ਸਤ੍ਤਰਸਮੋ ਪਰਿਚ੍ਛੇਦੋ
੧੭. ਦਿਟ੍ਠਿਸਙ੍ਗਹਕਥਾ
੫੯੩. ਯੇਵਾਪਨਕਨਾਮੇਨ, ਧਮ੍ਮਾ ਛਨ੍ਦਾਦਯੋ ਤਥਾ;
ਖਨ੍ਧਾਦਯੋ ਚ ਕੋਟ੍ਠਾਸਾ, ਉਦ੍ਦਿਟ੍ਠਾ ਹਿ ਯਥਾਰਹਂ.
੫੯੪. ਤਤ੍ਥ ਛਨ੍ਦਾਦਯੋ ਧਮ੍ਮਾ, ਵਿਭਤ੍ਤਾਵ ਯਥਾਰਹਂ;
ਖਨ੍ਧਾਦਿਰਾਸਯੋ ਵਾਪਿ, ਵਿਞ੍ਞੇਯ੍ਯਾ ਦਾਨਿ ਸਮ੍ਭਵਾ.
੫੯੫. ਵੇਦਨਾ ਵੇਦਨਾਕ੍ਖਨ੍ਧੋ, ਚਕ੍ਖੁਸਮ੍ਫਸ੍ਸਜਾਦਿਕਾ;
ਸਞ੍ਞਾ ਚ ਸਞ੍ਞਾਕ੍ਖਨ੍ਧੋਤਿ, ਛਬ੍ਬਿਧਾਪਿ ਪਕਾਸਿਤਾ.
੫੯੬. ਸਙ੍ਖਾਰਕ੍ਖਨ੍ਧਨਾਮੇਨ, ਸੇਸਾ ਚੇਤਸਿਕਾ ਮਤਾ;
ਵੁਤ੍ਤਾ ਵਿਞ੍ਞਾਣਕਾਯਾ ਛ, ਵਿਞ੍ਞਾਣਕ੍ਖਨ੍ਧਨਾਮਤੋ.
੫੯੭. ਰੂਪਕ੍ਖਨ੍ਧੋ ਪੁਨੇਕੋਵ, ਸਮ੍ਪਯੁਤ੍ਤਾਵਿਯੋਗਿਨੋ;
ਅਰੂਪਿਨੋ ਚ ਚਤ੍ਤਾਰੋ, ਪਞ੍ਚਕ੍ਖਨ੍ਧਾ ਪਵੁਚ੍ਚਰੇ.
੫੯੮. ਮਨਾਯਤਨਨਾਮਂ ਤੁ, ਚਿਤ੍ਤਮੇਵ ਤਥਾਪਰਾ;
ਚਕ੍ਖੁਵਿਞ੍ਞਾਣਧਾਤਾਦਿਸਤ੍ਤਵਿਞ੍ਞਾਣਧਾਤੁਯੋ.
੫੯੯. ਸਬ੍ਬੇ ਚੇਤਸਿਕਾ ਧਮ੍ਮਾ, ਧਮ੍ਮਾਯਤਨਸਙ੍ਗਹਾ;
ਧਮ੍ਮਧਾਤੂਤਿ ਚ ਵੁਤ੍ਤਾ, ਦ੍ਵਿਪਞ੍ਞਾਸਾਪਿ ਸਬ੍ਬਥਾ.
੬੦੦. ਸੁਖੁਮਾਨਿ ਚ ਰੂਪਾਨਿ, ਨਿਬ੍ਬਾਨਞ੍ਚੇਤ੍ਥ ਗਯ੍ਹਰੇ;
ਓਲ਼ਾਰਿਕਾਨਿ ਰੂਪਾਨਿ, ਦਸਾਯਤਨਧਾਤੁਯੋ.
੬੦੧. ਚਕ੍ਖੁਸੋਤਘਾਨਜਿਵ੍ਹਾ-ਕਾਯਾਯਤਨਨਾਮਕਾ;
ਰੂਪਸਦ੍ਦਗਨ੍ਧਰਸ-ਫੋਟ੍ਠਬ੍ਬਾਯਤਨਾਨਿ ਚ.
੬੦੨. ਦ੍ਵਾਦਸਾਯਤਨਾ ਸਬ੍ਬੇ, ਹੋਨ੍ਤਟ੍ਠਾਰਸਧਾਤੁਯੋ;
ਖਨ੍ਧਾ ਠਪੇਤ੍ਵਾ ਨਿਬ੍ਬਾਨਂ, ਨਤ੍ਥਿ ਪਣ੍ਣਤ੍ਤਿ ਤੀਸੁਪਿ.
