ਏਕਾਦਸਮੋ ਪਰਿਚ੍ਛੇਦੋ
੧੧. ਰਾਸਿਸਰੂਪਕਥਾ
੩੮੪. ਸਬ੍ਬਂ ਸਭਾਵਸਾਮਞ੍ਞ-ਵਿਸੇਸੇਨ ਯਥਾਰਹਂ;
ਗਤਰਾਸਿਵਸੇਨਾਥ, ਅਟ੍ਠਾਰਸਵਿਧਂ ਕਥਂ.
੩੮੫. ਫਸ੍ਸਪਞ੍ਚਕਰਾਸੀ ਚ, ਝਾਨਿਨ੍ਦ੍ਰਿਯਮਥਾਪਰੇ;
ਮਗ੍ਗਬਲਹੇਤੁਕਮ੍ਮ-ਪਥਲੋਕਿਯਰਾਸਯੋ.
੩੮੬. ਨਿਰਵਜ੍ਜਾ ਛ ਪਸ੍ਸਦ੍ਧਿ-ਆਦਿਕਾ ਚ ਸਤੀਮਤਾ;
ਯੁਗਨਨ੍ਧਾ ਚ ਸਮਥਾ, ਤਥਾ ਯੇਵਾਪਨਾਤਿ ਚ.
੩੮੭. ਫਸ੍ਸੋ ਚ ਵੇਦਨਾ ਸਞ੍ਞਾ, ਚੇਤਨਾ ਚਿਤ੍ਤਮੇਵ ਚ;
ਫਸ੍ਸਪਞ੍ਚਕਰਾਸੀਤਿ, ਪਞ੍ਚ ਧਮ੍ਮਾ ਪਕਾਸਿਤਾ.
੩੮੮. ਵਿਤਕ੍ਕੋ ਚ ਵਿਚਾਰੋ ਚ, ਪੀਤਿ ਚੇਕਗ੍ਗਤਾ ਤਥਾ;
ਸੁਖਂ ਦੁਕ੍ਖਮੁਪੇਕ੍ਖਾਤਿ, ਸਤ੍ਤ ਝਾਨਙ੍ਗਨਾਮਕਾ.
੩੮੯. ਸਦ੍ਧਿਨ੍ਦ੍ਰਿਯਞ੍ਚ ਵੀਰਿਯਂ, ਸਤਿ ਚੇਵ ਸਮਾਧਿ ਚ;
ਪਞ੍ਞਾ ਚਤੁਬ੍ਬਿਧਾ ਵੁਤ੍ਤਾ, ਮਨੋ ਪਞ੍ਚਾਪਿ ਵੇਦਨਾ.
੩੯੦. ਜੀਵਿਤਿਨ੍ਦ੍ਰਿਯਮੇਕਨ੍ਤਿ, ਚਕ੍ਖਾਦੀਨਿ ਚ ਸਤ੍ਤਧਾ;
ਬਾਵੀਸਤਿਨ੍ਦ੍ਰਿਯਾ ਨਾਮ, ਧਮ੍ਮਾ ਸੋਲ਼ਸ ਦੇਸਿਤਾ.
੩੯੧. ਆਦਿਮਗ੍ਗੇ ਅਨਞ੍ਞਾਤ-ਞ੍ਞਸ੍ਸਾਮੀਤਿਨ੍ਦ੍ਰਿਯਂ ਭਵੇ;
ਮਜ੍ਝੇ ਅਞ੍ਞਿਨ੍ਦ੍ਰਿਯਂ ਅਨ੍ਤੇ, ਅਞ੍ਞਾਤਾਵਿਨ੍ਦ੍ਰਿਯਨ੍ਤਿ ਚ.
੩੯੨. ਪਞ੍ਞਾਨੁਤ੍ਤਰਚਿਤ੍ਤੇਸੁ, ਹੋਨ੍ਤਿ ਤੀਣਿਨ੍ਦ੍ਰਿਯਾਨਿਪਿ;
ਤਿਹੇਤੁਕੇਸੁ ਸੇਸੇਸੁ, ਏਕਂ ਪਞ੍ਞਿਨ੍ਦ੍ਰਿਯਂ ਮਤਂ.
੩੯੩. ਸੁਖਂ ਦੁਕ੍ਖਿਨ੍ਦ੍ਰਿਯਞ੍ਚੇਵ, ਸੋਮਨਸ੍ਸਿਨ੍ਦ੍ਰਿਯਂ ਤਥਾ;
ਦੋਮਨਸ੍ਸਮੁਪੇਕ੍ਖਾਤਿ, ਪਞ੍ਚਧਾ ਵੇਦਨਾ ਕਥਾ.
