੭. ਪਟ੍ਠਾਨਮਾਤਿਕਤ੍ਥਵਣ੍ਣਨਾ
ਇਦਾਨਿ ਪਟ੍ਠਾਨਮਾਤਿਕਾਯ ਅਤ੍ਥਸਂਵਣ੍ਣਨਾਨਯੋ ਹੋਤਿ. ਕੇਨਟ੍ਠੇਨ ਪਟ੍ਠਾਨਨ੍ਤਿ? ਨਾਨਪ੍ਪਕਾਰਪਚ੍ਚਯਟ੍ਠੇਨ. ਪ-ਸਦ੍ਦੋ ਹਿ ਨਾਨਪ੍ਪਕਾਰਤ੍ਥਂ ਦੀਪੇਤਿ, ਠਾਨ-ਸਦ੍ਦੋ ਪਚ੍ਚਯਤ੍ਥਂ. ਅਥ ਵਾ ਵਿਭਜਨਟ੍ਠੇਨ ਪਟ੍ਠਾਨਂ. ਯਥਾ ਹਿ ਪਞ੍ਞਾਪਨਾ ਪਟ੍ਠਪਨਾ ਵਿਵਰਣਾ ਵਿਭਜਨਾ ਉਤ੍ਤਾਨੀਕਮ੍ਮਨ੍ਤਿ ਆਗਤਟ੍ਠਾਨੇ ਵਿਭਜਨਟ੍ਠੋ ਪਟ੍ਠਾਨਸਦ੍ਦਸਮਾਨਤ੍ਥੋ ਪਟ੍ਠਪਨਾ-ਸਦ੍ਦੋ ਦਿਸ੍ਸਤਿ, ਏਵਮਿਧਾਪਿ ਕੁਸਲਾਦੀਨਂ ਧਮ੍ਮਾਨਂ ਹੇਤੁਪਚ੍ਚਯਾਦੀਹਿ ਵਿਭਜਨਤੋ ਵਿਭਜਨਟ੍ਠੇਨ ਪਟ੍ਠਾਨਂ ਨਾਮ. ਅਥ ਵਾ ਪਟ੍ਠਿਤਟ੍ਠੇਨ ਪਟ੍ਠਾਨਂ, ਗਮਨਟ੍ਠੇਨਾਤਿ ਅਤ੍ਥੋ. ਸਬ੍ਬਧਮ੍ਮੇਸੁ ਹਿ ਅਸਙ੍ਗਗਮਨਸ੍ਸ ਸਬ੍ਬਞ੍ਞੁਤਞ੍ਞਾਣਸ੍ਸ ਹੇਤੁਪਚ੍ਚਯਾਦਿਭੇਦਭਿਨ੍ਨੇਸੁ ਕੁਸਲਾਦੀਸੁ ਵਿਤ੍ਥਾਰਿਤਨਯਲਾਭਤੋ ਨਿਸ੍ਸਙ੍ਗਵਸੇਨ ਪਵਤ੍ਤਗਮਨਤ੍ਤਾ ਗਮਨਟ੍ਠੇਨ ਪਟ੍ਠਾਨਂ ਨਾਮ, ਇਤਿ ਨਾਨਪ੍ਪਕਾਰਪਚ੍ਚਯਟ੍ਠੇਨ, ਵਿਭਜਨਟ੍ਠੇਨ, ਗਮਨਟ੍ਠੇਨ ਚ ਤਿਕਪਟ੍ਠਾਨਾਦੀਸੁ ਚਤੁਵੀਸਤਿਯਾ ਪਟ੍ਠਾਨੇਸੁ ਏਕੇਕਮ੍ਪਿ ਪਟ੍ਠਾਨਂ ਨਾਮ, ਤੇਸਂ ਪਨ ਸਮੂਹਤੋ ਪਕਰਣਂ ਪਟ੍ਠਾਨਂ ਨਾਮ, ਤੇਸਂ ਪਟ੍ਠਾਨਾਨਂ ਮਾਤਿਕਾ. ਸਯਮ੍ਪਿ ਵਾ ਪਟ੍ਠਾਨਭੂਤਾ ਮਾਤਿਕਾ, ਸਬ੍ਬਮ੍ਪੇਤਂ ਪਟ੍ਠਾਨਮਾਤਿਕਾ. ਯਾ ਸਾ ‘‘ਹੇਤੁਪਚ੍ਚਯੋ, ਆਰਮ੍ਮਣਪਚ੍ਚਯੋ…ਪੇ… ਅਵਿਗਤਪਚ੍ਚਯੋ’’ਤਿ ਏਵਂ ਤਿਕਪਟ੍ਠਾਨਾਦਿਚਤੁਵੀਸਤਿਪ੍ਪਭੇਦਸਮਨ੍ਤਪਟ੍ਠਾਨਦੇਸਨਾਯ ਮੂਲਭੂਤਪਚ੍ਚਯਭੇਦਸ੍ਸ ਵਸੇਨ ਭਗਵਤਾ ਪਕਰਣਸ੍ਸ ਆਦਿਮ੍ਹਿ ਠਪਿਤਾ, ਅਯਂ ਇਧ ਪਟ੍ਠਾਨਮਾਤਿਕਾ ਨਾਮ.
ਤਤ੍ਥ ਅਨੁਤ੍ਤਾਨਤ੍ਥਾਦਿਸਹਿਤੋ ਸਙ੍ਖੇਪਤ੍ਥਵਿਨਿਚ੍ਛਯੋ ਤਾਵ ਏਵਂ ਵੇਦਿਤਬ੍ਬੋ – ਹੇਤੁਪਚ੍ਚਯੋਤਿਆਦੀਸੁ ਹਿ ਹੇਤੁ ਚ ਸੋ ਪਚ੍ਚਯੋ ਚਾਤਿ ਹੇਤੁਪਚ੍ਚਯੋ, ਹੇਤੁ ਹੁਤ੍ਵਾ ਪਚ੍ਚਯੋ ਹੇਤੁਪਚ੍ਚਯੋ, ਹੇਤੁਭਾਵੇਨ ਪਚ੍ਚਯੋਤਿ ਵੁਤ੍ਤਂ ਹੋਤਿ. ਤਤ੍ਥ ਹੇਤੂਤਿ ਵਚਨਾਵਯਵਕਾਰਣਮੂਲਾਨਮੇਤਂ ਅਧਿਵਚਨਂ. ‘‘ਪਟਿਞ੍ਞਾਹੇਤੂ’’ਤਿਆਦੀਸੁ ਹਿ ਲੋਕੇ ਵਚਨਾਵਯਵੋ ‘‘ਹੇਤੂ’’ਤਿ ਵੁਚ੍ਚਤਿ, ਸਾਸਨੇ ਪਨ ‘‘ਯੇ ਧਮ੍ਮਾ ਹੇਤੁਪ੍ਪਭਵਾ’’ਤਿਆਦੀਸੁ (ਮਹਾਵ. ੬੦; ਅਪ. ਥੇਰ ੧.੧.੨੮੬) ਕਾਰਣਂ, ‘‘ਤਯੋ ਕੁਸਲਾ ਹੇਤੂ, ਤਯੋ ਅਕੁਸਲਾ ਹੇਤੂ’’ਤਿਆਦੀਸੁ (ਧ. ਸ. ੧੦੫੯) ਮੂਲਂ, ਇਦਂ ਇਧ ਅਧਿਪ੍ਪੇਤਂ, ਤਂ ਪਟਿਚ੍ਚ ਏਤਸ੍ਮਾ ਏਤੀਤਿ ਪਚ੍ਚਯੋ, ਅਪਚ੍ਚਕ੍ਖਾਯ ਨਂ ਵਤ੍ਤਤੀਤਿ ਅਤ੍ਥੋ. ਯੋ ਹਿ ਧਮ੍ਮੋ ਯਂ ਧਮ੍ਮਂ ਪਟਿਚ੍ਚ ਅਪਚ੍ਚਕ੍ਖਾਯ ਤਿਟ੍ਠਤਿ ਵਾ ਉਪ੍ਪਜ੍ਜਤਿ ਵਾ, ਸੋ ਤਸ੍ਸ ਉਪਕਾਰਕਲਕ੍ਖਣੇਨ ਪਚ੍ਚਯੋ ਨਾਮ. ਇਤਿ ਮੂਲਟ੍ਠੇਨ ਹੇਤੁ, ਉਪਕਾਰਕਟ੍ਠੇਨ ਪਚ੍ਚਯੋਤਿ ਸਙ੍ਖੇਪਤੋ ਮੂਲਟ੍ਠੇਨ ਉਪਕਾਰਕੋ ਧਮ੍ਮੋ ਹੇਤੁਪਚ੍ਚਯੋ, ਕੁਸਲਾਦੀਨਂ ਕੁਸਲਾਦਿਭਾਵਸਾਧਕੋਤਿ ਕੇਚਿ, ਏਵਂ ਸਨ੍ਤੇ ਪਨ ਤਂਸਮੁਟ੍ਠਾਨਰੂਪੇਸੁ ਹੇਤੁਪਚ੍ਚਯਤਾ ਨ ਸਮ੍ਪਜ੍ਜਤਿ, ਅਹੇਤੁਕਚਿਤ੍ਤਾਨਞ੍ਚ ਵਿਨਾ ਏਤੇਹਿ ਅਬ੍ਯਾਕਤਭਾਵੋ ਸਿਦ੍ਧੋ, ਸਹੇਤੁਕਾਨਮ੍ਪਿ ਚ ਯੋਨਿਸੋਮਨਸਿਕਾਰਾਦਿਪਟਿਬਦ੍ਧੋ ਕੁਸਲਾਦਿਭਾਵੋ, ਨ ਸਮ੍ਪਯੁਤ੍ਤਹੇਤੁਪਟਿਬਦ੍ਧੋ. ਯਦਿ ਚ ਸਿਯਾ, ਹੇਤੂਸੁਪਿ ਕੁਸਲਾਦਿਭਾਵਸਾਧਕੇਨ ਅਞ੍ਞੇਨ ਭਵਿਤਬ੍ਬਂ, ਕੁਸਲਾਦਿਭਾਵਸਾਧਨਵਸੇਨ ਪਨ ਹੇਤੂਨਂ ਮੂਲਟ੍ਠਂ ਅਗ੍ਗਹੇਤ੍ਵਾ ਸੁਪ੍ਪਤਿਟ੍ਠਿਤਭਾਵਸਾਧਨਵਸੇਨ ਗਯ੍ਹਮਾਨੇ ਨ ਕਿਞ੍ਚਿ ਵਿਰੁਜ੍ਝਤਿ. ਲਦ੍ਧਹੇਤੁਪਚ੍ਚਯਾ ਹਿ ਧਮ੍ਮਾ ਵਿਰੁਲ਼੍ਹਮੂਲਾ ਵਿਯ ਪਾਦਪਾ ਥਿਰਾ ਹੋਨ੍ਤਿ ਸੁਪ੍ਪਤਿਟ੍ਠਿਤਾ, ਇਤਰੇ ਪਨ ਤਿਲਬੀਜਕਾਦਿਸੇਵਾਲਾ ਵਿਯ ਨ ਸੁਪ੍ਪਤਿਟ੍ਠਿਤਾ, ਇਤਿ ਮੂਲਟ੍ਠੇਨ ਉਪਕਾਰਕੋਤਿ ਸੁਪ੍ਪਤਿਟ੍ਠਿਤਭਾਵਸਾਧਨੇਨ ਉਪਕਾਰਕੋ ਧਮ੍ਮੋ ਹੇਤੁਪਚ੍ਚਯੋਤਿ ਵੇਦਿਤਬ੍ਬੋ.
ਨਿਦ੍ਦੇਸੇ ‘‘ਹੇਤੂ ਹੇਤੁਸਮ੍ਪਯੁਤ੍ਤਕਾਨਂ ਧਮ੍ਮਾਨਂ ਤਂਸਮੁਟ੍ਠਾਨਾਨਞ੍ਚ ਰੂਪਾਨਂ ਹੇਤੁਪਚ੍ਚਯੇਨ ਪਚ੍ਚਯੋ’’ਤਿ ਵੁਤ੍ਤਂ, ਤਤ੍ਥ ‘‘ਚਿਤ੍ਤਸਮੁਟ੍ਠਾਨਾਨ’’ਨ੍ਤਿ ਅਵਤ੍ਵਾ ‘‘ਤਂਸਮੁਟ੍ਠਾਨਾਨ’’ਨ੍ਤਿ ਇਦਂ ਅਚਿਤ੍ਤਸਮੁਟ੍ਠਾਨਾਨਮ੍ਪਿ ਸਙ੍ਗਣ੍ਹਨਤ੍ਥਂ. ਪਞ੍ਹਾਵਾਰਸ੍ਮਿਂ ਹਿ ‘‘ਪਟਿਸਨ੍ਧਿਕ੍ਖਣੇ ਵਿਪਾਕਾਬ੍ਯਾਕਤਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਕਟਤ੍ਤਾ ਚ ਰੂਪਾਨਂ ਹੇਤੁਪਚ੍ਚਯੇਨ ਪਚ੍ਚਯੋ’’ਤਿ ਆਗਤਂ, ਕਸ੍ਮਾ ਪਨਾਯਂ ਹੇਤੁ ਪਟਿਸਨ੍ਧਿਯਮੇਵ ਕਟਤ੍ਤਾਰੂਪਾਨਂ ਹੇਤੁਪਚ੍ਚਯੇਨ ਪਚ੍ਚਯੋ ਹੋਤਿ, ਨ ਪਵਤ੍ਤੇਤਿ? ਪਟਿਸਨ੍ਧਿਯਂ ਕਮ੍ਮਜਰੂਪਾਨਂ ਚਿਤ੍ਤਪਟਿਬਦ੍ਧਵੁਤ੍ਤਿਤਾਯ, ਭਵਪਠਮਨਿਪਾਤਤੋ ਚਿਤ੍ਤਜਾਤਿ. ਇਤਰਰੂਪਸਨ੍ਤਤਿਉਪ੍ਪਤ੍ਥਮ੍ਭਾਭਾਵੇਨ ਏਵ ਦੁਬ੍ਬਲਵਤ੍ਥੁਂ ਚਿਤ੍ਤਮੇਵ ਨਿਸ੍ਸਾਯ ਉਪ੍ਪਜ੍ਜਤਿ ਚੇਵ ਤਿਟ੍ਠਤਿ ਚ. ਤਂ ਚਿਤ੍ਤਮ੍ਪਿ ਹਿ ਪਟਿਸਨ੍ਧਿਕ੍ਖਣੇ ਕਮ੍ਮਵੇਗਕ੍ਖਿਤ੍ਤਤਾਯ ਚੇਵ ਅਪੁਰੇਜਾਤਵਤ੍ਥੁਕਤਾਯ ਚ ਅਪ੍ਪਤਿਟ੍ਠਿਤਂ, ਪਪਾਤੇ ਪਤਿਤਮਤ੍ਤਕੋ ਪੁਰਿਸੋ ਨ ਕਿਞ੍ਚਿ ਸਿਪ੍ਪਂ ਕਾਤੁਂ ਵਿਯ ਚਿਤ੍ਤਜਰੂਪਂ ਜਨੇਤੁਂ ਨ ਸਕ੍ਕੋਤਿ, ਤਮੇਵ ਕਟਤ੍ਤਾਰੂਪਂ ਨਿਸ੍ਸਾਯ ਪਤਿਟ੍ਠਾਤਿ. ਪਟਿਸਨ੍ਧਿਚਿਤ੍ਤਾਨਿ ਹਿ ਰੂਪਂ ਨ ਜਨੇਨ੍ਤਿ, ਕਮ੍ਮਜਰੂਪਮੇਵ ਪਨ ਤੇਸਂ ਚਿਤ੍ਤਸਮੁਟ੍ਠਾਨਰੂਪਟ੍ਠਾਨੇ ਤਿਟ੍ਠਤਿ, ਪਵਤ੍ਤਿਯਂ ਪਨ ਪਟਿਲਦ੍ਧੁਪਤ੍ਥਮ੍ਭਤਾਯ ਤਂ ਰੂਪਂ ਵਿਨਾਪਿ ਕਮ੍ਮਪਟਿਬਦ੍ਧਾਵ ਪਵਤ੍ਤਿ, ਹੇਤੁਪਚ੍ਚਯਸ੍ਸ ਪਨੇਤ੍ਥ ਕੁਸਲਾਦਿਭੇਦਤੋ, ਭੂਮਿਭੇਦਤੋ ਚ ਵਿਭਾਗੋ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬੋਤਿ ਅਯਂ ਹੇਤੁਪਚ੍ਚਯੇ ਨਯੋ.
ਤਤੋ ਪਰੇਸੁ ਆਰਮ੍ਮਣਭਾਵੇਨ ਉਪਕਾਰਕੋ ਧਮ੍ਮੋ ਆਰਮ੍ਮਣਪਚ੍ਚਯੋ, ਸੋ ਨਿਦ੍ਦੇਸੇ ‘‘ਰੂਪਾਯਤਨਂ ਚਕ੍ਖੁਵਿਞ੍ਞਾਣਧਾਤੁਯਾ…ਪੇ… ਫੋਟ੍ਠਬ੍ਬਾਯਤਨਂ ਕਾਯਵਿਞ੍ਞਾਣਧਾਤੁਯਾ ਤਂਸਮ੍ਪਯੁਤ੍ਤਕਾਨਞ੍ਚ ਧਮ੍ਮਾਨਂ…ਪੇ… ਰੂਪਾਯਤਨਂ ਸਦ੍ਦਗਨ੍ਧਰਸਫੋਟ੍ਠਬ੍ਬਾਯਤਨਂ ਮਨੋਧਾਤੁਯਾ…ਪੇ… ਸਬ੍ਬੇ ਧਮ੍ਮਾ ਮਨੋਵਿਞ੍ਞਾਣਧਾਤੁਯਾ…ਪੇ… ਯਂ ਯਂ ਧਮ੍ਮਂ ਆਰਬ੍ਭ ਯੇ ਯੇ ਧਮ੍ਮਾ ਉਪ੍ਪਜ੍ਜਨ੍ਤਿ ਚਿਤ੍ਤਚੇਤਸਿਕਾ ਧਮ੍ਮਾ, ਤੇ ਤੇ ਧਮ੍ਮਾ ਤੇਸਂ ਤੇਸਂ ਧਮ੍ਮਾਨਂ ਆਰਮ੍ਮਣਪਚ੍ਚਯੇਨ ਪਚ੍ਚਯੋ’’ਤਿ ਏਵਂ ਨਿਦ੍ਦਿਟ੍ਠਤ੍ਤਾ ਨ ਕੋਚਿ ਧਮ੍ਮੋ ਨ ਹੋਤਿ. ਯਥਾ ਹਿ ਦੁਬ੍ਬਲਪੁਰਿਸੋ ਦਣ੍ਡਂ ਵਾ ਰਜ੍ਜੁਂ ਵਾ ਆਲਮ੍ਬਿਤ੍ਵਾ ਉਟ੍ਠਹਤਿ ਚੇਵ ਤਿਟ੍ਠਤਿ ਚ, ਏਵਂ ਚਿਤ੍ਤਚੇਤਸਿਕਾ ਧਮ੍ਮਾ ਰੂਪਾਦੀਸੁ ਛਸੁ ਯਂ ਕਿਞ੍ਚਿ ਆਲਮ੍ਬਿਤ੍ਵਾ ਉਪ੍ਪਜ੍ਜਨ੍ਤਿ ਚੇਵ ਤਿਟ੍ਠਨ੍ਤਿ ਚ, ਤਸ੍ਮਾ ਲੋਕਿਯਲੋਕੁਤ੍ਤਰਾਦਿਭੇਦਾ ਸਬ੍ਬੇਪਿ ਧਮ੍ਮਾ ਯਥਾਯੋਗਂ ਚਿਤ੍ਤਚੇਤਸਿਕਾਨਂ ਆਰਮ੍ਮਣਪਚ੍ਚਯੋਤਿ ਵੇਦਿਤਬ੍ਬੋਤਿ ਅਯਂ ਆਰਮ੍ਮਣਪਚ੍ਚਯੇ ਨਯੋ.
ਜੇਟ੍ਠਕਟ੍ਠੇਨ ਉਪਕਾਰਕੋ ਧਮ੍ਮੋ ਅਧਿਪਤਿਪਚ੍ਚਯੋ, ਸੋ ਨਿਦ੍ਦੇਸੇ ‘‘ਛਨ੍ਦਾਧਿਪਤਿ ਛਨ੍ਦਸਮ੍ਪਯੁਤ੍ਤਕਾਨਂ ਧਮ੍ਮਾਨਂ ਤਂਸਮੁਟ੍ਠਾਨਾਨਞ੍ਚ ਰੂਪਾਨਂ…ਪੇ… ਵੀਰਿਯਚਿਤ੍ਤਵੀਮਂਸਾਧਿਪਤਿ…ਪੇ… ਅਧਿਪਤਿਪਚ੍ਚਯੇਨ ਪਚ੍ਚਯੋ, ਯਂ ਯਂ ਧਮ੍ਮਂ ਗਰੁਂ ਕਤ੍ਵਾ ਯੇ ਯੇ ਧਮ੍ਮਾ ਉਪ੍ਪਜ੍ਜਨ੍ਤਿ ਚਿਤ੍ਤਚੇਤਸਿਕਾ ਧਮ੍ਮਾ, ਤੇ ਤੇ ਧਮ੍ਮਾ ਤੇਸਂ ਤੇਸਂ ਧਮ੍ਮਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ’’ਤਿ ਏਵਂ ਦ੍ਵਿਧਾ ਨਿਦ੍ਦਿਟ੍ਠੋ. ਤਤ੍ਥ ਛਨ੍ਦਾਦਯੋ ਸਹਜਾਤਾਧਿਪਤਿਭਾਵੇਨ ਵੁਤ੍ਤਾ, ਗਰੁਕਾਤਬ੍ਬਂ ਆਰਮ੍ਮਣਾਧਿਪਤਿਭਾਵੇਨ. ਤਤ੍ਥ ਚ ਲੋਕਿਯਕੁਸਲਭੂਤੋ ਆਰਮ੍ਮਣਾਧਿਪਤਿ ਲੋਕਿਯਕੁਸਲਾਨਞ੍ਚੇਵ ਲੋਭਸਹਗਤਚਿਤ੍ਤਾਨਞ੍ਚ ਆਰਮ੍ਮਣਾਧਿਪਤਿ ਹੋਤਿ, ਨਾਞ੍ਞਸ੍ਸ, ਅਕੁਸਲਭੂਤੋ ਪਨ ਲੋਭਸਹਗਤਚਿਤ੍ਤੁਪ੍ਪਾਦੋਤਿ ਵੁਚ੍ਚਤਿ ਇਤਰੇਸੁ ਗਰੁਕਾਤਬ੍ਬਤਾਯ ਅਭਾਵਤੋ, ਸੋ ਦ੍ਵਿਹੇਤੁਕਾਹੇਤੁਕਾਦਿਲੋਕਿਯਵਿਪਾਕਰੂਪਕ੍ਖਨ੍ਧਭੂਤੋ ਚ ਲੋਭਸਹਗਤਸ੍ਸੇਵ, ਨਾਞ੍ਞਸ੍ਸ, ਤਥਾ ਕਿਰਿਯਭੂਤੋਪੀਤਿ ਅਟ੍ਠਕਥਾਯਂ ਆਗਤਂ, ਤਂ ਞਾਣਸਮ੍ਪਯੁਤ੍ਤਕਿਰਿਯਾਨਂ ਸਬ੍ਬਞ੍ਞੁਤਞ੍ਞਾਣਾਭਿਞ੍ਞਾਦਿਪੁਬ੍ਬਵਸਪ੍ਪਵਤ੍ਤਾਨਂ ਕਾਮਾਵਚਰਕੁਸਲੇਹਿ ਗਰੁਕਾਤਬ੍ਬਭਾਵਸ੍ਸਾਵਿਰੋਧਭਾਵਸ੍ਸ ਦਸ੍ਸਨਤੋ ਵੀਮਂਸਿਤਬ੍ਬਂ. ਲੋਕੁਤ੍ਤਰਕੁਸਲਾਨਿ ਪਨ ਕਾਮਾਵਚਰਞਾਣਸਮ੍ਪਯੁਤ੍ਤਜਵਨਾਨਮੇਵ ਆਰਮ੍ਮਣਾਧਿਪਤਿਪਚ੍ਚਯਾ ਹੋਨ੍ਤਿ, ਨਿਬ੍ਬਾਨਂ ਪਨ ਤੇਸਞ੍ਞੇਵ ਲੋਕੁਤ੍ਤਰਕੁਸਲਵਿਪਾਕਾਨਞ੍ਚਾਤਿ ਵੇਦਿਤਬ੍ਬਨ੍ਤਿ ਅਯਂ ਅਧਿਪਤਿਪਚ੍ਚਯੇ ਨਯੋ.
ਅਨਨ੍ਤਰਭਾਵੇਨ ਉਪਕਾਰਕੋ ਧਮ੍ਮੋ ਅਨਨ੍ਤਰਪਚ੍ਚਯੋ, ਸੋਵ ਸਮਨਨ੍ਤਰਪਚ੍ਚਯੋ, ਬ੍ਯਞ੍ਜਨਮਤ੍ਤਮੇਵ ਨਾਨਂ ‘‘ਉਪਚਯਸਨ੍ਤਤੀ’’ਤਿਆਦੀਸੁ ਵਿਯ. ਯਮ੍ਪਿ ‘‘ਅਤ੍ਥਾਨਨ੍ਤਰਤਾਯ ਅਨਨ੍ਤਰਪਚ੍ਚਯੋ, ਕਾਲਾਨਨ੍ਤਰਤਾਯ ਸਮਨਨ੍ਤਰਪਚ੍ਚਯੋ’’ਤਿ ਆਚਰਿਯਾਨਂ ਮਤਂ, ਤਂ ‘‘ਨਿਰੋਧਾ ਵੁਟ੍ਠਹਨ੍ਤਸ੍ਸ ਨੇਵਸਞ੍ਞਾਨਾਸਞ੍ਞਾਯਤਨਕੁਸਲਂ ਫਲਸਮਾਪਤ੍ਤਿਯਾ ਸਮਨਨ੍ਤਰਪਚ੍ਚਯੇਨ ਪਚ੍ਚਯੋ’’ਤਿਆਦੀਹਿ ਵਿਰੁਜ੍ਝਤਿ, ਤਂਨਿਦ੍ਦੇਸੇ ‘‘ਚਕ੍ਖੁਵਿਞ੍ਞਾਣਧਾਤੁ ਤਂਸਮ੍ਪਯੁਤ੍ਤਕਾ ਚ ਧਮ੍ਮਾ ਮਨੋਧਾਤੁਯਾ…ਪੇ… ਕਾਯਵਿਞ੍ਞਾਣਧਾਤੁ…ਪੇ… ਮਨੋਧਾਤੁ…ਪੇ… ਮਨੋਵਿਞ੍ਞਾਣਧਾਤੁਯਾ…ਪੇ… ਪੁਰਿਮਾ ਪੁਰਿਮਾ ਕੁਸਲਾ ਧਮ੍ਮਾ ਪਚ੍ਛਿਮਾਨਂ ਪਚ੍ਛਿਮਾਨਂ ਕੁਸਲਾਨਂ ਧਮ੍ਮਾਨਂ…ਪੇ… ਅਬ੍ਯਾਕਤਾਨਂ ਧਮ੍ਮਾਨਂ…ਪੇ… ਪੁਰਿਮਾ ਪੁਰਿਮਾ ਅਕੁਸਲਾ ਧਮ੍ਮਾ ਪਚ੍ਛਿਮਾਨਂ ਪਚ੍ਛਿਮਾਨਂ ਅਕੁਸਲਾਨਂ…ਪੇ… ਅਬ੍ਯਾਕਤਾਨਂ…ਪੇ… ਯੇਸਂ ਯੇਸਂ ਧਮ੍ਮਾਨਂ ਅਨਨ੍ਤਰਾ ਯੇ ਯੇ ਧਮ੍ਮਾ ਉਪ੍ਪਜ੍ਜਨ੍ਤਿ ਚਿਤ੍ਤਚੇਤਸਿਕਾ ਧਮ੍ਮਾ, ਤੇ ਤੇ ਧਮ੍ਮਾ ਤੇਸਂ ਤੇਸਂ ਧਮ੍ਮਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ’’ਤਿ ਇਮਿਨਾ ਅਨਨ੍ਤਰਪਚ੍ਚਯਨਿਦ੍ਦੇਸਸਮਕੋ ਏਵ ਸਮਨਨ੍ਤਰਪਚ੍ਚਯੋ ਨਿਦ੍ਦਿਟ੍ਠੋ ਅਞ੍ਞਤ੍ਰ ਨਾਮਨਾਨਾਤ੍ਤਾਤਿ ਅਯਂ ਅਨਨ੍ਤਰਸਮਨਨ੍ਤਰਪਚ੍ਚਯਦ੍ਵਯੇ ਨਯੋ.
ਉਪ੍ਪਜ੍ਜਮਾਨੋਵ ਸਹ ਉਪ੍ਪਜ੍ਜਮਾਨਭਾਵੇਨ ਉਪਕਾਰਕੋ ਧਮ੍ਮੋ ਸਹਜਾਤਪਚ੍ਚਯੋ, ਸੋ ਨਿਦ੍ਦੇਸੇ ‘‘ਚਤ੍ਤਾਰੋ ਖਨ੍ਧਾ ਅਰੂਪਿਨੋ ਅਞ੍ਞਮਞ੍ਞਂ ਸਹਜਾਤਪਚ੍ਚਯੇਨ ਪਚ੍ਚਯੋ, ਚਤ੍ਤਾਰੋ ਮਹਾਭੂਤਾ ਅਞ੍ਞਮਞ੍ਞਂ…ਪੇ… ਓਕ੍ਕਨ੍ਤਿਕ੍ਖਣੇ ਨਾਮਰੂਪਂ ਅਞ੍ਞਮਞ੍ਞਂ…ਪੇ… ਚਿਤ੍ਤਚੇਤਸਿਕਾ ਧਮ੍ਮਾ ਚਿਤ੍ਤਸਮੁਟ੍ਠਾਨਾਨਂ ਰੂਪਾਨਂ…ਪੇ… ਮਹਾਭੂਤਾ ਉਪਾਦਾਰੂਪਾਨਂ…ਪੇ… ਰੂਪਿਨੋ ਧਮ੍ਮਾ ਅਰੂਪੀਨਂ ਧਮ੍ਮਾਨਂ ਕਿਞ੍ਚਿਕਾਲੇ ਸਹਜਾਤਪਚ੍ਚਯੇਨ ਪਚ੍ਚਯੋ, ਕਿਞ੍ਚਿਕਾਲੇ ਨਸਹਜਾਤਪਚ੍ਚਯੇਨ ਪਚ੍ਚਯੋ’’ਤਿ ਏਵਂ ਛਬ੍ਬਿਧੋ ਨਿਦ੍ਦਿਟ੍ਠੋ. ਤਤ੍ਥ ਅਞ੍ਞਮਞ੍ਞਨ੍ਤਿ ਇਮਿਨਾ ਤੇਸਂ ਧਮ੍ਮਾਨਂ ਏਕਕ੍ਖਣੇ ਪਚ੍ਚਯਭਾਵਞ੍ਚੇਵ ਪਚ੍ਚਯੁਪ੍ਪਨ੍ਨਭਾਵਞ੍ਚ ਦੀਪੇਤਿ, ਪਟਿਸਨ੍ਧਿਕ੍ਖਣੇ ਵਤ੍ਥੁਰੂਪਂ ਰੂਪਂ ਨਾਮ. ਚਿਤ੍ਤਚੇਤਸਿਕਾਤਿ ਪਵਤ੍ਤਿਯਂ ਚਤ੍ਤਾਰੋ ਖਨ੍ਧਾ, ਪਟਿਸਨ੍ਧਿਯਮ੍ਪੀਤਿ ਕੇਚਿ ਤਤ੍ਥ ਕਟਤ੍ਤਾਰੂਪਾਨਮ੍ਪਿ ਚਿਤ੍ਤਸਮੁਟ੍ਠਾਨੇ ਪਵਿਟ੍ਠਤ੍ਤਾ. ਤੇਸਂ ਹਿ ਪਟਿਸਨ੍ਧਿਚਿਤ੍ਤਚੇਤਸਿਕਾ ਸਹਜਾਤਪਚ੍ਚਯਾ ਹੋਨ੍ਤਿਯੇਵ, ਤਾਨਿ ਪਨ ਵਤ੍ਥੁਵਿਰਹਿਤਾਨਿ ਰੂਪਾਨਿ ਪਵਤ੍ਤਿਯਂ ਚਿਤ੍ਤਸਮੁਟ੍ਠਾਨਾਨਂ ਵਿਯ ਚਿਤ੍ਤਚੇਤਸਿਕਾਨਂ ਪਚ੍ਚਯਤ੍ਥਂ ਨ ਫਰਨ੍ਤਿ, ਤਸ੍ਮਾ ‘‘ਅਞ੍ਞਮਞ੍ਞ’’ਨ੍ਤਿ ਨ ਵੁਤ੍ਤਂ, ਤਥਾ ਭੂਤਾਨਂ ਉਪਾਦਾਰੂਪਂ. ਏਵਂ ਹਿ ਅਗਯ੍ਹਮਾਨੇ ਪਟਿਸਨ੍ਧਿਯਂ ਕਟਤ੍ਤਾਰੂਪਾਨਂ ਸਹਜਾਤਾ ਨਾਮ ਨਿਸ੍ਸਯਤਾ ਨ ਵੁਤ੍ਤਾਤਿ ਸਹਜਾਤਪਚ੍ਚਯਨਿਦ੍ਦੇਸੋ ਅਪਰਿਪੁਣ੍ਣੋ ਏਵ ਸਿਯਾ. ਕਿਞ੍ਚਿਕਾਲੇਤਿ ਇਦਮ੍ਪਿ ਓਕ੍ਕਨ੍ਤਿਕ੍ਖਣੇ ਹਦਯਵਤ੍ਥੁਮੇਵ ਸਨ੍ਧਾਯ ਵੁਤ੍ਤਤ੍ਤਾ ਤਤਿਯਕੋਟ੍ਠਾਸਮੇਵ ਭਜਤੀਤਿ ਅਤ੍ਥਤੋ ਅਯਂ ਪਚ੍ਚਯੋ ਪਞ੍ਚਵਿਧੋਤਿ ਅਯਂ ਸਹਜਾਤਪਚ੍ਚਯੇ ਨਯੋ.
ਅਞ੍ਞਮਞ੍ਞਂ ਉਪ੍ਪਾਦਨੁਪਤ੍ਥਮ੍ਭਨਭਾਵੇਨ ਉਪਕਾਰਕੋ ਧਮ੍ਮੋ ਅਞ੍ਞਮਞ੍ਞਪਚ੍ਚਯੋ ਤਿਦਣ੍ਡਕਂ ਵਿਯ. ਸੋ ਨਿਦ੍ਦੇਸੇ ‘‘ਚਤ੍ਤਾਰੋ ਖਨ੍ਧਾ ਅਰੂਪਿਨੋ ਅਞ੍ਞਮਞ੍ਞਪਚ੍ਚਯੇਨ ਪਚ੍ਚਯੋ, ਚਤ੍ਤਾਰੋ ਮਹਾਭੂਤਾ…ਪੇ… ਓਕ੍ਕਨ੍ਤਿਕ੍ਖਣੇ ਨਾਮਰੂਪਂ ਅਞ੍ਞਮਞ੍ਞਪਚ੍ਚਯੇਨ ਪਚ੍ਚਯੋ’’ਤਿ ਏਵਂ ਤਿਧਾ ਨਿਦ੍ਦਿਟ੍ਠੋਤਿ ਅਯਂ ਅਞ੍ਞਮਞ੍ਞਪਚ੍ਚਯੇ ਨਯੋ.
