੮. ਅਟ੍ਠਮੋ ਪਰਿਚ੍ਛੇਦੋ

ਪਕਿਣ੍ਣਕਨਿਦ੍ਦੇਸਵਣ੍ਣਨਾ

੪੭੫. ਇਦਾਨਿ ਪਨ ਸਬ੍ਬੇਸਂ, ਏਤੇਸਂ ਮਾਨਸਂ ਮਯਾ;

ਪਾਟਵਤ੍ਥਾਯ ਭਿਕ੍ਖੂਨਂ, ਕਥੀਯਤਿ ਪਕਿਣ੍ਣਕਂ.

ਇਦਾਨਿ ਪਨ ਕਾਲੇ ਏਤੇਸਂ ਤਿਹੇਤੁਕਦ੍ਵਿਹੇਤੁਕਅਹੇਤੁਕਾਨਂ ਸਬ੍ਬੇਸਂ ਪੁਗ੍ਗਲਾਨਂ ਪਕਿਣ੍ਣਕਂ ਮਾਨਸਂ ਭਿਕ੍ਖੂਨਂਪਾਟਵਤ੍ਥਾਯ ਭਿਕ੍ਖੂਨਂ ਛੇਕਭਾਵਤ੍ਥਾਯ ਮਯਾ ਕਥੀਯਤੇ ਉਚ੍ਚਤੇ.

੪੭੬-੮੫. ਪਨ੍ਥਮਕ੍ਕਟਕੋ ਉਣ੍ਣਨਾਭਿ ਪਨ੍ਥਮਕ੍ਕਟਕੋ ਨਾਮ ਪਞ੍ਚਸੁ ਦਿਸਾਸੁ ਤਸ੍ਸ ਸੁਤ੍ਤਂ ਪਸਾਰੇਤ੍ਵਾ ਜਾਲਮਜ੍ਝੇ ਨਿਪਜ੍ਜਤਿ. ਪਠਮਾਯ ਦਿਸਾਯੇਤ੍ਥ ਏਤ੍ਥ ਏਤਾਸੁ ਦਿਸਾਸੁ ਪਠਮਾਯ ਦਿਸਾਯ ਪਸਾਰਿਤੇ ਸੁਤ੍ਤੇ ਪਾਣਕੇਨ ਪਟਙ੍ਗੇਨ ਵਾ ਮਕ੍ਖਿਕਾਯ ਵਾ ਘਟ੍ਟਿਤੇ ਸਤਿ ਸਾ ਉਣ੍ਣਨਾਭਿ ਕਿਞ੍ਚਿ ਚਲਿਤ੍ਵਾ ਫਨ੍ਦਨਂ ਕਤ੍ਵਾ ਨਿਪਨ੍ਨਟ੍ਠਾਨਤੋ ਸੁਤ੍ਤਾਨੁਸਾਰੇਨ ਸੁਤ੍ਤਂ ਅਨੁਸਾਰੇਤ੍ਵਾ ਤਸ੍ਸ ਪਾਣਕਸ੍ਸ ਯੂਸਂ ਯੂਸਸਙ੍ਖਾਤਂ ਸੋਣਿਤਂ ਪਿਵਤਿ. ਪੁਨਾਗਨ੍ਤ੍ਵਾ ਤਤ੍ਥੇਵ ਤਸ੍ਮਿਂ ਜਾਲਮਜ੍ਝੇਯੇਵ ਯਥਾਸੁਖਂ ਨਿਪਜ੍ਜਤਿ, ਯਥਾ ਪਠਮਾਯ ਦਿਸਾਯ ਚਲਨਾਦਿਕਂ ਕਿਰਿਯਂ ਕਰੋਤਿ, ਏਵਮੇਵ ਦੁਤਿਯਾਦੀਸੁ ਚਤੂਸੁ ਦਿਸਾਸੁ ਚਲਨਾਦਿਕਂ ਕਿਰਿਯਂ ਕਰੋਤਿ, ਏਵਂ ਪਞ੍ਚਸੁ ਦਿਸਾਸੁ ਸੁਤ੍ਤਂ ਵਿਯ ਪਞ੍ਚ ਪਸਾਦਾ ਪਣ੍ਡਿਤੇਨ ਦਟ੍ਠਬ੍ਬਾ, ਮਜ੍ਝੇ ਮਕ੍ਕਟਕੋ ਵਿਯ ਚ ਚਿਤ੍ਤਂ ਪਨ ਪਣ੍ਡਿਤੇਨ ਦਟ੍ਠਬ੍ਬਂ. ਪਾਣਕਾਦੀਹਿ ਖੁਦ੍ਦਕਤਿਰਚ੍ਛਾਨੇਹਿ ਤਸ੍ਸ ਸਙ੍ਘਟ੍ਟਨਾ ਵਿਯ ਆਰਮ੍ਮਣੇ ਪਨ ਪਸਾਦਾਨਂ ਸਙ੍ਘਟ੍ਟਨਾ ਪਣ੍ਡਿਤੇਨ ਦਟ੍ਠਬ੍ਬਾ. ਜਾਲਮਜ੍ਝੇ ਨਿਪਨ੍ਨਾਯ ਉਣ੍ਣਨਾਭਿਯਾ ਤਂ ਚਲਨਂ ਵਿਯ ਪਸਾਦੇ ਘਟ੍ਟੇਤੀਤਿ ਪਸਾਦਘਟ੍ਟਨਂ, ਕਿਂ ਤਂ? ਆਰਮ੍ਮਣਂ. ਤਤ੍ਥ ਤਿਸ੍ਸਂ ਵੀਥਿਯਂ ਪਸਾਦਘਟ੍ਟਨਂ ਆਰਮ੍ਮਣਂ ਗਹੇਤ੍ਵਾ ਮਨੋਧਾਤੁਕਿਰਿਯਾਚਿਤ੍ਤਂ ਭਵਙ੍ਗਂ ਆਵਟ੍ਟੇਤੀਤਿ ਭਵਙ੍ਗਾਵਟ੍ਟਨਂ ਮਤਂ ਭਗਵਤਾ. ਤਸ੍ਸ ਪਨ੍ਥਮਕ੍ਕਟਕਸ੍ਸ ਸੁਤ੍ਤਾਨੁਸਾਰਂਵ ਸੁਤ੍ਤਂ ਅਨੁਗਮਨਂ ਵਿਯ ਵੀਥਿਚਿਤ੍ਤਪ੍ਪਵਤ੍ਤਨਂ ਪਣ੍ਡਿਤੇਨ ਦਟ੍ਠਬ੍ਬਂ. ਸੀਸੇ ਪਨ ਵਿਜ੍ਝਿਤ੍ਵਾ ਅਸ੍ਸ ਮਕ੍ਕਟਸ੍ਸ ਯੂਸਪਾਨਂ ਵਿਯ ਜਵਨਸ੍ਸ ਚਿਤ੍ਤਸ੍ਸ ਆਰਮ੍ਮਣੇਸੁ ਪਵਤ੍ਤਨਂ ਪਣ੍ਡਿਤੇਨ ਦਟ੍ਠਬ੍ਬਂ. ਪੁਨ ਆਗਨ੍ਤ੍ਵਾ ਸੁਤ੍ਤਜਾਲਮਜ੍ਝੇ ਨਿਪਜ੍ਜਨਂ ਯਥਾ ਵਤ੍ਥੁਂਯੇਵ ਹਦਯਵਤ੍ਥੁਂ ਏਵ ਨਿਸ੍ਸਾਯ ਚਿਤ੍ਤਸ੍ਸ ਪਰਿਵਤ੍ਤਨਂ ਪਣ੍ਡਿਤੇਨ ਦਟ੍ਠਬ੍ਬਂ.

