ਚਤੁਵੀਸਤਿਮੋ ਪਰਿਚ੍ਛੇਦੋ
੨੪. ਪਰਿਗ੍ਗਹਵਿਸੁਦ੍ਧਿਕਥਾ
੯੪੦. ਸੀਲਚਿਤ੍ਤਵਿਸੁਦ੍ਧੀਹਿ, ਯਥਾਵੁਤ੍ਤਾਹਿ ਮਣ੍ਡਿਤੋ;
ਪਯੋਗਾਸਯਸਮ੍ਪਨ੍ਨੋ, ਨਿਬ੍ਬਾਨਾਭਿਰਤੋ ਤਤੋ.
੯੪੧. ਖਨ੍ਧਾਯਤਨਧਾਤਾਦਿਪ੍ਪਭੇਦੇਹਿ ਯਥਾਰਹਂ;
ਲਕ੍ਖਣਪਚ੍ਚੁਪਟ੍ਠਾਨ-ਪਦਟ੍ਠਾਨਵਿਭਾਗਤੋ.
੯੪੨. ਪਰਿਗ੍ਗਹੇਤ੍ਵਾ ਸਙ੍ਖਾਰੇ, ਨਾਮਰੂਪਂ ਯਥਾਕਥਂ;
ਵਵਤ੍ਥਪੇਨ੍ਤੋ ਤਤ੍ਥੇਵਮਨੁਪਸ੍ਸਤਿ ਪਞ੍ਞਵਾ.
੯੪੩. ਨਾਮਰੂਪਮਿਦਂ ਸੁਦ੍ਧਂ, ਅਤ੍ਤਭਾਵੋਤਿ ਵੁਚ੍ਚਤਿ;
ਨਤ੍ਥੇਤ੍ਥ ਕੋਚਿ ਅਤ੍ਤਾ ਵਾ, ਸਤ੍ਤੋ ਜੀਵੋ ਚ ਪੁਗ੍ਗਲੋ.
੯੪੪. ਯਥਾਪਿ ਅਙ੍ਗਸਮ੍ਭਾਰਾ, ਹੋਤਿ ਸਦ੍ਦੋ ਰਥੋ ਇਤਿ;
ਏਵਂ ਖਨ੍ਧੇਸੁ ਸਨ੍ਤੇਸੁ, ਹੋਤਿ ਸਤ੍ਤੋਤਿ ਸਮ੍ਮੁਤਿ.
੯੪੫. ਖਨ੍ਧਾਯਤਨਧਾਤੂਨਂ, ਯਥਾਯੋਗਮਨੁਕ੍ਕਮੋ;
ਅਬ੍ਬੋਚ੍ਛਿਨ੍ਨੋ ਪਵਤ੍ਤਨ੍ਤੋ, ਸਂਸਾਰੋਤਿ ਪਵੁਚ੍ਚਤਿ.
੯੪੬. ਇਤਿ ਨਾਨਪ੍ਪਕਾਰੇਨ, ਤੇਭੂਮਕਪਰਿਗ੍ਗਹੋ;
ਭੂਮਿਧਮ੍ਮਵਵਤ੍ਥਾਨਂ, ਸੁਦ੍ਧਸਙ੍ਖਾਰਦਸ੍ਸਨਂ.
੯੪੭. ਅਤ੍ਤਦਿਟ੍ਠਿਪਹਾਨੇਨ, ਦਿਟ੍ਠਿਸਂਕ੍ਲੇਸਸੋਧਨਂ;
ਦਿਟ੍ਠਿਵਿਸੁਦ੍ਧਿ ਨਾਮਾਤਿ, ਞਾਣਮੇਤਂ ਪਵੁਚ੍ਚਤਿ.
੯੪੮. ਪਰਿਗ੍ਗਹਿਤਸਙ੍ਖਾਰੋ, ਨਾਮਰੂਪਮਪਤ੍ਥਿਯਾ;
ਤਤੋ ਪਰਂ ਯਥਾਯੋਗਂ, ਪਰਿਗ੍ਗਣ੍ਹਤਿ ਪਚ੍ਚਯੇ.
੯੪੯. ਦੁਕ੍ਖਸਮੁਦਯੋ ਤਤ੍ਥ, ਤਣ੍ਹਾ ਸਂਸਾਰਨਾਯਿਕਾ;
ਸਮੋਧਾਨੇਤਿ ਸਙ੍ਖਾਰੇ, ਤਤ੍ਥ ਤਤ੍ਥੁਪਪਤ੍ਤਿਯਾ.