ਅਧਿਟ੍ਠਾਨਾਕਾਰੇਨ, ਨਿਸ੍ਸਯਾਕਾਰੇਨ ਚ ਉਪਕਾਰਕੋ ਧਮ੍ਮੋ ਨਿਸ੍ਸਯਪਚ੍ਚਯੋ ਤਰੁਚਿਤ੍ਤਕਮ੍ਮਾਦੀਨਂ ਪਥਵੀਪਟਾਦਯੋ ਵਿਯ, ਸੋ ਨਿਦ੍ਦੇਸੇ ਸਹਜਾਤਪਚ੍ਚਯੇ ਵਿਯ ਛਧਾਵ ਨਿਦ੍ਦਿਟ੍ਠੋ. ਛਟ੍ਠੋ ਪਨੇਤ੍ਥ ਕੋਟ੍ਠਾਸੋ ‘‘ਚਕ੍ਖਾਯਤਨਂ ਚਕ੍ਖੁਵਿਞ੍ਞਾਣਧਾਤੁਯਾ, ਸੋਤਘਾਨਜਿਵ੍ਹਾਕਾਯਾਯਤਨਂ ਕਾਯਵਿਞ੍ਞਾਣਧਾਤੁਯਾ…ਪੇ… ਯਂ ਰੂਪਂ ਨਿਸ੍ਸਾਯ ਮਨੋਧਾਤੁ ਚ ਮਨੋਵਿਞ੍ਞਾਣਧਾਤੁ ਚ ਵਤ੍ਤਨ੍ਤਿ, ਤਂ ਰੂਪਂ ਮਨੋਧਾਤੁਯਾ ਚ ਮਨੋਵਿਞ੍ਞਾਣਧਾਤੁਯਾ ਚ ਤਂਸਮ੍ਪਯੁਤ੍ਤਕਾਨਞ੍ਚ ਧਮ੍ਮਾਨਂ ਨਿਸ੍ਸਯਪਚ੍ਚਯੇਨ ਪਚ੍ਚਯੋ’’ਤਿ ਏਵਂ ਪੁਰੇਜਾਤਨਿਸ੍ਸਯਦਸ੍ਸਨਵਸੇਨ ਵਿਭਤ੍ਤੋ, ਸੇਸਂ ਤਾਦਿਸਮੇਵ. ਤਤ੍ਥ ਰੂਪਨ੍ਤਿ ਹਦਯਵਤ੍ਥੁ.
ਉਪਨਿਸ੍ਸਯਪਚ੍ਚਯੋਤਿ ਏਤ੍ਥ ਪਨਾਯਂ ਵਚਨਤ੍ਥੋ – ਤਦਧੀਨਵੁਤ੍ਤਿਤਾਯ ਅਤ੍ਤਨੋ ਫਲੇਨ ਨਿਸ੍ਸਿਤੋ, ਨਪ੍ਪਟਿਕ੍ਖਿਤ੍ਤੋਤਿ ਨਿਸ੍ਸਯੋ, ਯਥਾ ਪਨ ਭੁਸੋ ਆਯਾਸੋ ਉਪਾਯਾਸੋ, ਏਵਂ ਭੁਸੋ ਨਿਸ੍ਸਯੋ ਉਪਨਿਸ੍ਸਯੋ, ਬਲਵਕਾਰਣਸ੍ਸੇਤਂ ਅਧਿਵਚਨਂ, ਤਸ੍ਮਾ ਬਲਵਕਾਰਣਭਾਵੇਨ ਉਪਕਾਰਕੋ ਧਮ੍ਮੋ ਉਪਨਿਸ੍ਸਯਪਚ੍ਚਯੋਤਿ ਵੇਦਿਤਬ੍ਬੋ. ਸੋ ਆਰਮ੍ਮਣੂਪਨਿਸ੍ਸਯੋ ਅਨਨ੍ਤਰੂਪਨਿਸ੍ਸਯੋ ਪਕਤੂਪਨਿਸ੍ਸਯੋਤਿ ਤਿਵਿਧੋ ਹੋਤਿ. ਤਤ੍ਥ ਆਰਮ੍ਮਣੂਪਨਿਸ੍ਸਯੋ ਤਾਵ ਆਰਮ੍ਮਣਾਧਿਪਤਿਨਾ ਸਦ੍ਧਿਂ ਨਾਨਤ੍ਤਂ ਅਕਤ੍ਵਾ ਵਿਭਤ੍ਤੋ. ਤਤ੍ਥ ਯਂ ਆਰਮ੍ਮਣਂ ਗਰੁਂ ਕਤ੍ਵਾ ਚਿਤ੍ਤਚੇਤਸਿਕਾ ਉਪ੍ਪਜ੍ਜਨ੍ਤਿ, ਤਂ ਨਿਯਮਤੋ ਤੇਸਂ ਆਰਮ੍ਮਣੇਸੁ ਬਲਵਾਰਮ੍ਮਣਂ ਹੋਤਿ, ਇਤਿ ਗਰੁਕਾਤਬ੍ਬਮਤ੍ਤਟ੍ਠੇਨ ਆਰਮ੍ਮਣਾਧਿਪਤਿ, ਬਲਵਕਾਰਣਟ੍ਠੇਨ ਆਰਮ੍ਮਣੂਪਨਿਸ੍ਸਯੋਤਿ ਏਵਮੇਤੇਸਂ ਨਾਨਤ੍ਤਂ ਵੇਦਿਤਬ੍ਬਂ.
ਅਨਨ੍ਤਰੂਪਨਿਸ੍ਸਯੋਪਿ ਅਨਨ੍ਤਰਪਚ੍ਚਯੇਨ ਨਾਨਤ੍ਤਂ ਅਕਤ੍ਵਾਵ ਵਿਭਤ੍ਤੋ, ਏਵਂ ਸਨ੍ਤੇਪਿ ਅਤ੍ਤਨੋ ਅਤ੍ਤਨੋ ਅਨਨ੍ਤਰਂ ਅਨੁਰੂਪਸ੍ਸ ਚਿਤ੍ਤੁਪ੍ਪਾਦਸ੍ਸ ਪਵਤ੍ਤਨਸਮਤ੍ਥਤਾਯ ਅਨਨ੍ਤਰਤਾ, ਪੁਰਿਮਚਿਤ੍ਤਸ੍ਸ ਪਚ੍ਛਿਮਚਿਤ੍ਤੁਪ੍ਪਾਦਨੇ ਬਲਵਤਾਯ ਅਨਨ੍ਤਰੂਪਨਿਸ੍ਸਯਤਾ ਚ ਵੇਦਿਤਬ੍ਬਾ. ਯਥਾ ਹਿ ਹੇਤੁਪਚ੍ਚਯਾਦੀਸੁ ਕਞ੍ਚਿ ਧਮ੍ਮਂ ਵਿਨਾਪਿ ਚਿਤ੍ਤਂ ਉਪ੍ਪਜ੍ਜਤਿ, ਨ ਏਵਂ ਅਨਨ੍ਤਰਚਿਤ੍ਤਂ ਵਿਨਾ ਚਿਤ੍ਤਸ੍ਸ ਉਪ੍ਪਤ੍ਤਿ ਨਾਮ ਅਤ੍ਥਿ, ਤਸ੍ਮਾ ਬਲਵਪਚ੍ਚਯੋ ਹੋਤਿ, ਇਤਿ ਬਲਵਕਾਰਣਟ੍ਠੇਨ ਅਨਨ੍ਤਰੋਵ ਅਨਨ੍ਤਰੂਪਨਿਸ੍ਸਯੋਤਿ ਏਵਮੇਤੇਸਂ ਨਾਨਤ੍ਤਂ ਵੇਦਿਤਬ੍ਬਂ.
ਪਕਤੋ ਉਪਨਿਸ੍ਸਯੋ ਪਕਤੂਪਨਿਸ੍ਸਯੋ, ਪਕਤੋ ਨਾਮ ਅਤ੍ਤਨੋ ਸਨ੍ਤਾਨੇ ਉਪ੍ਪਾਦਿਤੋ ਵਾ ਸਦ੍ਧਾਸੀਲਾਦਿਉਪਸੇਵਿਤੋ ਵਾ ਉਤੁਭੋਜਨਾਦਿਪਕਤਿਯਾਯੇਵ ਵਾ ਉਪਨਿਸ੍ਸਯੋ ਪਕਤੂਪਨਿਸ੍ਸਯੋ, ਇਤਿ ਪਰੂਪਨਿਸ੍ਸਯੇਨ ਅਮਿਸ੍ਸੋਤਿ ਅਤ੍ਥੋ. ਸੋ ਚ ਪਕਤੂਪਨਿਸ੍ਸਯੋ ‘‘ਸਦ੍ਧਂ ਉਪਨਿਸ੍ਸਾਯ ਦਾਨਂ ਦੇਤਿ, ਸੀਲਂ ਸਮਾਦਿਯਤਿ, ਉਪੋਸਥਕਮ੍ਮਂ ਕਰੋਤਿ, ਝਾਨਂ ਉਪ੍ਪਾਦੇਤਿ; ਵਿਪਸ੍ਸਨਂ, ਮਗ੍ਗਂ, ਅਭਿਞ੍ਞਂ, ਸਮਾਪਤ੍ਤਿਂ ਉਪ੍ਪਾਦੇਤਿ; ਸੀਲਂ, ਸੁਤਂ, ਚਾਗਂ, ਪਞ੍ਞਂ ਉਪਨਿਸ੍ਸਾਯ ਦਾਨਂ ਦੇਤਿ…ਪੇ… ਸਮਾਪਤ੍ਤਿਂ ਉਪ੍ਪਾਦੇਤੀ’’ਤਿਆਦਿਨਾ ਇਮੇਸਂ ਸਦ੍ਧਾਦੀਨਂ ਵਸੇਨ ਬਹੁਧਾ ਵਿਭਤ੍ਤੋ, ਏਵਂ ਉਪਨਿਸ੍ਸਯਪਚ੍ਚਯੋ ਤਿਵਿਧੋ. ਨਿਦ੍ਦੇਸੇ ਪਨਾਯਂ ‘‘ਪੁਰਿਮਾ ਪੁਰਿਮਾ ਕੁਸਲਾ ਧਮ੍ਮਾ ਪਚ੍ਛਿਮਾਨਂ ਪਚ੍ਛਿਮਾਨਂ ਕੁਸਲਾਨਂ ਧਮ੍ਮਾਨਂ …ਪੇ… ਅਕੁਸਲਾਨਂ ਕੇਸਞ੍ਚਿ…ਪੇ… ਅਬ੍ਯਾਕਤਾਨਂ ਧਮ੍ਮਾਨਂ…ਪੇ… ਪੁਰਿਮਾ ਪੁਰਿਮਾ ਅਕੁਸਲਾ ਧਮ੍ਮਾ ਪਚ੍ਛਿਮਾਨਂ ਪਚ੍ਛਿਮਾਨਂ ਅਕੁਸਲਾਨਂ…ਪੇ… ਕੁਸਲਾਨਂ ਕੇਸਞ੍ਚਿ…ਪੇ… ਅਬ੍ਯਾਕਤਾਨਂ ਧਮ੍ਮਾਨਂ…ਪੇ… ਪੁਰਿਮਾ ਪੁਰਿਮਾ ਅਬ੍ਯਾਕਤਾ ਧਮ੍ਮਾ…ਪੇ… ਅਬ੍ਯਾਕਤਾਨਂ, ਕੁਸਲਾਨਂ, ਅਕੁਸਲਾਨਂ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ, ਪੁਗ੍ਗਲੋਪਿ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ, ਸੇਨਾਸਨਮ੍ਪੀ’’ਤਿ ਏਵਂ ਨਿਦ੍ਦਿਟ੍ਠੋ. ਤਤ੍ਥ ਪੁਰਿਮਾਤਿ ਅਨਨ੍ਤਰੂਪਨਿਸ੍ਸਯੇ ਸਮਨਨ੍ਤਰਾਤੀਤਾਵ ਲਬ੍ਭਨ੍ਤਿ.
ਆਰਮ੍ਮਣੂਪਨਿਸ੍ਸਯਪਕਤੂਪਨਿਸ੍ਸਯੇਸੁ ਪਨ ਨਾਨਾਵਿਧਿਵਸੇਨ ਪੁਰਿਮਤਰਾਵਾਤਿ ਤਯੋਪਿ ਰਾਸੀ ਕੁਸਲੇਨ ਕੁਸਲਪਦੇ ਲਬ੍ਭਨ੍ਤਿ. ਕੁਸਲੇਨ ਪਨਾਕੁਸਲੇ ਸਮਨਨ੍ਤਰਾਤੀਤਾ ਨ ਲਬ੍ਭਨ੍ਤਿ, ਤੇਨਾਹ ‘‘ਕੇਸਞ੍ਚੀ’’ਤਿ. ਇਦਂ ਹਿ ‘‘ਕੁਸਲੋ ਧਮ੍ਮੋ ਅਕੁਸਲਸ੍ਸ ਧਮ੍ਮਸ੍ਸ ਆਰਮ੍ਮਣੂਪਨਿਸ੍ਸਯੋ ਪਕਤੂਪਨਿਸ੍ਸਯੋ, ਆਰਮ੍ਮਣੂਪਨਿਸ੍ਸਯੋ ਪਨ ਦਾਨਂ ਦਤ੍ਵਾ…ਪੇ… ਤਂ ਗਰੁਂ ਕਤ੍ਵਾ ਰਾਗੋ ਉਪ੍ਪਜ੍ਜਤਿ…ਪੇ… ਪਕਤੂਪਨਿਸ੍ਸਯੋ ਸਦ੍ਧਂ ਉਪਨਿਸ੍ਸਾਯ ਮਾਨਂ ਜਪ੍ਪੇਤੀ’’ਤਿਆਦਿਨਾ ਪਞ੍ਹਾਵਾਰੇ ਆਗਤਂ ਇਮਂ ਨਯਂ ਸਨ੍ਧਾਯ ਵੁਤ੍ਤਂ.
ਅਕੁਸਲੇਨ ਕੁਸਲਪਦੇ ਹਿ ਸਮਨਨ੍ਤਰਾਤੀਤਾ ਨ ਲਬ੍ਭਨ੍ਤਿ, ਤੇਨਾਹ ‘‘ਕੇਸਞ੍ਚੀ’’ਤਿ. ਇਦਂ ਪਨ ‘‘ਅਕੁਸਲੋ ਧਮ੍ਮੋ ਕੁਸਲਸ੍ਸ ਧਮ੍ਮਸ੍ਸ ਪਕਤੂਪਨਿਸ੍ਸਯੋ. ਰਾਗਂ ਉਪਨਿਸ੍ਸਾਯ ਦਾਨਂ ਦੇਤਿ…ਪੇ… ਪਾਣਂ ਹਨ੍ਤ੍ਵਾ ਤਸ੍ਸ ਪਟਿਘਾਤਤ੍ਥਾਯ ਦਾਨਂ ਦੇਤੀ’’ਤਿਆਦਿਨਾ ਨਯੇਨ ਪਞ੍ਹਾਵਾਰੇ ਆਗਤਂ ਪਕਤੂਪਨਿਸ੍ਸਯਮੇਵ ਸਨ੍ਧਾਯ ਵੁਤ੍ਤਂ. ਯਥਾ ਹਿ ਅਕੁਸਲਂ ਕੁਸਲਸ੍ਸ ਅਨਨ੍ਤਰੂਪਨਿਸ੍ਸਯੋ ਨ ਹੋਤਿ, ਤਥਾ ਆਰਮ੍ਮਣੂਪਨਿਸ੍ਸਯੋਪਿ ਨ ਹੋਤਿ. ਨ ਹਿ ਤਂ ਗਰੁਂ ਕਤ੍ਵਾ ਕੁਸਲਂ ਪਵਤ੍ਤਤਿ.
ਅਕੁਸਲੇਨ ਅਬ੍ਯਾਕਤਪਦੇ ਪਨ ਆਰਮ੍ਮਣੂਪਨਿਸ੍ਸਯੋਵ ਨ ਲਬ੍ਭਤਿ. ਨ ਹਿ ਤਂ ਅਬ੍ਯਾਕਤਾ ਗਰੁਂ ਕਰੋਨ੍ਤਿ, ਅਨਨ੍ਤਰਾ ਪਨਸ੍ਸ ਹੋਨ੍ਤਿ. ਤੇਨੇਵੇਤ੍ਥ ‘‘ਕੇਸਞ੍ਚੀ’’ਤਿ ਨ ਵੁਤ੍ਤਂ. ਸੇਸਪਦੇਸੁ ਤਯੋਪਿ ਉਪਨਿਸ੍ਸਯਾ ਲਬ੍ਭਨ੍ਤੇਵ. ‘‘ਪੁਗ੍ਗਲੋਪਿ, ਸੇਨਾਸਨਮ੍ਪੀ’’ਤਿ ਇਦਮ੍ਪਿ ਦ੍ਵਯਂ ਪਕਤੂਪਨਿਸ੍ਸਯਵਸੇਨੇਵੇਤ੍ਥ ਵੁਤ੍ਤਂ, ਉਤੁਭੋਜਨਾਦਯੋ ਚੇਤ੍ਥ ਸਙ੍ਗਹੇਤਬ੍ਬਾ. ਇਮਸ੍ਮਿਞ੍ਚ ਪਚ੍ਚਯੇ ਏਕਚ੍ਚਾਯ ਪਞ੍ਞਤ੍ਤਿਯਾ ਸਦ੍ਧਿਂ ਸਬ੍ਬੇਪਿ ਚਤੁਭੂਮਕਾ ਧਮ੍ਮਾ ਸਙ੍ਗਹਿਤਾਤਿ ਵੇਦਿਤਬ੍ਬਾਤਿ ਅਯਂ ਉਪਨਿਸ੍ਸਯਪਚ੍ਚਯੇ ਨਯੋ.
ਪਠਮਤਰਂ ਉਪ੍ਪਜ੍ਜਿਤ੍ਵਾ ਵਤ੍ਤਮਾਨਭਾਵੇਨ ਉਪਕਾਰਕਾ ਰੂਪਧਮ੍ਮਾ ਪੁਰੇਜਾਤਪਚ੍ਚਯੋ, ਸੋ ਪਸਾਦਤਬ੍ਬਿਸਯਹਦਯਵਤ੍ਥੁਵਸੇਨ ਏਕਾਦਸਵਿਧੋ. ਨਿਦ੍ਦੇਸੇ ਚ ‘‘ਚਕ੍ਖਾਯਤਨਂ ਚਕ੍ਖੁਵਿਞ੍ਞਾਣਧਾਤੁਯਾ ਤਂਸਮ੍ਪਯੁਤ੍ਤਕਾਨਞ੍ਚ ਧਮ੍ਮਾਨਂ ਪੁਰੇਜਾਤਪਚ੍ਚਯੇਨ ਪਚ੍ਚਯੋ…ਪੇ… ਕਾਯਾਯਤਨਂ ਕਾਯਵਿਞ੍ਞਾਣਧਾਤੁਯਾ …ਪੇ… ਰੂਪਾਯਤਨਂ ਚਕ੍ਖੁਵਿਞ੍ਞਾਣਧਾਤੁਯਾ…ਪੇ… ਫੋਟ੍ਠਬ੍ਬਾਯਤਨਂ ਕਾਯਵਿਞ੍ਞਾਣਧਾਤੁਯਾ…ਪੇ… ਰੂਪਾਯਤਨਂ ਸਦ੍ਦਗਨ੍ਧਰਸਫੋਟ੍ਠਬ੍ਬਾਯਤਨਂ ਮਨੋਧਾਤੁਯਾ…ਪੇ… ਯਂ ਰੂਪਂ ਨਿਸ੍ਸਾਯ…ਪੇ… ਤਂ ਰੂਪਂ ਮਨੋਧਾਤੁਯਾ ਚ ਮਨੋਵਿਞ੍ਞਾਣਧਾਤੁਯਾ ਚ ਕਿਞ੍ਚਿਕਾਲੇ ਪੁਰੇਜਾਤਪਚ੍ਚਯੇਨ ਪਚ੍ਚਯੋ, ਕਿਞ੍ਚਿਕਾਲੇ ਨ ਪੁਰੇਜਾਤਪਚ੍ਚਯੇਨ ਪਚ੍ਚਯੋ’’ਤਿ ਏਵਂ ਸਬ੍ਬਥਾਪਿ ਪਞ੍ਚਦ੍ਵਾਰੇ ਵਤ੍ਥਾਰਮ੍ਮਣਵਸੇਨ, ਮਨੋਦ੍ਵਾਰੇ ਵਤ੍ਥੁਵਸੇਨੇਵ ਚਾਯਂ ਨਿਦ੍ਦਿਟ੍ਠੋ. ਪਞ੍ਹਾਵਾਰੇ ਪਨ ਆਰਮ੍ਮਣਪੁਰੇਜਾਤਂ ‘‘ਅਰਹਾ ਚਕ੍ਖੁਂ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਵਿਪਸ੍ਸਤੀ’’ਤਿ ਆਗਤਤ੍ਤਾ ਮਨੋਦ੍ਵਾਰੇਪਿ ਅਟ੍ਠਾਰਸਨ੍ਨਂ ਰੂਪਾਨਂ ਵਸੇਨ ਆਰਮ੍ਮਣਪੁਰੇਜਾਤਮ੍ਪਿ ਲਬ੍ਭਤੇਵਾਤਿ ਅਯਂ ਪੁਰੇਜਾਤਪਚ੍ਚਯੇ ਨਯੋ.
ਪੁਰੇਜਾਤਾਨਂ ਰੂਪਧਮ੍ਮਾਨਂ ਉਪਤ੍ਥਮ੍ਭਕਟ੍ਠੇਨ ਉਪਕਾਰਕੋ ਅਰੂਪਧਮ੍ਮੋ ਪਚ੍ਛਾਜਾਤਪਚ੍ਚਯੋ ਗਿਜ੍ਝਪੋਤਕਸਰੀਰਾਨਂ ਆਹਾਰਾਸਾ ਚੇਤਨਾ ਵਿਯ. ਨਿਦ੍ਦੇਸੇਪਿ ਚਸ੍ਸ ‘‘ਪਚ੍ਛਾਜਾਤਾ ਚਿਤ੍ਤਚੇਤਸਿਕਾ ਧਮ੍ਮਾ ਪੁਰੇਜਾਤਸ੍ਸ ਇਮਸ੍ਸ ਕਾਯਸ੍ਸ ਪਚ੍ਛਾਜਾਤਪਚ੍ਚਯੇਨ ਪਚ੍ਚਯੋ’’ਤਿ ਏਵਂ ਵੁਤ੍ਤਂ. ਤਤ੍ਥ ਇਮਸ੍ਸ ਕਾਯਸ੍ਸਾਤਿ ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਭੂਤੁਪਾਦਾਯਰੂਪਕਾਯਸ੍ਸ. ਧਮ੍ਮਤੋ ਚਾਯਂ ਠਪੇਤ੍ਵਾ ਪਟਿਸਨ੍ਧਿਵਿਪਾਕੇ ਆਰੁਪ੍ਪਵਿਪਾਕੇ ਅਵਸੇਸਾ ਸਬ੍ਬੇ ਚਤੁਭੂਮਕਾ ਅਰੂਪਧਮ੍ਮਾਤਿ ਵੇਦਿਤਬ੍ਬਾਤਿ ਅਯਂ ਪਚ੍ਛਾਜਾਤਪਚ੍ਚਯੇ ਨਯੋ.
ਆਸੇਵਨਟ੍ਠੇਨ ਅਨਨ੍ਤਰਾਨਂ ਪਗੁਣਬਲਵਭਾਵੇਨ ਉਪਕਾਰਕੋ ਧਮ੍ਮੋ ਆਸੇਵਨਪਚ੍ਚਯੋ ਗਨ੍ਥਾਦਿਪੁਰਿਮਾਭਿਯੋਗੋ ਵਿਯ. ਸੋ ਕੁਸਲਾਕੁਸਲਕਿਰਿਯਜਵਨਵਸੇਨ ਤਿਵਿਧੋ. ਨਿਦ੍ਦੇਸੇ ਪਨਸ੍ਸ ‘‘ਪੁਰਿਮਾ ਪੁਰਿਮਾ ਕੁਸਲਾ ਧਮ੍ਮਾ ਪਚ੍ਛਿਮਾਨਂ ਪਚ੍ਛਿਮਾਨਂ ਕੁਸਲਾਨਂ ਧਮ੍ਮਾਨਂ…ਪੇ… ਅਕੁਸਲਾਨਂ ਧਮ੍ਮਾਨਂ…ਪੇ… ਕਿਰਿਯਾਬ੍ਯਾਕਤਾਨਂ ਧਮ੍ਮਾਨਂ ਆਸੇਵਨਪਚ੍ਚਯੇਨ ਪਚ੍ਚਯੋ’’ਤਿ ਨਿਦ੍ਦਿਟ੍ਠੋ. ਤਤ੍ਥ ਪੁਰਿਮਾ ਪੁਰਿਮਾਤਿ ਸਬ੍ਬਤ੍ਥ ਸਮਨਨ੍ਤਰਾਤੀਤਾਵ ਦਟ੍ਠਬ੍ਬਾ, ਤਤ੍ਥਾਪਿ ਕੁਸਲਾਦਯੋ ਅਬ੍ਯਾਕਤਾਦੀਨਂ ਭਿਨ੍ਨਜਾਤਿਕਾਨਂ ਸਮਨਨ੍ਤਰਾਨਮ੍ਪਿ ਵਾਸਨਾਸਙ੍ਖਾਤੇਨ ਆਸੇਵਨੇਨ ਪਗੁਣਤਰਬਲਵਭਾਵਵਿਸਿਟ੍ਠਂ ਅਤ੍ਤਨੋ ਕੁਸਲਾਦਿਭਾਵਸਙ੍ਖਾਤਗਤਿਂ ਗਾਹਾਪੇਤੁਂ ਅਸਮਤ੍ਥਤਾਯ ਆਸੇਵਨਪਚ੍ਚਯਾ ਨ ਹੋਨ੍ਤਿ, ਭੂਮਿਤੋ, ਪਨ ਆਰਮ੍ਮਣਤੋ ਚ ਭਿਨ੍ਨਾਪਿ ਕਾਮਾਵਚਰਤਿਹੇਤੁਕਕੁਸਲਕਿਰਿਯਾ ਅਤ੍ਤਨਾ ਸਦਿਸਵੇਦਨਾਨਮੇਵ ਮਹਗ੍ਗਤਲੋਕੁਤ੍ਤਰਕੁਸਲਕਿਰਿਯਾਨਮ੍ਪਿ, ਸਙ੍ਖਾਰਾਰਮ੍ਮਣਞ੍ਚ ਅਨੁਲੋਮਕੁਸਲਂ ਨਿਬ੍ਬਾਨਾਰਮ੍ਮਣਸ੍ਸ ਗੋਤ੍ਰਭੁਕੁਸਲਸ੍ਸ ਆਸੇਵਨਪਚ੍ਚਯਾ ਹੋਨ੍ਤਿਯੇਵ. ਲੋਕੁਤ੍ਤਰੋ ਪਨ ਆਸੇਵਨਪਚ੍ਚਯੋ ਨਤ੍ਥਿ, ਤਥਾ ਵਿਪਾਕੋ ਕਮ੍ਮਪਰਿਣਾਮਿਤਤ੍ਤਾਤਿ ਅਯਂ ਆਸੇਵਨਪਚ੍ਚਯੇ ਨਯੋ.
ਚਿਤ੍ਤਪ੍ਪਯੋਗਸਙ੍ਖਾਤੇਨ ਕਿਰਿਯਭਾਵੇਨ ਉਪਕਾਰਕੋ ਧਮ੍ਮੋ ਕਮ੍ਮਪਚ੍ਚਯੋ. ਸੋ ਨਾਨਕ੍ਖਣਿਕਾਯ ਕੁਸਲਾਕੁਸਲਚੇਤਨਾਯ ਚੇਵ ਸਹਜਾਤਾਯ ਚ ਸਬ੍ਬਾਯਪਿ ਚੇਤਨਾਯ ਵਸੇਨ ਦੁਵਿਧੋ ਹੋਤਿ. ਨਿਦ੍ਦੇਸੇਪਿ ਚਸ੍ਸ ‘‘ਕੁਸਲਾਕੁਸਲਂ ਕਮ੍ਮਂ ਵਿਪਾਕਾਨਂ ਖਨ੍ਧਾਨਂ ਕਟਤ੍ਤਾ ਚ ਰੂਪਾਨਂ…ਪੇ… ਚੇਤਨਾ ਸਮ੍ਪਯੁਤ੍ਤਕਾਨਂ ਧਮ੍ਮਾਨਂ ਤਂਸਮੁਟ੍ਠਾਨਾਨਞ੍ਚ ਰੂਪਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ’’ਤਿ ਦ੍ਵਿਧਾਵ ਵੁਤ੍ਤੋ. ਤਤ੍ਥ ਕਮ੍ਮਨ੍ਤਿ ਚੇਤਨਾਕਮ੍ਮਮੇਵ. ਕਟਤ੍ਤਾ ਚ ਰੂਪਾਨਨ੍ਤਿ ਕਮ੍ਮਸ੍ਸ ਕਟਤ੍ਤਾ ਉਪਚਿਤਤ੍ਤਾ ਨਿਪ੍ਫਾਦਿਤਤ੍ਤਾ ਉਪ੍ਪਨ੍ਨਾਨਂ ਕਮ੍ਮਜਾਨਂ ਰੂਪਾਨਂ ਕਟਤ੍ਤਾ ਏਵ, ਕਮ੍ਮਮ੍ਪਿ ਕਾਲਨ੍ਤਰੇਯੇਵ ਅਵਸੇਸਪਚ੍ਚਯਸਮਾਯੋਗੇ ਸਤਿ ਅਤ੍ਤਨੋ ਫਲਂ ਉਪ੍ਪਾਦੇਤਿ, ਨ ਤੁ ਵਿਨਟ੍ਠਤ੍ਤਾ ਠਿਤਤ੍ਤਾ ਤਂ ਵਾ ਠਿਤਂ ਪਨ ਕਮ੍ਮਂ ਨ ਜਨੇਤਿ. ਏਵਂ ਤਂਸਮੁਟ੍ਠਾਨਨ੍ਤਿ ਇਮਿਨਾ ਪਟਿਸਨ੍ਧਿਯਂ ਕਟਤ੍ਤਾਰੂਪਗ੍ਗਹਣਂ ਦਟ੍ਠਬ੍ਬਨ੍ਤਿ ਅਯਂ ਕਮ੍ਮਪਚ੍ਚਯੇ ਨਯੋ.
ਨਿਰੁਸ੍ਸਾਹਸਨ੍ਤਭਾਵੇਨ ਨਿਰੁਸ੍ਸਾਹਸਨ੍ਤਭਾਵਾਯ ਉਪਕਾਰਕੋ ਵਿਪਾਕਧਮ੍ਮੋ ਵਿਪਾਕਪਚ੍ਚਯੋ. ਸੋ ਪਵਤ੍ਤੇ ਚਿਤ੍ਤਸਮੁਟ੍ਠਾਨਾਨਂ, ਪਟਿਸਨ੍ਧਿਕ੍ਖਣੇ ਕਟਤ੍ਤਾਰੂਪਾਨਂ, ਸਬ੍ਬਤ੍ਥ ਚ ਸਮ੍ਪਯੁਤ੍ਤਧਮ੍ਮਾਨਂ ਪਚ੍ਚਯੋ ਹੋਤਿ. ਯਥਾਹ ਸਬ੍ਬਪਞ੍ਹਾਵਾਰੇ – ‘‘ਵਿਪਾਕਾਬ੍ਯਾਕਤੋ ਏਕੋ ਖਨ੍ਧੋ ਤਿਣ੍ਣਨ੍ਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਪਟਿਸਨ੍ਧਿਕ੍ਖਣੇ…ਪੇ… ਕਟਤ੍ਤਾ ਚ ਰੂਪਾਨਂ ਵਿਪਾਕਪਚ੍ਚਯੇਨ ਪਚ੍ਚਯੋ’’ਤਿਆਦਿ. ਨਿਦ੍ਦੇਸੇ ਪਨਸ੍ਸ ‘‘ਵਿਪਾਕਾ ਚਤ੍ਤਾਰੋ ਖਨ੍ਧਾ ਅਰੂਪਿਨੋ ਅਞ੍ਞਮਞ੍ਞਂ ਵਿਪਾਕਪਚ੍ਚਯੇਨ ਪਚ੍ਚਯੋ’’ਤਿ ਏਤ੍ਤਕਮੇਵ ਵੁਤ੍ਤਂ. ਤਂ ਪਞ੍ਹਾਵਾਰੇ ਵੁਤ੍ਤਵਿਧਾਨਂ ਸਨ੍ਧਾਯ ਸਾਵਸੇਸਂ ਵੁਤ੍ਤਨ੍ਤਿ ਅਯਂ ਵਿਪਾਕਪਚ੍ਚਯੇ ਨਯੋ.
ਰੂਪਾਰੂਪਾਨਂ ਉਪਤ੍ਥਮ੍ਭਕਟ੍ਠੇਨ ਉਪਕਾਰਕਾ ਚਤ੍ਤਾਰੋ ਆਹਾਰਾ ਆਹਾਰਪਚ੍ਚਯੋ. ਨਿਦ੍ਦੇਸੇ ਪਨ ‘‘ਕਬਲ਼ੀਕਾਰੋ ਆਹਾਰੋ ਇਮਸ੍ਸ ਕਾਯਸ੍ਸ…ਪੇ… ਅਰੂਪਿਨੋ ਆਹਾਰਾ ਸਮ੍ਪਯੁਤ੍ਤਕਾਨਂ ਧਮ੍ਮਾਨਂ ਤਂਸਮੁਟ੍ਠਾਨਾਨਞ੍ਚ ਰੂਪਾਨਂ ਆਹਾਰਪਚ੍ਚਯੇਨ ਪਚ੍ਚਯੋ’’ਤਿ ਏਵਂ ਨਿਦ੍ਦਿਟ੍ਠੋ. ਤਤ੍ਥ ਚਤੁਸਮੁਟ੍ਠਾਨਮੁਪਗਤਾ ਓਜਾ ਕਬਲ਼ੀਕਾਰੋ ਆਹਾਰੋ ਨਾਮ. ਸੋ ਯਸ੍ਮਾ ਆਹਾਰੂਪਸੇਵੀਨਞ੍ਞੇਵ ਅਜ੍ਝੋਹਟਾਹਾਰਉਤੁਜਾਹਾਰੂਪਤ੍ਥਦ੍ਧੋ ਏਵ ਚ ਕਮ੍ਮਜਾਦਿਆਹਾਰੋ ਇਮਸ੍ਸ ਕਾਯਸ੍ਸ ਠਿਤਿਯਾ ਪਵਤ੍ਤਤਿ, ਨ ਅਞ੍ਞਥਾ, ਤਸ੍ਮਾ ਕਬਲ਼ੀਕਾਤਬ੍ਬਉਤੁਜਵਤ੍ਥੁਸਨ੍ਨਿਸ੍ਸਿਤਤਾਦਸ੍ਸਨਤ੍ਥਂ ਕਬਲ਼ੀਕਾਰੋ ਆਹਾਰੋਤਿ ਵੁਤ੍ਤੋ. ਕਿਞ੍ਚਾਪਿ ਚਾਯਂ ‘‘ਇਮਸ੍ਸ ਕਾਯਸ੍ਸਾ’’ਤਿ ਅਵਿਸੇਸੇਨ ਵੁਤ੍ਤੋ, ਵਿਸੇਸਤੋ ਪਨ ਆਹਾਰਜਰੂਪਸ੍ਸ ਜਨਕੋ ਚੇਵ ਅਨੁਪਾਲਕੋ ਚ ਹੁਤ੍ਵਾ ਸੇਸਤਿਸਨ੍ਤਤਿਸਮੁਟ੍ਠਾਨਰੂਪਸ੍ਸ ਅਨੁਪਾਲਕੋ ਏਵ ਹੁਤ੍ਵਾ ਆਹਾਰਪਚ੍ਚਯੋ ਹੋਤਿ. ਤਂਸਮੁਟ੍ਠਾਨਾਨਨ੍ਤਿ ਇਮਿਨਾ ਪਟਿਸਨ੍ਧਿਯਂ ਕਮ੍ਮਸਮੁਟ੍ਠਾਨਾਨਿ ਗਹਿਤਾਨੇਵ. ਪਞ੍ਹਾਵਾਰੇ ਹਿ ‘‘ਪਟਿਸਨ੍ਧਿਕ੍ਖਣੇ ਵਿਪਾਕਾਬ੍ਯਾਕਤਾ ਆਹਾਰਾ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਕਟਤ੍ਤਾ ਚ ਰੂਪਾਨਂ ਆਹਾਰਪਚ੍ਚਯੇਨ ਪਚ੍ਚਯੋ’’ਤਿ ਵੁਤ੍ਤਨ੍ਤਿ ਅਯਂ ਆਹਾਰਪਚ੍ਚਯੇ ਨਯੋ.
