ਅਟ੍ਠਾਰਸਮੋ ਪਰਿਚ੍ਛੇਦੋ
੩. ਰੂਪਵਿਭਾਗੋ
੧੮. ਸਰੂਪਕਥਾ
੬੫੩. ਤੇਪਞ੍ਞਾਸ ਪਨਿਚ੍ਚੇਵਂ, ਨਾਮਧਮ੍ਮਾ ਪਕਾਸਿਤਾ;
ਅਟ੍ਠਵੀਸਵਿਧਂ ਦਾਨਿ, ਰੂਪਂ ਨਾਮ ਕਥੀਯਤਿ.
੬੫੪. ਪਥਵਾਪੋ ਚ ਤੇਜੋ ਚ, ਵਾਯੋ ਚੇਤਿ ਚਤੁਬ੍ਬਿਧੋ;
ਚਕ੍ਖੁਸੋਤਘਾਨਜਿਵ੍ਹਾ, ਕਾਯੋਤਿ ਪਨ ਪਞ੍ਚ ਚ.
੬੫੫. ਰੂਪਸਦ੍ਦਗਨ੍ਧਰਸਾ, ਚਤ੍ਤਾਰੋ ਚ ਅਥਾਪਰਂ;
ਇਤ੍ਥਿਪੁਮ੍ਭਾਵਯੁਗਲ਼ਂ, ਜੀਵਿਤਂ ਹਦਯਮ੍ਪਿ ਚ.
੬੫੬. ਕਾਯਵਿਞ੍ਞਤ੍ਤਿ ਚੇਵਾਥ, ਵਚੀਵਿਞ੍ਞਤ੍ਤਿ ਚ ਦ੍ਵਯਂ;
ਆਕਾਸਧਾਤੁ ਰੂਪਸ੍ਸ, ਲਹੁਤਾ ਮੁਦੁਤਾ ਤਸ੍ਸ.
੬੫੭. ਕਮ੍ਮਞ੍ਞਤਾ ਉਪਚਯੋ, ਸਨ੍ਤਤਿ ਜਰਤਾ ਪਨ;
ਅਨਿਚ੍ਚਤਾ ਚ ਕਬਲ਼ੀਕਾਰਾਹਾਰੋਤਿ ਸਬ੍ਬਥਾ.
੬੫੮. ਅਟ੍ਠਵੀਸਵਿਧਂ ਹੋਤਿ, ਰੂਪਮੇਤਂ ਸਰੂਪਤੋ;
ਤਸ੍ਸ ਲਕ੍ਖਣਭੇਦੇਨ, ਸਭਾਵਞ੍ਚ ਵਿਭਾਵਯੇ.
੬੫੯. ਸਨ੍ਧਾਰਣਂ ਤੁ ਪਥਵੀਧਾਤੁ ਕਕ੍ਖਲ਼ਲਕ੍ਖਣਾ;
ਆਬਨ੍ਧਨਮਾਪੋਧਾਤੁ, ਆਪਗ੍ਘਰਣਲਕ੍ਖਣਾ.
੬੬੦. ਪਰਿਪਾਚਨਤਾ ਤੇਜੋਧਾਤੁ ਉਣ੍ਹਤ੍ਤਲਕ੍ਖਣਾ;
ਸਮੁਦੀਰਣਤਾ ਵਾਯੋਧਾਤੁ ਵਿਤ੍ਥਮ੍ਭਲਕ੍ਖਣਾ.
੬੬੧. ਸਬ੍ਬਤ੍ਥਾਵਿਨਿਭੁਤ੍ਤਾਪਿ, ਅਸਮ੍ਮਿਸ੍ਸਕਲਕ੍ਖਣਾ;
ਤਂਤਂਭਾਵਸਮੁਸ੍ਸਨ੍ਨਸਮ੍ਭਾਰੇਸੁਪਲਕ੍ਖਿਤਾ.
੬੬੨. ਅਞ੍ਞਮਞ੍ਞੇਨੁਪਤ੍ਥਦ੍ਧਾ, ਸੇਸਰੂਪਸ੍ਸ ਨਿਸ੍ਸਯਾ;
ਚਤੁਧੇਵਂ ਕਲਾਪੇਸੁ, ਮਹਾਭੂਤਾ ਪਵਤ੍ਤਰੇ.
