੪. ਪੁਗ੍ਗਲਪਞ੍ਞਤ੍ਤਿਮਾਤਿਕਾ

ਏਕਕਮਾਤਿਕਤ੍ਥਵਣ੍ਣਨਾ

ਇਦਾਨਿ ਪੁਗ੍ਗਲਪਞ੍ਞਤ੍ਤਿਮਾਤਿਕਾਸਂਵਣ੍ਣਨਾਨਯੋ ਹੋਤਿ. ਤਤ੍ਥ ਅਨੁਤ੍ਤਾਨਤ੍ਥਤੋ ਤਾਵ ਛ ਪਞ੍ਞਤ੍ਤਿਯੋਤਿ ਏਤ੍ਥ ‘‘ਆਚਿਕ੍ਖਤਿ ਦੇਸੇਤਿ ਪਞ੍ਞਪੇਤਿ ਪਟ੍ਠਪੇਤੀ’’ਤਿ (ਸਂ. ਨਿ. ੨.੨੦) ਆਗਤਟ੍ਠਾਨੇ ਸਨ੍ਦਸ੍ਸਨਾ ਪਕਾਸਨਾ ਪਞ੍ਞਤ੍ਤਿ ਨਾਮ. ‘‘ਸੁਪਞ੍ਞਤ੍ਤਂ ਮਞ੍ਚਪੀਠ’’ਨ੍ਤਿ (ਪਾਰਾ. ੨੬੯) ਆਗਤਟ੍ਠਾਨੇ ਠਪਨਾ ਨਿਕ੍ਖਿਪਨਾ ਪਞ੍ਞਤ੍ਤਿ ਨਾਮ, ਇਧ ਉਭਯਮ੍ਪਿ ਵਟ੍ਟਤਿ. ਛ ਪਞ੍ਞਤ੍ਤਿਯੋਤਿ ਹਿ ਛ ਪਞ੍ਞਾਪਨਾ ਛ ਸਨ੍ਦਸ੍ਸਨਾ ਪਕਾਸਨਾਤਿਪਿ, ਛ ਠਪਨਾ ਨਿਕ੍ਖਿਪਨਾਤਿਪਿ ਵੁਤ੍ਤਂ ਹੋਤਿ. ਨਾਮਪਞ੍ਞਤ੍ਤਿਯੇਵ ਹਿ ਤੇ ਤੇ ਵਿਜ੍ਜਮਾਨਾਵਿਜ੍ਜਮਾਨੇ ਧਮ੍ਮੇ ਸਨ੍ਦਸ੍ਸੇਤੀਤਿਪਿ. ਤੇਨ ਤੇਨ ਕੋਟ੍ਠਾਸੇਨ ਠਪੇਤੀਤਿਪਿ. ਖਨ੍ਧਪਞ੍ਞਤ੍ਤੀਤਿਆਦਿ ਪਨ ਸਙ੍ਖੇਪਤੋ ਤਾਸਂ ਪਞ੍ਞਤ੍ਤੀਨਂ ਸਰੂਪਦਸ੍ਸਨਂ. ਤਤ੍ਥ ਖਨ੍ਧਾਨਂ ‘‘ਖਨ੍ਧਾ’’ਤਿ ਪਞ੍ਞਾਪਨਾ ਸਨ੍ਦਸ੍ਸਨਾ ਪਕਾਸਨਾ ਚ ਠਪਨਾ ਨਿਕ੍ਖਿਪਨਾ ਚ ਖਨ੍ਧਪਞ੍ਞਤ੍ਤਿ ਨਾਮ…ਪੇ… ਪੁਗ੍ਗਲਾਨਂ ‘‘ਪੁਗ੍ਗਲਾ’’ਤਿ ਪਞ੍ਞਾਪਨਾ ਸਨ੍ਦਸ੍ਸਨਾ ਪਕਾਸਨਾ ਚ ਠਪਨਾ ਨਿਕ੍ਖਿਪਨਾ ਚ ਪੁਗ੍ਗਲਪਞ੍ਞਤ੍ਤਿ ਨਾਮ. ਇਮਾ ਏਵ ਛ ਪਞ੍ਞਤ੍ਤਿਯੋ ਵਿਜ੍ਜਨ੍ਤਿ. ਅਞ੍ਞਾਸਮ੍ਪਿ ਸਮ੍ਮੁਤਿਪਰਮਤ੍ਥਕਥਾਨਂ ਪਞ੍ਞਤ੍ਤੀਨਂ ਅਨਨ੍ਤਤ੍ਤਾ, ਉਪਲਕ੍ਖਣਵਸੇਨ ਪਨ ਪਧਾਨਭਾਵਤੋ ਚ ਏਤਾਵ ਵੁਤ੍ਤਾ. ਪਾਲ਼ਿਮੁਤ੍ਤਕਨਯੇਨ ਪਨ ਸਬ੍ਬਸਙ੍ਗਾਹਿਕਾ ਵਿਜ੍ਜਮਾਨਪਞ੍ਞਤ੍ਤਿਆਦਯੋ ਛ ਨਾਮਪਞ੍ਞਤ੍ਤਿਯੋ ਅਟ੍ਠਕਥਾਸੁ (ਪੁ. ਪ. ਅਟ੍ਠ. ਮਾਤਿਕਾਵਣ੍ਣਨਾ ੧) ਆਗਤਾ, ਤਾ ਚ ਹੇਟ੍ਠਾ ਵੁਤ੍ਤਾਤਿ ਇਧ ਨ ਵੁਤ੍ਤਾ. ਤਾਸੁ ਇਧ ਪੁਗ੍ਗਲਪਞ੍ਞਤ੍ਤਿਪਦੇਨ ਅਵਿਜ੍ਜਮਾਨਪਞ੍ਞਤ੍ਤਿ, ਸੇਸੇਹਿ ਵਿਜ੍ਜਮਾਨਪਞ੍ਞਤ੍ਤਿ ਚਾਤਿ ਦ੍ਵੇ ਏਵ ਲਬ੍ਭਨ੍ਤਿ.

ਅਟ੍ਠਕਥਾਮੁਤ੍ਤਕੇਨ ਪਨ ਆਚਰਿਯਨਯੇਨ ਅਪਰਾਪਿ ਛ ਪਞ੍ਞਤ੍ਤਿਯੋ – ਉਪਾਦਾਪਞ੍ਞਤ੍ਤਿ ਉਪਨਿਧਾਪਞ੍ਞਤ੍ਤਿ ਸਮੋਧਾਨਪਞ੍ਞਤ੍ਤਿ ਉਪਨਿਕ੍ਖਿਤ੍ਤਪਞ੍ਞਤ੍ਤਿ ਤਜ੍ਜਾਪਞ੍ਞਤ੍ਤਿ ਸਨ੍ਤਤਿਪਞ੍ਞਤ੍ਤੀਤਿ, ਯਾ ‘‘ਅਤ੍ਥਪਞ੍ਞਤ੍ਤੀ’’ਤਿ ਵੁਚ੍ਚਤਿ. ਤਤ੍ਥ ਯਾ ਖਨ੍ਧਪਞ੍ਚਕਂ ਉਪਾਦਾਯ ਨਿਸ੍ਸਾਯ ਸਮ੍ਮਤਾ ਸਤ੍ਤਾਦਿਕਾ, ਅਙ੍ਗਾਨਿ ਉਪਾਦਾਯ ਰਥਾਦਿਕਾ, ਚਨ੍ਦਾਦਿਪਰਿਵਤ੍ਤਾਦਯੋ ਉਪਾਦਾਯ ਕਾਲਦਿਸਾਦਿਕਾ, ਤਂਤਂਭੂਤਨਿਮਿਤ੍ਤਂ, ਭਾਵਨਾਵਿਸੇਸਞ੍ਚ ਉਪਾਦਾਯ ਕਸਿਣਾਦਿਉਗ੍ਗਹਪਟਿਭਾਗਨਿਮਿਤ੍ਤਾਦਿਕਾਤਿ ਅਯਂ ਏਵਰੂਪਾ ਸਭਾਵਧਮ੍ਮੇਹਿ ਏਕਤ੍ਤੇਨ ਵਾ ਸਚ੍ਛਿਕਟ੍ਠਪਰਮਤ੍ਥੇਨ ਅਨੁਪਲਬ੍ਭਸਭਾਵਾ ਉਪਾਦਾਪਞ੍ਞਤ੍ਤਿ ਨਾਮ. ਪਞ੍ਞਾਪੇਤਬ੍ਬਟ੍ਠੇਨ ਚੇਸਾ ਪਞ੍ਞਤ੍ਤਿ ਵੁਤ੍ਤਾ, ਨ ਪਨ ਪਞ੍ਞਾਪਨਟ੍ਠੇਨ. ਯਾ ਤਸ੍ਸ ਤਸ੍ਸਤ੍ਥਸ੍ਸ ਪਞ੍ਞਾਪਨਾ, ਸਾ ਅਵਿਜ੍ਜਮਾਨਪਞ੍ਞਤ੍ਤਿਯੇਵ.

ਯਾ ਪਨ ਅਞ੍ਞਂ ਪਠਮਾਦਿਂ ਉਪਨਿਧਾਯ ਅਪੇਕ੍ਖਿਤ੍ਵਾ ਦੁਤਿਯਂ ਰਸ੍ਸਂ ਦੀਘਂ ਦੂਰਂ ਸਨ੍ਤਿਕਨ੍ਤਿਆਦਿਕਾ ਤਦਞ੍ਞਾਪੇਕ੍ਖੂਪਨਿਧਾ, ਛਤ੍ਤਪਾਣੀਤਿਆਦਿਕਾ ਹਤ੍ਥਗਤੂਪਨਿਧਾ, ਕੁਣ੍ਡਲੀਤਿਆਦਿਕਾ ਸਮ੍ਪਯੁਤ੍ਤੂਪਨਿਧਾ, ਧਞ੍ਞਸਕਟਨ੍ਤਿ ਆਦਿਕਾ ਸਮਾਰੋਪਿਤੂਪਨਿਧਾ, ਇਨ੍ਦਸਾਲਗੁਹਾਤਿਆਦਿਕਾ ਅਵਿਦੂਰਗਤੂਪਨਿਧਾ, ਸੁਵਣ੍ਣਵਣ੍ਣੋਤਿਆਦਿਕਾ ਪਟਿਭਾਗੂਪਨਿਧਾ, ਬ੍ਰਾਹ੍ਮਣਗਾਮੋਤਿਆਦਿਕਾ ਤਬ੍ਬਹੁਲੂਪਨਿਧਾ, ਮਣਿਕਟਕਨ੍ਤਿਆਦਿਕਾ ਤਬ੍ਬਿਸਿਟ੍ਠੂਪਨਿਧਾਤਿ ਏਵਮਾਦਿ ਅਨੇਕਪ੍ਪਕਾਰਾ ਪਞ੍ਞਾਪਨਾ, ਅਯਂ ਉਪਨਿਧਾਪਞ੍ਞਤ੍ਤਿ ਨਾਮ.

ਧਞ੍ਞਰਾਸੀਤਿਆਦਿਕਾ ਪਨ ਸਮੋਧਾਨਪਞ੍ਞਤ੍ਤਿ ਨਾਮ. ਪੁਰਿਮਸ੍ਸ ਪੁਰਿਮਸ੍ਸ ਉਪਨਿਕ੍ਖਿਪਿਤ੍ਵਾ ਦ੍ਵੇ ਤੀਣੀਤਿਆਦਿਕਾ ਉਪਨਿਕ੍ਖਿਤ੍ਤਪਞ੍ਞਤ੍ਤਿ ਨਾਮ. ਤਂਤਂਸਭਾਵਨਿਸ੍ਸਿਤਾ ਪਥਵੀਆਦਿਕਾ ਤਜ੍ਜਾਪਞ੍ਞਤ੍ਤਿ ਨਾਮ. ਆਸੀਤਿਕੋਤਿਆਦਿਕਾ ਪਨ ਸਨ੍ਤਤਿਪਞ੍ਞਤ੍ਤਿ ਨਾਮ.

ਅਟ੍ਠਕਥਾਮੁਤ੍ਤਕੇਨੇਵ ਆਚਰਿਯਨਯੇਨ ਅਪਰਾਪਿ ਧਮ੍ਮਕਥਿਕਾਦਿਕਾ ਕਿਚ੍ਚਪਞ੍ਞਤ੍ਤਿ, ਕਿਸਥੂਲਾਦਿਕਾ ਸਣ੍ਠਾਨਪਞ੍ਞਤ੍ਤਿ, ਇਤ੍ਥਿਪੁਰਿਸਾਦਿਕਾ ਲਿਙ੍ਗਪਞ੍ਞਤ੍ਤਿ, ਕਾਮਾਵਚਰਾਦਿਕਾ, ਕੋਸਲਕਾਦਿਕਾ ਚ ਭੂਮਿਪਞ੍ਞਤ੍ਤਿ, ਤਿਸ੍ਸੋ ਨਾਗੋਤਿਆਦਿਕਾ ਪਚ੍ਚਤ੍ਤਪਞ੍ਞਤ੍ਤਿ, ਨਿਰੋਧਾਦਿਕਾ ਅਸਙ੍ਖਤਪਞ੍ਞਤ੍ਤਿ ਚਾਤਿ ਛ ਪਞ੍ਞਤ੍ਤਿਯੋ.

ਏਤਾਸੁ ਪਨ ਦ੍ਵਾਦਸਸੁ ਤਜ੍ਜਾਪਞ੍ਞਤ੍ਤਿ, ਏਕਚ੍ਚਾ ਭੂਮਿਪਞ੍ਞਤ੍ਤਿ, ਅਸਙ੍ਖਤਪਞ੍ਞਤ੍ਤਿ ਚ ਵਿਜ੍ਜਮਾਨਪਞ੍ਞਤ੍ਤਿਸਙ੍ਖਾਤਾ ਨਾਮਪਞ੍ਞਤ੍ਤਿ, ਤਦਞ੍ਞਾ ਪਰਮਤ੍ਥਾਵਸੇਸਾ, ਪਨ ਅਤ੍ਥਪਞ੍ਞਤ੍ਤੀਤਿ ਦੀਪਿਤਾ ਅਵਿਜ੍ਜਮਾਨਾਦਿਪਞ੍ਞਤ੍ਤਿਯੋ ਚਾਤਿ. ਅਯਂ ਤਾਵੇਤ੍ਥ ਅਨੁਤ੍ਤਾਨਤ੍ਥਤੋ ਸਂਵਣ੍ਣਨਾ.