੪੮੬-੯੩. ਇਦਂ ਤੁ ਪਨ ਓਪਮ੍ਮਂ, ਅਤ੍ਥਂ ਦੀਪੇਤਿ ਕਿਂ ਤੁ ਹਿ ਇਦਂ ਓਪਮ੍ਮਂ ਕਂ ਅਤ੍ਥਂ ਦੀਪੇਤਿ ਪਕਾਸੇਤਿ? ਪਠਮਂ ਪਸਾਦੇ ਆਰਮ੍ਮਣੇਨ ਘਟ੍ਟਿਤੇ ਸਤਿ ਪਸਾਦਵਤ੍ਥੁਤੋ ਪਸਾਦੋ ਵਤ੍ਥੁ ਨਿਸ੍ਸਯੋ ਏਤਸ੍ਸਾਤਿ ਪਸਾਦਵਤ੍ਥੁ, ਚਿਤ੍ਤਂ, ਤਤੋ ਪਸਾਦਵਤ੍ਥੁਤੋ, ਪਠਮਂ ਏਵ ਵਤ੍ਥੁਸਨ੍ਨਿਸ੍ਸਿਤਂ ਭਵਙ੍ਗਸਙ੍ਖਾਤਂ ਮਨੋ ਜਾਯਤਿ, ਇਤਿਪਿ ਅਤ੍ਥੋ ਤੇਨ ਓਪਮ੍ਮੇਨ ਦੀਪਿਤੋ. ਏਕੇਕਾਰਮ੍ਮਣਂ ਦ੍ਵੀਸੁ ਦ੍ਵੀਸੁ ਦ੍ਵਾਰੇਸੁ ਸਬ੍ਬਸੋ ਸਬ੍ਬਪ੍ਪਕਾਰੇਨ ਪਨ ਆਪਾਥਂ ਆਗਚ੍ਛਤਿ, ਅਯਮਤ੍ਥੋਪਿ ਤੇਨ ਓਪਮ੍ਮੇਨ ਦੀਪਿਤੋ ‘‘ਦ੍ਵੀਸੁ ਦ੍ਵੀਸੁ ਦ੍ਵਾਰੇਸੂ’’ਤਿ, ਏਕਂ ਰੂਪਾਰਮ੍ਮਣਂ ਏਕਸ੍ਮਿਂਯੇਵ ਖਣੇ ਚਕ੍ਖੁਦ੍ਵਾਰੇ, ਮਨੋਦ੍ਵਾਰੇ ਚਾਤਿ ਦ੍ਵੀਸੁ ਦ੍ਵਾਰੇਸੁ ਆਪਾਥਂ ਆਗਚ੍ਛਤੀਤਿ ਅਤ੍ਥੋ. ਸੋਤਦ੍ਵਾਰਾਦੀਸੁਪਿ ਏਸੇਵ ਨਯੋ ਞੇਯ੍ਯੋ. ਰੂਪਂ ਚਕ੍ਖੁਪਸਾਦਮ੍ਹਿ ਘਟ੍ਟੇਤ੍ਵਾ ਤਙ੍ਖਣੇ ਪਨ ਤਸ੍ਸ ਖਣੇ ਪਨ ਤਥਾ ਮਨੋਦ੍ਵਾਰੇ ਪਨ ਆਪਾਥਂ ਆਗਚ੍ਛਤਿ, ਭਵਙ੍ਗਚਲਨਸ੍ਸ ਪਚ੍ਚਯੋ ਹੋਤੀਤਿ ਅਤ੍ਥੋ. ਨ ਸਂਸਯੋ ਏਤਸ੍ਮਿਂ ਵਚਨੇ ਸਂਸਯੋ ਨਤ੍ਥਿ. ਯਥਾ ਖਗੋ ਯਥਾ ਸਕੁਣੋ. ਹਿ ਸਚ੍ਚਂ ਮਯਾ ਵੁਤ੍ਤਂ ਵਚਨਂ. ਰੁਕ੍ਖਗ੍ਗੇ ਰੁਕ੍ਖਕੋਟਿਯਂ ਨਿਲੀਯਨ੍ਤੋਵ ਸਾਖਿਨੋ ਸਾਖਂ ਘਟ੍ਟੇਤਿ, ਤਸ੍ਸ ਛਾਯਾ ਭੂਮਿਯਂ ਪਥਵਿਯਂ ਫਰਤਿ ਪਟਿਹਞ੍ਞਤਿ. ਇਧਾਤਿ ਨਿਪਾਤੋ. ਸਾਖਾਯ ਸਕੁਣੇਨ ਘਟ੍ਟਨਂ ਭੂਮਿਯਂ ਛਾਯਾਫਰਣਾਪਿ ਚ ਅਪੁਬ੍ਬਂ ਅਚਰਿਮਂ ਏਕਕ੍ਖਣਸ੍ਮਿਂਯੇਵ ਜਾਯਰੇ ਜਾਯਨ੍ਤਿ. ਏਵਮੇਵ ਪਨ ਰੂਪਸ੍ਸ, ਪਸਾਦਸ੍ਸ ਚ ਘਟ੍ਟਨਂ, ਤਥੇਵ ਅਤ੍ਥਤੋ ਅਤ੍ਥਵਸੇਨ ਭਵਙ੍ਗਚਲਨਸ੍ਸਾਪਿ ਪਚ੍ਚਯਤ੍ਤੇਨ ਪਚ੍ਚਯਭਾਵੇਨ ਮਨੋਦ੍ਵਾਰੇ ਆਪਾਥਂ ਆਗਮਨਂ ਅਪੁਬ੍ਬਂ ਅਚਰਿਮਂ ਏਕਕ੍ਖਣੇਯੇਵ ਹੋਤਿ.

੪੯੪-੭. ਤਤੋ ਪਰਂ ਭਵਙ੍ਗਸੋਤਂ ਛਿਨ੍ਦਿਤ੍ਵਾ ਚਕ੍ਖੁਦ੍ਵਾਰੇ ਚਕ੍ਖੁਪਸਾਦੇ ਯਥਾਕ੍ਕਮਂ ਆਵਜ੍ਜਨੇ ਸਮੁਪ੍ਪਨ੍ਨੇ, ਦਸ੍ਸਨੇ ਸਮੁਪ੍ਪਨ੍ਨੇ, ਸਮ੍ਪਟਿਚ੍ਛਨੇ ਸਮੁਪ੍ਪਨ੍ਨੇ, ਸਨ੍ਤੀਰਣੇ ਸਮੁਪ੍ਪਨ੍ਨੇ, ਤਥਾ ਵੋਟ੍ਠਬ੍ਬਨੇ ਚ ਸਮੁਪ੍ਪਨ੍ਨੇ ਕੁਸਲਂ ਜਵਨਚਿਤ੍ਤਂ ਜਵਤਿ, ਤਥਾ ਅਕੁਸਲਮੇਵ ਚਿਤ੍ਤਂ ਜਵਤਿ. ਸੋਤਦ੍ਵਾਰਾਦੀਸੁਪਿ ਸਦ੍ਦਾਦੀਨਂ ਆਰਮ੍ਮਣਾਨਂ ਘਟ੍ਟਨੇ ਏਸੇਵ ਨਯੋ ਅਵਿਸੇਸੇਨ ਵਿਞ੍ਞੁਨਾ ਵਿਞ੍ਞੇਯ੍ਯੋ. ਏਤਸ੍ਸ ਅਤ੍ਥਸ੍ਸ ਦੀਪਨੇ ਦੋਵਾਰਿਕੋਪਮਾਦੀਨਿ ਵਚਨਾਨਿ ਉਦ੍ਧਰਿਤ੍ਵਾ ਤਤੋ ਪਕਰਣਤੋ ਨੀਹਰਿਤ੍ਵਾ ਏਤ੍ਥ ਏਤਸ੍ਮਿਂ ਵੀਥਿਯਾਧਿਕਾਰੇ ਵਿਞ੍ਞੁਨਾ ਦਸ੍ਸੇਤਬ੍ਬਾਨਿ.

੪੯੮-੯. ਅਸਮ੍ਭੇਦੇਨ ਚਕ੍ਖੁਸ੍ਸਾਤਿ ਤਸ੍ਸਾਪਿ ਚਕ੍ਖੁ ਅਸਮ੍ਭਿਨ੍ਨਂ ਹੋਤਿ. ਜੀਵਿਤਾ ਨਿਰੁਦ੍ਧਮ੍ਪਿ ਪਿਤ੍ਤੇਨ ਵਾ ਸੇਮ੍ਹੇਨ ਵਾ ਰੁਹਿਰੇਨ ਵਾ ਪਲਿਬੁਦ੍ਧਂ ਚਕ੍ਖੁਵਿਞ੍ਞਾਣਸ੍ਸ ਪਚ੍ਚਯੋ ਭਵਿਤੁਂ ਅਸਕ੍ਕੋਨ੍ਤਂ ਸਮ੍ਭਿਨ੍ਨਂ ਨਾਮ, ਸਕ੍ਕੋਨ੍ਤਂ ਅਸਮ੍ਭਿਨ੍ਨਂ ਨਾਮ ਹੋਤਿ. ਤੇਨ ਚਕ੍ਖੁਪਸਾਦਸ੍ਸ ਅਸਮ੍ਭਿਨ੍ਨੇਨ ਰੂਪਾਪਾਥਗਮਨੇਨ ਆਲੋਕਸਨ੍ਨਿਸ੍ਸਯੇਨਾਪਿ. ਤੇਨ ਤਿਵਿਧੇਨ ਪਚ੍ਚਯੇਨ ਸਮਨਕ੍ਕਾਰਹੇਤੁਨਾ ਪਞ੍ਚਦ੍ਵਾਰਾਵਜ੍ਜਨਪਚ੍ਚਯੇਨ ਸਹ ਪਵਤ੍ਤਨੇਨ. ਏਤੇਹਿ ਪਨ ਚਤੂਹਿ ਪਚ੍ਚਯੇਹਿ ਸਂ ਏਕਤੋ ਇਨ੍ਤਿ ਪਵਤ੍ਤਨ੍ਤੀਤਿ ਸਮੇਤਾ, ਸਮੇਤੇਹਿ ਸਹਗਤੇਹਿ ਸਮਾਗਮਂ ਏਕੀਭਾਵਂ ਆਗਤੇਹਿ, ਤਂ ਚਕ੍ਖੁਵਿਞ੍ਞਾਣਂ ਚਕ੍ਖੁਪਸਾਦਨਿਸ੍ਸਿਤਂ ਵਿਞ੍ਞਾਣਂ ਸਮ੍ਪਯੁਤ੍ਤੇਹਿ ਚੇਤਸਿਕੇਹਿ ਸਹ ਜਾਯਤੇ.

