ਏਕੂਨਤਿਂਸਤਿਮੋ ਪਰਿਚ੍ਛੇਦੋ
੨੯. ਨਾਮਪਞ੍ਞਤ੍ਤਿਕਥਾ
੧੧੧੪. ਨਾਮਵੋਹਾਰਸਙ੍ਕੇਤਕਾਰਣੋਪਨਿਬਨ੍ਧਨਾ;
ਯਥਾਵੁਤ੍ਤਤ੍ਥਸਦ੍ਦਾਨਂ, ਅਨ੍ਤਰਾ ਚਿਨ੍ਤਨਾ ਗਤਾ.
੧੧੧੫. ਨਾਮਪਞ੍ਞਤ੍ਤਿ ਨਾਮਾਯਂ, ਅਤ੍ਥਸਦ੍ਦਵਿਨਿਸ੍ਸਟਾ;
ਤਂਦ੍ਵਯਾਬਦ੍ਧਸਙ੍ਕੇਤਞੇਯ੍ਯਾਕਾਰੋਪਲਕ੍ਖਿਤਾ.
੧੧੧੬. ਯਾ ਗਯ੍ਹਤਿ ਨਾਮਘੋਸਗੋਚਰੁਪ੍ਪਨ੍ਨਵੀਥਿਯਾ;
ਪਵਤ੍ਤਾਨਨ੍ਤਰੁਪ੍ਪਨ੍ਨ-ਮਨੋਦ੍ਵਾਰਿਕਵੀਥਿਯਾ.
੧੧੧੭. ਮਞ੍ਚਪੀਠਾਦਿਸਦ੍ਦਂ ਹਿ, ਸੋਤਵਿਞ੍ਞਾਣਵੀਥਿਯਾ;
ਸੁਤ੍ਵਾ ਤਮੇਵ ਚਿਨ੍ਤੇਤ੍ਵਾ, ਮਨੋਦ੍ਵਾਰਿਕਵੀਥਿਯਾ.
੧੧੧੮. ਤਤੋ ਸਙ੍ਕੇਤਨਿਪ੍ਫਨ੍ਨਂ, ਨਾਮਂ ਚਿਨ੍ਤਾਯ ਗਯ੍ਹਤਿ;
ਨਾਮਪਞ੍ਞਤ੍ਤਿਅਤ੍ਥਾ ਤੁ, ਤਤੋ ਗਯ੍ਹਨ੍ਤਿ ਸਮ੍ਭਵਾ.
੧੧੧੯. ਸਦ੍ਦਨਾਮਤ੍ਥਪਞ੍ਞਤ੍ਤਿਪਰਮਤ੍ਥਵਸੇਨ ਹਿ;
ਚਤੁਧਾ ਤਿਵਿਧਾ ਵਾਥ, ਚਿਨ੍ਤਨਾ ਤਤ੍ਥ ਇਚ੍ਛਿਤਾ.
੧੧੨੦. ਇਤ੍ਥਮਟ੍ਠਕਥਾਮਗ੍ਗਂ, ਵਣ੍ਣੇਨ੍ਤੇਨ ਹਿ ਦਸ੍ਸਿਤੋ;
ਨਯੋ ਆਚਰਿਯੇਨੇਤਿ, ਵਿਭਾਗੋਯਂ ਪਕਾਸਿਤੋ.
੧੧੨੧. ਨਤ੍ਥਞ੍ਞਾ ਕਾਚਿ ਵਿਞ੍ਞਤ੍ਤਿ, ਵਿਕਾਰਸਹਿਤੋ ਪਨ;
ਸਦ੍ਦੋਵ ਨਾਮਪਞ੍ਞਤ੍ਤਿ, ਇਚ੍ਚੇਕਚ੍ਚੇਹਿ ਵਣ੍ਣਿਤਂ.
੧੧੨੨. ਤਦੇਤਂ ਨਾਮਪਞ੍ਞਤ੍ਤਿਭਾਵੇਨੇਕਵਿਧਮ੍ਪਿ ਚ;
ਨੇਰੁਤ੍ਤਿਕਯਾਦਿਚ੍ਛਕਵਸਾ ਨਾਮਂ ਦ੍ਵਿਧਾ ਭਵੇ.
੧੧੨੩. ਸਞ੍ਞਾਸੁ ਧਾਤੁਰੂਪਾਨਿ, ਪਚ੍ਚਯਞ੍ਚ ਤਤੋ ਪਰਂ;
ਕਤ੍ਵਾ ਵਣ੍ਣਾਗਮਾਦਿਞ੍ਚ, ਸਦ੍ਦਲਕ੍ਖਣਸਾਧਿਤਂ.
੧੧੨੪. ਨੇਰੁਤ੍ਤਿਕਮੁਦੀਰੇਨ੍ਤਿ, ਨਾਮਂ ਯਾਦਿਚ੍ਛਕਂ ਪਦਂ;
ਯਦਿਚ੍ਛਾਯ ਕਤਮਤ੍ਤਂ, ਬ੍ਯਞ੍ਜਨਤ੍ਥਵਿਵਜ੍ਜਿਤਂ.