ਅਤ੍ਥਨਿਚ੍ਛਯੋ ਪਨੇਤ੍ਥਾਪਿ ਪਾਲ਼ਿਨਯੇਨੇਵ ਸਦ੍ਧਿਂ ਹੋਤਿ, ਨ ਵਿਨਾ ਪਾਲ਼ਿਂ ਤਸ੍ਸ ਵਤ੍ਤੁਮਸਕ੍ਕੁਣੇਯ੍ਯਤ੍ਤਾ. ਪਾਲ਼ਿਯਞ੍ਚ ਯਸ੍ਮਾ ਆਦਿਤੋ ਪਞ੍ਚ ਪਞ੍ਞਤ੍ਤਿਯੋ, ਤਦਤ੍ਥਭੂਤਾ ਖਨ੍ਧਾਦਯੋ ਚ ਹੇਟ੍ਠਾ ਵਿਭਙ੍ਗਪ੍ਪਕਰਣੇ ਨਿਪ੍ਪਦੇਸਤੋ ਕਥਿਤਾਤਿ ਤਾ ਇਧ ‘‘ਕਿਤ੍ਤਾਵਤਾ ਖਨ੍ਧਾਨਂ ਖਨ੍ਧਪਞ੍ਞਤ੍ਤਿ, ਯਾਵਤਾ ਪਞ੍ਚਕ੍ਖਨ੍ਧਾ ਰੂਪਕ੍ਖਨ੍ਧੋ’’ਤਿਆਦਿਨਾ ਸਙ੍ਖੇਪੇਨੇਵ ਨਿਦ੍ਦਿਟ੍ਠਾ, ਤਾ ਚੇਤ੍ਥਾਪਿ ਵੁਤ੍ਤਤ੍ਥਾ. ਪੁਗ੍ਗਲਪਞ੍ਞਤ੍ਤਿ ਪਨ ਹੇਟ੍ਠਾ ਨ ਵੁਤ੍ਤਾਤਿ ‘‘ਕਿਤ੍ਤਾਵਤਾ ਪੁਗ੍ਗਲਾਨਂ ਪੁਗ੍ਗਲਪਞ੍ਞਤ੍ਤਿ? ਸਮਯਵਿਮੁਤ੍ਤੋ, ਅਸਮਯਵਿਮੁਤ੍ਤੋ’’ਤਿਆਦਿਨਾ ਏਕਕਾਦਿਭੇਦੇਨ ਯਾਵ ਦਸਕਾ ਦਸਧਾ ਮਾਤਿਕਂ ਠਪੇਤ੍ਵਾ ਵਿਤ੍ਥਾਰੇਨੇਵ ਵਿਭਤ੍ਤਾ, ਸਾ ਚ ਞਾਤਬ੍ਬਪਭੇਦਤੋ ਅਵੁਚ੍ਚਮਾਨਾ ਦੁਬ੍ਬਿਞ੍ਞੇਯ੍ਯਾ, ਤਸ੍ਮਾ ਪੁਗ੍ਗਲਪਞ੍ਞਤ੍ਤਿਯਾ ਏਵ ਚੇਤ੍ਥ ਪਾਲ਼ਿਨਯਾਨੁਸਾਰੇਨ ਸਙ੍ਖੇਪਤੋ ਅਤ੍ਥਨਿਚ੍ਛਯੋ ਹੋਤਿ, ਸੋ ਚੇਤ੍ਥ ਮਾਤਿਕਾਯਂ ਵੁਤ੍ਤੇ ਸਬ੍ਬਪੁਗ੍ਗਲੇ ਅਨੁਦ੍ਧਰਿਤ੍ਵਾ ਞਾਤਬ੍ਬਾਨਂ ਦੁਬ੍ਬਿਞ੍ਞੇਯ੍ਯਾਨਂ ਪੁਗ੍ਗਲਾਨਂ ਏਕਕਾਦਿਭੇਦਤੋਵ ਮਾਤਿਕਂ ਉਦ੍ਧਰਿਤ੍ਵਾ ਵਿਭਜਨਵਸੇਨ ਸਙ੍ਖੇਪਤੋਵ ਹੋਤਿ. ਕਥਂ? ‘‘ਸਮਯਵਿਮੁਤ੍ਤੋ ਅਸਮਯਵਿਮੁਤ੍ਤੋ, ਕੁਪ੍ਪਧਮ੍ਮੋ ਅਕੁਪ੍ਪਧਮ੍ਮੋ, ਚੇਤਨਾਭਬ੍ਬੋ ਅਨੁਰਕ੍ਖਣਾਭਬ੍ਬੋ, ਭਯੂਪਰਤੋ ਅਭਯੂਪਰਤੋ, ਭਬ੍ਬਾਗਮਨੋ ਅਭਬ੍ਬਾਗਮਨੋ, ਨਿਯਤੋ ਅਨਿਯਤੋ, ਪਟਿਪਨ੍ਨਕੋ ਫਲੇ ਠਿਤੋ, ਸਮਸੀਸੀ ਠਿਤਕਪ੍ਪੀ, ਸੋਤਾਪਨ੍ਨੋ ਸਤ੍ਤਕ੍ਖਤ੍ਤੁਪਰਮੋ ਕੋਲਂਕੋਲੋ ਏਕਬੀਜੀ, ਸਕਦਾਗਾਮੀ, ਅਨਾਗਾਮੀ ਅਨ੍ਤਰਾਪਰਿਨਿਬ੍ਬਾਯੀ ਉਪਹਚ੍ਚਪਰਿਨਿਬ੍ਬਾਯੀ ਅਸਙ੍ਖਾਰਪਰਿਨਿਬ੍ਬਾਯੀ ਸਸਙ੍ਖਾਰਪਰਿਨਿਬ੍ਬਾਯੀ ਉਦ੍ਧਂਸੋਤੋ ਅਕਨਿਟ੍ਠਗਾਮੀ, ਅਰਹਾ’’ਤਿ ਏਕਕਮਾਤਿਕਾ.

ਤਤ੍ਥ ਯੋ ਅਪ੍ਪਨਂ ਨਿਬ੍ਬਤ੍ਤੇਤੁਂ ਯੁਤ੍ਤਪਤ੍ਤਕਾਲੇ ਰੂਪਾਰੂਪਸਮਾਪਤ੍ਤਿਸਙ੍ਖਾਤੇਹਿ ਅਟ੍ਠਹਿ ਵਿਮੋਕ੍ਖੇਹਿ ਪਚ੍ਚਨੀਕਧਮ੍ਮਤੋ ਵਿਮੁਚ੍ਚਿਤ੍ਵਾ ਤੀਸੁ ਮਗ੍ਗੇਸੁ ਯੇਨ ਕੇਨਚਿ ਯਥਾਸਕਂ ਆਸਵੇ ਖੇਪੇਤ੍ਵਾ ਵੁਟ੍ਠਿਤੋ, ਅਯਂ ਸਮਯਵਿਮੁਤ੍ਤੋ ਨਾਮ. ‘‘ਏਕਚ੍ਚੇ ਆਸਵਾ ਪਰਿਕ੍ਖੀਣਾ’’ਤਿਆਦਿਵਚਨਤੋ (ਪੁ. ਪ. ੧) ਹਿ ਅਟ੍ਠਸਮਾਪਤ੍ਤਿਲਾਭੀ ਪੁਥੁਜ੍ਜਨੋ ਵਾ ਖੀਣਾਸਵੋ ਵਾ ਇਧ ਨ ਗਹਿਤੋ, ਸਮਾਪਤ੍ਤਿਲਾਭਿਨੋ ਪਨ ਫਲਟ੍ਠਸੇਖਾਵ ਗਹਿਤਾਤਿ ਵੇਦਿਤਬ੍ਬਾ. ਸੁਕ੍ਖਵਿਪਸ੍ਸਕਖੀਣਾਸਵੋ, ਸਬ੍ਬੇਪਿ ਚ ਅਰਿਯਾ ਮਗ੍ਗਵਿਮੋਕ੍ਖਂ ਸਨ੍ਧਾਯ ਅਸਮਯਵਿਮੁਤ੍ਤਾ ਨਾਮ. ਬਾਹਿਰਾਨਞ੍ਹਿ ਅਟ੍ਠਨ੍ਨਂ ਸਮਾਪਤ੍ਤੀਨਂ ਸਮਾਪਜ੍ਜਨ੍ਤਸ੍ਸ ਪਵਿਵੇਕਟ੍ਠਾਨਲਾਭਾਦਿਸਮਯੋਪਿ ਅਤ੍ਥਿ, ਵਤ੍ਤਕਰਣਕਾਲਾਦਿਅਸਮਯੋਪਿ ਅਤ੍ਥਿ. ਮਗ੍ਗਵਿਮੋਕ੍ਖੇਨ ਵਿਮੁਚ੍ਚਨਸ੍ਸ ਪਨ ਤਾਦਿਸੋ ਸਮਯੋ ਵਾ ਅਸਮਯੋ ਵਾ ਨਤ੍ਥਿ, ਯਸ੍ਸ ਸਦ੍ਧਾ ਬਲਵਤੀ, ਵਿਪਸ੍ਸਨਾ ਚ ਆਰਦ੍ਧਾ, ਤਸ੍ਸ ਗਚ੍ਛਨ੍ਤਸ੍ਸ ਵਾ ਭੁਞ੍ਜਨ੍ਤਸ੍ਸ ਵਾ ਮਗ੍ਗਫਲਪਟਿਵੇਧੋ ਨਾਮ ਨ ਹੋਤੀਤਿ ਨਤ੍ਥਿ, ਤਸ੍ਮਾ ਸਬ੍ਬੇ ਅਰਿਯਾ ਅਰਿਯਵਿਮੋਕ੍ਖੇ ਅਸਮਯਵਿਮੁਤ੍ਤਾਤਿ ਵੇਦਿਤਬ੍ਬਾ. ਪੁਰਿਮਪਦੇਪਿ ਲੋਕਿਯਸਮਾਪਤ੍ਤਿਞ੍ਞੇਵ ਸਨ੍ਧਾਯ ਸੇਖਾ ਸਮਯਵਿਮੁਤ੍ਤਾ ਨਾਮ ਜਾਤਾ.

ਅਵਸਿਭਾਵਾ ਅਟ੍ਠਸਮਾਪਤ੍ਤਿਲਾਭੀ ਪਨ ਪੁਥੁਜ੍ਜਨੋ, ਸੋਤਾਪਨ੍ਨਸਕਦਾਗਾਮਿਨੋ ਦ੍ਵੇ ਸੇਖਾ ਅਟ੍ਠਸਮਾਪਤ੍ਤਿਂ ਸਨ੍ਧਾਯ ਕੁਪ੍ਪਧਮ੍ਮੋ ਨਾਮ. ਪਰਿਹਾਨਧਮ੍ਮੋਤਿਪਿ ਦੁਵਿਧਾ ਏਵ. ਅਨਾਗਾਮਿਆਦਯੋ ਸੁਪ੍ਪਹੀਨਸਮਾਧਿਪਾਰਿਪਨ੍ਥਿਕਤ੍ਤਾ ਵਸਿਭਾਵਾ ਸਮਾਪਤ੍ਤਿਲਾਭੀ ਪੁਥੁਜ੍ਜਨੋ, ਅਰਿਯਾ ਚ ਲੋਕੁਤ੍ਤਰਧਮ੍ਮੇਪਿ ਸਨ੍ਧਾਯ ਅਕੁਪ੍ਪਧਮ੍ਮੋ ਨਾਮ. ਅਪਰਿਹਾਨਧਮ੍ਮੋਤਿ ਤੇ ਏਵ. ਚੇਤਨਾਭਬ੍ਬੋਤਿ ਚੇਤਨਾਸਙ੍ਖਾਤੇਨ ਝਾਨਸਮਾਪਤ੍ਤਿਵਲ਼ਞ੍ਜਨੇਨ ਅਪਰਿਹਾਨਿਂ ਆਪਜ੍ਜਿਤੁਂ ਭਬ੍ਬੋ. ਯੋ ਹਿ ਰੂਪਾਰੂਪਜ੍ਝਾਨੇਸੁ ਆਚਿਣ੍ਣਵਸਿਤਾਯ ਚੇਤਨਾਸਙ੍ਖਾਤਾਯ ਝਾਨਸਮਾਪਤ੍ਤਿਯਾ ਨਿਰਨ੍ਤਰਂ ਵਲ਼ਞ੍ਜਮਾਨੋ ਤੇਹਿ ਨ ਪਰਿਹਾਯਤਿ, ਅਵਲ਼ਞ੍ਜਮਾਨੋ ਚ ਪਰਿਹਾਯਤਿ, ਅਯਂ ਵਲ਼ਞ੍ਜਮਾਨੋ ਚੇਤਨਾਭਬ੍ਬੋ ਨਾਮ. ਅਨੁਰਕ੍ਖਣਾਭਬ੍ਬੋਤਿ ਝਾਨਸ੍ਸ ਉਪਕਾਰਾਨੁਪਕਾਰਧਮ੍ਮੇ ਜਾਨਿਤ੍ਵਾ ਅਨੁਰਕ੍ਖਣਾਯ ਅਵਲ਼ਞ੍ਜਮਾਨੋਪਿ ਅਪਰਿਹਾਨਿਂ ਆਪਜ੍ਜਿਤੁਂ ਭਬ੍ਬੋ, ਏਸੋ ਚ ਪੁਰਿਮਤੋ ਬਲਵਤਰੋ, ਆਚਿਣ੍ਣਵਸਿਨੋ ਪਞ੍ਞਾਸਮ੍ਪਦਾਯ ਉਪਕਾਰਾਨੁਪਕਾਰਧਮ੍ਮੇ ਜਾਨਿਤ੍ਵਾ ਤਦਨੁਰੂਪਂ ਪਟਿਪਜ੍ਜਨਤੋਤਿ ਵੇਦਿਤਬ੍ਬੋ.