੬੬੩. ਚਕ੍ਖੁ ਸਮ੍ਭਾਰਚਕ੍ਖੁਮ੍ਹਿ, ਸਤ੍ਤਕ੍ਖਿਪਟਲੋਚਿਤੇ;
ਕਣ੍ਹਮਣ੍ਡਲਮਜ੍ਝਮ੍ਹਿ, ਪਸਾਦੋਤਿ ਪਵੁਚ੍ਚਤਿ.
੬੬੪. ਯੇਨ ਚਕ੍ਖੁਪਸਾਦੇਨ, ਰੂਪਾਨਿ ਅਨੁਪਸ੍ਸਤਿ;
ਪਰਿਤ੍ਤਂ ਸੁਖੁਮਞ੍ਚੇਤਂ, ਊਕਾਸਿਰਸਮੂਪਮਂ.
੬੬੫. ਸੋਤਂ ਸੋਤਬਿਲਸ੍ਸਨ੍ਤੋ,
ਤਮ੍ਬਲੋਮਾਚਿਤੇ ਤਥਾ;
ਅਙ੍ਗੁਲਿਵੇਧਨਾਕਾਰੇ,
ਪਸਾਦੋਤਿ ਪਕਾਸਿਤੋ.
੬੬੬. ਅਨ੍ਤੋ ਅਜਪਦਟ੍ਠਾਨੇ, ਘਾਨਂ ਘਾਨਬਿਲੇ ਠਿਤਂ;
ਜਿਵ੍ਹਾ ਜਿਵ੍ਹਾਯ ਮਜ੍ਝਮ੍ਹਿ, ਉਪ੍ਪਲਾਕਾਰਸਨ੍ਨਿਭੇ.
੬੬੭. ਇਚ੍ਚੇਵਂ ਪਨ ਚਤ੍ਤਾਰੋ, ਤਂਤਂਦੇਸਵਵਤ੍ਥਿਤਾ;
ਕਾਯਪ੍ਪਸਾਦੋਪਾਦਿਨ੍ਨੇ, ਸਬ੍ਬਕੇਤਿ ਯਥਾਕ੍ਕਮਂ.
੬੬੮. ਰੂਪਾਦ੍ਯਾਭਿਘਾਤਾਰਹਭੂਤਾਨਂ ਵਾ ਯਥਾਰਹਂ;
ਦਟ੍ਠੁਕਾਮਨਿਦਾਨਾਦਿਕਮ੍ਮਭੂਤਾਨਮੇਵ ਵਾ.
੬੬੯. ਪਸਾਦਲਕ੍ਖਣਾ ਭੂਤਰੂਪਾਨਂ ਭੂਤਨਿਸ੍ਸਿਤਾ;
ਕਪ੍ਪਾਸਪਟਲਸ੍ਨੇਹਸਨ੍ਨਿਭਾਤਿ ਚ ਵਣ੍ਣਿਤਾ.
੬੭੦. ਪਞ੍ਚਾਪਿ ਜੀਵਿਤਾਰਕ੍ਖਾ, ਰੂਪਾਦਿਪਰਿਵਾਰਿਤਾ;
ਧੀਤਰਾਵ ਕੁਮਾਰਾਵ, ਕਲਾਪਨ੍ਤਰਵੁਤ੍ਤਿਨੋ.
੬੭੧. ਰੂਪਂ ਨਿਭਾਸੋ ਭੂਤਾਨਂ, ਸਦ੍ਦੋ ਨਿਗ੍ਘੋਸਨਂ ਤਥਾ;
ਗਨ੍ਧੋ ਚ ਗਨ੍ਧਨਂ ਤਤ੍ਥ, ਰਸੋ ਚ ਰਸਨੀਯਤਾ.
੬੭੨. ਭੂਤਤ੍ਤਯਞ੍ਚ ਫੋਟ੍ਠਬ੍ਬਂ, ਆਪੋਧਾਤੁਵਿਵਜ੍ਜਿਤਂ;
ਸਦ੍ਦੋ ਅਨਿਯਤੋ ਤਤ੍ਥ, ਤਦਞ੍ਞੇ ਸਹਵੁਤ੍ਤਿਨੋ.
੬੭੩. ਚਕ੍ਖਾਦਿਪਟਿਹਨਨਲਕ੍ਖਣਾ ਤੁ ਯਥਾਕ੍ਕਮਂ;
ਪਞ੍ਚੇਵ ਪਞ੍ਚਵਿਞ੍ਞਾਣਵੀਥਿਯਾ ਵਿਸਯਾ ਮਤਾ.
