੧੫. ਪਨ੍ਨਰਸਮੋ ਪਰਿਚ੍ਛੇਦੋ

ਅਰੂਪਾਵਚਰਸਮਾਧਿਭਾਵਨਾਨਿਦ੍ਦੇਸਵਣ੍ਣਨਾ

੯੮੦. ਏਵਂ ਪਥਵੀਕਸਿਣਵਸੇਨ ਚਤੁਕ੍ਕਪਞ੍ਚਕਜ੍ਝਾਨਾਨਿ ਦਸ੍ਸੇਤ੍ਵਾ ਯਸ੍ਮਾ ਸੇਸਕਸਿਣਵਸੇਨ ਨਿਦ੍ਦਿਸਿਯਮਾਨੇ ਗਨ੍ਥਗਾਰਵੋ ਹੋਤਿ, ਤਸ੍ਮਾ ਤਂ ਸਬ੍ਬਂ ਠਪੇਤ੍ਵਾ ਅਰੂਪਾਵਚਰਂ ਵਿਭਾਵੇਤੁਂ ‘‘ਰੂਪਾਰੂਪ’’ਨ੍ਤਿਆਦਿ ਆਰਦ੍ਧਂ. ਰੂਪਾਰੂਪਮਤੀਤੇਨਾਤਿ ਰੂਪਾਰੂਪਭਵਂ ਅਤਿਕ੍ਕਨ੍ਤੇਨ, ਪੁਨਾਨੂਪਪਤ੍ਤਿਵਸੇਨ ਰੂਪਾਰੂਪਭਵਂ ਅਤਿਕ੍ਕਨ੍ਤੇਨ, ਪਗੇਵ ਕਾਮਾਵਚਰਭਵਂ. ਰੂਪਾਰੂਪਾਦਿਵੇਦਿਨਾਤਿ ਰੂਪਾਰੂਪਾਦਿਭੂਮਨ੍ਤਰਵੇਦਿਨਾ.

੯੮੨-੪. ਯਸ੍ਮਾ ਅਯਂ ਅਰੂਪਾਵਚਰਸਮਾਧਿ ਨਾਮ ਰੂਪਵਿਰਾਗਭਾਵਨਾ ਰੂਪਵਿਰਾਗਵਸੇਨੇਵ ਅਭਿਨਿਪ੍ਫਾਦੇਤਬ੍ਬਾਵ, ਤਸ੍ਮਾ ਤਂ ਉਪ੍ਪਾਦੇਤੁਕਾਮਸ੍ਸ ਰੂਪੇ ਵਿਰਜ੍ਜਨਾਕਾਰਂ, ਵਿਰਤ੍ਤਮਾਨਸੇਨ ਚ ਤਦਤ੍ਥਾਯ ਪਟਿਪਜ੍ਜਨਵਿਧਿਂ ਦਸ੍ਸੇਤੁਂ ‘‘ਰੂਪੇ ਖੋ’’ਤਿਆਦਿ ਆਰਦ੍ਧਂ. ਦਣ੍ਡਨਟ੍ਠੇਨ ਦਣ੍ਡੋ, ਮੁਗ੍ਗਰਾਦਿ, ਪਰਪੀਲ਼ਨਾਧਿਪ੍ਪਾਯੇਨ ਤਸ੍ਸ ਆਦਾਨਂ ਦਣ੍ਡਾਦਾਨਂ. ਆਦਿ-ਸਦ੍ਦੇਨ ਸਤ੍ਥਾਦਾਨਕਲਹਵਿਗ੍ਗਹਵਿਵਾਦਤੁਵਂਤੁਵਂਪੇਸੁਞ੍ਞਾਦੀਨਂ, ਅਦਿਨ੍ਨਾਦਾਨਾਦੀਨਞ੍ਚ ਗਹਣਂ. ਚਕ੍ਖੁਰੋਗਾਦਯੋਤਿ ਆਦਿ-ਸਦ੍ਦੇਨ ਸੋਤਰੋਗਾਦੀਨਂ. ਰੂਪੇ ਆਦੀਨਵਂ ਦਿਸ੍ਵਾਤਿ ਕਰਜਰੂਪਾਦਿਓਲ਼ਾਰਿਕਰੂਪੇ ਤਨ੍ਨਿਦਾਨਂ ਦੋਸਂ ਦਿਸ੍ਵਾ. ਨਿਬ੍ਬਿਨ੍ਦਮਾਨਸੋਤਿ ਵਿਰਤ੍ਤਮਾਨਸੋ. ਅਰੂਪਨ੍ਤਿ ਅਰੂਪਾਵਚਰਭਾਵਨਂ. ਤਮ੍ਹਾ ਕਸਿਣਰੂਪਾਤਿ ਤਮ੍ਹਾ ਪਟਿਭਾਗਨਿਮਿਤ੍ਤਸਙ੍ਖਾਤਾ ਕਸਿਣਰੂਪਾ. ਨਨੁ ਚਾਯਂ ਰੂਪੇ ਆਦੀਨਵਂ ਦਿਸ੍ਵਾ ਤਂ ਸਮਤਿਕ੍ਕਮਤ੍ਥਾਯ ਪਟਿਪਜ੍ਜਤਿ, ਪਟਿਭਾਗਨਿਮਿਤ੍ਤਞ੍ਚ ਅਰੂਪਂ ਪਣ੍ਣਤ੍ਤਿਮਤ੍ਤਤ੍ਤਾਤਿ ਕਥਂ ਤਸ੍ਮਾ ਨਿਬ੍ਬਿਜ੍ਜਤੀਤਿ ਅਨੁਯੋਗਂ ਸਨ੍ਧਾਯ ਓਪਮ੍ਮਵਸੇਨ ਤਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਸੂਕਰਾਭਿਹਤੋਵ ਸਾ’’ਤਿ. ਯਥਾ ਹਿ ਵਨੇ ਸੂਕਰੇਨ ਪਹਤਮਤ੍ਤੋ ਸੁਨਖੋ ਤਤੋ ਭੀਤੋ ਰੂਪਦਸ੍ਸਨਵੇਲਾਯਂ ਭਤ੍ਤਪਚਨਉਕ੍ਖਲਿਂ ਦੂਰਤੋ ਦਿਸ੍ਵਾ ਸੂਕਰਪਟਿਭਾਗਤਾਯ ਤਸ੍ਸਂ ਸੂਕਰਾਸਙ੍ਕਂ ਉਪ੍ਪਾਦੇਤ੍ਵਾ ਉਤ੍ਰਸ੍ਤੋ ਪਲਾਯਤੇਵ, ਏਵਮੇਵ ਰੂਪੇ ਨਿਬ੍ਬਿਨ੍ਦਮਾਨਸੋ ਤਂ ਅਤਿਕ੍ਕਮਿਤੁਕਾਮੋ ਤਪ੍ਪਟਿਭਾਗੇ ਕਸਿਣਰੂਪੇਪਿ ਨਿਬ੍ਬਿਜ੍ਜਤਿ, ਸਮਤਿਕ੍ਕਮਿਤੁਕਾਮੋਤਿ ਅਧਿਪ੍ਪਾਯੋ.

੯੮੫-੬. ਚਤੁਤ੍ਥੇ ਪਨ ਝਾਨਸ੍ਮਿਨ੍ਤਿ ਠਪੇਤ੍ਵਾ ਪਰਿਚ੍ਛਿਨ੍ਨਾਕਾਸਕਸਿਣਂ ਨਵਸੁ ਪਥਵੀਕਸਿਣਾਦੀਸੁ ਅਞ੍ਞਤਰਸ੍ਮਿਂ ਪਟਿਲਦ੍ਧਚਤੁਤ੍ਥਜ੍ਝਾਨੇ. ਕੇਚਿ ਪਨ ਆਲੋਕਕਸਿਣਮ੍ਪਿ ਠਪੇਤ੍ਵਾ ਅਟ੍ਠਸੂਤਿ ਵਦਨ੍ਤਿ. ਤਸ੍ਸ ਪਨ ਠਪਨੇ ਕਾਰਣਂ ਨ ਦਿਸ੍ਸਤਿ. ਸੁਟ੍ਠੁ ਚਿਣ੍ਣੋ ਚਰਿਤੋ ਅਤਿਪ੍ਪਗੁਣਿਕਤੋ ਆਵਜ੍ਜਨਾਦਿਲਕ੍ਖਣੋ ਵਸੀਭਾਵੋ ਏਤੇਨਾਤਿ ਸੁਚਿਣ੍ਣਵਸੀ. ਕਰੋਤਿ…ਪੇ… ਯਤੋਤਿ ਯਸ੍ਮਾ ਇਦਂ ਚਤੁਤ੍ਥਜ੍ਝਾਨਚਿਤ੍ਤਂ ਮਯਾ ਨਿਬ੍ਬਿਨ੍ਦਕਸਿਣਰੂਪਂ ਆਰਮ੍ਮਣਂ ਕਰੋਤਿ. ਆਸਨ੍ਨਸੋਮਨਸ੍ਸਞ੍ਚਾਤਿ ਯਤੋ ਤਤਿਯਜ੍ਝਾਨਸ੍ਸ ਆਸਨ੍ਨਤਾਯ ਆਸਨ੍ਨਸੋਮਨਸ੍ਸਪਚ੍ਚਤ੍ਥਿਕਞ੍ਚ. ਥੂਲਸਨ੍ਤਵਿਮੋਕ੍ਖਤੋਤਿ ਸਨ੍ਤਵਿਮੋਕ੍ਖਸਙ੍ਖਾਤਅਰੂਪਜ੍ਝਾਨਤੋ ਏਤਂ ਯਤੋ ਥੂਲਂ ਓਲ਼ਾਰਿਕਂ. ਅਰੂਪਜ੍ਝਾਨਞ੍ਹਿ ਯੇ ਤੇ ਸਨ੍ਤਾ ਵਿਮੋਕ੍ਖਾ ਅਤਿਕ੍ਕਮ੍ਮ ਰੂਪੇ ਆਰੁਪ੍ਪਨ੍ਤਿਆਦੀਸੁ ‘‘ਸਨ੍ਤਵਿਮੋਕ੍ਖ’’ਨ੍ਤਿ ਵੁਚ੍ਚਤਿ, ਸਨ੍ਤਤਾਸਿਦ੍ਧਿ ਚਸ੍ਸ ਅਨੁਸ੍ਸਤਿਤੋ ਦਟ੍ਠਬ੍ਬਾ.