ਅਧਿਪਤਿਯਟ੍ਠੇਨ ਉਪਕਾਰਕਾ ਇਤ੍ਥਿਨ੍ਦ੍ਰਿਯਪੁਰਿਸਿਨ੍ਦ੍ਰਿਯਵਜ੍ਜਾ ਵੀਸਤਿ ਇਨ੍ਦ੍ਰਿਯਾ ਇਨ੍ਦ੍ਰਿਯਪਚ੍ਚਯੋ. ਇਤ੍ਥਿਨ੍ਦ੍ਰਿਯਪੁਰਿਸਿਨ੍ਦ੍ਰਿਯਾਨਿ ਹਿ ਕਿਞ੍ਚਾਪਿ ਇਤ੍ਥਿਪੁਰਿਸਲਿਙ੍ਗਾਕਪ੍ਪਾਦੀਨਂ ਬੀਜਭੂਤਾਨਿ, ਨੇਵ ਪਨ ਤੇਸਂ, ਨ ਅਞ੍ਞੇਸਂ ਇਨ੍ਦ੍ਰਿਯਾਦਿਪਚ੍ਚਯਤਂ ਫਰਨ੍ਤਿ. ਸੁਤ੍ਤਨ੍ਤਿਕਪਰਿਯਾਯੇਨ ਪਨ ਤੇਸਂ ਪਕਤੂਪਨਿਸ੍ਸਯਭਾਵਂ ਫਰਨ੍ਤੀਤਿ ਬਾਵੀਸਤੇਵ ਇਨ੍ਦ੍ਰਿਯਾਨਿ. ਤਤ੍ਥ ਚਕ੍ਖੁਨ੍ਦ੍ਰਿਯਾਦਯੋ ਪਞ੍ਚ ਅਰੂਪਧਮ੍ਮਾਨਮੇਵ ਇਨ੍ਦ੍ਰਿਯਪਚ੍ਚਯੋ, ਰੂਪਜੀਵਿਤਿਨ੍ਦ੍ਰਿਯਂ ਕਟਤ੍ਤਾਰੂਪਾਨਮੇਵ, ਸੇਸਾ ਰੂਪਾਰੂਪਾਨਂ. ਨਿਦ੍ਦੇਸੇ ‘‘ਚਕ੍ਖੁਨ੍ਦ੍ਰਿਯਂ ਚਕ੍ਖੁਵਿਞ੍ਞਾਣਧਾਤੁਯਾ ਤਂਸਮ੍ਪਯੁਤ੍ਤਕਾਨਞ੍ਚ ਧਮ੍ਮਾਨਂ…ਪੇ… ਕਾਯਵਿਞ੍ਞਾਣਧਾਤੁਯਾ…ਪੇ… ਰੂਪਜੀਵਿਤਿਨ੍ਦ੍ਰਿਯਂ ਕਟਤ੍ਤਾਰੂਪਾਨਂ, ਅਰੂਪਿਨੋ ਇਨ੍ਦ੍ਰਿਯਾ ਸਮ੍ਪਯੁਤ੍ਤਕਾਨਂ ਧਮ੍ਮਾਨਂ ਤਂਸਮੁਟ੍ਠਾਨਾਨਞ੍ਚ ਰੂਪਾਨਂ ਇਨ੍ਦ੍ਰਿਯਪਚ੍ਚਯੇਨ ਪਚ੍ਚਯੋ’’ਤਿ ਏਵਂ ਨਿਦ੍ਦਿਟ੍ਠੋ. ਤਂਸਮੁਟ੍ਠਾਨਾਨਨ੍ਤਿ ਏਤ੍ਥਾਪਿ ਕਟਤ੍ਤਾਰੂਪਮ੍ਪਿ ਸਙ੍ਗਹਿਤਂ. ਪਞ੍ਹਾਵਾਰੇ ਹਿ ‘‘ਪਟਿਸਨ੍ਧਿਕ੍ਖਣੇ ਵਿਪਾਕਾਬ੍ਯਾਕਤਾ ਇਨ੍ਦ੍ਰਿਯਾ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਕਟਤ੍ਤਾ ਚ ਰੂਪਾਨ’’ਨ੍ਤਿ ਵੁਤ੍ਤਨ੍ਤਿ ਅਯਂ ਇਨ੍ਦ੍ਰਿਯਪਚ੍ਚਯੇ ਨਯੋ.
ਉਪਨਿਜ੍ਝਾਯਨਟ੍ਠੇਨ ਉਪਕਾਰਕਾਨਿ ਠਪੇਤ੍ਵਾ ਦ੍ਵਿਪਞ੍ਚਵਿਞ੍ਞਾਣੇਸੁ ਵੇਦਨਾਤ੍ਤਯਂ, ਏਕਗ੍ਗਤਞ੍ਚ ਸੇਸਾਨਿ ਕੁਸਲਾਦਿਭੇਦਾਨਿ ਸਤ੍ਤ ਝਾਨਙ੍ਗਾਨਿ ਝਾਨਪਚ੍ਚਯੋ. ਦ੍ਵਿਪਞ੍ਚਵਿਞ੍ਞਾਣਾਨਂ ਹਿ ਅਭਿਨਿਪਾਤਮਤ੍ਤਤ੍ਤਾ ਤੇਸੁ ਵੇਦਨੇਕਗ੍ਗਤਾ ਉਪਨਿਜ੍ਝਾਯਨਾਕਾਰਸ੍ਸ ਅਭਾਵੇਨ ਝਾਨਙ੍ਗੇਸੁ ਨ ਉਦ੍ਧਟਾ, ਨਿਦ੍ਦੇਸੇ ਪਨਸ੍ਸ ‘‘ਝਾਨਙ੍ਗਾਨਿ ਝਾਨਸਮ੍ਪਯੁਤ੍ਤਕਾਨਂ ਧਮ੍ਮਾਨਂ ਤਂਸਮੁਟ੍ਠਾਨਾਨਞ੍ਚ ਰੂਪਾਨਂ ਝਾਨਪਚ੍ਚਯੇਨ ਪਚ੍ਚਯੋ’’ਤਿ ਨਿਦ੍ਦਿਟ੍ਠੋ. ਇਧਾਪਿ ਤਂਸਮੁਟ੍ਠਾਨਾਨਨ੍ਤਿ ਇਮਿਨਾ ਚ ਕਟਤ੍ਤਾਰੂਪਮ੍ਪਿ ਗਹਿਤਂ. ਪਞ੍ਹਾਵਾਰੇਹਿ ‘‘ਪਟਿਸਨ੍ਧਿਕ੍ਖਣੇ ਵਿਪਾਕਾਬ੍ਯਾਕਤਾਨਿ ਝਾਨਙ੍ਗਾਨਿ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਕਟਤ੍ਤਾ ਚ ਰੂਪਾਨ’’ਨ੍ਤਿ ਵੁਤ੍ਤਨ੍ਤਿ ਅਯਂ ਝਾਨਪਚ੍ਚਯੇ ਨਯੋ.
ਯਤੋ ਤਤੋ ਵਾ ਨਿਯ੍ਯਾਨਟ੍ਠੇਨ ਉਪਕਾਰਕਾਨਿ ਕੁਸਲਾਦਿਭੇਦਾਨਿ ਦ੍ਵਾਦਸ ਮਗ੍ਗਙ੍ਗਾਨਿ ਮਗ੍ਗਪਚ੍ਚਯੋ. ਨਿਦ੍ਦੇਸੇ ਪਨ ‘‘ਮਗ੍ਗਙ੍ਗਾਨਿ ਮਗ੍ਗਸਮ੍ਪਯੁਤ੍ਤਕਾਨਂ ਧਮ੍ਮਾਨਂ ਤਂਸਮੁਟ੍ਠਾਨਾਨਞ੍ਚ ਰੂਪਾਨਂ ਮਗ੍ਗਪਚ੍ਚਯੇਨ ਪਚ੍ਚਯੋ’’ਤਿ ਨਿਦ੍ਦਿਟ੍ਠੋ. ਏਤ੍ਥਾਪਿ ਤਂਸਮੁਟ੍ਠਾਨਾਨਨ੍ਤਿ ਇਮਿਨਾ ਕਟਤ੍ਤਾਰੂਪਗ੍ਗਹਣਂ. ਪਞ੍ਹਾਵਾਰੇ ਹਿ ‘‘ਪਟਿਸਨ੍ਧਿਕ੍ਖਣੇ ਵਿਪਾਕਾਬ੍ਯਾਕਤਾਨਿ ਮਗ੍ਗਙ੍ਗਾਨਿ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਕਟਤ੍ਤਾ ਚ ਰੂਪਾਨ’’ਨ੍ਤਿ ਵੁਤ੍ਤਂ, ਅਹੇਤੁਕਚਿਤ੍ਤੇਸੁ ਚੇਤ੍ਥ ਵਿਜ੍ਜਮਾਨਾਨਿ ਮਗ੍ਗਙ੍ਗਾਨਿ ਮਗ੍ਗਪਚ੍ਚਯਾ ਨ ਹੋਨ੍ਤਿ. ਅਯਂ ਮਗ੍ਗਪਚ੍ਚਯੇ ਨਯੋ.
ਏਕਵਤ੍ਥੁਕਏਕਾਰਮ੍ਮਣਏਕੁਪ੍ਪਾਦਏਕਨਿਰੋਧਸਙ੍ਖਾਤੇਨ ਸਮ੍ਪਯੁਤ੍ਤਭਾਵੇਨ ਉਪਕਾਰਕਾ ਅਰੂਪਿਨੋ ਧਮ੍ਮਾ ਸਮ੍ਪਯੁਤ੍ਤਪਚ੍ਚਯੋ. ਨਿਦ੍ਦੇਸੇ ਪਨ ‘‘ਚਤ੍ਤਾਰੋ ਖਨ੍ਧਾ ਅਰੂਪਿਨੋ ਧਮ੍ਮਾ ਅਞ੍ਞਮਞ੍ਞਂ ਸਮ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ’’ਤਿ ਨਿਦ੍ਦਿਟ੍ਠੋਤਿ ਅਯਂ ਸਮ੍ਪਯੁਤ੍ਤਪਚ੍ਚਯੇ ਨਯੋ.
ਏਕਵਤ੍ਥੁਕਾਦਿਭਾਵਾਨੁਪਗਮੇਨ ਉਪਕਾਰਕਾ ਰੂਪਿਨੋ ਧਮ੍ਮਾ ਅਰੂਪੀਨਂ, ਅਰੂਪਿਨੋ ਧਮ੍ਮਾ ਰੂਪੀਨਂ ਵਿਪ੍ਪਯੁਤ੍ਤਪਚ੍ਚਯੋ, ਸੋ ਸਹਜਾਤਪੁਰੇਜਾਤਪਚ੍ਛਾਜਾਤਵਸੇਨ ਤਿਵਿਧੋ ਹੋਤਿ. ਵੁਤ੍ਤਂ ਹੇਤਂ ‘‘ਸਹਜਾਤਾ ਕੁਸਲਾ ਖਨ੍ਧਾ ਚਿਤ੍ਤਸਮੁਟ੍ਠਾਨਾਨਂ ਰੂਪਾਨਂ…ਪੇ… ਪਚ੍ਛਾਜਾਤਾ ਕੁਸਲਾ ਖਨ੍ਧਾ ਪੁਰੇਜਾਤਸ੍ਸ ਇਮਸ੍ਸ ਕਾਯਸ੍ਸ ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ’’ਤਿਆਦਿ. ਪੁਰੇਜਾਤਂ ਪਨ ਛਵਤ੍ਥੁਵਸੇਨੇਵ ਵੇਦਿਤਬ੍ਬਂ. ਨਿਦ੍ਦੇਸੇ ਪਨਸ੍ਸ ‘‘ਰੂਪਿਨੋ ਧਮ੍ਮਾ ਅਰੂਪੀਨਂ…ਪੇ… ਅਰੂਪਿਨੋ ਧਮ੍ਮਾ ਰੂਪੀਨਂ ਧਮ੍ਮਾਨਂ ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ’’ਤਿ ਏਵਂ ਸਾਮਞ੍ਞਤੋ ਨਿਦ੍ਦਿਟ੍ਠੋ. ਤਤ੍ਥ ਰੂਪਿਨੋਤਿ ਇਦਂ ਛਵਤ੍ਥੂਨਂ ਵਸੇਨ ਵੁਤ੍ਤਂ, ਰੂਪਾਦਯੋ ਪਨ ਆਰਮ੍ਮਣਧਮ੍ਮਾ ਸਮ੍ਪਯੋਗਾਸਙ੍ਕਾਯਾਭਾਵੇਨ ਵਿਪ੍ਪਯੁਤ੍ਤਪਚ੍ਚਯਾ ਨ ਵੁਤ੍ਤਾ. ਚਕ੍ਖਾਦੀਨਂ ਹਿ ਵਤ੍ਥੂਨਂ ਅਬ੍ਭਨ੍ਤਰਤੋ ਅਰੂਪਧਮ੍ਮਾ ਨਿਕ੍ਖਮਨ੍ਤਾ ਵਿਯ ਉਪ੍ਪਜ੍ਜਨ੍ਤਿ, ਤਤ੍ਥ ਸਮ੍ਪਯੋਗਾਸਙ੍ਕਾ ਹੋਤਿ. ਪਞ੍ਹਾਵਾਰੇਪਿ ਹਿ ‘‘ਵਤ੍ਥੁ ਕੁਸਲਾਨਂ ਖਨ੍ਧਾਨਂ…ਪੇ… ਚਕ੍ਖਾਯਤਨਂ ਚਕ੍ਖੁਵਿਞ੍ਞਾਣਧਾਤੁਯਾ’’ਤਿਆਦਿਨਾ ਛ ਵਤ੍ਥੂਨੇਵ ਉਦ੍ਧਟਾਨਿ, ਅਰੂਪਿਨੋ ਧਮ੍ਮਾ ਰੂਪੀਨਨ੍ਤਿ ਏਤ੍ਥਾਪਿ ਨਿਬ੍ਬਾਨਂ ਅਰੂਪਮ੍ਪਿ ਸਮਾਨਂ ਰੂਪਸ੍ਸ ਵਿਪ੍ਪਯੁਤ੍ਤਪਚ੍ਚਯੋ ਨ ਹੋਤਿ ਸਬ੍ਬਥਾ ਸਮ੍ਪਯੋਗਾਸਙ੍ਕਾਭਾਵਤੋ, ‘‘ਚਤੂਹਿ ਸਮ੍ਪਯੋਗੋ ਚਤੂਹਿ ਵਿਪ੍ਪਯੋਗੋ’’ਤਿ (ਧਾਤੁ. ੩) ਹਿ ਵੁਤ੍ਤਨ੍ਤਿ ਅਯਂ ਵਿਪ੍ਪਯੁਤ੍ਤਪਚ੍ਚਯੇ ਨਯੋ.
ਪਚ੍ਚੁਪ੍ਪਨ੍ਨਲਕ੍ਖਣੇਨ ਅਤ੍ਥਿਭਾਵੇਨ ਤਾਦਿਸਸ੍ਸੇਵ ਧਮ੍ਮਸ੍ਸ ਉਪਤ੍ਥਮ੍ਭਕਟ੍ਠੇਨ ਉਪਕਾਰਕੋ ਧਮ੍ਮੋ ਅਤ੍ਥਿਪਚ੍ਚਯੋ, ਸੋ ਨਿਦ੍ਦੇਸੇ ‘‘ਚਤ੍ਤਾਰੋ ਖਨ੍ਧਾ ਅਰੂਪਿਨੋ ਅਞ੍ਞਮਞ੍ਞਂ…ਪੇ… ਚਤ੍ਤਾਰੋ ਮਹਾਭੂਤਾ ਅਞ੍ਞਮਞ੍ਞਂ, ਓਕ੍ਕਨ੍ਤਿਕ੍ਖਣੇ ਨਾਮਰੂਪਂ ਅਞ੍ਞਮਞ੍ਞਂ, ਚਿਤ੍ਤਚੇਤਸਿਕਾ ਧਮ੍ਮਾ ਚਿਤ੍ਤਸਮੁਟ੍ਠਾਨਾਨਂ ਰੂਪਾਨਂ, ਮਹਾਭੂਤਾ ਉਪਾਦਾਰੂਪਾਨਂ, ਚਕ੍ਖਾਯਤਨਂ ਚਕ੍ਖੁਵਿਞ੍ਞਾਣਧਾਤੁਯਾ…ਪੇ… ਰੂਪਾਯਤਨਂ ਚਕ੍ਖੁਵਿਞ੍ਞਾਣਧਾਤੁਯਾ ਤਂਸਮ੍ਪਯੁਤ੍ਤਕਾਨਞ੍ਚ ਧਮ੍ਮਾਨਂ…ਪੇ… ਰੂਪਾਯਤਨਂ…ਪੇ… ਫੋਟ੍ਠਬ੍ਬਾਯਤਨਂ ਮਨੋਧਾਤੁਯਾ…ਪੇ… ਮਨੋਧਾਤੁਯਾ ਚ ਮਨੋਵਿਞ੍ਞਾਣਧਾਤੁਯਾ ਚ ਤਂਸਮ੍ਪਯੁਤ੍ਤਕਾਨਞ੍ਚ ਧਮ੍ਮਾਨਂ ਅਤ੍ਥਿਪਚ੍ਚਯੇਨ ਪਚ੍ਚਯੋ’’ਤਿ ਏਵਂ ਸਹਜਾਤਪੁਰੇਜਾਤਵਸੇਨ ਚ ਬਹੁਧਾ ਨਿਦ੍ਦਿਟ੍ਠੋ, ਪਞ੍ਹਾਵਾਰੇ ਪਨ ‘‘ਸਹਜਾਤਂ ਪੁਰੇਜਾਤਂ ਪਚ੍ਛਾਜਾਤਂ ਆਹਾਰਂ ਇਨ੍ਦ੍ਰਿਯ’’ਨ੍ਤਿ ਇਮੇਸਂ ਪਞ੍ਚਨ੍ਨਮ੍ਪਿ ਵਸੇਨ ਆਗਤਤ੍ਤਾ ਪਚ੍ਛਾਜਾਤਕਬਲ਼ੀਕਾਰਆਹਾਰਰੂਪਜੀਵਿਤਿਨ੍ਦ੍ਰਿਯਾਨਂ ਵਸੇਨਾਪਿ ਅਤ੍ਥਿਪਚ੍ਚਯੋ ਗਹੇਤਬ੍ਬੋਵਾਤਿ ਅਯਂ ਅਤ੍ਥਿਪਚ੍ਚਯੇ ਨਯੋ.
ਅਤ੍ਤਨੋ ਅਨਨ੍ਤਰਂ ਉਪ੍ਪਜ੍ਜਮਾਨਾਨਂ ਅਰੂਪਧਮ੍ਮਾਨਂ ਪਵਤ੍ਤਿਓਕਾਸਦਾਨਵਸੇਨ ਉਪਕਾਰਕਾ ਸਮਨਨ੍ਤਰਨਿਰੁਦ੍ਧਾ ਅਰੂਪਧਮ੍ਮਾ ਨਤ੍ਥਿਪਚ੍ਚਯੋ, ਨਿਦ੍ਦੇਸੇ ਪਨ ‘‘ਸਮਨਨ੍ਤਰਨਿਰੁਦ੍ਧਾ ਚਿਤ੍ਤਚੇਤਸਿਕਾ ਧਮ੍ਮਾ ਪਟੁਪ੍ਪਨ੍ਨਾਨਂ ਚਿਤ੍ਤਚੇਤਸਿਕਾਨਂ ਧਮ੍ਮਾਨਂ ਨਤ੍ਥਿਪਚ੍ਚਯੇਨ ਪਚ੍ਚਯੋ’’ਤਿ ਏਵਂ ਸਾਮਞ੍ਞਤੋਵ ਨਿਦ੍ਦਿਟ੍ਠੋ. ਸਬ੍ਬਥਾ ਅਨਨ੍ਤਰਪਚ੍ਚਯਸਦਿਸਤਾਯ ਤਤ੍ਥ ਨਿਦ੍ਦਿਟ੍ਠਨਯੇਨੇਵੇਤ੍ਥ ਵਿਸੇਸੋ ਞਾਤਬ੍ਬੋਤਿ ਅਯਂ ਨਤ੍ਥਿਪਚ੍ਚਯੇ ਨਯੋ.
ਨਤ੍ਥਿਪਚ੍ਚਯਧਮ੍ਮਾਵ ਵਿਗਤਭਾਵੇਨ ਉਪਕਾਰਕਤ੍ਤਾ ਵਿਗਤਪਚ੍ਚਯੋਤਿ ਸਹ ਨਿਦ੍ਦੇਸੇਨ ਨਤ੍ਥਿਪਚ੍ਚਯਸਦਿਸੋਵਾਤਿ.
ਅਵਿਗਤਪਚ੍ਚਯੋਪਿ ਸਬ੍ਬਥਾ ਅਤ੍ਥਿਪਚ੍ਚਯਸਦਿਸੋਵ, ਦੇਸਨਾਵਿਲਾਸੇਨ, ਵੇਨੇਯ੍ਯਵਸੇਨ ਵਾ ਅਯਂ ਦੁਕੋ ਵੁਤ੍ਤੋਤਿ ਅਯਂ ਅਵਿਗਤਪਚ੍ਚਯੇ ਨਯੋ.
ਪਕਿਣ੍ਣਕਵਿਨਿਚ੍ਛਯੋ
ਇਮੇਸੁ ਪਨ ਚਤੁਵੀਸਤਿਯਾ ਪਚ੍ਚਯੇਸੁ ਞਾਣਚਾਰਸ੍ਸ ਵਿਸਦਭਾਵਤ੍ਥਂ –
ਧਮ੍ਮਤੋ ਕਾਲਤੋ ਚੇਵ, ਏਕਸ੍ਸਾਨੇਕਪਚ੍ਚਯਾ;
ਅਨੇਕੇਸਞ੍ਚ ਧਮ੍ਮਾਨਂ, ਏਕਪਚ੍ਚਯਭਾਵਤੋ.
ਸਭਾਗਾ ਵਿਸਭਾਗਾ ਚ, ਯੁਗਲ਼ਾ ਜਨਕਾਦਿਤੋ;
ਸਬ੍ਬਟ੍ਠਾਨਾਦਿਭੇਦਾ ਚ, ਰੂਪਾਰੂਪਵਿਕਪ੍ਪਤੋ;
ਭਵਤੋ ਸਙ੍ਗਹਾ ਞੇਯ੍ਯੋ, ਪਕਿਣ੍ਣਕਵਿਨਿਚ੍ਛਯੋ.
ਤਤ੍ਥ ਧਮ੍ਮਤੋਤਿ ਇਮੇਸੁ ਹਿ ਪਚ੍ਚਯੇਸੁ ਹੇਤੁਪਚ੍ਚਯੋ ਤਾਵ ਨਾਮਰੂਪਧਮ੍ਮੇਸੁ ਨਾਮਧਮ੍ਮੇਕਦੇਸੋ, ਤਥਾ ਸਹਜਾਤਾਧਿਪਤਿਕਮ੍ਮਝਾਨਮਗ੍ਗਪਚ੍ਚਯਾ, ਤਥਾ ਆਸੇਵਨਵਿਪਾਕਪਚ੍ਚਯਾ, ਚਤੁਕ੍ਖਨ੍ਧਸਙ੍ਗਹਿਤਾਪਿ ਵਿਪਾਕਧਮ੍ਮਾ ਅਨਨ੍ਤਰਸਮਨਨ੍ਤਰਪਚ੍ਛਾਜਾਤਸਮ੍ਪਯੁਤ੍ਤਨਤ੍ਥਿਵਿਗਤਪਚ੍ਚਯਾ. ਨਿਬ੍ਬਾਨਸ੍ਸ ਅਸਙ੍ਗਹਤੋ ਨਾਮੇਕਦੇਸੋਤਿਪਿ ਵਤ੍ਤੁਂ ਵਟ੍ਟਤਿ. ਪੁਰੇਜਾਤਪਚ੍ਚਯੋ ਰੂਪਧਮ੍ਮੋਵ, ਸੇਸਾ ਯਥਾਲਾਭਵਸੇਨ ਨਾਮਰੂਪਧਮ੍ਮਾ. ਤਤ੍ਥ ਚ ਆਰਮ੍ਮਣਾਧਿਪਤਿਆਰਮ੍ਮਣੂਪਨਿਸ੍ਸਯਪਕਤੂਪਨਿਸ੍ਸਯੇਸੁ ਪਞ੍ਞਤ੍ਤਿਪਿ ਸਙ੍ਗਹਿਤਾਤਿ ਅਯਂ ਧਮ੍ਮਤੋ ਵਿਨਿਚ੍ਛਯੋ.
ਕਾਲਤੋ ਪਨ ਹੇਤੁਸਹਜਾਤਅਞ੍ਞਮਞ੍ਞਨਿਸ੍ਸਯਪੁਰੇਜਾਤਪਚ੍ਛਾਜਾਤਵਿਪਾਕਆਹਾਰਇਨ੍ਦ੍ਰਿਯਝਾਨਮਗ੍ਗਸਮ੍ਪਯੁਤ੍ਤਵਿਪ੍ਪਯੁਤ੍ਤਅਤ੍ਥਿਅਵਿਗਤਪਚ੍ਚਯਾ ਪਨ੍ਨਰਸ ਪਚ੍ਚੁਪ੍ਪਨ੍ਨਾਵ ਹੁਤ੍ਵਾ ਅਤ੍ਤਨੋ ਫਲਸ੍ਸ ਪਚ੍ਚਯਾ ਹੋਨ੍ਤਿ, ਅਨਨ੍ਤਰਸਮਨਨ੍ਤਰਆਸੇਵਨਨਤ੍ਥਿਵਿਗਤਪਚ੍ਚਯਾ ਪਞ੍ਚ ਅਤੀਤਾ ਏਵ ਹੁਤ੍ਵਾ, ਕਮ੍ਮਪਚ੍ਚਯੋ ਪਨੇਕੋ ਪਚ੍ਚੁਪ੍ਪਨ੍ਨੋਪਿ ਅਤੀਤੋਪਿ ਹੁਤ੍ਵਾ, ਸੇਸਾ ਆਰਮ੍ਮਣਅਧਿਪਤਿਉਪਨਿਸ੍ਸਯਪਚ੍ਚਯਾ ਤਯੋਪਿ ਤੇਕਾਲਿਕਾਪਿ, ਨਿਬ੍ਬਾਨਪਞ੍ਞਤ੍ਤਿਵਸੇਨ ਕਾਲਵਿਮੁਤ੍ਤਾਪਿ ਹੁਤ੍ਵਾ ਅਤ੍ਤਨੋ ਫਲਸ੍ਸ ਪਚ੍ਚਯਾ ਹੋਨ੍ਤੀਤਿ ਅਯਂ ਕਾਲਤੋ ਵਿਨਿਚ੍ਛਯੋ.
ਏਕਸ੍ਸਾਨੇਕਪਚ੍ਚਯਾਤਿ ਏਕਧਮ੍ਮਸ੍ਸ, ਏਕਪਚ੍ਚਯਸ੍ਸ ਚ ਅਨੇਕਪਚ੍ਚਯਭਾਵਤੋ. ਕਥਂ? ਹੇਤੁਪਚ੍ਚਯੇ ਤਾਵ ਅਮੋਹੋ ਏਕੋ ਧਮ੍ਮੋ, ਸੋ ਪੁਰੇਜਾਤਕਮ੍ਮਆਹਾਰਝਾਨਵਜ੍ਜਾਨਂ ਵੀਸਤਿਯਾ ਪਚ੍ਚਯਾਨਂ ਵਸੇਨ ਅਨੇਕਪਚ੍ਚਯੋ ਹੋਤਿ, ਹੇਤੁਪਚ੍ਚਯਤ੍ਤਂ ਅਵਿਜਹਨ੍ਤੋਵ ਅਧਿਪਤਿਸਹਜਾਤਅਞ੍ਞਮਞ੍ਞਨਿਸ੍ਸਯਵਿਪਾਕਿਨ੍ਦ੍ਰਿਯਮਗ੍ਗਸਮ੍ਪਯੁਤ੍ਤਵਿਪ੍ਪਯੁਤ੍ਤਅਤ੍ਥਿਅਵਿਗਤਾਨਂ ਅਞ੍ਞੇਸਂ ਏਕਾਦਸਨ੍ਨਂ ਵਸੇਨ ਵਾ ਅਨੇਕਪਚ੍ਚਯੋ ਹੋਤਿ, ਤਥਾ ਅਲੋਭਾਦਯੋ, ਤੇਸੁ ਪਨ ਅਲੋਭਾਦੋਸਾ ਇਨ੍ਦ੍ਰਿਯਮਗ੍ਗਪਚ੍ਚਯਾ ਨ ਹੋਨ੍ਤਿ, ਤੇ ਤਯੋ ਅਵਿਪਾਕਭੂਤਾ ਲੋਭਦੋਸਮੋਹਾ ਵਿਪਾਕਪਚ੍ਚਯਾਪਿ ਨ ਹੋਨ੍ਤਿ, ਤੇ ਪਨ ਅਮੋਹਵਜ੍ਜਿਤਾ ਪਞ੍ਚ ਅਧਿਪਤਿਪਚ੍ਚਯਾ ਨ ਹੋਨ੍ਤਿ, ਤਥਾ ਸੇਸਾਪਿ ਅਵਿਪਾਕਭੂਤਾ.
ਆਰਮ੍ਮਣਪਚ੍ਚਯੇ ਰੂਪਾਯਤਨਂ ਚਕ੍ਖੁਵਿਞ੍ਞਾਣਧਾਤੁਯਾ ਆਰਮ੍ਮਣਪੁਰੇਜਾਤਅਤ੍ਥਿਅਵਿਗਤਾਨਂ ਚਤੁਨ੍ਨਂ ਵਸੇਨ ਅਨੇਕਪਚ੍ਚਯੋ ਹੋਤਿ, ਤਥਾ ਮਨੋਧਾਤੁਯਾ, ਅਹੇਤੁਕਮਨੋਵਿਞ੍ਞਾਣਧਾਤੁਯਾ ਚ. ਸਹੇਤੁਕਾਯ ਪਨ ਆਰਮ੍ਮਣਾਧਿਪਤਿਆਰਮ੍ਮਣੂਪਨਿਸ੍ਸਯਾਨਮ੍ਪਿ ਵਸੇਨ, ਸਦ੍ਦਾਦੀਸੁਪਿ ਏਸੇਵ ਨਯੋ. ਧਮ੍ਮਾਯਤਨਂ ਪਨ ਨਿਸ੍ਸਯਵਿਪ੍ਪਯੁਤ੍ਤਾਨਂ ਵਸੇਨਾਪਿ ਅਨੇਕਪਚ੍ਚਯੋ ਹੋਤਿ, ਤਥਾ ਆਰਮ੍ਮਣਪਚ੍ਚਯਤ੍ਤਂ ਅਵਿਜਹਨ੍ਤੋਵ ਆਰਮ੍ਮਣਾਧਿਪਤਿਨਿਸ੍ਸਯਉਪਨਿਸ੍ਸਯਪੁਰੇਜਾਤਵਿਪ੍ਪਯੁਤ੍ਤਅਤ੍ਥਿਅਵਿਗਤਾਨਂ ਵਸੇਨ ਅਪਰੇਸਮ੍ਪਿ ਸਤ੍ਤਨ੍ਨਂ ਵਸੇਨ ਅਨੇਕਪਚ੍ਚਯੋ ਹੋਤੀਤਿ ਅਯਮੇਤ੍ਥ ਉਕ੍ਕਟ੍ਠਪਰਿਚ੍ਛੇਦੋ. ਤਤ੍ਥ ਅਰੂਪਾਨਂ ਪਨ ਰੂਪਾਨਂ ਵਾ ਅਤੀਤਾਨਾਗਤਾਨਂ ਆਰਮ੍ਮਣਪਚ੍ਚਯਭਾਵੇ ਸਤਿ ਆਰਮ੍ਮਣਾਧਿਪਤਿਉਪਨਿਸ੍ਸਯਮਤ੍ਤਮੇਵ ਉਤ੍ਤਰਿ ਲਬ੍ਭਤਿ.
ਅਧਿਪਤਿਪਚ੍ਚਯੇ ਆਰਮ੍ਮਣਾਧਿਪਤਿ ਵੁਤ੍ਤਨਯੋਵ. ਸਹਜਾਤਾਧਿਪਤੀਸੁ ਚਿਤ੍ਤਂ ਹੇਤੁਪੁਰੇਜਾਤਕਮ੍ਮਝਾਨਮਗ੍ਗਵਜ੍ਜਾਨਂ ਏਕੂਨਵੀਸਤਿਯਾ ਪਚ੍ਚਯਾਨਂ ਵਸੇਨ ਅਨੇਕਪਚ੍ਚਯੋ ਹੋਤਿ, ਅਧਿਪਤਿਪਚ੍ਚਯਤ੍ਤਂ ਅਵਿਜਹਨ੍ਤੋ ਅਪਰੇਸਂ ਸਹਜਾਤਅਞ੍ਞਮਞ੍ਞਨਿਸ੍ਸਯਵਿਪਾਕਾਹਾਰਿਨ੍ਦ੍ਰਿਯਸਮ੍ਪਯੁਤ੍ਤਵਿਪ੍ਪਯੁਤ੍ਤਅਤ੍ਥਿਅਵਿਗਤਾਨਂ ਦਸਨ੍ਨਂ ਵਸੇਨੇਵ, ਤਥਾ ਵੀਰਿਯਂ ਆਹਾਰਪਚ੍ਚਯਵਜ੍ਜਾਨਂ ਮਗ੍ਗਪਚ੍ਚਯਸਹਿਤਾਨਂ ਵਸੇਨ, ਛਨ੍ਦੋ ਆਹਾਰਿਨ੍ਦ੍ਰਿਯਵਜ੍ਜਾਨਂ ਵਸੇਨ ਅਨੇਕਪਚ੍ਚਯੋ ਹੋਤਿ, ਵੀਮਂਸਾ ਹੇਤੁਪਚ੍ਚਯੇ ਵੁਤ੍ਤਨਯਾਵ.
