੭. ਸਤ੍ਤਮੋ ਪਰਿਚ੍ਛੇਦੋ
ਵਿਪਾਕਚਿਤ੍ਤਪ੍ਪਵਤ੍ਤਿਨਿਦ੍ਦੇਸਵਣ੍ਣਨਾ
੩੭੬. ਅਨਨ੍ਤਞਾਣੇਨ ਨਿਰਙ੍ਗਣੇਨ,
ਗੁਣੇਸਿਨਾ ਕਾਰੁਣਿਕੇਨ ਤੇਨ;
ਵੁਤ੍ਤੇ ਵਿਪਾਕੇ ਮਤਿਪਾਟਵਤ੍ਥਂ,
ਵਿਪਾਕਚਿਤ੍ਤਪ੍ਪਭਵਂ ਸੁਣਾਥ.
ਯੇਨ ਜਿਨੇਨ ਅਨਨ੍ਤਞਾਣੇਨ ਨਿਕ੍ਕਿਲੇਸੇਨ ਗੁਣੇਸਿਨਾ ਕਾਰੁਣਿਕੇਨ ਤੇਨ ਜਿਨੇਨ ਵੁਤ੍ਤੇ ਵਿਪਾਕਸ੍ਮਿਂ ਮਤਿਪਾਟਵਤ੍ਥਂ ਮਤਿਛੇਕਭਾਵਤ੍ਥਾਯ ਵਿਪਾਕਚਿਤ੍ਤਪ੍ਪਭਵਂ ਮਯਾ ਭਣਮਾਨਂ ਵਿਪਾਕਚਿਤ੍ਤਪ੍ਪਵਤ੍ਤਿਂ ਤੁਮ੍ਹੇ ਸੁਣਾਥ.
੩੭੭. ਏਕੂਨਤਿਂਸ ਕਮ੍ਮਾਨਿ, ਪਾਕਾ ਦ੍ਵਤ੍ਤਿਂਸ ਭਗਵਤਾ ਦਸ੍ਸਿਤਾ, ਕਮ੍ਮਾਨਿ ਤੀਸੁ ਦ੍ਵਾਰੇਸੁ ਦਿਸ੍ਸਰੇ, ਵਿਪਾਕਾ ਛਸੁ ਦ੍ਵਾਰੇਸੁ ਦਿਸ੍ਸਨ੍ਤਿ.
੩੭੮-੯. ਕੁਸਲਂ ਕਾਮਲੋਕਸ੍ਮਿਂ ਕਾਮਲੋਕਮ੍ਹਿ ਕੁਸਲਂ ਪਵਤ੍ਤੇ, ਪਟਿਸਨ੍ਧਿਯਞ੍ਚ ਤਂਤਂਪਚ੍ਚਯਮਾਗਮ੍ਮ ਤਂਤਂਪਚ੍ਚਯਂ ਪਟਿਚ੍ਚ. ਸੋ ਸੋ ਪਚ੍ਚਯੋ ਤਂਤਂਪਚ੍ਚਯੋ, ‘‘ਤਤਪਚ੍ਚਯੋ’’ਤਿ ਵਤ੍ਤਬ੍ਬੇ ਨਿਗ੍ਗਹੀਤਾਗਮਵਸੇਨ ‘‘ਤਂਤਂਪਚ੍ਚਯੋ’’ਤਿ ਵੁਤ੍ਤਂ. ਵਿਚ੍ਛਾਕਮ੍ਮਧਾਰਯਸਮਾਸੋਯਂ. ਵਿਵਿਧਂ ਫਲਂ ਦਦਾਤਿ. ਏਕਾਯ ਚੇਤਨਾਯ ਏਕਾ ਪਟਿਸਨ੍ਧਿ ਭਗਵਤਾ ਪਕਾਸਿਤਾ. ਨਾਨਾਕਮ੍ਮੇਹਿ ਨਾਨਾ ਪਟਿਸਨ੍ਧਿਯੋ ਚ ਭਵਨ੍ਤਿ.
੩੮੦-੧. ਤਿਹੇਤੁਕਂ ਤੁ ਯਂ ਕਮ੍ਮਂ ਤਿਹੇਤੁਕਂ ਯਂ ਕਮ੍ਮਂ ਪਨ ਕਾਮਾਵਚਰਸਞ੍ਞਿਤਂ ਤਿਹੇਤੁਕਂ ਵਿਪਾਕਂ ਦੁਹੇਤੁਞ੍ਚ ਵਿਪਾਕਂ ਅਹੇਤੁਞ੍ਚ ਵਿਪਾਕਂ ਦੇਤਿ. ਦੁਹੇਤੁਕਂ ਤੁ ਯਂ ਕਮ੍ਮਂ ਦੁਹੇਤੁਕਂ ਯਂ ਕਮ੍ਮਂ ਪਨ, ਤਂ ਕਮ੍ਮਂ ਤਿਹੇਤੁਕਂ ਵਿਪਾਕਂ ਨ ਦੇਤਿ, ਅਤ੍ਤਨੋ ਵਿਪਾਕਂ ਦੁਹੇਤੁਞ੍ਚ ਅਹੇਤੁਞ੍ਚ ਦੇਤਿ.
੩੮੨-੩. ਤਿਹੇਤੁਕੇਨ ਕਮ੍ਮੇਨ, ਪਟਿਸਨ੍ਧਿ ਤਿਹੇਤੁਕਾ ਹੋਤਿ, ਦੁਹੇਤੁਕਾਪਿ ਪਟਿਸਨ੍ਧਿ ਹੋਤੇਵ, ਅਹੇਤੁਕਾ ਪਟਿਸਨ੍ਧਿ ਨੇਵ ਹੋਤਿ, ਉਕ੍ਕਟ੍ਠਤਿਹੇਤੁਕਕਮ੍ਮੇਨ ਤਿਹੇਤੁਕਾ ਪਟਿਸਨ੍ਧਿ, ਓਮਕਤਿਹੇਤੁਕਕਮ੍ਮੇਨ ਦੁਹੇਤੁਕਾ ਪਟਿਸਨ੍ਧਿ ਹੋਤੀਤਿ ਅਧਿਪ੍ਪਾਯੋ. ਦੁਹੇਤੁਕੇਨ ਕਮ੍ਮੇਨ ਦੁਹੇਤੁਕਾ ਪਟਿਸਨ੍ਧਿ, ਅਹੇਤੁਕਾਪਿ ਪਟਿਸਨ੍ਧਿ ਹੋਤੇਵ, ਤਿਹੇਤੁਕਾ ਪਟਿਸਨ੍ਧਿ ਨੇਵ ਹੋਤਿ. ਉਕ੍ਕਟ੍ਠਦੁਹੇਤੁਕਕਮ੍ਮੇਨ ਦੁਹੇਤੁਕਾ ਪਟਿਸਨ੍ਧਿ, ਓਮਕਦੁਹੇਤੁਕਕਮ੍ਮੇਨ ਅਹੇਤੁਕਾ ਪਟਿਸਨ੍ਧਿ ਹੋਤੀਤਿ ਅਧਿਪ੍ਪਾਯੋ.
੩੮੪. ਅਸਙ੍ਖਾਰਕਮ੍ਮਂ ਅਸਙ੍ਖਾਰਵਿਪਾਕਂ ਦੇਤਿ, ਸਸਙ੍ਖਾਰਵਿਪਾਕਮ੍ਪਿ ਦੇਤਿ, ਸਸਙ੍ਖਾਰਕਮ੍ਮਂ ਸਸਙ੍ਖਾਰਫਲਂ, ਤਥਾ ਅਸਙ੍ਖਾਰਫਲਂ ਦੇਤਿ.
੩੮੫. ਏਕਾਯ ਚੇਤਨਾਯੇਤ੍ਥ ਏਤ੍ਥ ਏਤਾਸੁ ਚੇਤਨਾਸੁ ਏਕਾਯ ਕੁਸਲਾਯ ਚੇਤਨਾਯ ਸੋਲ਼ਸਵਿਧਾ ਵਿਪਾਕਚਿਤ੍ਤਾਨਿ ਭਵਨ੍ਤਿ. ਇਤਿ ਵਚਨਂ ਜਿਨੋ ਪਕਾਸਯੇ.