੫੦੦-੧. ਅਸਮ੍ਭੇਦੇਨ ਸੋਤਸ੍ਸ ਸੋਤਪਸਾਦਸ੍ਸ ਅਸਮ੍ਭਿਨ੍ਨੇਨ ਸਦ੍ਦਾਪਾਥਗਮੇਨ ਚ ਸਦ੍ਦਸ੍ਸ ਆਪਾਥਗਮਨੇਨ ਚ. ਆਕਾਸਨਿਸ੍ਸਯੇਨਾਪਿ ਪਿਹਿਤਕਣ੍ਣਚ੍ਛਿਦ੍ਦਸ੍ਸ ਸੋਤਵਿਞ੍ਞਾਣਂ ਨੁਪ੍ਪਜ੍ਜਤਿ. ਤੇਨ ਤਿਵਿਧੇਨ ਪਚ੍ਚਯੇਨ. ਸਮਨਕ੍ਕਾਰਹੇਤੁਨਾ ਪਞ੍ਚਦ੍ਵਾਰਾਵਜ੍ਜਨਪਚ੍ਚਯੇਨ ਸਹ ਪਵਤ੍ਤੇਨ. ਏਤੇਹਿ ਪਨ ਚਤੂਹਿ ਪਚ੍ਚਯੇਹਿ ਸਮੇਤੇਹਿ ਸਹਗਤੇਹਿ ਸਮਾਗਮਂ ਏਕੀਭਾਵਂ ਆਗਤੇਹਿ ਤਂ ਸੋਤਵਿਞ੍ਞਾਣਂ ਸਮ੍ਪਯੁਤ੍ਤੇਹਿ ਸਹ ਜਾਯਤਿ.

੫੦੨-੩. ਅਸਮ੍ਭੇਦੇਨ ਘਾਨਸ੍ਸ ਘਾਨਪਸਾਦਸ੍ਸ ਅਸਮ੍ਭਿਨ੍ਨੇਨ ਗਨ੍ਧਾਪਾਥਗਮੇਨ ਚ ਗਨ੍ਧਸ੍ਸ ਆਪਾਥਗਮਨੇਨ ਚ. ਵਾਯੋਸਨ੍ਨਿਸ੍ਸਯੇਨਾਪੀਤਿ ਘਾਨਬਿਲਮ੍ਹਿ ਪਵਿਸਨ੍ਤੇਨ ਵਾਯੁਨਾਤਿ ਅਤ੍ਥੋ. ਤੇਨ ਤਿਵਿਧੇਨ ਪਚ੍ਚਯੇਨ. ਸਮਨਕ੍ਕਾਰਹੇਤੁਨਾ ਪਞ੍ਚਦ੍ਵਾਰਾਵਜ੍ਜਨਪਚ੍ਚਯੇਨ ਸਹ ਪਵਤ੍ਤੇਨ. ਏਤੇਹਿ ਪਨ ਚਤੂਹਿ ਪਚ੍ਚਯੇਹਿ ਸਮੇਤੇਹਿ ਸਹਗਤੇਹਿ ਸਮਾਗਮਂ ਏਕੀਭਾਵਂ ਆਗਤੇਹਿ ਤਂ ਘਾਨਵਿਞ੍ਞਾਣਂ ਸਮ੍ਪਯੁਤ੍ਤੇਹਿ ਸਹ ਜਾਯਤਿ.

੫੦੪-੫. ਅਸਮ੍ਭੇਦੇਨ ਜਿਵ੍ਹਾਯ ਜਿਵ੍ਹਾਯ ਅਸਮ੍ਭਿਨ੍ਨੇਨ ਰਸਾਪਾਥਗਮੇਨ ਚ ਰਸਸ੍ਸ ਆਪਾਥਗਮਨੇਨ ਚ. ਆਪੋਸਨ੍ਨਿਸ੍ਸਯੇਨਾਪੀਤਿ ਜਿਵ੍ਹਾਤੇਮਨਂ ਆਪਂ ਲਦ੍ਧਾ ਚ ਉਪ੍ਪਜ੍ਜਤਿ, ਤੇਨ ਵਿਨਾ ਸੁਕ੍ਖਖਾਦਨੀਯੇ ਜਿਵ੍ਹਾਯ ਸਾਯਿਤੇਪਿ ਜਿਵ੍ਹਾਵਿਞ੍ਞਾਣਂ ਨੁਪ੍ਪਜ੍ਜਤੀਤਿ ਅਤ੍ਥੋ. ਤੇਨ ਤਿਵਿਧੇਨ ਪਚ੍ਚਯੇਨ. ਸਮਨਕ੍ਕਾਰਹੇਤੁਨਾ ਪਞ੍ਚਦ੍ਵਾਰਾਵਜ੍ਜਨਪਚ੍ਚਯੇਨ ਸਹ ਪਵਤ੍ਤੇਨ. ਏਤੇਹਿ ਪਨ ਚਤੂਹਿ ਪਚ੍ਚਯੇਹਿ ਸਮੇਤੇਹਿ ਸਹਗਤੇਹਿ ਸਮਾਗਮਂ ਏਕੀਭਾਵਂ ਆਗਤੇਹਿ ਤਂ ਜਿਵ੍ਹਾਵਿਞ੍ਞਾਣਂ ਸਮ੍ਪਯੁਤ੍ਤੇਹਿ ਸਹ ਜਾਯਤਿ.

੫੦੬-੭. ਕਾਯਪਸਾਦਸ੍ਸ ਅਸਮ੍ਭੇਦੇਨ ਫੋਟ੍ਠਬ੍ਬਸ੍ਸ ਆਪਾਥਗਮਨੇਨ ਚ. ਪਥਵੀਨਿਸ੍ਸਯੇਨਾਪੀਤਿ ਤੇਨ ਵਿਨਾ ਕਾਯਦ੍ਵਾਰਮ੍ਪੀਤਿ ਬਹਿਦ੍ਧਾ ਮਹਾਭੂਤਾਰਮ੍ਮਣਂ ਅਜ੍ਝਤ੍ਤਿਕਂ ਕਾਯਪਸਾਦਂ ਘਟ੍ਟੇਤ੍ਵਾ ਪਸਾਦਪਚ੍ਚਯੇਸੁ ਮਹਾਭੂਤੇਸੁ ਪਟਿਹਞ੍ਞਤਿ. ਤੇਨ ਤਿਵਿਧੇਨ ਪਚ੍ਚਯੇਨ. ਸਮਨਕ੍ਕਾਰਹੇਤੁਨਾ ਪਞ੍ਚਦ੍ਵਾਰਾਵਜ੍ਜਨਪਚ੍ਚਯੇਨ ਸਹ ਪਵਤ੍ਤੇਨ. ਏਤੇਹਿ ਪਨ ਚਤੂਹਿ ਪਚ੍ਚਯੇਹਿ ਸਮੇਤੇਹਿ ਸਹਗਤੇਹਿ ਸਮਾਗਮਂ ਏਕੀਭਾਵਂ ਆਗਤੇਹਿ ਤਂ ਕਾਯਵਿਞ੍ਞਾਣਂ ਸਮ੍ਪਯੁਤ੍ਤੇਹਿ ਸਹ ਜਾਯਤਿ.

੫੦੮-੯. ਅਸਮ੍ਭੇਦਾ ਮਨਸ੍ਸਾਪੀਤਿ ਮਨਨ੍ਤਿ ਭਵਙ੍ਗਚਿਤ੍ਤਂ. ਤਂ ਨਿਰੁਦ੍ਧਮ੍ਪਿ ਆਵਜ੍ਜਨਚਿਤ੍ਤਸ੍ਸ ਪਚ੍ਚਯੋ ਭਵਿਤੁਂ ਅਸਮਤ੍ਥਂ ਮਨ੍ਦਤਮਗਤਮੇਵ ਵਤ੍ਤਮਾਨਮ੍ਪਿ ਸਮ੍ਭਿਨ੍ਨਂ ਨਾਮ ਹੋਤਿ. ਆਵਜ੍ਜਨਸ੍ਸ ਪਚ੍ਚਯੋ ਭਵਿਤੁਂ ਸਮਤ੍ਥਂ ਅਸਮ੍ਭਿਨ੍ਨਂ ਨਾਮ. ਮਨਸ੍ਸ ਅਸਮ੍ਭੇਦੇਨ ਧਮ੍ਮਸ੍ਸ ਆਪਾਥਗਮਨੇਨ ਚ ਵਤ੍ਥੁਸਨ੍ਨਿਸ੍ਸਯੇਨ ਹਦਯਵਤ੍ਥੁਸਨ੍ਨਿਸ੍ਸਯੇਨ. ਤੇਨ ਤਿਵਿਧੇਨ ਪਚ੍ਚਯੇਨ. ਸਮਨਕ੍ਕਾਰਹੇਤੁਨਾ ਮਨੋਦ੍ਵਾਰਾਵਜ੍ਜਨੇਨ ਸਹ ਪਵਤ੍ਤੇਨ. ਏਤੇਹਿ ਪਨ ਚਤੂਹਿ ਪਚ੍ਚਯੇਹਿ ਸਮੇਤੇਹਿ ਸਹਗਤੇਹਿ ਸਮਾਗਮਂ ਏਕੀਭਾਵਂ ਆਗਤੇਹਿ ਤਂ ਮਨੋਵਿਞ੍ਞਾਣਂ ਤਂ ਮਨੋਵਿਞ੍ਞਾਣਸਙ੍ਖਾਤਂ ਜਵਨਚਿਤ੍ਤਂ ਸਮ੍ਪਯੁਤ੍ਤੇਹਿ ਸਹ ਜਾਯਤੇ.

