੬. ਯਮਕਮਾਤਿਕਾ

ਮੂਲਯਮਕਮਾਤਿਕਤ੍ਥਵਣ੍ਣਨਾ

ਇਦਾਨਿ ਯਮਕਮਾਤਿਕਾਯ ਸਂਵਣ੍ਣਨਾਨਯੋ ਹੋਤਿ. ਸਾ ਪਨੇਸਾ ਮੂਲਯਮਕਮਾਤਿਕਾ ਖਨ੍ਧਆਯਤਨਧਾਤੁਸਚ੍ਚਸਙ੍ਖਾਰਅਨੁਸਯਚਿਤ੍ਤਧਮ੍ਮਇਨ੍ਦ੍ਰਿਯਯਮਕਮਾਤਿਕਾਤਿ ਦਸਵਿਧਾ ਹੋਤਿ. ਕੇਨਟ੍ਠੇਨ ਚੇਤ੍ਥ ਯਮਕਨ੍ਤਿ? ਯੁਗਲ਼ਟ੍ਠੇਨ. ਯੁਗਲ਼ਂ ਹਿ ‘‘ਯਮਕਪਾਟਿਹਾਰਿਯਂ’’, ‘‘ਯਮਕਸਾਲਾ’’ਤਿਆਦੀਸੁ ‘‘ਯਮਕ’’ਨ੍ਤਿ ਵੁਚ੍ਚਤਿ, ਇਤਿ ਯੁਗਲ਼ਸਙ੍ਖਾਤਾਨਂ ਯਮਕਾਨਂ ਵਸੇਨ ਦੇਸਿਤਤ੍ਤਾ ਇਮੇਸੁ ਦਸਸੁ ਏਕੇਕਮ੍ਪਿ, ਏਤੇਸਂ ਵਿਭਜਨਤ੍ਤਾ ਨਿਦ੍ਦੇਸੋਪਿ, ਸਬ੍ਬੇਸਂ ਸਮੂਹਤ੍ਤਾ ਪਕਰਣਮ੍ਪਿ ਯਮਕਂ ਨਾਮ. ਇਧ ਪਨੇਤਾ ਨਿਦ੍ਦੇਸਯਮਕਂ ਉਪਾਦਾਯ ‘‘ਯਮਕਮਾਤਿਕਾ’’ਤ੍ਵੇਵ ਵੁਤ੍ਤਾ, ਤਾਸਂ ਪਨ ਦਸਨ੍ਨਂ ਯਮਕਮਾਤਿਕਾਨਂ ਮੂਲਯਮਕਮਾਤਿਕਾ ਆਦਿ. ਤਤ੍ਥਾਪਿ ‘‘ਯੇ ਕੇਚਿ ਕੁਸਲਾ ਧਮ੍ਮਾ, ਸਬ੍ਬੇ ਤੇ ਕੁਸਲਮੂਲਾ. ਯੇ ਵਾ ਪਨ ਕੁਸਲਮੂਲਾ, ਸਬ੍ਬੇ ਤੇ ਧਮ੍ਮਾ ਕੁਸਲਾ’’ਤਿ ਇਦਂ ਯਮਕਂ ਆਦਿ. ਤਸ੍ਸ ਕੁਸਲਮੂਲਸਙ੍ਖਾਤਾਨਂ ਦ੍ਵਿਨ੍ਨਂ ਅਤ੍ਥਾਨਂ ਵਸੇਨ ਅਤ੍ਥਯਮਕਨ੍ਤਿ ਵਾ, ਤੇਸਞ੍ਞੇਵ ਅਤ੍ਥਾਨਂ ਅਨੁਲੋਮਤੋ ਪਟਿਲੋਮਤੋ ਪਵਤ੍ਤਪਾਲ਼ਿਧਮ੍ਮਵਸੇਨ ਧਮ੍ਮਯਮਕਨ੍ਤਿ ਵਾ, ਅਨੁਲੋਮਪਟਿਲੋਮਤੋ ਪਵਤ੍ਤਪੁਚ੍ਛਾਵਸੇਨ ਪੁਚ੍ਛਾਯਮਕਨ੍ਤਿ ਵਾ ਤਿਧਾ ਯਮਕਭਾਵੋ ਵੇਦਿਤਬ੍ਬੋ. ਸੇਸੇਸੁਪਿ ਏਸੇਵ ਨਯੋ.

ਇਦਾਨਿ ਇਮੇਸਂ ਯਮਕਾਨਂ ਵਸੇਨ ਦੇਸਿਤਾਯ ਇਮਿਸ੍ਸਾ ਮੂਲਯਮਕਮਾਤਿਕਾਯ ਤਾਵ ਨਯਯਮਕਪੁਚ੍ਛਾਅਤ੍ਥਵਾਰਪ੍ਪਭੇਦਵਸੇਨ ਪਾਲ਼ਿਵਵਤ੍ਥਾਨਂ ਏਵਂ ਵੇਦਿਤਬ੍ਬਂ – ਕੁਸਲਤ੍ਤਿਕਮਾਤਿਕਾਯ ਹਿ ‘‘ਕੁਸਲਾ ਧਮ੍ਮਾ’’ਤਿ ਇਦਂ ਆਦਿਪਦਂ ਨਿਸ੍ਸਾਯ ਮੂਲਨਯੋ ਮੂਲਮੂਲਨਯੋ ਮੂਲਕਨਯੋ ਮੂਲਮੂਲਕਨਯੋਤਿ ਇਮੇ ਚਤ੍ਤਾਰੋ ਨਯਾ ਹੋਨ੍ਤਿ. ਤੇਸੁ ਏਕੇਕਸ੍ਮਿਂ ਨਯੇ ਮੂਲਯਮਕਂ ਏਕਮੂਲਯਮਕਂ ਅਞ੍ਞਮਞ੍ਞਮੂਲਯਮਕਨ੍ਤਿ ਤੀਣਿ ਤੀਣਿ ਯਮਕਾਨੀਤਿ ਦ੍ਵਾਦਸ ਯਮਕਾਨਿ. ਏਕੇਕਸ੍ਮਿਂ ਯਮਕੇ ਅਨੁਲੋਮਪਟਿਲੋਮਵਸੇਨ ਦ੍ਵੇ ਦ੍ਵੇ ਪੁਚ੍ਛਾਤਿ ਚਤੁਵੀਸਤਿ ਪੁਚ੍ਛਾ, ਏਕੇਕਪੁਚ੍ਛਾਯ ਸਨ੍ਨਿਟ੍ਠਾਨਸਂਸਯਵਸੇਨ ਦ੍ਵੇ ਦ੍ਵੇ ਅਤ੍ਥਾਤਿ ਅਟ੍ਠਚਤ੍ਤਾਲੀਸ ਅਤ੍ਥਾ.

ਤਤ੍ਥ ਯੇ ਕੇਚਿ ਕੁਸਲਾਤਿ ਕੁਸਲੇਸੁ ‘‘ਕੁਸਲਾ ਨੁ ਖੋ, ਨ ਕੁਸਲਾ ਨੁ ਖੋ’’ਤਿ ਸਨ੍ਦੇਹਾਭਾਵਤੋ ਇਮਸ੍ਮਿਂ ਪਦੇ ਸਨ੍ਨਿਟ੍ਠਾਨਤ੍ਥੋ ਵੇਦਿਤਬ੍ਬੋ. ਸਬ੍ਬੇ ਤੇ ਕੁਸਲਮੂਲਾਤਿ ‘‘ਸਬ੍ਬੇ ਤੇ ਕੁਸਲਾ ਧਮ੍ਮਾ ਕੁਸਲਮੂਲਾ ਨੁ ਖੋ, ਨ ਨੁ ਖੋ’’ਤਿ ਏਵਂ ਵਿਮਤਿਵਸੇਨ ਪੁਚ੍ਛਿਤਤ੍ਤਾ ਇਮਸ੍ਮਿਂ ਪਦੇ ਸਂਸਯਤ੍ਥੋ ਵੇਦਿਤਬ੍ਬੋ. ਸੋ ਚ ਖੋ ਵੇਨੇਯ੍ਯਾਨਂ ਸਂਸਯਟ੍ਠਾਨੇ ਸਂਸਯਂ ਦੀਪੇਤ੍ਵਾ ਤਂਵਿਨੋਦਨਤ੍ਥਂ ਭਗਵਤਾ ਵੁਤ੍ਤੋ, ਤਥਾਗਤਸ੍ਸ ਪਨ ਸਂਸਯਟ੍ਠਾਨਂ ਨਾਮ ਨਤ੍ਥਿ. ਇਤੋ ਪਰੇਸੁਪਿ ਪੁਚ੍ਛਾਪਦੇਸੁ ਏਸੇਵ ਨਯੋ. ਯਥਾ ਚ ਕੁਸਲਪਦਂ ਨਿਸ੍ਸਾਯ ਇਮੇ ਚਤੁਨਯਾਦਯੋ ਹੋਨ੍ਤਿ, ਅਕੁਸਲਪਦਂ ਨਿਸ੍ਸਾਯਪਿ ਤਥੇਵ, ਅਬ੍ਯਾਕਤਪਦਂ ਨਿਸ੍ਸਾਯਪਿ ਤਥੇਵ, ਕੁਸਲਾਦੀਨਿ ਤੀਣਿਪਿ ਪਦਾਨਿ ਏਕਤੋ ਕਤ੍ਵਾ ਨਿਦ੍ਦਿਟ੍ਠਂ ਨਾਮਪਦਂ ਨਿਸ੍ਸਾਯ ਤਥੇਵਾਤਿ ਕੁਸਲਤ੍ਤਿਕਮਾਤਿਕਾਯ ਚਤੂਸੁ ਪਦੇਸੁ ਸਬ੍ਬੇਪਿ ਸੋਲ਼ਸ ਨਯਾ, ਅਟ੍ਠਚਤ੍ਤਾਲੀਸ ਯਮਕਾਨਿ, ਛਨ੍ਨਵੁਤਿ ਪੁਚ੍ਛਾ, ਦ੍ਵਾਨਵੁਤਿਸਤਂ ਅਤ੍ਥਾ ਚ ਉਦ੍ਦੇਸਵਸੇਨ ਵੁਤ੍ਤਾਤਿ ਵੇਦਿਤਬ੍ਬਾ. ਏਤ੍ਤਾਵਤਾ ਮੂਲਵਾਰੋ ਹੇਤੁਵਾਰੋ ਨਿਦਾਨਵਾਰੋ ਸਮ੍ਭਵਵਾਰੋ ਪਭਵਵਾਰੋ ਸਮੁਟ੍ਠਾਨਵਾਰੋ ਆਹਾਰਵਾਰੋ ਆਰਮ੍ਮਣਵਾਰੋ ਪਚ੍ਚਯਵਾਰੋ ਸਮੁਦਯਵਾਰੋਤਿ ਸਬ੍ਬੇਪਿ ਦਸ ਵਾਰਾ ਹੋਨ੍ਤਿ. ਤਤ੍ਥ ਮੂਲਵਾਰੇ ਆਗਤਪਰਿਚ੍ਛੇਦੇਨੇਵ ਅਵਸੇਸੇਸੁਪਿ ਨਯਾਦਯੋ ਵੇਦਿਤਬ੍ਬਾ. ਪਾਲ਼ਿ ਪਨੇਤ੍ਥ ਅਤਿਸਂਖਿਤ੍ਤਾ. ਇਤਿ ਸਬ੍ਬੇਸੁਪਿ ਦਸਸੁ ਵਾਰੇਸੁ ਸਟ੍ਠਿਸਤਂ ਨਯਾ, ਅਸੀਤਿਅਧਿਕਾਨਿ ਚਤ੍ਤਾਰਿ ਯਮਕਸਤਾਨਿ, ਸਟ੍ਠਿਅਧਿਕਾਨਿ ਨਵ ਪੁਚ੍ਛਾਸਤਾਨਿ, ਵੀਸਾਧਿਕਾਨਿ ਏਕੂਨਵੀਸਤਿ ਅਤ੍ਥਸਤਾਨਿ ਚ ਉਦ੍ਦਿਟ੍ਠਾਨੀਤਿ ਵੇਦਿਤਬ੍ਬਾਨਿ.

ਏਵਮੇਤ੍ਥ ਨਯਯਮਕਪੁਚ੍ਛਾ ਅਤ੍ਥਵਾਰਪ੍ਪਭੇਦਵਸੇਨ ਪਾਲ਼ਿਵਵਤ੍ਥਾਨਂ ਵਿਦਿਤ੍ਵਾ ਇਦਾਨਿ ਤਸ੍ਸਾ ਅਨੁਤ੍ਤਾਨਪਦਤ੍ਥਾਨੁਸਾਰੇਨੇਵ ਵਿਭਙ੍ਗਨਯਸਹਿਤੋ ਸਙ੍ਖੇਪਤ੍ਥਵਣ੍ਣਨਾਨਯੋ ਏਵਂ ਵੇਦਿਤਬ੍ਬੋ – ਤਤ੍ਥ ਯੇ ਕੇਚੀਤਿ ਅਨਵਸੇਸਵਚਨਂ. ਕੁਸਲਾ ਧਮ੍ਮਾਤਿ ਅਨਵਜ੍ਜਸੁਖਵਿਪਾਕਾ ਨਿਸ੍ਸਤ੍ਤਸਭਾਵਾ. ਸਬ੍ਬੇ ਤੇ ਕੁਸਲਮੂਲਾਤਿ ਕਿਂ ਤੇ ਸਬ੍ਬੇਯੇਵ ਕੁਸਲਮੂਲਾ ਹੋਨ੍ਤੀਤਿ ਪੁਚ੍ਛਾ. ਇਮਾਨਿ ਪਨ ਵਿਸ੍ਸਜ੍ਜਨਮਾਤਿਕਾਯ ਨਤ੍ਥਿ. ਯਮਕਮਾਤਿਕਾਯ ਹਿ ਸਬ੍ਬਤ੍ਥ ਪੁਚ੍ਛਾਪਦਾਨੇਵ ਉਦ੍ਧਟਾਨਿ, ਨ ਵਿਸ੍ਸਜ੍ਜਨਾਨੀਤਿ. ਵਿਸ੍ਸਜ੍ਜਨਾਨਿ ਪਨ ਨਿਦ੍ਦੇਸੇਯੇਵ ਵੁਤ੍ਤਾਨਿ, ਤਸ੍ਮਾ ਸਬ੍ਬਤ੍ਥ ਨਿਦ੍ਦੇਸਨਯੇਨੇਵ ਵਿਸ੍ਸਜ੍ਜਨਮੁਖਂ ਦਸ੍ਸਯਿਸ੍ਸਾਮ. ਇਮਿਸ੍ਸਾਵ ‘‘ਯੇ ਕੇਚਿ ਕੁਸਲਾ ਧਮ੍ਮਾ, ਸਬ੍ਬੇ ਤੇ ਕੁਸਲਮੂਲਾ’’ਤਿ ਪੁਚ੍ਛਾਯ ਵਿਭਙ੍ਗਨਯੇਨ ਇਦਂ ਵਿਸ੍ਸਜ੍ਜਨਮੁਖਂ. ‘‘ਤੀਣੇਵ ਕੁਸਲਮੂਲਾਨਿ, ਅਵਸੇਸਾ ਕੁਸਲਾ ਧਮ੍ਮਾ ਨ ਕੁਸਲਮੂਲਾ’’ਤਿ ਤਸ੍ਸਾ ਚਾਯਮਤ੍ਥੋ – ਨ ਤੇ ਸਬ੍ਬੇ ਕੁਸਲਾ ਧਮ੍ਮਾ ਕੁਸਲਮੂਲਾਨਿ ਹੋਨ੍ਤਿ, ਅਲੋਭਾਦੀਨਿ ਪਨ ਤੀਣੇਵ ਕੁਸਲਮੂਲਾਨੀਤਿ. ਯੇ ਵਾ ਪਨ ਕੁਸਲਮੂਲਾ ਤਯੋ ਅਲੋਭਾਦਯੋ ਕੁਸਲਾਨਂ ਮੂਲਾਤਿ ਵੁਤ੍ਤਾ, ਸਬ੍ਬੇ ਤੇ ਕੁਸਲਾ ਧਮ੍ਮਾਤਿ ਕਿਂ ਤੇ ਸਬ੍ਬੇ ਤਯੋਪਿ ਧਮ੍ਮਾ ਕੁਸਲਾਤਿ ਪੁਚ੍ਛਾ. ਤਸ੍ਸਾ ਨਿਦ੍ਦੇਸੇ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ. ਤਸ੍ਸ ਤੇਸਂ ਤਿਣ੍ਣਂ ਮੂਲਾਨਂ ਕੁਸਲਭਾਵਮ੍ਪਿ ਸਮ੍ਪਟਿਚ੍ਛਾਮੀਤਿ ਅਤ੍ਥੋ. ਅਯਂ ਤਾਵ ਮੂਲਨਯੇ ਮੂਲਯਮਕਨਯੋ.

ਏਕਮੂਲਯਮਕੇ ਪਨ ਸਬ੍ਬੇ ਤੇ ਕੁਸਲਮੂਲੇਨ ਏਕਮੂਲਾਤਿ ਗਣਨਟ੍ਠੇਨ ਏਕਮੂਲਕਂ ਅਗ੍ਗਹੇਤ੍ਵਾ ਸਮਾਨਤ੍ਥੇਨ ਗਹੇਤਬ੍ਬਾ, ਅਯਂ ਹੇਤ੍ਥ ਅਤ੍ਥੋ – ‘‘ਸਬ੍ਬੇ ਤੇ ਕੁਸਲਮੂਲੇਨ ਏਕਂ ਸਮਾਨਂ ਮੂਲਂ ਏਤੇਸਨ੍ਤਿ ਏਕਮੂਲਾ’’ਤਿ. ਯਂ ਫਸ੍ਸਸ੍ਸ ਮੂਲਂ, ਕਿਂ ਤਦੇਵ ਵੇਦਨਾਦੀਨਨ੍ਤਿ ਅਯਂ ਪੁਚ੍ਛਾ. ਅਥ ਨੇਸਂ ਤਥਾਭਾਵਂ ਸਮ੍ਪਟਿਚ੍ਛਨਵਸੇਨ ‘‘ਆਮਨ੍ਤਾ’’ਤਿ ਵਿਭਙ੍ਗੇ ਵਿਸ੍ਸਜ੍ਜਨਂ. ਯੇ ਵਾ ਪਨ ਕੁਸਲਮੂਲੇਨ ਏਕਮੂਲਾ, ਸਬ੍ਬੇ ਤੇ ਧਮ੍ਮਾ ਕੁਸਲਾਤਿ ਪੁਚ੍ਛਾ. ਤਸ੍ਸਾ ਪਨ ਕੁਸਲਚਿਤ੍ਤਸਮੁਟ੍ਠਾਨਂ ਰੂਪਂ ਕੁਸਲਮੂਲੇਨ ਏਕਮੂਲਮੇਵ, ਨ ਕੁਸਲਂ, ਫਸ੍ਸਾਦਿਧਮ੍ਮਜਾਤਂ ਪਨ ਕੁਸਲਮੂਲੇਨ ਏਕਮੂਲਞ੍ਚੇਵ ਕੁਸਲਞ੍ਚਾਤਿ ਇਦਂ ਵਿਸ੍ਸਜ੍ਜਨਂ. ਯਥੇਵ ਹਿ ਫਸ੍ਸਾਦੀਨਂ ਅਲੋਭਾਦਯੋ ਸੁਪ੍ਪਤਿਟ੍ਠਿਤਭਾਵਸਾਧਨੇਨ ਹੇਤੁਪਚ੍ਚਯਤ੍ਤਾ ਮੂਲਂ, ਤਥਾ ਤਂਸਮੁਟ੍ਠਾਨਰੂਪਸ੍ਸਾਪੀਤਿ ਤਂਰੂਪਮ੍ਪਿ ਅਰੂਪਧਮ੍ਮੇਹਿ ਸਦ੍ਧਿਂ ਸਮਾਨਮੂਲਨ੍ਤਿ ਵੁਚ੍ਚਤਿ, ਨ ਪਨ ਕੁਸਲਂ ਅਨਵਜ੍ਜਸੁਖਵਿਪਾਕਤ੍ਤਾਭਾਵਾ. ਏਕਮੂਲਯਮਕਨਯੋ.

ਅਞ੍ਞਮਞ੍ਞਮੂਲਯਮਕੇ ਪਨ ‘‘ਯੇ ਕੇਚਿ ਕੁਸਲਾ’’ਤਿ ਅਪੁਚ੍ਛਿਤ੍ਵਾ ‘‘ਯੇ ਕੇਚਿ ਕੁਸਲਮੂਲੇਨ ਏਕਮੂਲਾ’’ਤਿ ਪੁਚ੍ਛਾ ਕਤਾ. ਕਸ੍ਮਾ? ਇਮਿਨਾਪਿ ਬ੍ਯਞ੍ਜਨੇਨ ਤਸ੍ਸੇਵਤ੍ਥਸ੍ਸ ਸਮ੍ਭਵਦਸ੍ਸਨਤ੍ਥਂ, ਕੁਸਲਸਮੁਟ੍ਠਾਨਰੂਪਸ੍ਸਾਪਿ ਸਮ੍ਪਿਣ੍ਡਨਤ੍ਥਞ੍ਚ. ਅਞ੍ਞਮਞ੍ਞਮੂਲਾਤਿ ਸਬ੍ਬੇਵ ਤੇ ਕਿਂ ਅਞ੍ਞਮਞ੍ਞਸ੍ਸ ਹੇਤੁਪਚ੍ਚਯਟ੍ਠੇਨ ਮੂਲਾਨਿ ਹੋਨ੍ਤੀਤਿ ਪੁਚ੍ਛਾ. ਤਸ੍ਸਾ ਯਾਨਿ ਦ੍ਵੇ ਤੀਣਿ ਮੂਲਾਨਿ ਏਕਤੋ ਉਪ੍ਪਜ੍ਜਨ੍ਤਿ, ਤਾਨੇਵ ਏਕਮੂਲਾਨਿ ਚੇਵ ਅਞ੍ਞਮਞ੍ਞਮੂਲਾਨਿ ਚ, ਅਵਸੇਸਾ ਕੁਸਲਮੂਲਸਹਜਾਤਾ ਰੂਪਾਰੂਪਧਮ੍ਮਾ ਕੁਸਲਮੂਲੇਨ ਏਕਮੂਲਾਵ, ਨ ਚ ਅਞ੍ਞਮਞ੍ਞਮੂਲਾਤਿ ਵਿਸ੍ਸਜ੍ਜਨਂ. ਤਸ੍ਸੇਵ ਪਟਿਲੋਮਨਯੇ ਸਬ੍ਬੇ ਤੇ ਅਞ੍ਞਮਞ੍ਞਮੂਲਾ ਅਲੋਭਾਦਯੋ ਕੁਸਲਾਤਿ ਪੁਚ੍ਛਾ. ਆਮਨ੍ਤਾਤਿ ਵਿਸ੍ਸਜ੍ਜਨਂ. ਮੂਲਨਯੋ.

ਯਥਾ ਚ ਮੂਲਨਯੇ ਮੂਲਯਮਕਏਕਮੂਲਯਮਕਅਞ੍ਞਮਞ੍ਞਮੂਲਯਮਕਵਸੇਨ ਛਬ੍ਬਿਧਾ ਪੁਚ੍ਛਾਵਿਸ੍ਸਜ੍ਜਨਨਯਾ ਵੁਤ੍ਤਾ, ਏਵਂ ਮੂਲਮੂਲਨਯਾਦੀਸੁਪਿ ਵੇਦਿਤਬ੍ਬਾ. ਅਯਂ ਪਨੇਤ੍ਥ ਵਿਸੇਸੋ – ਸਬ੍ਬੇ ਤੇ ਕੁਸਲਮੂਲਮੂਲਾਤਿ ਸਬ੍ਬੇ ਤੇ ਕੁਸਲਮੂਲਸਙ੍ਖਾਤਾ ਮੂਲਾ, ਕੁਸਲਮੂਲਮੂਲਾਤ੍ਵੇਵ ਅਤ੍ਥੋ. ਏਕਮੂਲਮੂਲਾਤਿ ਸਮਾਨਟ੍ਠੇਨ ਏਕਮੇਵ ਮੂਲਮੂਲਂ ਏਤੇਸਨ੍ਤਿ ਏਕਮੂਲਮੂਲਾ, ਸਮਾਨਮੂਲਮੂਲਾਤ੍ਵੇਵ ਅਤ੍ਥੋ. ਅਞ੍ਞਮਞ੍ਞਮੂਲਮੂਲਾਤਿ ਅਞ੍ਞਮਞ੍ਞਸ੍ਸ ਮੂਲਂ ਅਞ੍ਞਮਞ੍ਞਮੂਲਂ, ਤਂ ਹੇਤੁਪਚ੍ਚਯਟ੍ਠੇਨ ਮੂਲਂ ਏਤੇਸਨ੍ਤਿ ਅਞ੍ਞਮਞ੍ਞਮੂਲਮੂਲਾ, ਅਞ੍ਞਮਞ੍ਞਮੂਲਮੂਲਾਤ੍ਵੇਵ ਅਤ੍ਥੋ. ਸੇਸਂ ਤਾਦਿਸਮੇਵਾਤਿ. ਮੂਲਮੂਲਨਯੋ.

ਮੂਲਕਨਯੇ ਪਨ ਸਬ੍ਬੇ ਤੇ ਕੁਸਲਮੂਲਕਾਤਿ ਸਬ੍ਬੇ ਤੇ ਕੁਸਲਾ ਹੇਤੁਪਚ੍ਚਯਟ੍ਠੇਨ ਕੁਸਲਭੂਤਂ ਮੂਲਂ ਏਤੇਸਨ੍ਤਿ ਕੁਸਲਮੂਲਕਾਤਿ ਪੁਚ੍ਛਾ. ਆਮਨ੍ਤਾਤਿ ਵਿਸ੍ਸਜ੍ਜਨਂ. ‘‘ਯੇ ਵਾ ਪਨ ਕੁਸਲਮੂਲਕਾ, ਸਬ੍ਬੇ ਤੇ ਧਮ੍ਮਾ ਕੁਸਲਾ’’ਤਿ ਪੁਚ੍ਛਾ. ਯਂ ਰੂਪਂ, ਤਂ ਠਪੇਤ੍ਵਾ ਸੇਸਂ ਕੁਸਲਨ੍ਤਿ ਵਿਸ੍ਸਜ੍ਜਨਂ, ਸੇਸਂ ਤਾਦਿਸਮੇਵਾਤਿ. ਮੂਲਕਨਯੋ.

ਮੂਲਮੂਲਕਨਯੇ ਪਨ ਕੁਸਲਮੂਲਮੂਲਕਾਤਿ ਕੁਸਲਮੂਲਸਙ੍ਖਾਤਂ ਮੂਲਂ ਏਤੇਸਨ੍ਤਿ ਕੁਸਲਮੂਲਮੂਲਕਾ. ਸੇਸਂ ਤਾਦਿਸਮੇਵਾਤਿ.

ਅਯਂ ਤਾਵ ਕੁਸਲਪਦੇਸੁ ਪੁਚ੍ਛਾਵਿਸ੍ਸਜ੍ਜਨਨਯੋ. ਅਕੁਸਲਪਦਾਦੀਸੁਪਿ ਏਸੇਵ ਨਯੋ. ਅਯਂ ਪਨ ਵਿਸੇਸੋ – ਅਕੁਸਲਪਦਮੂਲੇਸੁ ਏਕਮੂਲਯਮਕੇ ‘‘ਯੇ ਕੇਚਿ ਅਕੁਸਲਾ ਧਮ੍ਮਾ, ਸਬ੍ਬੇ ਤੇ ਅਕੁਸਲਮੂਲੇਨ ਏਕਮੂਲਾ’’ਤਿ ਪਠਮਪੁਚ੍ਛਾਯ ‘‘ਅਹੇਤੁਕਂ ਅਕੁਸਲਂ ਅਕੁਸਲਮੂਲੇਨ ਏਕਮੂਲ’’ਨ੍ਤਿ ਨਿਦ੍ਦੇਸੇ ਵਿਸ੍ਸਜ੍ਜਨਂ ਕਤਂ. ਤਤ੍ਥ ਅਹੇਤੁਕਂ ਅਕੁਸਲਨ੍ਤਿ ਦ੍ਵੀਸੁ ਮੋਹਮੂਲਚਿਤ੍ਤੇਸੁ ਮੋਹਂ ਸਨ੍ਧਾਯ ਵੁਤ੍ਤਂ, ਅਬ੍ਯਾਕਤਪਦਮੂਲੇਸੁ ਏਕਮੂਲਯਮਕੇ ‘‘ਯੇ ਕੇਚਿ ਅਬ੍ਯਾਕਤਾ ਧਮ੍ਮਾ, ਸਬ੍ਬੇ ਤੇ ਅਬ੍ਯਾਕਤਮੂਲੇਨ ਏਕਮੂਲਾ’’ਤਿ ਪੁਚ੍ਛਾਯ ‘‘ਅਹੇਤੁਕਂ ਅਬ੍ਯਾਕਤਂ ਠਪੇਤ੍ਵਾ ਸੇਸਾ ਅਬ੍ਯਾਕਤਮੂਲੇਨ ਏਕਮੂਲਕਾ’’ਤਿ ਵਿਸ੍ਸਜ੍ਜਨਂ. ਤਤ੍ਥ ਅਹੇਤੁਕਂ ਅਬ੍ਯਾਕਤਨ੍ਤਿ ਅਟ੍ਠਾਰਸਾਹੇਤੁਕਚਿਤ੍ਤੁਪ੍ਪਾਦਾ, ਰੂਪਂ, ਨਿਬ੍ਬਾਨਞ੍ਚ. ਏਤ੍ਥ ਚ ਕਿਞ੍ਚਾਪਿ ਸਹੇਤੁਕਅਬ੍ਯਾਕਤਚਿਤ੍ਤਸਮੁਟ੍ਠਾਨਰੂਪਮ੍ਪਿ ਅਬ੍ਯਾਕਤਮੂਲੇਨ ਏਕਮੂਲਮੇਵ, ਤਂ ਪਨ ਅਬ੍ਬੋਹਾਰਿਕਂ ਕਤ੍ਵਾ ਨਿਦ੍ਦੇਸੇ ਏਕਤੋ ਲਬ੍ਭਮਾਨਕਵਸੇਨਪੇਤਂ ਵਿਸ੍ਸਜ੍ਜਨਂ ਕਤਨ੍ਤਿ ਵੇਦਿਤਬ੍ਬਂ.

ਨਾਮਪਦਮੂਲੇਸੁ ਚ ‘‘ਯੇ ਕੇਚਿ ਨਾਮਾ ਧਮ੍ਮਾ, ਸਬ੍ਬੇ ਤੇ ਨਾਮਮੂਲਾ’’ਤਿ ਪੁਚ੍ਛਾਯ ‘‘ਨਵੇਵ ਨਾਮਮੂਲਾਨਿ, ਅਵਸੇਸਾ ਨਾਮਾ ਧਮ੍ਮਾ, ਨ ਨਾਮਮੂਲਾ’’ਤਿ ਵਿਸ੍ਸਜ੍ਜਨਂ. ਏਕਮੂਲਨਯੇ ਪਨੇਤ੍ਥ ‘‘ਯੇ ਕੇਚਿ ਨਾਮਾ ਧਮ੍ਮਾ, ਸਬ੍ਬੇ ਤੇ ਨਾਮਮੂਲੇਨ ਏਕਮੂਲਾ’’ਤਿ ਪੁਚ੍ਛਾ. ‘‘ਅਹੇਤੁਕਂ ਨਾਮਂ ਠਪੇਤ੍ਵਾ ਸੇਸਂ ਨਾਮਮੂਲੇਨ ਏਕਮੂਲ’’ਨ੍ਤਿ ਵਿਸ੍ਸਜ੍ਜਨਂ. ਤਤ੍ਥ ਅਹੇਤੁਕਚਿਤ੍ਤੁਪ੍ਪਾਦਵਿਚਿਕਿਚ੍ਛੁਦ੍ਧਚ੍ਚਸਮ੍ਪਯੁਤ੍ਤਮੋਹਨਿਬ੍ਬਾਨਵਸੇਨ ਅਹੇਤੁਕਂ ਨਾਮਂ ਵੇਦਿਤਬ੍ਬਂ. ਸੇਸਂ ਸਬ੍ਬਤ੍ਥ ਕੁਸਲਪਦੇ ਵੁਤ੍ਤਾਨੁਸਾਰੇਨ ਸੁਵਿਞ੍ਞੇਯ੍ਯਮੇਵਾਤਿ. ਅਯਂ ਮੂਲਵਾਰੇ ਨਯੋ.

ਇਤੋ ਪਰੇਸੁ ਹੇਤੁਵਾਰਾਦੀਸੁ ਨਵਸੁ ਵਾਰੇਸੁ ਮੂਲਵਾਰਸਦਿਸੋਵ ਸਬ੍ਬਤ੍ਥ ਸਂਵਣ੍ਣਨਾਨਯੋ. ਹੇਤੁਆਦਿਪਦਮਤ੍ਤਮੇਵ ਹੇਤ੍ਥ ਵਿਸੇਸੋ, ਤਾਨਿ ਚ ਮੂਲ-ਸਦ੍ਦਪਰਿਯਾਯਤੋ ਅਲੋਭਾਦਿਹੇਤੁਕਾਨੇਵ. ਅਲੋਭਾਦਯੋ ਹਿ ਸਹਜਾਤਧਮ੍ਮਸਙ੍ਖਾਤਸ੍ਸ ਅਤ੍ਤਨੋ ਫਲਸ੍ਸ ਪਤਿਟ੍ਠਾਨਟ੍ਠੇਨ ਮੂਲਂ. ਤਸ੍ਸ ਨਿਪ੍ਫਾਦਨਤ੍ਥਂ ਹਿਨੋਤਿ ਪਵਤ੍ਤਤੀਤਿ ਹੇਤੁ, ‘‘ਹਨ੍ਦ ਨਂ ਗਣ੍ਹਥਾ’’ਤਿ ਦਸ੍ਸੇਨ੍ਤਂ ਵਿਯ ਅਤ੍ਤਨੋ ਫਲਂ ਨਿਦੇਤੀਤਿ ਨਿਦਾਨਂ. ਏਤਸ੍ਮਾ ਫਲਂ ਸਮ੍ਭਵਤੀਤਿ ਸਮ੍ਭਵੋ. ਪਭਵਤੀਤਿ ਪਭਵੋ. ਸਮੁਟ੍ਠਾਤਿ ਤਂ ਏਤ੍ਥ, ਏਤੇਨਾਤਿ ਵਾ ਸਮੁਟ੍ਠਾਨਂ. ਤਂ ਆਹਰਤੀਤਿ ਆਹਾਰੋ. ਅਪਟਿਕ੍ਖਿਪਿਤਬ੍ਬਟ੍ਠੇਨ ਤੇਨ ਆਲਮ੍ਬੀਯਤੀਤਿ ਆਲਮ੍ਬਣਂ. ਏਤਂ ਪਟਿਚ੍ਚ ਤਂ ਏਤੀਤਿ ਪਚ੍ਚਯੋ. ਏਤਸ੍ਮਾ ਤਂ ਸਮੁਦੇਤੀਤਿ ਸਮੁਦਯੋ. ਸਬ੍ਬਂ ਕਾਰਣਪਰਿਯਾਯੇਨ ਵੁਤ੍ਤਾ ‘‘ਮੂਲਂ ਹੇਤੁ ਨਿਦਾਨਞ੍ਚਾ’’ਤਿ ਗਾਥਾ ਦਸਨ੍ਨਮ੍ਪਿ ਵਾਰਾਨਂ ਉਦ੍ਦਾਨਗਾਥਾ ਨਾਮ. ਅਯਂ ਮੂਲਯਮਕਮਾਤਿਕਤ੍ਥਵਣ੍ਣਨਾਨਯੋ.

ਖਨ੍ਧਯਮਕਮਾਤਿਕਤ੍ਥਵਣ੍ਣਨਾ

ਖਨ੍ਧਯਮਕਪਾਲ਼ਿਯਾ ਪਨ ਪਾਲ਼ਿਵਵਤ੍ਥਾਨਂ ਤਾਵ ਏਵਂ ਵੇਦਿਤਬ੍ਬਂ – ‘‘ਪਞ੍ਚਕ੍ਖਨ੍ਧਾ’’ਤਿ ਪਦਂ ਆਦਿਂ ਕਤ੍ਵਾ ਯਾਵ ‘‘ਨ ਖਨ੍ਧਾ ਨ ਸਙ੍ਖਾਰਾ’’ਤਿ ਪਦਂ, ਤਾਵ ਪਵਤ੍ਤਾ ਅਯਂ ਖਨ੍ਧਯਮਕਮਾਤਿਕਾ ਨਾਮ. ਸਾ ਪਣ੍ਣਤ੍ਤਿਵਾਰਸ੍ਸ ‘‘ਉਦ੍ਦੇਸਵਾਰੋ’’ਤਿਪਿ ‘‘ਪੁਚ੍ਛਾਵਾਰੋ’’ਤਿਪਿ ਵੁਚ੍ਚਤਿ. ਸੋ ਚ ਪਦਸੋਧਨਵਾਰੋ ਪਦਸੋਧਨਮੂਲਚਕ੍ਕਵਾਰੋ ਸੁਦ੍ਧਖਨ੍ਧਵਾਰੋ ਸੁਦ੍ਧਖਨ੍ਧਮੂਲਚਕ੍ਕਵਾਰੋਤਿ ਚਤੂਹਿ ਨਯਵਾਰੇਹਿ ਪਟਿਮਣ੍ਡਿਤੋ. ਤਤ੍ਥ ‘‘ਰੂਪਂ ਰੂਪਕ੍ਖਨ੍ਧੋ, ਰੂਪਕ੍ਖਨ੍ਧੋ ਰੂਪ’’ਨ੍ਤਿਆਦਿਨਾ ਨਯੇਨ ਪਦਮੇਵ ਸੋਧੇਤ੍ਵਾ ਗਤੋ ਪਦਸੋਧਨਵਾਰੋ ਨਾਮ. ਸੋ ਅਨੁਲੋਮਪਟਿਲੋਮਵਸੇਨ ਦੁਵਿਧੋ ਹੋਤਿ. ਤਸ੍ਸ ਅਨੁਲੋਮਵਾਰੇ ‘‘ਰੂਪਂ ਰੂਪਕ੍ਖਨ੍ਧੋ, ਰੂਪਕ੍ਖਨ੍ਧੋ ਰੂਪ’’ਨ੍ਤਿਆਦੀਨਿ ਪਞ੍ਚ ਯਮਕਾਨਿ. ਪਟਿਲੋਮਵਾਰੇਪਿ ‘‘ਨ ਰੂਪਂ ਨ ਰੂਪਕ੍ਖਨ੍ਧੋ, ਨ ਰੂਪਕ੍ਖਨ੍ਧੋ ਨ ਰੂਪ’’ਨ੍ਤਿਆਦਿਨਾ ਪਞ੍ਚ ਵਾਰਾ.

ਤਤੋ ਪਰਂ ਤੇਸਞ੍ਞੇਵ ਪਦਸੋਧਨਵਾਰੇ ਸੋਧਿਤਾਨਂ ਖਨ੍ਧਾਨਂ ‘‘ਰੂਪਂ ਰੂਪਕ੍ਖਨ੍ਧੋ, ਖਨ੍ਧਾ ਵੇਦਨਾਕ੍ਖਨ੍ਧੋ’’ਤਿਆਦਿਨਾ ਨਯੇਨ ਏਕੇਕਖਨ੍ਧਮੂਲਕਾਨਿ ਚਤ੍ਤਾਰਿ ਚਤ੍ਤਾਰਿ ਚਕ੍ਕਾਨਿ ਬਨ੍ਧਿਤ੍ਵਾ ਗਤੋ ਪਦਸੋਧਨਮੂਲਕਾਨਂ ਚਕ੍ਕਾਨਂ ਅਤ੍ਥਿਤਾਯ ਪਦਸੋਧਨਮੂਲਚਕ੍ਕਵਾਰੋ ਨਾਮ. ਸੋਪਿ ਅਨੁਲੋਮਪਟਿਲੋਮਵਸੇਨ ਦੁਵਿਧੋ ਹੋਤਿ. ਤਸ੍ਸ ਅਨੁਲੋਮਵਾਰੇ ‘‘ਰੂਪਂ ਰੂਪਕ੍ਖਨ੍ਧੋ, ਖਨ੍ਧਾ ਵੇਦਨਾਕ੍ਖਨ੍ਧੋ’’ਤਿਆਦੀਨਿ ਏਕੇਕਖਨ੍ਧਮੂਲਕਾਨਿ ਚਤ੍ਤਾਰਿ ਚਤ੍ਤਾਰਿ ਕਤ੍ਵਾ ਵੀਸਤਿ ਯਮਕਾਨਿ. ਪਟਿਲੋਮਵਾਰੇਪਿ ‘‘ਨ ਰੂਪਂ ਨ ਰੂਪਕ੍ਖਨ੍ਧੋ, ਨ ਖਨ੍ਧਾ ਨ ਵੇਦਨਾਕ੍ਖਨ੍ਧੋ’’ਤਿਆਦੀਨਿ ਵੀਸਤਿਮੇਵ.

ਤਤੋ ਪਰਂ ‘‘ਰੂਪਂ ਖਨ੍ਧੋ, ਖਨ੍ਧਾ ਰੂਪ’’ਨ੍ਤਿਆਦਿਨਾ ਨਯੇਨ ਸੁਦ੍ਧਖਨ੍ਧਵਸੇਨੇਵ ਗਤੋ ਸੁਦ੍ਧਖਨ੍ਧਵਾਰੋ ਨਾਮ. ਸੋਪਿ ਅਨੁਲੋਮਪਟਿਲੋਮਵਸੇਨ ਦੁਵਿਧੋ ਹੋਤਿ. ਤਸ੍ਸ ਅਨੁਲੋਮਵਾਰੇ ‘‘ਰੂਪਂ ਖਨ੍ਧੋ, ਖਨ੍ਧਾ ਰੂਪ’’ਨ੍ਤਿਆਦੀਨਿ ਪਞ੍ਚ ਯਮਕਾਨਿ. ਪਟਿਲੋਮਵਾਰੇਪਿ ‘‘ਨ ਰੂਪਂ ਨ ਖਨ੍ਧੋ, ਨ ਖਨ੍ਧਾ ਨ ਰੂਪ’’ਨ੍ਤਿਆਦੀਨਿ ਪਞ੍ਚੇਵ.

ਤਤੋ ਪਰਂ ਤੇਸਞ੍ਞੇਵ ਸੁਦ੍ਧਖਨ੍ਧਾਨਂ ‘‘ਰੂਪਂ ਖਨ੍ਧੋ, ਖਨ੍ਧਾ ਵੇਦਨਾ’’ਤਿਆਦਿਨਾ ਨਯੇਨ ਏਕੇਕਖਨ੍ਧਮੂਲਕਾਨਿ ਚਤ੍ਤਾਰਿ ਚਤ੍ਤਾਰਿ ਚਕ੍ਕਾਨਿ ਬਨ੍ਧਿਤ੍ਵਾ ਗਤੋ ਸੁਦ੍ਧਖਨ੍ਧਮੂਲਕਾਨਂ ਚਕ੍ਕਾਨਂ ਅਤ੍ਥਿਤਾਯ ਸੁਦ੍ਧਖਨ੍ਧਮੂਲਚਕ੍ਕਵਾਰੋ ਨਾਮ. ਸੋਪਿ ਅਨੁਲੋਮਪਟਿਲੋਮਵਸੇਨ ਦੁਵਿਧੋ ਹੋਤਿ. ਤਸ੍ਸ ਅਨੁਲੋਮਵਾਰੇ ‘‘ਰੂਪਂ ਖਨ੍ਧੋ, ਖਨ੍ਧਾ ਵੇਦਨਾ’’ਤਿਆਦੀਨਿ ਏਕੇਕਖਨ੍ਧਮੂਲਕਾਨਿ ਚਤ੍ਤਾਰਿ ਚਤ੍ਤਾਰਿ ਕਤ੍ਵਾ ਵੀਸਤਿ ਯਮਕਾਨਿ. ਪਟਿਲੋਮਵਾਰੇਪਿ ‘‘ਨ ਰੂਪਂ ਨ ਖਨ੍ਧੋ, ਨ ਖਨ੍ਧਾ ਨ ਵੇਦਨਾ’’ਤਿਆਦੀਨਿ ਵੀਸਤਿਮੇਵ. ਏਵਮੇਤ੍ਥ ਚਤੂਸੁ ਨਯਵਾਰੇਸੁ ਏਕਂ ਯਮਕਸਤਂ, ਦ੍ਵੇ ਪੁਚ੍ਛਾਸਤਾਨਿ, ਏਕੇਕਪੁਚ੍ਛਾਯ ਸਨ੍ਨਿਟ੍ਠਾਨਸਂਸਯਵਸੇਨ ਦ੍ਵੇ ਦ੍ਵੇ ਅਤ੍ਥੇ ਕਤ੍ਵਾ ਚਤ੍ਤਾਰਿ ਚ ਅਤ੍ਥਸਤਾਨਿ ਉਦ੍ਦਿਟ੍ਠਾਨੀਤਿ ਵੇਦਿਤਬ੍ਬਾਨਿ.