੩੮੬-੯੨. ਵੇਦਨਾਪਰਿਵਤ੍ਤਨਂ ਆਰਮ੍ਮਣੇਨ ਹੋਤੇਵ, ਤਦਾਰਮ੍ਮਣਚਿਤ੍ਤਮ੍ਪਿ ਜਵਨੇਨ ਨਿਯਾਮਿਤਂ, ਸੋਮਨਸ੍ਸਯੁਤ੍ਤੇ ਕੁਸਲੇ ਜਵਨੇ ਜਵਿਤੇ ਤਦਾਰਮ੍ਮਣਮ੍ਪਿ ਸੋਮਨਸ੍ਸਯੁਤ੍ਤਮੇਵ ਹੋਤੀਤਿ ਅਤ੍ਥੋ. ਉਪੇਕ੍ਖਾਯੁਤ੍ਤਕੁਸਲੇਪਿ ਏਸੇਵ ਨਯੋ. ਕਾਮਾਵਚਰਚਿਤ੍ਤੇਨ ਕੁਸਲੇਨਾਦਿਨਾ ਪਠਮੇਨ ਕੁਸਲੇਨ ਤੁਲ੍ਯੇਨ ਵਿਪਾਕਚਿਤ੍ਤੇਨ. ਤਤਿਯਾਵਿਸੇਸਨਂ. ਯੇਨ ਸਤ੍ਤੇਨ ਗਹਿਤਾ ਪਟਿਸਨ੍ਧਿ ਚੇ ਯਦਿ, ਇਟ੍ਠੇ ਬਲਵਾਰਮ੍ਮਣੇ ਮਨਾਪੇ ਅਤਿਮਹਨ੍ਤਾਰਮ੍ਮਣੇ ਤਸ੍ਸ ਸਤ੍ਤਸ੍ਸ ਚਕ੍ਖੁਸ੍ਸ ਚਕ੍ਖੁਪਸਾਦਸ੍ਸ ਆਪਾਥਂ ਪਾਕਟਭਾਵਂ ਆਗਤੇ ਸਤਿ ਮਨੋਧਾਤੁਯਾ ਤਾਯ ਭਵਙ੍ਗਸ੍ਮਿਂ ਆਵਟ੍ਟਿਤੇ ਭਵਙ੍ਗਸੋਤੇ ਛਿਨ੍ਦਿਤੇ ਸਤਿ ਚਕ੍ਖੁਵਿਞ੍ਞਾਣਕਾਦੀਸੁ ਵੀਥਿਚਿਤ੍ਤੇਸੁ ਜਾਤੇਸੁ ਪਠਮਂ ਕੁਸਲਂ ਕਾਮਮਾਨਸਂ ਜਵਨਂ ਹੁਤ੍ਵਾ ਜਾਯਤੇ. ਸਤ੍ਤਕ੍ਖਤ੍ਤੁਵਾਰਾਨਿ ਜਵਿਤ੍ਵਾਨ ਪਠਮੇ ਮਹਾਕੁਸਲੇ ਗਤੇ ਤਦੇਵ ਤਂ ਏਵ ਇਟ੍ਠਂ ਆਰਮ੍ਮਣਂ ਕਤ੍ਵਾ ਤੇਨੇਵ ਪਠਮਮਹਾਕੁਸਲੇਨ ਸਦਿਸਂ ਤਦਾਰਮ੍ਮਣਵਿਪਾਕਚਿਤ੍ਤਂ. ਸਨ੍ਧਿਯਾ ਤੁਲ੍ਯਤੋ ਪਟਿਸਨ੍ਧਿਯਾ ਤੁਲ੍ਯਭਾਵੇਨ ਮੂਲਭਵਙ੍ਗਨ੍ਤਿ ਮੂਲਭਵਙ੍ਗਂ ਨਾਮ ਭਗਵਤਾ ਪਵੁਚ੍ਚਤੇ. ਤਞ੍ਚ ਤਦਾਰਮ੍ਮਣਚਿਤ੍ਤਂ ਸਨ੍ਤੀਰਣਂ ਸੋਮਨਸ੍ਸਯੁਤ੍ਤਂ ਸਨ੍ਤੀਰਣਂ ਦਸ੍ਸਨਂ ਸਮ੍ਪਟਿਚ੍ਛਨਂ ਏਤ੍ਥ ਏਤਸ੍ਮਿਂ ਵੀਥਿਚਿਤ੍ਤੇ ਗਣਨੂਪਗਚਿਤ੍ਤਾਨਿ ਗਣਨਂ ਉਪਗਤਾਨਿ ਚਿਤ੍ਤਾਨਿ ਚਤ੍ਤਾਰਿ ਏਵ ਭਵਨ੍ਤਿ.
੩੯੩-੪. ਯਦਾ ਹਿ ਦੁਤਿਯਂ ਚਿਤ੍ਤਂ, ਕੁਸਲਂ ਜਵਨਂ ਯਦਾ ਯਸ੍ਮਿਂ ਕਾਲੇ ਤਸ੍ਸੇਵ ਸੋਮਨਸ੍ਸਤਿਹੇਤੁਨੋ ਪੁਗ੍ਗਲਸ੍ਸ ਦੁਤਿਯਂ ਕੁਸਲਂ ਚਿਤ੍ਤਂ ਜਵਨਂ ਹੋਤਿ, ਤਦਾ ਤਸ੍ਮਿਂ ਕਾਲੇ ਤੇਨ ਜਵਨੇਨ ਤੁਲ੍ਯਵਿਪਾਕਂ ਤਦਾਰਮ੍ਮਣਂ. ਤਸ੍ਸ ਸਨ੍ਧਿਯਾ ਅਸਮਾਨਤ੍ਤਾ ਤਸ੍ਸ ਤਦਾਰਮ੍ਮਣਚਿਤ੍ਤਸ੍ਸ ਸਨ੍ਧਿਯਾ ਅਸਮਾਨਤ੍ਤਾ ਦ੍ਵੇ ਨਾਮਾਨਿ ਅਸ੍ਸ ਵਿਪਾਕਚਿਤ੍ਤਸ੍ਸ ਅਨੇਨ ਵਿਪਾਕਚਿਤ੍ਤੇਨ ਲਬ੍ਭਰੇ ਲਬ੍ਭਨ੍ਤਿ, ‘‘ਆਗਨ੍ਤੁਕਭਵਙ੍ਗ’’ਨ੍ਤਿ ਨਾਮਂ ‘‘ਤਦਾਰਮ੍ਮਣਕ’’ਨ੍ਤਿ ਚ ਨਾਮਂ ਇਤਿ ਦ੍ਵੇ ਨਾਮਾਨਿ ਲਬ੍ਭਨ੍ਤਿ.
੩੯੫-੬. ਯਦਾ ਤਸ੍ਸੇਵ ਪੁਗ੍ਗਲਸ੍ਸ ਤਤਿਯਂ ਪੁਞ੍ਞਂ ਜਵਨਂ ਹੋਤਿ, ਤਦਾ ਤੇਨ ਜਵਨੇਨ ਸਦਿਸਂ ਤਤਿਯਂ ਪਾਕਂ ਤਦਾਰਮ੍ਮਣਿਕਂ ਸਿਯਾ. ਇਦਂ ਵਿਪਾਕਚਿਤ੍ਤਂ ਆਗਨ੍ਤੁਕਭਵਙ੍ਗਨ੍ਤਿ ਆਗਨ੍ਤੁਭਵਙ੍ਗਂ ਨਾਮ ਭਗਵਤਾ ਵੁਚ੍ਚਤੇ, ਪੁਰਿਮਾਨਿ ਚ ਪਞ੍ਚ ਵਿਪਾਕਚਿਤ੍ਤਾਨਿ ਇਮਿਨਾ ਪਨ ਤਤਿਯਵਿਪਾਕੇਨ ਪਨ ਸਦ੍ਧਿਂ ਛ ਚਿਤ੍ਤਾਨਿ ਹੋਨ੍ਤਿ.
੩੯੭-੮. ਯਦਾ ਚਤੁਤ੍ਥਂ ਕੁਸਲਂ ਜਵਨਂ ਹੋਤਿ, ਤਦਾ ਤੇਨ ਜਵਨੇਨ ਤੁਲ੍ਯਂ ਚਤੁਤ੍ਥਵਿਪਾਕਂ ਤਦਾਰਮ੍ਮਣਭਾਵਂ ਵਜੇ ਗਚ੍ਛੇਯ੍ਯ. ਚਤੁਤ੍ਥਵਿਪਾਕਂ ਆਗਨ੍ਤੁਕਭਵਙ੍ਗਂ ਤਦਾਰਮ੍ਮਣਨਾਮਕਂ ਹੋਤਿ, ਪੁਰਿਮਾਨਿ ਛ ਪਾਕਾਨਿ ਇਮਿਨਾ ਸਹ ਚਤੁਤ੍ਥਪਾਕੇਨ ਸਤ੍ਤ ਚਿਤ੍ਤਾਨਿ ਹੋਨ੍ਤਿ.