੬੦੩. ਆਹਾਰਾਦਿ ਚ ਕੋਟ੍ਠਾਸਾ, ਪੁਬ੍ਬੇ ਵੁਤ੍ਤਨਯਾਵ ਤੇ;
ਇਤਿ ਮਿਸ੍ਸਕਸਙ੍ਖੇਪੋ, ਵਿਞ੍ਞਾਤਬ੍ਬੋ ਵਿਭਾਵਿਨਾ.
੬੦੪. ਦ੍ਵਾਦਸਾਕੁਸਲੇਸ੍ਵੇਵ, ਚੁਦ੍ਦਸਾਪਿ ਵਵਤ੍ਥਿਤਾ;
ਯੇ ਸਾਵਜ੍ਜਾਵ ਤੇਸਮ੍ਪਿ, ਸਙ੍ਗਹੋ ਦਾਨਿ ਨਿਯ੍ਯਤੇ.
੬੦੫. ਕਾਮਾਸਵੋ ਭਵਾਸਵੋ, ਦਿਟ੍ਠਾਵਿਜ੍ਜਾਸਵਾਤਿ ਚ;
ਚਤ੍ਤਾਰੋ ਆਸਵਾ ਵੁਤ੍ਤਾ, ਤਯੋ ਧਮ੍ਮਾ ਸਰੂਪਤੋ.
੬੦੬. ਆਸਵਾ ਆਸਵਟ੍ਠੇਨ,
ਓਘਾ ਵੁਯ੍ਹਨਤੋ ਤਥਾ;
ਯੋਜੇਨ੍ਤੀਤਿ ਚ ਯੋਗਾਤਿ,
ਤੇ ਚਤ੍ਤਾਰੋ ਚ ਦੇਸਿਤਾ.
੬੦੭. ਕਾਮਬ੍ਭਵੋ ਚ ਪਟਿਘੋ, ਮਾਨੋ ਦਿਟ੍ਠਿ ਚ ਸਂਸਯੋ;
ਸੀਲਬ੍ਬਤਪਰਾਮਾਸੋ, ਭਵਰਾਗੋ ਤਥਾਪਰੋ.
੬੦੮. ਇਸ੍ਸਾ ਮਚ੍ਛਰਿਯਾਵਿਜ੍ਜਾ, ਇਤਿ ਸਂਯੋਜਨਾ ਦਸ;
ਅਟ੍ਠ ਧਮ੍ਮਾ ਸਰੂਪੇਨ, ਅਭਿਧਮ੍ਮੇ ਪਕਾਸਿਤਾ.
੬੦੯. ਇਸ੍ਸਾਮਚ੍ਛਰਿਯਂ ਹਿਤ੍ਵਾ, ਕਤ੍ਵਾ ਮਾਨੁਦ੍ਧਵਂ ਤਹਿਂ;
ਭਿਨ੍ਦਿਤ੍ਵਾ ਭਵਰਾਗਞ੍ਚ, ਰੂਪਾਰੂਪਵਸਾ ਦ੍ਵਿਧਾ.
੬੧੦. ਪਞ੍ਚੋਰਮ੍ਭਾਗਿਯਾ ਚੇਵ, ਪਞ੍ਚੁਦ੍ਧਮ੍ਭਾਗਿਯਾਤਿ ਚ;
ਦਸ ਸਂਯੋਜਨਾ ਵੁਤ੍ਤਾ, ਸੁਤ੍ਤੇ ਸਤ੍ਤ ਸਰੂਪਤੋ.
੬੧੧. ਗਨ੍ਥਾ ਧਮ੍ਮਾ ਚ ਚਤ੍ਤਾਰੋ, ਤਯੋ ਧਮ੍ਮਾ ਸਰੂਪਤੋ;
ਅਭਿਜ੍ਝਾਕਾਯਗਨ੍ਥੋ ਚ, ਬ੍ਯਾਪਾਦੋ ਚ ਪਵੁਚ੍ਚਤਿ.
੬੧੨. ਸੀਲਬ੍ਬਤਪਰਾਮਾਸੋ, ਕਾਯਗਨ੍ਥੋ ਤਥਾਪਰੋ;
ਇਦਂਸਚ੍ਚਾਭਿਨਿਵੇਸੋ, ਇਤਿ ਦਿਟ੍ਠਿ ਵਿਭੇਦਿਤੋ.