ਏਵਮੇਤਿਸ੍ਸਾ ਪਾਲ਼ਿਵਵਤ੍ਥਾਨਂ ਵਿਦਿਤ੍ਵਾ ਇਦਾਨਿ ਅਨੁਤ੍ਤਾਨਪਦਤ੍ਥਾਨੁਸਾਰੇਨ ਵਿਭਙ੍ਗਨਯਸਹਿਤਸਙ੍ਖੇਪਤ੍ਥਵਣ੍ਣਨਾਨਯੋ ਏਵਂ ਵੇਦਿਤਬ੍ਬੋ. ਪਞ੍ਚਕ੍ਖਨ੍ਧਾਤਿ ਅਯਂ ਯਮਕਵਸੇਨ ਪੁਚ੍ਛਿਤਬ੍ਬਾਨਂ ਖਨ੍ਧਾਨਂ ਉਦ੍ਦੇਸੋ. ਰੂਪਕ੍ਖਨ੍ਧੋ…ਪੇ… ਵਿਞ੍ਞਾਣਕ੍ਖਨ੍ਧੋਤਿ ਤੇਸਞ੍ਞੇਵ ਪਭੇਦਤੋ ਨਾਮਵਵਤ੍ਥਾਨਂ. ਤਤੋ ਪਰਂ ਪਦਸੋਧਨਵਾਰਾਦਯੋ ਚਤ੍ਤਾਰੋ ਨਯਵਾਰਾ. ਤਤ੍ਥ ਰੂਪਂ ਰੂਪਕ੍ਖਨ੍ਧੋਤਿ ਯਂ ਕਿਞ੍ਚਿ ‘‘ਰੂਪ’’ਨ੍ਤਿ ਵੁਚ੍ਚਤਿ, ਸਬ੍ਬਂ ਤਂ ‘‘ਰੂਪਕ੍ਖਨ੍ਧੋ’’ਤਿ ਪੁਚ੍ਛਤੀਤਿ ਵਚਨਸੋਧਨਤ੍ਥਂ ਪੁਚ੍ਛਾ. ਤਸ੍ਸਾ ਚ ‘‘ਪਿਯਰੂਪਂ ਸਾਤਰੂਪਂ ਰੂਪਂ ਨ ਰੂਪਕ੍ਖਨ੍ਧੋ, ਰੂਪਕ੍ਖਨ੍ਧੋ ਰੂਪਞ੍ਚੇਵ ਰੂਪਕ੍ਖਨ੍ਧੋ ਚਾ’’ਤਿ ਇਦਂ ਨਿਦ੍ਦੇਸਨਯੇਨ ਵਿਸ੍ਸਜ੍ਜਨਂ. ਤਤ੍ਥ ਪਿਯਰੂਪਂ ਸਾਤਰੂਪਨ੍ਤਿਆਦੀਸੁ ਯਂ ‘‘ਰੂਪ’’ਨ੍ਤਿ ਵੁਤ੍ਤਂ, ਤਂ ਰੂਪਮੇਵ ਨ ਰੂਪਕ੍ਖਨ੍ਧੋ. ਯੋ ਪਨ ‘‘ਰੂਪਕ੍ਖਨ੍ਧੋ’’ਤਿ ਵੁਤ੍ਤੋ, ਸੋ ‘‘ਰੂਪ’’ਨ੍ਤਿਪਿ ‘‘ਰੂਪਕ੍ਖਨ੍ਧੋ’’ਤਿਪਿ ਵਤ੍ਤੁਂ ਵਟ੍ਟਤੀਤਿ ਅਤ੍ਥੋ. ਰੂਪਕ੍ਖਨ੍ਧੋ ਰੂਪਨ੍ਤਿ ਏਤ੍ਥ ਪਨ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ ਰੂਪਕ੍ਖਨ੍ਧਸ੍ਸ ਨਿਯਮੇਨ ਰੂਪਨ੍ਤਿ ਵਤ੍ਤਬ੍ਬਤ੍ਤਾ. ਵੇਦਨਾ ਵੇਦਨਾਕ੍ਖਨ੍ਧੋਤਿ ਪੁਚ੍ਛਾਯ, ਵੇਦਨਾਕ੍ਖਨ੍ਧੋ ਵੇਦਨਾਤਿ ਪੁਚ੍ਛਾਯ ਚ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ. ਸਞ੍ਞਾਸਞ੍ਞਾਕ੍ਖਨ੍ਧੋਤਿ ਪੁਚ੍ਛਾਯ ‘‘ਪਪਞ੍ਚਸਞ੍ਞਾ’’ਤਿਆਦੀਸੁ ਆਗਤਾ ਦਿਟ੍ਠਿਸਞ੍ਞਾ ਸਞ੍ਞਾ ਨ ਸਞ੍ਞਾਕ੍ਖਨ੍ਧੋ, ਸਞ੍ਞਾਕ੍ਖਨ੍ਧੋ ਸਞ੍ਞਾ ਚੇਵ ਸਞ੍ਞਾਕ੍ਖਨ੍ਧੋ ਚਾਤਿ ਵਿਸ੍ਸਜ੍ਜਨਂ. ਸਞ੍ਞਾਕ੍ਖਨ੍ਧੋ ਸਞ੍ਞਾਤਿ ਪੁਚ੍ਛਾਯ ਚ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ. ਸਙ੍ਖਾਰਾ ਸਙ੍ਖਾਰਕ੍ਖਨ੍ਧੋਤਿ ਪੁਚ੍ਛਾਯ ‘‘ਅਨਿਚ੍ਚਾ ਵਤ ਸਙ੍ਖਾਰਾ’’ਤਿਆਦੀਸੁ ਆਗਤੋ ਸਙ੍ਖਾਰਕ੍ਖਨ੍ਧੋ, ਤਤੋ ਅਵਸੇਸਾ ਸਙ੍ਖਤਧਮ੍ਮਾ ਸਙ੍ਖਾਰਾ ਨ ਸਙ੍ਖਾਰਕ੍ਖਨ੍ਧੋਤਿ ਵਿਸ੍ਸਜ੍ਜਨਂ. ਸਙ੍ਖਾਰਕ੍ਖਨ੍ਧੋ ਸਙ੍ਖਾਰਾਤਿ ਪੁਚ੍ਛਾਯ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ. ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋਤਿ ਪੁਚ੍ਛਾਯ, ਵਿਞ੍ਞਾਣਕ੍ਖਨ੍ਧੋ ਵਿਞ੍ਞਾਣਨ੍ਤਿ ਪੁਚ੍ਛਾਯ ਚ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ.

ਪਟਿਲੋਮਵਾਰੇ ਨ ਰੂਪਂ ਨ ਰੂਪਕ੍ਖਨ੍ਧੋਤਿ ਪੁਚ੍ਛਾਯ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ. ਤਸ੍ਸ ਰੂਪ-ਸਦ੍ਦਵਚਨੀਯਾ ਧਮ੍ਮਾ ਰੂਪਕ੍ਖਨ੍ਧੋ ਨ ਹੋਨ੍ਤੀਤਿ ਅਤ੍ਥੋ. ਨ ਰੂਪਕ੍ਖਨ੍ਧੋ ਨ ਰੂਪਨ੍ਤਿ ਪੁਚ੍ਛਾਯ ਰੂਪਕ੍ਖਨ੍ਧਵਿਰਹਿਤਾ ‘‘ਪਿਯਰੂਪਂ ਸਾਤਰੂਪ’’ਨ੍ਤਿ ਵੁਤ੍ਤਾ ਧਮ੍ਮਾ ਨ ਰੂਪਕ੍ਖਨ੍ਧੋ, ਰੂਪਂ, ਪਿਯਰੂਪਸਾਤਰੂਪਰੂਪਕ੍ਖਨ੍ਧਵਿਰਹਿਤਾ ਪਨ ਧਮ੍ਮਾ ਨ ਰੂਪਕ੍ਖਨ੍ਧੋ ਚੇਵ ਨ ਰੂਪਞ੍ਚਾਤਿ ਵਿਸ੍ਸਜ੍ਜਨਂ. ਨ ਵੇਦਨਾ ਨ ਵੇਦਨਾਕ੍ਖਨ੍ਧੋਤਿ ਪੁਚ੍ਛਾਯ, ਨ ਵੇਦਨਾਕ੍ਖਨ੍ਧੋ ਨ ਵੇਦਨਾਤਿ ਪੁਚ੍ਛਾਯ, ਨ ਸਞ੍ਞਾ ਨ ਸਞ੍ਞਾਕ੍ਖਨ੍ਧੋਤਿ ਪੁਚ੍ਛਾਯ ਚ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ. ਨ ਸਙ੍ਖਾਰਾ ਨ ਸਙ੍ਖਾਰਕ੍ਖਨ੍ਧੋਤਿ ਪੁਚ੍ਛਾਯ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ. ਨ ਸਞ੍ਞਾਕ੍ਖਨ੍ਧੋ ਨ ਸਞ੍ਞਾਤਿ ਪੁਚ੍ਛਾਯ ਪਨ ਦਿਟ੍ਠਿਸਞ੍ਞਾ ਨ ਸਞ੍ਞਾਕ੍ਖਨ੍ਧੋ, ਸਞ੍ਞਾ, ਤਂ ਦਿਟ੍ਠਿਸਞ੍ਞਂ, ਸਞ੍ਞਾਕ੍ਖਨ੍ਧਞ੍ਚ ਠਪੇਤ੍ਵਾ ਅਵਸੇਸਾ ਨ ਚੇਵ ਸਞ੍ਞਾ ਨ ਚ ਸਞ੍ਞਾਕ੍ਖਨ੍ਧੋਤਿ ਵਿਸ੍ਸਜ੍ਜਨਂ. ਨ ਸਙ੍ਖਾਰਾ ਨ ਸਙ੍ਖਾਰਕ੍ਖਨ੍ਧੋਤਿ ਪੁਚ੍ਛਾਯ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ. ਨ ਸਙ੍ਖਾਰਕ੍ਖਨ੍ਧੋ ਨ ਸਙ੍ਖਾਰਾਤਿ ਪੁਚ੍ਛਾਯ ਸਙ੍ਖਾਰਕ੍ਖਨ੍ਧਂ ਠਪੇਤ੍ਵਾ ਅਵਸੇਸਸਙ੍ਖਤਧਮ੍ਮਾ ਨ ਸਙ੍ਖਾਰਕ੍ਖਨ੍ਧੋ, ਸਙ੍ਖਾਰਾ, ਅਸਙ੍ਖਤਾ ਪਨ ਧਾਤੁ ਨ ਚੇਵ ਸਙ੍ਖਾਰਾ ਨ ਚ ਸਙ੍ਖਾਰਕ੍ਖਨ੍ਧੋਤਿ ਵਿਸ੍ਸਜ੍ਜਨਂ. ਨ ਵਿਞ੍ਞਾਣਂ ਨ ਵਿਞ੍ਞਾਣਕ੍ਖਨ੍ਧੋਤਿ ਪੁਚ੍ਛਾਯ, ਨ ਵਿਞ੍ਞਾਣਕ੍ਖਨ੍ਧੋ ਨ ਵਿਞ੍ਞਾਣਨ੍ਤਿ ਪੁਚ੍ਛਾਯ ਚ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ. ਇਮਿਨਾਵ ਨਯੇਨ ਇਤੋ ਪਰੇਸੁਪਿ ਸਬ੍ਬਤ੍ਥ ਵਿਸ੍ਸਜ੍ਜਨਨਯੋ ਵੇਦਿਤਬ੍ਬੋ, ਵਿਸੇਸਮਤ੍ਤਮੇਵ ਪਨ ਵਕ੍ਖਾਮ.

ਪਦਸੋਧਨਮੂਲਚਕ੍ਕਵਾਰੇ ਪਨ ਅਯਂ ਵਿਸੇਸੋ – ਖਨ੍ਧਾ ਵੇਦਨਾਕ੍ਖਨ੍ਧੋਤਿ ਯੇ ਕੇਚਿ ਖਨ੍ਧਾ, ਸਬ੍ਬੇ ਤੇ ਵੇਦਨਾਕ੍ਖਨ੍ਧੋਤਿ ਪੁਚ੍ਛਾ. ਤਸ੍ਸਾ ‘‘ਵੇਦਨਾਕ੍ਖਨ੍ਧੋ ਖਨ੍ਧੋ ਚੇਵ ਵੇਦਨਾਕ੍ਖਨ੍ਧੋ ਚ, ਅਵਸੇਸਾ ਪਨ ਖਨ੍ਧਾ, ਨ ਵੇਦਨਾਕ੍ਖਨ੍ਧੋ’’ਤਿ ਵਿਸ੍ਸਜ੍ਜਨਂ. ਸੇਸੇਸੁਪਿ ਏਸੇਵ ਨਯੋ. ਪਟਿਲੋਮੇ ਪਨ ਨ ਖਨ੍ਧਾ ਨ ਵੇਦਨਾਕ੍ਖਨ੍ਧੋਤਿ ਪੁਚ੍ਛਾਯ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ. ਏਤ੍ਥ ਚ ਯੇ ਪਞ੍ਞਤ੍ਤਿਨਿਬ੍ਬਾਨਸਙ੍ਖਾਤਾ ਧਮ੍ਮਾ ਖਨ੍ਧਾਪਿ ਨ ਹੋਨ੍ਤਿ, ਤੇ ਯਸ੍ਮਾ ਵੇਦਨਾਕ੍ਖਨ੍ਧੋਪਿ ਨ ਹੋਤਿ, ਤਸ੍ਮਾ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ, ਸੇਸਂ ਸੁਵਿਞ੍ਞੇਯ੍ਯਮੇਵ. ਪਦਸੋਧਨਮੂਲਚਕ੍ਕਵਾਰੋ.

ਸੁਦ੍ਧਖਨ੍ਧਵਾਰੇ ਪਨ ‘‘ਰੂਪਂ ਖਨ੍ਧੋ’’ਤਿ ਪੁਚ੍ਛਾਯ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ ਪਿਯਰੂਪਾਦੀਨਞ੍ਚ ਪਞ੍ਚਸੁ ਖਨ੍ਧੇਸੁ ਸਙ੍ਗਹਿਤਤ੍ਤਾ. ‘‘ਖਨ੍ਧਾ ਰੂਪ’’ਨ੍ਤਿਆਦੀਸੁ ਯੇ ਕੇਚਿ ਖਨ੍ਧਾ, ਸਬ੍ਬੇ ਤੇ ਰੂਪਕ੍ਖਨ੍ਧੋਤਿਆਦਿਨਾ ਅਤ੍ਥੋ ਗਹੇਤਬ੍ਬੋ. ਤੇਨੇਵ ਹਿਸ੍ਸ ਨਿਦ੍ਦੇਸੇ ‘‘ਖਨ੍ਧਾ ਰੂਪ’’ਨ੍ਤਿਆਦਿਨਾ ਪਦਂ ਅਨੁਦ੍ਧਰਿਤ੍ਵਾ ‘‘ਖਨ੍ਧਾ ਰੂਪਕ੍ਖਨ੍ਧੋ’’ਤਿਆਦਿਨਾ ਅਤ੍ਥਵਸੇਨੇਵ ਪਦਂ ਉਦ੍ਧਰਿਤ੍ਵਾ ‘‘ਰੂਪਕ੍ਖਨ੍ਧੋ ਖਨ੍ਧੋ ਚੇਵ ਰੂਪਕ੍ਖਨ੍ਧੋ ਚ, ਅਵਸੇਸਾ ਖਨ੍ਧਾ, ਨ ਰੂਪਕ੍ਖਨ੍ਧੋ’’ਤਿ ਵਿਸ੍ਸਜ੍ਜਨਂ ਕਤਂ. ਤੇਨੇਵ ਚ ਕਾਰਣੇਨ ਸੁਦ੍ਧਖਨ੍ਧਵਾਰੋਤਿ ਵੁਤ੍ਤੋ. ਵਚਨਸੋਧਨੇ ਵਿਯ ਹਿ ਏਤ੍ਥ ਨ ਵਚਨਂ ਪਮਾਣਂ, ਯਥਾ ਪਨ ਸੁਦ੍ਧਖਨ੍ਧਾ ਲਬ੍ਭਨ੍ਤਿ, ਤਥਾ ਤਥਾ ਅਤ੍ਥੋਵ ਪਮਾਣਂ. ਪਰਤੋ ਆਯਤਨਯਮਕਮਾਤਿਕਾਦੀਸੁਪਿ ਏਸੇਵ ਨਯੋ. ਪਟਿਲੋਮੇ ‘‘ਨ ਰੂਪਂ ਨ ਖਨ੍ਧੋ’’ਤਿ ਯਂ ਧਮ੍ਮਜਾਤਂ ਰੂਪਂ ਨ ਹੋਤਿ, ਤਂ ਖਨ੍ਧੋਪਿ ਨ ਹੋਤੀਤਿ ਪੁਚ੍ਛਾ, ਤਸ੍ਸਾ ‘‘ਰੂਪਕ੍ਖਨ੍ਧਵਿਰਹਿਤਾ ਖਨ੍ਧਾ, ਨ ਰੂਪਂ, ਤਥਾ ਨਿਬ੍ਬਾਨਂ ਨ ਪਨ ਰੂਪਞ੍ਚੇਵ ਨ ਖਨ੍ਧੋ ਚਾ’’ਤਿ ਵਿਸ੍ਸਜ੍ਜਨਂ. ਸੇਸਂ ਸੁਵਿਞ੍ਞੇਯ੍ਯਮੇਵ. ਸੁਦ੍ਧਖਨ੍ਧਵਾਰੋ.

ਸੁਦ੍ਧਖਨ੍ਧਮੂਲਚਕ੍ਕਵਾਰੇਪਿ ‘‘ਖਨ੍ਧਾ ਵੇਦਨਾਕ੍ਖਨ੍ਧੋ’’ਤਿਆਦਿਨਾ ਹੇਟ੍ਠਾ ਵੁਤ੍ਤਨਯੇਨ ਅਤ੍ਥੋ ਵੇਦਿਤਬ੍ਬੋਤਿ ਅਯਂ ਪਣ੍ਣਤ੍ਤਿਵਾਰੇ ਨਯੋ.

ਯਸ੍ਮਾ ਪਨ ਨਿਦ੍ਦੇਸੇ ਇਮਿਸ੍ਸਾ ਪਨ ਮਾਤਿਕਾਯ ਪਣ੍ਣਤ੍ਤਿਵਾਰਸਙ੍ਖਾਤਂ ਨਿਦ੍ਦੇਸਂ ਵਤ੍ਵਾ ਤਤੋ ਇਮਂ ਮਾਤਿਕਾਕ੍ਕਮਂ ਮੁਞ੍ਚਿਤ੍ਵਾ ਅਪਰੇਨ ਪਰਿਯਾਯੇਨ ਅਞ੍ਞੇਪਿ ਉਦ੍ਦੇਸਵਾਰਵਿਰਹਿਤਾ ‘‘ਪਵਤ੍ਤਿਵਾਰੋ ਪਰਿਞ੍ਞਾਵਾਰੋ’’ਤਿ ਦ੍ਵੇ ਮਹਾਵਾਰਾ ਪੁਚ੍ਛਾਵਿਸ੍ਸਜ੍ਜਨਵਸੇਨ ਵੁਤ੍ਤਾ, ਤਸ੍ਮਾ ਤੇਸਂ ਦ੍ਵਿਨ੍ਨਮ੍ਪਿ ਵਾਰਾਨਂ ਨਯੋ ਦਸ੍ਸੇਤਬ੍ਬੋ. ਤਤੋ ਪਵਤ੍ਤਿਵਾਰੇ ਤਾਵ ਪਾਲ਼ਿਵਵਤ੍ਥਾਨਪੁਬ੍ਬਿਕਾ ਮੁਖਮਤ੍ਤਪ੍ਪਕਾਸਨਾ – ਇਮਸ੍ਮਿਂ ਹਿ ਉਪ੍ਪਾਦਵਾਰੋ ਨਿਰੋਧਵਾਰੋ ਉਪ੍ਪਾਦਨਿਰੋਧਵਾਰੋਤਿ ਤਯੋ ਅਨ੍ਤਰਵਾਰਾ ਹੋਨ੍ਤਿ. ਤਤ੍ਥ ਉਪ੍ਪਾਦਵਾਰੇ ਤਾਵ ਤਿਣ੍ਣਂ ਅਦ੍ਧਾਨਂ ਵਸੇਨ ਛ ਕਾਲਭੇਦਾ ਹੋਨ੍ਤਿ ਪਚ੍ਚੁਪ੍ਪਨ੍ਨੋ, ਅਤੀਤੋ, ਅਨਾਗਤੋ, ਪਚ੍ਚੁਪ੍ਪਨ੍ਨੇਨਾਤੀਤੋ, ਪਚ੍ਚੁਪ੍ਪਨ੍ਨੇਨਾਨਾਗਤੋ, ਅਤੀਤੇਨਾਨਾਗਤੋਤਿ. ਏਵਮੇਤੇਸੁ ਛਸੁ ਕਾਲਭੇਦੇਸੁ ਯ੍ਵਾਯਂ ਪਠਮੋ ਪਚ੍ਚੁਪ੍ਪਨ੍ਨੋ, ਤਤ੍ਥ ਪੁਗ੍ਗਲਤੋ ਓਕਾਸਤੋ ਪੁਗ੍ਗਲੋਕਾਸਤੋਤਿ ਤਯੋ ਵਾਰਾ ਹੋਨ੍ਤਿ.

ਤਤ੍ਥ ‘‘ਯਸ੍ਸ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ, ਤਸ੍ਸ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਤੀਤਿ? ਅਸਞ੍ਞਸਤ੍ਤਂ ਉਪਪਜ੍ਜਨ੍ਤਾਨਂ ਤੇਸਂ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ, ਨੋ ਚ ਤੇਸਂ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਤਿ. ਪਞ੍ਚਵੋਕਾਰਂ ਉਪਪਜ੍ਜਨ੍ਤਾਨਂ ਤੇਸਂ ਰੂਪਕ੍ਖਨ੍ਧੋ ਚ ਉਪ੍ਪਜ੍ਜਤਿ, ਵੇਦਨਾਕ੍ਖਨ੍ਧੋ ਚ ਉਪ੍ਪਜ੍ਜਤਿ. ਯਸ੍ਸ ਵਾ ਪਨ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਤਿ, ਤਸ੍ਸ ਰੂਪਕ੍ਖਨ੍ਧੋ ਉਪ੍ਪਜ੍ਜਤੀਤਿ? ਅਰੂਪਂ ਉਪਪਜ੍ਜਨ੍ਤਾਨਂ ਤੇਸਂ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਤਿ, ਨੋ ਚ ਤੇਸਂ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ. ਪਞ੍ਚਵੋਕਾਰਂ ਉਪਪਜ੍ਜਨ੍ਤਾਨਂ ਤੇਸਂ ਵੇਦਨਾਕ੍ਖਨ੍ਧੋ ਚ ਉਪ੍ਪਜ੍ਜਤਿ, ਰੂਪਕ੍ਖਨ੍ਧੋ ਚ ਉਪ੍ਪਜ੍ਜਤਿ. ਯਸ੍ਸ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ…ਪੇ… ਤਸ੍ਸ ਵਿਞ੍ਞਾਣਕ੍ਖਨ੍ਧੋ ਉਪ੍ਪਜ੍ਜਤਿ…ਪੇ… ਯਸ੍ਸ ਵਾ ਪਨ ਵਿਞ੍ਞਾਣਕ੍ਖਨ੍ਧੋ ਉਪ੍ਪਜ੍ਜਤਿ, ਤਸ੍ਸ ਰੂਪਕ੍ਖਨ੍ਧੋ ਉਪ੍ਪਜ੍ਜਤੀਤਿ…ਪੇ… ਪਞ੍ਚਵੋਕਾਰਂ …ਪੇ… ਉਪ੍ਪਜ੍ਜਤੀ’’ਤਿ ਏਵਂ ਰੂਪਕ੍ਖਨ੍ਧਮੂਲਕਾਨਿ ਚਤ੍ਤਾਰਿ, ‘‘ਯਸ੍ਸ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਤਿ, ਤਸ੍ਸ ਸਞ੍ਞਾਕ੍ਖਨ੍ਧੋ ਉਪ੍ਪਜ੍ਜਤੀ’’ਤਿਆਦਿਨਾ ਚ ਵੇਦਨਾਕ੍ਖਨ੍ਧਮੂਲਕਾਨਿ ਤੀਣਿ, ਸਞ੍ਞਾਕ੍ਖਨ੍ਧਮੂਲਕਾਨਿ ਦ੍ਵੇ, ਸਙ੍ਖਾਰਕ੍ਖਨ੍ਧਮੂਲਕਂ ਏਕਨ੍ਤਿ ਏਵਮੇਤਾਨਿ ਪਚ੍ਚੁਪ੍ਪਨ੍ਨਕਾਲੇ ਪੁਗ੍ਗਲਵਾਰੇ ਅਨੁਲੋਮਨਯੇ ਦਸ ਯਮਕਾਨਿ ਹੋਨ੍ਤਿ. ਤਤ੍ਥ ਰੂਪਕ੍ਖਨ੍ਧਮੂਲਕੇਸੁ ਚਤੂਸੁ ਆਦਿਤੋ ਏਕਮੇਵ ਪਾਲ਼ਿਯਂ ਵਿਸ੍ਸਜ੍ਜਿਤਂ, ਸੇਸਾਨਿ ਤੇਨ ਸਦਿਸਵਿਸ੍ਸਜ੍ਜਨਾਨੀਤਿ ਤਨ੍ਤਿਯਾ ਲਹੁਭਾਵਤ੍ਥਂ ਸਂਖਿਤ੍ਤਾਨਿ.

ਵੇਦਨਾਕ੍ਖਨ੍ਧਮੂਲਕੇ ਪਨ ਸਬ੍ਬਤ੍ਥ ‘‘ਆਮਨ੍ਤਾ’’ਤਿ ਏਕਸਦਿਸਮੇਵ ਵਿਸ੍ਸਜ੍ਜਨਂ. ਵੇਦਨਾਦੀਸੁ ਉਪ੍ਪਨ੍ਨੇਸੁ ਨਿਯਮੇਨ ਸਞ੍ਞਾਦੀਨਂ ਉਪ੍ਪਜ੍ਜਨਤੋ ਤਤ੍ਥ ਸਬ੍ਬਾਨਿ ਸਂਖਿਤ੍ਤਾਨਿ. ਯਥਾ ਚ ਪੁਗ੍ਗਲਵਾਰੇ ਦਸ ਯਮਕਾਨਿ, ਏਵਂ ਓਕਾਸਵਾਰੇਪਿ ‘‘ਯਤ੍ਥ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ, ਤਤ੍ਥ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਤੀਤਿ? ਅਸਞ੍ਞਸਤ੍ਤੇ ਤਤ੍ਥ…ਪੇ… ਪਞ੍ਚਵੋਕਾਰੇ ਤਤ੍ਥ…ਪੇ… ਉਪ੍ਪਜ੍ਜਤੀ’’ਤਿਆਦਿਨਾ, ਪੁਗ੍ਗਲੋਕਾਸਵਾਰੇਪਿ ‘‘ਯਸ੍ਸ ਯਤ੍ਥ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ, ਤਸ੍ਸ ਤਤ੍ਥ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਤੀਤਿ? ਅਸਞ੍ਞਸਤ੍ਤਂ…ਪੇ… ਪਞ੍ਚਵੋਕਾਰਂ…ਪੇ… ਉਪ੍ਪਜ੍ਜਤੀ’’ਤਿਆਦਿਨਾ. ਪਚ੍ਚੁਪ੍ਪਨ੍ਨਕਾਲੇ ਤੀਸੁ ਵਾਰੇਸੁ ਅਨੁਲੋਮਨਯੇ ਤਿਂਸ ਯਮਕਾ ਹੋਨ੍ਤਿ. ਯਥਾ ਅਨੁਲੋਮਨਯੇ ਤਿਂਸ, ਏਵਂ ਪਟਿਲੋਮਨਯੇਪਿ ‘‘ਯਸ੍ਸ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤਿ, ਤਸ੍ਸ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਤੀਤਿ? ਅਰੂਪਂ ਉਪਪਜ੍ਜਨ੍ਤਾਨਂ ਤੇਸਂ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤਿ, ਨੋ ਚ ਤੇਸਂ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਤਿ. ਸਬ੍ਬੇਸਂ ਚਵਨ੍ਤਾਨਂ ਤੇਸਂ ਰੂਪਕ੍ਖਨ੍ਧੋ ਚ ਨੁਪ੍ਪਜ੍ਜਤਿ ਵੇਦਨਾਕ੍ਖਨ੍ਧੋ ਚ ਨੁਪ੍ਪਜ੍ਜਤਿ. ਯਸ੍ਸ ਵਾ ਪਨ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਤਿ, ਤਸ੍ਸ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤੀਤਿ? ਅਸਞ੍ਞਸਤ੍ਤਂ ਉਪਪਜ੍ਜਨ੍ਤਾਨਂ ਤੇਸਂ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਤਿ, ਨੋ ਚ ਤੇਸਂ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤਿ. ਸਬ੍ਬੇਸਂ ਚਵਨ੍ਤਾਨਂ ਤੇਸਂ ਵੇਦਨਾਕ੍ਖਨ੍ਧੋ ਚ ਨੁਪ੍ਪਜ੍ਜਤਿ ਰੂਪਕ੍ਖਨ੍ਧੋ ਚ ਨੁਪ੍ਪਜ੍ਜਤੀ’’ਤਿਆਦਿਨਾ, ‘‘ਯਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤਿ, ਤਤ੍ਥ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਤੀਤਿ? ਉਪ੍ਪਜ੍ਜਤਿ. ਯਤ੍ਥ ਵਾ ਪਨ…ਪੇ… ਨੁਪ੍ਪਜ੍ਜਤੀਤਿ? ਉਪ੍ਪਜ੍ਜਤੀ’’ਤਿਆਦਿਨਾ ਚ, ‘‘ਯਸ੍ਸ ਯਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤਿ, ਤਸ੍ਸ ਤਤ੍ਥ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਤੀਤਿ…ਪੇ… ਸਬ੍ਬੇਸਂ ਚਵਨ੍ਤਾਨਂ ਤਦੁਭਯਂ ਨੁਪ੍ਪਜ੍ਜਤੀ’’ਤਿਆਦਿਨਾ ਚਾਤਿ ਤਿਂਸ ਯਮਕਾ. ਏਵਂ ਪਚ੍ਚੁਪ੍ਪਨ੍ਨਕਾਲੇ ਸਟ੍ਠਿ ਯਮਕਾਨਿ, ਤਦ੍ਦਿਗੁਣਾ ਪੁਚ੍ਛਾ, ਤਦ੍ਦਿਗੁਣਾ ਚ ਅਤ੍ਥਾ ਵੇਦਿਤਬ੍ਬਾ.

ਤਤ੍ਥ ਯਸ੍ਸ ਰੂਪਕ੍ਖਨ੍ਧੋ ਉਪ੍ਪਜ੍ਜਤੀਤਿ ਯਸ੍ਸ ਪੁਗ੍ਗਲਸ੍ਸ ਪਟਿਸਨ੍ਧਿਕ੍ਖਣੇ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ. ਤਸ੍ਸ ਵੇਦਨਾਕ੍ਖਨ੍ਧੋਤਿ ਵੇਦਨਾਕ੍ਖਨ੍ਧੋਪਿ ਤਸ੍ਸ ਤਸ੍ਮਿਂਯੇਵ ਖਣੇ ਉਪ੍ਪਜ੍ਜਤੀਤਿ ਅਤ੍ਥੋ ਇਮਿਨਾਵ ਨਯੇਨ. ਤਤ੍ਥ ਅਸਞ੍ਞਸਤ੍ਤਨ੍ਤਿ ਅਸਞ੍ਞਤ੍ਤਭਵਂ ਪਟਿਸਨ੍ਧਿਵਸੇਨ ਉਪਪਜ੍ਜਨ੍ਤਾਨਂ ਤੇਸਂ ਉਪ੍ਪਜ੍ਜਨਕ੍ਖਣੇ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ, ਨੋ ਚ ਤੇਸਂ ਅਚਿਤ੍ਤਕਤ੍ਤਾ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਤੀਤਿ ਅਤ੍ਥੋ. ਇਮਿਨਾਵ ਨਯੇਨ ‘‘ਯਸ੍ਸ ਵਾ ਪਨ ਵੇਦਨਾਕ੍ਖਨ੍ਧੋ’’ਤਿਆਦਿਕੇਸੁ ਪੁਚ੍ਛਾਵਿਸ੍ਸਜ੍ਜਨੇਸੁ, ਤਤੋ ਪਰੇਸੁਪਿ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.

ਇਦਂ ਪਨੇਤ੍ਥ ਉਪ੍ਪਾਦਨਿਰੋਧੇਸੁ ਨਿਯਮਲਕ੍ਖਣਂ – ਸਕਲੇਪਿ ਹਿ ਇਮਸ੍ਮਿਂ ਖਨ੍ਧਯਮਕੇ ਤਤ੍ਥ ਤਤ੍ਥ ਉਪ੍ਪਨ੍ਨਾਨਂ ਸਤ੍ਤਾਨਂ ਪਵਤ੍ਤੇ ਯਾਵ ਮਰਣਾ ਵਾ ਖਨ੍ਧਾਨਂ ਅਪਰਿਯਨ੍ਤੇਸੁ ਉਪ੍ਪਾਦਨਿਰੋਧੇਸੁ ਵਿਜ੍ਜਮਾਨੇਸੁਪਿ ਲਹੁਪਰਿਵਤ੍ਤਾਨਂ ਧਮ੍ਮਾਨਂ ਵਿਨਿਬ੍ਭੋਗਂ ਕਤ੍ਵਾ ਉਪ੍ਪਾਦਨਿਰੋਧੇ ਦਸ੍ਸੇਤੁਂ ਨ ਸੁਕਰਨ੍ਤਿ ਪਵਤ੍ਤਿਯਂ ਉਪ੍ਪਾਦਨਿਰੋਧੇ ਅਨਾਮਸਿਤ੍ਵਾ ਪਟਿਸਨ੍ਧਿਉਪ੍ਪਾਦਵਸੇਨੇਵ ਉਪ੍ਪਾਦਵਾਰੋ, ਨਿਰੋਧਮਰਣਕਾਲੇ ਨਿਰੋਧਵਸੇਨੇਵ ਚ ਨਿਰੋਧਵਾਰੋ ਕਥਿਤੋ. ਏਵਮੇਤ੍ਥ ਉਪ੍ਪਾਦਨਿਰੋਧੇਸੁ ਨਿਯਮਲਕ੍ਖਣਂ ਵਿਦਿਤ੍ਵਾ ਪਟਿਸਨ੍ਧਿਉਪ੍ਪਾਦਮੇਵ ਚ ਚੁਤਿਨਿਰੋਧਮੇਵ ਚ ਗਹੇਤ੍ਵਾ ਤੇਸੁ ਤੇਸੁ ਠਾਨੇਸੁ ਆਗਤਾਨਂ ਪੁਚ੍ਛਾਵਿਸ੍ਸਜ੍ਜਨਾਨਂ ਅਤ੍ਥਵਿਨਿਚ੍ਛਯੋ ਵੇਦਿਤਬ੍ਬੋ.

ਪਟਿਲੋਮਨਯੇ ਪਨ ਸਬ੍ਬੇਸਂ ਚਵਨ੍ਤਾਨਨ੍ਤਿ ਮਰਣਚਿਤ੍ਤਸ੍ਸ ਭਙ੍ਗਕ੍ਖਣਸਮਨ੍ਨਾਗਤਾਨਂ. ਤੇਸਂ ਹਿ ਤਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤਿ, ਵੇਦਨਾਕ੍ਖਨ੍ਧੋ ਚ ਚੁਤਿਚਿਤ੍ਤਸ੍ਸ ਉਪ੍ਪਤ੍ਤਿਕ੍ਖਣੇ ਏਵ ਉਪ੍ਪਨ੍ਨਤ੍ਤਾ. ‘‘ਯਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤਿ, ਤਤ੍ਥ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਤੀ’’ਤਿ ਪੁਚ੍ਛਾਯ ਅਰੂਪਭਵਂ ਸਨ੍ਧਾਯ ‘‘ਉਪ੍ਪਜ੍ਜਤੀ’’ਤਿ ਇਦਂ ਵਿਸ੍ਸਜ੍ਜਨਂ ਕਤਂ, ਅਨਨ੍ਤਰਪੁਚ੍ਛਾਯ ਅਸਞ੍ਞਿਭਵਂ ਸਨ੍ਧਾਯ ‘‘ਉਪ੍ਪਜ੍ਜਤੀ’’ਤਿ ਇਦਂ ਵਿਸ੍ਸਜ੍ਜਨਨ੍ਤਿ ਵੇਦਿਤਬ੍ਬਂ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ ਅਯਂ ਪਚ੍ਚੁਪ੍ਪਨ੍ਨਕਾਲੇ ਨਯੋ.

ਯਥਾ ਚ ਪਚ੍ਚੁਪ੍ਪਨ੍ਨਕਾਲੇ ਸਟ੍ਠਿ ਯਮਕਾਦੀਨਿ, ਏਵਂ ਸੇਸੇਸੁਪਿ ਪਞ੍ਚਸੁ ਕਾਲਭੇਦੇਸੁ ਪਚ੍ਚੇਕਨ੍ਤਿ ਗਹੇਤਬ੍ਬਂ. ਪੁਚ੍ਛਾਵਿਸ੍ਸਜ੍ਜਨੇਸੁ ਪਨੇਤ੍ਥ ਕਿਞ੍ਚਾਪਿ ‘‘ਯਸ੍ਸ ਰੂਪਕ੍ਖਨ੍ਧੋ ਉਪ੍ਪਜ੍ਜਿਤ੍ਥ, ਤਸ੍ਸ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਤ੍ਥਾਤਿ? ਆਮਨ੍ਤਾ’’ਤਿਆਦਿਨਾ, ‘‘ਯਤ੍ਥ ਰੂਪਕ੍ਖਨ੍ਧੋ ਉਪ੍ਪਜ੍ਜਿਤ੍ਥ, ਤਤ੍ਥ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਤ੍ਥਾਤਿ? ਪਞ੍ਚਵੋਕਾਰੇ ਉਪ੍ਪਜ੍ਜਿਤ੍ਥ, ਨਾਞ੍ਞਤ੍ਥਾ’’ਤਿਆਦਿਨਾ ਚ, ‘‘ਯਸ੍ਸ ਯਤ੍ਥ ਰੂਪਕ੍ਖਨ੍ਧੋ ਉਪ੍ਪਜ੍ਜਿਤ੍ਥ, ਤਸ੍ਸ ਤਤ੍ਥ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਤ੍ਥਾਤਿ? ਪਞ੍ਚਵੋਕਾਰਾਨਂ ਤੇਸਂ ਤਤ੍ਥ ਉਪ੍ਪਜ੍ਜਿਤ੍ਥ, ਨਾਞ੍ਞਤ੍ਥਾ’’ਤਿਆਦਿਨਾ ਚ ਅਤੀਤਕਾਲੇ ਅਨੁਲੋਮਨਯੇ, ‘‘ਯਸ੍ਸ ਰੂਪਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥ, ਤਸ੍ਸ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥਾਤਿ? ਨਤ੍ਥੀ’’ਤਿਆਦਿਨਾ, ‘‘ਯਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥ, ਤਤ੍ਥ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥਾਤਿ? ਉਪ੍ਪਜ੍ਜਿਤ੍ਥਾ’’ਤਿਆਦਿਨਾ, ‘‘ਯਸ੍ਸ ਯਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥ, ਤਸ੍ਸ ਤਤ੍ਥ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥਾਤਿ? ਅਰੂਪਾਨਂ ਤੇਸਂ ਤਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥ, ਨੋ ਚ ਤੇਸਂ…ਪੇ… ਸੁਦ੍ਧਾਵਾਸਾਨਂ ਤੇਸਂ ਤਤ੍ਥ ਤਦੁਭਯਂ ਨੁਪ੍ਪਜ੍ਜਿਤ੍ਥਾ’’ਤਿਆਦਿਨਾ ਤੀਸੁ ਵਾਰੇਸੁ ਪਟਿਲੋਮਨਯੇ ਚ,

‘‘ਯਸ੍ਸ ਰੂਪਕ੍ਖਨ੍ਧੋ ਉਪ੍ਪਜ੍ਜਿਸ੍ਸਤਿ, ਤਸ੍ਸ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਸ੍ਸਤੀਤਿ? ਆਮਨ੍ਤਾ’’ਤਿਆਦਿਨਾ, ‘‘ਯਤ੍ਥ ਰੂਪਕ੍ਖਨ੍ਧੋ ਉਪ੍ਪਜ੍ਜਿਸ੍ਸਤਿ, ਤਤ੍ਥ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਸ੍ਸਤੀਤਿ…ਪੇ… ਪਞ੍ਚਵੋਕਾਰੇ ਉਪ੍ਪਜ੍ਜਿਸ੍ਸਤੀ’’ਤਿਆਦਿਨਾ, ‘‘ਯਸ੍ਸ ਯਤ੍ਥ ਰੂਪਕ੍ਖਨ੍ਧੋ ਉਪ੍ਪਜ੍ਜਿਸ੍ਸਤਿ, ਤਸ੍ਸ ਤਤ੍ਥ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਸ੍ਸਤਿ…ਪੇ… ਪਞ੍ਚਵੋਕਾਰਾਨਂ ਤੇਸਂ ਤਤ੍ਥ ਉਪ੍ਪਜ੍ਜਿਸ੍ਸਤੀ’’ਤਿਆਦਿਨਾ ਚ ਅਨਾਗਤਕਾਲੇ ਅਨੁਲੋਮਨਯੇ, ‘‘ਯਸ੍ਸ ਰੂਪਕ੍ਖਨ੍ਧੋ ਨੁਪ੍ਪਜ੍ਜਿਸ੍ਸਤਿ, ਤਸ੍ਸ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਸ੍ਸਤੀਤਿ? ਯੇ ਅਰੂਪਂ ਉਪਪਜ੍ਜਿਤ੍ਵਾ ਪਰਿਨਿਬ੍ਬਾਯਿਸ੍ਸਨ੍ਤਿ, ਤੇਸਂ ਰੂਪਕ੍ਖਨ੍ਧੋ ਨੁਪ੍ਪਜ੍ਜਿਸ੍ਸਤਿ, ਨੇਤਰੋ, ਪਚ੍ਛਿਮਭਵਿਕਾਨਂ ਤਦੁਭਯਂ ਨੁਪ੍ਪਜ੍ਜਿਸ੍ਸਤੀ’’ਤਿਆਦਿਨਾ, ‘‘ਯਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਿਸ੍ਸਤਿ, ਤਤ੍ਥ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਸ੍ਸਤੀ’’ਤਿਆਦਿਨਾ, ‘‘ਯਸ੍ਸ ਯਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਿਸ੍ਸਤਿ, ਤਸ੍ਸ ਤਤ੍ਥ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਸ੍ਸਤੀਤਿ? ਅਰੂਪਾਨਂ ਤੇਸਂ ਤਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਿਸ੍ਸਤਿ, ਨੇਤਰੋ, ਪਚ੍ਛਿਮਭਵਿਕਾਨਂ ਤਦੁਭਯਂ ਨੁਪ੍ਪਜ੍ਜਿਸ੍ਸਤੀ’’ਤਿਆਦਿਨਾ ਪਟਿਲੋਮਨਯੇ ਚ,

‘‘ਯਸ੍ਸ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ, ਤਸ੍ਸ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਤ੍ਥਾ’’ਤਿਆਦਿਨਾ, ‘‘ਯਤ੍ਥ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ, ਤਤ੍ਥ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਤ੍ਥਾਤਿ…ਪੇ… ਪਞ੍ਚਵੋਕਾਰੇ ਉਪ੍ਪਜ੍ਜਤੀ’’ਤਿਆਦਿਨਾ, ‘‘ਯਸ੍ਸ ਯਤ੍ਥ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ, ਤਸ੍ਸ ਤਤ੍ਥ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਤ੍ਥਾਤਿ? ਸੁਦ੍ਧਾਵਾਸਂ ਅਸਞ੍ਞਸਤ੍ਤਂ ਉਪਪਜ੍ਜਨ੍ਤਾਨਂ ਤੇਸਂ ਤਤ੍ਥ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ, ਨੋ ਚ ਤੇਸਂ ਤਤ੍ਥ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਤ੍ਥ, ਪਞ੍ਚਵੋਕਾਰੇ ਪਨ ਉਪ੍ਪਜ੍ਜਿਤ੍ਥਾ’’ਤਿਆਦਿਨਾ ਪਚ੍ਚੁਪ੍ਪਨ੍ਨੇਨ ਅਤੀਤਕਾਲੇ ਅਨੁਲੋਮਨਯੇ, ‘‘ਯਸ੍ਸ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤਿ, ਤਸ੍ਸ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥਾ’’ਤਿਆਦਿਨਾ, ‘‘ਯਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤਿ, ਤਤ੍ਥ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥਾਤਿ? ਉਪ੍ਪਜ੍ਜਿਤ੍ਥਾ’’ਤਿਆਦਿਨਾ, ‘‘ਯਸ੍ਸ ਯਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤਿ, ਤਸ੍ਸ ਤਤ੍ਥ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥਾਤਿ? ਪਞ੍ਚਵੋਕਾਰਾ ਚਵਨ੍ਤਾਨਂ ਅਰੂਪਾਨਞ੍ਚ ਤੇਸਂ ਤਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤਿ, ਨੋ ਚ ਤੇਸਂ ਤਤ੍ਥ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥ, ਸੁਦ੍ਧਾਵਾਸੇ ਪਰਿਨਿਬ੍ਬਨ੍ਤਾਨਂ ਅਸਞ੍ਞਸਤ੍ਤਾ ਚਵਨ੍ਤਾਨਂ ਤੇਸਂ ਤਤ੍ਥ ਰੂਪਕ੍ਖਨ੍ਧੋ ਚ ਨੁਪ੍ਪਜ੍ਜਤਿ ਵੇਦਨਾਕ੍ਖਨ੍ਧੋ ਚ ਨੁਪ੍ਪਜ੍ਜਿਤ੍ਥਾ’’ਤਿਆਦਿਨਾ ਪਟਿਲੋਮਨਯੇ ਚ,

‘‘ਯਸ੍ਸ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ, ਤਸ੍ਸ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਸ੍ਸਤੀਤਿ? ਪਚ੍ਛਿਮਭਵਿਕਾਨਂ ਪਞ੍ਚਵੋਕਾਰਂ ਉਪਪਜ੍ਜਨ੍ਤਾਨਂ ਤੇਸਂ ਰੂਪਕ੍ਖਨ੍ਧੋ ਉਪ੍ਪਜ੍ਜਤੀ’’ਤਿਆਦਿਨਾ, ‘‘ਯਤ੍ਥ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ, ਤਤ੍ਥ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਸ੍ਸਤੀਤਿ? ਪਞ੍ਚਵੋਕਾਰੇ…ਪੇ… ਉਪ੍ਪਜ੍ਜਿਸ੍ਸਤੀ’’ਤਿਆਦਿਨਾ ਚ, ‘‘ਯਸ੍ਸ ਯਤ੍ਥ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ, ਤਸ੍ਸ ਤਤ੍ਥ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਸ੍ਸਤੀਤਿ? ਪਚ੍ਛਿਮਭਵਿਕਾਨਂ ਪਞ੍ਚਵੋਕਾਰੇ…ਪੇ… ਉਪ੍ਪਜ੍ਜਿਸ੍ਸਤੀ’’ਤਿਆਦਿਨਾ ਚ ਪਚ੍ਚੁਪ੍ਪਨ੍ਨੇਨ ਅਨਾਗਤਕਾਲੇ ਅਨੁਲੋਮਨਯੇ, ‘‘ਯਸ੍ਸ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤਿ, ਤਸ੍ਸ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਸ੍ਸਤੀਤਿ ਪਞ੍ਚਵੋਕਾਰੇ ਪਰਿਨਿਬ੍ਬਨ੍ਤਾਨਂ ਅਰੂਪੇ ਪਚ੍ਛਿਮਭਵਿਕਾਨਂ…ਪੇ… ਨੁਪ੍ਪਜ੍ਜਿਸ੍ਸਤੀ’’ਤਿਆਦਿਨਾ, ‘‘ਯਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤਿ, ਤਤ੍ਥ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਸ੍ਸਤੀਤਿ? ਉਪ੍ਪਜ੍ਜਿਸ੍ਸਤੀ’’ਤਿਆਦਿਨਾ, ‘‘ਯਸ੍ਸ ਯਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤਿ, ਤਸ੍ਸ ਤਤ੍ਥ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਸ੍ਸਤੀਤਿ…ਪੇ… ਪਞ੍ਚਵੋਕਾਰੇ ਪਰਿਨਿਬ੍ਬਨ੍ਤਾਨਂ ਅਰੂਪੇ ਪਚ੍ਛਿਮਭਵਿਕਾਨਂ ਅਸਞ੍ਞਸਤ੍ਤਾ ਚਵਨ੍ਤਾਨਂ ਤੇਸਂ ਤਤ੍ਥ…ਪੇ… ਨੁਪ੍ਪਜ੍ਜਿਸ੍ਸਤੀ’’ਤਿਆਦਿਨਾ ਪਟਿਲੋਮਨਯੇ ਚ,

‘‘ਯਸ੍ਸ ਰੂਪਕ੍ਖਨ੍ਧੋ ਉਪ੍ਪਜ੍ਜਿਤ੍ਥ, ਤਸ੍ਸ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਸ੍ਸਤੀਤਿ? ਪਚ੍ਛਿਮਭਵਿਕਾਨਂ ਉਪ੍ਪਜ੍ਜਿਸ੍ਸਤੀ’’ਤਿਆਦਿਨਾ, ‘‘ਯਤ੍ਥ ਰੂਪਕ੍ਖਨ੍ਧੋ ਉਪ੍ਪਜ੍ਜਿਤ੍ਥ, ਤਤ੍ਥ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਸ੍ਸਤੀਤਿ…ਪੇ… ਪਞ੍ਚਵੋਕਾਰੇ ਉਪ੍ਪਜ੍ਜਿਸ੍ਸਤੀ’’ਤਿਆਦਿਨਾ, ‘‘ਯਸ੍ਸ ਯਤ੍ਥ ਰੂਪਕ੍ਖਨ੍ਧੋ ਉਪ੍ਪਜ੍ਜਿਤ੍ਥ, ਤਸ੍ਸ ਤਤ੍ਥ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਸ੍ਸਤੀਤਿ? ਪਞ੍ਚਵੋਕਾਰੇ ਪਚ੍ਛਿਮਭਵਿਕਾਨਂ ਅਸਞ੍ਞਸਤ੍ਤਾਨਂ…ਪੇ… ਉਪ੍ਪਜ੍ਜਿਸ੍ਸਤੀ’’ਤਿਆਦਿਨਾ ਅਤੀਤੇਨ ਅਨਾਗਤਕਾਲੇ ਅਨੁਲੋਮਨਯੇ, ‘‘ਯਸ੍ਸ ਰੂਪਕ੍ਖਨ੍ਧੋ ਉਪ੍ਪਜ੍ਜਿਤ੍ਥ, ਤਸ੍ਸ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਸ੍ਸਤੀਤਿ? ਨਤ੍ਥੀ’’ਤਿਆਦਿਨਾ, ‘‘ਯਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥ, ਤਤ੍ਥ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਸ੍ਸਤੀਤਿ? ਉਪ੍ਪਜ੍ਜਿਸ੍ਸਤੀ’’ਤਿਆਦਿਨਾ, ‘‘ਯਸ੍ਸ ਯਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥ, ਤਸ੍ਸ ਤਤ੍ਥ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਸ੍ਸਤੀਤਿ…ਪੇ… ਸੁਦ੍ਧਾਵਾਸਾਨਂ ਅਰੂਪੇ ਪਚ੍ਛਿਮਭਵਿਕਾਨਂ ਤੇਸਂ ਤਤ੍ਥ ਰੂਪਕ੍ਖਨ੍ਧੋ ਚ ਨੁਪ੍ਪਜ੍ਜਿਤ੍ਥ ਵੇਦਨਾਕ੍ਖਨ੍ਧੋ ਚ ਨੁਪ੍ਪਜ੍ਜਿਸ੍ਸਤੀ’’ਤਿਆਦਿਨਾ ਪਟਿਲੋਮਨਯੇ ਚ ਸੁਦ੍ਧਾ ਅਤ੍ਥਵਿਸੇਸਾ ਉਪਲਬ੍ਭਨ੍ਤਿ. ਤਥਾਪਿ ਗਨ੍ਥਵਿਤ੍ਥਾਰਭਯੇਨ ਅਨਵਸੇਸਤੋ ਨ ਦਸ੍ਸਯਿਸ੍ਸਾਮ, ਦਸ੍ਸਿਤਨਯੇਨੇਵ ਸਬ੍ਬਤ੍ਥ ਪੁਚ੍ਛਾਵਿਸ੍ਸਜ੍ਜਨਂ ਸਕ੍ਕਾ ਪਣ੍ਡਿਤੇਨ ਞਾਤੁਨ੍ਤਿ ਅਯਂ ਉਪ੍ਪਾਦਵਾਰੇ ਨਯੋ.