੩੯੯-੪੦੩. ਯਦਾ ਯਸ੍ਮਿਂ ਕਾਲੇ ਤਸ੍ਮਿਂ ਚਕ੍ਖੁਦ੍ਵਾਰੇ ਇਟ੍ਠਮਜ੍ਝਤ੍ਤਾਰਮ੍ਮਣਂ ਪਨ ਤਥਾ ਆਪਾਥਂ ਆਗਚ੍ਛਤਿ ਚ, ਤਦਾ ਵੁਤ੍ਤਨਯੇਨ ਆਵਜ੍ਜਨਦਸ੍ਸਨਸਮ੍ਪਟਿਚ੍ਛਨਚਿਤ੍ਤੇਸੁ ਜਾਤੇਸੁ ਇਧ ਇਮਸ੍ਮਿਂ ਮਜ੍ਝਤ੍ਤਾਰਮ੍ਮਣੇ ਆਰਮ੍ਮਣਵਸੇਨ ਵੇਦਨਾ ਪਰਿਵਤ੍ਤਤਿ, ਤਸ੍ਮਾ ਉਪੇਕ੍ਖਾਸਹਗਤਂ ਸਨ੍ਤੀਰਣਂ ਮਨੋ ਹੋਤਿ. ਉਪੇਕ੍ਖਾਸਹਗਤੇਸੁ ਏਵ ਚਤੂਸੁਪਿ ਜਵਨੇਸੁ ਜਵਿਤੇਸੁ ਤੇਹਿ ਜਵਨੇਹਿ ਤੁਲ੍ਯਾਨਿ ਚਤ੍ਤਾਰਿ ਵਿਪਾਕਚਿਤ੍ਤਾਨਿ ਜਾਯਰੇ. ਅਚ੍ਚਨ੍ਤਂ ਏਕਨ੍ਤੇਨ ਵੇਦਨਾਯ ਉਪੇਕ੍ਖਾਵੇਦਨਾਯ ਪੁਰਿਮੇਹਿ ਸੋਮਨਸ੍ਸਸਹਗਤੇਹਿ ਚਿਤ੍ਤੇਹਿ ਅਸਮਾਨਤ੍ਤਾ ਚਤ੍ਤਾਰਿ ਚਿਤ੍ਤਾਨਿ ਨਾਮਤੋ ਪਿਟ੍ਠਿਭਵਙ੍ਗਾਨਿ ਨਾਮ ਹੋਨ੍ਤਿ, ਪਿਟ੍ਠਿਭਵਙ੍ਗਾਨਿ ਸੋਮਨਸ੍ਸਵਿਪਾਕਾਨਂ ਪਚ੍ਛਾਭਾਗੇ ਭਵਙ੍ਗਾਨੀਤਿ ਅਤ੍ਥੋ. ਇਮਾਨਿ ਉਪੇਕ੍ਖਾਸਹਗਤਾਨਿ ਪਞ੍ਚ ਵਿਪਾਕਾਨਿ ਪੁਰਿਮੇਹਿ ਸਤ੍ਤਹਿ ਵਿਪਾਕੇਹਿ ਸਦ੍ਧਿਂ ਦ੍ਵਾਦਸ ਵਿਪਾਕਾਨਿ ਭਵਨ੍ਤਿ. ਇਤਿ ਵਚਨਂ ਧੀਰੋ ਵਿਨਿਦ੍ਦਿਸੇ.
੪੦੪-੬. ਯਥਾ ਚਕ੍ਖੁਦ੍ਵਾਰੇ ਦ੍ਵਾਦਸ ਵਿਪਾਕਾਨਿ ਹੋਨ੍ਤਿ, ਤਥਾ ਏਵਂ ਸੋਤਾਦੀਸੁ ਦ੍ਵਾਰੇਸੁਪਿ ਦ੍ਵਾਦਸ ਪਾਕਾਨਿ ਹੋਨ੍ਤਿ. ਇਤਿ ਵਚਨਂ ਧੀਰੋ ਨਿਦ੍ਦਿਸੇ, ਇਮੇ ਮਯਾ ਵੁਤ੍ਤਾ ਵਿਪਾਕਾ ਸਮਸਟ੍ਠਿ ਭਵਨ੍ਤਿ. ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਏਕਾਯ ਚੇਤਨਾਯ ਕਮ੍ਮੇ ਆਯੂਹਿਤੇ ਪਵਤ੍ਤਿਤੇ ਸਮਸਟ੍ਠਿ ਵਿਪਾਕਾਨਿ ਉਪ੍ਪਜ੍ਜਨ੍ਤਿ, ਇਮਸ੍ਮਿਂ ਵਚਨੇ ਸਂਸਯੋ ਨਤ੍ਥਿ. ਗਹਿਤਾਗ੍ਗਹਣੇਨੇਤ੍ਥ ਏਤ੍ਥ ਏਤੇਸੁ ਵਿਪਾਕੇਸੁ ਗਹਿਤਾਨਂ ਵਿਪਾਕਾਨਂ ਅਗ੍ਗਹਣੇਨ ਚਕ੍ਖੁਦ੍ਵਾਰੇ ਦ੍ਵਾਦਸ ਪਾਕਾ, ਸੋਤਵਿਞ੍ਞਾਣਕਾਦੀਨਿ ਚਤ੍ਤਾਰਿ ਚਾਤਿ ਸੋਲ਼ਸ ਪਾਕਾਨਿ ਹੋਨ੍ਤਿ.
੪੦੭-੧੧. ਏਕੇਨ ਤਿਹੇਤੁਕਕੁਸਲੇਨ ਅਸਙ੍ਖਾਰਿਕੇਨ ਕਮ੍ਮੇਨ ਆਯੂਹਿਤੇ ਯਥਾ, ਏਵਮੇਵ ਸਸਙ੍ਖਾਰਤਿਹੇਤੁਕਕੁਸਲੇਨਾਪਿ ਅਸਙ੍ਖਾਰਸਸਙ੍ਖਾਰਉਪੇਕ੍ਖਾਸਹਗਤੇਹਿਪਿ ਕੁਸਲੇਹਿ ਕਮ੍ਮੇ ਆਯੂਹਿਤੇ ਪਵਤ੍ਤਿਤੇ ਤੇਸਂ ਤਿਣ੍ਣਂ ਕੁਸਲਾਨਂ ਵਿਪਾਕੇਹਿ ਤੀਹਿਪਿ ਦਿਨ੍ਨਾਯ ਪਟਿਸਨ੍ਧਿਯਾ ਏਸੇਵ ਨਯੋ ਪਣ੍ਡਿਤੇਨ ਜਾਨਿਤਬ੍ਬੋ. ਇਧ ਇਮਸ੍ਮਿਂ ਉਪੇਕ੍ਖਾਸਹਗਤਦ੍ਵਯੇ ਇਟ੍ਠਮਜ੍ਝਤ੍ਤਗੋਚਰਸ੍ਸ ਵਸੇਨ ਵਿਪਾਕਚਿਤ੍ਤਪ੍ਪਵਤ੍ਤਿਂ ਪਠਮਂ ਦਸ੍ਸੇਤ੍ਵਾ ਦਸ੍ਸੇਤਬ੍ਬਾਥ ਪਚ੍ਛਾ ਤੁ, ਇਟ੍ਠਸ੍ਮਿਂ ਗੋਚਰੇ ਇਧ ਅਥ ਪਚ੍ਛਾ ਮਯਾ ਵੁਤ੍ਤਚਿਤ੍ਤਪ੍ਪਵਤ੍ਤਿਤੋ ਪਚ੍ਛਾਕਾਲੇ ਪਨ ਇਧ ਇਮਸ੍ਮਿਂ ਇਟ੍ਠਗੋਚਰੇ ਏਕੇਕਸ੍ਮਿਂ ਪਨ ਦ੍ਵਾਦਸ ਦ੍ਵਾਦਸ ਪਾਕਾ ਪਣ੍ਡਿਤੇਨ ਦਸ੍ਸੇਤਬ੍ਬਾ. ਗਹਿਤਾਗ੍ਗਹਣੇਨੇਤ੍ਥ ਏਤ੍ਥ ਏਤੇਸੁ ਵਿਪਾਕੇਸੁ ਗਹਿਤਾਨਂ ਵਿਪਾਕਾਨਂ ਅਗ੍ਗਹਣੇਨ ਸੋਲ਼ਸ ਪਾਕਚਿਤ੍ਤਾਨਿ ਹੋਨ੍ਤਿ. ਪੁਬ੍ਬੇ ਕਾਲੇ ਮਯਾ ਵੁਤ੍ਤਨਯੇਨੇਵ ਸਬ੍ਬਂ ਵਚਨਂ ਅਸੇਸਤੋ ਅਸੇਸਭਾਵੇਨ ਪਣ੍ਡਿਤੇਨ ਞੇਯ੍ਯਂ.