੯੮੭-੯੧. ਚਤੁਤ੍ਥੇਤਿ ਚਤੁਤ੍ਥਜ੍ਝਾਨੇ. ਪਠਮਾਰੁਪ੍ਪਞ੍ਚ ਸਨ੍ਤਤੋ ਦਿਸ੍ਵਾਤਿ ਸਮ੍ਬਨ੍ਧੋ, ਸਨ੍ਤਵਸੇਨ ਮਨਸਿ ਕਰਿਤ੍ਵਾਤਿ ਅਤ੍ਥੋ. ਸਨ੍ਤਤੋ ਮਨਸਿਕਰਣੇਨੇਵ ਚੇਤ੍ਥ ਪਣੀਤਤੋ, ਸੁਖੁਮਤੋ ਚ ਮਨਸਿਕਾਰੋ ਸਿਦ੍ਧੋਵ ਹੋਤੀਤਿ ਨ ਤੇ ਵਿਸੁਂ ਗਹਿਤਾ. ਪਤ੍ਥਰਿਤ੍ਵਾਨਾਤਿ ਪਗੇਵ ਵਡ੍ਢਿਤਂ, ਤਦਾ ਵਡ੍ਢਨਵਸੇਨ ਵਾ ਪਤ੍ਥਰਿਤ੍ਵਾ. ਪੁਬ੍ਬਕਾਲਵਸੇਨ ਚੇਤਂ ਵੁਤ੍ਤਂ. ਤੇਨ ਨਂ ਉਗ੍ਘਾਟੇਤ੍ਵਾ ਪਚ੍ਛਾ ਨ ਵਡ੍ਢਿਤਬ੍ਬਨ੍ਤਿ ਦਸ੍ਸੇਤਿ. ਨ ਹਿ ਤਂ ਪਚ੍ਛਾ ਵਡ੍ਢਨਤ੍ਥਾਯ ਵਾਯਮਿਯਮਾਨਮ੍ਪਿ ਵਡ੍ਢਤੀਤਿ. ਤੇਨਾਤਿ ਕਸਿਣਰੂਪੇਨ.

ਇਦਾਨਿਸ੍ਸ ਉਗ੍ਘਾਟਨਾਕਾਰਂ ਦਸ੍ਸੇਤੁਂ ‘‘ਆਕਾਸੋ ਇਤਿ ਵਾ’’ਤਿਆਦਿਂ ਵਤ੍ਵਾ ਪੁਨ ਤਂ ਸਮਤ੍ਥੇਤੁਂ ‘‘ਉਗ੍ਘਾਟੇਨ੍ਤੋ ਹੀ’’ਤਿਆਦਿ ਵੁਤ੍ਤਂ. ਉਦਯਵਸੇਨ, ਪਰਿਚ੍ਛੇਦਫਰਣਵਸੇਨ ਚ ਅਨ੍ਤਾਭਾਵਤੋ ਅਨਨ੍ਤੋ. ਨ ਸਂਵੇਲ੍ਲੇਤੀਤਿ ਕਟਸਾਰਕਕਿਲਞ੍ਜਾਦਯੋ ਵਿਯ ਨ ਪਟਿਸਂਹਰਤਿ. ਨਾਵਜ੍ਜਨ੍ਤੋ ਨ ਪੇਕ੍ਖਨ੍ਤੋਤਿ ਅਨਾਵਜ੍ਜਨ੍ਤੋ ਅਨਪੇਕ੍ਖਨ੍ਤੋ. ਅਞ੍ਞਦਤ੍ਥੁ ਤੇਨ ਫੁਟ੍ਠੋਕਾਸਂ ਵੁਤ੍ਤਨਯੇਨ ਮਨਸਿਕਰੋਨ੍ਤੋਯੇਵਾਤਿ ਅਧਿਪ੍ਪਾਯੋ. ਇਦਞ੍ਹਿ ਵੁਤ੍ਤਂ ਹੋਤਿ – ਰੂਪਾਵਚਰਚਤੁਤ੍ਥਜ੍ਝਾਨਸ੍ਸ ਆਰਮ੍ਮਣਭੂਤਂ ਕਸਿਣਰੂਪਂ ਸਬ੍ਬੇਨ ਸਬ੍ਬਂ ਅਮਨਸਿਕਰੋਤੋ, ਤੇਨ ਚ ਫੁਟ੍ਠੋਕਾਸਂ ‘‘ਆਕਾਸੋ ਆਕਾਸੋ’’ਤਿ ਮਨਸਿਕਰੋਤੋ ਯਦਾ ਤਂ ਭਾਵਨਾਨੁਭਾਵੇਨ ਆਕਾਸਂ ਹੁਤ੍ਵਾ ਉਪਟ੍ਠਾਤਿ, ਤਦਾ ਸੋ ਕਸਿਣਂ ਉਗ੍ਘਾਟੇਤਿ ਨਾਮਾਤਿ.

੯੯੨-੫. ਏਵਂ ਕਸਿਣੁਗ੍ਘਾਟਨਵਸੇਨ ਪਟਿਲਦ੍ਧੇ ਆਕਾਸਨਿਮਿਤ੍ਤੇ ਪੁਨ ਪਟਿਪਜ੍ਜਨਵਿਧਿਂ, ਯਸ੍ਸਤ੍ਥਾਯ ਯੇਸਂ ਪਟਿਪਜ੍ਜਤਿ, ਤਦਤ੍ਥਸਿਦ੍ਧਞ੍ਚ ਦਸ੍ਸੇਤੁਂ ‘‘ਕਸਿਣੁਗ੍ਘਾਟਿਮਾਕਾਸਂ ਨਿਮਿਤ੍ਤ’’ਨ੍ਤਿਆਦਿ ਵੁਤ੍ਤਂ. ਆਕਾਸਸ੍ਸ ਅਨਿਮਿਤ੍ਤਭਾਵੇਪਿ ਨਿਮਿਤ੍ਤੇਨ ਫੁਟ੍ਠੋਕਾਸਭਾਵਤੋ ‘‘ਨਿਮਿਤ੍ਤ’’ਨ੍ਤਿ ਵੁਤ੍ਤਂ. ਪਞ੍ਚ…ਪੇ… ਵਿਕ੍ਖਮ੍ਭਨ੍ਤੀਤਿ ਨਨੁ ਰੂਪਾਵਚਰਪਠਮਜ੍ਝਾਨਸ੍ਸ ਉਪਚਾਰਕ੍ਖਣੇਯੇਵ ਨੀਵਰਣਾਨਿ ਵਿਕ੍ਖਮ੍ਭਿਤਾਨਿ, ਤਤੋ ਪਟ੍ਠਾਯ ਚ ਨ ਤੇਸਂ ਪਰਿਯੁਟ੍ਠਾਨਂ ਅਤ੍ਥਿ. ਯਦਿ ਸਿਯਾ, ਝਾਨਤੋ ਪਰਿਹਾਯੇਯ੍ਯਾਤਿ? ਸਚ੍ਚਮੇਤਂ, ਇਮਸ੍ਸ ਪਨ ਝਾਨਸ੍ਸ ਵਣ੍ਣਭਣਨਵਸੇਨੇਤਂ ਵੁਤ੍ਤਂ ਯਥਾ ਅਞ੍ਞਤ੍ਥਾਪਿ ਹੇਟ੍ਠਾ ਪਹੀਨਾਨਂ ਉਪਰਿ ਪਹਾਨਵਚਨਨ੍ਤਿ. ਯੇ ਪਨ ‘‘ਸਬ੍ਬੇ ਕੁਸਲਾ ਧਮ੍ਮਾ ਸਬ੍ਬੇਸਂ ਅਕੁਸਲਾਨਂ ਪਟਿਪਕ੍ਖਾਤਿ ਕਤ੍ਵਾ ਏਵਂ ਵੁਤ੍ਤ’’ਨ੍ਤਿ ਵਦਨ੍ਤਿ, ਤੇਹਿ ਦੁਤਿਯਜ੍ਝਾਨੂਪਚਾਰਾਦੀਸੁ ਨੀਵਰਣਵਿਕ੍ਖਮ੍ਭਨਾਵਚਨਸ੍ਸ ਕਾਰਣਂ ਵਤ੍ਤਬ੍ਬਂ ਹੋਤਿ. ਯਮ੍ਪਿ ਚੇਕੇ ਵਦਨ੍ਤਿ ‘‘ਸਨ੍ਤੇਵ ਸੁਖੁਮਾਨਿ ਰੂਪਾਵਚਰਅਵਿਕ੍ਖਮ੍ਭਨੀਯਾਨਿ, ਤਾਨਿ ਸਨ੍ਧਾਯੇਤਂ ਵੁਤ੍ਤ’’ਨ੍ਤਿ, ਤਂ ਤੇਸਂ ਮਤਿਮਤ੍ਤਂ. ਨ ਹਿ ਮਹਗ੍ਗਤਕੁਸਲੇਸੁ ਲੋਕੁਤ੍ਤਰਕੁਸਲਂ ਵਿਯ ਓਧਿਸੋ ਪਹਾਨਂ ਨਾਮ ਅਤ੍ਥਿ. ਯੋ ਪਨ ਰੂਪਾਵਚਰੇਹਿ ਅਰੂਪਾਨਂ ਉਲ਼ਾਰਫਲਤਾਦਿਵਿਸੇਸੋ, ਸੋ ਭਾਵਨਾਵਿਸੇਸੇਨ ਸਨ੍ਤਤਰਪ੍ਪਣੀਤਤਰਭਾਵੇਨ ਤੇਸੁਯੇਵ ਪੁਰਿਮਪੁਰਿਮੇਹਿ ਪਚ੍ਛਿਮਪਚ੍ਛਿਮਾਨਂ ਵਿਯਾਤਿ ਦਟ੍ਠਬ੍ਬਂ. ਇਧਾਪੀਤਿ ਨ ਕੇਵਲਂ ਰੂਪਾਵਚਰਚਤੁਤ੍ਥਜ੍ਝਾਨੇ, ‘‘ਸੇਸਾਨਿ ਕਾਮਾਵਚਰਾਨੀ’’ਤਿਆਦੀਸੁ ਪਨ ਇਧ ਯਂ ਵਤ੍ਤਬ੍ਬਂ ਅਵੁਤ੍ਤਂ, ਤਂ ਰੂਪਾਵਚਰਜ੍ਝਾਨਨਿਦ੍ਦੇਸੇ ਵੁਤ੍ਤਨਯਾਨੁਸਾਰੇਨ ਵੇਦਿਤਬ੍ਬਂ.