੫੧੦-੧੧. ਮਨੋ ਭਵਙ੍ਗਚਿਤ੍ਤਂ ਨਾਮ ਵਿਭਾਵਿਨਾ ਵੇਦਿਤਬ੍ਬਂ. ਆਵਜ੍ਜਨਕ੍ਰਿਯਾਚਿਤ੍ਤਂ ਆਵਜ੍ਜਨਕਿਰਿਯਾਚਿਤ੍ਤਦ੍ਵਯਂ ਸਮਨਕ੍ਕਾਰੋ ਨਾਮ ਵਿਭਾਵਿਨਾ ਸਞ੍ਞਿਤਂ. ਵਤ੍ਥੁਸਨ੍ਨਿਸ੍ਸਯੇਨ ਇਤਿ ਅਯਂ ਪਾਠੋ ਸਬ੍ਬਤ੍ਥ ਸਬ੍ਬੇਸੁ ਭਵੇਸੁ ਨ ਗਚ੍ਛਤਿ. ਪਞ੍ਚਹਿ ਖਨ੍ਧੇਹਿ ਵੋਕਾਰੋ ਵੋਕਿਣ੍ਣੋਤਿ ਪਞ੍ਚਵੋਕਾਰੋ, ਪਞ੍ਚਵੋਕਾਰਭਵਂ ਸਨ੍ਧਾਯ ਕਾਰਣਂ ਕਤ੍ਵਾ ‘‘ਵਤ੍ਥੁਸਨ੍ਨਿਸ੍ਸਯੇਨਾ’’ਤਿ ਅਯਂ ਪਾਠੋ ਪਨ ਕਥਿਤੋ ਮਯਾ, ਪਞ੍ਚਵੋਕਾਰਭਵੋ ਨਾਮ ਕਾਮਰੂਪਭਵੋ, ਅਰੂਪਭਵੋ ਚਤੁਵੋਕਾਰਭਵੋ ਨਾਮ, ਅਸਞ੍ਞੀਭਵੋ ਏਕਵੋਕਾਰਭਵੋ ਨਾਮ. ਅਯਂ ਪਾਠੋ ਚਤੁਵੋਕਾਰਅਰੂਪਭਵਂ ਸਨ੍ਧਾਯ ਨ ਕਥਿਤੋਤਿ ਅਤ੍ਥੋ. ਵਤ੍ਥੁਸ੍ਸ ਰੂਪਤ੍ਤਾ ਅਰੂਪਭਵੇ ਕਥਂ ਵਤ੍ਥੁਸਨ੍ਨਿਸ੍ਸਯੋ ਭਵੇਯ੍ਯਾਤਿ ਅਤ੍ਥੋ.

੫੧੨-੪. ਪਟਿਸਨ੍ਧਾਦਿਚਿਤ੍ਤਾਨਿ, ਸਬ੍ਬਾਨੇਕੂਨਵੀਸਤਿ ਹੋਨ੍ਤਿ, ਕਾਮਾਵਚਰੇਸੁ ਦਸ, ਰੂਪੇਸੁ ਪਞ੍ਚ, ਅਰੂਪੀਸੁ ਚਤ੍ਤਾਰਿ, ਸਬ੍ਬਾਨਿ ਪਟਿਸਨ੍ਧਿਚਿਤ੍ਤਾਨਿ ਏਕੂਨਵੀਸਤਿ ਹੋਨ੍ਤਿ. ਕਮ੍ਮਂ ਨਾਮ ਕੁਸਲਾਕੁਸਲਚੇਤਨਾ. ਕਮ੍ਮਨਿਮਿਤ੍ਤਂ ਨਾਮ ਰੂਪਾਨਿ ਪਞ੍ਚਾਰਮ੍ਮਣਾਨਿ ਪਞ੍ਞਤ੍ਤਿ ਚ ਮਹਗ੍ਗਤਚਿਤ੍ਤਞ੍ਚ. ਤਥਾ ਗਤਿਨਿਮਿਤ੍ਤਕਂ ਨਾਮ ਕਪ੍ਪਰੁਕ੍ਖਾਦਯੋ, ਅਕੁਸਲਪਕ੍ਖੇ ਰੂਪਾਦਿਆਰਮ੍ਮਣਭੂਤਾ ਲੋਹਕੁਮ੍ਭਾਦਯੋ ਚ. ਇਤਿ ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਤੇਸਂ ਪਟਿਸਨ੍ਧਾਦਿਚਿਤ੍ਤਾਨਂ ਆਰਮ੍ਮਣਂ ਤਿਵਿਧਂ ਭਗਵਤਾ ਉਦੀਰਿਤਂ. ਕਾਮਾਵਚਰਸਨ੍ਧੀਨਂ ਪਰਿਤ੍ਤਾਰਮ੍ਮਣਂ ਕਾਮਾਵਚਰਾਰਮ੍ਮਣਂ ਭਗਵਤਾ ਮਤਂ. ਪਚ੍ਚੁਪ੍ਪਨ੍ਨਂ ਰੂਪਾਦਿਪਞ੍ਚਾਰਮ੍ਮਣਂ, ਗਤਿਨਿਮਿਤ੍ਤਂ ਪਞ੍ਚਾਰਮ੍ਮਣਞ੍ਚ ਪਚ੍ਚੁਪ੍ਪਨ੍ਨਞ੍ਚ ਹੋਤਿ. ਅਤੀਤਂ ਵਾ ਕਮ੍ਮਂ ਕੁਸਲਾਕੁਸਲਚੇਤਨਾ ਅਤੀਤਾਯੇਵ, ਨ ਪਚ੍ਚੁਪ੍ਪਨ੍ਨਾ. ਅਨਾਗਤਂ ਆਰਮ੍ਮਣਂ ਨਤ੍ਥਿ.

