੧੦. ਪਭੇਦਕਥਾ
੩੫੨. ਏਕੁਪ੍ਪਾਦਾ ਨਿਰੋਧਾ ਚ, ਏਕਾਲਮ੍ਬਣਵਤ੍ਥੁਕਾ;
ਸਹਗਤਾ ਸਹਜਾਤਾ, ਸਂਸਟ੍ਠਾ ਸਹਵੁਤ੍ਤਿਨੋ.
੩੫੩. ਤੇਪਞ੍ਞਾਸ ਪਨਿਚ੍ਚੇਤੇ, ਸਮ੍ਪਯੁਤ੍ਤਾ ਯਥਾਰਹਂ;
ਚਿਤ੍ਤਚੇਤਸਿਕਾ ਧਮ੍ਮਾ, ਅਟ੍ਠਾਰਸਵਿਧਾਪਿ ਚ.
੩੫੪. ਏਕਧਾ ਛਬ੍ਬਿਧਾ ਚੇਵ, ਚਤੁਧਾ ਸਤ੍ਤਧਾ ਠਿਤਾ;
ਚਿਤ੍ਤੁਪ੍ਪਾਦਪਭੇਦੇਨ, ਭਿਨ੍ਦਿਤਬ੍ਬਾ ਵਿਭਾਵਿਨਾ.
੩੫੫. ਅਟ੍ਠ ਧਮ੍ਮਾਵਿਨਿਬ੍ਭੋਗਾ, ਭਿਨ੍ਨਾਸੀਤਿ ਨਵੁਤ੍ਤਰਾ;
ਸਤ੍ਤਸਤਂ ਦਸ ਦ੍ਵੇ ਚ, ਸਬ੍ਬੇ ਹੋਨ੍ਤਿ ਸਮਿਸ੍ਸਿਤਾ.
੩੫੬. ਸਨ੍ਤੀਰਣਮਨੋਧਾਤੁ, ਸਿਤਵੋਟ੍ਠਬ੍ਬਨਾ ਤਥਾ;
ਅਪੁਞ੍ਞਾ ਕਾਮਪੁਞ੍ਞਾ ਚ, ਮਹਾਪਾਕਾ ਮਹਾਕ੍ਰਿਯਾ.
੩੫੭. ਪਠਮਜ੍ਝਾਨਧਮ੍ਮਾ ਚ, ਲੋਕੁਤ੍ਤਰਮਹਗ੍ਗਤਾ;
ਪਞ੍ਚਪਞ੍ਞਾਸ ਸਬ੍ਬੇਪਿ, ਵਿਤਕ੍ਕਾ ਹੋਨ੍ਤਿ ਭੇਦਿਤਾ.
੩੫੮. ਵਿਚਾਰਾਪਿ ਚ ਤੇਯੇਵ, ਦੁਤਿਯਜ੍ਝਾਨਨਾਮਕਾ;
ਏਕਾਦਸਾਪਰੇ ਚੇਤਿ, ਛਸਟ੍ਠਿ ਪਰਿਦੀਪਿਤਾ.
੩੫੯. ਅਪੁਞ੍ਞਾ ਕਾਮਪੁਞ੍ਞਾ ਚ, ਮਹਾਪਾਕਾ ਮਹਾਕ੍ਰਿਯਾ;
ਚਤੁਕ੍ਕਾ ਚੇਵ ਚਤ੍ਤਾਰੋ, ਸਿਤਞ੍ਚ ਸੁਖਤੀਰਣਂ.
੩੬੦. ਪਠਮਾਦਿਤਿਕਜ੍ਝਾਨਾ, ਲੋਕੁਤ੍ਤਰਮਹਗ੍ਗਤਾ;
ਇਚ੍ਚੇਵਮੇਕਪਞ੍ਞਾਸ, ਪੀਤਿਯੋ ਹੋਨ੍ਤਿ ਸਬ੍ਬਥਾ.
੩੬੧. ਸਿਤਵੋਟ੍ਠਬ੍ਬਨਾ ਦ੍ਵੇ ਚ, ਸਾਵਜ੍ਜਾ ਚਾਨਵਜ੍ਜਕਾ;
ਭਿਨ੍ਨਮੇਵਂ ਤੁ ਵੀਰਿਯਂ, ਤੇਸਤ੍ਤਤਿਵਿਧਂ ਭਵੇ.
੩੬੨. ਸਾਵਜ੍ਜਾ ਚਾਨਵਜ੍ਜਾ ਚ, ਮੋਮੂਹਦ੍ਵਯਵਜ੍ਜਿਤਾ;
ਛਨ੍ਦਾ ਭਵਨ੍ਤਿ ਸਬ੍ਬੇਪਿ, ਸਟ੍ਠਿਭੇਦਾ ਨਵੁਤ੍ਤਰਾ.