੬੭੪. ਇਤ੍ਥਿਨ੍ਦ੍ਰਿਯਂ ਪਨਿਤ੍ਥਿਤ੍ਤਂ, ਇਤ੍ਥਿਭਾਵੋਤਿ ਦੇਸਿਤੋ;
ਪੁਰਿਸਤ੍ਤਂ ਤਥਾਭਾਵੋ, ਪੁਰਿਸਿਨ੍ਦ੍ਰਿਯ ਨਾਮਕੋ.
੬੭੫. ਤਂ ਦ੍ਵਯਂ ਪਨੁਪਾਦਿਨ੍ਨੇ, ਕਾਯੇ ਸਬ੍ਬਤ੍ਥ ਲਬ੍ਭਤਿ;
ਕਲਾਪਨ੍ਤਰਭਿਨ੍ਨਞ੍ਚ, ਭਿਨ੍ਨਸਨ੍ਤਾਨਵਤ੍ਤਿ ਚ.
੬੭੬. ਰੂਪਾਨਂ ਕਮ੍ਮਜਾਤਾਨਂ, ਅਨੁਪਾਲਨਲਕ੍ਖਣਂ;
ਜੀਵਿਤਿਨ੍ਦ੍ਰਿਯਰੂਪਨ੍ਤਿ, ਆਯੁ ਨਾਮ ਪਵੁਚ੍ਚਤਿ.
੬੭੭. ਮਨੋਧਾਤੁਯਾ ਚ ਤਥਾ, ਮਨੋਵਿਞ੍ਞਾਣਧਾਤੁਯਾ;
ਨਿਸ੍ਸਯਲਕ੍ਖਣਂ ਵਤ੍ਥੁਰੂਪਂ ਹਦਯਨਿਸ੍ਸਿਤਂ.
੬੭੮. ਮਜ੍ਝੇ ਹਦਯਕੋਸਮ੍ਹਿ, ਅਡ੍ਢਪ੍ਪਸਤਲੋਹਿਤੇ;
ਭੂਤਰੂਪਮੁਪਾਦਾਯ, ਚਕ੍ਖਾਦਿ ਵਿਯ ਵਤ੍ਤਤਿ.
੬੭੯. ਆਕਾਸਧਾਤੁ ਰੂਪਾਨਂ, ਪਰਿਚ੍ਛੇਦਕਲਕ੍ਖਣਾ;
ਤਂਤਂਰੂਪਕਲਾਪਾਨਂ, ਪਰਿਯਨ੍ਤੋਤਿ ਵੁਚ੍ਚਤਿ.
੬੮੦. ਚਿਤ੍ਤਂ ਸਹਜਰੂਪਾਨਂ, ਕਾਯਸ੍ਸ ਗਮਨਾਦਿਸੁ;
ਸਨ੍ਥਮ੍ਭਨਸਨ੍ਧਾਰਣਚਲਨਸ੍ਸ ਤੁ ਪਚ੍ਚਯੋ.
੬੮੧. ਵਾਯੋਧਾਤੁਵਿਕਾਰੋਯਂ, ਕਾਯਵਿਞ੍ਞਤ੍ਤਿਨਾਮਕੋ;
ਵਾਯੋਧਾਤਾਧਿਕਾਨਂ ਤੁ, ਭੂਤਾਨਮਿਤਿ ਕੇਚਨਾ.
੬੮੨. ਤਥਾ ਚਿਤ੍ਤਸਮੁਟ੍ਠਿਨੋ, ਵਚੀਘੋਸਪ੍ਪਵਤ੍ਤਿਯਂ;
ਉਪਾਦਿਨ੍ਨਰੂਪਕਾਯਘਟ੍ਟਨਸ੍ਸ ਤੁ ਪਚ੍ਚਯੋ.
੬੮੩. ਪਥਵੀਧਾਤੁਵਿਕਾਰੋਯਂ, ਵਚੀਵਿਞ੍ਞਤ੍ਤਿਨਾਮਕੋ;
ਪਥਵੀਧਾਤਾਧਿਕਾਨਂ ਤੁ, ਭੂਤਾਨਮਿਤਿ ਕੇਚਨਾ.
੬੮੪. ਦ੍ਵੇਪਿ ਕਾਯਵਚੀਕਮ੍ਮਦ੍ਵਾਰਭੂਤਾ ਯਥਾਕ੍ਕਮਂ;
ਤੇ ਪਨ ਘਟ੍ਟਨਾਹੇਤੁ-ਵਿਕਾਰਾਕਾਰਲਕ੍ਖਣਾ.