੫੧੫-੨੬. ਅਟ੍ਠੇਵ ਚ ਮਹਾਵਿਪਾਕਾ, ਤੀਣਿ ਸਨ੍ਤੀਰਣਾਨਿ ਚਾਤਿ ਏਕਾਦਸਵਿਧਂ ਚਿਤ੍ਤਂ ਤਦਾਰਮ੍ਮਣਸਞ੍ਞਿਤਂ. ਏਕਾਦਸਵਿਧੇ ਚਿਤ੍ਤੇ ਤਦਾਰਮ੍ਮਣਸਞ੍ਞਿਤੇ ਪੁਞ੍ਞਵਿਪਾਕਾਨਿ ਕੁਸਲਵਿਪਾਕਾ ਦਸ ਹੋਨ੍ਤਿ, ਅਪੁਞ੍ਞਜਂ ਅਕੁਸਲਵਿਪਾਕਂ ਪਨ ਏਕਂ ਹੋਤਿ. ਮਹਾਵਿਪਾਕਾ ਰੂਪਾਰੂਪਭਵਦ੍ਵਯੇ ਨ ਜਾਯਨ੍ਤਿ, ਕਾਮਰੂਪਭਵੇ ਸਨ੍ਤੀਰਣਤ੍ਤਯਂ ਹੋਤਿ. ਯਾਨਿ ਤਦਾਰਮ੍ਮਣਚਿਤ੍ਤਾਨਿ ਸਤ੍ਥੁਨਾ ਜਿਨੇਨ ਵੁਤ੍ਤਾਨਿ, ਤੇਸੁ ਤਦਾਰਮ੍ਮਣਚਿਤ੍ਤੇਸੁ ਏਕਮ੍ਪਿ ਤਦਾਰਮ੍ਮਣਚਿਤ੍ਤਂ ਰੂਪਾਰੂਪਭਵਦ੍ਵਯੇ ਤਦਾਰਮ੍ਮਣਂ ਹੁਤ੍ਵਾ ਕਦਾਚਿਪਿ ਨਪ੍ਪਵਤ੍ਤਤਿ. ਕਸ੍ਮਾ ਕਾਰਣਾ? ਤਤ੍ਥ ਤਸ੍ਮਿਂ ਰੂਪਾਰੂਪਭਵਦ੍ਵਯੇ ‘‘ਤਦਾਰਮ੍ਮਣਂ ਨ ਹੋਤੀ’’ਤਿ ਵਚਨਂ ਚੋਦਕੋ ਭਵੇਯ੍ਯ, ਬੀਜਸ੍ਸਾਭਾਵਤੋ ਪਨ ਨ ਹੋਤੀਤਿ ਪਰਿਹਾਰੋ. ਅਕਾਮਾਵਚਰਾਰਮ੍ਮਣੇ ਅਕਾਮਾਵਚਰਧਮ੍ਮੇ ਇਦਂ ਤਦਾਰਮ੍ਮਣਮਾਨਸਂ ਨੇਵ ਅਨੁਬਨ੍ਧਤਿ. ਹਿ ਕਸ੍ਮਾ ਕਾਰਣਾ? ਪਰਿਤ੍ਤਾਰਮ੍ਮਣਤ੍ਤਾ ਚ ਏਕਨ੍ਤੇਨ ਅਵਸ੍ਸਂ ਤਦਾਰਮ੍ਮਣਮਾਨਸਸ੍ਸ ਕਾਮਾਵਚਰਾਰਮ੍ਮਣਤ੍ਤਾ ਚ ਤਥਾ ਅਪਰਿਚਿਤਤ੍ਤਾ ਚ ਸਬ੍ਬਦਾ ਨਾਨੁਬਨ੍ਧਤਿ. ਤਞ੍ਹਿ ਯਥਾ ਪਿਤਰਂ ਵਾ ਪਿਤੁਸਦਿਸਂ ਵਾ ਞਾਤਿਂ ਅਨੁਬਨ੍ਧਨ੍ਤੋਪਿ ਤਰੁਣਦਾਰਕੋ ਘਰਦ੍ਵਾਰਨ੍ਤਰਵੀਥਿਚਤੁਕ੍ਕਾਦਿਮ੍ਹਿ ਪਰਿਚਿਤੇਯੇਵ ਦੇਸੇ ਅਨੁਬਨ੍ਧਤਿ, ਨ ਅਰਞ੍ਞਂ ਵਾ ਯੁਦ੍ਧਭੂਮਿਂ ਵਾ ਗਚ੍ਛਤਿ, ਏਵਂ ਕਾਮਾਵਚਰੇ ਧਮ੍ਮੇ ਅਨੁਬਨ੍ਧਨ੍ਤਮ੍ਪਿ ਮਹਗ੍ਗਤਲੋਕੁਤ੍ਤਰਧਮ੍ਮਮਾਰਬ੍ਭ ਪਵਤ੍ਤਮਾਨੇ ਧਮ੍ਮੇ ਨਾਨੁਬਨ੍ਧਤਿ. ਯਸ੍ਮਾ ਚਸ੍ਸ ਸਬ੍ਬੋ ਕਾਮਾਵਚਰਪਾਕੋ ਚ ਕਿਰਿਯਾਮਨੋਧਾਤੁ ਕਿਰਿਯਾਅਹੇਤੁਕਮਨੋਵਿਞ੍ਞਾਣਧਾਤੁ ਸੋਮਨਸ੍ਸਸਹਗਤਾ ਇਮੇ ਧਮ੍ਮਾ ਪਰਿਤ੍ਤਾਰਮ੍ਮਣਾਤਿ ਏਵਂ ਅਚ੍ਚਨ੍ਤਂ ਪਰਿਤ੍ਤਮੇਵ ਆਰਮ੍ਮਣਂ ਵੁਤ੍ਤਂ, ਤਸ੍ਮਾ ਚੇਤਂ ਮਹਗ੍ਗਤਲੋਕੁਤ੍ਤਰਾਰਮ੍ਮਣੇ ਕਾਮਾਵਚਰਧਮ੍ਮੇਪਿ ਨਾਨੁਬਨ੍ਧਤੀਤਿ ਵੇਦਿਤਬ੍ਬਂ.

੫੨੭-੩੨. ਕਿਂ ਤੇਨ ਯੁਤ੍ਤਿਵਾਦੇਨ, ਵੁਤ੍ਤਂ ਅਟ੍ਠਕਥਾਸੁ ਹਿ ‘‘ਜਨਕਂ ਤੇਨ ਤੁਲ੍ਯ’’ਨ੍ਤਿਆਦਿਕੇਨ ਤੇਨ, ਯੁਤ੍ਤਿਯਾ ਵਾਦੋ ਯੁਤ੍ਤਿਵਾਦੋ, ‘‘ਜਨਕਂ ਤੇਨ ਤੁਲ੍ਯ’’ਨ੍ਤਿਆਦਿਕਾਯ ਯੁਤ੍ਤਿਕਥਾਯ ਕਿਂ ਪਯੋਜਨਂ ਵੁਤ੍ਤਂ? ਅਟ੍ਠਕਥਾਸੁ ਹਿ ਸਚ੍ਚਂ ‘‘ਕਿਂ ਤੇਨ ਯੁਤ੍ਤਿਵਾਦੇਨਾ’’ਤਿ ਵਚਨਂ, ‘‘ਅਤ੍ਥਕਥਾਸੂ’’ਤਿ ਵਤ੍ਤਬ੍ਬੇ ਸਮਾਸੇ ਹਿ ਤ੍ਥ-ਸ੍ਸ ਟ੍ਠ-ਕਾਰਂ ਕਤ੍ਵਾ ‘‘ਅਟ੍ਠਕਥਾਸੂ’’ਤਿ ਵੁਤ੍ਤਂ. ਕਾਮਾਵਚਰੇ ਧਮ੍ਮੇ ਪਟਿਚ੍ਚ ਤਦਾਰਮ੍ਮਣਭਾਵਦੀਪਕਂ ਵਚਨਂ ਆਚਰਿਯੇਨ ਵੁਤ੍ਤਂ. ਤਦਾਰਮ੍ਮਣਚਿਤ੍ਤਾਨਿ, ਏਕਾਦਸਪਿ ਸਬ੍ਬਸੋ ਸਬ੍ਬਪ੍ਪਕਾਰੇਨਪਿ ਤਦਾਰਮ੍ਮਣਚਿਤ੍ਤਾਨਿ ਨਾਮਗੋਤ੍ਤਂ ਪਨਾਰਬ੍ਭ ਤਿਸ੍ਸਾਦਿਕਂ ਨਾਮਪਞ੍ਞਤ੍ਤਿਂ ਪਟਿਚ੍ਚ ਕਚ੍ਚਾਯਨਗੋਤ੍ਤਕਸ੍ਸਪਗੋਤ੍ਤਾਦਿਕਂ ਗੋਤ੍ਤਪਞ੍ਞਤ੍ਤਿਂ ਪਟਿਚ੍ਚ ਜਵਨੇ ਜਵਿਤੇਪਿ ਚ ਤਦਾਰਮ੍ਮਣਂ ਨ ਗਣ੍ਹਨ੍ਤਿ, ਰੂਪਾਰੂਪਭਵੇਸੁ ਵਾ ਤਦਾਰਮ੍ਮਣਂ ਨ ਗਣ੍ਹਨ੍ਤਿ. ਯਦਾ ਪਞ੍ਞਤ੍ਤਿਮਾਰਬ੍ਭ, ਜਵਨੇ ਜਵਿਤੇਪਿ ਵਾ ਯਦਾ ਮਯਾ ਵੁਤ੍ਤਾਯ ਪਞ੍ਞਤ੍ਤਿਯਾ ਸੇਸਪਞ੍ਞਤ੍ਤਿਂ ਪਟਿਚ੍ਚ ਜਵਨੇ ਜਵਿਤੇਪਿ ਵਾ ਤਦਾਰਮ੍ਮਣਂ ਨ ਲਬ੍ਭਤੇ ਆਚਰਿਯੇਨ, ਤਥਾ ਦੁਕ੍ਖਅਨਿਚ੍ਚਅਨਤ੍ਤਲਕ੍ਖਣਾਰਮ੍ਮਣਿਕਾਯ ਵਿਪਸ੍ਸਨਾਯ ਤਦਾਰਮ੍ਮਣਂ ਨ ਲਬ੍ਭਤੇ ਆਚਰਿਯੇਨ. ਤਦਾਰਮ੍ਮਣਾ ਨ ਲਬ੍ਭਨ੍ਤਿ, ਮਿਚ੍ਛਤ੍ਤਨਿਯਤੇਸੁਪਿ ਮਿਚ੍ਛਤ੍ਤੇ ਮਿਚ੍ਛਾਸਭਾਵੇ ‘‘ਨਤ੍ਥਿ ਦਿਨ੍ਨ’’ਨ੍ਤ੍ਯਾਦਿਵਸੇਨ ਨਿਯਤਾਨਿ ਚਤ੍ਤਾਰਿ ਦਿਟ੍ਠਿਯੁਤ੍ਤਜਵਨਾਨਿ ਮਿਚ੍ਛਤ੍ਤਨਿਯਤਾਨਿ, ਮਿਚ੍ਛਤ੍ਤਨਿਯਤੇਸੁਪਿ ਤਦਾਰਮ੍ਮਣਂ ਨ ਲਬ੍ਭਤੇ ਆਚਰਿਯੇਨ, ਲੋਕੁਤ੍ਤਰਧਮ੍ਮੇ ਆਰਬ੍ਭ ਜਵਨੇ ਗਤੇਪਿ ਤਦਾਰਮ੍ਮਣਂ ਨ ਲਬ੍ਭਤੇ ਆਚਰਿਯੇਨ. ਤਥਾ ਮਹਗ੍ਗਤੇ ਧਮ੍ਮੇ ਆਰਬ੍ਭ ਜਵਨੇ ਜਵਿਤੇਪਿ ਤਦਾਰਮ੍ਮਣਂ ਨ ਲਬ੍ਭਤੇ ਆਚਰਿਯੇਨ, ਪਟਿਸਮ੍ਭਿਦਾਞਾਣਂ ਆਰਬ੍ਭ ਜਵਨੇ ਜਵਿਤੇਪਿ ਤਦਾਰਮ੍ਮਣਂ ਨ ਲਬ੍ਭਤੇ ਆਚਰਿਯੇਨ. ਮਨੋਦ੍ਵਾਰੇਪਿ ਸਬ੍ਬੇਸਂ ਜਵਨਾਨਂ ਅਨਨ੍ਤਰਂ ਅਨੁਪੁਬ੍ਬਤੋ ਤਦਾਰਮ੍ਮਣਚਿਤ੍ਤਾਨਿ ਭਵਨ੍ਤਿ.

