ਏਕੂਨਵੀਸਤਿਮੋ ਪਰਿਚ੍ਛੇਦੋ
੧੯. ਪਭੇਦਕਥਾ
੭੦੬. ਅਟ੍ਠਵੀਸਵਿਧਮ੍ਪੇਤਂ, ਰੂਪਂ ਦਾਨਿ ਯਥਾਰਹਂ;
ਭੂਤਰੂਪਾਦਿਭੇਦੇਹਿ, ਵਿਭਜੇਯ੍ਯ ਵਿਚਕ੍ਖਣੋ.
੭੦੭. ਪਥਵਾਦਿਕਮਿਦਨ੍ਤਿ, ਭੂਤਰੂਪਂ ਚਤੁਬ੍ਬਿਧਂ;
ਉਪਾਦਾਰੂਪਮਞ੍ਞਂ ਤੁ, ਚਤੁਵੀਸਤਿਵਿਧਂ ਭਵੇ.
੭੦੮. ਪਞ੍ਚਵਿਧਮ੍ਪਿ ਚਕ੍ਖਾਦਿਰੂਪਮਜ੍ਝਤ੍ਤਿਕਂ ਮਤਂ;
ਤੇਵੀਸਤਿਵਿਧਂ ਸੇਸਂ, ਬਾਹਿਰਨ੍ਤਿ ਪਵੁਚ੍ਚਤਿ.
੭੦੯. ਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬਾ ਸਤ੍ਤ ਪਞ੍ਚਧਾ;
ਪਞ੍ਚਪ੍ਪਸਾਦਵਿਸਯਾ, ਪਞ੍ਚਾਰਮ੍ਮਣਨਾਮਕਾ.
੭੧੦. ਏਕਵੀਸਤਿਵਿਧਂ ਸੇਸਂ, ਧਮ੍ਮਾਰਮ੍ਮਣਸਙ੍ਗਹਂ;
ਮਨੋਵਿਞ੍ਞਾਣਵਿਞ੍ਞੇਯ੍ਯਂ, ਮਨੋਦ੍ਵਾਰਸ੍ਸ ਗੋਚਰਂ.
੭੧੧. ਪਸਾਦਾ ਵਿਸਯਾ ਚੇਵ, ਪਞ੍ਚਕਾ ਦ੍ਵੇਪਿ ਸਮ੍ਭਵਾ;
ਦ੍ਵਾਦਸਾਪਿ ਸਰੂਪੇਨ, ਦਸਾਯਤਨਧਾਤੁਯੋ.
੭੧੨. ਯਦੇਦਂ ਪਨ ਸਬ੍ਬਮ੍ਪਿ, ਰੂਪਂ ਸਪ੍ਪਟਿਘਂ ਮਤਂ;
ਤਦੇਵੋਲ਼ਾਰਿਕਂ ਨਾਮ, ਸਨ੍ਤਿਕੇਤਿ ਪਵੁਚ੍ਚਤਿ.
੭੧੩. ਸੇਸਮਪ੍ਪਟਿਘਂ ਨਾਮ, ਧਮ੍ਮਾਯਤਨਧਾਤੁ ਚ;
ਸੁਖੁਮਞ੍ਚੇਵ ਰੂਪਞ੍ਚ, ਰੂਪਂ ਸੋਲ਼ਸਧਾ ਠਿਤਂ.
੭੧੪. ਛਬ੍ਬਿਧਾ ਵਤ੍ਥੁਰੂਪਂ ਤੁ, ਪਸਾਦਹਦਯਮ੍ਪਿ ਚ;
ਅਵਤ੍ਥੁਰੂਪਂ ਸੇਸਂ ਤੁ, ਦ੍ਵਾਵੀਸਤਿਵਿਧਂ ਭਵੇ.
੭੧੫. ਪਸਾਦਾ ਚੇਵ ਵਿਞ੍ਞਤ੍ਤਿ, ਦ੍ਵਾਰਰੂਪਂ ਤੁ ਸਤ੍ਤਧਾ;
ਸੇਸਂ ਅਦ੍ਵਾਰਰੂਪਂ ਤੁ, ਏਕਵੀਸਵਿਧਮ੍ਪਿ ਚ.
