੩. ਤਤਿਯੋ ਪਰਿਚ੍ਛੇਦੋ

ਚੇਤਸਿਕਵਿਭਾਗਨਿਦ੍ਦੇਸਵਣ੍ਣਨਾ

੮੯. ਨਾਮਸਾਮਞ੍ਞਤੋਯੇਵ ਦ੍ਵੇਪਞ੍ਞਾਸਾਤਿ ਫਸ੍ਸਾਦਿਨਾਮਸਾਮਞ੍ਞੇਨ ਦ੍ਵੀਹਿ ਅਧਿਕਾ ਪਣ੍ਣਾਸ ਹੋਨ੍ਤਿ, ਸਮ੍ਪਯੁਤ੍ਤਧਮ੍ਮਭੇਦਤੋ ਪਨ ਏਕੂਨਨਵੁਤਿਚਿਤ੍ਤਸਮ੍ਪਯੁਤ੍ਤੋ ਫਸ੍ਸੋ ਏਕੂਨਨਵੁਤਿਵਿਧੋਤਿ ਏਵਮਾਦਿਨਾ ਬਹੁਵਿਧਾਪਿ ਹੋਨ੍ਤੀਤਿ ਅਤ੍ਥੋ.

ਨਨੁ ਚ ਫਸ੍ਸਾਦਯੋ ਹੇਟ੍ਠਾ ਪਾਲ਼ਿਕ੍ਕਮੇਨ ਦਸ੍ਸਿਤਾ, ਇਧ ਪਨ ਕਸ੍ਮਾ ਨ ਤਥਾ ਵੁਤ੍ਤਾਤਿ? ਏਕੇਕਸਭਾਵਵਨ੍ਤਾਨਂ ਤਂਤਂਸਾਮਞ੍ਞਾਪੇਕ੍ਖਾਯ ਏਕਸ੍ਮਿਂ ਠਾਨੇ ਨਿਦ੍ਦਿਸਿਤੁਕਾਮਤ੍ਤਾ. ਫਸ੍ਸਾਦਯੋ ਹਿ ਮਨਕ੍ਕਾਰਾਵਸਾਨਾ ਤੇਰਸ ਕੁਸਲਾਕੁਸਲਾਬ੍ਯਾਕਤਸਾਮਞ੍ਞਤੋ ਏਕਤੋ ਵੁਤ੍ਤਾ, ਮਜ੍ਝਤ੍ਤਾਦਯੋ ਮੁਦਿਤਾਵਸਾਨਾ ਪਞ੍ਚਵੀਸਤਿ ਕੁਸਲਾਬ੍ਯਾਕਤਸਾਮਞ੍ਞਤੋ, ਲੋਭਾਦਯੋ ਪਨ ਅਨੋਤ੍ਤਪ੍ਪਾਵਸਾਨਾ ਅਕੁਸਲਭਾਵਸਾਮਞ੍ਞਤੋਤਿ ਏਵਂ ਤਂਤਂਸਾਮਞ੍ਞਾਪੇਕ੍ਖਾਯ ਸਮਾਨਸਭਾਵਾ ਧਮ੍ਮਾ ਏਕਤੋ ਵੁਤ੍ਤਾਤਿ.

੯੦. ਏਵਂ ਫਸ੍ਸਾਦਯੋ ਧਮ੍ਮੇ ਉਦ੍ਦਿਸਿਤ੍ਵਾ ਇਦਾਨਿ ‘‘ਏਤ੍ਤਕੇਸੁ ਅਯਂ ਧਮ੍ਮੋ ਸਮੁਪਲਬ੍ਭਤੀ’’ਤਿ ਚਿਤ੍ਤੁਪ੍ਪਾਦੇਸੁ ਤੇਸਂ ਪਯੋਗਂ ਦਸ੍ਸੇਤੁਂ ਪਠਮਂ ਤਾਵ ਚਿਤ੍ਤਗਣਨਂ ਦਸ੍ਸੇਨ੍ਤੋ ਆਹ ‘‘ਚਤੁਪਞ੍ਞਾਸਧਾ’’ਤਿਆਦਿ. ਕਾਮੇਤਿ ਕਾਮਾਵਚਰੇਤਿ ਵੁਤ੍ਤਂ ਹੋਤਿ. ਏਵਂ ‘‘ਰੂਪੇ ਅਰੂਪੇ’’ਤਿ ਏਤ੍ਥਾਪਿ. ਆਸਵਵਿਸਯਤ੍ਤਾਭਾਵਤੋ ਨ ਵਿਜ੍ਜਨ੍ਤਿ ਏਤੇਸੁ ਆਸਵਾਤਿ ਅਨਾਸਵਾ.

੯੧-੨. ਸਮਾਸਤੋਤਿ ਵਿਤ੍ਥਾਰਾਪੇਕ੍ਖਾਯ ਵੁਤ੍ਤਂ, ਨ ਇਤੋਪਿ ਸਮਾਸਸ੍ਸ ਅਭਾਵਤੋ. ਅਤਿਸਙ੍ਖੇਪਤੋ ਪਨ ਏਕੂਨਨਵੁਤਿ ਚਿਤ੍ਤੁਪ੍ਪਾਦਾ ਹੋਨ੍ਤਿ. ਏਤੇਸੂਤਿ ਇਮੇਸੁ ਚਿਤ੍ਤੁਪ੍ਪਾਦੇਸੁ. ਤੇਸਂ ਫਸ੍ਸਾਦੀਨਂ ਧਮ੍ਮਾਨਂ ਉਪ੍ਪਤ੍ਤਿਂ ਏਕੇਕਂ ਉਦ੍ਧਰਿਤ੍ਵਾ ਚਿਤ੍ਤਚੇਤਸਿਕੇਸੁ ਭਿਕ੍ਖੂਨਂ ਪਾਟਵਤ੍ਥਾਯ ਪਵਕ੍ਖਾਮੀਤਿ ਸਮ੍ਬਨ੍ਧੋ. ਏਕਕਨ੍ਤਿ ਏਕੇਕਂ, ਗਾਥਾਬਨ੍ਧਵਸੇਨ ਏ-ਕਾਰਲੋਪੋ.

੯੩. ਚੇਤਸਿਕਵਿਭਾਗਂ ਵਤ੍ਤੁਕਾਮੋਪਿ ਅਵਿਨਿਬ੍ਭੋਗਧਮ੍ਮੇ ਦਸ੍ਸੇਤੁਂ ਚਿਤ੍ਤੇਨ ਸਹ ਏਕਤੋ ਕਤ੍ਵਾ ਆਹ ‘‘ਫਸ੍ਸਪਞ੍ਚਕ’’ਨ੍ਤਿ. ਏਕਤੋ ਉਪ੍ਪਾਦੋ ਏਤੇਸਨ੍ਤਿ ਏਕੁਪ੍ਪਾਦਾ, ਸਹ ਖੀਯਨ੍ਤੀਤਿ ਸਹਕ੍ਖਯਾ, ਏਕਤੋ ਉਪ੍ਪਜ੍ਜਿਤ੍ਵਾ ਏਕਤੋ ਨਿਰੁਜ੍ਝਨਕਾਤਿ ਅਤ੍ਥੋ.

੯੪. ਸਬ੍ਬੇਸ੍ਵੇਵ ਏਕਵੀਸਸਤੇਸੁ ਚਿਤ੍ਤੇਸੁ ਸਮੁਪਲਬ੍ਭਨਤੋ ਸਬ੍ਬਸਾਧਾਰਣਾ. ਕਿਞ੍ਚਾਪਿ ਅਨਨ੍ਤਰਗਾਥਾਯ ਚਿਤ੍ਤੇਨ ਸਹ ਏਕੁਪ੍ਪਾਦਾਦਿਭਾਵਕਥਨੇਨੇਵ ਇਮੇਸਂ ਸਬ੍ਬਸਾਧਾਰਣਤਾ ਵੁਤ੍ਤਾ, ਤਤ੍ਥ ਪਨ ਏਕੁਪ੍ਪਾਦਾਦਿਮਤ੍ਤਕਥਨਮੇਵ ਇਚ੍ਛਿਤਂ, ਨ ਸਬ੍ਬਸਾਧਾਰਣਤਾ. ਵੁਤ੍ਤੋਪਿ ਵਾਯਮਤ੍ਥੋ ਤਤ੍ਥ ਅਪਾਕਟਤ੍ਤਾ ਪੁਨ ਪਾਕਟਂ ਕਤ੍ਵਾ ਇਧ ਵੁਤ੍ਤੋਤਿ.

