੯. ਨਵਮੋ ਪਰਿਚ੍ਛੇਦੋ
ਪੁਞ੍ਞਵਿਪਾਕਪਚ੍ਚਯਨਿਦ੍ਦੇਸਵਣ੍ਣਨਾ
੫੬੦-੨. ਬਾਤ੍ਤਿਂਸਪਾਕਚਿਤ੍ਤਾਨਿ, ਲੋਕਿਕਾਨੇਵ ਯਾਨਿ ਹਿ;
ਏਤੇਸਂ ਪਾਕਚਿਤ੍ਤਾਨਂ, ਪਟਿਸਨ੍ਧਿਪਵਤ੍ਤਿਸੁ.
ਯਾਨਿ ਲੋਕਿਕਾਨਿ ਏਵ ਬਾਤ੍ਤਿਂਸ ਪਾਕਚਿਤ੍ਤਾਨਿ ਹੋਨ੍ਤਿ, ਏਤੇਸਂ ਪਾਕਚਿਤ੍ਤਾਨਂ ਪੁਞ੍ਞਾਪੁਞ੍ਞਾਦਿਸਙ੍ਖਾਰਾ ਭਵਾਦੀਸੁ ਯੋਨਿਗਤਿਵਿਞ੍ਞਾਣਟ੍ਠਿਤਿਸਤ੍ਤਾਵਾਸੇਸੁ ਪਟਿਸਨ੍ਧਿਪਵਤ੍ਤੀਸੁ ਯਥਾ ਯੇਨ ਪਕਾਰੇਨ ਪਚ੍ਚਯਾ ਹੋਨ੍ਤਿ ਏਵ, ਇਮੇਸਂ ਵਿਪਾਕਚਿਤ੍ਤਾਨਂ ਤੇਪਿ ਸਙ੍ਖਾਰਾ ਭਵਾਦੀਸੁ ਯੋਨਿਗਤਿਵਿਞ੍ਞਾਣਟ੍ਠਿਤਿਸਤ੍ਤਾਵਾਸੇਸੁ ਪਟਿਸਨ੍ਧਿਪਵਤ੍ਤੀਸੁ ਤਥਾ ਤੇਨ ਪਕਾਰੇਨ ਵਿਭਾਵਿਨਾ ਪਣ੍ਡਿਤੇਨ ਵਿਞ੍ਞਾਤਬ੍ਬਾ. ਤਯੋ ਭਵਾ ਚਤਸ੍ਸੋ ਚ ਯੋਨਿਯੋ ਕਾਮਭਵਰੂਪਭਵਅਰੂਪਭਵਵਸੇਨ ਤਯੋ ਭਵਾ, ਅਣ੍ਡਜਜਲਾਬੁਜਸਂਸੇਦਜਓਪਪਾਤਿਕਯੋਨਿਵਸੇਨ ਚਤਸ੍ਸੋ ਚ ਯੋਨਿਯੋ, ਨਿਰਯਗਤਿਤਿਰਚ੍ਛਾਨਗਤਿਪੇਤਗਤਿਮਨੁਸ੍ਸਗਤਿਦੇਵਗਤਿਵਸੇਨ ਗਤਿਪਞ੍ਚਕਂ, ਸਨ੍ਧਿਸਞ੍ਞਾਯ ਪਟਿਸਨ੍ਧਿਸਞ੍ਞਾਯ ਨਾਨਤ੍ਤਾ ਨਾਨਾਭਾਵਤੋ, ਕਾਯਸ੍ਸਾਪਿ ਚ ਰੂਪਕਾਯਸ੍ਸਾਪਿ ਚ ਨਾਨਤ੍ਤਾ ਨਾਨਾਭਾਵਤੋ ਕਾਮਸੁਗਤਿਯੋ, ਨਾਨਾ ਅਤ੍ਤਾ ਸਭਾਵੋ ਏਤਸ੍ਸਾਤਿ ਨਾਨਤ੍ਤਾ, ਨਾਨਤ੍ਤੋ ਰੂਪਕਾਯੋ ਏਤੇਸਨ੍ਤਿ ਨਾਨਤ੍ਤਕਾਯਾ, ਨਾਨਾ ਸਭਾਵੋ ਏਤਸ੍ਸਾਤਿ ਨਾਨਤ੍ਤਾ, ਨਾਨਤ੍ਤਾਯੇਵ ਸਞ੍ਞਾ ਨਾਨਤ੍ਤਸਞ੍ਞਾ, ਸਾ ਏਤੇਸਂ ਅਤ੍ਥੀਤਿ ਨਾਨਤ੍ਤਸਞ੍ਞੀ ਨਾਮ, ਪਠਮਜ੍ਝਾਨਭੂਮਿ ਚ ਚਤੁਰਾਪਾਯਭੂਮਿਯੋ ਚ ਨਾਨਤ੍ਤਕਾਯਏਕਤ੍ਤਸਞ੍ਞੀ ਨਾਮ, ਦੁਤਿਯਜ੍ਝਾਨਭੂਮਿ ਏਕਤ੍ਤਕਾਯਨਾਨਤ੍ਤਸਞ੍ਞੀ ਨਾਮ, ਤਤਿਯਜ੍ਝਾਨਭੂਮਿਵੇਹਪ੍ਫਲਭੂਮਿਸੁਦ੍ਧਾਵਾਸਭੂਮਿਯੋ ਏਕਤ੍ਤਕਾਯਏਕਤ੍ਤਸਞ੍ਞੀ ਨਾਮ, ਹੇਟ੍ਠਾ ਠਿਤਾ ਰੂਪੇਹਿ ਸਦ੍ਧਿਂ ਸਤ੍ਤਵਿਞ੍ਞਾਣਟ੍ਠਿਤਿਯੋ, ਤਿਟ੍ਠਨ੍ਤਿ ਵਿਞ੍ਞਾਣਾਨਿ ਏਤ੍ਥਾਤਿ ਠਿਤਿਯੋ, ਵਿਞ੍ਞਾਣਾਨਂ ਠਿਤਿਯੋ ਵਿਞ੍ਞਾਣਟ੍ਠਿਤਿਯੋ, ਵਿਞ੍ਞਾਣਸ੍ਸ ਅਭਾਵਤੋ ਅਸਞ੍ਞੀਭੂਮਿ ਨ ਗਯ੍ਹਤੇ, ਚਤੁਤ੍ਥਾਰੁਪ੍ਪਭੂਮਿ ਚ ਪਟੁਵਿਞ੍ਞਾਣਾਭਾਵਤੋ ਨ ਗਯ੍ਹਤੇ. ਸਤ੍ਤਾਵਾਸਵਸੇਨ ਅਸਞ੍ਞੀਭੂਮਿਂ, ਚਤੁਤ੍ਥਾਰੁਪ੍ਪਭੂਮਿਞ੍ਚ ਪਨ ਗਹੇਤ੍ਵਾ ਤੇ ਸਤ੍ਤਾਵਾਸਾ ਨਵ ਏਵ ਹੋਨ੍ਤਿ.
