਨ, ਮਨੋਦ੍ਵਾਰਿਕਮਾਨਸਾ.

੯੮. ਇਟ੍ਠੇ ਆਰਮ੍ਮਣੇ ਹੋਨ੍ਤਿ, ਪੁਞ੍ਞਪਾਕਾਨਿ ਸਬ੍ਬਥਾ;

ਅਨਿਟ੍ਠੇ ਪਾਪਪਾਕਾਨਿ, ਨਿਯਮੋਯਂ ਪਕਾਸਿਤੋ.

੯੯. ਤਤ੍ਥਾਪਿ ਅਤਿਇਟ੍ਠਮ੍ਹਿ, ਤਦਾਰਮ੍ਮਣਤੀਰਣਂ;

ਸੋਮਨਸ੍ਸਯੁਤਂ ਇਟ੍ਠਮਜ੍ਝਤ੍ਤਮ੍ਹਿ ਉਪੇਕ੍ਖਿਤਂ.

੧੦੦. ਗੋਚਰੇਤਿਪਰਿਤ੍ਤਮ੍ਹਿ, ਅਤਿਅਪ੍ਪਾਯੁਕੇ ਪਨ;

ਭਵਙ੍ਗਮੇਵ ਚਲਤਿ, ਮੋਘਵਾਰੋਤਿ ਸੋ ਕਤੋ.

੧੦੧. ਵੋਟ੍ਠਬ੍ਬਨਂ ਪਰਿਤ੍ਤਮ੍ਹਿ, ਦ੍ਵਤ੍ਤਿਕ੍ਖਤ੍ਤੁਂ ਪਵਤ੍ਤਤਿ;

ਤਤੋ ਭਵਙ੍ਗਪਾਤੋਵ, ਸੋਪਿ ਮੋਘੋਤਿ ਵੁਚ੍ਚਤਿ.

੧੦੨. ਜਵਨਞ੍ਚ ਮਹਨ੍ਤਮ੍ਹਿ, ਜਵਿਤ੍ਵਾਨ ਤਤੋ ਪਰਂ;

ਨ ਸਮ੍ਭੋਤਿ ਤਦਾਲਮ੍ਬਂ, ਸੋਪਿ ਮੋਘੋਤਿ ਵੁਚ੍ਚਤਿ.

੧੦੩. ਗੋਚਰੇਤਿਮਹਨ੍ਤਮ੍ਹਿ, ਅਤਿਦੀਘਾਯੁਕੇ ਪਨ;

ਸਮ੍ਭੋਤਿ ਚ ਤਦਾਲਮ੍ਬਂ, ਸਮ੍ਪੁਣ੍ਣੋਤਿ ਪਵੁਚ੍ਚਤਿ.

੧੦੪. ਗੋਚਰੇਤਿਮਹਨ੍ਤਮ੍ਹਿ, ਤਦਾਰਮ੍ਮਣਸਮ੍ਭਵੋ;

ਪਞ੍ਚਦ੍ਵਾਰੇ ਮਨੋਦ੍ਵਾਰੇ, ਵਿਭੂਤੇ ਪਨ ਗੋਚਰੇ.

੧੦੫. ਕਾਮਾਵਚਰਸਤ੍ਤਾਨਂ, ਕਾਮਾਵਚਰਗੋਚਰੇ;

ਪਰਿਤ੍ਤਜਵਨੇਸ੍ਵੇਵ, ਤਦਾਰਮ੍ਮਣਮੁਦ੍ਦਿਸੇ.

੧੦੬. ਨਾਤਿਤਿਕ੍ਖੇ ਨਾਤਿਸੀਘੇ, ਨਾਤਿਤੇਜੁਸ੍ਸਦੇ ਜਵੇ;

ਸਮਮਨ੍ਦਪ੍ਪਵਤ੍ਤਮ੍ਹਿ, ਤਦਾਰਮ੍ਮਣਮਿਚ੍ਛਿਤਂ.

