੨੨. ਬਾਵੀਸਤਿਮੋ ਪਰਿਚ੍ਛੇਦੋ

ਞਾਣਦਸ੍ਸਨਵਿਸੁਦ੍ਧਿਨਿਦ੍ਦੇਸਵਣ੍ਣਨਾ

੧੩੧੯-੨੧. ਇਦਾਨਿ ਞਾਣਦਸ੍ਸਨਵਿਸੁਦ੍ਧਿਯਾ ਨਿਦ੍ਦੇਸੇ ਅਨੁਪ੍ਪਤ੍ਤੇ ਸਾ ਯਸ੍ਸ ਞਾਣਸ੍ਸ ਅਨਨ੍ਤਰਂ ਉਪ੍ਪਜ੍ਜਤਿ, ਤਂ ਤਾਵ ਦਸ੍ਸੇਨ੍ਤੋ ‘‘ਇਤੋ ਪਰ’’ਨ੍ਤਿਆਦਿਮਾਹ. ਇਤੋ ਪਰਨ੍ਤਿ ਇਤੋ ਅਨੁਲੋਮਞਾਣਤੋ ਉਪਰਿ. ਆਵਜ੍ਜਨਿਯਠਾਨਤ੍ਤਾਤਿ ਆਵਜ੍ਜਨਕਿਚ੍ਚਂ ਕਰੋਨ੍ਤਂ ਕਿਰਿਯਮਨੋਧਾਤੁ ਵਿਯ ਮਗ੍ਗਸ੍ਸ ਆਵਜ੍ਜਨਟ੍ਠਾਨੇ ਠਿਤਤ੍ਤਾ ਅਬ੍ਬੋਹਾਰਿਕਮੇਵ ਉਭਯਵਿਸੁਦ੍ਧਿਲਕ੍ਖਣਾਭਾਵਤੋ. ਕਿਞ੍ਚਾਪਿ ਏਵਂ, ਤਥਾਪਿ ਵੁਟ੍ਠਾਨਗਾਮਿਨਿਵਿਪਸ੍ਸਨਾਯ ਪਰਿਯੋਸਾਨਤ੍ਤਾ ਵਿਪਸ੍ਸਨਾਪਕ੍ਖਿਯਮੇਵਾਤਿ ਆਹ ‘‘ਵਿਪਸ੍ਸਨਾਯ ਸੋਤਸ੍ਮਿਂ, ਪਤਿਤਤ੍ਤਾ ਵਿਪਸ੍ਸਨਾ’’ਤਿ. ਏਤੇਨਸ੍ਸ ਪਟਿਪਦਾਞਾਣਦਸ੍ਸਨਵਿਸੁਦ੍ਧਿਭਜਨਂ ਦਸ੍ਸੇਤਿ.

੧੩੨੨. ਪੁਥੁਜ੍ਜਨੇਸੁ ਭਵਂ ਪੋਥੁਜ੍ਜਨਿਕਂ, ਤਦੇਵ ਗੋਤ੍ਤਂ ਅਰਿਯੇਹਿ ਅਸਮ੍ਮਿਸ੍ਸਾ ਪੁਥੁਜ੍ਜਨਸਮਞ੍ਞਾਤਿ ਪੋਥੁਜ੍ਜਨਿਕਗੋਤ੍ਤਂ. ਏਕਵਂਸਜਾਨਞ੍ਹਿ ਸਮਾਨਾ ਸਮਞ੍ਞਾ ‘‘ਗੋਤ੍ਤ’’ਨ੍ਤਿ ਵੁਚ੍ਚਤਿ, ਗਂ ਤਾਯਤਿ ਬੁਦ੍ਧਿਂ, ਅਭਿਧਾਨਞ੍ਚ ਏਕਂਸਿਕਵਿਸਯਤਾਯ ਰਕ੍ਖਤੀਤਿ ਕਤ੍ਵਾ. ਵਾ-ਸਦ੍ਦੋ ਵਕ੍ਖਮਾਨਤ੍ਥਵਿਕਪ੍ਪਨੇ. ਅਭਿਭੁਯ੍ਯ ਪਵਤ੍ਤਿਤੋ ਗੋਤ੍ਰਭੂਤਿ ਸਮ੍ਬਨ੍ਧੋ. ਗੋਤ੍ਤਂ ਵੁਚ੍ਚਤਿ ਨਿਬ੍ਬਾਨਂ ‘‘ਅਰਿਯੋ’’ਤਿ ਬੁਦ੍ਧਿਯਾ, ਅਭਿਧਾਨਸ੍ਸ ਚ ਤਾਯਨਤੋ ਪਵਤ੍ਤਨਤੋਤਿ ਅਧਿਪ੍ਪਾਯੋ. ਤਤੋ ਭਵਤੀਤਿ ਤਤੋ ਗੋਤ੍ਤਤੋ ਆਰਮ੍ਮਣਪਚ੍ਚਯਤੋ ਭਵਤਿ. ਇਤਿ-ਸਦ੍ਦੋ ਚੇਤ੍ਥ ਹੇਤੁਤ੍ਥੋ ਦਟ੍ਠਬ੍ਬੋ. ਤੇਨ ਯਸ੍ਮਾ ਤਤੋ ਭਵਤਿ, ਤਸ੍ਮਾ ਗੋਤ੍ਰਭੂਤਿ ਅਤ੍ਥੋ.