੯੯੭-੧੦੦੧. ‘‘ਪੁਨ ਭਾਵੇਤੁਕਾਮੇਨਾ’’ਤਿ ਵੁਤ੍ਤੇ ਪਠਮਮੇਵ ਪਠਮਾਰੁਪ੍ਪਸ੍ਸ ਭਾਵਿਤਤ੍ਤਾ ਕਿਂ ਭਾਵੇਤੁਕਾਮੇਨਾਤਿ ਅਨੁਯੋਗੇ ‘‘ਦੁਤਿਯਾਰੁਪ੍ਪਮਾਨਸ’’ਨ੍ਤਿ ਵੁਤ੍ਤਂ, ਨ ਪਨ ‘‘ਦੁਤਿਯਾਰੁਪ੍ਪਮਾਨਸਂ ਭਾਵੇਤੁਕਾਮੇਨਾ’’ਤਿ ਇਮਿਨਾ ਅਜ੍ਝਾਸਯੇਨ. ਨ ਹਿ ਪਠਮਂ ਦੁਤਿਯਾਰੁਪ੍ਪਂ ਭਾਵਿਤਨ੍ਤਿ. ਰੂਪਾਵਚਰਜ੍ਝਾਨਂ ਅਨਤਿਕ੍ਕਮਿਤ੍ਵਾ ਅਨਧਿਗਨ੍ਤਬ੍ਬਤੋ ਤਂ ਮਨਸਿਕਾਰਸਮੁਦਾਚਾਰਸ੍ਸ ਹਾਨਭਾਗਿਯਭਾਵਾਵਹਨਤੋ ਰੂਪਾਵਚਰਜ੍ਝਾਨਮੇਤਸ੍ਸ ਪਚ੍ਚਤ੍ਥਿਕਨ੍ਤਿ ਕਤ੍ਵਾ ਵੁਤ੍ਤਂ ‘‘ਆਸਨ੍ਨ…ਪੇ… ਪਚ੍ਚਤ੍ਥਿਕਨ੍ਤਿ ਚਾ’’ਤਿ. ਵੀਥਿਪਟਿਪਨ੍ਨਾਯ ਭਾਵਨਾਯ ਉਪਰੂਪਰਿਵਿਸੇਸਾਵਹਭਾਵਤੋ, ਪਣੀਤਭਾਵਸਿਦ੍ਧਿਤੋ ਚ ਪਠਮਾਰੁਪ੍ਪਤੋ ਦੁਤਿਯਾਰੁਪ੍ਪਂ ਸਨ੍ਤਤਰਸਭਾਵਨ੍ਤਿ ਆਹ ‘‘ਦੁਤਿਯਾਰੁਪ੍ਪ…ਪੇ… ਪਨਾ’’ਤਿ. ਵਕ੍ਖਤਿ ਹਿ ‘‘ਸੁਪਣੀਤਤਰਾ ਹੋਨ੍ਤਿ, ਪਚ੍ਛਿਮਾ ਪਚ੍ਛਿਮਾ ਇਧਾ’’ਤਿ (ਅਭਿਧ. ੧੦੪੦). ਵਿਞ੍ਞਾਣਮਿਚ੍ਚੇਵਂ ਮਨਸਾ ਕਾਤਬ੍ਬਨ੍ਤਿ ਵਿਞ੍ਞਾਣਂ ਵਿਞ੍ਞਾਣਂ ਇਚ੍ਚੇਵਂ ਮਨਸਾ ਕਾਤਬ੍ਬਂ, ਕੇਵਲਂ ਅਨਨ੍ਤਂ ਅਨਨ੍ਤਨ੍ਤਿ ਨ ਮਨਸਿ ਕਾਤਬ੍ਬਂ. ਤੇਨਾਹ ‘‘ਅਨਨ੍ਤਨ੍ਤਿ…ਪੇ… ਮਨਸਾ ਨਿਧਾ’’ਤਿ. ਅਨਨ੍ਤਂ ਵਿਞ੍ਞਾਣਂ ਅਨਨ੍ਤਂ ਵਿਞ੍ਞਾਣਨ੍ਤਿ ਪਨ ਮਨਸਿ ਕਾਤੁਂ ਵਟ੍ਟਤਿ.

੧੦੦੨-੬. ਤਸ੍ਮਿਂ ਪਨ ਨਿਮਿਤ੍ਤਸ੍ਮਿਨ੍ਤਿ ਤਸ੍ਮਿਂ ਪਠਮਾਰੁਪ੍ਪਵਿਞ੍ਞਾਣਸਙ੍ਖਾਤੇ ਵਿਞ੍ਞਾਣਨਿਮਿਤ੍ਤੇ. ਵਿਚਾਰੇਨ੍ਤਸ੍ਸ ਮਾਨਸਨ੍ਤਿ ਭਾਵਨਾਚਿਤ੍ਤਂ ਪਵਤ੍ਤੇਨ੍ਤਸ੍ਸ. ਆਕਾਸਫੁਟਵਿਞ੍ਞਾਣੇਤਿ ਕਸਿਣੁਗ੍ਘਾਟਿਮਾਕਾਸਂ ਫਰਿਤ੍ਵਾ ਪਵਤ੍ਤੇ ਪਠਮਾਰੁਪ੍ਪਵਿਞ੍ਞਾਣੇ ਆਰਮ੍ਮਣਭੂਤੇ. ਅਪ੍ਪੇਤੀਤਿ ਅਪ੍ਪਨਾਵਸੇਨ ਪਵਤ੍ਤਤਿ. ਸਭਾਵਧਮ੍ਮੇਪਿ ਆਰਮ੍ਮਣਸਮਤਿਕ੍ਕਮਭਾਵਨਾਵਿਸੇਸਭਾਵਤੋ ਇਦਂ ਅਪ੍ਪਨਾਪਤ੍ਤਂ ਹੋਤਿ ਚਤੁਤ੍ਥਾਰੁਪ੍ਪਂ ਵਿਯ. ਅਪ੍ਪਨਾ…ਪੇ… ਨਯੋਵਾਤਿ ਦੁਤਿਯਾਰੁਪ੍ਪਜ੍ਝਾਨੇ ਪੁਰਿਮਭਾਗੇ ਤੀਣਿ, ਚਤ੍ਤਾਰਿ ਵਾ ਜਵਨਾਨਿ ਕਾਮਾਵਚਰਾਨਿ ਉਪੇਕ੍ਖਾਵੇਦਨਾਸਮ੍ਪਯੁਤ੍ਤਾਨੇਵ ਹੋਨ੍ਤਿ. ਚਤੁਤ੍ਥਂ, ਪਞ੍ਚਮਂ ਵਾ ਆਰੁਪ੍ਪਮਾਨਸਨ੍ਤਿਆਦਿਨਾ ਅਪ੍ਪਨਾਨਯੋ ਪਠਮਾਰੁਪ੍ਪਜ੍ਝਾਨੇ ਵੁਤ੍ਤਨਯੋਵ. ਫਰਿਤ੍ਵਾ ਪਵਤ੍ਤਵਿਞ੍ਞਾਣਨ੍ਤਿ ਪਠਮਾਰੁਪ੍ਪਵਿਞ੍ਞਾਣਂ ਵਿਞ੍ਞਾਣਞ੍ਚਨ੍ਤਿ ਵੁਚ੍ਚਤੀਤਿ ਰੁਲ਼੍ਹੀਸਦ੍ਦਵਸੇਨ ਵੁਤ੍ਤਭਾਵਮੇਵ ਪਕਾਸੇਤੁਂ ‘‘ਵਿਞ੍ਞਾਣਾ…ਪੇ… ਸਿਯਾ’’ਤਿ ਵੁਤ੍ਤਂ. ਪੁਬ੍ਬੇ ਅਨਨ੍ਤਸ੍ਸ ਆਕਾਸਸ੍ਸ ਆਰਮ੍ਮਣਕਰਣਵਸੇਨ ਅਨਨ੍ਤਤਾਯ ‘‘ਵਿਞ੍ਞਾਣਞ੍ਚ’’ਨ੍ਤਿ ਵੁਤ੍ਤਨ੍ਤਿ. ਪੁਨ ਮਨਸਿਕਾਰਵਸੇਨ ਵਾ ਅਨਨ੍ਤਤਾਯ ਤਥਾ ਵੁਤ੍ਤਨ੍ਤਿ ਦਸ੍ਸੇਤੁਂ ‘‘ਮਨਕ੍ਕਾਰਵਸੇਨਾਪੀ’’ਤਿਆਦਿ ਵੁਤ੍ਤਂ. ਦੁਤਿਯਾਰੁਪ੍ਪਂ ਭਾਵੇਨ੍ਤੋ ਹਿ ਪਠਮਾਰੁਪ੍ਪਂ ਅਨਨ੍ਤਤੋ ਅਨਵਸੇਸਤੋ ਮਨਸਿ ਕਰੋਨ੍ਤੋ ਅਨਨ੍ਤਨ੍ਤਿ ਮਨਸਿ ਕਰੋਤਿ.