੫੬੩-੮. ਕਾਮੇ ਪੁਞ੍ਞਾਭਿਸਙ੍ਖਾਰਸਞ੍ਞਿਤਾ ਅਟ੍ਠ ਚੇਤਨਾ ਪੂਰੇਨ੍ਤਿ ਅਤ੍ਤਨੋ ਕਾਰਕਂ ਪੂਰੇਨ੍ਤਿ ਚ, ਅਜ੍ਝਾਸਯਂ ਪੁਜ੍ਜਞ੍ਚ ਭਵਂ ਨਿਬ੍ਬਤ੍ਤੇਨ੍ਤੀਤਿ ਪੁਞ੍ਞਾਨਿ, ਅਭਿਸਙ੍ਖਰੋਨ੍ਤਿ ਵਿਪਾਕਂ, ਕਮ੍ਮਜਰੂਪਞ੍ਚਾਤਿ ਅਭਿਸਙ੍ਖਾਰਾ, ਪੁਞ੍ਞਾਨਿ ਏਵ ਅਭਿਸਙ੍ਖਾਰਾ ਪੁਞ੍ਞਾਭਿਸਙ੍ਖਾਰਾ, ਤੇਯੇਵ ਸਞ੍ਞਿਤਾ ਪੁਞ੍ਞਾਭਿਸਙ੍ਖਾਰਸਞ੍ਞਿਤਾ, ਕਾਮੇ ਪੁਞ੍ਞਾਭਿਸਙ੍ਖਾਰਸਞ੍ਞਿਤਾ ਅਟ੍ਠ ਚੇਤਨਾ. ਨਵਨ੍ਨਂ ਪਾਕਚਿਤ੍ਤਾਨਂ ਉਪੇਕ੍ਖਾਯੁਤ੍ਤਾਹੇਤੁਕਮਹਾਵਿਪਾਕਵਸੇਨ ਨਵਨ੍ਨਂ ਪਾਕਚਿਤ੍ਤਾਨਂ ਕਾਮਸੁਗਤਿਯਂ ਪਨ ਨਾਨਾ ਵਤ੍ਤਮਾਨਚੇਤਨਾਖਣਤੋ ਪਰਂ ਖਣਂ ਏਤਸ੍ਸਾਤਿ ਨਾਨਾਖਣਂ, ਤਂ ਏਵ ਨਾਨਕ੍ਖਣਿਕਂ, ਤਮੇਵ ਕਮ੍ਮਂ ਨਾਨਕ੍ਖਣਿਕਕਮ੍ਮਂ, ਵਤ੍ਤਮਾਨਚੇਤਨਾਤੋ ਪਰਾ ਅਤੀਤਚੇਤਨਾਤਿ ਅਤ੍ਥੋ. ਬਲਵਾ ਨਿਸ੍ਸਯਪਚ੍ਚਯੋ ਉਪਨਿਸ੍ਸਯਪਚ੍ਚਯੋ, ਬਲਵਤ੍ਥੋ ਚੇਤ੍ਥ ਉਪ-ਸਦ੍ਦੋ, ਬਲਵਪਚ੍ਚਯੋਤਿ ਅਤ੍ਥੋ, ਨਾਨਕ੍ਖਣਿਕਕਮ੍ਮਪਚ੍ਚਯਵਸੇਨ ਬਲਵਪਚ੍ਚਯਵਸੇਨ ਚਾਤਿ ਅਤ੍ਥੋ. ਦ੍ਵੇਧਾ ਦ੍ਵੀਹਿ ਪਕਾਰੇਹਿ ਤੇਸਂ ਪਟਿਸਨ੍ਧਿਯਂ ਪਚ੍ਚਯਾ ਭਵਨ੍ਤਿ, ਤਾ ਅਟ੍ਠ ਕਾਮਾਵਚਰਮਹਾਕੁਸਲਚੇਤਨਾ ਉਪੇਕ੍ਖਾਸਹਿਤਾਹੇਤੁਮਨੋਵਿਞ੍ਞਾਣਧਾਤੁਯਾ ਵਿਨਾ ਉਪੇਕ੍ਖਾਸਹਗਤਾਹੇਤੁਮਨੋਵਿਞ੍ਞਾਣਧਾਤੁਂ ਵਜ੍ਜੇਤ੍ਵਾ ਪਰਿਤ੍ਤਪਾਕਾਨਂ ਚਕ੍ਖੁਸੋਤਘਾਨਜਿਵ੍ਹਾਕਾਯਸਮ੍ਪਟਿਚ੍ਛਨਸੋਮਨਸ੍ਸਯੁਤ੍ਤਾਹੇਤੁਕਕੁਸਲਵਿਪਾਕਾਨਂ ਦ੍ਵੇਧਾ ਨਾਨਕ੍ਖਣਿਕਕਮ੍ਮੂਪਨਿਸ੍ਸਯਪਚ੍ਚਯੇਹਿ ਪਵਤ੍ਤਿਯਂ ਪਚ੍ਚਯਾ ਹੋਨ੍ਤਿ. ਤਾਯੇਵ ਚੇਤਨਾ ਤਾ ਏਵ ਅਟ੍ਠ ਕਾਮਾਵਚਰਮਹਾਕੁਸਲਚੇਤਨਾ ਰੂਪਭਵੇ ਪਞ੍ਚਨ੍ਨਂ ਪਾਕਚਿਤ੍ਤਾਨਂ ਕੁਸਲਵਿਪਾਕਚਿਤ੍ਤਾਨਂ ਚਕ੍ਖੁਸੋਤਸਮ੍ਪਟਿਚ੍ਛਨਸੋਮਨਸ੍ਸਯੁਤ੍ਤਉਪੇਕ੍ਖਾਯੁਤ੍ਤਸਨ੍ਤੀਰਣਾਨਂ ਦ੍ਵੇਧਾ ਨਾਨਕ੍ਖਣਿਕਕਮ੍ਮੂਪਨਿਸ੍ਸਯਪਚ੍ਚਯੇਹਿ ਪਵਤ੍ਤਿਯਂ ਪਚ੍ਚਯਾ ਹੋਨ੍ਤਿ. ਅਟ੍ਠਨ੍ਨਂ ਤੁ ਪਰਿਤ੍ਤਾਨਂ, ਕਾਮੇ ਦੁਗ੍ਗਤਿਯਂ ਤਥਾ ਅਟ੍ਠਨ੍ਨਂ ਪਰਿਤ੍ਤਾਨਂ ਕੁਸਲਵਿਪਾਕਾਨਂ ਚਕ੍ਖੁਸੋਤਘਾਨਜਿਵ੍ਹਾਕਾਯਸਮ੍ਪਟਿਚ੍ਛਨਾਨਂ, ਦ੍ਵਿਨ੍ਨਂ ਸਨ੍ਤੀਰਣਾਨਞ੍ਚ ਪਵਤ੍ਤੇ ਪਵਤ੍ਤਿਕ੍ਖਣੇ ਪਚ੍ਚਯਾ ਹੋਨ੍ਤਿ, ਪਟਿਸਨ੍ਧਿਯਂ ਪਟਿਸਨ੍ਧਿਕ੍ਖਣੇ ਪਨ ਪਚ੍ਚਯਾ ਨ ਹੋਨ੍ਤਿ. ਵੁਤ੍ਤਪ੍ਪਕਾਰਾਵ ਕਾਮੇ ਸੁਗਤਿਯਂ ਯਥਾਵੁਤ੍ਤਪ੍ਪਕਾਰਾਵ ਅਟ੍ਠ ਕਾਮਾਵਚਰਮਹਾਕੁਸਲਚੇਤਨਾ ਕਾਮਸੁਗਤਿਯਂ ਤਥਾ ਸੋਲ਼ਸਨ੍ਨਂ ਕੁਸਲਵਿਪਾਕਾਨਂ ਪਵਤ੍ਤੇ ਪਵਤ੍ਤਿਕ੍ਖਣੇ ਦ੍ਵੇਧਾ ਨਾਨਕ੍ਖਣਿਕਕਮ੍ਮੂਪਨਿਸ੍ਸਯਪਚ੍ਚਯੇਹਿ ਪਚ੍ਚਯਾ ਹੋਨ੍ਤਿ, ਪਵਤ੍ਤੇ ਪਵਤ੍ਤਿਕ੍ਖਣੇ ਸਤ੍ਤਨ੍ਨਂ ਕੁਸਲਵਿਪਾਕਾਨਂ ਪਚ੍ਚਯਾ ਹੋਨ੍ਤਿ. ਪਟਿਸਨ੍ਧਿਯਂ ਪਟਿਸਨ੍ਧਿਕ੍ਖਣੇ ਨਵਨ੍ਨਂ ਕੁਸਲਵਿਪਾਕਚਿਤ੍ਤਾਨਂ ਪਚ੍ਚਯਾ ਹੋਨ੍ਤਿ.