੧੩੨੩-੫. ਞਾਣਦਸ੍ਸਨਵਿਸੁਦ੍ਧਿ ਏਵ ਞਾਣਦਸ੍ਸਨਸੁਦ੍ਧਿਕਂ. ਤਂ ਸਮ੍ਪਾਦੇਤੁਂ ਪਨਿਚ੍ਛਤਾ ਤੇਨ ਭਿਕ੍ਖੁਨਾ ਯਂ ਅਞ੍ਞਂ ਕਿਞ੍ਚਿਪਿ ਕਾਤਬ੍ਬਂ, ਤਂ ਨਤ੍ਥੀਤਿ ਸਮ੍ਬਨ੍ਧੋ. ਕਸ੍ਮਾ ਨਤ੍ਥੀਤਿ ਚੇ ਆਹ ‘‘ਯਂ ਹੀ’’ਤਿਆਦਿ. ‘‘ਕਤਮੇਵਾ’’ਤਿ ਵੁਤ੍ਤੇ ‘‘ਕਥ’’ਨ੍ਤਿ ਅਨੁਯੋਗਸ੍ਸ ਉਪਟ੍ਠਿਤਤ੍ਤਾ ‘‘ਅਨੁਲੋਮਾਵਸਾਨਂ ਹੀ’’ਤਿਆਦਿਨਾ ਤਂ ਸਮਤ੍ਥੇਤਿ.

੧੩੨੬-੭. ਏਵਂ ਉਪ੍ਪਨ੍ਨਅਨੁਲੋਮਞਾਣਸ੍ਸ ਪਨਸ੍ਸ ਏਤੇਹਿ ਤੀਹਿਪਿ ਅਨੁਲੋਮਞਾਣੇਹਿ ਅਤ੍ਤਨੋ ਬਲਾਨੁਰੂਪੇਨ ਥੂਲਥੂਲੇ ਸਚ੍ਚਪਟਿਚ੍ਛਾਦਕਤਮਮ੍ਹਿ ਅਨ੍ਤਰਧਾਪਿਤੇ ਸਬ੍ਬਸਙ੍ਖਾਰਗਤੇ ਚਿਤ੍ਤਂ ਨ ਪਕ੍ਖਨ੍ਦਤਿ, ਨ ਲਗ੍ਗਤਿ, ਪਦੁਮਪਲਾਸਤੋ ਉਦਕਂ ਵਿਯ ਪਤਿਕੁਟਤਿ ਪਤਿਵਟ੍ਟਤਿ, ਸਬ੍ਬਂ ਨਿਮਿਤ੍ਤਾਰਮ੍ਮਣਮ੍ਪਿ ਸਬ੍ਬਂ ਪਵਤ੍ਤਾਰਮ੍ਮਣਮ੍ਪਿ ਪਲਿਬੋਧਤੋ ਉਪਟ੍ਠਾਤਿ, ਅਥਸ੍ਸ ਸਬ੍ਬਸ੍ਮਿਂ ਨਿਮਿਤ੍ਤਪ੍ਪਵਤ੍ਤਾਰਮ੍ਮਣੇ ਪਲਿਬੋਧਤੋ ਉਪਟ੍ਠਿਤੇ ਦੁਤਿਯਸ੍ਸ ਵਾ ਤਤਿਯਸ੍ਸ ਵਾ ਅਨੁਲੋਮਞਾਣਸ੍ਸ ਅਨਨ੍ਤਰਂ ਗੋਤ੍ਰਭੁਞਾਣਂ ਉਪ੍ਪਜ੍ਜਤਿ. ਤੇਨਾਹ ‘‘ਤਸ੍ਸਾ’’ਤਿਆਦਿ. ਪਠਮਾਵਜ੍ਜਨਞ੍ਚੇਵ ਪਠਮਾਭੋਗਤਾਪਿ ਚਾਤਿ ਪਠਮਾਵਜ੍ਜਨਂ ਪਠਮਾਭੋਗਭੂਤਂ. ਸਕਤ੍ਥੇ ਹਿ ਅਯਂ ਤਾ-ਪਚ੍ਚਯੋਤਿ. ਤਤ੍ਥ ਆਵਜ੍ਜਨਂ ਚਿਤ੍ਤਸਨ੍ਤਾਨਸ੍ਸ ਪਰਿਣਾਮਨਵਸੇਨ, ਆਭੋਗੋ ਅਤ੍ਤਨੋ ਆਭੁਜਨਵਸੇਨ ਦਟ੍ਠਬ੍ਬੋ.