੩੯੪. ਰੂਪਾਰੂਪਵਸਾ ਦ੍ਵੇਧਾ, ਜੀਵਿਤਿਨ੍ਦ੍ਰਿਯਮੇਕਕਂ;
ਚਕ੍ਖੁਸੋਤਘਾਨਜਿਵ੍ਹਾਕਾਯਿਤ੍ਥਿਪੁਰਿਸਿਨ੍ਦ੍ਰਿਯਾ.
੩੯੫. ਤਤ੍ਥ ਜੀਵਿਤਰੂਪਞ੍ਚ, ਅਟ੍ਠੇਤ੍ਥ ਨ ਤੁ ਗਯ੍ਹਰੇ;
ਤਸ੍ਮਾ ਨਾਮਿਨ੍ਦ੍ਰਿਯਾਨੇਵ, ਦਸਪਞ੍ਚ ਵਿਨਿਦ੍ਦਿਸੇ.
੩੯੬. ਸਮ੍ਮਾਦਿਟ੍ਠਿ ਚ ਸਙ੍ਕਪ੍ਪੋ, ਵਾਯਾਮੋ ਵਿਰਤਿਤ੍ਤਯਂ;
ਸਮ੍ਮਾਸਤਿ ਸਮਾਧਿ ਚ, ਮਿਚ੍ਛਾਦਿਟ੍ਠਿ ਚ ਧਮ੍ਮਤੋ.
੩੯੭. ਮਗ੍ਗਙ੍ਗਾਨਿ ਨਵੇਤਾਨਿ, ਦ੍ਵਾਦਸਾਪਿ ਯਤੋ ਦ੍ਵਿਧਾ;
ਸਮ੍ਮਾਮਿਚ੍ਛਾਤਿ ਸਙ੍ਕਪ੍ਪੋ, ਵਾਯਾਮੋ ਚ ਸਮਾਧਿ ਚ.
੩੯੮. ਲੋਕਪਾਲਦੁਕਞ੍ਚੇਵ, ਹਿਰੋਤ੍ਤਪ੍ਪਮਥਾਪਰਂ;
ਅਹਿਰੀਕਮਨੋਤ੍ਤਪ੍ਪਂ, ਦੁਕਂ ਲੋਕਵਿਨਾਸਕਂ.
੩੯੯. ਪਞ੍ਚ ਸਦ੍ਧਾਦਯੋ ਚੇਤਿ, ਬਲਧਮ੍ਮਾ ਨਵੇਰਿਤਾ;
ਕਣ੍ਹਸੁਕ੍ਕਵਸੇਨਾਪਿ, ਪਟਿਪਕ੍ਖੇ ਅਕਮ੍ਪਿਯਾ.
੪੦੦. ਛ ਹੇਤੂ ਹੇਤੁਰਾਸਿਮ੍ਹਿ,
ਲੋਭਾਲੋਭਾਦਿਕਾ ਤਿਕਾ;
ਮੋਮੂਹੇ ਕਙ੍ਖਿਤੁਦ੍ਧਚ੍ਚਾ,
ਤਤ੍ਥ ਵੁਤ੍ਤਾਤਿ ਅਟ੍ਠਧਾ.
੪੦੧. ਮਿਚ੍ਛਾਦਿਟ੍ਠਿ ਅਭਿਜ੍ਝਾ ਚ, ਬ੍ਯਾਪਾਦੋ ਵਿਰਤਿਤ੍ਤਯਂ;
ਸਮ੍ਮਾਦਿਟ੍ਠਿਨਭਿਜ੍ਝਾ ਚ, ਅਬ੍ਯਾਪਾਦੋ ਚ ਚੇਤਨਾ.
੪੦੨. ਦਸ ਕਮ੍ਮਪਥਾਨੇਤ੍ਥ, ਵੁਤ੍ਤਾ ਵਿਰਤਿਚੇਤਨਾ;
ਲੋਕਪਾਲਵਿਨਾਸਾਤਿ, ਵੁਤ੍ਤਾ ਲੋਕਦੁਕਾ ਦ੍ਵਿਧਾ.
੪੦੩. ਪਸ੍ਸਦ੍ਧਿਆਦਿਯੁਗਲ਼ਾ, ਨਿਰਵਜ੍ਜਾ ਛ ਰਾਸਯੋ;
ਸਤਿ ਚ ਸਮ੍ਪਜਞ੍ਞਞ੍ਚ, ਉਪਕਾਰਦੁਕਂ ਭਵੇ.
੪੦੪. ਯੁਗਨਨ੍ਧਦੁਕਂ ਨਾਮ, ਸਮਥੋ ਚ ਵਿਪਸ੍ਸਨਾ;
ਪਗ੍ਗਹੋ ਚ ਅਵਿਕ੍ਖੇਪੋ, ਸਮਥਦ੍ਦੁਕਮੀਰਿਤਂ.
੪੦੫. ਯੇ ਸਰੂਪੇਨ ਨਿਦ੍ਦਿਟ੍ਠਾ, ਚਿਤ੍ਤੁਪ੍ਪਾਦੇਸੁ ਤਾਦਿਨਾ;
ਤੇ ਠਪੇਤ੍ਵਾਵਸੇਸਾ ਤੁ, ਯੇਵਾਪਨਕਨਾਮਕਾ.
