ਅਟ੍ਠਵੀਸਤਿਮੋ ਪਰਿਚ੍ਛੇਦੋ

੨੮. ਅਤ੍ਥਪਞ੍ਞਤ੍ਤਿਕਥਾ

੧੦੮੪. ਤਤ੍ਥ ਚ ਪੁਬ੍ਬਾਪਰਿਯ-ਪਵਤ੍ਤਕ੍ਖਨ੍ਧਸਮ੍ਮਤਾ;

ਵਿਞ੍ਞਤ੍ਤਿਨ੍ਦ੍ਰਿਯਵਿਪ੍ਫਾਰ-ਵਿਸੇਸੋਪਨਿਬਨ੍ਧਨਾ.

੧੦੮੫. ਦੇਵਯਕ੍ਖਮਨੁਸ੍ਸਾਦਿ-ਨਾਨਾਭੇਦਾ ਸਲਕ੍ਖਿਕਾ;

ਸਤ੍ਤਪਞ੍ਞਤ੍ਤਿ ਨਾਮਾਯਂ, ਸ੍ਵਾਯਂ ਸਤ੍ਤੋਤਿ ਸਮ੍ਮਤੋ.

੧੦੮੬. ਵਟ੍ਟਤ੍ਤਯਮੁਪਾਦਾਯ,

ਖਨ੍ਧਾਯਤਨਵੁਤ੍ਤਿਯਾ;

ਕਾਰਕੋ ਵੇਦਕੋ ਵਾਯਂ,

ਸਨ੍ਧਾਵਤਿ ਭਵੇ ਭਵੇ.

੧੦੮੭. ਤਸ੍ਮਾ ਸਂਸਾਰਮਾਪਨ੍ਨੋ, ਸਤ੍ਤੋ ਨਾਮ ਸ ਪੁਗ੍ਗਲੋ;

ਅਹਮਤ੍ਤਾਪਰਾ ਇਤ੍ਥੀ, ਪੁਰਿਸੋਤਿ ਚ ਕਪ੍ਪਿਤੋ.

੧੦੮੮. ਸ੍ਵਾਯਂ ਖਨ੍ਧਾਦਿਤੋ ਸਤ੍ਤੋ, ਅਞ੍ਞੋਤਿ ਚ ਨ ਵੁਚ੍ਚਤਿ;

ਖਨ੍ਧਾਦਿਵਿਨਿਮੁਤ੍ਤਸ੍ਸ, ਸਤ੍ਤਸ੍ਸੇਵ ਅਭਾਵਤੋ.

੧੦੮੯. ਖਨ੍ਧਾ ਖਨ੍ਧਾਨਮੇਵਾਯਂ, ਸਤ੍ਤੋਤਿ ਚ ਨ ਵੁਚ੍ਚਤਿ;

ਖਨ੍ਧਵੋਹਾਰਤੋ ਤਸ੍ਸ, ਅਞ੍ਞਵੋਹਾਰਸਮ੍ਭਵਾ.

੧੦੯੦. ਇਚ੍ਚੇਵਂ ਖਨ੍ਧਨਾਨਤ੍ਤੇ-ਕਤ੍ਤਮੁਤ੍ਤੋਪਿ ਅਤ੍ਥਤੋ;

ਤਬ੍ਬਿਸੇਸਾਵਚਰਿਤ-ਵੋਹਾਰੋ ਚ ਤੁ ਦਿਸ੍ਸਤਿ.

੧੦੯੧. ਤੇਨਾਯਂ ਪੁਗ੍ਗਲੋ ਸਤ੍ਤੋ, ਜਾਯਤਿਜ੍ਜਿਯ੍ਯਤੀਤਿ ਚ;

ਮੀਯਤੀਤਿ ਚ ਤਸ੍ਸਾਯਂ, ਸਂਸਾਰੋਤਿ ਪਵੁਚ੍ਚਤਿ.

੧੦੯੨. ਮਤੋ ਜਾਤੋ ਚ ਨ ਸ੍ਵੇਵ, ਖਨ੍ਧਭੇਦੋਪਚਾਰਤੋ;

ਨਾਪਰੋ ਸ੍ਵੇਵ ਸਨ੍ਤਾਨਭੇਦਾਭਾਵੋਪਚਾਰਤੋ.

੧੦੯੩. ਨਾਨਤ੍ਤੇਕਤ੍ਤਮਿਚ੍ਚੇਵਂ, ਪੁਗ੍ਗਲਸ੍ਸੋਪਚਾਰਤੋ;

ਉਚ੍ਛੇਦਸਸ੍ਸਤਤ੍ਤਂ ਵਾ, ਤਸ੍ਮਾ ਨੋਪੇਤਿ ਪੁਗ੍ਗਲੋ.

