੫. ਪਞ੍ਚਮੋ ਪਰਿਚ੍ਛੇਦੋ

ਭੂਮਿਪੁਗ੍ਗਲਚਿਤ੍ਤੁਪ੍ਪਤ੍ਤਿਨਿਦ੍ਦੇਸਵਣ੍ਣਨਾ

੧੮੨-੮. ਬੁਦ੍ਧਿਯਾ ਵੁਦ੍ਧਿਂ ਵਿਰੁਲ਼੍ਹਿਂ ਕਰੋਤੀਤਿ ਬੁਦ੍ਧਿਵੁਦ੍ਧਿਕਰਂ. ਯਸ੍ਸ ਯਸ੍ਸ ਨਯਸ੍ਸ ਕਥਨਂ ਪਟਿਞ੍ਞਾਤਂ, ਤਂ ਤਂ ਦਸ੍ਸੇਨ੍ਤੋ ਆਹ ‘‘ਚਿਤ੍ਤਾਨਂ ਭੂਮੀਸੁਪ੍ਪਤ੍ਤਿ’’ਨ੍ਤਿ. ਤਂ ਵਤ੍ਵਾ ਭੂਮੀਨਂ ਆਧਾਰਵਸੇਨ ਪਸਙ੍ਗਾਗਤਂ ਗਤਿਭੇਦਂ, ਭਵਭੇਦਞ੍ਚ ਦਸ੍ਸੇਤੁਂ ‘‘ਦੇਵਾ ਚੇਵਾ’’ਤਿਆਦਿ ਵੁਤ੍ਤਂ. ‘‘ਚਤਸ੍ਸੋਪਾਯਭੂਮਿਯੋ’’ਤਿ ਵਤ੍ਵਾ ਅਸੁਰਗਤਿਯਾ ਪੇਤਗਤਿਯਂਯੇਵ ਸਙ੍ਗਹਿਤਤ੍ਤਾ ‘‘ਗਤਿਯੋ ਪਞ੍ਚਾ’’ਤਿ ਵੁਤ੍ਤਨ੍ਤਿ ਵਦਨ੍ਤਿ. ਮਯਂ ਪਨ ‘‘ਤਿਸ੍ਸੋਵਾਪਾਯਭੂਮਿਯੋ’’ਤਿ ਪਾਠੇਨ ਭਵਿਤਬ੍ਬਨ੍ਤਿ ਮਞ੍ਞਾਮ. ਨ ਹਿ ਏਸ ਅਨਾਕੁਲਵਚਨੋ ਆਚਰਿਯੋ ਈਦਿਸਂ ਪੁਬ੍ਬਾਪਰਵਿਰੁਦ੍ਧਂ ਵਿਯ ਸਮ੍ਮੋਹਜਨਕਂ ਵਚਨਂ ਭਾਸਤਿ. ਪਾਲ਼ਿਯਮ੍ਪਿ ਹਿ –

‘‘ਪਞ੍ਚ ਖੋ ਇਮਾ, ਸਾਰਿਪੁਤ੍ਤ, ਗਤਿਯੋ. ਕਤਮਾ ਪਞ੍ਚ? ਨਿਰਯੋ ਤਿਰਚ੍ਛਾਨਯੋਨਿ ਪੇਤ੍ਤਿਵਿਸਯੋ ਮਨੁਸ੍ਸਾ ਦੇਵਾ’’ਤਿ (ਅ. ਨਿ. ੯.੬੮) –

ਏਵਂ ਤਿਣ੍ਣਮੇਵ ਅਪਾਯਾਨਂ ਵਸੇਨ ਵੁਤ੍ਤਂ. ਕਾਮਰੂਪਾਰੂਪਵਸੇਨ ਤਯੋ ਭਵਾ. ਤਤ੍ਥਾਤਿ ਤੇਸੁ ਤੀਸੁ ਭਵੇਸੁ. ਤਿਂਸੇਵਾਤਿ ਚਤਸ੍ਸੋ ਅਪਾਯਭੂਮਿਯੋ, ਸਤ੍ਤਵਿਧਾ ਕਾਮਸੁਗਤਿਭੂਮਿ, ਸੋਲ਼ਸ ਰੂਪੀਬ੍ਰਹ੍ਮਲੋਕਾ, ਚਤਸ੍ਸੋ ਅਰੂਪਭੂਮਿਯੋਤਿ ਏਕਤਿਂਸਭੂਮੀਨਮਨ੍ਤਰੇ ਚਿਤ੍ਤਪ੍ਪਵਤ੍ਤਿਅਧਿਕਾਰਤ੍ਤਾ ਅਸਞ੍ਞਭੂਮਿਂ ਅਪਨੇਤ੍ਵਾ ਅਵਸੇਸਾ ਤਿਂਸੇਵ ਭੂਮਿਯੋਤਿ ਅਤ੍ਥੋ. ਤਾਸੁ ਤਿਂਸੇਵ ਪੁਗ੍ਗਲਾਤਿ ਤਾਸੁ ਭੂਮੀਸੁ ਉਪ੍ਪਨ੍ਨਾ ਪੁਗ੍ਗਲਾ ਭੂਮਿਗਣਨਵਸੇਨ ਤਿਂਸੇਵ ਹੋਨ੍ਤਿ. ਭੂਮਿਵਸੇਨ ਤਿਂਸਵਿਧਾਪਿ ਪਨ ਪਟਿਸਨ੍ਧਿਚਿਤ੍ਤਗਣਨਾਯ ਏਕੂਨਵੀਸਤਿ ਹੋਨ੍ਤੀਤਿ ਦਸ੍ਸੇਨ੍ਤੋ ਆਹ ‘‘ਭੂਮੀਸ੍ਵੇਤਾਸੂ’’ਤਿਆਦਿ.

ਪਟਿਸਨ੍ਧਿਕਚਿਤ੍ਤਾਨਨ੍ਤਿ ਦਸ ਕਾਮਾਵਚਰਪਟਿਸਨ੍ਧਿਚਿਤ੍ਤਾਨਿ, ਪਞ੍ਚ ਰੂਪਾਵਚਰਪਟਿਸਨ੍ਧਿਚਿਤ੍ਤਾਨਿ, ਚਤ੍ਤਾਰਿ ਅਰੂਪਾਵਚਰਪਟਿਸਨ੍ਧਿਚਿਤ੍ਤਾਨੀਤਿ ਇਮੇਸਂ ਏਕੂਨਵੀਸਤਿਪਟਿਸਨ੍ਧਿਚਿਤ੍ਤਾਨਂ ਵਸੇਨ. ਅਸਞ੍ਞੀਨਮਚਿਤ੍ਤਕਾਤਿ ਅਸਞ੍ਞਸਤ੍ਤਾਨਂ ਅਚਿਤ੍ਤਕਾ ਪਟਿਸਨ੍ਧਿ. ਵੁਤ੍ਤਞ੍ਹੇਤਂ –

‘‘ਅਸਞ੍ਞਸਤ੍ਤਾ ਦੇਵਾ ਅਹੇਤੁਕਾ ਅਨਾਹਾਰਕਾ ਅਫਸ੍ਸਕਾ ਅਵੇਦਨਕਾ ਅਸਞ੍ਞਕਾ ਅਚੇਤਨਕਾ ਅਚਿਤ੍ਤਕਾ ਪਾਤੁਭਵਨ੍ਤੀ’’ਤਿ.

ਯਦਿ ਪਟਿਸਨ੍ਧਿਵਸੇਨ ਵੀਸਤਿ ਪੁਗ੍ਗਲਾ, ਕਥਂ ਭੂਮਿਵਸੇਨ ਤਿਂਸਾਤਿ ਵੁਤ੍ਤਾ. ਏਕਤਿਂਸਾਤਿ ਹਿ ਵਤ੍ਤਬ੍ਬਨ੍ਤਿ ਆਹ ‘‘ਇਧਾ’’ਤਿਆਦਿ.