੪੧੨-੪. ਤਿਹੇਤੁਕੇਨ ਕਮ੍ਮੇਨ, ਪਟਿਸਨ੍ਧਿ ਤਿਹੇਤੁਕਾ ਭਵਤਿ, ਇਤਿ ਅਯਂ ਵਾਰੋ ਏਤ੍ਤਾਵਤਾ ਏਤ੍ਤਕੇਨ ਵਚਨੇਨ ਮਯਾ ਵੁਤ੍ਤੋ. ਏਕਂ ਕਮ੍ਮਂ ਏਕਸ੍ਮਿਂ ਭਵੇ ਏਕਂ ਪਟਿਸਨ੍ਧਿਂ ਜਨੇਤਿ, ਤਤੋ ਪਟਿਸਨ੍ਧਿਤੋ ਅਪਰਂ ਅਞ੍ਞਂ ਦੁਤਿਯਂ ਪਟਿਸਨ੍ਧਿਂ ਨ ਜਨੇਤਿ, ਪਵਤ੍ਤਿਯਂ ਅਨੇਕਾਨਿ ਵਿਪਾਕਾਨਿ ਸਞ੍ਜਨੇਤਿ. ਹਿ ਸਚ੍ਚਂ ‘‘ਏਕਂ ਕਮ੍ਮ’’ਨ੍ਤਿਆਦਿਕਂ ਵਚਨਂ. ਏਕਸ੍ਮਾ ਬੀਜਾ ਏਕਤੋ ਬੀਜਤੋ ਏਕਂ ਅਙ੍ਕੁਰਂ ਜਾਯਤਿ, ਅਸ੍ਸ ਬੀਜਸ੍ਸ ਬਹੂਨਿ ਫਲਾਨਿ ਹੇਤੁਪ੍ਪਵਤ੍ਤਿਤੋ ਸਲਿਲਾਦਿਹੇਤੁਪ੍ਪਤ੍ਤਿਯਾ ਹੋਨ੍ਤਿ.
੪੧੫-੨੧. ਦੁਹੇਤੁਕੇਨ ਕਮ੍ਮੇਨ, ਪਟਿਸਨ੍ਧਿ ਦੁਹੇਤੁਕਾ ਹੋਤਿ, ਇਤਿ ਵਚਨਂ ਅਯਂ ਵਾਰੋ ਅਨੁਪੁਬ੍ਬੇਨ ਅਨੁਪਟਿਪਾਟਿਯਾ ਆਗਤੋ. ਇਧ ਇਮਸ੍ਮਿਂ ਅਧਿਕਾਰੇ ਦੁਹੇਤੁਕੇਨ ਪੁਞ੍ਞੇਨ ਸੋਮਨਸ੍ਸਯੁਤ੍ਤੇਨ ਅਸਙ੍ਖਾਰਿਕੇਨ ਚਿਤ੍ਤੇਨ ਕਮ੍ਮੇ ਆਯੂਹਿਤੇ ਪਨ ਦੁਹੇਤੁਕੇਨ ਸੋਮਨਸ੍ਸਯੁਤ੍ਤਕੁਸਲੇਨ ਤੁਲ੍ਯੇਨ ਪਾਕੇਨ ਯੇਨ ਸਤ੍ਤੇਨ ਗਹਿਤਾ ਪਟਿਸਨ੍ਧਿ ਚੇ, ਇਟ੍ਠੇ ਆਰਮ੍ਮਣੇ ਤਸ੍ਸ ਸਤ੍ਤਸ੍ਸ ਚਕ੍ਖੁਦ੍ਵਾਰੇ ਆਪਾਥਂ ਆਗਤੇ ਸੋਮਨਸ੍ਸਯੁਤ੍ਤੇ ਞਾਣਹੀਨੇ ਕੁਸਲਮਾਨਸੇ ਤਸ੍ਮਿਂ ਦੁਹੇਤੁਕੇ ਸਤ੍ਤਕ੍ਖਤ੍ਤੁਂ ਜਵਿਤ੍ਵਾਨ ਗਤੇ ਤਂ ਏਵ ਆਰਮ੍ਮਣਂ ਕਤ੍ਵਾ ਤਦਨਨ੍ਤਰਂ ਤਸ੍ਸ ਜਵਨਸ੍ਸ ਅਨਨ੍ਤਰਂ ਤਂਸਰਿਕ੍ਖਕਂ ਤੇਨ ਜਵਨੇਨ ਸਦਿਸਂ ਏਕਨ੍ਤਂ ਅਸਙ੍ਖਾਰਿਕਮਾਨਸਂ ਜਾਯਤਿ. ਤਨ੍ਤਿ ਤਂ ਚਿਤ੍ਤਂ ਮੂਲਭਵਙ੍ਗਨ੍ਤਿ ਮੂਲਭਵਙ੍ਗਂ ਨਾਮ ਤਦਾਰਮ੍ਮਣਮਿਚ੍ਚਪਿ ਤਦਾਰਮ੍ਮਣਂ ਨਾਮ ਉਭਯਮ੍ਪਿ ਨਾਮਂ ਤਸ੍ਸੇਵ ਨਾਮਂ ਤਸ੍ਸ ਚਿਤ੍ਤਸ੍ਸ ਏਵ ਨਾਮਂ. ਇਤਿ ਏਵਂ ਇਮਿਨਾ ਪਕਾਰੇਨ ਭਗਵਤਾ ਪਰਿਦੀਪਿਤਂ. ਦੁਹੇਤੁਕੇ ਸਸਙ੍ਖਾਰੇ ਕੁਸਲੇ ਜਵਨੇ ਜਵਿਤੇਪਿ ਚ ਤਂਸਮਂ ਤੇਨ ਚਿਤ੍ਤੇਨ ਸਦਿਸਂ ਆਗਨ੍ਤੁਕਸਙ੍ਖਾਤਂ ਤਦਾਰਮ੍ਮਣਮਾਨਸਂ ਹੋਤਿ.
੪੨੨-੯. ਤਥੇਵ ਚ ਤਥਾ ਏਵ ਚ ਇਟ੍ਠਮਜ੍ਝਤ੍ਤਗੋਚਰੇ ਦੁਹੇਤੂਨਂ ਦ੍ਵਿਨ੍ਨਂ ਉਪੇਕ੍ਖਾਯੁਤ੍ਤਾਨਂ ਜਵਨਾਨਂ ਅਨਨ੍ਤਰਂ ਤਾਦਿਸਾਨਿ ਤੇਹਿ ਜਵਨੇਹਿ ਸਦਿਸਾਨਿ ਦ੍ਵੇ ਤਦਾਰਮ੍ਮਣਮਾਨਸਾਨਿ ਜਾਯਨ੍ਤੇ, ਤੇਸਂ ਤਦਾਰਮ੍ਮਣਮਾਨਸਾਨਂ ‘‘ਪਿਟ੍ਠਿਭਵਙ੍ਗ’’ਨ੍ਤਿ ਨਾਮਂ, ‘‘ਆਗਨ੍ਤੁਕਭਵਙ੍ਗ’’ਨ੍ਤਿ ਚ ਨਾਮਂ ਹੋਤਿ. ਸਨ੍ਤੀਰਣਦ੍ਵਯਞ੍ਚੇਵ ਦਸ੍ਸਨਂ ਸਮ੍ਪਟਿਚ੍ਛਨਂ ਇਮਾਨਿ ਦ੍ਵੇ ਭਵਙ੍ਗਾਨਿ ਚਾਤਿ ਅਟ੍ਠ ਵਿਪਾਕਾ ਚਕ੍ਖੁਦ੍ਵਾਰੇ ਹੋਨ੍ਤਿ. ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਪਞ੍ਚਸੁ ਦ੍ਵਾਰੇਸੁਪਿ ਚ ਅਟ੍ਠ ਅਟ੍ਠ ਵਿਪਾਕੇ ਕਤ੍ਵਾ ਪਵਤ੍ਤਿਯਂ ਚਤ੍ਤਾਲੀਸ ਵਿਪਾਕਾਨਿ ਭਵਨ੍ਤਿ. ਗਹਿਤਾਗ੍ਗਹਣੇਨੇਤ੍ਥ, ਚਕ੍ਖੁਦ੍ਵਾਰੇ ਪਨਟ੍ਠ ਚ ਏਤ੍ਥ ਏਤੇਸੁ ਵਿਪਾਕੇਸੁ ਗਹਿਤਾਨਂ ਵਿਪਾਕਾਨਂ ਅਗ੍ਗਹਣੇਨ ਚਕ੍ਖੁਦ੍ਵਾਰੇ ਅਟ੍ਠ ਚ ਵਿਪਾਕਾ ਸੋਤਘਾਨਾਦਿਨਾ ਵਿਪਾਕੇਨ ਸਦ੍ਧਿਂ ਦ੍ਵਾਦਸ ਏਵ ਵਿਪਾਕਾਨਿ ਭਵਨ੍ਤਿ. ਏਕਾਯ ਚੇਤਨਾਯੇਵਂ ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਏਕਾਯ ਚੇਤਨਾਯ ਕਮ੍ਮੇ ਆਯੂਹਿਤੇ ਪਵਤ੍ਤਿਤੇ ਪਨ ਸਤਿ ਦ੍ਵਾਦਸੇਵ ਵਿਪਾਕਾਨਿ ਭਵਨ੍ਤਿ. ਇਤਿ ਵਚਨਂ ਵਿਜਿਤਕੁਸਲਯੁਦ੍ਧਸਙ੍ਗਾਮੇਨ ਪਕਾਸਿਤਂ ਦੇਸਿਤਂ. ਦੁਹੇਤੁਕਤ੍ਤਯੇਨਾਪਿ, ਸੇਸੇਨ ਸਦਿਸੇਨ ਤੁ ਮਯਾ ਵੁਤ੍ਤਤੋ ਦੁਹੇਤੁਤੋ ਸੇਸੇਨ ਦੁਹੇਤੁਕਤ੍ਤਯੇਨਾਪਿ ਸਦਿਸੇਨ ਪਾਕੇਨ ਆਦਿਨ੍ਨਸਨ੍ਧਿਨੋ ਗਹਿਤਪਟਿਸਨ੍ਧਿਕਸ੍ਸ ਸਤ੍ਤਸ੍ਸ ਏਵਂ ਨਯੋ ਮਤੋ ਕਥਿਤੋ ਨਿਰਙ੍ਗਣੇਨ. ਦੁਹੇਤੁਕੇਨ ਕਮ੍ਮੇਨ ਦੁਹੇਤੁਕਾ ਪਟਿਸਨ੍ਧਿ ਹੋਤਿ. ਇਤਿ ਅਯਂ ਵਾਰੋ ਚ ਏਤ੍ਤਾਵਤਾ ਏਤ੍ਤਕੇਨ ਵਚਨੇਨ ਮਯਾ ਵੁਤ੍ਤੋ.