ਯਥਾ ਚ ਉਪ੍ਪਾਦਵਾਰੇ ਛਸੁ ਕਾਲਭੇਦੇਸੁ ਪਚ੍ਚੇਕਂ ਪੁਗ੍ਗਲਾਦਿਭੇਦਤੋ ਅਨੁਲੋਮਪਟਿਲੋਮਨਯੁਭਯੇਨ ਛ ਛ ਵਾਰਾ, ਏਕੇਕਸ੍ਮਿਂ ਵਾਰੇ ਦਸ ਦਸ ਕਤ੍ਵਾ ਸਟ੍ਠਿ ਸਟ੍ਠਿ ਯਮਕਾਨਿ, ਸਬ੍ਬਾਨਿਪਿ ਸਟ੍ਠਿਅਧਿਕਾਨਿ ਤੀਣਿ ਯਮਕਸਤਾਨਿ, ਤਤੋ ਦ੍ਵਿਗੁਣਾ ਪੁਚ੍ਛਾ, ਦ੍ਵਿਗੁਣਾ ਅਤ੍ਥਾ ਚ ਹੋਨ੍ਤਿ, ਏਵਂ ਨਿਰੋਧਵਾਰੇ ਉਪ੍ਪਾਦਨਿਰੋਧਵਾਰੇਪਿ ਵੇਦਿਤਬ੍ਬਾ. ਤਤ੍ਥ ਚ ‘‘ਯਸ੍ਸ ਰੂਪਕ੍ਖਨ੍ਧੋ ਨਿਰੁਜ੍ਝਤਿ, ਤਸ੍ਸ ਵੇਦਨਾਕ੍ਖਨ੍ਧੋ ਨਿਰੁਜ੍ਝਤੀਤਿ…ਪੇ… ਪਞ੍ਚਵੋਕਾਰਾ ਚਵਨ੍ਤਾਨਂ…ਪੇ… ਨਿਰੁਜ੍ਝਤੀ’’ਤਿਆਦਿਨਾ, ‘‘ਯਸ੍ਸ ਰੂਪਕ੍ਖਨ੍ਧੋ ਨ ਨਿਰੁਜ੍ਝਤਿ, ਤਸ੍ਸ ਵੇਦਨਾਕ੍ਖਨ੍ਧੋ ਨ ਨਿਰੁਜ੍ਝਤੀਤਿ…ਪੇ… ਸਬ੍ਬੇਸਂ ਉਪਪਜ੍ਜਨ੍ਤਾਨਂ…ਪੇ… ਨ ਨਿਰੁਜ੍ਝਤੀ’’ਤਿਆਦਿਨਾ ਨਿਰੋਧਵਾਰੇ, ‘‘ਯਸ੍ਸ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ, ਤਸ੍ਸ ਵੇਦਨਾਕ੍ਖਨ੍ਧੋ ਨਿਰੁਜ੍ਝਤੀਤਿ? ਨੋ. ਯਸ੍ਸ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤਿ, ਤਸ੍ਸ ਵੇਦਨਾਕ੍ਖਨ੍ਧੋ ਨ ਨਿਰੁਜ੍ਝਤੀਤਿ…ਪੇ… ਅਰੂਪਂ ਉਪਪਜ੍ਜਨ੍ਤਾਨਂ ਅਸਞ੍ਞਸਤ੍ਤਾ ਚਵਨ੍ਤਾਨਂ ਤੇਸਂ ਰੂਪਕ੍ਖਨ੍ਧੋ ਚ ਨੁਪ੍ਪਜ੍ਜਤਿ, ਵੇਦਨਾਕ੍ਖਨ੍ਧੋ ਚ ਨ ਨਿਰੁਜ੍ਝਤੀ’’ਤਿਆਦਿਨਾ ਉਪ੍ਪਾਦਨਿਰੋਧਵਾਰੇ ਚ ਹੇਟ੍ਠਾ ਵੁਤ੍ਤਾਨੁਸਾਰੇਨ ਸਬ੍ਬਤ੍ਥ ਪੁਚ੍ਛਾਵਿਸ੍ਸਜ੍ਜਨਨਯੋ ਞਾਤਬ੍ਬੋਤਿ ਅਯਂ ਪਵਤ੍ਤਿਵਾਰੇ ਨਯੋ.

ਪਰਿਞ੍ਞਾਵਾਰੇ ਪਨ ਪੁਗ੍ਗਲਵਾਰਾਦੀਸੁ ਤੀਸੁ ਪੁਗ੍ਗਲਵਾਰੋ ਏਕੋਵ ਲਬ੍ਭਤਿ, ਨ ਓਕਾਸਪੁਗ੍ਗਲੋਕਾਸਵਾਰਾ ਸਦਿਸਵਿਸ੍ਸਜ੍ਜਨਤ੍ਤਾ. ਯੋ ਹਿ ਕੋਚਿ ਪੁਗ੍ਗਲੋ ਰੂਪਾਦਿਂ ਪਰਿਜਾਨਨ੍ਤੋਵ, ਯਤ੍ਥ ਕਤ੍ਥਚਿ ਨਿਰੁਦ੍ਧੋਪਿ ਤਾਦਿਸੋਵ ਹੋਤਿ, ਤਸ੍ਮਾ ਛਸੁ ਕਾਲਭੇਦੇਸੁ ਅਨੁਲੋਮਤੋ ਪੁਗ੍ਗਲਵਸੇਨ ਦ੍ਵੇ ਦ੍ਵੇ ਵਾਰਾ, ਏਕੇਕਸ੍ਮਿਂ ਵਾਰੇ ਦਸ ਦਸ ਕਤ੍ਵਾ ਵੀਸਤਿ ਵੀਸਤਿ ਯਮਕਾਨੀਤਿ ਵੀਸਂ ਯਮਕਸਤਂ, ਤਦ੍ਦਿਗੁਣਾ ਪੁਚ੍ਛਾ, ਤਦ੍ਦਿਗੁਣਾ ਚ ਅਤ੍ਥਾ ਵੇਦਿਤਬ੍ਬਾ. ਤਤ੍ਥ ਚ ‘‘ਯੋ ਰੂਪਕ੍ਖਨ੍ਧਂ ਪਰਿਜਾਨਾਤਿ, ਸੋ ਵੇਦਨਾਕ੍ਖਨ੍ਧਂ ਪਰਿਜਾਨਾਤੀਤਿ? ਆਮਨ੍ਤਾ’’ਤਿਆਦਿਨਾ ਚ, ‘‘ਯੋ ਰੂਪਕ੍ਖਨ੍ਧਂ ਨ ਪਰਿਜਾਨਾਤਿ, ਸੋ ਵੇਦਨਾਕ੍ਖਨ੍ਧਂ ਨ ਪਰਿਜਾਨਾਤੀਤਿ? ਆਮਨ੍ਤਾ’’ਤਿ ਆਦਿਨਾ ਚ ਅਨੁਲੋਮਪਟਿਲੋਮਤੋ ਆਦਿਤੋ ਤੀਸੁ ਕਾਲੇਸੁ ਸਬ੍ਬਪੁਚ੍ਛਾਨਂ ‘‘ਆਮਨ੍ਤਾ ਆਮਨ੍ਤਾ’’ਤ੍ਵੇਵ ਵਿਸ੍ਸਜ੍ਜਨਂ. ਇਤਰੇਸੁ ਪਨ ਤੀਸੁ ਮਿਸ੍ਸਕਕਾਲੇਸੁ ‘‘ਯੋ ਰੂਪਕ੍ਖਨ੍ਧਂ ਪਰਿਜਾਨਾਤਿ, ਸੋ ਵੇਦਨਾਕ੍ਖਨ੍ਧਂ ਪਰਿਜਾਨਿਤ੍ਥਾਤਿ? ਨੋ. ਯੋ ਵਾ ਪਨ…ਪੇ… ਨੋ’’ਤਿ ਏਵਂ ਇਤਰਕਾਲਦ੍ਵਯੇਪਿ ਅਨੁਲੋਮਨਯੇ ‘‘ਨੋ ਨੋ’’ਤ੍ਵੇਵ ਵਿਸ੍ਸਜ੍ਜਨਂ.

ਪਟਿਲੋਮਨਯੇ ਪਨ ‘‘ਯੋ ਰੂਪਕ੍ਖਨ੍ਧਂ ਨ ਪਰਿਜਾਨਾਤਿ, ਸੋ ਵੇਦਨਾਕ੍ਖਨ੍ਧਂ ਨ ਪਰਿਜਾਨਿਤ੍ਥਾਤਿ? ਅਰਹਾ ਰੂਪਕ੍ਖਨ੍ਧਂ ਨ ਪਰਿਜਾਨਾਤਿ, ਨੋ ਚ ਸੋ ਵੇਦਨਾਕ੍ਖਨ੍ਧਂ ਨ ਪਰਿਜਾਨਿਤ੍ਥ. ਅਗ੍ਗਮਗ੍ਗਸਮਙ੍ਗਿਞ੍ਚ ਅਰਹਨ੍ਤਞ੍ਚ ਠਪੇਤ੍ਵਾ ਅਵਸੇਸਾ ਪੁਗ੍ਗਲਾ ਰੂਪਕ੍ਖਨ੍ਧਞ੍ਚ ਨ ਪਰਿਜਾਨਨ੍ਤਿ, ਵੇਦਨਾਕ੍ਖਨ੍ਧਞ੍ਚ ਨ ਪਰਿਜਾਨਿਂਸੂ’’ਤਿਆਦਿਨਾ, ‘‘ਯੋ ਰੂਪਕ੍ਖਨ੍ਧਂ ਨ ਪਰਿਜਾਨਾਤਿ, ਸੋ ਵੇਦਨਾਕ੍ਖਨ੍ਧਂ ਨ ਪਰਿਜਾਨਿਸ੍ਸਤੀਤਿ? ਯੇ ਮਗ੍ਗਂ ਪਟਿਲਭਿਸ੍ਸਨ੍ਤਿ, ਤੇ ਰੂਪਕ੍ਖਨ੍ਧਂ ਨ ਪਰਿਜਾਨਨ੍ਤਿ, ਨੋ ਚ ਵੇਦਨਾਕ੍ਖਨ੍ਧਂ ਨ ਪਰਿਜਾਨਿਸ੍ਸਨ੍ਤਿ. ਅਰਹਾ ਯੇ ਚ ਪੁਥੁਜ੍ਜਨਾ ਮਗ੍ਗਂ ਨ ਪਟਿਲਭਿਸ੍ਸਨ੍ਤਿ, ਤੇ ਰੂਪਕ੍ਖਨ੍ਧਞ੍ਚ ਨ ਪਰਿਜਾਨਨ੍ਤਿ, ਵੇਦਨਾਕ੍ਖਨ੍ਧਞ੍ਚ ਨ ਪਰਿਜਾਨਿਸ੍ਸਨ੍ਤੀ’’ਤਿਆਦਿਨਾ ਚ, ‘‘ਯੋ ਰੂਪਕ੍ਖਨ੍ਧਂ ਨ ਪਰਿਜਾਨਿਤ੍ਥ, ਸੋ ਵੇਦਨਾਕ੍ਖਨ੍ਧਂ ਨ ਪਰਿਜਾਨਿਸ੍ਸਨ੍ਤੀਤਿ? ਯੇ ਮਗ੍ਗਂ ਪਟਿਲਭਿਸ੍ਸਨ੍ਤਿ, ਤੇ ਰੂਪਕ੍ਖਨ੍ਧਂ ਨ ਪਰਿਜਾਨਿਂਸੁ, ਨੋ ਚ ਵੇਦਨਾਕ੍ਖਨ੍ਧਂ ਨ ਪਰਿਜਾਨਿਸ੍ਸਨ੍ਤਿ. ਅਗ੍ਗਮਗ੍ਗਸਮਙ੍ਗੀ ਯੇ ਚ ਪੁਥੁਜ੍ਜਨਾ ਮਗ੍ਗਂ ਨ ਪਟਿਲਭਿਸ੍ਸਨ੍ਤਿ, ਤੇ ਰੂਪਕ੍ਖਨ੍ਧਞ੍ਚ ਨ ਪਰਿਜਾਨਿਂਸੁ, ਵੇਦਨਾਕ੍ਖਨ੍ਧਞ੍ਚ ਨ ਪਰਿਜਾਨਿਸ੍ਸਨ੍ਤੀ’’ਤਿਆਦਿਨਾ ਚ ਪੁਚ੍ਛਾਵਿਸ੍ਸਜ੍ਜਨਨਯੋ ਵੇਦਿਤਬ੍ਬੋ.

ਏਤ੍ਥ ਚ ਅਤੀਤਾਨਾਗਤਪਚ੍ਚੁਪ੍ਪਨ੍ਨਸਙ੍ਖਾਤਾ ਤਯੋ ਅਦ੍ਧਾ ਪਵਤ੍ਤਿਵਾਰੇ ਚੁਤਿਪਟਿਸਨ੍ਧਿਵਸੇਨ ਨ ਲਬ੍ਭਨ੍ਤਿ, ਪਵਤ੍ਤੇ ਚਿਤ੍ਤਕ੍ਖਣਵਸੇਨੇਵ ਲਬ੍ਭਨ੍ਤਿ. ਲੋਕੁਤ੍ਤਰਮਗ੍ਗਕ੍ਖਣਸ੍ਮਿਂ ਹਿ ਨਿਬ੍ਬਾਨਾਰਮ੍ਮਣੇਨ ਚਿਤ੍ਤੇਨ ਪਞ੍ਚਸੁ ਖਨ੍ਧੇਸੁ ਪਰਿਞ੍ਞਾਕਿਚ੍ਚਨਿਪ੍ਫਤ੍ਤਿਯਾ ਯਂ ਕਞ੍ਚਿ ਏਕਂ ਖਨ੍ਧਂ ਪਰਿਜਾਨਨ੍ਤੋ ਇਤਰਮ੍ਪਿ ‘‘ਪਰਿਜਾਨਾਤੀ’’ਤਿ ਅਨੁਲੋਮਪਞ੍ਹੇਸੁ ਪਰਿਞ੍ਞਾਕਿਚ੍ਚਸ੍ਸ ਮਤ੍ਥਕਪ੍ਪਤ੍ਤਂ ਅਗ੍ਗਮਗ੍ਗਸਮਙ੍ਗਿਂ ਸਨ੍ਧਾਯ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ ਵੁਤ੍ਤਂ. ‘‘ਨ ਪਰਿਜਾਨਾਤੀ’’ਤਿ ਪਟਿਲੋਮਪਞ੍ਹੇਸੁ ਪੁਥੁਜ੍ਜਨਾਦਯੋ ਸਨ੍ਧਾਯ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ‘‘ਪਰਿਜਾਨਿਤ੍ਥਾ’’ਤਿ ਇਮਸ੍ਮਿਂ ਪਨ ਅਤੀਤਕਾਲਵਾਰੇ ਮਗ੍ਗਾਨਨ੍ਤਰੇ ਅਗ੍ਗਫਲੇ ਠਿਤੋਪਿ ਪਰਿਞ੍ਞਾਕਿਚ੍ਚਸ੍ਸ ਨਿਟ੍ਠਿਤਤ੍ਤਾ ਪਰਿਜਾਨਿਤ੍ਥਯੇਵ ਨਾਮ. ‘‘ਪਰਿਜਾਨਾਤੀ’’ਤਿ ਚ ਅਗ੍ਗਮਗ੍ਗਸਮਙ੍ਗੀ ਵੁਚ੍ਚਤਿ, ‘‘ਪਰਿਜਾਨਿਸ੍ਸਨ੍ਤੀ’’ਤਿ ਪੁਥੁਜ੍ਜਨਾਦਯੋ, ਤਸ੍ਮਾ ਯੋ ਨ ਪਰਿਜਾਨਾਤਿ, ਸੋ ਪਰਿਜਾਨਿਤ੍ਥਾਤਿ ਵਾ, ਪਰਿਜਾਨਿਸ੍ਸਤੀਤਿਆਦਿਨਾ ਵਾ ਵਤ੍ਤੁਂ ਅਸਕ੍ਕੁਣੇਯ੍ਯਤਾਯ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ ਕਤਂ.

ਪਟਿਲੋਮਨਯੇ ਪਨ ‘‘ਅਗ੍ਗਮਗ੍ਗਸਮਙ੍ਗਿਞ੍ਚ ਅਰਹਨ੍ਤਞ੍ਚ ਠਪੇਤ੍ਵਾ’’ਤਿ ਇਦਂ ਅਗ੍ਗਮਗ੍ਗਸਮਙ੍ਗਿਨੋ ‘‘ਨ ਪਰਿਜਾਨਾਤੀ’’ਤਿ ਵਚਨਂ, ਅਰਹਤੋ ਚ ‘‘ਨ ਪਰਿਜਾਨਿਤ੍ਥਾ’’ਤਿ ਵਤ੍ਤੁਂ ਅਸਕ੍ਕੁਣੇਯ੍ਯਤਾਯ ਵੁਤ੍ਤਂ, ‘‘ਯੇ ਚ ਪੁਥੁਜ੍ਜਨਾ ਮਗ੍ਗਂ ਨ ਪਟਿਲਭਿਸ੍ਸਨ੍ਤੀ’’ਤਿ ਇਮਿਨਾ ਅਤੀਤੇ ਵਿਯ ਅਨਾਗਤੇਪਿ ਅਨਨ੍ਤਕਾਲਂ ਅਮੁਚ੍ਚਨਕਾ ਸਤ੍ਤਾ ਨਾਮ ਅਤ੍ਥੀਤਿ ਦਸ੍ਸੇਤਿ, ਤੇ ਚ ਅਰਹਤਾ ਨਿਟ੍ਠਿਤਪਰਿਞ੍ਞਾਕਿਚ੍ਚੇਨ, ‘‘ਨ ਪਰਿਜਾਨਿਸ੍ਸਨ੍ਤੀ’’ਤਿ ਵਤ੍ਤਬ੍ਬਤਂ ਵਾ ਆਪਨ੍ਨੇਨ ਸਮਕਾ ਜਾਤਾ, ਸਬ੍ਬਤ੍ਥ ਚ ਏਕਂ ਖਨ੍ਧਂ ਪਰਿਜਾਨਨ੍ਤੋ ਸਬ੍ਬਂ ਪਰਿਜਾਨਾਤਿ, ਅਪਰਿਜਾਨਨ੍ਤੋਪਿ ਚ ਸਬ੍ਬਂ ਨ ਪਰਿਜਾਨਾਤੀਤਿ ਵੇਦਿਤਬ੍ਬਨ੍ਤਿ ਅਯਂ ਖਨ੍ਧਯਮਕਮਾਤਿਕਤ੍ਥਸਂਵਣ੍ਣਨਾਨਯੋ.

ਆਯਤਨਯਮਕਮਾਤਿਕਤ੍ਥਵਣ੍ਣਨਾ

ਆਯਤਨਯਮਕਮਾਤਿਕਾਯ ਪਨ ਪਾਲ਼ਿਵਵਤ੍ਥਾਨਾਦਿਕਂ ਸਬ੍ਬਂ ਖਨ੍ਧਯਮਕਮਾਤਿਕਾਯ ਵੁਤ੍ਤਨਯੇਨੇਵ ਵੇਦਿਤਬ੍ਬਂ ਅਞ੍ਞਤ੍ਰ ਵਿਸੇਸਾ, ਤਤ੍ਰਾਯਂ ਵਿਸੇਸੋ – ‘‘ਦ੍ਵਾਦਸਾਯਤਨਾਨੀ’’ਤਿ ਪਦਂ ਆਦਿਂ ਕਤ੍ਵਾ ਯਾਵ ‘‘ਨਾਯਤਨਾ ਨ ਮਨੋ’’ਤਿ, ਤਾਵ ਪਵਤ੍ਤਾ ਅਯਂ ਆਯਤਨਮਾਤਿਕਾ ਨਾਮ. ਤਤ੍ਥ ਦ੍ਵਾਦਸਾਯਤਨਾਨਿ ਉਦ੍ਦਿਸਿਤ੍ਵਾ ਯਮਕਵਸੇਨ ਪੁਚ੍ਛਾਸੁ ਖਨ੍ਧਪਦਂ ਠਪੇਤ੍ਵਾ ਚਕ੍ਖਾਦੀਨਿ ਪਞ੍ਚ ਅਜ੍ਝਤ੍ਤਿਕਾਯਤਨਾਨਿ ਪਠਮਂ ਵੁਤ੍ਤਾਨਿ, ਪਚ੍ਛਾ ਰੂਪਾਦਿਪਞ੍ਚਬਾਹਿਰਾਯਤਨਾਨਿ, ਪਰਿਯੋਸਾਨੇ ਮਨਾਯਤਨਧਮ੍ਮਾਯਤਨਾਨੀਤਿ ਏਵਂ ਪਾਲ਼ਿਵਵਤ੍ਥਾਨੇ ਪਞ੍ਹੇ. ਵਿਸ੍ਸਜ੍ਜਨੇ ਪਨ ‘‘ਚਕ੍ਖੁ ਚਕ੍ਖਾਯਤਨਨ੍ਤਿ? ਦਿਬ੍ਬਚਕ੍ਖੁ ਪਞ੍ਞਾਚਕ੍ਖੁ ਚਕ੍ਖੁਮੇਵ, ਨ ਚਕ੍ਖਾਯਤਨਂ, ਚਕ੍ਖਾਯਤਨਂ ਚਕ੍ਖੁ ਚੇਵ ਚਕ੍ਖਾਯਤਨਞ੍ਚ. ਸੋਤਂ ਸੋਤਾਯਤਨਨ੍ਤਿ? ਦਿਬ੍ਬਸੋਤਂ ਤਣ੍ਹਾਸੋਤਂ ਸੋਤਮੇਵ, ਨ ਸੋਤਾਯਤਨਂ. ਘਾਨਂ ਘਾਨਾਯਤਨਨ੍ਤਿ? ਆਮਨ੍ਤਾ…ਪੇ… ਕਾਯੋ ਕਾਯਾਯਤਨਨ੍ਤਿ? ਨਾਮਕਾਯੋ ਚਿਤ੍ਤਕਾਯੋਤਿਆਦਿ ਕਾਯੋ, ਨ ਕਾਯਾਯਤਨਂ. ਰੂਪਂ ਰੂਪਾਯਤਨਨ੍ਤਿ? ਭੂਤਾਦਿ, ਪਿਯਰੂਪਾਦਿ ਚ ਰੂਪਂਵ, ਨ ਰੂਪਾਯਤਨਂ. ਸਦ੍ਦੋ ਸਦ੍ਦਾਯਤਨਨ੍ਤਿ? ਆਮਨ੍ਤਾ. ਗਨ੍ਧੋ ਗਨ੍ਧਾਯਤਨਨ੍ਤਿ? ਸੀਲਗਨ੍ਧਾਦਯੋ ਗਨ੍ਧੋਵ, ਨ ਗਨ੍ਧਾਯਤਨਂ. ਰਸੋ ਰਸਾਯਤਨਨ੍ਤਿ? ਅਤ੍ਥਰਸਾਦਯੋ ਰਸੋਵ, ਨ ਰਸਾਯਤਨਂ. ਧਮ੍ਮੋ ਧਮ੍ਮਾਯਤਨਨ੍ਤਿ? ਪਰਿਯਤ੍ਤਿਧਮ੍ਮਾਦਯੋ ਧਮ੍ਮੋਵ, ਨ ਧਮ੍ਮਾਯਤਨਂ. ਧਮ੍ਮਾਯਤਨਂ ਧਮ੍ਮੋਤਿ? ਆਮਨ੍ਤਾ’’ਤਿ ਅਯਂ ਪਣ੍ਣਤ੍ਤਿਵਾਰੇ ਵਿਸੇਸੋ.

ਪਵਤ੍ਤਿਵਾਰੇ ਪਨ ‘‘ਯਸ੍ਸ ਚਕ੍ਖਾਯਤਨਂ ਉਪ੍ਪਜ੍ਜਤਿ, ਤਸ੍ਸ ਸੋਤਾਯਤਨਂ ਉਪ੍ਪਜ੍ਜਤੀਤਿ? ਸਚਕ੍ਖੁਕਾਨਂ ਅਸੋਤਕਾਨਂ ਉਪਪਜ੍ਜਨ੍ਤਾਨਂ ਤੇਸਂ ਚਕ੍ਖਾਯਤਨਂ ਉਪ੍ਪਜ੍ਜਤਿ, ਨੋ ਚ ਤੇਸਂ ਸੋਤਾਯਤਨਂ ਉਪ੍ਪਜ੍ਜਤਿ. ਸਚਕ੍ਖੁਕਾਨਂ ਸਸੋਤਕਾਨਂ ਉਪਪਜ੍ਜਨ੍ਤਾਨਂ ਤੇਸਂ ਚਕ੍ਖਾਯਤਨਞ੍ਚ ਉਪ੍ਪਜ੍ਜਤਿ, ਸੋਤਾਯਤਨਞ੍ਚ ਉਪ੍ਪਜ੍ਜਤਿ…ਪੇ… ਯਸ੍ਸ ਰੂਪਾਯਤਨਂ ਉਪ੍ਪਜ੍ਜਤਿ, ਤਸ੍ਸ ਮਨਾਯਤਨਂ ਉਪ੍ਪਜ੍ਜਤੀਤਿ? ਅਚਿਤ੍ਤਕਾਨਂ ਰੂਪਾਯਤਨਂ ਉਪ੍ਪਜ੍ਜਤਿ, ਨੋ ਚ ਤੇਸਂ ਮਨਾਯਤਨਂ ਉਪ੍ਪਜ੍ਜਤਿ. ਪਞ੍ਚਵੋਕਾਰੇ ਉਪ੍ਪਾਦਕ੍ਖਣੇ ਤਦੁਭਯਂ ਉਪ੍ਪਜ੍ਜਤਿ. ਯਸ੍ਸ ਵਾ ਪਨ ਮਨਾਯਤਨਂ ਉਪ੍ਪਜ੍ਜਤਿ, ਤਸ੍ਸ ਰੂਪਾਯਤਨਂ ਉਪ੍ਪਜ੍ਜਤੀਤਿ? ਅਰੂਪਭਵਵਜ੍ਜਿਤੇ ਸਞ੍ਞਾਭਵੇ ਉਪਪਜ੍ਜਨ੍ਤਾਨਂ…ਪੇ… ਉਪ੍ਪਜ੍ਜਤਿ. ਯਸ੍ਸ ਰੂਪਾਯਤਨਂ ਉਪ੍ਪਜ੍ਜਤਿ, ਤਸ੍ਸ ਧਮ੍ਮਾਯਤਨਂ ਉਪ੍ਪਜ੍ਜਤੀਤਿ? ਆਮਨ੍ਤਾ. ਯਸ੍ਸ ਵਾ ਪਨ…ਪੇ… ਉਪ੍ਪਜ੍ਜਤੀਤਿ? ਅਰੂਪਭਵਵਜ੍ਜਿਤੇ ਸਬ੍ਬਤ੍ਥ ਉਪ੍ਪਜ੍ਜਤਿ. ਯਸ੍ਸ ਮਨਾਯਤਨਂ ਉਪ੍ਪਜ੍ਜਤਿ, ਤਸ੍ਸ ਧਮ੍ਮਾਯਤਨਂ ਉਪ੍ਪਜ੍ਜਤੀਤਿ? ਆਮਨ੍ਤਾ, ਯਸ੍ਸ ਵਾ ਪਨ…ਪੇ… ਉਪ੍ਪਜ੍ਜਤੀਤਿ? ਅਸਞ੍ਞਭਵਵਜ੍ਜਿਤੇ ਸਬ੍ਬਤ੍ਥ ਉਪ੍ਪਜ੍ਜਤੀ’’ਤਿ ਏਵਂ ਸਦ੍ਦਾਯਤਨਵਜ੍ਜਿਤਾ ਸੇਸਾਯਤਨਮਾਤਿਕਾਯਮਕਯੋਜਨਾ ਯਥਾਨੁਰੂਪਂ ਵੇਦਿਤਬ੍ਬਾ. ਸਦ੍ਦਾਯਤਨਂ ਹਿ ਪਟਿਸਨ੍ਧਿਕ੍ਖਣੇ ਨ ਲਬ੍ਭਤਿ, ਅਯਂ ਉਪ੍ਪਾਦਵਾਰੇ ਵਿਸੇਸੋ, ਇਮਿਨਾ ਨਯੇਨ ਨਿਰੋਧਵਾਰਾਦੀਸੁ, ਪਰਿਞ੍ਞਾਵਾਰੇ ਚ ਯੋਜਨਾਵਿਸੇਸੋ ਵੇਦਿਤਬ੍ਬੋ, ਸਬ੍ਬਤ੍ਥ ਚ ਖਨ੍ਧਤੋ ਆਯਤਨਾਨਂ ਬਹੁਤਾ ਚ ਯਮਕਵਾਰਬਹੁਤਾ ਚ ਵੇਦਿਤਬ੍ਬਾ. ਸੇਸਂ ਤਾਦਿਸਮੇਵਾਤਿ ਅਯਂ ਆਯਤਨਯਮਕਮਾਤਿਕਤ੍ਥਸਂਵਣ੍ਣਨਾਨਯੋ.

ਧਾਤੁਯਮਕਮਾਤਿਕਤ੍ਥਵਣ੍ਣਨਾ

ਧਾਤੁਯਮਕਮਾਤਿਕਾਯ ਪਨ ਪਾਲ਼ਿਵਵਤ੍ਥਾਨਂ ਸਬ੍ਬਂ ਆਯਤਨਯਮਕਮਾਤਿਕਾਯ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ ਅਯਂ ਧਾਤੁਯਮਕਮਾਤਿਕਤ੍ਥਸਂਵਣ੍ਣਨਾਨਯੋ.

ਸਚ੍ਚਯਮਕਮਾਤਿਕਤ੍ਥਵਣ੍ਣਨਾ

ਸਚ੍ਚਯਮਕਮਾਤਿਕਾਯ ਪਨ ਖਨ੍ਧਯਮਕੇ ਵੁਤ੍ਤਨਯੇਨ ਵਾਰਭੇਦਾ, ਕਾਲਾਦਿਭੇਦਾ ਚ ਵੇਦਿਤਬ੍ਬਾ, ਪਾਲ਼ਿਵਵਤ੍ਥਾਨੇ ਪਨੇਤ੍ਥ ਚਤੁਨ੍ਨਂ ਸਚ੍ਚਾਨਂ ਵਸੇਨ ਪਦਸੋਧਨਵਾਰੋ ਪਦਸੋਧਨਮੂਲਚਕ੍ਕਵਾਰੋ ਸੁਦ੍ਧਸਚ੍ਚਵਾਰੋ ਸੁਦ੍ਧਸਚ੍ਚਮੂਲਚਕ੍ਕਵਾਰੋਤਿ ਇਮੇਸੁ ਚਤੂਸੁ ਵਾਰੇਸੁ ਯਮਕਗਣਨਾ ਵੇਦਿਤਬ੍ਬਾ. ਪੁਚ੍ਛਾਵਿਸ੍ਸਜ੍ਜਨੇਸੁ ਪਨ ‘‘ਦੁਕ੍ਖਂ ਦੁਕ੍ਖਸਚ੍ਚਨ੍ਤਿ? ਆਮਨ੍ਤਾ. ਦੁਕ੍ਖਸਚ੍ਚਂ ਦੁਕ੍ਖਨ੍ਤਿ? ਕਾਯਿਕਚੇਤਸਿਕਂ ਦੁਕ੍ਖਂ ਠਪੇਤ੍ਵਾ ਅਵਸੇਸਂ ਦੁਕ੍ਖਸਚ੍ਚਂ, ਨ ਦੁਕ੍ਖਂ. ਕਾਯਿਕਚੇਤਸਿਕਂ ਦੁਕ੍ਖਂ ਪਨ ਦੁਕ੍ਖਞ੍ਚੇਵ ਦੁਕ੍ਖਸਚ੍ਚਞ੍ਚ. ਸਮੁਦਯੋ ਸਮੁਦਯਸਚ੍ਚਨ੍ਤਿ? ਤਣ੍ਹਂ ਠਪੇਤ੍ਵਾ ਅਵਸੇਸਾ ਸਚ੍ਚਵਿਭਙ੍ਗੇ ਨਿਦ੍ਦਿਟ੍ਠਾ ਕੁਸਲਾਦਿਧਮ੍ਮਾ ਸਮੁਦਯੋ, ਨ ਸਮੁਦਯਸਚ੍ਚਂ. ਤਣ੍ਹਾ ਪਨ ਸਮੁਦਯੋ ਚੇਵ ਸਮੁਦਯਸਚ੍ਚਞ੍ਚ. ਸਮੁਦਯਸਚ੍ਚਂ ਸਮੁਦਯੋਤਿ? ਆਮਨ੍ਤਾ. ਨਿਰੋਧੋ ਨਿਰੋਧਸਚ੍ਚਨ੍ਤਿ? ਤਦਙ੍ਗਨਿਰੋਧਾਦਯੋ, ਖਣਿਕਨਿਰੋਧੋ ਚ ਨਿਰੋਧੋਵ, ਨ ਨਿਰੋਧਸਚ੍ਚਂ. ਨਿਬ੍ਬਾਨਂ ਪਨ ਨਿਰੋਧੋ ਚੇਵ ਨਿਰੋਧਸਚ੍ਚਞ੍ਚ. ਨਿਰੋਧਸਚ੍ਚਂ ਨਿਰੋਧੋਤਿ? ਆਮਨ੍ਤਾ. ਮਗ੍ਗੋ ਮਗ੍ਗਸਚ੍ਚਨ੍ਤਿ? ਮਿਚ੍ਛਾਮਗ੍ਗਙ੍ਗਾਦਯੋ ਮਗ੍ਗੋ, ਨ ਮਗ੍ਗਸਚ੍ਚਂ. ਅਰਿਯਮਗ੍ਗੋ ਪਨ ਮਗ੍ਗੋ ਚੇਵ ਮਗ੍ਗਸਚ੍ਚਞ੍ਚ. ਮਗ੍ਗਸਚ੍ਚਂ ਮਗ੍ਗੋਤਿ? ਆਮਨ੍ਤਾ’’ਤਿਆਦਿਨਾ ਪਣ੍ਣਤ੍ਤਿਵਾਰੇ ਨਯੋ ਵੇਦਿਤਬ੍ਬੋ.

ਪਵਤ੍ਤਿਵਾਰੇ ਪਨ ‘‘ਯਸ੍ਸ ਦੁਕ੍ਖਸਚ੍ਚਂ ਉਪ੍ਪਜ੍ਜਤਿ, ਤਸ੍ਸ ਸਮੁਦਯਸਚ੍ਚਂ ਉਪ੍ਪਜ੍ਜਤੀਤਿ? ਸਬ੍ਬੇਸਂ ਉਪਪਜ੍ਜਨ੍ਤਾਨਂ ਪਵਤ੍ਤੇ ਤਣ੍ਹਾਵਿਪ੍ਪਯੁਤ੍ਤਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤੇਸਂ ਦੁਕ੍ਖਸਚ੍ਚਂ ਉਪ੍ਪਜ੍ਜਤਿ, ਨੋ ਚ ਤੇਸਂ ਸਮੁਦਯਸਚ੍ਚਂ ਉਪ੍ਪਜ੍ਜਤਿ. ਤਣ੍ਹਾਯ ਉਪ੍ਪਾਦਕ੍ਖਣੇ ਤਦੁਭਯਂ ਉਪ੍ਪਜ੍ਜਤਿ. ਯਸ੍ਸ ਦੁਕ੍ਖਸਚ੍ਚਂ ਉਪ੍ਪਜ੍ਜਤਿ, ਤਸ੍ਸ ਮਗ੍ਗਸਚ੍ਚਂ ਉਪ੍ਪਜ੍ਜਤੀਤਿ…ਪੇ… ਪਞ੍ਚਵੋਕਾਰੇ ਮਗ੍ਗਸ੍ਸ ਉਪ੍ਪਾਦਕ੍ਖਣੇ ਤਦੁਭਯਂ ਉਪ੍ਪਜ੍ਜਤਿ. ਯਸ੍ਸ ਵਾ ਪਨ…ਪੇ… ਉਪ੍ਪਜ੍ਜਤੀਤਿ? ਅਰੂਪੇ ਮਗ੍ਗਸ੍ਸ ਉਪ੍ਪਾਦਕ੍ਖਣੇ ਤੇਸਂ ਮਗ੍ਗਸਚ੍ਚਂ ਉਪ੍ਪਜ੍ਜਤਿ, ਨੋ ਚ ਤੇਸਂ ਦੁਕ੍ਖਸਚ੍ਚਂ ਉਪ੍ਪਜ੍ਜਤਿ. ਪਞ੍ਚਵੋਕਾਰੇ ਤਦੁਭਯਂ ਉਪ੍ਪਜ੍ਜਤਿ. ਯਸ੍ਸ ਸਮੁਦਯਸਚ੍ਚਂ ਉਪ੍ਪਜ੍ਜਤਿ, ਤਸ੍ਸ ਮਗ੍ਗਸਚ੍ਚਂ ਉਪ੍ਪਜ੍ਜਤੀਤਿ? ਨੋ, ਯਸ੍ਸ ਵਾ ਪਨ…ਪੇ… ਨੋ’’ਤਿਆਦਿਨਾ ਪੁਗ੍ਗਲਵਾਰੇ, ‘‘ਯਤ੍ਥ ਦੁਕ੍ਖਸਚ੍ਚਂ ਉਪ੍ਪਜ੍ਜਤਿ, ਤਤ੍ਥ ਸਮੁਦਯਸਚ੍ਚਂ ਉਪ੍ਪਜ੍ਜਤੀਤਿ? ਅਸਞ੍ਞਸਤ੍ਤੇ ਤਤ੍ਥ ਦੁਕ੍ਖਸਚ੍ਚਂ ਉਪ੍ਪਜ੍ਜਤਿ, ਨੋ ਚ ਤਤ੍ਥ ਤਦਞ੍ਞਂ, ਅਞ੍ਞਤ੍ਥ ਤਦੁਭਯਮ੍ਪਿ. ਯਤ੍ਥ ਦੁਕ੍ਖਸਚ੍ਚਂ ਉਪ੍ਪਜ੍ਜਤਿ, ਤਤ੍ਥ ਮਗ੍ਗਸਚ੍ਚਂ ਉਪ੍ਪਜ੍ਜਤੀਤਿ? ਅਪਾਯੇ, ਅਸਞ੍ਞਸਤ੍ਤੇ ਚ ਦੁਕ੍ਖਮੇਵ, ਨੋ ਚ ਤਤ੍ਥ ਤਦਞ੍ਞਂ, ਅਞ੍ਞਤ੍ਥ ਤਦੁਭਯਮ੍ਪੀ’’ਤਿਆਦਿਨਾ ਓਕਾਸਵਾਰੇ, ਪੁਗ੍ਗਲੋਕਾਸਵਾਰੇਪੀਤਿ ਏਵਂ ਅਨੁਲੋਮਨਯੇ,

‘‘ਯਸ੍ਸ ਦੁਕ੍ਖਸਚ੍ਚਂ ਨੁਪ੍ਪਜ੍ਜਤਿ, ਤਸ੍ਸ ਸਮੁਦਯਸਚ੍ਚਂ ਨੁਪ੍ਪਜ੍ਜਤੀਤਿ? ਆਮਨ੍ਤਾ. ਯਸ੍ਸ ਵਾ ਪਨ…ਪੇ… ਨੁਪ੍ਪਜ੍ਜਤੀਤਿ? ਸਬ੍ਬੇਸਂ ਉਪਪਜ੍ਜਨ੍ਤਾਨਂ ਪਵਤ੍ਤੇ ਤਣ੍ਹਾਵਿਪ੍ਪਯੁਤ੍ਤਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਸਮੁਦਯਸਚ੍ਚਂ ਨੁਪ੍ਪਜ੍ਜਤਿ, ਨੋ ਚ ਤੇਸਂ ਦੁਕ੍ਖਸਚ੍ਚਂ ਨੁਪ੍ਪਜ੍ਜਤਿ. ਸਬ੍ਬੇਸਂ ਚਵਨ੍ਤਾਨਂ ਪਵਤ੍ਤੇ ਚਿਤ੍ਤਸ੍ਸ ਭਙ੍ਗਕ੍ਖਣੇ ਅਰੂਪੇ ਮਗ੍ਗਸ੍ਸ ਚ ਫਲਸ੍ਸ ਚ ਉਪ੍ਪਾਦਕ੍ਖਣੇ ਤੇਸਂ ਸਮੁਦਯਸਚ੍ਚਞ੍ਚ ਨੁਪ੍ਪਜ੍ਜਤਿ, ਦੁਕ੍ਖਸਚ੍ਚਞ੍ਚ ਨੁਪ੍ਪਜ੍ਜਤੀ’’ਤਿਆਦਿਨਾ, ‘‘ਯਤ੍ਥ ਦੁਕ੍ਖਸਚ੍ਚਂ ਨੁਪ੍ਪਜ੍ਜਤਿ, ਤਤ੍ਥ ਸਮੁਦਯਸਚ੍ਚਂ ਨੁਪ੍ਪਜ੍ਜਤੀਤਿ? ਨਤ੍ਥਿ. ਯਤ੍ਥ ਵਾ ਪਨ ਸਮੁਦਯਸਚ੍ਚਂ ਨੁਪ੍ਪਜ੍ਜਤਿ, ਤਤ੍ਥ ਦੁਕ੍ਖਸਚ੍ਚਂ ਨੁਪ੍ਪਜ੍ਜਤੀਤਿ? ਉਪ੍ਪਜ੍ਜਤੀ’’ਤਿਆਦਿਨਾ ਚ, ‘‘ਯਸ੍ਸ ਯਤ੍ਥ ਦੁਕ੍ਖਸਚ੍ਚਂ ਨੁਪ੍ਪਜ੍ਜਤਿ, ਤਸ੍ਸ ਤਤ੍ਥ ਸਮੁਦਯਸਚ੍ਚਂ ਨੁਪ੍ਪਜ੍ਜਤੀਤਿ? ਆਮਨ੍ਤਾ. ਯਸ੍ਸ ਵਾ ਪਨ ਯਤ੍ਥ ਸਮੁਦਯਸਚ੍ਚਂ ਨੁਪ੍ਪਜ੍ਜਤਿ, ਤਸ੍ਸ ਤਤ੍ਥ ਦੁਕ੍ਖਸਚ੍ਚਂ ਨੁਪ੍ਪਜ੍ਜਤੀਤਿ? ਸਬ੍ਬੇਸਂ ਉਪਪਜ੍ਜਨ੍ਤਾਨਂ ਪਵਤ੍ਤੇ ਤਣ੍ਹਾਵਿਪ੍ਪਯੁਤ੍ਤਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤੇਸਂ ਤਤ੍ਥ ਸਮੁਦਯਸਚ੍ਚਂ ਏਵ ਨੁਪ੍ਪਜ੍ਜਤਿ, ਨੇਤਰਂ, ਸਬ੍ਬੇਸਂ ਪਨ ਚਵਨ੍ਤਾਨਂ ਪਵਤ੍ਤੇ ਚਿਤ੍ਤਸ੍ਸ ਭਙ੍ਗਕ੍ਖਣੇ ਅਰੂਪੇ ਮਗ੍ਗਸ੍ਸ ਚ ਫਲਸ੍ਸ ਚ ਉਪ੍ਪਾਦਕ੍ਖਣੇ ਤੇਸਂ ਤਤ੍ਥ ਤਦੁਭਯਮ੍ਪਿ ਨੁਪ੍ਪਜ੍ਜਤੀ’’ਤਿਆਦਿਨਾ ਚ ਸਬ੍ਬਤ੍ਥ ਪਟਿਲੋਮਨਯੇ ਚ,

‘‘ਯਸ੍ਸ ਦੁਕ੍ਖਸਚ੍ਚਂ ਉਪ੍ਪਜ੍ਜਿਤ੍ਥ, ਤਸ੍ਸ ਸਮੁਦਯਸਚ੍ਚਂ ਉਪ੍ਪਜ੍ਜਿਤ੍ਥਾਤਿ? ਆਮਨ੍ਤਾ. ਯਸ੍ਸ ਦੁਕ੍ਖਸਚ੍ਚਂ ਉਪ੍ਪਜ੍ਜਿਤ੍ਥ, ਤਸ੍ਸ ਮਗ੍ਗਸਚ੍ਚਂ ਉਪ੍ਪਜ੍ਜਿਤ੍ਥਾਤਿ? ਅਭਿਸਮੇਤਾਵੀਨਂ ਉਪ੍ਪਜ੍ਜਿਤ੍ਥ, ਨ ਇਤਰੇਸ’’ਨ੍ਤਿਆਦਿਨਾ, ‘‘ਯਸ੍ਸ ਯਤ੍ਥ ਦੁਕ੍ਖਸਚ੍ਚਂ ਉਪ੍ਪਜ੍ਜਿਤ੍ਥ, ਤਸ੍ਸ ਤਤ੍ਥ ਸਮੁਦਯਸਚ੍ਚਂ ਉਪ੍ਪਜ੍ਜਿਤ੍ਥਾਤਿ? ਸੁਦ੍ਧਾਵਾਸਾਨਂ ਦੁਤਿਯੇ ਚਿਤ੍ਤੇ ਵਤ੍ਤਮਾਨੇ ਅਸਞ੍ਞਸਤ੍ਤਾਨਂ ਤਤ੍ਥ ਦੁਕ੍ਖਸਚ੍ਚਂ ਉਪ੍ਪਜ੍ਜਿਤ੍ਥ, ਨੇਤਰਂ, ਇਤਰੇਸਂ ਤਦੁਭਯਂ ਉਪ੍ਪਜ੍ਜਿਤ੍ਥਾ’’ਤਿਆਦਿਨਾ, ‘‘ਯਸ੍ਸ ਦੁਕ੍ਖਸਚ੍ਚਂ ਉਪ੍ਪਜ੍ਜਿਸ੍ਸਤਿ, ਤਸ੍ਸ ਸਮੁਦਯਸਚ੍ਚਂ ਉਪ੍ਪਜ੍ਜਿਸ੍ਸਤੀਤਿ? ਅਗ੍ਗਮਗ੍ਗਸਮਙ੍ਗੀਨਂ ਅਰਹਨ੍ਤਾਨਂ ਯਸ੍ਸ ਚਿਤ੍ਤਸ੍ਸ ਅਨਨ੍ਤਰਾ ਅਗ੍ਗਮਗ੍ਗਂ ਪਟਿਲਭਿਸ੍ਸਨ੍ਤਿ, ਤੇਸਂ ਦੁਕ੍ਖਸਚ੍ਚਂ ਉਪ੍ਪਜ੍ਜਿਸ੍ਸਤਿ, ਨੇਤਰਂ, ਇਤਰੇਸਂ ਤਦੁਭਯਂ ਉਪ੍ਪਜ੍ਜਿਸ੍ਸਤੀ’’ਤਿਆਦਿਨਾ ਚ, ‘‘ਯਸ੍ਸ ਦੁਕ੍ਖਸਚ੍ਚਂ ਉਪ੍ਪਜ੍ਜਤਿ, ਤਸ੍ਸ ਸਮੁਦਯਸਚ੍ਚਂ ਉਪ੍ਪਜ੍ਜਿਤ੍ਥਾਤਿ? ਆਮਨ੍ਤਾ, ਯਸ੍ਸ ਵਾ ਪਨ…ਪੇ… ਉਪ੍ਪਜ੍ਜਤੀਤਿ? ਸਬ੍ਬੇਸਂ ਚਵਨ੍ਤਾਨਂ ਪਵਤ੍ਤੇ ਚਿਤ੍ਤਸ੍ਸ ਭਙ੍ਗਕ੍ਖਣੇ ਅਰੂਪੇ ਮਗ੍ਗਫਲੁਪ੍ਪਤ੍ਤਿਕ੍ਖਣੇ ਤੇਸਂ ਸਮੁਦਯਸਚ੍ਚਂ ਉਪ੍ਪਜ੍ਜਿਤ੍ਥ, ਨੋ ਚ ਤੇਸਂ ਦੁਕ੍ਖਸਚ੍ਚਂ ਉਪ੍ਪਜ੍ਜਤਿ. ਸਬ੍ਬੇਸਂ ਉਪਪਜ੍ਜਨ੍ਤਾਨਂ ਪਵਤ੍ਤੇ ਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਸਮੁਦਯਸਚ੍ਚਞ੍ਚ ਉਪ੍ਪਜ੍ਜਿਤ੍ਥ, ਦੁਕ੍ਖਸਚ੍ਚਞ੍ਚ ਉਪ੍ਪਜ੍ਜਤੀ’’ਤਿਆਦਿਨਾ ਚ ਸੇਸਕਾਲਭੇਦੇਸੁ ਚ ਅਨੁਲੋਮਪਟਿਲੋਮਾਦੀਸੁ ਚ ਵੁਤ੍ਤਾਨੁਸਾਰੇਨ ਉਪ੍ਪਾਦਵਾਰੇ ਸਬ੍ਬਤ੍ਥ ਵਿਸ੍ਸਜ੍ਜਨਨਯੋ ਯਥਾਨੁਰੂਪਂ ਞਾਤਬ੍ਬੋ. ‘‘ਯਸ੍ਸ ਦੁਕ੍ਖਸਚ੍ਚਂ ਨਿਰੁਜ੍ਝਤਿ, ਤਸ੍ਸ ਸਮੁਦਯਸਚ੍ਚਂ ਨਿਰੁਜ੍ਝਤੀਤਿ…ਪੇ… ਤਣ੍ਹਾਯ ਭਙ੍ਗਕ੍ਖਣੇ ਤੇਸਂ ਤਦੁਭਯਂ ਨਿਰੁਜ੍ਝਤੀ’’ਤਿਆਦਿਨਾ ਨਿਰੋਧਵਾਰੇ, ਉਪ੍ਪਾਦਨਿਰੋਧਵਾਰੇਪੀਤਿ ਏਵਂ ਪਵਤ੍ਤਿਵਾਰੇ ਸਬ੍ਬਤ੍ਥ ਯਥਾਨੁਰੂਪਤੋ ਯੋਜਨਾ ਵੇਦਿਤਬ੍ਬਾ.