੯੫-੧੦੦. ਦ੍ਵਿਪਞ੍ਚਵਿਞ੍ਞਾਣਵਜ੍ਜਿਤਚਤੁਚਤ੍ਤਾਲੀਸਕਾਮਾਵਚਰਚਿਤ੍ਤੇਸੁ, ਲੋਕਿਯਲੋਕੁਤ੍ਤਰਵਸੇਨ ਏਕਾਦਸਸੁ ਪਠਮਜ੍ਝਾਨਿਕਚਿਤ੍ਤੇਸੁ ਚਾਤਿ ਪਞ੍ਚਪਞ੍ਞਾਸਚਿਤ੍ਤੇਸੁ ਵਿਤਕ੍ਕਸ੍ਸ ਦੇਸਿਤਤ੍ਤਾ ਆਹ ‘‘ਵਿਤਕ੍ਕੋ…ਪੇ… ਸਮੁਦੀਰਿਤੋ’’ਤਿ. ਵਿਚਾਰੋ ਪਞ੍ਚਪਞ੍ਞਾਸਸਵਿਤਕ੍ਕਚਿਤ੍ਤੇਸੁ ਚੇਵ ਏਕਾਦਸਸੁ ਦੁਤਿਯਜ੍ਝਾਨਿਕਚਿਤ੍ਤੇਸੁ ਚਾਤਿ ਛਸਟ੍ਠਿਚਿਤ੍ਤੇਸੁ ਉਪ੍ਪਜ੍ਜਤੀਤਿ ਆਹ ‘‘ਚਾਰੋ…ਪੇ… ਜਾਯਤੇ’’ਤਿ.

ਏਕਪਞ੍ਞਾਸਚਿਤ੍ਤੇਸੁ ਪੀਤੀਤਿ ਕਾਯਵਿਞ੍ਞਾਣਵਜ੍ਜਿਤੇਸੁ ਅਟ੍ਠਾਰਸਸੁ ਸੋਮਨਸ੍ਸਸਹਗਤਕਾਮਾਵਚਰਚਿਤ੍ਤੇਸੁ ਚੇਵ ਚਤੁਤ੍ਥਪਞ੍ਚਮਜ੍ਝਾਨਵਜ੍ਜਿਤਤੇਤ੍ਤਿਂਸਰੂਪਜ੍ਝਾਨਿਕਚਿਤ੍ਤੇਸੁ ਚਾਤਿ ਏਕਪਞ੍ਞਾਸਚਿਤ੍ਤੇਸੁ ਪੀਤਿ ਜਾਯਤਿ. ਤੇਸਟ੍ਠਿਯਾ ਸੁਖਨ੍ਤਿ ਏਕਪਣ੍ਣਾਸਸਪ੍ਪੀਤਿਕਚਿਤ੍ਤੇਸੁ ਚੇਵ ਏਕਾਦਸਸੁ ਚਤੁਤ੍ਥਜ੍ਝਾਨਿਕਚਿਤ੍ਤੇਸੁ, ਕੁਸਲਵਿਪਾਕਕਾਯਵਿਞ੍ਞਾਣੇ ਚਾਤਿ ਤੇਸਟ੍ਠਿਯਾ ਚਿਤ੍ਤੇਸੁ ਸੁਖਂ ਜਾਯਤਿ. ਤੇਸਟ੍ਠਿਸੁਖਸਹਗਤਚਿਤ੍ਤਾਨਿ ਚੇਵ ਤੀਣਿ ਚ ਦੁਕ੍ਖਸਹਗਤਾਨੀਤਿ ਛਸਟ੍ਠਿਚਿਤ੍ਤੇ ਵਜ੍ਜੇਤ੍ਵਾ ਅਵਸੇਸਪਞ੍ਚਪਣ੍ਣਾਸਚਿਤ੍ਤੇਸੁ ਉਪੇਕ੍ਖਾ ਉਪ੍ਪਜ੍ਜਤੀਤਿ ਆਹ ‘‘ਉਪੇਕ੍ਖਾ ਪਞ੍ਚਪਞ੍ਞਾਸਚਿਤ੍ਤੇਸੂ’’ਤਿ. ਦੁਕ੍ਖਂ ਤੀਸੂਤਿ ਦ੍ਵੀਸੁ ਪਟਿਘਚਿਤ੍ਤੇਸੁ ਚੇਵ ਅਕੁਸਲਵਿਪਾਕਕਾਯਵਿਞ੍ਞਾਣੇ ਚਾਤਿ ਤੀਸੁ ਚਿਤ੍ਤੇਸੁ ਦੁਕ੍ਖਂ ਜਾਯਤਿ. ਹੋਤਿ…ਪੇ… ਸੋਮਨਸ੍ਸਿਨ੍ਦ੍ਰਿਯਨ੍ਤਿ ਤੇਸਟ੍ਠਿਯਾ ਸੁਖਸਹਗਤਚਿਤ੍ਤੇਸੁ ਏਕਮੇਵ ਕਾਯਵਿਞ੍ਞਾਣਂ ਅਪਨੇਤ੍ਵਾ ਅਵਸੇਸੇਸੁ ਸੋਮਨਸ੍ਸਿਨ੍ਦ੍ਰਿਯਂ ਹੋਤਿ. ਅਕੁਸਲਵਿਪਾਕਕਾਯਵਿਞ੍ਞਾਣਵਸੇਨ ਏਕਮੇਵ ਦੁਕ੍ਖਿਨ੍ਦ੍ਰਿਯਸਹਗਤਂ, ਤਥਾ ਕੁਸਲਵਿਪਾਕਕਾਯਵਿਞ੍ਞਾਣਮੇਵ ਸੁਖਿਨ੍ਦ੍ਰਿਯਸਮ੍ਪਯੁਤ੍ਤਨ੍ਤਿ ਆਹ ‘‘ਦੁਕ੍ਖਿਨ੍ਦ੍ਰਿਯਂ…ਪੇ… ਸੁਖਿਨ੍ਦ੍ਰਿਯ’’ਨ੍ਤਿ.

ਅਹੇਤੁਕਵਿਪਾਕਕਿਰਿਯਾਮਨੋਧਾਤੁਵਜ੍ਜਿਤੇਸੁ ਮਜ੍ਝਿਮਗਣਨਾਯ ਪਞ੍ਚਾਧਿਕਸਤਪਰਿਮਿਤੇਸੁ ਕੁਸਲਾਕੁਸਲਵਿਪਾਕਕਿਰਿਯਾਚਿਤ੍ਤੇਸੁ ਵੀਰਿਯਂ ਦੇਸਿਤਨ੍ਤਿ ਆਹ ‘‘ਪਞ੍ਚੁਤ੍ਤਰ…ਪੇ… ਆਹਾ’’ਤਿ. ਦਿਟ੍ਠਧਮ੍ਮਿਕਸਮ੍ਪਰਾਯਿਕਤ੍ਥੇਸੁ ਸਤ੍ਤੇ ਵਿਨੇਤਿ, ਵਿਗਤੋ ਵਾ ਨਾਯਕੋ ਇਮਸ੍ਸ, ਵਿਸਿਟ੍ਠੋ ਵਾ ਸਬ੍ਬਲੋਕਸ੍ਸ ਨਾਯਕੋ ਸਾਮਿ, ਵਿਸੇਸੇਨ ਵਾ ਵਿਨੇਯ੍ਯਸਤ੍ਤੇ ਨਿਬ੍ਬਾਨਪੁਰਂ ਨੇਤੀਤਿ ਵਿਨਾਯਕੋ. ਸਮਾਧਿਨ੍ਦ੍ਰਿਯਂ ਵਿਚਿਕਿਚ੍ਛਾਵਜ੍ਜਿਤਵੀਰਿਯਸਹਗਤਚਿਤ੍ਤੇਸੁ ਵੁਤ੍ਤਨ੍ਤਿ ਆਹ ‘‘ਚਤੁਤ੍ਤਰਸਤੇ’’ਤਿਆਦਿ.

ਅਟ੍ਠਾਰਸ ਅਹੇਤੁਕਚਿਤ੍ਤਾਨਿ, ਦ੍ਵੇ ਏਕਹੇਤੁਕਚਿਤ੍ਤਾਨਿ ਚ ਵਜ੍ਜੇਤ੍ਵਾ ਅਵਸੇਸਏਕੁਤ੍ਤਰਸਤੇ ਚਿਤ੍ਤੇ ਛਨ੍ਦੋ ਉਪ੍ਪਜ੍ਜਤੀਤਿ ਦਸ੍ਸੇਤੁਂ ‘‘ਸਬ੍ਬਾਹੇਤੁਕਚਿਤ੍ਤਾਨੀ’’ਤਿਆਦਿ ਵੁਤ੍ਤਂ. ਦਸ ਵਿਞ੍ਞਾਣੇਤਿ ਕੁਸਲਾਕੁਸਲਵਿਪਾਕਵਸੇਨ ਦ੍ਵਿਗੁਣਿਤੇ ਚਕ੍ਖਾਦਿਕੇ ਪਞ੍ਚਵਿਞ੍ਞਾਣੇ.

