ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ
ਅਭਿਧਮ੍ਮਾਵਤਾਰ-ਪੁਰਾਣਟੀਕਾ
੧. ਪਠਮੋ ਪਰਿਚ੍ਛੇਦੋ
ਚਿਤ੍ਤਨਿਦ੍ਦੇਸਵਣ੍ਣਨਾ
੮. ਤਤ੍ਥ ਤੇਸੁ ਚਤੁਬ੍ਬਿਧੇਸੁ ਪਰਮਤ੍ਥੇਸੁ, ਜਾਤਿਨਿਦ੍ਧਾਰਣਂ. ਚਿਤ੍ਤਨ੍ਤਿ ਚਿਤ੍ਤਂ ਨਾਮ. ਵਿਜਾਨਾਤੀਤਿ ਵਿਜਾਨਨਂ, ਵਿਸਯਾਨਂ ਵਿਜਾਨਨਂ ਵਿਸਯਵਿਜਾਨਨਂ. ਚਿਤ੍ਤਸਰੂਪਪਰਿਦੀਪਨਮਿਦਂ ਵਚਨਂ. ਤਸ੍ਸ ਪਨ ਚਿਤ੍ਤਸ੍ਸ ਕੋ ਵਚਨਤ੍ਥੋ ਕੋ ਸਦ੍ਦਤ੍ਥੋ. ਵੁਚ੍ਚਤੇ ਆਚਰਿਯੇਨ. ਸਬ੍ਬਸਙ੍ਗਾਹਕਵਸੇਨ ਸਬ੍ਬੇਸਂ ਚਿਤ੍ਤਾਨਂ ਸਙ੍ਗਾਹਕਨਯਵਸੇਨ. ਆਰਮ੍ਮਣਂ ਚਿਨ੍ਤੇਤਿ ਜਾਨਾਤੀਤਿ ਚਿਤ੍ਤਂ, ਤਦਾ ਸਬ੍ਬਂ ਚਿਤ੍ਤਂ ਅਧਿਪ੍ਪੇਤਂ. ਜਵਨਵੀਥਿਵਸੇਨ ਅਤ੍ਤਸਨ੍ਤਾਨਂ ਚਿਨੋਤੀਤਿ ਚਿਤ੍ਤਂ, ਤਦਾ ਕੁਸਲਾਕੁਸਲਮਹਾਕਿਰਿਯਾਚਿਤ੍ਤਂ ਅਧਿਪ੍ਪੇਤਂ. ਅਞ੍ਞੇਸਂ ਜਵਨਾਨਂ ਅਗ੍ਗਹਣਂ ਕਾਮਾਵਚਰਜਵਨਾਨਿ ਏਵ ਯੇਭੁਯ੍ਯਵਸੇਨ ਸਤ੍ਤਕ੍ਖਤ੍ਤੁਂ ਜਵਨ੍ਤੀਤਿ ਞਾਪਨਤ੍ਥਂ.
੯. ਵਿਚਿਤ੍ਤਂ ਕਰਣਂ ਯਸ੍ਸ ਤਂ ਵਿਚਿਤ੍ਤਕਰਣਂ, ਤਸ੍ਸ ਭਾਵੋ ਵਿਚਿਤ੍ਤਕਰਣਾ. ‘‘ਇਮਸ੍ਸ ਰੂਪਸ੍ਸ ਉਦ੍ਧਂ ਇਦਂ ਹੋਤੁ, ਹੇਟ੍ਠਾ ਇਦਂ ਹੋਤੁ, ਉਭਯਪਸ੍ਸੇ ਇਦ’’ਨ੍ਤਿ ਚਿਨ੍ਤੇਤ੍ਵਾ ਯਥਾਚਿਨ੍ਤਿਤੇਨ ਕਮੇਨ ਸੇਸਚਿਤ੍ਤਰੂਪਨਿਪ੍ਫਾਦਨਂ ਹੋਤਿ, ਏਵਂ ਯਂ ਕਿਞ੍ਚਿ ਲੋਕੇ ਵਿਚਿਤ੍ਤਂ ਸਿਪ੍ਪਜਾਤਂ, ਸਬ੍ਬਂ ਤਂ ਚਿਤ੍ਤੇਨੇਵ ਕਰੀਯਤਿ. ਏਵਂ ਵਿਚਿਤ੍ਤਕਰਣਤਾਯ ਚਿਤ੍ਤਂ. ਤਦਾ ਕਰਣਤਾਯ ਚਿਤ੍ਤਂ ਕਰੋਤੀਤਿ ਚਿਤ੍ਤਂ. ਇਦਂ ਤਦ੍ਧਿਤਪਦਂ. ਵਾ ਅਯਂ ਅਞ੍ਞੋ ਨਯੋ. ਤਂ ਅਤ੍ਤਨੋ ਚਿਤ੍ਤਤਾਯ ਅਞ੍ਞਦੇਵ ਸਰਾਗਂ ਚਿਤ੍ਤਂ, ਅਞ੍ਞਂ ਸਦੋਸਂ, ਅਞ੍ਞਂ ਸਮੋਹਂ. ਅਞ੍ਞਂ ਕਾਮਾਵਚਰਂ, ਅਞ੍ਞਂ ਰੂਪਾਵਚਰਾਦਿਭੇਦਂ. ਅਞ੍ਞਂ ਰੂਪਾਰਮ੍ਮਣਂ, ਅਞ੍ਞਂ ਸਦ੍ਦਾਦਿਆਰਮ੍ਮਣਂ. ਰੂਪਾਰਮ੍ਮਣੇਸੁਪਿ ਅਞ੍ਞਂ ਨੀਲਾਰਮ੍ਮਣਂ, ਅਞ੍ਞਂ ਪੀਤਾਦਿਆਰਮ੍ਮਣਂ. ਸਦ੍ਦਾਦਿਆਰਮ੍ਮਣੇਸੁਪਿ ਏਸੇਵ ਨਯੋ. ਸਬ੍ਬੇਸੁਪਿ ਤੇਸੁ ਅਞ੍ਞਂ ਹੀਨਂ, ਅਞ੍ਞਂ ਮਜ੍ਝਿਮਂ, ਅਞ੍ਞਂ ਪਣੀਤਂ. ਹੀਨਾਦੀਸੁਪਿ ਅਞ੍ਞਂ ਛਨ੍ਦਾਧਿਪਤੇਯ੍ਯਂ, ਅਞ੍ਞਂ ਚਿਤ੍ਤਾਧਿਪਤੇਯ੍ਯਂ, ਅਞ੍ਞਂ ਵੀਰਿਯਾਧਿਪਤੇਯ੍ਯਂ, ਅਞ੍ਞਂ ਵੀਮਂਸਾਧਿਪਤੇਯ੍ਯਂ, ਤਸ੍ਮਾ ਯਸ੍ਸ ਇਮੇਸਂ ਸਮ੍ਪਯੁਤ੍ਤਭੂਮਿਆਰਮ੍ਮਣਹੀਨਮਜ੍ਝਿਮਪਣੀਤਾਧਿਪਤੀਨਂ ਵਸੇਨ ਅਤ੍ਤਨੋ ਚਿਤ੍ਤਤਾਯ ਚਿਤ੍ਤਂ. ਚਿਤ੍ਤੋ ਏਤਸ੍ਮਿਂ ਅਤ੍ਥੀਤਿ ਚਿਤ੍ਤਂ. ਤਦਾ ਸਬ੍ਬਂ ਚਿਤ੍ਤਂ. ਪਞ੍ਞਤ੍ਤਿਯਮ੍ਪਿ ਵਿਞ੍ਞਾਣੇ ਵਿਚਿਤ੍ਤੇ ਚਿਤ੍ਤਸ੍ਸ ਕਮ੍ਮਂ ਚਿਤ੍ਤਕਮ੍ਮਂ, ਚਿਤ੍ਤਕਮ੍ਮਮੇਵ ਚਿਤ੍ਤਕਮ੍ਮਕਂ, ਚਿਤ੍ਤਕਮ੍ਮਕੇ ਵਿਚਿਤ੍ਤੇ ਇਧ ਇਮਸ੍ਮਿਂ ਅਧਿਕਾਰੇ ਚਿਤ੍ਤਸਮ੍ਮੁਤਿ ਚਿਤ੍ਤਸਦ੍ਦੋ ਵਿਞ੍ਞਾਣੇ ਚਿਤ੍ਤੇ ਵਿਞ੍ਞੁਨਾ ਦਟ੍ਠਬ੍ਬੋ.
ਤਂ ਪਨ ਸਬ੍ਬਸਙ੍ਗਾਹਕਵਸੇਨ ਚਿਨ੍ਤੇਤੀਤਿਆਦਿਨਾ ਵੁਤ੍ਤਪ੍ਪਕਾਰਂ ਚਿਤ੍ਤਂ. ਸਾਰਮ੍ਮਣਤੋ ਸਾਰਮ੍ਮਣਭਾਵੇਨ ਏਕਵਿਧਂ. ਸਵਿਪਾਕਾਵਿਪਾਕਤੋ ਸਵਿਪਾਕਾਵਿਪਾਕਵਸੇਨ ਦੁਵਿਧਂ. ਤਤ੍ਥ ਤਸ੍ਮਿਂ ਦੁਵਿਧੇ ਚਿਤ੍ਤੇ ਸਵਿਪਾਕਂ ਨਾਮ ਚਿਤ੍ਤਂ ਕੁਸਲਾਕੁਸਲਂ, ਅਵਿਪਾਕਂ ਅਬ੍ਯਾਕਤਂ, ਕੁਸਲਾਕੁਸਲਭਾਵੇਨ ਅਕਥਿਤਨ੍ਤਿ ਅਤ੍ਥੋ. ਕੁਸਲਜਾਤਿ ਅਕੁਸਲਜਾਤਿ ਅਬ੍ਯਾਕਤਜਾਤੀਤਿ ਜਾਤਿਭੇਦਤੋ ਤਿਵਿਧਂ.
ਤਤ੍ਥ ਤਸ੍ਮਿਂ ਵਚਨੇ ‘‘ਕੁਸਲ’’ਨ੍ਤਿ ਏਤਸ੍ਸ ਸਦ੍ਦਸ੍ਸ ਪਨ ਕੋ ਵਚਨਤ੍ਥੋ.
੧੦. ਕੁਚ੍ਛਿਤਾਨਂ ਸਲਨਤੋ ਪਾਪਕਾਨਂ ਧਮ੍ਮਾਨਂ ਕਮ੍ਪਨਤੋ ਵਿਦ੍ਧਂਸਨਤੋ. ਕੁਚ੍ਛਿਤੇਨਾਕਾਰੇਨ ਸਯਨ੍ਤੀਤਿ ਕੁਸਾ, ਕੁਸਾਨਂ ਅਕੁਸਲਸਙ੍ਖਾਤਾਨਂ ਲਵਨੇਨ ਛਿਨ੍ਦਨਤੋ. ਕੁਚ੍ਛਿਤੇ ਸਾਤਿ ਤਨੁਂ ਕਰੋਤੀਤਿ ਕੁਸਂ, ਕੁਸੇਨ ਞਾਣੇਨ ਲਾਤਬ੍ਬਤ੍ਤਾ ਗਹੇਤਬ੍ਬਤ੍ਤਾ. ਵਾ ਅਯਂ ਅਞ੍ਞੋ ਨਯੋ.
੧੧. ਕੁਸਲਸਦ੍ਦੋਯਂ ਅਯਂ ਕੁਸਲਸਦ੍ਦੋ ਛੇਕੇ ਅਤ੍ਥੇ ਆਰੋਗ੍ਯਤ੍ਥੇ ਅਨਵਜ੍ਜਤ੍ਥੇ ਇਟ੍ਠਵਿਪਾਕੇ ਅਤ੍ਥੇਪਿ ਦਿਟ੍ਠੋ ਅਮ੍ਹੇਹਿ. ਇਧ ਇਮਸ੍ਮਿਂ ਅਧਿਕਾਰੇ ਅਨਵਜ੍ਜਾਦਿਕੇ ਅਤ੍ਥੇ ਦਿਟ੍ਠੋ. ਆਦਿ-ਸਦ੍ਦੇਨ ਆਰੋਗ੍ਯਤ੍ਥਇਟ੍ਠਵਿਪਾਕਤ੍ਥਾ ਗਹੇਤਬ੍ਬਾ. ਦਿਟ੍ਠੋ ਯਸ੍ਮਾ, ਤਸ੍ਮਾ ਅਨਵਜ੍ਜਇਟ੍ਠਵਿਪਾਕਲਕ੍ਖਣਂ ਕੁਸਲਂ. ਨਤ੍ਥਿ ਅਵਜ੍ਜਂ ਕਿਲੇਸਾਵਜ੍ਜਂ ਕਿਲੇਸਦੋਸੋ ਕਿਲੇਸਦਰਥੋ ਏਤਸ੍ਸਾਤਿ ਅਨਵਜ੍ਜਂ, ਕਮ੍ਮੇਨ ਵਿਪਚ੍ਚੀਯਤੇਤਿ ਵਿਪਾਕੋ, ਇਟ੍ਠਾਨਿਟ੍ਠਾਦਿਆਰਮ੍ਮਣਾਨੁਭਵਨਵਸੇਨ, ਅਤ੍ਤਨੋ ਸਭਾਵੇਨ ਚ ਇਟ੍ਠੋ ਵਿਪਾਕੋ ਏਤਸ੍ਸਾਤਿ ਇਟ੍ਠਵਿਪਾਕਂ, ਅਨਵਜ੍ਜਮੇਵ ਇਟ੍ਠਵਿਪਾਕਂ, ਤਂ ਲਕ੍ਖੀਯਤਿ ਅਨੇਨ ਅਵਿਞ੍ਞਾਤਂ ਲਕ੍ਖਿਤਬ੍ਬਂ ਕੁਸਲਨ੍ਤਿ ਲਕ੍ਖਣਂ, ਅਨਵਜ੍ਜਇਟ੍ਠਵਿਪਾਕਂ ਲਕ੍ਖਣਂ ਏਤਸ੍ਸਾਤਿ ਅਨਵਜ੍ਜਇਟ੍ਠਵਿਪਾਕਲਕ੍ਖਣਂ. ਅਨਵਜ੍ਜਇਟ੍ਠਵਿਪਾਕਮੇਵ ਕੁਸਲਂ. ਨਨੁ ਕਥਂ ਸਯਮੇਵ ਅਤ੍ਤਨੋ ਲਕ੍ਖਣਂ ਭਵੇਯ੍ਯਾਤਿ ਚੋਦਨਾ ਭਵੇਯ੍ਯ ਵਿਞ੍ਞਾਤਾਵਿਞ੍ਞਾਤਸਦ੍ਦਤ੍ਥਭਾਵੇਨ ਲਕ੍ਖਣਲਕ੍ਖਿਤਬ੍ਬਭਾਵਯੁਤ੍ਤਿਤੋ. ਕੁਸਲਸਦ੍ਦਤ੍ਥਵਸੇਨ ਹਿ ਅਵਿਞ੍ਞਾਤਂ ਅਪਾਕਟਂ ਕੁਸਲਂ ਲਕ੍ਖਿਤਬ੍ਬਂ ਹੋਤਿ. ਅਨਵਜ੍ਜਇਟ੍ਠਵਿਪਾਕਸਦ੍ਦਤ੍ਥਵਸੇਨ ਵਿਞ੍ਞਾਤਂ ਪਾਕਟਂ ਕੁਸਲਂ ਲਕ੍ਖਣਂ ਹੋਤਿ. ਅਕੁਸਲਵਿਦ੍ਧਂਸਨਰਸਂ ਅਕੁਸਲਾਨਂ ਵਿਦ੍ਧਂਸਨਂ ਅਕੁਸਲਵਿਦ੍ਧਂਸਨਂ, ਤਂ ਰਸੋ ਕਿਚ੍ਚਮੇਤਸ੍ਸਾਤਿ ਅਕੁਸਲਵਿਦ੍ਧਂਸਨਰਸਂ, ਅਕੁਸਲਵਿਦ੍ਧਂਸਨਕਿਚ੍ਚਂ. ਵੋਦਾਨਭਾਵੇਨ ਪਚ੍ਚੁਪਟ੍ਠਾਤੀਤਿ ਵੋਦਾਨਪਚ੍ਚੁਪਟ੍ਠਾਨਂ, ਵੋਦਾਨਉਪਟ੍ਠਾਨਾਕਾਰਂ ਵੋਦਾਨਗਯ੍ਹਾਕਾਰਂ. ਵਾ ਅਯਂ ਅਞ੍ਞੋ ਨਯੋ. ਵਜ੍ਜਪਟਿਪਕ੍ਖਤ੍ਤਾ ਅਨਵਜ੍ਜਲਕ੍ਖਣਮੇਵ ਕੁਸਲਂ, ਵਜ੍ਜਪਟਿਪਕ੍ਖਲਕ੍ਖਣਂ ਕੁਸਲਨ੍ਤਿ ਅਤ੍ਥੋ. ਵੋਦਾਨਭਾਵਰਸਂ ਵੋਦਾਨਭਾਵਸਮ੍ਪਤ੍ਤਿਕਂ. ਇਟ੍ਠਵਿਪਾਕਪਚ੍ਚੁਪਟ੍ਠਾਨਂ ਇਟ੍ਠਵਿਪਾਕਫਲਂ. ਯੋਨਿਸੋਮਨਸਿਕਾਰਪਦਟ੍ਠਾਨਂ ਪਦਞ੍ਚ ਤਂ ਠਾਨਞ੍ਚਾਤਿ ਪਦਟ੍ਠਾਨਂ, ਉਭੋ ਕਾਰਣਤ੍ਥਾਧਿਵਚਨਂ, ਤਸ੍ਮਾ ਆਸਨ੍ਨਕਾਰਣਨ੍ਤਿ ਅਤ੍ਥੋ, ਇਤਰਥਾ ਪੁਨਰੁਤ੍ਤਿਦੋਸੋ ਸਿਯਾ, ਯੋਨਿਸੋਮਨਸਿਕਾਰੋ ਪਦਟ੍ਠਾਨਂ ਆਸਨ੍ਨਕਾਰਣਂ ਏਤਸ੍ਸਾਤਿ ਯੋਨਿਸੋਮਨਸਿਕਾਰਪਦਟ੍ਠਾਨਂ.
ਸਾਵਜ੍ਜਾਨਿਟ੍ਠਵਿਪਾਕਲਕ੍ਖਣਂ ਅਕੁਸਲਂ. ਤਦੁਭਯਵਿਪਰੀਤਂ ਤੇਹਿ ਉਭਯੇਹਿ ਕੁਸਲਾਕੁਸਲੇਹਿ ਵਿਪਰੀਤਂ ਅਵਿਪਾਕਲਕ੍ਖਣਂ ਏਤਸ੍ਸਾਤਿ ਤਦੁਭਯਵਿਪਰੀਤਲਕ੍ਖਣਂ ਅਬ੍ਯਾਕਤਂ. ਵਾ ਅਯਂ ਅਞ੍ਞੋ ਨਯੋ. ਅਵਿਪਾਕਾਰਹਂ ਵਿਪਾਕਸ੍ਸ ਅਨਨੁਚ੍ਛਵਿਕਂ.
ਸਵਤ੍ਥੁਕਾਵਤ੍ਥੁਕਭੇਦਤੋਤਿ ਸਵਤ੍ਥੁਕਂ ਹਦਯਵਤ੍ਥੁਕਂ, ਅਵਤ੍ਥੁਕਂ ਹਦਯਵਤ੍ਥੁਵਿਰਹਿਤਂ.
੧੨. ਉਦ੍ਦਾਨਤੋ ਸਙ੍ਖੇਪਵਸੇਨ ਕਿਲੇਸਵਤ੍ਥੁਵਸੇਨ ਦੁਵੇ ਕਾਮਾ ਹੋਨ੍ਤਿ. ਛਨ੍ਦਰਾਗੋਵ ਕਿਲੇਸੋ, ਤੇਭੂਮਕੇ ਪਵਤ੍ਤਂ ਵਟ੍ਟਸਹਿਤਂ ਵਤ੍ਥੁ, ਵਸਤਿ ਕਿਲੇਸੋ ਏਤ੍ਥਾਤਿ ਵਤ੍ਥੁ.
੧੩. ਕਿਲੇਸਕਾਮੋ ਵਤ੍ਥੁਂ ਕਾਮੇਤਿ ਇਚ੍ਛਤਿ, ਵਤ੍ਥੁ ਕਿਲੇਸਕਾਮੇਨ ਕਾਮੀਯਤਿ ਇਚ੍ਛੀਯਤੀਤਿ ਕਤ੍ਤੁਕਾਰਕਕਮ੍ਮਕਾਰਕਦ੍ਵਯੇ ਸਾਧਨਦ੍ਵਯੇ ਏਸ ਏਸੋ ਦੁਵਿਧੋਪਿ ਕਾਮੋ ਸਿਜ੍ਝਤਿ.
੧੪-੫. ਸੋ ਅਯਂ ਦੁਵਿਧੋਪਿ ਕਾਮੋ ਯਸ੍ਮਿਂ ਪਦੇਸੇ ਸਮ੍ਪਤ੍ਤੀਨਂ ਵਸੇਨ ਅਵਚਰਤਿ, ਇਤਿ ਤਸ੍ਮਾ ਕਾਰਣਾ ਸੋ ਪਨ ਪਦੇਸੋ ਚਤੁਪਾਯਾਨਂ ਛਨ੍ਨਂ ਦੇਵਾਨਂ ਮਨੁਸ੍ਸਾਨਂ ਵਸੇਨ ਏਵ ਏਕਾਦਸਵਿਧੋ ਹੋਤਿ.