੧੦੯੪. ਇਚ੍ਚਾਯਂ ਪੁਗ੍ਗਲੋ ਨਾਮ, ਸਤ੍ਤੋ ਸਂਸਾਰਕਾਰਕੋ;

ਖਨ੍ਧਾਦਿਕਮੁਪਾਦਾਯ, ਪਞ੍ਞਤ੍ਤੋਤਿ ਪਵੁਚ੍ਚਤਿ.

੧੦੯੫. ਤਸ੍ਮਾ ਪੁਗ੍ਗਲਸਙ੍ਖਾਤਾ, ਸਂਸਾਰੋਪਨਿਬਨ੍ਧਨਾ;

ਸਤ੍ਤਪਞ੍ਞਤ੍ਤਿ ਨਾਮਾਤਿ, ਵਿਞ੍ਞਾਤਬ੍ਬਾ ਵਿਭਾਵਿਨਾ.

੧੦੯੬. ਅਜ੍ਝਤ੍ਤਿਕਾ ਚ ਕੇਸਾਦਿਕੋਟ੍ਠਾਸਾ ਬਾਹਿਰੇਸੁ ਚ;

ਭੂਮਿਪਬ੍ਬਤਪਾਸਾਣਤਿਣਰੁਕ੍ਖਲਤਾਦਿਕਾ.

੧੦੯੭. ਭੂਤਸਮ੍ਭਾਰਨਿਬ੍ਬਤ੍ਤਿਵਿਭਾਗਪਰਿਕਪ੍ਪਿਤਾ;

ਤਮੁਪਾਦਾਯ ਸਮ੍ਭਾਰਪਞ੍ਞਤ੍ਤੀਤਿ ਪਵੁਚ੍ਚਤਿ.

੧੦੯੮. ਭੂਤਸਮ੍ਭਾਰਸਣ੍ਠਾਨਵਿਭਾਗਪਰਿਕਪ੍ਪਿਤਾ;

ਸਣ੍ਠਾਨਪਞ੍ਞਤ੍ਤਿ ਨਾਮ, ਥਮ੍ਭਕੁਮ੍ਭਾਦਿਕਾ ਮਤਾ.

੧੦੯੯. ਭੂਤਸਮ੍ਭਾਰਸਙ੍ਘਾਤਵਿਸੇਸਪਰਿਕਪ੍ਪਿਤਾ;

ਸਙ੍ਘਾਤਪਞ੍ਞਤ੍ਤਿ ਨਾਮ, ਰਥਗੇਹਾਦਿਕਾ ਮਤਾ.

੧੧੦੦. ਭੂਤਸਮ੍ਭਾਰਵਿਸੇਸਪਰਿਣਾਮਪਕਪ੍ਪਿਤਾ;

ਪਰਿਣਾਮਪਞ੍ਞਤ੍ਤੀਤਿ, ਦਧਿਭਤ੍ਤਾਦਿਕਾ ਮਤਾ.

੧੧੦੧. ਇਤ੍ਥਮਜ੍ਝਤ੍ਤਬਹਿਦ੍ਧਾ, ਧਮ੍ਮਾ ਸਮ੍ਭਾਰਸਮ੍ਭੂਤਾ;

ਸਨ੍ਤਾਨਵੁਤ੍ਤਿ ਸਙ੍ਕੇਤਸਿਦ੍ਧਾ ਪਞ੍ਞਤ੍ਤਿ ਪਞ੍ਚਧਾ.

੧੧੦੨. ਤਥਾ ਤਥਾ ਸਮੁਪ੍ਪਨ੍ਨਵਿਕਪ੍ਪਾਭੋਗਸਮ੍ਮਤਾ;

ਵਿਕਪ੍ਪਪਞ੍ਞਤ੍ਤਿ ਨਾਮ, ਕਾਲਾਕਾਸਦਿਸਾਦਿਕਾ.

੧੧੦੩. ਤਂ ਤਂ ਨਿਮਿਤ੍ਤਮਾਗਮ੍ਮ, ਤਤੋਪਟ੍ਠਾਨਕਪ੍ਪਿਤਾ;

ਉਪਟ੍ਠਾਨਪਞ੍ਞਤ੍ਤੀਤਿ, ਪਟਿਭਾਗਾਦਿਕਾ ਮਤਾ.