ਨ ਵਿਜ੍ਜਤਿ ਹੇਤੁ ਇਮੇਸਨ੍ਤਿ ਅਹੇਤੂ, ਦੁਵੇ, ਤੀਣਿ ਚ ਹੇਤੂ ਇਮੇਸਨ੍ਤਿ ਦ੍ਵਿਤਿਹੇਤੂ, ਪਟਿਸਨ੍ਧਿਵਸੇਨ ਅਹੇਤੁਕਾ, ਦੁਹੇਤੁਕਾ, ਤਿਹੇਤੁਕਾ ਚਾਤਿ ਅਤ੍ਥੋ. ਤਤ੍ਥ ਅਹੇਤੁਕਾ ਆਪਾਯਿਕਾ ਚ, ਏਕਚ੍ਚੇ ਭੂਮਦੇਵਾ, ਮਨੁਸ੍ਸੇਸੁ ਜਚ੍ਚਨ੍ਧਜਚ੍ਚਬਧਿਰਜਚ੍ਚੁਮ੍ਮਤ੍ਤਕਨਪੁਂਸਕਉਭਤੋਬ੍ਯਞ੍ਜਨਕਾਦਯੋ ਚ. ਵੁਤ੍ਤਾਵਸੇਸਾ ਕਾਮਸੁਗਤਿਵਾਸਿਨੋਵ ਦੁਹੇਤੁਕਾ. ਤਿਹੇਤੁਕਾ ਪਨ ਕਾਮਸੁਗਤਿਵਾਸਿਨੋਵ. ਅਰਿਯਾ ਪਨ ਅਟ੍ਠਾਤਿ ਚਤੁਨ੍ਨਂ ਅਰਿਯਮਗ੍ਗਸਮਙ੍ਗੀਨਂ, ਚਤੁਨ੍ਨਞ੍ਚ ਅਰਿਯਫਲਸਮਙ੍ਗੀਨਂ ਵਸੇਨ ਅਟ੍ਠ ਅਰਿਯਪੁਗ੍ਗਲਾ. ਨਨੁ ਚ ਅਰਿਯਾਪਿ ਤਿਹੇਤੁਕਾਯੇਵਾਤਿ? ਸਚ੍ਚਂ, ਚਿਤ੍ਤੁਪ੍ਪਾਦਂ ਪਨ ਪਤ੍ਵਾ ਤੇਸਂ ਵਿਸੇਸਸਬ੍ਭਾਵਤੋ ਵਿਸੁਂਯੇਵ ਉਦ੍ਧਟਾਤਿ ਦਟ੍ਠਬ੍ਬਂ.

੧੮੯-੯੨. ‘‘ਭੂਮੀਸੁਪ੍ਪਤ੍ਤਿਂ ਭਣਤੋ ਮੇ ਨਿਬੋਧਥਾ’’ਤਿ ਸੁਤ੍ਵਾ ਚੋਦਕੋ ‘‘ਤਿਂਸਭੂਮੀਸੂ’’ਤਿਆਦਿਨਾ ਸਬ੍ਬੇਸਂ ਭੂਮੀਨਂ ਸਾਧਾਰਣਚਿਤ੍ਤਾਨਿ ਪੁਚ੍ਛਤਿ, ਇਤਰੋ ‘‘ਚੁਦ੍ਦਸੇਵਾ’’ਤਿ ਵਿਸ੍ਸਜ੍ਜੇਤਿ. ਤਤ੍ਥ ਅਟ੍ਠ ਪਰਿਤ੍ਤਕੁਸਲਾਨਿ, ਚਤ੍ਤਾਰਿ ਦਿਟ੍ਠਿਵਿਪ੍ਪਯੁਤ੍ਤਾਨਿ, ਉਦ੍ਧਚ੍ਚਸਹਗਤਂ, ਮਨੋਦ੍ਵਾਰਾਵਜ੍ਜਨਞ੍ਚਾਤਿ ਚੁਦ੍ਦਸੇਵ, ਨ ਊਨਾਨਿ ਨਾਧਿਕਾਨਿ, ਸਬ੍ਬਾਸੁ ਤਿਂਸਭੂਮੀਸੁ ਹੋਨ੍ਤਿ, ਸਬ੍ਬਭੂਮੀਨਂ ਸਾਧਾਰਣਾਨੀਤਿ ਅਤ੍ਥੋ.

ਸਦਾ…ਪੇ… ਸਿਯੁਨ੍ਤਿ ਦ੍ਵੇ ਦੋਸਮੂਲਾਨਿ, ਕੁਸਲਵਿਪਾਕਚਕ੍ਖੁਸੋਤਵਿਞ੍ਞਾਣਸਮ੍ਪਟਿਚ੍ਛਨਸਨ੍ਤੀਰਣਦ੍ਵਯਵਜ੍ਜਿਤਾਨਿ ਅਟ੍ਠਾਰਸ ਕਾਮਾਵਚਰਵਿਪਾਕਚਿਤ੍ਤਾਨੀਤਿ ਵੀਸਤਿ ਚਿਤ੍ਤਾਨਿ ਸਦਾ ਕਾਮੇਯੇਵ ਭਵੇ ਸਿਯੁਂ, ਨ ਕਦਾਚਿ ਅਞ੍ਞਤ੍ਥ ਉਪ੍ਪਜ੍ਜਨ੍ਤੀਤਿ ਅਤ੍ਥੋ. ਨਨੁ ਚ ਬ੍ਰਹ੍ਮੂਨਮ੍ਪਿ ਅਕੁਸਲਵਿਪਾਕਾਨਿ ਉਪ੍ਪਜ੍ਜਨ੍ਤੀਤਿ? ਸਚ੍ਚਂ ਉਪ੍ਪਜ੍ਜਨ੍ਤਿ, ਤਾਨਿ ਕਾਮਭਵੇ ਅਨਿਟ੍ਠਰੂਪਾਦਯੋ ਆਰਬ੍ਭ ਉਪ੍ਪਜ੍ਜਨ੍ਤਿ ਬ੍ਰਹ੍ਮਲੋਕੇ ਤੇਸਂ ਅਭਾਵਤੋਤਿ ਕਾਮਭਵੇਯੇਵ ਨਿਯਮਿਤਾਨਿ. ਰੂਪਾਵਚਰਵਿਪਾਕਚਿਤ੍ਤਾਨਿ ਪਞ੍ਚ ਰੂਪਾਵਚਰਭਵੇਯੇਵ ਸਿਯੁਂ, ਚਤ੍ਤਾਰੋ ਚ ਅਰੂਪਾਵਚਰਵਿਪਾਕਾ ਅਰੂਪੀਸੂਤਿ ਆਹ ‘‘ਪਞ੍ਚ ਰੂਪਭਵੇ’’ਤਿਆਦਿ.

ਕਾਮ …ਪੇ… ਭਵਨ੍ਤੀਤਿ ਰੂਪਾਵਚਰਕੁਸਲਕਿਰਿਯਚਿਤ੍ਤਾਨਿ ਚੇਵ ਕੁਸਲਵਿਪਾਕਾਨਿ ਚ ਚਕ੍ਖੁਸੋਤਵਿਞ੍ਞਾਣਸਮ੍ਪਟਿਚ੍ਛਨਸਨ੍ਤੀਰਣਾਨਿ ਵੋਟ੍ਠਬ੍ਬਨਵਜ੍ਜਾਨਿ ਚ ਦ੍ਵੇ ਅਹੇਤੁਕਕਿਰਿਯਚਿਤ੍ਤਾਨਿ ਪਠਮਮਗ੍ਗਵਿਞ੍ਞਾਣਨ੍ਤਿ ਅਟ੍ਠਾਰਸ ਚਿਤ੍ਤਾਨਿ ਕਾਮਰੂਪਭਵੇਯੇਵ ਭਵਨ੍ਤਿ, ਨ ਅਰੂਪਭਵੇ. ਤਤ੍ਥ ਹਿ ਸਬ੍ਬਸੋ ਰੂਪਸਞ੍ਞਾਨਂ ਸਮਤਿਕ੍ਕਨ੍ਤਤ੍ਤਾ ਰੂਪਾਵਚਰਕੁਸਲਕਿਰਿਯਾ ਨੁਪ੍ਪਜ੍ਜਨ੍ਤਿ. ਚਕ੍ਖੁਵਿਞ੍ਞਾਣਾਦੀਨਿ ਵਤ੍ਥੁਦ੍ਵਾਰਵਿਰਹਤੋ, ਹਸਿਤੁਪ੍ਪਾਦੋ ਏਕਨ੍ਤਵਤ੍ਥੁਨਿਸ੍ਸਯਤ੍ਤਾ, ਸੋਤਾਪਤ੍ਤਿਮਗ੍ਗੋ ਪਰਤੋਘੋਸਪਚ੍ਚਯਾਯੇਵ ਨਿਬ੍ਬਤ੍ਤਨਤੋ ਨ ਉਪ੍ਪਜ੍ਜਤਿ. ਦ੍ਵੇਚਤ੍ਤਾਲੀਸਾਤਿ ਅਟ੍ਠ ਪਰਿਤ੍ਤਕੁਸਲਾਨਿ, ਚਤ੍ਤਾਰਿ ਅਰੂਪਕੁਸਲਾਨਿ, ਪਠਮਮਗ੍ਗਵਜ੍ਜਾਨਿ ਸਤ੍ਤ ਲੋਕੁਤ੍ਤਰਚਿਤ੍ਤਾਨਿ, ਪਟਿਘਦ੍ਵਯਵਜ੍ਜਿਤਾਨਿ ਚ ਦਸ ਅਕੁਸਲਚਿਤ੍ਤਾਨਿ, ਪੁਬ੍ਬੇ ਵੁਤ੍ਤਅਹੇਤੁਕਕਿਰਿਯਾਦ੍ਵਯਵਜ੍ਜਿਤਾਨਿ ਨਵ ਕਾਮਾਵਚਰਕਿਰਿਯਚਿਤ੍ਤਾਨਿ, ਚਤ੍ਤਾਰਿ ਅਰੂਪਾਵਚਰਕਿਰਿਯਚਿਤ੍ਤਾਨੀਤਿ ਏਵਂ ਦ੍ਵੇਚਤ੍ਤਾਲੀਸ ਚਿਤ੍ਤਾਨਿ ਤੀਸੁ ਭਵੇਸੁ ਹੋਨ੍ਤਿ.