੧੦੨-੬. ਨਿਯਤਾ ਨ ਯੇਵਾਪਨਕਾ ਵਿਯ ਕਦਾਚੀਤਿ ਅਤ੍ਥੋ. ਕਥਂ ਪਨੇਤੇ ਏਕਨਵੁਤਿਯਾ ਚਿਤ੍ਤੇਸ੍ਵੇਵ ਜਾਯਨ੍ਤੀਤਿ ਆਹ ‘‘ਅਹੇਤੁਕੇਸੂ’’ਤਿਆਦਿ. ਏਕੂਨਾਸੀਤਿਯਾਤਿ ਦ੍ਵਾਦਸ ਞਾਣਸਮ੍ਪਯੁਤ੍ਤਕਾਮਾਵਚਰਾਨਿ, ਪਞ੍ਚਦਸ ਰੂਪਾਵਚਰਾਨਿ, ਦ੍ਵਾਦਸ ਅਰੂਪਾਵਚਰਾਨਿ, ਸਮਚਤ੍ਤਾਲੀਸ ਲੋਕੁਤ੍ਤਰਚਿਤ੍ਤਾਨੀਤਿ ਏਵਂ ਏਕੂਨਾਸੀਤਿਯਾ ਤਿਹੇਤੁਕਚਿਤ੍ਤੇਸੁ. ਅਟ੍ਠਵੀਸਤਿਯਾ ਚਿਤ੍ਤੇਤਿ ਸੋਲ਼ਸਸੁ ਕਾਮਾਵਚਰਕੁਸਲਮਹਾਕਿਰਿਯਾਸੁ, ਦ੍ਵਾਦਸਸੁ ਚ ਲੋਕਿਯਚਤੁਤ੍ਥਜ੍ਝਾਨਚਿਤ੍ਤੇਸੁ ਚਾਤਿ ਅਟ੍ਠਵੀਸਤਿਚਿਤ੍ਤੇਸੁ. ਸਾਟ੍ਠਕੇ ਚਤ੍ਤਾਲੀਸਵਿਧੇਤਿ ਅਟ੍ਠਸਹਿਤੇ ਚਤ੍ਤਾਲੀਸਵਿਧੇ, ਅਟ੍ਠਚਤ੍ਤਾਲੀਸਵਿਧੇਤਿ ਵੁਤ੍ਤਂ ਹੋਤਿ. ਛ ਯੁਗਲ਼ਾਨੀਤਿ ਕਾਯਪਸ੍ਸਦ੍ਧਿਚਿਤ੍ਤਪਸ੍ਸਦ੍ਧਾਦੀਨਿ ਛ ਯੁਗਲ਼ਾਨਿ. ਕੁਸਲਾਬ੍ਯਾਕਤਾ ਚਾਤਿ ਕੁਸਲਚਿਤ੍ਤਸਮ੍ਪਯੋਗਤੋ ਕੁਸਲਾ, ਅਬ੍ਯਾਕਤਚਿਤ੍ਤਸਮ੍ਪਯੋਗਤੋ ਅਬ੍ਯਾਕਤਾਤਿ ਕੁਸਲੇਨਪਕਾਸਨਵਿਧਾਨੇਸੁ ਛੇਕੇਨ ਸਤ੍ਥੁਨਾ ਪਕਾਸਿਤਾ ਦੇਸਿਤਾਤਿ ਅਤ੍ਥੋ.

੧੦੮-੧੧੧. ਸਂਸਯੋਤਿ ਵਿਚਿਕਿਚ੍ਛਾ. ਸਾ ਹਿ ਸਂਸੇਤਿ ਸਮਨ੍ਤਤੋ ਸੇਤਿ, ‘‘ਏਵਂ ਨੁ ਖੋ, ਨੋ ਨੁ ਖੋ’’ਤਿ ਪਰਿਸਪ੍ਪਤੀਤਿ ਸਂਸਯੋ. ਮਹਨ੍ਤੇ ਸੀਲਕ੍ਖਨ੍ਧਾਦਿਕੇ ਏਸਤਿ ਗਵੇਸਤੀਤਿ ਮਹੇਸੀ. ਤੇਨ ਮਹੇਸਿਨਾ ਸਮ੍ਮਾਸਮ੍ਬੁਦ੍ਧੇਨ. ਅਟ੍ਠਸੂਤਿ ਅਟ੍ਠਲੋਭਸਹਗਤਚਿਤ੍ਤੇਸੁ. ਚਤੂਸੂਤਿ ਤੇਸ੍ਵੇਵ ਦਿਟ੍ਠਿਸਹਗਤਚਿਤ੍ਤੇਸੁ. ਦਿਟ੍ਠਿਵਿਯੁਤ੍ਤੇਸੁ ਚਤੂਸੂਤਿ ਸਮ੍ਬਨ੍ਧੋ. ਦ੍ਵੀਸ੍ਵੇਵਾਤਿ ਦ੍ਵੀਸੁ ਦੋਸਮੂਲਕਚਿਤ੍ਤੇਸੁ. ਦ੍ਵੀਸੁ ਜਾਯਨ੍ਤਿ ਨੋ ਸਹਾਤਿ ਦੋਸਮੂਲੇਸ੍ਵੇਵ ਦ੍ਵੀਸੁ ਜਾਯਨ੍ਤਿ, ਸਹ ਪਨ ਨ ਉਪ੍ਪਜ੍ਜਨ੍ਤਿ, ਉਸੂਯਨਕਾਲੇ ਇਸ੍ਸਾ, ਮਚ੍ਛਰਣਕਾਲੇ ਮਚ੍ਛੇਰਨ੍ਤਿਆਦਿਨਾ ਨਾਨਾ ਹੁਤ੍ਵਾਵ ਉਪ੍ਪਜ੍ਜਨ੍ਤਿ. ਪਞ੍ਚਸੂਤਿ ਪਞ੍ਚਸੁ ਸਸਙ੍ਖਾਰਿਕਚਿਤ੍ਤੇਸੁ.

੧੧੨. ਚਿਤ੍ਤਸ੍ਸ ਚੇਤਸਿਕਤ੍ਤਾਭਾਵੇਪਿ ਕੁਸਲਾਕੁਸਲਾਬ੍ਯਾਕਤਧਮ੍ਮਾਨਂ ਗਣਨਟ੍ਠਾਨਤੋ ‘‘ਮਨੋ’’ਤਿ ਚਿਤ੍ਤਮ੍ਪਿ ਵੁਤ੍ਤਂ.

