੨੩. ਮੂਲਵਿਸੁਦ੍ਧਿਕਥਾ
੮੯੫. ਇਤ੍ਥਂ ਚਿਤ੍ਤਂ ਚੇਤਸਿਕਂ, ਰੂਪਞ੍ਚੇਵਾਤਿ ਸਙ੍ਖਤਾ;
ਵੁਤ੍ਤਾ ਅਸਙ੍ਖਤਂ ਦਾਨਿ, ਨਿਬ੍ਬਾਨਨ੍ਤਿ ਪਵੁਚ੍ਚਤਿ.
੮੯੬. ਸੀਲਵਿਸੁਦ੍ਧਿ ਆਦਿਮ੍ਹਿ, ਤਤੋ ਚਿਤ੍ਤਵਿਸੁਦ੍ਧਿ ਚ;
ਦਿਟ੍ਠਿਵਿਸੁਦ੍ਧਿਨਾਮਾ ਚ, ਕਙ੍ਖਾਵਿਤਰਣਾਪਿ ਚ.
੮੯੭. ਤਤੋ ਪਰਂ ਮਗ੍ਗਾਮਗ੍ਗ-ਞਾਣਦਸ੍ਸਨਨਾਮਿਕਾ;
ਤਥਾ ਪਟਿਪਦਾਞਾਣ-ਦਸ੍ਸਨਾ ਞਾਣਦਸ੍ਸਨਂ.
੮੯੮. ਇਚ੍ਚਾਨੁਕ੍ਕਮਤੋ ਵੁਤ੍ਤਾ, ਸਤ੍ਤ ਹੋਨ੍ਤਿ ਵਿਸੁਦ੍ਧਿਯੋ;
ਸਤ੍ਤਮਾਨੁਤ੍ਤਰਾ ਤਤ੍ਥ, ਪੁਬ੍ਬਭਾਗਾ ਛ ਲੋਕਿਯਾ.
੮੯੯. ਸਂਵਰੋ ਪਾਤਿਮੋਕ੍ਖੋ ਚ, ਤਥੇਵਿਨ੍ਦ੍ਰਿਯਸਂਵਰੋ;
ਆਜੀਵਪਾਰਿਸੁਦ੍ਧਿ ਚ, ਸੀਲਂ ਪਚ੍ਚਯਨਿਸ੍ਸਿਤਂ.
੯੦੦. ਇਤਿ ਸੀਲਵਿਸੁਦ੍ਧੀਤਿ, ਸੁਦ੍ਧਮੇਤਂ ਪਵੁਚ੍ਚਤਿ;
ਚਤੁਪਾਰਿਸੁਦ੍ਧਿਸੀਲਂ, ਧੁਤਙ੍ਗਪਰਿਵਾਰਿਤਂ.
੯੦੧. ਕਸਿਣਾਨਿ ਦਸਾਸੁਭਾ, ਦਸਾਨੁਸ੍ਸਤਿਯੋ ਪਨ;
ਅਪ੍ਪਮਞ੍ਞਾ ਚ ਸਞ੍ਞਾ ਚ, ਵਵਤ੍ਥਾਰੁਪ੍ਪਕਾਤਿ ਚ.
੯੦੨. ਸਮਥਕ੍ਕਮ੍ਮਟ੍ਠਾਨਾਨਿ, ਤਾਲੀਸਟ੍ਠਕਥਾਨਯੇ;
ਪਾਲ਼ਿਯਂ ਤੁ ਵਿਭਤ੍ਤਾਨਿ, ਅਟ੍ਠਤਿਂਸਾਤਿ ਵਣ੍ਣਿਤਂ.
੯੦੩. ਪਥਵਾਪੋ ਚ ਤੇਜੋ ਚ,
ਵਾਯੋ ਨੀਲਞ੍ਚ ਪੀਤਕਂ;
ਲੋਹਿਤੋਦਾਤਮਾਕਾਸਂ,
ਆਲੋਕਕਸਿਣਨ੍ਤਿ ਚ.