੧੦੭. ਸੁਖੋਪੇਤਂ ਤਦਾਲਮ੍ਬਂ, ਉਪੇਕ੍ਖਾਕ੍ਰਿਯਤੋ ਪਰਂ;

ਨ ਹੋਤੁਪੇਕ੍ਖਾਸਹਿਤਂ, ਸੁਖਿਤਕ੍ਰਿਯਤੋ ਤਥਾ.

੧੦੮. ਨ ਹੋਤਿ ਦੋਮਨਸ੍ਸਮ੍ਹਾ, ਸੋਮਨਸ੍ਸਿਕਮਾਨਸਂ;

ਤਦਾਰਮ੍ਮਣਮਞ੍ਞਞ੍ਚ, ਭਵਙ੍ਗਂ ਚੁਤਿ ਵਾ ਤਥਾ.

੧੦੯. ਰਜ੍ਜਨਾਦਿਵਸੇਨੇਤ੍ਥ, ਜਵਨਾਕੁਸਲਂ ਭਵੇ;

ਕੁਸਲਂ ਪਨ ਸਮ੍ਭੋਤਿ, ਸਦ੍ਧਾਪਞ੍ਞਾਦਿਸਮ੍ਭਵੇ.

੧੧੦. ਤਦੇਵ ਵੀਤਰਾਗਾਨਂ, ਕ੍ਰਿਯਾ ਨਾਮ ਪਵੁਚ੍ਚਤਿ;

ਅਵਿਪਾਕਤਮਾਪਨ੍ਨਂ, ਵਟ੍ਟਮੂਲਪਰਿਕ੍ਖਯਾ.

੧੧੧. ਅਪ੍ਪਨਾਜਵਨਂ ਸੇਸਂ, ਮਹਗ੍ਗਤਮਨੁਤ੍ਤਰਂ;

ਛਬ੍ਬੀਸਤਿ ਯਥਾਯੋਗਂ, ਅਪ੍ਪਨਾਵੀਥਿਯਂ ਭਵੇ.

੧੧੨. ਪਰਿਕਮ੍ਮਂ ਕਰੋਨ੍ਤਸ੍ਸ, ਕਸਿਣਾਦਿਕਗੋਚਰੇ;

ਸੁਸਮਾਹਿਤਚਿਤ੍ਤਸ੍ਸ, ਉਪਚਾਰਸਮਾਧਿਨਾ.

੧੧੩. ਪਰਿਕਮ੍ਮੋਪਚਾਰਾਨੁਲੋਮਗੋਤ੍ਰਭੁਤੋ ਪਰਂ;

ਪਞ੍ਚਮਂ ਵਾ ਚਤੁਤ੍ਥਂ ਵਾ, ਜਵਨਂ ਹੋਤਿ ਅਪ੍ਪਨਾ.

੧੧੪. ਪੁਥੁਜ੍ਜਨਾਨ ਸੇਕ੍ਖਾਨਂ, ਕਾਮਪੁਞ੍ਞਤਿਹੇਤੁਤੋ;

ਤਿਹੇਤੁਕਾਮਕ੍ਰਿਯਤੋ, ਵੀਤਰਾਗਾਨਮਪ੍ਪਨਾ.

੧੧੫. ਤਤ੍ਰਾਪਿ ਸੁਖਿਤਜਵਂ, ਸੁਖਿਤਦ੍ਵਯਤੋ ਪਰਂ;

ਉਪੇਕ੍ਖਿਤਮ੍ਹਾ ਸਮ੍ਭੋਤਿ, ਉਪੇਕ੍ਖੇਕਗ੍ਗਤਾਯੁਤਂ.

੧੧੬. ਪਞ੍ਚ ਵਾਰੇ ਛ ਵਾ ਸਤ੍ਤ, ਪਰਿਤ੍ਤਜਵਨਂ ਭਵੇ;

ਸਕਿਂ ਦ੍ਵੇ ਵਾ ਤਦਾਲਮ੍ਬਂ, ਸਕਿਮਾਵਜ੍ਜਨਾਦਯੋ.

੧੧੭. ਅਪ੍ਪਨਾਜਵਨਞ੍ਚੇਕਂ, ਪਠਮੁਪ੍ਪਤ੍ਤਿਯਂ ਪਨ;

ਤਤੋ ਪਰਂ ਵਸੀਭੂਤਂ, ਅਹੋਰਤ੍ਤਂ ਪਵਤ੍ਤਤਿ.