੧੧੪-੫. ਏਤ੍ਤਾਵਤਾ ਚੇਤਸਿਕਵਿਭਾਗਂ ਦਸ੍ਸੇਤ੍ਵਾ ਇਦਾਨਿ ਏਕੇਕਸ੍ਮਿਂ ਚਿਤ੍ਤੁਪ੍ਪਾਦੇ ਲਬ੍ਭਮਾਨਰਾਸੀਸੁ ਅਙ੍ਗਵਿਭਾਗਦਸ੍ਸਨਤ੍ਥਂ ‘‘ਏਕੂਨਤਿਂਸਚਿਤ੍ਤੇਸੂ’’ਤਿਆਦਿ ਵੁਤ੍ਤਂ. ਨਨੁ ਚ ਫਸ੍ਸਪਞ੍ਚਮਕਰਾਸਿ ਸਬ੍ਬਪਠਮਂ ਆਗਤਾ, ਸਾ ਕਸ੍ਮਾ ਨ ਵੁਤ੍ਤਾਤਿ? ਸਬ੍ਬਸਾਧਾਰਣਭਾਵਤੋ. ਨ ਹਿ ਸੋ ਚਿਤ੍ਤੁਪ੍ਪਾਦੋ ਅਤ੍ਥਿ, ਯੋ ਫਸ੍ਸਪਞ੍ਚਮਕਵਿਨਿਮੁਤ੍ਤੋਤਿ. ਏਕਾਦਸ ਪਠਮਜ੍ਝਾਨਿਕਾਨਿ ਸੋਮਨਸ੍ਸਸਹਗਤਾਨਿ, ਦ੍ਵਾਦਸ ਸਹੇਤੁਕਕਾਮਾਵਚਰਾਨਿ, ਤਥਾ ਚਤ੍ਤਾਰਿ ਅਕੁਸਲਾਨਿ, ਸੁਖਸਨ੍ਤੀਰਣਹਸਿਤੁਪ੍ਪਾਦਾਨਿ ਦ੍ਵੇਤਿ ਏਕੂਨਤਿਂਸਚਿਤ੍ਤੇਸੁ ਪਞ੍ਚਙ੍ਗਿਕਂ ਝਾਨਂ ਪਞ੍ਚਕਰਾਸਿਸਙ੍ਖਾਤਂ ਮਤਂ. ਚਤੁ…ਪੇ… ਨਿਦ੍ਦਿਸੇਤਿ ਏਕਾਦਸ ਦੁਤਿਯਜ੍ਝਾਨਿਕਾਨਿ, ਕੁਸਲਵਿਪਾਕਕਿਰਿਯਾਵਸੇਨ ਦ੍ਵਾਦਸ ਉਪੇਕ੍ਖਾਸਹਗਤਸਹੇਤੁਕਕਾਮਾਵਚਰਾਨਿ, ਉਪੇਕ੍ਖਾਦੋਮਨਸ੍ਸਸਹਗਤਾਨਿ ਅਟ੍ਠ ਅਕੁਸਲਾਨਿ, ਦ੍ਵਿਪਞ੍ਚਵਿਞ੍ਞਾਣਵਜ੍ਜਿਤਉਪੇਕ੍ਖਾਸਹਗਤਾਨਿ ਛ ਅਹੇਤੁਕਚਿਤ੍ਤਾਨਿ ਚਾਤਿ ਇਮਾਨਿ ਸਤ੍ਤਤਿਂਸ ਚਿਤ੍ਤਾਨਿ ਯਥਾਯੋਗਂ ਚਤੂਹਿ ਝਾਨਙ੍ਗੇਹਿ ਯੁਤ੍ਤਾਨਿ. ਏਤ੍ਥ ਹਿ ਏਕਾਦਸ ਦੁਤਿਯਜ੍ਝਾਨਿਕਾਨਿ ਵਿਚਾਰਪੀਤਿਸੁਖਸਮਾਧੀਹਿ ਸਹਗਤਾਨਿ, ਇਤਰਾਨਿ ਯਥਾਯੋਗਂ ਉਪੇਕ੍ਖਾਦੋਮਨਸ੍ਸੇਸੁ ਏਕੇਕੇਨ ਵਿਤਕ੍ਕਵਿਚਾਰਸਮਾਧੀਹੀਤਿ ਚਤੂਹਿ ਸਮ੍ਪਯੁਤ੍ਤਾਨਿ.

ਏਕਾਦਸਵਿਧਨ੍ਤਿ ਏਕਾਦਸਵਿਧਂ ਤਤਿਯਜ੍ਝਾਨਿਕਚਿਤ੍ਤਂ ਪੀਤਿਸੁਖਚਿਤ੍ਤੇਕਗ੍ਗਤਾਯੋਗਤੋ ਤਿਵਙ੍ਗਿਕਮੁਦੀਰਿਤਂ. ਚਤੁਤ੍ਤਿਂਸ…ਪੇ… ਮੁਦੀਰਿਤਨ੍ਤਿ ਦ੍ਵਾਦਸ ਅਰੂਪਾਵਚਰਚਿਤ੍ਤਾਨਿ, ਦ੍ਵਾਵੀਸਤਿ ਚਤੁਤ੍ਥਪਞ੍ਚਮਜ੍ਝਾਨਿਕਾਨਿ ਸਾਸਵਾਨਾਸਵਾਨੀਤਿ ਚਤੁਤ੍ਤਿਂਸ ਚਿਤ੍ਤਾਨਿ ਯਥਾਯੋਗਂ ਉਪੇਕ੍ਖੇਕਗ੍ਗਤਾਯੋਗਤੋ, ਸੁਖੇਕਗ੍ਗਤਾਯੋਗਤੋ ਚ ਦੁਵਙ੍ਗਿਕਮੁਦੀਰਿਤਂ. ਚਤੁਤ੍ਥਜ੍ਝਾਨਿਕਾਨਿ ਹਿ ਏਕਾਦਸ ਸੁਖੇਕਗ੍ਗਤਾਸਹਿਤਾਨਿ, ਸੇਸਾਨਿ ਤੇਵੀਸਤਿ ਉਪੇਕ੍ਖੇਕਗ੍ਗਤਾਸਹਿਤਾਨਿ.

੧੧੬. ਸਭਾਵੇਨਾਵਿਤਕ੍ਕੇਸੂਤਿ ਦੁਤਿਯਜ੍ਝਾਨਾਦਯੋ ਵਿਯ ਭਾਵਨਾਬਲੇਨ ਵਿਨਾ ਸਭਾਵੇਨੇਵ ਅਵਿਤਕ੍ਕੇਸੁ ਦ੍ਵਿਪਞ੍ਚਵਿਞ੍ਞਾਣੇਸੁ. ਤੇਸੁ ਹਿ ਵਿਜ੍ਜਮਾਨਾਨਿਪਿ ਸੇਸਝਾਨਙ੍ਗਾਨਿ ਵਿਤਕ੍ਕਵਿਰਹੇਨ ਉਪਨਿਜ੍ਝਾਨਕਿਚ੍ਚੇਸੁ ਅਸਮਤ੍ਥਾਨਿ. ਤੇਨੇਵ ਹਿ ਅਟ੍ਠਕਥਾਯਮ੍ਪਿ ‘‘ਵਿਤਕ੍ਕਪਚ੍ਛਿਮਕਞ੍ਹਿ ਝਾਨਙ੍ਗਂ ਨਾਮਾ’’ਤਿ ਵੁਤ੍ਤਂ. ਭਾਵਨਾਯ ਅਵਿਤਕ੍ਕਭਾਵਪ੍ਪਤ੍ਤਾਨਿ ਪਨ ਭਾਵਨਾਬਲੇਨੇਵ ਉਪਨਿਜ੍ਝਾਨਕਿਚ੍ਚੇਸੁ ਪਟੁਤਰਾ, ਤਸ੍ਮਾ ਸਭਾਵੇਨਾਵਿਤਕ੍ਕੇਸੁ ਝਾਨਙ੍ਗਾਨਿ ਨ ਉਦ੍ਧਰੇਯ੍ਯ. ‘‘ਨ ਉਦ੍ਧਟਾ’’ਤਿ ਵਾ ਪਾਠੋ, ਨ ਉਦ੍ਧਟਾਨੀਤਿ ਅਤ੍ਥੋ.