੫੬੯-੭੪. ਰੂਪੇ ਪੁਞ੍ਞਾਭਿਸਙ੍ਖਾਰਾ, ਰੂਪਾਵਚਰਭੂਮਿਯਂ ਪਞ੍ਚਨ੍ਨਂ ਪਾਕਚਿਤ੍ਤਾਨਂ ਪਟਿਸਨ੍ਧਿਯਂ ਪਟਿਸਨ੍ਧਿਕ੍ਖਣੇ ਪਚ੍ਚਯਾ ਹੋਨ੍ਤਿਮਾਪੁਞ੍ਞਸਙ੍ਖਾਰਾ, ਕਾਮੇ ਦੁਗ੍ਗਤਿਯਂ ਦ੍ਵਿਧਾ ਇਮੇ ਅਪੁਞ੍ਞਾਭਿਸਙ੍ਖਾਰਾ, ਇਮਾ ਕੁਸਲਪਟਿਪਕ੍ਖਾ ਉਦ੍ਧਚ੍ਚਵਜ੍ਜਾ ਏਕਾਦਸ ਚੇਤਨਾ ਕਾਮਦੁਗ੍ਗਤਿਯਂ ਏਕਸ੍ਸ ਪਟਿਸਨ੍ਧਿਵਿਞ੍ਞਾਣਸ੍ਸ ਪਟਿਸਨ੍ਧਿਯਂ ਪਟਿਸਨ੍ਧਿਕ੍ਖਣੇ ਦ੍ਵਿਧਾ ਨਾਨਕ੍ਖਣਿਕਕਮ੍ਮੂਪਨਿਸ੍ਸਯਪਚ੍ਚਯੇਹਿ ਪਚ੍ਚਯਾ ਹੋਨ੍ਤਿ. ਦ੍ਵਾਦਸ ਅਕੁਸਲਚੇਤਨਾ ਪਵਤ੍ਤੇ ਪਵਤ੍ਤਿਕ੍ਖਣੇ ਏਵ ਛਨ੍ਨਂ ਚਕ੍ਖੁਸੋਤਘਾਨਜਿਵ੍ਹਾਕਾਯਸਮ੍ਪਟਿਚ੍ਛਨਾਨਂ ਅਕੁਸਲਵਿਪਾਕਾਨਂ ਪਚ੍ਚਯਾ ਹੋਨ੍ਤਿ, ਪਟਿਸਨ੍ਧਿਯਂ ਪਟਿਸਨ੍ਧਿਕ੍ਖਣੇ ਪਚ੍ਚਯਾ ਨੋ ਹੋਨ੍ਤਿ. ਸਤ੍ਤਨ੍ਨਮ੍ਪਿ ਭਵਨ੍ਤੇਵ ਪਵਤ੍ਤੇ ਪਵਤ੍ਤਿਕ੍ਖਣੇ ਪਟਿਸਨ੍ਧਿਯਂ ਪਟਿਸਨ੍ਧਿਕ੍ਖਣੇ ਅਕੁਸਲਵਿਪਾਕਾਨਿ ਸਤ੍ਤਨ੍ਨਂ ਚਕ੍ਖੁਸੋਤਘਾਨਜਿਵ੍ਹਾਕਾਯਸਮ੍ਪਟਿਚ੍ਛਨਸਨ੍ਤੀਰਣਾਨਂ ਪਚ੍ਚਯਾ ਭਵਨ੍ਤਿ. ਕਾਮੇ ਸੁਗਤਿਯਂ ਤੇਸਂ, ਸਤ੍ਤਨ੍ਨਮ੍ਪਿ ਤਥੇਵ ਚ ਦ੍ਵਾਦਸਾਕੁਸਲਚੇਤਨਾ ਕਾਮੇ ਸੁਗਤਿਯਂ ਤਥੇਵ ਚ ਤੇਸਂ ਸਤ੍ਤਨ੍ਨਂ ਅਕੁਸਲਵਿਪਾਕਾਨਂ ਪਵਤ੍ਤੇ ਪਵਤ੍ਤਿਕ੍ਖਣੇ ਪਚ੍ਚਯਾ ਹੋਨ੍ਤਿ, ਪਟਿਸਨ੍ਧਿਯਂ ਪਟਿਸਨ੍ਧਿਕ੍ਖਣੇ ਪਚ੍ਚਯਾ ਨ ਹੋਨ੍ਤਿ. ਵਿਞ੍ਞਾਣਾਨਂ ਚਤੁਨ੍ਨਮ੍ਪਿ, ਤੇਸਂ ਰੂਪਭਵੇ ਤਥਾ ਤਾਯੇਵ ਦ੍ਵਾਦਸਾਕੁਸਲਚੇਤਨਾ ਰੂਪਭਵੇ ਤੇਸਂ ਚਤੁਨ੍ਨਂ ਅਕੁਸਲਵਿਪਾਕਾਨਂ ਚਕ੍ਖੁਸੋਤਸਮ੍ਪਟਿਚ੍ਛਨਸਨ੍ਤੀਰਣਸਙ੍ਖਾਤਾਨਂ ਵਿਞ੍ਞਾਣਾਨਂ ਤਥਾ ਪਵਤ੍ਤੇ ਪਵਤ੍ਤਿਕ੍ਖਣੇ ਪਚ੍ਚਯਾ ਹੋਨ੍ਤਿ, ਪਟਿਸਨ੍ਧਿਯਂ ਪਟਿਸਨ੍ਧਿਕ੍ਖਣੇ ਪਚ੍ਚਯਾ ਨ ਹੋਨ੍ਤਿ. ਸੋ ਚ ਕਾਮਭਵੇਨਿਟ੍ਠਰੂਪਾਦਿਉਪਲਦ੍ਧਿਯਂ ਸੋ ਚ ਅਪੁਞ੍ਞਾਭਿਸਙ੍ਖਾਰੋ ਕਾਮਭਵੇ ਅਨਿਟ੍ਠਰੂਪਾਦਿਉਪਲਦ੍ਧਿਯਂ ਅਮਨਾਪਰੂਪਾਦੀਨਿ ਆਰਮ੍ਮਣਾਨਿ ਉਪਲਦ੍ਧਿਯਂ ਤੇਸਂ ਚਤੁਨ੍ਨਂ ਅਪੁਞ੍ਞਜਾਨਂ ਵਿਞ੍ਞਾਣਾਨਂ ਪਚ੍ਚਯੋ ਹੋਤਿ. ਹਿ ਸਚ੍ਚਂ ‘‘ਸੋ ਚ ਕਾਮਭਵੇਨਿਟ੍ਠ-ਰੂਪਾਦਿਉਪਲਦ੍ਧਿਯ’’ਨ੍ਤਿਆਦਿਕਂ ਵਚਨਂ. ਅਨਿਟ੍ਠਰੂਪਾਦਯੋ ਨਾਮ ਵਿਸਯਾ ਬ੍ਰਹ੍ਮਲੋਕੇ ਨ ਵਿਜ੍ਜਰੇ ਨ ਵਿਜ੍ਜਨ੍ਤਿ.
੫੭੫-੬. ਤਥੇਵਾਨੇਞ੍ਜਸਙ੍ਖਾਰੋ ਨ ਇਞ੍ਜਤਿ ਨ ਫਨ੍ਦਤਿ ਨ ਚਲਤੀਤਿ ਆਨੇਞ੍ਜਂ, ਆਨੇਞ੍ਜਞ੍ਚ ਤਂ ਸਙ੍ਖਾਰੋ ਚਾਤਿ ਆਨੇਞ੍ਜਸਙ੍ਖਾਰੋ, ਤਥਾ ਏਵ ਆਨੇਞ੍ਜਸਙ੍ਖਾਰੋ ਅਰੂਪਾਵਚਰਭੂਮਿਯਂ ਚਤੁਨ੍ਨਂ ਪਾਕਚਿਤ੍ਤਾਨਂ ਪਵਤ੍ਤੇ ਪਵਤ੍ਤਿਕ੍ਖਣੇ ਪਟਿਸਨ੍ਧਿਯਂ ਪਟਿਸਨ੍ਧਿਕ੍ਖਣੇ ਪਚ੍ਚਯੋ ਹੋਤਿ. ਭਵੇਸ੍ਵੇਤੇ ਭਵੇਸੁ ਏਤੇ ਵੁਤ੍ਤਪ੍ਪਕਾਰਾ ਪਚ੍ਚਯਾ ਵੁਤ੍ਤਪ੍ਪਕਾਰੇਨ ਪਟਿਸਨ੍ਧਿਪਵਤ੍ਤੀਸੁ ਯਥਾ ਚ ਯੇਨ ਯੇਨ ਚ ਪਕਾਰੇਨ ਨਾਨਕ੍ਖਣਿਕਕਮ੍ਮੂਪਨਿਸ੍ਸਯਪਚ੍ਚਯੇਹਿ ਪਚ੍ਚਯਾ ਹੋਨ੍ਤਿ, ਤੇਨ ਪਚ੍ਚਯਾ ਤਥਾ ਤੇਨ ਤੇਨ ਪਕਾਰੇਨ ਵਿਭਾਵਿਨਾ ਵਿਜਾਨਨ੍ਤੇਨ ਪਣ੍ਡਿਤੇਨ ਞੇਯ੍ਯਾ.
੫੭੭. ਏਸੇਵ ਚ ਨਯੋ ਞੇਯ੍ਯੋ, ਯੋਨਿਆਦੀਸੁ ਯੋਨਿਗਤਿਵਿਞ੍ਞਾਣਟ੍ਠਿਤਿਸਤ੍ਤਾਵਾਸੇਸੁ ਏਸੇਵ ਚ ਨਯੋ ਭਵੇਸੁ ਮਯਾ ਵੁਤ੍ਤੋ ਏਵ ਨਯੋ ਪਣ੍ਡਿਤੇਨ ਞੇਯ੍ਯੋ. ਤਤ੍ਰਿਦਂ ਤਤ੍ਰ ਭਵੇਸੁ ਆਦਿਤੋ ਪਟ੍ਠਾਯ ਵੁਤ੍ਤਂ ਇਦਂ ਵਚਨਂ ਮੁਖਮਤ੍ਤਨਿਦਸ੍ਸਨਂ ਉਪਾਯਮਤ੍ਤਦੀਪਨਂ ਹੋਤਿ.