ਤਥਾ ‘‘ਯੋ ਦੁਕ੍ਖਸਚ੍ਚਂ ਪਰਿਜਾਨਾਤਿ, ਸੋ ਸਮੁਦਯਸਚ੍ਚਂ ਪਜਹਤੀਤਿ? ਆਮਨ੍ਤਾ’’ਤਿਆਦਿਨਾ ਪਰਿਞ੍ਞਾਵਾਰੇਪੀਤਿ ਏਵਮੇਤ੍ਥ ਪਾਲ਼ਿਨਯੋ ਞਾਤਬ੍ਬੋ.

ਅਤ੍ਥਵਿਨਿਚ੍ਛਯੇ ਪਨੇਤ੍ਥ ਇਦਂ ਲਕ੍ਖਣਂ – ਪਵਤ੍ਤਿ ਵਾਰੇ ਤਾਵੇਤ੍ਥ ਨਿਰੋਧਸਚ੍ਚਂ ਨ ਲਬ੍ਭਤੇਵ, ਸੇਸੇਸੁ ਪਨ ਤੀਸੁ ਸਚ੍ਚੇਸੁ ਸਮੁਦਯਮਗ੍ਗਸਚ੍ਚਾਨਿ ਏਕਨ੍ਤੇਨ ਪਵਤ੍ਤਿਯਂ ਏਵ ਲਬ੍ਭਨ੍ਤਿ. ਦੁਕ੍ਖਸਚ੍ਚਂ ਚੁਤਿਪਟਿਸਨ੍ਧੀਸੁਪਿ ਪਵਤ੍ਤੇਪੀਤਿ ਏਵਮੇਤ੍ਥ ਯਂ ਯਂ ਸਬ੍ਬਤ੍ਥ ਲਬ੍ਭਤਿ, ਤਸ੍ਸ ਤਸ੍ਸ ਵਸੇਨ ਅਤ੍ਥਵਿਨਿਚ੍ਛਯੋ ਵੇਦਿਤਬ੍ਬੋ. ਤਤ੍ਰਿਦਂ ਨਯਮੁਖਂ – ਸਬ੍ਬੇਸਂ ਉਪਪਜ੍ਜਨ੍ਤਾਨਨ੍ਤਿ ਅਨ੍ਤਮਸੋ ਸੁਦ੍ਧਾਵਾਸਾਨਮ੍ਪਿ. ਤੇਪਿ ਹਿ ਦੁਕ੍ਖਸਚ੍ਚੇਨੇਵ ਉਪ੍ਪਜ੍ਜਨ੍ਤਿ. ਤਣ੍ਹਾਵਿਪ੍ਪਯੁਤ੍ਤਚਿਤ੍ਤਸ੍ਸਾਤਿ ਇਦਂ ਦੁਕ੍ਖਸਚ੍ਚਸਮੁਦਯਸਚ੍ਚੇਸੁ ਏਕਕੋਟ੍ਠਾਸਸ੍ਸ ਉਪ੍ਪਤ੍ਤਿਦਸ੍ਸਨਤ੍ਥਂ ਵੁਤ੍ਤਂ, ਤਸ੍ਮਾ ਪਞ੍ਚਵੋਕਾਰਵਸੇਨੇਵ ਗਹੇਤਬ੍ਬਂ. ਚਤੁਵੋਕਾਰੇ ਪਨ ਤਣ੍ਹਾਵਿਪ੍ਪਯੁਤ੍ਤਫਲਸਮਾਪਤ੍ਤਿਯਾ ਉਪ੍ਪਾਦਕ੍ਖਣੇ ਏਕਮ੍ਪਿ ਸਚ੍ਚਂ ਨੁਪ੍ਪਜ੍ਜਤਿ. ਤਦੁਭਯਨ੍ਤਿ ਦੁਕ੍ਖਸਮੁਦਯਸਚ੍ਚਦ੍ਵਯਂ. ਤਸ੍ਮਿਂ ਹਿ ਖਣੇ ਤਣ੍ਹਂ ਠਪੇਤ੍ਵਾ ਸੇਸਂ ਦੁਕ੍ਖਸਚ੍ਚਂ ਨਾਮ ਹੋਤੀਤਿ ਤਂ ਸਨ੍ਧਾਯੇਤਂ ਵੁਤ੍ਤਂ. ਮਗ੍ਗਸ੍ਸ ਉਪ੍ਪਾਦਕ੍ਖਣੇ ਪਨ ਰੂਪਮੇਵ ਦੁਕ੍ਖਸਚ੍ਚਂ ਨਾਮ, ਸੇਸਾ ਮਗ੍ਗਸਹਜਾਤਾ ਧਮ੍ਮਾ ਸਚ੍ਚਵਿਨਿਮੁਤ੍ਤਾਵ. ਤੇਨੇਵ ਕਾਰਣੇਨ ‘‘ਅਰੂਪੇ ਮਗ੍ਗਸ੍ਸ ਉਪ੍ਪਾਦਕ੍ਖਣੇ ਤੇਸਂ ਮਗ੍ਗਸਚ੍ਚਂ ਉਪ੍ਪਜ੍ਜਤਿ, ਨੋ ਚ ਤੇਸਂ ਦੁਕ੍ਖਸਚ੍ਚਂ ਉਪ੍ਪਜ੍ਜਤੀ’’ਤਿ ਵੁਤ੍ਤਂ. ਸਬ੍ਬੇਸਂ ਉਪਪਜ੍ਜਨ੍ਤਾਨਂ ਪਵਤ੍ਤੇ ਤਣ੍ਹਾਵਿਪ੍ਪਯੁਤ੍ਤਚਿਤ੍ਤਸ੍ਸ ਉਪ੍ਪਾਦਕ੍ਖਣੇ. ਤੇਸਂ ਤਤ੍ਥਾਤਿ ਤੇਸਂ ਤਸ੍ਮਿਂ ਉਪਪਤ੍ਤਿਕ੍ਖਣੇ ਤਣ੍ਹਾਵਿਪ੍ਪਯੁਤ੍ਤਚਿਤ੍ਤੁਪ੍ਪਤ੍ਤਿਕ੍ਖਣੇ ਚਾਤਿ ਏਵਮੇਤ੍ਥ ਖਣਵਸੇਨ ਓਕਾਸੋ ਵੇਦਿਤਬ੍ਬੋ. ਅਞ੍ਞੇਸੁਪਿ ਏਵਰੂਪੇਸੁ ਏਸੇਵ ਨਯੋ. ਅਨਭਿਸਮੇਤਾਵੀਨਨ੍ਤਿ ਅਨਭਿਸਮਿਤਸਚ੍ਚਾਨਨ੍ਤਿ ਇਮਿਨਾ ਨਯਮੁਖੇਨ ਸਬ੍ਬਤ੍ਥ ਅਤ੍ਥਵਿਨਿਚ੍ਛਯੋ ਵੇਦਿਤਬ੍ਬੋ.

ਪਰਿਞ੍ਞਾਵਾਰੇ ਪਨ ਞਾਤਤੀਰਣਪਹਾਨਵਸੇਨ ਤਿਸ੍ਸੋਪਿ ਪਰਿਞ੍ਞਾਯੋ ਲਬ੍ਭਨ੍ਤਿ. ਯਸ੍ਮਾ ਪਨ ਲੋਕੁਤ੍ਤਰਧਮ੍ਮੇਸੁ ਪਰਿਞ੍ਞਾਨਾਮ ਨਤ੍ਥਿ, ਤਸ੍ਮਾ ਇਧ ਦ੍ਵੇ ਏਵ ਸਚ੍ਚਾਨਿ ਗਹਿਤਾਨਿ. ਤਤ੍ਥ ‘‘ਦੁਕ੍ਖਸਚ੍ਚਂ ਪਰਿਜਾਨਾਤੀ’’ਤਿ ਞਾਤਤੀਰਣਪਰਿਞ੍ਞਾਵਸੇਨ ਵੁਤ੍ਤਂ, ‘‘ਸਮੁਦਯਸਚ੍ਚਂ ਪਜਹਤੀ’’ਤਿ ਞਾਤਪਹਾਨਪਰਿਞ੍ਞਾਵਸੇਨ, ਇਤਿ ਇਮਾਸਂ ਪਰਿਞ੍ਞਾਨਂ ਵਸੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਅਯਂ ਸਚ੍ਚਯਮਕਮਾਤਿਕਤ੍ਥਸਂਵਣ੍ਣਨਾਨਯੋ.

ਸਙ੍ਖਾਰਯਮਕਮਾਤਿਕਤ੍ਥਵਣ੍ਣਨਾ

ਸਙ੍ਖਾਰਯਮਕਮਾਤਿਕਾਯ ਪਨ ਹੇਟ੍ਠਾ ਵੁਤ੍ਤਨਯੇਨੇਵ ਮਹਾਵਾਰਨ੍ਤਰਾਦਿਭੇਦਾ ਵੇਦਿਤਬ੍ਬਾ. ਅਯਂ ਪਨੇਤ੍ਥ ਵਿਸੇਸੋ – ਮਾਤਿਕਾਯ ਤਾਵ ਯਥਾ ਹੇਟ੍ਠਾ ਖਨ੍ਧਾਦਯੋ ਧਮ੍ਮੇ ਉਦ੍ਦਿਸਿਤ੍ਵਾ ‘‘ਰੂਪਂ ਰੂਪਕ੍ਖਨ੍ਧੋ’’ਤਿਆਦਿਨਾ ਪਦਸੋਧਨਵਾਰੋ ਆਰਦ੍ਧੋ, ਤਥਾ ਅਨਾਰਭਿਤ੍ਵਾ ‘‘ਅਸ੍ਸਾਸਪਸ੍ਸਾਸਾ ਕਾਯਸਙ੍ਖਾਰੋ’’ਤਿਆਦਿਨਾ ਪਠਮਂ ਤਯੋਪਿ ਸਙ੍ਖਾਰਾ ਵਿਭਜਿਤ੍ਵਾ ਦਸ੍ਸਿਤਾ. ਤਤ੍ਥ ਕਾਯਸ੍ਸ ਸਙ੍ਖਾਰੋ ਕਾਯਸਙ੍ਖਾਰੋ, ਅਸ੍ਸਾਸਪਸ੍ਸਾਸਾ. ‘‘ਕਾਯਿਕਾ ਏਤੇ ਧਮ੍ਮਾ ਕਾਯਪਟਿਬਦ੍ਧਾ’’ਤਿ (ਮ. ਨਿ. ੧.੪੬੩; ਸਂ. ਨਿ. ੪.੩੪੮) ਵਚਨਤੋ ਕਾਰਣਭੂਤਸ੍ਸ ਕਰਜਕਾਯਸ੍ਸ ਫਲਭੂਤੋ ਏਸ ਸਙ੍ਖਾਰੋਤਿ ਕਾਯਸਙ੍ਖਾਰੋ. ਅਪਰੋ ਨਯੋ – ਸਙ੍ਖਰੀਯਤੀਤਿ ਸਙ੍ਖਾਰੋ. ਕੇਨ ਸਙ੍ਖਰੀਯਤਿ? ਕਾਯੇਨ. ਅਯਂ ਹਿ ਵਾਤੋ ਵਿਯ ਭਸ੍ਤਾਯ ਕਰਜਕਾਯੇਨ ਸਙ੍ਖਰੀਯਤਿ, ਏਵਮ੍ਪਿ ਕਾਯਸ੍ਸ ਸਙ੍ਖਾਰੋਤਿ ਕਾਯਸਙ੍ਖਾਰੋ, ਕਾਯੇਨ ਕਤੋ ਅਸ੍ਸਾਸਪਸ੍ਸਾਸਵਾਤੋਤਿ ਅਤ੍ਥੋ. ਚੇਤਸਾ ਵਿਤਕ੍ਕੇਤ੍ਵਾ ਵਿਚਾਰੇਤ੍ਵਾ ਪਚ੍ਛਾ ਵਾਚਂ ਭਿਨ੍ਦਤਿ, ਤਸ੍ਮਾ ‘‘ਵਿਤਕ੍ਕਵਿਚਾਰਾ ਵਚੀਸਙ੍ਖਾਰੋ’’ਤਿ (ਮ. ਨਿ. ੧.੪੬੩) ਵਚਨਤੋ ਪਨ ਸਙ੍ਖਰੋਤੀਤਿ ਸਙ੍ਖਾਰੋ, ਕਿਂ ਸਙ੍ਖਰੋਤਿ? ਵਚਿਂ. ਵਚਿਯਾ ਸਙ੍ਖਾਰੋਤਿ ਵਚੀਸਙ੍ਖਾਰੋ, ਵਚੀਭੇਦਸਮੁਟ੍ਠਾਪਕਸ੍ਸ ਵਿਤਕ੍ਕਵਿਚਾਰਦ੍ਵਯਸ੍ਸੇਤਂ ਨਾਮਂ. ‘‘ਸਞ੍ਞਾ ਚ ਵੇਦਨਾ ਚ ਚੇਤਸਿਕਾ ਏਤੇ ਧਮ੍ਮਾ ਚਿਤ੍ਤਪਟਿਬਦ੍ਧਾ’’ਤਿ (ਮ. ਨਿ. ੧.੪੬੩; ਸਂ. ਨਿ. ੪.੩੪੮) ਵਚਨਤੋਯੇਵ ਪਨ ਤਤਿਯਪਦੇ ਸਙ੍ਖਰੀਯਤੀਤਿ ਸਙ੍ਖਾਰੋ, ਕੇਨ ਸਙ੍ਖਰੀਯਤਿ? ਚਿਤ੍ਤੇਨ, ਇਤਿ ਚਿਤ੍ਤਸ੍ਸ ਸਙ੍ਖਾਰੋਤਿ ਚਿਤ੍ਤਸਙ੍ਖਾਰੋ, ਸਬ੍ਬੇਸਮ੍ਪਿ ਚਿਤ੍ਤਸਮੁਟ੍ਠਾਨਾਨਂ ਚੇਤਸਿਕਾਨਂ ਧਮ੍ਮਾਨਂ ਏਤਂ ਅਧਿਵਚਨਂ. ਵਿਤਕ੍ਕਵਿਚਾਰਾਨਂ ਪਨ ਵਚੀਸਙ੍ਖਾਰਭਾਵੇਨ ਵਿਸੁਂ ਗਹਿਤਤ੍ਤਾ ‘‘ਠਪੇਤ੍ਵਾ ਵਿਤਕ੍ਕਵਿਚਾਰੇ’’ਤਿ ਵੁਤ੍ਤਂ.

ਇਦਾਨਿ ‘‘ਕਾਯੋ ਕਾਯਸਙ੍ਖਾਰੋ’’ਤਿ ਪਦਸੋਧਨਵਾਰੋ ਆਰਦ੍ਧੋ, ਤਸ੍ਸ ਅਨੁਲੋਮਨਯੇ ਤੀਣਿ, ਪਟਿਲੋਮਨਯੇ ਤੀਣੀਤਿ ਛ ਯਮਕਾਨਿ. ਪਦਸੋਧਨਮੂਲਚਕ੍ਕਵਾਰੇ ਏਕੇਕਸਙ੍ਖਾਰਮੂਲਕਾਨਿ ਦ੍ਵੇ ਦ੍ਵੇ ਕਤ੍ਵਾ ਅਨੁਲੋਮਨਯੇ ਛ, ਪਟਿਲੋਮਨਯੇ ਛਾਤਿ ਦ੍ਵਾਦਸ ਯਮਕਾਨਿ. ਸੁਦ੍ਧਸਙ੍ਖਾਰਵਾਰੇ ਪਨ ਯਥਾ ਸੁਦ੍ਧਖਨ੍ਧਵਾਰਾਦੀਸੁ ‘‘ਰੂਪਂ ਖਨ੍ਧੋ, ਖਨ੍ਧਾ ਰੂਪ’’ਨ੍ਤਿਆਦਿਨਾ ਨਯੇਨ ਯਮਕਾਨਿਵੁਤ੍ਤਾਨਿ, ਏਵਂ ‘‘ਕਾਯੋ ਸਙ੍ਖਾਰੋ, ਸਙ੍ਖਾਰਾ ਕਾਯੋ’’ਤਿ ਅਵਤ੍ਵਾ ‘‘ਕਾਯਸਙ੍ਖਾਰੋ ਵਚੀਸਙ੍ਖਾਰੋ’’ਤਿਆਦਿਨਾ ਨਯੇਨ ਕਾਯਸਙ੍ਖਾਰਮੂਲਕਾਨਿ ਦ੍ਵੇ, ਵਚੀਸਙ੍ਖਾਰਮੂਲਕਂ ਏਕਨ੍ਤਿ ਅਨੁਲੋਮੇ ਤੀਣਿ, ਪਟਿਲੋਮੇ ਤੀਣੀਤਿ ਛ ਯਮਕਾਨਿ ਵੁਤ੍ਤਾਨਿ. ਕਿਂ ਕਾਰਣਾ? ਸੁਦ੍ਧਿਕਏਕੇਕਪਦਵਸੇਨ ਅਤ੍ਥਭੇਦਾਭਾਵਤੋ, ਕਾਯਸਙ੍ਖਾਰੋਤਿ ਪਨ ਦ੍ਵੀਹਿਪਿ ਪਦੇਹਿ ਏਕੋਵ ਅਤ੍ਥੋ ਲਬ੍ਭਤੀਤਿ ਅਯਂ ਵਿਸੇਸੋਵ, ਤਸ੍ਮਾ ਏਕੇਕਪਦਵਸੇਨ ਨ ਵੁਤ੍ਤਂ, ‘‘ਕਾਯੋ ਕਾਯਸਙ੍ਖਾਰੋ’’ਤਿਆਦਿ ਪਨ ਵਤ੍ਤਬ੍ਬਂ ਸਿਯਾ, ਸੋਪਿ ਨਯੋ ਪਦਸੋਧਨਵਾਰੇ ਵਿਨਾਪਿ ਅਤ੍ਥੇਨ ਵਚਨਂ ਯੁਜ੍ਜਤੀਤਿ ਤਤ੍ਥੇਵ ਵੁਤ੍ਤੋ, ਇਧ ਪਨ ਕਾਯਸਙ੍ਖਾਰਾਦੀਨਂ ਵਚੀਸਙ੍ਖਾਰਾਦੀਹਿ ਅਞ੍ਞਤ੍ਤਾ ‘‘ਕਾਯਸਙ੍ਖਾਰੋ ਵਚੀਸਙ੍ਖਾਰੋ’’ਤਿਆਦਿਨਾਪਿ ਯਮਕਾਨਿ ਵੁਤ੍ਤਾਨਿ. ਸੁਦ੍ਧਸਙ੍ਖਾਰਮੂਲਚਕ੍ਕਵਾਰੋ ਪਨੇਤ੍ਥ ਨ ਗਹਿਤੋਤਿ ਅਯਂ ਤਾਵੇਤ੍ਥ ਪਾਲ਼ਿਵਵਤ੍ਥਾਨੇ ਵਿਸੇਸੋ.

ਪਞ੍ਹਵਿਸ੍ਸਜ੍ਜਨੇਸੁ ਪਨ ‘‘ਕਾਯੋ ਕਾਯਸਙ੍ਖਾਰੋਤਿ? ਨੋ, ਕਾਯਸਙ੍ਖਾਰੋ ਕਾਯੋਤਿ? ਨੋ’’ਤਿ ਵਾ ਏਵਂ ਸਬ੍ਬਤ੍ਥ ਪਟਿਸੇਧੋ. ਵਿਸ੍ਸਜ੍ਜਨਾਨਂ ਕਾਯਾਦੀਨਂ ਏਵ ਕਾਯਸਙ੍ਖਾਰਾਦਿਨਾਮਤ੍ਤਾ. ਨ ਹਿ ਕਾਯਾਦਯੋ ਵਿਯ ਕਾਯਸਙ੍ਖਾਰਾਦੀਨਂ ਨਾਮਂ ਹੋਤਿ, ਪਟਿਲੋਮੇ ਪਨ ਨ ਕਾਯੋ ਨ ਕਾਯਸਙ੍ਖਾਰੋਤਿ ਯੋ ਕਾਯੋ ਨ ਹੋਤਿ, ਸੋ ਕਾਯਸਙ੍ਖਾਰੋਪਿ ਨ ਹੋਤੀਤਿ ਪੁਚ੍ਛਾਯ ਅਤ੍ਥੋ, ਤਸ੍ਸਾ ਕਾਯਸਙ੍ਖਾਰੋ ਨ ਕਾਯੋ ਕਾਯਸਙ੍ਖਾਰੋਤਿ ਕਾਯਸਙ੍ਖਾਰੋ ਕਾਯੋ ਨ ਹੋਤਿ, ਕਾਯਸਙ੍ਖਾਰੋਯੇਵ ਪਨੇਸੋ ਹੋਤਿ, ਕਾਯਞ੍ਚ ਕਾਯਸਙ੍ਖਾਰਞ੍ਚ ਠਪੇਤ੍ਵਾ ਅਵਸੇਸਂ ਸਙ੍ਖਤਾਸਙ੍ਖਤਾਦਿਭੇਦਂ ਸਬ੍ਬਂ ਨ ਚ ਕਾਯੋ, ਨ ਚ ਕਾਯਸਙ੍ਖਾਰੋਤਿ ਵਿਸ੍ਸਜ੍ਜਨਂ. ਸੇਸੇਸੁਪਿ ਏਸੇਵ ਨਯੋ, ਇਤਰੇਸੁ ਚ ਅਨੁਲੋਮਪਟਿਲੋਮੇਸੁ ‘‘ਕਾਯੋ ਕਾਯਸਙ੍ਖਾਰੋਤਿ? ਨੋ, ਸਙ੍ਖਾਰਾ ਵਚੀਸਙ੍ਖਾਰੋਤਿ? ਵਚੀਸਙ੍ਖਾਰੋ ਸਙ੍ਖਾਰੋ ਚੇਵ ਵਚੀਸਙ੍ਖਾਰੋ ਚ, ਅਵਸੇਸਾ ਸਙ੍ਖਾਰਾ, ਨ ਵਚੀਸਙ੍ਖਾਰੋ, ਨ ਸਙ੍ਖਾਰਾ ਨ ਵਚੀਸਙ੍ਖਾਰੋਤਿ? ਆਮਨ੍ਤਾ’’ਤਿਆਦਿਨਾ ਸਬ੍ਬਤ੍ਥ ਪੁਚ੍ਛਾਵਿਸ੍ਸਜ੍ਜਨਨਯੋ ਵੇਦਿਤਬ੍ਬੋ.

ਪਵਤ੍ਤਿਵਾਰੇ ਪਨ ‘‘ਯਸ੍ਸ ਕਾਯਸਙ੍ਖਾਰੋ ਉਪ੍ਪਜ੍ਜਤਿ, ਤਸ੍ਸ ਵਚੀਸਙ੍ਖਾਰੋ ਉਪ੍ਪਜ੍ਜਤੀਤਿ? ਵਿਨਾ ਵਿਤਕ੍ਕਵਿਚਾਰੇਹਿ ਅਸ੍ਸਾਸਪਸ੍ਸਾਸਾਨਂ ਉਪ੍ਪਾਦਕ੍ਖਣੇ ਤੇਸਂ ਕਾਯਸਙ੍ਖਾਰੋ ਉਪ੍ਪਜ੍ਜਤਿ, ਨੇਤਰੋ, ਸਵਿਤਕ੍ਕਸਵਿਚਾਰਚਿਤ੍ਤਸਮਙ੍ਗੀਨਂ ਪਨ ਕਾਮਾਵਚਰਸਤ੍ਤਾਨਂ ਤਦੁਭਯਮ੍ਪਿ ਉਪ੍ਪਜ੍ਜਤਿ. ਯਸ੍ਸ ਵਾ ਪਨ…ਪੇ… ਉਪ੍ਪਜ੍ਜਤੀਤਿ? ਰੂਪਾਰੂਪਭਵਿਕਾਨਂ ਵਿਤਕ੍ਕਵਿਚਾਰੁਪ੍ਪਾਦਕ੍ਖਣੇ ਵਚੀਸਙ੍ਖਾਰੋਵ ਉਪ੍ਪਜ੍ਜਤਿ, ਨੇਤਰੋ…ਪੇ… ਯਥਾਵੁਤ੍ਤਕਾਮਾਵਚਰਾਨਂ ਪਨ ਤਦੁਭਯਂ ਉਪ੍ਪਜ੍ਜਤਿ. ਯਸ੍ਸ ਕਾਯਸਙ੍ਖਾਰੋ ਉਪ੍ਪਜ੍ਜਤਿ, ਤਸ੍ਸ ਚਿਤ੍ਤਸਙ੍ਖਾਰੋ ਉਪ੍ਪਜ੍ਜਤੀਤਿ? ਆਮਨ੍ਤਾ…ਪੇ… ਯਸ੍ਸ ਵਾ ਪਨ…ਪੇ… ਉਪ੍ਪਜ੍ਜਤੀਤਿ…ਪੇ… ਅਸ੍ਸਾਸਪਸ੍ਸਾਸਾਨਂ ਉਪ੍ਪਾਦਕ੍ਖਣੇ ਤਦੁਭਯਂ ਉਪ੍ਪਜ੍ਜਤਿ. ਯਸ੍ਸ ਵਚੀਸਙ੍ਖਾਰੋ ਉਪ੍ਪਜ੍ਜਤਿ, ਤਸ੍ਸ ਚਿਤ੍ਤਸਙ੍ਖਾਰੋ ਉਪ੍ਪਜ੍ਜਤੀਤਿ? ਆਮਨ੍ਤਾ…ਪੇ… ਯਤ੍ਥ ਕਾਯਸਙ੍ਖਾਰੋ ਉਪ੍ਪਜ੍ਜਤਿ, ਤਤ੍ਥ ਵਚੀਸਙ੍ਖਾਰੋ ਉਪ੍ਪਜ੍ਜਤੀਤਿ? ਕਾਮਾਵਚਰਸਤ੍ਤਾਨਂ ਦੁਤਿਯਜ੍ਝਾਨੇ ਤਤਿਯਜ੍ਝਾਨੇ ਤਤ੍ਥ ਕਾਯਸਙ੍ਖਾਰੋਵ ਉਪ੍ਪਜ੍ਜਤਿ, ਨੇਤਰੋ, ਪਠਮਜ੍ਝਾਨਾਦੀਸੁ ਪਨ ਤਦੁਭਯਂ ਉਪ੍ਪਜ੍ਜਤਿ. ਯਤ੍ਥ ਵਾ ਪਨ …ਪੇ… ਉਪ੍ਪਜ੍ਜਤੀਤਿ? ਕਾਮਾਵਚਰੇ ਉਪ੍ਪਜ੍ਜਤਿ, ਨ ਰੂਪਾਰੂਪਭਵੇਸੁ. ਯਤ੍ਥ ਕਾਯਸਙ੍ਖਾਰੋ ਉਪ੍ਪਜ੍ਜਤਿ, ਤਤ੍ਥ ਚਿਤ੍ਤਸਙ੍ਖਾਰੋ ਉਪ੍ਪਜ੍ਜਤੀਤਿ? ਆਮਨ੍ਤਾ. ਯਤ੍ਥ ਵਾ ਪਨ…ਪੇ… ਉਪ੍ਪਜ੍ਜਤੀਤਿ? ਕਾਮਾਵਚਰਸਤ੍ਤਾਨਂ ਚਤੁਤ੍ਥਜ੍ਝਾਨੇ ਰੂਪਾਰੂਪਭਵੇ ਚ ਤਤ੍ਥ ਚਿਤ੍ਤਸਙ੍ਖਾਰੋਵ ਉਪ੍ਪਜ੍ਜਤਿ, ਨੇਤਰੋ, ਇਤਰਜ੍ਝਾਨਾਦੀਸੁ ਪਨ ਤਦੁਭਯਂ ਉਪ੍ਪਜ੍ਜਤੀ’’ਤਿਆਦਿਨਾ,

‘‘ਯਸ੍ਸ ਕਾਯਸਙ੍ਖਾਰੋ ਨੁਪ੍ਪਜ੍ਜਤਿ, ਤਸ੍ਸ ਵਚੀਸਙ੍ਖਾਰੋ ਨੁਪ੍ਪਜ੍ਜਤੀਤਿ? ਵਿਨਾ ਅਸ੍ਸਾਸਪਸ੍ਸਾਸੇਹਿ ਵਿਤਕ੍ਕਵਿਚਾਰਾਨਂ ਉਪ੍ਪਾਦਕ੍ਖਣੇ ਤੇਸਂ ਕਾਯਸਙ੍ਖਾਰੋਵ ਨੁਪ੍ਪਜ੍ਜਤਿ, ਨੇਤਰੋ, ਸਬ੍ਬੇਸਂ ਚਿਤ੍ਤਸ੍ਸ ਭਙ੍ਗਕ੍ਖਣੇ ਵਿਨਾ ਅਸ੍ਸਾਸਪਸ੍ਸਾਸੇਹਿ ਅਵਿਤਕ੍ਕਅਵਿਚਾਰਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਨਿਰੋਧਸਮਾਪਨ੍ਨਾਨਂ ਅਸਞ੍ਞਸਤ੍ਤਾਨਞ੍ਚ ਤਦੁਭਯਮ੍ਪਿ ਨੁਪ੍ਪਜ੍ਜਤਿ…ਪੇ… ਯਸ੍ਸ ਕਾਯਸਙ੍ਖਾਰੋ ਨੁਪ੍ਪਜ੍ਜਤਿ, ਤਸ੍ਸ ਚਿਤ੍ਤਸਙ੍ਖਾਰੋ ਨੁਪ੍ਪਜ੍ਜਤੀਤਿ…ਪੇ… ਸਬ੍ਬਚਿਤ੍ਤਾਨਂ ਭਙ੍ਗਕ੍ਖਣੇ ਨਿਰੋਧਸਮਾਪਨ੍ਨਾਨਂ ਅਸਞ੍ਞਸਤ੍ਤਾਨਞ੍ਚ ਨੁਪ੍ਪਜ੍ਜਤੀ’’ਤਿਆਦਿਨਾ ਚ, ‘‘ਯਤ੍ਥ ਕਾਯਸਙ੍ਖਾਰੋ ਨੁਪ੍ਪਜ੍ਜਤਿ, ਤਤ੍ਥ ਵਚੀਸਙ੍ਖਾਰੋ ਨੁਪ੍ਪਜ੍ਜਤੀਤਿ…ਪੇ… ਚਤੁਤ੍ਥਜ੍ਝਾਨਕ੍ਖਣੇ ਰੂਪਭਵਾਦੀਸੁ ਨੁਪ੍ਪਜ੍ਜਤੀ’’ਤਿਆਦਿਨਾ ਚ, ‘‘ਯਸ੍ਸ ਕਾਯਸਙ੍ਖਾਰੋ ਉਪ੍ਪਜ੍ਜਿਤ੍ਥ, ਤਸ੍ਸ ਵਚੀਸਙ੍ਖਾਰੋ ਉਪ੍ਪਜ੍ਜਿਤ੍ਥਾਤਿ? ਆਮਨ੍ਤਾ’’ਤਿਆਦਿਨਾ, ‘‘ਯਸ੍ਸ ਕਾਯਸਙ੍ਖਾਰੋ ਨੁਪ੍ਪਜ੍ਜਿਤ੍ਥ, ਤਸ੍ਸ ਚਿਤ੍ਤਸਙ੍ਖਾਰੋ ਨੁਪ੍ਪਜ੍ਜਿਤ੍ਥਾਤਿ? ਨਤ੍ਥੀ’’ਤਿਆਦਿਨਾ, ‘‘ਯਸ੍ਸ ਯਤ੍ਥ ਕਾਯਸਙ੍ਖਾਰੋ ਨੁਪ੍ਪਜ੍ਜਿਤ੍ਥ, ਤਸ੍ਸ ਤਤ੍ਥ ਵਚੀਸਙ੍ਖਾਰੋ ਨੁਪ੍ਪਜ੍ਜਿਤ੍ਥਾਤਿ…ਪੇ… ਚਤੁਤ੍ਥਜ੍ਝਾਨਂ ਸਮਾਪਨ੍ਨਾਨਂ ਸੁਦ੍ਧਾਵਾਸਾਨਂ ਦੁਤਿਯੇ ਚਿਤ੍ਤੇ ਵਤ੍ਤਮਾਨੇ ਅਸਞ੍ਞਸਤ੍ਤਾਨਂ ਤੇਸਂ ਤਤ੍ਥ ਕਾਯਸਙ੍ਖਾਰੋ ਚ ਨੁਪ੍ਪਜ੍ਜਿਤ੍ਥ ਵਚੀਸਙ੍ਖਾਰੋ ਚਾ’’ਤਿਆਦਿਨਾ ਚ,

‘‘ਯਸ੍ਸ ਕਾਯਸਙ੍ਖਾਰੋ ਉਪ੍ਪਜ੍ਜਿਸ੍ਸਤਿ, ਤਸ੍ਸ ਵਚੀਸਙ੍ਖਾਰੋ ਉਪ੍ਪਜ੍ਜਿਸ੍ਸਤੀਤਿ? ਆਮਨ੍ਤਾ. ਯਸ੍ਸ ਵਾ ਪਨ…ਪੇ… ਉਪ੍ਪਜ੍ਜਿਸ੍ਸਤੀਤਿ? ਯਸ੍ਸ ਚਿਤ੍ਤਸ੍ਸ ਅਨਨ੍ਤਰਾ ਕਾਮਾਵਚਰਾਨਂ ਪਚ੍ਛਿਮਚਿਤ੍ਤਂ ਉਪ੍ਪਜ੍ਜਿਸ੍ਸਤਿ, ਰੂਪਾਰੂਪਭਵੇ ਪਚ੍ਛਿਮਭਵਿਕਾਨਂ ਵਚੀਸਙ੍ਖਾਰੋਵ ਉਪ੍ਪਜ੍ਜਿਸ੍ਸਤਿ, ਨ ਕਾਯਸਙ੍ਖਾਰੋ, ਅਞ੍ਞੇਸਂ ਪਨ ਤਦੁਭਯਂ ਉਪ੍ਪਜ੍ਜਿਸ੍ਸਤੀ’’ਤਿਆਦਿਨਾ ਚ, ‘‘ਯਸ੍ਸ ਕਾਯਸਙ੍ਖਾਰੋ ਨੁਪ੍ਪਜ੍ਜਿਸ੍ਸਤਿ, ਤਸ੍ਸ ਵਚੀਸਙ੍ਖਾਰੋ ਨੁਪ੍ਪਜ੍ਜਿਸ੍ਸਤੀਤਿ…ਪੇ… ਪਚ੍ਛਿਮਚਿਤ੍ਤਸਮਙ੍ਗੀਨਂ ਯਸ੍ਸ ਚਿਤ੍ਤਸ੍ਸ ਅਨਨ੍ਤਰਾ ਅਵਿਤਕ੍ਕਅਵਿਚਾਰਂ ਪਚ੍ਛਿਮਚਿਤ੍ਤਂ ਉਪ੍ਪਜ੍ਜਿਸ੍ਸਤਿ, ਤੇਸਂ ਤਦੁਭਯਂ ਨੁਪ੍ਪਜ੍ਜਿਸ੍ਸਤੀ’’ਤਿਆਦਿਨਾ ਸਬ੍ਬਕਾਲਭੇਦੇਸੁ ਯਥਾਨੁਰੂਪਤੋ ਉਪ੍ਪਾਦਵਾਰੇ ਯੋਜਨਾਨਯੋ ਵੇਦਿਤਬ੍ਬੋ. ‘‘ਯਸ੍ਸ ਕਾਯਸਙ੍ਖਾਰੋ ਨਿਰੁਜ੍ਝਤਿ, ਤਸ੍ਸ ਵਚੀਸਙ੍ਖਾਰੋ ਨਿਰੁਜ੍ਝਤੀਤਿ…ਪੇ… ਪਠਮਜ੍ਝਾਨਂ ਸਮਾਪਨ੍ਨਾਨਂ ਕਾਮਾਵਚਰਾਨਂ ਅਸ੍ਸਾਸਪਸ੍ਸਾਸਾਨਂ ਭਙ੍ਗਕ੍ਖਣੇ ਤਦੁਭਯਂ ਨਿਰੁਜ੍ਝਤਿ. ਯਸ੍ਸ ਕਾਯਸਙ੍ਖਾਰੋ ਨਿਰੁਜ੍ਝਤਿ, ਤਸ੍ਸ ਚਿਤ੍ਤਸਙ੍ਖਾਰੋ ਨਿਰੁਜ੍ਝਤੀਤਿ? ਆਮਨ੍ਤਾ’’ਤਿਆਦਿਨਾ ਨਿਰੋਧਵਾਰੇ, ‘‘ਯਸ੍ਸ ਕਾਯਸਙ੍ਖਾਰੋ ਉਪ੍ਪਜ੍ਜਤਿ, ਤਸ੍ਸ ਵਚੀਸਙ੍ਖਾਰੋ ਨਿਰੁਜ੍ਝਤੀਤਿ? ਨੋ’’ਤਿਆਦਿਨਾ ਉਪ੍ਪਾਦਨਿਰੋਧਵਾਰੇ ਚ,

‘‘ਯੋ ਕਾਯਸਙ੍ਖਾਰਂ ਪਰਿਜਾਨਾਤਿ, ਸੋ ਵਚੀਸਙ੍ਖਾਰਂ ਪਰਿਜਾਨਾਤੀਤਿ? ਆਮਨ੍ਤਾ’’ਤਿਆਦਿਨਾ ਪਰਿਞ੍ਞਾਵਾਰੇ ਚ ਹੇਟ੍ਠਾ ਵੁਤ੍ਤਾਨੁਸਾਰੇਨ ਸਬ੍ਬਤ੍ਥ ਪਾਲ਼ਿਨਯੋ ਵੇਦਿਤਬ੍ਬੋ.

ਪਵਤ੍ਤਿਵਾਰੇ ਪਨੇਤ੍ਥ ਪਚ੍ਚੁਪ੍ਪਨ੍ਨਕਾਲੇ ਪੁਗ੍ਗਲਵਾਰਸ੍ਸ ਅਨੁਲੋਮਨਯੇ ਕਾਯਸਙ੍ਖਾਰਮੂਲਕਾਨਿ ਦ੍ਵੇ, ਵਚੀਸਙ੍ਖਾਰਮੂਲਕਂ ਏਕਨ੍ਤਿ ਤੀਣੇਵ ਯਮਕਾਨਿ ਲਬ੍ਭਨ੍ਤਿ. ਤਸ੍ਸ ਪਟਿਲੋਮਨਯੇਪਿ ਓਕਾਸਵਾਰਾਦੀਸੁਪਿ ਏਸੇਵ ਨਯੋ. ਏਵਮੇਤ੍ਥ ਸਬ੍ਬਵਾਰੇਸੁ ਤਿਣ੍ਣਂ ਤਿਣ੍ਣਂ ਯਮਕਾਨਂ ਵਸੇਨ ਯਮਕਗਣਨਾ ਵੇਦਿਤਬ੍ਬਾ. ਅਤ੍ਥਵਿਨਿਚ੍ਛਯੇ ਪਨੇਤ੍ਥ ਇਦਂ ਲਕ੍ਖਣਂ – ਇਮਸ੍ਮਿਂ ਹਿ ਸਙ੍ਖਾਰਯਮਕੇ ‘‘ਅਸ੍ਸਾਸਪਸ੍ਸਾਸਾਨਂ ਉਪ੍ਪਾਦਕ੍ਖਣੇ, ਵਿਤਕ੍ਕਵਿਚਾਰਾਨਂ ਉਪ੍ਪਾਦਕ੍ਖਣੇ’’ਤਿਆਦਿਵਚਨਤੋ (ਯਮ. ੨.ਸਙ੍ਖਾਰਯਮਕ.੧੯) ਪਚ੍ਚੁਪ੍ਪਨ੍ਨਾਦਿਕਾਲਭੇਦੋ ਪਵਤ੍ਤਿਵਸੇਨਾਪਿ ਗਹੇਤਬ੍ਬੋ, ਨ ਚੁਤਿਪਟਿਸਨ੍ਧਿਵਸੇਨੇਵ. ‘‘ਦੁਤਿਯਜ੍ਝਾਨੇ ਤਤਿਯਜ੍ਝਾਨੇ ਤਤ੍ਥ ਕਾਯਸਙ੍ਖਾਰੋ ਉਪ੍ਪਜ੍ਜਤੀ’’ਤਿਆਦਿਵਚਨਤੋ (ਯਮ. ੨.ਸਙ੍ਖਾਰਯਮਕ.੨੧) ਚ ਝਾਨਮ੍ਪਿ ਓਕਾਸਵਸੇਨ ਗਹਿਤਨ੍ਤਿ ਵੇਦਿਤਬ੍ਬਂ. ਏਵਮੇਤ੍ਥ ਯਂ ਯਂ ਲਬ੍ਭਤਿ, ਤਸ੍ਸ ਤਸ੍ਸ ਵਸੇਨ ਅਤ੍ਥਵਿਨਿਚ੍ਛਯੋ ਵੇਦਿਤਬ੍ਬੋ. ਤਤ੍ਰਿਦਂ ਨਯਮੁਖਂ – ‘‘ਵਿਨਾ ਵਿਤਕ੍ਕਵਿਚਾਰੇਹੀ’’ਤਿ ਦੁਤਿਯਤਤਿਯਜ੍ਝਾਨਵਸੇਨ ਵੁਤ੍ਤਂ, ਨ ਚਤੁਤ੍ਥਜ੍ਝਾਨਵਸੇਨ ਤਤ੍ਥ ਅਸ੍ਸਾਸਪਸ੍ਸਾਸਾਨਂ ਅਭਾਵਤੋ. ‘‘ਚਿਤ੍ਤਸ੍ਸ ਭਙ੍ਗਕ੍ਖਣੇ’’ਤਿ ਇਦਂ ਕਾਯਸਙ੍ਖਾਰਸ੍ਸ ਏਕਨ੍ਤਚਿਤ੍ਤਸਮੁਟ੍ਠਾਨਤ੍ਤਾ ਵੁਤ੍ਤਂ, ਉਪ੍ਪਜ੍ਜਮਾਨਮੇਵ ਹਿ ਚਿਤ੍ਤਂ ਰੂਪਂ, ਅਰੂਪਂ ਵਾ ਸਮੁਟ੍ਠਾਪੇਤਿ, ਨ ਭਿਜ੍ਜਮਾਨਂ, ਠਿਤਂ ਵਾ. ‘‘ਪਚ੍ਛਿਮਚਿਤ੍ਤਸਮਙ੍ਗੀਨ’’ਨ੍ਤਿ ਸਬ੍ਬਪਚ੍ਛਿਮੇਨ ਅਪ੍ਪਟਿਸਨ੍ਧਿਕਚਿਤ੍ਤੇਨ ਸਮਙ੍ਗੀਨਂ ਖੀਣਾਸਵਾਨਂ. ‘‘ਅਵਿਤਕ੍ਕਅਵਿਚਾਰਂ ਪਚ੍ਛਿਮਚਿਤ੍ਤ’’ਨ੍ਤਿ ਏਤ੍ਥ ਰੂਪਾਵਚਰਾਨਂ ਦੁਤਿਯਜ੍ਝਾਨਿਕਾਦਿਚੁਤਿਚਿਤ੍ਤਵਸੇਨ, ਅਰੂਪਾਵਚਰਾਨਞ੍ਚ ਚਤੁਤ੍ਥਜ੍ਝਾਨਿਕਚੁਤਿਚਿਤ੍ਤਵਸੇਨ ਅਤ੍ਥੋ ਗਹੇਤਬ੍ਬੋ.