੬੧੩. ਕਾਮਚ੍ਛਨ੍ਦੋ ਚ ਬ੍ਯਾਪਾਦੋ, ਥਿਨਮਿਦ੍ਧਮਥਾਪਰਂ;
ਤਥਾ ਉਦ੍ਧਚ੍ਚਕੁਕ੍ਕੁਚ੍ਚਂ, ਕਙ੍ਖਾਵਿਜ੍ਜਾਤਿ ਅਟ੍ਠਿਮੇ.
੬੧੪. ਧਮ੍ਮਾ ਨਿਵਰਣਾ ਨਾਮ, ਛਧਾ ਚ ਪਨ ਦੇਸਿਤਾ;
ਮਿਚ੍ਛਾਦਿਟ੍ਠਿ ਪਨੇਕਾਵ, ਪਰਾਮਾਸੋਤਿ ਵੁਚ੍ਚਤਿ.
੬੧੫. ਉਪਾਦਾਨਾਨਿ ਚਤ੍ਤਾਰਿ, ਕਾਮੁਪਾਦਾਦਿਨਾਮਕਾ;
ਦਿਟ੍ਠਿਸੀਲਬ੍ਬਤਂ ਅਤ੍ਤ-ਵਾਦੁਪਾਦਾਨਮੇਵ ਚ.
੬੧੬. ਲੋਭਦਿਟ੍ਠਿਵਸਾ ਦ੍ਵੇਵ, ਤਿਵਿਧਾ ਦਿਟ੍ਠਿ ਦੇਸਿਤਾ;
ਦਿਟ੍ਠਿ ਸੀਲਬ੍ਬਤਮਤ੍ਤ-ਵਾਦੋ ਚੇਤਿ ਮਹੇਸਿਨਾ.
੬੧੭. ਲੋਭੋ ਦੋਸੋ ਚ ਮੋਹੋ ਚ,
ਮਾਨੋ ਦਿਟ੍ਠਿ ਚ ਸਂਸਯੋ;
ਥਿਨਮੁਦ੍ਧਚ੍ਚਮੇਵਾਥ,
ਲੋਕਨਾਸਯੁਗਂ ਤਥਾ.
੬੧੮. ਇਤ੍ਥਂ ਕਿਲੇਸਵਤ੍ਥੂਨਿ, ਕਿਲੇਸਾਤਿ ਪਕਾਸਿਤਾ;
ਦਸੇਤੇ ਤੁ ਸਮਾਨਾਵ, ਪਰਤੋ ਚ ਸਰੂਪਤੋ.
੬੧੯. ਕਾਮਰਾਗੋ ਚ ਪਟਿਘੋ, ਮਾਨੋ ਦਿਟ੍ਠਿ ਚ ਸਂਸਯੋ;
ਭਵਰਾਗੋ ਅਵਿਜ੍ਜਾਤਿ, ਛ ਸਤ੍ਤਾਨੁਸਯਾ ਮਤਾ.
੬੨੦. ਗਾਹਾ ਚ ਪਲਿਬੋਧਾ ਚ, ਪਪਞ੍ਚਾ ਚੇਵ ਮਞ੍ਞਨਾ.
ਤਣ੍ਹਾ ਮਾਨੋ ਚ ਦਿਟ੍ਠਿ ਚ, ਦਿਟ੍ਠਿ ਤਣ੍ਹਾ ਚ ਨਿਸ੍ਸਯਾ.
੬੨੧. ਪਰਾਮਾਸੇਕਕੋ ਦ੍ਵੇਵ, ਨਿਸ੍ਸਯਾ ਮਞ੍ਞਨਾ ਤਯੋ;
ਆਸਵੋਘਯੋਗਗਨ੍ਥਾ, ਉਪਾਦਾਨਾ ਚ ਦੁਬ੍ਬਿਧਾ.
੬੨੨. ਅਟ੍ਠ ਨੀਵਰਣਾ ਵੁਤ੍ਤਾ, ਸਤ੍ਤਧਾਨੁਸਯਾ ਕਥਾ;
ਸਂਯੋਜਨਾ ਕਿਲੇਸਾ ਚ, ਦਸੇਵ ਪਰਤੋ ਠਿਤਾ.
੬੨੩. ਏਕਦ੍ਵਿਤਿਛਸਤ੍ਤਟ੍ਠਦਸਕਾ ਤੁ ਯਥਾਰਹਂ;
ਧਮ੍ਮਾ ਸਰੂਪਤੋ ਹੋਨ੍ਤਿ, ਯਥਾਵੁਤ੍ਤੇਸੁ ਰਾਸਿਸੁ.