੫੭੮-੮੧. ਅਵਿਸੇਸੇਨ ਪੁਞ੍ਞਾਭਿ-ਸਙ੍ਖਾਰੋ ਦ੍ਵਿਭਵੇਸੁਪਿ ਕਾਮਪੁਞ੍ਞਾਭਿਸਙ੍ਖਾਰਵਸੇਨ, ਰੂਪਪੁਞ੍ਞਾਭਿਸਙ੍ਖਾਰਵਸੇਨ ਚ ਪੁਞ੍ਞਾਭਿਸਙ੍ਖਾਰੋ ਅਵਿਸੇਸੇਨ ਸਮਾਨਭਾਵੇਨ ਦ੍ਵੀਸੁ ਭਵੇਸੁ ਕਾਮਰੂਪਭਵੇਸੁ ਪਟਿਸਨ੍ਧਿਂ ਦਤ੍ਵਾ ਸੋ ਸਙ੍ਖਾਰੋ ਸਬ੍ਬਪਾਕਂ ਜਨੇਤਿ ਨਿਬ੍ਬਤ੍ਤੇਤਿ. ਤਥਾ ਚਤੂਸੁ ਵਿਞ੍ਞੇਯ੍ਯੋ, ਅਣ੍ਡਜਾਦੀਸੁ ਯੋਨਿਸੁ ਦ੍ਵਿਭਵੇਸੁ ਪੁਞ੍ਞਾਭਿਸਙ੍ਖਾਰੋ ਵਿਯ ਤਥਾ ਚਤੂਸੁ ਅਣ੍ਡਜਾਦੀਸੁ ਸੋ ਪੁਞ੍ਞਾਭਿਸਙ੍ਖਾਰੋ ਪਣ੍ਡਿਤੇਨ ਞੇਯ੍ਯੋ. ‘‘ਅਣ੍ਡਜਾਦੀਸੂ’’ਤਿ ਵਚਨਂ ਪਦੁਮਪਚ੍ਚੇਕਬੁਦ੍ਧਾਨਂ ਮਨੁਸ੍ਸਤ੍ਤਂ ਸਨ੍ਧਾਯ ਵੁਤ੍ਤਂ. ਬਹੁਦੇਵਮਨੁਸ੍ਸਾਨਂ ਵਸੇਨ ਦ੍ਵੀਸੁ ਗਤੀਸੁ ਏਵ ਚ ਤਥਾ ਸੋ ਪੁਞ੍ਞਾਭਿਸਙ੍ਖਾਰੋ ਪਣ੍ਡਿਤੇਨ ਞੇਯ੍ਯੋ. ਤਥਾ ਨਾਨਤ੍ਤਕਾਯਾਦਿ-ਵਿਞ੍ਞਾਣਾਨਂ ਠਿਤੀਸੁਪਿ ਨਾਨਤ੍ਤਕਾਯਨਾਨਤ੍ਤਸਞ੍ਞੀਨਾਨਤ੍ਤਕਆਯਏਕਤ੍ਤਸਞ੍ਞੀ ਏਕਤ੍ਤਕਾਯਨਾਨਤ੍ਤਸਞ੍ਞੀ ਏਕਤ੍ਤਕਾਯਏਕਤ੍ਤਸਞ੍ਞੀਨਂ ਵਸੇਨ ਚਤੂਸੁ ਵਿਞ੍ਞਾਣਟ੍ਠਿਤੀਸੁ ਸੋ ਪੁਞ੍ਞਾਭਿਸਙ੍ਖਾਰੋ ਪਣ੍ਡਿਤੇਨ ਞੇਯ੍ਯੋ. ਨਾਨਤ੍ਤਕਾਯਨਾਨਤ੍ਤਸਞ੍ਞੀਨਾਨਤ੍ਤਕਾਯਏਕਤ੍ਤਸਞ੍ਞੀਏਕਤ੍ਤਕਾਯਨਾਨਤ੍ਤਸਞ੍ਞੀਏਕਤ੍ਤਕਾਯਏਕਤ੍ਤਸਞ੍ਞੀਨਂ ਵਸੇਨ ਵੁਤ੍ਤਪ੍ਪਕਾਰਸ੍ਮਿਂ ਚਤੁਬ੍ਬਿਧੇ ਸਤ੍ਤਾਵਾਸੇ ਤਥਾ ਸੋ ਪੁਞ੍ਞਾਭਿਸਙ੍ਖਾਰੋ ਪਣ੍ਡਿਤੇਨ ਞੇਯ੍ਯੋ. ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਪੁਞ੍ਞਾਭਿਸਙ੍ਖਾਰੋ ਭਵਾਦੀਸੁ ਭਵਯੋਨਿਗਤਿਵਿਞ੍ਞਾਣਟ੍ਠਿਤਿਸਤ੍ਤਾਵਾਸੇਸੁ ਯਥਾਰਹਂ ਸੋਲ਼ਸਨ੍ਨਂ ਕਾਮਕੁਸਲਪਾਕਾਨਂ, ਪਞ੍ਚਨ੍ਨਂ ਰੂਪਪਾਕਾਨਞ੍ਚਾਤਿ ਏਕਵੀਸਤਿਪਾਕਾਨਂ ਦ੍ਵਿਧਾ ਨਾਨਕ੍ਖਣਿਕਕਮ੍ਮੂਪਨਿਸ੍ਸਯਪਚ੍ਚਯੇਨ ਪਚ੍ਚਯੋ ਹੋਤਿ.
੫੮੨-੩. ਕਾਮੇ ਅਪੁਞ੍ਞਸਙ੍ਖਾਰੋ ਕਾਮਭਵੇ ਅਣ੍ਡਜਜਲਾਬੁਜਸਂਸੇਦਜਓਪਪਾਤਿਕਯੋਨਿਵਸੇਨ ਅਣ੍ਡਜਾਦੀਸੁ ਯੋਨੀਸੁ ਨਿਰਯਗਤਿਪੇਤਗਤਿਤਿਰਚ੍ਛਾਨਗਤਿਵਸੇਨ ਤੀਸੁ ਗਤੀਸੁ ਨਾਨਤ੍ਤਕਾਯਏਕਤ੍ਤਸਞ੍ਞੀਵਸੇਨ ਏਕਿਸ੍ਸਾ ਵਿਞ੍ਞਾਣਟ੍ਠਿਤਿਯਾ ਨਾਨਤ੍ਤਕਾਯਏਕਤ੍ਤਸਞ੍ਞੀਵਸੇਨ ਚ ਏਕਸ੍ਮਿਂ ਪਨ ਸਤ੍ਤਾਵਾਸੇ ਦ੍ਵਿਧਾ ਨਾਨਕ੍ਖਣਿਕਕਮ੍ਮੂਪਨਿਸ੍ਸਯਪਚ੍ਚਯੇਹਿ ਪਵਤ੍ਤੇ ਪਵਤ੍ਤਿਕ੍ਖਣੇ ਪਟਿਸਨ੍ਧਿਯਂ ਪਟਿਸਨ੍ਧਿਕ੍ਖਣੇ ਸੋ ਅਪੁਞ੍ਞਾਭਿਸਙ੍ਖਾਰੋ ਪਚ੍ਚਯੋ ਹੋਤਿ.
੫੮੪-੬. ਤਥੇਵਾਨੇਞ੍ਜਸਙ੍ਖਾਰੋ ਤਥਾ ਏਵ ਆਨੇਞ੍ਜਸਙ੍ਖਾਰੋ, ਏਕਾਰੂਪਭਵੇ ਏਕਸ੍ਮਿਂ ਅਰੂਪਭਵੇ ਏਕਿਸ੍ਸਾ ਓਪਪਾਤਿਕਯੋਨਿਯਾ ਚੇਵ ਏਕਿਸ੍ਸਾ ਦੇਵਗਤਿਯਾਪਿ ਚ ਆਕਾਸਾਨਞ੍ਚਾਯਤਨਭੂਮਿ ਵਿਞ੍ਞਾਣਞ੍ਚਾਯਤਨਭੂਮਿ ਆਕਿਞ੍ਚਞ੍ਞਾਯਤਨਭੂਮਿਵਸੇਨ ਤੀਸੁ ਏਵ ਚਿਤ੍ਤਟ੍ਠਿਤੀਸੁ ਚਤੁਨ੍ਨਂ ਅਰੂਪਭੂਮੀਨਂ ਵਸੇਨ ਚਤੁਬ੍ਬਿਧੇ ਸਤ੍ਤਾਵਾਸੇ ਚਤੁਨ੍ਨਂ ਅਰੂਪਪਾਕਚਿਤ੍ਤਾਨਂ ਦ੍ਵੇਧਾ ਨਾਨਕ੍ਖਣਿਕਕਮ੍ਮੋਪਨਿਸ੍ਸਯਪਚ੍ਚਯੇਹਿ ਸੋ ਆਨੇਞ੍ਜਾਭਿਸਙ੍ਖਾਰੋ ਪਚ੍ਚਯੋ ਹੋਤਿ. ਪਟਿਸਨ੍ਧਿਪਵਤ੍ਤੀਨਂ, ਵਸੇਨੇਵਂ ਭਵਾਦੀਸੁ ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਪਟਿਸਨ੍ਧਿਪਵਤ੍ਤੀਨਂ ਵਸੇਨ ਭਵਾਦੀਸੁ ਯਥਾ ਯੇ ਸਙ੍ਖਾਰਾ ਏਸਂ ਪਾਕਚਿਤ੍ਤਾਨਂ ਪਚ੍ਚਯਾ ਹੋਨ੍ਤਿ, ਤਥਾ ਤੇ ਸਙ੍ਖਾਰਾ ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਪਣ੍ਡਿਤੇਨ ਵਿਜਾਨਿਤਬ੍ਬਾ.