੧੯੩-੨੦੪. ਏਵਂ ਭਵਵਸੇਨ ਚਿਤ੍ਤੁਪ੍ਪਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਕਾਲਵਸੇਨ ਦਸ੍ਸੇਨ੍ਤੋ ਆਹ ‘‘ਠਪੇਤ੍ਵਾ ਪਨਾ’’ਤਿਆਦਿ. ਸਬ੍ਬਾਸਨ੍ਤਿ ਨਿਦ੍ਧਾਰਣਤ੍ਥੇ ਸਾਮਿਵਚਨਂ. ਅਟ੍ਠ ਮਹਾਕਿਰਿਯਾ, ਅਰਹਤ੍ਤਮਗ੍ਗਫਲਚਿਤ੍ਤਾਨਿ, ਅਨਾਗਾਮਿਫਲਂ, ਨੇਵਸਞ੍ਞਾਨਾਸਞ੍ਞਾਯਤਨਕੁਸਲਕਿਰਿਯਾਤਿ ਤੇਰਸੇਵ ਚਿਤ੍ਤਾਨਿ ਅਪਾਯਰਹਿਤਾਸੁ ਛਬ੍ਬੀਸਭੂਮੀਸੁ ਹੋਨ੍ਤਿ ਅਪਾਯੇਸੁ ਵਿਪਾਕਾਵਰਣਸਬ੍ਭਾਵੇ ਏਤੇਸਂ ਅਨੁਪ੍ਪਜ੍ਜਨਤੋ. ਅਪਰਾਨਿ ਛ ਚਿਤ੍ਤਾਨੀਤਿ ਸਮ੍ਬਨ੍ਧੋ. ਤਾਨਿ ਪਨ ਰੂਪਭਵਸਾਧਾਰਣਾਨਂ ਪਞ੍ਚਪਰਿਤ੍ਤਵਿਪਾਕਾਨਂ, ਕਿਰਿਯਮਨੋਧਾਤੁਯਾ ਚ ਵਸੇਨ ਵੇਦਿਤਬ੍ਬਾਨਿ.

ਪਞ੍ਚ ਚਿਤ੍ਤਾਨੀਤਿ ਦਿਟ੍ਠਿਸਮ੍ਪਯੁਤ੍ਤਵਿਚਿਕਿਚ੍ਛਾਵਸੇਨ ਪਞ੍ਚ ਚਿਤ੍ਤਾਨਿ. ਤਾਨਿ ਹਿ ਪਞ੍ਚਸੁ ਸੁਦ੍ਧਾਵਾਸਭੂਮੀਸੁ ਨ ਲਬ੍ਭਨ੍ਤਿ. ਤਤ੍ਥ ਅਨਾਗਾਮਿਖੀਣਾਸਵਾਨਮੇਵ ਅਧਿਵੁਤ੍ਥਤ੍ਤਾ, ਤੇਸਞ੍ਚ ਪਠਮਮਗ੍ਗੇਨੇਵ ਇਮੇਸਂ ਪਞ੍ਚਨ੍ਨਂ ਵਿਞ੍ਞਾਣਾਨਂ ਅਨੁਪ੍ਪਾਦਧਮ੍ਮਤਂ ਆਪਾਦਿਤਤ੍ਤਾ.

ਅਪਰਾਨਿ ਦੁਵੇਤਿ ਤਤਿਯਾਰੁਪ੍ਪਕੁਸਲਕਿਰਿਯਚਿਤ੍ਤਾਨਿ. ਤਾਨਿ ਹਿ ਨੇਵਸਞ੍ਞਾਨਾਸਞ੍ਞਾਯਤਨੇਸੁ ਅਤਿਕ੍ਕਨ੍ਤਾਰਮ੍ਮਣਤ੍ਤਾ, ਅਪਾਯੇਸੁ ਚ ਅਹੇਤੁਕਪਟਿਸਨ੍ਧਿਕਤ੍ਤਾ ਨੁਪ੍ਪਜ੍ਜਨ੍ਤਿ. ਚਤੁਵੀਸਤੀਭੂਮਿਸੁ ਦ੍ਵੇ ਚਾਤਿ ਵਿਞ੍ਞਾਣਞ੍ਚਾਯਤਨਕੁਸਲਕਿਰਿਯਾਵਸੇਨ ਦ੍ਵੇ ਚਿਤ੍ਤਾਨਿ. ਤੇਵੀਸਭੂਮਿਸੁ ਦ੍ਵੇਯੇਵਾਤਿ ਆਕਾਸਾਨਞ੍ਚਾਯਤਨਕੁਸਲਕਿਰਿਯਚਿਤ੍ਤਾਨਿ.

ਏਕਾਦਸਵਿਧਨ੍ਤਿ ਰੂਪਾਵਚਰਕੁਸਲਕਿਰਿਯਾ ਹਸਿਤੁਪ੍ਪਾਦੋਤਿ ਏਕਾਦਸ. ਸੋਤਾਪਤ੍ਤਿਫਲਂ ਯਾਵ ਅਨਾਗਾਮਿਮਗ੍ਗੋ ਚਤ੍ਤਾਰਿ ਚ ਚਿਤ੍ਤਾਨਿ ਸੁਦ੍ਧਾਵਾਸਅਪਾਯਵਜ੍ਜਾਸੁ ਏਕਵੀਸਤਿਭੂਮੀਸੁ ਭਵਨ੍ਤਿ. ਏਕਂ ਸੋਤਾਪਤ੍ਤਿਮਗ੍ਗਚਿਤ੍ਤਂ ਸੁਦ੍ਧਾਵਾਸਅਪਾਯਅਰੂਪਭੂਮਿਵਜ੍ਜੇਸੁ ਸਤ੍ਤਰਸਸੁ ਭੂਮੀਸੁ ਜਾਯਤਿ. ਦ੍ਵੇ ਦੋਸਮੂਲਾਨਿ, ਕੁਸਲਵਿਪਾਕਘਾਨਜਿਵ੍ਹਾਕਾਯਵਿਞ੍ਞਾਣਾਨਿ, ਸਤ੍ਤ ਅਕੁਸਲਵਿਪਾਕਾਤਿ ਦ੍ਵਾਦਸ ਚਿਤ੍ਤਾਨਿ ਮਹਗ੍ਗਤਭੂਮਿਵਜ੍ਜਾਸੁ ਏਕਾਦਸਸੁ ਕਾਮਭੂਮੀਸੁ ਜਾਯਨ੍ਤਿ. ਅਟ੍ਠ ਮਹਾਵਿਪਾਕਚਿਤ੍ਤਾਨਿ ਕਾਮਾਵਚਰਦੇਵਮਨੁਸ੍ਸਵਸੇਨ ਸਤ੍ਤਭੂਮੀਸੁ ਜਾਯਨ੍ਤਿ. ਛਸੁ ਭੂਮਿਸੂਤਿ ਵੇਹਪ੍ਫਲਸੁਦ੍ਧਾਵਾਸਸਙ੍ਖਾਤਾਸੁ ਛਸੁ ਪਞ੍ਚਮਜ੍ਝਾਨਭੂਮੀਸੁ.