੬੨੪. ਕਾਮਰਾਗਭਵਰਾਗਾ, ਕਾਮਾਸਵਭਵਾਸਵਾ;
ਰੂਪਰਾਗਾਰੂਪਰਾਗ, ਇਤਿ ਲੋਭੋ ਵਿਭੇਦਿਤੋ.
੬੨੫. ਇਦਂਸਚ੍ਚਾਭਿਨਿਵੇਸੋ, ਦਿਟ੍ਠਿ ਸੀਲਬ੍ਬਤਂ ਤਥਾ;
ਅਤ੍ਤਵਾਦੋ ਪਰਾਮਾਸੋ, ਇਤਿ ਦਿਟ੍ਠਿ ਪਵੁਚ੍ਚਤਿ.
੬੨੬. ਦਿਟ੍ਠਿ ਪਞ੍ਚਦਸਵਿਧਾ, ਲੋਭਟ੍ਠਾਰਸਧਾ ਤਹਿਂ;
ਸੇਸਾ ਸਪਰਰਾਸੀਹਿ, ਸਮਾਨਾ ਦ੍ਵਾਦਸਟ੍ਠਿਤਾ.
੬੨੭. ਏਕਾਦਸਸਮੁਟ੍ਠਾਨੇ, ਦਿਟ੍ਠਿਲੋਭਾ ਵਵਤ੍ਥਿਤਾ;
ਅਵਿਜ੍ਜਾ ਸਤ੍ਤਸੁ ਵੁਤ੍ਤਾ, ਪਟਿਘੋ ਪਨ ਪਞ੍ਚਸੁ.
੬੨੮. ਮਾਨੋ ਚ ਵਿਚਿਕਿਚ੍ਛਾ ਚ, ਚਤੁਟ੍ਠਾਨੇਸੁ ਉਦ੍ਧਟੋ;
ਤੀਸੁ ਦ੍ਵੀਸੁ ਚ ਥੀਨਨ੍ਤਿ, ਅਟ੍ਠੇਤੇ ਸਵਿਭਤ੍ਤਿਕਾ.
੬੨੯. ਇਸ੍ਸਾਮਚ੍ਛੇਰਕੁਕ੍ਕੁਚ੍ਚਮਿਦ੍ਧਲੋਕਵਿਨਾਸਕਾ;
ਛਾਵਿਭਤ੍ਤਿਕਧਮ੍ਮਾਤਿ, ਅਸਮ੍ਭਿਨ੍ਨਾ ਚਤੁਦ੍ਦਸ.
੬੩੦. ਰੂਪਰਾਗਾਰੂਪਰਾਗ-ਕਾਮਾਸਵਭਵਾਸਵਾ;
ਹੋਨ੍ਤਿ ਦਿਟ੍ਠਿਵਿਯੁਤ੍ਤੇਸੁ, ਪੁਬ੍ਬੇ ਵੁਤ੍ਤਨਯਾ ਪਨ.
੬੩੧. ਇਤਿ ਸਾਵਜ੍ਜਸਙ੍ਖੇਪਂ, ਞਤ੍ਵਾ ਪੁਨ ਵਿਚਕ੍ਖਣੋ;
ਬੋਧਿਪਕ੍ਖਿਯਧਮ੍ਮਾਨਂ, ਸਙ੍ਗਹਮ੍ਪਿ ਵਿਭਾਵਯੇ.
੬੩੨. ਯੇਸੁ ਸਞ੍ਞਾਚਿਤ੍ਤਦਿਟ੍ਠਿ-ਵਿਪਲ੍ਲਾਸਾ ਯਥਾਕ੍ਕਮਂ;
ਸੁਭਂ ਸੁਖਂ ਨਿਚ੍ਚਮਤ੍ਤਾ, ਇਤਿ ਦ੍ਵਾਦਸਧਾ ਠਿਤਾ.
੬੩੩. ਤਤ੍ਥ ਕਾਯੇ ਵੇਦਨਾਸੁ, ਚਿਤ੍ਤੇ ਧਮ੍ਮੇਸੁ ਚਕ੍ਕਮਾ;
ਅਸੁਭਂ ਦੁਕ੍ਖਮਨਿਚ੍ਚਮਨਤ੍ਤਾਤਿ ਉਪਟ੍ਠਿਤਾ.