ਭਯੂਪਰਤੋਤਿ ਭਯੇਨ ਪਾਪਤੋ ਉਪਰਤੋ ਵਿਰਤੋ ਸੇਖੋ, ਕਲ੍ਯਾਣਪੁਥੁਜ੍ਜਨੋ ਚ. ਤੇਸੁ ਪਚ੍ਛਿਮੋ ਦੁਗ੍ਗਤਿਵਟ੍ਟਕਿਲੇਸਉਪਵਾਦਸਙ੍ਖਾਤੇਹਿ ਚਤੂਹਿ ਭਯੇਹਿ ਪਾਪਤੋ ਓਰਮਤਿ, ਸੇਖੋ ਦੁਗ੍ਗਤਿਵਜ੍ਜੇਹਿ, ਅਪਾਯੇਹਿ ਮੁਤ੍ਤਤ੍ਤਾ. ਖੀਣਾਸਵੋ ਪਨ ਅਭਯੂਪਰਤੋ ਨਾਮ ਸਮੁਚ੍ਛਿਨ੍ਨਭਯਤ੍ਤਾ, ਉਪਵਾਦਤੋ ਪਨ ਓਰਮਿਤਬ੍ਬੋ.

ਅਭਬ੍ਬਾਗਮਨੋਤਿ ਸਮ੍ਮਤ੍ਤਨਿਯਾਮਾਗਮਨਸ੍ਸ ਅਭਬ੍ਬੋ, ਯੇ ਆਨਨ੍ਤਰਿਯਸਙ੍ਖਾਤੇਨ ਕਮ੍ਮਾਵਰਣੇਨ, ਨਿਯਤਮਿਚ੍ਛਾਦਿਟ੍ਠਿਸਙ੍ਖਾਤੇਨ ਕਿਲੇਸਾਵਰਣੇਨ, ਅਹੇਤੁਕਦੁਹੇਤੁਕਪਟਿਸਨ੍ਧਿਸਙ੍ਖਾਤੇਨ ਵਿਪਾਕਾਵਰਣੇਨ ਚ ਸਮਨ੍ਨਾਗਤਾ, ਬੁਦ੍ਧਾਦੀਸੁ ਚ ਸਦ੍ਧਾਰਹਿਤਾ, ਮਗ੍ਗਭਾਵਨਾਯ ਚ ਉਤ੍ਤਰਕੁਰੁਕਾਦਯੋ ਵਿਯ ਅਚ੍ਛਨ੍ਦਿਕਾ, ਪੁਬ੍ਬੂਪਨਿਸ੍ਸਯਰਹਿਤਾ ਚ, ਸਬ੍ਬੇਤੇ ਅਭਬ੍ਬਾਗਮਨਾ ਨਾਮ. ਵਿਪਰੀਤਾ ਭਬ੍ਬਾਗਮਨਾ ਨਾਮ. ਪਞ੍ਚਾਨਨ੍ਤਰਿਯਨਿਯਤਮਿਚ੍ਛਾਦਿਟ੍ਠਿਕਾ ਨਿਰਯਗਮਨੇ, ਅਟ੍ਠ ਅਰਿਯਪੁਗ੍ਗਲਾ ਅਨੁਪਾਦਾਪਰਿਨਿਬ੍ਬਾਨਾਦੀਸੁ ਨਿਯਤਾ ਨਾਮ. ਅਵਸੇਸਪੁਗ੍ਗਲਾ ਅਨਿਬਦ੍ਧਗਤਿਕਤਾਯ ਅਨਿਯਤਾ ਨਾਮ, ਉਤ੍ਤਰਕੁਰੁਕਾ ਪਨ ਸੁਗਤਿਨਿਯਤਾਪਿ ਮਿਚ੍ਛਤ੍ਤਸਮ੍ਮਤ੍ਤਨਿਯਾਮਸ੍ਸੇਵ ਇਧਾਧਿਪ੍ਪੇਤਤ੍ਤਾ ‘‘ਨਿਯਤਾ’’ਤਿ ਨ ਵੁਤ੍ਤਾ. ਮਗ੍ਗਸਮਙ੍ਗੀ ਪੁਗ੍ਗਲੋ ਮਗ੍ਗਕ੍ਖਣੇ ਫਲਤ੍ਥਾਯ ਪਟਿਪਨ੍ਨਕੋ ਨਾਮ, ਫਲਸਮਙ੍ਗੀ ਫਲਾਨੁਪ੍ਪਤ੍ਤਿਯਮ੍ਪਿ ਫਲੇ ਠਿਤੋ ਨਾਮ.

ਯਸ੍ਸ ਪਨ ਅਪੁਬ੍ਬਾਚਰਿਮਂ ਆਸਵਪਰਿਯਾਦਾਨਞ੍ਚ ਹੋਤਿ ਜੀਵਿਤਪਰਿਯਾਦਾਨਞ੍ਚ, ਅਯਂ ਸਮਸੀਸੀ ਨਾਮ. ਸੋ ਚ ਤਿਵਿਧੋ ਹੋਤਿ ਇਰਿਯਾਪਥਸਮਸੀਸੀ ਰੋਗਸਮਸੀਸੀ ਜੀਵਿਤਸਮਸੀਸੀਤਿ. ਤਤ੍ਥ ਯੋ ਚਤੂਸੁ ਇਰਿਯਾਪਥੇਸੁ ਏਕਸ੍ਮਿਂ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਤ੍ਵਾ ਤਸ੍ਮਿਞ੍ਞੇਵ ਇਰਿਯਾਪਥੇ ਪਰਿਨਿਬ੍ਬਾਤਿ, ਅਯਂ ਇਰਿਯਾਪਥਸਮਸੀਸੀ ਨਾਮ. ਯੋ ਪਨ ਏਕਂ ਰੋਗਂ ਪਤ੍ਵਾ ਅਨ੍ਤੋਰੋਗੇ ਏਵ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਤ੍ਵਾ ਤੇਨੇਵ ਰੋਗੇਨ ਪਰਿਨਿਬ੍ਬਾਤਿ, ਅਯਂ ਰੋਗਸਮਸੀਸੀ ਨਾਮ. ਯਸ੍ਸ ਪਨ ਕਿਲੇਸਸੀਸਸਙ੍ਖਾਤਾ ਅਵਿਜ੍ਜਾ, ਅਰਹਤ੍ਤਮਗ੍ਗੇਨ ਪਵਤ੍ਤਸੀਸਸਙ੍ਖਾਤਂ ਜੀਵਿਤਿਨ੍ਦ੍ਰਿਯਞ੍ਚ ਚੁਤਿਚਿਤ੍ਤੇਨ ਸਮਂ ਪਰਿਯਾਦਾਨਂ ਗਚ੍ਛਤਿ, ਅਯਂ ਜੀਵਿਤਸਮਸੀਸੀ ਨਾਮ. ਕਥਮਿਦਂ ਸਮਂ ਹੋਤੀਤਿ? ਵਾਰਸਮਤਾਯ. ਯਸ੍ਮਿਂ ਹਿ ਵਾਰੇ ਮਗ੍ਗੇਨ ਕਿਲੇਸੇ ਖੇਪਿਤੇ ਪਚ੍ਚਵੇਕ੍ਖਣਞਾਣਾਨਿ ਪਵਤ੍ਤਨ੍ਤਿ, ਤਸ੍ਸਾਨਨ੍ਤਰਮੇਵ ਪਰਿਨਿਬ੍ਬਾਯਤੋ ਇਮਾਯ ਵਾਰਸਮਤਾਯ ਇਦਂ ਉਭਯਸੀਸਪਰਿਯਾਦਾਨਮ੍ਪਿ ਸਮਂ ਹੋਤਿ ਨਾਮ, ਅਯਮੇਵ ਜੀਵਿਤਸਮਸੀਸੀ ਇਧਾਧਿਪ੍ਪੇਤੋ.

ਠਿਤਕਪ੍ਪੀਤਿ ਠਿਤੋ ਕਪ੍ਪੋ ਠਿਤਕਪ੍ਪੋ, ਸ੍ਵਾਸ੍ਸ ਅਤ੍ਥੀਤਿ ਠਿਤਕਪ੍ਪੀ, ਕਪ੍ਪਮ੍ਹਿ ਵਿਨਸ੍ਸਮਾਨਮ੍ਹਿ ਕਪ੍ਪਂ ਠਪੇਤੁਂ ਸਮਤ੍ਥੋਤਿ ਅਤ੍ਥੋ.

ਸਚੇ ਹਿ ਯੇਸਂ ਮਗ੍ਗਸਮਙ੍ਗਿਕ੍ਖਣੇ ਕਪ੍ਪਵਿਨਾਸੋ ਭਵੇਯ੍ਯ, ਨੇਵ ਤਾਵ ਕਪ੍ਪੋ ਵਿਨਸ੍ਸੇਯ੍ਯ, ਯਾਵਾਯਂ ਯਥਾਸਕਂ ਫਲਂ ਨ ਸਚ੍ਛਿਕਰੋਤੀਤਿ ਤੇ ਵਿਨਸ੍ਸਮਾਨਮ੍ਪਿ ਕਪ੍ਪਂ ਠਪੇਨ੍ਤੀਤਿ ਠਿਤਕਪ੍ਪਿਨੋ ਨਾਮ ਜਾਤਾਤਿ. ਕਿਞ੍ਚਾਪਿ ਕਪ੍ਪਵਿਨਾਸਨਕਾਲੇ ਸਾਸਨਂ ਨਤ੍ਥਿ, ਗਤਕੋਟਿਕੇ ਹਿ ਕਾਲੇ ਕਪ੍ਪਵਿਨਾਸੋ ਹੋਤਿ, ਏਵਂ ਸਨ੍ਤੇਪਿ ਮਗ੍ਗਾਨਨ੍ਤਰਫਲਸ੍ਸ ਅਨਨ੍ਤਰਾਯਂ ਦੀਪੇਤੁਂ ਇਦਂ ਅਭੂਤਮ੍ਪਿ ਕਾਰਣਂ ਆਹਟਂ.

ਸੋਤਾਪਨ੍ਨੋਤਿ ਨਿਬ੍ਬਾਨਸਮੁਦ੍ਦਨਿਨ੍ਨਤਾਯ ਸੋਤਸਙ੍ਖਾਤਸ੍ਸ ਮਗ੍ਗਸ੍ਸ ਪਠਮਸਮਙ੍ਗੀ ਵੁਚ੍ਚਤਿ, ਇਧ ਪਨ ਫਲਟ੍ਠੋ ਅਧਿਪ੍ਪੇਤੋ. ਤਸ੍ਸੇਵ ਚ ਪਭੇਦਦਸ੍ਸਨਤ੍ਥਂ ‘‘ਸਤ੍ਤਕ੍ਖਤ੍ਤੁਪਰਮੋ’’ਤਿਆਦਿ ਵੁਤ੍ਤਂ. ਸਤ੍ਤਵਾਰਾ ਪਰਮਾ ਅਸ੍ਸ ਭਵੂਪਪਤ੍ਤੀਤਿ ਸਤ੍ਤਕ੍ਖਤ੍ਤੁਪਰਮੋ, ਤਤੋ ਪਰਂ ਅਟ੍ਠਮਂ ਭਵਂ ਨਾਦਿਯਤੀਤਿ ਅਤ੍ਥੋ. ਸੋਤਾਪਨ੍ਨੋ ਹਿ ਯੋ ਸਤ੍ਤਕ੍ਖਤ੍ਤੁਂ ਦੇਵੇਸੁ, ਮਨੁਸ੍ਸੇਸੁ ਚ ਪਟਿਸਨ੍ਧਿਂ ਗਹੇਤ੍ਵਾ ਸਤ੍ਤਮੇ ਭਵੇ ਦੁਕ੍ਖਸ੍ਸਨ੍ਤਂ ਕਰੋਤਿ, ਅਯਂ ਸਤ੍ਤਕ੍ਖਤ੍ਤੁਪਰਮੋ ਨਾਮ. ਕੁਲਤੋ ਕੁਲਂ ਭਵਤੋ ਭਵਂ ਗਚ੍ਛਤੀਤਿ ਕੋਲਂਕੋਲੋ. ਸੋ ਹਿ ਦੇਵਮਨੁਸ੍ਸਵਸੇਨ ਦ੍ਵੇ ਗਤਿਯੋ ਭਵੇ ਸਂਸਰਿਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ, ਅਯਂ ਕੋਲਂਕੋਲੋ ਨਾਮ. ਕਮ੍ਮਪਟਿਸਨ੍ਧਿਯਾ ਏਕਂ ਕਮ੍ਮਂ ਕਿਲੇਸਬੀਜਂ ਅਸ੍ਸਾਤਿ ਏਕਬੀਜੀ. ਸੋ ਹਿ ਏਕਸ੍ਮਿਞ੍ਞੇਵ ਭਵੇ ਖੀਣਾਸਵੋ ਹੋਤਿ. ਕਿਂ ਪਨਸ੍ਸ ਭੇਦਸ੍ਸ ਨਿਯਾਮਕਨ੍ਤਿ? ਵਿਪਸ੍ਸਨਾਭਿਞ੍ਞਾਭੇਦਾ. ਸੋਤਾਪਨ੍ਨੇਸੁ ਹਿ ਯੋ ਵਿਪਸ੍ਸਨਾਯ ਪਮਤ੍ਤੋ, ਸੋ ਸਤ੍ਤਕ੍ਖਤ੍ਤੁਪਰਮੋ ਹੋਤਿ. ਯੋ ਕਿਞ੍ਚਿ ਅਪ੍ਪਮਤ੍ਤੋ, ਸੋ ਕੋਲਂਕੋਲੋ. ਯੋ ਪਨ ਵਿਪਸ੍ਸਨਾਯ ਅਤਿਵਿਯ ਅਪ੍ਪਮਤ੍ਤੋ, ਸੋ ਏਕਬੀਜੀ ਹੋਤਿ. ਯੇ ਪਨ ਅਭਿਵਿਯ ਪਮਤ੍ਤਾ ਵਟ੍ਟਜ੍ਝਾਸਯਾ ਅਨਾਥਪਿਣ੍ਡਿਕਵਿਸਾਖਾਸਕ੍ਕਾਦਯੋ, ਤੇ ਪੁਨਪ੍ਪੁਨਂ ਵਟ੍ਟਸ੍ਮਿਂਯੇਵ ਵਿਚਰਨ੍ਤਾ ਆਦਿਤੋ ਪਟ੍ਠਾਯ ਛ ਦੇਵਲੋਕੇ ਓਸਾਪੇਤ੍ਵਾ ਬ੍ਰਹ੍ਮਲੋਕੇਸੁਪਿ ਯਥਾਕ੍ਕਮਂ ਨਿਬ੍ਬਤ੍ਤਿਤ੍ਵਾ ਅਕਨਿਟ੍ਠੇ ਠਤ੍ਵਾ ਪਰਿਨਿਬ੍ਬਨ੍ਤਿ, ਨ ਤੇ ਇਧ ਗਹਿਤਾ. ਤੇ ਹਿ ਮਨੁਸ੍ਸਗਤਿਂ ਪੁਨਪ੍ਪੁਨਂ ਆਦਿਯਨ੍ਤਿ. ਯੇ ਪਨ ਮਨੁਸ੍ਸਗਤਿਯਮ੍ਪਿ ਭਵਂ ਆਦਿਯਨ੍ਤਿ, ਤੇਸਂ ਵਸੇਨ ਸਤ੍ਤਕ੍ਖਤ੍ਤੁਪਰਮੋ ਕੋਲਂਕੋਲੋ ਮਾਨੁਸਿਕਭਵਨਿਬ੍ਬਤ੍ਤਕੋ ਏਵ ਏਕਬੀਜੀ ਗਹਿਤੋ. ਤੇ ਪਨ ਸਦ੍ਧਾਧੁਰੇਨ ਆਗਤਾ ਤਯੋ, ਪਞ੍ਞਾਧੁਰੇਨ ਆਗਤਾ ਤਯੋਤਿ ਸੋਤਾਪਨ੍ਨੋ ਛਬ੍ਬਿਧੋ ਹੋਤੀਤਿ ਵੇਦਿਤਬ੍ਬੋ.