੧੧੮. ਸਕਿਂ ਦ੍ਵੇ ਵਾ ਨਿਰੋਧਸ੍ਸ, ਸਮਾਪਤ੍ਤਿਕ੍ਖਣੇ ਪਨ;

ਚਤੁਤ੍ਥਾਰੁਪ੍ਪਜਵਨਂ, ਤਤੋ ਚਿਤ੍ਤਂ ਨਿਰੁਜ੍ਝਤਿ.

੧੧੯. ਨਿਰੋਧਾ ਵੁਟ੍ਠਹਨ੍ਤਸ੍ਸ, ਉਪਰਿਟ੍ਠਫਲਦ੍ਵਯਂ;

ਪਞ੍ਚਾਭਿਞ੍ਞਾ ਤਥਾ ਮਗ੍ਗਾ, ਏਕਚਿਤ੍ਤਕ੍ਖਣਾ ਮਤਾ.

੧੨੦. ਫਲਮੇਕਦ੍ਵਯਂ ਤਥਾ, ਤਿਸ੍ਸੋ ਵਾ ਮਗ੍ਗਵੀਥਿਯਂ;

ਸਮਾਪਤ੍ਤਿਕ੍ਖਣੇ ਤਮ੍ਪਿ, ਅਹੋਰਤ੍ਤਂ ਪਵਤ੍ਤਤਿ.

੧੨੧. ਪਞ੍ਚਦ੍ਵਾਰੇ ਨ ਲਬ੍ਭਨ੍ਤਿ, ਲੋਕੁਤ੍ਤਰਮਹਗ੍ਗਤਾ;

ਵੀਥਿਮੁਤ੍ਤਮਨੋਧਾਤੁ, ਪਞ੍ਚ ਚਿਤ੍ਤਾਨਿ ਅਨ੍ਤਿਮੇ.

੧੨੨. ਪਰਿਤ੍ਤਾਨੇਵ ਸਬ੍ਬਾਨਿ, ਪਞ੍ਚਦ੍ਵਾਰੇਸੁ ਸਮ੍ਭਵਾ;

ਮਨੋਦ੍ਵਾਰਮ੍ਹਿ ਵੋਟ੍ਠਬ੍ਬ-ਤਦਾਲਮ੍ਬਜਵਾ ਸਿਯੁਂ.

੧੨੩. ਘਾਨਜਿਵ੍ਹਾਕਾਯਵੀਥਿ, ਤਦਾਰਮ੍ਮਣਮੇਵ ਚ;

ਰੂਪੇ ਨਤ੍ਥਿ ਤਥਾਰੂਪੇ, ਚਕ੍ਖੁਸੋਤਾਪਿ ਵੀਥਿਯੋ.

੧੨੪. ਸਬ੍ਬਾਪਿ ਵੀਥਿਯੋ ਕਾਮੇ,

ਰੂਪੇ ਤਿਸ੍ਸੋ ਪਕਾਸਿਤਾ;

ਏਕਾ ਵੀਥਿ ਪਨਾਰੂਪੇ,

ਨਤ੍ਥਾਸਞ੍ਞੀਸੁ ਕਾਚਿਪਿ.

੧੨੫. ਸਤ੍ਤਾਪਿ ਵੀਥਿਚਿਤ੍ਤਾਨਿ, ਕਾਮੇ ਰੂਪੇ ਛ ਸਮ੍ਭਵਾ;

ਅਰੂਪੇ ਦ੍ਵੇ ਮਨੋਦ੍ਵਾਰਾ-ਵਜ੍ਜਨਂ ਜਵਨਨ੍ਤਿ ਚਾਤਿ.

ਇਤਿ ਚਿਤ੍ਤਵਿਭਾਗੇ ਵੀਥਿਸਙ੍ਗਹਕਥਾ ਨਿਟ੍ਠਿਤਾ.

ਤਤਿਯੋ ਪਰਿਚ੍ਛੇਦੋ.