ਚਤ੍ਤਾਰਿ…ਪੇ… ਭੂਮਿਸੂਤਿ ਚਤੁਤ੍ਥਜ੍ਝਾਨਵਿਪਾਕੋ ਪਰਿਤ੍ਤਸੁਭਅਪ੍ਪਮਾਣਸੁਭਸੁਭਕਿਣ੍ਹਵਸੇਨ ਤੀਸੁ ਭੂਮੀਸੁ ਜਾਯਤਿ, ਦੁਤਿਯਜ੍ਝਾਨਵਿਪਾਕੋ, ਤਤਿਯਜ੍ਝਾਨਵਿਪਾਕੋ ਚ ਪਰਿਤ੍ਤਾਭਾਅਪ੍ਪਮਾਣਾਭਾਆਭਸ੍ਸਰਵਸੇਨ ਤੀਸੁ ਭੂਮੀਸੁ, ਪਠਮਜ੍ਝਾਨਵਿਪਾਕੋ ਬ੍ਰਹ੍ਮਪਾਰਿਸਜ੍ਜਬ੍ਰਹ੍ਮਪੁਰੋਹਿਤਮਹਾਬ੍ਰਹ੍ਮਾਵਸੇਨ ਤੀਸੁ ਭੂਮੀਸੁ ਹੋਤੀਤਿ ਏਵਂ ਚਤ੍ਤਾਰਿ ਚਿਤ੍ਤਾਨਿ ਏਕੇਕਵਸੇਨ ਤੀਸੁ ਤੀਸੁ ਭੂਮੀਸੁ ਜਾਯਨ੍ਤਿ.

੨੦੬-੯. ਏਵਂ ਏਤ੍ਤਕਾਨੇਵ ਚਿਤ੍ਤਾਨਿ ਏਤ੍ਤਕਾਸੁ ਭੂਮੀਸੁ ਉਪ੍ਪਜ੍ਜਨ੍ਤੀਤਿ ਚਿਤ੍ਤਨਿਯਮਵਸੇਨ ਉਪ੍ਪਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਏਤ੍ਤਕਾਸੁ ਏਵ ਭੂਮੀਸੁ ਏਤ੍ਤਕਾਨੇਵ ਚਿਤ੍ਤਾਨਿ ਉਪ੍ਪਜ੍ਜਨ੍ਤੀਤਿ ਭੂਮਿਨਿਯਮਵਸੇਨ ਦਸ੍ਸੇਤੁਂ ‘‘ਕੁਸਲਾਕੁਸਲਾ ਕਾਮੇ’’ਤਿਆਦਿ ਆਰਦ੍ਧਂ. ਤਤ੍ਥ ਕਾਮੇ ਕੁਸਲਾਕੁਸਲਾ ਵੀਸਤਿ, ਤੇਸਂ ਪਨ੍ਨਰਸ ਅਹੇਤੁਕਾ ਪਾਕਾ, ਆਵਜ੍ਜਨਦ੍ਵਯਞ੍ਚਾਤਿ ਸਤ੍ਤਤਿਂਸੇਵ ਮਾਨਸਾ ਨਰਕਾਦੀਸੁ ਚਤੂਸੁਪਿ ਅਪਾਯੇਸੁ ਜਾਯਰੇ. ਅਵਸੇਸਾਨਿ ਪਨ ਸਤ੍ਤਰਸ ਕਾਮਾਵਚਰਵਿਪਾਕਕਿਰਿਯਚਿਤ੍ਤਾਨਿ, ਪਞ੍ਚਤਿਂਸ ਮਹਗ੍ਗਤਲੋਕੁਤ੍ਤਰਾਨੀਤਿ ਦ੍ਵੇਪਞ੍ਞਾਸ ਮਾਨਸਾ ਕਦਾਚਿਪਿ ਤੇਸੁ ਨੁਪ੍ਪਜ੍ਜਨ੍ਤਿ ਅਭੂਮਿਭਾਵਤੋਤਿ ਅਤ੍ਥੋ.

ਅਸੀਤਿ ਹਦਯਾਤਿ ਵੁਤ੍ਤਾਵਸੇਸਾਨਿ ਅਸੀਤਿ ਚਿਤ੍ਤਾਨਿ. ਘਾਨਾਦਿਵਿਞ੍ਞਾਣਤ੍ਤਯਨ੍ਤਿ ਕੁਸਲਵਿਪਾਕਘਾਨਾਦਿਵਿਞ੍ਞਾਣਤ੍ਤਯਂ. ‘‘ਅਪੁਞ੍ਞਜਾ ਪਾਕਾ’’ਤਿ ਅਕੁਸਲਵਿਪਾਕਾਨਂ ਸਬ੍ਬੇਸਮੇਵ ਗਹਿਤਤ੍ਤਾ ਘਾਨਾਦਿਵਿਞ੍ਞਾਣਤ੍ਤਯਂ ਅਗ੍ਗਹਿਤਵਿਸੇਸਮ੍ਪਿ ਪਾਰਿਸੇਸਞਾਯੇਨ ਕੁਸਲਵਿਪਾਕਮੇਵ ਵਿਞ੍ਞਾਯਤਿ.

੨੧੩. ਦੋਮਨਸ੍ਸਨ੍ਤਿ ਦੋਮਨਸ੍ਸਸਹਗਤਂ. ਕ੍ਰਿਯਾ ਚ ਦ੍ਵੇਤਿ ਵੋਟ੍ਠਬ੍ਬਨਵਜ੍ਜਿਤਾ ਦ੍ਵੇ ਅਹੇਤੁਕਕਿਰਿਯਾ.

੨੧੪. ਭੂਮਿਵਸੇਨੇਵਾਤਿ ਪੁਗ੍ਗਲੇ ਅਨਾਮਸਿਤ੍ਵਾ ਕੇਵਲਂ ਭੂਮਿਵਸੇਨ. ਪੁਗ੍ਗਲਾਨਂ ਵਸੇਨ ਚ ਭੂਮਿਵਸੇਨ ਚ ਚਿਤ੍ਤੁਪ੍ਪਤ੍ਤਿਂ ਵਿਭਾਵਯੇਤਿ ਸਮ੍ਬਨ੍ਧੋ.

੨੧੬-੮. ਪਞ੍ਚਭੂਮਿਸੂਤਿ ਚਤੁਰਾਪਾਯਮਨੁਸ੍ਸਵਸੇਨ ਪਞ੍ਚਭੂਮੀਸੁ. ਅਹੇਤੁਕਾਨਂ ਪਟਿਸਨ੍ਧਿਸਦਿਸਤਦਾਰਮ੍ਮਣਵਸੇਨ ‘‘ਸਤ੍ਤਤਿਂਸੇਵਾ’’ਤਿ ਵੁਤ੍ਤਂ, ਅਞ੍ਞਕਮ੍ਮੇਨ ਪਨ ਦ੍ਵਿਹੇਤੁਕਤਦਾਰਮ੍ਮਣਸ੍ਸਾਪਿ ਸਮ੍ਭਵਤੋ ਏਕਚਤ੍ਤਾਲੀਸ ਹੋਨ੍ਤਿ. ਆਚਰਿਯਜੋਤਿਪਾਲਤ੍ਥੇਰਸ੍ਸ ਅਧਿਪ੍ਪਾਯੇਨ ਤਿਹੇਤੁਕਵਿਪਾਕੇਹਿਪਿ ਸਦ੍ਧਿਂ ਪਞ੍ਚਚਤ੍ਤਾਲੀਸੇਵਾਤਿ ਦਟ੍ਠਬ੍ਬਂ. ਅਹੇਤੁਕਸ੍ਸ ਵੁਤ੍ਤੇਹੀਤਿ ਅਹੇਤੁਕਸਤ੍ਤਸ੍ਸ ਵੁਤ੍ਤੇਹਿ ਸਤ੍ਤਤਿਂਸਮਾਨਸੇਹਿ ਸਹ. ਨਵ ਕ੍ਰਿਯਾਤਿ ਅਟ੍ਠ ਮਹਾਕਿਰਿਯਾ, ਹਸਿਤੁਪ੍ਪਾਦੋ ਚਾਤਿ ਇਮਾਨਿ ਅਸਾਧਾਰਣਕਿਰਿਯਚਿਤ੍ਤਾਨਿ ਨਵ.