੩੬੩. ਸਨ੍ਤੀਰਣਮਨੋਧਾਤੁ, ਸਿਤਵੋਟ੍ਠਬ੍ਬਨਾ ਤਥਾ;
ਸਾਵਜ੍ਜਾ ਚਾਨਵਜ੍ਜਾ ਚ, ਵਿਚਿਕਿਚ੍ਛਾਵਿਵਜ੍ਜਿਤਾ.
੩੬੪. ਅਧਿਮੋਕ੍ਖਾ ਪਨਿਚ੍ਚੇਵਂ, ਅਟ੍ਠਸਤ੍ਤਤਿ ਭੇਦਿਤਾ;
ਤਿਸਤਂ ਨਵੁਤਿ ਦ੍ਵੇ ਚ, ਭਿਨ੍ਨਾ ਹੋਨ੍ਤਿ ਪਕਿਣ੍ਣਕਾ.
੩੬੫. ਏਕੂਨਸਟ੍ਠਿ ਵਾ ਹੋਨ੍ਤਿ, ਸਦ੍ਧਾਦੇਕੂਨਵੀਸਤਿ;
ਸਹਸ੍ਸਞ੍ਚ ਸਤਞ੍ਚੇਕਂ, ਏਕਵੀਸਞ੍ਚ ਸਬ੍ਬਥਾ.
੩੬੬. ਞਾਣੇਨ ਸਮ੍ਪਯੁਤ੍ਤਾ ਚ, ਕਾਮੇ ਦ੍ਵਾਦਸਧਾਪਰੇ;
ਪਞ੍ਚਤਿਂਸਾਤਿ ਪਞ੍ਞਾਪਿ, ਸਤ੍ਤਤਾਲੀਸਧਾ ਕਥਾ.
੩੬੭. ਰੂਪਜ੍ਝਾਨਚਤੁਕ੍ਕਾ ਚ, ਕਾਮਪੁਞ੍ਞਾ ਮਹਾਕ੍ਰਿਯਾ;
ਅਟ੍ਠਵੀਸਪ੍ਪਮਞ੍ਞੇਵਂ, ਛਪ੍ਪਞ੍ਞਾਸ ਭਵਨ੍ਤਿ ਚ.
੩੬੮. ਅਨੁਤ੍ਤਰਾ ਕਾਮਪੁਞ੍ਞਾ, ਤਿਸ੍ਸੋ ਵਿਰਤਿਯੋ ਪਨ;
ਹੋਨ੍ਤਿ ਸੋਲ਼ਸਧਾ ਭਿਨ੍ਨਾ, ਅਟ੍ਠਤਾਲੀਸ ਪਿਣ੍ਡਿਤਾ.
੩੬੯. ਪਞ੍ਚਵੀਸਾਨਵਜ੍ਜੇਵਂ, ਸਮ੍ਪਯੁਤ੍ਤਾ ਚਤੁਬ੍ਬਿਧਾ;
ਸਹਸ੍ਸਦ੍ਵਿਸਤਞ੍ਚੇਵ, ਦ੍ਵਿ ਚ ਸਤ੍ਤਤਿ ਭੇਦਤੋ.
੩੭੦. ਚਤ੍ਤਾਰੋ ਪਾਪਸਾਮਞ੍ਞਾ, ਭਿਨ੍ਨਾ ਦ੍ਵਾਦਸਧਾ ਪਨ;
ਅਟ੍ਠਤਾਲੀਸਧਾ ਹੋਨ੍ਤਿ, ਤੇ ਸਬ੍ਬੇ ਪਰਿਪਿਣ੍ਡਿਤਾ.
੩੭੧. ਲੋਭੋ ਪਨਟ੍ਠਧਾ ਭਿਨ੍ਨੋ, ਥਿਨਮਿਦ੍ਧਞ੍ਚ ਪਞ੍ਚਧਾ;
ਚਤੁਧਾ ਦਿਟ੍ਠਿਮਾਨੋ ਚ, ਚਤੁਧਾ ਦਿਟ੍ਠਿਯੋ ਵਿਸੁਂ.
੩੭੨. ਦ੍ਵਿਧਾ ਦੋਸਾਦਿਚਤ੍ਤਾਰੋ, ਵਿਚਿਕਿਚ੍ਛੇਕਧਾਤਿ ਚ;
ਸਾਵਜ੍ਜਾ ਸਤ੍ਤਧਾ ਵੁਤ੍ਤਾ, ਭਿਨ੍ਨਾਸੀਤਿ ਤਿਕੁਤ੍ਤਰਾ.
੩੭੩. ਇਚ੍ਚਟ੍ਠਾਰਸਧਾ ਵੁਤ੍ਤਾ, ਤੇਪਞ੍ਞਾਸਾਪਿ ਭੇਦਤੋ;
ਦ੍ਵਿਸਹਸ੍ਸਞ੍ਚ ਤੁ ਸਤਂ, ਭਵਨ੍ਤੇਕੂਨਸਟ੍ਠਿ ਚ.