ਯਦਿ ਏਵਂ ਕਸ੍ਮਾ ਦ੍ਵਿਪਞ੍ਚਵਿਞ੍ਞਾਣੇਸੁ ਸਰੂਪੇਨੇਵ ਚਿਤ੍ਤੇਕਗ੍ਗਤਾ ਵੁਤ੍ਤਾ, ਨਨੁ ਤਸ੍ਸਾ ਵਿਤਕ੍ਕਵਿਰਹੇਨ ਝਾਨਙ੍ਗਕਿਚ੍ਚੇ ਅਸਮਤ੍ਥਤਾਯ ਰਾਸਿਭਜਨਾਭਾਵਤੋ ਯੇਵਾਪਨਕਵਸੇਨ ਵਚਨਂ ਯੁਤ੍ਤਨ੍ਤਿ? ਵੁਚ੍ਚਤੇ – ਕੁਸਲਾਕੁਸਲੇਸੁ ਅਵਿਜ੍ਜਮਾਨਧਮ੍ਮਸ੍ਸ ਵਿਪਾਕੇਸੁਪਿ ਅਨੁਪਲਬ੍ਭਨਤੋ ਝਾਨਙ੍ਗਕਿਚ੍ਚਸ੍ਸ ਅਕਰਣੇਪਿ ਕੁਸਲਾਕੁਸਲੇਸੁ ਦੇਸਿਤਨਿਯਾਮੇਨੇਵ ਸਰੂਪੇਨ ਇਧਾਪਿ ਵੁਤ੍ਤਾ. ਹੋਤੁ ਤਾਵ ਏਤਂ, ਝਾਨਰਾਸਿਯਂ ਵੇਦਨਾ ਕਸ੍ਮਾ ਵੁਤ੍ਤਾ. ਸਾ ਹਿ ਸਬ੍ਬਚਿਤ੍ਤਸਾਧਾਰਣਭਾਵਤੋ ਫਸ੍ਸਪਞ੍ਚਕਰਾਸਿਮ੍ਹਿ ਚੇਵ, ਉਪੇਕ੍ਖਾਦਿਇਨ੍ਦ੍ਰਿਯਭਾਵਤੋ ਇਨ੍ਦ੍ਰਿਯਰਾਸਿਮ੍ਹਿਯੇਵ ਵਤ੍ਤਬ੍ਬਾ, ਨ ਇਤਰਤ੍ਥ ਤਦਭਾਵਤੋਤਿ? ਸਚ੍ਚਂ, ਵੇਦਨਾ ਪਨ ਸਬ੍ਬਵੇਦਨਾਨਂ ਸਾਮਞ੍ਞਸਭਾਵੇਨ ਫਸ੍ਸਪਞ੍ਚਕੇ ਆਗਤਵੇਦਨਾ ਚ ਅਪਰੇਨ ਵਿਸੇਸਵਚਨੇਨ ਤਤ੍ਥ ਨਿਦ੍ਦਿਟ੍ਠਾ, ਨ ਤਤ੍ਥ ਅਨ੍ਤੋਕਰਣਤ੍ਥਂ. ਤੇਨੇਵ ਹਿ ਧਮ੍ਮਸਙ੍ਗਣਿਯਂ ਦ੍ਵਿਪਞ੍ਚਵਿਞ੍ਞਾਣੇਸੁ ਸਙ੍ਗਹਵਾਰੇ ਝਾਨਙ੍ਗਰਾਸਿ ਨ ਉਦ੍ਧਟਾਤਿ ਰੂਪਧਾਤੁਯਂ ਤਿਣ੍ਣਂ ਮਹਾਭੂਤਾਨਂ ਅਪ੍ਪਟਿਘਭਾਵੇਪਿ ਕਾਮਧਾਤੁਯਂ ਸਪ੍ਪਟਿਘਮਹਾਭੂਤੇਹਿ ਸਮਾਨਭਾਵਤੋ ਤਤ੍ਥਾਪਿ ਸਪ੍ਪਟਿਘਭਾਵੋ ਵਿਯ ਦ੍ਵਿਪਞ੍ਚਵਿਞ੍ਞਾਣੇਸੁ ਵੇਦਨਾਚਿਤ੍ਤੇਕਗ੍ਗਤਾਨਂ ਵਿਤਕ੍ਕਵਿਯੋਗੇਨ ਝਾਨਕਿਚ੍ਚਾਕਰਣੇਪਿ ਸਵਿਤਕ੍ਕਚਿਤ੍ਤੇਸੁ ਝਾਨਚਿਤ੍ਤਸਮਙ੍ਗੀਵੇਦਨਾਦੀਹਿ ਸਮਾਨਤ੍ਤਾ ਝਾਨਙ੍ਗਭਾਵੇਨ ਵਚਨਂ ਨਾਮ ਯੁਤ੍ਤਂ. ਤੇਨੇਵ ਚ ਨਾਮਰੂਪਸਮਾਸੇ ‘‘ਫਸ੍ਸਪਞ੍ਚਕਰਾਸਿਝਾਨਦੁਕਰਾਸਿਇਨ੍ਦ੍ਰਿਯਤ੍ਤਿਕਰਾਸੀ’’ਤਿ ਵੁਤ੍ਤਨ੍ਤਿ. ਅਥ ਵਾ ਕਿਂ ਏਤਾਯ ਯੁਤ੍ਤਿਚਿਨ੍ਤਾਯ, ਧਮ੍ਮਸਭਾਵਵੇਦਿਨਾ ਤਥਾਗਤੇਨ ਧਮ੍ਮਸਭਾਵਂ ਅਵਿਰਜ੍ਝਿਤ੍ਵਾ ਦੇਸਿਤਨ੍ਤਿ ਨ ਏਤ੍ਥ ਅਨੁਯੋਗੋ ਕਾਤਬ੍ਬੋਤਿ. ਅਹੇਤੁਕਚਿਤ੍ਤਾਨਂ ਆਰਮ੍ਮਣੇ ਸੁਪ੍ਪਤਿਟ੍ਠਿਤਤਾਭਾਵੇਨ ਅਨਿਯ੍ਯਾਨਿਕਤ੍ਤਾ ਵੁਤ੍ਤਂ ‘‘ਸਬ੍ਬਾ…ਪੇ… ਨ ਉਦ੍ਧਰੇ’’ਤਿ. ਵੁਤ੍ਤਞ੍ਹੇਤਂ ਅਟ੍ਠਕਥਾਯਮ੍ਪਿ ‘‘ਹੇਤੁਪਚ੍ਛਿਮਕੋ ਮਗ੍ਗੋ’’ਤਿ.

੧੧੭. ਤੀਣਿ ਸੋਲ਼ਸਚਿਤ੍ਤੇਸੂਤਿ ਪਨ੍ਨਰਸਸੁ ਅਹੇਤੁਕਵਿਪਾਕਚਿਤ੍ਤੇਸੁ ਚੇਵ ਕਿਰਿਯਾਮਨੋਧਾਤੁਮ੍ਹਿ ਚਾਤਿ ਸੋਲ਼ਸਸੁ ਚਿਤ੍ਤੇਸੁ. ਮਨਿਨ੍ਦ੍ਰਿਯਂ ਜੀਵਿਤਿਨ੍ਦ੍ਰਿਯਂ ਵੇਦਨਿਨ੍ਦ੍ਰਿਯੇਸੁ ਲਬ੍ਭਮਾਨਮੇਕਨ੍ਤਿ ਤੀਣਿਨ੍ਦ੍ਰਿਯਾਨਿ ਹੋਨ੍ਤਿ. ਇਮੇਸੁਪਿ ਕੁਸਲਵਿਪਾਕਕਾਯਵਿਞ੍ਞਾਣਧਾਤੁਯਂ ਮਨਿਨ੍ਦ੍ਰਿਯਸੁਖਿਨ੍ਦ੍ਰਿਯਜੀਵਿਤਿਨ੍ਦ੍ਰਿਯਵਸੇਨ ਤੀਣਿਨ੍ਦ੍ਰਿਯਾਨਿ, ਅਕੁਸਲਵਿਪਾਕਕਾਯਵਿਞ੍ਞਾਣਧਾਤੁਯਂ ਦੁਕ੍ਖਿਨ੍ਦ੍ਰਿਯੇਨ ਸਹ ਤੀਣਿ, ਸੁਖਸਨ੍ਤੀਰਣੇ ਸੋਮਨਸ੍ਸਿਨ੍ਦ੍ਰਿਯੇਨ ਸਹ ਤੀਣਿ, ਅਵਸੇਸਤੇਰਸਚਿਤ੍ਤੇਸੁ ਉਪੇਕ੍ਖਿਨ੍ਦ੍ਰਿਯੇਨ ਸਹ ਤੀਣੀਤਿ. ਏਤ੍ਥ ਚਿਤ੍ਤਨ੍ਤਿ ਸਸਮ੍ਪਯੁਤ੍ਤਧਮ੍ਮਸ੍ਸ ਚਿਤ੍ਤੁਪ੍ਪਾਦਸ੍ਸ ਅਧਿਪ੍ਪੇਤਤ੍ਤਾ ਮਨਿਨ੍ਦ੍ਰਿਯਸ੍ਸਾਪਿ ਆਧਾਰਭਾਵੋ ਯੁਜ੍ਜੇਯ੍ਯ. ਇਤਰਥਾ ਹਿ ਮਨਿਨ੍ਦ੍ਰਿਯਨ੍ਤਿ ਚਿਤ੍ਤਸ੍ਸੇਵ ਗਹਣੇ ਤਸ੍ਸ ਅਤ੍ਤਨੋ ਚ ਆਧਾਰਭਾਵੋ ਨ ਯੁਜ੍ਜਤੀਤਿ. ਏਕਸ੍ਮਿਂ ਪਨ ਚਤ੍ਤਾਰੀਤਿ ਏਕਸ੍ਮਿਂ ਵਿਚਿਕਿਚ੍ਛਾਸਹਗਤੇ ਵੀਰਿਯਿਨ੍ਦ੍ਰਿਯਮਨਿਨ੍ਦ੍ਰਿਯਜੀਵਿਤਿਨ੍ਦ੍ਰਿਯਉਪੇਕ੍ਖਿਨ੍ਦ੍ਰਿਯਵਸੇਨ ਚਤ੍ਤਾਰਿ. ਪਞ੍ਚ ਤੇਰਸਸੂਤਿ ਠਪੇਤ੍ਵਾ ਵਿਚਿਕਿਚ੍ਛਾਸਹਗਤਂ ਅਵਸੇਸਾਨਿ ਏਕਾਦਸ ਅਕੁਸਲਚਿਤ੍ਤਾਨਿ, ਕਿਰਿਯਾਹੇਤੁਕਮਨੋਵਿਞ੍ਞਾਣਧਾਤੁਦ੍ਵਯਨ੍ਤਿ ਤੇਰਸਸੁ ਚਿਤ੍ਤੇਸੁ ਵੀਰਿਯਿਨ੍ਦ੍ਰਿਯਾਦੀਨਿ ਤੀਣਿ, ਸਮਾਧਿਨ੍ਦ੍ਰਿਯਂ, ਵੇਦਨਿਨ੍ਦ੍ਰਿਯੇਸੁ ਲਬ੍ਭਮਾਨਂ ਏਕਨ੍ਤਿ ਪਞ੍ਚਿਨ੍ਦ੍ਰਿਯਾਨਿ. ਏਤ੍ਥ ਹਿ ਦ੍ਵੀਸੁ ਦੋਸਮੂਲੇਸੁ ਵੀਰਿਯਿਨ੍ਦ੍ਰਿਯਸਮਾਧਿਨ੍ਦ੍ਰਿਯਮਨਿਨ੍ਦ੍ਰਿਯਜੀਵਿਤਿਨ੍ਦ੍ਰਿਯਦੋਮਨਸ੍ਸਿਨ੍ਦ੍ਰਿਯਵਸੇਨ ਪਞ੍ਚ, ਪਞ੍ਚਸੁ ਸੋਮਨਸ੍ਸਸਹਗਤੇਸੁ ਪੁਰਿਮਾਨਿ ਚਤ੍ਤਾਰਿ ਸੋਮਨਸ੍ਸਿਨ੍ਦ੍ਰਿਯੇਨ ਸਦ੍ਧਿਂ ਪਞ੍ਚ, ਸੇਸੇਸੁ ਉਪੇਕ੍ਖਿਨ੍ਦ੍ਰਿਯੇਨ ਸਦ੍ਧਿਂ ਪਞ੍ਚ ਹੋਨ੍ਤਿ.