੧੩੨੮-੩੩. ਅਨਨ੍ਤਰਾਦੀਹੀਤਿ ਅਨਨ੍ਤਰਸਮਨਨ੍ਤਰਆਸੇਵਨਉਪਨਿਸ੍ਸਯਨਤ੍ਥਿਵਿਗਤਵਸੇਨ ਛਹਿ ਪਚ੍ਚਯੇਹਿ. ਮੁਦ੍ਧਨ੍ਤਿ ਮੁਦ੍ਧਭੂਤਂ. ਏਕਨ੍ਤਿਕਤਾਯ ਏਕਵਾਰਮੇਵ ਚ ਉਪ੍ਪਜ੍ਜਨਤੋ ਪੁਨਰਾਵਤ੍ਤਾਭਾਵੇਨ ਪਨ ਅਨਾਵਤ੍ਤਂ. ਅਨਾਵਜ੍ਜਨਮ੍ਪਿ ਚਾਤਿ ਅਨਾਵਜ੍ਜਨਮ੍ਪਿਸਮਾਨਂ. ਸਞ੍ਞਂ ਦਤ੍ਵਾ ਵਿਯਾਤਿ ‘‘ਏਵਂ ਉਪ੍ਪਜ੍ਜਾਹੀ’’ਤਿ ਸਞ੍ਞਂ ਦਤ੍ਵਾ ਵਿਯ. ਅਨਿਬ੍ਬਿਦ੍ਧਪੁਬ੍ਬਨ੍ਤਿ ਅਪਦਾਲਿਤਪੁਬ੍ਬਂ. ਵਿਦ੍ਧਂਸੇਨ੍ਤੋਵਾਤਿ ਵਿਨਾਸੇਨ੍ਤੋ ਏਵ. ਜਾਯਤੀਤਿ ਨਿਬ੍ਬਤ੍ਤਤਿ. ਏਤ੍ਥ ਚ ਇਮਂ ਉਪਮਂ ਆਹਰਨ੍ਤਿ – ਏਕੋ ਕਿਰ ਇਸ੍ਸਾਸੋ ਅਟ੍ਠਉਸਭਮਤ੍ਤੇ ਪਦੇਸੇ ਫਲਕਸਤਂ ਠਪਾਪੇਤ੍ਵਾ ਵਤ੍ਥੇਨ ਮੁਖਂ ਵੇਠੇਤ੍ਵਾ ਸਰਂ ਸਨ੍ਨਯ੍ਹਿਤ੍ਵਾ ਚਕ੍ਕਯਨ੍ਤੇ ਅਟ੍ਠਾਸਿ, ਅਞ੍ਞੋ ਪੁਰਿਸੋ ਚਕ੍ਕਯਨ੍ਤਂ ਆਵਿਜ੍ਝਿਤ੍ਵਾ ਯਦਾ ਇਸ੍ਸਾਸਸ੍ਸ ਫਲਕਂ ਅਭਿਮੁਖਂ ਹੋਤਿ, ਤਦਾ ਤਤ੍ਥ ਦਣ੍ਡਕੇਨ ਸਞ੍ਞਂ ਦੇਤਿ. ਇਸ੍ਸਾਸੋ ਦਣ੍ਡਕਸਞ੍ਞਂ ਅਮੁਞ੍ਚਿਤ੍ਵਾਵ ਸਰਂ ਖਿਪਿਤ੍ਵਾ ਫਲਕਸਤਨਿਬ੍ਬਿਜ੍ਝਤਿ. ਤਤ੍ਥ ਦਣ੍ਡਕਸਞ੍ਞਂ ਦੇਨ੍ਤੋ ਵਿਯ ਗੋਤ੍ਰਭੁਞਾਣਂ, ਇਸ੍ਸਾਸੋ ਵਿਯ ਮਗ੍ਗਞਾਣਂ, ਦਣ੍ਡਕਸਞ੍ਞਂ ਅਮੁਞ੍ਚਿਤ੍ਵਾਵ ਫਲਕਸਤਂ ਨਿਬ੍ਬਿਜ੍ਝਨਂ ਵਿਯ ਮਗ੍ਗਞਾਣਸ੍ਸ ਗੋਤ੍ਰਭੁਞਾਣੇਨ ਦਿਨ੍ਨਸਞ੍ਞਂ ਅਮੁਞ੍ਚਿਤ੍ਵਾਵ ਨਿਬ੍ਬਾਨਂ ਆਰਮ੍ਮਣਂ ਕਤ੍ਵਾ ਅਨਿਬ੍ਬਿਦ੍ਧਪੁਬ੍ਬਾਨਂ ਅਪਦਾਲਿਤਪੁਬ੍ਬਾਨਂ ਲੋਭਦੋਸਮੋਹਕ੍ਖਨ੍ਧਾਨਂ ਨਿਬ੍ਬਿਜ੍ਝਨਨ੍ਤਿ.