੯੦੪. ਕਸਿਣਾਨਿ ਦਸੇਤਾਨਿ, ਵੁਤ੍ਤਾਨਟ੍ਠਕਥਾਨਯੇ;
ਅਟ੍ਠੇਵ ਪਾਲ਼ਿਯਂ ਹਿਤ੍ਵਾ, ਅਨ੍ਤੇ ਤੁ ਕਸਿਣਦ੍ਵਯਂ.
੯੦੫. ਉਦ੍ਧੁਮਾਤਂ ਵਿਨੀਲਞ੍ਚ, ਵਿਪੁਬ੍ਬਕਂ ਵਿਖਾਯਿਤਂ;
ਵਿਚ੍ਛਿਦ੍ਦਕਞ੍ਚ ਵਿਕ੍ਖਿਤ੍ਤਂ, ਹਤਵਿਕ੍ਖਿਤ੍ਤਲੋਹਿਤਂ.
੯੦੬. ਪੁਲ਼ਵਕਂ ਅਟ੍ਠਿਕਞ੍ਚੇਤਿ, ਅਸੁਭਾ ਦਸ ਦੇਸਿਤਾ;
ਰੂਪਕਾਯਵਿਭਾਗਾਯ, ਦਸਕਾਯਵਿਪਤ੍ਤਿਯਾ.
੯੦੭. ਬੁਦ੍ਧੇ ਧਮ੍ਮੇ ਚ ਸਙ੍ਘੇ ਚ, ਸੀਲੇ ਚਾਗੇ ਚ ਅਤ੍ਤਨਾ;
ਦੇਵਤੋਪਸਮਾਯਞ੍ਚ, ਸਤ੍ਤਾਨੁਸ੍ਸਤਿਯੋ ਕਮਾ.
੯੦੮. ਮਰਣਸ੍ਸਤਿ ਨਾਮੇਕਾ, ਤਥਾ ਕਾਯਗਤਾਸਤਿ;
ਆਨਾਪਾਨਸ੍ਸਤਿਚ੍ਚੇਵਂ, ਦਸਾਨੁਸ੍ਸਤਿਯੋ ਮਤਾ.
੯੦੯. ਮੇਤ੍ਤਾ ਕਰੁਣਾ ਮੁਦਿਤਾ, ਉਪੇਕ੍ਖਾਤਿ ਚਤੁਬ੍ਬਿਧਾ;
ਵੁਤ੍ਤਾ ਬ੍ਰਹ੍ਮਵਿਹਾਰਾ ਚ, ਅਪ੍ਪਮਞ੍ਞਾਤਿ ਤਾਦਿਨਾ.
੯੧੦. ਏਕਾਹਾਰੇ ਪਟਿਕ੍ਕੂਲ-ਸਞ੍ਞਾ ਨਾਮੇਕਮੇਵ ਤੁ;
ਚਤੁਧਾਤੁਵਵਤ੍ਥਾਨਂ, ਚਤੁਧਾਤੁਪਰਿਗ੍ਗਹੋ.
੯੧੧. ਆਕਾਸਾਨਞ੍ਚਾਯਤਨਂ, ਵਿਞ੍ਞਾਣਞ੍ਚਮਥਾਪਰਂ;
ਆਕਿਞ੍ਚਞ੍ਞਂ ਤਥਾ ਨੇਵ-ਸਞ੍ਞਾਨਾਸਞ੍ਞਨਾਮਕਂ.
੯੧੨. ਇਚ੍ਚਾਨੁਕ੍ਕਮਤੋ ਵੁਤ੍ਤਾ, ਅਰੂਪਜ੍ਝਾਨਿਕਾ ਪਨ;
ਅਰੂਪਕਮ੍ਮਟ੍ਠਾਨਾਨਿ, ਚਤ੍ਤਾਰੋਪਿ ਪਕਿਤ੍ਤਿਤਾ.
