੧੬. ਚਿਤ੍ਤੁਪ੍ਪਾਦਕਥਾ
੫੩੩. ਚਿਤ੍ਤੁਪ੍ਪਾਦੇਸੁ ਧਮ੍ਮਾਨਂ, ਇਤਿ ਞਤ੍ਵਾ ਵਿਨਿਚ੍ਛਯਂ;
ਚਿਤ੍ਤੁਪ੍ਪਾਦਾਨਮੇਵਾਥ, ਞਾਤਬ੍ਬੋ ਭੇਦਸਙ੍ਗਹੋ.
੫੩੪. ਵੇਦਨਾਹਾਰਤੋ ਚੇਵ, ਹੇਤਾਧਿਪਤਿਤੋ ਤਥਾ;
ਝਾਨਿਨ੍ਦ੍ਰਿਯਮਗ੍ਗਬਲਾ, ਯੇਵਾਪਨਪਥਾਦਿਤੋ.
੫੩੫. ਤਤ੍ਥ ਸੁਖਾ ਚ ਦੁਕ੍ਖਾ ਚ, ਅਦੁਕ੍ਖਮਸੁਖਾਤਿ ਚ;
ਤਿਸ੍ਸੋ ਚ ਵੇਦਨਾ ਵੁਤ੍ਤਾ, ਸਮ੍ਭੋਗਤ੍ਥਵਿਸੇਸਤੋ.
੫੩੬. ਸੁਖਂ ਦੁਕ੍ਖਂ ਸੋਮਨਸ੍ਸਂ, ਦੋਮਨਸ੍ਸਮਥਾਪਰਂ;
ਉਪੇਕ੍ਖਿਨ੍ਦ੍ਰਿਯਮਿਚ੍ਚੇਵਂ, ਪਞ੍ਚਿਨ੍ਦ੍ਰਿਯਵਿਭਾਗਤੋ.
੫੩੭. ਕਾਯਵਿਞ੍ਞਾਣਯੁਗਲ਼ੇ, ਸੁਖਦੁਕ੍ਖਾ ਹਿ ਵੇਦਨਾ;
ਸੋਮਨਸ੍ਸਂ ਦੋਮਨਸ੍ਸਂ, ਇਤਿ ਨਾਮਂ ਲਭਨ੍ਤਿ ਨ.
੫੩੮. ਅਞ੍ਞਤ੍ਥ ਪਨ ਸਬ੍ਬਤ੍ਥ, ਸੁਖਾ ਦੁਕ੍ਖਾ ਚ ਵੇਦਨਾ;
ਸੋਮਨਸ੍ਸਂ ਦੋਮਨਸ੍ਸਂ, ਇਤਿ ਨਾਮਂ ਲਭਨ੍ਤਿ ਚ.
੫੩੯. ਅਦੁਕ੍ਖਿ ਅਸੁਖੋਪੇਕ੍ਖਾ, ਮਜ੍ਝਤ੍ਤਾਤਿ ਚ ਵੇਦਨਾ;
ਪਞ੍ਚਪਞ੍ਞਾਸਚਿਤ੍ਤੇਸੁ, ਤਦਞ੍ਞੇਸੁ ਪਕਾਸਿਤਾ.
੫੪੦. ਸੁਖਦੁਕ੍ਖਿਨ੍ਦ੍ਰਿਯਯੁਤ੍ਤਂ, ਕਾਯਵਿਞ੍ਞਾਣਕਦ੍ਵਯਂ;
ਦੋਮਨਸ੍ਸਿਨ੍ਦ੍ਰਿਯਯੁਤ੍ਤਂ, ਪਟਿਘਦ੍ਵਯਮਾਨਸਂ.
੫੪੧. ਅਟ੍ਠਾਰਸ ਪਰਿਤ੍ਤਾਨਿ, ਚਤੁਕ੍ਕਜ੍ਝਾਨਮਾਦਿਤੋ;
ਸੋਮਨਸ੍ਸਿਨ੍ਦ੍ਰਿਯਯੁਤ੍ਤਾ, ਦ੍ਵਾਸਟ੍ਠਿਵਿਧ ਮਾਨਸਾ.
੫੪੨. ਦ੍ਵਤ੍ਤਿਂਸ ਚ ਪਰਿਤ੍ਤਾਨਿ, ਤੇਵੀਸ ਝਾਨਪਞ੍ਚਮਾ;
ਹੋਨ੍ਤਿਪੇਕ੍ਖਿਨ੍ਦ੍ਰਿਯਯੁਤ੍ਤਾ, ਪਞ੍ਚਪਞ੍ਞਾਸ ਮਾਨਸਾ.