੪੩੦-੮. ਦੁਹੇਤੁਕੇਨ ਕਮ੍ਮੇਨ ਅਹੇਤੁਕਾ ਪਟਿਸਨ੍ਧਿ ਹੋਤਿ, ਇਤਿ ਅਯਂ ਵਾਰੋ ਅਨੁਪੁਬ੍ਬੇਨ ਪਟਿਪਾਟਿਯਾ ਆਗਤੋ. ਤੇਸੁ ਚਤੂਸੁਪਿ ਦੁਹੇਤੁਕੇਸੁ ਕੁਸਲੇਸੁ ਚਿਤ੍ਤੇਸੁ ਅਞ੍ਞਤਰੇਨੇਵ ਹੇਤੁਕੇਨ ਕਮ੍ਮੇ ਆਯੂਹਿਤੇ ਪਵਤ੍ਤਿਤੇ ਸਤਿ ਤਸ੍ਸੇਵ ਦੁਹੇਤੁਕਸ੍ਸ ਕੁਸਲਜਵਨਸ੍ਸ ਪਾਕਭੂਤਾਯ ਉਪੇਕ੍ਖਾਸਹਗਤਾਹੇਤੁਕਾਯ ਮਨੋਵਿਞ੍ਞਾਣਧਾਤੁਯਾ ਆਦਿਨ੍ਨਪਟਿਸਨ੍ਧਿਨੋ ਸਤ੍ਤਸ੍ਸ ਸਾ ਪਟਿਸਨ੍ਧਿ ਕਮ੍ਮਸਦਿਸਾ ਨਾਮ ਨ ਵਤ੍ਤਬ੍ਬਾ ਪਣ੍ਡਿਤੇਹਿ. ਹਿ ਸਚ੍ਚਂ ‘‘ਪਟਿਸਨ੍ਧਿ ਨ ਵਤ੍ਤਬ੍ਬਾ’’ਤਿਆਦਿਕਂ ਵਚਨਂ. ਕਮ੍ਮਂ ਦੁਹੇਤੁਕਂ ਹੋਤਿ, ਪਟਿਸਨ੍ਧਿ ਅਹੇਤੁਕਾ ਹੋਤਿ. ਤਸ੍ਸ ਦੇਹਿਨੋ ਸਤ੍ਤਸ੍ਸ ਵੁਡ੍ਢਿਮੁਪੇਤਸ੍ਸ ਵੁਡ੍ਢਿਂ ਉਪਗਤਸ੍ਸ ਚਕ੍ਖੁਦ੍ਵਾਰੇ ਪਨ ਇਟ੍ਠਮਜ੍ਝਤ੍ਤਗੋਚਰੇ ਆਪਾਥਮਾਗਤੇ ਸਤਿ ਦੁਹੇਤੁਕਾਨਂ ਚਤੁਨ੍ਨਂ ਪੁਞ੍ਞਾਨਂ ਯਸ੍ਸ ਕਸ੍ਸਚਿ ਜਵਨਸ੍ਸ ਅਵਸਾਨਮ੍ਹਿ ਇਦਂ ਅਹੇਤੁਕਂ ਮਨੋ ਤਦਾਰਮ੍ਮਣਭਾਵੇਨ ਜਾਯਤਿ. ਏਤ੍ਥ ਏਤਸ੍ਮਿਂ ਵਚਨੇ ਸਂਸਯੋ ਸਨ੍ਦੇਹੋ ਨਤ੍ਥਿ, ਤਂ ਅਹੇਤੁਕਚਿਤ੍ਤਂ ਮੂਲਭਵਙ੍ਗਞ੍ਚ ਤਦਾਰਮ੍ਮਣਮੇਵ ਚ ਹੋਤਿ. ਚਕ੍ਖੁਵਿਞ੍ਞਾਣਕਾਦੀਸੁਪਿ ਵੀਥਿਚਿਤ੍ਤੇਸੁ ਜਾਤੇਸੁ ਉਪੇਕ੍ਖਾਸਹਗਤਂਯੇਵ ਸਨ੍ਤੀਰਣਮ੍ਪਿ ਚ ਹੋਤਿ. ਤੇਸੁ ਏਕਂ ਠਪੇਤ੍ਵਾਨ, ਗਹਿਤਾਗ੍ਗਹਣੇਨਿਧ ਤੇਸੁ ਦ੍ਵੀਸੁ ਸਨ੍ਤੀਰਣਤਦਾਰਮ੍ਮਣਕਿਚ੍ਚੇਸੁ ਵਿਪਾਕੇਸੁ ਏਕਂ ਸਨ੍ਤੀਰਣਕਿਚ੍ਚਂ ਤਦਾਰਮ੍ਮਣਕਿਚ੍ਚਂ ਤਂ ਚਿਤ੍ਤਂ ਠਪੇਤ੍ਵਾ ਗਹਿਤਾਨਂ ਵਿਪਾਕਾਨਂ ਅਗ੍ਗਹਣੇਨ ਇਧ ਇਟ੍ਠਮਜ੍ਝਤ੍ਤਾਰਮ੍ਮਣੇ ਗਣਨੂਪਗਚਿਤ੍ਤਾਨਿ ਤੀਣਿਯੇਵ ਭਵਨ੍ਤਿ.
੪੩੯-੪੧. ਇਟ੍ਠੇ ਆਰਮ੍ਮਣੇ ਚਕ੍ਖੁ-ਦ੍ਵਾਰੇ ਆਪਾਥਮਾਗਤੇ ਤਦਾ ਸਨ੍ਤੀਰਣਞ੍ਚੇਵ ਸੋਮਨਸ੍ਸਯੁਤ੍ਤਂਯੇਵ ਹੋਤਿ, ਤਦਾਰਮ੍ਮਣਮਾਨਸਞ੍ਚ ਸੋਮਨਸ੍ਸਯੁਤ੍ਤਂਯੇਵ ਹੋਤਿ, ਤੇਸੁ ਸਨ੍ਤੀਰਣਤਦਾਰਮ੍ਮਣਕਿਚ੍ਚੇਸੁ ਵਿਪਾਕੇਸੁ ਏਕੇਕਂ ਸਨ੍ਤੀਰਣਕਿਚ੍ਚਂ, ਤਦਾਰਮ੍ਮਣਕਿਚ੍ਚਂ ਵਾ ਚਿਤ੍ਤਂ ਗਹੇਤ੍ਵਾ ਪੁਰਿਮਾਨਿ ਚ ਤੀਣਿ ਚਤ੍ਤਾਰਿ ਏਵ ਵਿਪਾਕਾਨਿ ਭਵਨ੍ਤਿ. ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਪਞ੍ਚਸੁ ਦ੍ਵਾਰੇਸੁਪਿ ਚਤ੍ਤਾਰਿ ਚਤ੍ਤਾਰਿ ਵਿਪਾਕਚਿਤ੍ਤਾਨੀਤਿ ਪਵਤ੍ਤਿਯਂ ਵਿਪਾਕਾਨਿ ਵੀਸਤਿ ਚਿਤ੍ਤਾਨਿ ਹੋਨ੍ਤਿ.