੧੩੩੫-੮. ਅਨਾਮਤਗ੍ਗ…ਪੇ… ਮਹੋਦਧਿਨ੍ਤਿ ਅਟ੍ਠਮਭਵਤੋ ਪਟ੍ਠਾਯ ਨਿਬ੍ਬਤ੍ਤਕਂ ਅਞ੍ਞਾਤਕੋਟਿਂ ਸਂਸਾਰਵਟ੍ਟਦੁਕ੍ਖਮਹਾਸਮੁਦ੍ਦਂ. ਪਾਣਾਤਿਪਾਤਾਦਿਪਞ੍ਚਵੇਰਾਨਿ ਚੇਵ ਪਞ੍ਚਵੀਸਤਿ ਮਹਾਭਯਾਨਿ ਚਾਤਿ ਸਬ੍ਬਵੇਰਭਯਾਨਿ. ਅਨੇਕੇਪਿ ਆਨਿਸਂਸੇਤਿ ਰਤਨਤ੍ਤਯੇ ਨਿਵਿਟ੍ਠਸਦ੍ਧਾਦਿਕੇ ਆਨਿਸਂਸੇ. ਆਦਿਮਗ੍ਗੇਨਾਤਿ ਸੋਤਾਪਤ੍ਤਿਮਗ੍ਗਸਙ੍ਖਾਤੇਨ ਪਠਮਮਗ੍ਗੇਨ. ਪਠਮਮਗ੍ਗਞਾਣਵਣ੍ਣਨਾ.

੧੩੩੯. ਤਸ੍ਸੇਵਾਨਨ੍ਤਰਨ੍ਤਿ ਤਸ੍ਸ ਅਨਨ੍ਤਰਂਯੇਵ. ਦ੍ਵੇਪਿ ਤੀਣਿ ਵਾਤਿ ਨਾਤਿਤਿਕ੍ਖਪਞ੍ਞਸ੍ਸ ਦ੍ਵੇ, ਤਿਕ੍ਖਪਞ੍ਞਸ੍ਸ ਤੀਣਿ ਫਲਚਿਤ੍ਤਾਨਿ.

੧੩੪੦-੩. ‘‘ਅਜਾਨਿਤ੍ਵਾ ਵਦਨ੍ਤਿ ਤੇ’’ਤਿ ਵਤ੍ਵਾ ਤਤ੍ਥ ਕਾਰਣਂ ਦਸ੍ਸੇਤੁਂ ‘‘ਏਕਸ੍ਸਾ’’ਤਿਆਦਿ ਵੁਤ੍ਤਂ. ਪਞ੍ਚਮਂ ਮਗ੍ਗਚਿਤ੍ਤਨ੍ਤਿ ਇਮਿਨਾਵ ਛਟ੍ਠਸ੍ਸ ਅਭਾਵਦੀਪਨੇਨ ‘‘ਏਕਂ ਫਲਚਿਤ੍ਤ’’ਨ੍ਤਿ ਵਦਤੋ ਗੋਦਤ੍ਤਤ੍ਥੇਰਸ੍ਸ ਵਾਦੋਪਿ ਪਟਿਕ੍ਖਿਤ੍ਤੋ.

੧੩੪੪. ‘‘ਏਤ੍ਤਾਵਤਾ’’ਤਿ ਪਠਮਮਗ੍ਗਸ੍ਸ ਉਪ੍ਪਤ੍ਤਿਅਨਨ੍ਤਰਂ ਫਲਸ੍ਸ ਉਪ੍ਪਤ੍ਤਿਮਤ੍ਤੇਨ. ਸੋਤਾਪਨ੍ਨੋਤਿ ਵੁਚ੍ਚਤੀਤਿ ਸੋਤਾਪਨ੍ਨੋ ਨਾਮ ਦੁਤਿਯੋ ਅਰਿਯਪੁਗ੍ਗਲੋਤਿ ਵੁਚ੍ਚਤਿ. ਸੋ ਦੇਵਰਜ੍ਜਚਕ੍ਕਵਤ੍ਤਿਰਜ੍ਜਾਦਿਪਮਾਦਟ੍ਠਾਨਂ ਆਗਮ੍ਮ ਭੁਸਂ ਪਮਤ੍ਤੋਪਿ ਹੁਤ੍ਵਾ ਕਾਮਸੁਗਤਿਯਂ ਸਤ੍ਤਕ੍ਖਤ੍ਤੁਮੇਵ ਸਨ੍ਧਾਵਿਤ੍ਵਾ ਸਂਸਰਿਤ੍ਵਾ ਦੁਕ੍ਖਸ੍ਸਨ੍ਤਕਰਣਸਮਤ੍ਥੋ ਹੋਤਿ. ਯਥਾਹ –

‘‘ਕਿਞ੍ਚਾਪਿ ਤੇ ਹੋਨ੍ਤਿ ਭੁਸਂ ਪਮਤ੍ਤਾ,

ਨ ਤੇ ਭਵਂ ਅਟ੍ਠਮਮਾਦਿਯਨ੍ਤੀ’’ਤਿ. (ਖੁ. ਪਾ. ੬.੯; ਸੁ. ਨਿ. ੨੩੨; ਨੇਤ੍ਤਿ. ੧੧੫);

ਰੂਪਾਰੂਪਲੋਕੇਸੁ ਪਨ ਨ ਤਥਾ ਨਿਯਮੋਤਿ ਆਚਰਿਯਾ.