੭੧੬. ਪਸਾਦਾ ਭਾਵਯੁਗਲ਼ਂ, ਜੀਵਿਤਞ੍ਚੇਤਿ ਅਟ੍ਠਧਾ;
ਇਨ੍ਦ੍ਰਿਯਰੂਪਮਞ੍ਞਂ ਤੁ, ਵੀਸਧਾਨਿਨ੍ਦ੍ਰਿਯਂ ਸਿਯਾ.
੭੧੭. ਵਣ੍ਣੋ ਗਨ੍ਧੋ ਰਸੋ ਓਜਾ, ਭੂਤਰੂਪਨ੍ਤਿ ਅਟ੍ਠਧਾ;
ਅਵਿਨਿਬ੍ਭੋਗਮਿਤਰਂ, ਵਿਨਿਬ੍ਭੋਗਂ ਤੁ ਵੀਸਧਾ.
੭੧੮. ਅਵਿਨਿਬ੍ਭੋਗਰੂਪਾਨਿ, ਸਦ੍ਦਵਤ੍ਥਿਨ੍ਦ੍ਰਿਯਾਨਿ ਚ;
ਨਿਪ੍ਫਨ੍ਨਂ ਅਟ੍ਠਾਰਸਧਾ, ਰੂਪਰੂਪਨ੍ਤਿ ਵੇਦਿਤਂ.
੭੧੯. ਪਰਿਚ੍ਛੇਦੋ ਪਨਾਕਾਸੋ, ਵਿਞ੍ਞਤ੍ਤਿਲਹੁਤਾਦਯੋ;
ਵਿਕਾਰਾ ਲਕ੍ਖਣਾ ਚੇਵ, ਰੂਪਸ੍ਸੁਪਚਯਾਦਯੋ.
੭੨੦. ਦਸਧਾਪਿ ਅਨਿਪ੍ਫਨ੍ਨਂ, ਨਤ੍ਥੇਤਂ ਪਰਮਤ੍ਥਤੋ;
ਰੂਪਸ੍ਸੇਤਨ੍ਤਿ ਕਤ੍ਵਾਨ, ਰੂਪਮਿਚ੍ਚੇਵ ਵੁਚ੍ਚਤਿ.
੭੨੧. ਰੂਪਾਯਤਨਮੇਵੇਕਂ, ਸਨਿਦਸ੍ਸਨਮੀਰਿਤਂ;
ਅਨਿਦਸ੍ਸਨਮਞ੍ਞਂ ਤੁ, ਸਤ੍ਤਵੀਸਤਿਵਿਧਮ੍ਪਿ ਚ.
੭੨੨. ਕਮ੍ਮਜਂ ਪਨੁਪਾਦਿਨ੍ਨਂ, ਅਨੁਪਾਦਿਨ੍ਨਕਾਪਰਂ;
ਤਿਵਿਧਂ ਚਿਤ੍ਤਜਞ੍ਚੇਵ, ਉਤੁਜਾਹਾਰਜਨ੍ਤਿ ਚ.
੭੨੩. ਚਕ੍ਖੁਸਮ੍ਫਸ੍ਸਵਤ੍ਥੂਤਿ, ਚਕ੍ਖੁਧਾਤੁ ਪਕਿਤ੍ਤਿਤਾ;
ਨ ਵਤ੍ਥੁ ਤਸ੍ਸ ਸੇਸਂ ਤੁ, ਸਤ੍ਤਵੀਸਤਿਵਿਧਂ ਭਵੇ.
੭੨੪. ਸੋਤਸਮ੍ਫਸ੍ਸਵਤ੍ਥਾਦਿ-ਵਸਾ ਚ ਦੁਵਿਧਾ ਤਥਾ;
ਤਿਵਿਧਾ ਚ ਵਿਭਾਵੇਯ੍ਯ, ਯਥਾਸਮ੍ਭਵਤੋ ਕਥਂ.
੭੨੫. ਸਨਿਦਸ੍ਸਨਰੂਪਞ੍ਚ, ਵਣ੍ਣੋ ਸਪ੍ਪਟਿਘਮ੍ਪਿ ਚ;
ਅਨਿਦਸ੍ਸਨਮਞ੍ਞਂ ਤੁ, ਥੂਲਂ ਸਪ੍ਪਟਿਘਂ ਭਵੇ.