੫੩੩-੪. ਮਨੋਦ੍ਵਾਰੇ ਆਰਮ੍ਮਣਘਟ੍ਟਨਾ ਨ ਵਿਜ੍ਜਤਿ. ਭਵਙ੍ਗਤੋ ਚੇਤਸੋ ਵੀਥਿਚਿਤ੍ਤਸ੍ਸ ਵੁਟ੍ਠਾਨਂ ਕਥਂ ਕੇਨ ਪਕਾਰੇਨ ਹੋਤਿ? ਮਨੋਦ੍ਵਾਰੇਪਿ ਘਟ੍ਟਨਾਯ ਵਿਨਾ ਘਟ੍ਟਨਂ ਵਜ੍ਜੇਤ੍ਵਾ ਆਪਾਥਂ ਆਗਚ੍ਛਨ੍ਤੇਵ ਯਸ੍ਮਾ ਕਾਰਣਾ, ਤਸ੍ਮਾ ਵੀਥਿਚਿਤ੍ਤਾਨਂ ਸਮ੍ਭਵੋ ਹੋਤਿ.

੫੩੫-੬. ਦ੍ਵਾਦਸਾਪੁਞ੍ਞਚਿਤ੍ਤਾਨਂ ਦ੍ਵਾਦਸਅਕੁਸਲਚਿਤ੍ਤਾਨਂ ਵਿਪਾਕਾ ਸਤ੍ਤਸਤ੍ਤਤਿ ਪਾਪਪਾਕਾ ਦ੍ਵਾਦਸਪਾਪਚਿਤ੍ਤਾਨਂ ਵਿਪਾਕਾ ਚਤੁਰਾਸੀਤਿ ਪਵਤ੍ਤਿਯਂ ਹੋਨ੍ਤਿ. ਏਕਸ੍ਸ ਸੋਮਨਸ੍ਸਯੁਤ੍ਤਦਿਟ੍ਠਿਸਮ੍ਪਯੁਤ੍ਤਾਕੁਸਲਸ੍ਸ ਚਕ੍ਖੁਸੋਤਘਾਨਜਿਵ੍ਹਾਕਾਯਵਿਞ੍ਞਾਣਾਨਿ, ਸਮ੍ਪਟਿਚ੍ਛਨਂ, ਉਪੇਕ੍ਖਾਯੁਤ੍ਤਸਨ੍ਤੀਰਣਾਨਿ ਚਾਤਿ ਸਤ੍ਤ ਅਕੁਸਲਪਾਕਾ ਹੋਨ੍ਤਿ. ਤਥਾ ਸੇਸਾਨਂ ਏਕਾਦਸਨ੍ਨਂ ਅਕੁਸਲਾਨਮ੍ਪਿ ਸਤ੍ਤ ਵਿਪਾਕਾ ਹੋਨ੍ਤਿ. ਏਕਾਦਸਵਿਧਾਨਂ ਤੁ, ਹਿਤ੍ਵਾ ਉਦ੍ਧਚ੍ਚਮਾਨਸਂ ਉਦ੍ਧਚ੍ਚਮਾਨਸਂ ਹਿਤ੍ਵਾ ਏਕਾਦਸਵਿਧਾਨਂ ਪਟਿਸਨ੍ਧਿਯੋ ਏਕਾਦਸਵਿਧਾ ਚੇਵ ਭਵਨ੍ਤਿ.

੫੩੭-੮. ਕ੍ਰਿਯਚਿਤ੍ਤੇਸੁ ਸਬ੍ਬੇਸੁ ਯਂ ਆਵਜ੍ਜਨਦ੍ਵਯਂ ਜਵਨਂ ਨ ਚ ਹੋਤਿ, ਤਂ ਆਵਜ੍ਜਨਦ੍ਵਯਂ ਕਰਣਮਤ੍ਤਤ੍ਤਾ ਕਿਰਿਯਾਮਤ੍ਤਤ੍ਤਾ ਵਾਤਪੁਪ੍ਫਸਮਂ ਵਾਤਪੁਪ੍ਫੇਨ ਸਦਿਸਂ ਮਤਂ ਭਗਵਤਾ. ਅਯਮੇਤ੍ਥਾਧਿਪ੍ਪਾਯੋ – ਖੀਣਾਸਵੇ ਉਪ੍ਪਨ੍ਨਕਾਲੇ ਵਾ ਤਂ ਆਵਜ੍ਜਨਦ੍ਵਯਂ ਕਿਰਿਯਚਿਤ੍ਤਂ ਭਵਿਤੁਂ ਯੁਤ੍ਤਂ. ਸਬ੍ਬੇਸੁ ਪੁਥੁਜ੍ਜਨੇਸੁ ਉਪ੍ਪਨ੍ਨਕਾਲੇ ਕਥਂ ਕਿਰਿਯਾ ਹੋਤੀਤਿ ਚੇ? ਕਰਣਮਤ੍ਤਤ੍ਤਾ ਅਫਲਦਾਯਕਂ ਵਾਤਪੁਪ੍ਫਂ ਵਿਯ ਅਫਲਦਾਯਕਂ ਕਿਰਿਯਚਿਤ੍ਤਂ ਭਵਿਤੁਂ ਯੁਤ੍ਤਿਹਾਰੋ ਕਿਰਿਯਾ ਪਨ ਹੋਤਿ. ਯਂ ਸਬ੍ਬਂ ਕਿਰਿਯਚਿਤ੍ਤਂ ਕਿਚ੍ਚਸਾਧਨਤੋ ਜਵਨਕਿਚ੍ਚਸਾਧਨਵਸੇਨ ਜਵਨਤ੍ਤਂ ਜਵਨਭਾਵਂ ਪਤ੍ਤਂ ਛਿਨ੍ਨਮੂਲਸ੍ਸ ਰੁਕ੍ਖਸ੍ਸ ਪੁਪ੍ਫਂ ਅਫਲਂ ਹੋਤਿ ਯਥਾ, ਏਵਂ ਛਿਨ੍ਨਾਵਿਜ੍ਜਾਤਣ੍ਹਾਮੂਲਸ੍ਸ ਵੀਤਰਾਗਸ੍ਸ ਤਂ ਸਬ੍ਬਂ ਕਿਰਿਯਚਿਤ੍ਤਂ ਅਫਲਂ ਵਿਪਾਕਵਿਰਹਿਤਂ ਸਿਯਾ ਭਵੇਯ੍ਯ.

੫੩੯-੪੦. ਪਟਿਚ੍ਚ ਪਨ ਏਤਸ੍ਮਾ, ਫਲਮੇਤੀਤਿ ਪਚ੍ਚਯੋ ਏਕਂ ਧਮ੍ਮਂ ਪਟਿਚ੍ਚ ਏਤਸ੍ਮਾ ਧਮ੍ਮਤੋ ਫਲਂ ਏਤਿ ਪਵਤ੍ਤਤਿ ਤਸ੍ਮਾ ਪਚ੍ਚਯੋ, ਯੋ ਧਮ੍ਮੋ ਯਸ੍ਸ ਧਮ੍ਮਸ੍ਸ ਠਿਤਿਯਾ ਉਪ੍ਪਤ੍ਤਿਯਾਪਿ ਉਪਕਾਰੋ ਨਾਮ ਹੋਤਿ, ਸੋ ਧਮ੍ਮੋ ਤਸ੍ਸ ਧਮ੍ਮਸ੍ਸ ਪਚ੍ਚਯੋਤਿ ਪਚ੍ਚਯੋ ਨਾਮ ਪਣ੍ਡਿਤੇਨ ਪਵੁਚ੍ਚਤੇ. ਸਮ੍ਭਵੋ ਪਭਵੋ ਹੇਤੁ ਕਾਰਣਂ ਪਚ੍ਚਯੋ ਮਤੋ ਭਗਵਤਾ. ਇਦਂ ਵਚਨਂ ਅਞ੍ਞਤ੍ਥ ਦੀਪਨਵਚਨਂ.