੧੩੪੭. ਫਲਾਦੀਨਨ੍ਤਿ ਆਦਿ-ਸਦ੍ਦੇਨ ਪਹੀਨਕਿਲੇਸਾਦਿਕੇ ਸਙ੍ਗਣ੍ਹਾਤਿ. ਤਥਾ ਚ ‘‘ਇਮਿਨਾ ਵਤਾਹਂ ਮਗ੍ਗੇਨ ਆਗਤੋ’’ਤਿ ਪਠਮਂ ਮਗ੍ਗਂ ਪਚ੍ਚਵੇਕ੍ਖਤਿ, ਤਤੋ ‘‘ਅਯਂ ਮੇ ਆਨਿਸਂਸੋ ਲਦ੍ਧੋ’’ਤਿ ਫਲਂ ਪਚ੍ਚਵੇਕ੍ਖਤਿ, ਤਤੋ ‘‘ਇਮੇ ਨਾਮ ਮੇ ਕਿਲੇਸਾ ਪਹੀਨਾ’’ਤਿ ਪਹੀਨਕਿਲੇਸੇ ਪਚ੍ਚਵੇਕ੍ਖਤਿ, ਤਤੋ ‘‘ਇਮੇ ਨਾਮ ਮੇ ਕਿਲੇਸਾ ਅਵਸਿਟ੍ਠਾ’’ਤਿ ਉਪਰਿਮਗ੍ਗਤ੍ਤਯਵਜ੍ਝੇ ਕਿਲੇਸੇ ਪਚ੍ਚਵੇਕ੍ਖਤਿ, ਅਵਸਾਨੇ ‘‘ਅਯਂ ਮੇ ਧਮ੍ਮੋ ਆਰਮ੍ਮਣਤੋ ਪਟਿਵਿਦ੍ਧੋ’’ਤਿ ਅਮਤਂ ਨਿਬ੍ਬਾਨਂ ਪਚ੍ਚਵੇਕ੍ਖਤਿ. ਇਤਿ ਸੋਤਾਪਨ੍ਨਸ੍ਸ ਪਞ੍ਚ ਪਚ੍ਚਵੇਕ੍ਖਣਞਾਣਾਨਿ ਹੋਨ੍ਤਿ. ਯਥਾ ਚ ਸੋਤਾਪਨ੍ਨਸ੍ਸ, ਏਵਂ ਸਕਦਾਗਾਮਿਅਨਾਗਾਮੀਨਮ੍ਪਿ. ਅਰਹਤੋ ਪਨ ਅਵਸਿਟ੍ਠਕਿਲੇਸਪਚ੍ਚਵੇਕ੍ਖਣਂ ਨਾਮ ਨਤ੍ਥਿ. ਏਵਂ ਸਬ੍ਬਾਨਿਪਿ ਏਕੂਨਵੀਸਤਿ ਪਚ੍ਚਵੇਕ੍ਖਣਞਾਣਾਨਿ. ਤੇਨਾਹ ‘‘ਪਚ੍ਚਵੇਕ੍ਖਣਞਾਣਾਨਿ, ਭਵਨ੍ਤੇਕੂਨਵੀਸਤੀ’’ਤਿ.