੫੪੩. ਸੁਖਯੁਤ੍ਤਾ ਤੁ ਤੇਸਟ੍ਠਿ, ਦੁਕ੍ਖਯੁਤ੍ਤਾ ਤਯੋ ਤਹਿਂ;
ਅਦੁਕ੍ਖਮਸੁਖਯੁਤ੍ਤਾ, ਪਞ੍ਚਪਞ੍ਞਾਸੁਪੇਕ੍ਖਕਾ.
੫੪੪. ਓਜਟ੍ਠਮਕਰੂਪਞ੍ਚ, ਵੇਦਨਂ ਸਨ੍ਧਿਮਾਨਸਂ;
ਨਾਮਰੂਪਞ੍ਚ ਕਮਤੋ, ਆਹਰਨ੍ਤੀਤਿ ਦੇਸਿਤਾ.
੫੪੫. ਆਹਾਰਾ ਕਬਲ਼ੀਕਾਰੋ, ਫਸ੍ਸੋ ਸਞ੍ਚੇਤਨਾ ਤਥਾ;
ਵਿਞ੍ਞਾਣਞ੍ਚੇਤਿ ਚਤ੍ਤਾਰੋ, ਉਪਤ੍ਥਮ੍ਭਾ ਚ ਸਮ੍ਭਵਾ.
੫੪੬. ਚਿਤ੍ਤੁਪ੍ਪਾਦੇਸੁ ਸਬ੍ਬਤ੍ਥ,
ਆਹਾਰਾਰੂਪਿਨੋ ਤਯੋ;
ਕਬਲ਼ੀਕਾਰੋ ਆਹਾਰੋ,
ਕਾਮੇ ਕਾਯਾਨੁਪਾਲਕੋ.
੫੪੭. ਅਲੋਭੋ ਚ ਅਦੋਸੋ ਚ,
ਅਮੋਹੋ ਚ ਤਥਾਪਰੋ;
ਲੋਭੋ ਦੋਸੋ ਚ ਮੋਹੋ ਚ,
ਹੇਤੂ ਧਮ੍ਮਾ ਛ ਦੇਸਿਤਾ.
੫੪੮. ਕੁਸਲਾਕੁਸਲਾ ਹੇਤੂ, ਤਯੋ ਅਬ੍ਯਾਕਤਾਤਿ ਚ;
ਨਵਦ੍ਵਾਦਸਧਾ ਤਤ੍ਥ, ਵਿਪਾਕਕ੍ਰਿਯਭੇਦਤੋ.
੫੪੯. ਦਸ ਪਞ੍ਚਾਧਿਕਾ ਹੋਨ੍ਤਿ, ਭੂਮਿਭੇਦਾ ਤਤੋ ਤਹਿਂ;
ਪੁਞ੍ਞਪਾਕਕ੍ਰਿਯਾਭੇਦਾ, ਤਾਲੀਸ ਚਤੁਨੂਨਕਾ.
੫੫੦. ਸਨ੍ਤੀਰਣਮਨੋਧਾਤੁ-ਪਞ੍ਚਵਿਞ੍ਞਾਣਮਾਨਸੇ;
ਵੋਟ੍ਠਬ੍ਬਨੇ ਚ ਹਸਿਤੇ, ਹੇਤੁ ਨਾਮ ਨ ਵਿਜ੍ਜਤਿ.
੫੫੧. ਲੋਭਮੂਲੇਸੁ ਲੋਭੋ ਚ,
ਮੋਹੋ ਚ ਪਟਿਘਦ੍ਵਯੇ;
ਦੋਸੋ ਮੋਹੋ ਚ ਲਬ੍ਭਨ੍ਤਿ,
ਮੋਹੋ ਏਕੋਵ ਮੋਮੁਹੇ.
੫੫੨. ਞਾਣੇਨ ਵਿਪ੍ਪਯੁਤ੍ਤੇਸੁ,
ਅਲੋਭਾਦਿਦ੍ਵਯਂ ਭਵੇ;
ਤਤੋ ਸੇਸੇਸੁ ਸਬ੍ਬਤ੍ਥ,
ਅਲੋਭਾਦਿਤਯੋਪਿ ਚ.