੫੪੧. ਲੋਭਾਦਿ ਪਨ ਯੋ ਧਮ੍ਮੋ, ਮੂਲਟ੍ਠੇਨੁਪਕਾਰਕੋ ਯੋ ਲੋਭਾਦਿ ਪਨ ਧਮ੍ਮੋ ਮੂਲਭਾਵੇਨ ਫਲਧਮ੍ਮਸ੍ਸ ਉਪਕਾਰਕੋ, ਸੋ ਲੋਭਾਦਿਧਮ੍ਮੋ ਫਲਧਮ੍ਮਸ੍ਸ ਹੇਤੂਤਿ ਹੇਤੁ ਨਾਮ ਵਿਭਾਵਿਨਾ ਵਿਞ੍ਞਾਤਬ੍ਬੋ.

੫੪੨. ਲੋਭੋ ਦੋਸੋ ਚ ਮੋਹੋ ਚ ਤਥਾ ਅਲੋਭਾਦਯੋ ਤਯੋ ਹੇਤੂ, ਤੇ ਛ ਏਵ ਹੇਤੁਯੋ ਹੋਨ੍ਤਿ, ਜਾਤਿਤੋ ਜਾਤਿਵਸੇਨ ਕੁਸਲਜਾਤਿਅਕੁਸਲਜਾਤਿਅਬ੍ਯਾਕਤਜਾਤਿਵਸੇਨ ਨਵਧਾ ਨਵਹਿ ਕੋਟ੍ਠਾਸੇਹਿ ਸਿਯੁਂ.

੫੪੩-੪. ਧਮ੍ਮਾਨਂ ਕੁਸਲਾਦੀਨਂ, ਕੁਸਲਾਦਿਤ੍ਤਸਾਧਕੋ ਯੋ ਧਮ੍ਮੋ ਕੁਸਲਾਦੀਨਂ ਧਮ੍ਮਾਨਂ ਕੁਸਲਾਦਿਤ੍ਤਸਾਧਕੋ ਕੁਸਲਾਦਿਭਾਵਸਾਧਕੋ, ਸੋ ਧਮ੍ਮੋ ਮੂਲਟ੍ਠੋ ਨਾਮ. ਏਵਂ ਵਚਨਂ ਏਕੇ ਏਕਚ੍ਚੇ ਆਚਰਿਯਾ ਵਦਨ੍ਤਿ. ਏਵਂ ਸਨ੍ਤੇ ਕੁਸਲਾਕੁਸਲਾਦੀਨਂ ਧਮ੍ਮਾਨਂ ਕੁਸਲਾਦਿਤ੍ਤਸਾਧਕਵਸੇਨ ਮੂਲਟ੍ਠੇ ਸਨ੍ਤੇ ਤਂਸਮੁਟ੍ਠਾਨਰੂਪੀਸੁ ਤੇਹਿ ਚਿਤ੍ਤੇਹਿ ਸਮੁਟ੍ਠਾਨਰੂਪੇਸੁ ਤੇਹਿ ਚਿਤ੍ਤੇਹਿ ਸਮੁਟ੍ਠਿਤੇਸੁ ਚਿਤ੍ਤਜਰੂਪੇਸੁ ਹੇਤੂਨਂ ਲੋਭਾਦਿਹੇਤੂਨਂ ਹੇਤੁਪਚ੍ਚਯਤਾ ਕਦਾਚਿਪਿ ਨੇਵ ਸਮ੍ਪਜ੍ਜਤਿ. ਅਯਮੇਤ੍ਥਾਧਿਪ੍ਪਾਯੋ – ਯਦਿ ਚਿਤ੍ਤੇਸੁ ਰੂਪਾਨਿ ਸਮੁਟ੍ਠਾਪੇਨ੍ਤੇਸੁ ਤੇ ਲੋਭਾਦਯੋਪਿ ਚਿਤ੍ਤਾਨਂ ਸਮ੍ਪਯੁਤ੍ਤਚਿਤ੍ਤਾਨਂ ਏਕੁਪ੍ਪਾਦਤ੍ਤਾ ਚ ਰੂਪਾਨਿ ਸਮੁਟ੍ਠਾਪੇਨ੍ਤਿਯੇਵ. ਤਦਾ ਤੇਸਂ ਮਤੇ ਤੇਸਂ ਚਿਤ੍ਤਜਰੂਪਾਨਂ ਕੁਸਲਾਦਿਤ੍ਤਂ ਸਿਯਾ. ਨ ਚ ਕਦਾਚਿ ਰੂਪਾਨਿ ਕੁਸਲਾਦਿਨਾਮਕਾਨਿ ਦਿਸ੍ਸਨ੍ਤਿ ਯਸ੍ਮਾ, ਤਸ੍ਮਾ ਚਿਤ੍ਤਜਰੂਪਾਨਂ ਕੁਸਲਾਦਿਭਾਵਞਾਪਨਤ੍ਥਂ ਤੇਸਂ ਚਿਤ੍ਤਜਰੂਪਾਨਂ ਤੇ ਲੋਭਾਦਯੋ ਹੇਤੁਪਚ੍ਚਯਾ ਨ ਹੋਨ੍ਤਿ, ਇਤਿ ਵਚਨਂ ਵਤ੍ਤਬ੍ਬਂ ਸਿਯਾ. ਏਵਞ੍ਚ ਸਤਿ ਚਿਤ੍ਤਜਰੂਪਾਨਿ ਨਾਮ ਕਦਾਚਿਪਿ ਵਿਯੁਤ੍ਤਾਨਿ ਚਰਨ੍ਤਿ, ਤਸ੍ਮਾ ਕੁਸਲਾਦਿਤ੍ਤਸਾਧਕੋ ਮੂਲਟ੍ਠੋ ਨ ਹੋਤਿ.

੫੪੫-੬. ਹਿ ਸਚ੍ਚਂ ‘‘ਏਵਂ ਸਨ੍ਤੇ ਤੁ ਹੇਤੂਨ’’ਨ੍ਤਿਆਦਿਕਂ ਵਚਨਂ. ਤੇ ਲੋਭਾਦਯੋ ਹੇਤੂ ਤੇਸਂ ਰੂਪਾਨਂ ਕੁਸਲਾਦਿਤਂ ਕੁਸਲਾਦਿਭਾਵਂ ਨ ਸਾਧੇਨ੍ਤਿ ਨ ਨਿਪ੍ਫਾਦੇਨ੍ਤਿ. ਤੇ ਹੇਤੂ ਤੇਸਂ ਪਨ ਰੂਪਾਨਂ ਪਚ੍ਚਯਾ ਨ ਚ ਨ ਹੋਨ੍ਤਿਯੇਵ, ਤਸ੍ਮਾ ਕਾਰਣਾ ਕੁਸਲਾਦੀਨਂ ਧਮ੍ਮਾਨਂ ਕੁਸਲਾਦਿਤ੍ਤਸਾਧਕੋ ਯੋ ਧਮ੍ਮੋ, ਸੋ ਧਮ੍ਮੋ ਮੂਲਟ੍ਠੋਤਿ ਮੂਲਸਭਾਵੋ ਨਾਮ ਸਮਯਞ੍ਞੁਨਾ ਸਮਯਵਿਜਾਨਨਸੀਲੇਨ ਵਿਞ੍ਞੁਨਾ ਗਨ੍ਤਬ੍ਬੋ ਜਾਨਿਤਬ੍ਬੋ.

੫੪੭. ਸੁਪ੍ਪਤਿਟ੍ਠਿਤਭਾਵਸ੍ਸ, ਸਾਧਨੇਨੁਪਕਾਰਕੋ ਸੁਪ੍ਪਤਿਟ੍ਠਿਤਭਾਵਂ ਸਾਧਨੇਨ ਉਪਕਾਰਕੋ ਯੋ ਅਤ੍ਥੋ, ਸੋ ਅਤ੍ਥੋ ਹੇਤੂਨਂ ਲੋਭਾਦੀਨਂ ਮੂਲਟ੍ਠੋ ਮੂਲਸਭਾਵੋ ਇਤਿ ਚ ਗਹਣਂ ਵਿਭਾਵਿਨਾ ਵਿਞ੍ਞਾਤਬ੍ਬਂ.