ਅਨਨ੍ਤਰਪਚ੍ਚਯੇ ਚਤੂਸੁ ਖਨ੍ਧੇਸੁ ਵੇਦਨਾਕ੍ਖਨ੍ਧੋ ਤਾਵ ਹੇਤੁਪੁਰੇਜਾਤਕਮ੍ਮਾਹਾਰਮਗ੍ਗਪਚ੍ਚਯਵਜ੍ਜਾਨਂ ਏਕੂਨਵੀਸਤਿਯਾ ਵਸੇਨ, ਸਞ੍ਞਾਕ੍ਖਨ੍ਧੋ ਤੇਸੁ ਇਨ੍ਦ੍ਰਿਯਝਾਨਵਜ੍ਜਾਨਂ ਸਤ੍ਤਰਸਨ੍ਨਂ ਵਸੇਨ, ਸਙ੍ਖਾਰਕ੍ਖਨ੍ਧੋ ਹੇਤੁਪੁਰੇਜਾਤਕਮ੍ਮਿਨ੍ਦ੍ਰਿਯਝਾਨਮਗ੍ਗਵਜ੍ਜਾਨਂ ਅਟ੍ਠਾਰਸਨ੍ਨਂ ਵਸੇਨ, ਤਥਾ ਚੇਤਨਾ ਕਮ੍ਮਸਹਿਤਾਨਂ, ਵਿਤਕ੍ਕੋ ਹੇਤੁਪੁਰੇਜਾਤਕਮ੍ਮਆਹਾਰਿਨ੍ਦ੍ਰਿਯਵਜ੍ਜਾਨਂ ਝਾਨਮਗ੍ਗਸਹਿਤਾਨਂ, ਵਿਚਾਰੋ, ਪੀਤਿ ਚ ਆਨਨ੍ਤਰਿਯਾਨਂ ਮਗ੍ਗਵਜ੍ਜਾਨਂ, ਏਕਗ੍ਗਤਾ ਹੇਤੁਪੁਰੇਜਾਤਕਮ੍ਮਾਹਾਰਵਜ੍ਜਾਨਂ ਵੀਸਤਿਯਾ ਪਚ੍ਚਯਾਨਂ ਵਸੇਨ, ਸਦ੍ਧਾ, ਜੀਵਿਤਿਨ੍ਦ੍ਰਿਯਞ੍ਚ ਅਨਨ੍ਤਰਾਨਂ ਹੇਤੁਪੁਰੇਜਾਤਕਮ੍ਮਾਹਾਰਝਾਨਮਗ੍ਗਵਜ੍ਜਾਨਂ ਅਟ੍ਠਾਰਸਨ੍ਨਂ, ਸਤਿ ਮਗ੍ਗਸਹਿਤਾਨਂ ਏਕੂਨਵੀਸਤਿਯਾ, ਹਿਰਿਓਤ੍ਤਪ੍ਪਕਾਯਪਸ੍ਸਦ੍ਧਾਦਿਛਯੁਗਾ, ਯੇਵਾਪਨਕੇਸੁ ਅਧਿਮੋਕ੍ਖਮਨਸਿਕਾਰਤਤ੍ਰਮਜ੍ਝਤ੍ਤਤਾ, ਕਰੁਣਾਮੁਦਿਤਾ ਚ ਹੇਤੁਪੁਰੇਜਾਤਕਮ੍ਮਾਹਾਰਝਾਨਮਗ੍ਗਿਨ੍ਦ੍ਰਿਯਵਜ੍ਜਾਨਂ ਸਤ੍ਤਰਸਨ੍ਨਂ, ਵਿਰਤਿਯੋ ਪਨ ਮਗ੍ਗਸਹਿਤਾਨਂ ਅਟ੍ਠਾਰਸਨ੍ਨਂ, ਮਿਚ੍ਛਾਦਿਟ੍ਠਿ ਤਤੋ ਵਿਪਾਕਵਜ੍ਜਾਨਂ ਸਤ੍ਤਰਸਨ੍ਨਂ ਵਸੇਨ, ਮਿਚ੍ਛਾਵਾਚਾਕਮ੍ਮਨ੍ਤਾਜੀਵਾ ਤੇਹਿ ਚੇਵ ਕਮ੍ਮਾਹਾਰਪਚ੍ਚਯੇਹਿ ਚਾਤਿ ਏਕੂਨਵੀਸਤਿਯਾ ਪਚ੍ਚਯਾਨਂ ਵਸੇਨ, ਅਹਿਰਿਕਂ ਅਨੋਤ੍ਤਪ੍ਪਂ ਮਾਨੋ ਥਿਨਂ ਮਿਦ੍ਧਂ ਉਦ੍ਧਚ੍ਚਨ੍ਤਿ ਇਮੇ ਹੇਤੁਪੁਰੇਜਾਤਕਮ੍ਮਵਿਪਾਕਾਹਾਰਿਨ੍ਦ੍ਰਿਯਝਾਨਮਗ੍ਗਵਜ੍ਜਾਨਂ ਸੋਲ਼ਸਨ੍ਨਂ, ਵਿਚਿਕਿਚ੍ਛਾ ਇਸ੍ਸਾਮਚ੍ਛਰਿਯਕੁਕ੍ਕੁਚ੍ਚਾਨਿ ਤਤੋ ਅਧਿਪਤਿਵਜ੍ਜਾਨਂ ਪਨ੍ਨਰਸਨ੍ਨਂ ਵਸੇਨ ਅਨੇਕਪਚ੍ਚਯਾ ਹੋਨ੍ਤਿ. ਅਨਨ੍ਤਰਪਚ੍ਚਯਤ੍ਤਂ ਅਵਿਜਹਨ੍ਤਾਨਂ ਪਨੇਤੇਸਂ ਸਮਨਨ੍ਤਰਉਪਨਿਸ੍ਸਯਕਮ੍ਮਨਤ੍ਥਿਵਿਗਤਾਨਂ ਅਪਰੇਸਂ ਛਨ੍ਨਂ ਵਸੇਨ ਚ. ਵਿਞ੍ਞਾਣਕ੍ਖਨ੍ਧਸ੍ਸ ਅਧਿਪਤਿਪਚ੍ਚਯੇਨੇਵ ਅਨੇਕਪਚ੍ਚਯਭਾਵੋ ਵੇਦਿਤਬ੍ਬੋ.
ਸਹਜਾਤਪਚ੍ਚਯੇ ਮਹਾਭੂਤਾਨਿ ਆਰਮ੍ਮਣਆਰਮ੍ਮਣਾਧਿਪਤਿਸਹਜਾਤਅਞ੍ਞਮਞ੍ਞਨਿਸ੍ਸਯਉਪਨਿਸ੍ਸਯਪੁਰੇਜਾਤਅਤ੍ਥਿਅਵਿਗਤਾਨਂ ਨਵਨ੍ਨਂ, ਹਦਯਵਤ੍ਥੁ ਤੇਸਞ੍ਞੇਵ ਵਿਪ੍ਪਯੁਤ੍ਤਸਹਿਤਾਨਂ ਵਸੇਨ. ਨਿਸ੍ਸਯਪਚ੍ਚਯੇ ਚਕ੍ਖਾਯਤਨਾਦੀਨਿ ਆਰਮ੍ਮਣਆਰਮ੍ਮਣਾਧਿਪਤਿਨਿਸ੍ਸਯਉਪਨਿਸ੍ਸਯਪੁਰੇਜਾਤਇਨ੍ਦ੍ਰਿਯਵਿਪ੍ਪਯੁਤ੍ਤਅਤ੍ਥਿਅਵਿਗਤਾਨਂ ਨਵਨ੍ਨਂ ਵਸੇਨ. ਪੁਰੇਜਾਤਪਚ੍ਚਯੇ ਰੂਪਸਦ੍ਦਗਨ੍ਧਰਸਾਯਤਨਾਦੀਨਿ ਆਰਮ੍ਮਣਆਰਮ੍ਮਣਾਧਿਪਤਿਉਪਨਿਸ੍ਸਯਪੁਰੇਜਾਤਅਤ੍ਥਿਅਵਿਗਤਾਨਂ ਛਨ੍ਨਂ ਵਸੇਨ. ਆਹਾਰਪਚ੍ਚਯੇ ਓਜਾ ਆਰਮ੍ਮਣਆਰਮ੍ਮਣਾਧਿਪਤਿਉਪਨਿਸ੍ਸਯਾਹਾਰਅਤ੍ਥਿਅਵਿਗਤਾਨਂ ਛਨ੍ਨਂ ਪਚ੍ਚਯਾਨਂ ਵਸੇਨ ਅਨੇਕਧਾ ਪਚ੍ਚਯੋ ਹੋਤਿ. ਤਂਤਂਪਚ੍ਚਯਤ੍ਤਂ ਅਵਿਜਹਨ੍ਤਾਨਂ ਤੇਸਂ ਤੇਸਂ ਸਬ੍ਬਤ੍ਥ ਆਰਮ੍ਮਣਾਧਿਪਤਿਅਨਨ੍ਤਰਸਮਨਨ੍ਤਰੂਪਨਿਸ੍ਸਯਾਦਿਪਚ੍ਚਯਤਾ ਵੁਤ੍ਤਨਯੇਨ ਵੇਦਿਤਬ੍ਬਾ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ ਅਯਂ ਏਕਸ੍ਸਾਨੇਕਪਚ੍ਚਯਤੋ ਵਿਨਿਚ੍ਛਯੋ.
ਅਨੇਕੇਸਞ੍ਚ ਧਮ੍ਮਾਨਂ, ਏਕਪਚ੍ਚਯਭਾਵਤੋਤਿ ਏਤੇਸੁ ਹਿ ਠਪੇਤ੍ਵਾ ਕਮ੍ਮਪਚ੍ਚਯਂ ਸੇਸੇਸੁ ਤੇਵੀਸਤਿਯਾ ਪਚ੍ਚਯੇਸੁ ਅਨੇਕੇ ਅਨੇਕੇਸਂ ਧਮ੍ਮਾਨਂ ਏਕਤੋ ਏਕੇਕਂ ਪਚ੍ਚਯਾ ਹੋਨ੍ਤਿ. ਕਮ੍ਮਪਚ੍ਚਯੋ ਪਨ ਚੇਤਨਾ ਏਕਧਮ੍ਮੋਵਾਤਿ ਅਯਂ ਅਨੇਕਧਮ੍ਮਾਨਂ ਏਕਪਚ੍ਚਯਭਾਵਤੋ ਵਿਨਿਚ੍ਛਯੋ.
ਸਭਾਗਾ ਵਿਸਭਾਗਾ ਚਾਤਿ ਏਤੇਸੁ ਹਿ ਅਨਨ੍ਤਰਸਮਨਨ੍ਤਰਅਨਨ੍ਤਰੂਪਨਿਸ੍ਸਯਾਸੇਵਨਨਤ੍ਥਿਵਿਗਤਪਚ੍ਚਯਾ ਸਭਾਗਾ, ਤਥਾ ਆਰਮ੍ਮਣਆਰਮ੍ਮਣਾਧਿਪਤਿਆਰਮ੍ਮਣੂਪਨਿਸ੍ਸਯਾ. ਪੁਰੇਜਾਤਪਚ੍ਚਯੋ ਪਨੇਤ੍ਥ ਪਚ੍ਛਾਜਾਤੇਨ ਵਿਸਭਾਗੋ, ਤਥਾ ਸਮ੍ਪਯੁਤ੍ਤੋ ਵਿਪ੍ਪਯੁਤ੍ਤੇਨ, ਅਤ੍ਥਿ ਨਤ੍ਥਿਨਾ, ਵਿਗਤੋ ਅਵਿਗਤੇਨਾਤਿ ਅਯਂ ਸਭਾਗਵਿਸਭਾਗਤੋ ਵਿਨਿਚ੍ਛਯੋ.
ਯੁਗਲ਼ਾਤਿ ਏਤ੍ਥ ਅਤ੍ਥਸਰਿਕ੍ਖਤਾਯ ਸਦ੍ਦਸਰਿਕ੍ਖਤਾਯ ਕਾਲਪਟਿਪਕ੍ਖਤਾਯ ਹੇਤੁਫਲਤਾਯ ਅਞ੍ਞਮਞ੍ਞਪਟਿਪਕ੍ਖਤਾਯਾਤਿ ਇਮੇਹਿ ਕਾਰਣੇਹਿ ਯੁਗਲ਼ਂ ਵੇਦਿਤਬ੍ਬਂ. ਅਨਨ੍ਤਰਸਮਨਨ੍ਤਰਾ ਹਿ ਅਤ੍ਥਸਰਿਕ੍ਖਤਾਯ ਏਕਂ ਯੁਗਲ਼ਂ ਨਾਮ. ਨਿਸ੍ਸਯੂਪਨਿਸ੍ਸਯਾ ਸਦ੍ਦਸਰਿਕ੍ਖਤਾਯ, ਪੁਰੇਜਾਤਪਚ੍ਛਾਜਾਤਾ ਕਾਲਪਟਿਪਕ੍ਖਤਾਯ, ਕਮ੍ਮਵਿਪਾਕਾ ਹੇਤੁਫਲਤਾਯ, ਸਮ੍ਪਯੁਤ੍ਤਵਿਪ੍ਪਯੁਤ੍ਤਾ ਅਞ੍ਞਮਞ੍ਞਪਟਿਪਕ੍ਖਤਾਯ ਏਕਂ ਯੁਗਲ਼ਂ, ਤਥਾ ਅਤ੍ਥਿਨਤ੍ਥਿਪਚ੍ਚਯਾ, ਵਿਗਤਅਵਿਗਤਪਚ੍ਚਯਾਤਿ ਅਯਂ ਯੁਗਲ਼ਤੋ ਵਿਨਿਚ੍ਛਯੋ.
ਜਨਕਾਦਿਤੋਤਿ ਜਨਕੋਪਤ੍ਥਮ੍ਭਕਤੋ. ਏਤੇਸੁ ਹਿ ਅਨਨ੍ਤਰਸਮਨਨ੍ਤਰੂਪਨਿਸ੍ਸਯਪਕਤੂਪਨਿਸ੍ਸਯਾਸੇਵਨਪਚ੍ਚਯਾ, ਨਾਨਕ੍ਖਣਿਕੋ ਕਮ੍ਮਪਚ੍ਚਯੋ, ਨਤ੍ਥਿਵਿਗਤਪਚ੍ਚਯਾ ਚਾਤਿ ਇਮੇ ਜਨਕਾ ਏਵ, ਨ ਉਪਤ੍ਥਮ੍ਭਕਾ. ਪਚ੍ਛਾਜਾਤਪਚ੍ਚਯੋ ਉਪਤ੍ਥਮ੍ਭਕੋ ਏਵ, ਨ ਜਨਕੋ. ਸੇਸਾ ਜਨਕਾ ਚੇਵ ਉਪਤ੍ਥਮ੍ਭਕਾ ਚਾਤਿ ਅਯਂ ਜਨਕਾਦਿਤੋ ਵਿਨਿਚ੍ਛਯੋ.
ਸਬ੍ਬਟ੍ਠਾਨਾਦਿਭੇਦਾਤਿ ਸਬ੍ਬਟ੍ਠਾਨਿਕਅਸਬ੍ਬਟ੍ਠਾਨਿਕਭੇਦਤੋ. ਏਤੇਸੁ ਹਿ ਸਹਜਾਤਨਿਸ੍ਸਯਅਤ੍ਥਿਅਵਿਗਤਪਚ੍ਚਯਾ ਸਬ੍ਬਟ੍ਠਾਨਿਕਾ. ਸਬ੍ਬੇਸੁ ਪਚ੍ਚਯੁਪ੍ਪਨ੍ਨੇਸੁ ਇਚ੍ਛਿਤਬ੍ਬਾ. ਏਤੇਹਿ ਵਿਨਾ ਉਪ੍ਪਜ੍ਜਮਾਨੋ ਏਕਧਮ੍ਮੋਪਿ ਨਤ੍ਥਿ. ਸੇਸਾ ਅਸਬ੍ਬਟ੍ਠਾਨਿਕਾ. ਤਤ੍ਥ ਚ ਆਰਮ੍ਮਣਆਰਮ੍ਮਣਾਧਿਪਤਿਅਨਨ੍ਤਰਸਮਨਨ੍ਤਰਾਨਨ੍ਤਰੂਪਨਿਸ੍ਸਯਪਕਤੂਪਨਿਸ੍ਸਯਪੁਰੇਜਾਤਾਸੇਵਨਸਮ੍ਪਯੁਤ੍ਤ ਅਤ੍ਥਿਨਤ੍ਥਿਵਿਗਤਪਚ੍ਚਯਾ ਅਰੂਪਧਮ੍ਮਾਨਞ੍ਞੇਵ ਕਾਰਣਤੋ ਅਸਬ੍ਬਟ੍ਠਾਨਿਕਾ. ਤਥਾ ਪਚ੍ਛਾਜਾਤਪਚ੍ਚਯੋ ਰੂਪਾਨਞ੍ਞੇਵ ਕਾਰਣਤੋ, ਸੇਸਾ ਏਕਚ੍ਚਾਨਂ ਰੂਪਾਰੂਪਧਮ੍ਮਾਨਂ ਕਾਰਣਤੋ ਅਸਬ੍ਬਟ੍ਠਾਨਿਕਾ. ਅਯਂ ਸਬ੍ਬਟ੍ਠਾਨਾਦਿਭੇਦਤੋ ਵਿਨਿਚ੍ਛਯੋ.
ਰੂਪਾਰੂਪਵਿਕਪ੍ਪਤੋਤਿ ਰੂਪਂ ਰੂਪਸ੍ਸ, ਰੂਪਂ ਅਰੂਪਸ੍ਸਾਤਿਆਦਿ ਵਿਕਪ੍ਪਤੋ. ਏਤੇਸੁ ਹਿ ਏਕੋਪਿ ਪਚ੍ਚਯੋ ਰੂਪਮੇਵ ਹੁਤ੍ਵਾ ਰੂਪਸ੍ਸੇਵ ਪਚ੍ਚਯੋ ਭਵਨ੍ਤੋ ਨਾਮ ਨਤ੍ਥਿ, ਰੂਪਮੇਵ ਪਨ ਅਰੂਪਸ੍ਸੇਵ ਅਤ੍ਥਿ, ਸੋ ਪੁਰੇਜਾਤਪਚ੍ਚਯੋ ਏਕੋ ਏਵ. ਰੂਪਮੇਵ ਹੁਤ੍ਵਾ ਰੂਪਾਰੂਪਸ੍ਸੇਵ ਪਚ੍ਚਯੋ ਨਾਮਾਤਿਪਿ ਨਤ੍ਥਿ, ਅਰੂਪਮੇਵ ਹੁਤ੍ਵਾ ਅਰੂਪਸ੍ਸੇਵ ਪਚ੍ਚਯੋਪਿ ਅਤ੍ਥਿ, ਸੋ ਅਨਨ੍ਤਰਸਮਨਨ੍ਤਰਆਸੇਵਨਸਮ੍ਪਯੁਤ੍ਤਨਤ੍ਥਿਵਿਗਤਵਸੇਨ ਛਬ੍ਬਿਧੋ. ਅਰੂਪਮੇਵ ਪਨ ਰੂਪਸ੍ਸੇਵ ਪਚ੍ਚਯੋਪਿ ਅਤ੍ਥਿ, ਸੋ ਪਚ੍ਛਾਜਾਤਪਚ੍ਚਯੋ ਏਕੋ ਏਵ. ਅਰੂਪਮੇਵ ਹੁਤ੍ਵਾ ਰੂਪਾਰੂਪਾਨਮ੍ਪਿ ਅਤ੍ਥਿ, ਸੋ ਹੇਤੁਕਮ੍ਮਵਿਪਾਕਝਾਨਮਗ੍ਗਵਸੇਨ ਪਞ੍ਚਵਿਧੋ. ਰੂਪਾਰੂਪਪਞ੍ਞਤ੍ਤਿ ਹੁਤ੍ਵਾ ਅਰੂਪਸ੍ਸੇਵ ਪਚ੍ਚਯੋਪਿ ਅਤ੍ਥਿ, ਸੋ ਆਰਮ੍ਮਣਉਪਨਿਸ੍ਸਯਵਸੇਨ ਦੁਵਿਧੋ. ਰੂਪਾਰੂਪਂ ਪਨ ਰੂਪਾਰੂਪਸ੍ਸਾਪਿ ਅਤ੍ਥਿ, ਸੋ ਅਧਿਪਤਿਸਹਜਾਤਅਞ੍ਞਮਞ੍ਞਨਿਸ੍ਸਯਾਹਾਰਿਨ੍ਦ੍ਰਿਯਵਿਪ੍ਪਯੁਤ੍ਤਅਤ੍ਥਿਅਵਿਗਤਵਸੇਨ ਨਵਵਿਧੋਤਿ ਅਯਂ ਰੂਪਾਰੂਪਵਿਕਪ੍ਪਤੋ ਵਿਨਿਚ੍ਛਯੋ.
ਭਵਤੋਤਿ ਇਮੇਸੁ ਹਿ ਪਚ੍ਚਯੇਸੁ ਪਞ੍ਚਵੋਕਾਰਭਵੇ ਤਾਵ ਨ ਕੋਚਿ ਪਚ੍ਚਯੋ ਨ ਲਬ੍ਭਤਿ ਨਾਮ, ਸਬ੍ਬੇਪਿ ਲਬ੍ਭਨ੍ਤਿ. ਚਤੁਵੋਕਾਰਭਵੇ ਪਨ ਪੁਰੇਜਾਤਪਚ੍ਛਾਜਾਤਵਿਪ੍ਪਯੁਤ੍ਤਪਚ੍ਚਯੇ ਅਪਨੇਤ੍ਵਾ ਸੇਸਾ ਏਕਵੀਸਤਿਮੇਵ. ਏਕਵੋਕਾਰਭਵੇ ਸਹਜਾਤਅਞ੍ਞਮਞ੍ਞਨਿਸ੍ਸਯਕਮ੍ਮਿਨ੍ਦ੍ਰਿਯਅਤ੍ਥਿਅਵਿਗਤਵਸੇਨ ਸਤ੍ਤੇਵ. ਬਾਹਿਰੇ ਪਨ ਅਨਿਨ੍ਦ੍ਰਿਯਬਦ੍ਧਰੂਪੇ ਤੇਸੁ ਕਮ੍ਮਿਨ੍ਦ੍ਰਿਯਵਜ੍ਜਾ ਪਞ੍ਚੇਵ ਲਬ੍ਭਨ੍ਤੀਤਿ ਅਯਂ ਭਵਤੋ ਵਿਨਿਚ੍ਛਯੋ.
ਸਙ੍ਗਹਾਤਿ ਸਬ੍ਬੇਪਿ ਹਿ ਇਮੇ ਚਤੁਵੀਸਤਿ ਪਚ੍ਚਯਾ ਆਰਮ੍ਮਣਸਹਜਾਤਉਪਨਿਸ੍ਸਯਪੁਰੇਜਾਤਪਚ੍ਛਾਜਾਤਕਮ੍ਮਾਹਾਰਿਨ੍ਦ੍ਰਿਯੇਸੁ ਅਟ੍ਠਸੁ ਚ ਪਚ੍ਚਯੇਸੁ ਸਙ੍ਗਹਂ ਗਚ੍ਛਨ੍ਤਿ. ਕਥਂ? ਤੇਸੁ ਹਿ ਹੇਤੁਅਞ੍ਞਮਞ੍ਞਵਿਪਾਕਝਾਨਮਗ੍ਗਸਮ੍ਪਯੁਤ੍ਤਪਚ੍ਚਯਾ ਛ ਸਹਜਾਤਪਚ੍ਚਯੇ ਸਙ੍ਗਹਂ ਗਚ੍ਛਨ੍ਤਿ. ਅਨਨ੍ਤਰਸਮਨਨ੍ਤਰਾਸੇਵਨਨਤ੍ਥਿਵਿਗਤਪਚ੍ਚਯਾ ਪਞ੍ਚ ਅਨਨ੍ਤਰੂਪਨਿਸ੍ਸਯੇ ਉਪਨਿਸ੍ਸਯਪਚ੍ਚਯੇ. ਨਿਸ੍ਸਯਪਚ੍ਚਯੋ ਸਹਜਾਤਪੁਰੇਜਾਤਭੇਦਤੋ ਦੁਵਿਧੋ. ਤਤ੍ਥ ਸਹਜਾਤੋ ਸਹਜਾਤਪਚ੍ਚਯੇ, ਪੁਰੇਜਾਤੋ ਪੁਰੇਜਾਤਪਚ੍ਚਯੇ. ਅਧਿਪਤਿਪਚ੍ਚਯੋਪਿ ਆਰਮ੍ਮਣਭੂਤੋ ਆਰਮ੍ਮਣੂਪਨਿਸ੍ਸਯੇ, ਸਹਜਾਤਭੂਤੋ ਸਹਜਾਤਪਚ੍ਚਯੇ. ਵਿਪ੍ਪਯੁਤ੍ਤਪਚ੍ਚਯੋਪਿ ਸਹਜਾਤਪੁਰੇਜਾਤਪਚ੍ਛਾਜਾਤਭੂਤਤਾਯ ਤਤ੍ਥ ਤਤ੍ਥ ਸਙ੍ਗਹਂ ਗਚ੍ਛਤਿ. ਅਤ੍ਥਿਅਵਿਗਤਪਚ੍ਚਯਾਪਿ ਸਹਜਾਤਪੁਰੇਜਾਤਪਚ੍ਛਾਜਾਤਾਹਾਰਿਨ੍ਦ੍ਰਿਯਭੂਤਤਾਯ ਤਤ੍ਥ ਤਤ੍ਥ ਪਚ੍ਚਯੇਸੁ ਸਙ੍ਗਹਂ ਗਚ੍ਛਨ੍ਤਿ. ਏਵਂ ਇਮੇਸੁ ਪਚ੍ਚਯੇਸੁ ਸਬ੍ਬਪਚ੍ਚਯਾਨਂ ਸਙ੍ਗਹੋ ਵੇਦਿਤਬ੍ਬੋ. ਤੇਨੇਵ ਤਿਕਪਟ੍ਠਾਨਪਾਲ਼ਿਯਂ ਪਚ੍ਚਨੀਯਨਯੇ ਇਮੇਸਂ ਅਟ੍ਠਨ੍ਨਂ ਪਚ੍ਚਯਾਨਂ ਵਸੇਨੇਵ ਕਤਿਪਯਪਞ੍ਹਾ ਵਿਸ੍ਸਜ੍ਜਿਤਾ. ਇਮੇਸਂ ਪਨ ਅਟ੍ਠਨ੍ਨਮ੍ਪਿ ਅਞ੍ਞਮਞ੍ਞਸਙ੍ਗਹੋਪਿ ਅਤ੍ਥਿਯੇਵ. ਤੇਸੁ ਹਿ ਆਰਮ੍ਮਣਪਚ੍ਚਯੋ ਅਧਿਪਤਿਭੂਤੋ ਉਪਨਿਸ੍ਸਯੇ, ਅਨਧਿਪਤਿਭੂਤੋ ਨ ਕਤ੍ਥਚੀਤਿ ਆਰਮ੍ਮਣਪਚ੍ਚਯੋ ਹੁਤ੍ਵਾ ਵਿਸੁਞ੍ਞੇਵ ਤਿਟ੍ਠਤਿ. ਕਮ੍ਮਪਚ੍ਚਯੋਪਿ ਸਹਜਾਤੋ ਸਹਜਾਤੇ. ਨਾਨਕ੍ਖਣਿਕੋ ਪਨ ਬਲਵਾ ਵਿਪਾਕਧਮ੍ਮਾਨਂ ਉਪਨਿਸ੍ਸਯੋ ਹੋਤੀਤਿ ਉਪਨਿਸ੍ਸਯਪਚ੍ਚਯੇ ਸਙ੍ਗਹਂ ਗਚ੍ਛਤਿ. ਬਲਵਾਪਿ ਪਨ ਕਮ੍ਮਜਰੂਪਾਨਂ, ਦੁਬ੍ਬਲੋ ਅਰੂਪਾਨਂ ਨਾਨਕ੍ਖਣਿਕਕਮ੍ਮਪਚ੍ਚਯੋ ਹੁਤ੍ਵਾ ਵਿਸੁਞ੍ਞੇਵ ਤਿਟ੍ਠਤਿ. ਆਹਾਰਪਚ੍ਚਯੋਪਿ ਅਰੂਪਭੂਤੋ ਸਹਜਾਤੇ, ਰੂਪਭੂਤੋ ਨ ਕਤ੍ਥਚੀਤਿ ਵਿਸੁਞ੍ਞੇਵ ਤਿਟ੍ਠਤਿ, ਇਨ੍ਦ੍ਰਿਯਪਚ੍ਚਯੋਪਿ ਅਰੂਪਭੂਤੋ ਸਹਜਾਤੇ, ਪਸਾਦਿਨ੍ਦ੍ਰਿਯਾ ਪੁਰੇਜਾਤੇ, ਰੂਪਜੀਵਿਤਿਨ੍ਦ੍ਰਿਯਂ ਨ ਕਤ੍ਥਚਿ ਸਙ੍ਗਹਂ ਗਚ੍ਛਤੀਤਿ ਇਨ੍ਦ੍ਰਿਯਪਚ੍ਚਯੋ ਹੁਤ੍ਵਾ ਵਿਸੁਞ੍ਞੇਵ ਤਿਟ੍ਠਤੀਤਿ ਏਵਮੇਵਂ ਅਞ੍ਞਮਞ੍ਞਸਙ੍ਗਹੋਪਿ ਅਤ੍ਥੇਵ. ਸਬ੍ਬੇਪਿ ਪਨੇਤੇ ਚਤੁਵੀਸਤਿ ਪਚ੍ਚਯਾ ਆਰਮ੍ਮਣਉਪਨਿਸ੍ਸਯਕਮ੍ਮਅਤ੍ਥਿਪਚ੍ਚਯੇਸੁ ਚਤੂਸੁਪਿ ਸਙ੍ਗਹਂ ਗਚ੍ਛਨ੍ਤੀਤਿ ਅਯਂ ਸਙ੍ਗਹਤੋ ਵਿਨਿਚ੍ਛਯੋ. ਅਯਂ ਅਨੁਤ੍ਤਾਨਪਦਤ੍ਥਸਹਿਤੋ ਸਙ੍ਖੇਪਤ੍ਥਵਿਨਿਚ੍ਛਯੋ.
ਪਕਿਣ੍ਣਕਵਿਨਿਚ੍ਛਯੋ ਨਿਟ੍ਠਿਤੋ.
ਵਿਭਙ੍ਗਨਯੇ ਪਨੇਤ੍ਥ ਪਾਲ਼ਿਵਵਤ੍ਥਾਨਂ ਤਾਵ ਸਙ੍ਖੇਪਤੋ ਏਵਂ ਵੇਦਿਤਬ੍ਬਂ. ਪਟ੍ਠਾਨਪਾਲ਼ਿਯਂ ਹਿ ‘‘ਹੇਤੁਪਚ੍ਚਯੋ…ਪੇ… ਅਵਿਗਤਪਚ੍ਚਯੋ’’ਤਿ ਪਚ੍ਚਯਪਦਾਨਿ ਮਾਤਿਕਾਵਸੇਨ ਨਿਕ੍ਖਿਪਿਤ੍ਵਾ ਤੇਸਂ ਪਚ੍ਚਯਾਨਂ – ‘‘ਹੇਤੂ ਹੇਤੁਸਮ੍ਪਯੁਤ੍ਤਕਾਨਂ ਧਮ੍ਮਾਨਂ ਤਂਸਮੁਟ੍ਠਾਨਾਨਞ੍ਚ ਰੂਪਾਨਂ ਹੇਤੁਪਚ੍ਚਯੇਨ ਪਚ੍ਚਯੋ’’ਤਿਆਦਿਨਾ ਨਯੇਨ ਪਚ੍ਚਯਭਾਜਨੀਯਸਙ੍ਖਾਤੋ ਨਿਦ੍ਦੇਸਵਾਰੋ ਪਠਮਂ ਵੁਤ੍ਤੋ. ਸੋਪਿ ਚ ਅਨਨ੍ਤਰਸਙ੍ਖੇਪਤ੍ਥਵਿਨਿਚ੍ਛਯੋ ਤਤ੍ਥ ਤਤ੍ਥ ਦਸ੍ਸਿਤੋ ਏਵ. ਤਦਨਨ੍ਤਰਂ ਤੇਸਂ ਚਤੁਵੀਸਤਿਯਾ ਪਚ੍ਚਯਾਨਂ ਕੁਸਲਤ੍ਤਿਕਾਦਯੋ ਦ੍ਵਾਵੀਸਤਿਤਿਕੇ, ਹੇਤੁਦੁਕਾਦਯੋ ਸਤਂ ਦੁਕੇ ਚ ਨਿਸ੍ਸਾਯ ਨਾਨਾਨਯਤੋ ਵਿਭਜਨਵਸੇਨ ਚਤੁਵੀਸਤਿਸਮਨ੍ਤਪਟ੍ਠਾਨਸਮੋਧਾਨਂ ਅਨਨ੍ਤਨਯਸਮਨ੍ਤਪਟ੍ਠਾਨਂ ਵਿਭਤ੍ਤਂ. ਕਥਂ? ਚਤੁਬ੍ਬਿਧਂ ਹਿ ਪਟ੍ਠਾਨਂ – ਅਨੁਲੋਮਪਟ੍ਠਾਨਂ, ਪਚ੍ਚਨੀਕਪਟ੍ਠਾਨਂ, ਅਨੁਲੋਮਪਚ੍ਚਨੀਕਪਟ੍ਠਾਨਂ, ਪਚ੍ਚਨੀਕਾਨੁਲੋਮਪਟ੍ਠਾਨਨ੍ਤਿ. ਤਤ੍ਥ ‘‘ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿਆਦਿਨਾ, ‘‘ਹੇਤੁਂ ਧਮ੍ਮਂ ਪਟਿਚ੍ਚ ਹੇਤੁਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿਆਦਿਨਾ ਕੁਸਲਾਦੀਨਂ, ਹੇਤੁਆਦੀਨਞ੍ਚ ਧਮ੍ਮਾਨਂ ਅਨੁਲੋਮਵਸੇਨ ਪਵਤ੍ਤਂ ਅਨੁਲੋਮਪਟ੍ਠਾਨਂ ਨਾਮ. ‘‘ਨਕੁਸਲਂ ਧਮ੍ਮਂ ਪਟਿਚ੍ਚ ਨਕੁਸਲੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ…ਪੇ… ਨਹੇਤੁਂ ਧਮ੍ਮਂ ਪਟਿਚ੍ਚ ਨਹੇਤੁਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿਆਦਿਨਾ ਕੁਸਲਾਦੀਨਂ, ਹੇਤੁਆਦੀਨਞ੍ਚ ਧਮ੍ਮਾਨਂ ਪਚ੍ਚਨੀਕਵਸੇਨ ਪਵਤ੍ਤਂ ਪਚ੍ਚਨੀਕਪਟ੍ਠਾਨਂ ਨਾਮ. ‘‘ਕੁਸਲਂ ਧਮ੍ਮਂ ਪਟਿਚ੍ਚ ਨਕੁਸਲੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ…ਪੇ… ਹੇਤੁਂ ਧਮ੍ਮਂ ਪਟਿਚ੍ਚ ਨਹੇਤੁਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿਆਦਿਨਾ ਪਵਤ੍ਤਂ ਅਨੁਲੋਮਪਚ੍ਚਨੀਕਪਟ੍ਠਾਨਂ ਨਾਮ. ‘‘ਨਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ…ਪੇ… ਨਹੇਤੁਂ ਧਮ੍ਮਂ ਪਟਿਚ੍ਚ ਹੇਤੁਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿਆਦਿਨਾ ਪਵਤ੍ਤਂ ਪਚ੍ਚਨੀਕਾਨੁਲੋਮਪਟ੍ਠਾਨਂ ਨਾਮ.
ਏਵਮੇਤੇਸੁ ਚਤੂਸੁ ਪਟ੍ਠਾਨੇਸੁ ਯਂ ਧਮ੍ਮਂ ਅਨੁਲੋਮਪਟ੍ਠਾਨਂ ਨਾਮ, ਤਂ ਤਾਵ ਛਬ੍ਬਿਧਂ ਹੋਤਿ – ਤਿਕਪਟ੍ਠਾਨਂ ਦੁਕਪਟ੍ਠਾਨਂ ਦੁਕਤਿਕਪਟ੍ਠਾਨਂ ਤਿਕਦੁਕਪਟ੍ਠਾਨਂ ਤਿਕਤਿਕਪਟ੍ਠਾਨਂ ਦੁਕਦੁਕਪਟ੍ਠਾਨਨ੍ਤਿ. ਯਥਾ ਚੇਤਂ, ਏਵਂ ਪਚ੍ਚਨੀਕਪਟ੍ਠਾਨਾਦੀਨਿਪਿ ਤੀਣਿ ਤੀਣਿ ਪਚ੍ਚੇਕਨ੍ਤਿ ਚਤੁਵੀਸਤਿਸਮਨ੍ਤਪਟ੍ਠਾਨਸਮੋਧਾਨਂ ਪਟ੍ਠਾਨਪ੍ਪਕਰਣਂ ਵੇਦਿਤਬ੍ਬਂ. ਸਮ੍ਮਾਸਮ੍ਬੁਦ੍ਧੇਨ ਹਿ ਅਨੁਲੋਮਪਟ੍ਠਾਨੇ ਦ੍ਵਾਵੀਸਤਿਤਿਕੇ ਨਿਸ੍ਸਾਯ ਤਿਕਪਟ੍ਠਾਨਂ ਨਾਮ ਨਿਦ੍ਦਿਟ੍ਠਂ. ਸਤਂ ਦੁਕੇ ਨਿਸ੍ਸਾਯ ਦੁਕਪਟ੍ਠਾਨਂ ਨਾਮ. ਤਤੋ ਤਿਕੇ ਦੁਕੇਸੁ ਪਕ੍ਖਿਪਿਤ੍ਵਾ ਦੁਕਤਿਕਪਟ੍ਠਾਨਂ ਨਾਮ. ਤਤੋ ਦੁਕੇ ਤਿਕੇਸੁ ਪਕ੍ਖਿਪਿਤ੍ਵਾ ਤਿਕਦੁਕਪਟ੍ਠਾਨਂ ਨਾਮ. ਤਿਕੇ ਪਨ ਤਿਕੇਸੁਯੇਵ ਪਕ੍ਖਿਪਿਤ੍ਵਾ ਤਿਕਤਿਕਪਟ੍ਠਾਨਂ ਨਾਮ. ਦੁਕੇ ਚ ਦੁਕੇਸੁ ਏਵ ਪਕ੍ਖਿਪਿਤ੍ਵਾ ਦੁਕਦੁਕਪਟ੍ਠਾਨਂ ਨਾਮ ਨਿਦ੍ਦਿਟ੍ਠਂ. ਪਠਮਂ ਤਾਵੇਤ੍ਥ ਅਨੁਲੋਮਪਟ੍ਠਾਨੇ ਤਿਕਪਟ੍ਠਾਨਨਯੋ ਨਿਦ੍ਦਿਟ੍ਠੋ. ਏਵਂ ਪਚ੍ਚਨੀਕਪਟ੍ਠਾਨੇ, ਅਨੁਲੋਮਪਚ੍ਚਨੀਕਪਟ੍ਠਾਨੇ, ਪਚ੍ਚਨੀਕਾਨੁਲੋਮਪਟ੍ਠਾਨੇਤਿ ਚਤੁਵੀਸਤਿਸਮਨ੍ਤਪਟ੍ਠਾਨਂ ਦੇਸਿਤਂ.