੫੫੩. ਤਿਹੇਤੁਕਾ ਸਤ੍ਤਚਤ੍ਤਾ-ਲੀਸ ਹੋਨ੍ਤਿ ਦ੍ਵਿਹੇਤੁਕਾ;
ਬਾਵੀਸ ਦ੍ਵੇਕਹੇਤੁਕਾ, ਅਟ੍ਠਾਰਸ ਅਹੇਤੁਕਾ.
੫੫੪. ਛਨ੍ਦੋ ਚਿਤ੍ਤਞ੍ਚ ਵੀਰਿਯਂ, ਵੀਮਂਸਾਤਿ ਚਤੁਬ੍ਬਿਧਾ;
ਸਹਜਾਤਾਧਿਪਾ ਧਮ੍ਮਾ, ਵੁਤ੍ਤਾਧਿਪਤਯੋ ਸਿਯੁਂ.
੫੫੫. ਯਮਾਲਮ੍ਬਂ ਗਰੁਂ ਕਤ੍ਵਾ, ਨਾਮਧਮ੍ਮਾ ਪਵਤ੍ਤਰੇ;
ਆਰਮ੍ਮਣਾਧਿਪਨਾਮੇਨ, ਤਦਾਲਮ੍ਬਣਮੀਰਿਤਂ.
੫੫੬. ਤਿਹੇਤੁਕਜਵੇਸ੍ਵੇਕੋ, ਚਤੂਸੁਪਿ ਯਥਾਰਹਂ;
ਦ੍ਵਿਹੇਤੁਕੇਸੁ ਸਮ੍ਭੋਤਿ, ਵੀਮਂਸਾਧਿਪਤਿਂ ਵਿਨਾ.
੫੫੭. ਅਨੁਤ੍ਤਰੇ ਕਾਮਪੁਞ੍ਞੇ, ਤਿਹੇਤੁਕਮਹਾਕ੍ਰਿਯੇ;
ਲੋਭਮੂਲੇ ਚ ਸਾਵਜ੍ਜੇ, ਲਬ੍ਭਤਾਲਮ੍ਬਣਾਧਿਪੋ.
੫੫੮. ਤਤ੍ਥ ਚਾਨਿਯਤਾ ਕਾਮੇ, ਲਬ੍ਭਮਾਨਾਪਿ ਲਬ੍ਭਰੇ;
ਮਹਗ੍ਗਤਾਨੁਤ੍ਤਰੇਸੁ, ਨਿਯਤਾਵ ਯਥਾਰਹਂ.
੫੫੯. ਕ੍ਰਿਯਾਦ੍ਵਿਹੇਤੁਪਟਿਘੇ,
ਨਤ੍ਥੇਵਾਲਮ੍ਬਣਾਧਿਪੋ;
ਮੋਮੂਹਾਹੇਤੁਕੇ ਪਾਕੇ,
ਲੋਕਿਯੇ ਚ ਨ ਕੋਚਿਪਿ.
੫੬੦. ਉਭਯਾਧਿਪਯੁਤ੍ਤਾ ਚ, ਸਹਜਾਧਿਪਯੋਗਿਨੋ;
ਉਭਯਾਨਿਯਤਾਧਿਪ੍ਪਾ, ਸਹਜਾਨਿਯਤਾਧਿਪਾ.
੫੬੧. ਉਭਯਵਿਪ੍ਪਯੁਤ੍ਤਾ ਚ, ਪਞ੍ਚਧਾ ਤਤ੍ਥ ਮਾਨਸਾ;
ਅਟ੍ਠਟ੍ਠਾਰਸ ਵੀਸਂ ਛ, ਸਤ੍ਤਤਿਂਸ ਯਥਾਕ੍ਕਮਂ.
੫੬੨. ਪਞ੍ਚਾਧਿਪਤਿਯੋਗਾ ਚ, ਚਤੁਰਾਧਿਪਯੋਗਿਨੋ;
ਤਿਵਿਧਾਧਿਪਯੁਤ੍ਤਾ ਚ, ਵਿਮੁਤ੍ਤਾਪਿ ਚ ਸਬ੍ਬਥਾ.
੫੬੩. ਸੋਲ਼ਸਾਥ ਸਮਤ੍ਤਿਂਸ, ਛਲ਼ੇਵਾਥ ਯਥਾਕ੍ਕਮਂ;
ਸਤ੍ਤਤਿਂਸਤਿਵਿਧਾਤਿ, ਚਤੁਧੇਵਮ੍ਪਿ ਨਿਦ੍ਦਿਸੇ.