੨੨੦-੧. ‘‘ਚਤੁਪਞ੍ਞਾਸ ਮਾਨਸਾ’’ਤਿ ਵਤ੍ਵਾ ਤੇਸਂ ਸਰੂਪਤੋ ਦਸ੍ਸਨਤ੍ਥਂ ਆਹ ‘‘ਦ੍ਵਿਹੇਤੁਕਸ੍ਸਾ’’ਤਿਆਦਿ. ਪੁਨ ‘‘ਚਤੁਪਞ੍ਞਾਸਾ’’ਤਿਆਦਿ ਪਨ ਨਿਗਮਨਂ.

੨੨੩-੪. ਪਞ੍ਞਾਸੇਵਸ੍ਸ ਚਿਤ੍ਤਾਨੀਤਿ ਤਿਹੇਤੁਕਸ੍ਸ ਪੁਥੁਜ੍ਜਨਸ੍ਸ ਵੁਤ੍ਤਚਤੁਪਞ੍ਞਾਸਚਿਤ੍ਤੇਸੁ ਦਿਟ੍ਠਿਵਿਚਿਕਿਚ੍ਛਾਸਹਗਤਵਜ੍ਜਾਨਿ ਏਕੂਨਪਞ੍ਞਾਸ, ਸੋਤਾਪਤ੍ਤਿਫਲਨ੍ਤਿ ਇਮਾਨਿ ਪਞ੍ਞਾਸੇਵ ਚਿਤ੍ਤਾਨਿ ਅਸ੍ਸ ਕਾਮਾਵਚਰਸ੍ਸ ਸੋਤਾਪਨ੍ਨਦੇਹਿਨੋ ਜਾਯਨ੍ਤੇ. ਨਵਤਿਂਸੇਵਾਤਿ ਏਕੂਨਚਤ੍ਤਾਲੀਸਚਿਤ੍ਤਾਨਿ. ਪਠਮਂ ਫਲਨ੍ਤਿ ਸੋਤਾਪਤ੍ਤਿਫਲਂ.

੨੨੫-੮. ਦੁਤਿਯਞ੍ਚ ਫਲਂ ਹਿਤ੍ਵਾਤਿ ਸਕਦਾਗਾਮਿਫਲਂ ਹਿਤ੍ਵਾ. ਚ-ਸਦ੍ਦੇਨ ਸੋਤਾਪਤ੍ਤਿਫਲਞ੍ਚ ਹਿਤ੍ਵਾਤਿ ਅਤ੍ਥੋ. ਅਤ੍ਤਨੋ ਫਲੇਨ ਸਹ ਯਾਨਿ ਅਟ੍ਠਚਤ੍ਤਾਲੀਸ ਚਿਤ੍ਤਾਨਿ, ਤਾਨਿ ਅਨਾਗਾਮਿਸ੍ਸ ਸਤ੍ਤਸ੍ਸ ਜਾਯਨ੍ਤਿ. ਚਤ੍ਤਾਲੀਸਞ੍ਚ ਚਤ੍ਤਾਰੀਤਿ ਤੇਵੀਸਤਿ ਕਾਮਾਵਚਰਵਿਪਾਕਚਿਤ੍ਤਾਨਿ, ਵੀਸਤਿ ਕਿਰਿਯਚਿਤ੍ਤਾਨਿ, ਅਰਹਤ੍ਤਫਲਞ੍ਚਾਤਿ ਚਤੁਚਤ੍ਤਾਲੀਸ ਚਿਤ੍ਤਾਨਿ. ਸਕਂ ਸਕਨ੍ਤਿ ‘‘ਸੋਤਾਪਨ੍ਨਸ੍ਸ ਸੋਤਾਪਤ੍ਤਿਮਗ੍ਗਚਿਤ੍ਤਂ, ਸਕਦਾਗਾਮਿਨੋ ਸਕਦਾਗਾਮਿਮਗ੍ਗਚਿਤ੍ਤ’’ਨ੍ਤਿਆਦਿਨਾ ਅਤ੍ਤਨੋ ਅਤ੍ਤਨੋ ਮਗ੍ਗਚਿਤ੍ਤਂ. ਕਸ੍ਮਾ ਪਨ ਤੇਸਂ ਏਕੇਕਮੇਵ ਚਿਤ੍ਤਂ ਹੋਤੀਤਿ ਆਹ ‘‘ਏਕਚਿਤ੍ਤਕ੍ਖਣਾਹਿ ਤੇ’’ਤਿ. ਪਞ੍ਚਤਿਂਸੇਵਾਤਿ ਸਤ੍ਤਰਸ ਕਾਮਰੂਪਾਰੂਪਕੁਸਲਚਿਤ੍ਤਾਨਿ, ਪਟਿਘਦ੍ਵਯਵਜ੍ਜਾਨਿ ਦਸ ਅਕੁਸਲਾਨਿ, ਰੂਪਭਵੇ ਲਬ੍ਭਮਾਨਕਾਨਿ ਪਞ੍ਚ ਅਹੇਤੁਕਵਿਪਾਕਾਨਿ, ਆਵਜ੍ਜਨਦ੍ਵਯਂ, ਪਠਮਜ੍ਝਾਨਵਿਪਾਕੋ ਚਾਤਿ ਪਞ੍ਚਤਿਂਸ ਚਿਤ੍ਤਾਨਿ ਤੀਸੁ ਪਠਮਜ੍ਝਾਨਭੂਮੀਸੁ ਪੁਥੁਜ੍ਜਨਸ੍ਸ ਜਾਯਨ੍ਤਿ.

੨੩੨-੫. ਹਿਤ੍ਵਾ ਚਾਤਿ ਏਤ੍ਥ ਚ-ਸਦ੍ਦੇਨ ਪਠਮਫਲਸ੍ਸ ਗਹਣਂ ਦਸ੍ਸੇਤਿ. ਤੇਨ ਅਪੁਞ੍ਞਪਞ੍ਚਕਂ ਹਿਤ੍ਵਾ ਪਠਮਂ ਫਲਂ ਗਹੇਤ੍ਵਾ ਚਾਤਿ ਅਤ੍ਥੋ. ਅਪੁਞ੍ਞਪਞ੍ਚਕਨ੍ਤਿ ਦਿਟ੍ਠਿਸਮ੍ਪਯੁਤ੍ਤਵਿਚਿਕਿਚ੍ਛਾਸਹਗਤਵਸੇਨ ਪਞ੍ਚ ਅਕੁਸਲਚਿਤ੍ਤਾਨਿ. ਤਤ੍ਥਾਤਿ ਤੇਸੁ ਸੋਤਾਪਨ੍ਨਸ੍ਸ ਵੁਤ੍ਤੇਸੁ. ਤਤ੍ਥੇਵਾਤਿ ਸਕਦਾਗਾਮਿਸ੍ਸ ਵੁਤ੍ਤੇਸੁ. ਪੁਞ੍ਞਜਂ ਸਮ੍ਪਟਿਚ੍ਛਨਂ ਸਨ੍ਤੀਰਣਦ੍ਵਯਞ੍ਚੇਵਾਤਿ ਸਮ੍ਬਨ੍ਧੋ.