‘‘ਯਸ੍ਸ ਕਾਯਸਙ੍ਖਾਰੋ ਨਿਰੁਜ੍ਝਤਿ, ਤਸ੍ਸ ਚਿਤ੍ਤਸਙ੍ਖਾਰੋ ਨਿਰੁਜ੍ਝਤੀ’’ਤਿ ਏਤ੍ਥ ਨਿਯਮਤੋ ਕਾਯਸਙ੍ਖਾਰਸ੍ਸ ਚਿਤ੍ਤਸਙ੍ਖਾਰੇਨ ਸਦ੍ਧਿਂ ਏਕਕ੍ਖਣੇ ਨਿਰੁਜ੍ਝਨਤੋ ‘‘ਆਮਨ੍ਤਾ’’ਤਿ ਪਟਿਵਚਨਂ ਦਿਨ੍ਨਂ ਨ ਏਕਚਿਤ੍ਤਕ੍ਖਣਿਕਤ੍ਤਾ. ਚਿਤ੍ਤਸਙ੍ਖਾਰੋ ਹਿ ਕਾਯਸਙ੍ਖਾਰੇਨ ਵਿਨਾਪਿ ਉਪ੍ਪਜ੍ਜਤਿ ਚ ਨਿਰੁਜ੍ਝਤਿ ਚ. ਕਾਯਸਙ੍ਖਾਰੋ ਪਨ ਚਿਤ੍ਤਸਮੁਟ੍ਠਾਨਤ੍ਤਾ ਯੇਨ ਚਿਤ੍ਤੇਨ ਸਦ੍ਧਿਂ ਉਪ੍ਪਜ੍ਜਤਿ, ਤਤੋ ਪਟ੍ਠਾਯ ਸਤ੍ਤਰਸਮੇਨ ਸਦ੍ਧਿਂ ਨਿਰੁਜ੍ਝਤਿ, ਏਸਾ ਚਿਤ੍ਤਸਮੁਟ੍ਠਾਨਰੂਪਸ੍ਸ ਧਮ੍ਮਤਾ. ਯਂ ਪਨ ਵਿਭਙ੍ਗਪ੍ਪਕਰਣਸ੍ਸ ਸੀਹਲ਼ਟ੍ਠਕਥਾਯ ‘‘ਚਿਤ੍ਤਸਮੁਟ੍ਠਾਨਰੂਪਂ ਸਤ੍ਤਰਸਮਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਨਿਰੁਜ੍ਝਤੀ’’ਤਿ ਵੁਤ੍ਤਂ, ਤਂ ਇਮਾਯ ਪਾਲ਼ਿਯਾ ਵਿਰੁਜ੍ਝਤਿ. ‘‘ਯਸ੍ਸ ਕਾਯਸਙ੍ਖਾਰੋ ਉਪ੍ਪਜ੍ਜਤਿ, ਤਸ੍ਸ ਵਚੀਸਙ੍ਖਾਰੋ ਨਿਰੁਜ੍ਝਤੀ’’ਤਿ ਏਤ੍ਥ ਯਸ੍ਮਾ ਕਾਯਸਙ੍ਖਾਰੋ ਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਉਪ੍ਪਜ੍ਜਤਿ, ਨ ਚ ਤਸ੍ਮਿਂ ਖਣੇ ਵਿਤਕ੍ਕਵਿਚਾਰਾ ਨਿਰੁਜ੍ਝਨ੍ਤਿ, ਤਸ੍ਮਾ ‘‘ਨੋ’’ਤਿ ਪਟਿਸੇਧੋ ਕਤੋ. ਇਮਿਨਾ ਨਯਮੁਖੇਨ ਸਬ੍ਬਤ੍ਥ ਵਿਨਿਚ੍ਛਯੋ ਵੇਦਿਤਬ੍ਬੋ. ਅਯਂ ਸਙ੍ਖਾਰਯਮਕਮਾਤਿਕਤ੍ਥਸਂਵਣ੍ਣਨਾਨਯੋ.

ਅਨੁਸਯਯਮਕਮਾਤਿਕਤ੍ਥਵਣ੍ਣਨਾ

ਅਨੁਸਯਯਮਕਮਾਤਿਕਾਯ ਪਨ ਪਾਲ਼ਿਵਵਤ੍ਥਾਨਂ ਤਾਵ ਏਵਂ ਵੇਦਿਤਬ੍ਬਂ. ਅਨੁਸਯਯਮਕੇਪਿ ਖਨ੍ਧਯਮਕਮਾਤਿਕਾਦੀਸੁ ਵਿਯ ਦੇਸਨਂ ਅਕਤ੍ਵਾ ਅਞ੍ਞੇਨ ਨਯੇਨ ਪਾਲ਼ਿਦੇਸਨਾ ਕਤਾ. ਕਥਂ? ਪਠਮਂ ਤਾਵ ਪਰਿਚ੍ਛੇਦਵਾਰੋ ਪਰਿਚ੍ਛਿਨ੍ਨੁਦ੍ਦੇਸਵਾਰੋਤਿ ਦ੍ਵੇ ਵਾਰਾ ਉਦ੍ਦੇਸਵਸੇਨ ਦੇਸਿਤਾ, ਤਤੋ ਉਪ੍ਪਤ੍ਤਿਟ੍ਠਾਨਵਾਰੋਤਿ ਏਕੋ ਖੁਦ੍ਦਕਵਾਰੋ. ਤਤੋ ਅਨੁਸਯਵਾਰੋ ਸਾਨੁਸਯਵਾਰੋ ਪਜਹਨਵਾਰੋ ਪਰਿਞ੍ਞਾਵਾਰੋ ਪਹੀਨਵਾਰੋ ਉਪ੍ਪਜ੍ਜਨਵਾਰੋ ਧਾਤੁਵਾਰੋਤਿ ਅਨੁਸਯੇ ਯੋਜੇਤ੍ਵਾ ਯਮਕਵਸੇਨ ਪਪਞ੍ਚਤੋ ਨਿਦ੍ਦਿਟ੍ਠਾ ਸਤ੍ਤ ਮਹਾਵਾਰਾਤਿ ਅਟ੍ਠਕਨਿਦ੍ਦੇਸਵਸੇਨ ਦੇਸਿਤਾ, ਏਵਂ ਦਸਹਿ ਵਾਰੇਹਿ ਅਨੁਸਯਯਮਕਦੇਸਨਾ ਕਤਾ. ਤੇਸੁ ਯੇ ਇਮੇ ਹਿ ਪਰਿਚ੍ਛੇਦਵਾਰੋਤਿਆਦਿਨਾ ਦ੍ਵੇ ਵਾਰਾ ਉਦ੍ਦੇਸਵਸੇਨ ਵੁਤ੍ਤਾ, ਤੇ ਇਧ ਅਨੁਸਯਯਮਕਮਾਤਿਕਾਤਿ ਗਹੇਤਬ੍ਬਾ.

ਤਤ੍ਥ ਹਿ ਸਤ੍ਤ ਅਨੁਸਯਾਤਿ ਅਯਂ ਗਣਨਾਯ ਪਰਿਚ੍ਛਿਨ੍ਦਿਤ੍ਵਾ ਅਨੁਸਯਾਨਂ ਦੇਸਿਤਤ੍ਤਾ ਪਰਿਚ੍ਛੇਦਵਾਰੋ ਨਾਮ. ਕਾਮਰਾਗਾਨੁਸਯੋ…ਪੇ… ਅਵਿਜ੍ਜਾਨੁਸਯੋਤਿ ਅਯਂ ਪਰਿਚ੍ਛੇਦਵਸੇਨ ਪਰਿਚ੍ਛਿਨ੍ਨਾਨਂ ਨਾਮਮਤ੍ਤਂ ਉਦ੍ਦਿਸਿਤ੍ਵਾ ‘‘ਇਮੇ ਨਾਮ ਤੇ’’ਤਿ ਦੇਸਿਤਤ੍ਤਾ ਪਰਿਚ੍ਛਿਨ੍ਨੁਦ੍ਦੇਸਵਾਰੋ ਨਾਮ. ਤਤ੍ਥ ਅਨੁਤ੍ਤਾਨਤ੍ਥਤੋ ਤਾਵ ਅਨੁਸਯਾਤਿ ਕੇਨਟ੍ਠੇਨ ਅਨੁਸਯਾ? ਅਨੁਸਯਨਟ੍ਠੇਨ. ਕੋ ਏਸ ਅਨੁਸਯਨਟ੍ਠੋ ਨਾਮਾਤਿ? ਅਪ੍ਪਹੀਨਟ੍ਠੋ. ਕਾਮਰਾਗਾਨੁਸਯਾਦਯੋ ਹਿ ਅਪ੍ਪਹੀਨਟ੍ਠੇਨ ਤਸ੍ਸ ਤਸ੍ਸ ਸਨ੍ਤਾਨੇ ਅਨੁਸੇਨ੍ਤਿ ਨਾਮ, ਤਸ੍ਮਾ ‘‘ਅਨੁਸਯਾ’’ਤਿ ਵੁਚ੍ਚਨ੍ਤਿ, ਅਨੁਸੇਨ੍ਤੀਤਿ ਚ ਤਂ ਤਂ ਅਨੁਰੂਪਂ ਕਾਰਣਂ ਲਭਿਤ੍ਵਾ ਉਪ੍ਪਜ੍ਜਨ੍ਤੀਤਿ ਅਤ੍ਥੋ. ਅਥਾਪਿ ਸਿਯਾ – ਅਨੁਸਯਨਟ੍ਠੋ ਨਾਮ ਅਪ੍ਪਹੀਨਾਕਾਰੋ, ਅਪ੍ਪਹੀਨਾਕਾਰੋ ਚ ਨ ਉਪ੍ਪਜ੍ਜਤਿ, ਤਸ੍ਮਾ ਅਨੁਸਯਾ ਨ ਉਪ੍ਪਜ੍ਜਨ੍ਤੀਤਿ. ਤਤ੍ਰਿਦਂ ਪਟਿਵਚਨਂ – ਅਪ੍ਪਹੀਨਾਕਾਰੋ ਅਨੁਸਯੋ, ਅਨੁਸਯੋਤਿ ਪਨ ਅਪ੍ਪਹੀਨਟ੍ਠੇਨ ਥਾਮਗਤਕਿਲੇਸੋ ਵੁਚ੍ਚਤਿ, ਸੋ ਚਿਤ੍ਤਸਮ੍ਪਯੁਤ੍ਤੋ ਸਾਰਮ੍ਮਣੋ ਸਪ੍ਪਚ੍ਚਯਟ੍ਠੇਨ ਸਹੇਤੁਕੋ ਏਕਨ੍ਤਾਕੁਸਲੋਵ ਹੋਤਿ ਕਥਾਵਤ੍ਥੁਸ੍ਮਿਂ (ਕਥਾ. ੫੫੪ ਆਦਯੋ) ਅਨੁਸਯਾਨਂ ਚਿਤ੍ਤਵਿਪ੍ਪਯੁਤ੍ਤਭਾਵਸ੍ਸ ਪਟਿਸੇਧਿਤਤ੍ਤਾ, ਸੋ ਚ ਅਤੀਤੋਪਿ ਹੋਤਿ, ਅਨਾਗਤੋਪਿ ਪਚ੍ਚੁਪ੍ਪਨ੍ਨੋਪਿ, ਤਸ੍ਮਾ ਉਪ੍ਪਜ੍ਜਤੀਤਿ ਵਤ੍ਤੁਂ ਯੁਤ੍ਤਂ. ਤਥਾ ਹਿ ਧਮ੍ਮਸਙ੍ਗਹੇ ਮੋਹਸ੍ਸ ਪਦਭਾਜਨੇ ੩੧੭ ‘‘ਅਵਿਜ੍ਜਾਨੁਸਯੋ ਅਵਿਜ੍ਜਾਪਰਿਯੁਟ੍ਠਾਨਂ…ਪੇ… ਅਯਂ ਤਸ੍ਮਿਂ ਸਮਯੇ ਮੋਹੋ ਹੋਤੀ’’ਤਿ (ਧ. ਸ. ੩੯੦). ਇਮਸ੍ਮਿਞ੍ਚ ਯਮਕੇ ਉਪ੍ਪਜ੍ਜਨਵਾਰੇ ‘‘ਯਸ੍ਸ ਕਾਮਰਾਗਾਨੁਸਯੋ ਉਪ੍ਪਜ੍ਜਤਿ, ਤਸ੍ਸ ਪਟਿਘਾਨੁਸਯੋ ਉਪ੍ਪਜ੍ਜਤੀ’’ਤਿਆਦਿ ਵੁਤ੍ਤਂ, ਤਸ੍ਮਾ ‘‘ਅਨੁਸੇਨ੍ਤੀਤਿ ਤਂ ਤਂ ਅਨੁਰੂਪਂ ਕਾਰਣਂ ਲਭਿਤ੍ਵਾ ਉਪ੍ਪਜ੍ਜਨ੍ਤੀ’’ਤਿ ਯਂ ਵੁਤ੍ਤਂ, ਤਂ ਸੁਵੁਤ੍ਤਨ੍ਤਿ ਵੇਦਿਤਬ੍ਬਂ. ਕਾਮਰਾਗਾਨੁਸਯੋਤਿ ਕਾਮਰਾਗੋ ਚ ਸੋ ਅਪ੍ਪਹੀਨਟ੍ਠੇਨ ਅਨੁਸਯੋ ਚਾਤਿ ਕਾਮਰਾਗਾਨੁਸਯੋ. ਸੇਸਪਦੇਸੁਪਿ ਏਸੇਵ ਨਯੋ. ਅਯਂ ਤਾਵੇਤ੍ਥ ਅਨੁਤ੍ਤਾਨਤ੍ਥੋ. ਅਤ੍ਥਵਿਨਿਚ੍ਛਯੋ ਪਨੇਤ੍ਥਾਪਿ ਨਿਦ੍ਦੇਸਨਯਮੁਖਦਸ੍ਸਨਵਸੇਨੇਵ ਹੋਤਿ, ਨਿਦ੍ਦੇਸੋ ਚੇਤ੍ਥ ਹੇਟ੍ਠਾ ਵੁਤ੍ਤੋ.

ਉਪ੍ਪਤ੍ਤਿਟ੍ਠਾਨਵਾਰਾਦਯੋ ਅਟ੍ਠ ਵਾਰਾ ਚ, ਤਤ੍ਰਾਯਂ ਪਾਲ਼ਿਵਵਤ੍ਥਾਨਾਨੁਪੁਬ੍ਬਿਕਾਮੁਖਮਤ੍ਤਪ੍ਪਕਾਸਨਾ. ਤੇਸਂ ਹਿ ਪਠਮੋ ਅਨੁਸਯਾਨਂ ਉਪ੍ਪਤ੍ਤਿਟ੍ਠਾਨਵਾਰੋ ਨਾਮ. ਤਤ੍ਥ ਵਾਰਭੇਦੋ ਯਮਕਯੋਜਨਵਾਰੇ ਨਤ੍ਥਿ, ਇਤਰੇਸੁ ਪਨ ਸਤ੍ਤਸੁ ਮਹਾਵਾਰੇਸੁ ਅਤ੍ਥਿ. ਤੇਸੁ ਹਿ ਪਠਮੋ ਅਨੁਸਯਵਾਰੋ ਅਨੁਲੋਮਪਟਿਲੋਮਨਯਵਸੇਨ ਦੁਵਿਧੋ ਹੋਤਿ. ਤਤ੍ਥ ਅਨੁਲੋਮਨਯੇ ‘‘ਯਸ੍ਸ ਯਤ੍ਥ…ਪੇ… ਅਨੁਸੇਤੀ’’ਤਿ ਪੁਗ੍ਗਲੋਕਾਸਤਦੁਭਯਨਾਮਵਸੇਨ ਤਯੋ ਅਨ੍ਤਰਵਾਰਾ ਹੋਨ੍ਤਿ, ਤੇਸੁ ਏਕੇਕਸ੍ਮਿਂ ਏਕਮੂਲਕਦ੍ਵਿਮੂਲਕਤਿਮੂਲਕਚਤੁਮੂਲਕਪਞ੍ਚਮੂਲਕਛਮੂਲਕਾਨਂ ਵਸੇਨ ਯਮਕਭੇਦਾ ਹੋਨ੍ਤਿ. ਯਥਾ ਚ ਅਨੁਲੋਮਨਯੇ, ਏਵਂ ਪਟਿਲੋਮਨਯੇਪਿ ਵੇਦਿਤਬ੍ਬਾ. ਯਥਾ ਚੇਤ੍ਥ ਅਨੁਸਯਵਾਰੇ, ਏਵਂ ਸਾਨੁਸਯਵਾਰਪਜਹਨਵਾਰਪਰਿਞ੍ਞਾਵਾਰਪਹੀਨਵਾਰਉਪ੍ਪਜ੍ਜਨਵਾਰੇਸੁ ਪਞ੍ਚਸੁਪਿ. ਅਯਂ ਪਨੇਤ੍ਥ ਪੁਰਿਮੇਸੁ ਤੀਸੁ ਵਾਰੇਸੁ ਵਿਸੇਸੋ. ਓਕਾਸਵਾਰੇ ‘‘ਯਤ੍ਥ ਤਤ੍ਥਾ’’ਤਿ ਅਵਤ੍ਵਾ ‘‘ਯਤੋ ਤਤੋ’’ਤਿ ਨਿਸ੍ਸਕ੍ਕਵਚਨੇਨ ਦੇਸਨਾ ਕਤਾ. ਸੇਸਂ ਤਾਦਿਸਮੇਵ. ਯੋ ਪਨਾਯਂ ਸਬ੍ਬਪਚ੍ਛਿਮੋ ਧਾਤੁਵਾਰੋ ਨਾਮ, ਸੋ ਪੁਚ੍ਛਾਵਾਰੋ ਵਿਸ੍ਸਜ੍ਜਨਵਾਰੋਤਿ ਦ੍ਵਿਧਾ ਠਿਤੋ. ਤਤ੍ਥ ਪੁਚ੍ਛਾਵਾਰੋ ਅਨੁਲੋਮਪਟਿਲੋਮਵਸੇਨ ਦੁਵਿਧੋ. ਤਸ੍ਸਾਵਸਾਨੇ ਪੁਚ੍ਛਾਨੁਕ੍ਕਮੇਨ ਵਿਸ੍ਸਜ੍ਜਨਂ ਕਤਨ੍ਤਿ. ਏਵਂ ਤਾਵੇਤ੍ਥ ਪਾਲ਼ਿਵਵਤ੍ਥਾਨਂ ਵੇਦਿਤਬ੍ਬਂ.

ਤਤ੍ਰਿਦਂ ਅਟ੍ਠਨ੍ਨਂ ਵਾਰਾਨਂ ਆਦਿਤੋ ਪਟ੍ਠਾਯ ਮੁਖਮਤ੍ਤਦਸ੍ਸਨਂ. ‘‘ਕਤ੍ਥ ਕਾਮਰਾਗਾਨੁਸਯੋ ਅਨੁਸੇਤਿ? ਕਾਮਧਾਤੁਯਾ ਦ੍ਵੀਸੁ ਵੇਦਨਾਸੁ ਏਤ੍ਥ ਕਾਮਰਾਗਾਨੁਸਯੋ ਅਨੁਸੇਤਿ. ਕਤ੍ਥ ਪਟਿਘਾਨੁਸਯੋ ਅਨੁਸੇਤਿ? ਦੁਕ੍ਖਾਯ ਵੇਦਨਾਯ…ਪੇ… ਮਾਨਾਨੁਸਯੋ ਕਾਮਧਾਤੁਯਾ ਦ੍ਵੀਸੁ ਵੇਦਨਾਸੁ ਰੂਪਧਾਤੁਯਾ ਅਰੂਪਧਾਤੁਯਾ ਚ ਅਨੁਸੇਤਿ. ਦਿਟ੍ਠਾਨੁਸਯੋ, ਵਿਚਿਕਿਚ੍ਛਾਨੁਸਯੋ ਚ ਸਬ੍ਬਸਕ੍ਕਾਯਪਰਿਯਾਪਨ੍ਨੇਸੁ ਧਮ੍ਮੇਸੁ, ਭਵਰਾਗਾਨੁਸਯੋ ਰੂਪਾਰੂਪਧਾਤੂਸੁ, ਅਵਿਜ੍ਜਾਨੁਸਯੋ ਸਬ੍ਬਸਕ੍ਕਾਯਪਰਿਯਾਪਨ੍ਨੇਸੁ ਧਮ੍ਮੇਸੁ ਅਨੁਸੇਤੀ’’ਤਿ ਅਯਂ ਤਾਵ ਪਠਮਵਾਰੇ ਪਾਲ਼ਿਨਯੋ.

ਤਤ੍ਥ ਕਾਮਧਾਤੁਯਾ ਦ੍ਵੀਸੁ ਵੇਦਨਾਸੂਤਿ ਕਾਮਾਵਚਰਭੂਮਿਯਂ ਸੁਖਾਯ ਚੇਵ ਉਪੇਕ੍ਖਾਯ ਚਾਤਿ ਦ੍ਵੀਸੁ ਵੇਦਨਾਸੁ, ਕਾਮਰਾਗਾਨੁਸਯੋ ਪਨ ਸਹਜਾਤਵਸੇਨ, ਆਰਮ੍ਮਣਵਸੇਨ ਚਾਤਿ ਦ੍ਵੀਹਾਕਾਰੇਹਿ ਅਨੁਸੇਤਿ ਉਪ੍ਪਜ੍ਜਤਿ, ਤਤ੍ਥ ਅਕੁਸਲਾਹਿ ਸੁਖਉਪੇਕ੍ਖਾਹਿ ਸਹਜਾਤੋਪਿ ਹੁਤ੍ਵਾ ਤਾ ਆਰਮ੍ਮਣਂ ਕਤ੍ਵਾਪਿ ਉਪ੍ਪਜ੍ਜਤਿ. ਅਵਸੇਸਾ ਪਨ ਕਾਮਾਵਚਰਕੁਸਲਵਿਪਾਕਕਿਰਿਯਵੇਦਨਾ ਆਰਮ੍ਮਣਮੇਵ ਕਤ੍ਵਾ ਉਪ੍ਪਜ੍ਜਤਿ, ਇਮਾਸੁ ਵੇਦਨਾਸੁ ਅਨੁਸਯਮਾਨੋ ਚੇਸ ਤਾਹਿ ਵੇਦਨਾਹਿ ਸਮ੍ਪਯੁਤ੍ਤੇਸੁ ਸਞ੍ਞਾਸਙ੍ਖਾਰਵਿਞ੍ਞਾਣੇਸੁਪਿ ਅਨੁਸੇਤਿਯੇਵ. ਇਮਾਸਂ ਪਨ ਵੇਦਨਾਨਂ ਅਸ੍ਸਾਦਟ੍ਠੇਨ ਕਾਮਰਾਗਾਨੁਸਯੁਪ੍ਪਤ੍ਤਿਯਾ ਸੇਸਸਮ੍ਪਯੁਤ੍ਤੇਹਿ ਪਧਾਨਤ੍ਤਾ, ਓਲ਼ਾਰਿਕਤ੍ਤੇਨ ਵੇਨੇਯ੍ਯਾਨਂ ਸੁਬੋਧਤ੍ਤਾ ਚ ਦ੍ਵੀਸੁ ਵੇਦਨਾਸੁਯੇਵ ਅਨੁਸੇਤੀਤਿ ਵੁਤ੍ਤਂ, ਏਵਂ ਉਪਰਿਪਿ. ਨ ਕੇਵਲਞ੍ਚੇਸ ਅਨੁਸਯਮਾਨੋ ਇਮਾਸੁ ਦ੍ਵੀਸੁ ਵੇਦਨਾਸੁਯੇਵ, ਵੇਦਨਾਸਮ੍ਪਯੁਤ੍ਤੇਸੁ ਧਮ੍ਮੇਸੁ ਚ ਅਨੁਸੇਤਿ, ਇਟ੍ਠੇਸੁ ਪਨ ਰੂਪਾਦੀਸੁਪਿ ਅਨੁਸੇਤਿ ਏਵ. ਵੁਤ੍ਤਮ੍ਪਿ ਚੇਤਂ ਵਿਭਙ੍ਗਪ੍ਪਕਰਣੇ ‘‘ਯਂ ਲੋਕੇ ਪਿਯਰੂਪਂ ਸਾਤਰੂਪਂ, ਏਤ੍ਥ ਸਤ੍ਤਾਨਂ ਕਾਮਰਾਗਾਨੁਸਯੋ ਅਨੁਸੇਤੀ’’ਤਿ (ਵਿਭ. ੮੧੬), ਏਤ੍ਥਾਨੁਸਯਯਮਕੇਪਿ ਵੁਤ੍ਤਂ ‘‘ਦੁਕ੍ਖਾਯ ਵੇਦਨਾਯ ਰੂਪਧਾਤੁਯਾ ਏਤ੍ਥ ਕਾਮਰਾਗਾਨੁਸਯੋ ਨਾਨੁਸੇਤੀ’’ਤਿਆਦਿ. ਏਤੇਨ ਵੁਤ੍ਤਾਵਸੇਸਰੂਪਾਦੀਸੁ ਛਸੁਪਿ ਆਰਮ੍ਮਣੇਸੁ ਅਨੁਸੇਤੀਤਿ ਵੁਤ੍ਤਂ ਹੋਤਿ. ਇਧ ਪਨ ਤਂ ਸਬ੍ਬਂ ਅਵਤ੍ਵਾ ਕਿਞ੍ਚਿਦੇਵ ਪਧਾਨਤ੍ਤਾਦਿਨਾ ਕਾਰਣੇਨ ਵੁਤ੍ਤਨ੍ਤਿ ਗਹੇਤਬ੍ਬਂ.

ਦੁਕ੍ਖਾਯਾਤਿ ਏਤ੍ਥ ਪਟਿਘਚਿਤ੍ਤਸਮ੍ਪਯੁਤ੍ਤਾ ਦ੍ਵੇ ਦੋਮਨਸ੍ਸਵੇਦਨਾ, ਕਾਯਵਿਞ੍ਞਾਣਸਮ੍ਪਯੁਤ੍ਤਾ ਦੁਕ੍ਖਵੇਦਨਾ ਚਾਤਿ ਤਿਸ੍ਸੋ ਵੇਦਨਾ, ਤਂ ਸਮ੍ਪਯੁਤ੍ਤਾ ਚ ਧਮ੍ਮਾ, ਅਨਿਟ੍ਠਾ ਛ ਰੂਪਾਦਯੋ ਧਮ੍ਮਾ ਪਟਿਘਾਨੁਸਯਸਹਜਾਤਵਸੇਨ, ਆਰਮ੍ਮਣਵਸੇਨ ਚ ਯਥਾਰਹਂ ਅਨੁਸਯਨਟ੍ਠਾਨਂ. ਕਿਂ ਪਨ ਇਤਰਾ ਦ੍ਵੇ ਵੇਦਨਾ ਇਟ੍ਠਾਰਮ੍ਮਣਂ ਵਾ ਪਟਿਘਸ੍ਸ ਆਰਮ੍ਮਣਂ ਨ ਹੋਨ੍ਤੀਤਿ? ਨੋ ਨ ਹੋਨ੍ਤਿ. ਪਰਿਹੀਨਜ੍ਝਾਨਸ੍ਸ ਹਿ ਨਟ੍ਠਂ ਇਟ੍ਠਂ ਸਸਮ੍ਪਯੁਤ੍ਤਧਮ੍ਮਂ ਝਾਨਮਾਰਬ੍ਭ ਦੋਮਨਸ੍ਸਂ ਉਪ੍ਪਜ੍ਜਤਿ, ਤਂ ਪਨ ਆਰਮ੍ਮਣਮਤ੍ਤਮੇਵ, ਨਾਨੁਸਯਨਟ੍ਠਾਨਂ ਇਟ੍ਠਤ੍ਤਾ. ਅਨਿਟ੍ਠਮੇਵ ਹਿ ਇਟ੍ਠਤੋ ਪਟਿਹਨਨਨਿਮਿਤ੍ਤਂ, ਯਂ ਪਨ ਤਤ੍ਥੁਪ੍ਪਨ੍ਨਂ, ਤਸ੍ਸ ਪਟਿਘਮਤ੍ਤਮੇਵ ਹੋਤਿ, ਨ ਪਟਿਘਾਨੁਸਯੋਤਿ. ਪਟਿਘਾਨੁਸਯੋ ਹਿ ਅਨਿਟ੍ਠਾਰਮ੍ਮਣੇ ਪਟਿਹਨਨਵਸੇਨ ਉਪ੍ਪਨ੍ਨੋ ਥਾਮਗਤੋ ਕਿਲੇਸੋ, ਇਤਰੋ ਦੋਮਨਸ੍ਸੇਨ ਸਦ੍ਧਿਂ ਉਪ੍ਪਨ੍ਨੋਪਿ ਅਤ੍ਤਨੋ ਪਟਿਹਨਨਕਿਚ੍ਚਸ੍ਸ ਅਕਰਣਤੋ ਪਟਿਘਾਨੁਸਯੋ ਨ ਹੋਤਿ, ਅਬ੍ਬੋਹਾਰਿਕਤ੍ਤਂ ਗਚ੍ਛਤਿ. ਯਥਾ ਹਿ ਪਾਣਾਤਿਪਾਤਚੇਤਨਾਯ ਸਦ੍ਧਿਂ ਉਪ੍ਪਨ੍ਨੋਪਿ ਬ੍ਯਾਪਾਦੋ ਮਨੋਕਮ੍ਮਂ ਨਾਮ ਨ ਹੋਤਿ, ਅਬ੍ਬੋਹਾਰਿਕਤ੍ਤਂ ਗਚ੍ਛਤਿ, ਏਵਨ੍ਤਿ ਗਹੇਤਬ੍ਬਂ. ਤੇਨੇਵ ਨੇਕ੍ਖਮ੍ਮਸ੍ਸਿਤਂ ਦੋਮਨਸ੍ਸਂ ਸੇਵਿਤਬ੍ਬਂ ਵੁਤ੍ਤਂ. ਮਾਨਾਨੁਸਯਸ੍ਸ ਪਨ ਦੁਕ੍ਖਦੋਮਨਸ੍ਸਵਜ੍ਜਿਤਾ ਸਬ੍ਬੇ ਲੋਕਿਯਾ ਧਮ੍ਮਾ ਅਨੁਸਯਨਟ੍ਠਾਨਂ. ‘‘ਦੁਕ੍ਖਾਯ ਵੇਦਨਾਯ ਅਪਰਿਯਾਪਨ੍ਨੇ ਏਤ੍ਥ…ਪੇ… ਮਾਨਾਨੁਸਯੋ ਚ ਨਾਨੁਸੇਤੀ’’ਤਿ ਹਿ ਵੁਤ੍ਤਂ. ਦਿਟ੍ਠਾਨੁਸਯਵਿਚਿਕਿਚ੍ਛਾਨੁਸਯਾਨਂ ਪਨ ਲੋਕੁਤ੍ਤਰਵਜ੍ਜਿਤਾ ਸਬ੍ਬੇਪਿ ਧਮ੍ਮਾ ਅਨੁਸਯਨਟ੍ਠਾਨਂ. ਤੇਨ ਵੁਤ੍ਤਂ ‘‘ਸਬ੍ਬਸਕ੍ਕਾਯਪਰਿਯਾਪਨ੍ਨੇਸੁ ਧਮ੍ਮੇਸੂ’’ਤਿ. ਤਤ੍ਥ ਸਂਸਾਰਵਟ੍ਟਨਿਸ੍ਸਿਤਟ੍ਠੇਨ ਸਕ੍ਕਾਯਪਰਿਯਾਪਨ੍ਨੇਸੁ ਸਬ੍ਬਧਮ੍ਮੇਸੂਤਿ ਅਤ੍ਥੋ. ਏਵਂ ਅਵਿਜ੍ਜਾਨੁਸਯੋਪਿ ਵੇਦਿਤਬ੍ਬੋ. ਸਬ੍ਬਤ੍ਥ ਚ ਸਹਜਾਤਾਰਮ੍ਮਣਭੇਦੋ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਭਵਰਾਗਾਨੁਸਯੋ ਪਨ ਕਿਞ੍ਚਾਪਿ ਦਿਟ੍ਠਿਵਿਪ੍ਪਯੁਤ੍ਤੇਸੁ ਚਤੂਸੁ ਚਿਤ੍ਤੇਸੁ ਉਪ੍ਪਜ੍ਜਨਤੋ ਸਹਜਾਤਵਸੇਨ ਕਾਮਧਾਤੁਯਾ ਦ੍ਵੀਸੁ ਵੇਦਨਾਸੁ ਅਨੁਸੇਤੀਤਿ ਵਤ੍ਤਬ੍ਬੋ ਭਵੇਯ੍ਯ, ਸੋ ਪਨ ਯਸ੍ਮਾ ਰੂਪਾਰੂਪਾਵਚਰਮੇਵਾਰਮ੍ਮਣਂ ਲਭਤਿ, ਨ ਕਾਮਾਵਚਰਾਰਮ੍ਮਣਮੇਵ, ਅਨੁਸਯਾਨਂ ਪਨ ਤਂ ਨ ਅਨੁਸਯਨਟ੍ਠਾਨਂ, ਤਸ੍ਮਾ ਆਰਮ੍ਮਣਵਸੇਨ ਨਿਯਮਂ ਅਕਤ੍ਵਾ ‘‘ਰੂਪਧਾਤੁਯਾ ਅਰੂਪਧਾਤੁਯਾ ਏਤ੍ਥ ਭਵਰਾਗਾਨੁਸਯੋ ਅਨੁਸੇਤੀ’’ਤਿ ਵੁਤ੍ਤਂ. ਤਂ ਰਾਗਵਸੇਨ ਸੋ ਚ ਸਬ੍ਬੋਪਿ ਰਾਗੋ ਕਾਮਰਾਗਾਨੁਸਯੋ ਗਹੇਤਬ੍ਬੋਤਿ ਅਯਂ ਉਪ੍ਪਤ੍ਤਿਟ੍ਠਾਨਵਾਰੇ ਨਯੋ.

ਇਤਰੇਸੁ ਪਨ ਸਤ੍ਤਸੁ ਮਹਾਵਾਰੇਸੁ ਤਾਵ ‘‘ਯਸ੍ਸ ਕਾਮਰਾਗਾਨੁਸਯੋ ਅਨੁਸੇਤਿ, ਤਸ੍ਸ ਪਟਿਘਾਨੁਸਯੋ ਅਨੁਸੇਤੀਤਿ? ਆਮਨ੍ਤਾ. ਯਸ੍ਸ ਵਾ ਪਨ ਪਟਿਘਾਨੁਸਯੋ ਅਨੁਸੇਤਿ, ਤਸ੍ਸ ਕਾਮਰਾਗਾਨੁਸਯੋ ਅਨੁਸੇਤੀਤਿ? ਆਮਨ੍ਤਾ. ਯਸ੍ਸ ਕਾਮਰਾਗਾਨੁਸਯੋ ਅਨੁਸੇਤਿ, ਤਸ੍ਸ ਮਾਨਾਨੁਸਯੋ ਅਨੁਸੇਤੀਤਿ? ਆਮਨ੍ਤਾ. ਯਸ੍ਸ ਵਾ ਪਨ ਮਾਨਾਨੁਸਯੋ ਅਨੁਸੇਤਿ, ਤਸ੍ਸ ਕਾਮਰਾਗਾਨੁਸਯੋ ਅਨੁਸੇਤੀਤਿ? ਅਨਾਗਾਮਿਸ੍ਸ ਮਾਨਾਨੁਸਯੋ ਅਨੁਸੇਤਿ, ਨੋ ਚ ਤਸ੍ਸ ਕਾਮਰਾਗਾਨੁਸਯੋ ਅਨੁਸੇਤਿ, ਤਿਣ੍ਣਂ ਪੁਗ੍ਗਲਾਨਂ ਮਾਨਾਨੁਸਯੋ ਚ ਅਨੁਸੇਤਿ, ਕਾਮਰਾਗਾਨੁਸਯੋ ਚ ਅਨੁਸੇਤਿ. ਯਸ੍ਸ ਕਾਮਰਾਗਾਨੁਸਯੋ ਅਨੁਸੇਤਿ, ਤਸ੍ਸ ਦਿਟ੍ਠਾਨੁਸਯੋ ਅਨੁਸੇਤੀਤਿ? ਦ੍ਵਿਨ੍ਨਂ ਪੁਗ੍ਗਲਾਨਂ ਕਾਮਰਾਗਾਨੁਸਯੋ ਅਨੁਸੇਤਿ, ਨੋ ਚ…ਪੇ… ਦਿਟ੍ਠਾਨੁਸਯੋ ਚ ਅਨੁਸੇਤਿ, ਯਸ੍ਸ ਵਾ ਪਨ…ਪੇ… ਆਮਨ੍ਤਾ. ਯਸ੍ਸ ਕਾਮਰਾਗਾਨੁਸਯੋ ਅਨੁਸੇਤਿ, ਤਸ੍ਸ ਵਿਚਿਕਿਚ੍ਛਾਨੁਸਯੋ ਅਨੁਸੇਤੀ’’ਤਿ ਪੁਚ੍ਛਾਯਪਿ ਦਿਟ੍ਠਾਨੁਸਯਸਦਿਸਮੇਵ ਵਿਸ੍ਸਜ੍ਜਨਂ. ਯਸ੍ਸ ਕਾਮਰਾਗਾਨੁਸਯੋ ਅਨੁਸੇਤਿ, ਤਸ੍ਸ ਭਵਰਾਗਾਨੁਸਯੋ ਅਨੁਸੇਤੀਤਿ? ਆਮਨ੍ਤਾ. ਯਸ੍ਸ ਵਾ ਪਨ…ਪੇ… ਅਨੁਸੇਤੀਤਿ…ਪੇ… ਤਿਣ੍ਣਂ ਪੁਗ੍ਗਲਾਨਂ ਭਵਰਾਗਾਨੁਸਯੋ ਚ ਅਨੁਸੇਤਿ, ਕਾਮਰਾਗਾਨੁਸਯੋ ਚ ਅਨੁਸੇਤਿ. ਅਵਿਜ੍ਜਾਨੁਸਯੇਪਿ ਏਸੇਵ ਨਯੋ. ਇਮਿਨਾ ਨਯੇਨ ਪਟਿਘਾਨੁਸਯਾਦਿਮੂਲਿਕਾਸੁ ਪੁਚ੍ਛਾਸੁ ਵਿਸ੍ਸਜ੍ਜਨਨਯੋ ਵੇਦਿਤਬ੍ਬੋ. ਅਯਂ ਏਕਮੂਲਕੇ ਨਯੋ.

ਯਸ੍ਸ ਕਾਮਰਾਗਾਨੁਸਯੋ ਚ ਪਟਿਘਾਨੁਸਯੋ ਚ ਅਨੁਸੇਤਿ, ਤਸ੍ਸ ਮਾਨਾਨੁਸਯੋ ਅਨੁਸੇਤੀਤਿ? ਆਮਨ੍ਤਾ. ਦ੍ਵਿਨ੍ਨਂ ਦ੍ਵਿਮੂਲਿਕਾ…ਪੇ… ਪਞ੍ਚਮੂਲਿਕਾਨਂ ਪਨ ਏਕਮੂਲੇ ਵੁਤ੍ਤਾਨੁਸਾਰੇਨ ਵਿਸ੍ਸਜ੍ਜਨਨਯੋ ਞਾਤਬ੍ਬੋ. ਤਤ੍ਰਾਯਂ ਪਚ੍ਛਿਮਾਨੁਸਯੇ ਯੋਜਨਾ – ‘‘ਯਸ੍ਸ ਕਾਮਰਾਗਾਨੁਸਯੋ ਚ ਪਟਿਘਾਨੁਸਯੋ ਚ ਮਾਨਾਨੁਸਯੋ ਚ ਦਿਟ੍ਠਾਨੁਸਯੋ ਚ ਵਿਚਿਕਿਚ੍ਛਾਨੁਸਯੋ ਚ ਭਵਰਾਗਾਨੁਸਯੋ ਚ ਅਨੁਸੇਤਿ, ਤਸ੍ਸ ਅਵਿਜ੍ਜਾਨੁਸਯੋ ਅਨੁਸੇਤੀਤਿ? ਆਮਨ੍ਤਾ. ਯਸ੍ਸ ਵਾ ਪਨ ਅਵਿਜ੍ਜਾਨੁਸਯੋ ਅਨੁਸੇਤਿ, ਤਸ੍ਸ ਕਾਮਰਾਗਾਨੁਸਯੋ ਚ…ਪੇ… ਭਵਰਾਗਾਨੁਸਯੋ ਚ ਅਨੁਸੇਤੀਤਿ? ਅਨਾਗਾਮਿਸ੍ਸ ਅਵਿਜ੍ਜਾਨੁਸਯੋ ਚ ਮਾਨਾਨੁਸਯੋ ਚ ਭਵਰਾਗਾਨੁਸਯੋ ਚ ਅਨੁਸੇਤਿ, ਨ ਇਤਰੇ, ਦ੍ਵਿਨ੍ਨਂ ਪੁਗ੍ਗਲਾਨਂ ਅਵਿਜ੍ਜਾਨੁਸਯੋ ਚ ਕਾਮਰਾਗਪਟਿਘਮਾਨਭਵਰਾਗਾਨੁਸਯਾ ਚ ਅਨੁਸੇਨ੍ਤਿ, ਨ ਦਿਟ੍ਠਿਵਿਚਿਕਿਚ੍ਛਾਨੁਸਯਾ, ਪੁਥੁਜ੍ਜਨਸ੍ਸ ਪਨ ਸਬ੍ਬੇਪਿ ਅਨੁਸੇਨ੍ਤੀ’’ਤਿ ਅਯਂ ਪੁਗ੍ਗਲਵਾਰੇ ਨਯੋ.

ਓਕਾਸਵਾਰੇ ਪਨ ‘‘ਯਤ੍ਥ ਕਾਮਰਾਗਾਨੁਸਯੋ ਅਨੁਸੇਤਿ, ਤਤ੍ਥ ਪਟਿਘਾਨੁਸਯੋ ਅਨੁਸੇਤੀਤਿ? ਨੋ. ਯਤ੍ਥ ਵਾ ਪਨ…ਪੇ… ਅਨੁਸੇਤੀਤਿ? ਨੋ. ਯਤ੍ਥ ਕਾਮਰਾਗਾਨੁਸਯੋ ਅਨੁਸੇਤਿ, ਤਤ੍ਥ ਮਾਨਾਨੁਸਯੋ ਅਨੁਸੇਤੀਤਿ? ਆਮਨ੍ਤਾ. ਯਤ੍ਥ ਵਾ ਪਨ ਮਾਨਾਨੁਸਯੋ ਅਨੁਸੇਤਿ, ਤਤ੍ਥ ਕਾਮਰਾਗਾਨੁਸਯੋ ਅਨੁਸੇਤੀਤਿ? ਰੂਪਧਾਤੁਯਾ ਅਰੂਪਧਾਤੁਯਾ ਏਤ੍ਥ ਮਾਨਾਨੁਸਯੋ ਅਨੁਸੇਤਿ, ਨ ਕਾਮਰਾਗਾਨੁਸਯੋ, ਕਾਮਧਾਤੁਯਾ ਦ੍ਵੀਸੁ ਵੇਦਨਾਸੁ ਤਦੁਭਯਂ ਅਨੁਸੇਤਿ. ਯਤ੍ਥ ਕਾਮਰਾਗਾਨੁਸਯੋ…ਪੇ… ਅਨੁਸੇਤੀਤਿ? ਆਮਨ੍ਤਾ. ਯਤ੍ਥ ਵਾ ਪਨ…ਪੇ… ਅਨੁਸੇਤੀਤਿ? ਦੁਕ੍ਖਾਯ ਵੇਦਨਾਯ ਰੂਪਧਾਤੁਯਾ ਅਰੂਪਧਾਤੁਯਾ ਏਤ੍ਥ ਵਿਚਿਕਿਚ੍ਛਾਨੁਸਯੋ ਅਨੁਸੇਤਿ, ਨ ਕਾਮਰਾਗਾਨੁਸਯੋ, ਕਾਮਧਾਤੁਯਾ ਦ੍ਵੀਸੁ ਵੇਦਨਾਸੁ ਤਦੁਭਯਂ ਅਨੁਸੇਤਿ. ਯਤ੍ਥ ਕਾਮਰਾਗਾਨੁਸਯੋ…ਪੇ… ਅਨੁਸੇਤਿ, ਤਤ੍ਥ ਭਵਰਾਗਾਨੁਸਯੋ ਅਨੁਸੇਤੀਤਿ? ਨੋ. ਯਤ੍ਥ ਵਾ ਪਨ…ਪੇ… ਨੋ. ਯਤ੍ਥ ਕਾਮਰਾਗਾਨੁਸਯੋ ਅਨੁਸੇਤਿ, ਤਤ੍ਥ ਅਵਿਜ੍ਜਾਨੁਸਯੋ ਅਨੁਸੇਤੀਤਿ? ਆਮਨ੍ਤਾ. ਯਤ੍ਥ ਵਾ ਪਨ…ਪੇ… ਅਨੁਸੇਤੀਤਿ? ਦੁਕ੍ਖਾਯ ਵੇਦਨਾਯ ਰੂਪਾਰੂਪਧਾਤੁਯਾ ਏਤ੍ਥ ਅਵਿਜ੍ਜਾਨੁਸਯੋ ਅਨੁਸੇਤਿ, ਨ ਕਾਮਰਾਗਾਨੁਸਯੋ, ਕਾਮਧਾਤੁਯਾ ਦ੍ਵੀਸੁ ਵੇਦਨਾਸੁ ਤਦੁਭਯਂ ਅਨੁਸੇਤਿ.