੯੧੩. ਕਸਿਣਾਸੁਭਕੋਟ੍ਠਾਸੇ, ਆਨਾਪਾਨੇ ਚ ਸਬ੍ਬਥਾ;
ਦਿਸ੍ਵਾ ਸੁਤ੍ਵਾ ਫੁਸਿਤ੍ਵਾ ਵਾ, ਪਰਿਕਮ੍ਮਂ ਤੁ ਕੁਬ੍ਬਤੋ.
੯੧੪. ਉਗ੍ਗਹੋ ਨਾਮ ਸਮ੍ਭੋਤਿ, ਨਿਮਿਤ੍ਤਂ ਤਤ੍ਥ ਯੁਞ੍ਜਤੋ;
ਪਟਿਭਾਗੋ ਤਮਾਰਬ੍ਭ, ਤਤ੍ਥ ਵਤ੍ਤਤਿ ਅਪ੍ਪਨਾ.
੯੧੫. ਸਾਧੁ ਸਤ੍ਤਾ ਸੁਖੀ ਹੋਨ੍ਤੁ, ਦੁਕ੍ਖਾ ਮੁਚ੍ਚਨ੍ਤੁ ਪਾਣਿਨੋ;
ਅਹੋ ਸਤ੍ਤਾ ਸੁਖਪ੍ਪਤ੍ਤਾ, ਹੋਨ੍ਤੁ ਯਦਿਚ੍ਛਕਾਤਿ ਚ.
੯੧੬. ਉਦ੍ਦਿਸ੍ਸ ਵਾ ਅਨੋਦਿਸ੍ਸ, ਯੁਞ੍ਜਤੋ ਸਤ੍ਤਗੋਚਰੇ;
ਅਪ੍ਪਮਞ੍ਞਾ ਪਨਪ੍ਪੇਨ੍ਤਿ, ਅਨੁਪੁਬ੍ਬੇਨ ਵਤ੍ਤਿਕਾ.
੯੧੭. ਕਸਿਣੁਗ੍ਘਾਟਿਮਾਕਾਸੇ, ਪਠਮਾਰੁਪ੍ਪਮਾਨਸੇ;
ਤਸ੍ਸੇਵ ਨਤ੍ਥਿਭਾਵੇ ਚ, ਤਤਿਯਾਰੁਪ੍ਪਕੇਤਿ ਚ.
੯੧੮. ਯੁਞ੍ਜਨ੍ਤਸ੍ਸ ਪਨੇਤੇਸੁ, ਗੋਚਰੇਸੁ ਚਤੂਸੁਪਿ;
ਅਪ੍ਪੇਨ੍ਤਿ ਅਨੁਪੁਬ੍ਬੇਨ, ਆਰੁਪ੍ਪਾਪਿ ਚਤੁਬ੍ਬਿਧਾ.
੯੧੯. ਆਨਾਪਾਨਞ੍ਚ ਕਸਿਣਂ, ਪਞ੍ਚਕਜ੍ਝਾਨਿਕਂ ਤਹਿਂ;
ਪਠਮਜ੍ਝਾਨਿਕਾ ਵੁਤ੍ਤਾ, ਕੋਟ੍ਠਾਸਾਸੁਭਭਾਵਨਾ.
੯੨੦. ਸੁਖਿਤਜ੍ਝਾਨਿਕਾ ਤਿਸ੍ਸੋ, ਅਪ੍ਪਮਞ੍ਞਾ ਚ ਹੇਟ੍ਠਿਮਾ;
ਉਪੇਕ੍ਖਾਰੁਪ੍ਪਕਾ ਪਞ੍ਚ, ਉਪੇਕ੍ਖਾਝਾਨਿਕਾਤਿ ਚ.
੯੨੧. ਏਕਾ ਦਸੇਕਾ ਦਸ ਚ, ਤਯੋ ਪਞ੍ਚੇਤਿ ਸਬ੍ਬਥਾ;
ਪਰਿਕਮ੍ਮਵਸਾ ਤਿਂਸ, ਛ ਕੋਟ੍ਠਾਸਾ ਯਥਾਕ੍ਕਮਂ.