੧੦੧੦. ਪਠਮਾਰੁਪ੍ਪਵਿਞ੍ਞਾਣਾਭਾਵੋਤਿ ਕਸਿਣਂ ਉਗ੍ਘਾਟੇਤ੍ਵਾ ਆਕਾਸੋ ਵਿਯ ਆਕਾਸਾਨਞ੍ਚਾਯਤਨਂ ਪਹਾਯ ਤਸ੍ਸ ਅਭਾਵੋ ਮਨਸਿ ਕਾਤਬ੍ਬੋ. ਕਸ੍ਮਾ ਪਨੇਤ੍ਥ ਦੁਤਿਯਾਰੁਪ੍ਪਵਿਞ੍ਞਾਣਾਭਾਵਂ ਅਮਨਸਿਕਤ੍ਵਾ ਪਠਮਾਰੁਪ੍ਪਵਿਞ੍ਞਾਣਾਭਾਵੋ ਮਨਸਿ ਕਾਤਬ੍ਬੋਤਿ? ਵੁਚ੍ਚਤੇ – ਤਯਿਦਂ ਆਰਮ੍ਮਣਾਤਿਕ੍ਕਮਨਵਸੇਨ ਪਤ੍ਤਬ੍ਬਂ, ਨ ਪਨ ਅਙ੍ਗਾਤਿਕ੍ਕਮਨਵਸੇਨ. ਤਥਾ ਚ ਸਤਿ ਆਰਮ੍ਮਣੇਯੇਵ ਸਾਤਿਸਯਂ ਦੋਸਦਸ੍ਸਨੇਨ ਤਂ ਸਮਤਿਕ੍ਕਮਿਤਬ੍ਬਂ, ਆਰਮ੍ਮਣਞ੍ਚ ਦੁਤਿਯਾਰੁਪ੍ਪਸ੍ਸ ਪਠਮਾਰੁਪ੍ਪਮੇਵ, ਤਸ੍ਮਾ ਕਸਿਣੇ ਆਦੀਨਵਂ ਦਿਸ੍ਵਾ ਤਂ ਉਗ੍ਘਾਟੇਤ੍ਵਾ ਤਬ੍ਬਿਵਿਤ੍ਤਾਕਾਸਸ੍ਸ ਵਿਯ ਪਠਮਾਰੁਪ੍ਪਵਿਞ੍ਞਾਣੇ ਆਦੀਨਵਂ ਦਿਸ੍ਵਾ ਤਂ ਪਹਾਯ ਤਦਭਾਵਸ੍ਸੇਵ ਮਨਸਿਕਰਣਂ ਯੁਤ੍ਤਨ੍ਤਿ. ਅਭਯਗਿਰਿਵਾਸਿਨੋ ਪਨ ‘‘ਵਿਞ੍ਞਾਣਞ੍ਚਾਯਤਨਾਭਾਵੋਯੇਵ ਮਨਸਿ ਕਾਤਬ੍ਬੋ’’ਤਿ ਵਦਨ੍ਤਿ, ਤੇ ਪਨ ਇਮੇਸਂ ਆਰਮ੍ਮਣਾਤਿਕ੍ਕਮਨਵਸੇਨ ਪਤ੍ਤਬ੍ਬਭਾਵਂ ਅਸਲ੍ਲਕ੍ਖੇਤ੍ਵਾ ਕਥੇਨ੍ਤਿ. ਯਦਿ ਸਲ੍ਲਕ੍ਖੇਨ੍ਤਿ, ਅਞ੍ਞਤ੍ਥ ਦੋਸਂ ਦਿਸ੍ਵਾ ਅਞ੍ਞਸ੍ਸ ਸਮਤਿਕ੍ਕਮੇ ਅਤਿਪ੍ਪਸਙ੍ਗਦੋਸਤੋ ਨ ਮੁਚ੍ਚਨ੍ਤਿ.

ਅਥਾਪਿ ਵਦੇਯ੍ਯੁਂ – ‘‘ਵਿਞ੍ਞਾਣਞ੍ਚਾਯਤਨਂ ਸਤੋ ਸਮਾਪਜ੍ਜਤਿ, ਸਤੋ ਸਮਾਪਜ੍ਜਿਤ੍ਵਾ ਸਤੋ ਵੁਟ੍ਠਾਤਿ, ਸਤੋ ਵੁਟ੍ਠਹਿਤ੍ਵਾ ਤਞ੍ਞੇਵ ਵਿਞ੍ਞਾਣਂ ਭਾਵੇਤੀ’ਤਿ ਵਚਨਤੋ ਵਿਞ੍ਞਾਣਞ੍ਚਾਯਤਨਾਭਾਵੋਯੇਵ ਮਨਸਿ ਕਾਤਬ੍ਬੋ’’ਤਿ, ਤਯਿਦਂ ਪਾਲ਼ਿਅਤ੍ਥਂ ਵਿਰੁਜ੍ਝਿਤ੍ਵਾ ਗਹਣਵਸੇਨ ਚਿਨ੍ਤਿਤਂ. ਨ ਹੇਤ੍ਥ ਤਞ੍ਞੇਵ ਵਿਞ੍ਞਾਣਨ੍ਤਿ ਵਿਞ੍ਞਾਣਞ੍ਚਾਯਤਨਂ ਅਧਿਪ੍ਪੇਤਂ. ਯਦਿ ਹਿ ਤਂ ਅਧਿਪ੍ਪੇਤਂ ਸਿਯਾ, ਵਿਞ੍ਞਾਣਞ੍ਚਾਯਤਨਨ੍ਤਿ ਤਸ੍ਸ ਪਧਾਨਭਾਵੇਨ ਨਿਦ੍ਦਿਟ੍ਠਤ੍ਤਾ ਤਞ੍ਞੇਵਾਤਿ ਵਚਨੇਨੇਵ ਪਰਿਯਤ੍ਤਂ, ਕਿਂ ਵਿਞ੍ਞਾਣਨ੍ਤਿ ਵਚਨੇਨ. ਅਥ ਸਰੂਪਨਿਦ੍ਦੇਸਤ੍ਥਂ ਵਿਞ੍ਞਾਣਵਚਨਂ, ਏਵਂ ਸਤਿ ਤਞ੍ਞੇਵ ਵਿਞ੍ਞਾਣਞ੍ਚਾਯਤਨਨ੍ਤਿ ਵੁਤ੍ਤਂ ਸਿਯਾ, ਤਸ੍ਮਾ ਵਿਞ੍ਞਾਣਨ੍ਤਿ ਵਚਨੇਨ ਯਂ ਆਰਬ੍ਭ ਵਿਞ੍ਞਾਣਞ੍ਚਾਯਤਨਂ ਪਵਤ੍ਤਂ, ਤਸ੍ਸੇਵ ਆਕਾਸਾਨਞ੍ਚਾਯਤਨਸ੍ਸ ਗਹਣਂ, ਨ ਇਤਰਸ੍ਸਾਤਿ ਸੁਟ੍ਠੁ ਵੁਤ੍ਤਂ.