੭੨੬. ਅਨਿਦਸ੍ਸਨਰੂਪਞ੍ਚ, ਸੇਸਮਪ੍ਪਟਿਘਮ੍ਪਿ ਚ;
ਸੋਲ਼ਸਾਤਿ ਚ ਸਬ੍ਬਮ੍ਪਿ, ਰੂਪਂ ਤਿਵਿਧਮੁਦ੍ਦਿਸੇ.
੭੨੭. ਅਪਤ੍ਤਗਾਹਕਂ ਨਾਮ, ਚਕ੍ਖੁਸੋਤਦ੍ਵਯਂ ਪਨ;
ਸਮ੍ਪਤ੍ਤਗਾਹਕਂ ਨਾਮ, ਘਾਨਾਦਿਤ੍ਤਯਮੀਰਿਤਂ.
੭੨੮. ਅਗਾਹਕਮਤੋ ਸੇਸਂ, ਤੇਵੀਸਤਿਵਿਧਂ ਭਵੇ;
ਕਿਞ੍ਚਿ ਸਾਰਮ੍ਮਣਂ ਨਾਮ, ਨ ਗਯ੍ਹਤੀਤਿ ਸਬ੍ਬਥਾ.
੭੨੯. ਉਪਾਦਾ ਅਜ੍ਝਤ੍ਤਿਕਂ ਰੂਪਂ, ਉਪਾਦਾ ਬਾਹਿਰਂ ਤਥਾ;
ਨੋਪਾਦਾ ਬਾਹਿਰਞ੍ਚੇਤਿ, ਏਵਮ੍ਪਿ ਤਿਵਿਧਂ ਭਵੇ.
੭੩੦. ਅਜ੍ਝਤ੍ਤਿਕਮੁਪਾਦਿਨ੍ਨਂ, ਬਾਹਿਰਞ੍ਚ ਤਥਾਪਰਂ;
ਅਨੁਪਾਦਿਨ੍ਨਕਞ੍ਚੇਤਿ, ਏਵਮਾਦਿਵਸਾਪਿ ਚ.
੭੩੧. ਦਿਟ੍ਠਂ ਰੂਪਂ ਸੁਤਂ ਸਦ੍ਦੋ, ਗਨ੍ਧਾਦਿ ਤਿਵਿਧਂ ਮੁਤਂ;
ਵਿਞ੍ਞਾਤਮਞ੍ਞਵਿਞ੍ਞੇਯ੍ਯਂ, ਮਨਸਾਤਿ ਚਤੁਬ੍ਬਿਧਂ.
੭੩੨. ਰੂਪਰੂਪਂ ਪਰਿਚ੍ਛੇਦੋ, ਵਿਕਾਰੋ ਲਕ੍ਖਣਂ ਕਮਾ;
ਅਟ੍ਠਾਰਸੇਕਕਂ ਪਞ੍ਚ, ਚਤੁਕ੍ਕਨ੍ਤਿ ਚ ਤਂ ਤਥਾ.
੭੩੩. ਦ੍ਵਾਰਞ੍ਚ ਹੋਤਿ ਵਤ੍ਥੁ ਚ, ਨ ਵਤ੍ਥੁ ਦ੍ਵਾਰਮੇਵ ਤੁ;
ਨ ਦ੍ਵਾਰਂ ਵਤ੍ਥੁਮੇਵਾਥ, ਨੋਭਯਨ੍ਤਿ ਚ ਨਿਦ੍ਦਿਸੇ.
੭੩੪. ਉਪਾਦਾ ਅਨੁਪਾਦਿਨ੍ਨਂ, ਅਨੁਪਾਦਿਨ੍ਨਕਂ ਤਥਾ;
ਨੋਪਾਦਾ ਦੁਵਿਧਞ੍ਚੇਤਿ, ਚਤੁਦ੍ਧੇਵਮ੍ਪਿ ਦੇਸਿਤਂ.