੧੧੨੫. ਤਿਵਿਧਮ੍ਪਿ ਤਦਨ੍ਵਤ੍ਥਕਾਦਿਮਞ੍ਚੋਪਚਾਰਿਮਂ;
ਨਿਬ੍ਬਚਨਤ੍ਥਸਾਪੇਕ੍ਖਂ, ਤਤ੍ਥਾਨ੍ਵਤ੍ਥਮੁਦੀਰਿਤਂ.
੧੧੨੬. ਯਦਿਚ੍ਛਾਕਤਸਙ੍ਕੇਤਂ, ਕਾਦਿਮਞ੍ਚੋਪਚਾਰਿਮਂ;
ਅਤਮ੍ਭੂਤਸ੍ਸ ਤਬ੍ਭਾਵਵੋਹਾਰੋਤਿ ਪਵੁਚ੍ਚਤਿ.
੧੧੨੭. ਤਥਾ ਸਾਮਞ੍ਞਨਾਮਞ੍ਚ, ਗੁਣਨਾਮਞ੍ਚ ਕਿਤ੍ਤਿਮਂ;
ਓਪਪਾਤਿਕਮਿਚ੍ਚੇਵਂ, ਨਾਮਂ ਹੋਤਿ ਚਤੁਬ੍ਬਿਧਂ.
੧੧੨੮. ਮਹਾਜਨਸਮ੍ਮਤਞ੍ਚ, ਅਨ੍ਵਤ੍ਥਞ੍ਚੇਵ ਤਾਦਿਸਂ;
ਤੀਣਿ ਨਾਮਾਨਿ ਚਨ੍ਦਾਦਿਨਾਮਂ ਤਤ੍ਥੋਪਪਾਤਿਕਂ.
੧੧੨੯. ਯਾਦਿਚ੍ਛਕਮਾਵਤ੍ਥਿਕਂ, ਨੇਮਿਤ੍ਤਕਮਥਾਪਰਂ;
ਲਿਙ੍ਗਿਕਂ ਰੁਲ਼੍ਹਿਕਞ੍ਚੇਤਿ, ਨਾਮਂ ਪਞ੍ਚਵਿਧਂ ਭਵੇ.
੧੧੩੦. ਯਾਦਿਚ੍ਛਕਂ ਯਥਾਵੁਡ੍ਢਂ, ਵਚ੍ਛਦਮ੍ਮਾਦਿਕਂ ਪਨ;
ਆਵਤ੍ਥਿਕਂ ਨੇਮਿਤ੍ਤਕਂ, ਸੀਲਵਾਪਞ੍ਞਵਾਦਿਕਂ.
੧੧੩੧. ਲਿਙ੍ਗਿਕਂ ਦਿਟ੍ਠਲਿਙ੍ਗਂ ਤੁ, ਦਣ੍ਡੀਛਤ੍ਤੀਤਿਆਦਿਕਂ;
ਰੁਲ਼੍ਹਿਕਂ ਲੇਸਮਤ੍ਤੇਨ, ਰੁਲ਼੍ਹਂ ਗੋਮਹਿਂਸਾਦਿਕਂ.
੧੧੩੨. ਵਿਜ੍ਜਮਾਨਾਵਿਜ੍ਜਮਾਨ-ਪਞ੍ਞਤ੍ਤੋਭਯਮਿਸ੍ਸਿਤਾ;
ਵਿਭਤ੍ਤਾ ਨਾਮਪਞ੍ਞਤ੍ਤਿ, ਛਬ੍ਬਿਧਾ ਹੋਤਿ ਤਤ੍ਥ ਹਿ.
੧੧੩੩. ਵਿਜ੍ਜਮਾਨਪਞ੍ਞਤ੍ਤੀਤਿ, ਵਿਜ੍ਜਮਾਨਤ੍ਥਦੀਪਿਤਾ;
ਵੁਚ੍ਚਤਿ ਖਨ੍ਧਾਯਤਨ-ਧਾਤੁਪਞ੍ਚਿਨ੍ਦ੍ਰਿਯਾਦਿਕਾ.
੧੧੩੪. ਅਵਿਜ੍ਜਮਾਨਪਞ੍ਞਤ੍ਤਿ-ਨਾਮਿਕਾ ਪਰਮਤ੍ਥਤੋ;
ਅਵਿਜ੍ਜਮਾਨਮਞ੍ਚਾਦਿ, ਅਤ੍ਥਪਞ੍ਞਤ੍ਤਿਦੀਪਿਤਾ.
੧੧੩੫. ਵਿਜ੍ਜਮਾਨੇਨ ਅਵਿਜ੍ਜ-ਮਾਨਪਞ੍ਞਤ੍ਤਿਨਾਮਿਕਾ;
ਤੇਵਿਜ੍ਜੋ ਛਲ਼ਭਿਞ੍ਞੋ ਚ, ਸੀਲਵਾ ਪਞ੍ਞਵਾਪਿ ਚ.