ਪਟਿਸਨ੍ਧਿਵਸੇਨ ਪਨ ਸਕਿਂ ਇਮਂ ਮਨੁਸ੍ਸਗਤਿਂ ਆਗਚ੍ਛਤੀਤਿ ਸਕਦਾਗਾਮੀ, ਦੁਤਿਯਮਗ੍ਗਫਲਸਮਙ੍ਗੀ. ਇਮਿਨਾ ਪਞ੍ਚਸੁ ਸਕਦਾਗਾਮੀਸੁ ਚਤ੍ਤਾਰੋ ਵਜ੍ਜੇਤ੍ਵਾ ਏਕੋਵ ਗਹਿਤੋ. ਏਕਚ੍ਚੋ ਹਿ ਸਕਦਾਗਾਮਿਫਲੇ ਠਤ੍ਵਾ ਪੁਨ ਦੁਤਿਯਭਵੇ ਇਧੇਵ ਪਰਿਨਿਬ੍ਬਾਤਿ, ਏਕਚ੍ਚੋ ਇਧ ਪਤ੍ਵਾ ਦੇਵਲੋਕੇ ਪਰਿਨਿਬ੍ਬਾਤਿ, ਏਕਚ੍ਚੋ ਦੇਵਲੋਕੇ ਪਤ੍ਵਾ ਦੁਤਿਯਭਵੇ ਤਤ੍ਥੇਵ ਪਰਿਨਿਬ੍ਬਾਤਿ, ਏਕਚ੍ਚੋ ਦੇਵਲੋਕੇ ਪਤ੍ਵਾ ਇਧੂਪਪਜ੍ਜਿਤ੍ਵਾ ਪਰਿਨਿਬ੍ਬਾਤਿ, ਇਮੇ ਚਤ੍ਤਾਰੋਪਿ ਇਧ ਨ ਗਹਿਤਾ. ਯੋ ਪਨ ਇਧ ਪਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਪੁਨ ਇਧੂਪਪਜ੍ਜਿਤ੍ਵਾ ਪਰਿਨਿਬ੍ਬਾਤਿ, ਅਯਮੇਕੋਵ ਇਧ ਗਹਿਤੋ. ਇਮਸ੍ਸ ਚ ਦ੍ਵੇ ਪਟਿਸਨ੍ਧਿਯੋ, ਏਕਬੀਜਿਸ੍ਸ ਪਨ ਏਕਾਵਾਤਿ ਇਦਂ ਤੇਸਂ ਨਾਨਾਕਰਣਨ੍ਤਿ ਵੇਦਿਤਬ੍ਬਂ.

ਪਟਿਸਨ੍ਧਿਵਸੇਨ ਕਾਮਭਵਂ ਨਾਗਚ੍ਛਤੀਤਿ ਅਨਾਗਾਮੀ, ਤਤਿਯਮਗ੍ਗਫਲਸਮਙ੍ਗੀ. ਤਸ੍ਸੇਵ ਪਨ ਪਭੇਦਦਸ੍ਸਨਤ੍ਥਂ ‘‘ਅਨ੍ਤਰਾਪਰਿਨਿਬ੍ਬਾਯੀ’’ਤਿਆਦਿ ਵੁਤ੍ਤਂ. ਤਤ੍ਥ ਅਨ੍ਤਰਾਪਰਿਨਿਬ੍ਬਾਯੀਤਿ ਆਯੁਵੇਮਜ੍ਝਸ੍ਸ ਅਨ੍ਤਰਾ ਏਵ ਅਰਹਤ੍ਤਮਗ੍ਗਂ ਉਪ੍ਪਾਦੇਤ੍ਵਾ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਨਸੀਲੋ ਏਕੋ ਅਨਾਗਾਮੀ. ਸੋ ਚ ਉਪ੍ਪਨ੍ਨਸਮਨਨ੍ਤਰਂ ਪਰਿਨਿਬ੍ਬਾਯੀ, ਆਯੁਵੇਮਜ੍ਝਂ ਅਪ੍ਪਤ੍ਵਾ ਪਰਿਨਿਬ੍ਬਾਯੀ, ਆਯੁਵੇਮਜ੍ਝਂ ਪਤ੍ਵਾ ਪਰਿਨਿਬ੍ਬਾਯੀਤਿ ਤਿਵਿਧੋ ਹੋਤਿ. ਉਪਹਚ੍ਚਪਰਿਨਿਬ੍ਬਾਯੀਤਿ ਆਯੁਵੇਮਜ੍ਝਂ ਉਪਹਚ੍ਚ ਅਤਿਕ੍ਕਮਿਤ੍ਵਾ, ਮਰਣਸਮਯਂ ਵਾ ਉਪਹਚ੍ਚ ਉਪਗਨ੍ਤ੍ਵਾ ਪਰਿਨਿਬ੍ਬਾਯੀ, ਆਯੁਵੇਮਜ੍ਝਂ ਅਤਿਕ੍ਕਮਿਤ੍ਵਾ ਯਾਵ ਮਰਣਸਮਯਾ ਪਰਿਨਿਬ੍ਬਾਯੀਤਿ ਅਤ੍ਥੋ. ਅਸਙ੍ਖਾਰਪਰਿਨਿਬ੍ਬਾਯੀਤਿ ਅਸਙ੍ਖਾਰੇਨ ਅਪ੍ਪਦੁਕ੍ਖੇਨ ਅਧਿਮਤ੍ਤਪ੍ਪਯੋਗਂ ਅਕਤ੍ਵਾ ਪਰਿਨਿਬ੍ਬਾਯਨਸੀਲੋ. ਸਸਙ੍ਖਾਰਪਰਿਨਿਬ੍ਬਾਯੀਤਿ ਸਸਙ੍ਖਾਰੇਨ ਦੁਕ੍ਖੇਨ ਕਸਿਰੇਨ ਅਧਿਮਤ੍ਤਪ੍ਪਯੋਗੇਨ ਪਰਿਨਿਬ੍ਬਾਯਨਸੀਲੋ. ਉਦ੍ਧਂਸੋਤੋਤਿ ਉਦ੍ਧਂਵਾਹਿਭਾਵੇਨ ਉਦ੍ਧਮਸ੍ਸ ਤਣ੍ਹਾਸੋਤਂ ਵਟ੍ਟਸੋਤਞ੍ਚ, ਉਦ੍ਧਂ ਵਾ ਗਨ੍ਤ੍ਵਾ ਪਟਿਲਭਿਤਬ੍ਬਤੋ ਉਦ੍ਧਂ ਮਗ੍ਗਸੋਤਮਸ੍ਸਾਤਿਪਿ ਉਦ੍ਧਂਸੋਤੋ. ਅਕਨਿਟ੍ਠਂ ਗਚ੍ਛਤੀਤਿ ਅਕਨਿਟ੍ਠਗਾਮੀ. ਇਮੇਸਂ ਪਨ ਅਨਾਗਾਮੀਨਂ ਪਭੇਦਦਸ੍ਸਨਤ੍ਥਮ੍ਪੇਤ੍ਥ ਉਦ੍ਧਂਸੋਤੋ ਅਕਨਿਟ੍ਠਗਾਮੀਤਿਆਦਿ ਚਤੁਕ੍ਕਂ ਵੇਦਿਤਬ੍ਬਂ.

ਤਤ੍ਥ ਯੋ ਅਵਿਹਤੋ ਪਟ੍ਠਾਯ ਚਤੂਸੁ ਯਥਾਕ੍ਕਮਂ ਉਪ੍ਪਜ੍ਜਿਤ੍ਵਾ ਯਾਵਤਾਯੁਕਂ ਠਤ੍ਵਾ ਚੁਤੋ ਅਕਨਿਟ੍ਠੇ ਉਪ੍ਪਜ੍ਜਿਤ੍ਵਾ ਪਰਿਨਿਬ੍ਬਾਤਿ, ਅਯਂ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਨਾਮ. ਯੋ ਪਨ ਅਕਨਿਟ੍ਠਂ ਅਪ੍ਪਤ੍ਵਾ ਅਨ੍ਤਰਾ ਪਰਿਨਿਬ੍ਬਾਤਿ, ਅਯਂ ਉਦ੍ਧਂਸੋਤੋ ਨ ਅਕਨਿਟ੍ਠਗਾਮੀ ਨਾਮ. ਯੋ ਮਨੁਸ੍ਸਲੋਕੋ ਅਕਨਿਟ੍ਠਮੇਵ ਗਨ੍ਤ੍ਵਾ ਪਰਿਨਿਬ੍ਬਾਤਿ, ਅਯਂ ਨ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਨਾਮ. ਯੋ ਪਨ ਹੇਟ੍ਠਾ ਚਤੂਸੁ ਸੁਦ੍ਧਾਵਾਸੇਸੁ ਅਞ੍ਞਤਰਸ੍ਮਿਂ ਉਪ੍ਪਜ੍ਜਿਤ੍ਵਾ ਤਤ੍ਥੇਵ ਪਰਿਨਿਬ੍ਬਾਤਿ, ਅਯਂ ਨ ਉਦ੍ਧਂਸੋਤੋ ਨ ਅਕਨਿਟ੍ਠਗਾਮੀ ਨਾਮ. ਏਵਮੇਤੇ ਅਨਾਗਾਮਿਨੋ ਅਟ੍ਠਚਤ੍ਤਾਲੀਸਵਿਧਾ ਹੋਨ੍ਤਿ. ਕਥਂ? ਅਵਿਹੇਸੁ ਤਾਵ ਤਯੋ ਅਨ੍ਤਰਾਪਰਿਨਿਬ੍ਬਾਯਿਨੋ, ਏਕੋ ਉਪਹਚ੍ਚਪਰਿਨਿਬ੍ਬਾਯੀ, ਏਕੋ ਉਦ੍ਧਂਸੋਤੋਤਿ ਪਞ੍ਚ, ਤੇ ਅਸਙ੍ਖਾਰਪਰਿਨਿਬ੍ਬਾਯਿਸਸਙ੍ਖਾਰਪਰਿਨਿਬ੍ਬਾਯਿਵਸੇਨ ਦਸ ਹੋਨ੍ਤਿ, ਏਵਂ ਅਤਪ੍ਪਸੁਦਸ੍ਸਸੁਦਸ੍ਸੀਸੂਤਿ ਚਤ੍ਤਾਲੀਸਂ, ਅਕਨਿਟ੍ਠੇ ਪਨ ਉਦ੍ਧਂਸੋਤੋ ਨਤ੍ਥਿ, ਤਸ੍ਮਾ ਤਤ੍ਥ ਤਂ ਸਸਙ੍ਖਾਰਾਸਙ੍ਖਾਰਵਸੇਨ ਦੁਵਿਧਂ ਉਦ੍ਧਂਸੋਤਂ ਵਜ੍ਜੇਤ੍ਵਾ ਅਟ੍ਠ ਚਾਤਿ ਅਟ੍ਠਚਤ੍ਤਾਲੀਸ ਹੋਨ੍ਤਿ.