੧੬. ਕਾਮੋਵਚਰਤੀਤਿ ਏਤ੍ਥ ਏਤਸ੍ਮਿਂ ਏਕਾਦਸਵਿਧੇ ਪਦੇਸੇ ਕਾਮੋ ਅਵਚਰਤਿ, ਇਤਿ ਤਸ੍ਮਾ ਕਾਰਣਾ ਸੋ ਪਦੇਸੋ ਅਸ੍ਸ ਕਾਮਸ੍ਸ ਅਨੇਨ ਕਾਮੇਨ ਅਭਿਲਕ੍ਖਿਤਤ੍ਤਾ ਕਾਮਾਵਚਰਸਞ੍ਞਿਤੋ. ਅਭਿਲਕ੍ਖਿਤਸਦ੍ਦਪ੍ਪਯੋਗੇ ਤਤਿਯਤ੍ਥੇ ‘‘ਅਸ੍ਸਾ’’ਤਿ ਛਟ੍ਠੀ ਹੋਤੀਤਿ ਸਦ੍ਦਸਤ੍ਥਵਿਦੂ ਪਠਨ੍ਤਿ. ਸਸਤ੍ਥਾਵਚਰੋ ਪਦੇਸੋ ਵਿਯ ਸਤ੍ਤੇ ਸਸਨ੍ਤਿ ਹਿਂਸਨ੍ਤਿ ਤੇਹੀਤਿ ਸਤ੍ਥਾ, ਸਹ ਸਤ੍ਥੇਹੀਤਿ ਸਸਤ੍ਥਾ, ਸਸਤ੍ਥਾ ਪੁਰਿਸਾ ਅਵਚਰਨ੍ਤਿ ਏਤ੍ਥਾਤਿ ਸਸਤ੍ਥਾਵਚਰੋ. ਯਥਾ ਹਿ ਯਸ੍ਮਿਂ ਪਦੇਸੇ ਸਸਤ੍ਥਾ ਪੁਰਿਸਾ ਅਵਚਰਨ੍ਤਿ, ਸੋ ਪਦੇਸੋ ਵਿਜ੍ਜਮਾਨੇਸੁਪਿ ਅਞ੍ਞੇਸੁ ਦ੍ਵਿਪਦਚਤੁਪ੍ਪਦੇਸੁ ਅਵਚਰਨ੍ਤੇਸੁ ਤੇਸਂ ਉਪਲਕ੍ਖਿਤਤ੍ਤਾ ‘‘ਸਸਤ੍ਥਾਵਚਰੋ’’ਤ੍ਵੇਵ ਵੁਚ੍ਚਤਿ, ਏਵਂ ਵਿਜ੍ਜਮਾਨੇਸੁਪਿ ਅਞ੍ਞੇਸੁ ਰੂਪਾਵਚਰਾਦੀਸੁ ਤਤ੍ਥ ਅਵਚਰਨ੍ਤੇਸੁ ਤੇਸਂ ਅਭਿਲਕ੍ਖਿਤਤ੍ਤਾ ਅਯਂ ਪਦੇਸੋ ‘‘ਕਾਮਾਵਚਰੋ’’ਤ੍ਵੇਵ ਵੁਚ੍ਚਤਿ.
੧੭. ਯਥਾ ਰੂਪਭਵੋ ਉਤ੍ਤਰਪਦਸ੍ਸ ਲੋਪਂ ਕਤ੍ਵਾ ਰੂਪਨ੍ਤਿ ਵੁਤ੍ਤੋ, ਏਵਂ ਤਥਾ ਸ੍ਵਾਯਂ ਸੋ ਅਯਂ ਏਸੋ ਕਾਮਾਵਚਰੋ ਉਤ੍ਤਰਪਦਸ੍ਸ ਲੋਪਂ ਕਤ੍ਵਾ ਕਾਮੋ ਇਤਿ ਸਞ੍ਞਿਤੋ ਕਾਮੋ ਨਾਮ ਉਦੀਰਿਤੋ ਪਣ੍ਡਿਤੇਨ ਕਥਿਤੋ.
੧੮. ਤਸ੍ਮਿਂ ਕਾਮੇ ਇਦਂ ਚਿਤ੍ਤਂ ਤਸ੍ਮਿਂ ਕਾਮਾਵਚਰੇ ਸਦਾ ਅਵਚਰਤਿ, ਇਤਿ ਤਸ੍ਮਾ ਕਾਰਣਾ ਕਾਮਾਵਚਰਂ ਇਤਿ ਏਵਂ ਕਾਮਘਾਤਿਨਾ ਕਾਮਾਨਂ ਵਿਨਾਸਕੇਨ ਬੁਦ੍ਧੇਨ ਕਥਿਤਂ. ਕਿਞ੍ਚਾਪਿ ਏਤਂ ਰੂਪਾਰੂਪਭਵੇਸੁਪਿ ਅਵਚਰਤਿ, ਯਥਾ ਪਨ ਸਙ੍ਗਾਮੇ ਯੇਭੁਯ੍ਯੇਨ ਅਵਚਰਣਤੋ ‘‘ਸਙ੍ਗਾਮਾਵਚਰੋ’’ਤਿ ਲਦ੍ਧਨਾਮੋ ਨਾਗੋ ਨਗਰੇ ਚਰਨ੍ਤੋਪਿ ‘‘ਸਙ੍ਗਾਮਾਵਚਰੋ’’ਤ੍ਵੇਵ ਵੁਚ੍ਚਤਿ, ਥਲਚਰਜਲਚਰਾ ਪਾਣਿਨੋ ਅਥਲੇ ਅਜਲੇ ਠਿਤਾਪਿ ‘‘ਥਲਚਰਜਲਚਰਾ’’ਤ੍ਵੇਵ ਵੁਚ੍ਚਨ੍ਤਿ, ਏਵਂ ਇਦਂ ਅਞ੍ਞਤ੍ਥ ਅਵਚਰਨ੍ਤਮ੍ਪਿ ਕਾਮਾਵਚਰਮੇਵਾਤਿ ਦਟ੍ਠਬ੍ਬਂ. ਆਰਮ੍ਮਣਕਰਣਵਸੇਨ ਵਾ ਏਤ੍ਥ ਕਾਮੋ ਅਵਚਰਤੀਤਿਪਿ ਕਾਮਾਵਚਰਂ. ਕਾਮਞ੍ਚੇਸ ਰੂਪਾਰੂਪਾਵਚਰੇਸੁਪਿ ਅਵਚਰਤਿ, ਯਥਾ ਪਨ ਵਦਤੀਤਿ ਵਚ੍ਛੋ, ਮਹਿਯਂ ਸੇਤੀਤਿ ਮਹਿਂਸੋਤਿ ਵੁਤ੍ਤੇ ਨ ਯਤ੍ਤਕਾ ਵਦਨ੍ਤਿ, ਮਹਿਯਂ ਵਾ ਸੇਨ੍ਤਿ, ਸਬ੍ਬੇਸਂ ਤਂ ਨਾਮਂ ਹੋਤਿ, ਏਵਂਸਮ੍ਪਦਮਿਦਂ ਦਟ੍ਠਬ੍ਬਂ.
੧੯. ਪਟਿਸਨ੍ਧਿਂ ਭਵੇ ਕਾਮੇ ਕਾਮਭਵਸਙ੍ਖਾਤੇ ਕਾਮੇ ਪਟਿਸਨ੍ਧਿਂ ਅਵਚਾਰਯਤਿ, ਇਤਿ ਤਸ੍ਮਾ ਕਾਮਾਵਚਰਂ. ਇਤਿ ਏਵਂ ਵਾ ਅਯਂ ਅਞ੍ਞੋ ਨਯੋ. ਤਤ੍ਰ ਤਸ੍ਮਿਂ ਕਾਮਾਵਚਰੇ ਪਰਿਯਾਪਨ੍ਨਂ ਅਨ੍ਤੋਗਧਂ, ਇਤਿ ਤਸ੍ਮਾ ਕਾਮਾਵਚਰਂ.
੨੦. ਅਟ੍ਠਵਿਧਂ ਚਿਤ੍ਤਂ ਕਾਮਾਵਚਰਸਞ੍ਞਿਤਂ ਇਦਂ ਅਟ੍ਠਵਿਧਂ ਚਿਤ੍ਤਂ. ਦਸਪੁਞ੍ਞਕਿਰਿਯਵਤ੍ਥੁਵਸੇਨੇਵ ਪੁਞ੍ਞਕਿਰਿਯਾ ਏਵ ਤੇਸਂ ਤੇਸਂ ਫਲਾਨਿਸਂਸਾਨਂ ਵਤ੍ਥੂਨਿ ਕਾਰਣਾਨੀਤਿ ਪੁਞ੍ਞਕਿਰਿਯਵਤ੍ਥੂਨਿ, ਤੇਸਂ ਵਸੋ, ਤੇਨ ਪਵਤ੍ਤਤਿ.
੨੧. ਦਾਨਂ ਸੀਲਂ ਭਾਵਨਾ ਪਤ੍ਤਿਦਾਨਂ ਵੇਯ੍ਯਾਵਚ੍ਚਂ ਧਮ੍ਮਦੇਸਨਾ ਅਨੁਮੋਦਨਾ ਦਿਟ੍ਠਿਜੁਭਾਵੋ ਸਂਸੁਤਿ ਧਮ੍ਮਸ੍ਸਵਨਞ੍ਚ ਅਪਚਾਯੋ ਅਪਚਾਯਨਂ, ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਪੁਞ੍ਞਾਨਿ ਏਵ ਵਤ੍ਥੂਨਿ ਪੁਞ੍ਞਵਤ੍ਥੂਨਿ, ਤੇਸਂ ਪਭੇਦੋ ਪੁਞ੍ਞਵਤ੍ਥੁਪ੍ਪਭੇਦੋ ਞੇਯ੍ਯੋ ਪਣ੍ਡਿਤੇਨ ਜਾਨਿਤਬ੍ਬੋ.
੨੨-੩. ਗਚ੍ਛਨ੍ਤਿ ਸਙ੍ਗਹਂ ਦਾਨੇ ਪਤ੍ਤਿਦਾਨਾਨੁਮੋਦਨਾ ਦਾਨੇ ਸਙ੍ਗਹਂ ਗਚ੍ਛਨ੍ਤਿ, ਵੇਯ੍ਯਾਵਚ੍ਚਾਪਚਾਯਨਾ ਸੀਲਮਯੇ ਪੁਞ੍ਞੇ ਸਙ੍ਗਹਂ ਗਚ੍ਛਨ੍ਤਿ, ਧਮ੍ਮਦੇਸਨਾ ਧਮ੍ਮਸ੍ਸਵਨਂ ਦਿਟ੍ਠਿਉਜੁਕਾ ਭਾਵਨਾਮਯੇ ਪੁਞ੍ਞੇ ਸਙ੍ਗਹਂ ਗਚ੍ਛਨ੍ਤਿ, ਦਸ ਪੁਞ੍ਞਕਿਰਿਯਾਪਿ ਚ ਤੀਣਿ ਏਵ ਸਮ੍ਭੋਨ੍ਤਿ.
੨੪. ਸਬ੍ਬਾਨੁਸ੍ਸਤਿਪੁਞ੍ਞਞ੍ਚ ਪਸਂਸਾ ਸਰਣਤ੍ਤਯਂ ਰਤਨਤ੍ਤਯਗੁਣਪਸਂਸਾ ਚ ਏਤੇ ਦਿਟ੍ਠਿਜੁਕਮ੍ਮਮ੍ਹਿ ਸਙ੍ਗਯ੍ਹਨ੍ਤਿ, ਤਸ੍ਮਿਂ ਸਙ੍ਗਹਪਾਪੁਣੇ ਸਂਸਯੋ ਸਨ੍ਦੇਹੋ ਨਤ੍ਥਿ.
੨੫. ਪੁਰਿਮਾ ਚੇਤਨਾ ਤਤੋ ਪੁਬ੍ਬਭਾਗੇ ਪਵਤ੍ਤਾ ਚੇਤਨਾ, ਮੁਞ੍ਚਚੇਤਨਾ ਪਚ੍ਚੁਪ੍ਪਨ੍ਨਾ ਚੇਤਨਾ, ਪਰਚੇਤਨਾ ਪਚ੍ਛਾਕਾਲੇ ਪਵਤ੍ਤਾ ਚੇਤਨਾ, ਤਿਸ੍ਸੋਪਿ ਚੇਤਨਾ ਦਾਨਮਯੇ ਪੁਞ੍ਞੇ ਹੋਨ੍ਤਿ. ਏਵਨ੍ਤਿ ਯਥਾ ਤਿਸ੍ਸੋਪਿ ਚੇਤਨਾ ਦਾਨਮਯੇ ਪੁਞ੍ਞੇ ਹੋਨ੍ਤਿ, ਏਵਂ ਤਥਾ ਦਾਨਮਯਪੁਞ੍ਞਤੋ ਸੇਸੇਸੁਪਿ ਸੀਲਮਯਭਾਵਨਾਮਯੇਸੁ ਤਿਸ੍ਸੋ ਚੇਤਨਾ ਪਣ੍ਡਿਤੋ ਦੀਪਯੇ ਕਥੇਯ੍ਯ.
ਹਿ ਸਚ੍ਚਂ ਯਦਾ ਪਨ ਯੋ ਪੁਗ੍ਗਲੋ ਦੇਯ੍ਯਧਮ੍ਮਪਟਿਗ੍ਗਾਹਕਾਦਿਸਮ੍ਪਤ੍ਤਿਂ ਆਗਮ੍ਮ ਪਟਿਚ੍ਚ. ਪਟਿਗ੍ਗਾਹਕਾਦਿਸਮ੍ਪਤ੍ਤਿਨ੍ਤਿ ਏਤ੍ਥ ਆਦਿ-ਸਦ੍ਦੇਨ ਦੇਸਕਾਲਕਲ੍ਯਾਣਮਿਤ੍ਤਾਦਯੋ ਗਹਿਤਾ. ਅਞ੍ਞਂ ਵਾ ਸੋਮਨਸ੍ਸਹੇਤੁਨ੍ਤਿ ਅਞ੍ਞ-ਗ੍ਗਹਣੇਨ ਸਦ੍ਧਾਬਹੁਲਤਾਵਿਸੁਦ੍ਧਿਦਿਟ੍ਠਿਤਾਕੁਸਲਕਿਰਿਯਾਨਿਸਂਸਦਸ੍ਸਿਤਾਸੋਮਨਸ੍ਸਪਟਿਸਨ੍ਧਿਕਤਾਦੀਨਂ ਸਙ੍ਗਹੋ. ਅਤ੍ਥਿ ਦਿਨ੍ਨਂ ਦਾਨਸ੍ਸ ਫਲਂ ਅਤ੍ਥਿ. ਆਦਿ-ਸਦ੍ਦੇਨ ਅਤ੍ਥਿਹੁਤਾਦਯੋ ਗਹਿਤਾ. ਪੁਰਕ੍ਖਤ੍ਵਾਤਿ ਪੁਰਤੋ ਕਤ੍ਵਾ. ਪਰੇਹਿ ਅਨੁਸ੍ਸਾਹਿਤੋ ਅਚੋਦਿਤੋ ਦਾਨਾਦੀਨਿ ਪੁਞ੍ਞਾਨਿ ਕਰੋਤਿ. ਦਾਨਾਦੀਨੀਤਿ ਵਚਨੇਨ ਦੇਯ੍ਯਧਮ੍ਮਂ ਨਿਸ੍ਸਾਯ ਪਵਤ੍ਤਦਾਨਚੇਤਨਾ ਗਹੇਤਬ੍ਬਾ. ਤਦਾ ਅਸ੍ਸ ਪੁਗ੍ਗਲਸ੍ਸ. ਸਙ੍ਖਰਣਂ ਸਙ੍ਖਾਰੋ, ਨਤ੍ਥਿ ਸਙ੍ਖਾਰੋ ਏਤਸ੍ਸਾਤਿ ਅਸਙ੍ਖਾਰੋ, ਤਂ ਏਵ ਅਸਙ੍ਖਾਰਿਕਂ, ਅਪ੍ਪਯੋਗਨ੍ਤਿ ਅਤ੍ਥੋ. ਵੁਤ੍ਤਨਯੇਨਾਤਿ ਵੁਤ੍ਤਨਯੋ ਨਾਮ ‘‘ਦੇਯ੍ਯਧਮ੍ਮਪਟਿਗ੍ਗਾਹਕਾਦਿਸਮ੍ਪਤ੍ਤਿ’’ਨ੍ਤਿ ਵਚਨਂ. ਇਮਸ੍ਮਿਂ ਪਨਤ੍ਥੇ ਸਙ੍ਖਰੋਤੀਤਿ ਸਙ੍ਖਾਰੋ ਨਾਮ ਅਤ੍ਤਨੋ ਵਾ ਪਵਤ੍ਤਸ੍ਸ ਪੁਬ੍ਬਪ੍ਪਯੋਗਸ੍ਸ ਅਧਿਵਚਨਂ, ਪਰਸ੍ਸ ਵਾ ਪਵਤ੍ਤਪੁਬ੍ਬਪ੍ਪਯੋਗਸ੍ਸ ਅਧਿਵਚਨਂ. ਅਯਮਸ੍ਸ ਅਧਿਪ੍ਪਾਯੋ – ਯਦਾ ਯੋ ‘‘ਦਾਨਾਦੀਨਿ ਕਰਿਸ੍ਸਾਮੀ’’ਤਿ ਚਿਤ੍ਤਂ ਸਮੁਪ੍ਪਾਦੇਤ੍ਵਾ ਨਾਕਾਸਿ, ਪਚ੍ਛਾ ਅਤ੍ਤਨੋ ਪੁਬ੍ਬਚੇਤਨਾਯ ਉਸ੍ਸਾਹਿਤੋ ਕਰੋਤਿ, ਤਦਾ ਸਸਙ੍ਖਾਰਿਕਂ ਹੋਤਿ, ਅਤ੍ਤਨੋ ਪੁਬ੍ਬਪ੍ਪਯੋਗੇਨ ਸਹ ਪਵਤ੍ਤਤੀਤਿ ਅਤ੍ਥੋ. ਪਟਿਪਤ੍ਤਿਦਸ੍ਸਨੇਨ ਪਟਿਪਜ੍ਜਿਤਬ੍ਬਾ ਸੀਲਾਦੀਹਿ ਪਟਿਪਜ੍ਜਨ੍ਤਿ ਜਾਨਨ੍ਤਿ ਗਚ੍ਛਨ੍ਤਿ ਵਾ ਨਿਬ੍ਬਾਨਂ ਏਤਾਯਾਤਿ ਪਟਿਪਤ੍ਤਿ, ਤਾਯ ਦਸ੍ਸਨਂ ਪਟਿਪਤ੍ਤਿਦਸ੍ਸਨਂ, ਤੇਨ. ਜਾਤੋ ਪਰਿਚਯੋ ਏਤੇਸਨ੍ਤਿ ਜਾਤਪਰਿਚਯਾ. ਸਹਸਾਤਿ ਵੇਗੇਨ. ਚਤੂਸੁਪਿ ਵਿਕਪ੍ਪੇਸੁ ਦਸ੍ਸੇਯ੍ਯ.
੨੬. ਦਸਪੁਞ੍ਞਕ੍ਰਿਯਾਦੀਨਂ ਵਸੇਨ ਚ ਬਹੂਨਿਪਿ ਭਵਨ੍ਤਿ ਏਤਾਨਿ ਪਨ ਚਿਤ੍ਤਾਨਿ ਦਸਪੁਞ੍ਞਕਿਰਿਯਾਦੀਨਂ ਵਸੇਨਪਿ ਬਹੂਨਿਪਿ ਭਵਨ੍ਤਿ ਇਤਿ ਏਵਂ ਪਕਾਸਯੇ ਭਗਵਾ ਪਕਾਸੇਯ੍ਯ.
੨੭. ਸਤ੍ਤਰਸ ਸਹਸ੍ਸਾਨਿ, ਦ੍ਵੇ ਸਤਾਨਿ ਅਸੀਤਿ ਚ;
ਕਾਮਾਵਚਰਪੁਞ੍ਞਾਨਿ, ਭਵਨ੍ਤੀਤਿ ਵਿਨਿਦ੍ਦਿਸੇਤਿ. –
ਕਾਮਾਵਚਰਪੁਞ੍ਞਾਨਿ ਸਤ੍ਤਰਸ ਸਹਸ੍ਸਾਨਿ ਚ ਦ੍ਵੇ ਸਤਾਨਿ ਚ ਅਸੀਤਿ ਚ ਭਵਨ੍ਤਿ, ਇਤਿ ਵਚਨਂ ਵਿਨਿਦ੍ਦਿਸੇ ਆਚਰਿਯੋ ਕਥੇਯ੍ਯ.
ਦਸਪੁਞ੍ਞਕ੍ਰਿਯਾਵਤ੍ਥੁ, ਛਦ੍ਵਾਰਾਧਿਪਤੀਹਿ ਚ;
ਕਾਯਾਦੀਹਿ ਚ ਤੀਹੇਵ, ਹੀਨਾਦੀਹਿ ਚ ਤੀਹਿ ਤੁ.
ਦ੍ਵੀਸੁ ਭਵੇਸੁ ਕਾਮਭਵਰੂਪਭਵੇਸੁ. ਪਟਿਪਦਾਦਿਭੇਦਤੋ ਦੁਕ੍ਖਾਪਟਿਪਦਂ ਦਨ੍ਧਾਭਿਞ੍ਞਂ, ਦੁਕ੍ਖਾਪਟਿਪਦਂ ਖਿਪ੍ਪਾਭਿਞ੍ਞਂ, ਸੁਖਾਪਟਿਪਦਂ ਦਨ੍ਧਾਭਿਞ੍ਞਂ, ਸੁਖਾਪਟਿਪਦਂ ਖਿਪ੍ਪਾਭਿਞ੍ਞਂ. ਰੂਪਾਵਚਰਭਾਵਨਾਪੁਞ੍ਞਵਸਪ੍ਪਵਤ੍ਤਂ ਰੂਪਾਵਚਰੇ ਪਵਤ੍ਤਸ੍ਸ ਭਾਵਨਾਪੁਞ੍ਞਸ੍ਸ ਵਸੇਨ ਪਵਤ੍ਤਂ ਰੂਪਾਵਚਰੂਪਪਤ੍ਤਿਨਿਪ੍ਫਾਦਕਂ ਰੂਪਾਵਚਰੇ ਉਪਪਤ੍ਤਿਯਾ ਪਟਿਸਨ੍ਧਿਯਾ ਨਿਪ੍ਫਾਦਕਂ ਹੋਤਿ.
ਸਵਤ੍ਥੁਕਾਵਤ੍ਥੁਕਭੇਦਤੋਤਿ ਅਰੂਪਾਵਚਰਂ ਯਦਾ ਕਾਮਰੂਪੇ ਜਾਯਤਿ, ਤਦਾ ਹਦਯਵਤ੍ਥੁਂ ਨਿਸ੍ਸਾਯ ਜਾਯਤਿ, ਇਤਿ ਤਸ੍ਮਾ ਸਵਤ੍ਥੁਕਂ ਨਾਮ ਜਾਤਂ. ਯਦਾ ਅਰੂਪੇ ਜਾਯਤਿ, ਤਦਾ ਹਦਯਵਤ੍ਥੁਂ ਅਨਿਸ੍ਸਾਯ ਜਾਯਤਿ, ਇਤਿ ਤਸ੍ਮਾ ਅਵਤ੍ਥੁਕਂ ਨਾਮ ਜਾਤਂ.
ਆਕਾਸਾਨਞ੍ਚਾਯਤਨਸ੍ਸ ਕਸਿਣੁਗ੍ਘਾਟਿਮਾਕਾਸਂ ਆਰਮ੍ਮਣਂ. ਵਿਞ੍ਞਾਣਞ੍ਚਾਯਤਨਸ੍ਸ ਤਤ੍ਥ ਪਵਤ੍ਤਵਿਞ੍ਞਾਣਂ, ਤਸ੍ਮਿਂ ਕਸਿਣੁਗ੍ਘਾਟਿਮਾਕਾਸੇ ਪਵਤ੍ਤਂ ਵਿਞ੍ਞਾਣਂ ਚਿਤ੍ਤਂ ਆਰਮ੍ਮਣਂ ਹੋਤਿ. ਆਕਿਞ੍ਚਞ੍ਞਾਯਤਨਸ੍ਸ ਤਸ੍ਸ ਅਪਗਮੋ ਤਸ੍ਸ ਆਕਾਸਾਨਞ੍ਚਾਯਤਨਸ੍ਸ ਅਪਗਮੋ ਅਭਾਵੋ ਵੋਹਾਰੋ ਆਰਮ੍ਮਣਂ ਹੋਤਿ. ਨੇਵਸਞ੍ਞਾਨਾਸਞ੍ਞਾਯਤਨਸ੍ਸ ਆਕਿਞ੍ਚਞ੍ਞਾਯਤਨਂ ਆਰਮ੍ਮਣਂ ਹੋਤਿ.