ਯਤ੍ਥ ਪਟਿਘਾਨੁਸਯੋ ਅਨੁਸੇਤਿ, ਤਤ੍ਥ ਮਾਨਾਨੁਸਯੋ ਅਨੁਸੇਤੀਤਿ? ਨੋ. ਯਤ੍ਥ ਵਾ ਪਨ…ਪੇ… ਨੋ. ਯਤ੍ਥ ਪਟਿਘਾਨੁਸਯੋ ਅਨੁਸੇਤਿ, ਤਤ੍ਥ ਦਿਟ੍ਠਾਨੁਸਯੋ ਵਿਚਿਕਿਚ੍ਛਾਨੁਸਯੋ ਅਨੁਸੇਤੀਤਿ? ਆਮਨ੍ਤਾ. ਯਤ੍ਥ ਵਾ ਪਨ…ਪੇ… ਅਨੁਸੇਤੀਤਿ? ਕਾਮਧਾਤੁਯਾ ਦ੍ਵੀਸੁ ਵੇਦਨਾਸੁ ਰੂਪਾਰੂਪਧਾਤੁਯਾ ਏਤ੍ਥ ਵਿਚਿਕਿਚ੍ਛਾਨੁਸਯੋ ਅਨੁਸੇਤਿ, ਨ ਪਟਿਘਾਨੁਸਯੋ, ਦੁਕ੍ਖਾਯ ਪਨ ਵੇਦਨਾਯ ਤਦੁਭਯਂ ਅਨੁਸੇਤਿ. ਯਤ੍ਥ ਪਟਿਘਾਨੁਸਯੋ ਅਨੁਸੇਤਿ, ਤਤ੍ਥ ਭਵਰਾਗਾਨੁਸਯੋ ਅਨੁਸੇਤੀਤਿ? ਨੋ. ਯਤ੍ਥ ਵਾ ਪਨ…ਪੇ… ਨੋ. ਯਤ੍ਥ ਪਟਿਘਾਨੁਸਯੋ ਅਨੁਸੇਤਿ, ਤਤ੍ਥ ਅਵਿਜ੍ਜਾਨੁਸਯੋ ਅਨੁਸੇਤੀਤਿ? ਆਮਨ੍ਤਾ. ਯਤ੍ਥ ਵਾ ਪਨ…ਪੇ… ਅਨੁਸੇਤੀਤਿ…ਪੇ… ਦੁਕ੍ਖਾਯ ਵੇਦਨਾਯ ਤਦੁਭਯਂ ਅਨੁਸੇਤਿ, ਅਞ੍ਞਤ੍ਥ ਅਵਿਜ੍ਜਾਨੁਸਯੋ ਚ.

ਯਤ੍ਥ ਮਾਨਾਨੁਸਯੋ ਅਨੁਸੇਤਿ, ਤਤ੍ਥ ਦਿਟ੍ਠਾਨੁਸਯੋ ਵਿਚਿਕਿਚ੍ਛਾਨੁਸਯੋ ਅਨੁਸੇਤੀਤਿ? ਆਮਨ੍ਤਾ. ਯਤ੍ਥ ਵਾ ਪਨ…ਪੇ… ਅਨੁਸੇਤੀਤਿ? ਦੁਕ੍ਖਾਯ ਵੇਦਨਾਯ ਦਿਟ੍ਠਾਨੁਸਯੋਵ, ਨੇਤਰੋ, ਤਦਞ੍ਞੇਸੁ ਸਬ੍ਬਤ੍ਥ ਅਨੁਸੇਤਿ. ਯਤ੍ਥ ਮਾਨਾਨੁਸਯੋ ਅਨੁਸੇਤਿ, ਤਤ੍ਥ ਭਵਰਾਗਾਨੁਸਯੋ ਅਨੁਸੇਤੀਤਿ? ਕਾਮਧਾਤੁਯਾ ਦ੍ਵੀਸੁ ਵੇਦਨਾਸੁ ਮਾਨਾਨੁਸਯੋ, ਨੇਤਰੋ, ਰੂਪਾਰੂਪਧਾਤੁਯਾ ਪਨ ਤਦੁਭਯਂ ਅਨੁਸੇਤਿ. ਯਤ੍ਥ ਵਾ ਪਨ…ਪੇ… ਆਮਨ੍ਤਾ. ਯਤ੍ਥ ਮਾਨਾਨੁਸਯੋ ਅਨੁਸੇਤਿ, ਤਤ੍ਥ ਅਵਿਜ੍ਜਾਨੁਸਯੋ…ਪੇ… ਆਮਨ੍ਤਾ. ਯਤ੍ਥ ਵਾ ਪਨ…ਪੇ… ਅਨੁਸੇਤੀਤਿ? ਦੁਕ੍ਖਵੇਦਨਂ ਠਪੇਤ੍ਵਾ ਤਦਞ੍ਞਾਸੁ ਸਬ੍ਬਤ੍ਥ ਤਦੁਭਯਂ ਅਨੁਸੇਤਿ. ਯਤ੍ਥ ਦਿਟ੍ਠਾਨੁਸਯੋ, ਤਤ੍ਥ ਵਿਚਿਕਿਚ੍ਛਾਨੁਸਯੋ…ਪੇ… ਆਮਨ੍ਤਾ. ਯਤ੍ਥ ਦਿਟ੍ਠਾਨੁਸਯੋ, ਤਤ੍ਥ ਭਵਰਾਗਾਨੁਸਯੋ ਅਨੁਸੇਤੀਤਿ? ਕਾਮਧਾਤੁਯਾ ਤੀਸੁ ਵੇਦਨਾਸੁ ਦਿਟ੍ਠਾਨੁਸਯੋਵ, ਰੂਪਾਰੂਪਭਵੇਸੁ ਤਦੁਭਯਂ ਅਨੁਸੇਤਿ. ਯਤ੍ਥ ਵਾ ਪਨ…ਪੇ… ਆਮਨ੍ਤਾ. ਯਤ੍ਥ ਦਿਟ੍ਠਾਨੁਸਯੋ ਅਨੁਸੇਤਿ, ਤਤ੍ਥ ਅਵਿਜ੍ਜਾਨੁਸਯੋ…ਪੇ… ਆਮਨ੍ਤਾ. ਯਤ੍ਥ ਵਾ ਪਨ…ਪੇ… ਆਮਨ੍ਤਾ. ਏਸ ਨਯੋ ਵਿਚਿਕਿਚ੍ਛਾਮੂਲਕੇਸੁਪਿ. ਯਤ੍ਥ ਭਵਰਾਗਾਨੁਸਯੋ, ਤਤ੍ਥ ਅਵਿਜ੍ਜਾਨੁਸਯੋ ਅਨੁਸੇਤੀਤਿ? ਆਮਨ੍ਤਾ. ਯਤ੍ਥ ਵਾ ਪਨ…ਪੇ… ਅਨੁਸੇਤਿ, ਤਤ੍ਥ ਕਾਮਧਾਤੁਯਾ ਤੀਸੁ ਵੇਦਨਾਸੁ ਅਵਿਜ੍ਜਾਨੁਸਯੋਵ, ਰੂਪਾਰੂਪਭਵੇਸੁ ਪਨ ਤਦੁਭਯਂ ਅਨੁਸੇਤੀ’’ਤਿ ਅਯਮੇਤ੍ਥ ਏਕਮੂਲਨਯੋ.

‘‘ਯਸ੍ਸ…ਪੇ… ਨਾਨੁਸੇਤਿ. ਯਸ੍ਸ…ਪੇ… ਨਾਨੁਸੇਤਿ ਮਾਨਾਨੁਸਯੋ, ਅਰਹਤੋ ਪਨ ਤਦੁਭਯਮ੍ਪਿ ਨਾਨੁਸੇਤਿ. ਯਸ੍ਸ ਵਾ ਪਨ…ਪੇ… ਆਮਨ੍ਤਾ. ਯਸ੍ਸ ਕਾਮਰਾਗਾਨੁਸਯੋ ਨਾਨੁਸੇਤਿ, ਤਸ੍ਸ ਦਿਟ੍ਠਾਨੁਸਯੋ ਵਿਚਿਕਿਚ੍ਛਾਨੁਸਯੋ ਨਾਨੁਸੇਤੀਤਿ? ਆਮਨ੍ਤਾ. ਯਸ੍ਸ ਵਾ ਪਨ…ਪੇ… ਨਾਨੁਸੇਤੀਤਿ? ਦ੍ਵਿਨ੍ਨਂ ਪੁਗ੍ਗਲਾਨਂ ਵਿਚਿਕਿਚ੍ਛਾਨੁਸਯੋਵ ਨਾਨੁਸੇਤਿ, ਨੇਤਰੋ, ਅਨਾਗਾਮਿਅਰਹਨ੍ਤਾਨਂ ਤਦੁਭਯਮ੍ਪਿ ਨਾਨੁਸੇਤੀ’’ਤਿਆਦਿਨਾ ਨਯੇਨ ਪੁਗ੍ਗਲਵਾਰੇ,

‘‘ਯਤ੍ਥ ਕਾਮਰਾਗਾਨੁਸਯੋ ਨਾਨੁਸੇਤਿ, ਤਤ੍ਥ ਪਟਿਘਾਨੁਸਯੋ ਨਾਨੁਸੇਤੀਤਿ? ਦੁਕ੍ਖਾਯ ਵੇਦਨਾਯ ਕਾਮਰਾਗਾਨੁਸਯੋਵ ਨਾਨੁਸੇਤਿ, ਨੇਤਰੋ, ਰੂਪਾਰੂਪਧਾਤੁਪਰਿਯਾਪਨ੍ਨੇਸੁ ਤਦੁਭਯਂ ਨਾਨੁਸੇਤਿ. ਯਤ੍ਥ ਵਾ ਪਨ…ਪੇ… ਨਾਨੁਸੇਤੀਤਿ? ਕਾਮਧਾਤੁਯਾ ਦ੍ਵੀਸੁ ਵੇਦਨਾਸੁ ਪਟਿਘਾਨੁਸਯੋਵ, ਰੂਪਾਰੂਪਪਰਿਯਾਪਨ੍ਨੇਸੁ ਪਨ ਤਦੁਭਯਂ ਨਾਨੁਸੇਤਿ. ਯਤ੍ਥ ਕਾਮਰਾਗਾਨੁਸਯੋ ਨਾਨੁਸੇਤਿ, ਤਤ੍ਥ ਮਾਨਾਨੁਸਯੋ ਨਾਨੁਸੇਤੀਤਿ? ਰੂਪਾਰੂਪਧਾਤੂਸੁ ਕਾਮਰਾਗਾਨੁਸਯੋਵ, ਦੁਕ੍ਖਾਯ ਪਨ ਵੇਦਨਾਯ, ਅਪਰਿਯਾਪਨ੍ਨੇਸੁ ਚ ਤਦੁਭਯਂ ਨਾਨੁਸੇਤਿ. ਯਤ੍ਥ ਵਾ ਪਨ…ਪੇ… ਆਮਨ੍ਤਾ. ਯਤ੍ਥ ਕਾਮਰਾਗਾਨੁਸਯੋ ਨਾਨੁਸੇਤਿ, ਤਤ੍ਥ ਦਿਟ੍ਠਾਨੁਸਯੋ, ਵਿਚਿਕਿਚ੍ਛਾਨੁਸਯੋ ਨਾਨੁਸੇਤੀਤਿ? ਦੁਕ੍ਖਾਯ ਵੇਦਨਾਯ ਰੂਪਾਰੂਪਧਾਤੂਸੁ ਕਾਮਰਾਗਾਨੁਸਯੋਵ, ਅਪਰਿਯਾਪਨ੍ਨੇ ਪਨ ਤਦੁਭਯਂ ਨਾਨੁਸੇਤੀ’’ਤਿਆਦਿਨਾ ਨਯੇਨ ਓਕਾਸਵਾਰੇ ਚ,

‘‘ਯਸ੍ਸ ਯਤ੍ਥ ਕਾਮਰਾਗਾਨੁਸਯੋ ਨਾਨੁਸੇਤਿ, ਤਸ੍ਸ ਤਤ੍ਥ ਪਟਿਘਾਨੁਸਯੋ ਨਾਨੁਸੇਤੀਤਿ? ਤਿਣ੍ਣਂ ਪੁਗ੍ਗਲਾਨਂ ਦੁਕ੍ਖਾਯ ਵੇਦਨਾਯ ਕਾਮਰਾਗਾਨੁਸਯੋਵ, ਰੂਪਾਰੂਪਪਰਿਯਾਪਨ੍ਨੇਸੁ ਤਦੁਭਯਂ ਨਾਨੁਸੇਤਿ, ਦ੍ਵਿਨ੍ਨਂ ਪੁਗ੍ਗਲਾਨਂ ਸਬ੍ਬਤ੍ਥ ਤਦੁਭਯਂ ਨਾਨੁਸੇਤਿ. ਯਸ੍ਸ ਵਾ ਪਨ ਯਤ੍ਥ…ਪੇ… ਨਾਨੁਸੇਤੀਤਿ? ਤਿਣ੍ਣਂ ਪੁਗ੍ਗਲਾਨਂ ਕਾਮਧਾਤੁਯਾ ਦ੍ਵੀਸੁ ਵੇਦਨਾਸੁ ਪਟਿਘਾਨੁਸਯੋਵ, ਰੂਪਾਰੂਪਪਰਿਯਾਪਨ੍ਨੇਸੁ ਤਦੁਭਯਂ ਨਾਨੁਸੇਤਿ, ਦ੍ਵਿਨ੍ਨਂ ਪੁਗ੍ਗਲਾਨਂ ਸਬ੍ਬਤ੍ਥ ਤਦੁਭਯਂ ਨਾਨੁਸੇਤਿ. ਯਸ੍ਸ ਯਤ੍ਥ ਕਾਮਰਾਗਾਨੁਸਯੋ ਨਾਨੁਸੇਤਿ, ਤਸ੍ਸ ਤਤ੍ਥ ਮਾਨਾਨੁਸਯੋ ਨਾਨੁਸੇਤੀਤਿ? ਤਿਣ੍ਣਂ ਪੁਗ੍ਗਲਾਨਂ ਰੂਪਾਰੂਪਧਾਤੁਯਾ ਕਾਮਰਾਗਾਨੁਸਯੋਵ, ਨੇਤਰੋ, ਦੁਕ੍ਖਾਯ ਵੇਦਨਾਯ, ਅਪਰਿਯਾਪਨ੍ਨੇ ਚ ਤਦੁਭਯਂ ਨਾਨੁਸੇਤਿ, ਅਨਾਗਾਮਿਸ੍ਸ ਕਾਮਧਾਤੁਯਾ ਦ੍ਵੀਸੁ ਵੇਦਨਾਸੁ ਰੂਪਾਰੂਪਧਾਤੁਯਾ ਕਾਮਰਾਗਾਨੁਸਯੋਵ, ਅਰਹਤੋ ਪਨ ਸਬ੍ਬਤ੍ਥ ਤਦੁਭਯਂ ਨਾਨੁਸੇਤੀ’’ਤਿਆਦਿਨਾ ਪੁਗ੍ਗਲੋਕਾਸਵਾਰੇ ਚ ਵੁਤ੍ਤਾਨੁਸਾਰੇਨ ਨਯੋ ਞਾਤਬ੍ਬੋਤਿ ਅਯਂ ਪਾਲ਼ਿਨਯੋ.

ਤਤ੍ਥ ‘‘ਯਸ੍ਸ ਕਾਮਰਾਗਾਨੁਸਯੋ ਅਨੁਸੇਤਿ, ਤਸ੍ਸ ਪਟਿਘਾਨੁਸਯੋ ਅਨੁਸੇਤੀ’’ਤਿ ਏਤ੍ਥ ਯਦੇਤਂ ‘‘ਆਮਨ੍ਤਾ’’ਤਿ ਪਟਿਵਚਨਂ ਦਿਨ੍ਨਂ, ਤਂ ਦੁਦ੍ਦਿਨ੍ਨਂ ਵਿਯ ਖਾਯਤਿ. ਕਸ੍ਮਾ? ਕਾਮਰਾਗਪਟਿਘਾਨਂ ਏਕਕ੍ਖਣੇ ਅਨੁਪ੍ਪਤ੍ਤਿਤੋ. ਯਥਾ ਹਿ ‘‘ਯਸ੍ਸ ਮਨਾਯਤਨਂ ਉਪ੍ਪਜ੍ਜਤਿ, ਤਸ੍ਸ ਧਮ੍ਮਾਯਤਨਂ ਉਪ੍ਪਜ੍ਜਤੀ’’ਤਿਆਦੀਸੁ ਮਨਾਯਤਨਧਮ੍ਮਾਯਤਨਾਦੀਨਿ ਏਕਕ੍ਖਣੇ ਉਪ੍ਪਜ੍ਜਨ੍ਤਿ, ਨ ਤਥਾ ਕਾਮਰਾਗਪਟਿਘਾ, ਵਿਸੁਞ੍ਞੇਵ ਉਪ੍ਪਜ੍ਜਨਤੋ, ਤਸ੍ਮਾ ਏਤ੍ਥ ‘‘ਨੋ’’ਤਿ ਪਟਿਸੇਧੋ ਕਤ੍ਤਬ੍ਬੋ ਸਿਯਾ, ਤਂ ਪਨ ਅਕਤ੍ਵਾ ‘‘ਆਮਨ੍ਤਾ’’ਤਿ ਪਟਿਵਚਨਸ੍ਸ ਦਿਨ੍ਨਤ੍ਤਾ ਹੇਟ੍ਠਾ ਯਮਕੇਸੁ ਵਿਯ ਏਤ੍ਥ ਖਣਪਚ੍ਚੁਪ੍ਪਨ੍ਨਵਸੇਨ ਵਤ੍ਤਮਾਨਵੋਹਾਰਂ ਅਗ੍ਗਹੇਤ੍ਵਾ ਅਞ੍ਞਥਾ ਗਹੇਤਬ੍ਬੋ. ਕਥਂ ਗਹੇਤਬ੍ਬੋ? ਅਪ੍ਪਹੀਨਵਸੇਨ. ਅਪ੍ਪਹੀਨਤਂ ਹਿ ਸਨ੍ਧਾਯ ਅਯਂ ਅਨੁਸੇਤੀਤਿ ਵਤ੍ਤਮਾਨਵੋਹਾਰੋ ਵੁਤ੍ਤੋ, ਨ ਖਣਪਚ੍ਚੁਪ੍ਪਨ੍ਨਤਂ, ਤਸ੍ਮਾ ਇਮਿਸ੍ਸਾ ਪੁਚ੍ਛਾਯ ਯਸ੍ਸ ਕਾਮਰਾਗਾਨੁਸਯੋ ਅਪ੍ਪਹੀਨੋ, ਨ ਅਨੁਪ੍ਪਤ੍ਤਿਧਮ੍ਮਤਂ ਆਪਾਦਿਤੋ, ਤਸ੍ਸ ਪਟਿਘਾਨੁਸਯੋ ਅਪ੍ਪਹੀਨੋ, ਨ ਅਨੁਪ੍ਪਤ੍ਤਿਧਮ੍ਮਤਂ ਆਪਾਦਿਤੋ, ਤਸ੍ਸ ਪਟਿਘਾਨੁਸਯੋ ਅਪ੍ਪਹੀਨੋਤਿ ਏਵਮਤ੍ਥੋ ਗਹੇਤਬ੍ਬੋ. ਯਸ੍ਮਾ ਚ ਤੇਸੁ ਕਾਮਰਾਗਪਟਿਘੇਸੁ ਯਸ੍ਸੇਕੋ ਅਪ੍ਪਹੀਨੋ, ਤਸ੍ਸ ਇਤਰੋਪਿ ਅਪ੍ਪਹੀਨੋਵ ਹੋਤਿ, ਤਸ੍ਮਾ ‘‘ਆਮਨ੍ਤਾ’’ਤਿ ਵੁਤ੍ਤਂ. ਇਤੋ ਪਰੇਸੁਪਿ ਏਵਰੂਪੇਸੁ ਉਪ੍ਪਜ੍ਜਤਿਵਾਰਾਦਿਵਿਸ੍ਸਜ੍ਜਨੇਸੁ ਏਸੇਵ ਨਯੋ. ਤਿਣ੍ਣਂ ਪੁਗ੍ਗਲਾਨਨ੍ਤਿ ਪੁਥੁਜ੍ਜਨਸੋਤਾਪਨ੍ਨਸਕਦਾਗਾਮੀਨਂ. ਦ੍ਵਿਨ੍ਨਨ੍ਤਿ ਸੋਤਾਪਨ੍ਨਸਕਦਾਗਾਮੀਨਂ. ਏਵਂ ਉਪ੍ਪਜ੍ਜਨਂ ਦੀਪਿਤਂ. ਓਕਾਸਵਾਰਸ੍ਸ ਪਠਮਦੁਤਿਯਪੁਚ੍ਛਾਸੁ ਯਸ੍ਮਾ ਕਾਮਰਾਗਪਟਿਘਾ ਏਕਚਿਤ੍ਤੇ ਨ ਉਪ੍ਪਜ੍ਜਨ੍ਤਿ, ਤਸ੍ਮਾ ‘‘ਨੋ’’ਤਿ ਪਟਿਸੇਧੋ ਕਤੋ. ਦੁਕਮੂਲਾਦੀਸੁ ਚ ਯਸ੍ਮਾ ਕਾਮਰਾਗਪਟਿਘਾਦਯੋ ਏਕਸ੍ਮਿਂ ਠਾਨਸਙ੍ਖਾਤੇ ਚਿਤ੍ਤੇ, ਆਰਮ੍ਮਣੇ ਵਾ ਨ ਉਪ੍ਪਜ੍ਜਨ੍ਤਿ, ਤਸ੍ਮਾ ‘‘ਨਤ੍ਥੀ’’ਤਿ ਤਤ੍ਥ ਪਟਿਕ੍ਖੇਪੋ ਕਤੋ, ਅਯਂ ਪੁਚ੍ਛਾ ਅਪੁਬ੍ਬਾ ਏਵਾਤਿ ਅਧਿਪ੍ਪਾਯੋ. ਪੁਗ੍ਗਲੋਕਾਸਵਾਰੇ ਚਤੁਨ੍ਨਨ੍ਤਿ ਪੁਥੁਜ੍ਜਨਸੋਤਾਪਨ੍ਨਸਕਦਾਗਾਮਿਅਨਾਗਾਮੀਨਂ. ਪਟਿਲੋਮੇ ਦ੍ਵਿਨ੍ਨਨ੍ਤਿ ਅਨਾਗਾਮਿਅਰਹਨ੍ਤੇ ਸਨ੍ਧਾਯ ਵੁਤ੍ਤਨ੍ਤਿ ਅਯਂ ਅਨੁਸਯਵਾਰੇ ਨਯੋ.

ਸਾਨੁਸਯਵਾਰੇ ਪਨ ‘‘ਯੋ ਕਾਮਰਾਗਾਨੁਸਯੇਨ ਸਾਨੁਸਯੋ, ਸੋ ਪਟਿਘਾਨੁਸਯੇਨ ਸਾਨੁਸਯੋਤਿ? ਆਮਨ੍ਤਾ…ਪੇ… ਮਾਨਾਨੁਸਯੇਨ ਸਾਨੁਸਯੋਤਿ? ਆਮਨ੍ਤਾ. ਯੋ ਵਾ ਪਨ ਮਾਨਾਨੁਸਯੇਨ ਸਾਨੁਸਯੋ, ਸੋ ਕਾਮਰਾਗਾਨੁਸਯੇਨ ਸਾਨੁਸਯੋਤਿ? ਅਨਾਗਾਮੀ ਮਾਨਾਨੁਸਯੇਨੇਵ, ਨ ਕਾਮਰਾਗਾਨੁਸਯੇਨ, ਤਯੋ ਪਨ ਪੁਗ੍ਗਲਾ ਤਦੁਭਯੇਨਾਪਿ ਅਨੁਸਯੇਨਾ’’ਤਿ ਇਮਿਨਾ ਨਯੇਨ ਸੇਸੇਸੁ ਦੁਕਮੂਲਾਦੀਸੁ ਪੁਚ੍ਛਾਵਿਸ੍ਸਜ੍ਜਨਨਯੋ ਞਾਤਬ੍ਬੋ, ਅਯਂ ਪੁਗ੍ਗਲਵਾਰੇ ਨਯੋ.

‘‘ਯਤੋ ਕਾਮਰਾਗਾਨੁਸਯੇਨ ਸਾਨੁਸਯੋ, ਤਤੋ ਪਟਿਘਾਨੁਸਯੇਨ ਸਾਨੁਸਯੋਤਿ? ਨੋ…ਪੇ… ਮਾਨਾਨੁਸਯੇਨ ਸਾਨੁਸਯੋਤਿ? ਆਮਨ੍ਤਾ. ਯਤੋ ਵਾ ਪਨ ਮਾਨਾਨੁਸਯੇਨ ਸਾਨੁਸਯੋ, ਤਤੋ ਕਾਮਰਾਗਾਨੁਸਯੇਨ ਸਾਨੁਸਯੋਤਿ? ਰੂਪਾਰੂਪਧਾਤੁਯਾ ਮਾਨਾਨੁਸਯੇਨੇਵ, ਨੇਤਰੇਨ, ਕਾਮਧਾਤੁਯਾ ਦ੍ਵੀਸੁ ਵੇਦਨਾਸੁ ਤਦੁਭਯੇਨਾਪੀ’’ਤਿਆਦਿਨਾ ਓਕਾਸਵਾਰੇ ਚ,

‘‘ਯੋ ਯਤੋ ਕਾਮਰਾਗਾਨੁਸਯੇਨ ਸਾਨੁਸਯੋ, ਸੋ ਤਤੋ ਪਟਿਘਾਨੁਸਯੇਨ ਸਾਨੁਸਯੋਤਿ? ਨੋ’’ਤਿਆਦਿਨਾ ਪੁਗ੍ਗਲੋਕਾਸਵਾਰੇ ਚਾਤਿ ਏਵਂ ਅਨੁਲੋਮਨਯੇ ਚ, ‘‘ਯੋ ਕਾਮਰਾਗਾਨੁਸਯੇਨ ਨਿਰਨੁਸਯੋ, ਸੋ ਪਟਿਘਾਨੁਸਯੇਨ ਨਿਰਨੁਸਯੋਤਿ? ਆਮਨ੍ਤਾ’’ਤਿਆਦਿਨਾ ਪਟਿਲੋਮਨਯੇਪਿ ਸਬ੍ਬਤ੍ਥ ਅਨੁਸਯਵਾਰੇ ਵੁਤ੍ਤਾਨੁਸਾਰਤੋ ਪੁਚ੍ਛਾਵਿਸ੍ਸਜ੍ਜਨਨਯੋ ਞਾਤਬ੍ਬੋ.

ਤਤ੍ਥ ਯਤੋ ਕਾਮਰਾਗਾਨੁਸਯੇਨ ਸਾਨੁਸਯੋਤਿ ਯਤੋ ਕਾਰਣਤੋ ਉਪ੍ਪਨ੍ਨੇਨ ਕਾਮਰਾਗਾਨੁਸਯੇਨ ਸਾਨੁਸਯੋ, ਕਿਂ ਸੋ ਤਤੋ ਕਾਰਣਤੋ ਉਪ੍ਪਨ੍ਨਪਟਿਘਾਨੁਸਯੇਨਪਿ ਸਾਨੁਸਯੋਤਿ ਵੁਚ੍ਚਤਿ. ਯਸ੍ਮਾ ਪਨੇਤੇ ਦ੍ਵੇ ਏਕਸ੍ਮਾ ਠਾਨਾ ਨ ਉਪ੍ਪਜ੍ਜਨ੍ਤਿ, ਤਸ੍ਮਾ ‘‘ਨੋ’’ਤਿ ਪਟਿਸੇਧੋ ਕਤੋ ਸੇਸਂ ਤਾਦਿਸਮੇਵਾਤਿ ਅਯਂ ਸਾਨੁਸਯਵਾਰੇ ਨਯੋ.

ਪਜਹਨਵਾਰੇ ਪਨ ‘‘ਯੋ ਕਾਮਰਾਗਾਨੁਸਯਂ ਪਜਹਤਿ, ਸੋ ਪਟਿਘਾਨੁਸਯਂ ਪਜਹਤੀਤਿ? ਆਮਨ੍ਤਾ…ਪੇ… ਮਾਨਾਨੁਸਯਂ ਪਜਹਤੀਤਿ? ਤਦੇਕਟ੍ਠਂ ਪਜਹਤਿ. ਯੋ ਵਾ ਪਨ ਮਾਨਾਨੁਸਯਂ ਪਜਹਤਿ, ਸੋ ਕਾਮਰਾਗਾਨੁਸਯਂ ਪਜਹਤੀਤਿ? ਨੋ…ਪੇ… ਸੋ ਦਿਟ੍ਠਾਨੁਸਯਂ ਵਿਚਿਕਿਚ੍ਛਾਨੁਸਯਂ ਪਜਹਤੀਤਿ? ਨੋ. ਯੋ ਵਾ ਪਨ ਵਿਚਿਕਿਚ੍ਛਾਨੁਸਯਂ ਪਜਹਤਿ, ਸੋ ਕਾਮਰਾਗਾਨੁਸਯਂ ਪਜਹਤੀਤਿ? ਤਦੇਕਟ੍ਠਂ ਪਜਹਤਿ. ਯੋ…ਪੇ… ਭਵਰਾਗਾਨੁਸਯਂ ਅਵਿਜ੍ਜਾਨੁਸਯਂ ਪਜਹਤੀਤਿ? ਤਦੇਕਟ੍ਠਂ ਪਜਹਤਿ…ਪੇ… ਯੋ ਕਾਮਰਾਗਾਨੁਸਯਞ੍ਚ ਪਟਿਘਾਨੁਸਯਞ੍ਚ ਮਾਨਾਨੁਸਯਞ੍ਚ…ਪੇ… ਪਜਹਤੀਤਿ? ਨਤ੍ਥੀ’’ਤਿਆਦਿਨਾ ਪੁਗ੍ਗਲਵਾਰੇ,

‘‘ਯਤੋ ਕਾਮਰਾਗਾਨੁਸਯਂ ਪਜਹਤਿ, ਤਤੋ ਪਟਿਘਾਨੁਸਯਂ ਪਜਹਤੀਤਿ? ਨੋ…ਪੇ… ਯਤੋ ਕਾਮਰਾਗਾਨੁਸਯਂ ਪਜਹਤਿ, ਤਤੋ ਮਾਨਾਨੁਸਯਂ ਪਜਹਤੀਤਿ? ਆਮਨ੍ਤਾ. ਯਤੋ ਵਾ ਪਨ ਮਾਨਾਨੁਸਯਂ ਪਜਹਤਿ, ਤਤੋ ਕਾਮਰਾਗਾਨੁਸਯਂ ਪਜਹਤੀਤਿ? ਰੂਪਾਰੂਪਧਾਤੁਯਾ ਤਤੋ ਮਾਨਾਨੁਸਯਮੇਵ, ਕਾਮਧਾਤੁਯਾ ਪਨ ਦ੍ਵੀਸੁ ਵੇਦਨਾਸੁ ਤਤੋ ਮਾਨਾਨੁਸਯਂ ਪਜਹਤੀ’’ਤਿਆਦਿਨਾ ਓਕਾਸਵਾਰੇ ਚ,

‘‘ਯੋ ਯਤੋ ਕਾਮਰਾਗਾਨੁਸਯਂ ਪਜਹਤਿ, ਸੋ ਤਤੋ ਪਟਿਘਾਨੁਸਯਂ ਪਜਹਤੀਤਿ? ਨੋ…ਪੇ… ਮਾਨਾਨੁਸਯਂ ਪਜਹਤੀਤਿ? ਤਦੇਕਟ੍ਠਂ ਪਜਹਤਿ…ਪੇ… ਵਿਚਿਕਿਚ੍ਛਾਨੁਸਯਂ ਪਜਹਤੀਤਿ? ਨੋ. ਯੋ ਵਾ ਪਨ ਯਤੋ ਵਿਚਿਕਿਚ੍ਛਾਨੁਸਯਂ ਪਜਹਤਿ, ਸੋ ਤਤੋ ਕਾਮਰਾਗਾਨੁਸਯਂ ਪਜਹਤੀਤਿ? ਅਟ੍ਠਮਕੋ ਦੁਕ੍ਖਾਯ ਵੇਦਨਾਯ ਰੂਪਾਰੂਪਧਾਤੁਯਾ ਸੋ ਤਤੋ ਵਿਚਿਕਿਚ੍ਛਾਨੁਸਯਂ ਪਜਹਤਿ, ਨੋ ਚ ਸੋ ਤਤੋ ਕਾਮਰਾਗਾਨੁਸਯਂ ਪਜਹਤਿ, ਸ੍ਵੇਵ ਪੁਗ੍ਗਲੋ ਕਾਮਧਾਤੁਯਾ ਦ੍ਵੀਸੁ ਵੇਦਨਾਸੁ ਸੋ ਤਤੋ ਵਿਚਿਕਿਚ੍ਛਾਨੁਸਯਂ ਪਜਹਤਿ, ਕਾਮਰਾਗਾਨੁਸਯਂ ਤਦੇਕਟ੍ਠਂ ਪਜਹਤੀ’’ਤਿਆਦਿਨਾ ਪੁਗ੍ਗਲੋਕਾਸਵਾਰੇ ਚਾਤਿ ਏਵਂ ਅਨੁਲੋਮਨਯੇ ਚ, ‘‘ਯੋ ਕਾਮਰਾਗਾਨੁਸਯਂ ਨ ਪਜਹਤਿ, ਸੋ ਪਟਿਘਾਨੁਸਯਂ ਨ ਪਜਹਤੀਤਿ? ਆਮਨ੍ਤਾ…ਪੇ… ਵਿਚਿਕਿਚ੍ਛਾਨੁਸਯਂ ਨ ਪਜਹਤੀਤਿ? ਅਟ੍ਠਮਕੋ ਕਾਮਰਾਗਾਨੁਸਯਂ ਨ ਪਜਹਤਿ, ਨੇਤਰਂ, ਅਨਾਗਾਮਿਮਗ੍ਗਸਮਙ੍ਗਿਂ, ਅਟ੍ਠਮਕਞ੍ਚ ਠਪੇਤ੍ਵਾ ਅਵਸੇਸਾ ਪੁਗ੍ਗਲਾ ਤਦੁਭਯਂ ਨ ਪਜਹਨ੍ਤੀ’’ਤਿਆਦਿਨਾ ਪਟਿਲੋਮਨਯੇ ਚ ਸਬ੍ਬਤ੍ਥ ਪੁਚ੍ਛਾਵਿਸ੍ਸਜ੍ਜਨਨਯੋ ਞਾਤਬ੍ਬੋ.

ਤਤ੍ਥ ਪਜਹਤੀਤਿ ਤੇਨ ਤੇਨ ਮਗ੍ਗੇਨ ਪਹਾਨਪਰਿਞ੍ਞਾਵਸੇਨ ਪਜਹਤਿ. ਤਦੇਕਟ੍ਠਨ੍ਤਿ ਪਹਾਨੇਕਟ੍ਠਤਂ ਸਨ੍ਧਾਯ ਵੁਤ੍ਤਂ. ਪਠਮਮਗ੍ਗਾਦਿਨਾ ਹਿ ਨ ਕੇਵਲਂ ਦਿਟ੍ਠਾਦਿਕਾ ਏਵ ਧਮ੍ਮਾ ਪਹੀਯਨ੍ਤਿ, ਅਥ ਖੋ ਅਪਾਯਗਮਨਿਯਾ ਤੇਨ ਕਾਮਰਾਗਪਟਿਘਮਾਨਾਦਯੋਪਿ ਪਹੀਯਨ੍ਤਿ ਏਵ. ਪਠਮਮਗ੍ਗਵਜ੍ਝਾ ਹਿ ਕਾਮਰਾਗਾ, ਅਪਾਯਗਮਨਿਯਾ ਚ ਮਾਨਾਵਿਜ੍ਜਾਦਯੋਪਿ, ਤਤਿਯਮਗ੍ਗਵਜ੍ਝਾਤਿ ਪਹਾਨੇਕਟ੍ਠਾ ਹੁਤ੍ਵਾ ਪਹੀਯਨ੍ਤਿ ਏਵਾਤਿ ‘‘ਨੋ’’ਤਿ ਅਰਹਤ੍ਤਮਗ੍ਗਟ੍ਠਂ ਸਨ੍ਧਾਯ ਵੁਤ੍ਤਂ. ਸੋ ਹਿ ਕਾਮਰਾਗਾਨੁਸਯਂਯੇਵ ਪਹੀਨਤ੍ਤਾ ਨ ਪਜਹਤੀਤਿ. ਯਤੋ ਕਾਮਰਾਗਾਨੁਸਯਂ ਪਜਹਤੀਤਿ ਯਤੋ ਉਪ੍ਪਜ੍ਜਨਕਂ ਕਾਮਰਾਗਾਨੁਸਯਂ ਪਜਹਤੀਤਿ ਅਤ੍ਥੋ, ਅਟ੍ਠਮਕੋਤਿ ਸੋਤਾਪਤ੍ਤਿਮਗ੍ਗਟ੍ਠੋ. ਸੋ ਹਿ ਦਕ੍ਖਿਣੇਯ੍ਯਕ੍ਕਮੇਨ ਅਰਹਤ੍ਤਫਲਟ੍ਠਤੋ ਪਟ੍ਠਾਯ ਗਣਿਯਮਾਨੋ ਅਟ੍ਠਮਕੋ ਨਾਮ. ਪਟਿਲੋਮਨਯੇ ਅਨਾਗਾਮਿਮਗ੍ਗਸਮਙ੍ਗਿਞ੍ਚ ਅਟ੍ਠਮਕਞ੍ਚ ਠਪੇਤ੍ਵਾ ਅਵਸੇਸਾਤਿ ਪੁਥੁਜ੍ਜਨਸੇਸਸੇਖਾਸੇਖਾ. ਤੇਸੁ ਹਿ ਪੁਥੁਜ੍ਜਨਾ ਪਹਾਨਪਰਿਞ੍ਞਾਯ ਅਭਾਵੇਨ ਨ ਪਜਹਨ੍ਤਿ, ਸੇਸਾ ਤੇਸਂ ਪਹੀਨਤ੍ਤਾਤਿ ਇਮਿਨਾ ਨਯੇਨ ਸਬ੍ਬਤ੍ਥ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਅਯਂ ਪਜਹਨਵਾਰੇ ਨਯੋ.

ਪਰਿਞ੍ਞਾਵਾਰੋ ਪਨ ‘‘ਯੋ ਕਾਮਰਾਗਾਨੁਸਯਂ ਪਰਿਜਾਨਾਤਿ, ਸੋ ਪਟਿਘਾਨੁਸਯਂ ਪਰਿਜਾਨਾਤੀ’’ਤਿਆਦਿਨਾ ਪਜਹਨਵਾਰਸਦਿਸੋਵ. ਅਯਮ੍ਪਿ ਹਿ ਪਜਹਨਵਾਰੋ ਵਿਯ ਮਗ੍ਗਟ੍ਠਾਨਞ੍ਞੇਵ ਵਸੇਨ ਵਿਸ੍ਸਜ੍ਜਿਤੋ. ਤਤ੍ਥ ਪਰਿਜਾਨਾਤੀਤਿ ਤੀਹਿ ਪਰਿਞ੍ਞਾਹਿ ਪਰਿਜਾਨਾਤੀਤਿ ਅਤ੍ਥੋ. ਅਯਂ ਪਰਿਞ੍ਞਾਵਾਰੇ ਨਯੋ.

ਪਹੀਨਵਾਰੇ ਪਨ ‘‘ਯਸ੍ਸ ਕਾਮਰਾਗਾਨੁਸਯੋ ਪਹੀਨੋ, ਤਸ੍ਸ ਪਟਿਘਾਨੁਸਯੋ ਪਹੀਨੋਤਿ? ਆਮਨ੍ਤਾ…ਪੇ… ਮਾਨਾਨੁਸਯੋ ਪਹੀਨੋਤਿ? ਅਨਾਗਾਮਿਸ੍ਸ ਕਾਮਰਾਗਾਨੁਸਯੋਵ, ਅਰਹਤੋ ਪਨ ਮਾਨਾਨੁਸਯੋਪਿ ਪਹੀਨੋ’’ਤਿਆਦਿਨਾ ਪੁਗ੍ਗਲਵਾਰੇ, ‘‘ਯਤ੍ਥ ਕਾਮਰਾਗਾਨੁਸਯੋ ਪਹੀਨੋ, ਤਤ੍ਥ ਪਟਿਘਾਨੁਸਯੋ ਪਹੀਨੋਤਿ? ਨ ਵਤ੍ਤਬ੍ਬੋ ਪਹੀਨੋਤਿ ਵਾ ਅਪ੍ਪਹੀਨੋਤਿ ਵਾ. ਯਤ੍ਥ ਵਾ ਪਨ…ਪੇ… ਨ ਵਤ੍ਤਬ੍ਬੋ…ਪੇ… ਤਤ੍ਥ ਮਾਨਾਨੁਸਯੋ ਪਹੀਨੋਤਿ? ਆਮਨ੍ਤਾ. ਯਤ੍ਥ ਵਾ ਪਨ…ਪੇ… ਪਹੀਨੋਤਿ? ਰੂਪਾਰੂਪਧਾਤੁਯਾ ਏਤ੍ਥ ਮਾਨਾਨੁਸਯੋ ਪਹੀਨੋ, ਕਾਮਰਾਗਾਨੁਸਯੋ ਨ ਵਤ੍ਤਬ੍ਬੋ, ਕਾਮਧਾਤੁਯਾ ਦ੍ਵੀਸੁ ਵੇਦਨਾਸੁ ਏਤ੍ਥ ਤਦੁਭਯਂ ਪਹੀਨ’’ਨ੍ਤਿਆਦਿਨਾ ਓਕਾਸਵਾਰੇ, ਪੁਗ੍ਗਲੋਕਾਸਵਾਰੇਤਿ ਏਵਂ ਅਨੁਲੋਮਨਯੇ, ‘‘ਯਸ੍ਸ ਕਾਮਰਾਗਾਨੁਸਯੋ ਅਪ੍ਪਹੀਨੋ, ਤਸ੍ਸ ਪਟਿਘਾਨੁਸਯੋ ਅਪ੍ਪਹੀਨੋਤਿ? ਆਮਨ੍ਤਾ. ਯਸ੍ਸ ਵਾ ਪਨ…ਪੇ… ਆਮਨ੍ਤਾ…ਪੇ… ਯਸ੍ਸ ਵਾ ਪਨ ਮਾਨਾਨੁਸਯੋ ਅਪ੍ਪਹੀਨੋ, ਤਸ੍ਸ ਕਾਮਰਾਗਾਨੁਸਯੋ ਅਪ੍ਪਹੀਨੋਤਿ? ਅਨਾਗਾਮਿਸ੍ਸ ਮਾਨਾਨੁਸਯੋਵ, ਤਿਣ੍ਣਂ ਪੁਗ੍ਗਲਾਨਂ ਤਦੁਭਯਂ ਅਪ੍ਪਹੀਨ’’ਨ੍ਤਿਆਦਿਨਾ ਪਟਿਲੋਮਨਯੇ ਚ ਵੁਤ੍ਤਨਯੇਨੇਵ ਪੁਚ੍ਛਾਵਿਸ੍ਸਜ੍ਜਨਨਯੋ ਞਾਤਬ੍ਬੋ.

ਏਤ੍ਥ ਚ ਫਲਟ੍ਠਵਸੇਨੇਵ ਅਤ੍ਥੋ ਗਹੇਤਬ੍ਬੋ ਮਗ੍ਗਟ੍ਠਾਨਂ ਪਹੀਨਕਿਲੇਸਤ੍ਤਾਭਾਵਾ. ਤੇਸਂ ਹਿ ਅਨੁਸਯਾ ਪਹੀਯਨ੍ਤਿ ਏਵ, ਨ ਪਨ ਪਹੀਨਾਤਿ ਅਨਾਗਾਮਿਆਦਯੋ ਫਲਟ੍ਠਾਵ ਗਹੇਤਬ੍ਬਾ, ਓਕਾਸਵਾਰੇ ਪਨ ‘‘ਨ ਵਤ੍ਤਬ੍ਬੋ’’ਤਿ ਇਦਂ ਉਭਿਨ੍ਨਂ ਉਪ੍ਪਤ੍ਤਿਟ੍ਠਾਨਸ੍ਸ ਅਸਾਧਾਰਣਤ੍ਤਾ ਵੁਤ੍ਤਂ. ਅਞ੍ਞਂ ਹਿ ਕਾਮਰਾਗਾਨੁਸਯਸ੍ਸ ਉਪ੍ਪਤ੍ਤਿਟ੍ਠਾਨਂ, ਅਞ੍ਞਂ ਪਟਿਘਾਨੁਸਯਸ੍ਸ. ਅਭਾਵਿਤਮਗ੍ਗਸ੍ਸ ਚ ਯਤ੍ਥ ਅਨੁਸਯੋ ਉਪ੍ਪਜ੍ਜਤਿ, ਮਗ੍ਗੇ ਭਾਵਿਤੇ ਤਤ੍ਥੇਵ ਸੋ ਪਹੀਨੋ ਨਾਮ ਹੋਤਿ, ਤਸ੍ਮਾ ਸੋ ਤਤ੍ਥ ਪਹੀਨੋਤਿ ਵਾ, ਅਪ੍ਪਹੀਨੋਤਿ ਵਾ ਨ ਵਤ੍ਤਬ੍ਬੋ, ਸਬ੍ਬਤ੍ਥਾਪਿ ਪਨ ਸਯਂ ਅਭਾਵੇਨ ਤਤ੍ਥ ਅਪ੍ਪਹੀਨੋਤਿ ਨ ਵਤ੍ਤਬ੍ਬੋ. ਉਭਿਨ੍ਨਂ ਪਨ ਸਾਧਾਰਣਟ੍ਠਾਨਂ ਸਨ੍ਧਾਯ ‘‘ਆਮਨ੍ਤਾ’’ਤਿ ਵੁਤ੍ਤਂ. ਮਾਨਾਨੁਸਯੋ ਹਿ ਕਾਮਧਾਤੁਯਾ ਵੇਦਨਾਦ੍ਵਯਸਙ੍ਖਾਤੇ ਸਾਧਾਰਣਟ੍ਠਾਨੇ ਕਾਮਰਾਗੇਨ ਸਦ੍ਧਿਂ ਪਹੀਨੋ ਨਾਮ ਹੋਤਿ. ਯਸ੍ਸ ਕਾਮਰਾਗਾਨੁਸਯੋ ਅਪ੍ਪਹੀਨੋਤਿ ਪੁਥੁਜ੍ਜਨਸ੍ਸ, ਸੋਤਾਪਤ੍ਤਿਸਕਦਾਗਾਮਿਫਲਟ੍ਠਾਨਞ੍ਚ ਵਸੇਨ ਅਤ੍ਥੋ ਗਹੇਤਬ੍ਬੋ. ‘‘ਤਿਣ੍ਣਂ ਪੁਗ੍ਗਲਾਨ’’ਨ੍ਤਿ ਹਿ ਵੁਤ੍ਤਂ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ ਅਯਂ ਪਹੀਨਵਾਰੇ ਨਯੋ.