੪੪੨-੮. ਚਕ੍ਖੁਦ੍ਵਾਰੇ ਤੁ ਚਤ੍ਤਾਰਿ, ਗਹਿਤਾਗ੍ਗਹਣੇਨਿਧ ਗਹਿਤਾਨਂ ਵਿਪਾਕਾਨਂ ਅਗ੍ਗਹਣੇਨ ਚਕ੍ਖੁਦ੍ਵਾਰੇ ਪਨ ਚਤ੍ਤਾਰਿ ਵਿਪਾਕਾਨਿ ਇਧ ਇਮਸ੍ਮਿਂ ਇਟ੍ਠਾਰਮ੍ਮਣੇ ਸੋਤਘਾਨਾਦਿਨਾ ਵਿਪਾਕੇਨ ਸਦ੍ਧਿਂ ਅਹੇਤੁਕਂ ਅਟ੍ਠਕਂ ਹੋਤਿ ਏਵ. ਅਹੇਤੁਕਪਟਿਸਨ੍ਧਿਸ੍ਸ ਸਤ੍ਤਸ੍ਸ ਦੁਹੇਤੁਕਂ, ਤਿਹੇਤੁਕਂ ਵਾ ਤਦਾਰਮ੍ਮਣਂ ਨ ਭਵੇ ਨ ਭਵੇਯ੍ਯ, ਦੁਹੇਤੁਪਟਿਸਨ੍ਧਿਨੋ ਸਤ੍ਤਸ੍ਸ ਤਿਹੇਤੁਕਂ ਤਦਾਰਮ੍ਮਣਂ ਨ ਭਵੇ. ਜਾਤਾ ਸੁਗਤਿਯਂ ਯੇਨ, ਪਾਕੇਨ ਪਟਿਸਨ੍ਧਿ ਤੁ ਸੁਗਤਿਯਂ ਯੇਨ ਪਾਕੇਨ ਪਟਿਸਨ੍ਧਿ ਜਾਤਾ, ਤੇਨ ਵਿਪਾਕੇਨ ਤੁਲ੍ਯਮ੍ਪਿ, ਹੀਨਂ ਵਾ ਤੇਸਂ ਤਦਾਰਮ੍ਮਣਂ ਭਵੇਯ੍ਯ. ਮਨੁਸ੍ਸਲੋਕਂ ਸਨ੍ਧਾਯ, ਵੁਤ੍ਤਞ੍ਚਾਹੇਤੁਕਟ੍ਠਕਂ ਸੁਗਤਿਯਂ ਅਹੇਤੁਕਟ੍ਠਕਞ੍ਚ ਮਨੁਸ੍ਸਲੋਕਞ੍ਚ ਸਨ੍ਧਾਯ ਪਟਿਚ੍ਚ ਕਾਰਣਂ ਕਤ੍ਵਾ ਮਯਾ ਵੁਤ੍ਤਂ. ਚਤੂਸੁਪਿ ਅਪਾਯੇਸੁ ਪਨ ਅਪੇਤੋ ਅਯੋ ਪਤਿਟ੍ਠਾ ਏਤੇਹੀਤਿ ਅਪਾਯੋ, ਤੇਸੁ. ਪਵਤ੍ਤੇ ਅਹੇਤੁਕਂ ਅਟ੍ਠਕਂ ਆਪਾਯਿਕੇਹਿ ਲਬ੍ਭਤਿ. ਥੇਰੋ ਨੇਰਯਿਕਾਨਂ ਤੁ, ਧਮ੍ਮਂ ਦੇਸੇਤਿ ਵਸ੍ਸਤਿ ਥਿਰੋ ਥਿਰਕਾਰਧਮ੍ਮੋ ਯਸ੍ਮਿਂ ਅਤ੍ਥੀਤਿ ਥੇਰੋ, ਦੁਤਿਯਅਗ੍ਗਸਾਵਕਭੂਤੋ ਇਦ੍ਧਿਮਾ ਮੋਗ੍ਗਲ੍ਲਾਨਤ੍ਥੇਰੋ ਨੇਰਯਿਕਾਨਂ ਨਿਰਯੇ ਜਾਤਾਨਂ ਸਤ੍ਤਾਨਂ ਧਮ੍ਮਂ ਦੇਸੇਤਿ ਵਸ੍ਸਤਿ, ‘‘ਉਚ੍ਛਙ੍ਗੇ ਮਂ ਨਿਸੀਦਿਤ੍ਵਾ’’ਤਿਆਦੀਸੁ ਵਿਯ ਦੇਵਂ ਵਸ੍ਸਾਪੇਤੀਤਿ ਅਤ੍ਥੋ. ਗਨ੍ਧਂ ਵਾਯੁਞ੍ਚ ਮਾਪੇਤਿ ਯਦਾ, ਤਦਾ ਪਨ ਤੇਸਂ ਨੇਰਯਿਕਾਨਂ ਸਤ੍ਤਾਨਂ ਤੇਹਿ ਨੇਰਯਿਕਸਤ੍ਤੇਹਿ ਥੇਰਂ ਦਿਸ੍ਵਾ, ਧਮ੍ਮਞ੍ਚ ਸੁਤ੍ਵਾ, ਗਨ੍ਧਞ੍ਚ ਘਾਯਿਤ੍ਵਾ ਜਲਂ ਉਦਕਞ੍ਚ ਪਿਵਤਂ ਪਿਵਨ੍ਤਾਨਂ ਮੁਦੁਂ ਵਾਯੁਞ੍ਚ ਤੇਹਿ ਫੁਸਤਂ ਫੁਸਨ੍ਤਾਨਂ ਤੇਸਂ ਨੇਰਯਿਕਸਤ੍ਤਾਨਂ ਚਕ੍ਖੁਵਿਞ੍ਞਾਣਕਾਦੀਨਿ ਪਞ੍ਚਪਿ ਪੁਞ੍ਞਜਾਨਿ ਏਵ ਕੁਸਲਵਿਪਾਕਾਨਿ ਏਵ ਸਨ੍ਤੀਰਣਦ੍ਵਯਂ ਪੁਞ੍ਞਜਂ ਏਵ ਕੁਸਲਵਿਪਾਕਂ ਏਵ ਪੁਞ੍ਞਜਾ ਏਵ ਏਕਾ ਮਨੋਧਾਤੁ ਇਤਿ ਅਟ੍ਠਕਂ ਹੋਤਿ.
੪੪੯-੫੦. ਅਯਂ ਤਾਵ ਕਥਾ ‘‘ਚਕ੍ਖੁਵਿਞ੍ਞਾਣਕਾਦੀਨਿ ਪੁਞ੍ਞਜਾਨੇਵਾ’’ਤਿਆਦਿਕਾ ਅਯਂ ਕਥਾ ਇਟ੍ਠਇਟ੍ਠਮਜ੍ਝਤ੍ਤਗੋਚਰੇ ਕਾਮਾਵਚਰੇ ਪੁਞ੍ਞਾਨਂ ਜਵਨਾਨਂ ਵਸੇਨ ਮਯਾ ਵੁਤ੍ਤਾ. ਤਦਾਰਮ੍ਮਣਚੇਤਸੋ ਤਦਾਰਮ੍ਮਣਚਿਤ੍ਤਸ੍ਸ ਯਂ ਨਿਯਮਤ੍ਤਂ ‘‘ਤਦਾਰਮ੍ਮਣਮਾਨਸਂ ਜਵਨੇਨ ਨਿਯਾਮਿਤ’’ਨ੍ਤਿਆਦਿਵਚਨੇਨ ਮਯਾ ਵੁਤ੍ਤਂ, ਤਂ ਨਿਯਮਤ੍ਤਂ ਕੁਸਲਂ ਸਨ੍ਧਾਯ ਵੁਤ੍ਤਂ. ਸੋਮਨਸ੍ਸਯੁਤ੍ਤੇ ਕਾਮਾਵਚਰਕੁਸਲੇ ਜਵਿਤੇ ਤਦਾਰਮ੍ਮਣਮ੍ਪਿ ਸੋਮਨਸ੍ਸਯੁਤ੍ਤਮੇਵ ਹੋਤਿ, ਉਪੇਕ੍ਖਾਯੁਤ੍ਤੇ ਕਾਮਾਵਚਰਕੁਸਲੇ ਜਵਿਤੇ ਤਦਾਰਮ੍ਮਣਮ੍ਪਿ ਉਪੇਕ੍ਖਾਯੁਤ੍ਤਮੇਵ ਹੋਤਿ, ਨੇਤਂ ਅਕੁਸਲੇ ਉਪੇਕ੍ਖਾਯੁਤ੍ਤੇ ਵਿਚਿਕਿਚ੍ਛਾਦਿਕੇ ਅਕੁਸਲੇ ਜਵਨੇ ਪਨ ਜਵਿਤੇ ਸੋਮਨਸ੍ਸਯੁਤ੍ਤਮ੍ਪਿ ਤਦਾਰਮ੍ਮਣਂ ਹੋਤੀਤਿ ਅਧਿਪ੍ਪਾਯੋ. ਇਤਿਪਿ ਵਚਨਂ ਆਚਰਿਯੇਨ ਦੀਪਿਤਂ.