ਰੂਪੇ ਸਞ੍ਞਾ ਰੂਪਸਞ੍ਞਾ. ਸਞ੍ਞਾਸੀਸੇਨ ਚਿਤ੍ਤਮ੍ਪਿ ਗਹਿਤਂ. ਸਮਤਿਕ੍ਕਮਾ ਕਸਿਣੁਗ੍ਘਾਟਿਮਾਕਾਸਸਮਤਿਕ੍ਕਮਨੇਨ. ਪਟਿਘੇ ਦ੍ਵਾਰਾਰਮ੍ਮਣਾਨਂ ਸਙ੍ਘਟ੍ਟਨੇ ਪਵਤ੍ਤਾ ਸਞ੍ਞਾ ਪਟਿਘਸਞ੍ਞਾ. ਦ੍ਵਿਪਞ੍ਚਵਿਞ੍ਞਾਣਾਨਂ ਅਧਿਵਚਨਂ. ਤਾਸਂ ਪਟਿਘਸਞ੍ਞਾਨਂ ਦ੍ਵਿਪਞ੍ਚਵਿਞ੍ਞਾਣਾਨਂ ਅਤ੍ਥਙ੍ਗਮਾ ਅਤ੍ਥਙ੍ਗਮੇਨ. ਨਾਨਾ ਅਤ੍ਤਾ ਸਭਾਵੋ ਏਤਸ੍ਸਾਤਿ ਨਾਨਤ੍ਤਂ, ਆਰਮ੍ਮਣਂ, ਨਾਨਤ੍ਤੇ ਨਾਨਾਸਭਾਵੇ ਪਵਤ੍ਤਾ ਸਞ੍ਞਾ ਨਾਨਤ੍ਤਸਞ੍ਞਾ, ਨਾਨਾ ਅਤ੍ਤਾ ਸਭਾਵੋ ਏਤਿਸ੍ਸਾਤਿ ਵਾ ਨਾਨਤ੍ਤਾ, ਸਾਯੇਵ ਸਞ੍ਞਾ ਨਾਨਤ੍ਤਸਞ੍ਞਾ, ਕਾਮਾਵਚਰਸਞ੍ਞਾਤਿ ਅਤ੍ਥੋ. ਤਾਸਂ ਨਾਨਤ੍ਤਸਞ੍ਞਾਨਂ ਅਮਨਸਿਕਾਰਾ ਅਮਨਸਿਕਾਰੇਨ.
ਨਿਯਤਾਨਿਯਤਵਤ੍ਥੁਕਭੇਦਤੋਤਿ ਸੋਤਾਪਤ੍ਤਿਮਗ੍ਗੋ ਨਿਯਤਵਤ੍ਥੁਕੋ. ਕਸ੍ਮਾ? ਕਾਮਰੂਪੇਸੁਯੇਵ ਹਦਯਵਤ੍ਥੁਂ ਨਿਸ੍ਸਾਯ ਉਪ੍ਪਜ੍ਜਨਤੋ. ਇਤਰੇ ਪਨ ਤਯੋ ਮਗ੍ਗਾ ਅਨਿਯਤਵਤ੍ਥੁਕਾ. ਕਸ੍ਮਾ? ਕਾਮਰੂਪੇਸੁ ਹਦਯਵਤ੍ਥੁਂ ਨਿਸ੍ਸਾਯ ਜਾਯਨ੍ਤਿ, ਅਰੂਪੇ ਹਦਯਵਤ੍ਥੁਂ ਅਨਿਸ੍ਸਾਯ ਜਾਯਨ੍ਤਿ, ਤਸ੍ਮਾ ਅਨਿਯਤਵਤ੍ਥੁਕਾ. ਤੀਹਿ ਵਿਮੋਕ੍ਖਮੁਖੇਹੀਤਿ ਸੁਞ੍ਞਤਅਨਿਮਿਤ੍ਤਅਪ੍ਪਣਿਹਿਤਸਙ੍ਖਾਤੇਹਿ ਤੀਹਿ ਵਿਮੋਕ੍ਖਮੁਖੇਹਿ.
ਯਸ੍ਸ ਸਂਵਿਜ੍ਜਨ੍ਤਿ, ਤਂ ਪੁਗ੍ਗਲਂ ਵਟ੍ਟਸ੍ਮਿਂ ਸਂਯੋਜੇਨ੍ਤਿ ਬਨ੍ਧਨ੍ਤੀਤਿ ਸਂਯੋਜਨਾ. ਸਕ੍ਕਾਯਦਿਟ੍ਠਿਵਿਚਿਕਿਚ੍ਛਾਸੀਲਬ੍ਬਤਪਰਾਮਾਸਾਯੇਵ ਸਂਯੋਜਨਾ ਸਕ੍ਕਾਯਦਿਟ੍ਠਿਵਿਚਿਕਿਚ੍ਛਾਸੀਲਬ੍ਬਤਪਰਾਮਾਸਸਂਯੋਜਨਾ, ਤੇਸਂ ਪਹਾਨਂ ਸਕ੍ਕਾਯਦਿਟ੍ਠਿਵਿਚਿਕਿਚ੍ਛਾਸੀਲਬ੍ਬਤਪਰਾਮਾਸਸਂਯੋਜਨਪ੍ਪਹਾਨਂ, ਤਂ ਕਰੋਤੀਤਿ ਸਕ੍ਕਾਯਦਿਟ੍ਠਿਵਿਚਿਕਿਚ੍ਛਾਸੀਲਬ੍ਬਤਪਰਾਮਾਸਸਂਯੋਜਨਪ੍ਪਹਾਨਕਰਂ, ਸੋਤਾਪਤ੍ਤਿਮਗ੍ਗਚਿਤ੍ਤਂ. ਮਾਨੋਪਿ ਏਕਦੇਸਤੋ ਅਪਾਯਗਾਮਿਕੋਯੇਵ ਪਹਿਯ੍ਯਤੇ. ਸੋਤਾਪਤ੍ਤਿਮਗ੍ਗੇਨ ਨਿਸ੍ਸੇਸਤੋ ਨ ਪਹਿਯ੍ਯਤੇ. ਸੇਸਕਿਲੇਸੇਸੁਪਿ ਏਸੇਵ ਨਯੋ. ਉਦ੍ਧਚ੍ਚਂ ਪਨ ਏਕਦੇਸਤੋਪਿ ਅਪਾਯਗਾਮਿਕਮ੍ਪਿ ਨ ਪਹਿਯ੍ਯਤਿ. ਸਕਦਾਗਾਮਿਮਗ੍ਗਚਿਤ੍ਤਂ ਰਾਗਦੋਸਮੋਹਾਨਂ ਤਨੁਤ੍ਤਕਰਂ. ਸੋਤਾਪਤ੍ਤਿਮਗ੍ਗੇਨ ਨਾਸਿਤਸਂਯੋਜਨਾਨਂ ਪਹਾਨਂ ਕਸ੍ਮਾ ਨ ਵੁਤ੍ਤਨ੍ਤਿ ਚੇ? ਪਠਮਮਗ੍ਗਤੋ ਦੁਤਿਯਮਗ੍ਗਸ੍ਸ ਮਹਨ੍ਤਤ੍ਤਾ ਪਠਮਮਗ੍ਗੇਨ ਨਾਸਿਤਾ ਸਂਯੋਜਨਾ ਦੁਤਿਯਮਗ੍ਗੇਨ ਨਾਸਿਤਾਤਿ ਪਞ੍ਞਾਯਤਿ, ਇਤਿ ਯਸ੍ਮਾ, ਤਸ੍ਮਾ ਨ ਵੁਤ੍ਤਂ. ਤਤਿਯਚਤੁਤ੍ਥਮਗ੍ਗੇਸੁਪਿ ਏਸੇਵ ਨਯੋ. ਏਤ੍ਥ ਏਤਸ੍ਮਿਂ ਲੋਕੁਤ੍ਤਰਚਿਤ੍ਤੇ. ਏਕੇਕਨ੍ਤਿ ਵਿਚ੍ਛਾਵਸੇਨ ਵੁਤ੍ਤਂ. ਮਗ੍ਗਾਨੁਰੂਪਨ੍ਤਿ ਵਚਨਂ ਪਠਮਮਗ੍ਗਸ੍ਸ ਪਠਮਫਲਞ੍ਚ ਅਨੁਰੂਪਨ੍ਤਿ ਵਿਞ੍ਞਾਪਨਤ੍ਥਂ.
੨੮. ਕਾਮੇ ਅਟ੍ਠੇਵ ਕਾਮਾਵਚਰੇ ਅਟ੍ਠ ਏਵ ਚਿਤ੍ਤਾਨਿ, ਰੂਪੇ ਰੂਪਭਵੇ ਪਞ੍ਚ ਚਿਤ੍ਤਾਨਿ, ਅਰੂਪਿਸੁ ਚਤ੍ਤਾਰਿ ਚਿਤ੍ਤਾਨਿ, ਅਨੁਤ੍ਤਰਾਨਿ ਲੋਕੁਤ੍ਤਰਚਿਤ੍ਤਾਨਿ ਚਤ੍ਤਾਰਿ, ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਕੁਸਲਾਨਿ ਚਿਤ੍ਤਾਨਿ ਏਕਵੀਸਤਿ ਹੋਨ੍ਤਿ.
੨੯. ਕੁਸਲਾਕੁਸਲਾਪਗਤੇਨ ਸਤਾ ਮੁਨਿਨਾ ਕੁਸਲਤੋ, ਅਕੁਸਲਤੋ ਚ ਅਪਗਤੇਨ ਸਤਾ ਸਤਿਸਮ੍ਪਨ੍ਨੇਨ ਕੁਸਲੇ ਕੁਸਲੇਨ ਛੇਕੇਨ ਵਸਿਨਾ ਪਞ੍ਚਵਸੀਹਿ ਸਮਨ੍ਨਾਗਤੇਨ ਯਂ ਕੁਸਲਚਿਤ੍ਤਂ ਚਤੁਭੂਮਿਗਤਂ ਚਤੂਸੁ ਭੂਮੀਸੁ ਪਵਤ੍ਤਂ ਸਕਲਂ ਸਬ੍ਬਂ ਲਪਿਤਂ ਕਥਿਤਂ, ਤਂ ਕੁਸਲਚਿਤ੍ਤਂ ਮਯਾਪਿ ਬੁਦ੍ਧਦਤ੍ਤਾਚਰਿਯੇਨ ਲਪਿਤਂ ਕਥਿਤਂ.
ਨਿਯਤਾਨਿਯਤਵਤ੍ਥੁਵਸੇਨਾਤਿ ਪਟਿਘਸਮ੍ਪਯੁਤ੍ਤਦ੍ਵਯਂ ਕਾਮੇਯੇਵ ਹਦਯਵਤ੍ਥੁਂ ਨਿਸ੍ਸਾਯ ਜਾਯਤਿ, ਅਞ੍ਞਭੂਮੀਸੁ ਨ ਜਾਯਤਿ, ਤਸ੍ਮਾ ਨਿਯਤਵਤ੍ਥੁਕਂ ਹੋਤਿ. ਇਤਰਾਨਿ ਪਨ ਅਕੁਸਲਾਨਿ ਕਾਮਰੂਪੇਸੁ ਉਪ੍ਪਜ੍ਜਨਕਾਲੇ ਹਦਯਵਤ੍ਥੁਂ ਨਿਸ੍ਸਾਯ ਜਾਯਨ੍ਤਿ, ਅਰੂਪੇ ਹਦਯਵਤ੍ਥੁਂ ਅਨਿਸ੍ਸਾਯ ਜਾਯਨ੍ਤਿ, ਤਸ੍ਮਾ ਅਨਿਯਤਵਤ੍ਥੁਕਾਨਿ, ਤੇਨ. ਪਟਿਸਨ੍ਧਿਜਨਕਾਜਨਕਵਸੇਨ ਚਾਤਿ ਉਦ੍ਧਚ੍ਚਸਹਗਤਂ ਪਟਿਸਨ੍ਧਿਂ ਨ ਜਨੇਤਿ. ਯਦਿ ਪਟਿਸਨ੍ਧਿਂ ਜਨੇਯ੍ਯ, ਅਪਾਯੇਸੁਯੇਵ ਜਨੇਯ੍ਯ. ਕਸ੍ਮਾ? ਸੋਤਾਪਤ੍ਤਿਮਗ੍ਗੇਨ ਏਕਦੇਸਤੋ ਅਪਾਯਗਾਮਿਕਮ੍ਪਿ ਨ ਜਹਿਤਂ, ਸਬ੍ਬਂ ਨ ਜਹਿਤਨ੍ਤਿ ਅਤ੍ਥੋ. ਸੋਪਿ ਮਗ੍ਗੋ ਅਪਾਯਗਾਮੀ ਨ ਹੋਤਿ. ਅਞ੍ਞੇ ਪਨ ਕਿਲੇਸਾ ਏਕਦੇਸਵਸੇਨ ਅਪਾਯਗਾਮਿਕਾ ਜਹਿਤਾ, ਤੇਨ ਪਠਮਮਗ੍ਗੇਨਾਤਿ ਤਸ੍ਮਾ ਨ ਜਨੇਤਿ. ਏਕਾਦਸਵਿਧਂ ਪਨ ਪਟਿਸਨ੍ਧਿਂ ਜਨੇਤਿ, ਤੇਨ.
ਦਿਟ੍ਠਮਙ੍ਗਲਾਦੀਨੀਤਿ ਆਦਿ-ਸਦ੍ਦੇਨ ਸੁਤਮਙ੍ਗਲਾਦੀਨਿ ਗਹਿਤਾਨਿ. ਸਾਰਤੋ ਉਤ੍ਤਮਤੋ ਪਚ੍ਚੇਤਿ ਸਦ੍ਦਹਤਿ. ਸਭਾਵਤਿਕ੍ਖੇਨ ਸਭਾਵੋ ਤਿਕ੍ਖੋ ਏਤਸ੍ਸਾਤਿ ਸਭਾਵਤਿਕ੍ਖਂ, ਤੇਨ ਸਭਾਵਤਿਕ੍ਖੇਨ.
ਅਸ੍ਸ ਪਨ ਪਟਿਘਸਮ੍ਪਯੁਤ੍ਤਸ੍ਸ ਪਾਣਾਤਿਪਾਤਾਦੀਸੁ ਅਕੁਸਲਕਮ੍ਮੇਸੁ ਤਿਕ੍ਖਪ੍ਪਵਤ੍ਤਿਕਾਲੇ ਅਸਙ੍ਖਾਰਿਕਸ੍ਸ ਉਪ੍ਪਤ੍ਤਿ, ਮਨ੍ਦਪ੍ਪਵਤ੍ਤਿਕਾਲੇ ਸਸਙ੍ਖਾਰਿਕਸ੍ਸ ਉਪ੍ਪਤ੍ਤਿ ਵੇਦਿਤਬ੍ਬਾ.
ਤਸ੍ਸ ਮੋਮੂਹਸ੍ਸ.
ਦੁਕ੍ਖਵਿਸੇਸਸ੍ਸ ਦੁਕ੍ਖਨਾਨਤ੍ਤਸ੍ਸ.
੩੦. ਲੋਭਮੂਲਵਸੇਨ ਅਟ੍ਠ ਚਿਤ੍ਤਾਨਿ, ਦੋਸਮੂਲਵਸਾ ਦੁਵੇ ਚਿਤ੍ਤਾਨਿ, ਮੋਹਮੂਲਵਸੇਨ ਦ੍ਵੇ ਚਿਤ੍ਤਾਨਿ. ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਅਕੁਸਲਾਨਿ ਦ੍ਵਾਦਸਪ੍ਪਕਾਰਾਨਿ ਸਿਯੁਂ ਭਵੇਯ੍ਯੁਂ.
੩੧. ਯਂ ਪਾਪਮਾਨਸਂ ਯਂ ਅਕੁਸਲਚਿਤ੍ਤਂ ਪਾਪਾਪਾਪੇਸੁ ਪਾਪਅਪਾਪੇਸੁ ਕੁਸਲਾਕੁਸਲੇਸੁ ਅਪਾਪੇਨ ਅਪ੍ਪਵਤ੍ਤੇਨ ਪਾਪਾਪਾਪਪ੍ਪਹੀਨੇਨ ਵੁਤ੍ਤਂ ਈਰਿਤਂ ਕਥਿਤਂ, ਤਂ ਪਾਪਮਾਨਸਂ ਤਂ ਅਕੁਸਲਚਿਤ੍ਤਂ ਮਯਾ ਸਮੁਦਾਹਟਂ ਕਥਿਤਂ.
ਯਥਾ ਪਨਸ੍ਸ ਯਥਾ ਪਨ ਅਸ੍ਸ ਵਿਪਾਕਸ੍ਸ ਕੁਸਲਂ ਦਾਨਾਦਿਵਸੇਨ ਦਾਨਾਦੀਨਂ ਦਸਪੁਞ੍ਞਕਿਰਿਯਵਤ੍ਥੂਨਂ ਵਸੇਨ ਛਸੁ ਆਰਮ੍ਮਣੇਸੁ ਪਵਤ੍ਤਤਿ, ਇਦਂ ਵਿਪਾਕਚਿਤ੍ਤਂ ਤਥਾ ਨ ਪਵਤ੍ਤਤਿ. ਹਿ ਸਚ੍ਚਂ ਇਦਂ ਵਿਪਾਕਂ ਪਟਿਸਨ੍ਧਿਭਵਙ੍ਗਚੁਤਿਤਦਾਰਮ੍ਮਣਵਸੇਨ ਪਰਿਤ੍ਤਧਮ੍ਮਪਰਿਯਾਪਨ੍ਨੇਸੁ ਕਾਮਾਵਚਰਧਮ੍ਮਨ੍ਤੋਗਧੇਸੁ ਛਸੁ ਆਰਮ੍ਮਣੇਸੁ ਪਵਤ੍ਤਤਿ. ਸਮ੍ਪਯੁਤ੍ਤਧਮ੍ਮਾਨਞ੍ਚ ਵਿਸੇਸੇ ਅਸਤਿਪਿ ਕੁਸਲਸਮ੍ਪਯੁਤ੍ਤਧਮ੍ਮਤੋ ਅਸ੍ਸ ਵਿਪਾਕਸ੍ਸ, ਸਮ੍ਪਯੁਤ੍ਤਧਮ੍ਮਾਨਞ੍ਚ ਨਾਨਤ੍ਤੇ ਅਸਤਿਪਿ ਇਦਂ ਵਿਪਾਕਂ ਆਦਾਸਤਲਾਦੀਸੁ ਧਮ੍ਮਜਾਤੇਸੁ ਮੁਖਨਿਮਿਤ੍ਤਂ ਵਿਯ ਨਿਰੁਸ੍ਸਾਹਂ. ਅਯਮਸ੍ਸਾਧਿਪ੍ਪਾਯੋ – ਯਥਾ ਆਦਾਸਤਲੇ ਮੁਖਨਿਮਿਤ੍ਤਂ ਮੁਖੇ ਚਲਿਤੇ ਚਲਤਿ, ਅਚਲਿਤੇ ਨ ਚਲਤਿ, ਮੁਖਸ੍ਸ ਕਾਰਣਂ ਵਿਨਾ ਮੁਖਨਿਮਿਤ੍ਤਸ੍ਸ ਵਿਯ ਕਾਰਣਂ ਨਤ੍ਥਿ, ਏਵਂ ਕੁਸਲਕਾਰਣਾ ਵਿਪਾਕਸ੍ਸ ਅਞ੍ਞਂ ਕਾਰਣਂ ਨਤ੍ਥਿ, ਨਿਰੁਸ੍ਸਾਹਂ ਵਿਪਾਕਂ.
੩੨. ਕਾਮਾਵਚਰਦੇਵਾਨਂ ਮਨੁਸ੍ਸਾਨਂ ਇਮੇ ਅਟ੍ਠ ਮਹਾਵਿਪਾਕਾ ਦੁਹੇਤੁਕਤਿਹੇਤੁਕਾਨਂ ਕਾਮਾਵਚਰਦੇਵਾਨਂ, ਮਨੁਸ੍ਸਾਨਞ੍ਚ ਪਟਿਸਨ੍ਧਿਯੋ ਭਵਨ੍ਤਿ.
੩੩-੪. ਤਤੋ ਪਰਂ ਪਵਤ੍ਤਿਯਂ ਯਾਵਤਾਯੁਕਂ ਭਵਙ੍ਗਂ ਹੁਤ੍ਵਾ ਬਲਵਾਰਮ੍ਮਣੇ ਅਤਿਮਹਨ੍ਤਵਿਭੂਤਾਰਮ੍ਮਣੇ ਤਦਾਰਮ੍ਮਣਞ੍ਚ ਹੁਤ੍ਵਾ ਤਤੋ ਪਰਂ ਮਰਣਕਾਲਸ੍ਮਿਂ ਚੁਤਿ ਹੁਤ੍ਵਾ ਪਵਤ੍ਤਨ੍ਤਿ, ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਚਤੂਸੁ ਠਾਨੇਸੁ ਵਿਪਚ੍ਚਨ੍ਤਿ ਵਿਪਾਕਭਾਵੇਨ ਜਾਯਨ੍ਤਿ.
੩੫. ਸਭੂਮਿਕੁਸਲੇਹੇਵ ਮਹਾਪਾਕਾ ਸਮਾ ਵਿਨਾ ਮਹਾਪਾਕਾ ਕਮ੍ਮਦ੍ਵਾਰਂ ਕਮ੍ਮਕਾਰਣਂ ਵਿਨਾ, ਕਮ੍ਮਞ੍ਚ ਮਹਾਪੁਞ੍ਞਾਨਂ ਕਿਰਿਯਵਤ੍ਥੁਕਂ ਵਿਨਾ ਵਜ੍ਜੇਤ੍ਵਾ ਸਭੂਮਿਕੁਸਲੇਹੇਵ ਅਤ੍ਤਨੋ ਭੂਮਿਯਂ ਪਵਤ੍ਤੇਹਿ ਕੁਸਲੇਹਿ ਏਵ ਸਮਾ ਸਦਿਸਾ. ਕਮ੍ਮਦ੍ਵਾਰਂ ਨਾਮ ਕਾਯਵਿਞ੍ਞਤ੍ਤਿਕਮ੍ਮਦ੍ਵਾਰਂ, ਵਚੀਵਿਞ੍ਞਤ੍ਤਿਕਮ੍ਮਦ੍ਵਾਰਂ, ਭਵਙ੍ਗਸਙ੍ਖਾਤਂ ਮਨੋਦ੍ਵਾਰਂ, ਇਤਿ ਤਿਵਿਧਂ ਕਮ੍ਮਦ੍ਵਾਰਂ ਕਮ੍ਮਕਾਰਣਂ. ਕਮ੍ਮਂ ਨਾਮ ਅਟ੍ਠਕਾਮਾਵਚਰਕੁਸਲਚੇਤਨਾ ਇਧ ਅਧਿਪ੍ਪੇਤਾ.
੩੬. ਪਾਕਾ ਕੁਸਲਵਿਪਾਕਾ ਅਵਿਞ੍ਞਤ੍ਤਿਜਨਤ੍ਤਾ ਚ ਵਿਞ੍ਞਤ੍ਤਿ ਚ ਵਿਞ੍ਞਤ੍ਤਿ ਚ ਵਿਞ੍ਞਤ੍ਤਿਵਿਞ੍ਞਤ੍ਤਿਯੋਤਿ ਵਤ੍ਤਬ੍ਬੇ ਸਰੂਪੇਕਸੇਸਂ ਕਤ੍ਵਾ ‘‘ਵਿਞ੍ਞਤ੍ਤੀ’’ਤਿ ਵੁਤ੍ਤਂ, ਤਾ ਜਨੇਨ੍ਤੀਤਿ ਵਿਞ੍ਞਤ੍ਤਿਜਨਾ, ਨ ਵਿਞ੍ਞਤ੍ਤਿਜਨਾ ਅਵਿਞ੍ਞਤ੍ਤਿਜਨਾ, ਤੇਸਂ ਭਾਵੋ ਅਵਿਞ੍ਞਤ੍ਤਿਜਨਤ੍ਤਂ. ਤਸ੍ਮਾ ਅਵਿਞ੍ਞਤ੍ਤਿਜਨਤ੍ਤਾ ਕਾਯਵਿਞ੍ਞਤ੍ਤਿਵਚੀਵਿਞ੍ਞਤ੍ਤਿਸਙ੍ਖਾਤਾਨਂ ਕਮ੍ਮਦ੍ਵਾਰਾਨਂ ਅਜਨਕਤ੍ਤਾ ਮਨੋਦ੍ਵਾਰਸਙ੍ਖਾਤਸ੍ਸ ਕਮ੍ਮਦ੍ਵਾਰਸ੍ਸ ਵਸੇਨ ਚ ਅਪ੍ਪਵਤ੍ਤਨਤੋ ਅਵਿਪਾਕਸਭਾਵਤੋ ਚ ਅਕਮ੍ਮਭਾਵਤੋ ਚ ਅਪ੍ਪਵਤ੍ਤਨਤੋ ਚੇਵ ਪੁਞ੍ਞਕਿਰਿਯਵਤ੍ਥੁਵਸੇਨ ਅਪ੍ਪਵਤ੍ਤਨਤੋ ਚੇਵ ਪੁਞ੍ਞੇਹਿ ਨੋ ਸਮਾ ਅਸਦਿਸਾ.
੩੭-੯. ਪਰਿਤ੍ਤਾਰਮ੍ਮਣਤ੍ਤਾ ਹਿ ਤੇਸਮੇਕਨ੍ਤਤੋ ਤੇਸਂ ਵਿਪਾਕਾਨਂ ਏਕਨ੍ਤਤੋ ਪਰਿਤ੍ਤਾਰਮ੍ਮਣਤ੍ਤਾ ਕਾਮਾਵਚਰਾਰਮ੍ਮਣਤ੍ਤਾ ਤੇਸੁ ਵਿਪਾਕੇਸੁ ਸਤ੍ਤਪਞ੍ਞਤ੍ਤਿਕਾਰਮ੍ਮਣਾ ਕਰੁਣਾਮੁਦਿਤਾ ਕਦਾਚਿ ਕਿਸ੍ਮਿਞ੍ਚਿ ਕਾਲੇ ਨ ਜਾਯਨ੍ਤਿ, ਤਥਾ ਏਵਂ ਤਿਸ੍ਸੋ ਪਨ ਵਿਰਤਿਯੋ ਏਤੇਸੁ ਵਿਪਾਕੇਸੁ ਨ ਜਾਯਨ੍ਤਿ, ਹਿ ਕਸ੍ਮਾ ਕਾਰਣਾ ਨ ਜਾਯਨ੍ਤਿ, ਪਞ੍ਚ ਸਿਕ੍ਖਾਪਦਾ ਕੁਸਲਾਤਿ ਕੁਸਲਾ ਨਾਮਾਤਿ ਸਤ੍ਥੁਨਾ ਵੁਤ੍ਤਾ ਯਸ੍ਮਾ ਕਾਰਣਾ, ਤਸ੍ਮਾ ਨ ਜਾਯਨ੍ਤਿ. ਤਥਾਧਿਪਤਿਨੋਪੇਤ੍ਥ ਤਥਾ ਏਵਮੇਵ ਚਤ੍ਤਾਰੋ ਅਧਿਪਤਿਨੋਪਿ ਏਤੇਸੁ ਵਿਪਾਕੇਸੁ ਨ ਸਨ੍ਤਿ. ਕਸ੍ਮਾ? ਛਨ੍ਦਾਦੀਨਿ ਧਮ੍ਮਜਾਤਾਨਿ ਪੁਰੇਤਰਂ ਕਤ੍ਵਾ ਅਨੁਪ੍ਪਜ੍ਜਨਤੋ ਨ ਸਨ੍ਤਿ, ਇਤਿ ਵਚਨਂ ਵਿਨਿਦ੍ਦਿਸੇ ਆਚਰਿਯੋ ਕਥੇਯ੍ਯ.
੪੦. ਅਸਙ੍ਖਾਰਸਸਙ੍ਖਾਰਵਿਧਾਨਂ ਪਨ ਪੁਞ੍ਞਤੋ ਵਿਪਾਕੇਸੁ ਅਸਙ੍ਖਾਰਸਸਙ੍ਖਾਰਵਿਧਾਨਂ ਪੁਞ੍ਞਤੋ ਕੁਸਲਤੋ ਆਗਮਨਵਸੇਨ ਞੇਯ੍ਯਂ. ਤਤ੍ਥ ਏਕਚ੍ਚਾਨਂ ਆਚਰਿਯਾਨਂ ਮਤੇਨ ਮੁਖੇ ਚਲਿਤੇ ਆਦਾਸਤਲੇ ਮੁਖਨਿਮਿਤ੍ਤਚਲਨਂ ਵਿਯ ਅਸਙ੍ਖਾਰਸ੍ਸ ਕੁਸਲਸ੍ਸ ਵਿਪਾਕੋ ਅਸਙ੍ਖਾਰੋ ਹੋਤਿ, ਸਸਙ੍ਖਾਰਸ੍ਸ ਕੁਸਲਸ੍ਸ ਵਿਪਾਕੋ ਸਸਙ੍ਖਾਰੋ ਹੋਤਿ, ਏਵਂ ਆਗਮਨਵਸੇਨ ਞੇਯ੍ਯਂ. ਪਚ੍ਚਯਤੋ ਚੇਵ ਞੇਯ੍ਯਂ ਤਤ੍ਥ ਏਕਚ੍ਚਾਨਂ ਆਚਰਿਯਾਨਂ ਮਤੇਨ ਬਲਵਨ੍ਤੇਹਿ ਵਿਭੂਤੇਹਿ ਪਚ੍ਚਯੇਹਿ ਕਮ੍ਮਾਦੀਹਿ ਉਪ੍ਪਨ੍ਨੋ ਅਸਙ੍ਖਾਰੋ ਦੁਬ੍ਬਲੇਹਿ ਸਸਙ੍ਖਾਰੋਤਿ ਏਵਂ ਪਚ੍ਚਯਵਸੇਨ ਵਿਞ੍ਞੇਯ੍ਯਂ ਜਾਨਿਤਬ੍ਬਂ.
੪੧-੨. ਹੀਨਾਦੀਨਂ ਪੁਞ੍ਞਾਨਂ ਵਿਪਾਕਤ੍ਤਾ ਹੀਨਾਦਯੋ ਵਿਪਾਕਾ ਪੁਞ੍ਞਵਾਦਿਨਾ ਜਿਨੇਨ ਪਰਿਦੀਪਿਤਾ ਭਵਨ੍ਤਿ, ਇਤਿ ਏਵਂ ਇਮਿਨਾ ਵੁਤ੍ਤਪ੍ਪਕਾਰੇਨ ਪਵਤ੍ਤਂ ਇਦਂ ਅਟ੍ਠਵਿਧਂ ਚਿਤ੍ਤਂ ਏਕਨ੍ਤੇਨ ਸਵਤ੍ਥੁਕਂ ਕਾਮਲੋਕਸ੍ਮਿਂ ਜਾਯਤੇ, ਅਞ੍ਞਤ੍ਥ ਪਨ ਅਞ੍ਞਾਸੁ ਭੂਮੀਸੁ ਨ ਜਾਯਤੇ.
ਵਿਞ੍ਞਾਣਪਞ੍ਚਕਂ ਨਿਯਤਾਰਮ੍ਮਣਨ੍ਤਿ ਚਕ੍ਖੁਵਿਞ੍ਞਾਣਸ੍ਸ ਰੂਪਮੇਵ ਆਰਮ੍ਮਣਂ, ਨ ਸਦ੍ਦਾਦਯੋ. ਸੇਸਤ੍ਤਯਂ ਯਦਾ ਚਕ੍ਖੁਵਿਞ੍ਞਾਣੇਨ ਗਹਿਤਂ ਆਰਮ੍ਮਣਂ ਕਰੋਤਿ, ਤਦਾਸ੍ਸ ਰੂਪਂ ਆਰਮ੍ਮਣਂ ਹੋਤਿ. ਯਦਾ ਸੋਤਵਿਞ੍ਞਾਣੇਨ ਗਹਿਤਂ, ਤਦਾਸ੍ਸ ਸਦ੍ਦੋ ਆਰਮ੍ਮਣੋ ਹੋਤਿ. ਯਦਾ ਘਾਨਜਿਵ੍ਹਾਕਾਯਵਿਞ੍ਞਾਣੇਹਿ ਗਹਿਤਾਨਿ ਆਰਮ੍ਮਣਾਨਿ ਕਰੋਨ੍ਤਿ, ਤਦਾਸ੍ਸ ਗਨ੍ਧਰਸਫੋਟ੍ਠਬ੍ਬਾਰਮ੍ਮਣਾਨਿ ਹੋਨ੍ਤਿ. ਮਨੋਵਿਞ੍ਞਾਣਧਾਤੁਦ੍ਵਯਂ ਯਦਾ ਤਦਾਰਮ੍ਮਣਂ ਹੋਤਿ, ਤਦਾ ਛਆਰਮ੍ਮਣਂ ਹੋਤਿ, ਏਵਂ ਅਨਿਯਤਾਰਮ੍ਮਣਂ ਹੋਤਿ.
ਰੂਪਾਰਮ੍ਮਣਾਯ ਕਿਰਿਯਾਮਨੋਧਾਤੁਯਾ ਅਪਗਮੋ ਪਦਟ੍ਠਾਨਂ ਆਸਨ੍ਨਕਾਰਣਂ ਏਤਸ੍ਸਾਤਿ ਅਪਗਮਪਦਟ੍ਠਾਨਂ, ਤਾਯ ਆਵਜ੍ਜਨਂ ਕਤ੍ਵਾ ਠਿਤਾਯ ਚਕ੍ਖੁਵਿਞ੍ਞਾਣੇਨ ਦਸ੍ਸਨਕਿਚ੍ਚਂ ਕਰੀਯਤੀਤਿ ਅਤ੍ਥੋ. ਤਥਾਭਾਵਪਚ੍ਚੁਪਟ੍ਠਾਨਂ ਸਮ੍ਪਟਿਚ੍ਛਨਭਾਵੇਨ ਗਯ੍ਹਾਕਾਰਂ. ਸਨ੍ਤੀਰਣਾਦਿਰਸਾ ਸੋਮਨਸ੍ਸਯੁਤ੍ਤਾ ਮਨੋਵਿਞ੍ਞਾਣਧਾਤੁਸਨ੍ਤੀਰਣਤਦਾਰਮ੍ਮਣਰਸਾ, ਉਪੇਕ੍ਖਾਯੁਤ੍ਤਾ ਪਨ ਸਨ੍ਤੀਰਣਤਦਾਰਮ੍ਮਣਪਟਿਸਨ੍ਧਿਭਵਙ੍ਗਚੁਤਿਰਸਾ, ਤਥਾਭਾਵਪਚ੍ਚੁਪਟ੍ਠਾਨਾ ਸਨ੍ਤੀਰਣਾਦਿਭਾਵੇਨ ਗਯ੍ਹਾਕਾਰਂ.
੪੩. ਕਾਮਾਵਚਰਪੁਞ੍ਞਸ੍ਸ ਕਾਮਾਵਚਰਕੁਸਲਸ੍ਸ ਸੋਲ਼ਸ ਵਿਪਾਕਾ ਹੋਨ੍ਤਿ. ਇਤਿ ਯਂ ਵਚਨਂ ਵੁਤ੍ਤਂ, ਤਂ ਵਚਨਂ ਤਿਹੇਤੁਕਪੁਞ੍ਞਸ੍ਸ ਉਕ੍ਕਟ੍ਠਸ੍ਸ ਵਸੇਨ ਆਚਰਿਯੋ ਪਰਿਦੀਪਯੇ. ਅਯਮੇਤ੍ਥ ਅਤ੍ਥੋ – ਛਨ੍ਦਾਧਿਪਤੇਯ੍ਯਾਦੀਨਂ ਵਸੇਨ ਉਕ੍ਕਟ੍ਠਤਿਹੇਤੁਕਕੁਸਲਂ ਕਾਮਸੁਗਤਿਯਂ ਤਿਹੇਤੁਕਪਟਿਸਨ੍ਧਿਂ ਦਤ੍ਵਾ ਪਵਤ੍ਤੇ ਅਟ੍ਠ ਅਹੇਤੁਕਕੁਸਲਵਿਪਾਕਾਨਿ, ਅਟ੍ਠ ਮਹਾਕੁਸਲਵਿਪਾਕਾਨੀਤਿ ਸੋਲ਼ਸ ਪਾਕਾਨਿ ਨਿਪ੍ਫਾਦੇਤਿ.
੪੪. ਕੁਸਲਾਨੁਗਤਂ ਕਤ੍ਵਾ ਭਾਜਿਤਂ ਕਿਂ ਮਹਗ੍ਗਤਂ ਵਿਪਾਕਚਿਤ੍ਤਂ ਕੁਸਲਾਨੁਗਤਂ ਕੁਸਲਂ ਅਨੁਗਤਂ ਕਤ੍ਵਾ ਮਹਗ੍ਗਤਕੁਸਲਚਿਤ੍ਤੇਨ ਸਮਾਨਂ ਕਤ੍ਵਾ ਭਗਵਤਾ ਭਾਜਿਤਂ ਦੇਸਿਤਂ. ਕਿਂ ਕੇਨ ਕਾਰਣੇਨ? ਕਾਮਾਵਚਰਪੁਞ੍ਞਂਵ ਕਾਮਾਵਚਰਕੁਸਲਂ ਇਵ ਅਸਮਾਨਫਲਂ ਨਤ੍ਥਿ ਯਤੋ ਯਸ੍ਮਾ ਕਾਰਣਾ, ਤਸ੍ਮਾ ਵਿਪਾਕਂ ਕੁਸਲਾਨੁਗਤਂ ਕਤ੍ਵਾ ਭਗਵਤਾ ਭਾਜਿਤਂ ਦੇਸਿਤਂ. ਕਾਮਾਵਚਰਪੁਞ੍ਞਂਵਾਤਿ ਯਥਾ ਅਟ੍ਠਵਿਧੇਸੁ ਕਾਮਾਵਚਰਕੁਸਲੇਸੁ ਉਕ੍ਕਟ੍ਠਤਿਹੇਤੁਕਕੁਸਲਂ ਕਾਮਸੁਗਤਿਯਂ ਤਿਹੇਤੁਕਪਟਿਸਨ੍ਧਿਂ ਦਤ੍ਵਾ ਪਵਤ੍ਤੇ ਸੋਲ਼ਸ ਕੁਸਲਵਿਪਾਕਾਨਿ ਨਿਪ੍ਫਾਦੇਤਿ, ਤਿਹੇਤੁਕਓਮਕਞ੍ਚ ਦੁਹੇਤੁਕਉਕ੍ਕਟ੍ਠਞ੍ਚ ਕਾਮਸੁਗਤਿਯਂ ਦੁਹੇਤੁਕਪਟਿਸਨ੍ਧਿਂ ਦਤ੍ਵਾ ਪਵਤ੍ਤੇ ਤਿਹੇਤੁਕਵਿਰਹਿਤਾਨਿ ਅਹੇਤੁਕਦੁਹੇਤੁਕਸਙ੍ਖਾਤਾਨਿ ਵਿਪਾਕਾਨਿ ਨਿਪ੍ਫਾਦੇਤਿ, ਦੁਹੇਤੁਕਓਮਕਂ ਪਨ ਕਾਮਸੁਗਤਿਯਂ ਅਹੇਤੁਕਪਟਿਸਨ੍ਧਿਂ ਦਤ੍ਵਾ ਪਵਤ੍ਤੇ ਅਟ੍ਠ ਅਹੇਤੁਕਵਿਪਾਕਾਨਿ ਨਿਪ੍ਫਾਦੇਤਿ, ਏਵਂ ਕਾਮਾਵਚਰਪੁਞ੍ਞਂ ਅਸਮਾਨਫਲਂਵ ਹੋਤਿ.
੪੫. ਗਜਾਦੀਨਂ ਛਾਯਾ ਗਜਾਦਿਸਦਿਸਾ ਹੋਤਿ ਯਥਾ, ਏਵਂ ਮਹਗ੍ਗਤਵਿਪਾਕਂ ਸਬ੍ਬਥਾ ਸਬ੍ਬਪਕਾਰੇਨ ਅਤ੍ਤਨੋ ਕੁਸਲੇਹੇਵ ਸਮਾਨਂ ਹੋਤਿ.
੪੬-੭. ਕਾਮਾਵਚਰਪੁਞ੍ਞਂਵ ਨਾਪਰਾਪਰਿਯਵੇਦਨਂ ਇਦਂ ਮਹਗ੍ਗਤਕੁਸਲਂ ਕਾਮਾਵਚਰਪੁਞ੍ਞਂਵ ਅਪਰਾਪਰਿਯਵੇਦਨਂ ਅਪਰਸ੍ਮਿਂ ਭਵੇ ਫਲਦਾਯਕਂ ਨ ਹੋਤਿ, ਝਾਨਾ ਅਪਰਿਹੀਨਸ੍ਸ ਭਵਗਾਮਿਨੋ ਪਟਿਸਨ੍ਧਿਗਾਮਿਨੋ ਸਤ੍ਤਸ੍ਸ ਕੁਸਲਾਨਨ੍ਤਰਂਯੇਵ ਫਲਂ ਉਪ੍ਪਜ੍ਜਤਿ, ਇਤਿ ਚ ਞਾਪਨਤ੍ਥਂ ਏਤਸ੍ਸ ਮਹਗ੍ਗਤਵਿਪਾਕਸ੍ਸ ਕੁਸਲਾਨੁਗਤਂ ਕੁਸਲਾਨੁਗਮਨਂ ਭਗਵਤਾ ਕਤਂ.
੪੮. ਏਤ੍ਥ ਏਤਸ੍ਮਿਂ ਮਹਗ੍ਗਤਵਿਪਾਕੇ ਪਟਿਪਦਾਕ੍ਕਮੋ ਤੇਸਞ੍ਚ ਹੀਨਾਦੀਨਂ ਭੇਦਤੋ ਝਾਨਾਗਮਨਤੋ ਮਹਗ੍ਗਤਕੁਸਲਝਾਨਸ੍ਸ ਆਗਮਨਵਸੇਨ ਵਿਭਾਵਿਨਾ ਪਣ੍ਡਿਤੇਨ ਵੇਦਿਤਬ੍ਬੋ.
੪੯. ਏਤ੍ਥ ਵਿਪਾਕੇ ਛਨ੍ਦਾਦਿਅਧਿਪਤੀਨਂ ਅਭਾਵੋ, ਅਯਮੇਵ ਵਿਸੇਸਤੋ ਕੁਸਲਤੋ ਅਯਂ ਏਵ ਵਿਸੇਸੋ, ਸੇਸਂ ਸਬ੍ਬਪਕਾਰਂ ਅਵਿਸੇਸੇਨ ਕੁਸਲੇਨ ਸਮਂ ਮਤਂ ਕਥਿਤਂ ਭਗਵਤਾ.
੫੦. ਸੁਞ੍ਞਤਂ ਅਨਿਮਿਤ੍ਤਨ੍ਤਿ, ਤਥਾਪਣਿਹਿਤਨ੍ਤਿਪਿ ਸੁਞ੍ਞਤਂ ਅਨਤ੍ਤਾ, ਅਨਿਮਿਤ੍ਤਂ ਅਨਿਚ੍ਚਂ, ਅਪ੍ਪਣਿਹਿਤਂ ਦੁਕ੍ਖਂ ਇਤਿ ਏਤਾਨਿ ਤੀਣਿ ਨਾਮਾਨਿ ਮਗ੍ਗਸ੍ਸ ਅਨਨ੍ਤਰੇ ਚਤੁਬ੍ਬਿਧਸ੍ਸ ਮਗ੍ਗਸ੍ਸ ਅਨਨ੍ਤਰੇ ਚਤੁਬ੍ਬਿਧੇ ਫਲੇ ਹੋਨ੍ਤਿ.
੫੧. ਲਬ੍ਭਨ੍ਤਿ ਪਰਭਾਗਸ੍ਮਿਂ ਮਗ੍ਗਾਨਨ੍ਤਰੇ ਪਵਤ੍ਤਫਲਤੋ ਅਞ੍ਞਸ੍ਮਿਂ ਕਾਲੇ ਵਲ਼ਞ੍ਜਨਫਲੇਸੁ ਫਲਸਮਾਪਤ੍ਤਿਸਮਾਪਜ੍ਜਨਕਾਲੇਸੁ ਏਤਾਨਿ ਤੀਣਿ ਨਾਮਾਨਿ ਨ ਲਬ੍ਭਨ੍ਤੇ, ਫਲੇਹਿ ਵਿਪਸ੍ਸਨਾਵਸੇਨੇਵ ਅਨਤ੍ਤਅਨਿਚ੍ਚਦੁਕ੍ਖਸਙ੍ਖਾਤਾਨਂ ਤਿਣ੍ਣਂ ਵਿਪਸ੍ਸਨਾਨਂ ਵਸੇਨ ਏਵ ਤਾਨਿ ਤੀਣਿ ਨਾਮਾਨਿ ਲਬ੍ਭਰੇ ਫਲੇਹਿ ਲਬ੍ਭਨ੍ਤੇ.
੫੨. ਹੋਨ੍ਤਿ ਸਾਧਿਪਤੀਨੇਵ ਲੋਕੁਤ੍ਤਰਫਲਾਨਿ ਤੁ ਏਕਨ੍ਤਤੋ ਸਾਧਿਪਤੀਨਿ ਏਵ ਹੋਨ੍ਤਿ, ਲੋਕੁਤ੍ਤਰਫਲਾਨਿ ਠਪੇਤ੍ਵਾ ਅਞ੍ਞਸ੍ਮਿਂ ਵਿਪਾਕੇ ਅਧਿਪਤੀ ਨਤ੍ਥਿ.
