੧੦. ਦਸਮੋ ਪਰਿਚ੍ਛੇਦੋ
ਰੂਪਵਿਭਾਗਵਣ੍ਣਨਾ
੬੨੨. ਵੁਤ੍ਤਮਾਦਿਮ੍ਹਿ ਯਂ ਰੂਪਂ, ਚਿਤ੍ਤਜਾਨਮਨਨ੍ਤਰਂ ਯਂ ਰੂਪਂ ਚਿਤ੍ਤਚੇਤਸਿਕਾਨਂ ਅਨਨ੍ਤਰਂ ਆਦਿਮ੍ਹਿ ਪਕਰਣਾਦਿਮ੍ਹਿ ‘‘ਚਿਤ੍ਤਂ ਚੇਤਸਿਕਂ ਰੂਪ’’ਨ੍ਤਿਆਦਿਨਾ ਵਚਨੇਨ ਆਚਰਿਯੇਨ ਵੁਤ੍ਤਂ, ਇਤੋ ਪਰਂ ਇਦਾਨਿ ਤਸ੍ਸ ਰੂਪਸ੍ਸ ਵਿਭਾਵਨਂ ਸਮਾਸੇਨ ਸਙ੍ਖੇਪੇਨ ਕਰਿਸ੍ਸਂ.
੬੨੩. ਯਂ ਰੁਪ੍ਪਤੀਤਿ ਰੂਪਨ੍ਤਿ ਯਂ ਧਮ੍ਮਜਾਤਂ ਰੁਪ੍ਪਤਿ ਸੀਤਾਦਿਨਾ ਵਿਰੁਦ੍ਧਪਚ੍ਚਯੇਨ ਵਿਕਾਰਮਾਪਜ੍ਜਤਿ. ਤਥਾ ਰੂਪਯਤੀਤਿ ਰੂਪਂ ਯਂ ਧਮ੍ਮਜਾਤਂ ਵਣ੍ਣਵਿਕਾਰਮਾਪਜ੍ਜਮਾਨਂ ਹਦਯਙ੍ਗਤਭਾਵਂ ਅਜ੍ਝਾਸਯਂ ਪਕਾਸੇਤਿ, ਇਤਿ ਤਸ੍ਮਾ ਰੂਪਂ, ਕਿਂ ਤਂ? ਵਣ੍ਣਾਯਤਨਂ. ਰੂਪਾਰੂਪਭਵਾਤੀਤੋ, ਸੁਰੂਪੋ ਰੂਪਮਬ੍ਰ੍ਵਿ ਭਗਵਾ ਰੂਪਾਰੂਪਭਵਅਤੀਤੋ ਸੁਰੂਪੋ ਰੂਪਂ ਅਬ੍ਰ੍ਵਿ ਕਥੇਸਿ.
੬੨੫-੬. ਮਹਾਭੂਤੇਨਾਤਿ ਮਹਨ੍ਤੋ ਭੂਤੋ ਉਪ੍ਪਤ੍ਤਿ ਏਤਸ੍ਸਾਤਿ ਮਹਾਭੂਤੋ, ਤੇਨ. ਵਞ੍ਚਕਤ੍ਤਾ ਮਹਾਭੂਤਸਮਾਤਿ ਵਾ.
੬੩੦. ਨਿਰੁਪਾਦਾਨਮਾਨਸੋਤਿ ਉਪਾਦਾਨਵਿਰਹਿਤਚਿਤ੍ਤੋ.
੬੩੩. ਤਸ੍ਸ ਸਮ੍ਪਤ੍ਤੀਤਿ ਤਸ੍ਸ ਕਿਚ੍ਚਸ੍ਸ ਸਮ੍ਪਤ੍ਤਿ.
੬੩੪. ਉਪਬ੍ਰੂਹਨਰਸਾਤਿ ਵਡ੍ਢਨਕਿਚ੍ਚਾ.
੬੩੭. ਆਸਯਾਨੁਸਯੇ ਞਾਣਨ੍ਤਿ ਏਤ੍ਥ ਆਸਯੋ ਨਾਮ
ਸਸ੍ਸਤੁਚ੍ਛੇਦਦਿਟ੍ਠੀ ਚ, ਖਨ੍ਤੀ ਸਚ੍ਚਾਨੁਲੋਮਿਕਂ;
ਯਥਾਭੂਤਞ੍ਚ ਯਂ ਞਾਣਂ, ਏਤਂ ਆਸਯਸਦ੍ਦਿਤਂ.