੫੮੭-੯੦. ਨ ਰੂਪਾਰੂਪਧਮ੍ਮਾਨਂ, ਸਙ੍ਕਨ੍ਤਿ ਪਨ ਵਿਜ੍ਜਤਿ ਰੂਪਧਮ੍ਮਾਨਂ, ਚਿਤ੍ਤਚੇਤਸਿਕਸਙ੍ਖਾਤਾਨਂ ਨਾਮਧਮ੍ਮਾਨਞ੍ਚ ਸਙ੍ਕਨ੍ਤਿ ਪਨ ਸਙ੍ਕਮਨਂ ਪਨ ਨ ਵਿਜ੍ਜਤਿ. ਸਙ੍ਕਨ੍ਤਿਭਾਵੇ ਅਸਤਿ ਅਤੀਤਭਵਤੋ ਇਧ ਇਮਸ੍ਮਿਂ ਭਵੇ ਰੂਪਧਮ੍ਮਾਨਂ ਸਙ੍ਕਮਨਭਾਵੇ ਅਸਤਿ ਪਟਿਸਨ੍ਧਿਚਿਤ੍ਤਂ ਕਥਂ ਕੇਨ ਪਕਾਰੇਨ ਸਿਯਾ ਭਵੇਯ੍ਯ? ਨਤ੍ਥਿ ਚਿਤ੍ਤਸ੍ਸ ਸਙ੍ਕਨ੍ਤਿ, ਅਤੀਤਭਵਤੋ ਇਧ ਇਮਸ੍ਮਿਂ ਭਵੇ ਚਿਤ੍ਤਸ੍ਸ ਸਙ੍ਕਨ੍ਤਿ ਸਙ੍ਕਮਨਂ ਨਤ੍ਥਿ, ਤਤੋ ਅਤੀਤਭਵਤੋ ਅਤੀਤਂ ਹੇਤੁਂ ਵਿਨਾ ਵਜ੍ਜੇਤ੍ਵਾ ਇਧ ਇਮਸ੍ਮਿਂ ਭਵੇ ਚਿਤ੍ਤਸ੍ਸ ਪਾਤੁਭਾਵੋ ਨ ਵਿਜ੍ਜਤਿ. ਸੁਲਦ੍ਧਪਚ੍ਚਯਂ ਰੂਪਾਰੂਪਮਤ੍ਤਂ ਸੁਟ੍ਠੁ ਲਦ੍ਧਪਚ੍ਚਯਂ ਰੂਪਨਾਮਮਤ੍ਤਂ ਜਾਯਤਿ. ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਪਚ੍ਚਯਂ ਲਭਿਤ੍ਵਾ ਉਪ੍ਪਜ੍ਜਮਾਨਂ ਰੂਪਾਰੂਪਮਤ੍ਤਂ ਰੂਪਨਾਮਮਤ੍ਤਂ ਜਾਯਤਿ. ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਪਚ੍ਚਯਂ ਲਭਿਤ੍ਵਾ ਉਪ੍ਪਜ੍ਜਮਾਨਂ ਰੂਪਾਰੂਪਮਤ੍ਤਂ ਭਵਨ੍ਤਰਂ ਅਞ੍ਞਭਵਂ ਪਟਿਸਨ੍ਧਿਂ ਉਪੇਤਿ ਉਪਗਚ੍ਛਤਿ. ਇਤਿ ਵਚਨਂ ਸਮਞ੍ਞਾਯ ਲੋਕਿਯਵੋਹਾਰੇਨ ਪਵੁਚ੍ਚਤੇ, ਸਤ੍ਤੋ ਵਾ ਨਤ੍ਥਿ, ਸਤ੍ਤੋ ਜੀਵੋਤਿ ਵੇਵਚਨਂ, ਅਤ੍ਤਾ ਵਾਪਿ ਨ ਵਿਜ੍ਜਤਿ.
੫੯੧-੯. ਤਸ੍ਸਿਦਂ ਪਾਕਟਂ ਕਤ੍ਵਾ, ਪਟਿਸਨ੍ਧਿਕ੍ਕਮਂ ਪਨ ਤਸ੍ਸ ਸਤ੍ਤਸ੍ਸ ਇਦਂ ਪਟਿਸਨ੍ਧਿਕ੍ਕਮਂ ਸੁਦੁਬ੍ਬੁਧਂ ਅਤਿਦੁਬ੍ਬਿਜਾਨਂ ਪਾਕਟਂ ਕਤ੍ਵਾ ਅਹਂ ਦਸ੍ਸਯਿਸ੍ਸਾਮਿ, ਤਮੇਤਂ ਪਟਿਸਨ੍ਧਿਕ੍ਕਮਂ ਸਾਧੁ ਸਾਧੁਕਂ ਨਿਬੋਧਥ, ਸਾਧੁ ਸਾਧੁਕਂ ਮਨਸਿ ਕਰੋਥ, ਵਿਵਿਧੇਸੁ ਆਰਮ੍ਮਣੇਸੁ ਲੋਭਵਸੇਨ ਚਿਤ੍ਤਂ ਅਨਾਮੇਤ੍ਵਾ ਵਜਿਰਮਞ੍ਜੂਸਾਯ ਅਨਗ੍ਘਮਣਿਰਤਨਂ ਪਕ੍ਖਿਪਨ੍ਤੋ ਵਿਯ ਚਿਤ੍ਤੇ ਠਪੇਤ੍ਵਾਤਿ ਅਤ੍ਥੋ. ਅਤੀਤਸ੍ਮਿਂ ਭਵੇ ਤਸ੍ਸ, ਆਸਨ੍ਨਮਰਣਸ੍ਸ ਹਿਇਤੋ ਭਵਤੋ ਅਤੀਤਸ੍ਮਿਂ ਭਵੇ ਆਸਨ੍ਨਮਰਣਸ੍ਸ ਤਸ੍ਸ ਸਰੀਰਸ੍ਮਿਂ ਆਤਪੇ ਪਕ੍ਖਿਤ੍ਤਂ ਹਰਿਤਂ ਤਾਲਪਣ੍ਣਂ ਵਿਯ ਸੁਸ੍ਸਮਾਨੇ ਸਤਿ ਚਕ੍ਖੁਨ੍ਦ੍ਰਿਯਾਦਿਕੇ ਇਨ੍ਦ੍ਰਿਯੇ ਨਟ੍ਠੇ ਹਦਯਵਤ੍ਥੁਮਤ੍ਤਸ੍ਮਿਂ ਠਿਤੇ ਕਾਯਪ੍ਪਸਾਦਿਕੇ ਵਿਞ੍ਞਾਣੇ ਤਸ੍ਮਿਂ ਖਣੇ ਵਤ੍ਥੁਸਨ੍ਨਿਸ੍ਸਿਤਂ ਹਦਯਵਤ੍ਥੁਨਿਸ੍ਸਿਤਂ. ‘‘ਚਿਤ੍ਤ’’ਨ੍ਤਿ ਵਚਨਂ ਭਵਙ੍ਗਮਨੋਦ੍ਵਾਰਾਵਜ੍ਜਨਜਵਨਂ ਸਨ੍ਧਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਪੁਬ੍ਬਾਨੁਸੇਵਿਤਨ੍ਤਿ ਇਤੋ ਕਾਲਾ ਪੁਬ੍ਬਕਾਲੇ ਤੇਨ ਪਨ ਅਨੁਸੇਵਿਤਂ ਅਨੁਚਿਣ੍ਣਂ ਪੁਞ੍ਞਂ ਕਮ੍ਮਂ ਵਾ ਅਪੁਞ੍ਞਂ ਏਵ ਵਾ ਕਮ੍ਮਂ ਕਮ੍ਮਨਿਮਿਤ੍ਤਂ ਗਤਿਨਿਮਿਤ੍ਤਂ ਵਾ ਕਮ੍ਮਫਲੇਨ ਦ੍ਵਾਰੇਸੁ ਪਚ੍ਚੁਪਟ੍ਠਿਤਂ ਆਲਮ੍ਬਿਤ੍ਵਾ ਮਨੋਦ੍ਵਾਰਾਵਜ੍ਜਨਜਵਨਵਸੇਨ ਸੇਵਿਤਚਿਤ੍ਤਂ ਪਵਤ੍ਤਤਿ. ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਪਵਤ੍ਤਮਾਨਂ ਤਂ ਵਿਞ੍ਞਾਣਂ ਤਂ ਜਵਨਚਿਤ੍ਤਂ ਲਦ੍ਧਪਚ੍ਚਯਂ ਲਦ੍ਧਾਰਮ੍ਮਣਪਚ੍ਚਯਂ. ਅਵਿਜ੍ਜਾਯ ਪਟਿਚ੍ਛਨ੍ਨਾਦੀਨਵੇ ਵਿਸਯੇਤਿ ਅਕੁਸਲਜਵਨੇ ਜਵਿਤੇ ਤਸ੍ਸ ਜਵਨਸ੍ਸ ਅਵਿਜ੍ਜਾਯ ਅਪ੍ਪਟਿਚ੍ਛਨ੍ਨਦੋਸੇ ਤਸ੍ਮਿਂ ਕਮ੍ਮਾਦਿਕੇ ਆਰਮ੍ਮਣੇ ਕੁਸਲਜਵਨੇ ਜਵਿਤੇ ਤਤੋ ਚਿਤ੍ਤਵੀਥਿਤੋ ਪੁਬ੍ਬਭਾਗੇ ਪਵਤ੍ਤਾਯ ਅਵਿਜ੍ਜਾਯ ਪਟਿਚ੍ਛਨ੍ਨਦੋਸੇ ਤਸ੍ਮਿਂ ਕਮ੍ਮਾਦਿਕੇ ਆਰਮ੍ਮਣੇ. ਤਣ੍ਹਾਤਿ ਅਕੁਸਲਜਵਨੇਨ ਸਹਜੋ ਲੋਭੋ, ਅਕੁਸਲਜਵਨੇ ਵਾ ਜਵਿਤੇ ਤਤੋ ਵੀਥਿਚਿਤ੍ਤਤੋ ਪੁਬ੍ਬਭਾਗੇ ਪਵਤ੍ਤੋ ਲੋਭੋ ਤਣ੍ਹਾ. ਨਮੇਤੀਤਿ ਅਞ੍ਞਂ ਆਰਮ੍ਮਣਂ ਅਗ੍ਗਾਹਾਪੇਤ੍ਵਾ ਦਲ਼੍ਹਗ੍ਗਾਹਵਸੇਨ ਤਂ ਏਵ ਕਮ੍ਮਨਿਮਿਤ੍ਤਗਤਿਨਿਮਿਤ੍ਤਸਙ੍ਖਾਤਂ ਆਰਮ੍ਮਣਂ ਗਣ੍ਹਾਪੇਤੀਤਿ ਅਤ੍ਥੋ. ਸਹਜਾ ਸਙ੍ਖਾਰਾ ਪਨ ਤਸ੍ਸ ਚਿਤ੍ਤਸ੍ਸ ਸਹਜਾ ਏਕਤੋ ਜਾਤਾ ਚੇਤਨਾ ਪਨ ਤਸ੍ਮਿਂ ਯੇਵਾਰਮ੍ਮਣੇ ਖਿਪਨ੍ਤਿ ਪਵਤ੍ਤਨ੍ਤਿ. ਇਮਸ੍ਮਿਂ ਪਚ੍ਚੁਪ੍ਪਨ੍ਨਭਵੇ ਏਕਸਨ੍ਤਤਿਵਸਾ ਪਵਤ੍ਤਾਯ ਤਣ੍ਹਾਯ ਨਮੀਯਮਾਨਂ ਤਂ ਵਿਞ੍ਞਾਣਂ ਓਰਿਮਾ ਤੀਰਮ੍ਹਾ ਰਜ੍ਜੁਕਂ ਆਲਮ੍ਬਿਤ੍ਵਾ ਮਾਤਿਕਾਤਿਕ੍ਕਮੋ ਪੁਰਿਸੋ ਵਿਯ ਏਤਂ ਪੁਰਿਮਂ ਨਿਸ੍ਸਯਭੂਤਂ ਹਦਯਵਤ੍ਥੁਂ ਜਹਤਿ ਛਡ੍ਡੇਤਿ, ਚੁਤਿਚਿਤ੍ਤਂ ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਤੀਤਿ ਅਤ੍ਥੋ. ਅਪਰਂ ਕਮ੍ਮਸਮ੍ਭੂਤਂ ਨਿਸ੍ਸਯਂ ਅਪਰਂ ਅਞ੍ਞਕਮ੍ਮਤੋ ਸਮ੍ਭੂਤਂ ਨਿਸ੍ਸਯਭੂਤਂ ਹਦਯਵਤ੍ਥੁਂ ਲਭਿਤ੍ਵਾ ਵਾ ਅਲਭਿਤ੍ਵਾਪਿ ਵਾ ਆਰਮ੍ਮਣਾਦੀਹਿ ਪਚ੍ਚਯੇਹਿ ਤਂ ਪਟਿਸਨ੍ਧਿਸਙ੍ਖਾਤਂ ਮਾਨਸਂ ਪਵਤ੍ਤਤਿ. ‘‘ਲਭਿਤ੍ਵਾ’’ਤਿ ਵਚਨਂ ਕਾਮਰੂਪਭਵਂ ਸਨ੍ਧਾਯ ਵੁਤ੍ਤਂ. ‘‘ਅਲਭਿਤ੍ਵਾ’’ਤਿ ਵਚਨਂ ਅਰੂਪਭਵਂ ਸਨ੍ਧਾਯ ਵੁਤ੍ਤਂ. ਏਤ੍ਥ ਏਤੇਸੁ ਚਿਤ੍ਤੇਸੁ ਪੁਰਿਮਂ ‘‘ਜਹਤੀ’’ਤਿ ਵਚਨੇਨ ਵੁਤ੍ਤਞ੍ਚੇਵ ਚਿਤ੍ਤਂ, ਚੁਤਿਚਿਤ੍ਤਂ ਪਚ੍ਛਿਮਂ ‘‘ਆਰਮ੍ਮਣਾਦੀਹਿ ਪਚ੍ਚਯੇਹਿ ਪਵਤ੍ਤਤੀ’’ਤਿ ਵਚਨੇਨ ਵੁਤ੍ਤਞ੍ਚੇਵ ਚਿਤ੍ਤਂ ਪਟਿਸਨ੍ਧਿਚਿਤ੍ਤਂ ਪਣ੍ਡਿਤੇਨ ਵੇਦਿਤਬ੍ਬਂ.
੬੦੦-੬. ਤਦੇਤਂ ਤਂ ਏਤਂ ਪਟਿਸਨ੍ਧਿਚਿਤ੍ਤਂ ਪੁਰਿਮਾ ਭਵਤੋ ਇਧ ਇਮਸ੍ਮਿਂ ਪਚ੍ਛਿਮਭਵੇ ਨਾਪਿ ਆਗਤਂ, ਕਮ੍ਮਾਦਿਞ੍ਚ ਹੇਤੁਂ ਵਿਨਾ ਵਜ੍ਜੇਤ੍ਵਾ ਪਟਿਸਨ੍ਧਿਚਿਤ੍ਤਂ ਪਾਤੁਭੂਤਂ ਨ ਚੇਵ ਤਂ ਏਤ੍ਥ ਏਤਸ੍ਮਿਂ ਵਚਨੇ ਏਤਸ੍ਸ ਪਟਿਸਨ੍ਧਿਚਿਤ੍ਤਸ੍ਸ ਪੁਰਿਮਾ ਭਵਤੋ ਇਧ ਇਮਸ੍ਮਿਂ ਪਚ੍ਚੁਪ੍ਪਨ੍ਨਭਵੇ ਅਨਾਗਮਨੇ ਅਤੀਤਭਵਹੇਤੂਹਿ ਅਤੀਤਭਵੇ ਕਮ੍ਮਾਦਿਪਚ੍ਚਯੇਹਿ ਏਤਸ੍ਸ ਪਟਿਸਨ੍ਧਿਚਿਤ੍ਤਸ੍ਸ ਸਮ੍ਭਵੇ. ਪਟਿਘੋਸਦੀਪਮੁਦ੍ਦਾਦੀ, ਭਵਨ੍ਤੇਤ੍ਥ ਨਿਦਸ੍ਸਨਾ ਏਤ੍ਥ ਏਤਸ੍ਮਿਂ ਤਸ੍ਸ ਪਟਿਸਨ੍ਧਿਚਿਤ੍ਤਸ੍ਸ ਅਤੀਤਭਵਤੋ ਅਨਾਗਮਨੇ ਅਤੀਤਭਵੇ ਹੇਤੂਹਿ ਸਮ੍ਭਵੇ ਪਟਿਘੋਸਦੀਪਮੁਦ੍ਦਾਦਿਅਤ੍ਥਨਿਦਸ੍ਸਨਾ ਉਪਮਾ ਭਵਨ੍ਤਿ. ਅਞ੍ਞਤ੍ਰ ਅਞ੍ਞਸ੍ਮਿਂ ਪਟਿਘੋਸਾਦੀਨਂ ਅਤ੍ਥਾਨਂ ਪਵਤ੍ਤਿਟ੍ਠਾਨੇ ਆਗਨ੍ਤ੍ਵਾ ਸਦ੍ਦਾਦਿਹੇਤੁਕਾ ਸਦ੍ਦਾਦਯੋ ਪਚ੍ਚਯਾ ਹੋਨ੍ਤਿ ਯਥਾ. ਇਦਂ ਵੁਤ੍ਤਂ ਹੋਤਿ – ਇਮਸ੍ਮਿਂ ਠਾਨੇ ਜਨੇਹਿ ਪਵਤ੍ਤਾਪਿਤਾ ਸਦ੍ਦਦੀਪਮੁਦ੍ਦਾਦਯੋ ਅਤ੍ਥਾ ਪਬ੍ਬਤਨ੍ਤਰਾਦੀਸੁ ਅਞ੍ਞੇਸੁ ਠਾਨੇਸੁ ਪਵਤ੍ਤਾਨਂ ਪਟਿਘੋਸਦੀਪਮੁਦ੍ਦਾਦੀਨਂ ਅਤ੍ਥਾਨਂ ਹੇਤੁਕਾ ਹੋਨ੍ਤਿ. ਤੇਸੁ ਸਦ੍ਦਾਦੀਸੁ ਪਚ੍ਚਯੇਸੁ ਸਨ੍ਤੇਸੁ ਯੇ ਤੇ ਪਟਿਘੋਸਾਦਯੋ ਹੋਨ੍ਤਿ, ਅਸਨ੍ਤੇਸੁ ਨ ਹੋਨ੍ਤਿ ਯਥਾ, ਏਵਮੇਵ ਚ ਵਿਞ੍ਞਾਣਂ ਅਤੀਤਭਵਤੋ ਪਚ੍ਚੁਪ੍ਪਨ੍ਨਭਵਵਿਞ੍ਞਾਣਵਸੇਨ ਪਵਤ੍ਤਂ ਵਿਞ੍ਞਾਣਂ ਵਿਭਾਵਿਨਾ ਵੇਦਿਤਬ੍ਬਂ. ਸਨ੍ਤਾਨਬਨ੍ਧਤੋ ਸਨ੍ਤਾਨਬਨ੍ਧਵਸੇਨ ਏਕਤਾ ਅਤੀਤਭਵਪਚ੍ਚੁਪ੍ਪਨ੍ਨਭਵਵਿਞ੍ਞਾਣਵਸੇਨ ਪਵਤ੍ਤਸ੍ਸ ਵਿਞ੍ਞਾਣਸ੍ਸ ਏਕੀਭਾਵੋ ਨਤ੍ਥਿ, ਨਾਨਤਾਪਿ ਤਸ੍ਸ ਵਿਞ੍ਞਾਣਸ੍ਸ ਨਾਨਾਭਾਵੋਪਿ ਪਚ੍ਚੇਕਭਾਵੋ ਅਪਿ. ਸਤਿ ਸਨ੍ਤਾਨਬਨ੍ਧੇ ਤੁ, ਏਕਨ੍ਤੇਨੇਕਤਾ ਸਿਯਾ ਸਨ੍ਤਾਨਬਨ੍ਧੇ ਸਤਿ ਏਕਨ੍ਤੇਨ ਤਸ੍ਸ ਵਿਞ੍ਞਾਣਸ੍ਸ ਏਕਤਾ ਏਕੀਭਾਵੋ ਸਿਯਾ ਭਵੇਯ੍ਯ, ਖੀਰਸਭਾਵਤੋ ਪਗ੍ਘਰਣਸਭਾਵਤੋ ਖੀਰਤੋ ਸਮ੍ਭੂਤਂ ਘਨਸਭਾਵਂ ਕਦਾਚਿਪਿ ਕਿਸ੍ਮਿਞ੍ਚਿਪਿ ਕਾਲੇ ਨ ਭਵੇਯ੍ਯ, ਸਬ੍ਬਦਾ ਪਗ੍ਘਰਣਸਭਾਵਖੀਰਮੇਵ ਭਵੇਯ੍ਯਾਤਿ ਅਤ੍ਥੋ. ਅਥਾਪਿ ਅਪਰੋ ਨਯੋਪਿ ਸਾ ਏਕਨ੍ਤਨਾਨਤਾ ਤਸ੍ਸ ਵਿਞ੍ਞਾਣਸ੍ਸ ਸੋ ਏਕਨ੍ਤਨਾਨਾਭਾਵੋ ਯਦਿ ਭਵੇਯ੍ਯ, ਖੀਰਸਾਮਿਕੋ ਸੋ ਪੁਗ੍ਗਲੋ ਦਧਿਸਾਮਿ ਨ ਭਵੇਯ੍ਯ. ਖੀਰਕਾਲੇ ਖੀਰਸ੍ਸ ਇਸ੍ਸਰਭੂਤੋ ਸਾਮਿਕੋ ਪਗ੍ਘਰਣਸਭਾਵਂ ਜਹਿਤ੍ਵਾ ਦਧਿਸ੍ਸ ਉਪ੍ਪਜ੍ਜਮਾਨਕਾਲੇ ਤਸ੍ਸ ਦਧਿਸ੍ਸ ਇਸ੍ਸਰੋ ਨ ਭਵੇਯ੍ਯ, ਤਤੋ ਖੀਰਸਾਮਿਕੋ ਅਞ੍ਞੋ ਪੁਗ੍ਗਲੋ ਤਸ੍ਸ ਦਧਿਸ੍ਸ ਅਨਿਸ੍ਸਰੋ ਅਸਾਮਿਕੋ ਭਵੇਯ੍ਯਾਤਿ ਅਤ੍ਥੋ. ਯਸ੍ਮਾ ਕਾਰਣਾ ਏਤ੍ਥ ਏਤਸ੍ਮਿਂ ਪਟਿਸਨ੍ਧਿਕ੍ਕਮਵਿਨਿਚ੍ਛਯੇ ਏਕਨ੍ਤਏਕਤਾਪਿ ਵਾ ਏਕਨ੍ਤਨਾਨਤਾਪਿ ਵਾ ਸਮਯਞ੍ਞੁਨਾ ਵਿਞ੍ਞੁਨਾ ਨ ਚੇਵ ਉਪਗਨ੍ਤਬ੍ਬਾ.
੬੦੭-੧੦. ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਅਸਙ੍ਕਨ੍ਤਿਪਾਤੁਭਾਵੇ ਸਙ੍ਕਨ੍ਤਿਪਾਤੁਭਾਵਰਹਿਤੇ ਭਵੇ ਸਤਿ ਇਮਸ੍ਮਿਂ ਮਨੁਸ੍ਸਤ੍ਤਭਾਵੇ ਖਨ੍ਧਾਦਿਸਮਤਾ ਅਭਿਸਮ੍ਭੂਤਾ ਯੇ ਖਨ੍ਧਾ ਹੋਨ੍ਤਿ, ਏਤੇਸਂ ਇਧ ਇਮਸ੍ਮਿਂ ਮਨੁਸ੍ਸਤ੍ਤਭਾਵੇ ਨਿਰੁਦ੍ਧਤ੍ਤਾ ਇਧ ਇਮਸ੍ਮਿਂ ਮਨੁਸ੍ਸਤ੍ਤਭਾਵੇ ਜਨੇਹਿ ਕਤਸ੍ਸ ਤਸ੍ਸ ਕਮ੍ਮਸ੍ਸ ਫਲਹੇਤੁਨੋ ਫਲਸ੍ਸ ਪਚ੍ਚਯਭੂਤਸ੍ਸ ਪਰਤ੍ਥ ਪਰਸ੍ਮਿਂ ਲੋਕੇ ਆਗਮਤੋ ਚੇਵ ਏਵਂ ਅਞ੍ਞਸ੍ਸ ਸਤ੍ਤਸ੍ਸ ਅਞ੍ਞਤੋ ਕਮ੍ਮਤੋ ਹਿ ਤਤੋ ਸਤ੍ਤਤੋ ਅਞ੍ਞੇਨ ਸਤ੍ਤੇਨ ਕਤਤੋ ਅਞ੍ਞਤੋ ਚੇਵ ਕਮ੍ਮਤੋ ਤਂ ਫਲਂ ਸਿਯਾ ਭਵੇਯ੍ਯ, ‘‘ਅਞ੍ਞਸ੍ਸ ਸਤ੍ਤਸ੍ਸਾ’’ਤਿ ਵਚਨੇਨ ਤਿਤ੍ਥਿਯਸਤ੍ਤਸ੍ਸਪਿ ਕਮ੍ਮਂ ਅਞ੍ਞਸ੍ਸ ਚ ਫਲਂ ਦਦੇਯ੍ਯਾਤਿ ਅਤ੍ਥੋ, ਤਸ੍ਮਾ ਕਾਰਣਾ ਏਤਂ ਸਬ੍ਬਂ ਏਵ ਚ ਤੁਮ੍ਹੇਹਿ ਵੁਤ੍ਤਵਿਧਾਨਂ ਨ ਸੁਨ੍ਦਰਂ. ਏਤ੍ਥਾਹਾਤਿ ਏਤਸ੍ਮਿਂ ਠਾਨੇ ਠਤ੍ਵਾ ਚੋਦਕੋ ਆਹ – ਨਨੁ ਏਵਂ ‘‘ਅਸਙ੍ਕਨ੍ਤਿਪਾਤੁਭਾਵੇ ਭਵੇ ਸਤੀ’’ਤਿਆਦਿਕਂ ਵਚਨਂ ਨਿਯਤੀਤਿ? ਵੁਚ੍ਚਤੇ – ਸਨ੍ਤਾਨੇ ਯਂ ਫਲਂ ਏਤਂ ਏਕਸ੍ਮਿਂ ਸਨ੍ਤਾਨੇ ਪਵਤ੍ਤਮਾਨਂ ਯਂ ਏਤਂ ਫਲਂ ਅਞ੍ਞਸ੍ਸ ਸਤ੍ਤਸ੍ਸ ਨ ਹੋਤਿ, ਅਞ੍ਞਤੋ ਕਮ੍ਮਤੋ ਨ ਚ ਹੋਤਿ, ਬੀਜਾਨਂ ਅਭਿਸਙ੍ਖਾਰੋ ਏਤਸ੍ਸਤ੍ਥਸ੍ਸ ‘‘ਏਕਸ੍ਮਿਂ ਸਨ੍ਤਾਨੇ’’ਤਿਆਦਿਕਸ੍ਸ ਏਤਸ੍ਸ ਅਤ੍ਥਸ੍ਸ ਸਾਧਕੋ ਨਿਪ੍ਫਾਦਕੋ ਹੋਤਿ.