੨੩੭. ਏਵਂ ਪਠਮਜ੍ਝਾਨਭੂਮਿਯਂ ਪੁਥੁਜ੍ਜਨਸੋਤਾਪਨ੍ਨਾਦਿਵਸੇਨ ਚਿਤ੍ਤਸਮ੍ਭਵਂ ਦਸ੍ਸੇਤ੍ਵਾ ਇਦਾਨਿ ਤੇਸਮੇਵ ਵਸੇਨ ਦੁਤਿਯਜ੍ਝਾਨਭੂਮਿਯਂ ਦਸ੍ਸੇਤੁਂ ‘‘ਪੁਥੁਜ੍ਜਨਸ੍ਸਾ’’ਤਿਆਦਿ ਆਰਦ੍ਧਂ. ਦੁਤਿਯਜ੍ਝਾਨਤਤਿਯਜ੍ਝਾਨਵਿਪਾਕਾਨਂ ਏਕਸਤ੍ਤਸ੍ਸੇਵ ਅਸਮ੍ਭਵੇਪਿ ਦੁਤਿਯਜ੍ਝਾਨਤਲੇ ਨਿਬ੍ਬਤ੍ਤੇ ਪੁਥੁਜ੍ਜਨਾਦਯੋ ਪੁਥੁਜ੍ਜਨਾਦਿਭਾਵਸਾਮਞ੍ਞੇਨ ਏਕਤੋ ਗਹੇਤ੍ਵਾ ‘‘ਦੁਤਿਯਜ੍ਝਾਨਤਤਿਯਜ੍ਝਾਨਪਾਕਤੋ’’ਤਿ ਵੁਤ੍ਤਂ.

੨੪੨. ਪਰਿਤ੍ਤਸੁਭਾਦਿਤੋ ਪਟ੍ਠਾਯ ਯਾਵ ਅਕਨਿਟ੍ਠਾ ਤਤਿਯਚਤੁਤ੍ਥਜ੍ਝਾਨਭੂਮੀਸੁ ਪਠਮਜ੍ਝਾਨਭੂਮਿਯਂ ਵੁਤ੍ਤਗਣਨਾਯ ਚਿਤ੍ਤਪ੍ਪਵਤ੍ਤਿ ਵੇਦਿਤਬ੍ਬਾ. ਤੇਨਾਹ ‘‘ਪਰਿਤ੍ਤਕਸੁਭਾਦੀਨ’’ਨ੍ਤਿਆਦਿ.

੨੪੭. ਚਤੁਵੀਸਤਿ ਚਿਤ੍ਤਾਨੀਤਿ ਅਟ੍ਠਪਰਿਤ੍ਤਕੁਸਲਾਨਿ, ਚਤ੍ਤਾਰਿ ਅਰੂਪਕੁਸਲਾਨਿ, ਪਟਿਘਦ੍ਵਯਵਜ੍ਜਿਤਾਨਿ ਦਸ ਅਕੁਸਲਚਿਤ੍ਤਾਨਿ, ਪਠਮਾਰੁਪ੍ਪਵਿਪਾਕੋ, ਮਨੋਦ੍ਵਾਰਾਵਜ੍ਜਨਞ੍ਚਾਤਿ ਚਤੁਵੀਸਤਿ ਚਿਤ੍ਤਾਨਿ ਪਠਮਾਰੁਪ੍ਪਭੂਮਿਯਂ ਪੁਥੁਜ੍ਜਨਸ੍ਸ ਜਾਯਨ੍ਤਿ.

੨੫੦-੩. ਦਸ ਪਞ੍ਚਾਤਿ ਅਟ੍ਠ ਮਹਾਕਿਰਿਯਾ, ਚਤਸ੍ਸੋ ਅਰੂਪਕਿਰਿਯਾ, ਮਨੋਦ੍ਵਾਰਾਵਜ੍ਜਨਂ, ਪਠਮਾਰੁਪ੍ਪਵਿਪਾਕੋ, ਅਰਹਤ੍ਤਫਲਞ੍ਚਾਤਿ ਪਨ੍ਨਰਸ ਚਿਤ੍ਤਾਨਿ ਪਠਮਾਰੁਪ੍ਪਭੂਮਿਯਂ ਅਰਹਤੋ ਹੋਨ੍ਤਿ.

ਤੇਵੀਸਾਤਿ ਪਠਮਾਰੁਪ੍ਪਭੂਮਿਯਂ ਪੁਥੁਜ੍ਜਨਸ੍ਸ ਵੁਤ੍ਤੇਸੁ ਚਤੁਵੀਸਤਿਚਿਤ੍ਤੇਸੁ ਆਕਾਸਾਨਞ੍ਚਾਯਤਨਕੁਸਲਵਿਪਾਕਵਜ੍ਜਾ ਬਾਵੀਸਤਿ ਚ ਦੁਤਿਯਾਰੁਪ੍ਪਵਿਪਾਕੋ ਚਾਤਿ ਤੇਵੀਸਤਿ ਦੁਤਿਯਾਰੁਪ੍ਪਭੂਮਿਯਂ ਪੁਥੁਜ੍ਜਨਸ੍ਸ ਹੋਨ੍ਤਿ. ਤਤ੍ਥੇਵ ਤਿਣ੍ਣਂ ਫਲਟ੍ਠਸੇਖਾਨਂ ਪੁਥੁਜ੍ਜਨਸ੍ਸ ਵੁਤ੍ਤੇਸੁ ਅਕੁਸਲਪਞ੍ਚਕਵਜ੍ਜਾਨਿ ਅਟ੍ਠਾਰਸ, ਤਂਤਂਫਲਞ੍ਚਾਤਿ ਏਕੂਨਵੀਸਤਿ ਚਿਤ੍ਤਾਨਿ ਹੋਨ੍ਤਿ.

ਕ੍ਰਿਯਾ ਦ੍ਵਾਦਸਾਤਿ ਅਟ੍ਠ ਮਹਾਕਿਰਿਯਾ, ਆਕਾਸਾਨਞ੍ਚਾਯਤਨਵਜ੍ਜਿਤਾ ਤਿਸ੍ਸੋ ਅਰੂਪਕਿਰਿਯਾ, ਮਨੋਦ੍ਵਾਰਾਵਜ੍ਜਨਨ੍ਤਿ ਦ੍ਵਾਦਸ ਕਿਰਿਯਚਿਤ੍ਤਾਨਿ. ਪਾਕੇਕੋਤਿ ਏਕੋ ਅਰੂਪਵਿਪਾਕੋ.

ਦੁਤਿਯਾਰੁਪ੍ਪਭੂਮਿਯਂ ਪੁਥੁਜ੍ਜਨਸ੍ਸ ਵੁਤ੍ਤੇਸੁ ਵਿਞ੍ਞਾਣਞ੍ਚਾਯਤਨਕੁਸਲਵਿਪਾਕਵਜ੍ਜਾਨਿ ਏਕਵੀਸਤਿ, ਆਕਿਞ੍ਚਞ੍ਞਾਯਤਨਵਿਪਾਕੋ ਚਾਤਿ ਬਾਵੀਸਤਿ ਚਿਤ੍ਤਾਨਿ ਤਤਿਯਾਰੁਪ੍ਪਭੂਮਿਯਂ ਪੁਥੁਜ੍ਜਨਸ੍ਸ ਉਪ੍ਪਜ੍ਜਨ੍ਤਿ.