੫੩. ਮਗ੍ਗੋ ਅਤ੍ਤਨੋ ਮਗ੍ਗਭਾਵੇਨ ਮਗ੍ਗੋ ਨਾਮ ਵੁਚ੍ਚਤੇ ਭਗਵਤਾ. ਫਲਂ ਮਗ੍ਗਂ ਉਪਾਦਾਯ ਅਟ੍ਠਙ੍ਗਿਕਮਗ੍ਗਂ ਨਿਸ੍ਸਯਂ ਕਤ੍ਵਾ ਮਗ੍ਗੋ ਨਾਮ ਇਤਿ ਵਚਨਂ ਵੁਚ੍ਚਤੇ ਭਗਵਤਾ.
੫੪. ਇਮੇ ਸਤ੍ਤ ਅਕੁਸਲਵਿਪਾਕਾ. ਗਾਵੋ ਚਰਨ੍ਤਿ ਏਤ੍ਥਾਤਿ ਗੋਚਰੋ, ਤਸ੍ਸਦਿਸਤ੍ਤਾ ਗੋਚਰੋ ਆਰਮ੍ਮਣਨ੍ਤਿ ਅਤ੍ਥੋ, ਅਨਿਟ੍ਠੋ ਚ ਅਨਿਟ੍ਠਮਜ੍ਝਤ੍ਤੋ ਚ ਅਨਿਟ੍ਠਾਨਿਟ੍ਠਮਜ੍ਝਤ੍ਤਾ, ਤੇਯੇਵ ਗੋਚਰੋ ਅਨਿਟ੍ਠਾਨਿਟ੍ਠਮਜ੍ਝਤ੍ਤਗੋਚਰੋ, ਤਸ੍ਮਿਂ ਅਨਿਟ੍ਠਾਨਿਟ੍ਠਮਜ੍ਝਤ੍ਤਗੋਚਰੇ ਵਤ੍ਤਰੇ ਵਤ੍ਤਨ੍ਤਿ. ਸੁਖਾਦਿਤ੍ਤਯਯੁਤ੍ਤਾ ਤੇ ਤੇ ਅਟ੍ਠ ਅਹੇਤੁਕਕੁਸਲਵਿਪਾਕਾ ਸੁਖਾਦਿਤ੍ਤਯਯੁਤ੍ਤਾ ਸੁਖਸੋਮਨਸ੍ਸਉਪੇਕ੍ਖਾਵੇਦਨਾਹਿ ਸਹਗਤਾ. ਦੁਕ੍ਖੁਪੇਕ੍ਖਾਯੁਤਾ ਇਮੇ ਇਮੇ ਸਤ੍ਤ ਅਹੇਤੁਕਅਕੁਸਲਵਿਪਾਕਾ ਦੁਕ੍ਖੁਪੇਕ੍ਖਾਵੇਦਨਾਹਿ ਸਹਗਤਾ.
੫੫. ਏਵਂ ਛਤ੍ਤਿਂਸਧਾ ਪਾਕਂ ਪਾਕਸਾਸਨਪੂਜਿਤੋ ਸੁਗਤੋ. ਕਿਂ ਵਿਸਿਟ੍ਠੋ? ਪਾਕਂ ਨਾਮ ਅਸੁਰਂ, ਤਂ ਸਾਸਤਿ, ਪਾਕੇਨ ਅਤ੍ਤਨੋ ਪੁਞ੍ਞਫਲੇਨ ਦੇਵੇ ਅਨੁਸਾਸਤੀਤਿ ਵਾ ਪਾਕਸਾਸਨੋ, ਕੋ ਸੋ? ਸਕ੍ਕੋ. ਤੇਨ ਪਾਕਸਾਸਨੇਨ ਪੂਜਿਤੋ ਸਵਿਪਾਕਾਵਿਪਾਕੇਸੁ ਕੁਸਲਵਿਪਾਕਕਿਰਿਯੇਸੁ ਕੁਸਲੋ ਛੇਕੋ ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਪਾਕਂ ਚਿਤ੍ਤਂ ਛਤ੍ਤਿਂਸਪ੍ਪਕਾਰਂ ਅਬ੍ਰ੍ਵਿ ਅਵੋਚ.
ਅਨੁਲ਼ਾਰੇਸੂਤਿ ਖੁਦ੍ਦਕੇਸੁ. ਤਥਾਭਾਵਪਚ੍ਚੁਪਟ੍ਠਾਨਾ ਛਲ਼ਾਰਮ੍ਮਣਵਿਜਾਨਨਗਯ੍ਹਾਕਾਰਾ. ਸਬ੍ਬਞ੍ਞੁਤਞ੍ਞਾਣਸ੍ਸ ਗਤਿ ਵਿਯ ਗਤਿ ਏਤਿਸ੍ਸਾਤਿ ਸਬ੍ਬਞ੍ਞੁਤਞ੍ਞਾਣਗਤਿਕਾ.
੫੬. ਸੋਮਨਸ੍ਸਯੁਤ੍ਤਾਨਟ੍ਠ, ਕੁਸਲਾਕੁਸਲਾਨਿ ਚ ਸੋਮਨਸ੍ਸਯੁਤ੍ਤਾਨਿ ਅਟ੍ਠ ਕੁਸਲਾਕੁਸਲਾਨਿ ਚ, ਕ੍ਰਿਯਤੋ ਪਨ ਪਞ੍ਚ ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਹਾਸਚਿਤ੍ਤਾਨਿ ਤੇਰਸ.
੫੭. ਪੁਥੁਜ੍ਜਨਾ ਹਸਨ੍ਤੇਤ੍ਥ ਏਤ੍ਥ ਏਤੇਸੁ ਤੇਰਸਚਿਤ੍ਤੇਸੁ ਪੁਥੁਜ੍ਜਨਾ ਪਨ ਅਟ੍ਠਹਿ ਚਿਤ੍ਤੇਹਿ ਹਸਨ੍ਤਿ. ਸੇਖਾ ਸਤ੍ਤ ਅਰਿਯਾ ਛਹਿ ਚਿਤ੍ਤੇਹਿ ਹਸਨ੍ਤਿ. ਅਸੇਖਾ ਖੀਣਾਸਵਾ ਪਞ੍ਚਹਿ ਚਿਤ੍ਤੇਹਿ ਹਸਨ੍ਤਿ.
ਕੁਸਲਾਨਿ ਪਨ ਰੂਪਾਰੂਪਕੁਸਲਾਨਿ ਸੇਖਪੁਥੁਜ੍ਜਨਾਨਂ ਉਪ੍ਪਜ੍ਜਨ੍ਤਿ. ਇਮਾਨਿ ਰੂਪਾਰੂਪਕਿਰਿਯਾਨਿ ਖੀਣਾਸਵਾਨਂ ਭਾਵਨਾਯੇਵ ਕਾਰੋ ਭਾਵਨਾਕਾਰੋ, ਤਸ੍ਸ ਵਸੋ ਭਾਵਨਾਕਾਰਵਸੋ, ਤੇਨ ਪਵਤ੍ਤਾਨਿ. ਤਾਨਿ ਰੂਪਾਰੂਪਕੁਸਲਾਨਿ ਭਾਵਨਾਪੁਞ੍ਞਵਸਪ੍ਪਵਤ੍ਤਾਨਿ ਭਾਵਨਾਕੁਸਲਵਸੇਨ ਪਵਤ੍ਤਾਨਿ. ਇਮੇਸਂ ਰੂਪਾਰੂਪਕਿਰਿਯਾਨਂ ਤੇਸਞ੍ਚ ਰੂਪਾਰੂਪਕੁਸਲਾਨਂ ਅਯਮੇਵ ਵਿਸੇਸੋ.
੫੮-੯. ਯਾ ਪੁਥੁਜ੍ਜਨਕਾਲਸ੍ਮਿਂ, ਅਭਿਨਿਬ੍ਬਤ੍ਤਿਤਾ ਪਨ ਪੁਥੁਜ੍ਜਨਕਾਲਸ੍ਮਿਂ ਪੁਥੁਜ੍ਜਨਭਾਵਟ੍ਠਿਤੇਨ ਯੋਗਿਨਾ ਅਭਿਨਿਬ੍ਬਤ੍ਤਿਤਾ ਯਾ ਰੂਪਾਰੂਪਸਮਾਪਤ੍ਤਿ, ਸਾ ਰੂਪਾਰੂਪਸਮਾਪਤ੍ਤਿ ਸੋ ਯੋਗੀ ਖੀਣਾਸਵੋ ਭਿਕ੍ਖੁ ਹੁਤ੍ਵਾ ਨਂ ਰੂਪਾਰੂਪਸਮਾਪਤ੍ਤਿਂ ਯਾਵ ਯਤ੍ਤਕਂ ਕਾਲਂ ਨ ਸਮਾਪਜ੍ਜਤੇ, ਤਾਵ ਤਤ੍ਤਕੇਨ ਕਾਲੇਨ ਤਸ੍ਸ ਖੀਣਾਸਵਭਿਕ੍ਖੁਨੋ ਕੁਸਲਾ ਏਵ ਰੂਪਾਰੂਪਕੁਸਲਾ ਏਵ ਹੋਤਿ. ਖੀਣਾਸਵੇਨ ਸਾ ਰੂਪਾਰੂਪਸਮਾਪਤ੍ਤਿ ਸਚੇ ਯਦਿ ਸਮਾਪਨ੍ਨਾ ਸਮਾਪਜ੍ਜਿਤਾ, ਕ੍ਰਿਯਾ ਰੂਪਾਰੂਪਕਿਰਿਯਾ ਹੋਤਿ.
੬੦. ਏਕਾਦਸਵਿਧਂ ਕਾਮੇ ਕਾਮਾਵਚਰੇ ਕਿਰਿਯਚਿਤ੍ਤਂ ਏਕਾਦਸਵਿਧਂ, ਰੂਪੇ ਰੂਪਾਵਚਰੇ ਪਞ੍ਚ, ਅਰੂਪਿਸੁ ਚਤ੍ਤਾਰਿ ਇਤਿ ਸਬ੍ਬਾਨਿ ਕ੍ਰਿਯਚਿਤ੍ਤਾਨਿ ਵੀਸਤਿ.
੬੧. ਲੋਕੁਤ੍ਤਰਕ੍ਰਿਯਚਿਤ੍ਤਂ, ਪਨ ਕਸ੍ਮਾ ਨ ਵਿਜ੍ਜਤਿ? ਮਗ੍ਗਸ੍ਸ ਏਕਚਿਤ੍ਤਕ੍ਖਣਿਕਤ੍ਤਾ ਨ ਵਿਜ੍ਜਤਿ. ਅਯਮੇਤ੍ਥ ਅਧਿਪ੍ਪਾਯੋ – ਚਤੁਮਗ੍ਗਟ੍ਠੋ ਖੀਣਾਸਵੋ ਨਾਮ ਨ ਹੋਤਿ, ਮਗ੍ਗਾਨਨ੍ਤਰਮੇਵ ਫਲਂ ਉਪ੍ਪਜ੍ਜਤਿ, ਮਗ੍ਗੋਪਿ ਏਕਚਿਤ੍ਤਕ੍ਖਣਿਕੋ ਯਦਿ ਚਿਤ੍ਤਂ ਬਹੁਚਿਤ੍ਤਕ੍ਖਣਿਕਂ, ਫਲਸਮਙ੍ਗਿਨੋ ਖੀਣਾਸਵਸ੍ਸਪਿ ਮਗ੍ਗਚਿਤ੍ਤਂ ਭਵੇਯ੍ਯ, ਏਵਂ ਸਤਿ ਲੋਕੁਤ੍ਤਰਕਿਰਿਯਚਿਤ੍ਤਂ ਭਵੇਯ੍ਯਾਤਿ ਅਧਿਪ੍ਪਾਯੋ.
੬੨. ਕ੍ਰਿਯਾਕ੍ਰਿਯਾਪਤ੍ਤਿਵਿਭਾਗਦੇਸਕੋ ਕਰਣਂ ਕ੍ਰਿਯਂ, ਕ੍ਰਿਯਂ ਨਾਮ ਵਿਨਯਪਰਿਯਾਯੇਨ ਅਕਤ੍ਤਬ੍ਬਸ੍ਸ ਕਰਣਂ, ਨ ਕਰਣਂ ਅਕ੍ਰਿਯਂ, ਅਕ੍ਰਿਯਂ ਨਾਮ ਵਿਨਯਪਰਿਯਾਯੇਨ ਕਤ੍ਤਬ੍ਬਸ੍ਸ ਅਕਰਣਂ, ਆਪਜ੍ਜਨਂ ਆਪਤ੍ਤਿ, ਕ੍ਰਿਯਾਯ ਕਰਣੇਨ ਆਪਤ੍ਤਿ ਕ੍ਰਿਯਾਪਤ੍ਤਿ, ਅਕ੍ਰਿਯਾਯ ਅਕਰਣੇਨ ਆਪਤ੍ਤਿ ਅਕ੍ਰਿਯਾਪਤ੍ਤਿ, ਕ੍ਰਿਯਾਪਤ੍ਤਿ ਚ ਅਕ੍ਰਿਯਾਪਤ੍ਤਿ ਚ ਕ੍ਰਿਯਾਪਤ੍ਯਾਕ੍ਰਿਯਾਪਤ੍ਤਿਯੋ, ਏਕਸ੍ਸ ਆਪਤ੍ਤਿ-ਸਦ੍ਦਸ੍ਸ ਲੋਪਂ ਕਤ੍ਵਾ ‘‘ਕ੍ਰਿਯਾਕ੍ਰਿਯਾਪਤ੍ਤਿਯੋ’’ਤਿ ਵੁਤ੍ਤਂ, ਤਾਸਂ ਵਿਭਾਗੋ ਕ੍ਰਿਯਾਕ੍ਰਿਯਾਪਤ੍ਤਿਵਿਭਾਗੋ, ਦੇਸੇਤੀਤਿ ਦੇਸਕੋ, ਤਸ੍ਸ ਦੇਸਕੋ ਕ੍ਰਿਯਾਕ੍ਰਿਯਾਪਤ੍ਤਿਵਿਭਾਗਦੇਸਕੋ. ਣ੍ਵੁ-ਤੁ-ਪਚ੍ਚਯੇਸੁ ਪਰੇਸੁ ਕਮ੍ਮਤ੍ਥੇ ਛਟ੍ਠੀ ਹੋਤੀਤਿ ਵਦਨ੍ਤਿ. ਜਿਨੋ ਕਿਂ ਵਿਸਿਟ੍ਠੋ? ਕ੍ਰਿਯਾਕ੍ਰਿਯਾਪਤ੍ਤਿਵਿਭਾਗਦੇਸਕੋ ਹਿਤਾਹਿਤਾਨਂ ਸਕ੍ਰਿਯਾਕ੍ਰਿਯਾਰਤੋ ਹਿਤਸ੍ਸ ਸਕ੍ਰਿਯਾਯ ਰਤੋ, ਅਹਿਤਸ੍ਸ ਅਕ੍ਰਿਯਾਯ ਰਤੋ, ਯਂ ਕ੍ਰਿਯਾਕ੍ਰਿਯਂ, ਕ੍ਰਿਯਂ ਨਾਮ ਕ੍ਰਿਯਚਿਤ੍ਤਂ, ਅਕ੍ਰਿਯਂ ਨਾਮ ਕੁਸਲਾਕੁਸਲਵਿਪਾਕਚਿਤ੍ਤਂ ਇਚ੍ਛਨ੍ਤਿ ਏਕੇ. ਤਂ ਨ. ਕਸ੍ਮਾ? ਕੁਸਲਾਧਿਕਾਰੇ ‘‘ਕੁਸਲਂ ਮੁਨਿਨਾ ਲਪਿਤਂ’’ ਅਕੁਸਲਾਧਿਕਾਰੇ ‘‘ਪਾਪਮਾਨਸਂ ਪਾਪਾਪਾਪੇਸ੍ਵਪਾਪੇਨ ਵੁਤ੍ਤਂ’’ ਵਿਪਾਕਾਧਿਕਾਰੇ ‘‘ਪਾਕਂ ਸੁਗਤੋ ਅਬ੍ਰਵੀ’’ਤਿ ਵਤ੍ਵਾ ਪੁਨ ਕ੍ਰਿਯਾਧਿਕਾਰੇ ‘‘ਕੁਸਲਾਕੁਸਲਵਿਪਾਕਾਨਿ ਅਵੋਚਾ’’ਤਿ ਵਚਨਸ੍ਸ ਵਤ੍ਤਬ੍ਬਾਭਾਵਤੋ. ਤੇਨ ਵਾਸ੍ਸ ਕ੍ਰਿਯਾਕ੍ਰਿਯਂ ਏਤਸ੍ਸਾਤਿ ਕ੍ਰਿਯਾਕ੍ਰਿਯਂ, ਕ੍ਰਿਯਾਕ੍ਰਿਯਸਭਾਵਨ੍ਤਿ ਅਤ੍ਥੋ. ਅਯਮੇਵ ਸਾਰਤੋ ਪਚ੍ਚੇਤਬ੍ਬੋ. ਯਂ ਕ੍ਰਿਯਾਕ੍ਰਿਯਂ ਚਿਤ੍ਤਂ ਕ੍ਰਿਯਾਕ੍ਰਿਯਾਸਭਾਵਂ ਅਵੋਚ ਦੇਸੇਸਿ, ਤਂ ਕ੍ਰਿਯਾਕ੍ਰਿਯਂ ਕ੍ਰਿਯਾਕ੍ਰਿਯਸਭਾਵਂ ਮਯਾ ਸਮੀਰਿਤਂ, ਸਮ੍ਮਾ ਪਕਾਰੇਨ ਈਰਿਤਂ ਕਥਿਤਂ.
੬੪. ਏਕੂਨਨਵੁਤਿ ਸਬ੍ਬੇ, ਚਿਤ੍ਤੁਪ੍ਪਾਦਾ ਮਹੇਸਿਨਾ ਲੋਕੁਤ੍ਤਰੇ ਅਟ੍ਠ ਕਤ੍ਵਾ ਏਕੂਨਨਵੁਤਿ ਸਬ੍ਬੇ ਚਿਤ੍ਤੁਪ੍ਪਾਦਾ ਮਹੇਸਿਨਾ ਤਥਾਗਤੇਨ ਸਮਾਸਤੋ ਸਙ੍ਖੇਪਤੋ ਨਿਦ੍ਦਿਟ੍ਠਾ.
੬੫. ਪਿਟਕੇ ਅਭਿਧਮ੍ਮਸ੍ਮਿਂ, ਯੇ ਭਿਕ੍ਖੂ ਪਾਟਵਤ੍ਥਿਨੋ ਅਭਿਧਮ੍ਮਪਿਟਕੇ ਪਟੁਨੋ ਭਾਵੋ ਪਾਟਵਂ, ਤੇਨ ਅਤ੍ਥੋ ਪਾਟਵਤ੍ਥੋ, ਸੋ ਏਤੇਸਂ ਅਤ੍ਥੀਤਿ ਪਾਟਵਤ੍ਥਿਨੋ, ਛੇਕਭਾਵਤ੍ਥਿਕਾ ਯੇ ਭਿਕ੍ਖੂ, ਤੇਹਿ ਭਿਕ੍ਖੂਹਿ ਅਯਂ ਅਭਿਧਮ੍ਮਾਵਤਾਰੋ ਉਗ੍ਗਹੇਤਬ੍ਬੋ ਸਿਕ੍ਖਿਤਬ੍ਬੋ ਪੁਨਪ੍ਪੁਨਂ ਚਿਨ੍ਤਿਤਬ੍ਬੋ.
੬੬. ਯੇ ਜਨਾ ਤਸ੍ਸਙ੍ਕਾਸੇਨ ਤਂਸਨ੍ਨਿਭੇਨ ਅਭਿਧਮ੍ਮਾਵਤਾਰੇਨ ਅਭਿਧਮ੍ਮਮਹੋਦਧਿਂ ਮਹਾਸਾਗਰਸਨ੍ਨਿਭਂ ਅਭਿਧਮ੍ਮਂ ਤਰਨ੍ਤਿ, ਤੇ ਇਮਂ ਲੋਕਂ ਪਰਲੋਕਞ੍ਚ ਤਰਨ੍ਤਿ. ਇਤੀਤਿ ਪਰਿਸਮਾਪਨੇ.
ਇਤਿ ਅਭਿਧਮ੍ਮਾਵਤਾਰਟੀਕਾਯ
ਚਿਤ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
ਪਠਮੋ ਪਰਿਚ੍ਛੇਦੋ.
੨. ਦੁਤਿਯੋ ਪਰਿਚ੍ਛੇਦੋ
ਚੇਤਸਿਕਨਿਦ੍ਦੇਸਵਣ੍ਣਨਾ
੬੭. ਚਿਤ੍ਤਾਨਨ੍ਤਰਮੁਦ੍ਦਿਟ੍ਠਾ, ਯੇ ਚ ਚੇਤਸਿਕਾ ਮਯਾ ਯੇ ਚ ਚੇਤਸਿਕਾ ਚਿਤ੍ਤਾਨਨ੍ਤਰਂ ਮਯਾ ਉਦ੍ਦਿਟ੍ਠਾ, ਇਤੋ ਪਰਂ ਇਦਾਨਿ ਤੇਸਂ ਚੇਤਸਿਕਾਨਂ ਵਿਭਾਜਨਂ ਕਰਿਸ੍ਸਾਮਿ ਅਹਂ.
ਇਮੇਸੁ ਪਨ ਕਰੁਣਾਮੁਦਿਤਾਵਸੇਨ ਭਾਵਨਾਕਾਲੇ ਕਰੁਣਾਪੁਬ੍ਬਭਾਗੋ ਵਾ, ਅਪ੍ਪਨਾਪਤ੍ਤਾਯ ਕਰੁਣਾਯ ਪੁਬ੍ਬਭਾਗੋ, ਤਸ੍ਮਿਂ ਪੁਬ੍ਬਭਾਗੇ, ਕਰੁਣਾਤੋ ਪੁਬ੍ਬਭਾਗੇ ਕਾਮਾਵਚਰਚਿਤ੍ਤੇਤਿ ਅਤ੍ਥੋ. ਏਕਾ ਕਰੁਣਾ ਉਪ੍ਪਜ੍ਜਤਿ. ਮੁਦਿਤਾਪੁਬ੍ਬਭਾਗੇ ਵਾ ਅਪ੍ਪਨਾਪਤ੍ਤਾਯ ਮੁਦਿਤਾਯ ਪੁਬ੍ਬਭਾਗੇ ਏਕਾ ਮੁਦਿਤਾ ਉਪ੍ਪਜ੍ਜਤਿ. ਇਮਿਨਾ ਕਾਮਾਵਚਰਚਿਤ੍ਤੇਨ ਯੋਗੀ ਮਿਚ੍ਛਾਕਮ੍ਮਨ੍ਤਾਦੀਹਿ ਧਮ੍ਮੇਹਿ ਵਿਰਮਤਿ. ਰਮੁ-ਧਾਤੁ ਕੀਲ਼ਾਯਂ, ਵਿ-ਸਦ੍ਦੋ ਵਿਰਮਣਤ੍ਥੋ.
