੨. ਪਕਿਣ੍ਣਕਕਥਾ
੪੬. ਕੁਸਲਾਨੇਕਵੀਸੇਵ, ਦ੍ਵਾਦਸਾਕੁਸਲਾਨਿ ਚ;
ਛਤ੍ਤਿਂਸਤਿ ਵਿਪਾਕਾਨਿ, ਕ੍ਰਿਯਾਚਿਤ੍ਤਾਨਿ ਵੀਸਤਿ.
੪੭. ਕਾਮੇਸੁ ਚਤੁਪਞ੍ਞਾਸ, ਰੂਪੇਸੁ ਦਸ ਪਞ੍ਚ ਚ;
ਦ੍ਵਾਦਸਾਰੁਪ੍ਪਚਿਤ੍ਤਾਨਿ, ਅਟ੍ਠਾਨੁਤ੍ਤਰਮਾਨਸਾ.
੪੮. ਕਾਮੇ ਤੇਵੀਸ ਪਾਕਾਨਿ, ਪੁਞ੍ਞਾਪੁਞ੍ਞਾਨਿ ਵੀਸਤਿ;
ਏਕਾਦਸ ਕ੍ਰਿਯਾ ਚੇਤਿ, ਚਤੁਪਞ੍ਞਾਸ ਸਬ੍ਬਥਾ.
੪੯. ਪੁਞ੍ਞਪਾਕਕ੍ਰਿਯਾਭੇਦਾ, ਤਯੋ ਰੂਪੇਸੁ ਪਞ੍ਚਕਾ;
ਆਰੁਪ੍ਪੇਤਿ ਚਤੁਕ੍ਕਾਨਿ, ਸਤ੍ਤਵੀਸ ਮਹਗ੍ਗਤਾ.
੫੦. ਚਤੁਮਗ੍ਗਫਲਾਨਂ ਤੁ, ਵਸੇਨਟ੍ਠਪਿ ਝਾਨਤੋ;
ਦਸੋਭਯਮ੍ਪਿ ਮਿਸ੍ਸੇਤ੍ਵਾ, ਤਾਲੀਸਾਨੁਤ੍ਤਰਾ ਸਿਯੁਂ.
੫੧. ਪੁਞ੍ਞਪਾਕਕ੍ਰਿਯਾਪਾਪਾ, ਸਨ੍ਤਿ ਕਾਮੇ ਮਹਗ੍ਗਤੇ;
ਪਾਪਂ ਨਤ੍ਥਿ ਕ੍ਰਿਯਾਪਾਪਾ, ਨ ਵਿਜ੍ਜਨ੍ਤਿ ਅਨੁਤ੍ਤਰੇ.
੫੨. ਪਾਪਾਹੇਤੁਕਮੁਤ੍ਤਾਨਿ, ਅਨਵਜ੍ਜਾਨਿ ਸਬ੍ਬਥਾ;
ਏਕੂਨਸਟ੍ਠਿ ਚਿਤ੍ਤਾਨਿ, ਪੁਞ੍ਞਪਾਕਕ੍ਰਿਯਾਵਸਾ.
੫੩. ਕਮ੍ਮਚਿਤ੍ਤਾਨਿ ਤੇਤ੍ਤਿਂਸ, ਪੁਞ੍ਞਾਪੁਞ੍ਞਾਨਿ ਸਬ੍ਬਥਾ;
ਛਤ੍ਤਿਂਸ ਤੇਸਂ ਪਾਕਾਨਿ, ਕ੍ਰਿਯਾ ਵੀਸ ਨ ਚੋਭਯਂ.
੫੪. ਚਕ੍ਖੁਵਿਞ੍ਞਾਣਧਾਤਾਦਿ, ਪਞ੍ਚਵਿਞ੍ਞਾਣਨਾਮਕਾ;
ਪਞ੍ਚਦ੍ਵਾਰਾਵਜ੍ਜਨਞ੍ਚ, ਦੁਵਿਧਂ ਸਮ੍ਪਟਿਚ੍ਛਨਂ.
੫੫. ਮਨੋਧਾਤੁਤ੍ਤਯਂ ਨਾਮ, ਛਸਤ੍ਤਤਿ ਤਤੋ ਪਰੇ;
ਮਨੋਵਿਞ੍ਞਾਣਧਾਤੂਤਿ, ਸਤ੍ਤਧਾ ਧਾਤੁਭੇਦਤੋ.