੧੦੧੧-੨. ਪਠਮਾਰੁਪ੍ਪਵਿਞ੍ਞਾਣਾਭਾਵੋਮਨਸਿਕਾਤਬ੍ਬੋਤਿ ਵਤ੍ਵਾ ਮਨਸਿਕਾਰਵਿਧਿਂ ਦਸ੍ਸੇਤੁਂ ‘‘ਤਂ ਪਨਾ’’ਤਿਆਦਿ ਵੁਤ੍ਤਂ. ਅਕਤ੍ਵਾ ਮਨਸਾਤਿ ਮਨਸਾ ਆਰਮ੍ਮਣਂ ਅਕਤ੍ਵਾ ਸਬ੍ਬੇਨ ਸਬ੍ਬਂ ਤਂ ਅਚਿਨ੍ਤੇਤ੍ਵਾ. ‘‘ਆਕਾਸਂ ਆਕਾਸ’’ਨ੍ਤਿ ਮਨਸਿ ਕਰੋਨ੍ਤਸ੍ਸ ਕਸਿਣਵਿਵਿਤ੍ਤਾਕਾਸਂ ਵਿਯ ‘‘ਨਤ੍ਥਿ ਨਤ੍ਥੀ’’ਤਿ, ‘‘ਸੁਞ੍ਞਂ ਸੁਞ੍ਞ’’ਨ੍ਤਿ ਵਾ ਮਨਸਿ ਕਰੋਨ੍ਤਸ੍ਸ ਵਿਞ੍ਞਾਣਵਿਵਿਤ੍ਤਂ ਅਭਾਵਮਤ੍ਤਮੇਵ ਉਪਟ੍ਠਾਤੀਤਿ ਆਹ ‘‘ਨਤ੍ਥੀ’’ਤਿਆਦਿ. ਵਾ-ਸਦ੍ਦੋ ਅਨਿਯਮਤ੍ਥੋ, ਤੇਨ ਦ੍ਵੀਸੁ ਪਕਾਰੇਸੁ ਏਕੇਨਪਿ ਅਤ੍ਥਸਿਦ੍ਧਿ ਹੋਤੀਤਿ ਦਸ੍ਸੇਤਿ. ਅਵੁਤ੍ਤਵਿਕਪ੍ਪਨਤ੍ਥੋ ਵਾ ਵਾ-ਸਦ੍ਦੋ, ਤੇਨ ‘‘ਵਿਵਿਤ੍ਤਂ ਵਿਵਿਤ੍ਤ’’ਨ੍ਤਿ ਇਮਸ੍ਸਪਿ ਸਙ੍ਗਹੋ ਦਟ੍ਠਬ੍ਬੋ. ਅਨਿਯਮੋ ਪਨੇਤ੍ਥ ਤਿਣ੍ਣਮ੍ਪਿ ਵਿਸੁਂ ਵਿਸੁਂ ਪਰਿਯਾਯਭਾਵਤੋਵ ਸਿਦ੍ਧੋ. ਪਰਿਯਾਯਸਦ੍ਦਾ ਹਿ ਵਿਸੁਂ ਵਿਸੁਂਯੇਵ ਅਤ੍ਥਂ ਸਾਧੇਨ੍ਤਾ ਪਰਿਯਾਯਾਤਿ ਲੋਕੇ ਨਿਰੁਲ਼੍ਹਾ. ਯਥਾਹੁ –

‘‘ਪਰਿਯਾਯੇਨੇਵ ਤੇ ਯਸ੍ਮਾ, ਵਦਨ੍ਤਤ੍ਥਂ ਨ ਸਂਹਤਾ;

ਪਰਿਯਾਯਤ੍ਥਂ ਤਤੋ ਸਬ੍ਬਂ, ਪਰਿਯਾਯੇਸੁ ਵਵਤ੍ਥਿਤ’’ਨ੍ਤਿ.

੧੦੧੩-੬. ਤਸ੍ਮਿਂ ਨਿਮਿਤ੍ਤੇਤਿ ਪਠਮਾਰੁਪ੍ਪਵਿਞ੍ਞਾਣਸ੍ਸ ਅਭਾਵਸਙ੍ਖਾਤੇ ਝਾਨੁਪ੍ਪਤ੍ਤਿਕਾਰਣਭੂਤੇ ਨਿਮਿਤ੍ਤੇ. ਸਤਿ ਸਨ੍ਤਿਟ੍ਠਤੀਤਿ ਅਭਾਵਨਿਮਿਤ੍ਤਾਰਮ੍ਮਣਾ ਸਤਿ ਸਮ੍ਮਾ ਸੁਪ੍ਪਤਿਟ੍ਠਿਤਾ ਹੁਤ੍ਵਾ ਤਿਟ੍ਠਤਿ. ਸਤਿਸੀਸੇਨ ਚੇਤ੍ਥ ਉਪਚਾਰਜ੍ਝਾਨਾਨੁਗੁਣਾਨਂ ਸਦ੍ਧਾਪਞ੍ਚਮਾਨਂ ਇਨ੍ਦ੍ਰਿਯਾਨਂ ਸਕਿਚ੍ਚਯੋਗਂ ਦਸ੍ਸੇਤਿ. ਉਪਚਾਰਜ੍ਝਾਨਂ ਪਨ ‘‘ਭਿਯ੍ਯੋਪਿ ਸਮਾਧਿਯਤਿ ਮਾਨਸ’’ਨ੍ਤਿ ਇਮਿਨਾ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਕਸਿਣੁਗ੍ਘਾਟਿਮਾ…ਪੇ… ਅਭਾਵਕੇਤਿ ਏਵਂ ਪਵਤ੍ਤਵਿਞ੍ਞਾਣਸ੍ਸ ਨਤ੍ਥਿਭਾਵਸਙ੍ਖਾਤੇ ਵਿਨਾਸਾਭਾਵਕੇ ਨ ਪੁਰੇ ਅਭਾਵਾਦਿਕੇ. ਅਪ੍ਪਨਾਨਯੋ ਪਨੇਤ੍ਥ ਪਥਵੀਕਸਿਣੇ ਵੁਤ੍ਤਨਯਾਨੁਸਾਰੇਨ ਵੇਦਿਤਬ੍ਬੋਤਿ ਆਹ ‘‘ਅਪ੍ਪਨਾਯ ਨਯੋ’’ਤਿਆਦਿ.

੧੦੧੭-੯. ਏਵਂ ਯਂ ਤਤ੍ਥ ਅਵਸਿਟ੍ਠਂ, ਤਂ ਅਤਿਦਿਸਿਤ੍ਵਾ ਇਦਾਨਿ ਵਿਸੇਸਂ ਦਸ੍ਸੇਤੁਂ ‘‘ਆਕਾਸਗਤਵਿਞ੍ਞਾਣ’’ਨ੍ਤਿਆਦਿ ਵੁਤ੍ਤਂ. ਪਰਿਕਮ੍ਮਮਨਕ੍ਕਾਰੇ ਤਸ੍ਮਿਂ ਅਨ੍ਤਰਹਿਤੇਤਿ ‘‘ਨਤ੍ਥਿ ਨਤ੍ਥੀ’’ਤਿ ਪਵਤ੍ਤਪਰਿਕਮ੍ਮਮਨਸਿਕਾਰੇ ਅਮਨਸਿਕਰਣੇਨ ਅਸ੍ਮਿਂ ਪਠਮਾਰੁਪ੍ਪਵਿਞ੍ਞਾਣੇ ਅਨ੍ਤਰਹਿਤੇ, ਨ ਪਨ ਖਣਭਙ੍ਗਵਸੇਨ, ਝਾਨਪਰਿਹਾਨਿਵਸੇਨ ਵਾ ਅਨ੍ਤਰਹਿਤੇ. ਖਣਭਙ੍ਗਵਸੇਨ ਹਿ ਅਨ੍ਤਰਧਾਨਂ ਖਣੇ ਖਣੇ ਉਪਲਬ੍ਭਤਿ. ਪਰਿਹਾਨਿਵਸੇਨ ਚ ਅਨ੍ਤਰਧਾਨੇ ਪੁਨ ਤਂ ਅਨੁਪ੍ਪਾਦੇਤ੍ਵਾ ਉਤ੍ਤਰਿ ਞਾਣਾਧਿਗਮੋਯੇਵ ਨਤ੍ਥੀਤਿ. ਤਸ੍ਸਾਪਗਮਮਤ੍ਤਂਵ ਪਸ੍ਸਨ੍ਤੋ ਵਸਤੀਤਿ ਤਸ੍ਸ ਪਠਮਾਰੁਪ੍ਪਸ੍ਸ ਅਭਾਵਮਤ੍ਤਂ ਪਸ੍ਸਨ੍ਤੋ ਸੋ ਯੋਗਾਵਚਰੋ ਵਿਹਰਤਿ. ਯਥਾ ਕਥਂ ਵਿਯਾਤਿ ਆਹ ‘‘ਸਨ੍ਨਿਪਾਤ’’ਨ੍ਤਿਆਦਿ. ਇਦਂ ਵੁਤ੍ਤਂ ਹੋਤਿ – ਯਥਾ ਨਾਮ ਕੋਚਿ ਪੁਰਿਸੋ ਮਣ੍ਡਲਮਾਲ਼ਾਦੀਸੁ ਕਤ੍ਥਚਿ ਕੇਨਚਿਦੇਵ ਕਰਣੀਯੇਨ ਸਨ੍ਨਿਪਤਿਤਂ ਭਿਕ੍ਖੁਸਙ੍ਘਂ ਦਿਸ੍ਵਾ ਕਤ੍ਥਚਿ ਗਨ੍ਤ੍ਵਾ ਸਨ੍ਨਿਪਾਤਕਿਚ੍ਚਾਵਸਾਨੇ ਉਟ੍ਠਾਯ ਪਕ੍ਕਨ੍ਤੇਸੁ ਭਿਕ੍ਖੂਸੁ ਪੁਨ ਤਂ ਠਾਨਂ ਗਨ੍ਤ੍ਵਾ ਓਲੋਕੇਨ੍ਤੋ ਸੁਞ੍ਞਮੇਵ ਪਸ੍ਸਤਿ, ਏਵਂਸਮ੍ਪਦਮਿਦਂ ਦਟ੍ਠਬ੍ਬਨ੍ਤਿ. ਤਤ੍ਰਿਦਂ ਓਪਮ੍ਮਸਂਸਨ੍ਦਨਂ – ਯਥਾ ਸੋ ਪੁਰਿਸੋ ਸਨ੍ਨਿਪਤਿਤਂ ਭਿਕ੍ਖੁਸਙ੍ਘਂ ਦਿਸ੍ਵਾ ਗਤੋ, ਤਤੋ ਸਬ੍ਬੇਸੁ ਭਿਕ੍ਖੂਸੁ ਅਪਗਤੇਸੁ ਤਂ ਠਾਨਂ ਤੇਹਿ ਸੁਞ੍ਞਮੇਵ ਪਸ੍ਸਤਿ, ਨ ਪਨ ਤੇਸਂ ਕੁਤੋਚਿ ਅਪਗਤਕਾਰਣਂ, ਏਵਮਯਂ ਯੋਗਾਵਚਰੋ ਪੁਬ੍ਬੇ ਵਿਞ੍ਞਾਣਞ੍ਚਾਯਤਨਜ੍ਝਾਨਚਕ੍ਖੁਨਾ ਪਠਮਾਰੁਪ੍ਪਵਿਞ੍ਞਾਣਂ ਦਿਸ੍ਵਾ ਨਤ੍ਥੀਤਿ ਮਨਸਿਕਾਰੇਨ ਤਸ੍ਮਿਂ ਅਪਗਤੇ ਤਤਿਯਾਰੁਪ੍ਪਚਕ੍ਖੁਨਾ ਤਸ੍ਸ ਨਤ੍ਥਿਭਾਵਮੇਵ ਪਸ੍ਸਤਿ, ਨ ਤਸ੍ਸ ਅਪਗਤਕਾਰਣਂ ਵੀਮਂਸਤਿ ਝਾਨਸ੍ਸ ਤਾਦਿਸਾਭੋਗਾਭਾਵਤੋਤਿ.

