ਨਿਗਮਨਕਥਾਵਣ੍ਣਨਾ

੧੪੦੧. ਸੁਮਤਿਮਤਿਵਿਚਾਰਬੋਧਨੋਤਿ ਸੁਮਤੀਨਂ ਸੁਨ੍ਦਰਪਞ੍ਞਾਨਂ ਕਵੀਨਂ ਮਤਿਯਾ ਵਿਚਾਰਸ੍ਸ ਬੋਧਨੋ. ਵਿਮਤਿਵਿਮੋਹਵਿਨਾਸਨੋਤਿ ਵਿਮਤੀਨਂ ਬਾਲਾਨਂ ਵਿਮੋਹਸ੍ਸ ਵਿਨਾਸਨੋ. ਕੁਮਤਿਮਤਿਮਹਾਤਮੋਨਾਸੋਤਿ ਕੁਮਤੀਨਂ ਬਾਲਾਨਂ ਮਹਾਤਮਸਨ੍ਨਿਭਾਯ ਮਤਿਯਾ ਨਾਸਕੋ. ਪਟੁਮਤਿਭਾਸਕਰੋਤਿ ਪਟੂਨਂ ਪਣ੍ਡਿਤਾਨਂ ਤਿਕ੍ਖਪਞ੍ਞਾਯ ਓਭਾਸਕਰੋ.

੧੪੦੨. ਸੁਮਤਿਨਾਮਕੋ ਭਿਕ੍ਖੁ ਅਸਮਾਨਤੋ ਅਸਦਿਸਾਯ ਪੂਜਾਯ ਮਮ ਆਯਾਚਿਤੋ ਯਤੋ ਯਸ੍ਮਾ ਕਾਰਣਾ, ਤਤੋ ਤਸ੍ਮਾ ਕਾਰਣਾ ਅਯਂ ਅਭਿਧਮ੍ਮਾਵਤਾਰੋ. ਪਦਾਤੋ ਪਦਾਤਿ ਕੋਟ੍ਠਾਸਤੋ ਕੋਟ੍ਠਾਸਤੋ. ਹਿਤਵਿਭਾਵਨਾ ਭਾਵਨਾਤਿ ਹਿਤਪ੍ਪਕਾਸਨਾਯ ਭਾਵਨਾਯ ਮਯਾ ਰਚਿਤੋ. ਅਥ ਵਾ ਅਹਂ ਸੁਮਤਿਨਾ ਭਿਕ੍ਖੁਨਾ ਅਸਮਾਨਤੋ ਮਾਨਤੋ ਆਯਾਚਿਤੋ ਯਤੋ ਯਸ੍ਮਾ, ਤਤੋ ਤਸ੍ਮਾ.

੧੪੦੫. ਤਿਵਿਧਾ ਬ੍ਯਪ੍ਪਥਾਨਞ੍ਹਿ ਗਤਿਯੋਤਿ ਬ੍ਯਪ੍ਪਥਾਨਂ ਵਚਨਾਨਂ ਅਤ੍ਥਗਨ੍ਥਯੁਤ੍ਤਿਵਸੇਨ ਤਿਵਿਧਾ ਗਤਿਯੋ.

੧੪੦੬. ਨਿਕਾਯਨ੍ਤਰਲਦ੍ਧੀਹੀਤਿ ਅਞ੍ਞਸ੍ਮਿਂ ਨਿਕਾਯੇ ਲਦ੍ਧੀਹਿ. ਵਾਚਨਾਮਗ੍ਗਨਿਸ੍ਸਿਤੋਤਿ ਵਚਨਪ੍ਪਬਨ੍ਧਨਿਸ੍ਸਿਤੋ.

੧੪੧੦. ਅਸਂਕਿਣ੍ਣਕੁਲਾਕੁਲੇਤਿ ਅਸਮ੍ਮਿਸ੍ਸਕੁਲੇਹਿ ਆਕਿਣ੍ਣੇ. ਸੁਪਸਨ੍ਨਸਿਤੋਦਕੇਤਿ ਮਧੁਰਸੀਤੋਦਕੇ.

੧੪੧੧. ਸਙ੍ਕਟੇਤਿ ਸਮ੍ਬਾਧੇ.

੧੪੧੨. ਕੇਲਾਸਸਿਖਰਾਕਾਰਪਾਸਾਦਪਟਿਮਣ੍ਡਿਤੇਤਿ ਰਜਤਪਬ੍ਬਤਮਤ੍ਥਕਨਿਭੇਹਿ ਪਾਸਾਦੇਹਿ ਅਲਙ੍ਕਤੇ.