੫੬. ਮਨੋਵਿਞ੍ਞਾਣਧਾਤੁਞ੍ਚ, ਮਨੋਧਾਤੁਤ੍ਤਯਂ ਤਥਾ;
ਕਤ੍ਵਾ ਮਨੋਵਿਞ੍ਞਾਣਨ੍ਤਿ, ਛ ਵਿਞ੍ਞਾਣਾ ਪਕਿਤ੍ਤਿਤਾ.
੫੭. ਆਵਜ੍ਜਨਂ ਦਸ੍ਸਨਞ੍ਚ, ਸਵਨਂ ਘਾਯਨਂ ਤਥਾ;
ਸਾਯਨਂ ਫੁਸਨਞ੍ਚੇਵ, ਸਮ੍ਪਟਿਚ੍ਛਨਤੀਰਣਂ.
੫੮. ਵੋਟ੍ਠਬ੍ਬਨਞ੍ਚ ਜਵਨਂ, ਤਦਾਰਮ੍ਮਣਨਾਮਕਂ;
ਭਵਙ੍ਗਂ ਚੁਤਿ ਸਨ੍ਧੀਤਿ, ਚਿਤ੍ਤਂ ਚੁਦ੍ਦਸਧਾ ਠਿਤਂ.
੫੯. ਆਵਜ੍ਜਨਾਦਯੋ ਦ੍ਵੇ ਦ੍ਵੇ, ਯੁਗਾ ਸਤ੍ਤ ਯਥਾਕ੍ਕਮਂ;
ਤੀਣਿ ਤੀਰਣਚਿਤ੍ਤਾਨਿ, ਏਕਂ ਵੋਟ੍ਠਬ੍ਬਨਂ ਮਤਂ.
੬੦. ਕੁਸਲਾਕੁਸਲਾ ਸਬ੍ਬੇ, ਫਲਾ ਚਾਵਜ੍ਜਨਂ ਵਿਨਾ;
ਕ੍ਰਿਯਾ ਚ ਪਞ੍ਚਪਞ੍ਞਾਸ, ਜਵਨਨ੍ਤਿ ਪਵੁਚ੍ਚਰੇ.
੬੧. ਸਨ੍ਤੀਰਣਮਹਾਪਾਕਾ, ਤਦਾਰਮ੍ਮਣਨਾਮਕਾ;
ਏਕਾਦਸ ਪਵਤ੍ਤਨ੍ਤਿ, ਜਵਨਾਰਮ੍ਮਣੇ ਯਤੋ.
੬੨. ਮਹਗ੍ਗਤਮਹਾਪਾਕਾ, ਉਪੇਕ੍ਖਾਤੀਰਣਦ੍ਵਯਂ;
ਚੁਤਿਸਨ੍ਧਿਭਵਙ੍ਗਾਨਿ, ਚਿਤ੍ਤਾਨੇਕੂਨਵੀਸਤਿ.
੬੩. ਜਵਨਾਵਜ੍ਜਨਾਦੀਨਿ, ਵੋਟ੍ਠਬ੍ਬਸੁਖਤੀਰਣਾ;
ਮਹਗ੍ਗਤਮਹਾਪਾਕਾ, ਉਪੇਕ੍ਖਾਤੀਰਣਾਤਿ ਚ.
੬੪. ਅਟ੍ਠਸਟ੍ਠਿ ਤਥਾ ਦ੍ਵੇ ਚ, ਨਵਟ੍ਠ ਦ੍ਵੇ ਯਥਾਕ੍ਕਮਂ;
ਏਕਦ੍ਵਿਤਿਚਤੁਪ੍ਪਞ੍ਚਕਿਚ੍ਚਟ੍ਠਾਨਾਨਿ ਨਿਦ੍ਦਿਸੇ.
੬੫. ਰੂਪਪਾਕਾ ਮਹਾਪਾਕਾ, ਮਨੋਧਾਤੁ ਚ ਤੀਰਣਂ;
ਰੂਪਂ ਜਨੇਨ੍ਤਿ ਏਕੂਨਵੀਸਤਿ ਨੇਤਰਦ੍ਵਯਂ.