੬੮. ਆਦਿਨਾ ਪੁਞ੍ਞਚਿਤ੍ਤੇਨ, ਤੇਤ੍ਤਿਂਸ ਨਿਯਤਾ ਮਤਾ ਆਦਿਨਾ ਪੁਞ੍ਞਚਿਤ੍ਤੇਨ ਪਠਮਮਹਾਕੁਸਲਚਿਤ੍ਤੇਨ ਸਹ ਨਿਯਤਾ ਤੇਤ੍ਤਿਂਸ ਚੇਤਸਿਕਾ ਭਗਵਤਾ ਮਤਾਤਿ, ਅਥ ਵਾ ਕਰੁਣਾਮੁਦਿਤਾ ਅਨਿਯਤਾ ਏਕੇਨ ਧਮ੍ਮੇਨ ਸਹ ਚਤੁਤ੍ਤਿਂਸ ਧਮ੍ਮਾ ਭਵਨ੍ਤਿ.
੬੯. ਕਸ੍ਮਾ ਪਨੇਤ੍ਥ ਮੇਤ੍ਤਾ ਚ, ਉਪੇਕ੍ਖਾ ਚ ਨ ਉਦ੍ਧਟਾ ਏਤ੍ਥ ਏਤੇਸੁ ਯੇਵਾਪਨਕਧਮ੍ਮੇਸੁ, ਨਿਦ੍ਧਾਰਣਂ, ਮੇਤ੍ਤਾ ਚ ਉਪੇਕ੍ਖਾ ਚ ਧਮ੍ਮਰਾਜੇਨ ਸਤ੍ਥੁਨਾ ਨ ਉਦ੍ਧਟਾ ਨ ਵੁਤ੍ਤਾ ਕਸ੍ਮਾ ਕਾਰਣਾ.
੭੦. ਅਬ੍ਯਾਪਾਦੇਨ ਮੇਤ੍ਤਾਪਿ ਅਬ੍ਯਾਪਾਦੇਨ ਮੇਤ੍ਤਾ ਗਹਿਤਾ, ਉਪੇਕ੍ਖਾਤਿ ਤਤ੍ਰਮਜ੍ਝਤ੍ਤਤਾਯ ਚ ਗਹਿਤਾ ਯਸ੍ਮਾ ਕਾਰਣਾ, ਤਸ੍ਮਾ ਉਭੋਪੇਤਾ ਭਗਵਤਾ ਨ ਗਹਿਤਾ.
੭੧. ਕਸ੍ਮਾ ਯੇਵਾਪਨਾ ਧਮ੍ਮਾ, ਬੁਦ੍ਧੇਨਾਦਿਚ੍ਚਬਨ੍ਧੁਨਾ ਸਬ੍ਬੇ ਤੇ ਯੇਵਾਪਨਾ ਧਮ੍ਮਾ ਯੇਵਾਪਨਨਾਮਕਾ ਪਾਲ਼ਿਯਂ ਸਰੂਪੇਨ ਏਵ. ਬਨ੍ਧਤਿ ਸ੍ਨੇਹੇਨ ਏਤਸ੍ਮਿਨ੍ਤਿ ਬਨ੍ਧੁ, ਆਦਿਚ੍ਚਸ੍ਸ ਬਨ੍ਧੁ ਆਦਿਚ੍ਚਬਨ੍ਧੁ, ਤੇਨ ਆਦਿਚ੍ਚਬਨ੍ਧੁਨਾ ਬੁਦ੍ਧੇਨ ਨ ਚ ਉਦ੍ਧਟਾ ਨ ਦੇਸਿਤਾ.
੭੨. ਕਸ੍ਮਾ ਕਾਰਣਾ? ਯਸ੍ਮਾ ਅਨਿਯਤਾ ਕੇਚਿ ਯੇਵਾਪਨਕਾ ਅਨਿਯਤਾ, ਯਸ੍ਮਾ ਕਾਰਣਾ ਰਾਸਿਂ ਦੁਕਵਗ੍ਗਾਦਿਰਾਸਿਂ ਨ ਭਜਨ੍ਤਿ ਨ ਸੇਵਨ੍ਤਿ, ਯਸ੍ਮਾ ਕਾਰਣਾ ਕੇਚਿ ਯੇਵਾਪਨਕਾ ਦੁਬ੍ਬਲਾ, ਤਸ੍ਮਾ ਪਾਲ਼ਿਯਂ ਭਗਵਤਾ ਨ ਵੁਤ੍ਤਾ.
੭੩. ਛਨ੍ਦਾਧਿਮੋਕ੍ਖਮੁਦਿਤਾ ਮਨਸਿ ਚ ਕਾਰੋ,
ਮਜ੍ਝਤ੍ਤਤਾ ਚ ਕਰੁਣਾ ਵਿਰਤਿਤ੍ਤਯਞ੍ਚ;
ਪੁਞ੍ਞੇਸੁ ਤੇਨ ਨਿਯਤਾਨਿਯਤਾ ਚ ਸਬ੍ਬੇ,
ਯੇਵਾਪਨਾ ਮੁਨਿਵਰੇਨ ਨ ਚੇਵ ਵੁਤ੍ਤਾ.
ਛਨ੍ਦਾਧਿਮੋਕ੍ਖੋ ਮੁਦਿਤਾ ਮਨਸਿਕਾਰੋ ਮਜ੍ਝਤ੍ਤਤਾ ਕਰੁਣਾ ਵਿਰਤਿਤ੍ਤਯਞ੍ਚ ਪੁਞ੍ਞੇਸੁਕੁਸਲੇਸੁ ਨਿਯਤਾ ਚਤ੍ਤਾਰੋ ਅਨਿਯਤਾ ਪਞ੍ਚ ਸਬ੍ਬੇ ਯੇਵਾਪਨਾ ਨ ਚ ਏਵ ਤੇਨ ਮੁਨਿਵਰੇਨ ਵੁਤ੍ਤਾ.
੭੪-੮੦. ਕਸ੍ਮਾ ਪਨੇਤ੍ਥ ਫਸ੍ਸੋਵ, ਪਠਮਂ ਸਮੁਦੀਰਿਤੋ ਏਤ੍ਥ ਏਤੇਸੁ ਚੇਤਸਿਕੇਸੁ, ਜਾਤਿਨਿਦ੍ਧਾਰਣਂ, ਫਸ੍ਸੋਵ ਪਠਮਂ ਸਮੁਦੀਰਿਤੋ ਕਥਿਤੋ. ਕਸ੍ਮਾ ਕਾਰਣਾ? ਕਿਰ ਮਯਾ ਸੁਤਂ, ਆਰਮ੍ਮਣੇ ਚਿਤ੍ਤਸ੍ਸ ਪਠਮਂ ਅਭਿਨਿਪਾਤਤ੍ਤਾ ਫਸ੍ਸੋ ਪਠਮਂ ਸਮੁਦੀਰਿਤੋ, ਫੁਸਿਤ੍ਵਾ ਪਨ ਫਸ੍ਸੇਨ ਫਸ੍ਸੇਨ ਆਰਮ੍ਮਣਂ ਫੁਸਿਤ੍ਵਾ ਯੋਗਿਨੋ ਵੇਦਨਾਯ ਆਰਮ੍ਮਣਂ ਵੇਦਯੇ, ਸਞ੍ਞਾਯ ਸਞ੍ਜਾਨਾਤਿ, ਚੇਤਨਾਯ ਆਰਮ੍ਮਣਂ ਚੇਤਯੇ. ਸਹਜਾਤਾਨਂ ਚੇਤਸਿਕਾਨਂ ਫਸ੍ਸੋਵ ਇਧ ਇਮਸ੍ਮਿਂ ਚਿਤ੍ਤੇ ਮਹੇਸਿਨਾ ਪਠਮਂ ਵੁਤ੍ਤੋ. ਹਿ ਕਸ੍ਮਾ ਕਾਰਣਾ? ਯਸ੍ਮਾ ਬਲਵਪਚ੍ਚਯਤ੍ਤਾ, ਤਸ੍ਮਾ ਵੁਤ੍ਤੋ. ਅਕਾਰਣਮਿਦਂ ਸਬ੍ਬਂ, ਚਿਤ੍ਤਾਨਂ ਤੁ ਸਹੇਵ ਚ ‘‘ਪਠਮਾਭਿਨਿਪਾਤਤ੍ਤਾ’’ਤਿ ਚ ‘‘ਬਲਵਪਚ੍ਚਯਤ੍ਤਾ’’ਤਿ ਚ ਇਦਂ ਸਬ੍ਬਂ ਵਚਨਂ ਅਕਾਰਣਂ ਅਹੇਤੁਕਂ ਅਯੁਤ੍ਤਂ, ਕਸ੍ਮਾ ਕਾਰਣਾ? ਚਿਤ੍ਤਜਾਨਂ ਚਿਤ੍ਤੇਹਿ ਸਹਪ੍ਪਵਤ੍ਤਾਨਂ ਚੇਤਸਿਕਾਨਂ ਏਕੁਪ੍ਪਾਦਾਦਿਭਾਵੇਨ ਸਮਾਨੁਪ੍ਪਾਦਸਮਾਨਨਿਰੋਧਸਮਾਨਾਲਮ੍ਬਣਸਮਾਨਵਤ੍ਥੁਕਭਾਵੇਨ ਪਵਤ੍ਤਿਤੋ ਅਕਾਰਣਂ ਅਯੁਤ੍ਤਂ. ਅਯਂ ਤੁ ਪਠਮੁਪ੍ਪਨ੍ਨੋ, ਅਯਂ ਪਚ੍ਛਾਤਿ ਨਤ੍ਥਿਦਂ ਅਯਂ ਧਮ੍ਮੋ ਪਠਮੁਪ੍ਪਨ੍ਨੋ, ਅਯਂ ਧਮ੍ਮੋ ਪਚ੍ਛਾਕਾਲੇ ਉਪ੍ਪਨ੍ਨੋ ਇਤਿ ਇਦਂ ਵਚਨਂ ਨਤ੍ਥਿ. ਬਲਵਪਚ੍ਚਯਤ੍ਤੇਪਿ ਕਾਰਣਂ ਨ ਚ ਦਿਸ੍ਸਤਿ. ਦੇਸਨਾਕ੍ਕਮਤੋ ਚੇਵ ਪਠਮਂ ਸਮੁਦੀਰਿਤੋ ਇਚ੍ਚੇਵਂ ਇਤਿ ਏਵਂ ਇਤਿ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਫਸ੍ਸਸ੍ਸ ਪਠਮਂ ਸਮੁਦੀਰਿਤਤਂ ਵਿਞ੍ਞੁਨਾ ਵਿਭਾਵਿਨਾ ਵਿਞ੍ਞੇਯ੍ਯਂ, ਵਿਸੇਸਤੋ ਵਿਸੇਸੇਨ ਅਞ੍ਞਥਾ ਨ ਵਿਞ੍ਞੇਯ੍ਯਂ. ਨ ਚ ਪਰਿਯੇਸਿਤਬ੍ਬੋਯਂ, ਤਸ੍ਮਾ ਪੁਬ੍ਬਾਪਰਕ੍ਕਮੋ ਯਸ੍ਮਾ ਕਾਰਣਾ ਅਯਂ ਪੁਬ੍ਬਾਪਰਕ੍ਕਮੋ ਵਿਞ੍ਞੁਨਾ ਨ ਚ ਪਰਿਯੇਸਿਤਬ੍ਬੋ ਨ ਗਵੇਸਿਤਬ੍ਬੋ, ਧਮ੍ਮਾ ਏਵ ਵਚਨਤ੍ਥਲਕ੍ਖਣਾਦੀਹਿ ਵਿਜਾਨਤਾ ਪਣ੍ਡਿਤੇਨ ਪਰਿਯੇਸਿਤਬ੍ਬਾ.
ਇਟ੍ਠਾਕਾਰਾਨੁਭਵਨਰਸਾ ਇਟ੍ਠਾਰਮ੍ਮਣਾਨੁਭਵਨਕਿਚ੍ਚਾ ਸੁਭੋਜਨਰਸਂ ਅਨੁਭਵਨ੍ਤੋ ਰਾਜਾ ਵਿਯ. ਚੇਤਸਿਕਅਸ੍ਸਾਦਪਚ੍ਚੁਪਟ੍ਠਾਨਾ ਚੇਤਸਿਕਪਸ੍ਸਦ੍ਧਿਪਦਟ੍ਠਾਨਾ.
ਪਚ੍ਚਾਭਿਞ੍ਞਾਣਕਰਣਰਸਾ ਪਟਿਜਾਨਨਕਿਚ੍ਚਾ ਵਡ੍ਢਕਿਸ੍ਸ ਅਭਿਞ੍ਞਾਣਕਰਣਮਿਵ ਵਡ੍ਢਕਿਨੋ ਸਕਿਂ ਸਞ੍ਜਾਨਿਤ੍ਵਾਪਿ ਦਾਰੁਹਰੇਸੁ ਸੁਤ੍ਤਸ੍ਸ ਪਟਿਪਸਾਰਣਂ ਵਿਯਾਤਿ ਅਧਿਪ੍ਪਾਯੋ. ਯਥਾਗਹਿਤਨਿਮਿਤ੍ਤਵਸੇਨਾਤਿ ਯਥਾਪਵਤ੍ਤਿਤਨਿਮਿਤ੍ਤਸ੍ਸ ਵਸੇਨ. ਮਨਸਿ ਅਭਿਨਿਵੇਸਕਰਣਂ ਗਯ੍ਹਾਕਾਰਾ.
ਆਯੂਹਨਰਸਾ ਪਵਤ੍ਤਨਕਿਚ੍ਚਸਾਧਕਾ. ਮਹਾਵਡ੍ਢਕਿਆਦਯੋ ਵਿਯ ਯਥਾ ਮਹਾਵਡ੍ਢਕੀ ਸਯਮ੍ਪਿ ਦਾਰੁਂ ਤਚ੍ਛਤਿ, ਪਰੇਪਿ ਦਾਰੁਂ ਤਚ੍ਛਾਪੇਤਿ, ਏਵਂ ਸਯਮ੍ਪਿ ਆਰਮ੍ਮਣੇ ਸਨ੍ਦਹਤਿ, ਸਮ੍ਪਯੁਤ੍ਤਧਮ੍ਮੇਪਿ ਅਭਿਸਨ੍ਦਹਾਪੇਤਿ.
ਆਹਨਨਂ ਭੁਸੋ ਹਨਨਂ, ਪਰਿਯਾਹਨਨਂ ਸਮਨ੍ਤਾ ਹਨਨਂ, ਤਂ ਰਸੋ ਏਤਸ੍ਸਾਤਿ ਆਹਨਨਪਰਿਯਾਹਨਨਰਸੋ.
ਆਰਮ੍ਮਣਾਨੁਮਜ੍ਜਨਲਕ੍ਖਣੋ ਆਰਮ੍ਮਣਪਰਿਮਦ੍ਦਨਲਕ੍ਖਣੋ.
ਪਿਨਯਤੀਤਿ ਪੀਤਿ, ਸਹਜਾਤਧਮ੍ਮੇ ਆਰਮ੍ਮਣੇ ਪਿਨਯਤੀਤਿ ਅਤ੍ਥੋ. ਕਾਯਚਿਤ੍ਤਫਰਣਰਸਾ. ਉਦਗ੍ਗਸ੍ਸ ਚਿਤ੍ਤਸ੍ਸ ਭਾਵੋ ਓਦਗ੍ਯਂ, ਤਂ ਪਚ੍ਚੁਪਟ੍ਠਾਨਂ ਏਤਸ੍ਸਾਤਿ ਓਦਗ੍ਯਪਚ੍ਚੁਪਟ੍ਠਾਨਾ.
ਸਦ੍ਦਹਨ੍ਤਿ ਵਤ੍ਥੁਤ੍ਤਯਂ ਸਦ੍ਦਹਨ੍ਤਿ. ਅਕਾਲੁਸਿਯਪਚ੍ਚੁਪਟ੍ਠਾਨਾ ਅਨਾਵਿਲਭਾਵਪਚ੍ਚੁਪਟ੍ਠਾਨਾ. ਸਦ੍ਧੇਯ੍ਯਵਤ੍ਥੁਪਦਟ੍ਠਾਨਾ ਸਦ੍ਦਹਿਤਬ੍ਬਵਤ੍ਥੁਤ੍ਤਯਾਸਨ੍ਨਕਾਰਣਾ.
ਅਰਞ੍ਞਗਤਸੁਦੇਸਕੋ ਵਿਯ ਅਰਞ੍ਞੇ ਗਤੋ ਮਗ੍ਗਸੁਦੇਸਕੋ ਵਿਯ.
ਅਤ੍ਤਨਾ ਅਵਿਨਿਬ੍ਭੁਤ੍ਤਾਨਂ ਧਮ੍ਮਾਨਨ੍ਤਿ ਅਵਿਗਤਾਨਂ ਚੇਤਸਿਕਾਨਂ. ਤੇਸਨ੍ਤਿ ਤੇਸਂ ਚੇਤਸਿਕਾਨਂ ਧਮ੍ਮਾਨਂ. ਸਨ੍ਤੇਪਿ ਚ ਤੇਸਂ ਚੇਤਸਿਕਾਨਂ ਅਨੁਪਾਲਨਲਕ੍ਖਣਾਦਿਮ੍ਹਿ ਵਿਧਾਨੇ ਅਤ੍ਥਿਕ੍ਖਣੇਯੇਵ ਤਂ ਤੇਸਂ ਪਾਲੇਤਬ੍ਬਾਨਂ ਚੇਤਸਿਕਾਨਂ ਪਵਤ੍ਤਕ੍ਖਣੇਯੇਵ ਤਂ ਜੀਵਿਤਂ ਤੇ ਧਮ੍ਮੇ ਪਾਲੇਤਬ੍ਬੇ ਚੇਤਸਿਕੇ ਅਨੁਪਾਲੇਤਿ. ਉਦਕਂ ਵਿਯਾਤਿ ਯਥਾ ਉਦਕਂ ਅਤ੍ਤਨਿ ਉਪ੍ਪਲਾਦੀਨਿ ਅਨੁਪਾਲੇਤਿ, ਤਥਾ ਅਨੁਪਾਲਨਲਕ੍ਖਣਾਦਿਮ੍ਹਿ ਵਿਧਾਨੇ ਸਨ੍ਤੇਪਿ ਤੇਸਂ ਅਤ੍ਥਿਕ੍ਖਣੇਯੇਵ ਅਨੁਪਾਲੇਤਿ, ਵਿਜ੍ਜਮਾਨਕ੍ਖਣੇਵ ਅਨੁਪਾਲੇਤੀਤਿ ਅਧਿਪ੍ਪਾਯੋ. ਪਚ੍ਚਯੁਪ੍ਪਨ੍ਨੇਪਿ ਚ ਧਮ੍ਮੇ ਅਨੁਪਾਲੇਤਿ, ਧਾਤਿ ਵਿਯ ਕੁਮਾਰਂ ਅਞ੍ਞਾਯ ਜਨਿਤਂ ਕੁਮਾਰਂ ਰਕ੍ਖਨ੍ਤੀ ਧਾਤਿ ਵਿਯ, ਪਰਸ੍ਸ ਪੁਤ੍ਤਂ ਅਙ੍ਕਾਦਿਨਾ ਧਾਰੇਤੀਤਿ ਧਾਤਿ. ਸਯਂਪਵਤ੍ਤਿਤਧਮ੍ਮਸਮ੍ਬਨ੍ਧੇਨੇਵ ਪਵਤ੍ਤਤਿ ਅਤ੍ਤਨਾ ਪਵਤ੍ਤਿਤੇਹਿ ਧਮ੍ਮੇਹਿ ਸਮ੍ਪਵਤ੍ਤਤਿ. ਨਿਯਾਮਕੋ ਵਿਯ ਯਥਾ ਨਿਯਾਮਕੋ ਏਕਨਾਵਾਯ ਵੁਤ੍ਥੇਹਿ ਜਨੇਹਿ ਸਹ ਪਵਤ੍ਤਤਿ, ਭਙ੍ਗਤੋ ਉਦ੍ਧਂ ਤਂ ਜੀਵਿਤਂ ਨ ਪਵਤ੍ਤਯਤਿ, ਅਤ੍ਤਨੋ ਚ ਅਭਾਵਾ ਠਪਯਿਤਬ੍ਬਾਨਂ ਚੇਤਸਿਕਾਨਞ੍ਚ ਅਭਾਵਾ, ਭਙ੍ਗਕ੍ਖਣੇ ਚੇਤਸਿਕੇ ਨ ਠਪੇਤਿ ਸਯਂ ਭਿਜ੍ਜਮਾਨਤ੍ਤਾ, ਵਟ੍ਟਿਸ੍ਨੇਹੋ ਖੀਯਮਾਨੋ ਪਦੀਪਸਿਖਂ ਨ ਕਰੋਤਿ ਯਥਾ.
ਸੋਮ੍ਮਭਾਵਪਚ੍ਚੁਪਟ੍ਠਾਨੋਤਿ ਮੁਦੁਭਾਵਪਚ੍ਚੁਪਟ੍ਠਾਨੋ, ਸੀਤਲਭਾਵਪਚ੍ਚੁਪਟ੍ਠਾਨੋ ਵਾ.
ਕਾਯੋਤਿ ਚੇਤ੍ਥ ਵੇਦਨਾਦਯੋ ਤਯੋ ਖਨ੍ਧਾ ਵੇਦਨਾਕ੍ਖਨ੍ਧੋ ਸਞ੍ਞਾਕ੍ਖਨ੍ਧੋ ਸਙ੍ਖਾਰਕ੍ਖਨ੍ਧੋ ਇਮੇ ਖਨ੍ਧਾ ਗਹਿਤਾ.
ਨਿਮ੍ਮਦ੍ਦਨਰਸਾਤਿ ਨਿਮ੍ਮਦ੍ਦਨਕਿਚ੍ਚਾ. ਕਾਯਚਿਤ੍ਤਾਨਂ ਅਵੂਪਸਮਤਾਉਦ੍ਧਚ੍ਚਾਦਿਕਿਲੇਸਪਟਿਪਕ੍ਖਭੂਤਾਤਿ ਆਦਿਗ੍ਗਹਣੇਨ ਕੁਕ੍ਕੁਚ੍ਚਂ ਗਹੇਤਬ੍ਬਂ.
ਇਤਿ ਅਭਿਧਮ੍ਮਾਵਤਾਰਟੀਕਾਯ
ਚੇਤਸਿਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
ਦੁਤਿਯੋ ਪਰਿਚ੍ਛੇਦੋ.