ਏਤ੍ਥ ਚ ਦੁਵਿਧਂ ਅਨੁਲੋਮਂ, ਪਚ੍ਚਨੀਕਞ੍ਚ ਧਮ੍ਮਾਨੁਲੋਮਂ ਧਮ੍ਮਪਚ੍ਚਨੀਕਂ, ਪਚ੍ਚਯਾਨੁਲੋਮਂ ਪਚ੍ਚਯਪਚ੍ਚਨੀਕਨ੍ਤਿ. ਤਤ੍ਥ ‘‘ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ’’ਤਿਆਦਿਨਾ ਕੁਸਲਾਦੀਨਂ ਤਿਕਧਮ੍ਮਾਨਂ, ਹੇਤੁਆਦੀਨਂ ਦੁਕਧਮ੍ਮਾਨਞ੍ਚ ਅਨੁਲੋਮਦੇਸਨਾਵਸੇਨ ਧਮ੍ਮਾਨੁਲੋਮਂ ਵੇਦਿਤਬ੍ਬਂ. ‘‘ਨਕੁਸਲਂ ਧਮ੍ਮਂ ਪਟਿਚ੍ਚ ਨਕੁਸਲੋ ਧਮ੍ਮੋ’’ਤਿਆਦਿਨਾ ਤਿਕਦੁਕਧਮ੍ਮਾਨਂ ਪਚ੍ਚਨੀਕਵਸੇਨ ਧਮ੍ਮਪਚ੍ਚਨੀਕਂ ਵੇਦਿਤਬ੍ਬਂ. ‘‘ਹੇਤੁਪਚ੍ਚਯਾ ਆਰਮ੍ਮਣਪਚ੍ਚਯਾ’’ਤਿ ਏਵਂ ਚਤੁਵੀਸਤਿਯਾ ਪਚ੍ਚਯਾਨਂ ਅਨੁਲੋਮਦੇਸਨਾਵਸੇਨ ਪਚ੍ਚਯਾਨੁਲੋਮਂ ਵੇਦਿਤਬ੍ਬਂ. ‘‘ਨਹੇਤੁਪਚ੍ਚਯਾ ਨਾਰਮ੍ਮਣਪਚ੍ਚਯਾ’’ਤਿ ਏਵਂ ਪਚ੍ਚਯਾਨਂ ਪਚ੍ਚਨੀਕਵਸੇਨ ਪਚ੍ਚਯਪਚ੍ਚਨੀਕਞ੍ਚ ਵੇਦਿਤਬ੍ਬਂ. ਤਤ੍ਰ ਯਦਿਦਂ ਧਮ੍ਮਾਨੁਲੋਮਂ ਧਮ੍ਮਪਚ੍ਚਨੀਕਞ੍ਚ, ਤਸ੍ਸ ਵਸੇਨ ਚਤੁਵੀਸਤਿਸਮਨ੍ਤਪਟ੍ਠਾਨਂ ਵੇਦਿਤਬ੍ਬਂ. ਪਚ੍ਚਯਾਨੁਲੋਮਂ ਪਚ੍ਚਯਪਚ੍ਚਨੀਕਞ੍ਚ ਅਨੁਲੋਮਤਿਕਪਟ੍ਠਾਨਾਦੀਸੁ ਚਤੁਵੀਸਤਿਯਾ ਪਟ੍ਠਾਨੇਸੁ ਏਕੇਕਤਿਕਦੁਕੇਸੁ ਏਵਂ ਲਬ੍ਭਤਿ. ਤਞ੍ਚ ਉਪਰਿ ਪਾਲ਼ਿਨਯਦਸ੍ਸਨੇ ਏਵ ਪਾਕਟਂ ਭਵਿਸ੍ਸਤਿ. ਤਤ੍ਰਿਮਾਨਿ ਚਤੁਵੀਸਤਿ ਪਟ੍ਠਾਨਾਨਿ ਇਮੇਸਂ ਤਿਕਦੁਕਾਨਂ ਵਸੇਨ ਨਿਦ੍ਦਿਟ੍ਠਤ੍ਤਾ ਤਿਕਪਟ੍ਠਾਨਂ…ਪੇ… ਦੁਕਦੁਕਪਟ੍ਠਾਨਨ੍ਤਿ ਵੁਚ੍ਚਤਿ.
ਤੇਸੁ ਤਿਕਦੁਕੇਸੁ ਏਕੇਕਂ ਤਿਕਦੁਕਂ ਇਮੇਸਂ ਹੇਤੁਪਚ੍ਚਯਾਦੀਨਂ ਚਤੁਵੀਸਤਿਯਾ ਪਚ੍ਚਯਾਨਂ ਅਨੁਲੋਮਾਦਿਨਯਚਤੁਕ੍ਕਵਸੇਨ ਸਤ੍ਤਹਿ ਸਤ੍ਤਹਿ ਮਹਾਵਾਰੇਹਿ ਵਿਤ੍ਥਾਰਤੋ ਵਿਭਤ੍ਤਂ. ਕਤਮੇਹਿ ਸਤ੍ਤਹਿ? ਪਟਿਚ੍ਚਵਾਰੋ ਸਹਜਾਤਵਾਰੋ ਪਚ੍ਚਯਵਾਰੋ ਨਿਸ੍ਸਯਵਾਰੋ ਸਂਸਟ੍ਠਵਾਰੋ ਸਮ੍ਪਯੁਤ੍ਤਵਾਰੋ ਪਞ੍ਹਾਵਾਰੋਤਿ ਇਮੇਹਿ. ਤਤ੍ਥ ‘‘ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ’’ਤਿਆਦਿਨਾ ਪਟਿਚ੍ਚਾਭਿਧਾਨੇਨ ਵੁਤ੍ਤੋ ਪਟਿਚ੍ਚਵਾਰੋ ਨਾਮ. ‘‘ਕੁਸਲਂ ਧਮ੍ਮਂ ਸਹਜਾਤੋ, ਕੁਸਲਂ ਧਮ੍ਮਂ ਪਚ੍ਚਯਾ, ਕੁਸਲਂ ਧਮ੍ਮਂ ਨਿਸ੍ਸਾਯ, ਕੁਸਲਂ ਧਮ੍ਮਂ ਸਂਸਟ੍ਠੋ, ਕੁਸਲਂ ਧਮ੍ਮਂ ਸਮ੍ਪਯੁਤ੍ਤੋ’’ਤਿ ਏਵਂ ਸਹਜਾਤਾਦਿਅਭਿਧਾਨੇਹਿ ਵੁਤ੍ਤਾ ਪਞ੍ਚ ਵਾਰਾ ਸਹਜਾਤਾਦਿਵਾਰਾਨਿ. ਪਰਤੋ ਚ ਸਂਸਟ੍ਠਸਮ੍ਪਯੁਤ੍ਤਵਾਰੇਸੁ ਦ੍ਵੀਸੁ ਅਰੂਪਧਮ੍ਮਵਸੇਨੇਵ ਪਚ੍ਚਯਪਚ੍ਚਯੁਪ੍ਪਨ੍ਨਾ ਚ, ਸੇਸੇਸੁ ਚਤੂਸੁ ਵਾਰੇਸੁ, ਸਤ੍ਤਮੇਵ ਪਞ੍ਹਾਵਾਰੇ ਚ ਰੂਪਾਰੂਪਵਸੇਨ, ਪਚ੍ਚਯਵਾਰੇ, ਨਿਸ੍ਸਯਵਾਰੇ ਚ ਸਹਜਾਤਪਚ੍ਛਾਜਾਤਪੁਰੇਜਾਤਵਸੇਨ, ਸੇਸੇਸੁ ਸਹਜਾਤਵਸੇਨ ਪਚ੍ਚਯਪਚ੍ਚਯੁਪ੍ਪਨ੍ਨਾ ਚ ਕਥਿਤਾਤਿ ਅਯਂ ਵਿਸੇਸੋ. ਸਤ੍ਤਮਵਾਰੇ ਪਨ ਯਸ੍ਮਾ ‘‘ਕੁਸਲੋ ਧਮ੍ਮੋ ਕੁਸਲਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ’’ਤਿਆਦਿਨਾ ਨਯੇਨ ਤੇ ਤੇ ਪਞ੍ਹੇ ਉਦ੍ਧਰਿਤ੍ਵਾ ਪੁਨ ‘‘ਕੁਸਲਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨ’’ਨ੍ਤਿਆਦਿਨਾ ਨਯੇਨ ਸਬ੍ਬੇਪਿ ਤੇ ਪਞ੍ਹਾ ਨਿਜ੍ਜਟਾ, ਨਿਗ੍ਗੁਮ੍ਬਾ ਚ ਕਤ੍ਵਾ ਵਿਭਤ੍ਤਾ, ਤਸ੍ਮਾ ਸੋ ਵਾਰੋ ਪਞ੍ਹਾਨਂ ਸਾਧੁਕਂ ਵਿਭਤ੍ਤਤ੍ਤਾ ਪਞ੍ਹਾਵਾਰੋਤ੍ਵੇਵ ਸਙ੍ਖਂ ਗਤੋ. ਇਤਿ ਇਮੇਹਿ ਸਤ੍ਤਹਿ ਮਹਾਵਾਰੇਹਿ ਚਤੁਵੀਸਤਿਯਾ ਸਮਨ੍ਤਪਟ੍ਠਾਨੇਸੁ ਸਬ੍ਬੇਪਿ ਤਿਕਦੁਕਾ ਚਤੁਵੀਸਤਿਯਾ ਪਚ੍ਚਯਾਨਂ ਅਨੁਲੋਮਾਦਿਵਸੇਨ ਵਿਤ੍ਥਾਰਤੋ ਵਿਭਤ੍ਤਾ. ਕਥਂ? ਅਨੁਲੋਮਪਟ੍ਠਾਨੇ ਹਿ ਯਦਿਦਂ ਦ੍ਵਾਵੀਸਤਿਤਿਕੇ ਨਿਸ੍ਸਾਯ ਤਿਕਪਟ੍ਠਾਨਂ ਨਾਮ ਸਬ੍ਬਪਠਮਂ ਨਿਦ੍ਦਿਟ੍ਠਂ. ਤਤ੍ਥ ਕੁਸਲਤ੍ਤਿਕਂ ਤਾਵ ਇਮੇਹਿ ਪਟਿਚ੍ਚਵਾਰਾਦੀਹਿ ਮਹਾਵਾਰੇਹਿ ਪਚ੍ਚਯਾਨੁਲੋਮਾਦਿਨਯਚਤੁਕ੍ਕਤੋ ਵਿਭਤ੍ਤਂ. ਤਤ੍ਥ ਯੋ ਤਾਵੇਸ ਸਬ੍ਬਪਠਮੋ ਪਟਿਚ੍ਚਵਾਰੋ ਨਾਮ, ਸੋ ਉਦ੍ਦੇਸਨਿਦ੍ਦੇਸਤੋ ਦੁਵਿਧੋ ਹੋਤਿ.
ਤਤ੍ਥ ਉਦ੍ਦੇਸਵਾਰੋ ਕੁਸਲਾਦਯੋ ਪਟਿਚ੍ਚ ਹੇਤੁਪਚ੍ਚਯਾਦਿਵਸੇਨ ਕੁਸਲਾਦੀਨਂ ਯੁਤ੍ਤਾਨਂ, ਅਕੁਸਲਾਦੀਨਂ ਅਯੁਤ੍ਤਕਾਨਞ੍ਚ ਧਮ੍ਮਾਨਂ ਉਪ੍ਪਤ੍ਤਿਪੁਚ੍ਛਨਵਸੇਨੇਵ ਪਵਤ੍ਤਤ੍ਤਾ ‘‘ਪੁਚ੍ਛਾਵਾਰੋ’’ਤਿਪਿ, ਪੁਚ੍ਛਾਨਞ੍ਞੇਵ ਪਞ੍ਞਾਪਨਤੋ ‘‘ਪਣ੍ਣਤ੍ਤਿਵਾਰੋ’’ਤਿਪਿ ਵੁਚ੍ਚਤਿ. ਨ ਹਿ ਤਤ੍ਥ ਵਿਸ੍ਸਜ੍ਜਨਂ ਅਤ੍ਥਿ. ਨਿਦ੍ਦੇਸਵਾਰੋ ਪਨ ਪੁਚ੍ਛਾਵਾਰੇ ਪਰਿਪੁਚ੍ਛਿਤੇਸੁ ਪਞ੍ਹੇਸੁ ‘‘ਸਿਯਾ ਅਕੁਸਲਂ ਧਮ੍ਮਂ ਪਟਿਚ੍ਚ ਅਕੁਸਲੋ ਧਮ੍ਮੋ ਉਪ੍ਪਜ੍ਜੇਯ੍ਯਾ’’ਤਿਆਦਿਕਂ ਅਯੁਤ੍ਤਂ ਪਞ੍ਹਂ ਅਨੁਦ੍ਧਰਿਤ੍ਵਾ ਲਬ੍ਭਮਾਨਾਨਞ੍ਞੇਵ ਪਞ੍ਹਾਨਂ ਵਸੇਨ ਪਵਤ੍ਤੋ. ਇਤਰੇਸੁ ਪਨ ਸਹਜਾਤਾਦੀਸੁ, ਸੇਸੇਸੁ ਚ ਤਿਕੇਸੁ, ਸੇਸਪਟ੍ਠਾਨੇਸੁ ਚ ਸਬ੍ਬਤ੍ਥ ਪੁਚ੍ਛਾਵਾਰੋ ਨਤ੍ਥਿ, ਲਬ੍ਭਮਾਨਵਸੇਨ ਸਬ੍ਬਵਿਸ੍ਸਜ੍ਜਨਮੇਵ ਦਸ੍ਸਿਤਨ੍ਤਿ ਇਦਮੇਤ੍ਥ ਸਙ੍ਖੇਪਤੋ ਪਾਲ਼ਿਵਵਤ੍ਥਾਨਂ.
ਇਦਾਨਿ ਪਨੇਤ੍ਥ ਆਦਿਤੋ ਪਟ੍ਠਾਯ ਏਵਂ ਵਿਭਙ੍ਗਨਯੋ ਵੇਦਿਤਬ੍ਬੋ. ਅਨੁਲੋਮਪਟ੍ਠਾਨਸ੍ਮਿਞ੍ਹਿ ਤਿਕਪਟ੍ਠਾਨੇ ਕੁਸਲਤ੍ਤਿਕਸ੍ਸ ਸਤ੍ਤਸੁ ਮਹਾਵਾਰੇਸੁ ਪਠਮਸ੍ਸ ਪਟਿਚ੍ਚਵਾਰਸ੍ਸ ਪੁਚ੍ਛਾਵਾਰੇ ਤਾਵ – ‘‘ਸਿਯਾ ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ ਉਪ੍ਪਜ੍ਜੇਯ੍ਯ ਹੇਤੁਪਚ੍ਚਯਾ…ਪੇ… ਅਕੁਸਲੋ ਧਮ੍ਮੋ…ਪੇ… ਅਬ੍ਯਾਕਤੋ…ਪੇ… ਕੁਸਲੋ ਚ ਅਬ੍ਯਾਕਤੋ ਚ…ਪੇ… ਅਕੁਸਲੋ ਚ ਅਬ੍ਯਾਕਤੋ ਚ…ਪੇ… ਕੁਸਲੋ ਚ ਅਕੁਸਲੋ ਚ…ਪੇ… ਕੁਸਲੋ ਚ ਅਕੁਸਲੋ ਚ ਅਬ੍ਯਾਕਤੋ ਚ ਧਮ੍ਮਾ ਉਪ੍ਪਜ੍ਜੇਯ੍ਯੁਂ ਹੇਤੁਪਚ੍ਚਯਾ’’ਤਿ ਕੁਸਲਪਦਮੂਲਾ ਸਤ੍ਤ ਪੁਚ੍ਛਾ ਉਦ੍ਧਟਾ.
ਏਵਂ ਅਕੁਸਲਪਦਮੂਲਾ, ਅਬ੍ਯਾਕਤਪਦਮੂਲਾ ਚ. ‘‘ਸਿਯਾ ਕੁਸਲਞ੍ਚ ਅਬ੍ਯਾਕਤਞ੍ਚ ਧਮ੍ਮਂ ਪਟਿਚ੍ਚ ਅਕੁਸਲੋ…ਪੇ… ਸਿਯਾ ਅਕੁਸਲਞ੍ਚ ਅਬ੍ਯਾਕਤਞ੍ਚ…ਪੇ… ਸਿਯਾ ਕੁਸਲਞ੍ਚ ਅਕੁਸਲਞ੍ਚ…ਪੇ… ਸਿਯਾ ਕੁਸਲਞ੍ਚ ਅਕੁਸਲਞ੍ਚ ਅਬ੍ਯਾਕਤਞ੍ਚ ਧਮ੍ਮਂ ਪਟਿਚ੍ਚਾ’’ਤਿ ਦ੍ਵਿਮੂਲਕਾ, ਤਿਮੂਲਕਾ ਚ ਸਤ੍ਤ ਸਤ੍ਤ ਪੁਚ੍ਛਾਤਿ ਏਕੂਨਪਞ੍ਞਾਸ ਪੁਚ੍ਛਾ ਹੇਤੁਪਚ੍ਚਯਮੂਲਕਾ ਉਦ੍ਧਟਾ.
ਇਮਿਨਾਵ ਨਯੇਨ ‘‘ਸਿਯਾ ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ ਉਪ੍ਪਜ੍ਜੇਯ੍ਯ ਆਰਮ੍ਮਣਪਚ੍ਚਯਾ…ਪੇ… ਅਵਿਗਤਪਚ੍ਚਯਾ’’ਤਿ ਏਵਂ ਸੇਸਪਚ੍ਚਯਮੂਲਕਾਪਿ ਪੁਚ੍ਛਾਵੇਦਿਤਬ੍ਬਾ. ਏਕਮੂਲਕਨਯੋ.
ਯਥਾ ਚ ਏਕਮੂਲਕੇ, ਏਵਂ ‘‘ਸਿਯਾ ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ ਉਪ੍ਪਜ੍ਜੇਯ੍ਯ ਹੇਤੁਪਚ੍ਚਯਾ ਆਰਮ੍ਮਣਪਚ੍ਚਯਾ…ਪੇ… ਹੇਤੁਪਚ੍ਚਯਾ ਅਵਿਗਤਪਚ੍ਚਯਾ’’ਤਿਆਦਿਨਾ ਦ੍ਵਿਮੂਲਕੇਪਿ. ‘‘ਹੇਤੁਪਚ੍ਚਯਾ ਆਰਮ੍ਮਣਪਚ੍ਚਯਾ ਅਧਿਪਤਿਪਚ੍ਚਯਾ…ਪੇ… ਹੇਤੁਪਚ੍ਚਯਾ ਆਰਮ੍ਮਣਪਚ੍ਚਯਾ ਅਨਨ੍ਤਰਪਚ੍ਚਯਾ…ਪੇ… ਹੇਤੁਪਚ੍ਚਯਾ ਆਰਮ੍ਮਣਪਚ੍ਚਯਾ ਅਵਿਗਤਪਚ੍ਚਯਾ’’ਤਿਆਦਿਨਾ ਤਿਮੂਲਕਾਦੀਸੁ ਸਬ੍ਬਮੂਲਕਪਰਿਯੋਸਾਨੇਸੁ ਵਾਰੇਸੁ ਨਯਾ ਵੇਦਿਤਬ੍ਬਾ. ਹੇਤੁਪਚ੍ਚਯਮੂਲਕਨਯੋ.
ਯਥਾ ਚ ਹੇਤੁਮੂਲਕੇ, ਏਵਂ ‘‘ਸਿਯਾ ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ ਉਪ੍ਪਜ੍ਜੇਯ੍ਯ ਆਰਮ੍ਮਣਪਚ੍ਚਯਾ’’ਤਿਆਦਿਨਾ ਸੇਸਪਚ੍ਚਯਮੂਲਕੇਸੁਪਿ ਨਯੋ ਞਾਤਬ੍ਬੋ. ਪਚ੍ਚਯਾਨੁਲੋਮਵਾਰੋ. ਏਤੇਨੇਵ ਉਪਾਯੇਨ ‘‘ਸਿਯਾ ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ ਉਪ੍ਪਜ੍ਜੇਯ੍ਯ ਨਹੇਤੁਪਚ੍ਚਯਾ’’ਤਿਆਦਿਨਾ ਸਬ੍ਬਪ੍ਪਕਾਰਯੁਤ੍ਤੋ ਪਚ੍ਚਯਪਚ੍ਚਨੀਕਵਾਰੋਪਿ. ‘‘ਸਿਯਾ ਕੁਸਲਂ ਧਮ੍ਮਂ…ਪੇ… ਉਪ੍ਪਜ੍ਜਤਿ ਹੇਤੁਪਚ੍ਚਯਾ ਨਾਰਮ੍ਮਣਪਚ੍ਚਯਾ’’ਤਿਆਦਿਨਾ ਅਨੁਲੋਮਪਚ੍ਚਨੀਕਪਚ੍ਚਯਵਾਰੋਪਿ. ‘‘ਸਿਯਾ ਕੁਸਲਂ ਧਮ੍ਮਂ…ਪੇ… ਉਪ੍ਪਜ੍ਜੇਯ੍ਯ ਨਹੇਤੁਪਚ੍ਚਯਾ ਆਰਮ੍ਮਣਪਚ੍ਚਯਾ’’ਤਿਆਦਿਨਾ ਪਚ੍ਚਨੀਯਾਨੁਲੋਮਵਾਰੋਪਿ ਸਬ੍ਬਤ੍ਥ ਨੇਤਬ੍ਬੋਤਿ ਅਯਂ ਤਾਵੇਤ੍ਥ ਪੁਚ੍ਛਾਵਾਰੇ ਨਯੋ.
ਨਿਦ੍ਦੇਸਵਾਰੋ ਪਨ ਉਦ੍ਦੇਸਵਾਰੇ ਦਸ੍ਸਿਤਾਸੁ ਪੁਚ੍ਛਾਸੁ ਕੁਸਲਾਕੁਸਲਾਦੀਨਂ ਸਹੁਪ੍ਪਤ੍ਤਿਯਾ ਅਭਾਵਤੋ ਯਾ ਏਤਾ ‘‘ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ ਉਪ੍ਪਜ੍ਜਤੀ’’ਤਿਆਦਿਕਾ ਪੁਚ੍ਛਾ ਸਬ੍ਬਸੋ ਵਿਸ੍ਸਜ੍ਜਨਂ ਲਭਨ੍ਤਿ, ਤਾ ਪਹਾਯ ਯਾ ਵਿਸ੍ਸਜ੍ਜਨਂ ਲਭਨ੍ਤਿ, ਤਾਸਮੇਵ ਵਿਸ੍ਸਜ੍ਜਨਵਸੇਨ ਪਵਤ੍ਤੋ. ਤਤ੍ਰਾਯਂ ਨਯੋ – ‘‘ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ. ਕੁਸਲਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ. ਤਯੋ ਖਨ੍ਧੇ ਪਟਿਚ੍ਚ ਏਕੋ ਖਨ੍ਧੋ. ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ. ਕੁਸਲਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ. ਕੁਸਲੇ ਖਨ੍ਧੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ. ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਚ ਅਬ੍ਯਾਕਤੋ ਚ ਧਮ੍ਮਾ ਉਪ੍ਪਜ੍ਜਨ੍ਤਿ ਹੇਤੁਪਚ੍ਚਯਾ. ਕੁਸਲਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ. ਤਯੋ ਖਨ੍ਧੇ ਪਟਿਚ੍ਚ ਏਕੋ ਖਨ੍ਧੋ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ. ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪ’’ਨ੍ਤਿ ਏਵਂ ਕੁਸਲਪਦਮੂਲਾਸੁ ਸਤ੍ਤਸੁ ਪੁਚ੍ਛਾਸੁ ਤਿਸ੍ਸੋਵ ਲਬ੍ਭਮਾਨਾ ਵਿਸ੍ਸਜ੍ਜਿਤਾ. ਤਥਾ ਅਕੁਸਲਪਦਮੂਲਾਸੁਪਿ ਤਿਸ੍ਸੋਵ. ਅਬ੍ਯਾਕਤਪਦਮੂਲਾਸੁ ਪਨ ‘‘ਅਬ੍ਯਾਕਤਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ. ਵਿਪਾਕਾਬ੍ਯਾਕਤਂ ਕਿਰਿਯਾਬ੍ਯਾਕਤਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ…ਪੇ… ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ. ਪਟਿਸਨ੍ਧਿਕ੍ਖਣੇ ਵਿਪਾਕਾਬ੍ਯਾਕਤਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ ਕਟਤ੍ਤਾ ਚ ਰੂਪਂ…ਪੇ… ਦ੍ਵੇ ਖਨ੍ਧਾ ਕਟਤ੍ਤਾ ਚ ਰੂਪਂ. ਖਨ੍ਧੇ ਪਟਿਚ੍ਚ ਵਤ੍ਥੁ, ਵਤ੍ਥੁਂ ਪਟਿਚ੍ਚ ਖਨ੍ਧਾ. ਏਕਂ ਮਹਾਭੂਤਂ ਪਟਿਚ੍ਚ ਤਯੋ ਮਹਾਭੂਤਾ…ਪੇ… ਦ੍ਵੇ ਮਹਾਭੂਤੇ ਪਟਿਚ੍ਚ ਦ੍ਵੇ ਮਹਾਭੂਤਾ. ਮਹਾਭੂਤੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ ਕਟਤ੍ਤਾਰੂਪਂ ਉਪਾਦਾਰੂਪ’’ਨ੍ਤਿ ਏਕਾਵ. ਦ੍ਵਿਮੂਲਿਕਾਦੀਸੁ ਚ ‘‘ਕੁਸਲਞ੍ਚ ਅਬ੍ਯਾਕਤਞ੍ਚ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ. ਕੁਸਲੇ ਖਨ੍ਧੇ ਚ ਮਹਾਭੂਤੇ ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪ’’ਨ੍ਤਿ ਏਕਾ. ਤਥਾ ‘‘ਅਕੁਸਲਞ੍ਚ ਅਬ੍ਯਾਕਤਞ੍ਚ ਪਟਿਚ੍ਚਾ’’ਤਿ, ਏਵਂ ਹੇਤੁਪਚ੍ਚਯਮੂਲਿਕਾਸੁ ਏਕੂਨਪਞ੍ਞਾਸਾਯ ਪੁਚ੍ਛਾਸੁ ਨਵੇਵ ਲਬ੍ਭਮਾਨਾ ਵਿਸ੍ਸਜ੍ਜਿਤਾ. ਸੇਸਾ ਚਤ੍ਤਾਲੀਸ ਮੋਘਪੁਚ੍ਛਾਤਿ ਨ ਵਿਸ੍ਸਜ੍ਜਿਤਾ. ਏਵਂ ਉਪਰਿ ਆਰਮ੍ਮਣਪਚ੍ਚਯਾਦੀਸੁ ਵਿਸ੍ਸਜ੍ਜਿਤਾਵਸੇਸਾ ਮੋਘਪੁਚ੍ਛਾਤਿ ਗਹੇਤਬ੍ਬਾ. ਵਿਜਾਨਨਸੁਖਤ੍ਥਂ ਪਨ ਭਗਵਤਾ ਪੁਚ੍ਛਾਵਾਰੇ ਲਬ੍ਭਮਾਨਾ, ਅਲਬ੍ਭਮਾਨਾ ਚ ਸਬ੍ਬਾਪਿ ਤਾ ਦਸ੍ਸਿਤਾਤਿ ਵੇਦਿਤਬ੍ਬਾਤਿ.
ਤਤ੍ਥ ਕੁਸਲਂ ਧਮ੍ਮਂ ਪਟਿਚ੍ਚਾਤਿ ਸਹਜਾਤੇਸੁ ਵੇਦਨਾਕ੍ਖਨ੍ਧਾਦਿਭੇਦਂ ਏਕਂ ਕੁਸਲਂ ਧਮ੍ਮਂ ਪਟਿਚ੍ਚ ਪਟਿਗਨ੍ਤ੍ਵਾ, ਸਹੁਪ੍ਪਤ੍ਤਿਸਙ੍ਖਾਤੇਨ ਸਦਿਸਭਾਵੇਨ ਪਤ੍ਵਾਤਿ ਅਤ੍ਥੋ. ਸਦਿਸਤ੍ਥੋ ਹਿ ਏਤ੍ਥ ਪਟਿਸਦ੍ਦੋ ‘‘ਪਟਿਪੁਗ੍ਗਲੋ’’ਤਿਆਦੀਸੁ ਵਿਯ. ਕੁਸਲੋ ਧਮ੍ਮੋਤਿ ਸਞ੍ਞਾਕ੍ਖਨ੍ਧਾਦਿਭੇਦੋ ਸਹੁਪ੍ਪਨ੍ਨੋ ਕੁਸਲੋ ਧਮ੍ਮੋ. ਉਪ੍ਪਜ੍ਜਤੀਤਿ ਪਾਕਟਭਾਵਤੋ ਉਦ੍ਧਂ ਉਪ੍ਪਾਦਾਦਿਂ ਪਾਪੁਣਾਤਿ, ਅਤ੍ਤਾਨਂ ਵਾ ਪਟਿਲਭਤਿ. ਹੇਤੁਪਚ੍ਚਯਾਤਿ ਨ ਕੇਵਲਂ ਕੁਸਲਧਮ੍ਮਮਤ੍ਤਮੇਵ ਪਟਿਚ੍ਚ ਉਪ੍ਪਜ੍ਜਤਿ, ਅਥ ਖੋ ਕੁਸਲਹੇਤੁਨਾ ਹੇਤੁਪਚ੍ਚਯਤਂ ਸਾਧੇਨ੍ਤੇਨ ਚ ਉਪ੍ਪਜ੍ਜਤੀਤਿ ਏਵਮਤ੍ਥੋ ਗਹੇਤਬ੍ਬੋ.
ਏਵਮਿਦਂ ‘‘ਉਪ੍ਪਜ੍ਜੇਯ੍ਯਾ’’ਤਿ ਪੁਚ੍ਛਾਯ ‘‘ਉਪ੍ਪਜ੍ਜਤੀ’’ਤਿ ਅਵਿਸੇਸੇਨ ਵਿਸ੍ਸਜ੍ਜਨਂ ਵਤ੍ਵਾ ਇਦਾਨਿ ਯਂ ਧਮ੍ਮਂ ਪਟਿਚ੍ਚ ਯੇ ਧਮ੍ਮਾ ਉਪ੍ਪਜ੍ਜਨ੍ਤਿ, ਤੇ ਪਚ੍ਚਯਪਚ੍ਚਯੁਪ੍ਪਨ੍ਨੇ ਖਨ੍ਧਵਸੇਨ ਵਿਸੇਸੇਤ੍ਵਾ ਦਸ੍ਸੇਤੁਂ ‘‘ਕੁਸਲਂ ਏਕਂ ਖਨ੍ਧ’’ਨ੍ਤਿਆਦਿ ਵੁਤ੍ਤਂ. ਯਸ੍ਮਾ ਪਨੇਤ੍ਥ ਏਕੋ ਖਨ੍ਧੋ ਏਕਸ੍ਸੇਵ, ਦ੍ਵਿਨ੍ਨਂਯੇਵ ਵਾ, ਦ੍ਵੇ ਵਾ ਪਨ ਏਕਸ੍ਸੇਵ ਪਚ੍ਚਯਾ ਨਾਮ ਨ ਹੋਨ੍ਤਿ, ਤਸ੍ਮਾ ਤੇ ਪਕਾਰੇਨ ਅਨਾਮਸਿਤ੍ਵਾ ‘‘ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ’’ਤਿਆਦਿਨਾ ਪਚ੍ਚਯਭਾਵੇਨ ਗਹਿਤਾਵਸੇਸਂ ਸਬ੍ਬਂ ਪਚ੍ਚਯੁਪ੍ਪਨ੍ਨਂ ਕਤ੍ਵਾ ਦਸ੍ਸਿਤਨ੍ਤਿ ਵੇਦਿਤਬ੍ਬਂ. ਏਵਂ ਉਪਰਿਪਿ ਸਬ੍ਬਤ੍ਥ. ਚਿਤ੍ਤਸਮੁਟ੍ਠਾਨਂ ਰੂਪਨ੍ਤਿ ਇਦਂ ਪਟਿਚ੍ਚਤ੍ਥਸ੍ਸ ਸਹਜਾਤਤ੍ਥਤ੍ਤਾ ਯਂ ਕੁਸਲੇਨ ਸਹਜਾਤਞ੍ਚੇਵ ਹੇਤੁਪਚ੍ਚਯਞ੍ਚ ਲਭਤਿ, ਤਂ ਦਸ੍ਸੇਤੁਂ ਵੁਤ੍ਤਂ ‘‘ਵਿਪਾਕਾਬ੍ਯਾਕਤਂ ਕਿਰਿਯਾਬ੍ਯਾਕਤ’’ਨ੍ਤਿ. ਏਤ੍ਥ ਹੇਤੁਪਚ੍ਚਯਾਧਿਕਾਰੇ ਅਹੇਤੁਕਾ ਨ ਗਹੇਤਬ੍ਬਾ. ਖਨ੍ਧੇ ਪਟਿਚ੍ਚ ਵਤ੍ਥੂਤਿਆਦਿ ਕਟਤ੍ਤਾਰੂਪਗ੍ਗਹਣੇਨ ਵਤ੍ਥੁਸ੍ਮਿਂ ਗਹਿਤੇਪਿ ਵਤ੍ਥੁਂ ਪਟਿਚ੍ਚ ਅਰੂਪਕ੍ਖਨ੍ਧਾਨਂ ਉਪ੍ਪਤ੍ਤਿਦਸ੍ਸਨਤ੍ਥਂ ਵੁਤ੍ਤਂ. ਏਕਂ ਮਹਾਭੂਤਨ੍ਤਿਆਦਿ ਪਨ ਰੂਪਾਬ੍ਯਾਕਤਂ ਪਟਿਚ੍ਚ ਰੂਪਾਬ੍ਯਾਕਤਸ੍ਸ ਉਪ੍ਪਤ੍ਤਿਦਸ੍ਸਨਤ੍ਥਂ. ਹੇਤੁਪਚ੍ਚਯੇ ਉਪਤ੍ਥਮ੍ਭਕਾਨਮੇਵ ਚੇਤ੍ਥ ਚਿਤ੍ਤਜਾਨਂ, ਪਟਿਸਨ੍ਧਿਯਂ ਕਮ੍ਮਜਾਨਞ੍ਚ ਅਞ੍ਞਮਞ੍ਞਂ ਪਚ੍ਚਯਪਚ੍ਚਯੁਪ੍ਪਨ੍ਨਤਾ ਗਹੇਤਬ੍ਬਾ, ਨ ਅਹੇਤੁਕਚਿਤ੍ਤਜਉਤੁਜਾਦੀਨਂ ਤੇਸਂ ਹੇਤੁਪਚ੍ਚਯਾ ਉਪ੍ਪਤ੍ਤਿਯਾ ਅਭਾਵਤੋ. ਮਹਾਭੂਤੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਨ੍ਤਿਆਦਿ ਮਹਾਭੂਤੇ ਪਟਿਚ੍ਚ ਉਪਾਦਾਦੀਨਂ ਉਪ੍ਪਤ੍ਤਿਦਸ੍ਸਨਤ੍ਥਂ ਵੁਤ੍ਤਂ. ਇਮਿਨਾ ਉਪਾਯੇਨ ਆਰਮ੍ਮਣਪਚ੍ਚਯਾਦੀਸੁਪਿ ਵਿਸ੍ਸਜ੍ਜਨਾਨਂ ਅਤ੍ਥੋ ਵੇਦਿਤਬ੍ਬੋ.
ਆਰਮ੍ਮਣਪਚ੍ਚਯੇ ‘‘ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ ਉਪ੍ਪਜ੍ਜਤਿ ਆਰਮ੍ਮਣਪਚ੍ਚਯਾ. ਏਕਂ ਖਨ੍ਧਂ…ਪੇ… ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ. ਅਕੁਸਲਂ ਧਮ੍ਮਂ ਪਟਿਚ੍ਚ ਅਕੁਸਲੋ ਧਮ੍ਮੋ…ਪੇ… ਅਬ੍ਯਾਕਤਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ ਧਮ੍ਮੋ ਉਪ੍ਪਜ੍ਜਤਿ ਆਰਮ੍ਮਣਪਚ੍ਚਯਾ. ਵਿਪਾਕਾਬ੍ਯਾਕਤਂ ਕਿਰਿਯਾਬ੍ਯਾਕਤਂ ਏਕਂ ਖਨ੍ਧਂ…ਪੇ… ਦ੍ਵੇ ਖਨ੍ਧਾ. ਪਟਿਸਨ੍ਧਿਕ੍ਖਣੇ ਵਿਪਾਕਾਬ੍ਯਾਕਤਂ ਏਕਂ ਖਨ੍ਧਂ…ਪੇ… ਦ੍ਵੇ ਖਨ੍ਧਾ. ਵਤ੍ਥੁਂ ਪਟਿਚ੍ਚ ਖਨ੍ਧਾ’’ਤਿ ਏਵਂ ਤਿਸ੍ਸੋ ਵਿਸ੍ਸਜ੍ਜਿਤਾ. ਸੇਸਾ ਰੂਪਮਿਸ੍ਸਕਤ੍ਤਾ, ਰੂਪਸ੍ਸ ਚ ਆਰਮ੍ਮਣਪਚ੍ਚਯੇਨ ਅਨੁਪ੍ਪਤ੍ਤਿਤੋ ਨ ਗਹਿਤਾ. ਤੇਨੇਵ ‘‘ਵਤ੍ਥੁਂ ਪਟਿਚ੍ਚ ਖਨ੍ਧਾ’’ਤਿ ਵਤ੍ਵਾ ‘‘ਖਨ੍ਧੇ ਪਟਿਚ੍ਚ ਵਤ੍ਥੂ’’ਤਿ ਨ ਵੁਤ੍ਤਂ. ਏਤ੍ਥ ਚ ਆਰਮ੍ਮਣਪਚ੍ਚਯਾਤਿ ਸਹਜਾਤਂ ਕੁਸਲਂ ਧਮ੍ਮਂ ਪਟਿਚ੍ਚ ਉਪ੍ਪਜ੍ਜਮਾਨੋ ਕੁਸਲੋ ਧਮ੍ਮੋ ਤਤੋ ਅਞ੍ਞੇਨ ਅਸਹਜਾਤੇਨ ਛਬ੍ਬਿਧੇਨ ਆਰਮ੍ਮਣਭੂਤੇਨ ਪਚ੍ਚਯੇਨਾਤਿ ਏਵਂ ਅਤ੍ਥੋ ਗਹੇਤਬ੍ਬੋ. ਨ ਹਿ ਅਤ੍ਤਨਾ ਸਹਜਾਤਂ ਆਰਮ੍ਮਣਂ ਕਤ੍ਵਾ ਚਿਤ੍ਤਚੇਤਸਿਕਾ ਉਪ੍ਪਜ੍ਜਨ੍ਤਿ.
ਅਧਿਪਤਿਪਚ੍ਚਯੇ ਹੇਤੁਪਚ੍ਚਯਸਦਿਸਂ ਵਿਸ੍ਸਜ੍ਜਨਂ. ਅਨਨ੍ਤਰਸਮਨਨ੍ਤਰੇਸੁ ਪਨ ਰੂਪਾਭਾਵਤੋ ਆਰਮ੍ਮਣਪਚ੍ਚਯਸਦਿਸਂ. ਸਹਜਾਤਪਚ੍ਚਯੇਪਿ ਹੇਤੁਪਚ੍ਚਯਸਦਿਸਂ. ਅਬ੍ਯਾਕਤਂ ਪਟਿਚ੍ਚ ਅਬ੍ਯਾਕਤੁਪ੍ਪਤ੍ਤਿਯਾ ਪਨ ‘‘ਬਾਹਿਰਂ ਏਕਂ ਮਹਾਭੂਤਂ ਪਟਿਚ੍ਚ…ਪੇ… ਦ੍ਵੇ ਮਹਾਭੂਤਾ. ਮਹਾਭੂਤੇ ਪਟਿਚ੍ਚ ਉਪਾਦਾਰੂਪਂ…ਪੇ… ਆਹਾਰਸਮੁਟ੍ਠਾਨਂ ਏਕਂ ਮਹਾਭੂਤਂ…ਪੇ… ਦ੍ਵੇ ਮਹਾਭੂਤਾ…ਪੇ… ਉਤੁਸਮੁਟ੍ਠਾਨਂ ਏਕਂ…ਪੇ… ਦ੍ਵੇ ਮਹਾਭੂਤਾ…ਪੇ… ਅਸਞ੍ਞਸਤ੍ਤਾਨਂ ਏਕਂ ਮਹਾਭੂਤਂ ਪਟਿਚ੍ਚ…ਪੇ… ਦ੍ਵੇ ਮਹਾਭੂਤਾ…ਪੇ… ਕਟਤ੍ਤਾਰੂਪਂ ਉਪਾਦਾਰੂਪ’’ਨ੍ਤਿ ਇਦਂ ਅਧਿਕਂ. ਏਵਂ ਅਞ੍ਞਮਞ੍ਞਪਚ੍ਚਯੇਪਿ. ਕੇਵਲਂ ਤਤ੍ਥ ਕਟਤ੍ਤਾਰੂਪਂ ਉਪਾਦਾਰੂਪਞ੍ਚ ਨ ਗਹਿਤਂ ਤੇਸਂ ਅਞ੍ਞਮਞ੍ਞਪਚ੍ਚਯਤ੍ਤਾਭਾਵਾ. ਨਿਸ੍ਸਯਪਚ੍ਚਯੇਪਿ ਸਹਜਾਤਪਚ੍ਚਯਸਦਿਸਂ ਵਿਸ੍ਸਜ੍ਜਨਂ. ਪਟਿਚ੍ਚਤ੍ਥਸ੍ਸ ਪਨ ਸਹਜਾਤਤ੍ਥਤ੍ਤਾ ਚਕ੍ਖਾਦੀਸੁ ਪੁਰੇਜਾਤਨਿਸ੍ਸਯਾ ਇਧ ਨ ਗਹਿਤਾਤਿ. ਉਪਨਿਸ੍ਸਯਪਚ੍ਚਯੇਪਿ ਰੂਪਸ੍ਸ ਉਪਨਿਸ੍ਸਯਪਚ੍ਚਯੁਪ੍ਪਨ੍ਨਤ੍ਤਾਭਾਵਾ ਆਰਮ੍ਮਣਪਚ੍ਚਯਸਦਿਸਮੇਵ ਵਿਸ੍ਸਜ੍ਜਨਂ.
ਪੁਰੇਜਾਤਪਚ੍ਚਯੇ ਪਨ ‘‘ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ ਉਪ੍ਪਜ੍ਜਤਿ ਪੁਰੇਜਾਤਪਚ੍ਚਯਾ. ਕੁਸਲਂ ਏਕਂ…ਪੇ… ਦ੍ਵੇ ਖਨ੍ਧਾ. ਵਤ੍ਥੁਂ ਪੁਰੇਜਾਤਪਚ੍ਚਯਾ. ਅਕੁਸਲਂ ਧਮ੍ਮਂ ਪਟਿਚ੍ਚ ਅਕੁਸਲੋ…ਪੇ… ਅਬ੍ਯਾਕਤਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਪੁਰੇਜਾਤਪਚ੍ਚਯਾ. ਵਿਪਾਕਾਬ੍ਯਾਕਤਂ ਕਿਰਿਯਾਬ੍ਯਾਕਤਂ ਏਕਂ ਖਨ੍ਧਂ…ਪੇ… ਦ੍ਵੇ ਖਨ੍ਧਾ. ਵਤ੍ਥੁਂ ਪੁਰੇਜਾਤਪਚ੍ਚਯਾ’’ਤਿ ਏਵਂ ਤਿਸ੍ਸੋ ਪੁਚ੍ਛਾ ਵਿਸ੍ਸਜ੍ਜਿਤਾ. ਤਤ੍ਥ ਵਤ੍ਥੁਂ ਪੁਰੇਜਾਤਪਚ੍ਚਯਾਤਿ ਇਦਂ ਆਰਮ੍ਮਣਪੁਰੇਜਾਤਨਿਵਤ੍ਤਨਤ੍ਥਂ ਵੁਤ੍ਤਂ. ਤਂ ਹਿ ਚਕ੍ਖੁਵਿਞ੍ਞਾਣਾਦੀਨਂਯੇਵ ਪੁਰੇਜਾਤਪਚ੍ਚਯਤਂ ਸਾਧਯਤਿ, ਨ ਮਨੋਵਿਞ੍ਞਾਣਧਾਤੁਯਾਤਿ ਇਧ ਨ ਗਹਿਤਂ.
ਪਚ੍ਛਾਜਾਤਪਚ੍ਚਯੋ ਇਧ ਅਰੂਪਧਮ੍ਮੇਸੁ ਨ ਲਬ੍ਭਤਿ. ਰੂਪਧਮ੍ਮੇਸੁ ਚ ਉਪਤ੍ਥਮ੍ਭਕੋਵ, ਨ ਜਨਕੋ, ਤਸ੍ਮਾ ‘‘ਅਬ੍ਯਾਕਤਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ ਧਮ੍ਮੋ ਉਪ੍ਪਜ੍ਜਤੀ’’ਤਿਆਦਿ ਨ ਵਤ੍ਤਬ੍ਬੋਵਾਤਿ ਅਯਂ ਨ ਗਹਿਤੋ. ਆਸੇਵਨਪਚ੍ਚਯੇਪਿ ਆਰਮ੍ਮਣਪਚ੍ਚਯੇ ਵਿਯ ਤਿਸ੍ਸੋਵ ਪੁਚ੍ਛਾ ਵਿਸ੍ਸਜ੍ਜਿਤਾ.
ਕਮ੍ਮਪਚ੍ਚਯੇ ‘‘ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ ਉਪ੍ਪਜ੍ਜਤਿ ਕਮ੍ਮਪਚ੍ਚਯਾ. ਕੁਸਲਂ ਏਕਂ ਖਨ੍ਧਂ…ਪੇ… ਅਬ੍ਯਾਕਤੋ ਧਮ੍ਮੋ ਉਪ੍ਪਜ੍ਜਤਿ…ਪੇ… ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ…ਪੇ… ਕੁਸਲੋ ਚ ਅਬ੍ਯਾਕਤੋ ਚ ਧਮ੍ਮਾ…ਪੇ… ਚਿਤ੍ਤਸਮੁਟ੍ਠਾਨਂ ਰੂਪ’’ਨ੍ਤਿ ਕੁਸਲਪਦੇ ਤਿਸ੍ਸੋ, ਤਥਾ ਅਕੁਸਲਪਦੇ. ਅਬ੍ਯਾਕਤਪਦੇ ਪਨ ‘‘ਅਬ੍ਯਾਕਤਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਵਿਪਾਕਾਬ੍ਯਾਕਤਂ ਕਿਰਿਯਾਬ੍ਯਾਕਤਂ ਏਕਂ ਖਨ੍ਧਂ ਪਟਿਚ੍ਚ…ਪੇ… ਮਹਾਭੂਤੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ ਕਟਤ੍ਤਾਰੂਪਂ ਉਪਾਦਾਰੂਪਂ, ਅਸਞ੍ਞਸਤ੍ਤਾਨਂ…ਪੇ… ਕਟਤ੍ਤਾਰੂਪਂ ਉਪਾਦਾਰੂਪ’’ਨ੍ਤਿ ਏਵਂ ਤਿਸ੍ਸੋ. ‘‘ਕੁਸਲਞ੍ਚ ਅਬ੍ਯਾਕਤਞ੍ਚ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਕੁਸਲੇ ਖਨ੍ਧੇ ਚ ਮਹਾਭੂਤੇ ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪ’’ਨ੍ਤਿਆਦਿਨਾ ਸਹਜਾਤਸਦਿਸਂ ਵਿਸ੍ਸਜ੍ਜਨਂ. ਨਤ੍ਥਿਵਿਗਤਪਚ੍ਚਯੇਸੁ ਆਰਮ੍ਮਣਸਦਿਸਂ.
ਏਵਂ ਸਬ੍ਬਪਚ੍ਚਯੇਸੁ ਲਬ੍ਭਮਾਨਪਞ੍ਹੇ ਵਿਸ੍ਸਜ੍ਜਨਂ ਦਸ੍ਸੇਤ੍ਵਾ ਤਤੋ ਹੇਤੁਅਧਿਪਤਿਝਾਨਮਗ੍ਗਪਚ੍ਚਯਾ ਏਕਸਦਿਸਾ. ਆਰਮ੍ਮਣਾਨਨ੍ਤਰਸਮਨਨ੍ਤਰੂਪਨਿਸ੍ਸਯਾਸੇਵਨਨਤ੍ਥਿਵਿਗਤਪਚ੍ਚਯਾ ਏਕਸਦਿਸਾ. ਸਹਜਾਤਅਞ੍ਞਮਞ੍ਞਨਿਸ੍ਸਯਅਤ੍ਥਿਅਵਿਗਤਾ ਏਕਸਦਿਸਾ. ਆਸੇਵਨਪਚ੍ਚਯੇ ਵਿਪਾਕੋ ਨ ਲਬ੍ਭਤਿ. ਅਞ੍ਞਮਞ੍ਞਪਚ੍ਚਯੇ ਚਿਤ੍ਤਜਰੂਪਂ, ਉਪਾਦਾਰੂਪਞ੍ਚ ਨ ਲਬ੍ਭਤੀਤਿਆਦਿਨਾ ਪਚ੍ਚਯਾਨਂ ਅਞ੍ਞਮਞ੍ਞਸਦਿਸਤ੍ਤਂ ਵਤ੍ਵਾ ਪੁਨ ਤੇਸਂ ‘‘ਹੇਤੁਯਾ ਨਵ. ਆਰਮ੍ਮਣੇ ਤੀਣਿ. ਅਧਿਪਤਿਯਾ ਨਵ. ਅਨਨ੍ਤਰਸਮਨਨ੍ਤਰੇਸੁ ਤੀਣਿ. ਸਹਜਾਤੇ ਨਵ. ਅਞ੍ਞਮਞ੍ਞੇ ਤੀਣਿ. ਨਿਸ੍ਸਯੇ ਨਵ. ਉਪਨਿਸ੍ਸਯੇ ਤੀਣਿ. ਪੁਰੇਜਾਤੇ ਤੀਣਿ. ਆਸੇਵਨੇ ਤੀਣਿ. ਕਮ੍ਮੇ ਨਵ. ਵਿਪਾਕੇ ਏਕਂ. ਆਹਾਰੇ ਨਵ. ਇਨ੍ਦ੍ਰਿਯੇ ਨਵ. ਝਾਨੇ ਨਵ. ਮਗ੍ਗੇ ਨਵ. ਸਮ੍ਪਯੁਤ੍ਤੇ ਤੀਣਿ. ਵਿਪ੍ਪਯੁਤ੍ਤੇ ਨਵ. ਅਤ੍ਥਿਯਾ ਨਵ. ਨਤ੍ਥਿਯਾ ਤੀਣਿ. ਵਿਗਤੇ ਤੀਣਿ. ਅਵਿਗਤੇ ਨਵਾ’’ਤਿ ਏਵਂ ਹੇਤੁਪਚ੍ਚਯਾਦੀਨਂ ਏਕੇਕਸ੍ਮਿਂ ਪੁਚ੍ਛਾਵਿਸ੍ਸਜ੍ਜਨਵਾਰਗਣਨਾ ਵੁਤ੍ਤਾਤਿ ਅਯਂ ਏਕਮੂਲਕਨਯੋ.
ਯਥਾ ਚ ਏਕਮੂਲਕੇ, ਏਵਂ ‘‘ਹੇਤੁਪਚ੍ਚਯਾ ਆਰਮ੍ਮਣਪਚ੍ਚਯਾ’’ਤਿਆਦਿਨਾ ਦ੍ਵਿਮੂਲਕਾਦੀਸੁਪਿ ਸਬ੍ਬਮੂਲਕਪਰਿਯੋਸਾਨੇਸੁ ਯਥਾਨੁਰੂਪਂ ਨਯੋ ਨੇਤਬ੍ਬੋ. ਪਾਲ਼ਿਯਮ੍ਪਿ ਵਿਤ੍ਥਾਰਨਯਂ ਅਦਸ੍ਸੇਤ੍ਵਾ ‘‘ਹੇਤੁਪਚ੍ਚਯਾ ਆਰਮ੍ਮਣੇ ਤੀਣੀ’’ਤਿਆਦਿਨਾ ਵਿਸ੍ਸਜ੍ਜਨਵਾਰਗਣਨਭੇਦੋ ਦਸ੍ਸਿਤੋਤਿ ਅਯਂ ਪਚ੍ਚਯਾਨੁਲੋਮੇ ਨਯੋ.
ਪਚ੍ਚਯਪਚ੍ਚਨੀਯੇ ਪਨ ‘‘ਅਕੁਸਲਂ ਧਮ੍ਮਂ ਪਟਿਚ੍ਚ ਅਕੁਸਲੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ. ਵਿਚਿਕਿਚ੍ਛਾਸਹਗਤੇ ਉਦ੍ਧਚ੍ਚਸਹਗਤੇ ਖਨ੍ਧੇ ਪਟਿਚ੍ਚ ਵਿਚਿਕਿਚ੍ਛਾਸਹਗਤੋ ਉਦ੍ਧਚ੍ਚਸਹਗਤੋ ਮੋਹੋ. ਅਬ੍ਯਾਕਤਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ. ਅਹੇਤੁਕਂ ਵਿਪਾਕਾਬ੍ਯਾਕਤਂ ਕਿਰਿਯਾਬ੍ਯਾਕਤਂ ਏਕਂ ਖਨ੍ਧਂ…ਪੇ… ਦ੍ਵੇ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ. ਅਹੇਤੁਕਪਟਿਸਨ੍ਧਿਕ੍ਖਣੇ ਵਿਪਾਕਾਬ੍ਯਾਕਤਂ ਏਕਂ ਖਨ੍ਧਂ…ਪੇ… ਦ੍ਵੇ ਖਨ੍ਧਾ ਕਟਤ੍ਤਾ ਚ ਰੂਪਂ…ਪੇ… ਵਤ੍ਥੁਂ ਪਟਿਚ੍ਚ ਖਨ੍ਧਾ. ਏਕਂ ਮਹਾਭੂਤਂ ਪਟਿਚ੍ਚ…ਪੇ… ਮਹਾਭੂਤੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ, ਕਟਤ੍ਤਾਰੂਪਂ ਉਪਾਦਾਰੂਪਂ…ਪੇ… ਏਕਂ ਮਹਾਭੂਤਂ ਪਟਿਚ੍ਚ…ਪੇ… ਉਪਾਦਾਰੂਪ’’ਨ੍ਤਿ ਇਮਾ ਦ੍ਵੇ ਵਿਸ੍ਸਜ੍ਜਿਤਾ.
ਨਾਰਮ੍ਮਣਪਚ੍ਚਯੇ ‘‘ਕੁਸਲਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਕੁਸਲੇ…ਪੇ… ਅਕੁਸਲਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਅਕੁਸਲੇ…ਪੇ… ਅਬ੍ਯਾਕਤਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਕੁਸਲਞ੍ਚ ਅਬ੍ਯਾਕਤਞ੍ਚ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਚਿਤ੍ਤਸਮੁਟ੍ਠਾਨਂ ਰੂਪਂ, ਅਕੁਸਲਞ੍ਚ ਅਬ੍ਯਾਕਤਞ੍ਚ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਮਹਾਭੂਤੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪ’’ਨ੍ਤਿ ਇਮਾ ਪਞ੍ਚ ਵਿਸ੍ਸਜ੍ਜਿਤਾ.
ਨਾਧਿਪਤਿਪਚ੍ਚਯੇ ‘‘ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ…ਪੇ… ਕੁਸਲਂ ਏਕਂ ਖਨ੍ਧਂ…ਪੇ… ਦ੍ਵੇ ਖਨ੍ਧਾ. ਕੁਸਲਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਕੁਸਲੇ ਖਨ੍ਧੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ. ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਚ ਅਬ੍ਯਾਕਤੋ ਚ ਧਮ੍ਮਾ ਉਪ੍ਪਜ੍ਜਨ੍ਤਿ…ਪੇ… ਅਕੁਸਲਂ ਧਮ੍ਮਂ ਪਟਿਚ੍ਚ ਅਕੁਸਲੋ…ਪੇ… ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ, ਅਕੁਸਲਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਅਕੁਸਲੇ ਖਨ੍ਧੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ. ਅਕੁਸਲਂ ਧਮ੍ਮਂ ਪਟਿਚ੍ਚ ਅਕੁਸਲੋ ਚ ਅਬ੍ਯਾਕਤੋ ਚ ਧਮ੍ਮਾ…ਪੇ… ਅਬ੍ਯਾਕਤਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ …ਪੇ… ਮਹਾਭੂਤੇ ਪਟਿਚ੍ਚ…ਪੇ… ਕਟਤ੍ਤਾਰੂਪਂ ਉਪਾਦਾਰੂਪਂ. ਕੁਸਲਞ੍ਚ ਅਬ੍ਯਾਕਤਞ੍ਚ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਕੁਸਲੇ ਖਨ੍ਧੇ ਚ ਮਹਾਭੂਤੇ ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ. ਅਕੁਸਲਞ੍ਚ ਅਬ੍ਯਾਕਤਞ੍ਚ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਅਕੁਸਲੇ ਖਨ੍ਧੇ ਚ ਮਹਾਭੂਤੇ ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪ’’ਨ੍ਤਿ ਨਵ ਪੁਚ੍ਛਾ ਵਿਸ੍ਸਜ੍ਜਿਤਾ. ਨਾਨਨ੍ਤਰਨਸਮਨਨ੍ਤਰਪਚ੍ਚਯਾ ਨਾਰਮ੍ਮਣਪਚ੍ਚਯਸਦਿਸਾ.
ਨਾਞ੍ਞਮਞ੍ਞਪਚ੍ਚਯੇ ‘‘ਕੁਸਲਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਕੁਸਲੇ…ਪੇ… ਚਿਤ੍ਤਸਮੁਟ੍ਠਾਨਂ ਰੂਪਂ. ਅਕੁਸਲਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਅਕੁਸਲੇ…ਪੇ… ਚਿਤ੍ਤਸਮੁਟ੍ਠਾਨਂ ਰੂਪਂ. ਅਬ੍ਯਾਕਤਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਵਿਪਾਕਾਬ੍ਯਾਕਤੇ ਕਿਰਿਯਾਬ੍ਯਾਕਤੇ ਖਨ੍ਧੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ. ਪਟਿਸਨ੍ਧਿਕ੍ਖਣੇ ਵਿਪਾਕਾਬ੍ਯਾਕਤੇ…ਪੇ… ਕਟਤ੍ਤਾ ਰੂਪਂ. ਮਹਾਭੂਤੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ ਕਟਤ੍ਤਾਰੂਪਂ ਉਪਾਦਾਰੂਪਂ. ਬਾਹਿਰੇ ਮਹਾਭੂਤੇ ਪਟਿਚ੍ਚ ਉਪਾਦਾਰੂਪਂ. ਆਹਾਰਸਮੁਟ੍ਠਾਨੇ ਮਹਾਭੂਤੇ ਪਟਿਚ੍ਚ ਉਪਾਦਾਰੂਪਂ. ਉਤੁਸਮੁਟ੍ਠਾਨੇ…ਪੇ… ਉਪਾਦਾਰੂਪਂ. ਅਸਞ੍ਞਸਤ੍ਤਾਨਂ ਮਹਾਭੂਤੇ ਪਟਿਚ੍ਚ ਕਟਤ੍ਤਾਰੂਪਂ ਉਪਾਦਾਰੂਪਂ. ਕੁਸਲਞ੍ਚ ਅਬ੍ਯਾਕਤਞ੍ਚ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਕੁਸਲੇ ਖਨ੍ਧੇ ਚ ਮਹਾਭੂਤੇ ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ. ਅਕੁਸਲਞ੍ਚ ਅਬ੍ਯਾਕਤਞ੍ਚ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ…ਪੇ… ਅਕੁਸਲੇ ਖਨ੍ਧੇ ਚ ਮਹਾਭੂਤੇ ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪ’’ਨ੍ਤਿ ਪਞ੍ਚ ਵਿਸ੍ਸਜ੍ਜਿਤਾ. ਤਤ੍ਥ ਵਿਪਾਕਾਬ੍ਯਾਕਤੇ ਖਨ੍ਧੇ ਪਟਿਚ੍ਚ ਕਟਤ੍ਤਾਰੂਪਨ੍ਤਿ ਹਦਯਵਤ੍ਥੁਵਜ੍ਜਂ ਵੇਦਿਤਬ੍ਬਂ. ਨਉਪਨਿਸ੍ਸਯਪਚ੍ਚਯੋ ਨਾਰਮ੍ਮਣਪਚ੍ਚਯਸਦਿਸੋ.
ਨਪੁਰੇਜਾਤਪਚ੍ਚਯੇ ‘‘ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ…ਪੇ… ਅਰੂਪੇ ਕੁਸਲਂ…ਪੇ… ਦ੍ਵੇ ਖਨ੍ਧਾ. ਕੁਸਲਂ ਪਟਿਚ੍ਚ ਅਬ੍ਯਾਕਤੋ…ਪੇ… ਚਿਤ੍ਤਸਮੁਟ੍ਠਾਨਂ ਰੂਪ’’ਨ੍ਤਿ ਕੁਸਲਪਦੇ ਦ੍ਵੇ, ਤਥਾ ਅਕੁਸਲਪਦੇਪਿ. ‘‘ਅਬ੍ਯਾਕਤਂ ਪਟਿਚ੍ਚ ਅਬ੍ਯਾਕਤੋ…ਪੇ… ਅਰੂਪੇ ਵਿਪਾਕਾਬ੍ਯਾਕਤਂ ਕਿਰਿਯਾਬ੍ਯਾਕਤਂ…ਪੇ… ਬਾਹਿਰਂ…ਪੇ… ਉਪਾਦਾਰੂਪਂ. ਕੁਸਲਞ੍ਚ ਅਬ੍ਯਾਕਤਞ੍ਚ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ. ਕੁਸਲੇ ਖਨ੍ਧੇ ਚ ਮਹਾਭੂਤੇ ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ. ਅਕੁਸਲਞ੍ਚ ਅਬ੍ਯਾਕਤਞ੍ਚ…ਪੇ… ਅਕੁਸਲੇ ਖਨ੍ਧੇ ਚ…ਪੇ… ਰੂਪ’’ਨ੍ਤਿ ਇਮਾ ਤਿਸ੍ਸੋਤਿ ਸਤ੍ਤ ਵਿਸ੍ਸਜ੍ਜਿਤਾ. ਨਪਚ੍ਛਾਜਾਤਨਾਸੇਵਨਪਚ੍ਚਯਾ ਨਾਧਿਪਤਿਪਚ੍ਚਯਸਦਿਸਾ. ਤਤ੍ਥ ਕੁਸਲਾਕੁਸਲਕਿਰਿਯਾਨਂ ਪਠਮਜਵਨਵਸੇਨ ਨਾਸੇਵਨਪਚ੍ਚਯਪ੍ਪਵਤ੍ਤਿ ਵੇਦਿਤਬ੍ਬਾ.
ਨਕਮ੍ਮਪਚ੍ਚਯੇ ‘‘ਕੁਸਲਂ ਪਟਿਚ੍ਚ ਕੁਸਲੋ, ਕੁਸਲਾ ਚੇਤਨਾ. ਅਕੁਸਲਂ ਪਟਿਚ੍ਚ ਅਕੁਸਲੋ, ਅਕੁਸਲਾ ਚੇਤਨਾ. ਅਬ੍ਯਾਕਤਂ ਪਟਿਚ੍ਚ ਅਬ੍ਯਾਕਤੋ, ਵਿਪਾਕਕਿਰਿਯਾ ਚੇਤਨਾ. ਬਾਹਿਰਂ, ਆਹਾਰਸਮੁਟ੍ਠਾਨਂ, ਉਤੁਸਮੁਟ੍ਠਾਨ’’ਨ੍ਤਿ ਤਿਸ੍ਸੋ ਵਿਸ੍ਸਜ੍ਜਿਤਾ.
ਨਵਿਪਾਕਪਚ੍ਚਯੇ ‘‘ਕੁਸਲਂ ਪਟਿਚ੍ਚ ਕੁਸਲੋ, ਅਬ੍ਯਾਕਤੋ. ਕੁਸਲੋ ਚ ਅਬ੍ਯਾਕਤੋ ਚਾ’’ਤਿ ਕੁਸਲਪਦੇ ਤਿਸ੍ਸੋ, ਤਥਾ ਅਕੁਸਲਪਦੇਪਿ. ‘‘ਅਬ੍ਯਾਕਤਂ ਪਟਿਚ੍ਚ ਅਬ੍ਯਾਕਤੋ…ਪੇ… ਬਾਹਿਰਂ ਆਹਾਰਸਮੁਟ੍ਠਾਨਂ ਉਤੁਸਮੁਟ੍ਠਾਨਂ ਅਸਞ੍ਞ…ਪੇ… ਉਪਾਦਾਰੂਪਂ…ਪੇ… ਅਕੁਸਲਞ੍ਚ ਅਬ੍ਯਾਕਤਞ੍ਚ ਅਬ੍ਯਾਕਤੋ’’ਤਿ ਇਮਾ ਤਿਸ੍ਸੋਤਿ ਨਵ ਵਿਸ੍ਸਜ੍ਜਿਤਾ.
ਨਾਹਾਰਪਚ੍ਚਯੇ ‘‘ਅਬ੍ਯਾਕਤਂ ਪਟਿਚ੍ਚ ਅਬ੍ਯਾਕਤੋ. ਬਾਹਿਰਂ ਉਤੁਸਮੁਟ੍ਠਾਨਂ, ਅਸਞ੍ਞ…ਪੇ… ਉਪਾਦਾਰੂਪ’’ਨ੍ਤਿ ਏਕਾਵ.
ਨਇਨ੍ਦ੍ਰਿਯਪਚ੍ਚਯੇ ‘‘ਅਬ੍ਯਾਕਤਂ ਪਟਿਚ੍ਚ ਅਬ੍ਯਾਕਤੋ. ਬਾਹਿਰਂ ਆਹਾਰਸਮੁਟ੍ਠਾਨਂ…ਪੇ… ਉਤੁਸਮੁਟ੍ਠਾਨਂ…ਪੇ… ਅਸਞ੍ਞਸਤ੍ਤਾਨਂ ਮਹਾਭੂਤੇ ਪਟਿਚ੍ਚ ਰੂਪਜੀਵਿਤਿਨ੍ਦ੍ਰਿਯ’’ਨ੍ਤਿ ਏਕਾਵ.
ਨਝਾਨਪਚ੍ਚਯੇ ‘‘ਅਬ੍ਯਾਕਤਂ ਪਟਿਚ੍ਚ ਅਬ੍ਯਾਕਤੋ. ਪਞ੍ਚਵਿਞ੍ਞਾਣਸਹਗਤਂ…ਪੇ… ਬਾਹਿਰਂ ਆਹਾਰਉਤੁਅਸਞ੍ਞਉਪਾਦਾਰੂਪ’’ਨ੍ਤਿ ਏਕਾਵ.
ਨਮਗ੍ਗਪਚ੍ਚਯੇ ‘‘ਅਬ੍ਯਾਕਤਂ ਪਟਿਚ੍ਚ ਅਬ੍ਯਾਕਤੋ. ਅਹੇਤੁਕਂ ਵਿਪਾਕਾਬ੍ਯਾਕਤਂ ਕਿਰਿਯਾਬ੍ਯਾਕਤਂ…ਪੇ… ਚਿਤ੍ਤਸਮੁਟ੍ਠਾਨਂ…ਪੇ… ਅਹੇਤੁਕਪਟਿਸਨ੍ਧਿਕ੍ਖਣੇ ਵਿਪਾਕਾ…ਪੇ… ਕਟਤ੍ਤਾ ਚ ਰੂਪਂ…ਪੇ… ਬਾਹਿਰਂ ਆਹਾਰਉਤੁਅਸਞ੍ਞਉਪਾਦਾਰੂਪ’’ਨ੍ਤਿ ਏਕਾਵ.
ਨਸਮ੍ਪਯੁਤ੍ਤਪਚ੍ਚਯੋ ਨਾਰਮ੍ਮਣਪਚ੍ਚਯਸਦਿਸੋ.
ਨਵਿਪ੍ਪਯੁਤ੍ਤਪਚ੍ਚਯੇ ‘‘ਕੁਸਲਂ ਪਟਿਚ੍ਚ ਕੁਸਲੋ. ਅਰੂਪੇ ਕੁਸਲੋਵ. ਅਕੁਸਲਂ…ਪੇ… ਅਰੂਪੇ ਅਕੁਸਲੋ. ਅਬ੍ਯਾਕਤਂ ਪਟਿਚ੍ਚ ਅਬ੍ਯਾਕਤੋ, ਅਰੂਪੇ ਵਿਪਾਕਕਿਰਿਯਾਬ੍ਯਾਕਤਂ. ਬਾਹਿਰਂ ਅਸਞ੍ਞ…ਪੇ… ਉਪਾਦਾਰੂਪ’’ਨ੍ਤਿ ਇਮਾ ਤਿਸ੍ਸੋਵ ਪੁਚ੍ਛਾ ਵਿਸ੍ਸਜ੍ਜਿਤਾ. ਨੋਨਤ੍ਥਿਨੋਵਿਗਤਪਚ੍ਚਯਾ ਨਾਰਮ੍ਮਣਪਚ੍ਚਯਸਦਿਸਾ. ਨਸਹਜਾਤਨਨਿਸ੍ਸਯਨੋਅਤ੍ਥਿਨੋਅਵਿਗਤਪਚ੍ਚਯਾ ਪਨੇਤ੍ਥ ਚਤ੍ਤਾਰੋਪਿ ਨ ਲਬ੍ਭਨ੍ਤੀਤਿ.