ਅਤ੍ਥੀਤਿ ਖੋ, ਕਚ੍ਚਾਨ, ਅਯਮੇਕੋ ਅਨ੍ਤੋ, ਅਨ੍ਤੋ ਖੋ, ਕਚ੍ਚਾਨ, ਅਤ੍ਥਿ ਇਤਿ ਅਯਂ ਏਕੋ ਅਨ੍ਤੋ ਕੋਟ੍ਠਾਸੋ, ਅਯਂ ਸਸ੍ਸਤਦਿਟ੍ਠਿ. ਨਤ੍ਥੀਤਿ ਖੋ, ਕਚ੍ਚਾਨ, ਅਯਂ ਦੁਤਿਯੋ ਅਨ੍ਤੋ, ਅਯਂ ਉਚ੍ਛੇਦਦਿਟ੍ਠਿ. ਖਨ੍ਤੀ ਸਚ੍ਚਾਨੁਲੋਮਿਕਨ੍ਤਿ ਚਤੁਨ੍ਨਂ ਸਚ੍ਚਾਨਂ ਅਨੁਲੋਮਿਕਞਾਣਂ, ਸਙ੍ਖਾਰੁਪੇਕ੍ਖਾਞਾਣਨ੍ਤਿ ਅਤ੍ਥੋ. ਯਥਾਭੂਤਞ੍ਚ ਯਂ ਞਾਣਨ੍ਤਿ ਸਪ੍ਪਚ੍ਚਯਨਾਮਰੂਪਦਸ੍ਸਨਂ ਞਾਣਂ. ਏਤਂਆਸਯਸਦ੍ਦਿਤਨ੍ਤਿ ਏਤਂ ਆਸਯਂ ਇਤਿ ਕਥਿਤਂ. ਏਵਂ ਵੁਤ੍ਤਪ੍ਪਕਾਰੇਨ ਆਸਯੇ ਞਾਣਂ ਨਾਮ. ਅਨੁਸਯੋ ਨਾਮ ਦਿਟ੍ਠਾਨੁਸਯਾਦਯੋ ਅਨੁਸਯਾ ਸਤ੍ਤ. ਇਨ੍ਦ੍ਰਿਯਾਨਂ ਪਰੋਪਰੇਤਿ ਪਰੇ ਅਧਿਕਭਾਵੇਨ ਓਪਰੇ ਚ ਤਿਕ੍ਖਾਨੁਭਾਵੇਨ ਅਯਂ ਸਤ੍ਤੋ ਤਿਕ੍ਖਸਦ੍ਧਿਨ੍ਦ੍ਰਿਯੋ ਮੁਦੁਸਦ੍ਧਿਨ੍ਦ੍ਰਿਯੋ ਹੀਨਸਦ੍ਧਿਨ੍ਦ੍ਰਿਯੋਤਿ ਅਤ੍ਥੋ. ਸਮਾਧਿਨ੍ਦ੍ਰਿਯਾਦੀਸੁਪਿ ਏਸੇਵ ਨਯੋ. ਇਤਿ ਸਤ੍ਤਾਨਂ ਇਨ੍ਦ੍ਰਿਯਾਨਂ ਪਰਓਪਰੇ ਞਾਣਂ.
੬੩੮. ਸਬ੍ਬਞ੍ਞੁਤਾ ਞਾਣਨ੍ਤਿ ਤਿਹੇਤੁਕਕਾਮਾਵਚਰਕ੍ਰਿਯਾਚਤੁਕ੍ਕਂ ਗਹੇਤਬ੍ਬਂ.
੬੪੧. ਅਕ੍ਖਿਕੂਟੇਹਿ ਮਤ੍ਥਲੁਙ੍ਗੇਨ ਪਰਿਚ੍ਛਿਨ੍ਨੋ ਅਨ੍ਤਤੋ.
੬੪੫. ਭਾਵਸਮ੍ਭਵਸਣ੍ਠਾਨਾਤਿ ਇਤ੍ਥਿਪੁਮਸਮ੍ਭਵਭੂਤਵਣ੍ਣਾਯਤਨਂ.
੬੪੭. ਏਤੇ ਦਸ ਚਤੁਸਮੁਟ੍ਠਾਨਾ ਸਮ੍ਭਾਰਾ ਚਤੂਹਿ ਪਚ੍ਚਯੇਹਿ ਚਤ੍ਤਾਲੀਸ ਭਵਨ੍ਤਿ.
੬੫੨. ਨਿਵਿਟ੍ਠੇਤਿ ਪਤਿਟ੍ਠਿਤੇ.
੬੫੮. ਉਬ੍ਬਿਅਧਿਕਾਨਂ ਪਥਵੀਅਧਿਕਾਨਂ.