੧੩੪੮-੫੦. ਯਾਸਂ ਪਚ੍ਚਵੇਕ੍ਖਣਵਸੇਨ ਇਮਾਨਿ ਞਾਣਾਨਿ ਪਵਤ੍ਤਨ੍ਤਿ, ਤਾ ਦਸ੍ਸੇਤੁਂ ‘‘ਮਗ੍ਗੋ ਫਲਞ੍ਚਾ’’ਤਿਆਦਿਮਾਹ. ਉਕ੍ਕਟ੍ਠਪਰਿਚ੍ਛੇਦੋਯੇਵ ਚੇਸੋ. ਪਹੀਨਾਵਸਿਟ੍ਠਕਿਲੇਸਪਚ੍ਚਵੇਕ੍ਖਣਞ੍ਹਿ ਸੇਖਾਨਮ੍ਪਿ ਹੋਤਿ ਵਾ ਨ ਵਾ. ਨ ਹਿ ਸਬ੍ਬੇਵ ਤਤ੍ਥ ਸਮਤ੍ਥਾ ਹੋਨ੍ਤਿ. ਤੇਨੇਵ ਹਿ ਮਹਾਨਾਮੋ ਭਗਵਨ੍ਤਂ ਪੁਚ੍ਛਿ ‘‘ਕੋ ਸੁ ਨਾਮ ਮੇ ਧਮ੍ਮੋ ਅਜ੍ਝਤ੍ਤਂ ਅਪ੍ਪਹੀਨੋ, ਯੇਨ ਮੇ ਏਕਦਾ ਲੋਭਧਮ੍ਮਾਪਿ ਚਿਤ੍ਤਂ ਪਰਿਯਾਦਾਯ ਤਿਟ੍ਠਨ੍ਤੀ’’ਤਿਆਦਿ (ਮ. ਨਿ. ੧.੧੭੫). ਯੋਗਮਾਰਭਤੇਤਿ ਤਸ੍ਮਿਂਯੇਵ ਵਾ ਆਸਨੇ ਨਿਸਿਨ੍ਨੋ, ਅਪਰੇਨ ਵਾ ਸਮਯੇਨ ਕਾਮਰਾਗਬ੍ਯਾਪਾਦਾਨਂ ਤਨੁਭਾਵਕਰਾਯ ਸਕਦਾਗਾਮਿਮਗ੍ਗਸਙ੍ਖਾਤਾਯ ਦੁਤਿਯਾਯ ਭੂਮਿਯਾ ਅਧਿਗਮਤ੍ਥਾਯ ਵਿਪਸ੍ਸਨਾਯੋਗਂ ਕਰੋਤਿ, ਦੁਤਿਯਭਾਵੋ ਚਸ੍ਸ ਦੇਸਨਾਵਸੇਨ, ਉਪ੍ਪਤ੍ਤਿਵਸੇਨ ਚ ਵੇਦਿਤਬ੍ਬੋ. ਸਮ੍ਪਯੁਤ੍ਤਾਨਂ ਪਨ ਨਿਸ੍ਸਯਭਾਵੇਨ ਤੇ ਧਮ੍ਮਾ ਭਵਨ੍ਤਿ ਏਤ੍ਥਾਤਿ ਭੂਮਿ, ਯਸ੍ਮਾ ਵਾ ਸਮਾਨੇਪਿ ਲੋਕੁਤ੍ਤਰਭਾਵੇ ਸਯਮ੍ਪਿ ਭਵਤਿ, ਨ ਨਿਬ੍ਬਾਨਂ ਵਿਯ ਅਪਾਤੁਭੂਤਂ, ਤਸ੍ਮਾਪਿ ‘‘ਭੂਮੀ’’ਤਿ ਵੁਚ੍ਚਤਿ. ਞਾਣੇਨ ਪਰਿਮਜ੍ਜਤੀਤਿ ਤੇਨ ਤੇਨਾਕਾਰੇਨ ਇਨ੍ਦ੍ਰਿਯਾਨਂ ਤਿਕ੍ਖਤਰਤਂ ਸਮ੍ਪਾਦੇਤ੍ਵਾ, ਬਲਬੋਜ੍ਝਙ੍ਗਾਨਞ੍ਚ ਪਟੁਤਰਭਾਵਂ ਸਾਧੇਤ੍ਵਾ ਲਕ੍ਖਣਤ੍ਤਯਂ ਤੀਰਣਵਸੇਨ ਪਰਿਮਜ੍ਜਤਿ.

੧੩੫੧-੨. ਤਤ੍ਥ ਅਪਰਾਪਰਂ ਞਾਣਂ ਚਾਰੇਨ੍ਤੋ ਪਰਿਵਤ੍ਤੇਤਿ. ਤੇਨਾਹ ‘‘ਵਿਪਸ੍ਸਨਾਵੀਥਿਂ ਓਗਾਹਤੀ’’ਤਿ. ਹੇਟ੍ਠਾ ਵੁਤ੍ਤਨਯੇਨਾਤਿ ਉਦਯਬ੍ਬਯਞਾਣਾਦੀਨਂ ਉਪ੍ਪਾਦਨੇ ਵੁਤ੍ਤਨਯੇਨੇਵ. ਗੋਤ੍ਰਭੁਸ੍ਸ ਅਨਨ੍ਤਰਨ੍ਤਿ ਏਤ੍ਥ ਗੋਤ੍ਰਭੁ ਵਿਯ ਗੋਤ੍ਰਭੁ. ਪਠਮਮਗ੍ਗਪੁਰੇਚਾਰਿਕਞਾਣਞ੍ਹਿ ਪੁਥੁਜ੍ਜਨਗੋਤ੍ਤਾਭਿਭਵਨਤੋ, ਅਰਿਯਗੋਤ੍ਤਭਵਨਤੋ ਚ ਨਿਪ੍ਪਰਿਯਾਯਤੋ ‘‘ਗੋਤ੍ਰਭੂ’’ਤਿ ਵੁਚ੍ਚਤਿ, ਇਦਂ ਪਨ ਤਂਸਦਿਸਤਾਯ ਪਰਿਯਾਯਤੋ ਗੋਤ੍ਰਭੁ. ਏਕਚ੍ਚਸਂਕਿਲੇਸਵਿਸੁਦ੍ਧਿਯਾ, ਪਨ ਅਚ੍ਚਨ੍ਤਵਿਸੁਦ੍ਧਿਯਾ ਆਰਮ੍ਮਣਕਰਣਤੋ ਚ ‘‘ਵੋਦਾਨ’’ਨ੍ਤਿ ਵੁਚ੍ਚਤਿ. ਤੇਨਾਹ ਪਟ੍ਠਾਨੇ ‘‘ਅਨੁਲੋਮਂ ਵੋਦਾਨਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ’’ਤਿ (ਪਟ੍ਠਾ. ੧.੧.੪੧੭). ਯਸ੍ਮਾ ਪਨ ਪਟਿਸਮ੍ਭਿਦਾਮਗ੍ਗੇ ‘‘ਉਪ੍ਪਾਦਾਦਿਅਭਿਭਵਨਟ੍ਠਂ ਉਪਾਦਾਯ ਅਟ੍ਠ ਗੋਤ੍ਰਭੁਧਮ੍ਮਾ ਸਮਾਧਿਵਸੇਨ ਉਪ੍ਪਜ੍ਜਨ੍ਤਿ, ਦਸ ਗੋਤ੍ਰਭੁਧਮ੍ਮਾ ਵਿਪਸ੍ਸਨਾਵਸੇਨ ਉਪ੍ਪਜ੍ਜਨ੍ਤੀ’’ਤਿਆਦੀਸੁ (ਪਟਿ. ਮ. ੧.੬੦) ਗੋਤ੍ਰਭੁਨਾਮਵਸੇਨੇਵ ਆਗਤਂ, ਤਸ੍ਮਾ ਇਧਾਪਿ ‘‘ਗੋਤ੍ਰਭੁਸ੍ਸ ਅਨਨ੍ਤਰ’’ਨ੍ਤਿ ਵੁਤ੍ਤਂ ਗੋਤ੍ਤਸਙ੍ਖਾਤਨਿਬ੍ਬਾਨਤੋ ਭੂਤਨ੍ਤਿ ਕਤ੍ਵਾ. ਦੁਤਿਯਮਗ੍ਗਞਾਣਵਣ੍ਣਨਾ.