੪੦੬. ਛਨ੍ਦੋ ਚ ਅਧਿਮੋਕ੍ਖੋ ਚ, ਤਤ੍ਰਮਜ੍ਝਤ੍ਤਤਾ ਤਥਾ;
ਉਦ੍ਧਚ੍ਚਂ ਮਨਸਿਕਾਰੋ, ਪਞ੍ਚਾਪਣ੍ਣਕਨਾਮਕਾ.
੪੦੭. ਮਾਨੋ ਚ ਥਿਨਮਿਦ੍ਧਞ੍ਚ, ਇਸ੍ਸਾ ਮਚ੍ਛਰਿਯਂ ਤਥਾ;
ਕੁਕ੍ਕੁਚ੍ਚਮਪ੍ਪਮਞ੍ਞਾ ਚ, ਤਿਸ੍ਸੋ ਵਿਰਤਿਯੋਪਿ ਚ.
੪੦੮. ਏਤੇ ਅਨਿਯਤਾ ਨਾਮ, ਏਕਾਦਸ ਯਥਾਰਹਂ;
ਤਤੋ ਚ ਸੇਸਾ ਸਬ੍ਬੇਪਿ, ਨਿਯਤਾਤਿ ਪਕਿਤ੍ਤਿਤਾ.
੪੦੯. ਕੇਚਿ ਰਾਸਿਂ ਨ ਭਜਨ੍ਤਿ, ਕੇਚਿ ਚਾਨਿਯਤਾ ਯਤੋ;
ਤਸ੍ਮਾ ਯੇਵਾਪਨਾਤੇਵ, ਧਮ੍ਮਾ ਸੋਲ਼ਸ ਦੇਸਿਤਾ.
੪੧੦. ਸਤ੍ਤਤਿਂਸਾਵਸੇਸਾ ਤੁ, ਤਤ੍ਥ ਤਤ੍ਥ ਯਥਾਰਹਂ;
ਸਰੂਪੇਨੇਵ ਨਿਦ੍ਦਿਟ੍ਠਾ, ਚਿਤ੍ਤੁਪ੍ਪਾਦੇਸੁ ਸਬ੍ਬਥਾ.
੪੧੧. ਦੇਸਿਤਾਨੁਤ੍ਤਰੁਦ੍ਧਚ੍ਚੇ, ਨਾਮਤੋ ਵਿਰਤੁਦ੍ਧਵਾ;
ਤਥਾਨੁਤ੍ਤਰਚਿਤ੍ਤੇਸੁ, ਨਿਯਤਂ ਵਿਰਤਿਤ੍ਤਯਂ.
੪੧੨. ਚਿਤ੍ਤਂ ਵਿਤਕ੍ਕੋ ਸਦ੍ਧਾ ਚ,
ਹਿਰੋਤ੍ਤਪ੍ਪਬਲਦ੍ਵਯਂ;
ਅਲੋਭੋ ਚ ਅਦੋਸੋ ਚ,
ਲੋਭੋ ਦੋਸੋ ਚ ਦਿਟ੍ਠਿ ਚ.
੪੧੩. ਅਹਿਰੀਕਮਨੋਤ੍ਤਪ੍ਪਂ,
ਉਦ੍ਧਚ੍ਚਂ ਵਿਰਤਿਤ੍ਤਯਂ;
ਸੋਲ਼ਸੇਤੇ ਯਥਾਯੋਗਂ,
ਦ੍ਵੀਸੁ ਠਾਨੇਸੁ ਦੇਸਿਤਾ.
੪੧੪. ਵੇਦਨਾ ਤੀਸੁ ਵੀਰਿਯਂ, ਸਤਿ ਚ ਚਤੁਰਾਸਿਕਾ;
ਸਮਾਧਿ ਛਸੁ ਪਞ੍ਞਾ ਚ, ਸਤ੍ਤਟ੍ਠਾਨੇਸੁ ਦੀਪਿਤਾ.
੪੧੫. ਏਕਵੀਸ ਪਨਿਚ੍ਚੇਤੇ, ਸਵਿਭਤ੍ਤਿਕਨਾਮਕਾ;
ਸੇਸਾ ਦ੍ਵਤ੍ਤਿਂਸਤਿ ਧਮ੍ਮਾ, ਸਬ੍ਬੇਪਿ ਅਵਿਭਤ੍ਤਿਕਾਤਿ.
ਇਤਿ ਚੇਤਸਿਕਵਿਭਾਗੇ ਰਾਸਿਸਰੂਪਕਥਾ ਨਿਟ੍ਠਿਤਾ.
ਏਕਾਦਸਮੋ ਪਰਿਚ੍ਛੇਦੋ.