੩. ਤਤਿਯੋ ਪਰਿਚ੍ਛੇਦੋ
ਚੇਤਸਿਕਵਿਭਾਗਨਿਦ੍ਦੇਸਵਣ੍ਣਨਾ
੮੯. ਸਬ੍ਬੇ ਚੇਤਸਿਕਾ ਵੁਤ੍ਤਾ, ਬੁਦ੍ਧੇਨਾਦਿਚ੍ਚਬਨ੍ਧੁਨਾ ਯੇ ਸਬ੍ਬੇ ਚੇਤਸਿਕਾ ਆਦਿਚ੍ਚਬਨ੍ਧੁਨਾ ਬੁਦ੍ਧੇਨ ਵੁਤ੍ਤਾ, ਤੇ ਸਬ੍ਬੇ ਚੇਤਸਿਕਾ ਨਾਮਸਾਮਞ੍ਞਤੋ ਨਾਮਸਮਾਨਭਾਵੇਨ ਦ੍ਵੇਪਞ੍ਞਾਸਭਵਨ੍ਤਿ ਤੇ, ਅਨੋਤ੍ਤਪ੍ਪਪਰਿਯੋਸਾਨਾ ਦ੍ਵਿਪਞ੍ਞਾਸ ਭਵਨ੍ਤਿ.
੯੦-੯੨. ਚਤੁਪਞ੍ਞਾਸਧਾ ਕਾਮੇ, ਰੂਪੇ ਪਞ੍ਚਦਸੇਰਿਤਾ ਕਾਮੇ ਕਾਮਾਵਚਰੇ ਚਤੁਪਞ੍ਞਾਸ ਚਿਤ੍ਤਾਨਿ ਈਰਿਤਾ. ਰੂਪੇ ਰੂਪਾਵਚਰੇ ਪਞ੍ਚਦਸ ਚਿਤ੍ਤਾਨਿ ਈਰਿਤਾ ਭਵਨ੍ਤਿ. ਦ੍ਵਾਦਸਾਰੂਪੇ ਅਰੂਪਾਵਚਰੇ ਦ੍ਵਾਦਸ ਚਿਤ੍ਤਾਨਿ ਭਵਨ੍ਤਿ. ਚਤ੍ਤਾਲੀਸ ਮਨਾਸਵਾ ਲੋਕੁਤ੍ਤਰਚਿਤ੍ਤਾਨਿ ਚਤ੍ਤਾਲੀਸ ਭਵਨ੍ਤਿ, ਏਕਵੀਸਸਤਂ ਸਬ੍ਬੇ ਚਿਤ੍ਤੁਪ੍ਪਾਦਾ ਸਮਾਸਤੋ ਸਙ੍ਖੇਪਤੋ ਏਕਵੀਸਸਤਂ ਹੋਤਿ. ਏਤੇਸੁ ਤੇਸਮੁਪ੍ਪਤ੍ਤਿਂ ਇਤੋ ਪਰਂ ਏਤੇਸੁ ਮਯਾ ਵੁਤ੍ਤੇਸੁ ਚਿਤ੍ਤੇਸੁ ਤੇਸਂ ਫਸ੍ਸਾਦੀਨਂ ਧਮ੍ਮਾਨਂ ਉਪ੍ਪਤ੍ਤਿਂ ਏਕਂ ਏਕਂ ਉਦ੍ਧਰਿਤ੍ਵਾ ਚਿਤ੍ਤਚੇਤਸਿਕੇਸੁ ਭਿਕ੍ਖੂਨਂ ਪਾਟਵਤ੍ਥਾਯ ਅਹਂ ਪਵਕ੍ਖਾਮਿ ਦੇਸਿਸ੍ਸਾਮਿ.
੯੩. ਏਕਗ੍ਗਤਾ ਚਿਤ੍ਤੇਕਗ੍ਗਤਾ ਮਨਕ੍ਕਾਰੋ ਮਨਸਿਕਾਰੋ ਜੀਵਿਤਂ ਫਸ੍ਸਪਞ੍ਚਕਂ ਏਤੇ ਅਟ੍ਠ ਚੇਤਸਿਕਾ ਅਵਿਨਿਬ੍ਭੋਗਾ ਅਞ੍ਞਮਞ੍ਞਤੋ ਅਵਿਗਤਾ ਏਕੁਪ੍ਪਾਦਾ ਸਮਾਨੁਪ੍ਪਾਦਾ ਸਹਕ੍ਖਯਾ ਸਹਵਯਾ.
੯੪. ਫਸ੍ਸੋ ਚ ਵੇਦਨਾ ਸਞ੍ਞਾ, ਚੇਤਨਾ ਜੀਵਿਤਿਨ੍ਦ੍ਰਿਯਂ ਏਕਗ੍ਗਤਾ ਮਨਕ੍ਕਾਰੋ ਇਮੇ ਚੇਤਸਿਕਾ ਸਬ੍ਬਸਾਧਾਰਣਾ ਸਬ੍ਬਚਿਤ੍ਤੇਹਿ ਸਾਧਾਰਣਾ, ਸਬ੍ਬਚਿਤ੍ਤਾਨਂ ਸਾਧਾਰਣਾ ਵਾ.
੯੫. ਵਿਤਕ੍ਕੋ ਪਞ੍ਚਪਞ੍ਞਾਸ-ਚਿਤ੍ਤੇਸੁ ਸਮੁਦੀਰਿਤੋ. ਚਾਰੋ ਛਸਟ੍ਠਿਚਿਤ੍ਤੇਸੁ ਵਿਤਕ੍ਕੋ ਤਾਵ ਦ੍ਵਿਪਞ੍ਚਵਿਞ੍ਞਾਣਵਜ੍ਜਿਤਕਾਮਾਵਚਰੇਸੁ ਚੇਵ ਏਕਾਦਸਸੁ ਪਠਮਜ੍ਝਾਨਚਿਤ੍ਤੇਸੁ ਚਾਤਿ ਪਞ੍ਚਪਞ੍ਞਾਸਚਿਤ੍ਤੇਸੁ ਭਗਵਤਾ ਸਮੁਦੀਰਿਤੋ. ਵਿਚਾਰੋ ਦ੍ਵਿਪਞ੍ਚਵਿਞ੍ਞਾਣਵਜ੍ਜਿਤਕਾਮਾਵਚਰਚਿਤ੍ਤੇਸੁ ਏਕਾਦਸਸੁ ਪਠਮਜ੍ਝਾਨਚਿਤ੍ਤੇਸੁ ਚ ਏਕਾਦਸਸੁ ਦੁਤਿਯਜ੍ਝਾਨਚਿਤ੍ਤੇਸੁ ਚਾਤਿ ਛਸਟ੍ਠਿਚਿਤ੍ਤੇਸੁ ਜਾਯਤਿ. ਏਤ੍ਥ ਏਤਸ੍ਮਿਂ ਵਚਨੇ ਸਂਸਯੋ ਨਤ੍ਥਿ.
੯੬. ਏਕਪਞ੍ਞਾਸਚਿਤ੍ਤੇਸੁ, ਪੀਤਿ ਤੇਸਟ੍ਠਿਯਾ ਸੁਖਂ ਪੀਤਿਦੋਮਨਸ੍ਸੁਪੇਕ੍ਖਾਸਹਗਤਕਾਯਵਿਞ੍ਞਾਣਚਤੁਤ੍ਥਜ੍ਝਾਨਵਜ੍ਜਿਤੇਸੁ ਏਕਪਞ੍ਞਾਸਚਿਤ੍ਤੇਸੁ ਜਾਯਤਿ. ਸੁਖਂ ਦੋਮਨਸ੍ਸਦੁਕ੍ਖੁਪੇਕ੍ਖਾਸਹਗਤਵਜ੍ਜਿਤੇਸੁ ਤੇਸਟ੍ਠਿਚਿਤ੍ਤੇਸੁ ਜਾਯਤਿ. ਉਪੇਕ੍ਖਾ ਸੋਮਨਸ੍ਸਸੁਖਦੁਕ੍ਖਸਹਗਤਵਜ੍ਜਿਤੇਸੁ ਪਞ੍ਚਪਞ੍ਞਾਸਚਿਤ੍ਤੇਸੁ ਜਾਯਤਿ. ਦੁਕ੍ਖਂ ਅਕੁਸਲਵਿਪਾਕਕਾਯਵਿਞ੍ਞਾਣਪਟਿਘਸਹਗਤੇਸੁ ਤੀਸੁ ਚਿਤ੍ਤੇਸੁ ਜਾਯਤਿ.
੯੭. ਹੋਤਿ ਦ੍ਵਾਸਟ੍ਠਿਚਿਤ੍ਤੇਸੁ, ਸੋਮਨਸ੍ਸਿਨ੍ਦ੍ਰਿਯਂ ਪਨ ਦੋਮਨਸ੍ਸਦੁਕ੍ਖਸੁਖੁਪੇਕ੍ਖਾਸਹਗਤਵਜ੍ਜਿਤੇਸੁ ਦ੍ਵਾਸਟ੍ਠਿਚਿਤ੍ਤੇਸੁ ਜਾਯਤਿ. ਦੁਕ੍ਖਿਨ੍ਦ੍ਰਿਯਂ ਪਨੇਕਸ੍ਮਿਂ ਅਕੁਸਲਵਿਪਾਕੇ ਕਾਯਵਿਞ੍ਞਾਣੇ ਜਾਯਤਿ. ਤਥੇਕਮ੍ਹਿ ਸੁਖਿਨ੍ਦ੍ਰਿਯਂ ਤਥਾ ਏਕਸ੍ਮਿਂ ਪੁਞ੍ਞਪਾਕੇ ਕਾਯਵਿਞ੍ਞਾਣੇ ਹੋਤਿ.
੯੮. ਪਞ੍ਚੁਤ੍ਤਰਸਤੇ ਚਿਤ੍ਤੇ, ਵੀਰਿਯਂ ਆਹ ਨਾਯਕੋ ਜਿਨੋ ਪਞ੍ਚਦ੍ਵਾਰਾਵਜ੍ਜਨਦ੍ਵਿਪਞ੍ਚਵਿਞ੍ਞਾਣਸਮ੍ਪਟਿਚ੍ਛਨਸਨ੍ਤੀਰਣਵਜ੍ਜਿਤੇ ਪਞ੍ਚੁਤ੍ਤਰਸਤੇ ਚਿਤ੍ਤੇ ਵੀਰਿਯਂ ਆਹ ਕਥੇਸਿ. ਚਤੁਤ੍ਤਰਸਤੇ ਚਿਤ੍ਤੇ, ਸਮਾਧਿਨ੍ਦ੍ਰਿਯਮਬ੍ਰ੍ਵਿ ਵਿਚਿਕਿਚ੍ਛਾਸਹਗਤਦ੍ਵਿਪਞ੍ਚਵਿਞ੍ਞਾਣਸਮ੍ਪਟਿਚ੍ਛਨਸਨ੍ਤੀਰਣਪਞ੍ਚਦ੍ਵਾਰਾਵਜ੍ਜਨਵਜ੍ਜਿਤੇ ਚਤੁਤ੍ਤਰਸਤੇ ਚਿਤ੍ਤੇ ਸਮਾਧਿਨ੍ਦ੍ਰਿਯਂ ਅਵੋਚ.
੯੯. ਸਬ੍ਬਾਹੇਤੁਕਚਿਤ੍ਤਾਨਿ, ਠਪੇਤ੍ਵਾ ਚੇਕਹੇਤੁਕੇ ਸਬ੍ਬਾਨਿ ਅਟ੍ਠਾਰਸ ਅਹੇਤੁਕਚਿਤ੍ਤਾਨਿ ਏਕਹੇਤੁਕਚਿਤ੍ਤਦ੍ਵਯਞ੍ਚ ਠਪੇਤ੍ਵਾ ਸੇਸਸ੍ਮਿਂ ਏਕੁਤ੍ਤਰਸਤੇ ਚਿਤ੍ਤੇ ਛਨ੍ਦਸ੍ਸ ਉਪ੍ਪਤ੍ਤਿਂ ਉਦ੍ਦਿਸੇ ਪਣ੍ਡਿਤੋ ਕਥੇਯ੍ਯ.
੧੦੦. ਠਪੇਤ੍ਵਾ ਦਸ ਵਿਞ੍ਞਾਣੇ ਚਕ੍ਖੁਵਿਞ੍ਞਾਣਾਦਿਕੇ ਦਸ ਵਿਞ੍ਞਾਣੇ ਚ ਵਿਚਿਕਿਚ੍ਛਾਯੁਤਮ੍ਪਿ ਚਿਤ੍ਤਂ ਠਪੇਤ੍ਵਾ ਸੇਸਸ੍ਮਿਂ ਦਸੁਤ੍ਤਰਸਤੇ ਚਿਤ੍ਤੇ ਅਧਿਮੋਕ੍ਖੋ ਭਗਵਤਾ ਉਦੀਰਿਤੋ.
੧੦੧-੨. ਸਦ੍ਧਾ ਸਤਿ ਹਿਰੀ ਓਤ੍ਤਪ੍ਪਂ ਅਲੋਭੋ ਅਦੋਸੋ ਤਤ੍ਰਮਜ੍ਝਤ੍ਤਂ ਛ ਯੁਗਲ਼ਾ ਚ ਇਤਿ ਇਮੇ ਏਕੂਨਵੀਸਤਿ ਧਮ੍ਮਾ ਨਿਯਤਾ ਹੁਤ੍ਵਾ ਏਕਨਵੁਤਿਯਾ ਚਿਤ੍ਤੇ ਜਾਯਨ੍ਤਿ. ਏਕੂਨਵੀਸਤਿ ਧਮ੍ਮਾ ਅਹੇਤੁਕੇਸੁ ਅਟ੍ਠਾਰਸਸੁ ਅਪੁਞ੍ਞੇਸੁ ਦ੍ਵਾਦਸਸੁ ਅਕੁਸਲੇਸੁ ਨ ਜਾਯਰੇ ਨ ਜਾਯਨ੍ਤਿ.
੧੦੩. ਏਕੂਨਾਸੀਤਿਯਾ ਚਿਤ੍ਤੇ, ਪਞ੍ਞਾ ਜਾਯਤਿ ਸਬ੍ਬਦਾ ਪਞ੍ਞਾ ਦ੍ਵਾਦਸਅਕੁਸਲਅਟ੍ਠਾਰਸਅਹੇਤੁਕਮਹਾਕੁਸਲਞਾਣਵਿਪ੍ਪਯੁਤ੍ਤਮਹਾਵਿਪਾਕਞਾਣਵਿਪ੍ਪਯੁਤ੍ਤਮਹਾਕਿਰਿਯਾਞਾਣਵਿਪ੍ਪਯੁਤ੍ਤਵਜ੍ਜਿਤੇ ਏਕੂਨਾਸੀਤਿਯਾ ਚਿਤ੍ਤੇ ਜਾਯਤਿ. ਅਟ੍ਠਵੀਸਤਿਯਾ ਚਿਤ੍ਤੇ, ਕਰੁਣਾਮੁਦਿਤਾ ਸਿਯੁਂ ਕਰੁਣਾਮੁਦਿਤਾ ਅਟ੍ਠਸੁ ਮਹਾਕੁਸਲੇਸੁ, ਅਟ੍ਠਸੁ ਮਹਾਕਿਰਿਯਾਸੁ, ਰੂਪਾਵਚਰਪਞ੍ਚਮਜ੍ਝਾਨਵਜ੍ਜਿਤੇਸੁ ਦ੍ਵਾਦਸਰੂਪਾਵਚਰੇਸੁ ਚਾਤਿ ਅਟ੍ਠਵੀਸਤਿਯਾ ਚਿਤ੍ਤੇਸੁ ਸਿਯੁਂ ਭਵੇਯ੍ਯੁਂ.
੧੦੪. ਕਾਮਾਵਚਰਪੁਞ੍ਞੇਸੁ, ਸਬ੍ਬਲੋਕੁਤ੍ਤਰੇਸੁ ਚ ਕਾਮਾਵਚਰਮਹਾਕੁਸਲੇਸੁ ਚਿਤ੍ਤੇਸੁ ਸਬ੍ਬੇਸੁ ਲੋਕੁਤ੍ਤਰੇਸੁ ਚਾਤਿ ਸਹ ਅਟ੍ਠਕੇ ਚਤ੍ਤਾਲੀਸਵਿਧੇ ਚਿਤ੍ਤੇ ਵਿਰਤਿਤ੍ਤਯਂ ਹੋਤਿ.
੧੦੫. ਸਦ੍ਧਾ ਸਤਿ ਹਿਰੋਤ੍ਤਪ੍ਪਂ ਅਲੋਭਾਦਿਤ੍ਤਯਮ੍ਪਿ ਚ ਯੁਗਲ਼ਾਨਿ ਛ ਚ ਮਜ੍ਝਤ੍ਤਂ ਕਰੁਣਾਮੁਦਿਤਾਪਿ ਚ.
੧੦੬. ਤਥਾ ਤਿਸ੍ਸੋ ਵਿਰਤਿਯੋ ਸਬ੍ਬੇ ਤੇ ਪਞ੍ਚਵੀਸਤਿ ਧਮ੍ਮਾ ਮਹਾਕੁਸਲਚਿਤ੍ਤਸਮ੍ਪਯੁਤ੍ਤਅਬ੍ਯਾਕਤਚਿਤ੍ਤਸਮ੍ਪਯੁਤ੍ਤਾਤਿ ਕੁਸਲੇਨ ਸਬ੍ਬੇਸੁਯੇਵ ਧਮ੍ਮੇਸੁ ਛੇਕੇਨ ਵਿਜਿਤਙ੍ਗਣੇਨ ਪਕਾਸਿਤਾ.
੧੦੭. ਅਹਿਰੀਕਂ ਅਨੋਤ੍ਤਪ੍ਪਂ, ਮੋਹੋ ਉਦ੍ਧਚ੍ਚਮੇਵ ਚਾਤਿ ਇਮੇ ਚਤ੍ਤਾਰੋ ਧਮ੍ਮਾ ਨਿਯਤਾ ਹੁਤ੍ਵਾ ਦ੍ਵਾਦਸਾਪੁਞ੍ਞਚਿਤ੍ਤੇਸੁਯੇਵ ਦ੍ਵਾਦਸਅਕੁਸਲਚਿਤ੍ਤੇਸੁਯੇਵ ਜਾਯਰੇ ਜਾਯਨ੍ਤਿ.
੧੦੮-੯. ਲੋਭੋ ਦੋਸੋ ਚ ਮੋਹੋ ਚ, ਮਾਨੋ ਦਿਟ੍ਠਿ ਚ ਸਂਸਯੋ ਵਿਚਿਕਿਚ੍ਛਾ ਮਿਦ੍ਧਂ ਉਦ੍ਧਚ੍ਚਂ ਕੁਕ੍ਕੁਚ੍ਚਂ ਥਿਨਂ ਮਚ੍ਛਰਿਯਮ੍ਪਿ ਚ ਅਹਿਰਿਕਂ ਅਨੋਤ੍ਤਪ੍ਪਂ ਇਸ੍ਸਾ ਚ ਦੋਮਨਸ੍ਸਕਂ ਏਤੇ ਧਮ੍ਮਾ ਅਕੁਸਲਾ ਅਕੁਸਲਚਿਤ੍ਤਸਮ੍ਪਯੁਤ੍ਤਾ ਏਕਨ੍ਤੇਨ ਮਹੇਸਿਨਾ ਵਿਜਿਤਙ੍ਗਣਵਿਗਤਮਲੇਨ ਵੁਤ੍ਤਾ.
੧੧੦. ਲੋਭੋ ਅਟ੍ਠਸੁ ਲੋਭਮੂਲੇਸੁ ਚਿਤ੍ਤੇਸੁ ਭਗਵਤਾ ਨਿਦ੍ਦਿਟ੍ਠੋ ਦਸ੍ਸਿਤੋ. ਦਿਟ੍ਠਿ ਚਤੂਸੁ ਦਿਟ੍ਠਿਸਮ੍ਪਯੁਤ੍ਤੇਸੁ ਚਿਤ੍ਤੇਸੁ ਵੁਤ੍ਤਾ. ਮਾਨੋ ਦਿਟ੍ਠਿਵਿਪ੍ਪਯੁਤ੍ਤੇਸੁ ਚਤੂਸੁ ਗਾਹੂਪਵਾਦਪ੍ਪਭਿਨ੍ਦਨੇਨ ਵੁਤ੍ਤੋ. ਦੋਸੋ ਦ੍ਵੀਸੁ ਏਵ ਪਟਿਘਸਮ੍ਪਯੁਤ੍ਤੇਸੁ ਚਿਤ੍ਤੇਸੁ ਮੁਨਿਨ੍ਦੇਨ ਵੁਤ੍ਤੋ.
੧੧੧. ਇਸ੍ਸਾਮਚ੍ਛੇਰਕੁਕ੍ਕੁਚ੍ਚਾ ਦ੍ਵੀਸੁ ਦੋਸਮੂਲੇਸੁ ਚਿਤ੍ਤੇਸੁ ਜਾਯਨ੍ਤਿ, ਨੋ ਸਹ ਸਹ ਨੋ ਜਾਯਨ੍ਤਿ, ਏਕੇਕੋਵ ਜਾਯਨ੍ਤੀਤਿ ਅਤ੍ਥੋ. ਵਿਚਿਕਿਚ੍ਛਾ ਪਨੇਕਸ੍ਮਿਂ ਵਿਚਿਕਿਚ੍ਛਾ ਪਨ ਏਕਸ੍ਮਿਂ ਵਿਚਿਕਿਚ੍ਛਾਸਹਗਤਚਿਤ੍ਤੇ ਜਾਯਤਿ. ਥਿਨਮਿਦ੍ਧਂ ਪਞ੍ਚਸੁ ਸਸਙ੍ਖਾਰਿਕਅਕੁਸਲਚਿਤ੍ਤੇਸੁ ਜਾਯਤਿ.
੧੧੨-੩. ਫਸ੍ਸੋ ਚ ਵੇਦਨਾ ਸਞ੍ਞਾ, ਚੇਤਨਾ ਜੀਵਿਤਂ ਮਨੋ ਵਿਤਕ੍ਕੋ ਚ ਵਿਚਾਰੋ ਚ ਪੀਤਿ ਵੀਰਿਯਂ ਸਮਾਧਿ ਚ ਛਨ੍ਦੋ ਚੇਵਾਧਿਮੋਕ੍ਖੋ ਚ ਮਨਸਿਕਾਰੋ ਚ ਚੁਦ੍ਦਸ ਧਮ੍ਮਾ ਕੁਸਲਾ ਚ ਕੁਸਲਚੇਤਸਿਕਾ ਚ ਹੋਨ੍ਤਿ. ਅਕੁਸਲਾ ਚੇਵ ਅਕੁਸਲਚੇਤਸਿਕਾ ਚੇਵ ਅਬ੍ਯਾਕਤਾਪਿ ਚ ਅਬ੍ਯਾਕਤਚੇਤਸਿਕਾ ਚ ਹੋਨ੍ਤਿ.