੪੫੧-੭. ਇਧ ਇਮਸ੍ਮਿਂ ਅਧਿਪ੍ਪਾਯੇ ਅਕੁਸਲਚਿਤ੍ਤੇਸੁ ਸੋਮਨਸ੍ਸਯੁਤ੍ਤੇਸੁ ਚਤੂਸੁਪਿ ਇਟ੍ਠੇ ਆਰਮ੍ਮਣੇ ਤੇਸੁ ਚਿਤ੍ਤੇਸੁ ਜਵਿਤੇਸੁ ਸੋਮਨਸ੍ਸਯੁਤ੍ਤਾ ਅਹੇਤੁਮਨੋਵਿਞ੍ਞਾਣਧਾਤੁ ਤਦਨਨ੍ਤਰਂ ਤੇਸਂ ਅਕੁਸਲਜਵਨਾਨਂ ਅਨਨ੍ਤਰਂ ਤਦਾਰਮ੍ਮਣਭਾਵੇਨ ਜਾਯਤਿ. ਉਪੇਕ੍ਖਾਯੁਤ੍ਤੇਸੁ ਛਸੁ ਅਕੁਸਲਚਿਤ੍ਤੇਸੁ ਇਟ੍ਠਮਜ੍ਝਤ੍ਤੇ ਗੋਚਰੇ ਜਵਿਤੇਸੁ ਪੁਞ੍ਞਜਾ ਉਪੇਕ੍ਖਾਸਹਗਤਾ ਅਹੇਤੁਮਨੋਵਿਞ੍ਞਾਣਧਾਤੁ ਏਵ ਤਦਨਨ੍ਤਰਂ ਵਾ ਤੇਸਂ ਉਪੇਕ੍ਖਾਸਹਗਤਾਨਂ ਛਨ੍ਨਂ ਅਕੁਸਲਜਵਨਾਨਂ ਅਨਨ੍ਤਰਂ ਤਦਾਰਮ੍ਮਣਭਾਵੇਨ ਜਾਯਤਿ. ਇਟ੍ਠਾਰਮ੍ਮਣਯੋਗਸ੍ਮਿਂ ਬੁਦ੍ਧਰੂਪਾਦਿਇਟ੍ਠਾਰਮ੍ਮਣਯੋਗਸ੍ਮਿਂ ਕਙ੍ਖਤੋ ‘‘ਬੁਦ੍ਧੋ ਨੁ ਖੋ, ਨੋ ਬੁਦ੍ਧੋ’’ਤਿ ਕਙ੍ਖਨ੍ਤਸ੍ਸ ਸਤ੍ਤਸ੍ਸ ਉਦ੍ਧਤਸ੍ਸ ਵਾ ਸਤ੍ਤਸ੍ਸ ਤਦਾਰਮ੍ਮਣਮਾਨਸਂ ਸੋਮਨਸ੍ਸਯੁਤ੍ਤਂ ਅਹੇਤੁਕਂ ਵਿਪਾਕਂ ਹੋਤਿ ਪਿਟ੍ਠਿਭਵਙ੍ਗਂ. ਸੋਮਨਸ੍ਸਯੁਤੇ ਚਿਤ੍ਤੇ, ਜਵਨੇ ਜਵਿਤੇ ਪਨ ਸੋਮਨਸ੍ਸਯੁਤ੍ਤਾ ਏਵ ਪਞ੍ਚ ਤਦਾਰਮ੍ਮਣਮਾਨਸਾ ਪਣ੍ਡਿਤੇਨ ਗਵੇਸਿਤਬ੍ਬਾ. ਉਪੇਕ੍ਖਾਸਹਗਤੇ ਚਿਤ੍ਤੇ ਜਵਨੇ ਪਨ ਜਵਿਤੇ ਸਤਿ ਉਪੇਕ੍ਖਾਸਹਗਤਾ ਛ ਚ ਤਦਾਰਮ੍ਮਣਮਾਨਸਾ ਪਣ੍ਡਿਤੇਨ ਗਵੇਸਿਤਬ੍ਬਾ.
੪੫੮-੬੩. ਤਿਹੇਤੁਸੋਮਨਸ੍ਸੇਨ, ਆਦਿਨ੍ਨਪਟਿਸਨ੍ਧਿਨੋ ਸਤ੍ਤਸ੍ਸ ਝਾਨਤੋ ਪਰਿਹੀਨਸ੍ਸ ਵਿਪ੍ਪਟਿਸਾਰਿਨੋ ਤਂ ਝਾਨਂ ਪਚ੍ਚਵੇਕ੍ਖਤੋ ਪਚ੍ਚਵੇਕ੍ਖਨ੍ਤਸ੍ਸ ਦੋਮਨਸ੍ਸਯੁਤ੍ਤਂ ਚਿਤ੍ਤਂ ਹੋਤਿ. ਤਸ੍ਸ ਦੋਮਨਸ੍ਸਸ੍ਸ ਅਨਨ੍ਤਰਂ ਕਿਂ ਮਾਨਸਂ ਜਾਯਤੇ, ਤ੍ਵਂ ਦੋਮਨਸ੍ਸਯੁਤ੍ਤਜਵਨਸ੍ਸ ਅਨਨ੍ਤਰਮਾਨਸਂ ਬ੍ਰੂਹਿ ਕਥੇਹਿ. ਪਟ੍ਠਾਨੇ ਪਟਿਸਿਦ੍ਧਾ ਹਿ ਦੋਮਨਸ੍ਸਸ੍ਸਾਨਨ੍ਤਰਂ ਸੋਮਨਸ੍ਸਸ੍ਸ ਉਪ੍ਪਤ੍ਤਿ ਪਟ੍ਠਾਨੇ ਪਟਿਸਿਦ੍ਧਾ ਪਟ੍ਠਾਨਪ੍ਪਕਰਣੇ ਭਗਵਤਾ ਨਿਵਾਰਿਤਾ, ਅਸ੍ਸ ਸੋਮਨਸ੍ਸਸ੍ਸ ਵਾ ਅਨਨ੍ਤਰਂ ਦੋਮਨਸ੍ਸਸ੍ਸ ਉਪ੍ਪਤ੍ਤਿ ਪਟ੍ਠਾਨੇ ਪਟ੍ਠਾਨਪ੍ਪਕਰਣੇ ਪਟਿਸਿਦ੍ਧਾ ਭਗਵਤਾ ਨਿਵਾਰਿਤਾ. ਮਹਗ੍ਗਤਂ ਪਨਾਰਬ੍ਭ ਮਹਗ੍ਗਤਂ ਪਟਿਚ੍ਚ ਜਵਨੇ ਜਵਿਤੇਪਿ ਚ ਤਦਾਰਮ੍ਮਣਮਾਨਸਂ ਤਤ੍ਥੇਵ ਤਸ੍ਮਿਂ ਪਟ੍ਠਾਨੇ ਏਵ ਪਟਿਸਿਦ੍ਧਂ ਭਗਵਤਾ ਨਿਵਾਰਿਤਂ. ਤਸ੍ਮਾ ਕਾਰਣਾ ਭਵਙ੍ਗਪਾਤੋ ਵਾ ਤਦਾਰਮ੍ਮਣਮੇਵ ਵਾ ਨ ਹੋਤਿ. ਕਿਂ ਨੁ ਕਾਤਬ੍ਬਂ ਤੇਸਂ ਭਵਙ੍ਗਤਦਾਰਮ੍ਮਣਾਨਂ ਅਭਾਵੇ ਕਾਰਣਂ ਯਂ ਕਾਤਬ੍ਬਂ, ਅਮ੍ਹੇਹਿ ਤਂ ਕਾਰਣਂ ਕਿਂ ਨੁ ਪੁਚ੍ਛਾਮ, ਤਂ ਤਦਤ੍ਥਂ ਆਭਿਧਮ੍ਮਿਕਭਾਵੇਨ ਆਭਿਧਮ੍ਮਿਕ ਤਂ ਕਾਰਣਂ ਵਦ ਵਦਾਹਿ. ਉਪੇਕ੍ਖਾਸਹਗਤਾਹੇਤੁਮਨੋਵਿਞ੍ਞਾਣਧਾਤੁ ਪੁਞ੍ਞਾਪੁਞ੍ਞਵਿਪਾਕਾ ਤਦਾਰਮ੍ਮਣਿਕਾ ਸਿਯਾ ਭਵੇਯ੍ਯ.