੧੪੧੩. ਵਿਵਿਧਾਕਾਰਚਾਰੁਪਾਕਾਰਗੋਪੁਰੇਤਿ ਵਿਵਿਧਸਣ੍ਠਾਨਮਨੁਞ੍ਞਪਾਕਾਰਦ੍ਵਾਰਕੋਟ੍ਠਕੇ.

੧੪੧੪. ਸਲ੍ਲੇਖਾਤਿ ਸਲ੍ਲੇਖਵੁਤ੍ਤਿ. ਸਾਖਲ੍ਯੇਤਿ ਸਖਿਲਭਾਵੇ. ਸਤਾਤਿ ਸਤਿਸਮ੍ਪਨ੍ਨੇਨ.

੧੪੧੫. ਵਸ੍ਸਵਲਾਹਕਾ ਦੇਵਾਤਿ ਵਸ੍ਸਵਲਾਹਕਭੂਤਾ ਦੇਵਾ ਅਮਰਾ.

ਨਿਗਮਨਕਥਾਵਣ੍ਣਨਾ ਨਿਟ੍ਠਿਤਾ.

ਅਭਿਧਮ੍ਮਾਵਤਾਰਪੁਰਾਣਟੀਕਾ ਨਿਟ੍ਠਿਤਾ.

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਅਭਿਧਮ੍ਮਾਵਤਾਰ-ਅਭਿਨਵਟੀਕਾ

(ਪਠਮੋ ਭਾਗੋ)

ਗਨ੍ਥਾਰਮ੍ਭਕਥਾ

(ਕ) ਵਿਸੁਦ੍ਧਕਰੁਣਾਞਾਣਂ, ਬੁਦ੍ਧਂ ਸਮ੍ਬੁਦ੍ਧਪੂਜਿਤਂ;

ਧਮ੍ਮਂ ਸਦ੍ਧਮ੍ਮਸਮ੍ਭੂਤਂ, ਵਨ੍ਦੇ ਸਂਘਂ ਨਿਰਙ੍ਗਣਂ.

(ਖ) ਸਾਰਿਪੁਤ੍ਤਂ ਮਹਾਥੇਰਂ, ਪਰਿਯਤ੍ਤਿਵਿਸਾਰਦਂ;

ਨਮਾਮਿ ਸਨ੍ਤਵੁਤ੍ਤਿਂ ਮੇ, ਗੁਰੁਂ ਗਾਰਵਭਾਜਨਂ.

(ਗ) ਵਨ੍ਦਨ੍ਤੇਨ ਮਯਾ ਏਵਂ,

ਯਾ ਲਦ੍ਧਾ ਪੁਞ੍ਞਸਮ੍ਪਦਾ;

ਹਿਤ੍ਵਾ ਤਸ੍ਸਾਨੁਭਾਵੇਨ,

ਅਨ੍ਤਰਾਯੇ ਅਸੇਸਤੋ.

(ਘ) ਮਹਾਵਿਹਾਰਵਾਸੀਨਂ, ਥੇਰਾਨਂ ਥਿਰਸੀਲਿਨਂ;

ਵਂਸਾਲਙ੍ਕਾਰਭੂਤੇਨ, ਭੂਤਾਨੁਗ੍ਗਹਕਾਰਿਨਾ.

(ਙ) ਥੇਰੇਨ ਬੁਦ੍ਧਦਤ੍ਤੇਨ, ਰਚਿਤਂ ਯਂ ਮਨੋਰਮਂ;

ਪਿਟਕੇ ਅਭਿਧਮ੍ਮਸ੍ਮਿਂ, ਓਤਾਰੁਪਾਯਭਾਵਤੋ.

(ਚ) ਅਭਿਧਮ੍ਮਾਵਤਾਰੋਤਿ, ਲਦ੍ਧਨਾਮੇਨ ਵਿਸ੍ਸੁਤਂ;

ਨਾਨਾਨਿਪੁਣਗਮ੍ਭੀਰਨਯਂ ਪਕਰਣੁਤ੍ਤਮਂ.

(ਛ) ਅਤ੍ਥਸਂਵਣ੍ਣਨਂ ਤਸ੍ਸ, ਆਰਭਿਸ੍ਸਂ ਯਥਾਬਲਂ;

ਪਾਮੋਜ੍ਜਜਨਨਤ੍ਥਾਯ, ਆਭਿਧਮ੍ਮਿਕਭਿਕ੍ਖੁਨਨ੍ਤਿ.