ਉਪ੍ਪਜ੍ਜਨਵਾਰੇ ਪਨ ‘‘ਯਸ੍ਸ ਕਾਮਰਾਗਾਨੁਸਯੋ ਉਪ੍ਪਜ੍ਜਤਿ, ਤਸ੍ਸ ਪਟਿਘਾਨੁਸਯੋ ਉਪ੍ਪਜ੍ਜਤੀ’’ਤਿਆਦਿਨਾ ਸਬ੍ਬਤ੍ਥ ਅਨੁਸਯਵਾਰਸਦਿਸੋਵਾਤਿ ਅਯਂ ਉਪ੍ਪਜ੍ਜਨਵਾਰੇ ਨਯੋ.

ਧਾਤੁਵਾਰੇ ਪਨ ‘‘ਕਾਮਧਾਤੁਯਾ ਚੁਤਸ੍ਸ ਕਾਮਧਾਤੁਂ ਉਪਪਜ੍ਜਨ੍ਤਸ੍ਸ ਕਤਿ ਅਨੁਸਯਾ ਅਨੁਸੇਨ੍ਤਿ, ਕਤਿ ਅਨੁਸਯਾ ਨਾਨੁਸੇਨ੍ਤਿ, ਕਤਿ ਅਨੁਸਯਾ ਭਙ੍ਗਾ? ਕਾਮਧਾਤੁਯਾ ਚੁਤਸ੍ਸ ਰੂਪਧਾਤੁਂ ਉਪਪਜ੍ਜਨ੍ਤਸ੍ਸ…ਪੇ… ਕਤਿ ਭਙ੍ਗਾ? ਕਾਮਧਾਤੁਯਾ ਚੁਤਸ੍ਸ ਅਰੂਪਧਾਤੁਂ ਉਪਪਜ੍ਜਨ੍ਤਸ੍ਸ…ਪੇ… ਰੂਪਧਾਤੁਂ ਉਪਪਜ੍ਜਨ੍ਤਸ੍ਸ ਨ ਅਰੂਪਧਾਤੁਂ ਉਪਪਜ੍ਜਨ੍ਤਸ੍ਸ…ਪੇ… ਕਤਿ ਭਙ੍ਗਂ? ਕਾਮਧਾਤੁਯਾ ਚੁਤਸ੍ਸ ਨ ਕਾਮਧਾਤੁਂ, ਨ ਅਰੂਪਧਾਤੁਂ ਉਪਪਜ੍ਜਨ੍ਤਸ੍ਸ…ਪੇ… ਨ ਰੂਪਧਾਤੁਂ ਨ ਅਰੂਪਧਾਤੁਂ ਉਪਪਜ੍ਜਨ੍ਤਸ੍ਸ. ਨ ਕਾਮਧਾਤੁਂ ਨ ਰੂਪਧਾਤੁਂ ਉਪਪਜ੍ਜਨ੍ਤਸ੍ਸ ਕਤਿ ਭਙ੍ਗਾ’’ਤਿ ਏਵਂ ਕਾਮਧਾਤੁਮੂਲਕਾ ਨਵ ਪੁਚ੍ਛਾ, ਤਥਾ ‘‘ਰੂਪਧਾਤੁਯਾ ਚੁਤਸ੍ਸਾ’’ਤਿਆਦਿਨਾ ਰੂਪਧਾਤੁਮੂਲਕਾ ਨਵ, ਅਰੂਪਧਾਤੁਯਾ ਨਵ ਚਾਤਿ ਸਤ੍ਤਵੀਸਤਿ ਅਨੁਲੋਮਪੁਚ੍ਛਾ, ਤਥਾ ‘‘ਨ ਕਾਮਧਾਤੁਯਾ ਚੁਤਸ੍ਸਾ’’ਤਿਆਦਿਨਾ ਸਤ੍ਤਵੀਸਤਿ ਪਟਿਲੋਮਪੁਚ੍ਛਾ ਚ, ਤਥਾ ‘‘ਨ ਕਾਮਧਾਤੁਯਾ ਨ ਅਰੂਪਧਾਤੁਯਾ ਚੁਤਸ੍ਸ ਕਾਮਧਾਤੁਂ ਉਪਪਜ੍ਜਨ੍ਤਸ੍ਸਾ’’ਤਿਆਦਿਨਾ ਸਤ੍ਤਵੀਸਤਿ ਦੁਕਮੂਲਕਾ ਪੁਚ੍ਛਾ ਚਾਤਿ ਏਵਂ ਪੁਚ੍ਛਾਵਾਰੇ ਏਕਾਸੀਤਿ ਪੁਚ੍ਛਾ ਵੇਦਿਤਬ੍ਬਾ.

ਤਤ੍ਥ ਅਨੁਸੇਨ੍ਤੀਤਿ ਚਿਤ੍ਤਸਨ੍ਤਾਨੇ ਅਨੁਗਤਾ ਹੁਤ੍ਵਾ ਕਤਿ ਅਨੁਸੇਨ੍ਤਿ, ਭਙ੍ਗਾਤਿ ਅਨੁਸੇਨ੍ਤਿ ਚ ਨਾਨੁਸੇਨ੍ਤਿ ਚਾਤਿ ਏਵਂ ਕਤਿ ਵਿਭਜਿਤਬ੍ਬਾਤਿ ਅਤ੍ਥੋ. ਨ ਕਾਮਧਾਤੁਂ ਉਪਪਜ੍ਜਨ੍ਤਸ੍ਸਾਤਿ ਕਾਮਧਾਤੁਵਿਰਹਿਤਾ ਦ੍ਵੇ ਰੂਪਾਰੂਪਧਾਤੁਯੋ ਉਪਪਜ੍ਜਨ੍ਤਸ੍ਸ. ਨ ਕਾਮਧਾਤੁਂ ਨ ਰੂਪਧਾਤੁਨ੍ਤਿ ਅਰੂਪਧਾਤੁਂ ਉਪਪਜ੍ਜਨ੍ਤਸ੍ਸ. ਨ ਕਾਮਧਾਤੁਯਾਤਿ ਰੂਪਾਰੂਪਧਾਤੂਹਿ ਚੁਤਸ੍ਸ, ਏਵਂ ਸੇਸੇਸੁਪਿ ਸਬ੍ਬਤ੍ਥ ਪਟਿਸਨ੍ਧਿਵਸੇਨ, ਧਾਤੁਵਸੇਨ ਚ ਅਤ੍ਥੋ ਵੇਦਿਤਬ੍ਬੋਤਿ ਅਯਂ ਉਦ੍ਦੇਸਵਾਰੇ ਨਯੋ.

ਨਿਦ੍ਦੇਸਵਾਰੇ ਪਨਸ੍ਸ ‘‘ਕਾਮਧਾਤੁਯਾ ਚੁਤਸ੍ਸ ਕਾਮਧਾਤੁਂ ਉਪਪਜ੍ਜਨ੍ਤਸ੍ਸ ਕਸ੍ਸਚਿ ਸਤ੍ਤ ਅਨੁਸਯਾ ਅਨੁਸੇਨ੍ਤਿ, ਕਸ੍ਸਚਿ ਪਞ੍ਚ ਅਨੁਸਯਾ ਅਨੁਸੇਨ੍ਤਿ, ਅਨੁਸਯਾ ਭਙ੍ਗਾ ਨਤ੍ਥਿ, ਕਾਮਧਾਤੁਯਾ ਚੁਤਸ੍ਸ ਰੂਪਧਾਤੁਂ ਉਪਪਜ੍ਜਨ੍ਤਸ੍ਸ ਕਸ੍ਸਚਿ ਸਤ੍ਤ ਅਨੁਸਯਾ ਅਨੁਸੇਨ੍ਤਿ, ਕਸ੍ਸਚਿ ਪਞ੍ਚ, ਕਸ੍ਸਚਿ ਤਯੋ …ਪੇ… ਭਙ੍ਗਾ ਨਤ੍ਥੀ’’ਤਿ ਇਮਿਨਾ ਨਯੇਨ ਸਬ੍ਬਤ੍ਥ ਵਿਸ੍ਸਜ੍ਜਨਂ ਵੇਦਿਤਬ੍ਬਂ, ਅਯਂ ਪਨੇਤ੍ਥ ਵਿਸੇਸੋ – ਰੂਪਧਾਤੁਯਾ ਚੁਤਸ੍ਸ ਕਾਮਧਾਤੁਂ ਉਪਪਜ੍ਜਨ੍ਤਸ੍ਸ ਸਤ੍ਤੇਵ ਅਨੁਸਯਾ ਅਨੁਸੇਨ੍ਤਿ, ਤਥਾ ‘‘ਅਰੂਪਧਾਤੁਯਾ ਚੁਤਸ੍ਸ ਕਾਮਧਾਤੁਂ ਉਪਪਜ੍ਜਨ੍ਤਸ੍ਸਾ’’ਤਿਆਦੀਸੁਪਿ, ਅਰੂਪਧਾਤੁਯਾ ਪਨ ਚੁਤਸ੍ਸ ਰੂਪਧਾਤੁਯਾ ਉਪਪਤ੍ਤਿ ਨਤ੍ਥਿ, ਹੇਟ੍ਠਾ ਉਪਪਜ੍ਜਮਾਨੋ ਕਾਮਧਾਤੁਂ ਏਵ ਉਪਪਜ੍ਜਤਿ, ਸਤ੍ਤੇਵ ਅਨੁਸਯਾ ਅਨੁਸੇਨ੍ਤੀਤਿ ਏਵਂ ਅਞ੍ਞੇਸੁਪਿ ਏਵਰੂਪੇਸੁ ਵਿਸ੍ਸਜ੍ਜਨਨਯੋ ਵੇਦਿਤਬ੍ਬੋਤਿ ਅਯਂ ਵਿਸੇਸੋ, ਸੇਸਂ ਵੁਤ੍ਤਨਯਮੇਵਾਤਿ ਅਯਮੇਤ੍ਥ ਪਾਲ਼ਿਨਯੋ.

ਤਤ੍ਥ ਕਸ੍ਸਚਿ ਸਤ੍ਤਾਤਿ ਪੁਥੁਜ੍ਜਨਵਸੇਨ ਵੁਤ੍ਤਂ, ਪਞ੍ਚਾਤਿ ਸੋਤਾਪਨ੍ਨਸਕਦਾਗਾਮੀਨਂ ਵਸੇਨ. ਤੇਸਂ ਹਿ ਦਿਟ੍ਠਿਵਿਚਿਕਿਚ੍ਛਾਨੁਸਯਾ ਪਹੀਨਾਤਿ, ਕਾਮਧਾਤੁਯਾ ਪਨ ਅਨਾਗਾਮੀਨਂ ਉਪਪਤ੍ਤਿਅਭਾਵਤੋ ਪਠਮਵਾਰੇ ‘‘ਕਸ੍ਸਚਿ ਤਯੋ’’ਤਿ ਨ ਵੁਤ੍ਤਂ, ਰੂਪਾਰੂਪਧਾਤੂਸੁ ਉਪ੍ਪਜ੍ਜਨਵਾਰੇਸੁ ਏਵ ਵੁਤ੍ਤਂ…ਪੇ… ਅਨਾਗਾਮੀਨਂ ਹਿ ਕਾਮਰਾਗਪਟਿਘਾਨਮ੍ਪਿ ਪਹੀਨਤ੍ਤਾ ਤਯੋਵ ਅਨੁਸਯਾ ਅਨੁਸੇਨ੍ਤਿ, ਇਧ ਚ ਅਨੁਸਯਾਨਂ ਉਪ੍ਪਤ੍ਤਿਵਸੇਨ ਨਯੋ, ਅਨੁਸਯਾਨਂ ਅਨੁਸਯਨਂ ਅਗ੍ਗਹੇਤ੍ਵਾ ਅਪ੍ਪਹੀਨਭਾਵੇਨ ਪਟਿਸਨ੍ਧਿਕ੍ਖਣੇ ਅਪਿ ਅਨੁਸਯਨਂ ਗਹੇਤਬ੍ਬਂ. ਸਤ੍ਤੇਵਾਤਿ ਅਰਿਯਸਾਵਕਸ੍ਸ ਰੂਪਾਰੂਪਧਾਤੁਯਾ ਚੁਤਸ੍ਸ ਹੇਟ੍ਠਾ ਕਾਮਭਵਾਦੀਸੁ ਉਪਪਤ੍ਤਿ ਨਾਮ ਨਤ੍ਥਿ, ਪੁਥੁਜ੍ਜਨਸ੍ਸੇਵ ਹੋਤਿ, ਤਸ੍ਮਾ ‘‘ਸਤ੍ਤੇਵਾ’’ਤਿ ਨਿਯਮੇਤ੍ਵਾ ਵੁਤ੍ਤਂ, ਅਰੂਪਧਾਤੁਯਾ ਚੁਤਸ੍ਸ ਰੂਪਧਾਤੁਯਾ ਉਪਪਤ੍ਤਿ ਨਤ੍ਥੀਤਿ. ਕਸ੍ਮਾ ਨਤ੍ਥਿ? ਅਰੂਪੀਨਂ ਰੂਪਜ੍ਝਾਨਸ੍ਸ ਅਭਾਵਾ. ਤੇ ਹਿ ਸਬ੍ਬਸੋ ਰੂਪਸਞ੍ਞਾਨਂ ਸਮਤਿਕ੍ਕਮਨਰੂਪਧਾਤੁਂ ਉਪਪਨ੍ਨਾਤਿ. ਸੇਸਂ ਨਯਤੋ ਸੁਵਿਞ੍ਞੇਯ੍ਯਮੇਵਾਤਿ ਅਯਂ ਧਾਤੁਵਾਰੇ ਨਯੋ. ਅਯਂ ਅਨੁਸਯਯਮਕਮਾਤਿਕਤ੍ਥਸਂਵਣ੍ਣਨਾਨਯੋ.

ਚਿਤ੍ਤਯਮਕਮਾਤਿਕਤ੍ਥਵਣ੍ਣਨਾ

ਚਿਤ੍ਤਯਮਕਮਾਤਿਕਾਯਂ ਪਨ ਪਾਲ਼ਿਵਵਤ੍ਥਾਨਂ ਤਾਵ ਏਵਂ ਵੇਦਿਤਬ੍ਬਂ. ਇਮਿਸ੍ਸਂ ਹਿ ਮਾਤਿਕਾਯਂ ਪੁਗ੍ਗਲਵਾਰੋ ਧਮ੍ਮਵਾਰੋ ਪੁਗ੍ਗਲਧਮ੍ਮਵਾਰੋਤਿ ਆਦਿਤੋਵ ਤਯੋ ਸੁਦ੍ਧਿਕਮਹਾਵਾਰਾ ਹੋਨ੍ਤਿ, ਤਤ੍ਥ ‘‘ਯਸ੍ਸ ਚਿਤ੍ਤਂ ਉਪ੍ਪਜ੍ਜਤਿ ਨ ਨਿਰੁਜ੍ਝਤੀ’’ਤਿ ਏਵਂ ਪੁਗ੍ਗਲਵਸੇਨ ਚਿਤ੍ਤਸ੍ਸ ਉਪ੍ਪਜ੍ਜਨਨਿਰੁਜ੍ਝਨਾਦਿਭੇਦਂ ਦੀਪੇਨ੍ਤੋ ਗਤੋ ਪੁਗ੍ਗਲਵਾਰੋ ਨਾਮ. ‘‘ਯਂ ਚਿਤ੍ਤਂ ਉਪ੍ਪਜ੍ਜਤਿ ਨ ਨਿਰੁਜ੍ਝਤੀ’’ਤਿ ਏਵਂ ਧਮ੍ਮਵਸੇਨੇਵ ਚਿਤ੍ਤਸ੍ਸ ਉਪ੍ਪਜ੍ਜਨਨਿਰੁਜ੍ਝਨਾਦਿਭੇਦਂ ਦੀਪੇਨ੍ਤੋ ਗਤੋ ਧਮ੍ਮਵਾਰੋ ਨਾਮ. ‘‘ਯਸ੍ਸ ਯਂ ਚਿਤ੍ਤਂ ਉਪ੍ਪਜ੍ਜਤਿ ਨ ਨਿਰੁਜ੍ਝਤੀ’’ਤਿ ਏਵਂ ਉਭਯਵਸੇਨੇਵ ਚਿਤ੍ਤਸ੍ਸ ਉਪ੍ਪਜ੍ਜਨਨਿਰੁਜ੍ਝਨਾਦਿਭੇਦਂ ਦੀਪੇਨ੍ਤੋ ਗਤੋ ਪੁਗ੍ਗਲਧਮ੍ਮਵਾਰੋ ਨਾਮ.

ਤਤੋ ‘‘ਯਸ੍ਸ ਸਰਾਗਂ ਚਿਤ੍ਤ’’ਨ੍ਤਿਆਦੀਨਂ ਸੋਲ਼ਸਨ੍ਨਂ ਪਦਾਨਂ ਵਸੇਨ ਅਪਰੇ ਸਰਾਗਾਦਿਪਦਵਿਸੇਸਿਤਾ ਸੋਲ਼ਸ ਪੁਗ੍ਗਲਵਾਰਾ, ਸੋਲ਼ਸ ਧਮ੍ਮਵਾਰਾ, ਸੋਲ਼ਸ ਪੁਗ੍ਗਲਧਮ੍ਮਵਾਰਾਤਿ ਅਟ੍ਠਚਤ੍ਤਾਲੀਸ ਮਿਸ੍ਸਕਵਾਰਾ ਹੋਨ੍ਤਿ, ਤੇ ਸਰਾਗਾਦਿਪਦਮਤ੍ਤਂ ਦਸ੍ਸੇਤ੍ਵਾ ਸਂਖਿਤ੍ਤਾ. ਤਤੋ ‘‘ਯਸ੍ਸ ਕੁਸਲਂ ਚਿਤ੍ਤ’’ਨ੍ਤਿਆਦਿਨਾ ਨਯੇਨ ਛਸਟ੍ਠਿਦ੍ਵਿਸਤਸਙ੍ਖਾਤਾਨਂ ਅਭਿਧਮ੍ਮਮਾਤਿਕਾਪਦਾਨਂ ਵਸੇਨ ਅਪਰੇ ਕੁਸਲਾਦਿਪਦਵਿਸੇਸਿਤਾ ਛਸਟ੍ਠਿਦ੍ਵਿਸਤਪੁਗ੍ਗਲਵਾਰਾ, ਛਸਟ੍ਠਿਦ੍ਵਿਸਤਧਮ੍ਮਵਾਰਾ, ਛਸਟ੍ਠਿਦ੍ਵਿਸਤਪੁਗ੍ਗਲਧਮ੍ਮਵਾਰਾਤਿ ਅਟ੍ਠਨਵੁਤਿਸਤ੍ਤਸਤਾ ਮਿਸ੍ਸਕਵਾਰਾ ਹੋਨ੍ਤਿ, ਤੇਪਿ ਕੁਸਲਾਦਿਪਦਮਤ੍ਤਂ ਦਸ੍ਸੇਤ੍ਵਾ ਸਂਖਿਤ੍ਤਾਯੇਵ, ਯਾਨਿਪੇਤ੍ਥ ਸਨਿਦਸ੍ਸਨਾਦੀਨਿ ਪਦਾਨਿ ਚਿਤ੍ਤੇਨ ਸਦ੍ਧਿਂ ਨ ਯੁਜ੍ਜਨ੍ਤਿ, ਤਾਨਿ ਮੋਘਪੁਚ੍ਛਾਵਸੇਨ ਗਹਿਤਾਨੀਤਿ.

ਤੇਸੁ ਪਨ ਤੀਸੁ ਵਾਰੇਸੁ ਸਬ੍ਬਪਠਮੇ ਸੁਦ੍ਧਿਕਪੁਗ੍ਗਲਮਹਾਵਾਰੇ ਤਾਵ ਉਪ੍ਪਾਦਨਿਰੋਧਕਾਲਸਮ੍ਭੇਦਵਾਰੋ ਉਪ੍ਪਾਦੁਪ੍ਪਨ੍ਨਵਾਰੋ ਨਿਰੋਧੁਪ੍ਪਨ੍ਨਵਾਰੋ ਉਪ੍ਪਾਦਵਾਰੋ ਨਿਰੋਧਵਾਰੋ ਉਪ੍ਪਾਦਨਿਰੋਧਵਾਰੋ ਉਪ੍ਪਜ੍ਜਮਾਨਨਨਿਰੋਧਵਾਰੋ ਉਪ੍ਪਜ੍ਜਮਾਨੁਪ੍ਪਨ੍ਨਵਾਰੋ ਨਿਰੁਜ੍ਝਮਾਨੁਪ੍ਪਨ੍ਨਵਾਰੋ ਉਪ੍ਪਨ੍ਨੁਪ੍ਪਾਦਵਾਰੋ ਅਤੀਤਾਨਾਗਤਵਾਰੋ ਉਪ੍ਪਨ੍ਨੁਪ੍ਪਜ੍ਜਮਾਨਵਾਰੋ ਨਿਰੁਦ੍ਧਨਿਰੁਜ੍ਝਮਾਨਵਾਰੋ ਅਤਿਕ੍ਕਨ੍ਤਕਾਲਵਾਰੋ ਚਾਤਿ ਚੁਦ੍ਦਸ ਅਨ੍ਤਰਵਾਰਾ, ਤੇਸੁ ਉਪ੍ਪਾਦਵਾਰੋ ਨਿਰੋਧਵਾਰੋ ਉਪ੍ਪਾਦਨਿਰੋਧਵਾਰੋਤਿ ਇਮੇਸੁ ਤੀਸੁ ਵਾਰੇਸੁ ਪਚ੍ਚੇਕਂ ਵਤ੍ਤਮਾਨਾਤੀਤਸ੍ਸ, ਵਤ੍ਤਮਾਨਾਨਾਗਤਸ੍ਸ, ਅਤੀਤਾਨਾਗਤਸ੍ਸ ਚਾਤਿ ਤਿਣ੍ਣਂ ਕਾਲਭੇਦਾਨਂ ਵਸੇਨ ਅਨੁਲੋਮਪਟਿਲੋਮਤੋ ਛ ਛ ਕਤ੍ਵਾ ਅਟ੍ਠਾਰਸ ਯਮਕਾਨਿ, ਉਪ੍ਪਨ੍ਨੁਪ੍ਪਾਦਵਾਰੇ ਅਤੀਤਾਨਾਗਤਕਾਲਵਸੇਨ ਅਨੁਲੋਮਤੋ ਦ੍ਵੇ, ਪਟਿਲੋਮਤੋ ਦ੍ਵੇਤਿ ਚਤ੍ਤਾਰਿ ਯਮਕਾਨਿ, ਸੇਸੇਸੁ ਆਦਿਤੋ ਨਿਦ੍ਦਿਟ੍ਠੇਸੁ ਤੀਸੁ, ਅਨ੍ਤਰੇ ਨਿਦ੍ਦਿਟ੍ਠੇਸੁ ਤੀਸੁ, ਅਵਸਾਨੇ ਨਿਦ੍ਦਿਟ੍ਠੇਸੁ ਚਤੂਸੂਤਿ ਦਸਸੁ ਵਾਰੇਸੁ ਅਨੁਲੋਮਤੋ ਏਕਂ, ਪਟਿਲੋਮਤੋ ਏਕਨ੍ਤਿ ਦ੍ਵੇ ਦ੍ਵੇ ਕਤ੍ਵਾ ਵੀਸਤਿ ਯਮਕਾਨਿ, ਏਵਂ ਸਬ੍ਬੇਸੁਪਿ ਚੁਦ੍ਦਸਸੁ ਅਨ੍ਤਰਵਾਰੇਸੁ ਦ੍ਵਾਚਤ੍ਤਾਲੀਸ ਯਮਕਾਨਿ, ਚਤੁਰਾਸੀਤਿ ਪੁਚ੍ਛਾ, ਅਟ੍ਠਸਟ੍ਠਿਅਤ੍ਥਸਤਂ ਹੋਤਿ. ਯਥਾ ਚ ਏਕਸ੍ਮਿਂ ਸੁਦ੍ਧਿਕਪੁਗ੍ਗਲਮਹਾਵਾਰੇ, ਤਥਾ ਸੁਦ੍ਧਿਕਧਮ੍ਮਮਹਾਵਾਰੇ, ਸੁਦ੍ਧਿਕਪੁਗ੍ਗਲਧਮ੍ਮਮਹਾਵਾਰੇਪੀਤਿ ਤੀਸੁ ਮਹਾਵਾਰੇਸੁ ਛਬ੍ਬੀਸਤਿਯਮਕਸਤਂ, ਤਤੋ ਦਿਗੁਣਾ ਪੁਚ੍ਛਾ, ਦਿਗੁਣਾ ਅਤ੍ਥਾ ਚ ਵੇਦਿਤਬ੍ਬਾ, ਇਦਂ ਪਨ ਵਾਰਤ੍ਤਯਂ ਸਰਾਗਾਦਿਵਸੇਨ ਸੋਲ਼ਸਗੁਣਂ, ਕੁਸਲਾਦਿਵਸੇਨ ਛਸਟ੍ਠਿਦ੍ਵਿਸਤਗੁਣਂ ਕਤ੍ਵਾ ਇਮਿਸ੍ਸਾ ਚਿਤ੍ਤਯਮਕਮਾਤਿਕਾਯ ਅਨੇਕਾਨਿ ਯਮਕਸਹਸ੍ਸਾਨਿ, ਤਦ੍ਦਿਗੁਣਾ ਪੁਚ੍ਛਾ, ਤਦ੍ਦਿਗੁਣਾ ਅਤ੍ਥਾ ਚ ਹੋਨ੍ਤਿ, ਪਾਠੋ ਪਨ ਸਂਖਿਤ੍ਤੋ. ਏਵਮੇਤ੍ਥ ਪਾਲ਼ਿਵਵਤ੍ਥਾਨਂ ਵਿਦਿਤ੍ਵਾ ਇਦਾਨਿ ਅਨੁਤ੍ਤਾਨਪਦਤ੍ਥਾਨੁਸਾਰੇਨ ਵਿਭਙ੍ਗਨਯਸਹਿਤੋ ਸਙ੍ਖੇਪਤ੍ਥਵਣ੍ਣਨਾਨਯੋ ਏਵਂ ਵੇਦਿਤਬ੍ਬੋ.

ਯਸ੍ਸ ਚਿਤ੍ਤਂ ਉਪ੍ਪਜ੍ਜਤੀਤਿ ਯਸ੍ਸ ਪੁਗ੍ਗਲਸ੍ਸ ਚਿਤ੍ਤਂ ਉਪ੍ਪਾਦਕ੍ਖਣਸਮਙ੍ਗਿਤਾਯ ਉਪ੍ਪਜ੍ਜਤਿ. ਨ ਨਿਰੁਜ੍ਝਤੀਤਿ ਨਿਰੋਧਕ੍ਖਣਂ ਅਪ੍ਪਤ੍ਤਤਾਯ ਨ ਨਿਰੁਜ੍ਝਤਿ. ਤਸ੍ਸ ਚਿਤ੍ਤਨ੍ਤਿ ਕਿਂ ਤਸ੍ਸ ਪੁਗ੍ਗਲਸ੍ਸ ਤਤੋ ਪਟ੍ਠਾਯ ਚਿਤ੍ਤਂ ਨਿਰੁਜ੍ਝਿਸ੍ਸਤੀਤਿ ਪੁਚ੍ਛਾ, ਤਸ੍ਸਾ ਚ, ‘‘ਪਚ੍ਛਿਮਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤੇਸਂ ਚਿਤ੍ਤਂ ਉਪ੍ਪਜ੍ਜਤਿ ਨ ਨਿਰੁਜ੍ਝਤਿ, ਨਿਰੁਜ੍ਝਿਸ੍ਸਤਿ ਨੁਪ੍ਪਜ੍ਜਿਸ੍ਸਤਿ, ਇਤਰੇਸਂ ਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤੇਸਂ ਚਿਤ੍ਤਂ ਉਪ੍ਪਜ੍ਜਤਿ ਨ ਨਿਰੁਜ੍ਝਤਿ, ਨਿਰੁਜ੍ਝਿਸ੍ਸਤਿ ਚੇਵ ਉਪ੍ਪਜ੍ਜਿਸ੍ਸਤਿ ਚਾ’’ਤਿ ਵਿਸ੍ਸਜ੍ਜਨਂ. ਤਤ੍ਥ ਤੇਸਂ ਚਿਤ੍ਤਨ੍ਤਿ ਯੇਸਂ ਖੀਣਾਸਵਾਨਂ ਪਚ੍ਛਿਮਚਿਤ੍ਤਸਙ੍ਖਾਤਸ੍ਸ ਚੁਤਿਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਵਤ੍ਤਤਿ, ਤੇਸਂ ਤਦੇਵ ਚੁਤਿਚਿਤ੍ਤਂ ਉਪ੍ਪਾਦਪ੍ਪਤ੍ਤਤਾਯ ਉਪ੍ਪਜ੍ਜਤਿ ਨਾਮ, ਭਙ੍ਗਂ ਅਪ੍ਪਤ੍ਤਤਾਯ ਨ ਨਿਰੁਜ੍ਝਤਿ ਨਾਮ, ਇਦਾਨਿ ਪਨ ਭਙ੍ਗਂ ਪਤ੍ਵਾ ਤਂ ਤੇਸਂ ਚਿਤ੍ਤਂ ਨਿਰੁਜ੍ਝਿਸ੍ਸਤਿ, ਤਤੋ ਅਪ੍ਪਟਿਸਨ੍ਧਿਕਤ੍ਤਾ ਅਞ੍ਞਂ ਨੁਪ੍ਪਜ੍ਜਿਸ੍ਸਤਿ. ਇਤਰੇਸਨ੍ਤਿ ਪਚ੍ਛਿਮਚਿਤ੍ਤਸਮਙ੍ਗਿਂ ਖੀਣਾਸਵਂ ਠਪੇਤ੍ਵਾ ਅਵਸੇਸਾਨਂ ਸੇਖਾਸੇਖਪੁਥੁਜ੍ਜਨਾਨਂ ਨਿਰੁਜ੍ਝਿਸ੍ਸਤਿ ਚੇਵ ਅਞ੍ਞਂ ਪਨ ਤਸ੍ਮਿਂ ਵਾ ਅਤ੍ਤਭਾਵੇ ਉਪ੍ਪਜ੍ਜਿਸ੍ਸਤਿ ਚਾਤਿ ਅਤ੍ਥੋ.

‘‘ਯਸ੍ਸ ਵਾ ਪਨ ਚਿਤ੍ਤਂ ਨਿਰੁਜ੍ਝਿਸ੍ਸਤਿ ਨੁਪ੍ਪਜ੍ਜਿਸ੍ਸਤਿ, ਤਸ੍ਸ ਚਿਤ੍ਤਂ ਉਪ੍ਪਜ੍ਜਤਿ ਨ ਨਿਰੁਜ੍ਝਤੀ’’ਤਿ ਇਮਿਸ੍ਸਾ ਦੁਤਿਯਪੁਚ੍ਛਾਯ ਪਚ੍ਛਿਮਚਿਤ੍ਤਸਮਙ੍ਗਿਨੋ ਖੀਣਾਸਵਸ੍ਸ ਚਿਤ੍ਤਂ ਸਨ੍ਧਾਯ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ. ‘‘ਯਸ੍ਸ ਚਿਤ੍ਤਂ ਨੁਪ੍ਪਜ੍ਜਤਿ ਨਿਰੁਜ੍ਝਤਿ, ਤਸ੍ਸ ਚਿਤ੍ਤਂ ਨ ਨਿਰੁਜ੍ਝਿਸ੍ਸਤਿ ਉਪ੍ਪਜ੍ਜਿਸ੍ਸਤੀ’’ਤਿ ਪੁਚ੍ਛਾਯ ‘‘ਨੋ’’ਤਿ ਪਟਿਸੇਧੋਵ ਵਿਸ੍ਸਜ੍ਜਨਂ. ਨ ਉਪ੍ਪਜ੍ਜਤਿ ਨਿਰੁਜ੍ਝਤੀਤਿ ਹਿ ਭਙ੍ਗਕ੍ਖਣੇ ਅਰਹਤੋ ਪਚ੍ਛਿਮਚਿਤ੍ਤਮ੍ਪਿ ਸੇਸਾਨਂ ਭਿਜ੍ਜਮਾਨਚਿਤ੍ਤਮ੍ਪਿ ਪੁਚ੍ਛਤਿ, ਤਤੋ ਪਟ੍ਠਾਯ ਪਨ ਅਰਹਤੋ ਤਾਵ ਚਿਤ੍ਤਂ ਨ ਨਿਰੁਜ੍ਝਿਸ੍ਸਤੀਤਿ ਸਕ੍ਕਾ ਵਤ੍ਤੁਂ, ਉਪ੍ਪਜ੍ਜਿਸ੍ਸਤੀਤਿ ਪਨ ਨ ਸਕ੍ਕਾ, ਤਸ੍ਮਾ ‘‘ਨੋ’’ਤਿ ਏਤ੍ਥ ਪਟਿਸੇਧੋ ਕਤੋ, ‘‘ਯਸ੍ਸ ਵਾ ਪਨ ਚਿਤ੍ਤਂ ਨ ਨਿਰੁਜ੍ਝਿਸ੍ਸਤਿ ਉਪ੍ਪਜ੍ਜਿਸ੍ਸਤਿ, ਤਸ੍ਸ ਚਿਤ੍ਤਂ ਨੁਪ੍ਪਜ੍ਜਤਿ ਨਿਰੁਜ੍ਝਤੀ’’ਤਿ ਪੁਚ੍ਛਾਯ ‘‘ਨਤ੍ਥੀ’’ਤਿ ਪਟਿਕ੍ਖੇਪੋਵ ਵਿਸ੍ਸਜ੍ਜਨਂ. ਯਸ੍ਸ ਹਿ ਚਿਤ੍ਤਂ ਨ ਨਿਰੁਜ੍ਝਿਸ੍ਸਤਿ ਉਪ੍ਪਜ੍ਜਿਸ੍ਸਤਿ, ਸੋ ਚ ਪੁਗ੍ਗਲੋ ਨਤ੍ਥੀਤਿ.

ਯਸ੍ਸ ਚਿਤ੍ਤਂ ਉਪ੍ਪਜ੍ਜਤਿ, ਤਸ੍ਸ ਚਿਤ੍ਤਂ ਉਪ੍ਪਨ੍ਨਨ੍ਤਿ? ਆਮਨ੍ਤਾ, ਯਸ੍ਸ ਵਾ ਪਨ…ਪੇ… ਉਪ੍ਪਜ੍ਜਤੀਤਿ? ਸਬ੍ਬੇਸਂ ਚਿਤ੍ਤਸ੍ਸ ਭਙ੍ਗਕ੍ਖਣੇ ਤਂ ਚਿਤ੍ਤਂ ਉਪ੍ਪਨ੍ਨਂ, ਨੋ ਚ ਉਪ੍ਪਜ੍ਜਤਿ, ਸਬ੍ਬੇਸਂ ਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤੇਸਂ ਚਿਤ੍ਤਂ ਉਪ੍ਪਨ੍ਨਞ੍ਚੇਵ ਉਪ੍ਪਜ੍ਜਤਿ ਚ, ਯਸ੍ਸ ਚਿਤ੍ਤਂ ਨੁਪ੍ਪਜ੍ਜਤਿ, ਤਸ੍ਸ ਚਿਤ੍ਤਂ ਨੁਪ੍ਪਨ੍ਨਨ੍ਤਿ? ਚਿਤ੍ਤਸ੍ਸ ਭਙ੍ਗਕ੍ਖਣੇ ਚਿਤ੍ਤਂ ਨੁਪ੍ਪਜ੍ਜਤਿ, ਨੋ ਚ ਨੁਪ੍ਪਨ੍ਨਂ, ਨਿਰੋਧਸਮਾਪਨ੍ਨਾਨਂ ਅਸਞ੍ਞਸਤ੍ਤਾਨਂ ਚਿਤ੍ਤਂ ਨੁਪ੍ਪਜ੍ਜਤਿ ਚੇਵ ਨੁਪ੍ਪਨ੍ਨਞ੍ਚ. ਯਸ੍ਸ ਵਾ ਪਨ…ਪੇ… ਨੁਪ੍ਪਜ੍ਜਤੀਤਿ? ਆਮਨ੍ਤਾ. ਏਤ੍ਥ ਚ ਉਪ੍ਪਨ੍ਨਨ੍ਤਿ ਉਪ੍ਪਾਦਸਮਙ੍ਗਿਨੋਪੇਤਂ ਨਾਮਂ, ਉਪ੍ਪਜ੍ਜਤੀਤਿ ਚ ਉਪ੍ਪਾਦਸਮਙ੍ਗਿਨੋਵ.

ਯਸ੍ਸ ਚਿਤ੍ਤਂ ਨਿਰੁਜ੍ਝਤਿ, ਤਸ੍ਸ ਚਿਤ੍ਤਂ ਉਪ੍ਪਨ੍ਨਨ੍ਤਿ? ਆਮਨ੍ਤਾ. ਯਸ੍ਸ ਵਾ ਪਨ…ਪੇ… ਨਿਰੁਜ੍ਝਤੀਤਿ? ਭਙ੍ਗਕ੍ਖਣੇ ਤਥਾ. ਯਸ੍ਸ ਚਿਤ੍ਤਂ ਨ ਨਿਰੁਜ੍ਝਤਿ, ਤਸ੍ਸ ਚਿਤ੍ਤਂ ਨੁਪ੍ਪਨ੍ਨਨ੍ਤਿ? ਨਿਰੋਧਸਮਾਪਨ੍ਨਾਦੀਨਂ ਚਿਤ੍ਤਂ. ਯਸ੍ਸ ਵਾ ਪਨ…ਪੇ… ਆਮਨ੍ਤਾ.

ਯਸ੍ਸ ਚਿਤ੍ਤਂ ਉਪ੍ਪਜ੍ਜਤਿ, ਤਸ੍ਸ ਚਿਤ੍ਤਂ ਉਪ੍ਪਜ੍ਜਿਤ੍ਥਾਤਿ? ਆਮਨ੍ਤਾ. ਯਸ੍ਸ ਵਾ ਪਨ…ਪੇ… ਉਪ੍ਪਜ੍ਜਤੀਤਿ? ਸਬ੍ਬੇਸਂ ਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤਥਾ. ਏਤ੍ਥ ਚ ਉਪ੍ਪਾਦਪ੍ਪਤ੍ਤਤ੍ਤਾ ਉਪ੍ਪਜ੍ਜਿਤ੍ਥ, ਤਂ ਅਨਤੀਤਤ੍ਤਾ ਉਪ੍ਪਜ੍ਜਤਿ ਨਾਮਾਤਿ ਅਤ੍ਥੋਤਿ ਅਟ੍ਠਕਥਾਯਂ ਖਣਪਚ੍ਚੁਪ੍ਪਨ੍ਨਵਸੇਨ ਅਤ੍ਥੋ ਵੁਤ੍ਤੋ. ਉਪ੍ਪਜ੍ਜਿਤ੍ਥਾਤਿ ਪਨ ਇਮਸ੍ਸ ਅਤੀਤਚਿਤ੍ਤਕ੍ਖਣਵਸੇਨ ਅਤ੍ਥੇ ਗਯ੍ਹਮਾਨੇ ਏਵ ਉਪਰਿਪਾਲ਼ਿਯਾ ਨ ਵਿਰੁਜ੍ਝਤਿ, ਨ ਅਞ੍ਞਥਾਤਿ ਪਞ੍ਞਾਯਤਿ, ਤਸ੍ਮਾ ਪੁਬ੍ਬਾਪਰਂ ਓਲੋਕੇਤ੍ਵਾ ਪਾਲ਼ਿਅਵਿਰੋਧੇਨ ਅਤ੍ਥੋ ਗਹੇਤਬ੍ਬੋ.

ਯਸ੍ਸ ਚਿਤ੍ਤਂ ਨੁਪ੍ਪਜ੍ਜਤਿ, ਤਸ੍ਸ ਚਿਤ੍ਤਂ ਨੁਪ੍ਪਜ੍ਜਿਤ੍ਥਾਤਿ? ਉਪ੍ਪਜ੍ਜਿਤ੍ਥ. ਯਸ੍ਸ ਵਾ ਪਨ…ਪੇ… ਨੁਪ੍ਪਜ੍ਜਤੀਤਿ? ਨਤ੍ਥਿ. ਯਸ੍ਸ ਚਿਤ੍ਤਂ ਉਪ੍ਪਜ੍ਜਤਿ, ਤਸ੍ਸ ਚਿਤ੍ਤਂ ਉਪ੍ਪਜ੍ਜਿਸ੍ਸਤੀਤਿ? ਪਚ੍ਛਿਮਚਿਤ੍ਤਸਮਙ੍ਗਿਖੀਣਾਸਵਵਿਰਹਿਤਾਨਂ ਚਿਤ੍ਤਂ ਤਥਾ. ਯਸ੍ਸ ਵਾ ਪਨ…ਪੇ… ਉਪ੍ਪਜ੍ਜਤੀਤਿ? ਉਪ੍ਪਾਦਕ੍ਖਣੇ ਤਥਾ. ਯਸ੍ਸ ਚਿਤ੍ਤਂ…ਪੇ… ਨੁਪ੍ਪਜ੍ਜਿਸ੍ਸਤੀਤਿ? ਅਸੇਖਾਨਂ ਪਚ੍ਛਿਮਚਿਤ੍ਤਸ੍ਸ ਭਙ੍ਗਕ੍ਖਣੇ ਤਥਾ. ਯਸ੍ਸ ਵਾ ਪਨ…ਪੇ… ਨੁਪ੍ਪਜ੍ਜਤੀਤਿ? ਪਚ੍ਛਿਮਚਿਤ੍ਤਸ੍ਸ ਭਙ੍ਗਕ੍ਖਣੇ ਤਥਾ. ਯਸ੍ਸ ਚਿਤ੍ਤਂ ਉਪ੍ਪਜ੍ਜਿਤ੍ਥ, ਤਸ੍ਸ ਚਿਤ੍ਤਂ ਉਪ੍ਪਜ੍ਜਿਸ੍ਸਤੀਤਿ? ਪਚ੍ਛਿਮਚਿਤ੍ਤਸਮਙ੍ਗਿਂ ਠਪੇਤ੍ਵਾ ਸੇਸਾਨਂ ਤਥਾ. ਯਸ੍ਸ ਵਾ ਪਨ…ਪੇ… ਆਮਨ੍ਤਾ. ਯਸ੍ਸ ਚਿਤ੍ਤਂ ਨੁਪ੍ਪਜ੍ਜਿਤ੍ਥ, ਤਸ੍ਸ ਚਿਤ੍ਤਂ ਨੁਪ੍ਪਜ੍ਜਿਸ੍ਸਤੀਤਿ? ਨਤ੍ਥਿ. ਯਸ੍ਸ ਵਾ ਪਨ…ਪੇ… ਨੁਪ੍ਪਜ੍ਜਿਤ੍ਥਾਤਿ? ਉਪ੍ਪਜ੍ਜਿਤ੍ਥ.

ਯਸ੍ਸ ਚਿਤ੍ਤਂ ਨਿਰੁਜ੍ਝਤਿ, ਤਸ੍ਸ ਚਿਤ੍ਤਂ ਨਿਰੁਜ੍ਝਿਤ੍ਥਾਤਿ? ਆਮਨ੍ਤਾ. ਯਸ੍ਸ ਵਾ ਪਨ…ਪੇ… ਨਿਰੁਜ੍ਝਤੀਤਿ? ਭਙ੍ਗਕ੍ਖਣੇ ਤਥਾ. ਯਸ੍ਸ ਚਿਤ੍ਤਂ…ਪੇ… ਨ ਨਿਰੁਜ੍ਝਿਤ੍ਥਾਤਿ? ਨਿਰੁਜ੍ਝਿਤ੍ਥ. ਯਸ੍ਸ ਵਾ ਪਨ…ਪੇ… ਨਤ੍ਥਿ. ਯਸ੍ਸ ਚਿਤ੍ਤਂ ਨਿਰੁਜ੍ਝਤਿ, ਤਸ੍ਸ ਚਿਤ੍ਤਂ ਨਿਰੁਜ੍ਝਿਸ੍ਸਤੀਤਿ? ਪਚ੍ਛਿਮਚਿਤ੍ਤਸਮਙ੍ਗਿਂ ਠਪੇਤ੍ਵਾ ਸੇਸਾਨਂ ਚਿਤ੍ਤਸ੍ਸ ਭਙ੍ਗਕ੍ਖਣੇ ਤਥਾ. ਯਸ੍ਸ ਵਾ ਪਨ…ਪੇ… ਸੇਸਾਨਂ ਭਙ੍ਗਕ੍ਖਣੇ ਤਥਾ. ਯਸ੍ਸ ਚਿਤ੍ਤਂ…ਪੇ… ਨਿਰੁਜ੍ਝਿਸ੍ਸਤਿ. ਯਸ੍ਸ ਵਾ ਪਨ…ਪੇ… ਨਿਰੁਜ੍ਝਤਿ.

ਯਸ੍ਸ ਚਿਤ੍ਤਂ ਨਿਰੁਜ੍ਝਿਤ੍ਥ, ਤਸ੍ਸ ਚਿਤ੍ਤਂ ਨਿਰੁਜ੍ਝਿਸ੍ਸਤੀਤਿ? ਪਚ੍ਛਿਮਚਿਤ੍ਤਸ੍ਸ ਭਙ੍ਗਕ੍ਖਣੇ ਠਪੇਤ੍ਵਾ ਸੇਸਾਨਂ ਚਿਤ੍ਤਂ ਤਥਾ. ਯਸ੍ਸ ਵਾ ਪਨ…ਪੇ… ਆਮਨ੍ਤਾ. ਯਸ੍ਸ ਚਿਤ੍ਤਂ ਨ ਨਿਰੁਜ੍ਝਿਤ੍ਥ, ਤਸ੍ਸ ਚਿਤ੍ਤਂ ਨ ਨਿਰੁਜ੍ਝਿਸ੍ਸਤੀਤਿ? ਨਤ੍ਥਿ. ਯਸ੍ਸ ਵਾ ਪਨ…ਪੇ… ਨ ਨਿਰੁਜ੍ਝਿਤ੍ਥਾਤਿ? ਨਿਰੁਜ੍ਝਿਤ੍ਥ.