੯੨੨. ਪਞ੍ਚਕਾਦਿਸੁਖੋਪੇਕ੍ਖਾ, ਝਾਨਭੇਦਾ ਚਤੁਬ੍ਬਿਧਾ;
ਏਕਚ੍ਚਤੁਪਞ੍ਚਝਾਨ-ਵਸੇਨ ਤਿਵਿਧਾ ਸਿਯੁਂ.
੯੨੩. ਰੂਪਾਰੂਪਵਸਾ ਦ੍ਵੇ ਚ, ਅਪ੍ਪਨਾਤੋ ਪੁਨੇਕਧਾ;
ਇਚ੍ਚੇਵਮਪ੍ਪਨਾ ਕਮ੍ਮ-ਟ੍ਠਾਨਭੇਦਾ ਸਮਿਸ੍ਸਿਤਾ.
੯੨੪. ਦ੍ਵੇ ਚ ਸਞ੍ਞਾਵਵਤ੍ਥਾਨਾ, ਅਟ੍ਠਾਨੁਸ੍ਸਤਿਯੋਤਿ ਚ;
ਸੇਸਾ ਦਸ ਪਵੁਚ੍ਚਨ੍ਤਿ, ਉਪਚਾਰਸਮਾਧਿਕਾ.
੯੨੫. ਪਰਿਕਮ੍ਮੋਪਚਾਰਾਨੁਲੋਮਗੋਤ੍ਰਭੁਤੋ ਪਰਂ;
ਪਞ੍ਚਮਂ ਵਾ ਚਤੁਤ੍ਥਂ ਵਾ, ਜਵਨਂ ਹੋਤਿ ਅਪ੍ਪਨਾ.
੯੨੬. ਅਪ੍ਪਨਾਜਵਨਂ ਸਬ੍ਬਂ, ਲੋਕੁਤ੍ਤਰਮਹਗ੍ਗਤਂ;
ਤਿਹੇਤੁਕਪਰਿਤ੍ਤਾਨਿ, ਪੁਰਿਮਾਨਿ ਯਥਾਰਹਂ.
੯੨੭. ਆਵਜ੍ਜਨਾ ਚ ਵਸਿਤਾ, ਤਂਸਮਾਪਜ੍ਜਨਾ ਤਥਾ;
ਅਧਿਟ੍ਠਾਨਾ ਚ ਵੁਟ੍ਠਾਨਾ, ਪਚ੍ਚਵੇਕ੍ਖਣ ਪਞ੍ਚਮਾ.
੯੨੮. ਵਸਿਤਾਹਿ ਵਸੀਭੂਤਾ, ਇਤਿ ਕਤ੍ਵਾਨ ਪਞ੍ਚਹਿ;
ਭਾਵੇਨ੍ਤਸ੍ਸ ਪਨਪ੍ਪੇਨ੍ਤਿ, ਉਪਰੂਪਰਿ ਅਪ੍ਪਨਾ.
੯੨੯. ਯੁਞ੍ਜਨ੍ਤਸ੍ਸ ਤੁ ਵੁਟ੍ਠਾਯ, ਕਸਿਣਜ੍ਝਾਨਪਞ੍ਚਮਾ;
ਪਞ੍ਚਾਭਿਞ੍ਞਾ ਹਿ ਅਪ੍ਪੇਨ੍ਤਿ, ਰੂਪਸਦ੍ਦਾਦਿਗੋਚਰੇ.
੯੩੦. ਲੋਕੁਤ੍ਤਰਾ ਪਨਪ੍ਪੇਨ੍ਤਿ, ਸਬ੍ਬੇ ਨਿਬ੍ਬਾਨਗੋਚਰੇ;
ਅਨਿਚ੍ਚਦੁਕ੍ਖਾਨਤ੍ਤਾਤਿ, ਭੂਮਿਧਮ੍ਮੇ ਵਿਪਸ੍ਸਤੋ.