੫੬੪. ਵੀਮਂਸਾਧਿਪਯੁਤ੍ਤਾ ਚ, ਸਹਜਾਧਿਪਯੋਗਿਨੋ;
ਆਲਮ੍ਬਾਧਿਪਯੁਤ੍ਤਾ ਚ, ਵਿਪ੍ਪਮੁਤ੍ਤਾਪਿ ਸਬ੍ਬਥਾ.
੫੬੫. ਚਤੁਤ੍ਤਿਂਸ ਦ੍ਵਿਪਞ੍ਞਾਸ, ਅਟ੍ਠਵੀਸ ਯਥਾਕ੍ਕਮਂ;
ਸਤ੍ਤਤਿਂਸਤਿ ਚੇਵੇਤਿ, ਚਤੁਧੇਵਮ੍ਪਿ ਨਿਦ੍ਦਿਸੇ.
੫੬੬. ਸਹਜਾਧਿਪਲਦ੍ਧਾ ਤੁ, ਦ੍ਵੇਪਞ੍ਞਾਸੇਵ ਸਬ੍ਬਥਾ;
ਆਲਮ੍ਬਾਧਿਪਲਦ੍ਧਾ ਚ, ਉਭਯਾਧਿਪਲਾਭਿਨੋ.
੫੬੭. ਅਟ੍ਠਵੀਸੇਵ ਸਬ੍ਬੇਪਿ, ਦ੍ਵੇਪਞ੍ਞਾਸੇਵ ਸਾਧਿਪਾ;
ਸੇਸਾ ਨਿਰਾਧਿਪਾ ਸਬ੍ਬੇ, ਸਤ੍ਤਤਿਂਸਾਪਿ ਸਬ੍ਬਥਾ.
੫੬੮. ਵੇਦਨਾਦਿਵਸੇਨੇਵਂ, ਞਤ੍ਵਾ ਭੇਦਂ ਚਤੁਬ੍ਬਿਧਂ;
ਝਾਨਿਨ੍ਦ੍ਰਿਯਮਗ੍ਗਬਲ-ਵਸੇਨਾਪਿ ਵਿਭਾਵਯੇ.
੫੬੯. ਵਿਤਕ੍ਕਹੇਟ੍ਠਿਮਂ ਝਾਨਂ, ਮਨੋਪਰਂ ਮਨਿਨ੍ਦ੍ਰਿਯਂ;
ਹੇਤੁਪਰਞ੍ਚ ਮਗ੍ਗਙ੍ਗਂ, ਬਲਂ ਵੀਰਿਯਪਚ੍ਛਿਮਂ.
੫੭੦. ਅਵਿਤਕ੍ਕੇ ਪਕਤਿਯਾ, ਤਸ੍ਮਾ ਝਾਨਂ ਨ ਵਿਜ੍ਜਤਿ;
ਅਹੇਤੁਕੇ ਚ ਮਗ੍ਗਙ੍ਗਂ, ਬਲਞ੍ਚਾਵੀਰਿਯੇ ਯਥਾ.
੫੭੧. ਅਟ੍ਠ ਰੂਪਿਨ੍ਦ੍ਰਿਯਾਨੇਤ੍ਥ, ਅਗਯ੍ਹਨ੍ਤੇਵ ਸਬ੍ਬਥਾ;
ਮਗ੍ਗਿਨ੍ਦ੍ਰਿਯਬਲਟ੍ਠੇਸੁ, ਸਮਾਧਿ ਚ ਨ ਕਙ੍ਖਿਤੇ.
੫੭੨. ਕਾਮਪੁਞ੍ਞੇਸ੍ਵਨਿਯਤਾ, ਵਿਰਤੀਪਿ ਅਨੁਦ੍ਧਤਾ;
ਪਞ੍ਞਾਨੁਤ੍ਤਰਚਿਤ੍ਤੇਸੁ, ਇਨ੍ਦ੍ਰਿਯਤ੍ਤਯਭਾਜਿਤਾ.
੫੭੩. ਸੇਸਾ ਵੁਤ੍ਤਾਨੁਸਾਰੇਨ, ਲਬ੍ਭਮਾਨਜ੍ਝਾਨਾਦਿਕਾ;
ਤੇਹਿ ਯੁਤ੍ਤਾ ਚ ਵਿਞ੍ਞੇਯ੍ਯਾ, ਚਿਤ੍ਤੁਪ੍ਪਾਦਾ ਯਥਾਕ੍ਕਮਂ.