੯੫੦. ਤਣ੍ਹਾਸਮ੍ਭਵਮੇਵੇਤਂ, ਤਸ੍ਮਾ ਦੁਕ੍ਖਂ ਪਵੁਚ੍ਚਤਿ;
ਤਦਪ੍ਪਵਤ੍ਤਿ ਨਿਬ੍ਬਾਨਂ, ਮਗ੍ਗੋ ਤਂਪਾਪਕੋਤਿ ਚ.
੯੫੧. ਚਤੁਸਚ੍ਚਵਵਤ੍ਥਾਨ-ਮੁਖੇਨੇਵਮ੍ਪਿ ਪਚ੍ਚਯੇ;
ਪਰਿਗ੍ਗਣ੍ਹਨ੍ਤਿ ਏਕਚ੍ਚੇ, ਸਙ੍ਖਾਰਾਨਮਥਾਪਰੇ.
੯੫੨. ਆਲੋਕਾਕਾਸਵਾਯਾਪਪਥਵਿਞ੍ਚੁਪਨਿਸ੍ਸਯਂ;
ਭਵਙ੍ਗਪਰਿਣਾਮਞ੍ਚ, ਲਭਿਤ੍ਵਾਵ ਯਥਾਰਹਂ.
੯੫੩. ਛ ਵਤ੍ਥੂਨਿ ਚ ਨਿਸ੍ਸਾਯ, ਛ ਦ੍ਵਾਰਾਰਮ੍ਮਣਾਨਿ ਚ;
ਪਟਿਚ੍ਚ ਮਨਸਿਕਾਰਂ, ਪਵਤ੍ਤਨ੍ਤਿ ਅਰੂਪਿਨੋ.
੯੫੪. ਯਥਾਸਕਸਮੁਟ੍ਠਾਨਂ, ਵਿਭਾਗੇਹਿ ਚ ਰੂਪਿਨੋ;
ਪਵਤ੍ਤਨ੍ਤਿ ਏਕਚ੍ਚੇਤਿ, ਪਰਿਗ੍ਗਣ੍ਹਨ੍ਤਿ ਪਚ੍ਚਯੇ.
੯੫੫. ਅਵਿਜ੍ਜਾਪਚ੍ਚਯਾ ਹੋਨ੍ਤਿ, ਸਙ੍ਖਾਰਾ ਤੁ ਤਤੋ ਤਥਾ;
ਵਿਞ੍ਞਾਣਂ ਨਾਮਰੂਪਞ੍ਚ, ਸਲ਼ਾਯਤਨਨਾਮਕਂ.
੯੫੬. ਫਸ੍ਸੋ ਚ ਵੇਦਨਾ ਤਣ੍ਹਾ, ਉਪਾਦਾਨਂ ਭਵੋ ਤਤੋ;
ਜਾਤਿ ਜਰਾ ਮਰਣਞ੍ਚ, ਪਵਤ੍ਤਤਿ ਯਥਾਰਹਂ.
੯੫੭. ਤਤੋ ਸੋਕੋ ਪਰਿਦੇਵੋ, ਦੁਕ੍ਖਞ੍ਚੇਵ ਤਥਾਪਰਂ;
ਦੋਮਨਸ੍ਸਮੁਪਾਯਾਸੋ, ਸਮ੍ਭੋਤਿ ਚ ਯਥਾਰਹਂ.
੯੫੮. ਏਤਸ੍ਸ ਕੇਵਲਸ੍ਸੇਵਂ, ਦੁਕ੍ਖਕ੍ਖਨ੍ਧਸ੍ਸ ਸਮ੍ਭਵੋ;
ਪਟਿਚ੍ਚਸਮੁਪ੍ਪਾਦੋਵ, ਨਤ੍ਥਞ੍ਞੋ ਕੋਚਿ ਕਾਰਕੋ.
੯੫੯. ਤਤ੍ਥਾਵਿਜ੍ਜਾਦਯੋ ਦ੍ਵੇਪਿ, ਅਦ੍ਧਾਤੀਤੋ ਅਨਾਗਤੋ;
ਜਾਤਾਦਯੋਪਰੇ ਅਟ੍ਠ, ਪਚ੍ਚੁਪ੍ਪਨ੍ਨੋਤਿ ਵਣ੍ਣਿਤੋ.