ਅਰਹਾਤਿ ਕਿਲੇਸਾਰੀਨਂ ਹਤਤ੍ਤਾਦਿਨਾ ਖੀਣਾਸਵੋ ਅਰਹਾ ਨਾਮ. ਸੋ ਸੁਞ੍ਞਤਾਦਿਵਿਮੋਕ੍ਖਤ੍ਤਯਵਸੇਨ ਤਿਵਿਧੋ ਹੁਤ੍ਵਾ ਪੁਨ ਪਚ੍ਚੇਕਂ ਪਟਿਪਦਾਚਤੁਕ੍ਕਵਸੇਨ ਦ੍ਵਾਦਸਵਿਧਾ ਹੋਨ੍ਤਿ. ਯਥਾ ਚ ਅਰਹਾ ਦ੍ਵਾਦਸਵਿਧੋ, ਏਵਂ ਦ੍ਵਾਦਸੇਵ ਸਕਦਾਗਾਮਿਨੋ, ਚਤੁਵੀਸਤਿ ਸੋਤਾਪਨ੍ਨਾ ਅਟ੍ਠਚਤ੍ਤਾਲੀਸ ਅਨਾਗਾਮਿਨੋਵ ਪਚ੍ਚੇਕਨ੍ਤਿ ਵੇਦਿਤਬ੍ਬਂ. ਇਮੇ ਚ ਸਬ੍ਬੇ ਅਰਿਯਾ ਇਮਸ੍ਮਿਂ ਸਾਸਨੇ ਏਵ ਉਪ੍ਪਜ੍ਜਨ੍ਤਿ, ਨੋ ਬਹਿਦ੍ਧਾਤਿ. ਏਕਕਨਯੋ.

ਦੁਕਾਦਿਮਾਤਿਕਤ੍ਥਵਣ੍ਣਨਾ

ਦੁਕਾਦੀਸੁ ‘‘ਦ੍ਵੇ ਪੁਗ੍ਗਲਾ – ਕੋਧਨੋ ਚ ਉਪਨਾਹੀ ਚ ਮਕ੍ਖੀ ਚ ਪਲ਼ਾਸੀ ਚਾ’’ਤਿਆਦਿਨਾ ਦੁਕਞ੍ਚ, ‘‘ਤਯੋ ਪੁਗ੍ਗਲਾ – ਨਿਰਾਸੋ ਆਸਂਸੋ ਵਿਗਤਾਸੋ’’ਤਿਆਦਿਨਾ ਤਿਕਞ੍ਚ, ‘‘ਚਤ੍ਤਾਰੋ ਪੁਗ੍ਗਲਾ – ਅਸਪ੍ਪੁਰਿਸੋ, ਅਸਪ੍ਪੁਰਿਸੇਨਅਸਪ੍ਪੁਰਿਸਤਰੋ, ਸਪ੍ਪੁਰਿਸੋ, ਸਪ੍ਪੁਰਿਸੇਨਸਪ੍ਪੁਰਿਸਤਰੋ’’ਤਿਆਦਿਨਾ ਚਤੁਕ੍ਕਞ੍ਚ, ‘‘ਪਞ੍ਚ ਪੁਗ੍ਗਲਾ – ਅਤ੍ਥੇਕਚ੍ਚੋ ਪੁਗ੍ਗਲੋ ਆਰਭਤਿ ਚ ਵਿਪ੍ਪਟਿਸਾਰੀ ਚ ਹੋਤਿ, ਤਞ੍ਚ ਚੇਤੋਵਿਮੁਤ੍ਤਿਂ ਪਞ੍ਞਾਵਿਮੁਤ੍ਤਿਂ ਯਥਾਭੂਤਂ ਨਪ੍ਪਜਾਨਾਤਿ. ਯਤ੍ਥਸ੍ਸ ਤੇ ਉਪ੍ਪਨ੍ਨਾ ਪਾਪਕਾ ਅਕੁਸਲਾ ਧਮ੍ਮਾ ਅਪਰਿਸੇਸਾ ਨਿਰੁਜ੍ਝਨ੍ਤਿ, ਅਤ੍ਥੇਕਚ੍ਚੋ ਪੁਗ੍ਗਲੋ ਆਰਭਤਿ ਨ ਵਿਪ੍ਪਟਿਸਾਰੀ ਚ ਹੋਤਿ…ਪੇ… ਅਪਰਿਸੇਸਾ ਨਿਰੁਜ੍ਝਨ੍ਤਿ, ਅਤ੍ਥੇਕਚ੍ਚੋ ਪੁਗ੍ਗਲੋ ਨਾਰਭਤਿ ਵਿਪ੍ਪਟਿਸਾਰੀ ਚ ਹੋਤਿ…ਪੇ… ਅਪਰਿਸੇਸਾ ਨਿਰੁਜ੍ਝਨ੍ਤਿ. ਅਤ੍ਥੇਕਚ੍ਚੋ ਪੁਗ੍ਗਲੋ ਨਾਰਭਤਿ ਨ ਵਿਪ੍ਪਟਿਸਾਰੀ ਹੋਤਿ…ਪੇ… ਅਪਰਿਸੇਸਾ ਨਿਰੁਜ੍ਝਨ੍ਤੀ’’ਤਿਆਦਿਨਾ ਪਞ੍ਚਕਞ੍ਚ ਵਿਤ੍ਥਾਰਤੋ ਮਾਤਿਕਂ ਨਿਕ੍ਖਿਪਿਤ੍ਵਾ ਸਬ੍ਬੇਪਿ ਤੇ ਪੁਗ੍ਗਲਾ ਨਿਦ੍ਦਿਟ੍ਠਾ, ਇਧ ਪਨ ਤੇ ਗਨ੍ਥਵਿਤ੍ਥਾਰਭਯੇਨ ਸਬ੍ਬੇ ਨ ਉਦ੍ਦਿਟ੍ਠਾ, ਪਾਲ਼ਿਯਾ ਏਵ ਞਾਤਬ੍ਬਾਤਿ.

ਤਤ੍ਥ ਤਿਕੇ ਨਿਰਾਸੋਤਿ ਅਰਹਤ੍ਤਾਸਾਯ ਵਿਰਹਿਤੋ ਦੁਸ੍ਸੀਲੋ. ਤਸ੍ਸ ਹਿ ਅਤ੍ਤਨੋ ਅਭਬ੍ਬਤਾਯ ਭਬ੍ਬਸਹਾਯਕਸ੍ਸ ਸੀਲਵਤੋ ਅਰਹਤ੍ਤਪ੍ਪਤ੍ਤਿਂ ਸੁਤ੍ਵਾ, ਚਣ੍ਡਾਲਪੁਤ੍ਤਸ੍ਸ ਵਿਯ ਕਸ੍ਸਚਿ ਰਾਜਪੁਤ੍ਤਸ੍ਸ ਰਜ੍ਜਾਭਿਸੇਕਂ ਸੁਤ੍ਵਾ ਅਭਿਸੇਕਪ੍ਪਤ੍ਤਿਯਂ, ‘‘ਕੁਦਾਸ੍ਸੁ ਨਾਮਾਹਮ੍ਪਿ ਅਰਹਤ੍ਤਂ ਪਾਪੁਣੇਯ੍ਯ’’ਨ੍ਤਿ ਅਰਹਤ੍ਤਪ੍ਪਤ੍ਤਿਯਂ ਪਤ੍ਥਨਾਪਿ ਨ ਉਪ੍ਪਜ੍ਜਤਿ. ਆਸਂਸੋਤਿ ਅਰਹਤ੍ਤਂ ਆਸੀਸਮਾਨੋ ਪਤ੍ਥਯਮਾਨੋ ਸੀਲਵਾ. ਤਸ੍ਸ ਹਿ ਅਰਹਤ੍ਤਪਤ੍ਥਨਾਯ ਸੀਲਸਮ੍ਪਤ੍ਤਿਯਾ ਠਿਤਤ੍ਤਾ ਕਸ੍ਸਚਿ ਅਰਹਤ੍ਤਪ੍ਪਤ੍ਤਿਂ ਸੁਤ੍ਵਾ, ਉਭਤੋਸੁਜਾਤਸ੍ਸ ਰਾਜਕੁਮਾਰਸ੍ਸ ਵਿਯ ਤਾਦਿਸਸ੍ਸ ਕਸ੍ਸਚਿ ਰਜ੍ਜਾਭਿਸੇਕਂ ਸੁਤ੍ਵਾ ਅਭਿਸੇਕਪ੍ਪਤ੍ਤਿਯਂ, ਅਰਹਤ੍ਤਪ੍ਪਤ੍ਤਿਯਂ ਪਤ੍ਥਨਾ ਉਪ੍ਪਜ੍ਜਤਿ. ਵਿਗਤਾਸੋਤਿ ਅਰਹਾ. ਸੋ ਹਿ ਪਤ੍ਤਅਰਹਤ੍ਤਤਾਯ ਤਤ੍ਥ ਵਿਗਤਾਸੋ ਹੋਤਿ ਪਤ੍ਤਾਭਿਸੇਕੋ ਵਿਯ ਖਤ੍ਤਿਯੋ ਅਭਿਸੇਕਪ੍ਪਤ੍ਤਿਯਨ੍ਤਿ ਵੇਦਿਤਬ੍ਬਂ.

ਚਤੁਕ੍ਕੇ ਪਨ ਪਾਣਾਤਿਪਾਤਾਦਿਅਕੁਸਲਕਮ੍ਮਪਥਸਮਨ੍ਨਾਗਤੋ ਅਸਪ੍ਪੁਰਿਸੋ ਨਾਮ. ਯੋ ਪਨ ਸਯਮ੍ਪਿ ਪਾਣਾਤਿਪਾਤਾਦੀਨਿ ਕਤ੍ਵਾ ਪਰਞ੍ਚ ਤਤ੍ਥ ਸਮਾਦਪੇਤਿ, ਅਯਂ ਅਸਪ੍ਪੁਰਿਸੇਨਅਸਪ੍ਪੁਰਿਸਤਰੋ, ਅਸਪ੍ਪੁਰਿਸਤੋਪਿ ਅਸਪ੍ਪੁਰਿਸਤਰੋਤਿ ਅਤ੍ਥੋ. ਵੁਤ੍ਤਪਟਿਪਕ੍ਖਕੁਸਲਵਸੇਨ ਸਪ੍ਪੁਰਿਸੋ, ਸਪ੍ਪੁਰਿਸੇਨਸਪ੍ਪੁਰਿਸਤਰੋ ਚ ਵੇਦਿਤਬ੍ਬੋ.

ਪਞ੍ਚਕੇ ਆਰਭਤਿ ਚ ਵਿਪ੍ਪਟਿਸਾਰੀ ਚ ਹੋਤੀਤਿ ਏਤ੍ਥ ਆਰਮ੍ਭ-ਸਦ੍ਦੋ ਆਪਤ੍ਤਿਵੀਤਿਕ੍ਕਮੇ ਵਤ੍ਤਤਿ, ਤਸ੍ਮਾ ਆਪਤ੍ਤਿਵੀਤਿਕ੍ਕਮਵਸੇਨ ਆਰਭਤਿ ਚੇਵ ਤਪ੍ਪਚ੍ਚਯਾ ਚ ਵਿਪ੍ਪਟਿਸਾਰੀ ਹੋਤੀਤਿ ਅਤ੍ਥੋ. ਚੇਤੋਵਿਮੁਤ੍ਤਿਨ੍ਤਿ ਫਲਸਮ੍ਪਯੁਤ੍ਤਸਮਾਧਿਂ. ਪਞ੍ਞਾਵਿਮੁਤ੍ਤਿਨ੍ਤਿ ਫਲਸਮ੍ਪਯੁਤ੍ਤਞਾਣਂ. ਯਥਾਭੂਤਂ ਨਪ੍ਪਜਾਨਾਤੀਤਿ ਅਨਧਿਗਤਤ੍ਤਾ ਯਥਾਸਭਾਵਤੋ ਨਪ੍ਪਜਾਨਾਤਿ. ਯਤ੍ਥਸ੍ਸਾਤਿ ਯਸ੍ਮਿਂ ਅਰਹਤ੍ਤਫਲਸਙ੍ਖਾਤੇ ਝਾਨੇ ਅਧਿਗਤੇ ਅਸ੍ਸ ਪੁਗ੍ਗਲਸ੍ਸ ਸਬ੍ਬੇ ਪਾਪਕਾ ਅਕੁਸਲਾ ਧਮ੍ਮਾ ਨਿਰਵਸੇਸਾ ਨਿਰੁਜ੍ਝਨ੍ਤਿ, ਤੇ ਨਪ੍ਪਜਾਨਾਤੀਤਿ ਸਮ੍ਬਨ੍ਧੋ. ਕਿਞ੍ਚਾਪਿ ਤੇ ਮਗ੍ਗਕ੍ਖਣੇ ਏਵ ਨਿਰੁਜ੍ਝਨ੍ਤਿ ਨਾਮ, ਫਲਕ੍ਖਣੇ ਪਨ ਨਿਰੁਦ੍ਧਾ ਨਾਮ ਹੋਨ੍ਤਿ, ਇਧ ਪਨ ਮਗ੍ਗਕਿਚ੍ਚਵਸੇਨ ‘‘ਫਲਕ੍ਖਣੇ ਨਿਰੁਜ੍ਝਨ੍ਤੀ’’ਤਿ ਵੁਤ੍ਤਾਤਿ ਵੇਦਿਤਬ੍ਬਾ.