ਯਸ੍ਸ ਚਿਤ੍ਤਂ ਉਪ੍ਪਜ੍ਜਤਿ, ਤਸ੍ਸ ਚਿਤ੍ਤਂ ਨਿਰੁਜ੍ਝਿਤ੍ਥਾਤਿ? ਆਮਨ੍ਤਾ. ਯਸ੍ਸ ਵਾ ਪਨ…ਪੇ… ਉਪ੍ਪਜ੍ਜਤੀਤਿ? ਸਬ੍ਬੇਸਂ ਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤਥਾ. ਯਸ੍ਸ ਚਿਤ੍ਤਂ ਨੁਪ੍ਪਜ੍ਜਤਿ, ਤਸ੍ਸ ਚਿਤ੍ਤਂ ਨ ਨਿਰੁਜ੍ਝਿਤ੍ਥਾਤਿ? ਨਿਰੁਜ੍ਝਿਤ੍ਥ. ਯਸ੍ਸ ਵਾ ਪਨ…ਪੇ… ਨਤ੍ਥਿ, ਯਸ੍ਸ ਚਿਤ੍ਤਂ ਉਪ੍ਪਜ੍ਜਤਿ, ਤਸ੍ਸ ਚਿਤ੍ਤਂ ਨਿਰੁਜ੍ਝਿਸ੍ਸਤੀਤਿ? ਆਮਨ੍ਤਾ. ਯਸ੍ਸ ਵਾ ਪਨ…ਪੇ… ਉਪ੍ਪਜ੍ਜਤੀਤਿ? ਸਬ੍ਬੇਸਂ ਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤਥਾ. ਯਸ੍ਸ ਚਿਤ੍ਤਂ ਨੁਪ੍ਪਜ੍ਜਤਿ, ਤਸ੍ਸ ਚਿਤ੍ਤਂ ਨ ਨਿਰੁਜ੍ਝਿਸ੍ਸਤੀਤਿ? ਪਚ੍ਛਿਮਚਿਤ੍ਤਸ੍ਸ ਭਙ੍ਗਕ੍ਖਣੇ ਤਥਾ. ਯਸ੍ਸ ਵਾ ਪਨ…ਪੇ… ਆਮਨ੍ਤਾ. ਯਸ੍ਸ ਚਿਤ੍ਤਂ ਉਪ੍ਪਜ੍ਜਿਤ੍ਥ, ਤਸ੍ਸ ਚਿਤ੍ਤਂ ਨਿਰੁਜ੍ਝਿਸ੍ਸਤੀਤਿ? ਨਿਰੁਜ੍ਝਮਾਨਂ ਪਚ੍ਛਿਮਚਿਤ੍ਤਂ ਠਪੇਤ੍ਵਾ ਤਥਾ. ਯਸ੍ਸ ਵਾ ਪਨ…ਪੇ… ਆਮਨ੍ਤਾ. ਯਸ੍ਸ ਚਿਤ੍ਤਂ ਨੁਪ੍ਪਜ੍ਜਿਤ੍ਥ, ਤਸ੍ਸ ਚਿਤ੍ਤਂ ਨ ਨਿਰੁਜ੍ਝਿਸ੍ਸਤੀਤਿ? ਨਤ੍ਥਿ. ਯਸ੍ਸ ਵਾ ਪਨ…ਪੇ… ਨੁਪ੍ਪਜ੍ਜਿਤ੍ਥਾਤਿ? ਉਪ੍ਪਜ੍ਜਿਤ੍ਥ.

ਯਸ੍ਸ ਚਿਤ੍ਤਂ ਉਪ੍ਪਜ੍ਜਤਿ, ਤਸ੍ਸ ਚਿਤ੍ਤਂ ਨ ਨਿਰੁਜ੍ਝਤੀਤਿ? ਆਮਨ੍ਤਾ. ਯਸ੍ਸ ਵਾ ਪਨ…ਪੇ… ਉਪ੍ਪਜ੍ਜਤੀਤਿ? ਸਬ੍ਬੇਸਂ ਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤਥਾ. ਯਸ੍ਸ ਚਿਤ੍ਤਂ ਨੁਪ੍ਪਜ੍ਜਤਿ, ਤਸ੍ਸ ਚਿਤ੍ਤਂ ਨਿਰੁਜ੍ਝਤੀਤਿ? ਸਬ੍ਬੇਸਂ ਚਿਤ੍ਤਸ੍ਸ ਭਙ੍ਗਕ੍ਖਣੇ ਤਥਾ. ਯਸ੍ਸ ਵਾ ਪਨ…ਪੇ… ਨੁਪ੍ਪਜ੍ਜਤੀਤਿ? ਆਮਨ੍ਤਾ.

ਯਸ੍ਸ ਚਿਤ੍ਤਂ ਉਪ੍ਪਜ੍ਜਮਾਨਂ, ਤਸ੍ਸ ਚਿਤ੍ਤਂ ਉਪ੍ਪਨ੍ਨਨ੍ਤਿ? ਆਮਨ੍ਤਾ. ਯਸ੍ਸ ਵਾ ਪਨ…ਪੇ… ਉਪ੍ਪਜ੍ਜਮਾਨਨ੍ਤਿ? ਸਬ੍ਬੇਸਂ ਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤਥਾ. ਯਸ੍ਸ ਚਿਤ੍ਤਂ ਨੁਪ੍ਪਜ੍ਜਮਾਨਂ, ਤਸ੍ਸ ਚਿਤ੍ਤਂ ਨੁਪ੍ਪਨ੍ਨਨ੍ਤਿ? ਨਿਰੋਧਸਮਾਪਨ੍ਨਾਦੀਨਂ ਚਿਤ੍ਤਂ ਤਥਾ. ਯਸ੍ਸ ਵਾ ਪਨ…ਪੇ… ਆਮਨ੍ਤਾ.

ਯਸ੍ਸ ਚਿਤ੍ਤਂ ਨਿਰੁਜ੍ਝਮਾਨਂ, ਤਸ੍ਸ ਚਿਤ੍ਤਂ ਉਪ੍ਪਨ੍ਨਨ੍ਤਿ? ਆਮਨ੍ਤਾ. ਯਸ੍ਸ ਵਾ ਪਨ…ਪੇ… ਭਙ੍ਗਕ੍ਖਣੇ ਤਥਾ. ਯਸ੍ਸ ਚਿਤ੍ਤਂ ਨ ਨਿਰੁਜ੍ਝਮਾਨਂ, ਤਸ੍ਸ ਚਿਤ੍ਤਂ ਨੁਪ੍ਪਨ੍ਨਨ੍ਤਿ? ਨਿਰੋਧਸਮਾਪਨ੍ਨਾਦੀਨਂ ਚਿਤ੍ਤਂ ਤਥਾ. ਯਸ੍ਸ ਵਾ ਪਨ…ਪੇ… ਆਮਨ੍ਤਾ.

ਯਸ੍ਸ ਚਿਤ੍ਤਂ ਉਪ੍ਪਨ੍ਨਂ, ਤਸ੍ਸ ਚਿਤ੍ਤਂ ਉਪ੍ਪਜ੍ਜਿਤ੍ਥਾਤਿ? ਆਮਨ੍ਤਾ. ਯਸ੍ਸ ਵਾ ਪਨ…ਪੇ… ਉਪ੍ਪਨ੍ਨਨ੍ਤਿ? ਚਿਤ੍ਤਸਮਙ੍ਗੀਨਂ ਤਥਾ. ਯਸ੍ਸ ਚਿਤ੍ਤਂ ਨੁਪ੍ਪਨ੍ਨਂ, ਤਸ੍ਸ ਚਿਤ੍ਤਂ ਨੁਪ੍ਪਜ੍ਜਿਤ੍ਥਾਤਿ? ਉਪ੍ਪਜ੍ਜਿਤ੍ਥ. ਯਸ੍ਸ ਵਾ ਪਨ…ਪੇ… ਨੁਪ੍ਪਨ੍ਨਨ੍ਤਿ? ਨਤ੍ਥਿ…ਪੇ… ਯਸ੍ਸ ਚਿਤ੍ਤਂ ਨੁਪ੍ਪਨ੍ਨਂ, ਤਸ੍ਸ ਚਿਤ੍ਤਂ ਨੁਪ੍ਪਜ੍ਜਿਸ੍ਸਤੀਤਿ? ਉਪ੍ਪਜ੍ਜਿਸ੍ਸਤਿ. ਯਸ੍ਸ ਵਾ ਪਨ…ਪੇ… ਨੁਪ੍ਪਨ੍ਨਨ੍ਤਿ? ਉਪ੍ਪਨ੍ਨਂ.

ਯਸ੍ਸ ਚਿਤ੍ਤਂ ਉਪ੍ਪਜ੍ਜਿਤ੍ਥ ਨੋ ਚ ਤਸ੍ਸ ਚਿਤ੍ਤਂ ਉਪ੍ਪਨ੍ਨਂ, ਤਸ੍ਸ ਚਿਤ੍ਤਂ ਉਪ੍ਪਜ੍ਜਿਸ੍ਸਤੀਤਿ? ਆਮਨ੍ਤਾ. ਯਸ੍ਸ ਵਾ ਪਨ ਚਿਤ੍ਤਂ ਉਪ੍ਪਜ੍ਜਿਸ੍ਸਤਿ ਨੋ ਚ ਤਸ੍ਸ ਚਿਤ੍ਤਂ ਉਪ੍ਪਨ੍ਨਂ, ਤਸ੍ਸ ਚਿਤ੍ਤਂ ਉਪ੍ਪਜ੍ਜਿਤ੍ਥਾਤਿ? ਆਮਨ੍ਤਾ. ਏਤ੍ਥ ‘‘ਨੋ ਚ ਤਸ੍ਸ ਚਿਤ੍ਤਂ ਨੁਪ੍ਪਨ੍ਨ’’ਨ੍ਤਿ ਇਦਂ ਅਸਞ੍ਞਾਦਿਅਚਿਤ੍ਤਕੇ ਸਨ੍ਧਾਯ ਵੁਤ੍ਤਂ. ਤੇਸਂ ਨਿਯਮੇਨ ਚਿਤ੍ਤੁਪ੍ਪਤ੍ਤਿਯਾ ਅਭਾਵਤੋ ‘‘ਆਮਨ੍ਤਾ’’ਤਿ ਉਭਯਤ੍ਥ ਵਿਸ੍ਸਜ੍ਜਨਂ ਵੁਤ੍ਤਂ. ਅਯਞ੍ਚ ਵਾਰੋ ਕਾਲਤ੍ਤਯੇ ਗਹੇਤ੍ਵਾ ਸਮਤ੍ਥਿਤੋਤਿ ਗਹੇਤਬ੍ਬੋ.

‘‘ਯਸ੍ਸ ਚਿਤ੍ਤਂ ਨੁਪ੍ਪਜ੍ਜਿਤ੍ਥ ਨੋ ਚ ਤਸ੍ਸ ਚਿਤ੍ਤਂ ਨੁਪ੍ਪਨ੍ਨਂ, ਤਸ੍ਸ ਚਿਤ੍ਤਂ ਨੁਪ੍ਪਜ੍ਜਿਸ੍ਸਤੀਤਿ? ਨਤ੍ਥਿ. ਯਸ੍ਸ ਵਾ ਪਨ ਚਿਤ੍ਤਂ ਨੁਪ੍ਪਜ੍ਜਿਸ੍ਸਤਿ ਨੋ ਚ ਤਸ੍ਸ ਚਿਤ੍ਤਂ ਨੁਪ੍ਪਨ੍ਨਂ, ਤਸ੍ਸ ਚਿਤ੍ਤਂ ਨੁਪ੍ਪਜ੍ਜਿਤ੍ਥਾਤਿ? ਉਪ੍ਪਜ੍ਜਿਤ੍ਥ.

ਉਪ੍ਪਨ੍ਨਂ ਉਪ੍ਪਜ੍ਜਮਾਨਨ੍ਤਿ? ਉਪ੍ਪਾਦਕ੍ਖਣੇ ਚਿਤ੍ਤਂ ਤਥਾ. ਉਪ੍ਪਜ੍ਜਮਾਨਂ ਉਪ੍ਪਨ੍ਨਨ੍ਤਿ? ਆਮਨ੍ਤਾ. ਨੁਪ੍ਪਨ੍ਨਂ ਨੁਪ੍ਪਜ੍ਜਮਾਨਨ੍ਤਿ? ਆਮਨ੍ਤਾ. ਨੁਪ੍ਪਜ੍ਜਮਾਨਂ ਨੁਪ੍ਪਨ੍ਨਨ੍ਤਿ? ਅਤੀਤਾਨਾਗਤਚਿਤ੍ਤਂ ਤਥਾ.

ਨਿਰੁਦ੍ਧਂ ਨਿਰੁਜ੍ਝਮਾਨਨ੍ਤਿ? ਨੋ, ਨਿਰੁਜ੍ਝਮਾਨਂ ਨਿਰੁਦ੍ਧਨ੍ਤਿ? ਨੋ, ਨਨਿਰੁਦ੍ਧਂ ਨਨਿਰੁਜ੍ਝਮਾਨਨ੍ਤਿ? ਉਪ੍ਪਾਦਕ੍ਖਣੇ ਅਨਾਗਤਞ੍ਚ ਚਿਤ੍ਤਂ ਤਥਾ. ਨਨਿਰੁਜ੍ਝਮਾਨਂ ਨਨਿਰੁਦ੍ਧਨ੍ਤਿਪਿ ਤਥੇਵ.

ਯਸ੍ਸ ਚਿਤ੍ਤਂ ਉਪ੍ਪਜ੍ਜਮਾਨਂ ਖਣਂ ਖਣਂ ਵੀਤਿਕ੍ਕਨ੍ਤਂ ਅਤਿਕ੍ਕਨ੍ਤਕਾਲਂ, ਨਿਰੁਜ੍ਝਮਾਨਂ ਖਣਂ ਖਣਂ ਵੀਤਿਕ੍ਕਨ੍ਤਂ ਅਤਿਕ੍ਕਨ੍ਤਕਾਲਂ, ਤਸ੍ਸ ਚਿਤ੍ਤਨ੍ਤਿ? ਨੋ ਚ ਭਙ੍ਗਕ੍ਖਣਂ ਵੀਤਿਕ੍ਕਨ੍ਤਂ, ਅਤੀਤਂ ਚਿਤ੍ਤਂ ਤਦੁਭਯਂ ਵੀਤਿਕ੍ਕਨ੍ਤਂ, ਯਸ੍ਸ ਵਾ ਪਨ ਚਿਤ੍ਤਂ ਨਿਰੁਜ੍ਝਮਾਨਂ ਖਣਂ ਖਣਂ ਵੀਤਿਕ੍ਕਨ੍ਤਂ ਅਤਿਕ੍ਕਨ੍ਤਕਾਲਂ, ਉਪ੍ਪਜ੍ਜਮਾਨਂ ਖਣਂ ਖਣਂ ਵੀਤਿਕ੍ਕਨ੍ਤਂ ਅਤਿਕ੍ਕਨ੍ਤਕਾਲਂ, ਤਸ੍ਸ ਚਿਤ੍ਤਨ੍ਤਿ? ਅਤੀਤਂ ਚਿਤ੍ਤ’’ਨ੍ਤਿ ਇਮਿਨਾ ਨਯੇਨ ਪੁਗ੍ਗਲਵਾਰੇ ਸਬ੍ਬਤ੍ਥ ਵਿਸ੍ਸਜ੍ਜਨਨਯੋ ਵੇਦਿਤਬ੍ਬੋ.

ਤਤ੍ਥ ਉਪ੍ਪਜ੍ਜਮਾਨਂ ਖਣਨ੍ਤਿ ਉਪ੍ਪਜ੍ਜਮਾਨਸ੍ਸ ਖਣਂ, ਉਪ੍ਪਾਦਕ੍ਖਣਨ੍ਤਿ ਅਤ੍ਥੋ. ਖਣਂ ਵੀਤਿਕ੍ਕਨ੍ਤਂ ਅਤਿਕ੍ਕਨ੍ਤਕਾਲਨ੍ਤਿ ਨ ਚਿਰਂ ਵੀਤਿਕ੍ਕਨ੍ਤਂ, ਤਮੇਵ ਪਨ ਉਪ੍ਪਾਦਕ੍ਖਣਂ ਵੀਤਿਕ੍ਕਨ੍ਤਂ ਹੁਤ੍ਵਾ ਅਤਿਕ੍ਕਨ੍ਤਕਾਲਨ੍ਤਿ ਸਙ੍ਖਂ ਗਚ੍ਛਤਿ, ਨਿਰੁਜ੍ਝਮਾਨਂ ਖਣਨ੍ਤਿ ਨਿਰੁਜ੍ਝਮਾਨਸ੍ਸ ਖਣਂ, ਭਙ੍ਗਕ੍ਖਣਨ੍ਤਿ ਅਤ੍ਥੋ. ਖਣਂ ਵੀਤਿਕ੍ਕਨ੍ਤਂ ਅਤਿਕ੍ਕਨ੍ਤਕਾਲਨ੍ਤਿ ਕਿਂ ਤਸ੍ਸ ਚਿਤ੍ਤਂ ਏਵਂ ਨਿਰੋਧਕ੍ਖਣਮ੍ਪਿ ਵੀਤਿਕ੍ਕਨ੍ਤਂ ਹੁਤ੍ਵਾ ਅਤਿਕ੍ਕਨ੍ਤਕਾਲਂ ਨਾਮ ਹੋਤੀਤਿ ਪੁਚ੍ਛਤਿ. ਯਸ੍ਸ ਭਙ੍ਗਕ੍ਖਣੇ ਚਿਤ੍ਤਂ ਉਪ੍ਪਾਦਕ੍ਖਣਂ ਖਣਂ ਵੀਤਿਕ੍ਕਨ੍ਤਂ ਹੁਤ੍ਵਾ ਅਤਿਕ੍ਕਨ੍ਤਕਾਲਂ ਨਾਮ ਹੋਤਿ, ਨਿਰੋਧਕ੍ਖਣਂ ਵੀਤਿਕ੍ਕਨ੍ਤਂ ਹੁਤ੍ਵਾ ਅਤਿਕ੍ਕਨ੍ਤਕਾਲਂ ਨਾਮ ਹੋਤਿ, ਅਤੀਤਂ ਪਨ ਚਿਤ੍ਤਂ ਉਭੋਪਿ ਖਣੇ ਖਣਂ ਵੀਤਿਕ੍ਕਨ੍ਤਂ ਹੁਤ੍ਵਾ ਅਤਿਕ੍ਕਨ੍ਤਕਾਲਂ ਨਾਮ ਹੋਤੀਤਿ ਅਤੀਤਚਿਤ੍ਤਵਸੇਨ ਵਿਸ੍ਸਜ੍ਜਨਂ ਕਤਂ. ਇਮਿਨਾਵ ਉਪਾਯੇਨ ਉਪਰਿਮੇਸੁ ਅਤ੍ਥਧਮ੍ਮਵਾਰਾਦੀਸੁ ਚ ਸਬ੍ਬਵਿਸ੍ਸਜ੍ਜਨੇਸੁ ਅਤ੍ਥੋ ਵੇਦਿਤਬ੍ਬੋ. ਅਯਂ ਅਤਿਕ੍ਕਨ੍ਤਕਾਲਵਾਰੇ ਨਯੋ.

ਯਂ ਚਿਤ੍ਤਂ ਉਪ੍ਪਜ੍ਜਤਿ ਨਨਿਰੁਜ੍ਝਤਿ, ਤਂ ਚਿਤ੍ਤਂ ਨਿਰੁਜ੍ਝਿਸ੍ਸਤਿ ਨੁਪ੍ਪਜ੍ਜਿਸ੍ਸਤੀਤਿ? ਆਮਨ੍ਤਾ. ਯਂ ਵਾ ਪਨ…ਪੇ… ਆਮਨ੍ਤਾ. ਯਂ ਚਿਤ੍ਤਂ ਨੁਪ੍ਪਜ੍ਜਤਿ ਨਿਰੁਜ੍ਝਤਿ, ਤਂ ਚਿਤ੍ਤਂ ਨਨਿਰੁਜ੍ਝਿਸ੍ਸਤਿ ਉਪ੍ਪਜ੍ਜਿਸ੍ਸਤੀਤਿ? ਨੋ. ਯਂ ਵਾ ਪਨ ਚਿਤ੍ਤਂ ਨਨਿਰੁਜ੍ਝਿਸ੍ਸਤਿ ਉਪ੍ਪਜ੍ਜਿਸ੍ਸਤਿ, ਤਂ ਚਿਤ੍ਤਂ ਨੁਪ੍ਪਜ੍ਜਤਿ ਨਿਰੁਜ੍ਝਤੀਤਿ? ਨਤ੍ਥਿ.

ਯਂ ਚਿਤ੍ਤਂ ਉਪ੍ਪਜ੍ਜਤਿ, ਤਂ ਚਿਤ੍ਤਂ ਉਪ੍ਪਨ੍ਨਨ੍ਤਿ? ਆਮਨ੍ਤਾ. ਯਂ ਵਾ ਪਨ…ਪੇ… ਉਪ੍ਪਜ੍ਜਤੀਤਿ? ਉਪ੍ਪਾਦਕ੍ਖਣੇ ਚਿਤ੍ਤਂ ਤਥਾ, ਏਵਂ ਪਟਿਲੋਮਪੁਚ੍ਛਾਸੁਪਿ ਤਤੋ ਸੇਸਾਸੁਪਿ. ‘‘ਯਂ ਚਿਤ੍ਤਂ ਨੁਪ੍ਪਜ੍ਜਤਿ, ਤਂ ਚਿਤ੍ਤਂ ਨੁਪ੍ਪਨ੍ਨਨ੍ਤਿ? ਅਤੀਤਾਨਾਗਤਂ ਚਿਤ੍ਤਂ ਤਥਾ. ਯਂ ਵਾ ਪਨ…ਪੇ… ਆਮਨ੍ਤਾ…ਪੇ… ਭਙ੍ਗਕ੍ਖਣੇ ਚਿਤ੍ਤ’’ਨ੍ਤਿਆਦਿਨਾ, ‘‘ਯਂ ਚਿਤ੍ਤਂ ਉਪ੍ਪਜ੍ਜਤਿ, ਤਂ ਚਿਤ੍ਤਂ ਉਪ੍ਪਜ੍ਜਿਤ੍ਥਾਤਿ? ਨੋ. ਯਂ ਚਿਤ੍ਤਂ ਨੁਪ੍ਪਜ੍ਜਤਿ, ਤਂ ਚਿਤ੍ਤਂ ਨੁਪ੍ਪਜ੍ਜਿਤ੍ਥਾਤਿ? ਭਙ੍ਗਕ੍ਖਣੇ ਚਿਤ੍ਤਂ ਅਨਾਗਤਞ੍ਚਾ’’ਤਿਆਦਿਨਾ, ‘‘ਯਂ ਚਿਤ੍ਤਂ ਉਪ੍ਪਜ੍ਜਤਿ, ਤਂ ਚਿਤ੍ਤਂ ਉਪ੍ਪਜ੍ਜਿਸ੍ਸਤੀਤਿ? ਨੋ. ਯਂ ਵਾ ਪਨ…ਪੇ… ਨੋ, ਯਂ ਚਿਤ੍ਤਂ ਨੁਪ੍ਪਜ੍ਜਤਿ, ਤਂ ਚਿਤ੍ਤਂ ਨੁਪ੍ਪਜ੍ਜਿਸ੍ਸਤੀਤਿ? ਅਨਾਗਤਂ ਚਿਤ੍ਤਂ ਨੁਪ੍ਪਜ੍ਜਤਿ, ਨੋ ਚ ਤਂ ਚਿਤ੍ਤਂ ਨੁਪ੍ਪਜ੍ਜਿਸ੍ਸਤਿ, ਭਙ੍ਗਕ੍ਖਣੇ ਚਿਤ੍ਤਂ ਅਤੀਤਂ ਚਿਤ੍ਤ’’ਨ੍ਤਿਆਦਿਨਾ ਚ, ‘‘ਯਂ ਚਿਤ੍ਤਂ ਉਪ੍ਪਜ੍ਜਿਤ੍ਥ, ਤਂ ਚਿਤ੍ਤਂ ਉਪ੍ਪਜ੍ਜਿਸ੍ਸਤੀਤਿ? ਨੋ. ਯਂ ਵਾ ਪਨ…ਪੇ… ਨੋ, ਯਂ ਚਿਤ੍ਤਂ ਨੁਪ੍ਪਜ੍ਜਿਤ੍ਥ, ਤਂ ਚਿਤ੍ਤਂ ਨੁਪ੍ਪਜ੍ਜਿਸ੍ਸਤੀਤਿ? ਅਨਾਗਤਂ ਚਿਤ੍ਤ’’ਨ੍ਤਿਆਦਿਨਾ ਚ,

‘‘ਯਂ ਚਿਤ੍ਤਂ ਨਿਰੁਜ੍ਝਤਿ, ਤਂ ਚਿਤ੍ਤਂ ਨਿਰੁਜ੍ਝਿਤ੍ਥਾਤਿ? ਨੋ’’ਤਿਆਦਿਨਾ ਚ, ‘‘ਯਂ ਚਿਤ੍ਤਂ ਉਪ੍ਪਜ੍ਜਤਿ, ਤਂ ਚਿਤ੍ਤਂ ਨਿਰੁਜ੍ਝਿਤ੍ਥਾਤਿ? ਨੋ’’ਤਿਆਦਿਨਾ ਚ, ‘‘ਯਂ ਚਿਤ੍ਤਂ ਉਪ੍ਪਜ੍ਜਤਿ, ਤਂ ਚਿਤ੍ਤਂ ਨਿਰੁਜ੍ਝਿਸ੍ਸਤੀਤਿ? ਆਮਨ੍ਤਾ’’ਤਿਆਦਿਨਾ ਚ, ‘‘ਯਂ ਚਿਤ੍ਤਂ ਉਪ੍ਪਜ੍ਜਿਤ੍ਥ, ਤਂ ਚਿਤ੍ਤਂ ਨਿਰੁਜ੍ਝਿਸ੍ਸਤੀਤਿ? ਨੋ’’ਤਿਆਦਿਨਾ ਚ,

‘‘ਯਂ ਚਿਤ੍ਤਂ ਉਪ੍ਪਜ੍ਜਮਾਨਂ, ਤਂ ਚਿਤ੍ਤਂ ਉਪ੍ਪਨ੍ਨਨ੍ਤਿ? ਆਮਨ੍ਤਾ. ਯਂ ਵਾ ਪਨ…ਪੇ… ਉਪ੍ਪਜ੍ਜਮਾਨਨ੍ਤਿ…ਪੇ… ਉਪ੍ਪਾਦਕ੍ਖਣੇ ਚਿਤ੍ਤ’’ਨ੍ਤਿਆਦਿਨਾ ਚ, ‘‘ਯਂ ਚਿਤ੍ਤਂ ਨਿਰੁਜ੍ਝਮਾਨਂ, ਤਂ ਚਿਤ੍ਤਂ ਉਪ੍ਪਨ੍ਨਨ੍ਤਿ? ਆਮਨ੍ਤਾ’’ਤਿਆਦਿਨਾ ਚ, ‘‘ਯਂ ਚਿਤ੍ਤਂ ਉਪ੍ਪਨ੍ਨਂ, ਤਂ ਚਿਤ੍ਤਂ ਉਪ੍ਪਜ੍ਜਿਤ੍ਥਾਤਿ? ਨੋ. ਯਂ ਵਾ ਪਨ…ਪੇ… ਨੋ’’ਤਿਆਦਿਨਾ ਚ,

‘‘ਯਂ ਚਿਤ੍ਤਂ ਉਪ੍ਪਜ੍ਜਿਤ੍ਥ ਨੋ ਚ ਤਂ ਚਿਤ੍ਤਂ ਉਪ੍ਪਨ੍ਨਂ, ਤਂ ਚਿਤ੍ਤਂ ਉਪ੍ਪਜ੍ਜਿਸ੍ਸਤੀਤਿ? ਨੋ. ਯਂ ਵਾ ਪਨ…ਪੇ… ਨੋ. ਯਂ ਚਿਤ੍ਤਂ ਨੁਪ੍ਪਜ੍ਜਿਤ੍ਥ ਨੋ ਚ ਤਂ ਚਿਤ੍ਤਂ ਨੁਪ੍ਪਨ੍ਨਂ, ਤਂ ਚਿਤ੍ਤਂ ਨੁਪ੍ਪਜ੍ਜਿਸ੍ਸਤੀਤਿ? ਆਮਨ੍ਤਾ’’ਤਿਆਦਿਨਾ ਚ, ‘‘ਉਪ੍ਪਨ੍ਨਂ ਉਪ੍ਪਜ੍ਜਮਾਨਨ੍ਤਿ…ਪੇ… ਉਪ੍ਪਾਦਕ੍ਖਣੇ ਉਪ੍ਪਨ੍ਨਞ੍ਚੇਵ ਉਪ੍ਪਜ੍ਜਮਾਨਞ੍ਚ. ਉਪ੍ਪਜ੍ਜਮਾਨਂ ਉਪ੍ਪਨ੍ਨਨ੍ਤਿ? ਆਮਨ੍ਤਾ’’ਤਿਆਦਿਨਾ ਚ, ‘‘ਨਿਰੁਦ੍ਧਂ ਨਿਰੁਜ੍ਝਮਾਨਨ੍ਤਿ? ਨੋ’’ਤਿਆਦਿਨਾ ਚ,

‘‘ਯਂ ਚਿਤ੍ਤਂ ਉਪ੍ਪਜ੍ਜਮਾਨਂ ਖਣਂ ਖਣਂ ਵੀਤਿਕ੍ਕਨ੍ਤਂ ਅਤਿਕ੍ਕਨ੍ਤਕਾਲਂ, ਨਿਰੁਜ੍ਝਮਾਨਂ ਖਣਂ ਖਣਂ ਵੀਤਿਕ੍ਕਨ੍ਤਂ ਅਤਿਕ੍ਕਨ੍ਤਕਾਲਂ, ਤਂ ਚਿਤ੍ਤਨ੍ਤਿ…ਪੇ… ਅਤੀਤਂ ਚਿਤ੍ਤ’’ਨ੍ਤਿਆਦਿਨਾ ਚ ਧਮ੍ਮਵਾਰੇ,

‘‘ਯਸ੍ਸ ਯਂ ਚਿਤ੍ਤਂ ਉਪ੍ਪਜ੍ਜਤਿ ਨ ਨਿਰੁਜ੍ਝਤਿ, ਤਸ੍ਸ ਤਂ ਚਿਤ੍ਤਂ ਨਿਰੁਜ੍ਝਿਸ੍ਸਤਿ ਨੁਪ੍ਪਜ੍ਜਿਸ੍ਸਤੀਤਿ? ਆਮਨ੍ਤਾ’’ਤਿਆਦਿਨਾ ਚ ਪੁਗ੍ਗਲਧਮ੍ਮਵਾਰੇ ਚ, ਸਰਾਗਾਦਿਪਦੇਹਿ, ਕੁਸਲਾਦਿਪਦੇਹਿ ਚ ਮਿਸ੍ਸੇਸੁ ਸਬ੍ਬਵਾਰੇਸੁ ਚ ਪੁਚ੍ਛਾਸੁ ਹੇਟ੍ਠਾ ਵੁਤ੍ਤਾਨੁਸਾਰੇਨ ਵਿਸ੍ਸਜ੍ਜਨਨਯੋ ਵੇਦਿਤਬ੍ਬੋ. ਅਯਂ ਚਿਤ੍ਤਯਮਕਮਾਤਿਕਤ੍ਥਸਂਵਣ੍ਣਨਾਨਯੋ.

ਧਮ੍ਮਯਮਕਮਾਤਿਕਤ੍ਥਵਣ੍ਣਨਾ

ਧਮ੍ਮਯਮਕਮਾਤਿਕਾਯ ਪਨ ਖਨ੍ਧਯਮਕੇ ਵੁਤ੍ਤਨਯੇਨੇਵ ਪਾਲ਼ਿਵਵਤ੍ਥਾਨਂ ਵੇਦਿਤਬ੍ਬਂ. ‘‘ਯੋ ਕੁਸਲਂ ਧਮ੍ਮਂ ਭਾਵੇਤਿ, ਸੋ ਅਕੁਸਲਂ ਧਮ੍ਮਂ ਪਜਹਤੀ’’ਤਿ ਆਗਤਤ੍ਤਾ ਪਨੇਤ੍ਥ ਪਰਿਞ੍ਞਾਵਾਰੋ ਭਾਵਨਾਵਾਰੋ ਨਾਮ. ਤਤ੍ਥ ਯਸ੍ਮਾ ਅਬ੍ਯਾਕਤੋ ਧਮ੍ਮੋ ਨੇਵ ਭਾਵੇਤਬ੍ਬੋ ਨ ਪਹਾਤਬ੍ਬੋ, ਤਸ੍ਮਾ ਪਦਮੇਵ ਨ ਉਦ੍ਧਟਨ੍ਤਿ ਵੇਦਿਤਬ੍ਬਂ. ਪੁਚ੍ਛਾਵਿਸ੍ਸਜ੍ਜਨੇ ਪਨੇਤ੍ਥ ‘‘ਕੁਸਲਾਕੁਸਲਾ ਧਮ੍ਮਾਤਿ? ਆਮਨ੍ਤਾ’’ਤਿਆਦਿਨਾ, ‘‘ਧਮ੍ਮਾ ਅਕੁਸਲਾ ਧਮ੍ਮਾਤਿ? ਅਕੁਸਲਾ ਧਮ੍ਮਾ ਧਮ੍ਮਾ ਚੇਵ ਅਕੁਸਲਾ ਧਮ੍ਮਾ ਚ, ਅਵਸੇਸਾ ਧਮ੍ਮਾ ਨ ਅਕੁਸਲਾ ਧਮ੍ਮਾ’’ਤਿਆਦਿਨਾ ਚ ਪਣ੍ਣਤ੍ਤਿਵਾਰੇ ਵਿਸ੍ਸਜ੍ਜਨਨਯੋ ਞਾਤਬ੍ਬੋ.

‘‘ਯਸ੍ਸ ਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ, ਤਸ੍ਸ ਅਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤੀਤਿ? ਨੋ. ਯਸ੍ਸ ਵਾ ਪਨ…ਪੇ… ਯਸ੍ਸ ਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ, ਤਸ੍ਸ ਅਬ੍ਯਾਕਤਾ ਧਮ੍ਮਾ ਉਪ੍ਪਜ੍ਜਨ੍ਤੀਤਿ? ਪਞ੍ਚਵੋਕਾਰੇ ਕੁਸਲਾਨਂ ਉਪ੍ਪਾਦਕ੍ਖਣੇ…ਪੇ… ਉਪ੍ਪਜ੍ਜਨ੍ਤੀ’’ਤਿਆਦਿਨਾ ਚ, ‘‘ਯਤ੍ਥ ਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ, ਤਤ੍ਥ ਅਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤੀਤਿ? ਆਮਨ੍ਤਾ…ਪੇ… ਤਤ੍ਥ ਅਬ੍ਯਾਕਤਾ ਧਮ੍ਮਾ ਉਪ੍ਪਜ੍ਜਨ੍ਤੀਤਿ? ਆਮਨ੍ਤਾ. ਯਤ੍ਥ ਵਾ ਪਨ ਅਬ੍ਯਾਕਤਾ ਧਮ੍ਮਾ ਉਪ੍ਪਜ੍ਜਨ੍ਤਿ, ਤਤ੍ਥ ਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤੀਤਿ …ਪੇ… ਚਤੁਵੋਕਾਰੇ…ਪੇ… ਉਪ੍ਪਜ੍ਜਨ੍ਤੀ’’ਤਿਆਦਿਨਾ ਚ, ‘‘ਯਸ੍ਸ ਯਤ੍ਥ ਕੁਸਲਾ ਧਮ੍ਮਾ…ਪੇ… ਉਪ੍ਪਜ੍ਜਨ੍ਤੀਤਿ? ਨੋ’’ਤਿਆਦਿਨਾ ਚ,

‘‘ਯਸ੍ਸ ਕੁਸਲਾ ਧਮ੍ਮਾ ਨੁਪ੍ਪਜ੍ਜਨ੍ਤਿ, ਤਸ੍ਸ ਅਕੁਸਲਾ ਧਮ੍ਮਾ ਨੁਪ੍ਪਜ੍ਜਨ੍ਤੀਤਿ…ਪੇ… ਸਬ੍ਬੇਸਂ ਚਿਤ੍ਤਸ੍ਸ ਭਙ੍ਗਕ੍ਖਣੇ ਅਬ੍ਯਾਕਤਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਨਿਰੋਧਸਮਾਪਨ੍ਨਾਨਂ ਅਸਞ੍ਞਸਤ੍ਤਾਨਂ ਤੇਸਂ ਕੁਸਲਾ ਚ ਧਮ੍ਮਾ ਨੁਪ੍ਪਜ੍ਜਨ੍ਤਿ, ਅਕੁਸਲਾ ਚ ਧਮ੍ਮਾ ਨੁਪ੍ਪਜ੍ਜਨ੍ਤੀ’’ਤਿਆਦਿਨਾ ਚ, ‘‘ਯਸ੍ਸ ਕੁਸਲਾ ਧਮ੍ਮਾ ਨੁਪ੍ਪਜ੍ਜਨ੍ਤਿ, ਤਸ੍ਸ ਅਬ੍ਯਾਕਤਾ ਧਮ੍ਮਾ ਨੁਪ੍ਪਜ੍ਜਨ੍ਤੀਤਿ…ਪੇ… ਸਬ੍ਬੇਸਂ ਚਵਨ੍ਤਾਨਂ ਪਵਤ੍ਤੇ ਚਿਤ੍ਤਸ੍ਸ ਭਙ੍ਗਕ੍ਖਣੇ ਆਰੁਪ੍ਪੇ ਅਕੁਸਲਾਨਂ ਉਪ੍ਪਾਦਕ੍ਖਣੇ ਚ ਨੁਪ੍ਪਜ੍ਜਨ੍ਤੀ’’ਤਿਆਦਿਨਾ ਚ, ‘‘ਯਤ੍ਥ ਕੁਸਲਾ ਧਮ੍ਮਾ ਨੁਪ੍ਪਜ੍ਜਨ੍ਤਿ, ਤਤ੍ਥ ਅਕੁਸਲਾ ਧਮ੍ਮਾ ਨੁਪ੍ਪਜ੍ਜਨ੍ਤੀਤਿ? ਆਮਨ੍ਤਾ…ਪੇ… ਤਤ੍ਥ ਅਬ੍ਯਾਕਤਾ ਧਮ੍ਮਾ ਨੁਪ੍ਪਜ੍ਜਨ੍ਤੀਤਿ? ਉਪ੍ਪਜ੍ਜਨ੍ਤਿ. ਯਤ੍ਥ ਵਾ ਪਨ ਅਬ੍ਯਾਕਤਾ ਧਮ੍ਮਾ ਨੁਪ੍ਪਜ੍ਜਨ੍ਤਿ, ਤਤ੍ਥ ਅਕੁਸਲਾ ਧਮ੍ਮਾ ਨੁਪ੍ਪਜ੍ਜਨ੍ਤੀਤਿ? ਨਤ੍ਥੀ’’ਤਿਆਦਿਨਾ ਚ ਉਪ੍ਪਾਦਵਾਰੇ,

‘‘ਯਸ੍ਸ ਕੁਸਲਾ ਧਮ੍ਮਾ ਨਿਰੁਜ੍ਝਨ੍ਤਿ, ਤਸ੍ਸ ਅਕੁਸਲਾ ਧਮ੍ਮਾ ਨਿਰੁਜ੍ਝਨ੍ਤੀਤਿ? ਨੋ’’ਤਿਆਦਿਨਾ ਨਿਰੋਧਵਾਰੇ ਚ,

‘‘ਯਸ੍ਸ ਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ, ਤਸ੍ਸ ਅਕੁਸਲਾ ਧਮ੍ਮਾ ਨਿਰੁਜ੍ਝਨ੍ਤੀਤਿ? ਨੋ’’ਤਿਆਦਿਨਾ ਉਪ੍ਪਾਦਨਿਰੋਧਵਾਰੇ ਚ,

‘‘ਯੋ ਕੁਸਲਂ ਧਮ੍ਮਂ ਭਾਵੇਤਿ, ਸੋ ਅਕੁਸਲਂ ਧਮ੍ਮਂ ਪਜਹਿਤ੍ਥਾਤਿ? ਨੋ…ਪੇ… ਯੋ ਕੁਸਲਂ ਧਮ੍ਮਂ ਨ ਭਾਵੇਤਿ, ਸੋ ਅਕੁਸਲਂ ਧਮ੍ਮਂ ਨਪ੍ਪਜਹਿਤ੍ਥਾਤਿ? ਅਗ੍ਗਮਗ੍ਗਸਮਙ੍ਗਿਞ੍ਚ ਅਰਹਨ੍ਤਞ੍ਚ ਠਪੇਤ੍ਵਾ ਅਵਸੇਸਾ ਪੁਗ੍ਗਲਾ’’ਤਿਆਦਿਨਾ ਭਾਵਨਾਵਾਰੇ ਚ ਪੁਚ੍ਛਾਵਿਸ੍ਸਜ੍ਜਨਨਯੋ ਹੇਟ੍ਠਾ ਵੁਤ੍ਤਾਨੁਸਾਰੇਨ ਞਾਤਬ੍ਬੋ.

ਅਤ੍ਥਵਿਨਿਚ੍ਛਯੇ ਪਨੇਤ੍ਥ ਇਦਂ ਲਕ੍ਖਣਂ. ਇਮਸ੍ਸ ਹਿ ਧਮ੍ਮਯਮਕਸ੍ਸ ਪਵਤ੍ਤਿਮਹਾਵਾਰੇ ਉਪ੍ਪਜ੍ਜਨ੍ਤਿ ਨਿਰੁਜ੍ਝਨ੍ਤੀਤਿ ਇਮੇਸੁ ਉਪ੍ਪਾਦਨਿਰੋਧੇਸੁ ਕੁਸਲਾਕੁਸਲਧਮ੍ਮਾ ਤਾਵ ਏਕਨ੍ਤੇਨ ਪਵਤ੍ਤਿਯਂਯੇਵ ਲਬ੍ਭਨ੍ਤਿ, ਨ ਚੁਤਿਪਟਿਸਨ੍ਧੀਸੁ, ਅਬ੍ਯਾਕਤਧਮ੍ਮਾ ਪਨ ਪਵਤ੍ਤੇ ਚ ਚੁਤਿਪਟਿਸਨ੍ਧੀਸੁ ਚਾਤਿ ਤੀਸੁਪਿ ਕਾਲੇਸੁ ਲਬ੍ਭਨ੍ਤਿ, ਏਵਮੇਤ੍ਥ ਯਂ ਯਤ੍ਥ ਯਤ੍ਥ ਲਬ੍ਭਤਿ, ਤਸ੍ਸ ਵਸੇਨ ਤਤ੍ਥ ਤਤ੍ਥ ਵਿਨਿਚ੍ਛਯੋ ਵੇਦਿਤਬ੍ਬੋ.

ਤਤ੍ਰਿਦਂ ਨਯਮੁਖਂ – ਕੁਸਲਾਕੁਸਲਾਨਂ ਤਾਵ ਏਕਕ੍ਖਣੇ ਅਨੁਪ੍ਪਜ੍ਜਨਤੋ ‘‘ਨੋ’’ਤਿ ਪਟਿਸੇਧੋ ਕਤੋ. ਅਬ੍ਯਾਕਤਾ ਚਾਤਿ ਇਦਂ ਚਿਤ੍ਤਸਮੁਟ੍ਠਾਨਰੂਪਂ ਸਨ੍ਧਾਯ ਵੁਤ੍ਤਂ. ਯਤ੍ਥ ਕੁਸਲਾ ਧਮ੍ਮਾ ਨੁਪ੍ਪਜ੍ਜਨ੍ਤੀਤਿ ਅਸਞ੍ਞਭਵਂ ਸਨ੍ਧਾਯ ਵੁਤ੍ਤਂ, ਅਬ੍ਯਾਕਤਾਨਂ ਧਮ੍ਮਾਨਂ ਅਨੁਪ੍ਪਤ੍ਤਿਟ੍ਠਾਨਸ੍ਸਾਭਾਵਾ ‘‘ਨਤ੍ਥੀ’’ਤਿ ਪਟਿਕ੍ਖੇਪੋ ਕਤੋ, ਨਿਰੋਧਵਾਰੇ ਕੁਸਲਾਕੁਸਲਾਨਂ ਏਕਤੋ ਅਨਿਰੁਜ੍ਝਨਤੋ ‘‘ਨੋ’’ਤਿ ਵੁਤ੍ਤਨ੍ਤਿ ਇਮਿਨਾਵ ਨਯਮੁਖੇਨ ਸਬ੍ਬਤ੍ਥ ਵਿਨਿਚ੍ਛਯੋ ਵੇਦਿਤਬ੍ਬੋ. ਅਯਂ ਧਮ੍ਮਯਮਕਮਾਤਿਕਤ੍ਥਸਂਵਣ੍ਣਨਾਨਯੋ.

ਇਨ੍ਦ੍ਰਿਯਯਮਕਮਾਤਿਕਤ੍ਥਵਣ੍ਣਨਾ

ਇਨ੍ਦ੍ਰਿਯਯਮਕਮਾਤਿਕਾਯਂ ਪਨ ਖਨ੍ਧਯਮਕਮਾਤਿਕਾਦੀਸੁ ਵੁਤ੍ਤਨਯੇਨੇਵ ਪਾਲ਼ਿਵਵਤ੍ਥਾਨਾਦਿਕੋ ਸਬ੍ਬੋ ਅਤ੍ਥਸਂਵਣ੍ਣਨਾਨਯੋ ਵੇਦਿਤਬ੍ਬੋ. ਮਨਿਨ੍ਦ੍ਰਿਯਂ ਪਨੇਤ੍ਥ ਯਥਾ ਚਕ੍ਖੁਨ੍ਦ੍ਰਿਯਾਦਿਮੂਲਕੇਹਿ, ਤਥੇਵ ਇਤ੍ਥਿਨ੍ਦ੍ਰਿਯਾਦਿਮੂਲਕੇਹਿ ਸਦ੍ਧਿਂ ਸਮ੍ਪਯੋਗਂ ਗਚ੍ਛਤਿ, ਤਸ੍ਮਾ ਨਿਕ੍ਖਿਤ੍ਤਪਟਿਪਾਟਿਯਾ ਅਯੋਜੇਤ੍ਵਾ ਸਬ੍ਬੇਹਿਪਿ ਚਕ੍ਖੁਨ੍ਦ੍ਰਿਯਮੂਲਾਦੀਹਿ ਸਦ੍ਧਿਂ ਪਰਿਯੋਸਾਨੇ ਯੋਜਿਤਂ, ਚਕ੍ਖੁਨ੍ਦ੍ਰਿਯੇਨ ਚ ਸਦ੍ਧਿਂ ਸੁਖਿਨ੍ਦ੍ਰਿਯਦੁਕ੍ਖਿਨ੍ਦ੍ਰਿਯਦੋਮਨਸ੍ਸਿਨ੍ਦ੍ਰਿਯਾਨਿ, ਲੋਕੁਤ੍ਤਰਿਨ੍ਦ੍ਰਿਯਾਨਿ ਚ ਪਟਿਸਨ੍ਧਿਯਂ ਨਤ੍ਥੀਤਿ ਨ ਗਹਿਤਾਨਿ. ਯਥਾ ਚੇਤ੍ਥ, ਏਵਂ ਸੇਸਿਨ੍ਦ੍ਰਿਯਮੂਲਕੇਸੁਪਿ ਯਥਾਨੁਰੂਪਂ ਞਾਤਬ੍ਬਂ. ਇਨ੍ਦ੍ਰਿਯਾਨਂ ਪਨ ਬਹੁਕਤਾਯ ਧਾਤੁਯਮਕਤੋਪਿ ਬਹੁਤਰਾਨਿ ਯਮਕਾਨਿ ਹੋਨ੍ਤਿ ਅਯਂ ਵਿਸੇਸੋ, ਸੇਸਂ ਹੇਟ੍ਠਾ ਵੁਤ੍ਤਾਨੁਸਾਰੇਨ ਞਾਤਬ੍ਬਨ੍ਤਿ. ਅਯਂ ਇਨ੍ਦ੍ਰਿਯਯਮਕਮਾਤਿਕਤ੍ਥਸਂਵਣ੍ਣਨਾਨਯੋ.

ਮੋਹਵਿਚ੍ਛੇਦਨਿਯਾ ਅਭਿਧਮ੍ਮਮਾਤਿਕਤ੍ਥਵਣ੍ਣਨਾਯ

ਯਮਕਮਾਤਿਕਤ੍ਥਵਣ੍ਣਨਾ ਨਿਟ੍ਠਿਤਾ.