੬੩੪. ਯਥਾਵੁਤ੍ਤਵਿਪਲ੍ਲਾਸਪਹਾਨਾਯ ਯਥਾਰਹਂ;
ਭਿਨ੍ਨਾ ਵਿਸਯਕਿਚ੍ਚਾਨਂ, ਵਸੇਨ ਪਨ ਸਮ੍ਭਵਾ.
੬੩੫. ਚਤ੍ਤਾਰੋ ਸਤਿਪਟ੍ਠਾਨਾ, ਕਾਯਾਨੁਪਸ੍ਸਨਾਦਯੋ;
ਇਤਿ ਵੁਤ੍ਤਾ ਪਨੇਕਾਵ, ਸਮ੍ਮਾਸਤਿ ਮਹੇਸਿਨਾ.
੬੩੬. ਉਪ੍ਪਨ੍ਨਾਨੁਪ੍ਪਨ੍ਨਪਾਪਪਹਾਨਾਨੁਪ੍ਪਨ੍ਨਾਯ ਚ;
ਅਨੁਪ੍ਪਨ੍ਨੁਪ੍ਪਨ੍ਨੇਹਿ ਵਾ, ਨਿਬ੍ਬਤ੍ਤਿ ਅਭਿਵੁਦ੍ਧਿਯਾ.
੬੩੭. ਪਦਹਨ੍ਤਸ੍ਸ ਵਾਯਾਮੋ, ਕਿਚ੍ਚਾਭੋਗਵਿਭਾਗਤੋ;
ਸਮ੍ਮਪ੍ਪਧਾਨਾ ਚਤ੍ਤਾਰੋ, ਇਤਿ ਵੁਤ੍ਤਾ ਮਹੇਸਿਨਾ.
੬੩੮. ਛਨ੍ਦੋ ਚ ਵੀਰਿਯਂ ਚਿਤ੍ਤਂ, ਵੀਮਂਸਾਤਿ ਚ ਤਾਦਿਨਾ;
ਚਤ੍ਤਾਰੋ ਇਦ੍ਧਿਪਾਦਾਤਿ, ਵਿਭਤ੍ਤਾ ਚਤੁਰਾਧਿਪਾ.
੬੩੯. ਸਦ੍ਧਿਨ੍ਦ੍ਰਿਯਞ੍ਚ ਵੀਰਿਯਂ, ਸਤਿ ਚੇਵ ਸਮਾਧਿ ਚ;
ਪਞ੍ਞਿਨ੍ਦ੍ਰਿਯਞ੍ਚ ਪਞ੍ਚੇਵ, ਬੋਧਿਪਕ੍ਖਿਯਸਙ੍ਗਹੇ.
੬੪੦. ਇਨ੍ਦ੍ਰਿਯਾਨਿਨ੍ਦ੍ਰਿਯਟ੍ਠੇਨ, ਬਲਟ੍ਠੇਨ ਬਲਾਨਿ ਚ;
ਇਤਿ ਭਿਨ੍ਨਾ ਵਿਭਤ੍ਤਾ ਚ, ਦੁਵਿਧਾਪਿ ਮਹੇਸਿਨਾ.
੬੪੧. ਸਤੀ ਚ ਧਮ੍ਮਵਿਚਯੋ, ਤਥਾ ਵੀਰਿਯਪੀਤਿਯੋ;
ਪਸ੍ਸਦ੍ਧਿ ਚ ਸਮਾਧਿ ਚ, ਉਪੇਕ੍ਖਾਤਿ ਚ ਤਾਦਿਨਾ.
੬੪੨. ਦੇਸਿਤਾ ਸਤ੍ਤ ਬੋਜ੍ਝਙ੍ਗਾ, ਬੁਜ੍ਝਨ੍ਤਸ੍ਸ ਸਭਾਵਤੋ;
ਕਾਯਚਿਤ੍ਤਵਸਾ ਭਿਨ੍ਨਂ, ਕਤ੍ਵਾ ਪਸ੍ਸਦ੍ਧਿਮੇਕਕਂ.
੬੪੩. ਸਮ੍ਮਾਦਿਟ੍ਠਿ ਚ ਸਙ੍ਕਪ੍ਪੋ, ਵਾਯਾਮੋ ਵਿਰਤਿਤ੍ਤਯਂ;
ਸਮ੍ਮਾਸਤਿ ਸਮਾਧੀ ਚ, ਮਗ੍ਗੋ ਅਟ੍ਠਙ੍ਗਿਕੋ ਮਤੋ.