੭੩੫. ਸਪ੍ਪਟਿਗ੍ਘਮੁਪਾਦਾ ਚ, ਰੂਪਮਪ੍ਪਟਿਘਂ ਤਥਾ;
ਨੋਪਾਦਾ ਦੁਵਿਧਞ੍ਚੇਤਿ, ਚਤੁਦ੍ਧਾ ਏਵਮਾਦਿਤੋ.
੭੩੬. ਏਕਾਦਸੇਕਜਰੂਪਂ, ਹਦਯਿਨ੍ਦ੍ਰਿਯਨਵਕਂ;
ਕਮ੍ਮਜਂ ਚਿਤ੍ਤਜਞ੍ਚੇਵ, ਤਥਾ ਵਿਞ੍ਞਤ੍ਤਿਕਂ ਦ੍ਵਯਂ.
੭੩੭. ਸਦ੍ਦੋ ਚਿਤ੍ਤੋਤੁਜੋ ਤਸ੍ਮਾ, ਰੂਪਮੇਕਂ ਦ੍ਵਿਜਂ ਮਤਂ;
ਚਿਤ੍ਤੋਤਾਹਾਰਸਮ੍ਭੂਤਂ, ਲਹੁਤਾਦਿਤ੍ਤਯਂ ਤਿਜਂ.
੭੩੮. ਨਵਾਕਾਸਾਵਿਨਿਬ੍ਭੋਗਾ, ਕਮ੍ਮਾਦਿਚਤੁਸਮ੍ਭਵਾ;
ਅਥ ਲਕ੍ਖਣਰੂਪਨ੍ਤਿ, ਰੂਪਮੇਵਂ ਤੁ ਪਞ੍ਚਧਾ.
੭੩੯. ਨਵਾਕਾਸਾਵਿਨਿਬ੍ਭੋਗਾ, ਨਵ ਵਤ੍ਥਿਨ੍ਦ੍ਰਿਯਾਨਿ ਚ;
ਅਟ੍ਠਾਰਸਵਿਧਂ ਰੂਪਂ, ਕਮ੍ਮਜਂ ਹੋਤਿ ਪਿਣ੍ਡਿਤਂ.
੭੪੦. ਸਦ੍ਦਾਕਾਸਾਵਿਨਿਬ੍ਭੋਗਾ, ਵਿਞ੍ਞਤ੍ਤਿਲਹੁਤਾਦਯੋ;
ਪਞ੍ਚਦਸਵਿਧਂ ਰੂਪਂ, ਚਿਤ੍ਤਸਮ੍ਭਵਮੁਦ੍ਦਿਸੇ.
੭੪੧. ਸਦ੍ਦਾਕਾਸਾਵਿਨਿਬ੍ਭੋਗਾ, ਲਹੁਤਾਦਿਤ੍ਤਯਨ੍ਤਿ ਚ;
ਉਤੁਸਮ੍ਭਵਮੀਰੇਨ੍ਤਿ, ਰੂਪਂ ਤੇਰਸਧਾ ਠਿਤਂ.
੭੪੨. ਪਰਿਚ੍ਛੇਦਾਵਿਨਿਬ੍ਭੋਗਾ, ਲਹੁਤਾਦਿਤ੍ਤਯਮ੍ਪਿ ਚ;
ਏਵਮਾਹਾਰਜਂ ਨਾਮ, ਰੂਪਂ ਦ੍ਵਾਦਸਧਾ ਠਿਤਂ.
੭੪੩. ਜਾਤਿ ਜਰਾ ਚ ਮਰਣਂ, ਨ ਕੁਤੋਚਿਪਿ ਜਾਯਤਿ;
ਏਵਮ੍ਪਿ ਪਞ੍ਚਧਾ ਹੋਤਿ, ਰੂਪਜਾਤਿਵਿਭਾਗਤੋ.
੭੪੪. ਪਞ੍ਚਵੀਸਤਿਵਿਧਂ ਕਮ੍ਮਂ, ਕਾਮਰੂਪਵਵਤ੍ਥਿਤਂ;
ਜਨੇਤਿ ਕਮ੍ਮਜਂ ਰੂਪਂ, ਕਾਮਰੂਪਭਵਦ੍ਵਯੇ.