੨੫੪-੬੦. ਪੁਥੁਜ੍ਜਨਸ੍ਸ ਵੁਤ੍ਤੇਸੁ ਅਪੁਞ੍ਞਪਞ੍ਚਕਵਜ੍ਜਾਨਿ ਸਤ੍ਤਰਸ, ਪਠਮਫਲਞ੍ਚਾਤਿ ਅਟ੍ਠਾਰਸ ਤਤਿਯਾਰੁਪ੍ਪਭੂਮਿਯਂ ਸੋਤਾਪਨ੍ਨਸ੍ਸ ਉਪ੍ਪਜ੍ਜਨ੍ਤਿ. ਤਾਨੀਤਿ ਤਾਨੇਵ ਅਟ੍ਠਾਰਸ ਚਿਤ੍ਤਾਨਿ. ‘‘ਠਪੇਤ੍ਵਾ ਪਠਮਂ ਫਲ’’ਨ੍ਤਿ ਹਿ ਵਚਨਤੋ ਦੁਤਿਯਫਲਂ ਪਕ੍ਖਿਪਿਤ੍ਵਾਤਿ ਅਯਮਤ੍ਥੋ ਅਵੁਤ੍ਤਸਿਦ੍ਧੋ. ਨ ਹਿ ਸਕਦਾਗਾਮਿਨੋ ਸਕਦਾਗਾਮਿਫਲਞ੍ਚ ਨੁਪ੍ਪਜ੍ਜਤਿ. ਏਵਞ੍ਚ ਕਤ੍ਵਾ ਵੁਤ੍ਤਂ ‘‘ਠਪੇਤ੍ਵਾ ਦੁਤਿਯਂ ਫਲ’’ਨ੍ਤਿ. ਏਤ੍ਥਾਪਿ ਅਨਾਗਾਮਿਫਲਂ ਪਕਰਣਸਿਦ੍ਧਮੇਵਾਤਿ ਦਟ੍ਠਬ੍ਬਂ. ਅਟ੍ਠ ਮਹਾਕਿਰਿਯਾ, ਦ੍ਵੇ ਤਤਿਯਚਤੁਤ੍ਥਾਰੁਪ੍ਪਕਿਰਿਯਾ, ਮਨੋਦ੍ਵਾਰਾਵਜ੍ਜਨਂ, ਆਕਿਞ੍ਚਞ੍ਞਾਯਤਨਵਿਪਾਕੋ, ਅਰਹਤ੍ਤਫਲਨ੍ਤਿ ਤੇਰਸ ਚਿਤ੍ਤਾਨਿ ਤਤਿਯਾਰੁਪ੍ਪਭੂਮਿਯਂ ਖੀਣਾਸਵਸ੍ਸ ਜਾਯਨ੍ਤਿ. ਤਤਿਯਾਰੁਪ੍ਪਭੂਮਿਯਂ ਪੁਥੁਜ੍ਜਨਸ੍ਸ ਵੁਤ੍ਤੇਸੁ ਦ੍ਵਾਵੀਸਤਿਚਿਤ੍ਤੇਸੁ ਆਕਿਞ੍ਚਞ੍ਞਾਯਤਨਕੁਸਲਵਿਪਾਕਵਜ੍ਜਾਤਿ ਵੀਸਤਿ, ਨੇਵਸਞ੍ਞਾਨਾਸਞ੍ਞਾਯਤਨਵਿਪਾਕੋਤਿ ਏਕਵੀਸਤਿ ਚਿਤ੍ਤਾਨਿ ਚਤੁਤ੍ਥਾਰੁਪ੍ਪਭੂਮਿਯਂ ਪੁਥੁਜ੍ਜਨਸ੍ਸ ਜਾਯਨ੍ਤਿ. ਪੁਥੁਜ੍ਜਨਸ੍ਸ ਵੁਤ੍ਤੇਸੁ ਅਪੁਞ੍ਞਪਞ੍ਚਕਵਜ੍ਜਾਨਿ ਸੋਲ਼ਸ, ਸੋਤਾਪਤ੍ਤਿਫਲਞ੍ਚਾਤਿ ਸਤ੍ਤਰਸ ਤਤ੍ਥੇਵ ਸੋਤਾਪਨ੍ਨਸ੍ਸ ਹੋਨ੍ਤਿ. ਅਟ੍ਠ ਮਹਾਕਿਰਿਯਾ, ਦ੍ਵੇ ਚ ਨੇਵਸਞ੍ਞਾਨਾਸਞ੍ਞਾਯਤਨਵਿਪਾਕਕਿਰਿਯਾ, ਮਨੋਦ੍ਵਾਰਾਵਜ੍ਜਨਂ, ਅਰਹਤ੍ਤਫਲਞ੍ਚਾਤਿ ਦ੍ਵਾਦਸ ਚਿਤ੍ਤਾਨਿ ਤਤ੍ਥੇਵ ਅਰਹਤੋ ਉਪ੍ਪਜ੍ਜਨ੍ਤਿ.

੨੬੧-੩. ਅਰੂਪਕੁਸਲਾ ਚੇਵ ਕਿਰਿਯਾਪਿ ਚ ਉਪ੍ਪਜ੍ਜਨ੍ਤਿ, ਨ ਪਨ ਵਿਪਾਕਾਤਿ ਅਧਿਪ੍ਪਾਯੋ. ਉਦ੍ਧਮੁਦ੍ਧਮਰੂਪੀਨਨ੍ਤਿ ਵਿਞ੍ਞਾਣਞ੍ਚਾਯਤਨਾਦੀਸੁ ਅਰੂਪੀਨਂ. ਹੇਟ੍ਠਿਮਾਤਿ ਵਿਞ੍ਞਾਣਞ੍ਚਾਯਤਨਿਕਾਨਂ ਆਕਾਸਾਨਞ੍ਚਾਯਤਨਕੁਸਲਵਿਪਾਕਾ ਨੁਪ੍ਪਜ੍ਜਨ੍ਤਿ, ਆਕਿਞ੍ਚਞ੍ਞਾਯਤਨਿਕਾਨਂ ਆਕਾਸਾਨਞ੍ਚਾਯਤਨਵਿਞ੍ਞਾਣਞ੍ਚਾਯਤਨਕੁਸਲਵਿਪਾਕਾਤਿ ਏਵਮਾਦਿਨਾ ਹੇਟ੍ਠਿਮਾ ਹੇਟ੍ਠਿਮਾ ਅਰੂਪਾ ਨੁਪ੍ਪਜ੍ਜਨ੍ਤਿ. ਕਸ੍ਮਾਤਿ ਆਹ ‘‘ਦਿਟ੍ਠਾਦੀਨਵਤੋ ਕਿਰਾ’’ਤਿ. ਕਿਰਾਤਿ ਅਨੁਸ੍ਸੁਤਿਯਂ. ਦਿਟ੍ਠਾਦੀਨਵਤੋਤਿ ਆਰਮ੍ਮਣੇ, ਝਾਨੇ ਚ ਦਿਟ੍ਠਦੋਸਤ੍ਤਾ. ਕੁਸਲਾਨੁਤ੍ਤਰਾਤਿ ਲੋਕੁਤ੍ਤਰਕੁਸਲਾ.

੨੬੬. ਸਬ੍ਬੋ ਰੂਪੋ ਮਹਗ੍ਗਤੋਤਿ ਸਬ੍ਬੋ ਰੂਪਾਵਚਰਮਹਗ੍ਗਤਚਿਤ੍ਤੁਪ੍ਪਾਦੋ. ਮਨੋਧਾਤੂਤਿ ਕਿਰਿਯਾਮਨੋਧਾਤੁਵਿਪਾਕਮਨੋਧਾਤੂਨਂ ਕਾਮਵਿਪਾਕ-ਗ੍ਗਹਣੇਨ ਗਹਿਤਤ੍ਤਾ.