੧੩੫੫-੭. ਯਨ੍ਤਿ ਯਸ੍ਮਾ. ਸਕਿਦੇਵਾਤਿ ਏਕਵਾਰਮੇਵ. ਇਮਂ ਲੋਕਂ ਆਗਨ੍ਤ੍ਵਾਤਿ ਇਮਿਨਾ ਪਞ੍ਚਸੁ ਸਕਦਾਗਾਮੀਸੁ ਚਤ੍ਤਾਰੋ ਵਜ੍ਜੇਤ੍ਵਾ ਏਕੋਵ ਗਹਿਤੋ. ਏਕਚ੍ਚੋ ਹਿ ਇਧ ਸਕਦਾਗਾਮਿਫਲਂ ਪਤ੍ਵਾ ਇਧੇਵ ਪਰਿਨਿਬ੍ਬਾਯਤਿ, ਏਕਚ੍ਚੋ ਇਧ ਪਤ੍ਵਾ ਦੇਵਲੋਕੇ ਪਰਿਨਿਬ੍ਬਾਯਤਿ, ਏਕਚ੍ਚੋ ਦੇਵਲੋਕੇ ਪਤ੍ਵਾ ਤਤ੍ਥੇਵ ਪਰਿਨਿਬ੍ਬਾਯਤਿ, ਏਕਚ੍ਚੋ ਦੇਵਲੋਕੇ ਪਤ੍ਵਾ ਇਧੂਪਪਜ੍ਜਿਤ੍ਵਾ ਪਰਿਨਿਬ੍ਬਾਯਤੀਤਿ ਇਮੇ ਚਤ੍ਤਾਰੋਪਿ ਇਧ ਨ ਗਹਿਤਾ. ਯੋ ਪਨ ਇਧ ਪਤ੍ਵਾ ਦੇਵਲੋਕੇ ਯਾਵਤਾਯੁਕਂ ਵਸਿਤ੍ਵਾ ਇਧੂਪਪਜ੍ਜਿਤ੍ਵਾ ਪਰਿਨਿਬ੍ਬਾਯਤਿ, ਅਯਮੇਕੋਵ ਇਧ ਗਹਿਤੋਤਿ. ਅਨ੍ਤਕਰੋ ਭਵੇਤਿ ਦੁਕ੍ਖਸ੍ਸਨ੍ਤਕਰੋ ਭਵੇਯ੍ਯ, ਭਵੇ ਵਾ ਅਨ੍ਤਕਰੋ ਭਵਸ੍ਸ ਅਨ੍ਤਕਰੋਤਿ ਅਤ੍ਥੋ. ਤਤਿਯਾਯ ਭੂਮਿਯਾ ਪਤ੍ਤਿਯਾਤਿ ਸਮ੍ਬਨ੍ਧੋ. ਬ੍ਯਾਪਾਦਕਾਮਰਾਗਾਨਂ ਪਹਾਨਾਯਾਤਿ ਤੇਸਂਯੇਵ ਸਕਦਾਗਾਮਿਮਗ੍ਗੇਨ ਤਨੁਕਰਾਨਂ ਸਂਯੋਜਨਾਨਂ ਨਿਰਵਸੇਸਪ੍ਪਹਾਨਾਯ. ਤਤਿਯਮਗ੍ਗਞਾਣਵਣ੍ਣਨਾ.