੧੧੮. ਸਤ੍ਤ ਦ੍ਵਾਦਸਚਿਤ੍ਤੇਸੂਤਿ ਦ੍ਵਾਦਸਸੁ ਞਾਣਵਿਪ੍ਪਯੁਤ੍ਤਚਿਤ੍ਤੇਸੁ ਸਦ੍ਧਾਸਤਿਸਮਾਧਿਵੀਰਿਯਜੀਵਿਤਮਨਿਨ੍ਦ੍ਰਿਯਾਨਿ ਚ ਵੇਦਨਿਨ੍ਦ੍ਰਿਯੇਸੁ ਲਬ੍ਭਮਾਨਮੇਕਨ੍ਤਿ ਸਤ੍ਤ ਇਨ੍ਦ੍ਰਿਯਾਨਿ. ਤਤ੍ਥ ਹਿ ਛਸੁ ਸੋਮਨਸ੍ਸਸਹਗਤੇਸੁ ਸਦ੍ਧਿਨ੍ਦ੍ਰਿਯਾਦੀਨਿ ਛ ਸੋਮਨਸ੍ਸਿਨ੍ਦ੍ਰਿਯੇਨ ਸਦ੍ਧਿਂ ਸਤ੍ਤ, ਇਤਰੇਸੁ ਛਸੁ ਉਪੇਕ੍ਖਿਨ੍ਦ੍ਰਿਯੇਨ ਸਦ੍ਧਿਂ ਸਤ੍ਤ ਹੋਨ੍ਤਿ. ਏਕੇਨੂਨੇਸੁ…ਪੇ… ਮਨੇਸੁ ਚਾਤਿ ਦ੍ਵਾਦਸ ਞਾਣਸਮ੍ਪਯੁਤ੍ਤਾਨਿ ਕਾਮਾਵਚਰਾਨਿ, ਸਤ੍ਤਵੀਸਤਿ ਲੋਕਿਯਜ੍ਝਾਨਚਿਤ੍ਤਾਨਿ ਚਾਤਿ ਏਕੂਨਚਤ੍ਤਾਲੀਸਵਿਧੇਸੁ ਲੋਕਿਯਚਿਤ੍ਤੇਸੁ ਪੁਰਿਮਾਨਿ ਸਤ੍ਤ, ਪਞ੍ਞਿਨ੍ਦ੍ਰਿਯਞ੍ਚਾਤਿ ਅਟ੍ਠੇਵ ਇਨ੍ਦ੍ਰਿਯਾਨਿ. ਏਤ੍ਥ ਹਿ ਸੋਮਨਸ੍ਸਸਹਗਤੇਸੁ ਛਸੁ ਕਾਮਾਵਚਰੇਸੁ, ਦ੍ਵਾਦਸਸੁ ਰੂਪਾਵਚਰਚਤੁਕ੍ਕਜ੍ਝਾਨੇਸੁ ਚਾਤਿ ਅਟ੍ਠਾਰਸਚਿਤ੍ਤੇਸੁ ਸੋਮਨਸ੍ਸਿਨ੍ਦ੍ਰਿਯੇਨ, ਸੇਸੇਸੁ ਚ ਉਪੇਕ੍ਖਿਨ੍ਦ੍ਰਿਯੇਨ ਸਦ੍ਧਿਂ ਯੋਜੇਤ੍ਵਾ ਅਟ੍ਠਿਨ੍ਦ੍ਰਿਯਾਨਿ ਵੇਦਿਤਬ੍ਬਾਨਿ.

੧੧੯. ਚਤ੍ਤਾਲੀਸਾਯ ਚਿਤ੍ਤੇਸੁ ਨਵਕਨ੍ਤਿ ਸਮਚਤ੍ਤਾਲੀਸਵਿਧੇਸੁ ਲੋਕੁਤ੍ਤਰਚਿਤ੍ਤੇਸੁ ਪੁਰਿਮਾਨਿ ਅਟ੍ਠਇਨ੍ਦ੍ਰਿਯਾਨਿ, ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਂ ਅਞ੍ਞਿਨ੍ਦ੍ਰਿਯਂ ਅਞ੍ਞਾਤਾਵਿਨ੍ਦ੍ਰਿਯਨ੍ਤਿ ਇਮੇਸੁ ਲਬ੍ਭਮਾਨਮੇਕਨ੍ਤਿ ਇਨ੍ਦ੍ਰਿਯਾਨਂ ਨਵਕਾ. ਸੋਤਾਪਤ੍ਤਿਮਗ੍ਗੇਸੁ ਹਿ ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਂ ਲਬ੍ਭਤਿ. ਸੋਤਾਪਤ੍ਤਿਫਲਤੋ ਪਟ੍ਠਾਯ ਅਰਹਤ੍ਤਮਗ੍ਗਪਰਿਯੋਸਾਨੇਸੁ ਤਂ ਨ ਲਬ੍ਭਤਿ. ਤਸ੍ਸ ਠਾਨੇ ਅਞ੍ਞਿਨ੍ਦ੍ਰਿਯਂ. ਅਰਹਤ੍ਤਫਲੇ ਤਮ੍ਪਿ ਨ ਲਬ੍ਭਤਿ. ਤਸ੍ਸ ਠਾਨੇ ਅਞ੍ਞਾਤਾਵਿਨ੍ਦ੍ਰਿਯਂ ਤਿਟ੍ਠਤੀਤਿ. ਏਵਨ੍ਤਿ ਛਹਿ ਇਨ੍ਦ੍ਰਿਯੇਹਿ ਸਮ੍ਪਯੁਤ੍ਤਸ੍ਸ ਅਭਾਵਤੋ ਕਤ੍ਥਚਿ ਤੀਣਿ, ਕਤ੍ਥਚਿ ਚਤ੍ਤਾਰਿ, ਕਤ੍ਥਚਿ ਪਞ੍ਚ, ਕਤ੍ਥਚਿ ਸਤ੍ਤ, ਕਤ੍ਥਚਿ ਅਟ੍ਠ, ਕਤ੍ਥਚਿ ਨਵਿਨ੍ਦ੍ਰਿਯਾਨੀਤਿ ਏਵਂ ਛਹਿ ਆਕਾਰੇਹਿ ਇਨ੍ਦ੍ਰਿਯਯੋਗੋਪਿ, ਨ ਕੇਵਲਂ ਝਾਨਙ੍ਗਯੋਗੋਵ, ਅਥ ਖੋ ਇਨ੍ਦ੍ਰਿਯੇਹਿ ਸਹ ਚਿਤ੍ਤੁਪ੍ਪਾਦਾਨਂ ਸਮ੍ਪਯੋਗੋਪਿ ਵੇਦਿਤਬ੍ਬੋਤਿ.