੬੬੦-੨. ਵਿਸੇਸੇ ਸਤੀਤਿ ਨਿਸ੍ਸਯਭੂਤਾਨਂ ਚਤੁਨ੍ਨਂ ਵਿਸੇਸੇ ਸਤਿ, ਸਬ੍ਬਸੋ ਸਬ੍ਬੇਸਂ ਵਿਸੇਸਪਰਿਕਪ੍ਪਨਂ ਪਹਾਯ ਏਵ ਕਮ੍ਮਵਿਸੇਸੇਨ ਪਸਾਦਾਨਂ ਵਿਸੇਸਤਾ ਞੇਯ੍ਯਾ.
੬੬੩. ਸਦ੍ਦੀਯਤੀਤਿ ਉਚ੍ਚਾਰੀਯਤੇ. ਰਸਨ੍ਤੀਤਿ ਅਸ੍ਸਾਦੇਨ੍ਤਿ.
੬੬੮. ਪਰਤੋਤਿ ਪਠਮਕਪ੍ਪਤੋ ਅਪਰਭਾਗੇ ਪਟਿਸਨ੍ਧਿਯਂ ਭਾਵਦ੍ਵਯਂ ਸਮੁਟ੍ਠਾਤੀਤਿ ਵਿਞ੍ਞੇਯ੍ਯਂ. ‘‘ਪਵਤ੍ਤੇਪਿ ਸਮੁਟ੍ਠਾਯਾ’’ਤਿਆਦਿਕਂ ਸੋਣਕੁਮਾਰਾਦਯੋ ਸਨ੍ਧਾਯ ਵੁਤ੍ਤਂ.
੬੭੨. ਨ ਤਂ ਬ੍ਯਞ੍ਜਨਕਾਰਣਨ੍ਤਿ ਤਂ ਇਨ੍ਦ੍ਰਿਯਦ੍ਵਯਂ ਬ੍ਯਞ੍ਜਨਸ੍ਸ ਕਾਰਣਂ ਨ ਸਿਯਾ. ਤਸ੍ਸਾਤਿ ਬ੍ਯਞ੍ਜਨਸ੍ਸ.
੬੭੪. ਉਬ੍ਬਾਹਨਨ੍ਤਿ ਨੀਹਰਣਂ.
੬੭੬-੭. ਅਨ੍ਨਪਾਨਾਦਿਕਂ ਵਤ੍ਥੁ ਯਂ ਕਮ੍ਮਜਂ ਅਗ੍ਗਿਂ ਹਰਤਿ, ਕੇਵਲਂ ਏਕਂ ਹੁਤ੍ਵਾ ਤਂ ਅਨ੍ਨਪਾਨਾਦਿਕਂ ਵਤ੍ਥੁ ਜੀਵਿਤਂ ਪਨ ਪਾਲੇਤੁਂ ਨ ਚ ਸਕ੍ਕੋਤਿ. ਏਕਤੋ ਜੀਵਿਤਂ ਪਾਲੇਤੁਞ੍ਚ ਸਕ੍ਕੋਨ੍ਤਿ.
ਕਾਯੇਨ ਰੂਪਕਾਯੇਨ ਅਤ੍ਤਨੋ ਭਾਵਂ ਵਿਞ੍ਞਾਪੇਨ੍ਤਾਨਂ ਭਾਵੋ ਕਾਯਗ੍ਗਹਣਾਨੁਸਾਰੇਨ ਕਾਯਗ੍ਗਹਣਸ੍ਸ ਅਨੁਚਿਨ੍ਤਨੇਨ ਗਹਿਤਾਯ ਵਾਯੋਧਾਤੁਵਿਕਾਰਸਙ੍ਖਾਤਾਯ ਏਤਾਯ ਧਮ੍ਮਜਾਤਿਯਾ ਪਣ੍ਡਿਤੇਹਿ ਵਿਞ੍ਞਾਯਤੇ. ਇਤਿਪਿ ਤਸ੍ਮਾ ਕਾਯਵਿਞ੍ਞਤ੍ਤਿ.
੬੮੧. ਏਕਾਵਜ੍ਜਨਵੀਥਿਯਂ ਹੇਟ੍ਠਾ ਛਹਿ ਚਿਤ੍ਤੇਹਿ ਵਾਯੋਧਾਤੁਸਮੁਟ੍ਠਿਤਂ ਉਪਤ੍ਥਮ੍ਭਂ ਲਭਿਤ੍ਵਾ.
੬੮੪. ਸਹ ਸਦ੍ਦੇਨ ਵਾਤਿ ਸਦ੍ਦੇਨ ਸਹੇਵ.