ਆਰਭਤਿ ਨ ਵਿਪ੍ਪਟਿਸਾਰੀ ਚ ਹੋਤੀਤਿ ਆਪਤ੍ਤਿਂ ਆਪਜ੍ਜਤਿ, ਤਂ ਪਨ ਦੇਸੇਤੁਂ ਸਭਾਗਪੁਗ੍ਗਲਂ ਪਰਿਯੇਸਤਿ, ਵੁਟ੍ਠਾਪੇਤਿ ਵਾ, ਤਸ੍ਮਾ ਨ ਵਿਪ੍ਪਟਿਸਾਰੀ ਹੋਤਿ. ਨਾਰਭਤਿ ਵਿਪ੍ਪਟਿਸਾਰੀ ਚ ਹੋਤੀਤਿ ਆਪਤ੍ਤਿਂ ਨਾਪਜ੍ਜਤਿ, ਵਿਨਯਪਞ੍ਞਤ੍ਤਿਯਂ ਪਨ ਅਕੋਵਿਦਤ੍ਤਾ ਅਨਾਪਤ੍ਤਿਯਾ ਆਪਤ੍ਤਿਸਞ੍ਞਿਤਾਯ ਵੁਟ੍ਠਿਤਾਯਪਿ ਤਂ ਆਪਤ੍ਤਿਯਾ ਵਿਪ੍ਪਟਿਸਾਰਂ ਵਿਨੋਦੇਤੁਂ ਅਸਕ੍ਕੁਣੇਯ੍ਯਤਾਯ ਵਿਪ੍ਪਟਿਸਾਰੀ ਹੋਤਿ. ਨਾਰਭਤਿ ਨ ਵਿਪ੍ਪਟਿਸਾਰੀ ਹੋਤੀਤਿ ਨਾਰਭਤਿ ਨੇਵ ਆਪਤ੍ਤਿਂ ਆਪਜ੍ਜਤਿ, ਨ ਵਿਪ੍ਪਟਿਸਾਰੀ ਹੋਤਿ. ਅਰਹਤ੍ਤਞ੍ਚ ਨ ਪਾਪੁਣਾਤਿ. ਕਤਰੋ ਪਨੇਸ ਪੁਗ੍ਗਲੋਤਿ? ਸੀਲਵਾ ਓਸ੍ਸਟ੍ਠਵੀਰਿਯੋ ਪੁਗ੍ਗਲੋ. ਸੋ ਹਿ ‘‘ਕਿਂ ਮੇ ਇਮਸ੍ਮਿਂ ਬੁਦ੍ਧਕਾਲੇ ਪਰਿਨਿਬ੍ਬਾਨੇਨ, ਅਨਾਗਤੇ ਮੇਤ੍ਤੇਯ੍ਯਸਮ੍ਮਾਸਮ੍ਬੁਦ੍ਧਕਾਲੇ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਵਿਸੁਦ੍ਧਸੀਲੋਪਿ ਪਟਿਪਤ੍ਤਿਂ ਨ ਪੂਰੇਤਿ. ਇਮੇ ਚਤ੍ਤਾਰੋਪਿ ਪੁਗ੍ਗਲਾ ਤਥਾ ਤਥਾ ਓਵਦਿਤ੍ਵਾ ਆਸਵਕ੍ਖਯੇ ਪਤਿਟ੍ਠਾਪੇਤਬ੍ਬਾ. ਏਵਂ ਹਿ ਤੇਪਿ ਯ੍ਵਾਯਂ ਪਞ੍ਚਮੋ ਪੁਗ੍ਗਲੋ ਨਾਰਭਤਿ ਨ ਵਿਪ੍ਪਟਿਸਾਰੀ ਆਰਦ੍ਧਵੀਰਿਯੋ ਅਰਹਤ੍ਤਂ ਪਾਪੁਣਾਤਿ, ਤੇਨ ਸਮਸਮਾਵ ਭਵਿਸ੍ਸਨ੍ਤੀਤਿ.

ਛਕ੍ਕਾਦੀਸੁ –

‘‘ਛ ਪੁਗ੍ਗਲਾ – ਅਤ੍ਥੇਕਚ੍ਚੋ ਪੁਗ੍ਗਲੋ ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਸਾਮਂ ਸਚ੍ਚਾਨਿ ਅਭਿਸਮ੍ਬੁਜ੍ਝਤਿ, ਤਤ੍ਥ ਚ ਸਬ੍ਬਞ੍ਞੁਤਂ ਪਾਪੁਣਾਤਿ ਬਲੇਸੁ ਚ ਵਸੀਭਾਵਂ. ਅਤ੍ਥੇਕਚ੍ਚੋ ਪੁਗ੍ਗਲੋ…ਪੇ… ਅਭਿਸਮ੍ਬੁਜ੍ਝਤਿ, ਨ ਚ ਤਤ੍ਥ ਸਬ੍ਬਞ੍ਞੁਤਂ ਪਾਪੁਣਾਤਿ, ਨ ਚ ਬਲੇਸੁ ਵਸਿਭਾਵਂ. ਅਤ੍ਥੇਕਚ੍ਚੋ ਪੁਗ੍ਗਲੋ…ਪੇ… ਅਨਭਿਸਮ੍ਬੁਜ੍ਝਤਿ, ਦਿਟ੍ਠੇਵ ਧਮ੍ਮੇ ਦੁਕ੍ਖਸ੍ਸਨ੍ਤਕਰੋ ਹੋਤਿ, ਸਾਵਕਪਾਰਮਿਞ੍ਚ ਪਾਪੁਣਾਤਿ. ਅਤ੍ਥੇਕਚ੍ਚੋ ਪੁਗ੍ਗਲੋ…ਪੇ… ਦੁਕ੍ਖਸ੍ਸਨ੍ਤਕਰੋ ਹੋਤਿ, ਨ ਚ ਸਾਵਕਪਾਰਮਿਂ ਪਾਪੁਣਾਤਿ. ਅਤ੍ਥੇਕਚ੍ਚੋ ਪੁਗ੍ਗਲੋ…ਪੇ… ਅਨਭਿਸਮ੍ਬੁਜ੍ਝਤਿ, ਨ ਚ ਦਿਟ੍ਠੇਵ ਧਮ੍ਮੇ ਦੁਕ੍ਖਸ੍ਸਨ੍ਤਕਰੋ ਹੋਤਿ, ਅਨਾਗਾਮੀ ਹੋਤਿ ਅਨਾਗਨ੍ਤਾ ਇਤ੍ਥਤ੍ਤਂ. ਅਤ੍ਥੇਕਚ੍ਚੋ ਪੁਗ੍ਗਲੋ…ਪੇ… ਅਨਭਿਸਮ੍ਬੁਜ੍ਝਤਿ, ਨ ਚ ਦਿਟ੍ਠੇਵ ਧਮ੍ਮੇ ਦੁਕ੍ਖਸ੍ਸਨ੍ਤਕਰੋ ਹੋਤਿ, ਆਗਾਮੀ ਹੋਤਿ ਆਗਨ੍ਤਾ ਇਤ੍ਥਤ੍ਤ’’ਨ੍ਤਿ –

ਛਕ੍ਕਂ, ‘‘ਸਤ੍ਤ ਪੁਗ੍ਗਲਾ – ਸਤ੍ਤ ਉਦਕੂਪਮਾ ਪੁਗ੍ਗਲਾ ਸਕਿਂ ਨਿਮੁਗ੍ਗੋ ਨਿਮੁਗ੍ਗੋਵ ਹੋਤਿ, ਉਮ੍ਮੁਜ੍ਜਿਤ੍ਵਾ ਨਿਮੁਜ੍ਜਤਿ, ਉਮ੍ਮੁਜ੍ਜਿਤ੍ਵਾ ਠਿਤੋ ਹੋਤਿ, ਉਮ੍ਮੁਜ੍ਜਿਤ੍ਵਾ ਵਿਪਸ੍ਸਤਿ ਵਿਲੋਕੇਤਿ, ਉਮ੍ਮੁਜ੍ਜਿਤ੍ਵਾ ਪਤਰਤਿ, ਉਮ੍ਮੁਜ੍ਜਿਤ੍ਵਾ ਪਟਿਗਾਧਪ੍ਪਤ੍ਤੋ ਹੋਤਿ, ਉਮ੍ਮੁਜ੍ਜਿਤ੍ਵਾ ਤਿਣ੍ਣੋ ਹੋਤਿ ਪਾਰਙ੍ਗਤੋ, ਥਲੇ ਤਿਟ੍ਠਤਿ ਬ੍ਰਾਹ੍ਮਣੋ’’ਤਿਆਦਿਨਾ ਸਤ੍ਤਕਂ, ‘‘ਅਟ੍ਠ ਪੁਗ੍ਗਲਾ – ਚਤ੍ਤਾਰੋ ਮਗ੍ਗਸਮਙ੍ਗਿਨੋ, ਚਤ੍ਤਾਰੋ ਫਲਸਮਙ੍ਗਿਨੋ ਪੁਗ੍ਗਲਾ’’ਤਿ ਅਟ੍ਠਕਂ, ‘‘ਨਵ ਪੁਗ੍ਗਲਾ – ਸਮ੍ਮਾਸਮ੍ਬੁਦ੍ਧੋ ਪਚ੍ਚੇਕਸਮ੍ਬੁਦ੍ਧੋ ਉਭਤੋਭਾਗਵਿਮੁਤ੍ਤੋ ਪਞ੍ਞਾਵਿਮੁਤ੍ਤੋ ਕਾਯਸਕ੍ਖੀ ਦਿਟ੍ਠਿਪ੍ਪਤ੍ਤੋ ਸਦ੍ਧਾਵਿਮੁਤ੍ਤੋ ਧਮ੍ਮਾਨੁਸਾਰੀ ਸਦ੍ਧਾਨੁਸਾਰੀ’’ਤਿ ਨਵਕਂ, ‘‘ਦਸ ਪੁਗ੍ਗਲਾ – ਪਞ੍ਚਨ੍ਨਂ ਇਧ ਨਿਟ੍ਠਾ, ਪਞ੍ਚਨ੍ਨਂ ਇਧ ਵਿਹਾਯ ਨਿਟ੍ਠਾ’’ਤਿ ਦਸਕਞ੍ਚ ਮਾਤਿਕਂ ਨਿਕ੍ਖਿਪਿਤ੍ਵਾ ਪਾਲ਼ਿਯਂ ਨਿਦ੍ਦੇਸੋ ਕਤੋ. ਤਤ੍ਥ ਛਕ੍ਕੇ ਪਠਮੇਨ ਪਦੇਨ ਸਮ੍ਮਾਸਮ੍ਬੁਦ੍ਧੋ ਦਟ੍ਠਬ੍ਬੋ. ਸੋ ਹਿ ਅਨਾਚਰਿਯਕੋ ਅਤ੍ਤਨਾ ਉਪ੍ਪਾਦਿਤੇਨ ਸਬ੍ਬਞ੍ਞੁਤਞ੍ਞਾਣਪਦਟ੍ਠਾਨੇਨ ਅਰਹਤ੍ਤਮਗ੍ਗਞਾਣੇਨ ਸਬ੍ਬਾਕਾਰਤੋ ਸਚ੍ਚਾਨਿ ਅਭਿਸਮ੍ਬੁਜ੍ਝਿਤ੍ਵਾ ਸਬ੍ਬਞ੍ਞੁਤਂ ਪਾਪੁਣਿ, ਦਸਞਾਣਬਲੇਸੁ ਚ ਵਸਿਭਾਵਨ੍ਤਿ. ਦੁਤਿਯੇਨ ਪਨ ਪਚ੍ਚੇਕਸਮ੍ਬੁਦ੍ਧੋ ਦਟ੍ਠਬ੍ਬੋ. ਤਤਿਯੇਨ ਅਗ੍ਗਸਾਵਕੋ, ਚਤੁਤ੍ਥੇਨ ਅਵਸੇਸਾ ਅਰਹਨ੍ਤੋ, ਪਞ੍ਚਮੇਨ ਅਨਾਗਾਮੀ, ਛਟ੍ਠੇਨ ਸੋਤਾਪਨ੍ਨਸਕਦਾਗਾਮਿਨੋ ਦਟ੍ਠਬ੍ਬਾ. ਤੇ ਹਿ ‘‘ਆਗਨ੍ਤਾ ਇਤ੍ਥਤ੍ਤ’’ਨ੍ਤਿ ਵੁਤ੍ਤਾਤਿ.