੪੬੪-੭. ਇਮਸ੍ਸ ਤਦਾਰਮ੍ਮਣਸ੍ਸ ਆਵਜ੍ਜਨਂ ਕਿਂ ਨਤ੍ਥਿ? ਤਂ ਤਦਾਰਮ੍ਮਣਮਾਨਸਂ ਕਥਂ ਕੇਨ ਪਕਾਰੇਨ ਜਾਯਤੇ? ਭਵਙ੍ਗਆਵਜ੍ਜਨਾਨਂ ਚਿਤ੍ਤਾਨਂ ਕਿਂ ਆਵਜ੍ਜਨਮਤ੍ਤਂ? ਮਗ੍ਗਸ੍ਸ ਅਨਨ੍ਤਰਸ੍ਸ ਚ ਫਲਸ੍ਸਾਪਿ ਕਿਂ ਆਵਜ੍ਜਨਂ ਨਤ੍ਥਿ? ਨਿਰੋਧਾ ਚ ਨਿਰੋਧਤੋ ਵੁਟ੍ਠਹਨ੍ਤਸ੍ਸ ਭਿਕ੍ਖੁਨੋ ਫਲਚਿਤ੍ਤਸ੍ਸ ਵਾਤਿ ਮਯਾ ਸੁਤਂ, ਏਵਂ ਇਮਿਨਾ ਮਯਾ ਵੁਤ੍ਤਪ੍ਪਕਾਰੇਨ ਆਵਜ੍ਜਨਂ ਨਤ੍ਥਿ. ਵਿਨਾ ਆਵਜ੍ਜਨੇਨਾਪਿ, ਹੋਤੁ ਜਾਯਤੁ ਮਾਨਸਂ ਚਿਤ੍ਤਂ ਆਵਜ੍ਜਨੇਨ ਵਿਨਾ ਆਵਜ੍ਜਨਂ ਵਜ੍ਜੇਤ੍ਵਾ ਹੋਤੁ ਜਾਯਤੁ, ਕਿਮਸ੍ਸਾਰਮ੍ਮਣਂ ਅਸ੍ਸ ਤਦਾਰਮ੍ਮਣਮਾਨਸਸ੍ਸ ਕਿਂ ਆਰਮ੍ਮਣਂ, ਪਣ੍ਡਿਤ, ਤ੍ਵਂ ਆਰਮ੍ਮਣਂ ਯਦਿ ਜਾਨਾਸਿ, ਤਂ ਆਰਮ੍ਮਣਂ ਬ੍ਰੂਹਿ ਮਯ੍ਹਂ ਕਥੇਹਿ. ਵਿਨਾ ਆਰਮ੍ਮਣੇਨੇਤਂ ਏਤਂ ਮਾਨਸਂ ਆਰਮ੍ਮਣੇਨ ਵਿਨਾ ਆਰਮ੍ਮਣਂ ਵਜ੍ਜੇਤ੍ਵਾ ਨ ਜਾਯਤਿ. ਹਿ ਸਚ੍ਚਂ ‘‘ਵਿਨਾ ਆਰਮ੍ਮਣੇਨੇਤ’’ਨ੍ਤਿਆਦਿਕਂ ਵਚਨਂ, ਤਦਾਰਮ੍ਮਣਮਾਨਸਂ ਯਦਾ ਦੋਮਨਸ੍ਸਯੁਤ੍ਤਂ ਜਵਨਂ ਮਹਗ੍ਗਤਾਰਮ੍ਮਣਂ ਜਵਤਿ, ਤਦਾ ਤਸ੍ਮਿਂਯੇਵ ਜਵਨਚਿਤ੍ਤਕ੍ਖਣੇ ਪਰਿਤ੍ਤੇਸੁ ਕਾਮਾਵਚਰਾਰਮ੍ਮਣੇਸੁ ਯਂ ਕਿਞ੍ਚਿ ਪਰਿਤ੍ਤਾਰਮ੍ਮਣਂ ਆਰਬ੍ਭ ਪਟਿਚ੍ਚ ਜਾਯਤਿ.
੪੬੮-੭੩. ਉਤੁਬੀਜਨਿਯਾਮੋ ਚ ਉਤੁਨਿਯਾਮੋ ਬੀਜਨਿਯਾਮੋ ਚ ਕਮ੍ਮਧਮ੍ਮਨਿਯਾਮਤਾ ਚ ਕਮ੍ਮਨਿਯਾਮਤਾ ਚ ਸੀਲਾਦਿਪਾਰਮੀਧਮ੍ਮਨਿਯਾਮਤਾ ਚ ਚਿਤ੍ਤਸ੍ਸ ਨਿਯਾਮੋ ਚਾਤਿ ਪਞ੍ਚ ਨਿਯਾਮਤਾ ਪਣ੍ਡਿਤੇਨ ਞੇਯ੍ਯਾ. ਤਤ੍ਥ ਤੇਸੁ ਪਞ੍ਚਸੁ ਨਿਯਾਮੇਸੁ ਸਬ੍ਬੇਸਂ ਪਨ ਰੁਕ੍ਖਾਨਂ ਏਕਪ੍ਪਹਾਰੇਨ ਫਲਪੁਪ੍ਫਾਦਿਧਾਰਣਂ ਉਤੁ, ਅਯਂ ਉਤੁਨਿਯਾਮਤਾ. ਤੇਸਂ ਤੇਸਂ ਤੁ ਬੀਜਾਨਂ, ਤਂਤਂਤੁਲ੍ਯਫਲੁਬ੍ਭਵੋ ਤੇਸਂ ਤੇਸਂ ਬੀਜਾਨਂ ਪਨ ਤੇਹਿ ਤੇਹਿ ਬੀਜੇਹਿ ਤੁਲ੍ਯਾਨਮ੍ਪਿ ਸਸ੍ਸਾਨਂ ਫਲਾਨਂ ਉਪ੍ਪਤ੍ਤਿ, ਅਯਂ ਬੀਜਨਿਯਾਮਤਾ. ਮਤ੍ਥਕੇ ਨਾਲ਼ਿਕੇਰਸ੍ਸ ਨਾਲ਼ਿਕੇਰਫਲਸ੍ਸ ਮਤ੍ਥਕੇ ਛਿਦ੍ਦਤ੍ਤਂ ਛਿਦ੍ਦਭਾਵੋ, ਅਯਂ ਬੀਜਜੋ ਬੀਜਤੋ ਜਾਤੋ ਨਿਯਾਮੋ. ਤਿਹੇਤੁਕਕਮ੍ਮਂ ਤਿਹੇਤੁਕਞ੍ਚ ਵਿਪਾਕਂ ਦੁਹੇਤੁਕਞ੍ਚ ਵਿਪਾਕਂ ਅਹੇਤੁਕਞ੍ਚ ਵਿਪਾਕਂ ਯਤੋ ਯਂ ਕਮ੍ਮਂ ਦੇਤਿ, ਅਯਂ ਕਮ੍ਮਨਿਯਾਮਤਾ. ਬੋਧਿਸਤ੍ਤਸ੍ਸ ਜਾਤਿਯਂ ਜਿਨਙ੍ਕੁਰਸ੍ਸ ਜਾਤਿਕ੍ਖਣੇ ਮੇਦਨੀਕਮ੍ਪਨਾਦਿਕਂ ਅਨੇਕਵਿਸੇਸਤ੍ਤਂ, ਅਯਂ ਸੀਲਾਦਿਪਾਰਮੀਧਮ੍ਮਨਿਯਾਮਤਾ. ਤੇਨ ਗੋਚਰੇਨ ਪਸਾਦਸ੍ਮਿਂ ਘਟ੍ਟਿਤੇ ਸਤਿ ਇਧ ਇਮਸ੍ਮਿਂ ਚਿਤ੍ਤਵੀਥਿਯਂ ਆਵਜ੍ਜਨਾਦੀਨਂ ਚਿਤ੍ਤਾਨਂ ਉਪ੍ਪਤ੍ਤਿ, ਅਯਂ ਚਿਤ੍ਤਨਿਯਾਮਤਾ.
੪੭੪. ਯੋ ਪੁਗ੍ਗਲੋ ਧੀਰੋ ਧੀਰਸਮ੍ਪਨ੍ਨੋ ਗੁਣਸਮ੍ਪਨ੍ਨੋ ਵਿਕ੍ਖਿਤ੍ਤਪਾਪੋ ਮੋਹਨ੍ਧਕਾਰਾਪਗਮਂ ਅਨ੍ਧਕਾਰਮਨਿਸ੍ਸਾਯ ਅਵਿਜ੍ਜਾਨਿਸ੍ਸਰਣਂ ਯਦਿਚ੍ਛੇ ਸਚੇ ਇਚ੍ਛੇਯ੍ਯ, ਸੋ ਧੀਰੋ ਇਮਂ ਅਭਿਧਮ੍ਮਾਵਤਾਰਪ੍ਪਕਰਣਂ ਅਨ੍ਧਜ੍ਜਨਾਨਂ ਅਨ੍ਧਸਦਿਸਬਾਲਜਨਾਨਂ ਹਦਯਨ੍ਧਕਾਰਂ ਵਿਦ੍ਧਂਸਨਂ ਅਨ੍ਧਕਾਰਸਨ੍ਨਿਸ੍ਸਿਤਸ੍ਸ ਯਸ੍ਸ ਹਦਯਸ੍ਸ ਵਿਦ੍ਧਂਸਨਕਰਂ ਜਲਨ੍ਤਂ ਦੀਪਂ ਜਲਮਾਨਂ ਦੀਪਂ. ਪਯਤ੍ਤੋਤਿ ਪਕਾਰੇਨ ਯਤਤਿ ਵੀਰਿਯਂ ਕਰੋਤੀਤਿ ਪਯਤ੍ਤੋ, ਸਤਤਂ ਸਬ੍ਬਦਾ ਸਿਕ੍ਖੇਥ ਸਜ੍ਝਾਯਨਧਾਰਣਚਿਨ੍ਤਨਵਸੇਨ ਸਿਕ੍ਖੇਯ੍ਯ.
ਇਤਿ ਅਭਿਧਮ੍ਮਾਵਤਾਰਟੀਕਾਯ
ਵਿਪਾਕਚਿਤ੍ਤਪ੍ਪਵਤ੍ਤਿਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
ਸਤ੍ਤਮੋ ਪਰਿਚ੍ਛੇਦੋ.