੧੦੨੦-੪. ਚਤੁਤ੍ਥਾ…ਪੇ… ਨ ਚ ਸਨ੍ਤਨ੍ਤਿ ਯਥਾ ਨੇਵਸਞ੍ਞਾਨਾਸਞ੍ਞਾਯਤਨਚਿਤ੍ਤਂ ਸਙ੍ਖਾਰਾਵਸੇਸਸੁਖੁਮਭਾਵਪ੍ਪਤ੍ਤਿਯਾ ਸਵਿਸੇਸਂ ਸਨ੍ਤਂ, ਏਵਮਯਂ ਆਕਿਞ੍ਚਞ੍ਞਾਯਤਨਸਮਾਪਤ੍ਤਿ ਨ ਚ ਸਨ੍ਤਾ ਤਦਭਾਵਤੋਤਿ ਅਧਿਪ੍ਪਾਯੋ. ਚ-ਸਦ੍ਦੋ ਪਨੇਤ੍ਥ ਅਵੁਤ੍ਤਸਮੁਚ੍ਚਯਤ੍ਥੋ. ਤੇਨ ‘‘ਸਞ੍ਞਾ ਰੋਗੋ, ਸਞ੍ਞਾ ਗਣ੍ਡੋ, ਸਞ੍ਞਾ ਸਲ੍ਲਂ, ਏਤਂ ਸਨ੍ਤਂ, ਏਤਂ ਪਣੀਤਂ, ਯਦਿਦਂ ਨੇਵਸਞ੍ਞਾਨਾਸਞ੍ਞਾਯਤਨ’’ਨ੍ਤਿ ਇਮਸ੍ਸਪਿ ਸਙ੍ਗਹੋ ਵੇਦਿਤਬ੍ਬੋ. ਚਤੁਤ੍ਥਂ ਸਨ੍ਤਤੋਤਿ ਸਙ੍ਖਾਰਾਵਸੇਸਸੁਖੁਮਭਾਵੇਨੇਵ ਸਵਿਸੇਸਂ ਸਨ੍ਤਤਾਯ, ਅਸਨ੍ਤਭਾਵਕਰਰੋਗਾਦਿਸਰਿਕ੍ਖਕਸਞ੍ਞਾਵਿਰਹਤੋ ਚ ਸਨ੍ਤਤੋ ਦਿਸ੍ਵਾ. ‘‘ਸਨ੍ਤਂ ਸਨ੍ਤਮਿਦਂ ਚਿਤ੍ਤ’’ਨ੍ਤਿ ਇਮਿਨਾ ਭਾਵਨਾਕਾਰਂ ਦਸ੍ਸੇਤਿ. ਵਿਭਙ੍ਗੇਪਿ ਹਿ ਤਂਯੇਵ ਆਕਿਞ੍ਚਞ੍ਞਾਯਤਨਂ ਸਨ੍ਤਤੋ ਮਨਸਿ ਕਰੋਤੀਤਿ ਅਯਮੇਵ ਭਾਵਨਾਕਾਰੋ ਗਹਿਤੋ. ਅਪਰੇ ਪਨ ‘‘ਪਾਲ਼ਿਯਂ ਇਮਸ੍ਸ ਭਾਵਨਾਕਾਰੋ ਨ ਗਹਿਤੋ’’ਤਿ ਵਤ੍ਵਾ ਤਤ੍ਥ ਕਾਰਣਂ ਵਦਨ੍ਤਿ, ਤਤ੍ਥ ਵਤ੍ਤਬ੍ਬਂ ਵਿਸੁਦ੍ਧਿਮਗ੍ਗਸਂਵਣ੍ਣਨਾਦਿਤੋ ਗਹੇਤਬ੍ਬਂ.

੧੦੨੭. ਤਤਿਯਾਰੁਪ੍ਪਸਙ੍ਖਾਤਕ੍ਖਨ੍ਧੇਸੁ ਚ ਚਤੂਸੁਪਿ ਆਰਮ੍ਮਣਭੂਤੇਸੂਤਿ ਅਧਿਪ੍ਪਾਯੋ.

੧੦੨੯-੩੧. ਅਭਾਵਮਤ੍ਤਮ੍ਪੀਤਿ ਸੁਞ੍ਞਤਮਤ੍ਤਮ੍ਪਿ ਏਵਂ ਸੁਖੁਮਮ੍ਪੀਤਿ ਅਧਿਪ੍ਪਾਯੋ. ਸਨ੍ਤਾਰਮ੍ਮਣਤਾਯਾਤਿ ਸਨ੍ਤਂ ਆਰਮ੍ਮਣਂ ਏਤਸ੍ਸਾਤਿ ਸਨ੍ਤਾਰਮ੍ਮਣਾ, ਤਬ੍ਭਾਵੋ ਸਨ੍ਤਾਰਮ੍ਮਣਤਾ, ਤਾਯ, ਨ ਝਾਨਸਨ੍ਤਤਾਯ. ਨ ਹਿ ਤਤਿਯਾਰੁਪ੍ਪਸਮਾਪਤ੍ਤਿ ਚਤੁਤ੍ਥਾਰੁਪ੍ਪਤੋ ਸਨ੍ਤਤਰਾ. ਚੋਦਕੋ ਯਂ ਸਨ੍ਤਤੋ ਮਨਸਿ ਕਰੋਤਿ, ਨ ਤਤ੍ਥ ਆਦੀਨਵਦਸ੍ਸਨਂ ਭਵੇਯ੍ਯ. ਅਸਤਿ ਚ ਆਦੀਨਵਦਸ੍ਸਨੇ ਨ ਸਮਤਿਕ੍ਕਮੋ ਏਵ ਸਿਯਾਤਿ ‘‘ਸਨ੍ਤਤੋ ਚੇ ਮਨਕ੍ਕਾਰੋ ਕਥਞ੍ਚ ਸਮਤਿਕ੍ਕਮੋ’’ਤਿ ਆਹ. ਇਤਰੋ ‘‘ਅਨਾਪਜ੍ਜਿਤੁਕਾਮਤ੍ਤਾ’’ਤਿਆਦਿਨਾ ਪਰਿਹਾਰਮਾਹ. ਤੇਨ ਆਦੀਨਵਦਸ੍ਸਨਮ੍ਪਿ ਅਤ੍ਥੇਵਾਤਿ ਦਸ੍ਸੇਤਿ. ਯਸ੍ਮਿਞ੍ਹਿ ਝਾਨੇ ਅਭਿਰਤਿ, ਤਤ੍ਥ ਆਵਜ੍ਜਨਸਮਾਪਜ੍ਜਨਾਦਿਪਟਿਪਤ੍ਤਿਯਾ ਭਵਿਤਬ੍ਬਂ. ਸਾ ਪਨਸ੍ਸ ਤਤਿਯਾਰੁਪ੍ਪੇ ਸਬ੍ਬਸੋਵ ਨਤ੍ਥਿ, ਕੇਵਲਂ ਸੁਞ੍ਞਭਾਵਤੋ ਆਰਮ੍ਮਣਕਰਣਮਤ੍ਤਮੇਵ. ਤਥਾ ਹੇਸ ਕਿਞ੍ਚਾਪਿ ਤਂ ਸਨ੍ਤਤੋ ਮਨਸਿ ਕਰੋਤਿ, ਅਥ ਖ੍ਵਸ੍ਸ ‘‘ਅਹਮੇਤਂ ਆਵਜ੍ਜਿਸ੍ਸਾਮਿ, ਸਮਾਪਜ੍ਜਿਸ੍ਸਾਮੀ’’ਤਿ ਆਭੋਗੋ ਸਮਨ੍ਨਾਹਾਰੋ ਨ ਹੋਤਿ. ਕਸ੍ਮਾ? ਆਕਿਞ੍ਚਞ੍ਞਾਯਤਨਤੋ ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਯਾ ਪਣੀਤਤਰਤਾਯ. ਯਥਾ ਹਿ ਰਾਜਾ ਮਹਤਾ ਰਾਜਾਨੁਭਾਵੇਨ ਨਗਰਵੀਥਿਯਂ ਚਰਨ੍ਤੋ ਦਨ੍ਤਕਾਰਾਦਯੋ ਕਮ੍ਮਕਾਰੇ ਛੇਕੇ ਅਨੇਕਾਨਿ ਦਨ੍ਤਵਿਕਤਿਆਦੀਨਿ ਸਿਪ੍ਪਾਨਿ ਕਰੋਨ੍ਤੇ ਦਿਸ੍ਵਾ ‘‘ਅਹੋ ਵਤ ਰੇ ਛੇਕਾ ਆਚਰਿਯਾ, ਈਦਿਸਾਨਿ ਸਿਪ੍ਪਾਨਿ ਕਰਿਸ੍ਸਨ੍ਤੀ’’ਤਿ ਏਵਂ ਤੇਸਂ ਛੇਕਤਾਯ ਤੁਸ੍ਸਤਿ, ਨ ਚਸ੍ਸ ਏਵਂ ਹੋਤਿ ‘‘ਅਹੋ ਵਤਾਹਮ੍ਪਿ ਰਜ੍ਜਂ ਪਹਾਯ ਏਵਰੂਪੋ ਸਿਪ੍ਪਿਕੋ ਭਵੇਯ੍ਯ’’ਨ੍ਤਿ. ਤਂ ਕਿਸ੍ਸ ਹੇਤੁ? ਰਜ੍ਜਸਿਰਿਯਾ ਮਹਾਨਿਸਂਸਤਾਯ, ਸੋ ਤੇਸਂ ਜੀਵਿਤਂ ਤਿਣਾਯਪਿ ਅਮਞ੍ਞਮਾਨੋ ਤੇ ਸਮਤਿਕ੍ਕਮਿਤ੍ਵਾ ਗਚ੍ਛਤਿ, ਏਵਂਸਮ੍ਪਦਮਿਦਂ ਦਟ੍ਠਬ੍ਬਂ.