ਸਤ੍ਤਕੇ ਪਠਮੇਨ ਪਦੇਨ ਸਾਸਨੇ ਅਨਿਵਿਟ੍ਠਸਦ੍ਧੋ ਨਿਯਤਮਿਚ੍ਛਾਦਿਟ੍ਠਿਧਮ੍ਮੇਹਿ ਏਕਨ੍ਤਕਾਲ਼ਕੇਹਿ ਸਮਨ੍ਨਾਗਤੋ ਗਹਿਤੋ. ਸੋ ਹਿ ਸਮੁਦ੍ਦੇ ਉਦਕਭੀਰੁਕਪੁਰਿਸੋ ਵਿਯ ਸਂਸਾਰੇ ਅਪਾਯੇ ਨਿਮੁਗ੍ਗੋ ਨਿਮੁਗ੍ਗੋਵ ਹੋਤਿ, ਨ ਪੁਨ ਭਵਤੋ ਵੁਟ੍ਠਾਤਿ, ਅਨਨ੍ਤਮ੍ਪਿ ਕਾਲਂ ਭਵੇ ਏਵ ਵਿਚਰਤਿ ਸਾਸਨਸਮਾਯੋਗਾਭਾਵਾ. ਦੁਤਿਯੇਨ ਪਦੇਨ ਸਾਸਨੇ ਪਟਿਲਦ੍ਧਸਦ੍ਧੋਪਿ ਦੇਵਦਤ੍ਤਾਦਯੋ ਵਿਯ ਸਦ੍ਧਾਦਿਪਰਿਹਾਨਿਯਂ ਠਿਤੋ ਦੁਸ੍ਸੀਲੋ ਗਹਿਤੋ. ਸੋ ਹਿ ਸਮੁਦ੍ਦੇ ਕੇਨਚਿ ਕਾਰਣੇਨ ਉਮ੍ਮੁਜ੍ਜਿਤ੍ਵਾ ਪੁਨ ਨਿਮੁਗ੍ਗੋ ਵਿਯ ਸਾਸਨਸਦ੍ਧਾਯ ਉਮ੍ਮੁਜ੍ਜਿਤ੍ਵਾਪਿ ਅਪਾਯੇ ਨਿਮੁਜ੍ਜਤਿ ਏਵ, ਅਯਂ ਪਨ ਚਿਰਕਾਲਾਤਿਕ੍ਕਮੇਨ ਬੁਦ੍ਧਾਦੀਹਿ, ਅਤ੍ਤਨਾ ਏਵ ਵਾ ਪਚ੍ਚੇਕਬੋਧਿਞਾਣੇਨ ਭਵਤੋ ਉਦ੍ਧਰਣੀਯੋ ਹੋਤਿ ਸਾਸਨੇ ਸਕਿਂ ਉਪ੍ਪਨ੍ਨਾਯਪਿ ਸਦ੍ਧਾਯ ਮੋਕ੍ਖਭਾਵੇਨ ਨਿਯਮੇਨ ਨਿਬ੍ਬਾਨਾਵਹਤ੍ਤਾ. ਅਯਮੇਵ ਹਿਸ੍ਸ ਪੁਰਿਮਪੁਗ੍ਗਲਤੋ ਵਿਸੇਸੋ, ਇਤਰਥਾ ਤਸ੍ਸ ਵਿਸੁਂ ਗਹਣੇ ਪਯੋਜਨਮੇਵ ਨ ਸਿਯਾਤਿ ਗਹੇਤਬ੍ਬਂ. ਤਤਿਯੇਨ ਸਾਸਨੇ ਉਪ੍ਪਨ੍ਨਸਦ੍ਧੋ ਠਿਤਿਭਾਗਿਯੇਹਿ ਸੀਲਾਦਿਗੁਣੇਹਿ ਸਮਨ੍ਨਾਗਤੋ ਗਹਿਤੋ. ਸੋ ਹਿ ਉਮ੍ਮੁਜ੍ਜਿਤ੍ਵਾ ਤੀਰਂ ਅਦਿਸ੍ਵਾਵ ਸਮੁਦ੍ਦਮਜ੍ਝੇ ਨਾਵਾਦਿਆਗਮਨਂ ਓਲੋਕੇਨ੍ਤੋ ਪੁਨ ਅਨਿਮੁਜ੍ਜਿਤ੍ਵਾ ਉਣ੍ਣਤਪ੍ਪਦੇਸੇ ਠਿਤੋ ਵਿਯ ਸਾਸਨਸਦ੍ਧਾਯ ਉਮ੍ਮੁਜ੍ਜਿਤ੍ਵਾ ਨਿਬ੍ਬਾਨਂ ਅਦਿਸ੍ਵਾਵ ਬੁਦ੍ਧਾਦਿਂ ਓਲੋਕਯਮਾਨੋ ਸਗ੍ਗੇ, ਸੀਲਾਦਿਮ੍ਹਿ ਠਿਤੋ ਹੋਤਿ. ਚਤੁਤ੍ਥੇਨ ਪਨ ਸੋਤਾਪਨ੍ਨੋ ਗਹਿਤੋ. ਸੋ ਹਿ ਉਮ੍ਮੁਜ੍ਜਿਤ੍ਵਾ ਠਿਤੋ ਤੀਰਂ ਦਿਸ੍ਵਾ ਉਤ੍ਤਰਣੂਪਾਯਂ ਵਿਲੋਕਯਮਾਨੋ ਵਿਯ ਲੋਕੁਤ੍ਤਰਸਦ੍ਧਾਯ ਉਮ੍ਮੁਜ੍ਜਿਤ੍ਵਾ ਨਿਬ੍ਬਾਨਤੀਰਂ ਦਿਸ੍ਵਾ ਉਤ੍ਤਰਣੋਪਾਯਂ ਵਿਲੋਕੇਤਿ. ਪਞ੍ਚਮੇਨ ਸਕਦਾਗਾਮੀ ਗਹਿਤੋ. ਸੋ ਹਿ ਸਮੁਦ੍ਦੇ ਤੀਰਂ ਦਿਸ੍ਵਾ ਤਦਭਿਮੁਖਂ ਪਤਰਮਾਨੋ ਵਿਯ ਪਠਮਮਗ੍ਗੇਨ ਨਿਬ੍ਬਾਨਤੀਰਂ ਦਿਸ੍ਵਾ ਤਦਭਿਮੁਖਂ ਦੁਤਿਯਮਗ੍ਗੇਨ ਪਤਰਤਿ ਨਾਮ. ਛਟ੍ਠੇਨ ਅਨਾਗਾਮੀ ਗਹਿਤੋ. ਸੋ ਹਿ ਪਤਰਿਤ੍ਵਾ ਤੀਰਂ ਉਪਗ੍ਗਮ੍ਮ ਕਟਿਪ੍ਪਮਾਣੇ ਉਦਕੇ ਠਿਤੋ ਵਿਯ ਅਰਹਤ੍ਤਸਮੀਪੇ ਸਤਿਕਵਾਟਪਤਿਤ੍ਥੇ ਅਨਾਵਤ੍ਤਿਧਮ੍ਮਤਾਯ ਤਤਿਯਮਗ੍ਗੇਨ ਤਿਟ੍ਠਤਿ. ਸਤ੍ਤਮੇਨ ਪਨ ਅਰਹਾ ਗਹਿਤੋ, ਸੋ ਹਿ ਤਰਿਤ੍ਵਾ ਪਾਰਂ ਪਤ੍ਵਾ ਠਿਤਪੁਰਿਸੋ ਵਿਯ ਚਤ੍ਤਾਰੋ ਓਘੇ ਤਰਿਤ੍ਵਾ ਨਿਬ੍ਬਾਨਤ੍ਥਲੇ ਠਿਤੋ ਖੀਣਾਸਵਬ੍ਰਾਹ੍ਮਣੋ ਨਾਮ ਹੋਤੀਤਿ.

ਨਵਕੇ ਉਭਤੋਭਾਗਵਿਮੁਤ੍ਤੋਤਿ ਰੂਪਾਰੂਪਸਮਾਪਤ੍ਤਿਯਾ ਵਿਕ੍ਖਮ੍ਭਨਵਿਮੋਕ੍ਖੇਨ, ਅਰਿਯਮਗ੍ਗੇਨ ਸਮੁਚ੍ਛੇਦਵਿਮੋਕ੍ਖੇਨ ਕਿਲੇਸਤੋ ਵਿਮੁਤ੍ਤੋ, ਅਰੂਪਸਮਾਪਤ੍ਤਿਯਾ ਵਾ ਰੂਪਕਾਯਤੋ, ਮਗ੍ਗੇਨ ਚ ਨਾਮਕਾਯਤੋਤਿ ਇਮੇਹਿ ਉਭਤੋਭਾਗੇਹਿ ਵਿਮੁਤ੍ਤੋਤਿਪਿ ਉਭਤੋਭਾਗਵਿਮੁਤ੍ਤੋ, ਸੋ ਚਤੁਨ੍ਨਂ ਅਰੂਪਸਮਾਪਤ੍ਤੀਨਂ ਏਕੇਕਤੋ ਵੁਟ੍ਠਾਯ ਸਙ੍ਖਾਰੇ ਸਮ੍ਮਸਿਤ੍ਵਾ ਅਰਹਤ੍ਤਪ੍ਪਤ੍ਤਾਨਂ ਚਤੁਨ੍ਨਂ, ਨਿਰੋਧਾ ਵੁਟ੍ਠਾਯ ਅਰਹਤ੍ਤਪ੍ਪਤ੍ਤਅਨਾਗਾਮਿਨੋ ਚ ਵਸੇਨ ਪਞ੍ਚਵਿਧੋ, ਤੇਸੁ ਪਚ੍ਛਿਮੋਵ ਨਿਪ੍ਪਰਿਯਾਯਤੋ ਉਭਤੋਭਾਗਵਿਮੁਤ੍ਤੋ ਨਾਮ, ਸੇਸਾ ਪਰਿਯਾਯੇਨ. ਏਤ੍ਥ ਚ ਰੂਪਾਵਚਰਚਤੁਤ੍ਥਜ੍ਝਾਨਂ ਕਿਲੇਸਕਾਯਤੋ ਵਿਮੁਤ੍ਤਮ੍ਪਿ ਰੂਪਕਾਯਤੋ ਅਵਿਮੁਤ੍ਤਂ, ਅਰੂਪਾਵਚਰਂ ਪਨ ਤਦਭਯਤੋਪਿ ਵਿਮੁਤ੍ਤਂ, ਤਸ੍ਮਾ ਤਦੇਵ ਪਾਦਕਂ ਕਤ੍ਵਾ ਅਰਹਤ੍ਤਪ੍ਪਤ੍ਤੋਵ ਉਭਤੋਭਾਗਵਿਮੁਤ੍ਤੋ ਹੋਤਿ, ਨ ਰੂਪਾਵਚਰਨ੍ਤਿ ਵੇਦਿਤਬ੍ਬਂ. ਪਞ੍ਞਾਵਿਮੁਤ੍ਤੋਤਿ ਅਰਹਤ੍ਤਮਗ੍ਗਪਞ੍ਞਾਯ ਆਸਵੇਹਿ ਵਿਮੁਤ੍ਤੋ. ਸੋ ਹਿ ਸੁਕ੍ਖਵਿਪਸ੍ਸਕੋ, ਚਤੂਹਿ ਰੂਪਾਵਚਰਜ੍ਝਾਨੇਹਿ ਵੁਟ੍ਠਾਯ ਅਰਹਤ੍ਤਪ੍ਪਤ੍ਤਾ ਚਤ੍ਤਾਰੋ ਚਾਤਿ ਪਞ੍ਚਵਿਧੋ. ਅਰੂਪਾਵਚਰਜ੍ਝਾਨੇਸੁ ਹਿ ਏਕਸ੍ਮਿਮ੍ਪਿ ਸਤਿ ਉਭਤੋਭਾਗਵਿਮੁਤ੍ਤੋਵ ਨਾਮ ਹੋਤਿ.

ਕਾਯਸਕ੍ਖੀਤਿ ਰੂਪਾਰੂਪਜ੍ਝਾਨਲਾਭੀ ਅਰਿਯੋ. ਸੋ ਹਿ ਸੋਤਾਪਤ੍ਤਿਮਗ੍ਗਟ੍ਠਵਜ੍ਜਿਤਾਨਂ ਛਨ੍ਨਂ ਸੇਖਾਨਂ ਵਸੇਨ ਛਬ੍ਬਿਧੋ. ਤੇਨੇਵ ਹਿਸ੍ਸ ‘‘ਏਕਚ੍ਚੇ ਆਸਵਾ ਪਰਿਕ੍ਖੀਣਾ’’ਤਿ ਨਿਦ੍ਦੇਸੇ ਵੁਤ੍ਤਂ. ਸੋਤਾਪਤ੍ਤਿਮਗ੍ਗਟ੍ਠਸ੍ਸ ਚ ਨ ਕੇਚਿਪਿ ਆਸਵਾ ਪਰਿਕ੍ਖੀਣਾਤਿ ਵਤ੍ਤਬ੍ਬਾ, ਪਰਿਕ੍ਖੀਯਿਸ੍ਸਨ੍ਤੀਤਿ ਪਨ ਵਤ੍ਤਬ੍ਬਾ, ਅਰਹਤੋ ਪਨ ਸਬ੍ਬੇਪਿ ਆਸਵਾ ਪਰਿਕ੍ਖੀਣਾ, ਨ ਏਕਚ੍ਚੇਤਿ. ਸੋ ਹਿ ਫੁਟ੍ਠਨ੍ਤਂ ਸਚ੍ਛਿਕਰੋਤੀਤਿ ਕਾਯਸਕ੍ਖੀ, ਫੁਟ੍ਠਾਨਂ ਪਟਿਲਦ੍ਧਾਨਂ ਝਾਨਾਨਂ ਅਨਨ੍ਤਰਂ ਨਾਮਕਾਯੇਨ ਨਿਰੋਧਂ ਸਚ੍ਛਿਕਰੋਤੀਤਿਪਿ ਕਾਯਸਕ੍ਖੀ, ਕਾਯੇਨਾਤਿ ਚੇਤ੍ਥ ‘‘ਨਾਮਕਾਯੇਨ ਚੇਵ ਪਰਮਤ੍ਥਸਚ੍ਚਂ ਸਚ੍ਛਿਕਰੋਤਿ, ਪਞ੍ਞਾਯ ਚ ਅਤਿਵਿਜ੍ਝ ਪਸ੍ਸਤੀ’’ਤਿ ਵਚਨਤੋ ਅਰਹਤ੍ਤਫਲਂ ਠਪੇਤ੍ਵਾ ਸੇਸਮਗ੍ਗਫਲਾਨਮੇਤਂ ਅਧਿਵਚਨਂ, ਤੇਨ ਕਾਯੇਨ ਪਠਮਜ੍ਝਾਨਾਨਨ੍ਤਰਂ ਨਿਬ੍ਬਾਨਸ੍ਸ ਸਚ੍ਛਿਕਰਣਤੋਪਿ ਕਾਯਸਕ੍ਖੀਤਿ ਕੇਚਿ. ਦਿਟ੍ਠਿਪ੍ਪਤ੍ਤੋਤਿ ਸੁਕ੍ਖਵਿਪਸ੍ਸਕੋ, ਰੂਪਜ੍ਝਾਨਲਾਭੀ ਚ ਯਥਾਵੁਤ੍ਤੋ ਛਬ੍ਬਿਧੋ ਸੇਖੋ ਚ, ਅਯਂ ਦਿਟ੍ਠਨ੍ਤਪ੍ਪਤ੍ਤੋਤਿ ਦਿਟ੍ਠਿਪ੍ਪਤ੍ਤੋ. ਦਸ੍ਸਨਂ ਦਿਟ੍ਠਿ, ਪਠਮਮਗ੍ਗੋ, ਤਸ੍ਸ ਅਨਨ੍ਤਰਂ ਨਿਰੋਧਪ੍ਪਤ੍ਤੋਤਿ ਅਤ੍ਥੋ. ਦਿਟ੍ਠਪ੍ਪਤ੍ਤੋਤਿਪਿ ਪਾਠੋ, ਤਸ੍ਸ ਪਠਮਮਗ੍ਗੇਨ ਦਿਟ੍ਠਂ ਨਿਬ੍ਬਾਨਂ ਪੁਨ ਪਤ੍ਤੋਤਿ ਅਤ੍ਥੋ.