੧੧੪. ਏਕੂਨਤਿਂਸਚਿਤ੍ਤੇਸੁ, ਝਾਨਂ ਪਞ੍ਚਙ੍ਗਿਕਂ ਮਤਂ ਚਤੂਸੁ ਸੋਮਨਸ੍ਸਸਹਗਤਾਕੁਸਲੇਸੁ, ਦ੍ਵਾਦਸਸੁ ਸੋਮਨਸ੍ਸਸਹਗਤਮਹਾਕੁਸਲਮਹਾਵਿਪਾਕਮਹਾਕਿਰਿਯਚਿਤ੍ਤੇਸੁ, ਸੁਖਸਨ੍ਤੀਰਣਹਸਿਤੁਪ੍ਪਾਦਚਿਤ੍ਤੇਸੁ, ਤੀਸੁ ਰੂਪਪਠਮਜ੍ਝਾਨਚਿਤ੍ਤੇਸੁ, ਅਟ੍ਠਸੁ ਲੋਕੁਤ੍ਤਰਪਠਮਜ੍ਝਾਨਚਿਤ੍ਤੇਸੁ ਚਾਤਿ ਏਕੂਨਤਿਂਸਚਿਤ੍ਤੇਸੁ ਪਞ੍ਚਙ੍ਗਿਕਂ ਪਞ੍ਚਾਵਯਵਝਾਨਯੁਤ੍ਤਂ ਝਾਨਂ ਸੁਗਤੇਨ ਮਤਂ. ਉਪੇਕ੍ਖਾਸਹਗਤਾਨਿ ਚਤ੍ਤਾਰਿ ਲੋਭਮੂਲਾਨਿ ਚ ਦ੍ਵੇ ਦੋਸਮੂਲਾਨਿ ਚ ਦ੍ਵੇ ਮੋਹਮੂਲਾਨਿ ਚ ਮਨੋਧਾਤੁਤ੍ਤਿਕਞ੍ਚ ਉਪੇਕ੍ਖਾਸਹਗਤਾ ਤਿਸ੍ਸੋ ਅਹੇਤੁਕਮਨੋਵਿਞ੍ਞਾਣਧਾਤੁਯੋ ਚ ਦ੍ਵਾਦਸੁਪੇਕ੍ਖਾਸਹਗਤਾਨਿ ਮਹਾਕੁਸਲਮਹਾਵਿਪਾਕਕਿਰਿਯਚਿਤ੍ਤਾਨਿ ਤੀਣਿ ਰੂਪਦੁਤਿਯਜ੍ਝਾਨਚਿਤ੍ਤਾਨਿ ਅਟ੍ਠ ਲੋਕੁਤ੍ਤਰਦੁਤਿਯਜ੍ਝਾਨਚਿਤ੍ਤਾਨਿ ਚਾਤਿ ਸਤ੍ਤਤਿਂਸ ਚਿਤ੍ਤਾਨਿ ਚਤੁਝਾਨਙ੍ਗਯੁਤ੍ਤਾਨਿ ਚਤੁਝਾਨਾਵਯਵਯੁਤ੍ਤਾਨਿ ਇਤਿ ਏਵਂ ਨਿਦ੍ਦਿਸੇ ਕਥੇਯ੍ਯ.
੧੧੫. ਏਕਾਦਸਵਿਧਂ ਚਿਤ੍ਤਂ, ਤਿਵਙ੍ਗਿਕਮੁਦੀਰਿਤਂ ਤੀਣਿ ਰੂਪਾਵਚਰਤਤਿਯਜ੍ਝਾਨਚਿਤ੍ਤਾਨਿ, ਅਟ੍ਠਲੋਕੁਤ੍ਤਰਤਤਿਯਜ੍ਝਾਨਚਿਤ੍ਤਾਨਿ ਚਾਤਿ ਏਕਾਦਸਵਿਧਂ ਚਿਤ੍ਤਂ ਤਿਵਙ੍ਗਿਕਂ ਤਿਅਵਯਵਝਾਨਯੁਤ੍ਤਂ, ਛ ਰੂਪਾਵਚਰਚਤੁਤ੍ਥਜ੍ਝਾਨਪਞ੍ਚਮਜ੍ਝਾਨਚਿਤ੍ਤਾਨਿ, ਦ੍ਵਾਦਸਾਰੂਪਾਵਚਰਚਿਤ੍ਤਾਨਿ, ਸੋਲ਼ਸ ਲੋਕੁਤ੍ਤਰਚਤੁਤ੍ਥਜ੍ਝਾਨਪਞ੍ਚਮਜ੍ਝਾਨਚਿਤ੍ਤਾਨਿ ਚਾਤਿ ਚਤੁਤਿਂਸਵਿਧਂ ਚਿਤ੍ਤਂ ਦੁਵਙ੍ਗਿਕਂ ਦ੍ਵਿਅਵਯਵਝਾਨਯੁਤ੍ਤਂ ਉਦੀਰਿਤਂ ਜਿਨੇਨ ਈਰਿਤਂ.
੧੧੬. ਸਭਾਵੇਨਾਵਿਤਕ੍ਕੇਸੁ, ਝਾਨਙ੍ਗਾਨਿ ਨ ਉਦ੍ਧਰੇ ਸਭਾਵੇਨ ਪਕਤਿਯਾ ਅਵਿਤਕ੍ਕੇਸੁ ਵਿਤਕ੍ਕਵਿਰਹਿਤੇਸੁ ਦ੍ਵਿਪਞ੍ਚਵਿਞ੍ਞਾਣੇਸੁ ਝਾਨਙ੍ਗਾਨਿ ਝਾਨਾਵਯਵਾਨਿ ਜਿਨੋ ਨ ਉਦ੍ਧਰੇ. ਅਯਮੇਤ੍ਥਾਧਿਪ੍ਪਾਯੋ – ਅਞ੍ਞਤ੍ਥ ਵਿਤਕ੍ਕੋ ਝਾਨਚਿਤ੍ਤੇਨ ਵਿਪ੍ਪਹੀਨੋ ਭਾਸਿਤੋ, ਇਮੇਸੁ ਪਨ ਨੇਵ ਝਾਨਚਿਤ੍ਤੇਨ ਪਹੀਨਾ, ਪਕਤਿਯਾ ਵਿਤਕ੍ਕਵਿਰਹਿਤਾਨਿ ਦ੍ਵਿਪਞ੍ਚਵਿਞ੍ਞਾਣਾਨਿ ਸਬ੍ਬਾਹੇਤੁਕਚਿਤ੍ਤੇਸੁ ਮਗ੍ਗਙ੍ਗਾਨਿ ਮਗ੍ਗਾਵਯਵਾਨਿ ਜਿਨੋ ਨ ਉਦ੍ਧਰੇ ਨ ਦੇਸੇਯ੍ਯ.
੧੧੭. ਬੁਧੋ ਜਿਨੋ ਦ੍ਵਿਪਞ੍ਚਵਿਞ੍ਞਾਣੇਸੁ ਮਨੋਧਾਤੁਤ੍ਤਿਕੇ ਚ ਤੀਸੁ ਸਨ੍ਤੀਰਣੇਸੁ ਚਾਤਿ ਸੋਲ਼ਸਚਿਤ੍ਤੇਸੁ ਤੀਣਿਨ੍ਦ੍ਰਿਯਾਨਿ ਵਦੇ ਕਥੇਯ੍ਯ. ਏਕਸ੍ਮਿਂ ਪਨ ਚਤ੍ਤਾਰਿ ਏਕਸ੍ਮਿਂ ਵਿਚਿਕਿਚ੍ਛਾਸਹਗਤਚਿਤ੍ਤੇ ਚਤ੍ਤਾਰਿ ਇਨ੍ਦ੍ਰਿਯਾਨਿ ਹੋਨ੍ਤਿ, ਏਕਾਦਸਸੁ ਅਕੁਸਲਚਿਤ੍ਤੇਸੁ ਵਿਚਿਕਿਚ੍ਛਾਯੁਤ੍ਤਚਿਤ੍ਤਵਜ੍ਜਿਤੇਸੁ ਹਸਿਤੁਪ੍ਪਾਦੇ ਚੇਵ ਵੋਟ੍ਠਬ੍ਬਨਚਿਤ੍ਤੇ ਚਾਤਿ ਤੇਰਸਸੁ ਚਿਤ੍ਤੇਸੁ ਪਞ੍ਚ ਇਨ੍ਦ੍ਰਿਯਾਨਿ ਬੁਧੋ ਭਗਵਾ ਉਦ੍ਧਰੇ ਉਦ੍ਧਰੇਯ੍ਯ.
੧੧੮. ਸਤ੍ਤ ਦ੍ਵਾਦਸਚਿਤ੍ਤੇਸੁ, ਇਨ੍ਦ੍ਰਿਯਾਨਿ ਜਿਨੋਬ੍ਰ੍ਵਿ ਜਿਨੋ ਬੁਦ੍ਧੋ ਞਾਣਵਿਪ੍ਪਯੁਤ੍ਤਮਹਾਕੁਸਲਮਹਾਵਿਪਾਕਮਹਾਕਿਰਿਯਾਸਙ੍ਖਾਤੇਸੁ ਦ੍ਵਾਦਸਚਿਤ੍ਤੇਸੁ ਸਤ੍ਤ ਇਨ੍ਦ੍ਰਿਯਾਨਿ ਅਬ੍ਰ੍ਵਿ ਕਥੇਸਿ, ਏਕੇਨੂਨੇਸੁ ਅਟ੍ਠੇਵ, ਚਤ੍ਤਾਲੀਸਮਨੇਸੁ ਚ ਜਿਨੋ ਞਾਣਸਮ੍ਪਯੁਤ੍ਤਮਹਾਕੁਸਲਮਹਾਵਿਪਾਕਮਹਾਕਿਰਿਯਾਸਙ੍ਖਾਤੇਸੁ ਦ੍ਵਾਦਸਸੁ ਚਿਤ੍ਤੇਸੁ, ਪਞ੍ਚਦਸਸੁ ਰੂਪੇਸੁ, ਦ੍ਵਾਦਸਸੁ ਅਰੂਪੇਸੁ ਚਾਤਿ ਏਕੇਨੂਨੇਸੁ ਚਤ੍ਤਾਲੀਸਮਨੇਸੁ ਅਟ੍ਠੇਵ ਇਨ੍ਦ੍ਰਿਯਾਨਿ ਅਬ੍ਰ੍ਵਿ.
੧੧੯. ਚਤ੍ਤਾਲੀਸਾਯ ਲੋਕੁਤ੍ਤਰਚਿਤ੍ਤੇਸੁ ਨਵਕਂ ਇਨ੍ਦ੍ਰਿਯਨਵਕਂ ਨਾਯਕੋ ਅਬ੍ਰ੍ਵਿ ਕਥੇਸਿ. ਏਵਂ ਇਨ੍ਦ੍ਰਿਯਯੋਗੋਪਿ, ਵੇਦਿਤਬ੍ਬੋ ਵਿਭਾਵਿਨਾ ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਚਿਤ੍ਤੇਸੁ ਇਨ੍ਦ੍ਰਿਯਯੋਗੋ ਵਿਭਾਵਿਨਾ ਵਿਸੇਸੇਨ ਪਞ੍ਞਂ ਭਾਵੇਤੁਂ ਪਕਾਸੇਤੁਂ ਸੀਲਮੇਤਸ੍ਸਾਤਿ ਵਿਭਾਵੀ, ਤੇਨ ਵੇਦਿਤਬ੍ਬੋ.
੧੨੦. ਅਮਗ੍ਗਙ੍ਗਾਨਿ ਨਾਮੇਤ੍ਥ, ਅਟ੍ਠਾਰਸ ਅਹੇਤੁਕਾ ਏਤ੍ਥ ਏਤੇਸੁ ਚਿਤ੍ਤੇਸੁ ਅਟ੍ਠਾਰਸ ਅਹੇਤੁਕਾ ਨਤ੍ਥਿ ਮਗ੍ਗੋ ਏਤੇਸੂਤਿ ਅਮਗ੍ਗਙ੍ਗਾਨਿ ਨਾਮ, ਝਾਨਙ੍ਗਾਨਿ ਨ ਵਿਜ੍ਜਨ੍ਤਿ, ਵਿਞ੍ਞਾਣੇਸੁ ਦ੍ਵਿਪਞ੍ਚਸੁ ਦ੍ਵਿਪਞ੍ਚਵਿਞ੍ਞਾਣੇਸੁ ਝਾਨਙ੍ਗਾਨਿਪਿ ਨ ਸਂਵਿਜ੍ਜਨ੍ਤਿ.
੧੨੧. ਏਕਂ ਚਿਤ੍ਤਂ ਦੁਮਗ੍ਗਙ੍ਗਂ ਏਕਂ ਵਿਚਿਕਿਚ੍ਛਾਸਹਗਤਚਿਤ੍ਤਂ ਦੁਮਗ੍ਗਙ੍ਗਂ ਦੁਮਗ੍ਗਾਵਯਵਂ, ਚਤੂਸੁ ਦਿਟ੍ਠਿਵਿਪ੍ਪਯੁਤ੍ਤਾਕੁਸਲਚਿਤ੍ਤੇਸੁ ਚ ਦ੍ਵੀਸੁ ਪਟਿਘਯੁਤ੍ਤੇਸੁ ਚ ਉਦ੍ਧਚ੍ਚਯੁਤ੍ਤੇਸੁ ਚਾਤਿ ਸਤ੍ਤਸੁ ਚਿਤ੍ਤੇਸੁ ਚ ਤਿਮਗ੍ਗਙ੍ਗਾਨਿ ਤਿਮਗ੍ਗਾਵਯਵਾਨਿ ਹੋਨ੍ਤਿ. ਚਤ੍ਤਾਲੀਸਾਯਚਿਤ੍ਤੇਸੁ, ਮਗ੍ਗੋ ਸੋ ਚਤੁਰਙ੍ਗਿਕੋ ਚਤੂਸੁ ਦਿਟ੍ਠਿਸਮ੍ਪਯੁਤ੍ਤਾਕੁਸਲੇਸੁ ਞਾਣਵਿਪ੍ਪਯੁਤ੍ਤਮਹਾਕੁਸਲਮਹਾਵਿਪਾਕਮਹਾਕਿਰਿਯਾਸਙ੍ਖਾਤੇਸੁ ਦ੍ਵਾਦਸਸੁ ਚਿਤ੍ਤੇਸੁ ਚ ਰੂਪਾਵਚਰਦੁਤਿਯਤਤਿਯਚਤੁਤ੍ਥਪਞ੍ਚਮਜ੍ਝਾਨਸਙ੍ਖਾਤੇਸੁ ਦ੍ਵਾਦਸਸੁ ਰੂਪਾਵਚਰੇਸੁ, ਦ੍ਵਾਦਸਸੁ ਅਰੂਪਾਵਚਰੇਸੁ ਚਾਤਿ ਚਤ੍ਤਾਲੀਸਾਯ ਚਿਤ੍ਤੇਸੁ ਚਤੁਰਙ੍ਗਿਕੋ ਮਗ੍ਗੋ ਚਤੁਰਾਵਯਵੋ ਮਗ੍ਗੋ ਹੋਤਿ.
੧੨੨. ਪਞ੍ਚਦ੍ਦਸਸੁ ਚਿਤ੍ਤੇਸੁ, ਮਗ੍ਗੋ ਪਞ੍ਚਙ੍ਗਿਕੋ ਮਤੋ ਞਾਣਸਮ੍ਪਯੁਤ੍ਤਮਹਾਕੁਸਲਮਹਾਵਿਪਾਕਮਹਾਕਿਰਿਯਾਸਙ੍ਖਾਤੇਸੁ ਦ੍ਵਾਦਸਸੁ, ਤੀਸੁ ਰੂਪਪਠਮਜ੍ਝਾਨਚਿਤ੍ਤੇਸੁ ਚਾਤਿ ਪਞ੍ਚਦ੍ਦਸਸੁ ਚਿਤ੍ਤੇਸੁ ਪਞ੍ਚਙ੍ਗਿਕੋ ਪਞ੍ਚਾਵਯਵੋ ਮਗ੍ਗੋ ਭਗਵਤਾ ਮਤੋ. ਦ੍ਵਤ੍ਤਿਂਸਚਿਤ੍ਤੇਸੁ ਮਗ੍ਗੋ ਸਤ੍ਤਙ੍ਗਿਕੋਪਿ ਚ ਲੋਕੁਤ੍ਤਰਦੁਤਿਯਤਤਿਯਚਤੁਤ੍ਥਪਞ੍ਚਮਜ੍ਝਾਨਸਙ੍ਖਾਤੇਸੁ ਦ੍ਵਤ੍ਤਿਂਸਚਿਤ੍ਤੇਸੁ ਮਗ੍ਗੋ ਸਤ੍ਤਙ੍ਗਿਕੋ ਸਤ੍ਤਾਵਯਵੋ ਹੋਤਿ.
੧੨੩. ਮਗ੍ਗੋ ਅਟ੍ਠਸੁ ਚਿਤ੍ਤੇਸੁ ਮਗ੍ਗਫਲਵਸੇਨ ਅਟ੍ਠਸੁ ਲੋਕੁਤ੍ਤਰਚਿਤ੍ਤੇਸੁ ਮਗ੍ਗੋ ਅਟ੍ਠਙ੍ਗਿਕੋ ਅਟ੍ਠਾਵਯਵੋ ਹੋਤਿ. ਇਤਿ ਪਰਿਸਮਾਪਨੇ. ਤੁ ਪਦਪੂਰਣੇ. ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਸਬ੍ਬਚਿਤ੍ਤੇਸੁ ਮਗ੍ਗਙ੍ਗਾਨਿ ਮਗ੍ਗਾਵਯਵਾਨਿ ਧੀਰੋ ਉਦ੍ਧਰੇਯ੍ਯ, ਦੇਸੇਯ੍ਯਾਤਿ ਅਤ੍ਥੋ.
੧੨੪. ਬਲਾਨਿ ਦ੍ਵੇ ਦ੍ਵਿਚਿਤ੍ਤੇਸੁ ਹਸਿਤੁਪ੍ਪਾਦਵੋਟ੍ਠਬ੍ਬਨਸਙ੍ਖਾਤੇਸੁ ਦ੍ਵੀਸੁ ਚਿਤ੍ਤੇਸੁ ਦ੍ਵੇ ਬਲਾਨਿ ਹੋਨ੍ਤਿ. ਏਕਸ੍ਮਿਂ ਤੀਣਿ ਦੀਪਯੇ ਏਕਸ੍ਮਿਂ ਵਿਚਿਕਿਚ੍ਛਾਯੁਤ੍ਤੇ ਤੀਣਿ ਬਲਾਨਿ ਧੀਰੋ ਦੀਪਯੇ ਪਕਾਸੇਯ੍ਯ. ਵਿਚਿਕਿਚ੍ਛਾਯੁਤ੍ਤਤੋ ਸੇਸੇਸੁ ਏਕਾਦਸਸੁ ਅਕੁਸਲੇਸੁ ਚਤ੍ਤਾਰਿ ਬਲਾਨਿ ਹੋਨ੍ਤਿ. ਛ ਦ੍ਵਾਦਸਸੁ ਞਾਣਵਿਪ੍ਪਯੁਤ੍ਤਮਹਾਕੁਸਲਮਹਾਵਿਪਾਕਮਹਾਕਿਰਿਯਾਸਙ੍ਖਾਤੇਸੁ ਦ੍ਵਾਦਸਸੁ ਚਿਤ੍ਤੇਸੁ ਛ ਬਲਾਨਿ ਹੋਨ੍ਤੀਤਿ ਧੀਰੋ ਨਿਦ੍ਦਿਸੇ ਕਥੇਯ੍ਯ.
੧੨੫. ਏਕੂਨਾਸੀਤਿਯਾ ਸਤ੍ਤ ਞਾਣਸਮ੍ਪਯੁਤ੍ਤਮਹਾਕੁਸਲਮਹਾਵਿਪਾਕਮਹਾਕਿਰਿਯਾਸਙ੍ਖਾਤੇਸੁ ਦ੍ਵਾਦਸਸੁ ਕਾਮਾਵਚਰਚਿਤ੍ਤੇਸੁ, ਸਤ੍ਤਵੀਸਤਿਯਾ ਮਹਗ੍ਗਤਚਿਤ੍ਤੇਸੁ, ਚਤ੍ਤਾਲੀਸਲੋਕੁਤ੍ਤਰਚਿਤ੍ਤੇਸੁ ਚਾਤਿ ਏਕੂਨਾਸੀਤਿਯਾ ਚਿਤ੍ਤੇਸੁ ਸਤ੍ਤ ਬਲਾਨਿ ਹੋਨ੍ਤਿ. ਸੋਲ਼ਸੇਵਾਬਲਾਨਿ ਤੁ ਦ੍ਵਿਪਞ੍ਚਵਿਞ੍ਞਾਣਾਨਿ ਚ ਤਿਸ੍ਸੋ ਮਨੋਧਾਤੁਯੋ ਚ ਤੀਣਿ ਸਨ੍ਤੀਰਣਾਨਿ ਚਾਤਿ ਸੋਲ਼ਸ ਏਵ ਚਿਤ੍ਤਾਨਿ ਅਬਲਾਨਿ ਬਲਵਿਰਹਿਤਾਨਿ ਹੋਨ੍ਤਿ, ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਚਿਤ੍ਤਂ ਸਬਲਂ ਬਲੇਨ ਸਹਗਤਂ ਅਬਲਮ੍ਪਿ ਚ ਬਲਵਿਰਹਿਤਞ੍ਚਾਪਿ ਚਿਤ੍ਤਂ ਵਿਞ੍ਞੇਯ੍ਯਂ ਧੀਰੇਨ ਵਿਜਾਨਿਤਬ੍ਬਂ.
੧੨੬. ਝਾਨਙ੍ਗਮਗ੍ਗਙ੍ਗਬਲਿਨ੍ਦ੍ਰਿਯਾਨਿ, ਚਿਤ੍ਤੇਸੁ ਜਾਯਨ੍ਤਿ ਹਿ ਯੇਸੁ ਯਾਨਿ ਯੇਸੁ ਚਿਤ੍ਤੇਸੁ ਯਾਨਿ ਝਾਨਙ੍ਗਮਗ੍ਗਙ੍ਗਬਲਇਨ੍ਦ੍ਰਿਯਾਨਿ ਜਾਯਨ੍ਤਿ, ਮਯਾ ਸਮਾਸੇਨ ਸਮੁਦ੍ਧਰਿਤ੍ਵਾ ਅਸਂਸਟ੍ਠਂ ਉਦ੍ਧਰਿਤ੍ਵਾ ਤੇਸੁ ਚਿਤ੍ਤੇਸੁ ਸਬ੍ਬਾਨਿਪਿ ਤਾਨਿ ਝਾਨਙ੍ਗਮਗ੍ਗਙ੍ਗਬਲਇਨ੍ਦ੍ਰਿਯਾਨਿ ਸਮਾਸੇਨ ਸਙ੍ਖੇਪੇਨ ਮਯਾ ਬੁਦ੍ਧਦਤ੍ਤਾਚਰਿਯੇਨ ਵੁਤ੍ਤਾਨਿ ਕਥਿਤਾਨਿ.
ਇਤਿ ਅਭਿਧਮ੍ਮਾਵਤਾਰਟੀਕਾਯ
ਚੇਤਸਿਕਵਿਭਾਗਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
ਤਤਿਯੋ ਪਰਿਚ੍ਛੇਦੋ.