ਏਵਂ ਪਚ੍ਚਨੀਕੇ ਲਬ੍ਭਮਾਨਪਞ੍ਹਵਿਸ੍ਸਜ੍ਜਨਂ ਦਸ੍ਸੇਤ੍ਵਾ ਤਤੋ ‘‘ਨਹੇਤੁਯਾ ਦ੍ਵੇ. ਨਾਰਮ੍ਮਣੇ ਪਞ੍ਚ. ਨਾਧਿਪਤਿਯਾ ਨਵ. ਨਾਨਨ੍ਤਰੇ ਨਸਮਨਨ੍ਤਰੇ ਨਾਞ੍ਞਮਞ੍ਞੇ ਨਉਪਨਿਸ੍ਸਯੇ ਪਞ੍ਚ. ਨਪੁਰੇਜਾਤੇ ਸਤ੍ਤ. ਨਪਚ੍ਛਾਜਾਤੇ ਨਾਸੇਵਨੇ ਨਵ. ਨਕਮ੍ਮੇ ਤੀਣਿ. ਨਵਿਪਾਕੇ ਨਵ. ਨਾਹਾਰੇ ਨਇਨ੍ਦ੍ਰਿਯੇ ਨਝਾਨੇ ਨਮਗ੍ਗੇ ਏਕਂ. ਨਸਮ੍ਪਯੁਤ੍ਤੇ ਪਞ੍ਚ. ਨਵਿਪ੍ਪਯੁਤ੍ਤੇ ਤੀਣਿ. ਨੋਨਤ੍ਥਿਨੋਵਿਗਤੇਸੁ ਪਞ੍ਚਾ’’ਤਿ ਵਿਸ੍ਸਜ੍ਜਨਵਾਰਗਣਨਾ ਵੁਤ੍ਤਾਤਿ ਅਯਂ ਏਕਮੂਲਕਨਯੋ.
ਇਮਿਨਾਵ ਨਯੇਨ ਦ੍ਵਿਮੂਲਕਾਦੀਸੁਪਿ ਯਥਾਨੁਰੂਪਂ ਨਯੋ ਨੇਤਬ੍ਬੋ, ਪਾਲ਼ਿਯਂ ਪਨ ‘‘ਨਹੇਤੁਪਚ੍ਚਯਾ ਨਾਰਮ੍ਮਣੇ ਏਕ’’ਨ੍ਤਿਆਦਿਨਾ ਵਿਸ੍ਸਜ੍ਜਨਵਾਰਗਣਨਾਵ ਦਸ੍ਸਿਤਾਤਿ ਅਯਂ ਪਚ੍ਚਯਪਚ੍ਚਨੀਯਨਯੋ.
ਇਮਿਨਾ ਵੁਤ੍ਤਾਨੁਸਾਰੇਨੇਵ ‘‘ਕੁਸਲਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ ਨਾਰਮ੍ਮਣਪਚ੍ਚਯਾ’’ਤਿਆਦਿਨਾ ਅਨੁਲੋਮਪਚ੍ਚਨੀਯਨਯੇ, ‘‘ਅਕੁਸਲਂ ਧਮ੍ਮਂ ਪਟਿਚ੍ਚ ਅਕੁਸਲੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ ਆਰਮ੍ਮਣਪਚ੍ਚਯਾ’’ਤਿਆਦਿਨਾ ਪਚ੍ਚਨੀਯਾਨੁਲੋਮਨਯੇ ਪਞ੍ਹਵਿਸ੍ਸਜ੍ਜਨਨਯੋ ਵੇਦਿਤਬ੍ਬੋ. ਪਾਲ਼ਿਯਂ ਪਨੇਤ੍ਥ ਵਿਸ੍ਸਜ੍ਜਨਵਾਰਗਣਨਾਵ ਦਸ੍ਸਿਤਾਤਿ ਅਯਂ ਅਨੁਲੋਮਪਚ੍ਚਨੀਯਕੁਸਲਤ੍ਤਿਕੇ ਪਟਿਚ੍ਚਵਾਰਨਯੋ.
ਸਹਜਾਤਵਾਰਾਦੀਸੁਪਿ ਛਵਾਰੇਸੁ ਪਟਿਚ੍ਚਵਾਰੇ ਵੁਤ੍ਤਾਨੁਸਾਰੇਨ ਸਬ੍ਬਤ੍ਥ ਨਯੋ ਨੇਤਬ੍ਬੋ. ਯੇ ਪਨ ਤਤ੍ਥ ਤਤ੍ਥ ਪਾਲ਼ਿਵਿਸੇਸਾ, ਅਤ੍ਥਵਿਸੇਸਾ ਚ ਉਪਲਬ੍ਭਨ੍ਤਿ, ਤੇ ਪਟ੍ਠਾਨਪਾਲ਼ਿਅਟ੍ਠਕਥਾਸੁ ਏਵ ਸਬ੍ਬਾਕਾਰਤੋ ਗਹੇਤਬ੍ਬਾ. ਇਧ ਪਨ ਤੇ ਸਬ੍ਬੇ ਸਙ੍ਖੇਪਨਯਤੋ ਦਸ੍ਸਿਯਮਾਨਾਪਿ ਗਨ੍ਥਭਾਰਿਯਂ ਕਰੋਨ੍ਤੀਤਿ ਨ ਦਸ੍ਸਿਤਾ.
ਤੇਸੁ ਪਨ ਵਾਰੇਸੁ ‘‘ਕੁਸਲਂ ਧਮ੍ਮਂ ਸਹਜਾਤੋ ਕੁਸਲੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ. ਕੁਸਲਂ ਧਮ੍ਮਂ ਪਚ੍ਚਯਾ… ਕੁਸਲਂ ਧਮ੍ਮਂ ਨਿਸ੍ਸਾਯ… ਕੁਸਲਂ ਧਮ੍ਮਂ ਸਂਸਟ੍ਠੋ… ਕੁਸਲਂ ਧਮ੍ਮਂ ਸਮ੍ਪਯੁਤ੍ਤੋ ਕੁਸਲੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿ ਏਵਂ ਆਦਿਤੋ ਪਞ੍ਚਸੁ ਵਾਰੇਸੁ ਪਾਲ਼ਿਗਤਿ ਞਾਤਬ੍ਬਾ. ਤੇਸੁ ਚ ਪਟਿਚ੍ਚਸਹਜਾਤਾ ਏਕਤ੍ਥਾ, ਪਚ੍ਚਯਨਿਸ੍ਸਯਾ ਏਕਤ੍ਥਾ, ਸਂਸਟ੍ਠਸਮ੍ਪਯੁਤ੍ਤਾ ਏਕਤ੍ਥਾ. ਤਤ੍ਥ ‘‘ਕੁਸਲਂ ਧਮ੍ਮਂ ਸਹਜਾਤੋ’’ਤਿਆਦੀਸੁ ਕੁਸਲਂ ਧਮ੍ਮਂ ਪਟਿਚ੍ਚ ਤੇਨ ਸਹਜਾਤੋ ਹੁਤ੍ਵਾਤਿਆਦਿਨਾ ਯਥਾਨੁਰੂਪਂ ਅਤ੍ਥੋ ਵੇਦਿਤਬ੍ਬੋ. ਪਚ੍ਛਿਮੇ ਪਨ ਪਞ੍ਹਾਵਾਰੇ ‘‘ਕੁਸਲੋ ਧਮ੍ਮੋ ਕੁਸਲਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ. ਕੁਸਲਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. ਕੁਸਲੋ ਅਬ੍ਯਾਕਤਸ੍ਸ…ਪੇ… ਕੁਸਲਸ੍ਸ ਚ ਅਬ੍ਯਾਕਤਸ੍ਸ ਚ…ਪੇ… ਕੁਸਲਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚਾ’’ਤਿਆਦਿਨਾ ਹੇਤੁਪਚ੍ਚਯੇ,
‘‘ਕੁਸਲੋ ਧਮ੍ਮੋ ਕੁਸਲਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ. ਦਾਨਂ ਦਤ੍ਵਾ ਸੀਲਂ ਸਮਾਦਿਯਿਤ੍ਵਾ ਉਪੋਸਥਕਮ੍ਮਂ ਕਤ੍ਵਾ ਤਂ ਪਚ੍ਚਵੇਕ੍ਖਤਿ. ਪੁਬ੍ਬੇ ਸੁਚਿਣ੍ਣਾਨਿ…ਪੇ… ਝਾਨਾ ਵੁਟ੍ਠਹਿਤ੍ਵਾ ਝਾਨਂ… ਸੇਖਾ ਗੋਤ੍ਰਭੁਂ ਵੋਦਾਨਂ ਮਗ੍ਗਂ ਪਚ੍ਚਵੇਕ੍ਖਨ੍ਤਿ. ਸੇਖਾ ਵਾ ਪੁਥੁਜ੍ਜਨਾ ਵਾ ਕੁਸਲਂ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਵਿਪਸ੍ਸਨ੍ਤਿ. ਚੇਤੋਪਰਿਯਞਾਣੇਨ ਕੁਸਲਚਿਤ੍ਤਸਮਙ੍ਗਿਸ੍ਸ ਚਿਤ੍ਤਂ ਜਾਨਨ੍ਤਿ. ਆਕਾਸਾਨਞ੍ਚਾਯਤਨਕੁਸਲਂ ਵਿਞ੍ਞਾਣਞ੍ਚਾਯਤਨਕੁਸਲਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ. ਆਕਿਞ੍ਚਞ੍ਞਾਯਤਨਕੁਸਲਂ ਨੇਵਸਞ੍ਞਾਨਾਸਞ੍ਞਾਯਤਨਕੁਸਲਸ੍ਸ… ਕੁਸਲਾ ਖਨ੍ਧਾ ਇਦ੍ਧਿਵਿਧਞਾਣਸ੍ਸ ਚੇਤੋਪਰਿਯਪੁਬ੍ਬੇਨਿਵਾਸਯਥਾਕਮ੍ਮੂਪਗਅਨਾਗਤਂਸਞਾਣਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ.
ਕੁਸਲੋ ਅਕੁਸਲਸ੍ਸ…ਪੇ… ਦਾਨਂ ਦਤ੍ਵਾ…ਪੇ… ਕਤ੍ਵਾ ਤਂ ਅਸ੍ਸਾਦੇਤਿ ਅਭਿਨਨ੍ਦਤਿ. ਤਂ ਆਰਬ੍ਭ ਰਾਗੋ ਉਪ੍ਪਜ੍ਜਤਿ. ਦਿਟ੍ਠਿ ਵਿਚਿਕਿਚ੍ਛਾ ਉਦ੍ਧਚ੍ਚਂ ਦੋਮਨਸ੍ਸਂ ਉਪ੍ਪਜ੍ਜਤਿ. ਪੁਬ੍ਬੇ ਸੁਚਿਣ੍ਣਾਨਿ ਅਸ੍ਸਾਦੇਤਿ …ਪੇ… ਦੋਮਨਸ੍ਸਂ ਉਪ੍ਪਜ੍ਜਤਿ. ਝਾਨਾ ਵੁਟ੍ਠਹਿਤ੍ਵਾ ਝਾਨਂ ਅਸ੍ਸਾਦੇਤਿ…ਪੇ… ਉਦ੍ਧਚ੍ਚਂ ਉਪ੍ਪਜ੍ਜਤਿ. ਝਾਨੇ ਪਰਿਹੀਨੇ ਵਿਪ੍ਪਟਿਸਾਰਿਸ੍ਸ ਦੋਮਨਸ੍ਸਂ ਉਪ੍ਪਜ੍ਜਤਿ.
ਕੁਸਲੋ ਅਬ੍ਯਾਕਤਸ੍ਸ…ਪੇ… ਪਚ੍ਚਯੋ. ਅਰਹਾ ਮਗ੍ਗਂ ਪਚ੍ਚਵੇਕ੍ਖਤਿ. ਪੁਬ੍ਬੇ ਸੁਚਿਣ੍ਣਾਨਿ… ਕੁਸਲ…ਪੇ… ਵਿਪਸ੍ਸਤਿ…ਪੇ… ਵਿਪਾਕੋ ਤਦਾਰਮ੍ਮਣਤਾ ਉਪ੍ਪਜ੍ਜਤਿ. ਆਕਾਸਾਨਞ੍ਚਾਯਤਨਕੁਸਲਂ ਵਿਞ੍ਞਾਣਞ੍ਚਾਯਤਨਵਿਪਾਕਸ੍ਸ…ਪੇ… ਕਿਰਿਯਸ੍ਸ. ਆਕਿਞ੍ਚਞ੍ਞਾਯਤਨ…ਪੇ… ਵਿਪਾਕਸ੍ਸ ਚ ਕਿਰਿਯਸ੍ਸ ਚ. ਕੁਸਲਾ ਖਨ੍ਧਾ ਚੇਤੋਪਰਿਯ…ਪੇ… ਅਨਾਗਤਂਸਞਾਣਸ੍ਸ ਆਵਜ੍ਜਨਾਯ.
ਅਕੁਸਲੋ ਅਕੁਸਲਸ੍ਸ…ਪੇ… ਪਚ੍ਚਯੋ. ਰਾਗਂ ਅਸ੍ਸਾਦੇਤਿ…ਪੇ… ਉਦ੍ਧਚ੍ਚਂ ਉਪ੍ਪਜ੍ਜਤਿ. ਅਕੁਸਲੋ ਕੁਸਲਸ੍ਸ…ਪੇ… ਪਚ੍ਚਯੋ. ਸੇਖਾ ਪਹੀਨੇ ਕਿਲੇਸੇ…ਪੇ… ਅਨਾਗਤਂਸਞਾਣਸ੍ਸ. ਅਕੁਸਲੋ ਅਬ੍ਯਾਕਤਸ੍ਸ… ਅਰਹਾ ਪਹੀਨੇ ਕਿਲੇਸੇ…ਪੇ… ਆਵਜ੍ਜਨਾਯ.
ਅਬ੍ਯਾਕਤੋ ਅਬ੍ਯਾਕਤਸ੍ਸ… ਅਰਹਾ ਫਲਂ ਪਚ੍ਚਵੇਕ੍ਖਤਿ. ਨਿਬ੍ਬਾਨਂ, ਚਕ੍ਖੁਂ…ਪੇ… ਫੋਟ੍ਠਬ੍ਬਂ ਵਿਪਸ੍ਸਤਿ. ਦਿਬ੍ਬੇਨ ਚਕ੍ਖੁਨਾ ਰੂਪਂ ਪਸ੍ਸਤਿ…ਪੇ… ਆਕਿਞ੍ਚਞ੍ਞਾਯਤਨਕਿਰਿਯਂ…ਪੇ… ਕਿਰਿਯਸ੍ਸ. ਰੂਪਾਯਤਨਂ ਚਕ੍ਖੁਵਿਞ੍ਞਾਣਸ੍ਸ…ਪੇ… ਆਵਜ੍ਜਨਾਯ. ਅਬ੍ਯਾਕਤੋ ਕੁਸਲਸ੍ਸ… ਸੇਖਾ ਫਲਂ…ਪੇ… ਅਨਾਗਤਂਸਞਾਣਸ੍ਸ. ਅਬ੍ਯਾਕਤੋ ਅਕੁਸਲਸ੍ਸ… ਚਕ੍ਖੁਂ ਅਸ੍ਸਾਦੇਤੀ’’ਤਿਆਦਿਨਾ ਆਰਮ੍ਮਣਪਚ੍ਚਯੇ ਚ,
‘‘ਕੁਸਲੋ ਕੁਸਲਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਆਰਮ੍ਮਣਾਧਿਪਤਿ, ਸਹਜਾਤਾਧਿਪਤਿ. ਆਰਮ੍ਮਣਾਧਿਪਤਿ – ਦਾਨਂ ਦਤ੍ਵਾ’’ਤਿਆਦਿਨਾ ਅਧਿਪਤਿਪਚ੍ਚਯੇ ਚ,
‘‘ਕੁਸਲੋ ਕੁਸਲਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ’’ਤਿਆਦਿਨਾ ਵਿਤ੍ਥਾਰਤੋ ਅਨਨ੍ਤਰਸਮਨਨ੍ਤਰਸਹਜਾਤਅਞ੍ਞਮਞ੍ਞਨਿਸ੍ਸਯਪਚ੍ਚਯੇਸੁ ਚ,
‘‘ਕੁਸਲੋ ਕੁਸਲਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਆਰਮ੍ਮਣੂਪਨਿਸ੍ਸਯੋ ਅਨਨ੍ਤਰੂਪਨਿਸ੍ਸਯੋ ਪਕਤੂਪਨਿਸ੍ਸਯੋ. ਆਰਮ੍ਮਣੂਪਨਿਸ੍ਸਯੋ – ਦਾਨਂ ਦਤ੍ਵਾ’’ਤਿਆਦਿਨਾ ਆਰਮ੍ਮਣਪਚ੍ਚਯੇ ਵੁਤ੍ਤਨਯੇਨ, ‘‘ਅਨਨ੍ਤਰੂਪਨਿਸ੍ਸਯੋ – ਪੁਰਿਮਾ ਪੁਰਿਮਾ ਕੁਸਲਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨ’’ਨ੍ਤਿਆਦਿਨਾ ਅਨਨ੍ਤਰਪਚ੍ਚਯੇ ਵੁਤ੍ਤਨਯੇਨੇਵ, ‘‘ਪਕਤੂਪਨਿਸ੍ਸਯੋ – ਸਦ੍ਧਂ ਉਪਨਿਸ੍ਸਾਯ…ਪੇ… ਉਪੋਸਥਕਮ੍ਮਂ ਕਰੋਤਿ. ਝਾਨਂ, ਵਿਪਸ੍ਸਨਂ, ਮਗ੍ਗਂ, ਅਭਿਞ੍ਞਂ, ਸਮਾਪਤ੍ਤਿਂ ਉਪ੍ਪਾਦੇਤਿ. ਸੀਲਂ, ਸੁਤਂ, ਚਾਗਂ, ਪਞ੍ਞਂ ਉਪਨਿਸ੍ਸਾਯ…ਪੇ… ਪਠਮਸ੍ਸ ਝਾਨਸ੍ਸ ਪਰਿਕਮ੍ਮਂ ਪਠਮਸ੍ਸ ਝਾਨਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ…ਪੇ… ਆਕਿਞ੍ਚਞ੍ਞਾਯਤਨਂ ਨੇਵਸਞ੍ਞਾਨਾਸਞ੍ਞਾਯਤਨਸ੍ਸ…ਪੇ… ਯਥਾਕਮ੍ਮੂਪਗਞਾਣਂ ਅਨਾਗਤਂਸਞਾਣਸ੍ਸ…ਪੇ… ਪਠਮਸ੍ਸ ਮਗ੍ਗਸ੍ਸ ਪਰਿਕਮ੍ਮਂ ਪਠਮਸ੍ਸ…ਪੇ… ਤਤਿਯੋ ਮਗ੍ਗੋ ਚਤੁਤ੍ਥਸ੍ਸ. ਮਗ੍ਗੋ ਸੇਖਾਨਂ ਅਤ੍ਥਪਟਿਸਮ੍ਭਿਦਾਯ…ਪੇ… ਠਾਨਾਠਾਨਕੋਸਲ੍ਲਸ੍ਸ ਉਪਨਿਸ੍ਸਯ. ਕੁਸਲੋ ਅਕੁਸਲਸ੍ਸ…ਪੇ… ਆਰਮ੍ਮਣੂਪਨਿਸ੍ਸਯੋ. ਪਕਤੂਪ…ਪੇ… ਪਕਤੂਪਨਿਸ੍ਸਯੋ – ਸਦ੍ਧਂ ਉਪਨਿਸ੍ਸਾਯ ਮਾਨਂ ਜਪ੍ਪੇਤਿ. ਦਿਟ੍ਠਿਂ ਗਣ੍ਹਾਤਿ…ਪੇ… ਸਦ੍ਧਾ ਸੀਲਂ ਸੁਤਂ ਚਾਗੋ ਪਞ੍ਞਾ ਰਾਗਸ੍ਸ, ਦੋਸਸ੍ਸ, ਮੋਹਸ੍ਸ, ਮਾਨਸ੍ਸ, ਦਿਟ੍ਠਿਯਾ. ਪਤ੍ਥਨਾਯ…ਪੇ… ਕੁਸਲੋ ਅਬ੍ਯਾਕਤਸ੍ਸ…ਪੇ… ਆਰਮ੍ਮਣੂਪਨਿਸ੍ਸਯੋ. ਅਨਨ੍ਤਰੂਪਨਿਸ੍ਸਯੋ. ਪਕਤੂਪ…ਪੇ… ਪਕਤੂਪਨਿਸ੍ਸਯੋ – ਸਦ੍ਧਂ ਉਪਨਿਸ੍ਸਾਯ ਅਤ੍ਤਾਨਂ ਆਤਾਪੇਤਿ…ਪੇ… ਕਾਯਿਕਸ੍ਸ ਸੁਖਸ੍ਸ, ਦੁਕ੍ਖਸ੍ਸ, ਫਲਸਮਾਪਤ੍ਤਿਯਾ. ਕੁਸਲਂ ਕਮ੍ਮਂ ਵਿਪਾਕਸ੍ਸ…ਪੇ… ਮਗ੍ਗੋ ਅਰਹਤੋ ਅਤ੍ਥਪਟਿਸਮ੍ਭਿਦਾਯ ਪਚ੍ਚਯੋ.
ਅਕੁਸਲੋ ਅਕੁਸਲਸ੍ਸ…ਪੇ… ਪਕਤੂਪਨਿਸ੍ਸਯੋ – ਰਾਗਂ ਉਪਨਿਸ੍ਸਾਯ ਪਾਣਂ ਹਨਤਿ…ਪੇ… ਸਮ੍ਫਂ ਪਲਪਤਿ…ਪੇ… ਸਙ੍ਘਂ ਭਿਨ੍ਦਤਿ. ਦੋਸਂ, ਮੋਹਂ, ਮਾਨਂ, ਦਿਟ੍ਠਿਂ, ਪਤ੍ਥਨਂ ਉਪਨਿਸ੍ਸਾਯ…ਪੇ… ਸਙ੍ਘਂ ਭਿਨ੍ਦਤਿ…ਪੇ… ਪਾਣਾਤਿਪਾਤੋ ਪਾਣਾਤਿਪਾਤਸ੍ਸ…ਪੇ… ਸਙ੍ਘਭੇਦਕਮ੍ਮਸ੍ਸ…ਪੇ… ਪਚ੍ਚਯੋ.
ਅਕੁਸਲੋ ਕੁਸਲਸ੍ਸ…ਪੇ… ਪਕਤੂਪਨਿਸ੍ਸਯੋ – ਰਾਗਂ ਉਪਨਿਸ੍ਸਾਯ ਦਾਨਂ ਦੇਤਿ…ਪੇ… ਮਗ੍ਗਂ ਉਪ੍ਪਾਦੇਤਿ…ਪੇ… ਸਮਾਪਤ੍ਤਿਂ ਉਪ੍ਪਾਦੇਤਿ. ਰਾਗੋ…ਪੇ… ਪਤ੍ਥਨਾ. ਸਦ੍ਧਾਯ, ਸੀਲਸ੍ਸ…ਪੇ… ਪਞ੍ਞਾਯ ਉਪਨਿਸ੍ਸਯ. ਪਾਣਂ ਹਨ੍ਤ੍ਵਾ ਤਸ੍ਸ ਪਟਿਘਾਤਤ੍ਥਾਯ ਦਾਨਂ ਦੇਤੀ’’ਤਿਆਦਿਨਾ ਚ ਉਪਨਿਸ੍ਸਯਪਚ੍ਚਯੇ ਚ,
‘‘ਅਬ੍ਯਾਕਤੋ ਅਬ੍ਯਾਕਤਸ੍ਸ ਪੁਰੇਜਾਤਪਚ੍ਚਯੇਨ ਪਚ੍ਚਯੋ…ਪੇ… ਆਰਮ੍ਮਣਪੁਰੇਜਾਤਂ – ਅਰਹਾ ਚਕ੍ਖੁਂ…ਪੇ… ਫੋਟ੍ਠਬ੍ਬੇ, ਵਤ੍ਥੁਂ ਵਿਪਸ੍ਸਤਿ…ਪੇ… ਦਿਬ੍ਬੇਨ ਚਕ੍ਖੁਨਾ ਰੂਪਂ ਪਸ੍ਸਤਿ…ਪੇ… ਰੂਪਾਯਤਨਂ ਚਕ੍ਖੁਵਿਞ੍ਞਾਣਸ੍ਸ…ਪੇ… ਵਤ੍ਥੁਪੁਰੇਜਾਤਂ – ਚਕ੍ਖਾਯਤਨਂ ਚਕ੍ਖੁਵਿਞ੍ਞਾਣਸ੍ਸ…ਪੇ… ਵਤ੍ਥੁ ਵਿਪਾਕਾਬ੍ਯਾਕਤਾਨ’’ਨ੍ਤਿਆਦਿਨਾ ਪੁਰੇਜਾਤਪਚ੍ਚਯੇ ਚ,
‘‘ਕੁਸਲੋ ਅਬ੍ਯਾਕਤਸ੍ਸ…ਪੇ… ਪਚ੍ਛਾਜਾਤਾ ਕੁਸਲਾ ਖਨ੍ਧਾ ਪੁਰੇਜਾਤਸ੍ਸ ਇਮਸ੍ਸ ਕਾਯਸ੍ਸਾ’’ਤਿਆਦਿਨਾ ਪਚ੍ਛਾਜਾਤਪਚ੍ਚਯੇ ਚ,
‘‘ਕੁਸਲੋ ਕੁਸਲਸ੍ਸ…ਪੇ… ਪੁਰਿਮਾ ਪੁਰਿਮਾ ਕੁਸਲਾ ਖਨ੍ਧਾ’’ਤਿਆਦਿਨਾ ਆਸੇਵਨਪਚ੍ਚਯੇ ਚ,
‘‘ਸਹਜਾਤਾ ਨਾਨਾਕ੍ਖਣਿਕਾ, ਸਹਜਾਤਾ ਕੁਸਲਾ ਚੇਤਨਾ…ਪੇ… ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ. ਨਾਨਾਕ੍ਖਣਿਕਾ ਵਿਪਾਕਾਨਂ ਖਨ੍ਧਾਨਂ ਕਟਤ੍ਤਾ ਚ ਰੂਪਾਨ’’ਨ੍ਤਿਆਦਿਨਾ ਕਮ੍ਮਪਚ੍ਚਯੇ ਚ,
‘‘ਅਬ੍ਯਾਕਤੋ ਅਬ੍ਯਾਕਤਸ੍ਸ…ਪੇ… ਏਕੋ ਖਨ੍ਧੋ ਤਿਣ੍ਣਨ੍ਨ’’ਨ੍ਤਿਆਦਿਨਾ ਵਿਪਾਕਪਚ੍ਚਯੇ ਚ,
‘‘ਕੁਸਲੋ ਕੁਸਲਸ੍ਸਾ’’ਤਿਆਦਿਨਾ ਆਹਾਰਪਚ੍ਚਯਾਦੀਸੁ ਚ, ‘‘ਕੁਸਲੋ ਅਬ੍ਯਾਕਤਸ੍ਸ, ਸਹਜਾਤਂ, ਪਚ੍ਛਾਜਾਤਂ, ਸਹਜਾਤਾ ਚਿਤ੍ਤਸਮੁਟ੍ਠਾਨਾਨਂ ਰੂਪਾਨਂ. ਪਚ੍ਛਾਜਾਤਾ ਇਮਸ੍ਸ ਕਾਯਸ੍ਸ…ਪੇ… ਅਬ੍ਯਾਕਤੋ ਕੁਸਲਸ੍ਸ…ਪੇ… ਪੁਰੇਜਾਤਂ ਵਤ੍ਥੁ ਕੁਸਲਾਨਂ ਖਨ੍ਧਾਨਂ ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ’’ਤਿਆਦਿਨਾ ਵਿਪ੍ਪਯੁਤ੍ਤਪਚ੍ਚਯਾਦੀਸੁ ਚ ਪਾਲ਼ਿਗਤਿ ਵੇਦਿਤਬ੍ਬਾ.
ਤਤ੍ਥ ਕੁਸਲਧਮ੍ਮੋ ਨਾਮੇਸ ਯਸ੍ਮਾ ਉਪ੍ਪਜ੍ਜਨ੍ਤੋ ਠਪੇਤ੍ਵਾ ਪਚ੍ਛਾਜਾਤਪਚ੍ਚਯਂ, ਵਿਪਾਕਪਚ੍ਚਯਞ੍ਚ ਸੇਸੇਹਿ ਦ੍ਵਾਵੀਸਤਿਯਾ ਪਚ੍ਚਯੇਹਿ ਉਪ੍ਪਜ੍ਜਤਿ. ਕੁਸਲਸ੍ਸ ਚ ਪਚ੍ਚਯੋ ਹੋਨ੍ਤੋ ਠਪੇਤ੍ਵਾ ਪੁਰੇਜਾਤਪਚ੍ਛਾਜਾਤਵਿਪਾਕਵਿਪ੍ਪਯੁਤ੍ਤਪਚ੍ਚਯੇ ਸੇਸੇਹਿ ਵੀਸਤਿਯਾ ਪਚ੍ਚਯੇਹਿ ਪਚ੍ਚਯੋ ਹੋਤਿ. ਏਵਂ ਕੁਸਲੋ ਕੁਸਲਾਦੀਨਂ, ਅਕੁਸਲੋ ਚ ਅਕੁਸਲਾਦੀਨਂ ਯਥਾਨੁਰੂਪਂ ਪਚ੍ਚਯਾ ਹੋਨ੍ਤਿ, ਤਸ੍ਮਾ ਕੁਸਲਾਦੀਨਂ ਤਂਤਂਪਚ੍ਚਯੁਪ੍ਪਨ੍ਨਵਿਭਾਗਂ ਦਸ੍ਸੇਤੁਂ ਪਞ੍ਹਾਵਾਰੋ ਵੁਤ੍ਤੋ. ਤਤ੍ਥ ਸੇਖਾ ਗੋਤ੍ਰਭੁਨ੍ਤਿ ਸੋਤਾਪਨ੍ਨਂ ਸਨ੍ਧਾਯ ਵੁਤ੍ਤਂ, ਵੋਦਾਨਨ੍ਤਿ ਸਕਦਾਗਾਮਿਅਨਾਗਾਮਿਨੋ. ਤੇਸਂ ਹਿ ਗੋਤ੍ਰਭੁਚਿਤ੍ਤਂ ਵੋਦਾਨਂ ਨਾਮ. ਮਗ੍ਗਾ ਵੁਟ੍ਠਹਿਤ੍ਵਾਤਿ ਮਗ੍ਗਵੀਥਿਤੋ ਵੁਟ੍ਠਾਯ. ਨ ਹਿ ਮਗ੍ਗਾਨਨ੍ਤਰਾ ਪਚ੍ਚਵੇਕ੍ਖਣਾ ਨਾਮ ਅਤ੍ਥੀਤਿ ਅਯਂ ਅਨੁਲੋਮਪਟ੍ਠਾਨੇ ਕੁਸਲਤ੍ਤਿਕਨਯੋ.
ਵੇਦਨਾਤ੍ਤਿਕਾਦੀਸੁ ‘‘ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਧਮ੍ਮਂ ਪਟਿਚ੍ਚ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ. ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਏਕਂ ਖਨ੍ਧਂ ਪਟਿਚ੍ਚ ਦ੍ਵੇ ਖਨ੍ਧਾ. ਦ੍ਵੇ ਖਨ੍ਧੇ ਪਟਿਚ੍ਚ ਏਕੋ ਖਨ੍ਧੋ’’ਤਿਆਦਿਨਾ ਕੁਸਲਤ੍ਤਿਕੇ ਵੁਤ੍ਤਾਨੁਸਾਰੇਨ ਪਟਿਚ੍ਚਵਾਰਾਦੀਸੁ ਪਞ੍ਹਾਵਾਰਪਰਿਯੋਸਾਨੇਸੁ ਸਤ੍ਤਸੁ ਵਾਰੇਸੁ ਏਕੇਕਸ੍ਮਿਂ ਪਚ੍ਚਯਾਨੁਲੋਮਾਦੀਹਿ ਚ ਏਕਮੂਲਾਦੀਹਿ ਨਯੇਹਿ ਚ ਸਬ੍ਬਤ੍ਤਿਕੇਸੁ ਲਬ੍ਭਮਾਨਪਦਵਸੇਨ ਗਣਨਾਨਯੋ ਯੋਜੇਤ੍ਵਾ ਞਾਤਬ੍ਬੋ. ਤਤ੍ਥ ਵੇਦਨਾਤ੍ਤਿਕੇ ਵੇਦਨਾਕ੍ਖਨ੍ਧਸ੍ਸ ਅਲਬ੍ਭਨਤੋ ‘‘ਏਕਂ ਖਨ੍ਧਂ ਨਿਸ੍ਸਾਯ ਦ੍ਵੇ ਖਨ੍ਧਾ’’ਤਿਆਦਿ ਵੁਤ੍ਤਂ. ਸਬ੍ਬਤ੍ਥ ਵਿਸੇਸੋ ਪਾਲ਼ਿਅਟ੍ਠਕਥਾਨੁਸਾਰੇਨੇਵ ਞਾਤਬ੍ਬੋਤਿ ਅਯਂ ਅਨੁਲੋਮਪਟਿਲੋਮੇ ਤਿਕਪਟ੍ਠਾਨਨਯੋ.
ਦੁਕਪਟ੍ਠਾਨੇ ਪਨ ‘‘ਹੇਤੁਂ ਧਮ੍ਮਂ ਪਟਿਚ੍ਚ ਹੇਤੁ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ. ਅਲੋਭਂ ਪਟਿਚ੍ਚ ਅਦੋਸੋ. ਅਮੋਹੋ. ਅਦੋਸਂ ਅਮੋਹਂ ਪਟਿਚ੍ਚ ਅਲੋਭੋ. ਅਦੋਸੋ. ਲੋਭਂ ਪਟਿਚ੍ਚ ਮੋਹੋ. ਮੋਹਂ ਪਟਿਚ੍ਚ ਲੋਭੋ. ਦੋਸਂ ਪਟਿਚ੍ਚ ਮੋਹੋ. ਮੋਹਂ ਪਟਿਚ੍ਚ ਦੋਸੋ. ਪਟਿਸਨ੍ਧਿਕ੍ਖਣੇ ਹੇਤੁਂ ਧਮ੍ਮਂ ਪਟਿਚ੍ਚ ਨਹੇਤੁ ਧਮ੍ਮੋ ਉਪ੍ਪਜ੍ਜਤਿ…ਪੇ… ਹੇਤੂ ਚ ਨਹੇਤੂ ਚ. ਨਹੇਤੁਂ ਪਟਿਚ੍ਚ ਨਹੇਤੁ ਧਮ੍ਮੋ ਨ…ਪੇ… ਹੇਤੂ ਚ ਨਹੇਤੂ ਚਾ’’ਤਿਆਦਿਨਾ ਹੇਤੁਦੁਕੇ,
‘‘ਸਹੇਤੁਕਂ ਧਮ੍ਮਂ ਪਟਿਚ੍ਚ ਸਹੇਤੁਕੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ. ਸਹੇਤੁਕਂ ਏਕਂ ਖਨ੍ਧਂ…ਪੇ… ਸਹੇਤੁਕਂ ਧਮ੍ਮਂ ਪਟਿਚ੍ਚ. ਅਹੇਤੁਕੋ…ਪੇ… ਚਿਤ੍ਤਸਮੁਟ੍ਠਾਨਂ ਰੂਪਂ. ਪਟਿਸਨ੍ਧਿਕ੍ਖਣੇ…ਪੇ… ਸਹੇਤੁਕੋ ਚ, ਅਹੇਤੁਕੋ ਚ…ਪੇ… ਅਹੇਤੁਕਂ ਖਨ੍ਧਂ ਪਟਿਚ੍ਚ ਅਹੇਤੁਕੋ. ਵਿਚਿਕਿਚ੍ਛਾਸਹਗਤਂ ਉਦ੍ਧਚ੍ਚਸਹਗਤਂ ਮੋਹਂ ਪਟਿਚ੍ਚ ਸਮ੍ਪਯੁਤ੍ਤਕਾ ਖਨ੍ਧਾ…ਪੇ… ਚਿਤ੍ਤਸਮੁਟ੍ਠਾਨਂ. ਆਹਾਰਸਮੁਟ੍ਠਾਨ’’ਨ੍ਤਿਆਦਿਨਾ ਸਹੇਤੁਕਦੁਕਾਦੀਸੁ ਚ ਕੇਨਚਿਵਿਞ੍ਞੇਯ੍ਯਦੁਕਵਜ੍ਜਿਤੇਸੁ ਸਬ੍ਬਦੁਕੇਸੁ ਪਚ੍ਚੇਕਂ ਪਟਿਚ੍ਚਵਾਰਾਦੀਸੁ ਸਤ੍ਤਸੁ ਮਹਾਵਾਰੇਸੁ ਏਕੇਕਸ੍ਮਿਂ ਪਚ੍ਚਯਾਨੁਲੋਮਾਦੀਸੁ ਚਤੂਸੁ ਨਯੇਸੁ ਏਕਮੂਲਕਾਦੀਹਿ ਸਬ੍ਬਵਾਰੇਹਿ ਕੁਸਲਤ੍ਤਿਕੇ ਵੁਤ੍ਤਾਨੁਸਾਰੇਨ ਯਥਾਨੁਰੂਪਂ ਵਿਭਙ੍ਗਨਯੋ ਯੋਜੇਤ੍ਵਾ ਞਾਤਬ੍ਬੋ. ਸਬ੍ਬਸ੍ਮਿਮ੍ਪਿ ਹਿ ਪਟ੍ਠਾਨੇ ਕੇਨਚਿਵਿਞ੍ਞੇਯ੍ਯਦੁਕਂ ਨ ਲਬ੍ਭਤੀਤਿ ਅਯਂ ਦੁਕਪਟ੍ਠਾਨਨਯੋ.