੬੯੦-੧. ਏਤਾਸਂ ਪਨ ਲਹੁਤਾਦੀਨਂ ਤਿਸ੍ਸਨ੍ਨਂ ਪਵਤ੍ਤਿਯਂ ਨਿਦਸ੍ਸਨਂ ਕਮਤੋ ਆਰੋਗ੍ਯਂ ਲਹੁਤਾ, ਮਦ੍ਦਿਤਂ ਧਮ੍ਮਂ ਮੁਦੁਤਾ, ਧਨ੍ਤਹੇਮਂ ਕਮ੍ਮਞ੍ਞਤਾ ਹੋਤਿ. ਲਹੁਤਾਦਿਤ੍ਤਯਂ ਪਨ ਕਮ੍ਮਂ ਕਾਤੁਂ ਨ ਸਕ੍ਕੋਤਿ, ਆਹਾਰਾਦਿਤ੍ਤਯਂਯੇਵ ਲਹੁਤਾਦਿਤ੍ਤਯਂ ਕਰੋਤਿ ਯਸ੍ਮਾ, ਤਤੋ ਤਂ ਤਿਜਂ ਨਾਮ.
੬੯੩. ਵੁਤ੍ਤਮਾਕਾਰਨਾਨਤ੍ਤਾਤਿ ਏਤ੍ਥ ਆਕਾਰਨਾਨਤ੍ਤਾ ਨਾਮ ਆਚਯਾਕਾਰਅਨੁਬਨ੍ਧਤਾਕਾਰਵਸੇਨ ਵੁਤ੍ਤਂ. ਵੇਨੇਯ੍ਯਾਨਂ ਵਸੇਨ ਵਾਤਿ ਏਕੇ ਵੇਨੇਯ੍ਯਾ ਆਚਯਵਸੇਨ ਜਾਤਿਰੂਪਂ ਜਾਨਨ੍ਤਿ, ਏਕੇ ਅਨੁਬਨ੍ਧਤਾਵਸੇਨ ਜਾਨਨ੍ਤਿ. ਇਤਿ ਵੇਨੇਯ੍ਯਾਨਂ ਜਾਨਨਵਸੇਨ ਜਾਤਿਰੂਪਂ ਦ੍ਵਿਧਾ ਵੁਤ੍ਤਂ.
੬੯੪. ਸਭਾਵਾਨਪਗਮੇ ਅਤ੍ਤਨੋ ਸਭਾਵਸ੍ਸ ਅਨਪਗਮੇ ਸਤਿ.
ਤੇ ਮਿਦ੍ਧਰੂਪਵਾਦਾਚਰਿਯਾ ਪਟਿਕ੍ਖਿਪਿਤਬ੍ਬਾ. ਕਥਂ? ਅਦ੍ਧਾ ਮੁਨਿਸਿ ਸਮ੍ਬੁਦ੍ਧੋ, ਨਤ੍ਥਿ ਨੀਵਰਣਾ ਤਵਾਤਿ ਯੋ ਤ੍ਵਂ ਅਦ੍ਧਾ ਏਕਨ੍ਤੇਨ ਮੁਨਿ ਅਸਿ ਸਮ੍ਬੁਦ੍ਧੋ ਅਸਿ ਨੀਵਰਣਾ ਧਮ੍ਮਾ ਤਵ ਤੁਯ੍ਹਂ ਨਤ੍ਥਿ, ਇਤਿ ਵਚਨੇ ਸਚੇ ਮਿਦ੍ਧਂ ਨੀਵਰਣਂ ਰੂਪੇ ਪਵਿਟ੍ਠਂ ਸਿਯਾ. ਭਗਵਤਾ ਰੂਪਕਾਯਸ੍ਸ ਵਿਜ੍ਜਮਾਨਤ੍ਤਾ ‘‘ਨਤ੍ਥਿ ਨੀਵਰਣਾ ਤਵਾ’’ਤਿ ਵਚਨਂ ਵਤ੍ਤਬ੍ਬਂ ਸਿਯਾ. ਥਿਨਮਿਦ੍ਧਨੀਵਰਣਂ ਅਵਿਜ੍ਜਾਨੀਵਰਣੇਨ ਸਹ ਨੀਵਰਣਞ੍ਚੇਵ ਹੋਤਿ, ਨੀਵਰਣਸਮ੍ਪਯੁਤ੍ਤਞ੍ਚ ਹੋਤਿ. ਇਤਿ ਸਮ੍ਪਯੁਤ੍ਤਵਚਨਤੋ ਸਮ੍ਪਯੁਤ੍ਤਸ੍ਸ ਰੂਪਸ੍ਸ ਅਭਾਵਤੋ ਤਮ੍ਪਿ ਨ ਵਤ੍ਤਬ੍ਬਂ ਸਿਯਾ. ਨ ਪੁਰੇਜਾਤਪਚ੍ਚਯਾਤਿ ਅਞ੍ਞਮਞ੍ਞਪਚ੍ਚਯਾਤਿ ਅਤ੍ਥੋ. ਸਚੇ ਥਿਨਮਿਦ੍ਧਂ ਰੂਪਂ ਸਿਯਾ, ਕਥਂ ਅਰੂਪੇਪਿ ਅਞ੍ਞਮਞ੍ਞਂ ਸਿਯਾ, ਨ ਸਿਯਾਤਿ ਅਤ੍ਥੋ. ਅਰੂਪੇਪਿ ਕਾਮਚ੍ਛਨ੍ਦਨੀਵਰਣਂ ਪਟਿਚ੍ਚ ਥਿਨਮਿਦ੍ਧਨੀਵਰਣਂ ਉਪ੍ਪਜ੍ਜਤਿ. ਇਤਿ ਵਚਨੇਨ ਚ ਨ ਮਿਦ੍ਧਰੂਪਂ ਸਿਯਾ, ਅਰੂਪੇ ਕਥਂ ਸਿਯਾਤਿ ਅਤ੍ਥੋ. ਅਰੂਪਮੇਵ ਮਿਦ੍ਧਂ ਇਤਿ ਪਟਿਕ੍ਖਿਪਿਤਬ੍ਬਾ. ਅਰੂਪੇਪਿ ਏਤਸ੍ਸ ਮਿਦ੍ਧਸ੍ਸ ਉਪ੍ਪਤ੍ਤਿਯਾ ਸਾਧਕਵਚਨਤੋ ਨਿਟ੍ਠਂ ਏਤ੍ਥ ਚ ਅਵਗਨ੍ਤਬ੍ਬਂ ‘‘ਅਰੂਪ’’ਨ੍ਤਿ ਵਿਞ੍ਞੁਨਾ.
੭੦੫-੬. ਕਮ੍ਮੇਨ ਵੀਸਤਿ ਰੂਪਾਤਿ ਅਟ੍ਠਿਨ੍ਦ੍ਰਿਯਵਤ੍ਥੁਅਟ੍ਠਾਵਿਨਿਬ੍ਭੋਗਸਨ੍ਤਤੂਪਚਯਾਕਾਸਾ ਕਮ੍ਮਜਾ. ਚੇਤਸਾ ਵਿਞ੍ਞਤ੍ਤਿਦ੍ਵਯਸਦ੍ਦਲਹੁਤਾਦਿਤ੍ਤਯਅਵਿਨਿਬ੍ਭੋਗਸਨ੍ਤਤੂਪਚਯਾਕਾਸਾ ਚਿਤ੍ਤਜਾ. ਉਤੁਨਾ ਸਦ੍ਦਲਹੁਤਾਦਿਤ੍ਤਯਅਵਿਨਿਬ੍ਭੋਗਸਨ੍ਤਤੂਪਚਯਾਕਾਸਾ ਉਤੁਜਾ. ਆਹਾਰਤੋ ਲਹੁਤਾਦਿਤ੍ਤਯਅਵਿਨਿਬ੍ਭੋਗਸਨ੍ਤਤੂਪਚਯਾਕਾਸਾ ਆਹਾਰਜਾ.