੧੨੦-੩. ਇਦਾਨਿ ਮਗ੍ਗਙ੍ਗਸਮ੍ਪਯੋਗਂ ਦਸ੍ਸੇਨ੍ਤੋ ਪਠਮਂ ਤਾਵ ਯੇਸੁ ਚਿਤ੍ਤੇਸੁ ਮਗ੍ਗਙ੍ਗਾਨਿ ਨ ਲਬ੍ਭਨ੍ਤਿ, ਤਾਨਿ ਦਸ੍ਸੇਤ੍ਵਾ ਪਚ੍ਛਾ ਮਗ੍ਗਙ੍ਗਯੋਗਚਿਤ੍ਤੁਪ੍ਪਾਦੇ ਦਸ੍ਸੇਤੁਂ ‘‘ਅਮਗ੍ਗਙ੍ਗਾਨੀ’’ਤਿਆਦਿਮਾਹ. ਏਤ੍ਥਾਤਿ ਏਤਸ੍ਮਿਂ ਏਕਵੀਸਸਤਪ੍ਪਭੇਦੇ ਚਿਤ੍ਤਸ੍ਮਿਂ, ਇਮਸ੍ਮਿਂ ਮਗ੍ਗਙ੍ਗਾਧਿਕਾਰੇ ਵਾ. ਵਿਞ੍ਞਾਣੇਸੁ ਦ੍ਵਿਪਞ੍ਚਸੂਤਿ ਸਭਾਵਾਵਿਤਕ੍ਕੇਸੁ ਚਕ੍ਖਾਦੀਸੁ ਦ੍ਵਿਪਞ੍ਚਵਿਞ੍ਞਾਣੇਸੁ. ਕਿਞ੍ਚਾਪਿ ਹੇਟ੍ਠਾ ਦ੍ਵਿਪਞ੍ਚਵਿਞ੍ਞਾਣੇਸੁ ਝਾਨਙ੍ਗਾਭਾਵੋ, ਅਹੇਤੁਕੇਸੁ ਚ ਮਗ੍ਗਙ੍ਗਾਭਾਵੋ ਵੁਤ੍ਤੋਵ, ਅਝਾਨਙ੍ਗਾਨਿ ਪਨ ਤਤ੍ਥ ਅਧਿਕਾਰਵਸੇਨ ਵੁਤ੍ਤਾਨਿ, ਇਧ ਪਸਙ੍ਗਾਗਤਵਸੇਨ. ਅਮਗ੍ਗਙ੍ਗਾਨਿ ਤਤ੍ਥ ਪਸਙ੍ਗਾਗਤਵਸੇਨ, ਇਧ ਅਧਿਕਾਰਵਸੇਨਾਤਿ ਨ ਕੋਚਿ ਪੁਨਰੁਤ੍ਤਿਦੋਸੋ.

ਏਕਨ੍ਤਿ ਵਿਚਿਕਿਚ੍ਛਾਸਮ੍ਪਯੁਤ੍ਤਂ ਚਿਤ੍ਤਂ. ਤਞ੍ਹਿ ਮਿਚ੍ਛਾਸਙ੍ਕਪ੍ਪਮਿਚ੍ਛਾਵਾਯਾਮਯੋਗਤੋ ਦ੍ਵੇ ਮਗ੍ਗਙ੍ਗਾਨਿ ਏਤ੍ਥਾਤਿ ਦੁਮਗ੍ਗਙ੍ਗਂ. ਤਿਮਗ੍ਗਙ੍ਗਾਨਿ ਸਤ੍ਤਸੂਤਿ ਚਤ੍ਤਾਰਿ ਦਿਟ੍ਠਿਵਿਪ੍ਪਯੁਤ੍ਤਾਨਿ, ਦ੍ਵੇ ਦੋਸਮੂਲਾਨਿ, ਉਦ੍ਧਚ੍ਚਸਹਗਤਚਿਤ੍ਤਨ੍ਤਿ ਸਤ੍ਤਸੁ ਮਿਚ੍ਛਾਸਙ੍ਕਪ੍ਪਮਿਚ੍ਛਾਵਾਯਾਮਮਿਚ੍ਛਾਸਮਾਧਿਯੋਗਤੋ ਤਿਮਗ੍ਗਙ੍ਗਾਨਿ. ਚਤ੍ਤਾਲੀਸ…ਪੇ… ਚਤੁਰਙ੍ਗਿਕੋਤਿ ਦ੍ਵਾਦਸ ਞਾਣਵਿਪ੍ਪਯੁਤ੍ਤਾਨਿ, ਚਤ੍ਤਾਰਿ ਦਿਟ੍ਠਿਸਮ੍ਪਯੁਤ੍ਤਾਨਿ, ਪਠਮਜ੍ਝਾਨਿਕਵਜ੍ਜਾਨਿ ਚਤੁਵੀਸਤਿ ਮਹਗ੍ਗਤਚਿਤ੍ਤਾਨੀਤਿ ਚਤ੍ਤਾਲੀਸਚਿਤ੍ਤੇਸੁ ਯੋ ਮਗ੍ਗੋ ਲਬ੍ਭਤਿ, ਸੋ ਯਥਾਯੋਗਂ ਸਮ੍ਮਾਸਙ੍ਕਪ੍ਪਸਮ੍ਮਾਵਾਯਾਮਸਮ੍ਮਾਸਤਿਸਮ੍ਮਾਸਮਾਧਿਯੋਗਤੋ, ਮਿਚ੍ਛਾਦਿਟ੍ਠਿਮਿਚ੍ਛਾਸਙ੍ਕਪ੍ਪਮਿਚ੍ਛਾਵਾਯਾਮਮਿਚ੍ਛਾਸਮਾਧਿਯੋਗਤੋ, ਸਮ੍ਮਾਦਿਟ੍ਠਿਸਮ੍ਮਾਵਾਯਾਮਸਮ੍ਮਾਸਤਿਸਮ੍ਮਾਸਮਾਧਿਯੋਗਤੋ ਚ ਚਤੁਰਙ੍ਗਿਕੋ ਮਤੋ. ਤਤ੍ਥ ਞਾਣਵਿਪ੍ਪਯੁਤ੍ਤੇਸੁ ਦ੍ਵਾਦਸਸੁ ਪਠਮਾਨਿ ਚਤ੍ਤਾਰਿ, ਦਿਟ੍ਠਿਸਮ੍ਪਯੁਤ੍ਤੇਸੁ ਮਜ੍ਝਿਮਾਨਿ, ਸੇਸੇਸੁ ਪਚ੍ਛਿਮਾਨਿ ਲਬ੍ਭਨ੍ਤਿ.

ਪਞ੍ਚਦ੍ਦਸਸੁ…ਪੇ… ਪਞ੍ਚਙ੍ਗਿਕੋਤਿ ਦ੍ਵਾਦਸਸੁ ਞਾਣਸਮ੍ਪਯੁਤ੍ਤਕਾਮਾਵਚਰੇਸੁ ਚੇਵ ਤੀਸੁ ਲੋਕਿਯਪਠਮਜ੍ਝਾਨਿਕੇਸੁ ਚਾਤਿ ਪਨ੍ਨਰਸਸੁ ਚਿਤ੍ਤੇਸੁ ਸਮ੍ਮਾਦਿਟ੍ਠਿਸਮ੍ਮਾਸਙ੍ਕਪ੍ਪਸਮ੍ਮਾਵਾਯਾਮਸਮ੍ਮਾਸਤਿਸਮ੍ਮਾਸਮਾਧਿਵਸੇਨ ਪਞ੍ਚਙ੍ਗਿਕੋ ਮਗ੍ਗੋ. ਨਨੁ ਚ ਸਮ੍ਮਾਵਾਚਾਦਯੋ ਕਾਮਾਵਚਰੇਸੁ ਲਬ੍ਭਨ੍ਤੀਤਿ? ਸਚ੍ਚਂ ਲਬ੍ਭਨ੍ਤਿ, ਪਾਠੇ ਪਨ ਅਨਾਗਤਤ੍ਤਾ ਇਧ ਪਰਿਚ੍ਚਤ੍ਤਾਤਿ. ਦ੍ਵਤ੍ਤਿਂਸਚਿਤ੍ਤੇਸੂਤਿ ਪਠਮਜ੍ਝਾਨਿਕਵਜ੍ਜੇਸੁ ਦ੍ਵਤ੍ਤਿਂਸਲੋਕੁਤ੍ਤਰਚਿਤ੍ਤੇਸੁ. ਸਤ੍ਤਙ੍ਗਿਕੋਤਿ ਅਵਿਤਕ੍ਕਤ੍ਤਾ ਸਮ੍ਮਾਸਙ੍ਕਪ੍ਪੋ ਨ ਲਬ੍ਭਤੀਤਿ ਤਂ ਪਰਿਚ੍ਚਜਿਤ੍ਵਾ ਅਵਸੇਸਸਤ੍ਤਮਗ੍ਗਙ੍ਗਵਸੇਨ ਸਤ੍ਤਙ੍ਗਿਕੋ ਵੁਤ੍ਤੋ.