੫੭੪. ਸੋਮਨਸ੍ਸਯੁਤ੍ਤਾ ਕਾਮੇ, ਲੋਕੁਤ੍ਤਰਮਹਗ੍ਗਤੇ;
ਪਠਮਜ੍ਝਾਨਚਿਤ੍ਤਾ ਚ, ਪਞ੍ਚਝਾਨਙ੍ਗਿਕਾ ਮਤਾ.
੫੭੫. ਦੁਕ੍ਖੁਪੇਕ੍ਖਾਯੁਤ੍ਤਾ ਕਾਮੇ, ਪਞ੍ਚਵਿਞ੍ਞਾਣਵਜ੍ਜਿਤਾ;
ਦੁਤਿਯਜ੍ਝਾਨਚਿਤ੍ਤਾ ਚ, ਚਤੁਝਾਨਙ੍ਗਿਕਾ ਸਿਯੁਂ.
੫੭੬. ਝਾਨਙ੍ਗਤ੍ਤਯਸਂਯੁਤ੍ਤਾ, ਤਤਿਯਜ੍ਝਾਨਮਾਨਸਾ;
ਚਤੁਤ੍ਥਪਞ੍ਚਮਾਰੁਪ੍ਪਾ, ਝਾਨਙ੍ਗਦ੍ਵਯਯੋਗਿਨੋ.
੫੭੭. ਪਞ੍ਚਵਿਞ੍ਞਾਣਯੁਗਲ਼ੇ, ਝਾਨਙ੍ਗਂ ਨਤ੍ਥਿ ਕਿਞ੍ਚਿਪਿ;
ਇਤ੍ਥਂ ਝਾਨਾਨਂ ਭੇਦੇਨ, ਪਞ੍ਚਧਾ ਮਾਨਸਾ ਠਿਤਾ.
੫੭੮. ਏਕੂਨਤਿਂਸਤਿ ਸਤ੍ਤ-ਤਿਂਸ ਚੇਕਾਦਸਾਪਰੇ;
ਚਤੁਤ੍ਤਿਂਸ ਦਸੇਵਾਥ, ਗਣਿਕਾ ਤੁ ਯਥਾਕ੍ਕਮਂ.
੫੭੯. ਲੋਕੁਤ੍ਤਰੇਸੁ ਸਬ੍ਬੇਸੁ, ਇਨ੍ਦ੍ਰਿਯਾਨਿ ਨਵੁਚ੍ਚਰੇ;
ਤਿਹੇਤੁਕੇਸੁ ਸਬ੍ਬੇਸੁ, ਲੋਕਿਯੇਸੁ ਪਨਟ੍ਠਧਾ.
੫੮੦. ਞਾਣੇਨ ਵਿਪ੍ਪਯੁਤ੍ਤੇਸੁ, ਸਤ੍ਤਧਾਵ ਸਮੁਦ੍ਧਰੇ;
ਸਿਤਵੋਟ੍ਠਬ੍ਬਨਾ ਪੁਞ੍ਞੇ, ਪਞ੍ਚਧਾਵ ਪਕਾਸਯੇ.
੫੮੧. ਵਿਚਿਕਿਚ੍ਛਾਸਹਗਤੇ, ਚਤੁਧਾਵ ਵਿਨਿਦ੍ਦਿਸੇ;
ਤੀਣਿਨ੍ਦ੍ਰਿਯਾਨਿ ਵੁਤ੍ਤਾਨਿ, ਸੇਸਾਹੇਤੁਕਮਾਨਸੇ.
੫੮੨. ਅਟ੍ਠ ਚੇਕੂਨਤਾਲੀਸ, ਦ੍ਵਾਦਸ ਵਾਥ ਤੇਰਸ;
ਏਕਞ੍ਚ ਸੋਲ਼ਸ ਚੇਤਿ, ਛਬ੍ਬਿਧਾ ਤਤ੍ਥ ਸਙ੍ਗਹੋ.
੫੮੩. ਪਠਮਾਨੁਤ੍ਤਰਂ ਝਾਨਂ, ਅਟ੍ਠਮਗ੍ਗਙ੍ਗਿਕਂ ਮਤਂ;
ਸਤ੍ਤਮਗ੍ਗਙ੍ਗਿਕਂ ਨਾਮ, ਸੇਸਂ ਝਾਨਮਨੁਤ੍ਤਰਂ.