੧੧੩੬. ਅਵਿਜ੍ਜਮਾਨੇਨ ਵਿਜ੍ਜ-ਮਾਨਪਞ੍ਞਤ੍ਤਿਨਾਮਿਕਾ;
ਇਤ੍ਥਿਰੂਪਂ ਇਤ੍ਥਿਸਦ੍ਦੋ, ਇਤ੍ਥਿਚਿਤ੍ਤਨ੍ਤਿਆਦਿਕਾ.
੧੧੩੭. ਵਿਜ੍ਜਮਾਨੇਨ ਤੁ ਵਿਜ੍ਜ-ਮਾਨਪਞ੍ਞਤ੍ਤਿਨਾਮਿਕਾ;
ਚਕ੍ਖੁਵਿਞ੍ਞਾਣਂ ਚ ਚਕ੍ਖੁ-ਸਮ੍ਫਸ੍ਸੋ ਚੇਵਮਾਦਿਕਾ.
੧੧੩੮. ਅਵਿਜ੍ਜਮਾਨੇਨਾਵਿਜ੍ਜ-ਮਾਨਪਞ੍ਞਤ੍ਤਿਨਾਮਿਕਾ;
ਖਤ੍ਤਿਯਪੁਤ੍ਤੋ ਬ੍ਰਾਹ੍ਮਣ-ਪੁਤ੍ਤੋ ਇਚ੍ਚੇਵਮਾਦਿਕਾ.
੧੧੩੯. ਇਤਿ ਵੁਤ੍ਤਾਨੁਸਾਰੇਨ, ਨਾਮਪਞ੍ਞਤ੍ਤਿਯਾ ਬੁਧੋ;
ਸਰੂਪਂ ਵਿਸਯਞ੍ਚੇਵ, ਵਿਭਾਗਞ੍ਚ ਵਿਭਾਵਯੇ.
੧੧੪੦. ਇਚ੍ਚੇਵਂ ਪਰਮਤ੍ਥਾ ਚ, ਯਥਾਵੁਤ੍ਤਾ ਚਤੁਬ੍ਬਿਧਾ;
ਪਞ੍ਞਤ੍ਤਿ ਦੁਵਿਧਾ ਚੇਤਿ, ਞੇਯ੍ਯਤ੍ਥਾ ਛਬ੍ਬਿਧਾ ਮਤਾਤਿ.
ਇਤਿ ਪਞ੍ਞਤ੍ਤਿਵਿਭਾਗੇ ਨਾਮਪਞ੍ਞਤ੍ਤਿਕਥਾ ਨਿਟ੍ਠਿਤਾ.
ਏਕੂਨਤਿਂਸਤਿਮੋ ਪਰਿਚ੍ਛੇਦੋ.
ਨਿਟ੍ਠਿਤੋ ਚ ਸਬ੍ਬਥਾਪਿ ਪਞ੍ਞਤ੍ਤਿਵਿਭਾਗੋ.
ਨਿਗਮਨਕਥਾ
੧੧੪੧. ਸੇਟ੍ਠੇ ਕਞ੍ਚਿਵਰੇ ਰਟ੍ਠੇ, ਕਾਵੇਰਿਨਗਰੇ ਵਰੇ;
ਕੁਲੇ ਸਞ੍ਜਾਤਭੂਤੇਨ, ਬਹੁਸ੍ਸੁਤੇਨ ਞਾਣਿਨਾ.
੧੧੪੨. ਅਨੁਰੁਦ੍ਧੇਨ ਥੇਰੇਨ, ਅਨਿਰੁਦ੍ਧਯਸਸ੍ਸਿਨਾ;
ਤਮ੍ਬਰਟ੍ਠੇ ਵਸਨ੍ਤੇਨ, ਨਗਰੇ ਤਞ੍ਜਨਾਮਕੇ.
੧੧੪੩. ਤਤ੍ਥ ਸਙ੍ਘਵਿਸਿਟ੍ਠੇਨ, ਯਾਚਿਤੇਨ ਅਨਾਕੁਲਂ;
ਮਹਾਵਿਹਾਰਵਾਸੀਨਂ, ਵਾਚਨਾਮਗ੍ਗਨਿਸ੍ਸਿਤਂ.
੧੧੪੪. ਪਰਮਤ੍ਥਂ ਪਕਾਸੇਨ੍ਤਂ, ਪਰਮਤ੍ਥਵਿਨਿਚ੍ਛਯਂ;
ਪਕਰਣਂ ਕਤਂ ਤੇਨ, ਪਰਮਤ੍ਥਤ੍ਥਵੇਦਿਨਾਤਿ.
ਇਤਿ ਅਨੁਰੁਦ੍ਧਾਚਰਿਯੇਨ ਰਚਿਤੋ
ਪਰਮਤ੍ਥਵਿਨਿਚ੍ਛਯੋ ਨਿਟ੍ਠਿਤੋ.
ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