੬੮੫. ਵਿਞ੍ਞਾਪੇਤੀਤਿ ਕਾਯੇਨ, ਵਾਚਾਯ ਚ ਵਿਚਿਨ੍ਤਿਤਂ;
ਸਯਞ੍ਚ ਵਿਞ੍ਞਾਯਤੀਤਿ, ਵਿਞ੍ਞਤ੍ਤੀਤਿ ਪਕਿਤ੍ਤਿਤਾ.
੬੮੬. ਲਹੁਤਾ ਪਨ ਰੂਪਾਨਂ, ਅਦਨ੍ਧਾਕਾਰਲਕ੍ਖਣਾ;
ਮੁਦੁਤਾਪਿ ਚ ਰੂਪਾਨਂ, ਮਦ੍ਦਵਾਕਾਰਲਕ੍ਖਣਾ.
੬੮੭. ਕਮ੍ਮਞ੍ਞਤਾ ਚ ਰੂਪਾਨਂ, ਯੋਗ੍ਗਤਾਕਾਰਲਕ੍ਖਣਾ;
ਗਾਰਵਥਦ੍ਧਤਾ ਯੋਗ੍ਗਪਟਿਪਕ੍ਖਾ ਯਥਾਕ੍ਕਮਂ.
੬੮੮. ਸਪ੍ਪਾਯਮੁਤੁਮਾਹਾਰਂ, ਲਭਿਤ੍ਵਾ ਚਿਤ੍ਤਸਮ੍ਪਦਂ;
ਲਹੂ ਮੁਦੁ ਚ ਕਮ੍ਮਞ੍ਞਂ, ਯਦਾ ਰੂਪਂ ਪਵਤ੍ਤਤਿ.
੬੮੯. ਤਥਾਪਵਤ੍ਤਰੂਪਸ੍ਸ, ਪਵਤ੍ਤਾਕਾਰਭੇਦਿਤਂ;
ਲਹੁਤਾਦਿਤ੍ਤਯਮ੍ਪੇਤਂ, ਸਹਵੁਤ੍ਤਿ ਤਦਾ ਭਵੇ.
੬੯੦. ਸਪ੍ਪਾਯਂ ਪਟਿਵੇਧਾਯ, ਪਟਿਪਤ੍ਤੁਪਕਾਰਿਤਾ;
ਸਾਕਾਰਾ ਰੂਪਸਮ੍ਪਤ੍ਤਿ, ਪਞ੍ਞਤ੍ਤਾਵ ਮਹੇਸਿਨਾ.
੬੯੧. ਰੂਪਸ੍ਸੋਪਚਯੋ ਨਾਮ, ਰੂਪਸ੍ਸਾਚਯਲਕ੍ਖਣੋ;
ਪਵਤ੍ਤਿਲਕ੍ਖਣਾ ਰੂਪਸਨ੍ਤਤੀਤਿ ਪਕਾਸਿਤਾ.
੬੯੨. ਰੂਪਮਾਚਯਰੂਪੇਨ, ਜਾਯਤਿਚ੍ਚੁਪਰੂਪਰਿ;
ਪੇਕ੍ਖਤੋਪਚਯਾਕਾਰਾ, ਜਾਤਿ ਗਯ੍ਹਤਿ ਯੋਗਿਨੋ.
੬੯੩. ਅਨੁਪ੍ਪਬਨ੍ਧਾਕਾਰੇਨ, ਜਾਯਤੀਤਿ ਸਪੇਕ੍ਖਤੋ;
ਤਦਾਯਂ ਸਨ੍ਤਤਾਕਾਰਾ, ਜਾਤਿ ਗਯ੍ਹਤਿ ਤਸ੍ਸ ਤੁ.
੬੯੪. ਏਵਮਾਭੋਗਭੇਦੇਨ, ਜਾਤਿਰੂਪਂ ਦ੍ਵਿਧਾ ਕਤਂ;
ਅਤ੍ਤੂਪਲਦ੍ਧਿਭਾਵੇਨ, ਜਾਯਨ੍ਤਂ ਵਾਥ ਕੇਵਲਂ.
੬੯੫. ਰੂਪਂ ਵਿਵਿਤ੍ਤੋਕਾਸਸ੍ਸ, ਪੂਰਕਟ੍ਠੇਨ ਚੀਯਤਿ;
ਅਭਾਵਾ ਪੁਨਭਾਵਾਯ, ਪਵਤ੍ਤਂ ਸਨ੍ਤਤੀਤਿ ਚ.