੧੩੬੩-੭. ਪਟਿਸਨ੍ਧਿਵਸੇਨ ਕਾਮਭਵਸ੍ਸ ਅਨਾਗਮਨਤੋ ਅਨਾਗਾਮੀ. ਤੇਨਾਹ ‘‘ਤਤ੍ਥੇਵ ਪਰਿਨਿਬ੍ਬਾਯੀ’’ਤਿ. ਤਤ੍ਥੇਵਾਤਿ ਸੁਦ੍ਧਾਵਾਸੇ ਵਾ ਅਞ੍ਞਤ੍ਥ ਵਾ ਯਤ੍ਥ ਉਪ੍ਪਨ੍ਨੋ, ਤਤ੍ਥੇਵ ਪਰਿਨਿਬ੍ਬਾਯਿ. ਅਨਾਵਤ੍ਤਿਸਭਾਵੋਤਿ ਤਸ੍ਮਾ ਲੋਕਾ ਇਧ ਪਟਿਸਨ੍ਧਿਗ੍ਗਹਣਵਸੇਨ ਇਮਂ ਲੋਕਂ ਪੁਨਰਾਗਮਨਾਭਾਵਤੋ ਅਨਾਵਤ੍ਤਨਸਭਾਵੋ, ਬੁਦ੍ਧਦਸ੍ਸਨਥੇਰਦਸ੍ਸਨਧਮ੍ਮਸ੍ਸਵਨਾਨਂ ਪਨਤ੍ਥਾਯ ਆਗਮਨਂ ਹੋਤਿਯੇਵ. ਰੂਪਰਾਗਾਦਿਪਹਾਨਾਯਾਤਿ ਰੂਪਰਾਗਅਰੂਪਰਾਗਮਾਨਉਦ੍ਧਚ੍ਚਅਵਿਜ੍ਜਾਸਙ੍ਖਾਤਾਨਂ ਪਞ੍ਚਨ੍ਨਂ ਉਦ੍ਧਮ੍ਭਾਗਿਯਸਂਯੋਜਨਾਨਂ ਨਿਰਵਸੇਸਪ੍ਪਹਾਨਾਯ. ਵਿਦ੍ਧਂਸਾਯਾਤਿ ਵਿਨਾਸਾਯ. ਚਤੁਤ੍ਥਮਗ੍ਗਞਾਣਵਣ੍ਣਨਾ.

੧੩੭੧-੪. ਮਹਾਖੀਣਾਸਵੋਤਿ ਮਹਾਨੁਭਾਵਤੋ ਨਿਬਦ੍ਧਪੂਜਾਵਚਨਮੇਤਂ, ਨ ਉਪਾਦਾਯਵਚਨਂ ‘‘ਯਥਾ ਮਹਾਮੋਗ੍ਗਲ੍ਲਾਨੋ’’ਤਿ. ਨ ਹਿ ਚੂਲ਼ਖੀਣਾਸਵੋ ਨਾਮ ਅਤ੍ਥਿ. ਅਨੁਪ੍ਪਤ੍ਤੋ ਸਦਤ੍ਥੋ ਸਕਤ੍ਥੋ, ਪੂਜਤ੍ਥੋ ਵਾ ਏਤੇਨਾਤਿ ਅਨੁਪ੍ਪਤ੍ਤਸਦਤ੍ਥੋ, ਸਦਤ੍ਥੋਤਿ ਚ ਅਰਹਤ੍ਤਂ ਵੇਦਿਤਬ੍ਬਂ. ਤਞ੍ਹਿ ਅਤ੍ਤੁਪਨਿਬਨ੍ਧਨਟ੍ਠੇਨ, ਅਤ੍ਤਾਨਂ ਅਵਿਜਹਨਟ੍ਠੇਨ, ਅਤ੍ਤਨੋ ਪਰਮਤ੍ਥਟ੍ਠੇਨ ਚ ਅਤ੍ਤਨੋ ਅਤ੍ਥਤ੍ਤਾ ‘‘ਸਦਤ੍ਥੋ’’ਤਿ ਵੁਚ੍ਚਤਿ. ਖੀਣਾਨਿ ਦਸਪਿ ਭਵਸਂਯੋਜਨਾਨਿ ਏਤਸ੍ਸਾਤਿ ਖੀਣਸਂਯੋਜਨੋ. ਦਕ੍ਖਿਣਂ ਅਰਹਤੀਤਿ ਦਕ੍ਖਿਣੇਯ੍ਯੋ. ਚਤਸ੍ਸੋਪੀਤਿ ਸੋਤਾਪਤ੍ਤਿਮਗ੍ਗੋ ਸਕਦਾਗਾਮਿਮਗ੍ਗੋ ਅਨਾਗਾਮਿਮਗ੍ਗੋ ਅਰਹਤ੍ਤਮਗ੍ਗੋਤਿ ਚਤਸ੍ਸੋਪਿ. ਵਿਸੁਦ੍ਧਿਕਾਮੇਨਾਤਿ ਅਤ੍ਤਨੋ ਵਿਸੁਦ੍ਧਿਂ ਇਚ੍ਛਨ੍ਤੇਨ. ਤਪੋਯੇਵ ਧਨਮਸ੍ਸਾਤਿ ਤਪੋਧਨੋ, ਤੇਨ.

ਇਤਿ ਅਭਿਧਮ੍ਮਤ੍ਥਵਿਕਾਸਿਨਿਯਾ ਨਾਮ

ਅਭਿਧਮ੍ਮਾਵਤਾਰਸਂਵਣ੍ਣਨਾਯ

ਞਾਣਦਸ੍ਸਨਵਿਸੁਦ੍ਧਿਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.