੧੦੩੨. ਸੁਖੁਮਂ ਪਰਨ੍ਤਿ ਉਕ੍ਕਂਸਤੋ ਸੁਖੁਮਂ, ਪਠਮਜ੍ਝਾਨੂਪਚਾਰਤੋ ਪਟ੍ਠਾਯ ਹਿ ਤਚ੍ਛੇਨ੍ਤਿਯਾ ਵਿਯ ਪਵਤ੍ਤਮਾਨਾਯ ਭਾਵਨਾਯ ਅਨੁਕ੍ਕਮੇਨ ਸਙ੍ਖਾਰਾ ਤਤ੍ਥ ਅਨ੍ਤਿਮਕੋਟ੍ਠਾਸਤਂ ਪਾਪਿਤਾਤਿ. ਯਦਿ ਏਵਂ ਕਥਂ ਭਾਵਨਾ ਅਤ੍ਤਨੋ ਕਿਚ੍ਚਂ ਸਾਧੇਤਿ, ਨਨੁ ਚੇਸਾ ਤਦਵਤ੍ਥਂ ਪਾਪਿਤਾ ਆਰਮ੍ਮਣਂ ਨ ਸਮ੍ਮਾ ਉਪਨਿਜ੍ਝਾਯਤੀਤਿ? ਨਯਿਦਮੇਵ ਦਟ੍ਠਬ੍ਬਂ. ਭਾਵਨਾਬਲੇਨ ਸੁਖੁਮਭਾਵਂ ਪਾਪਿਤਾਪਿ ਚੇਸਾ ਅਤ੍ਤਨੋ ਕਿਚ੍ਚੇ ਦੁਬ੍ਬਲਤ੍ਤਂ ਨ ਪਾਪਿਤਾ, ਅਥ ਖੋ ਵਿਪ੍ਫਾਰਿਕਤਾਭਾਵਂ ਗਮਿਤਾ, ਤੇਨ ਤਥਾ ਸੁਖੁਮਾਪਿ ਅਤ੍ਤਨੋ ਕਿਚ੍ਚੇ ਨ ਦੁਬ੍ਬਲਾ ਏਵਾਤਿ ਨ ਤਤ੍ਥ ਤਸ੍ਸਾ ਅਸਾਮਤ੍ਥਿਯਂ ਹੋਤਿ.

੧੦੩੩-੪. ਯਾਯ ਸਞ੍ਞਾਯਾਤਿ ਯਾਦਿਸਾਯ ਸਞ੍ਞਾਯ ਸਦ੍ਦਪ੍ਪਵਤ੍ਤਿਹੇਤੁਭੂਤਾਯ. ਸੋ ਨੇਵਸਞ੍ਞਾਨਾਸਞ੍ਞਾਯਤਨਸਮਙ੍ਗੀ ਪੁਗ੍ਗਲੋ. ਨੇਵਸਞ੍ਞੀ ਚ ਨਾਸਞ੍ਞੀ ਹੋਤਿ ਨੇਵਸਞ੍ਞਾਨਾਸਞ੍ਞਾਸਮਙ੍ਗੀ ਹੋਤਿ. ਨ ਕੇਵਲਂ ਤੁ ਸਞ੍ਞਾਵ ਏਦਿਸੀ ਸੁਖੁਮਾ ਨੇਵਸਞ੍ਞਾਨਾਸਞ੍ਞਾ ਹੋਤਿ, ਅਥ ਖੋ ਪਨ ਵੇਦਨਾਦਯੋਪਿ ਸੁਖੁਮਾ, ਵੇਦਨਾਪਿ ਨੇਵਵੇਦਨਾਨਾਵੇਦਨਾ, ਚਿਤ੍ਤਮ੍ਪਿ ਨੇਵਚਿਤ੍ਤਂਨਾਚਿਤ੍ਤਂ, ਫਸ੍ਸੋਪਿ ਨੇਵਫਸ੍ਸੋਨਾਫਸ੍ਸੋ. ਏਸ ਨਯੋ ਸੇਸਸਮ੍ਪਯੁਤ੍ਤਧਮ੍ਮੇਸੁ. ਸਞ੍ਞਾਸੀਸੇਨ ਪਨ ‘‘ਨੇਵਸਞ੍ਞਾਨਾਸਞ੍ਞਾਯਤਨ’’ਨ੍ਤਿ ਵੁਤ੍ਤਂ ‘‘ਨਾਨਤ੍ਤਕਾਯਾ ਨਾਨਤ੍ਤਸਞ੍ਞਿਨੋ’’ਤਿਆਦੀਸੁ (ਦੀ. ਨਿ. ੩.੩੩੨, ੩੪੧, ੩੫੭, ੩੫੯; ਅ. ਨਿ. ੭.੪੪; ੯.੨੪) ਵਿਯ. ਨਨੁ ਚੇਤ੍ਥ ਯਦਿ ਸਞ੍ਞਾ ਅਤ੍ਥਿ, ਕਥਂ ਨੇਵਸਞ੍ਞਾਤਿ ਵਤ੍ਤੁਂ ਵਟ੍ਟਤਿ. ਯਦਿ ਨਤ੍ਥਿ, ਕਥਂ ਨਾਸਞ੍ਞਾਤਿ ਅਨੁਯੋਗਂ ਸਨ੍ਧਾਯ ਇਮਮਤ੍ਥਂ ਉਪਮਾਹਿ ਸਾਧੇਤੁਂ ‘‘ਪਤ੍ਤਮਕ੍ਖਨਤੇਲੇਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਪਤ੍ਤਮਕ੍ਖਣਤੇਲੇਨਾਤਿ ਅਨ੍ਤੋਵੁਤ੍ਥਤਾਯ ਯਾਗੁਯਾ ਸਦ੍ਧਿਂ ਅਕਪ੍ਪਿਯਟ੍ਠੇਨ ਤੇਲਂ ਅਤ੍ਥੀਤਿ, ਨਾਲ਼ਿਪੂਰਾਦੀਨਂ ਵਸੇਨ ਨਤ੍ਥੀਤਿ ਚ ਵਤ੍ਤਬ੍ਬੇਨ ਪਤ੍ਤੇ ਮਕ੍ਖਿਤਤੇਲੇਨ. ਮਗ੍ਗਸ੍ਮਿਂ ਉਦਕੇਨ ਚਾਤਿ ਉਪਾਹਨਤੇਮਨਮਤ੍ਤਟ੍ਠੇਨ ਉਦਕਂ ਅਤ੍ਥੀਤਿ, ਨਹਾਨਵਸੇਨ ਨਤ੍ਥੀਤਿ ਚ ਵਤ੍ਤਬ੍ਬੇਨ ਮਗ੍ਗਸ੍ਮਿਂ ਉਦਕੇਨ.