੬੧੧-੫. ਏਕਸ੍ਮਿਂ ਪਨ ਸਨ੍ਤਾਨੇ, ਵਤ੍ਤਮਾਨਂ ਫਲਂ ਪਨ ਅਞ੍ਞਸ੍ਸ ਸਤ੍ਤਸ੍ਸਾਪਿ ਵਾ ਨ ਹੋਤਿ, ਤਂ ਫਲਂ ਅਞ੍ਞਤੋ ਕਮ੍ਮਤੋ ਨ ਹੋਤਿ. ਬੀਜਾਨਂ ਅਭਿਸਙ੍ਖਾਰੋ ਏਤਸ੍ਸਤ੍ਥਸ੍ਸ ‘‘ਏਕਸ੍ਮਿਂ ਪਨ ਸਨ੍ਤਾਨੇ’’ਤਿਆਦਿਕਸ੍ਸ ਏਤਸ੍ਸ ਅਤ੍ਥਸ੍ਸ ਸਾਧਕੋ ਨਿਪ੍ਫਾਦਕੋ ਹੋਤਿ, ਬੀਜਾਨਂ ਅਭਿਸਙ੍ਖਾਰੇ ਮਧੁਆਦਿਨਾ ਵਤ੍ਥੁਨਾ ਜਨੇਹਿ ਕਤੇ ਤਸ੍ਸ ਬੀਜਸ੍ਸ ਸਨ੍ਤਾਨੇ ਪਠਮਂ ਲਦ੍ਧਪਚ੍ਚਯੋ ਪਠਮਂ ਲਦ੍ਧਮਧੁਆਦਿਪਚ੍ਚਯੋ ਤਸ੍ਸ ਬੀਜਸ੍ਸ ਫਲਂ ਕਾਲਨ੍ਤਰੇ ਮਧੁਆਦਿਨਾ ਬੀਜਾਭਿਸਙ੍ਖਰਣਤੋ ਅਞ੍ਞਸ੍ਮਿਂ ਕਾਲੇ ਮਧੁਰੋ ਹੋਤਿ. ਹਿ ਸਚ੍ਚਂ ‘‘ਬੀਜਾਨਂ ਅਭਿਸਙ੍ਖਾਰੇ’’ਤਿਆਦਿਕਂ ਵਚਨਂ. ਤਾਨਿ ਹਿ ਤਾਨਿ ਏਵ ਪਠਮਂ ਮਧੁਆਦਿਨਾ ਜਨੇਹਿ ਰੋਪਿਤਾਨਿ ਬੀਜਾਨਿ ਅਭਿਸਙ੍ਖਰਣਤੋ ਕਾਲਨ੍ਤਰੇ ਮਧੁਰਭਾਵਂ ਫਲਮ੍ਪਿ ਵਾ ਫਲਟ੍ਠਂ ਵਾ ਨ ਪਾਪੁਣਨ੍ਤਿ. ਏਵਂ ਇਮਿਨਾ ਪਕਾਰੇਨ ਇਦਂ ਮਯਾ ਵੁਤ੍ਤਂ ‘‘ਏਕਸ੍ਮਿਂ ਪਨ ਸਨ੍ਤਾਨੇ’’ਤਿਆਦਿਕਂ ਵਚਨਂ ਪਣ੍ਡਿਤੇਨ ਞੇਯ੍ਯਂ. ਅਪਿ ਚ ਅਪਰੋ ਨਯੋ. ਬਾਲਕਾਲੇ ਤਰੁਣਕਾਲੇ ਤੇਨ ਤਰੁਣੇਨ ਪਯੁਤ੍ਤੇਨ ਵਿਜ੍ਜਾਸਿਪ੍ਪੋਸਧਾਦਿਨਾ ਕਮ੍ਮੇਨਾਪਿ ਤਸ੍ਸ ਵੁਦ੍ਧਕਾਲਸ੍ਮਿਂ ਫਲਦਾਨਸੀਲੇਨ ਅਯਂ ‘‘ਏਕਸ੍ਮਿਂ ਪਨ ਸਨ੍ਤਾਨੇ’’ਤਿਆਦਿਕੋ ਅਤ੍ਥੋ ਪਣ੍ਡਿਤੇਨ ਦੀਪੇਤਬ੍ਬੋ.
੬੧੬-੨੦. ਚੋਦਕੋ ਪੁਨਾਹ – ਏਵਂ ਸਨ੍ਤੇਪਿ ਤਂ ਕਮ੍ਮਂ ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਕਮ੍ਮੇ ਸਨ੍ਤੇਪਿ ਸਂਵਿਜ੍ਜਮਾਨੇਪਿ ਤਂ ਕਮ੍ਮਂ ਏਤਸ੍ਮਿਂਯੇਵ ਖਣੇ ਵਿਜ੍ਜਮਾਨਮ੍ਪਿ ਵਾ ਫਲਸ੍ਸ ਪਚ੍ਚਯੋ ਹੋਤਿ. ਅਥ ਵਾਵਿਜ੍ਜਮਾਨਕਂ ਪਚ੍ਚਯੋ ਨ ਭਵੇਯ੍ਯ. ਏਤਸ੍ਮਿਂਯੇਵ ਖਣੇ ਅਵਿਜ੍ਜਮਾਨਕਂ ਕਮ੍ਮਂ ਵਾ ਫਲਸ੍ਸ ਪਚ੍ਚਯੋ ਹੋਤਿ. ਸਚੇ ਯਦਿ ਵਿਜ੍ਜਮਾਨਂ ਫਲਸ੍ਸ ਪਚ੍ਚਯੋ ਹੋਤਿ, ਤਪ੍ਪਵਤ੍ਤਿਕ੍ਖਣੇਪਨ ਤਸ੍ਸ ਕਮ੍ਮਸ੍ਸ ਪਵਤ੍ਤਿਕ੍ਖਣੇ ਤਸ੍ਸ ਕਮ੍ਮਸ੍ਸ ਵਿਜ੍ਜਮਾਨਕਾਲੇ ਪਨ ਹੇਤੁਨਾ ਕਮ੍ਮੇਨੇਵ ਸਦ੍ਧਿਂ ਪਾਕੇਨ ਭਵਿਤਬ੍ਬਂ. ਅਥ ਵਾ ਅਪਰੋ ਨਯੋ. ਵਿਜ੍ਜਮਾਨਂ ਨਿਰੁਦ੍ਧਂ ਕਮ੍ਮਂ ਵਿਪਾਕਸ੍ਸ ਪਚ੍ਚਯੋ ਯਦਿ ਭਵੇਯ੍ਯ, ਪਵਤ੍ਤਿਕ੍ਖਣਤੋ ਤਸ੍ਸ ਕਮ੍ਮਸ੍ਸ ਪਵਤ੍ਤਿਕ੍ਖਣਤੋ ਪੁਬ੍ਬੇ ਵਾ ਕਾਲੇ, ਤਸ੍ਸ ਕਮ੍ਮਸ੍ਸ ਪਵਤ੍ਤਿਕ੍ਖਣਤੋ ਪਚ੍ਛਾ ਵਾ ਅਵਿਜ੍ਜਮਾਨਕਾਲੇਤਿ ਅਤ੍ਥੋ. ਨਿਚ੍ਚਫਲਂ ਸਿਯਾਤਿ ਸਬ੍ਬਦਾ ਕਮ੍ਮਪਚ੍ਚਯਵਿਰਹਿਤਂ ਫਲਂ ਸਿਯਾਤਿ ਅਤ੍ਥੋ. ਆਚਰਿਯੇਨ ਵੁਚ੍ਚਤੇ – ‘‘ਲੋਭਂ, ਭਿਕ੍ਖਵੇ, ਪਜਹਥ, ਸੋਤਾਪਤ੍ਤਿਪਟਿਲਾਭਾਯ ਅਹਮੇਵ ਪਾਟਿਭੋਗੋ’’ਤਿਆਦੀਸੁ ਪਾਠੇਸੁ ਪਾਟਿਭੋਗੋ ਵਿਯ ਕਮ੍ਮਂ ਦਟ੍ਠਬ੍ਬਂ. ਸੋਤਾਪਤ੍ਤਿਫਲਂ ਵਿਯ ਕਮ੍ਮਤੋ ਸਮ੍ਭੂਤਂ ਫਲਂ ਦਟ੍ਠਬ੍ਬਂ. ਕਟਤ੍ਤਾਯੇਵ ਜਨੇਹਿ ਕਟਤ੍ਤਾਯੇਵ ਤਂ ਕਮ੍ਮਂ ਫਲਸ੍ਸ ਪਚ੍ਚਯੋ ਹੋਤਿ, ਅਸ੍ਸ ਵਿਜ੍ਜਮਾਨਤ੍ਤਂ ਨ ਚ ਹੋਤਿ, ਤਸ੍ਸ ਅਵਿਜ੍ਜਮਾਨਸ੍ਸ ਕਮ੍ਮਸ੍ਸ ਵਿਜ੍ਜਮਾਨਤਾ ਵਾ ਨ ਚ ਨੇਵ ਹੋਤਿ.
੬੨੧. ਅਭਿਧਮ੍ਮਾਵਤਾਰੋਯਂ ਅਭਿਧਮ੍ਮਾਵਤਾਰੋ ਅਯਂ ਪਰਮਤ੍ਥਪ੍ਪਕਾਸਨੋ ਭੂਤਤ੍ਥਦੀਪਨੋ ਸੋਤੂਨਂ ਪੁਗ੍ਗਲਾਨਂ ਪੀਤਿਬੁਦ੍ਧਿਵਿਵਡ੍ਢਨੋ ਪਣ੍ਡਿਤੇਹਿ ਵਿਵਿਧੇਸੁ ਆਰਮ੍ਮਣੇਸੁ ਚਿਤ੍ਤਂ ਅਨਾਮੇਤ੍ਵਾ ਸਕ੍ਕਚ੍ਚੇਨ ਮਨਸਿਕਾਰੇਨ ਸੋਤਬ੍ਬੋ.
ਇਤਿ ਅਭਿਧਮ੍ਮਾਵਤਾਰਟੀਕਾਯ
ਪੁਞ੍ਞਵਿਪਾਕਪਚ੍ਚਯਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
ਨਵਮੋ ਪਰਿਚ੍ਛੇਦੋ.