੯੩੧. ਤਤ੍ਥ ਚ ਪਾਦਕਜ੍ਝਾਨਂ, ਸਮ੍ਮਟ੍ਠਜ੍ਝਾਨਮੇਵ ਵਾ;
ਅਜ੍ਝਾਸਯੋ ਚ ਵੁਟ੍ਠਾਨ-ਗਾਮਿਨੀ ਚ ਵਿਪਸ੍ਸਨਾ.
੯੩੨. ਮਗ੍ਗਾਨਂ ਝਾਨਭੇਦਾਯ, ਯਥਾਯੋਗਂ ਨਿਯਾਮਤਾ;
ਯਥਾਸਕਂ ਫਲਾਨਂ ਤੁ, ਮਗ੍ਗਾ ਹੋਨ੍ਤਿ ਨਿਯਾਮਤਾ.
੯੩੩. ਮਗ੍ਗਾਨਨ੍ਤਰਮੇਵਾਥ, ਭੂਮਿਧਮ੍ਮੇ ਵਿਪਸ੍ਸਤੋ;
ਫਲਸਮਾਪਤ੍ਤਿਯਮ੍ਪਿ, ਅਪ੍ਪੇਤਿ ਫਲਮਾਨਸਂ.
੯੩੪. ਅਨੁਪੁਬ੍ਬਸਮਾਪਤ੍ਤਿਂ, ਸਮਾਪਜ੍ਜਿਸ੍ਸ ਵੁਟ੍ਠਿਤੋ;
ਝਾਨਧਮ੍ਮੇ ਵਿਪਸ੍ਸਿਤ੍ਵਾ, ਤਤ੍ਥ ਤਤ੍ਥੇਵ ਪਣ੍ਡਿਤੋ.
੯੩੫. ਚਤੁਤ੍ਥਾਰੁਪ੍ਪਮਪ੍ਪੇਤ੍ਵਾ, ਏਕਦ੍ਵਿਜਵਨਾਪਰਂ;
ਨਿਰੋਧਂ ਨਾਮ ਫੁਸਤਿ, ਸਮਾਪਤ੍ਤਿਮਚਿਤ੍ਤਕਂ.
੯੩੬. ਅਰਹਾ ਵਾ ਅਨਾਗਾਮੀ, ਪਞ੍ਚਵੋਕਾਰਭੂਮਿਯਂ;
ਯਥਾਸਕਂ ਫਲੁਪ੍ਪਾਦੋ, ਵੁਟ੍ਠਾਨਨ੍ਤਿ ਤਤੋ ਮਤੋ.
੯੩੭. ਅਪ੍ਪਨਾਪਰਿਯੋਸਾਨੇ, ਸਿਯਾ ਸਬ੍ਬਤ੍ਥ ਸਮ੍ਭਵਾ;
ਭਵਙ੍ਗਪਾਤੋ ਤਂ ਛੇਤ੍ਵਾ, ਜਾਯਤੇ ਪਚ੍ਚਵੇਕ੍ਖਣਾ.
੯੩੮. ਇਤਿ ਵੁਤ੍ਤਾਨੁਸਾਰੇਨ, ਅਪ੍ਪਨਾਨਯਸਙ੍ਗਹਂ;
ਯਥਾਯੋਗਂ ਵਿਭਾਵੇਯ੍ਯ, ਤਤ੍ਥ ਤਤ੍ਥ ਵਿਚਕ੍ਖਣੋ.
੯੩੯. ਚਿਤ੍ਤਵਿਸੁਦ੍ਧਿ ਨਾਮਾਯਂ, ਚਿਤ੍ਤਸਂਕ੍ਲੇਸਸੋਧਨੋ;
ਉਪਚਾਰਪ੍ਪਨਾਭੇਦੋ, ਸਮਥੋ ਪੁਬ੍ਬਭਾਗਿਯੋਤਿ.
ਇਤਿ ਨਿਬ੍ਬਾਨਵਿਭਾਗੇ ਮੂਲਵਿਸੁਦ੍ਧਿਕਥਾ ਨਿਟ੍ਠਿਤਾ.
ਤੇਵੀਸਤਿਮੋ ਪਰਿਚ੍ਛੇਦੋ.