੫੪੮-੯. ਕੁਸਲਾਕੁਸਲਾ ਹੇਤੂ ਕੁਸਲਾ ਹੇਤੂ, ਅਕੁਸਲਾ ਹੇਤੂ, ਕ੍ਰਿਯਾਹੇਤੂ ਸਬ੍ਬਸੋ ਸਬ੍ਬਪ੍ਪਕਾਰੇਨ ਸਬ੍ਬੇ ਕਿਰਿਯਾਹੇਤੁਯੋ ਚ ਸਮ੍ਪਯੁਤ੍ਤਾਨਂ ਪਞ੍ਚਵੋਕਾਰਭੂਮਿਯਂ ਸਮ੍ਪਯੁਤ੍ਤਾਨਂ ਧਮ੍ਮਾਨਂ ਅਞ੍ਞਮਞ੍ਞਪਚ੍ਚਯਭਾਵੇਨ ਹੇਤੁਪਚ੍ਚਯਤਂ ਯਾਤਾ ਗਤਾ. ਤਂਸਮੁਟ੍ਠਾਨਾਨਂ ਚਿਤ੍ਤਜਰੂਪਾਨਞ੍ਚ ਹੇਤੁਪਚ੍ਚਯਤਂ ਯਾਤਾ ਗਤਾ, ਏਤੇ ਹੇਤੂ ਚਤੁਵੋਕਾਰਭੂਮਿਯਂ ਸਮ੍ਪਯੁਤ੍ਤਾਨਂ ਏਵ ਧਮ੍ਮਾਨਂ ਹੇਤੁਪਚ੍ਚਯਤਂ ਯਾਤਾ ਗਤਾ.

੫੫੦-੧. ਕਾਮੇ ਵਿਪਾਕਹੇਤੂਪਿ ਅਤ੍ਤਨਾ ਸਮ੍ਪਯੁਤ੍ਤਾਨਂ ਹੇਤੁਪਚ੍ਚਯਤਂ ਯਾਤਾ, ਪਟਿਸਨ੍ਧਿਕ੍ਖਣੇਪਿ ਕਟਤ੍ਤਾਰੂਪਜਾਤਾਨਂ ਕਮ੍ਮਜਰੂਪਾਨਂ ਹੇਤੁਪਚ੍ਚਯਤਂ ਯਾਤਾ, ਤਸ੍ਮਾ ਪਟਿਸਨ੍ਧਿਚਿਤ੍ਤੁਪ੍ਪਾਦਕ੍ਖਣੇਯੇਵ ਕਮ੍ਮਜਰੂਪਾਨਂ ਉਪ੍ਪਾਦੋ ਹੋਤਿ, ਯਸ੍ਮਾ ਕਾਰਣਾ ਪਵਤ੍ਤਿਯਂ ਚਿਤ੍ਤਜਾਨਞ੍ਚ ਰੂਪਾਨਂ ਹੇਤੁਪਚ੍ਚਯਤਂ ਗਤਾ.

੫੫੨-੫. ਰੂਪੇ ਵਿਪਾਕਹੇਤੂ ਕਾਮਾਵਚਰਭੂਮਿਯਂ ਹੇਤੁਯੋ ਵਿਯ ਹੇਤੁਪਚ੍ਚਯਾ ਹੋਨ੍ਤਿ, ਪਞ੍ਚਵੋਕਾਰੇ ਲੋਕੁਤ੍ਤਰਵਿਪਾਕਹੇਤਵੋ ਚਿਤ੍ਤਜਾਨਂ ਰੂਪਾਨਞ੍ਚ ਸਮ੍ਪਯੁਤ੍ਤਾਨਞ੍ਚ ਪਞ੍ਚਵੋਕਾਰਭੂਮਿਯਂ ਹੇਤੁਪਚ੍ਚਯਾ ਹੋਨ੍ਤਿ. ਚਤੁਵੋਕਾਰੇ ਲੋਕੁਤ੍ਤਰਵਿਪਾਕਜਾ ਹੇਤਵੋ ਸਮ੍ਪਯੁਤ੍ਤਾਨਂ ਏਵ ਚਤੁਵੋਕਾਰਭੂਮਿਯਂ ਹੇਤੁਪਚ੍ਚਯਾ ਭਵਨ੍ਤਿ. ਇਤਰੇ ਚਤੁਵੋਕਾਰੇ ਅਰੂਪਭਵੇ ਵਿਪਾਕਜਾ ਹੇਤਵੋ ਸਮ੍ਪਯੁਤ੍ਤਾਨਂ ਏਵ ਸਭੂਮਿਯਂ ਅਤ੍ਤਨੋ ਭੂਮਿਯਂ ਅਰੂਪਭੂਮਿਯਂ ਹੇਤੁਪਚ੍ਚਯਾ ਹੋਨ੍ਤਿ. ਹੇਤੁਤ੍ਥੋ ਹੇਤੂਨਂ ਅਤ੍ਥੋ ਹੇਤੁਯੋ ਚੇਵ ਹੇਤੁਪਚ੍ਚਯੋ ਚੇਵ ਹੇਤੁਪਚ੍ਚਯਸਮ੍ਭਵੋ ਹੇਤੁਪਚ੍ਚਯੁਪ੍ਪਤ੍ਤਿ, ਏਵਮੇਵ ਏਵਂ ਇਮਿਨਾ ਪਕਾਰੇਨ. ਸਞ੍ਜਾਤੋ ਸੁਖਹੇਤੁ ਯਸ੍ਸਾਤਿ ਸਞ੍ਜਾਤਸੁਖਹੇਤੁ, ਤੇਨ ਵਿਞ੍ਞੇਯ੍ਯੋ.

੫੫੬-੮. ਛਨ੍ਦੋ ਚਿਤ੍ਤਞ੍ਚ ਵੀਰਿਯਂ ਵੀਮਂਸਾ ਚਾਤਿ ਚਤੁਧਾਧਿਪਤੀ ਲੋਕਾਧਿਪਤਿਨਾ ਸਤ੍ਥੁਨਾ ਵੁਤ੍ਤਾ. ਛਨ੍ਦਂ ਜੇਟ੍ਠਕਂ ਕਤ੍ਵਾ ਚਿਤ੍ਤਸ੍ਸ ਉਪ੍ਪਤ੍ਤਿਕਾਲਸ੍ਮਿਂ ਯੋ ਛਨ੍ਦੋ, ਸੋ ਛਨ੍ਦਾਧਿਪਤਿ ਨਾਮ, ਛਨ੍ਦਂ ਧੁਰਂ ਕਤ੍ਵਾ ਸਮਾਧਿਕਰਣਚਿਤ੍ਤਸ੍ਸ ਏਸੇਵ ਨਯੋ ਸੇਸੇਸੁਪਿ ਚ ਤੀਸੁ ਮਯਾ ਵੁਤ੍ਤਤੋ ਛਨ੍ਦਾਧਿਪਤਿਤੋ ਸੇਸੇਸੁਪਿ ਚ ਅਧਿਪਤੀਸੁ. ਯੋ ਧਮ੍ਮੋ ਜੇਟ੍ਠਟ੍ਠੇਨ ਉਪਕਾਰਕੋ, ਸੋ ਧਮ੍ਮੋ ਅਧਿਪਤੀਤਿ ਅਧਿਪਤਿ ਨਾਮ ਭਗਵਤਾ ਨਿਦ੍ਦਿਟ੍ਠੋ.

੫੫੯. ਸੁਮਤਿਮਤਿਵਿਬੋਧਨਂ ਵਿਚਿਤ੍ਤਂ,

ਕੁਮਤਿਮਤਿਨ੍ਧਨਪਾਵਕਂ ਪਧਾਨਂ;

ਇਮਮਤਿਮਧੁਰਂ ਅਵੇਦਿ ਯੋ ਯੋ,

ਜਿਨਵਚਨਂ ਸਕਲਂ ਅਵੇਦਿ ਸੋ ਸੋ.

ਯੋ ਯੋ ਜਨੋ ਇਮਂ ਅਭਿਧਮ੍ਮਾਵਤਾਰਂ ਸੁਮਤਿਮਤਿਵਿਬੋਧਨਂ ਸੁਮਤੀਨਂ ਸੁਨ੍ਦਰਮਤੀਨਂ ਪਣ੍ਡਿਤਾਨਂ ਮਤਿਯਾ ਵਿਬੋਧਨਕਰਂ ਵਿਚਿਤ੍ਤਂ ਕੁਮਤੀਨਂ ਕੁਚ੍ਛਿਤਮਤੀਨਂ ਬਾਲਾਨਂ ਮਤਿਇਨ੍ਧਨੇ ਪਧਾਨਂ ਪਾਵਕਂ ਅਤਿਮਧੁਰਕਰਂ ਅਵੇਦਿ ਜਾਨਿ, ਸੋ ਸੋ ਜਨੋ ਸਕਲਂ ਜਿਨਵਚਨਂ ਅਵੇਦਿ ਜਾਨਿ.

ਇਤਿ ਅਭਿਧਮ੍ਮਾਵਤਾਰਟੀਕਾਯ

ਪਕਿਣ੍ਣਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਅਟ੍ਠਮੋ ਪਰਿਚ੍ਛੇਦੋ.