੬੪੪. ਇਤਿ ਸਤ੍ਤੇਵ ਸਙ੍ਖੇਪਾ, ਸਤ੍ਤਤਿਂਸ ਪਭੇਦਤੋ;
ਏਕਂ ਕਤ੍ਵਾਨ ਪਸ੍ਸਦ੍ਧਿਂ, ਅਸਮ੍ਭਿਨ੍ਨਾ ਚਤੁਦ੍ਦਸ.
੬੪੫. ਨਵਧਾ ਵੀਰਿਯਂ ਵੁਤ੍ਤਂ, ਛਸੁ ਰਾਸੀਸੁ ਪਞ੍ਚਸੁ;
ਅਟ੍ਠਧਾ ਸਤਿ ਸੇਸਾ ਤੁ, ਸਮਾਨਪਦਰਾਸਿਕਾ.
੬੪੬. ਪਞ੍ਚਸ੍ਵੇਵ ਤੁ ਪਞ੍ਞਾ ਚ, ਸਮਾਧਿ ਚਤੁਰਾਸਿਕੋ;
ਸਦ੍ਧਾ ਦ੍ਵੀਸੁ ਵਿਭਤ੍ਤਾਤਿ, ਪਞ੍ਚੇਤੇ ਸਵਿਭਤ੍ਤਿਕਾ.
੬੪੭. ਨਵਾ ਵਿਭਤ੍ਤਿਕਾ ਸੇਸਾ, ਛਨ੍ਦੋ ਚਿਤ੍ਤਮਥਾਪਰਂ;
ਪੀਤਿ ਪਸ੍ਸਦ੍ਧਿਪੇਕ੍ਖਾ ਚ, ਸਙ੍ਕਪ੍ਪੋ ਵਿਰਤਿਤ੍ਤਯਂ.
੬੪੮. ਇਤਿ ਵੁਤ੍ਤਨਯਾ ਸਬ੍ਬੇ, ਬੋਧਿਪਕ੍ਖਿਯਸਙ੍ਗਹਾ;
ਲੋਕੁਤ੍ਤਰੇਸੁ ਸਮ੍ਭੋਨ੍ਤਿ, ਸਬ੍ਬਥਾਪਿ ਯਥਾਰਹਂ.
੬੪੯. ਪੁਬ੍ਬਭਾਗੇ ਯਥਾਯੋਗਂ, ਲੋਕਿਯੇਸੁ ਚ ਲਬ੍ਭਰੇ;
ਨਿਬ੍ਬੇਦਭਾਵਨਾਕਾਲੇ, ਛਬ੍ਬਿਸੁਦ੍ਧਿਪਵਤ੍ਤਿਯਂ.
੬੫੦. ਇਤਿ ਮਿਸ੍ਸਕਸਾਵਜ੍ਜਾ, ਬੋਧਿਪਕ੍ਖਿਯਸਙ੍ਗਹਾ;
ਯੇਵਾਪਨਕਰਾਸਿਮ੍ਹਿ, ਯਥਾਸਮ੍ਭਵਤੋ ਠਿਤਾ.
੬੫੧. ਕਮ੍ਮਪਥਾ ਤੁ ਸਮ੍ਭੋਨ੍ਤਿ, ਪੁਞ੍ਞਾਪੁਞ੍ਞੇਸੁ ਸਬ੍ਬਥਾ;
ਅਪਥਾ ਚ ਸੁਚਰਿਤਾ, ਤਥਾ ਦੁਚ੍ਚਰਿਤਾਪਿ ਚ.
੬੫੨. ਤਤ੍ਥ ਕਮ੍ਮਪਥਟ੍ਠਾਨੇ, ਅਨਭਿਜ੍ਝਾਦਯੋ ਪਨ;
ਉਪਚਾਰੇਨ ਵੁਚ੍ਚਨ੍ਤਿ, ਵਿਪਾਕੇਸੁ ਕ੍ਰਿਯੇਸੁ ਵਾਤਿ.
ਇਤਿ ਚੇਤਸਿਕਵਿਭਾਗੇ ਦਿਟ੍ਠਿਸਙ੍ਗਹਕਥਾ ਨਿਟ੍ਠਿਤਾ.
ਸਤ੍ਤਰਸਮੋ ਪਰਿਚ੍ਛੇਦੋ.
ਨਿਟ੍ਠਿਤੋ ਚ ਸਬ੍ਬਥਾਪਿ ਚੇਤਸਿਕਵਿਭਾਗੋ.