੯੬੦. ਪੁਞ੍ਞਾਪੁਞ੍ਞਾਨੇਞ੍ਜਵਸਾ, ਸਙ੍ਖਾਰਾ ਤਿਵਿਧਾ ਤਥਾ;
ਭਵੇਕਦੇਸੋ ਕਮ੍ਮਞ੍ਚ, ਕਮ੍ਮਵਟ੍ਟਨ੍ਤਿ ਵੁਚ੍ਚਤਿ.
੯੬੧. ਅਵਿਜ੍ਜਾਤਣ੍ਹੁਪਾਦਾਨਾ, ਕ੍ਲੇਸਵਟ੍ਟਮਥਾਪਰੇ;
ਵਿਪਾਕਵਟ੍ਟਂ ਸਤ੍ਤਾਪਿ, ਉਪਪਤ੍ਤਿਭਵੋਪਿ ਚ.
੯੬੨. ਅਵਿਜ੍ਜਾਸਙ੍ਖਾਰਾਨਂ ਤੁ, ਗਹਣੇ ਗਹਿਤਾਵ ਤੇ;
ਤਣ੍ਹੁਪਾਦਾਨਭਵਾਤਿ, ਅਤੀਤੇ ਪਞ੍ਚ ਹੇਤਵੋ.
੯੬੩. ਤਣ੍ਹੁਪਾਦਾਨਭਵਾਨਂ, ਗਹਣੇ ਗਹਿਤਾਵ ਤੇ;
ਅਵਿਜ੍ਜਾ ਸਙ੍ਖਾਰਾ ਚੇਤਿ, ਪਚ੍ਚੁਪ੍ਪਨ੍ਨੇਪਿ ਪਞ੍ਚਕੇ.
੯੬੪. ਵਿਞ੍ਞਾਣਾਦਿਸਰੂਪੇਨ, ਦਸ੍ਸਿਤਂ ਫਲਪਞ੍ਚਕਂ;
ਤਥਾ ਤਦੇਵ ਜਾਤਾਦਿ-ਨਾਮੇਨਾਨਾਗਤਨ੍ਤਿ ਚ.
੯੬੫. ਅਤੀਤੇ ਹੇਤਵੋ ਪਞ੍ਚ, ਇਦਾਨਿ ਫਲਪਞ੍ਚਕਂ;
ਇਦਾਨਿ ਹੇਤਵੋ ਪਞ੍ਚ, ਆਯਤਿਂ ਫਲਪਞ੍ਚਕਂ.
੯੬੬. ਹੇਤੁਫਲਂ ਫਲਹੇਤੁ, ਪੁਨ ਹੇਤੁਫਲਾਨਿ ਚ;
ਤਿਸਨ੍ਧਿ ਚਤੁਸਙ੍ਖੇਪਂ, ਵੀਸਤਾਕਾਰਮਬ੍ਰਵੁਂ.
੯੬੭. ਅਤ੍ਥਧਮ੍ਮਪਟਿਵੇਧ-ਦੇਸਨਾਨਂ ਯਥਾਰਹਂ;
ਗਮ੍ਭੀਰਤ੍ਤਾ ਚਤੁਨ੍ਨਮ੍ਪਿ, ਚਤੁਗਮ੍ਭੀਰਤਾ ਮਤਾ.
੯੬੮. ਏਕਤ੍ਤਨਾਨਤ੍ਤਨਯਾ, ਅਬ੍ਯਾਪਾਰਨਯੋਪਰੋ;
ਤਥੇਵਂਧਮ੍ਮਤਾ ਚੇਤਿ, ਨਯਾ ਵੁਤ੍ਤਾ ਚਤੁਬ੍ਬਿਧਾ.
੯੬੯. ਜਰਾਮਰਣਸੋਕਾਦਿ-ਪੀਲ਼ਿਤਾਨਮਭਿਣ੍ਹਸੋ;
ਆਸਵਾਨਂ ਸਮੁਪ੍ਪਾਦਾ, ਅਵਿਜ੍ਜਾ ਚ ਪਵਤ੍ਤਤਿ.
੯੭੦. ਅਵਿਜ੍ਜਾਪਚ੍ਚਯਾ ਹੋਨ੍ਤਿ, ਸਙ੍ਖਾਰਾਪਿ ਯਥਾ ਪੁਰੇ;
ਬਦ੍ਧਾਵਿਚ੍ਛੇਦਮਿਚ੍ਚੇਵਂ, ਭਵਚਕ੍ਕਮਨਾਦਿਕਂ.
੯੭੧. ਤਣ੍ਹਾਵਿਜ੍ਜਾਨਾਭਿਕਂ ਤਂ, ਜਰਾਮਰਣਨੇਮਿਕਂ;
ਸੇਸਾਕਾਰਾਦਿਘਟਿਕਂ, ਤਿਭਵਾਰਥਯੋਜਿਤਂ.
੯੭੨. ਤਿਅਦ੍ਧਞ੍ਚ ਤਿਵਟ੍ਟਞ੍ਚ, ਤਿਸਨ੍ਧਿਘਟਿਕਂ ਤਥਾ;
ਚਤੁਸਙ੍ਖੇਪਗਮ੍ਭੀਰਨਯਮਣ੍ਡਿਤਦੇਸਨਂ.
੯੭੩. ਵੀਸਤਾਕਾਰਵਿਭਾਗਂ, ਦ੍ਵਾਦਸਾਕਾਰਸਙ੍ਗਹਂ;
ਧਮ੍ਮਟ੍ਠਿਤੀਤਿ ਦੀਪੇਨ੍ਤਿ, ਇਦਪ੍ਪਚ੍ਚਯਤਂ ਬੁਧਾ.
੯੭੪. ਪਟਿਚ੍ਚਸਮੁਪ੍ਪਾਦੋਯਂ, ਪਚ੍ਚਯਾਕਾਰਨਾਮਤੋ;
ਸਙ੍ਖੇਪਤੋ ਚ ਵਿਤ੍ਥਾਰਾ, ਵਿਵਿਧਾਕਾਰਭੇਦਤੋ.
੯੭੫. ਜਨੇਤਿ ਪਚ੍ਚਯੁਪ੍ਪਨ੍ਨੇ, ਅਵਿਜ੍ਜਾਦਿਪਵਤ੍ਤਿਯਾ;
ਅਵਿਜ੍ਜਾਦਿਨਿਰੋਧੇਨ, ਨਿਰੋਧੇਤਿ ਚ ਸਬ੍ਬਥਾ.
੯੭੬. ਪਚ੍ਚਯਪ੍ਪਚ੍ਚਯੁਪ੍ਪਨ੍ਨ-ਵਸੇਨੇਵ ਪਵਤ੍ਤਤਿ;
ਸਂਸਾਰੋਯਨ੍ਤਿ ਏਕਚ੍ਚੇ, ਪਰਿਗ੍ਗਣ੍ਹਨ੍ਤਿ ਪਚ੍ਚਯੇ.
੯੭੭. ਸਮਨ੍ਤਪਟ੍ਠਾਨਮਹਾਪਕਰਣਵਿਭਾਗਤੋ;
ਏਕਚ੍ਚੇ ਪਰਿਗ੍ਗਣ੍ਹਨ੍ਤਿ, ਚਤੁਵੀਸਤਿ ਪਚ੍ਚਯੇ.
੯੭੮. ਇਤਿ ਨਾਨਪ੍ਪਕਾਰੇਨ, ਪਚ੍ਚਯਾਨਂ ਪਰਿਗ੍ਗਹੋ;
ਸਪ੍ਪਚ੍ਚਯਨਾਮਰੂਪਂ, ਵਵਤ੍ਥਾਨਨ੍ਤਿ ਵੇਦਿਤਂ.
੯੭੯. ਇਦਪ੍ਪਚ੍ਚਯਤਾਞਾਣਂ, ਪਚ੍ਚਯਾਕਾਰਦਸ੍ਸਨਂ;
ਧਮ੍ਮਟ੍ਠਿਤਿ ਯਥਾਭੂਤਞਾਣਦਸ੍ਸਨਨਾਮਕਂ.
੯੮੦. ਕਾਲਤ੍ਤਯਵਿਭਾਗੇਸੁ, ਕਙ੍ਖਾਸਂਕ੍ਲੇਸਸੋਧਨਂ;
ਕਙ੍ਖਾਵਿਤਰਣਾ ਨਾਮ, ਵਿਸੁਦ੍ਧੀਤਿ ਪਵੁਚ੍ਚਤੀਤਿ.
ਇਤਿ ਨਿਬ੍ਬਾਨਵਿਭਾਗੇ ਪਰਿਗ੍ਗਹਵਿਸੁਦ੍ਧਿਕਥਾ ਨਿਟ੍ਠਿਤਾ.
ਚਤੁਵੀਸਤਿਮੋ ਪਰਿਚ੍ਛੇਦੋ.