੬੬. ਅਭਿਞ੍ਞਾਵਜ੍ਜਿਤਾ ਸਬ੍ਬੇ, ਅਪ੍ਪਨਾਜਵਨਾ ਪਨ;
ਰੂਪਂ ਜਨੇਨ੍ਤਿ ਛਬ੍ਬੀਸ, ਪਣਾਮੇਨ੍ਤਿਰਿਯਾਪਥਂ.
੬੭. ਅਭਿਞ੍ਞਾਦ੍ਵਯਵੋਟ੍ਠਬ੍ਬਪਰਿਤ੍ਤਜਵਨਾ ਪਨ;
ਦ੍ਵਤ੍ਤਿਂਸ ਰੂਪਵਿਞ੍ਞਤ੍ਤਿਇਰਿਯਾਪਥਸਾਧਕਾ.
੬੮. ਪਞ੍ਚਵਿਞ੍ਞਾਣਮਾਰੁਪ੍ਪ-ਵਿਪਾਕਾ ਸਬ੍ਬਸਨ੍ਧਿਯੋ;
ਚੁਤਿ ਖੀਣਾਸਵਸ੍ਸੇਤਿ, ਸੋਲ਼ਸੇਤੇ ਨ ਕਿਞ੍ਚਿਪਿ.
੬੯. ਰੂਪਂ ਜਨੇਨ੍ਤਿ ਚਿਤ੍ਤਾਨਿ, ਸਤ੍ਤਸਤ੍ਤਤਿ ਸਬ੍ਬਥਾ;
ਅਟ੍ਠਪਞ੍ਞਾਸ ਚਿਤ੍ਤਾਨਿ, ਪਣਾਮੇਨ੍ਤਿਰਿਯਾਪਥਂ.
੭੦. ਦ੍ਵਤ੍ਤਿਂਸ ਚਤੁਵਿਞ੍ਞਤ੍ਤਿਂ, ਸਮੁਟ੍ਠਾਪੇਨ੍ਤਿ ਮਾਨਸਾ;
ਨ ਜਨੇਨ੍ਤਿ ਤਸ੍ਸਮ੍ਪੇਕਂ, ਯਥਾਵੁਤ੍ਤਾਨਿ ਸੋਲ਼ਸ.
੭੧. ਸੋਮਨਸ੍ਸਸਹਗਤਾ, ਪਰਿਤ੍ਤਜਵਨਾ ਪਨ;
ਹਸਨਮ੍ਪਿ ਜਨੇਨ੍ਤੀਤਿ, ਚਤੁਕਿਚ੍ਚਾਨਿ ਤੇਰਸ.
੭੨. ਸਬ੍ਬਮ੍ਪਿ ਪਞ੍ਚਵੋਕਾਰੇ, ਕਿਚ੍ਚਮੇਤਂ ਪਕਾਸਿਤਂ;
ਆਰੁਪ੍ਪੇ ਪਨ ਸਬ੍ਬਮ੍ਪਿ, ਰੂਪਾਯਤ੍ਤਂ ਨ ਵਿਜ੍ਜਤਿ.
੭੩. ਅਸਞ੍ਞੀਨਂ ਤੁ ਸਬ੍ਬਾਨਿ, ਚਿਤ੍ਤਾਨੇਵ ਨ ਲਬ੍ਭਰੇ;
ਰੂਪਕ੍ਖਨ੍ਧੋਵ ਤੇਸਂ ਤੁ, ਅਤ੍ਤਭਾਵੋਤਿ ਵੁਚ੍ਚਤਿ.
੭੪. ਪਾਣਾਤਿਪਾਤਥੇਯ੍ਯਾਦਿਵਸੇਨੋਪਚਿਤਂ ਪਨ;
ਉਦ੍ਧਚ੍ਚਰਹਿਤਾਪੁਞ੍ਞਂ, ਚਤੁਰਾਪਾਯਭੂਮਿਯਂ.
੭੫. ਦਤ੍ਵਾ ਸਨ੍ਧਿਂ ਪਵਤ੍ਤੇ ਤੁ, ਪਞ੍ਚਵੋਕਾਰਭੂਮਿਯਂ;
ਉਦ੍ਧਚ੍ਚਸਹਿਤਞ੍ਚਾਪਿ, ਸਤ੍ਤ ਪਾਕਾਨਿ ਪਚ੍ਚਤਿ.