੭੦੭-੧੭. ਜਾਯੇਯ੍ਯੁਂ ਯਦਿ ਤਾਨਿਪੀਤਿ ਤਾਨਿ ਜਰਤਾਅਨਿਚ੍ਚਤਾਰੂਪਾ ਯਦਿ ਜਾਯੇਯ੍ਯੁਂ, ਏਵਂ ਸਨ੍ਤੇ ਤੁ ਤੇਸਂ ਜਰਤਾਅਨਿਚ੍ਚਤਾ ਭੇਦਾ ਸਿਯੁਂ. ਹਿ ਸਚ੍ਚਂ ਵਚਨਂ ਪਾਕੋ ਨ ਪਚ੍ਚਤਿ, ਭੇਦੋ ਵਾ ਨ ਚ ਭਿਜ੍ਜਤਿ ਯਸ੍ਮਾ, ਤਸ੍ਮਾ ਤੇਸਂ ਪਾਕਭੇਦਾ ਸਿਯੁਨ੍ਤਿ, ਤਂ ਵਚਨਂ ਨਤ੍ਥਿ. ਏਤਂ ਜਰਤਾਅਨਿਚ੍ਚਤਾਦ੍ਵਯਂ ਜਾਤਸ੍ਸ ਨਿਪ੍ਫਨ੍ਨਰੂਪਸ੍ਸ ਪਾਕਭੇਦਤ੍ਤਾ ਨ ਜਾਯਤਿ. ਸਿਯਾ ਕਸ੍ਸਚਿ ਬੁਦ੍ਧੇਤ੍ਥਾਤਿ ਏਤ੍ਥ ਜਰਤਾਅਨਿਚ੍ਚਤਾਵਿਨਿਚ੍ਛਯਾਧਿਕਾਰੇ ਕਸ੍ਸਚਿ ਜਨਸ੍ਸ ਬੁਦ੍ਧਿ ਞਾਣਂ ਯਦਿ ਸਿਯਾ, ‘‘ਰੂਪਸ੍ਸੂਪਚਯੋ’’ਤਿ ਵਚਨੇਨ ‘‘ਜਾਤਿ ਜਾਯਤੀ’’ਤਿ ਵਚਨਂ ਦੀਪਿਤਂ ਯਥਾ, ਏਵਂ ਤਥਾ ਪਾਕੋਪਿ ਪਚ੍ਚਤੁ, ਭੇਦੋਪਿ ਪਰਿਭਿਜ੍ਜਤੁ, ਏਵਂ ਬੁਦ੍ਧਿ ਸਿਯਾ. ਜਾਤਿ ਨ ਚੇਵ ਜਾਯਤੇ. ਇਤਿ ਇਮਿਨਾ ਪਕਾਰੇਨ ਵਿਭਾਵਿਨਾ ਞੇਯ੍ਯਾ. ਜਾਤਿ ਜਾਯਮਾਨਸ੍ਸ ਨਿਪ੍ਫਨ੍ਨਰੂਪਸ੍ਸ ਨਿਬ੍ਬਤ੍ਤਿ ਨਾਮ ਪਕਾਸਿਤਾ. ਤਤ੍ਥ ਯਸ੍ਸ ਸਿਯਾ ਤਤ੍ਥ ਵਚਨੇ ਯਸ੍ਸ ਜਨਸ੍ਸ ਬੁਦ੍ਧਿ ਸਿਯਾ. ਯੇਸਂ ਨਿਪ੍ਫਨ੍ਨਰੂਪਧਮ੍ਮਾਨਂ ਜਾਤਿ ਅਤ੍ਥਿ, ਸਾ ਜਾਤਿ ਅਭਿਨਿਬ੍ਬਤ੍ਤਿਸਮ੍ਮੁਤਿਂ ਤਪ੍ਪਚ੍ਚਯਤ੍ਤਵੋਹਾਰਂ ਤੇਸਂ ਨਿਪ੍ਫਨ੍ਨਰੂਪਧਮ੍ਮਾਨਂ ਪਚ੍ਚਯਟ੍ਠੇਨ ਲਦ੍ਧਵੋਹਾਰਂ ਕਮ੍ਮਜਾਦਿਕਂ ਵੋਹਾਰਂ ਲਭਤੇਵ ਯਥਾ, ਤਥਾ ਤੇਸਂ ਨਿਪ੍ਫਨ੍ਨਰੂਪਧਮ੍ਮਾਨਂ ਤੇ ਪਾਕਭੇਦਾ ਅਭਿਨਿਬ੍ਬਤ੍ਤਿਸਮ੍ਮੁਤਿਂ ਨਾਮ ਤਪ੍ਪਚ੍ਚਯਤ੍ਤਵੋਹਾਰਂ ਲਭਨ੍ਤਿ, ਇਤਿ ਬੁਦ੍ਧਿ ਸਿਯਾ. ਤਸ੍ਸ ਜਨਸ੍ਸ ਏਵਂ ਵਤ੍ਤਬ੍ਬਂ – ਇਦਂ ਸਨ੍ਤਤੂਪਚਯਦ੍ਵਯਂ ਕਮ੍ਮਾਦਿਸਮ੍ਭਵਂ ਹੋਤਿ ਯਥਾ, ਏਵਂ ਪਾਕਭੇਦਾ ਤਂ ਕਮ੍ਮਾਦਿਸਮ੍ਭਵਵੋਹਾਰਂ ਕਦਾਚਿਪਿ ਨ ਲਭਨ੍ਤਿ. ਹਿ ਸਚ੍ਚਂ ਵਚਨਂ ਕਸ੍ਮਾ ਕਾਰਣਾ ਜਨਕਾਨਂ ਕਮ੍ਮਾਦਿਪਚ੍ਚਯਾਨਂ ਆਨੁਭਾਵਸਙ੍ਖਾਤੇ ਖਣੁਪ੍ਪਾਦੇ ਤੇਸਂ ਪਾਕਭੇਦਾਨਂ ਅਭਾਵਤੋ ਨ ਲਭਨ੍ਤਿ. ਵੁਤ੍ਤਪ੍ਪਕਾਰੇਨ ਖਣੁਪ੍ਪਾਦੇ ਜਾਤਿਪਰਮ੍ਪਰਾਭਾਵਤੋ ਸਾ ਜਾਤਿ ਲਬ੍ਭਤੇ, ਤਸ੍ਮਾ ਕਾਰਣਾ ਜਾਤਿ ਏਵ ਅਭਿਨਿਬ੍ਬਤ੍ਤਿਸਮ੍ਮੁਤਿਂ ਪਚ੍ਚਯਤ੍ਤਵੋਹਾਰਂ ਲਭਤਿ, ਇਤਰਂ ਜਰਤਾਅਨਿਚ੍ਚਤਾਦ੍ਵਯਂ ਪਨ ਨ ਲਭਤਿ. ਤਂ ਜਰਤਾਅਨਿਚ੍ਚਤਾਦ੍ਵਯਂ ਜਿਯ੍ਯਤਿ ਇਤਿ ਭਿਜ੍ਜਤਿ ਇਤਿ ਵਾ ਨ ਵਤ੍ਤਬ੍ਬਂ ਹੋਤਿ. ਕਸ੍ਮਾ? ਕਮ੍ਮਾਦਿਪਚ੍ਚਯਾਨਂ ਆਨੁਭਾਵਕ੍ਖਣੇ ਤਸ੍ਸ ਜਰਤਾਅਨਿਚ੍ਚਤਾਦ੍ਵਯਸ੍ਸ ਪਚ੍ਚਯਾਨਂ ਅਭਾਵਤੋ.
੭੧੮-੨੩. ਅਨਿਚ੍ਚਂ ਸਙ੍ਖਤਞ੍ਚੇਤਂ ਜਰਾਮਰਣਂ ਅਨਿਚ੍ਚਸਙ੍ਖਾਤਂ ਇਤਿਪਿ ਵਚਨਸ੍ਸ ਭਗਵਤਾ ਵੁਤ੍ਤਤ੍ਤਾ ਜਰਤਾਅਨਿਚ੍ਚਤਾਦ੍ਵਯਂ ਜਾਯਤਿ, ਏਵਂ ਇਤਿ ਤ੍ਵਂ ਚੇ ਮਞ੍ਞਸਿ, ਏਵਂ ‘‘ਜਾਯਤਿ ਏਵਾ’’ਤਿ ਵਚਨਂ ਭਗਵਤਾ ਨ ਵਤ੍ਤਬ੍ਬਂ. ਹਿ ਕਸ੍ਮਾ ਕਾਰਣਾ? ‘‘ਅਨਿਚ੍ਚਂ ਸਙ੍ਖਤਞ੍ਚੇਤਂ, ਜਰਾਮਰਣਮਿਚ੍ਚਪੀ’’ਤਿਵੁਤ੍ਤਭਾਵਾਦਿਨਾ ਆਕਾਰਦੇਸਨਾਪਰਿਯਾਯੇਨ ਲੇਸੇਨ ਭਗਵਤਾ ਅਨਿਚ੍ਚਾਨਂ ਨਿਪ੍ਫਨ੍ਨਰੂਪਧਮ੍ਮਾਨਂ ਜਰਾਮਰਣਸਙ੍ਖਾਤਂ ਸਭਾਵਤੋ ਜਰਾਮਰਣਂ ਅਨਿਚ੍ਚਂ ਸਙ੍ਖਤਞ੍ਚਾਪਿ ਚਿਤ੍ਤਜਾਨਂ ਵਿਕਾਰਤ੍ਤਾ ਵਿਞ੍ਞਤ੍ਤਿਯੋ ‘‘ਚਿਤ੍ਤਜਾ’’ਤਿ ਵੁਤ੍ਤਾ ਵਿਯ, ਤਥਾ ਏਵਂ ਭਗਵਤਾ ਵੁਤ੍ਤਂ. ਯਦਿ ਏਵਂ ਅਤ੍ਥੇ ਸਤਿ ਏਤਂ ਰੁਪ੍ਪਨਲਕ੍ਖਣਤ੍ਤਯਂ ਅਜਾਤਤ੍ਤਾ ਚ ਸਬ੍ਬਥਾ ਸਬ੍ਬਾਕਾਰੇਨ ਖਂਪੁਪ੍ਫਂਵ ਨਤ੍ਥਿ, ਅਸਙ੍ਖਤਂ ਨਿਬ੍ਬਾਨਂ ਵਿਯ ਨਿਚ੍ਚਂਵਾਤਿ ਚ ਚੋਦਕੋ ਵਦੇਯ੍ਯ, ਨਤ੍ਥਿ ਨਿਚ੍ਚਨ੍ਤਿ ਇਦਂ ਉਭਯਵਚਨਂ ਨੋ ਭਗਵਤਾ ਵਤ੍ਤਬ੍ਬਂ. ਕਸ੍ਮਾ? ਨਿਸ੍ਸਯਧਮ੍ਮਾਨਂ ਆਯਤ੍ਤਭਾਵੇਨ ਪਵਤ੍ਤਿਤੋ ਪਥਵਿਯਾਦੀਨਂ ਨਿਸ੍ਸਯਾਨਂ ਭਾਵੇ ਸਤਿ ਤਸ੍ਸ ਲਕ੍ਖਣਤ੍ਤਯਸ੍ਸ ਭਾਵਤੋ, ਤਸ੍ਮਾ ਖਂਪੁਪ੍ਫਂਵ ਤਂ ਲਕ੍ਖਣਤ੍ਤਯਂ ਨ ਨਤ੍ਥਿ, ਅਤ੍ਥੀਤਿ ਅਤ੍ਥੋ. ਪਥਵੀਆਦੀਨਂ ਅਭਾਵੇ ਤਂ ਲਕ੍ਖਣਤ੍ਤਯਂ ਨ ਚ ਲਬ੍ਭਤਿ ਯਸ੍ਮਾ, ਤਸ੍ਮਾ ਨਿਬ੍ਬਾਨਂ ਵਿਯ, ਤਥਾ ਨਿਚ੍ਚਂ ਨ.
੭੨੪-੫. ਪਰਿਚ੍ਛੇਦਾਦਯੋ ਅਨਿਪ੍ਫਨ੍ਨਾ. ਤੇਸਮੇਵ ਚ ਰੂਪਾਨਂ ਤੇਸਮੇਵ ਨਿਪ੍ਫਨ੍ਨਰੂਪਧਮ੍ਮਾਨਂ ਵਿਕਾਰਤ੍ਤਾ ਨਿਪ੍ਫਨ੍ਨਾ ਚੇਵ ਸਙ੍ਖਤਾ ਸੇਸਵਸੇਨ ਵੁਤ੍ਤਾਨਂ ਪਭੇਦਕਤੋਤਿ ਦਸ੍ਸਨਤੋ. ਸੇਸਂ ਉਤ੍ਤਾਨਤ੍ਥਮੇਵ.
੭੬੭. ਗਨ੍ਤੁਂ ਪਨਿਚ੍ਛੇ ਪਿਟਕੇਭਿਧਮ੍ਮੇ,
ਯੋ ਧਮ੍ਮਸੇਨਾਪਤਿਨਾ ਸਮਤ੍ਤਂ;
ਹਿਤਤ੍ਥਿਨਾ ਤੇਨ ਚ ਭਿਕ੍ਖੁਨਾਯਂ,
ਸਕ੍ਕਚ੍ਚ ਸਮ੍ਮਾ ਪਨ ਸਿਕ੍ਖਿਤਬ੍ਬੋ.
ਯੋ ਭਿਕ੍ਖੁ ਅਭਿਧਮ੍ਮੇ ਪਿਟਕੇ ਧਮ੍ਮਸੇਨਾਪਤਿਨਾ ਸਮਤ੍ਤਂ ਸਭਾਵਂ ਗਨ੍ਤੁਂ ਪਾਪੁਣਿਤੁਂ ਇਚ੍ਛੇਯ੍ਯ, ਤੇਨ ਚ ਭਿਕ੍ਖੁਨਾ ਹਿਤਤ੍ਥਿਨਾ ਸਕ੍ਕਚ੍ਚਂ ਆਦਰੇਨ ਸਮ੍ਮਾ ਤੀਰਣਚਿਨ੍ਤਨਸਜ੍ਝਾਯਨੇਹਿ ਅਯਂ ਅਭਿਧਮ੍ਮਾਵਤਾਰੋ ਸਿਕ੍ਖਿਤਬ੍ਬੋ.
ਇਤਿ ਅਭਿਧਮ੍ਮਾਵਤਾਰਟੀਕਾਯ
ਰੂਪਵਿਭਾਗਵਣ੍ਣਨਾ ਨਿਟ੍ਠਿਤਾ.
ਦਸਮੋ ਪਰਿਚ੍ਛੇਦੋ.