੩੭੪. ਵਿਤਕ੍ਕਵਿਚਾਰਪੀਤਿਸੁਖੋਪੇਕ੍ਖਾਸੁ ਪਞ੍ਚਸੁ;
ਭਿਨ੍ਦਿਤ੍ਵਾ ਝਾਨਭੇਦੇਨ, ਗਹੇਤਬ੍ਬਾ ਅਨੁਤ੍ਤਰਾ.
੩੭੫. ਅਞ੍ਞਤ੍ਰ ਪਨ ਸਬ੍ਬਤ੍ਥ, ਨਤ੍ਥਿ ਭੇਦਪ੍ਪਯੋਜਨਂ;
ਅਟ੍ਠੇਵ ਕਸ੍ਮਾ ਗਯ੍ਹਨ੍ਤਿ, ਅਭੇਦੇਨਾਤਿ ਲਕ੍ਖਯੇ.
੩੭੬. ਪਠਮਾਦਿਚਤੁਜ੍ਝਾਨਾ, ਲੋਕੁਤ੍ਤਰਮਹਗ੍ਗਤਾ;
ਇਚ੍ਚੇਕਮੇਕਦਸਧਾ, ਚਤੁਤਾਲੀਸ ਪਿਣ੍ਡਿਤਾ.
੩੭੭. ਤੇਵੀਸ ਪਞ੍ਚਮਾ ਚੇਤਿ, ਸਤ੍ਤਸਟ੍ਠਿ ਸਮਿਸ੍ਸਿਤਾ;
ਅਪ੍ਪਨਾ ਤਤ੍ਥ ਸਬ੍ਬਾਪਿ, ਅਟ੍ਠਪਞ੍ਞਾਸ ਦੀਪਿਤਾ.
੩੭੮. ਪਞ੍ਚਤਿਂਸੇਵ ਸਙ੍ਖੇਪਾ, ਲੋਕੁਤ੍ਤਰਮਹਗ੍ਗਤਾ;
ਅਪ੍ਪਨਾ ਤਤ੍ਥ ਸਬ੍ਬਾਪਿ, ਛਬ੍ਬੀਸਤਿ ਪਕਾਸਿਤਾ.
੩੭੯. ਇਦ੍ਧਿਵਿਧਂ ਦਿਬ੍ਬਸੋਤਂ, ਚੇਤੋਪਰਿਯਨਾਮਕਾ;
ਪੁਬ੍ਬੇਨਿਵਾਸਾਨੁਸ੍ਸਤਿ, ਦਿਬ੍ਬਚਕ੍ਖੂਤਿ ਪਞ੍ਚਧਾ.
੩੮੦. ਅਭਿਞ੍ਞਾਞਾਣਮੀਰੇਨ੍ਤਿ, ਰੂਪਾਵਚਰਪਞ੍ਚਮਾ;
ਕੁਸਲਞ੍ਚ ਕ੍ਰਿਯਾ ਚੇਤਿ, ਭੇਦਿਤਂ ਦੁਵਿਧਮ੍ਪਿ ਚ.
੩੮੧. ਤਂ ਦ੍ਵਯਮ੍ਪਿ ਸਮ੍ਮਿਸ੍ਸੇਤ੍ਵਾ, ਪਞ੍ਚਾਭਿਞ੍ਞਾ ਚ ਲੋਕਿਯਾ;
ਆਸਵਕ੍ਖਯਞਾਣਞ੍ਚ, ਛਲ਼ਭਿਞ੍ਞਾ ਪਵੁਚ੍ਚਰੇ.
੩੮੨. ਲੋਕਿਯਾ ਚ ਦਸਾਭਿਞ੍ਞਾ, ਭਿਨ੍ਦਿਤ੍ਵਾ ਕੁਸਲਕ੍ਰਿਯਾ;
ਸਤ੍ਤਸਤ੍ਤਤਿ ਝਾਨਾਨਿ, ਅਟ੍ਠਸਟ੍ਠਿ ਪਨਪ੍ਪਨਾ.
੩੮੩. ਸਤ੍ਤਸਤ੍ਤਤਿ ਚਿਤ੍ਤਾਨਿ, ਚਤੁਪਞ੍ਞਾਸ ਸਬ੍ਬਥਾ;
ਪਚਿਤਾਨਿ ਚ ਚਿਤ੍ਤਾਨਿ, ਏਕਤਿਂਸਸਤਂ ਸਿਯੁਨ੍ਤਿ.
ਇਤਿ ਚੇਤਸਿਕਵਿਭਾਗੇ ਪਭੇਦਕਥਾ ਨਿਟ੍ਠਿਤਾ.
ਦਸਮੋ ਪਰਿਚ੍ਛੇਦੋ.