੧੧੦੪. ਵਿਸੇਸਾਕਾਰਮਤ੍ਤਾਪਿ, ਅਤ੍ਥਨ੍ਤਰਪਕਪ੍ਪਿਤਾ;

ਆਕਾਰਪਞ੍ਞਤ੍ਤਿ ਨਾਮ, ਵਿਞ੍ਞਤ੍ਤਿਲਹੁਤਾਦਿਕਾ.

੧੧੦੫. ਤਂ ਤਂ ਕਾਰਣਮਾਗਮ੍ਮ, ਤਥਾ ਵੋਹਾਰਕਪ੍ਪਿਤਾ;

ਵੋਹਾਰਪਞ੍ਞਤ੍ਤਿ ਨਾਮ, ਕਥਿਨਾਪਤ੍ਤਿਆਦਿਕਾ.

੧੧੦੬. ਬਾਲੋ ਯੋ ਸੋ ਚ ਮੇ ਅਤ੍ਤਾ,

ਸੋ ਭਵਿਸ੍ਸਾਮਿ ਮਂ ਚ ਤੁ;

ਨਿਚ੍ਚੋ ਧੁਵੋ ਸਸ੍ਸਤੋਤਿ-

ਆਦਿਕਾ ਪਨ ਸਬ੍ਬਥਾ.

੧੧੦੭. ਤਬ੍ਬੋਹਾਰਨਿਮਿਤ੍ਤਾਨਂ, ਅਭਾਵੇਪਿ ਪਵਤ੍ਤਿਤੋ;

ਅਭਿਨਿਵੇਸਪਞ੍ਞਤ੍ਤਿ, ਨਾਮ ਤਿਤ੍ਥਿਯਕਪ੍ਪਿਤਾ.

੧੧੦੮. ਇਚ੍ਚੇਵਂ ਲੋਕਸਾਸਨਤਿਤ੍ਥਾਯਤਨਕਪ੍ਪਿਤਾ;

ਸਨ੍ਤਾਨਮੁਤ੍ਤਸਙ੍ਕੇਤਸਿਦ੍ਧਾ ਅਤ੍ਥਾਪਿ ਪਞ੍ਚਧਾ.

੧੧੦੯. ਸਙ੍ਕਾਨਵੁਤ੍ਤਿਸਨ੍ਤਾਨਮੁਤ੍ਤਭੇਦਵਸਾ ਦ੍ਵਿਧਾ;

ਅਤ੍ਥਪਞ੍ਞਤ੍ਤਿ ਨਾਮਾਯਂ, ਦਸਧਾ ਪਰਿਦੀਪਿਤਾ.

੧੧੧੦. ਇਤਿ ਵੁਤ੍ਤਪ੍ਪਕਾਰੇਸੁ, ਪਞ੍ਞਤ੍ਤਤ੍ਥੇਸੁ ਪਣ੍ਡਿਤਾ;

ਪਞ੍ਞਤ੍ਤਿਮਤ੍ਤਂ ਸਨ੍ਧਾਯ, ਵੋਹਰਨ੍ਤਿ ਯਥਾਕਥਂ.

੧੧੧੧. ਤਦਞ੍ਞੇ ਪਨ ਬਾਲਾ ਚ, ਤਿਤ੍ਥਿਯਾਪਿ ਅਕੋਵਿਦਾ;

ਪਞ੍ਞਤ੍ਤਿਮਤਿਧਾਵਿਤ੍ਵਾ, ਗਣ੍ਹਨ੍ਤਿ ਪਰਮਤ੍ਥਤੋ.

੧੧੧੨. ਤੇ ਤਥਾ ਗਹਿਤਾਕਾਰਾ, ਅਞ੍ਞਾਣਗਹਿਤਾ ਜਨਾ;

ਮਿਚ੍ਛਤ੍ਤਾਭਿਨਿਵਿਟ੍ਠਾ ਚ, ਵਡ੍ਢਨ੍ਤਿ ਭਵਬਨ੍ਧਨਂ.

੧੧੧੩. ਦੁਵਿਧੇਸੁਪਿ ਅਤ੍ਥੇਸੁ, ਤਸ੍ਮਾ ਪਣ੍ਡਿਤਜਾਤਿਕੋ;

ਪਰਮਤ੍ਥਪਞ੍ਞਤ੍ਤੀਸੁ, ਵਿਭਾਗਮਿਤਿ ਲਕ੍ਖਯੇਤਿ.

ਇਤਿ ਪਞ੍ਞਤ੍ਤਿਵਿਭਾਗੇ ਅਤ੍ਥਪਞ੍ਞਤ੍ਤਿਕਥਾ ਨਿਟ੍ਠਿਤਾ.

ਅਟ੍ਠਵੀਸਤਿਮੋ ਪਰਿਚ੍ਛੇਦੋ.