ਯਤ੍ਥ ਪਨ ਸਮ੍ਮਾਸਙ੍ਕਪ੍ਪੋ ਲਬ੍ਭਤਿ, ਤਤ੍ਥ ਤੇਨ ਸਹ ਅਟ੍ਠਙ੍ਗਿਕੋਤਿ ਆਹ ‘‘ਮਗ੍ਗੋ ਅਟ੍ਠਸੂ’’ਤਿਆਦਿ. ਤਤ੍ਥ ਅਟ੍ਠਸੁ ਚਿਤ੍ਤੇਸੂਤਿ ਪਠਮਜ੍ਝਾਨਿਕੇਸੁ ਅਟ੍ਠਸੁ ਲੋਕੁਤ੍ਤਰਚਿਤ੍ਤੇਸੁ. ਏਵਨ੍ਤਿ ਛਹਿ ਮਗ੍ਗਙ੍ਗੇਹਿ ਸਮ੍ਪਯੁਤ੍ਤਸ੍ਸ ਅਭਾਵਤੋ ਕਤ੍ਥਚਿ ਦ੍ਵੇ ਮਗ੍ਗਙ੍ਗਾਨਿ, ਕਤ੍ਥਚਿ ਤੀਣਿ, ਕਤ੍ਥਚਿ ਚਤ੍ਤਾਰਿ, ਕਤ੍ਥਚਿ ਪਞ੍ਚ, ਕਤ੍ਥਚਿ ਸਤ੍ਤ, ਕਤ੍ਥਚਿ ਅਟ੍ਠਾਤਿ ਏਵਂ ਛਹਿ ਪਕਾਰੇਹਿ.

੧੨੪-੬. ਇਦਾਨਿ ਬਲਸਮ੍ਪਯੋਗਂ ਦਸ੍ਸੇਨ੍ਤੋ ਆਹ ‘‘ਬਲਾਨਿ ਦ੍ਵੇ’’ਤਿਆਦਿ. ਤਤ੍ਥ ਵੀਰਿਯਬਲਸਮਾਧਿਬਲਵਸੇਨ ਦ੍ਵੇ ਬਲਾਨਿ ਕਿਰਿਯਾਹੇਤੁਕਮਨੋਵਿਞ੍ਞਾਣਧਾਤੁਦ੍ਵਯੇ ਵਿਭਙ੍ਗਵਾਰੇ ਆਗਤਾਨਿ ਵੀਰਿਯਬਲਸਮਾਧਿਬਲਾਨਿ ਪਚ੍ਚੇਕਂ ਲਬ੍ਭਨ੍ਤੀਤਿ ‘‘ਦ੍ਵੇ ਦ੍ਵਿਚਿਤ੍ਤੇਸੂ’’ਤਿ ਵੁਤ੍ਤਂ. ਏਕਸ੍ਮਿਂ ਤੀਣੀਤਿ ਏਕਸ੍ਮਿਂ ਵਿਚਿਕਿਚ੍ਛਾਸਹਗਤੇ ਵੀਰਿਯਬਲਅਹਿਰਿਕਬਲਅਨੋਤ੍ਤਪ੍ਪਬਲਵਸੇਨ ਤੀਣਿ ਬਲਾਨਿ. ਏਕਾਦਸਸੁ ਚਤ੍ਤਾਰੀਤਿ ਵਿਚਿਕਿਚ੍ਛਾਸਹਗਤਵਜ੍ਜੇਸੁ ਏਕਾਦਸਸੁ ਅਕੁਸਲਚਿਤ੍ਤੇਸੁ ਸਮਾਧਿਬਲਞ੍ਚੇਵ ਪੁਬ੍ਬੇ ਵੁਤ੍ਤਾਨਿ ਤੀਣੀਤਿ ਚਤ੍ਤਾਰਿਬਲਾਨਿ. ਛ ਦ੍ਵਾਦਸਸੂਤਿ ਦ੍ਵਾਦਸਸੁ ਞਾਣਵਿਪ੍ਪਯੁਤ੍ਤਚਿਤ੍ਤੇਸੁ ਸਦ੍ਧਾਵੀਰਿਯਸਤਿਸਮਾਧਿਹਿਰਿਓਤ੍ਤਪ੍ਪਵਸੇਨ ਛ ਬਲਾਨਿ.

ਏਕੂਨਾਸੀਤਿਯਾ ਸਤ੍ਤਾਤਿ ਦ੍ਵਾਦਸਸੁ ਞਾਣਸਮ੍ਪਯੁਤ੍ਤਕਾਮਾਵਚਰਚਿਤ੍ਤੇਸੁ ਚੇਵ ਸਤ੍ਤਵੀਸਤਿਮਹਗ੍ਗਤਚਿਤ੍ਤੇਸੁ ਚ ਚਤ੍ਤਾਲੀਸਾਯ ਲੋਕੁਤ੍ਤਰਚਿਤ੍ਤੇਸੁ ਚਾਤਿ ਏਕੂਨਾਸੀਤਿਵਿਧੇਸੁ ਚਿਤ੍ਤੇਸੁ ਸਦ੍ਧਾਵੀਰਿਯਸਤਿਸਮਾਧਿਪਞ੍ਞਾਹਿਰਿਓਤ੍ਤਪ੍ਪਵਸੇਨ ਸਤ੍ਤ ਬਲਾਨਿ. ਸੋਲ਼ਸੇਵਾਬਲਾਨੀਤਿ ਪਞ੍ਚਦਸ ਅਹੇਤੁਕਵਿਪਾਕਾਨਿ, ਕਿਰਿਯਾਮਨੋਧਾਤੁਆਵਜ੍ਜਨਞ੍ਚਾਤਿ ਸੋਲ਼ਸ ਬਲਵਿਪ੍ਪਯੋਗਤੋ ਅਬਲਚਿਤ੍ਤਾਨਿ. ਏਵਨ੍ਤਿ ਪਞ੍ਚਹਿ ਬਲੇਹਿ ਸਮ੍ਪਯੁਤ੍ਤਸ੍ਸ ਅਭਾਵਤੋ ਕਤ੍ਥਚਿ ਦ੍ਵੇ, ਕਤ੍ਥਚਿ ਤੀਣਿ, ਕਤ੍ਥਚਿ ਚਤ੍ਤਾਰਿ, ਕਤ੍ਥਚਿ ਛ, ਕਤ੍ਥਚਿ ਸਤ੍ਤਾਤਿ ਪਞ੍ਚਹਿ ਆਕਾਰੇਹਿ ਸਬਲਂ, ਇਮੇਸੁ ਏਕਸ੍ਸਾਪਿ ਅਭਾਵਤੋ ਅਬਲਮ੍ਪਿ ਚ ਵਿਞ੍ਞੇਯ੍ਯਂ, ਵਿਜਾਨਿਤਬ੍ਬਨ੍ਤਿ ਅਤ੍ਥੋ. ਹੇਤੁਰਾਸਿਆਦਯੋ ਵਿਨਿਚ੍ਛਯਭਾਵਤੋ ਨ ਵੁਤ੍ਤਾਤਿ ਵੇਦਿਤਬ੍ਬਂ. ਯੇਸੁ ਚਿਤ੍ਤੇਸੁ ਯਾਨਿ ਝਾਨਙ੍ਗਮਗ੍ਗਙ੍ਗਬਲਿਨ੍ਦ੍ਰਿਯਾਨਿ ਜਾਯਨ੍ਤੀਤਿ ਸਮ੍ਬਨ੍ਧੋ. ਗਾਥਾਬਨ੍ਧਸੁਖਤ੍ਥਂ ਇਨ੍ਦ੍ਰਿਯਾਨਂ ਓਸਾਨਕਰਣਂ.

ਇਤਿ ਅਭਿਧਮ੍ਮਤ੍ਥਵਿਕਾਸਿਨਿਯਾ ਨਾਮ

ਅਭਿਧਮ੍ਮਾਵਤਾਰਸਂਵਣ੍ਣਨਾਯ

ਚੇਤਸਿਕਵਿਭਾਗਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.