੫੮੪. ਲੋਕਿਯਂ ਪਠਮਂ ਝਾਨਂ, ਤਥਾ ਕਾਮੇ ਤਿਹੇਤੁਕਂ;
ਪਞ੍ਚਮਗ੍ਗਙ੍ਗਿਕਾ ਨਾਮ, ਚਿਤ੍ਤੁਪ੍ਪਾਦਾ ਪਕਾਸਿਤਾ.
੫੮੫. ਸੇਸਂ ਮਹਗ੍ਗਤਂ ਝਾਨਂ, ਸਮ੍ਪਯੁਤ੍ਤਾ ਚ ਦਿਟ੍ਠਿਯਾ;
ਞਾਣੇਨ ਵਿਪ੍ਪਯੁਤ੍ਤਾ ਚ, ਚਤੁਮਗ੍ਗਙ੍ਗਿਕਾ ਮਤਾ.
੫੮੬. ਦੋਸਮੂਲਦ੍ਵਯਞ੍ਚੇਵ, ਉਦ੍ਧਚ੍ਚਸਹਿਤਂ ਤਥਾ;
ਦਿਟ੍ਠਿਯਾ ਵਿਪ੍ਪਯੁਤ੍ਤਾ ਚ, ਮਗ੍ਗਙ੍ਗਤ੍ਤਯਯੋਗਿਨੋ.
੫੮੭. ਵਿਚਿਕਿਚ੍ਛਾਸਮ੍ਪਯੁਤ੍ਤੋ, ਵੁਤ੍ਤੋ ਮਗ੍ਗੋ ਦੁਵਙ੍ਗਿਕੋ;
ਅਮਗ੍ਗਾਹੇਤੁਕੋ ਚੇਤਿ, ਸਤ੍ਤਧਾ ਤਤ੍ਥ ਸਙ੍ਗਹੋ.
੫੮੮. ਅਟ੍ਠ ਦ੍ਵਤ੍ਤਿਂਸਤਿ ਚੇਵ, ਦਸ ਪਞ੍ਚਾਧਿਕਾਪਰੇ;
ਤਾਲੀਸ ਕਮਤੋ ਸਤ੍ਤ, ਏਕਞ੍ਚਟ੍ਠਦਸਾਪਰੇ.
੫੮੯. ਬਲਾਨਿ ਪਨ ਸਤ੍ਤੇਵ, ਸਬ੍ਬਤ੍ਥਾਪਿ ਤਿਹੇਤੁਕੇ;
ਞਾਣੇਨ ਵਿਪ੍ਪਯੁਤ੍ਤੇਸੁ, ਛ ਬਲਾਨਿ ਸਮੁਦ੍ਦਿਸੇ.
੫੯੦. ਚਤੁਧਾਕੁਸਲੇ ਹੋਨ੍ਤਿ, ਤਿਵਿਧਾ ਕਙ੍ਖਿਤੇ ਪਨ;
ਦ੍ਵਿਬਲਂ ਸਿਤਵੋਟ੍ਠਬ੍ਬਂ, ਅਬਲਂ ਸੇਸਮੀਰਿਤਂ.
੫੯੧. ਛਬ੍ਬਿਧੋ ਸਙ੍ਗਹੋ ਤਤ੍ਥ, ਸਤ੍ਤਤਾਲੀਸਥਾਪਰੇ;
ਦ੍ਵਾਦਸੇਕਾਦਸੇਕਂ ਦ੍ਵੇ, ਸੋਲ਼ਸੇਤਿ ਯਥਾਕ੍ਕਮਂ.
੫੯੨. ਇਤ੍ਥਂ ਪਞ੍ਚ ਛ ਸਤ੍ਤ ਛ-ਕੋਟ੍ਠਾਸਾ ਕਮਤੋ ਠਿਤਾ;
ਚਤੁਵੀਸਤਿ ਸਬ੍ਬੇਪਿ, ਝਾਨਙ੍ਗਾਦਿਵਸਾ ਕਥਾ.
ਇਤਿ ਚੇਤਸਿਕਵਿਭਾਗੇ ਚਿਤ੍ਤੁਪ੍ਪਾਦਕਥਾ ਨਿਟ੍ਠਿਤਾ.
ਸੋਲ਼ਸਮੋ ਪਰਿਚ੍ਛੇਦੋ.