ਦੁਕਤਿਕਪਟ੍ਠਾਨੇ ਪਨ ‘‘ਹੇਤੁਂ ਕੁਸਲਂ ਧਮ੍ਮਂ ਪਟਿਚ੍ਚ ਹੇਤੁ ਕੁਸਲੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿਆਦਿਨਾ ਹੇਤੁਦੁਕੇਨ ਸਦ੍ਧਿਂ ਕੁਸਲਤ੍ਤਿਕੇ ਕੁਸਲਂ ਪਦਂ ਯੋਜੇਤ੍ਵਾ ਪਟਿਚ੍ਚਵਾਰਾਦੀਸੁ ਸਤ੍ਤਸੁ ਵਾਰੇਸੁ ਪਚ੍ਚਯਾਨੁਲੋਮਾਦੀਨਂ ਚਤੁਨ੍ਨਂ ਨਯਾਨਂ ਵਸੇਨ ਲਬ੍ਭਮਾਨਕਪਚ੍ਚਯਾ ਏਕਮੂਲਕਾਦਿਨਯੇਹਿ ਦਸ੍ਸਿਤਾ. ਯਥਾ ਚ ਕੁਸਲਂ ਪਦਂ, ਏਵਂ ਅਕੁਸਲਂ ਪਦਂ, ਅਬ੍ਯਾਕਤਞ੍ਚ ਹੇਤੁਦੁਕੇਨ ਯੋਜੇਤ੍ਵਾ ਵੁਤ੍ਤਨਯੇਨ ਦਸ੍ਸੇਤ੍ਵਾ ਹੇਤੁਕੁਸਲਦੁਕਤਿਕਨ੍ਤਿ ਠਪਿਤਂ. ਪਾਲ਼ਿ ਪਨ ਅਤਿਸਂਖਿਤ੍ਤਾ. ਯਥਾ ਕੁਸਲਤ੍ਤਿਕਂ, ਏਵਂ ‘‘ਹੇਤੁਂ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਧਮ੍ਮਂ ਪਟਿਚ੍ਚ ਹੇਤੁ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿਆਦਿਨਾ ਲਬ੍ਭਮਾਨਕਪਦਵਸੇਨ ਵੇਦਨਾਤ੍ਤਿਕਾਦਯੋਪਿ ਹੇਤੁਦੁਕੇਨ ਯੋਜੇਤ੍ਵਾ ਹੇਤੁਵੇਦਨਦੁਕਤਿਕਾਦੀਨਿ ਏਕਵੀਸਤਿਦੁਕਤਿਕਾਨਿ ਦਸ੍ਸਿਤਾਨੀਤਿ. ਯਥਾ ਚ ਹੇਤੁਦੁਕੇਨ ਸਦ੍ਧਿਂ ਲਬ੍ਭਮਾਨਕਪਦਵਸੇਨ ਦ੍ਵਾਵੀਸਤਿਤਿਕਾ ਯੋਜਿਤਾ, ਏਵਂ ਸਹੇਤੁਕਦੁਕਾਦੀਹਿ ਸਬ੍ਬੇਹਿ ਸਦ੍ਧਿਂ ਪਚ੍ਚੇਕਂ ਦ੍ਵਾਵੀਸਤਿਤਿਕਾ ਯੋਜੇਤਬ੍ਬਾ. ਪਾਲ਼ਿ ਪਨੇਤ੍ਥ ਇਤੋ ਪਰੇਸੁਪਿ ਸਬ੍ਬਤ੍ਥ ਅਤਿਸਂਖਿਤ੍ਤਾ. ਏਵਂ ਦ੍ਵਾਵੀਸਤਿਤਿਕੇ ਗਹੇਤ੍ਵਾ ਦੁਕਸਤੇ ਪਕ੍ਖਿਪਿਤ੍ਵਾ ਦੁਕਤਿਕਪਟ੍ਠਾਨਂ ਦੇਸਿਤਨ੍ਤਿ ਅਯਂ ਦੁਕਤਿਕਪਟ੍ਠਾਨਨਯੋ.
ਤਿਕਦੁਕਪਟ੍ਠਾਨੇਪਿ ‘‘ਕੁਸਲਂ ਹੇਤੁਂ ਧਮ੍ਮਂ ਪਟਿਚ੍ਚ ਕੁਸਲੋ ਹੇਤੁ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿਆਦਿਨਾ ਕੁਸਲਤ੍ਤਿਕੇਨ ਸਦ੍ਧਿਂ ਹੇਤੁਪਦਂ ਯੋਜੇਤ੍ਵਾ ਪਟਿਚ੍ਚਵਾਰਾਦੀਸੁ ਸਤ੍ਤਸੁ ਮਹਾਵਾਰੇਸੁ ਪਚ੍ਚਯਾਨੁਲੋਮਾਦਿਨਯਚਤੁਕ੍ਕਵਸੇਨ ਲਬ੍ਭਮਾਨਕਪਚ੍ਚਯਾ ਏਕਮੂਲਾਦੀਹਿ ਸਬ੍ਬਵਾਰੇਹਿ ਦਸ੍ਸਿਤਾ. ਯਥਾ ਹੇਤੁਪਦਂ, ਏਵਂ ਨਹੇਤੁਪਦਮ੍ਪਿ ਕੁਸਲਤ੍ਤਿਕੇਨ ਸਦ੍ਧਿਂ ਯੋਜੇਤ੍ਵਾ ਕੁਸਲਹੇਤੁ ਤਿਕਦੁਕਨ੍ਤਿ ਠਪਿਤਂ. ਯਥਾ ਚ ਕੁਸਲਤ੍ਤਿਕੇਨ ਸਦ੍ਧਿਂ ਹੇਤੁਦੁਕਂ, ਏਵਂ ‘‘ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਹੇਤੁਂ ਕੁਸਲਂ ਧਮ੍ਮਂ ਪਟਿਚ੍ਚਾ’’ਤਿਆਦਿਨਾ ਵੇਦਨਾਤ੍ਤਿਕਾਦੀਹਿਪਿ ਤਂ ਯੋਜੇਤ੍ਵਾ ਵੇਦਨਾਤ੍ਤਿਕਦੁਕਾਦੀਨਿ ਏਕਵੀਸਤਿਤਿਕਦੁਕਾਦੀਨਿ ਦਸ੍ਸਿਤਾਨਿ. ਯਥਾ ਚ ਹੇਤੁਦੁਕਂ, ਏਵਂ ਸਹੇਤੁਕਾਦਯੋਪਿ ਸਬ੍ਬੇ ਪਚ੍ਚੇਕਂ ਦ੍ਵਾਵੀਸਤਿਯਾ ਤਿਕੇਹਿ ਲਬ੍ਭਮਾਨਪਦਵਸੇਨੇਵ ਯੋਜਿਤਾ. ਏਵਂ ਦੁਕਸਤਂ ਦ੍ਵਾਵੀਸਤਿਯਾ ਤਿਕੇਸੁ ਪਕ੍ਖਿਪਿਤ੍ਵਾ ਤਿਕਦੁਕਪਟ੍ਠਾਨਂ ਦੇਸਿਤਨ੍ਤਿ ਅਯਂ ਤਿਕਦੁਕਪਟ੍ਠਾਨਨਯੋ.
ਤਿਕਤਿਕਪਟ੍ਠਾਨੇਪਿ ‘‘ਕੁਸਲਂ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਧਮ੍ਮਂ ਪਟਿਚ੍ਚ ਕੁਸਲੋ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿਆਦਿਨਾ ਕੁਸਲਤ੍ਤਿਕਂ ਵੇਦਨਾਤ੍ਤਿਕਾਦੀਹਿ ਸਬ੍ਬਤ੍ਤਿਕੇਹਿ, ਵੇਦਨਾਤ੍ਤਿਕਾਦਯੋ ਚ ਕੁਸਲਤ੍ਤਿਕਾਦੀਹਿ ਵੁਤ੍ਤਨਯੇਨ ਯੋਜੇਤ੍ਵਾ ਪਚ੍ਚਯਾ ਦਸ੍ਸਿਤਾ. ਏਵਂ ਤਿਕੇਸੁ ਏਵ ਤਿਕੇ ਪਕ੍ਖਿਪਿਤ੍ਵਾ ਤਿਕਤਿਕਪਟ੍ਠਾਨਂ ਦੇਸਿਤਨ੍ਤਿ ਅਯਂ ਤਿਕਤਿਕਪਟ੍ਠਾਨਨਯੋ.
ਦੁਕਦੁਕਪਟ੍ਠਾਨੇਪਿ ‘‘ਹੇਤੁਂ ਸਹੇਤੁਕਂ ਧਮ੍ਮਂ ਪਟਿਚ੍ਚ ਹੇਤੁ ਸਹੇਤੁਕੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿਆਦਿਨਾ ਹੇਤੁਦੁਕਂ ਸਹੇਤੁਕਾਦੀਹਿ, ਸਹੇਤੁਕਞ੍ਚ ਹੇਤੁਦੁਕਾਦੀਹਿ ਯੋਜੇਤ੍ਵਾ ਹੇਟ੍ਠਾ ਵੁਤ੍ਤਨਯੇਹਿ ਪਚ੍ਚਯਾ ਦਸ੍ਸਿਤਾ. ਏਵਂ ਦੁਕੇਸੁ ਏਵ ਦੁਕੇ ਪਕ੍ਖਿਪਿਤ੍ਵਾ ਦੁਕਦੁਕਪਟ੍ਠਾਨਂ ਦੇਸਿਤਨ੍ਤਿ ਅਯਂ ਦੁਕਦੁਕਪਟ੍ਠਾਨਨਯੋ. ਏਵਂ ਤਾਵ ਅਨੁਲੋਮਪਟ੍ਠਾਨੇ –
‘‘ਤਿਕਞ੍ਚ ਪਟ੍ਠਾਨਵਰਂ ਦੁਕੁਤ੍ਤਮਂ,
ਦੁਕਤਿਕਞ੍ਚੇਵ ਤਿਕਦੁਕਞ੍ਚ;
ਤਿਕਤਿਕਞ੍ਚੇਵ ਦੁਕਦੁਕਞ੍ਚ,
ਛ ਅਨੁਲੋਮਮ੍ਹਿ ਨਯਾ ਸੁਗਮ੍ਭੀਰਾ’’ਤਿ. –
ਵੁਤ੍ਤਾ ਛ ਨਯਾ ਵੇਦਿਤਬ੍ਬਾ. ਪਚ੍ਚਯਵਸੇਨ ਪਨੇਤੇਸੁ ਛਸੁ ਏਕੇਕਸ੍ਮਿਂ ਪਟ੍ਠਾਨੇ ਪਚ੍ਚਯਾਨੁਲੋਮਾਦੀਨਂ ਚਤੁਨ੍ਨਂ ਨਯਾਨਂ ਵਸੇਨ ਏਤੇਨ ਪਰਿਯਾਯੇਨ ਚਤੁਵੀਸਤਿਨਯਪਟਿਮਣ੍ਡਿਤਮਿਦਂ ਧਮ੍ਮਾਨੁਲੋਮਪਟ੍ਠਾਨਨ੍ਤਿ ਵੇਦਿਤਬ੍ਬਂ. ਅਯਂ ਅਨੁਲੋਮਪਟ੍ਠਾਨਨਯੋ.
ਪਚ੍ਚਨੀਯਪਟ੍ਠਾਨੇ ਪਨ ‘‘ਨਕੁਸਲਂ ਧਮ੍ਮਂ ਪਟਿਚ੍ਚ ਨਕੁਸਲੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ. ਅਕੁਸਲਂ ਅਬ੍ਯਾਕਤਂ ਏਕਂ ਖਨ੍ਧਂ ਪਟਿਚ੍ਚ…ਪੇ… ਦ੍ਵੇ ਖਨ੍ਧਾ, ਚਿਤ੍ਤਸਮੁਟ੍ਠਾਨਞ੍ਚ ਰੂਪ’’ਨ੍ਤਿਆਦਿਨਾ ਤਿਕਪਟ੍ਠਾਨੇ, ‘‘ਨਹੇਤੁਂ ਧਮ੍ਮਂ ਪਟਿਚ੍ਚ ਨਹੇਤੁ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ. ਨਹੇਤੁਂ ਏਕਂ ਖਨ੍ਧਂ ਪਟਿਚ੍ਚ…ਪੇ… ਚਿਤ੍ਤਸਮੁਟ੍ਠਾਨਞ੍ਚ ਰੂਪ’’ਨ੍ਤਿਆਦਿਨਾ ਦੁਕਪਟ੍ਠਾਨੇ ਚ, ‘‘ਨਹੇਤੁਂ ਨਕੁਸਲਂ ਧਮ੍ਮਂ ਪਟਿਚ੍ਚ ਨਹੇਤੁ ਨਕੁਸਲੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ. ਨਹੇਤੁਂ ਨਕੁਸਲਂ ਅਬ੍ਯਾਕਤਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ’’ਤਿਆਦਿਨਾ ਦੁਕਤਿਕਪਟ੍ਠਾਨੇ ਚ, ‘‘ਨਕੁਸਲਂ ਨਹੇਤੁਂ ਧਮ੍ਮਂ ਪਟਿਚ੍ਚ ਨਕੁਸਲੋ ਨਹੇਤੁ ਧਮ੍ਮੋ ਉਪ੍ਪਜ੍ਜਤੀ’’ਤਿਆਦਿਨਾ ਤਿਕਦੁਕਪਟ੍ਠਾਨੇ ਚ, ‘‘ਨਕੁਸਲਂ ਨਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਧਮ੍ਮਂ ਪਟਿਚ੍ਚ ਨਕੁਸਲੋ ਨਸੁਖਾਯ ਵੇਦਨਾਯ ਸਮ੍ਪਯੁਤ੍ਤੋ ਧਮ੍ਮੋ ਉਪ੍ਪਜ੍ਜਤੀ’’ਤਿਆਦਿਨਾ ਤਿਕਤਿਕਪਟ੍ਠਾਨੇ ਚ, ‘‘ਨਹੇਤੁਂ ਨਸਹੇਤੁਕਂ ਧਮ੍ਮਂ ਪਟਿਚ੍ਚ ਨਹੇਤੁ ਨਸਹੇਤੁਕੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿਆਦਿਨਾ ਦੁਕਦੁਕਪਟ੍ਠਾਨੇ ਚਾਤਿ ਛਸੁ ਪਚ੍ਚਨੀਯਪਟ੍ਠਾਨੇਸੁ ਅਨੁਲੋਮਤਿਕਪਟ੍ਠਾਨਾਦੀਸੁ ਛਸੁ ਪਟ੍ਠਾਨੇਸੁ ਵੁਤ੍ਤੇਨ ਸਬ੍ਬੇਨ ਪਕਾਰੇਨ ਪਾਲ਼ਿਨਯੋ ਵੇਦਿਤਬ੍ਬੋ. ਇਦਞ੍ਚ ਕੁਸਲਾਦੀਨਂ, ਹੇਤੁਆਦੀਨਞ੍ਚ ਧਮ੍ਮਾਨਂ ਪਚ੍ਚਯੁਪ੍ਪਨ੍ਨਭਾਵਪਟਿਕ੍ਖੇਪਵਸੇਨ ਪਵਤ੍ਤਤ੍ਤਾ ਧਮ੍ਮਪਚ੍ਚਨੀਯਪਟ੍ਠਾਨਂ ਨਾਮ ਜਾਤਂ. ਤਤ੍ਥ ਹਿ ਨਕੁਸਲਂ ਧਮ੍ਮਂ ਪਟਿਚ੍ਚਾਤਿ ਕੁਸਲਸ੍ਸ ਪਚ੍ਚਯਪਟਿਕ੍ਖੇਪੋ. ਨਕੁਸਲੋ ਧਮ੍ਮੋ ਉਪ੍ਪਜ੍ਜਤੀਤਿ ਕੁਸਲਸ੍ਸ ਪਚ੍ਚਯੁਪ੍ਪਨ੍ਨਭਾਵਪਟਿਕ੍ਖੇਪੋ. ਤਥਾ ‘‘ਅਕੁਸਲਂ ਅਬ੍ਯਾਕਤਂ ਏਕਂ ਖਨ੍ਧਂ ਪਟਿਚ੍ਚ…ਪੇ… ਅਕੁਸਲਾ, ਅਬ੍ਯਾਕਤਾ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ ਉਪ੍ਪਜ੍ਜਤੀ’’ਤਿ ਏਵਮਾਦਿਨਾ ਨਯੇਨੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਏਵਮੇਤ੍ਥ ਪਚ੍ਚਨੀਯਪਟ੍ਠਾਨੇ –
‘‘ਤਿਕਞ੍ਚ ਪਟ੍ਠਾਨਵਰਂ ਦੁਕੁਤ੍ਤਮਂ,
ਦੁਕਤਿਕਞ੍ਚੇਵ ਤਿਕਦੁਕਞ੍ਚ;
ਤਿਕਤਿਕਞ੍ਚੇਵ ਦੁਕਦੁਕਞ੍ਚ,
ਛ ਪਚ੍ਚਨੀਯਮ੍ਹਿ ਨਯਾ ਸੁਗਮ੍ਭੀਰਾ’’ਤਿ. –
ਵੁਤ੍ਤਾ ਛ ਨਯਾ ਵੇਦਿਤਬ੍ਬਾ. ਪਚ੍ਚਯਵਸੇਨ ਪਨੇਤ੍ਥਾਪਿ ਏਕੇਕਸ੍ਮਿਂ ਪਚ੍ਚਯਾਨੁਲੋਮਾਦੀਨਂ ਚਤੁਨ੍ਨਂ ਚਤੁਨ੍ਨਂ ਨਯਾਨਂ ਵਸੇਨ ਚਤੁਵੀਸਤਿਨਯਪਟਿਮਣ੍ਡਿਤਮਿਦਂ ਧਮ੍ਮਪਚ੍ਚਨੀਯਪਟ੍ਠਾਨਨ੍ਤਿ ਵੇਦਿਤਬ੍ਬਨ੍ਤਿ ਅਯਂ ਪਚ੍ਚਨੀਯਪਟ੍ਠਾਨਨਯੋ.
ਅਨੁਲੋਮਪਚ੍ਚਨੀਯਪਟ੍ਠਾਨੇ ਪਨ ‘‘ਕੁਸਲਂ ਧਮ੍ਮਂ ਪਟਿਚ੍ਚ ਨਕੁਸਲੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ. ਕੁਸਲੇ ਖਨ੍ਧੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪ’’ਨ੍ਤਿਆਦਿਨਾ ਤਿਕਪਟ੍ਠਾਨੇ, ‘‘ਹੇਤੁਂ ਧਮ੍ਮਂ ਪਟਿਚ੍ਚ ਨਹੇਤੁ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿਆਦਿਨਾ ਦੁਕਪਟ੍ਠਾਨੇ ਚ, ‘‘ਹੇਤੁਂ ਕੁਸਲਂ ਧਮ੍ਮਂ ਪਟਿਚ੍ਚ ਨਹੇਤੁ ਨਕੁਸਲੋ ਧਮ੍ਮੋ ਉਪ੍ਪਜ੍ਜਤੀ’’ਤਿਆਦਿਨਾ ਦੁਕਤਿਕਪਟ੍ਠਾਨੇ ਚ, ‘‘ਕੁਸਲਂ ਹੇਤੁਂ ਧਮ੍ਮਂ ਪਟਿਚ੍ਚ ਨਕੁਸਲੋ ਨਹੇਤੁ ਧਮ੍ਮੋ ਉਪ੍ਪਜ੍ਜਤੀ’’ਤਿਆਦਿਨਾ ਤਿਕਦੁਕਪਟ੍ਠਾਨੇ ਚ, ‘‘ਕੁਸਲਂ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਧਮ੍ਮਂ ਪਟਿਚ੍ਚ ਨਕੁਸਲੋ ਨਸੁਖਾਯ ਵੇਦਨਾਯ ਸਮ੍ਪਯੁਤ੍ਤੋ ਧਮ੍ਮੋ ਉਪ੍ਪਜ੍ਜਤੀ’’ਤਿਆਦਿਨਾ ਤਿਕਤਿਕਪਟ੍ਠਾਨੇ ਚ, ‘‘ਹੇਤੁਂ ਸਹੇਤੁਕਂ ਧਮ੍ਮਂ ਪਟਿਚ੍ਚ ਨਹੇਤੁ ਨਸਹੇਤੁਕੋ ਧਮ੍ਮੋ ਉਪ੍ਪਜ੍ਜਤੀ’’ਤਿਆਦਿਨਾ ਦੁਕਦੁਕਪਟ੍ਠਾਨੇ ਚ ਹੇਟ੍ਠਾ ਵੁਤ੍ਤਨਯੇਨ ਸਬ੍ਬੇਨ ਪਕਾਰੇਨ ਪਾਲ਼ਿਨਯੋ ਵੇਦਿਤਬ੍ਬੋ. ਇਦਂ ਕੁਸਲਾਦੀਨਂ ਧਮ੍ਮਾਨਂ ਪਚ੍ਚਯਤ੍ਤਂ ਅਪ੍ਪਟਿਕ੍ਖਿਪਿਤ੍ਵਾ ਪਚ੍ਚਯੁਪ੍ਪਨ੍ਨਾਨਂ ਕੁਸਲਾਦਿਭਾਵਪਟਿਕ੍ਖੇਪਵਸੇਨ ਪਵਤ੍ਤਤ੍ਤਾ ਧਮ੍ਮਾਨੁਲੋਮਪਚ੍ਚਨੀਯਪਟ੍ਠਾਨਂ ਨਾਮ ਜਾਤਂ. ਤਤ੍ਥ ਹਿ ਕੁਸਲਂ ਧਮ੍ਮਂ ਪਟਿਚ੍ਚਾਤਿ ਕੁਸਲਸ੍ਸ ਪਚ੍ਚਯਭਾਵਵਿਧਾਨਂ. ਨਕੁਸਲੋ ਧਮ੍ਮੋ ਉਪ੍ਪਜ੍ਜਤੀਤਿ ਕੁਸਲਸ੍ਸ ਪਚ੍ਚਯੁਪ੍ਪਨ੍ਨਭਾਵਨਿਵਾਰਣਂ, ਤਸ੍ਮਾ ‘‘ਕੁਸਲੇ ਖਨ੍ਧੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪ’’ਨ੍ਤਿਆਦਿਨਾ ਵਿਸ੍ਸਜ੍ਜਨਂ ਵੁਤ੍ਤਨ੍ਤਿ ਵੇਦਿਤਬ੍ਬਨ੍ਤਿ ਏਵਮੇਤ੍ਥ ਅਨੁਲੋਮਪਚ੍ਚਨੀਯਪਟ੍ਠਾਨੇ –
‘‘ਤਿਕਞ੍ਚ ਪਟ੍ਠਾਨਵਰਂ ਦੁਕੁਤ੍ਤਮਂ,
ਦੁਕਤਿਕਞ੍ਚੇਵ ਤਿਕਦੁਕਞ੍ਚ;
ਤਿਕਤਿਕਞ੍ਚੇਵ ਦੁਕਦੁਕਞ੍ਚ,
ਛ ਅਨੁਲੋਮਪਚ੍ਚਨੀਯਮ੍ਹਿ ਨਯਾ ਸੁਗਮ੍ਭੀਰਾ’’ਤਿ. –
ਵੁਤ੍ਤਾ ਛ ਨਯਾ ਵੇਦਿਤਬ੍ਬਾ. ਪਚ੍ਚਯਵਸੇਨ ਪਨੇਤ੍ਥਾਪਿ ਏਕੇਕਸ੍ਮਿਂ ਪਚ੍ਚਯਾਨੁਲੋਮਾਦੀਨਂ ਚਤੁਨ੍ਨਂ ਚਤੁਨ੍ਨਂ ਨਯਾਨਂ ਵਸੇਨ ਚਤੁਵੀਸਤਿਨਯਪਟਿਮਣ੍ਡਿਤਮਿਦਂ ਧਮ੍ਮਾਨੁਲੋਮਪਚ੍ਚਨੀਯਪਟ੍ਠਾਨਨ੍ਤਿ ਵੇਦਿਤਬ੍ਬਨ੍ਤਿ ਅਯਂ ਅਨੁਲੋਮਪਚ੍ਚਨੀਯਪਟ੍ਠਾਨਨਯੋ.
ਪਚ੍ਚਨੀਯਾਨੁਲੋਮਪਟ੍ਠਾਨੇ ‘‘ਨਕੁਸਲਂ ਧਮ੍ਮਂ ਪਟਿਚ੍ਚ ਅਕੁਸਲੋ ਧਮ੍ਮੋ…ਪੇ… ਨਕੁਸਲਂ ਧਮ੍ਮਂ ਪਟਿਚ੍ਚ ਅਬ੍ਯਾਕਤੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿਆਦਿਨਾ ਤਿਕਪਟ੍ਠਾਨੇ, ‘‘ਨਹੇਤੁਂ ਧਮ੍ਮਂ ਪਟਿਚ੍ਚ ਹੇਤੁ ਧਮ੍ਮੋ ਉਪ੍ਪਜ੍ਜਤੀ’’ਤਿਆਦਿਨਾ ਦੁਕਪਟ੍ਠਾਨੇ ਚ, ‘‘ਨਹੇਤੁਂ ਨਕੁਸਲਂ ਧਮ੍ਮਂ ਪਟਿਚ੍ਚ ਹੇਤੁ ਅਕੁਸਲੋ ਧਮ੍ਮੋ…ਪੇ… ਹੇਤੁ ਅਬ੍ਯਾਕਤੋ ਧਮ੍ਮੋ ਉਪ੍ਪਜ੍ਜਤੀਤਿ’’ਆਦਿਨਾ ਦੁਕਤਿਕਪਟ੍ਠਾਨੇ ਚ, ‘‘ਨਕੁਸਲਂ ਨਹੇਤੁਂ ਧਮ੍ਮਂ ਪਟਿਚ੍ਚ ਅਕੁਸਲੋ ਹੇਤੁ ਧਮ੍ਮੋ…ਪੇ… ਅਬ੍ਯਾਕਤੋ ਹੇਤੁ ਧਮ੍ਮੋ ਉਪ੍ਪਜ੍ਜਤੀ’’ਤਿਆਦਿਨਾ ਤਿਕਦੁਕਪਟ੍ਠਾਨੇ ਚ, ‘‘ਨਕੁਸਲਂ ਨਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਧਮ੍ਮਂ ਪਟਿਚ੍ਚ ਅਕੁਸਲੋ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤੋ ਧਮ੍ਮੋ…ਪੇ… ਅਬ੍ਯਾਕਤੋ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤੋ ਧਮ੍ਮੋ ਉਪ੍ਪਜ੍ਜਤੀ’’ਤਿਆਦਿਨਾ ਤਿਕਤਿਕਪਟ੍ਠਾਨੇ ਚ, ‘‘ਨਹੇਤੁਂ ਨਸਹੇਤੁਕਂ ਧਮ੍ਮਂ ਪਟਿਚ੍ਚ ਹੇਤੁ ਸਹੇਤੁਕੋ ਧਮ੍ਮੋ ਉਪ੍ਪਜ੍ਜਤੀ’’ਤਿਆਦਿਨਾ ਦੁਕਦੁਕਪਟ੍ਠਾਨੇ ਚ, ਹੇਟ੍ਠਾ ਵੁਤ੍ਤੇਨ ਪਕਾਰੇਨ ਪਾਲ਼ਿਨਯੋ ਵੇਦਿਤਬ੍ਬੋ. ਇਦਞ੍ਚ ਕੁਸਲਾਦਿਧਮ੍ਮਾਨਂ ਪਚ੍ਚਯਤ੍ਤਂ ਪਟਿਕ੍ਖਿਪਿਤ੍ਵਾ ਤੇਸਂ ਪਚ੍ਚਯੁਪ੍ਪਨ੍ਨਭਾਵਅਪ੍ਪਟਿਕ੍ਖੇਪਵਸੇਨ ਪਵਤ੍ਤਤ੍ਤਾ ਧਮ੍ਮਪਚ੍ਚਨੀਯਾਨੁਲੋਮਪਟ੍ਠਾਨਂ ਨਾਮ ਜਾਤਂ. ਤਤ੍ਥ ਨਕੁਸਲਂ ਧਮ੍ਮਨ੍ਤਿ ਕੁਸਲਸ੍ਸ ਪਚ੍ਚਯਭਾਵਨਿਵਾਰਣਂ. ਅਕੁਸਲੋ ਧਮ੍ਮੋ ਉਪ੍ਪਜ੍ਜਤੀਤਿ ਅਕੁਸਲਸ੍ਸ ਉਪ੍ਪਤ੍ਤਿਵਿਧਾਨਂ. ਕੁਸਲਂ ਪਨ ਪਟਿਚ੍ਚ ਕੁਸਲਸ੍ਸ ਉਪ੍ਪਤ੍ਤਿਅਭਾਵਤੋ ‘‘ਕੁਸਲੋ ਧਮ੍ਮੋ ਉਪ੍ਪਜ੍ਜਤੀ’’ਤਿ ਅਵਤ੍ਵਾ ‘‘ਅਕੁਸਲੋ ਧਮ੍ਮੋ ਉਪ੍ਪਜ੍ਜਤੀ’’ਤਿ ਲਬ੍ਭਮਾਨਪਦਵਸੇਨ ਵੁਤ੍ਤਂ. ਕੁਸਲਂ, ਹਿ ਅਕੁਸਲਂ, ਅਬ੍ਯਾਕਤਂ ਵਾ ਸਹਜਾਤਪਚ੍ਚਯਂ ਕਤ੍ਵਾ ਉਪ੍ਪਜ੍ਜਮਾਨੋ ਕੁਸਲੋ ਨਾਮ ਨਤ੍ਥਿ, ਤਸ੍ਮਾ ਅਕੁਸਲਸ੍ਸ ਚ ਅਬ੍ਯਾਕਤਸ੍ਸ ਚ ਵਸੇਨ ਦੇਸਨਾ ਕਤਾ. ਏਵਮਞ੍ਞਤ੍ਥ. ਏਵਮੇਤ੍ਥ ਧਮ੍ਮਪਚ੍ਚਨੀਯਾਨੁਲੋਮਪਟ੍ਠਾਨੇ –
‘‘ਤਿਕਞ੍ਚ ਪਟ੍ਠਾਨਵਰਂ ਦੁਕੁਤ੍ਤਮਂ,
ਦੁਕਤਿਕਞ੍ਚੇਵ ਤਿਕਦੁਕਞ੍ਚ;
ਤਿਕਤਿਕਞ੍ਚੇਵ ਦੁਕਦੁਕਞ੍ਚ,
ਛ ਪਚ੍ਚਨੀਯਾਨੁਲੋਮਮ੍ਹਿ ਨਯਾ ਸੁਗਮ੍ਭੀਰਾ’’ਤਿ. –
ਵੁਤ੍ਤਾ ਛ ਨਯਾ ਵੇਦਿਤਬ੍ਬਾ. ਪਚ੍ਚਯਵਸੇਨ ਪਨੇਤ੍ਥਾਪਿ ਤਿਕਪਟ੍ਠਾਨਾਦੀਸੁ ਏਕੇਕਸ੍ਮਿਂ ਪਚ੍ਚਯਾਨੁਲੋਮਾਦੀਨਂ ਚਤੁਨ੍ਨਂ ਚਤੁਨ੍ਨਂ ਨਯਾਨਂ ਵਸੇਨ ਏਕੇਨ ਪਰਿਯਾਯੇਨ ਚਤੁਵੀਸਤਿਨਯਪਟਿਮਣ੍ਡਿਤਮਿਦਂ ਧਮ੍ਮਪਚ੍ਚਨੀਯਾਨੁਲੋਮਪਟ੍ਠਾਨਨ੍ਤਿ ਵੇਦਿਤਬ੍ਬਨ੍ਤਿ ਅਯਂ ਪਚ੍ਚਨੀਯਾਨੁਲੋਮਪਟ੍ਠਾਨਨਯੋ.
ਏਵਮਿਦਂ ਭਗਵਤਾ ਅਨੁਲੋਮਪਟ੍ਠਾਨਾਦੀਸੁ ਚਤੂਸੁ ਏਕੇਕਸ੍ਮਿਂ ਪਟ੍ਠਾਨੇ ਤਿਕਦੁਕਾਦੀਨਞ੍ਞੇਵ ਛਨ੍ਨਂ ਛਨ੍ਨਂ ਨਯਾਨਂ ਵਸੇਨ ਚਤੁਵੀਸਤਿਨਯਪਟਿਮਣ੍ਡਿਤਂ ਸਮਨ੍ਤਪਟ੍ਠਾਨਮਹਾਪਕਰਣਂ ਦੇਸਿਤਂ. ਪਚ੍ਚਯਵਸੇਨ ਪਨੇਤੇਸੁ ਚਤੁਵੀਸਤਿਯਾ ਪਟ੍ਠਾਨੇਸੁ ਏਕੇਕਸ੍ਮਿਂ ਪਚ੍ਚਯਾਨੁਲੋਮਾਦੀਨਂ ਚਤੁਨ੍ਨਂ ਚਤੁਨ੍ਨਂ ਨਯਾਨਂ ਵਸੇਨੇਤਂ ਛਨ੍ਨਵੁਤਿਨਯਪਟਿਮਣ੍ਡਿਤਂ ਹੋਤਿ, ਧਮ੍ਮਵਸੇਨੇਵ ਚੇਤਂ ਪਕਰਣਂ ਚਤੁਵੀਸਤਿਸਮਨ੍ਤਪਟ੍ਠਾਨਂ ਵੁਤ੍ਤਨ੍ਤਿ ਅਯਮੇਤ੍ਥ ਵਿਭਙ੍ਗਨਯੋ.
ਮੋਹਵਿਚ੍ਛੇਦਨਿਯਾ ਅਭਿਧਮ੍ਮਮਾਤਿਕਤ੍ਥਵਣ੍ਣਨਾਯ
ਪਟ੍ਠਾਨਮਾਤਿਕਤ੍ਥਵਣ੍ਣਨਾ ਨਿਟ੍ਠਿਤਾ.
ਨਿਗਮਨਕਥਾ
ਏਤ੍ਤਾਵਤਾ ਚ –
੧. ਮਾਤਿਕਾਯਾਭਿਧਮ੍ਮਸ੍ਸ, ਆਰਦ੍ਧਾ ਅਤ੍ਥਵਣ੍ਣਨਾ;
ਮੋਹਵਿਚ੍ਛੇਦਨੀ ਨਾਮ, ਯਾ ਸਾ ਨਿਟ੍ਠਮੁਪਾਗਤਾ.
੨. ਨਿਟ੍ਠਂ ਯਥਾਯਂ ਸਮ੍ਪਤ੍ਤਾ, ਲਜ੍ਜੀਹਿ ਅਭਿਪਤ੍ਥਿਤਾ;
ਸਬ੍ਬੇ ਨਿਟ੍ਠਂ ਤਥਾ ਸਨ੍ਤਾ, ਸਮੇਨ੍ਤੁ ਸੁਮਨੋਰਥਾ.
੩. ਯੋ ਗਮ੍ਭੀਰੋ ਸਸਾਦੀਨਂ, ਸਮੁਦ੍ਦੋਵ ਭਯਾਵਹੋ;
ਕਾਲੇਸ੍ਮਿਂ ਧੀਮਤਞ੍ਚਾਪਿ, ਅਪਿ ਗਨ੍ਥਾਵਲੋਕਨੇ.