੭੪੫. ਪਞ੍ਚਵਿਞ੍ਞਾਣਮਾਰੁਪ੍ਪ-ਵਿਪਾਕਾ ਸਬ੍ਬਸਨ੍ਧਿਯੋ;
ਚੁਤਿ ਖੀਣਾਸਵਸ੍ਸੇਤਿ, ਸੋਲ਼ਸੇਤੇ ਵਿਵਜ੍ਜਯੇ.
੭੪੬. ਪਞ੍ਚਸਤ੍ਤਤਿ ਸੇਸਾਨਿ, ਚਿਤ੍ਤਾਨਿਮਾਨਿ ਸਮ੍ਭਵਾ;
ਜਨੇਨ੍ਤਿ ਚਿਤ੍ਤਜਂ ਰੂਪਂ, ਪਞ੍ਚਵੋਕਾਰਭੂਮਿਯਂ.
੭੪੭. ਜਨੇਭਿ ਉਤੁਜਂ ਰੂਪਂ, ਤੇਜੋਧਾਤੁ ਭਵਦ੍ਵਯੇ;
ਕਾਮਭੂਮਿਯਮੋਜਾ ਤੁ, ਜਨੇਤਾਹਾਰਜਂ ਤਥਾ.
੭੪੮. ਕਮ੍ਮਂ ਜਨੇਤਿ ਰੂਪਾਨਿ, ਅਤ੍ਤਜਾਨਿ ਖਣੇ ਖਣੇ;
ਚਿਤ੍ਤਮੁਪ੍ਪਾਦਕਾਲਮ੍ਹਿ, ਉਪ੍ਪਾਦਾਨਨ੍ਤਰਂ ਪਰਂ.
੭੪੯. ਉਤੁਸਮ੍ਭਵਮੀਰੇਨ੍ਤਿ, ਰੂਪਂ ਤੇਰਸਧਾ ਠਿਤਂ;
ਪਰਿਚ੍ਛੇਦਾਵਿਨਿਬ੍ਭੋਗਾ, ਲਹੁਤਾਦਿਤ੍ਤਯਮ੍ਪਿ ਚ.
੭੫੦. ਸਨ੍ਧਿਯਮ੍ਪਿ ਕਮ੍ਮਜਂ ਤੁ, ਪਵਤ੍ਤੇਪਿ ਚ ਸਮ੍ਭਵਾ;
ਜਨੇਤਿ ਰੂਪਂ ਸੇਸਾਨਿ, ਪਵਤ੍ਤੇ, ਨ ਤੁ ਸਨ੍ਧਿਯਂ.
੭੫੧. ਇਨ੍ਦ੍ਰਿਯਬਦ੍ਧਸਨ੍ਤਾਨੇ, ਕਮ੍ਮਾਦਿ ਤਿਵਿਧਮ੍ਪਿ ਚ;
ਜਨੇਤਿ ਰੂਪਂ ਮਤਕੇ, ਬਾਹਿਰੇ ਤੁ ਯਥਾਰਹਂ.
੭੫੨. ਇਤਿ ਕਮ੍ਮਾਦਯੋ ਰੂਪਂ, ਜਨੇਨ੍ਤਿ ਚ ਯਥਾਸਕਂ;
ਸੇਸਾਨਮ੍ਪਿ ਚ ਰੂਪਾਨਂ, ਪਚ੍ਚਯਾ ਹੋਨ੍ਤਿ ਸਮ੍ਭਵਾ.
੭੫੩. ਇਤਿ ਰੂਪਵਿਭਾਗਞ੍ਚ, ਜਾਤਿਭੇਦਞ੍ਚ ਸਮ੍ਭਵਾ;
ਜਨਕਾਦਿਪ੍ਪਭੇਦਞ੍ਚ, ਰੂਪਾਨਂ ਤਤ੍ਥ ਦੀਪਯੇਤਿ.
ਇਤਿ ਰੂਪਵਿਭਾਗੇ ਪਭੇਦਕਥਾ ਨਿਟ੍ਠਿਤਾ.
ਏਕੂਨਵੀਸਤਿਮੋ ਪਰਿਚ੍ਛੇਦੋ.