੭੬. ਦਾਨਸੀਲਾਦਿਭੇਦੇਨ, ਪਵਤ੍ਤਂ ਕੁਸਲਂ ਪਨ;
ਕਾਮੇ ਮਾਨਸਮੁਕ੍ਕਟ੍ਠਂ, ਚਤੁਕ੍ਕਂ ਤੁ ਤਿਹੇਤੁਕਂ.
੭੭. ਦਤ੍ਵਾ ਤਿਹੇਤੁਕਂ ਸਨ੍ਧਿਂ, ਕਾਮੇ ਸੁਗਤਿਯਂ ਪਨ;
ਸੋਲ਼ਸ ਪੁਞ੍ਞਪਾਕਾਨਿ, ਪਵਤ੍ਤੇ ਤੁ ਵਿਪਚ੍ਚਤਿ.
੭੮. ਤਿਹੇਤੁਕੋਮਕਂ ਪੁਞ੍ਞਂ, ਉਕ੍ਕਟ੍ਠਞ੍ਚ ਦ੍ਵਿਹੇਤੁਕਂ;
ਦਤ੍ਵਾ ਦ੍ਵਿਹੇਤੁਕਂ ਸਨ੍ਧਿਂ, ਕਾਮੇ ਸੁਗਤਿਯਂ ਤਥਾ.
੭੯. ਪਵਤ੍ਤੇ ਪਨ ਞਾਣੇਨ, ਸਮ੍ਪਯੁਤ੍ਤਂ ਵਿਵਜ੍ਜਿਯ;
ਦ੍ਵਾਦਸ ਪੁਞ੍ਞਪਾਕਾਨਿ, ਵਿਪਚ੍ਚਤਿ ਯਥਾਰਹਂ.
੮੦. ਦ੍ਵਿਹੇਤੁਕੋਮਕਂ ਪੁਞ੍ਞਂ, ਪਟਿਸਨ੍ਧਿਮਹੇਤੁਕਂ;
ਦੇਤਿ ਮਾਨੁਸਕੇ ਚੇਵ, ਵਿਨਿਪਾਤਾਸੁਰੇ ਤਥਾ.
੮੧. ਅਟ੍ਠਾਹੇਤੁਕਪਾਕਾਨਿ, ਪਵਤ੍ਤੇ ਤੁ ਵਿਪਚ੍ਚਰੇ;
ਚਤ੍ਤਾਰਿਪਿ ਚਤੁਕ੍ਕਾਨਿ, ਪਞ੍ਚਵੋਕਾਰਭੂਮਿਯਂ.
੮੨. ਭਾਵਨਾਮਯਪੁਞ੍ਞਂ ਤੁ, ਮਹਗ੍ਗਤਮਨੁਤ੍ਤਰਂ;
ਯਥਾਭੂਮਿਨਿਯਾਮੇਨ, ਦੇਤਿ ਪਾਕਂ ਯਥਾਸਕਂ.
੮੩. ਕਟਤ੍ਤਾਰੂਪਪਾਕਾਨਿ, ਪਞ੍ਚਵੋਕਾਰਭੂਮਿਯਂ;
ਆਰੁਪ੍ਪਾਨੁਤ੍ਤਰੇ ਪਾਕਂ, ਤਥਾ ਰੂਪਮਸਞ੍ਞਿਸੁ.
੮੪. ਪੁਞ੍ਞਾਪੁਞ੍ਞਾਨਿ ਕਮ੍ਮਾਨਿ, ਤੇਤ੍ਤਿਂਸਾਪਿ ਚ ਯਬ੍ਬਥਾ;
ਸਞ੍ਜਨੇਨ੍ਤਿ ਯਥਾਯੋਗਂ, ਪਟਿਸਨ੍ਧਿਪਵਤ੍ਤਿਯਂ.
ਇਤਿ ਚਿਤ੍ਤਵਿਭਾਗੇ ਪਕਿਣ੍ਣਕਕਥਾ ਨਿਟ੍ਠਿਤਾ.
ਦੁਤਿਯੋ ਪਰਿਚ੍ਛੇਦੋ.