੧੦੩੫-੭. ਅਯਂ ਅਤ੍ਥੋਤਿ ਕਿਞ੍ਚਿ ਵਿਸੇਸਂ ਉਪਾਦਾਯ ਸਭਾਵਤੋ ਅਤ੍ਥੀਤਿ ਵਤ੍ਤਬ੍ਬਸ੍ਸੇਵ ਧਮ੍ਮਸ੍ਸ ਕਿਞ੍ਚਿ ਵਿਸੇਸਂ ਉਪਾਦਾਯ ਨਤ੍ਥੀਤਿ ਵਤ੍ਤਬ੍ਬਤਾਸਙ੍ਖਾਤੋ ਅਯਮਤ੍ਥੋ. ਪਟੁਸਞ੍ਞਾਕਿਚ੍ਚਂ ਕਾਤੁਂ ਅਸਮਤ੍ਥਤਾਯ ਹਿ ਨੇਵਸਞ੍ਞਤਾ, ਸਙ੍ਖਾਰਾਵਸੇਸਸੁਖੁਮਭਾਵੇਨ ਨਾਸਞ੍ਞਤਾ ਚ ਹੋਤਿ. ਤੇਨਾਹ ‘‘ਪਟੁਸਞ੍ਞਾਯ ਕਿਚ੍ਚਸ੍ਸਾ’’ਤਿਆਦਿ. ਆਰਮ੍ਮਣਸਞ੍ਜਾਨਨਞ੍ਚੇਵ ਵਿਪਸ੍ਸਨਾਯ ਵਿਸਯਭਾਵਂ ਉਪਗਨ੍ਤ੍ਵਾ ਨਿਬ੍ਬਿਦਾਜਨਨਞ੍ਚ ਪਟੁਸਞ੍ਞਾਕਿਚ੍ਚਂ ਕਥਮਯਂ ਸਞ੍ਞਾਵ ਸਮਾਨਾ ਸਞ੍ਞਾਕਿਚ੍ਚਂ ਕਾਤੁਂ ਨ ਸਕ੍ਕੋਤੀਤਿ ਆਹ ‘‘ਯਥਾ ਦਹਨਕਿਚ੍ਚ’’ਨ੍ਤਿਆਦਿ. ਨ੍ਹਾਤੁਕਾਮਸ੍ਸ ਉਣ੍ਹਸੀਤਭਾਵਂ ਅਕਤ੍ਵਾ ਸੁਖਜਨਨਤਾਯ ਸੁਖੋਦਕਂ, ਤਸ੍ਮਿਂ. ਤੇਜੋਧਾਤੁ ਯਥਾ ਦਹਨਕਿਚ੍ਚਂ ਕਾਤੁਂ ਨ ਸਕ੍ਕੋਤਿ, ਏਵਮੇਸਾ ਅਤਿਸਨ੍ਤਾਰਮ੍ਮਣੇ ਪਵਤ੍ਤਤ੍ਤਾ ਆਰਮ੍ਮਣਸਞ੍ਜਾਨਨਂ ਕਾਤੁਂ ਨ ਸਕ੍ਕੋਤਿ, ਪਰਮਸੁਖੁਮਤ੍ਤਂ ਗਤਾਵ. ਤੇਨੇਵ ਹੇਸਾ ਅਕਤਾਭਿਨਿਵੇਸਸ੍ਸ ਵਿਪਸ੍ਸਨਾਞਾਣੇਨ ਸੁਖਗ੍ਗਯ੍ਹਾ ਨ ਹੋਤੀਤਿ ਸੇਸਸਮਾਪਤ੍ਤੀਸੁ ਸਞ੍ਞਾ ਵਿਯ ਵਿਪਸ੍ਸਨਾਯ ਵਿਸਯਭਾਵਂ ਉਪਗਨ੍ਤ੍ਵਾ ਨਿਬ੍ਬਿਦਾਜਨਨਮ੍ਪਿ ਕਾਤੁਂ ਨ ਸਕ੍ਕੋਤਿ, ਅਞ੍ਞੇਸੁ ਹਿ ਖਨ੍ਧੇਸੁ ਅਕਤਵਿਪਸ੍ਸਨਾਭਿਨਿਵੇਸੋ ਭਿਕ੍ਖੁ ਨੇਵਸਞ੍ਞਾਨਾਸਞ੍ਞਾਯਤਨਕ੍ਖਨ੍ਧੇ ਸਮ੍ਮਸਿਤ੍ਵਾ ਨਿਬ੍ਬਿਦਂ ਪਤ੍ਤੁਂ ਸਮਤ੍ਥੋ ਨਾਮ ਨਤ੍ਥਿ, ਅਪਿ ਆਯਸ੍ਮਾ ਸਾਰਿਪੁਤ੍ਤੋ. ਪਕਤਿਵਿਪਸ੍ਸਕੋ ਪਨ ਸਾਰਿਪੁਤ੍ਤਸਦਿਸੋ ਭਿਕ੍ਖੁ ਖਨ੍ਧਾਦਿਮੁਖੇਨ ਵਿਪਸ੍ਸਨਂ ਅਭਿਨਿਵਿਸਿਤ੍ਵਾ ਦ੍ਵਾਰਾਰਮ੍ਮਣੇਹਿ ਸਦ੍ਧਿਂ ਦ੍ਵਾਰਪ੍ਪਵਤ੍ਤਧਮ੍ਮਾਨਂ ਵਿਪਸ੍ਸਨਂ ਆਰਭਿਤ੍ਵਾ ਠਿਤੋ ਸਕ੍ਕੁਣੇਯ੍ਯ ਤਬ੍ਬਿਸਯਂ ਉਦਯਬ੍ਬਯਞਾਣਂ ਉਪ੍ਪਾਦੇਤੁਂ, ਸੋਪਿ ਕਲਾਪਸਮ੍ਮਸਨਵਸੇਨੇਵ, ਨੋ ਅਨੁਪਦਧਮ੍ਮਵਿਪਸ੍ਸਨਾਵਸੇਨ. ਨ ਹਿ ਸਾਰਿਪੁਤ੍ਤਸਦਿਸੋ ਭਿਕ੍ਖੁ ਚਤੁਤ੍ਥਾਰੁਪ੍ਪਪਰਿਯਾਪਨ੍ਨੇਸੁ ਫਸ੍ਸਾਦਿਧਮ੍ਮੇਸੁ ਵਿਨਿਬ੍ਭੁਜਿਤ੍ਵਾ ਵਿਸੁਂ ਵਿਸੁਂ ਸਰੂਪਤੋ ਗਹੇਤ੍ਵਾ ਅਨਿਚ੍ਚਾਦਿਵਸੇਨ ਸਮ੍ਮਸਿਤੁਂ ਸਕ੍ਕੋਤਿ. ਕੇਵਲਂ ਪਨ ਅਵਿਨਿਬ੍ਭੁਜ੍ਜ ਏਕਤੋ ਗਹੇਤ੍ਵਾ ਕਲਾਪਤੋ ਸਮੂਹਤੋਯੇਵ ਸਮ੍ਮਸਿਤੁਂ ਸਮਤ੍ਥੋ ਹੋਤਿ, ਏਵਂ ਸੁਖੁਮਤ੍ਤੇਨੇਸਾ ਵਿਜ੍ਜਤਿ.

੧੦੩੮-੪੦. ਰੂਪਨ੍ਤਿ ਕਸਿਣਰੂਪਸਙ੍ਖਾਤਂ ਪਟਿਭਾਗਨਿਮਿਤ੍ਤਂ. ਆਕਾਸਨ੍ਤਿ ਕਸਿਣੁਗ੍ਘਾਟਿਮਾਕਾਸਂ. ਵਿਞ੍ਞਾਣਨ੍ਤਿ ਆਕਾਸੇ ਪਵਤ੍ਤਵਿਞ੍ਞਾਣਂ. ਤਦਭਾਵਕਨ੍ਤਿ ਤਸ੍ਸ ਆਕਾਸੇ ਪਵਤ੍ਤਵਿਞ੍ਞਾਣਸ੍ਸ ਅਭਾਵਕਂ. ਕਮਤੋਤਿ ਪਠਮਾਰੁਪ੍ਪਂ ਸਮਤਿਕ੍ਕਮਿਤ੍ਵਾ ਹੋਤੀਤਿਆਦਿਨਾ ਅਨੁਕ੍ਕਮਤੋ. ਅਤ੍ਤਨਾ ਵੁਤ੍ਤਮਤ੍ਥਂ ਅਟ੍ਠਕਥਾਵਚਨਂ ਆਹਰਿਤ੍ਵਾ ਸਾਧੇਨ੍ਤੋ ‘‘ਆਹ ਚਾ’’ਤਿਆਦਿਮਾਹ. ਇਧਾਤਿ ਇਮਾਸੁ ਚਤੂਸੁ ਅਰੂਪਸਮਾਪਤ੍ਤੀਸੁ. ਪਚ੍ਛਿਮਾ ਪਚ੍ਛਿਮਾ ਸਮਾਪਤ੍ਤਿਯੋ ਹਿ ਪੁਰਿਮਾਪੁਰਿਮਾਹਿ ਸਮਾਪਤ੍ਤੀਹਿ ਸੁਪਣੀਤਤਰਾ ਸੁਟ੍ਠੁ ਪਣੀਤਤਰਾ, ਸੁਨ੍ਦਰਪਣੀਤਤਰਾਤਿ ਵਾ ਅਤ੍ਥੋ. ਪਾਸਾਦਤਲਸਾਟਿਕਾਤਿ ਚਤੁਭੂਮਕਪਾਸਾਦਸ੍ਸ ਹੇਟ੍ਠਿਮਹੇਟ੍ਠਿਮਤੋ ਉਪਰੂਪਰਿ ਸਵਿਸੇਸਾ ਪਞ੍ਚ ਕਾਮਗੁਣਾ, ਚਤ੍ਤਾਰੋ ਪਾਸਾਦਤਲਾ ਚ ਥੂਲਸਣ੍ਹਸਣ੍ਹਤਰਸਣ੍ਹਤਮਸੁਤ੍ਤੇਹਿ ਵਿਹਿਤਾ ਆਯਾਮਵਿਤ੍ਥਾਰਤੋ ਸਮਪ੍ਪਮਾਣਾ ਸਾਟਿਕਾ ਚ.

੧੦੪੨. ਰੂਪਾਰੂਪਭਵਂ ਅਭਿਭੁਯ੍ਯ ਨਿਬ੍ਬਾਨਂ ਯਾਤਿ, ਅਥ ਵਾ ਨੀਵਰਣੇ ਅਭਿਭੁਯ੍ਯ ਰੂਪਾਰੂਪਭਵਂ ਯਾਤੀਤਿ ਅਤ੍ਥੋ.

ਇਤਿ ਅਭਿਧਮ੍ਮਤ੍ਥਵਿਕਾਸਿਨਿਯਾ ਨਾਮ

ਅਭਿਧਮ੍ਮਾਵਤਾਰਸਂਵਣ੍ਣਨਾਯ

ਅਰੂਪਾਵਚਰਸਮਾਧਿਭਾਵਨਾਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.