੨੬੯-੭੩. ਏਵਂ…ਪੇ… ਹੇਟ੍ਠਿਮਨ੍ਤਿ ਦੁਤਿਯਾਰੁਪ੍ਪਭੂਮਿਯਂ ਵੁਤ੍ਤੇਸੁ ਦੁਤਿਯਾਰੁਪ੍ਪਤ੍ਤਯਂ ਠਪੇਤ੍ਵਾ ਅਤ੍ਤਨੋ ਪਾਕੇਨ ਸਹ ਤਤਿਯਾਰੁਪ੍ਪਭੂਮਿਯਂ ਏਕੂਨਚਤ੍ਤਾਲੀਸ ਚਿਤ੍ਤਾਨਿ ਤਤ੍ਥਵੁਤ੍ਤੇਸੁ ਤਤਿਯਾਰੁਪ੍ਪਤ੍ਤਯਂ ਠਪੇਤ੍ਵਾ ਅਤ੍ਤਨੋ ਪਾਕੇਨ ਸਹ ਸਤ੍ਤਤਿਂਸਾਤਿ ਏਵਂ ਸੇਸਦ੍ਵਯੇਪਿ ਹੇਟ੍ਠਿਮਹੇਟ੍ਠਿਮਂ ਹਿਤ੍ਵਾ ਚਿਤ੍ਤਗਣਨਾ ਞੇਯ੍ਯਾ. ਅਤ੍ਤਨੋ ਅਤ੍ਤਨੋਤਿ ਪਠਮਾਰੁਪ੍ਪਭੂਮਿਯਂ ਪਠਮਾਰੁਪ੍ਪਵਿਪਾਕੋ, ਦੁਤਿਯਾਰੁਪ੍ਪਭੂਮਿਯਂ ਦੁਤਿਯਾਰੁਪ੍ਪਵਿਪਾਕੋਤਿ ਏਵਂ ਅਤ੍ਤਨੋ ਅਤ੍ਤਨੋ ਵਿਪਾਕਾ ਚਤ੍ਤਾਰੋ ਚ ਅਨਾਸਵਾ ਲੋਕੁਤ੍ਤਰਵਿਪਾਕਾਤਿ ਏਵਂ ਚਤੂਸੁ ਅਰੂਪਭੂਮੀਸੁ ਏਕੇਕਾਯ ਭੂਮਿਯਾ ਪਞ੍ਚ ਪਞ੍ਚ ਵਿਪਾਕਾ ਜਾਯਨ੍ਤਿ. ਯਾ ਕਿਰਿਯਾ ਤੇਰਸੇਵ ਸਿਯੁਂ, ਤਾ ਸਬ੍ਬਪਠਮਾਰੁਪ੍ਪਭੂਮਿਯਂ ਖੀਣਾਸਵਸ੍ਸ ਜਾਯਨ੍ਤੇਤਿ ਸਮ੍ਬਨ੍ਧੋ. ਦੁਤਿਯਾਰੁਪ੍ਪਭੂਮਿਯਂ ਖੀਣਾਸਵਸ੍ਸ ਪਠਮਾਰੁਪ੍ਪਕਿਰਿਯਚਿਤ੍ਤਂ ਵਜ੍ਜੇਤ੍ਵਾ ਦ੍ਵਾਦਸੇਵ ਕ੍ਰਿਯਾ ਹੋਨ੍ਤਿ. ਤਤਿਯਾਰੁਪ੍ਪਭੂਮਿਯਂ ਦੁਤਿਯਾਰੁਪ੍ਪਕਿਰਿਯਚਿਤ੍ਤਂ ਵਜ੍ਜੇਤ੍ਵਾ ਏਕਾਦਸ. ਚਤੁਤ੍ਥਾਰੁਪ੍ਪਭੂਮਿਯਂ ਤਤਿਯਾਰੁਪ੍ਪਕਿਰਿਯਚਿਤ੍ਤਂ ਵਜ੍ਜੇਤ੍ਵਾ ਦਸੇਵ ਵਿਞ੍ਞੇਯ੍ਯਾ.

੨੭੪-੫. ਇਦਾਨਿ ਕੇਵਲਂ ਪੁਗ੍ਗਲਵਸੇਨ ਤੇਸਮੇਵ ਪੁਗ੍ਗਲਾਨਂ ਆਵੇਣਿਕਚਿਤ੍ਤਂ ਦਸ੍ਸੇਤੁਂ ‘‘ਅਰਹਤੋ ਪਨਾ’’ਤਿਆਦਿਨਾ ਅਰਹਤੋਯੇਵ ਉਪ੍ਪਜ੍ਜਨਕਚਿਤ੍ਤਂ ਦਸ੍ਸੇਤ੍ਵਾ ਅਨਾਗਾਮਿਆਦੀਨਂ ਪਾਟਿਪੁਗ੍ਗਲਿਕਂ ਸਕਸਕਫਲਚਿਤ੍ਤਂ ਪਾਕਟਮੇਵਾਤਿ ਸਂਖਿਤ੍ਤਂ. ਅਰਹਤੋਤਿ ਖੀਣਾਸਵਸ੍ਸ. ਅਰਹਤੋ ਭਾਵੋ ਅਰਹਤ੍ਤਂ, ਅਰਹਤ੍ਤਫਲਨ੍ਤਿ ਅਤ੍ਥੋ. ਤਞ੍ਹਿ ‘‘ਅਰੀਨਂ ਹਤਤ੍ਤਾ ਅਰਹਾ’’ਤਿਆਦਿਨਾ ਅਰਹਨ੍ਤ-ਸਦ੍ਦਸ੍ਸ ਪਵਤ੍ਤਿਨਿਮਿਤ੍ਤਭਾਵੇਨ ‘‘ਅਰਹਤ੍ਤ’’ਨ੍ਤਿ ਵੁਚ੍ਚਤਿ. ਇਦਾਨਿ ਤੇਸਂ ਤੇਸਂ ਪੁਗ੍ਗਲਾਨਂ ਸਾਧਾਰਣਚਿਤ੍ਤਾਨਿ ਦਸ੍ਸੇਤੁਂ ‘‘ਚਤੁਨ੍ਨਞ੍ਚ ਫਲਟ੍ਠਾਨ’’ਨ੍ਤਿਆਦਿ ਵੁਤ੍ਤਂ.

੨੯੦. ਸੁਸਾਰਨ੍ਤਿ ਅਤ੍ਥਬ੍ਯਞ੍ਜਨਵਸੇਨ ਪਰਿਚ੍ਚਜਿਤਬ੍ਬਸ੍ਸ ਫੇਗ੍ਗੁਸ੍ਸ ਅਭਾਵਤੋ ਸੁਟ੍ਠੁ ਸਾਰਂ, ਸਬ੍ਬਸੋ ਸਾਰਨ੍ਤਿ ਅਤ੍ਥੋ. ਪਰਨ੍ਤਿ ਸੁਸਾਰਤ੍ਤਾ ਏਵ ਪਰਂ. ਸਤ੍ਤਾਨਂ ਇਧਲੋਕਪਰਲੋਕਹਿਤਪਟਿਚ੍ਛਾਦਕਸ੍ਸ ਅਵਿਜ੍ਜਨ੍ਧਕਾਰਸ੍ਸ ਵਿਧਮਨਤੋ ਮੋਹਨ੍ਧਕਾਰਪ੍ਪਦੀਪਂ. ਚਿਨ੍ਤੇਤੀਤਿ ਅਤ੍ਥਵਸੇਨ ਚਿਨ੍ਤੇਤਿ. ਵਾਚੇਤੀਤਿ ਬ੍ਯਞ੍ਜਨਵਸੇਨ ਸਜ੍ਝਾਯਤਿ. ਰਾਗਦੋਸਾਨਂ ਮੋਹੇਨ ਸਹ ਅਵਿਨਾਭਾਵਤੋ ਤਸ੍ਸ ਅਨੁਪਗਮਨਂ ਅਤ੍ਥਸਿਦ੍ਧਮੇਵਾਤਿ ‘‘ਮੋਹਨ੍ਧਕਾਰਪ੍ਪਦੀਪ’’ਨ੍ਤਿ ਵਤ੍ਵਾਪਿ ‘‘ਨਰਂ…ਪੇ… ਨੋਪਯਨ੍ਤੀ’’ਤਿ ਰਾਗਦੋਸਾਨੁਪਗਮਨਮੇਵ ਵੁਤ੍ਤਂ. ‘‘ਮੋਹਨ੍ਧਕਾਰਪ੍ਪਦੀਪ’’ਨ੍ਤਿ ਵਾ ਵਚਨੇਨੇਵ ਮੋਹਸ੍ਸ ਅਨੁਪਗਮੋ ਵੁਤ੍ਤੋ ਹੋਤੀਤਿ ਰਾਗਦੋਸਾਨਮੇਵ ਅਨੁਪਗਮਨਂ ਵੁਤ੍ਤਂ. ਮੂਲਭੂਤਾਨਂ ਪਨ ਤਿਣ੍ਣਂ ਅਨੁਪਗਮਨਵਚਨੇਨ ਸੇਸਕਿਲੇਸਾਨਮ੍ਪਿ ਅਨੁਪਗਮਨਂ ਵੁਤ੍ਤਮੇਵਾਤਿ ਦਟ੍ਠਬ੍ਬਂ.

ਇਤਿ ਅਭਿਧਮ੍ਮਤ੍ਥਵਿਕਾਸਿਨਿਯਾ ਨਾਮ

ਅਭਿਧਮ੍ਮਾਵਤਾਰਸਂਵਣ੍ਣਨਾਯ

ਭੂਮਿਪੁਗ੍ਗਲਚਿਤ੍ਤੁਪ੍ਪਤ੍ਤਿਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਪਠਮੋ ਭਾਗੋ ਨਿਟ੍ਠਿਤੋ.

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਅਭਿਧਮ੍ਮਾਵਤਾਰ-ਅਭਿਨਵਟੀਕਾ

(ਦੁਤਿਯੋ ਭਾਗੋ)