੬੯੬. ਏਵਮਾਕਾਰਭੇਦਾਵ, ਸਬ੍ਬਾਕਾਰਵਰਾਕਰੋ;
ਜਾਤਿਰੂਪਂ ਦ੍ਵਿਧਾਕਾਸਿ, ਜਾਤਿਰੂਪਵਿਰੋਚਨੋ.
੬੯੭. ਜਰਤਾ ਨਵਤਾਹਾਯਾ, ਰੂਪਾਨਂ ਪਾਕਲਕ੍ਖਣਾ;
ਅਨਿਚ੍ਚਤਨ੍ਤਿ ਮਪ੍ਪਤ੍ਤਿ, ਪਰਿਭਿਜ੍ਜਨਲਕ੍ਖਣਾ.
੬੯੮. ਇਤਿ ਲਕ੍ਖਣਰੂਪਂ ਤੁ, ਤਿਵਿਧਂ ਭਿਨ੍ਨਕਾਲਿਕਂ;
ਸਭਾਵਰੂਪਧਮ੍ਮੇਸੁ, ਤਂਤਂਕਾਲੋਪਲਕ੍ਖਿਤਂ.
੬੯੯. ਯੇਨ ਲਕ੍ਖੀਯਤਿ ਰੂਪਂ, ਭਿਨ੍ਨਾਕਾਰਂ ਖਣੇ ਖਣੇ;
ਵਿਪਸ੍ਸਨਾਨਯਤ੍ਥਾਯ, ਤਮਿਚ੍ਚਾਹ ਤਥਾਗਤੋ.
੭੦੦. ਕਬਲ਼ੀਕਾਰੋ ਆਹਾਰੋ,
ਯਾਪੇਤਬ੍ਬੋਜਲਕ੍ਖਣੋ;
ਆਹਾਰੋ ਸੇਨ੍ਦ੍ਰਿਯਜਾਤੋ,
ਰੂਪਕਾਯਾਨੁਪਾਲਕੋ.
੭੦੧. ਇਚ੍ਚੇਵਂ ਸਪਰਿਚ੍ਛੇਦਾ, ਸਵਿਕਾਰਾ ਸਲਕ੍ਖਣਾ;
ਅਕਿਚ੍ਚਪਟਿਵੇਧਾਯ, ਦਯਾਪਨ੍ਨੇਨ ਤਾਦਿਨਾ.
੭੦੨. ਤਤ੍ਥ ਤਤ੍ਥ ਯਥਾਯੋਗਂ, ਦੇਸਿਤਾਤਿ ਪਕਾਸਿਤਾ;
ਰੂਪਧਮ੍ਮਾ ਸਰੂਪੇਨ, ਅਟ੍ਠਵੀਸਤਿ ਸਬ੍ਬਥਾ.
੭੦੩. ਕਤ੍ਵਾਨ ਜਾਤਿਮੇਕਂ ਤੁ, ਤਤ੍ਥੋਪਚਯਸਨ੍ਤਤਿਂ;
ਸਤ੍ਤਵੀਸਤਿ ਰੂਪਾਨਿ, ਭਵਨ੍ਤੀਤਿ ਵਿਨਿਦ੍ਦਿਸੇ.
੭੦੪. ਭੂਤਤ੍ਤਯਂ ਤੁ ਫੋਟ੍ਠਬ੍ਬਂ, ਕਤ੍ਵਾ ਛਬ੍ਬੀਸਧਾਪਿ ਚ;
ਉਭਯਂ ਜਾਤਿਫੋਟ੍ਠਬ੍ਬਂ, ਗਹੇਤ੍ਵਾ ਪਞ੍ਚਵੀਸਤਿ.
੭੦੫. ਰੂਪਧਮ੍ਮਾਨਮਿਚ੍ਚੇਵਂ, ਵਿਭਾਵੇਯ੍ਯ ਵਿਸਾਰਦੋ;
ਸਰੂਪਂ ਨਾਮਸਙ੍ਖੇਪਂ, ਸਭਾਵਞ੍ਚ ਸਲਕ੍ਖਣਨ੍ਤਿ.
ਇਤਿ ਰੂਪਵਿਭਾਗੇ ਸਰੂਪਕਥਾ ਨਿਟ੍ਠਿਤਾ.
ਅਟ੍ਠਾਰਸਮੋ ਪਰਿਚ੍ਛੇਦੋ.