ਸਦ੍ਧਾਵਿਮੁਤ੍ਤੋਤਿ ਸੁਕ੍ਖਵਿਪਸ੍ਸਕੋ, ਰੂਪਜ੍ਝਾਨਲਾਭੀ ਚ ਯਥਾਵੁਤ੍ਤੋ ਛਬ੍ਬਿਧੋ ਸੇਖੋ ਚ. ਅਯਂ ਹਿ ਸਦ੍ਦਹਨ੍ਤੋ ਵਿਮੁਤ੍ਤੋਤਿ ਸਦ੍ਧਾਵਿਮੁਤ੍ਤੋ. ਕਥਂ ਪਨੇਤਸ੍ਸ ਦਿਟ੍ਠਿਪ੍ਪਤ੍ਤਤੋ ਨਾਨਤ੍ਤਨ੍ਤਿ? ਆਗਮਨੀਯਪਟਿਪਦਾਯ. ਦਿਟ੍ਠਿਪ੍ਪਤ੍ਤੋ ਹਿ ਪਞ੍ਞਾਸਮ੍ਪਦਾਯ ਪੁਬ੍ਬਭਾਗੇ ਵਿਪਸ੍ਸਨਾਯ ਕਿਲੇਸੇ ਅਪ੍ਪਦੁਕ੍ਖੇਨ ਵਿਕ੍ਖਮ੍ਭੇਨ੍ਤੋ ਆਗਤੋ, ਸਦ੍ਧਾਵਿਮੁਤ੍ਤੋ ਪਨ ਸਦ੍ਧਾਬਹੁਲਤਾਯ ਕਿਲੇਸੇ ਦੁਕ੍ਖੇਨ ਵਿਕ੍ਖਮ੍ਭੇਨ੍ਤੋ ਆਗਤੋ. ਏਤਮੇਵ ਹਿ ਭੇਦਂ ਸਨ੍ਧਾਯ ਨਿਦ੍ਦੇਸੇ ‘‘ਏਕਚ੍ਚੇ ਆਸਵਾ ਪਰਿਕ੍ਖੀਣਾ ਹੋਨ੍ਤਿ, ਨੋ ਚ ਖੋ ਯਥਾਦਿਟ੍ਠਿਪ੍ਪਤ੍ਤਸ੍ਸਾ’’ਤਿ ਵੁਤ੍ਤਂ.

ਧਮ੍ਮਾਨੁਸਾਰੀਤਿ ਯਸ੍ਸ ਸੋਤਾਪਤ੍ਤਿਮਗ੍ਗਕ੍ਖਣੇ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ, ਅਯਂ ਪਞ੍ਞਾਸਙ੍ਖਾਤੇਨ ਧਮ੍ਮੇਨ ਸਰਤਿ ਅਨੁਸ੍ਸਰਤੀਤਿ ਧਮ੍ਮਾਨੁਸਾਰੀ, ਸੋਤਾਪਤ੍ਤਿਮਗ੍ਗਟ੍ਠਸ੍ਸੇਤਂ ਨਾਮਂ. ਫਲੇ ਪਨ ਪਤ੍ਤੇ ਦਿਟ੍ਠਿਪ੍ਪਤ੍ਤੋ ਨਾਮ ਹੋਤਿ. ਸਦ੍ਧਾਨੁਸਾਰੀਤਿ ਯਸ੍ਸ ਸੋਤਾਪਤ੍ਤਿਮਗ੍ਗਕ੍ਖਣੇ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ, ਅਯਂ ਸਦ੍ਧਾਯ ਸਰਤਿ ਅਨੁਸ੍ਸਰਤੀਤਿ ਸਦ੍ਧਾਨੁਸਾਰੀ, ਸੋਤਾਪਤ੍ਤਿਮਗ੍ਗਟ੍ਠਸ੍ਸੇਤਂ ਨਾਮਂ. ਫਲੇ ਪਨ ਪਤ੍ਤੇ ਸਦ੍ਧਾਵਿਮੁਤ੍ਤੋ ਨਾਮ ਹੋਤਿ.

ਲੋਕੁਤ੍ਤਰਧਮ੍ਮਂ ਹਿ ਨਿਬ੍ਬਤ੍ਤੇਨ੍ਤਾਨਂ ਦ੍ਵੇ ਧੁਰਾਨਿ ਨਾਮ, ਦ੍ਵੇ ਅਭਿਨਿਵੇਸਾ ਨਾਮ, ਦ੍ਵੇ ਸੀਸਾਨਿ ਨਾਮ. ਤਤ੍ਥ ਸਦ੍ਧਾਧੁਰਂ ਪਞ੍ਞਾਧੁਰਨ੍ਤਿ ਦ੍ਵੇ ਧੁਰਾਨਿ ਨਾਮ. ਏਕੋ ਪਨ ਸਮਥਾਭਿਨਿਵੇਸੋ, ਏਕੋ ਵਿਪਸ੍ਸਨਾਭਿਨਿਵੇਸੋਤਿ ਦ੍ਵੇ ਅਭਿਨਿਵੇਸਾ. ਏਕੋ ਚ ਅਰਹਤ੍ਤਂ ਮਤ੍ਥਕਂ ਪਾਪੁਣਨ੍ਤੋ ਉਭਤੋਭਾਗਵਿਮੁਤ੍ਤੋ ਹੋਤਿ, ਏਕੋ ਪਞ੍ਞਾਵਿਮੁਤ੍ਤੋਤਿ ਇਮਾਨਿ ਦ੍ਵੇ ਸੀਸਾਨਿ ਨਾਮ. ਯੇ ਹਿ ਕੇਚਿ ਲੋਕੁਤ੍ਤਰਂ ਧਮ੍ਮਂ ਨਿਬ੍ਬਤ੍ਤੇਨ੍ਤਿ, ਸਬ੍ਬੇ ਤੇ ਦ੍ਵੇ ਇਮੇ ਧਮ੍ਮੇ ਧੁਰਂ ਕਤ੍ਵਾ ਇਮੇਸੁ ਦ੍ਵੀਸੁ ਠਾਨੇਸੁ ਅਭਿਨਿਵਿਸਿਤ੍ਵਾ ਇਮੇਹਿ ਦ੍ਵੀਹਿ ਠਾਨੇਹਿ ਵਿਮੁਚ੍ਚਨ੍ਤਿ. ਤੇਸੁ ਯੋ ਭਿਕ੍ਖੁ ਅਟ੍ਠਸਮਾਪਤ੍ਤਿਲਾਭੀ ਪਞ੍ਞਂ ਧੁਰਂ ਕਤ੍ਵਾ ਸਮਥਵਸੇਨ ਅਭਿਨਿਵਿਟ੍ਠੋ ਅਞ੍ਞਤਰਂ ਅਰੂਪਸਮਾਪਤ੍ਤਿਂ ਪਦਟ੍ਠਾਨਂ ਕਤ੍ਵਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਾਪੁਣਾਤਿ, ਅਯਂ ਸੋਤਾਪਤ੍ਤਿਮਗ੍ਗਕ੍ਖਣੇ ਧਮ੍ਮਾਨੁਸਾਰੀ ਨਾਮ. ਪਰਤੋ ਪਨ ਛਸੁ ਠਾਨੇਸੁ ਕਾਯਸਕ੍ਖੀ ਨਾਮ. ਅਰਹਤ੍ਤਫਲਂ ਪਤ੍ਤੇ ਉਭਤੋਭਾਗਵਿਮੁਤ੍ਤੋ ਨਾਮ.

ਅਪਰੋ ਪਞ੍ਞਮੇਵ ਧੁਰਂ ਕਤ੍ਵਾ ਵਿਪਸ੍ਸਨਾਵਸੇਨ ਅਭਿਨਿਵਿਟ੍ਠੋ ਸੁਦ੍ਧਸਙ੍ਖਾਰੇ ਵਾ ਰੂਪਾਵਚਰਜ੍ਝਾਨੇਸੁ ਵਾ ਅਞ੍ਞਤਰਂ ਸਮ੍ਮਸਿਤ੍ਵਾ ਅਰਹਤ੍ਤਂ ਪਾਪੁਣਾਤਿ, ਅਯਮ੍ਪਿ ਸੋਤਾਪਤ੍ਤਿਮਗ੍ਗਕ੍ਖਣੇ ਧਮ੍ਮਾਨੁਸਾਰੀ ਨਾਮ. ਪਰਤੋ ਪਨ ਛਸੁ ਠਾਨੇਸੁ ਦਿਟ੍ਠਿਪ੍ਪਤ੍ਤੋ ਨਾਮ, ਅਰਹਤ੍ਤਂ ਪਤ੍ਤੇ ਪਞ੍ਞਾਵਿਮੁਤ੍ਤੋ ਨਾਮ.

ਅਪਰੋ ਪਨ ਅਟ੍ਠਸਮਾਪਤ੍ਤਿਲਾਭੀ ਸਦ੍ਧਂ ਧੁਰਂ ਕਤ੍ਵਾ ਸਮਾਧਿਵਸੇਨ ਅਭਿਨਿਵਿਟ੍ਠੋ ਅਞ੍ਞਤਰਂ ਅਰੂਪਸਮਾਪਤ੍ਤਿਂ ਪਦਟ੍ਠਾਨਂ ਕਤ੍ਵਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਾਪੁਣਾਤਿ, ਅਯਂ ਸੋਤਾਪਤ੍ਤਿਮਗ੍ਗਕ੍ਖਣੇ ਸਦ੍ਧਾਨੁਸਾਰੀ ਨਾਮ, ਪਰਤੋ ਛਸੁ ਠਾਨੇਸੁ ਕਾਯਸਕ੍ਖੀਯੇਵ ਨਾਮ. ਅਰਹਤ੍ਤਂ ਪਤ੍ਤੇ ਉਭਤੋਭਾਗਵਿਮੁਤ੍ਤੋਯੇਵ ਨਾਮ. ਅਪਰੋ ਸਦ੍ਧਮੇਵ ਧੁਰਂ ਕਤ੍ਵਾ ਵਿਪਸ੍ਸਨਾਵਸੇਨ ਅਭਿਨਿਵਿਟ੍ਠੋ ਸੁਦ੍ਧਸਙ੍ਖਾਰੇ ਵਾ ਰੂਪਾਵਚਰਜ੍ਝਾਨੇਸੁ ਵਾ ਅਞ੍ਞਤਰਂ ਸਮ੍ਮਸਿਤ੍ਵਾ ਅਰਹਤ੍ਤਂ ਪਾਪੁਣਾਤਿ, ਅਯਮ੍ਪਿ ਸੋਤਾਪਤ੍ਤਿਮਗ੍ਗਕ੍ਖਣੇ ਸਦ੍ਧਾਨੁਸਾਰੀ ਨਾਮ, ਪਰਤੋ ਛਸੁ ਠਾਨੇਸੁ ਸਦ੍ਧਾਵਿਮੁਤ੍ਤੋ ਨਾਮ. ਅਰਹਤ੍ਤਪ੍ਪਤ੍ਤੇ ਪਞ੍ਞਾਵਿਮੁਤ੍ਤੋ ਨਾਮ. ਇਮੇ ਸਤ੍ਤ ਪੁਗ੍ਗਲਾ ਸਮ੍ਮਾਸਮ੍ਬੁਦ੍ਧਪਚ੍ਚੇਕਸਮ੍ਬੁਦ੍ਧੇਹਿ ਸਦ੍ਧਿਂ ਨਵ ਲੋਕੇ ਅਗ੍ਗਦਕ੍ਖਿਣੇਯ੍ਯਾ ਨਾਮਾਤਿ.

ਦਸਕੇ ਪਞ੍ਚਨ੍ਨਂ ਇਧ ਨਿਟ੍ਠਾਤਿ ਸਤ੍ਤਕ੍ਖਤ੍ਤੁਪਰਮੋ, ਕੋਲਂਕੋਲੋ, ਏਕਬੀਜੀ, ਸਕਦਾਗਾਮੀ ਕਾਮਾਵਚਰਪਟਿਸਨ੍ਧਿਕੋ, ਅਰਹਾ ਚਾਤਿ ਇਮੇਸਂ ਪਞ੍ਚਨ੍ਨਂ ਇਧ ਕਾਮਾਵਚਰਭੂਮਿਯਞ੍ਞੇਵ ਅਨੁਪਾਦਿਸੇਸਨਿਬ੍ਬਾਨਸਙ੍ਖਾਤਾ ਨਿਟ੍ਠਾਤਿ ਅਤ੍ਥੋ. ਕਾਮਾਵਚਰਤ੍ਤਭਾਵੇ ਏਵ ਹਿ ਏਤੇ ਪਰਿਨਿਬ੍ਬਾਯਨ੍ਤਿ, ਨਾਞ੍ਞਸ੍ਮਿਂ. ਪਞ੍ਚਨ੍ਨਂ ਇਧ ਵਿਹਾਯ ਨਿਟ੍ਠਾਤਿ ਅਨ੍ਤਰਾਪਰਿਨਿਬ੍ਬਾਯੀ ਉਪਹਚ੍ਚਪਰਿਨਿਬ੍ਬਾਯੀ ਅਸਙ੍ਖਾਰਪਰਿਨਿਬ੍ਬਾਯੀ ਸਸਙ੍ਖਾਰਪਰਿਨਿਬ੍ਬਾਯੀ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਚਾਤਿ ਇਮੇਸਂ ਪਞ੍ਚਨ੍ਨਂ ਇਧ ਕਾਮਾਵਚਰੇ ਅਤ੍ਤਭਾਵਂ ਵਿਹਾਯ ਵਿਜਹਿਤ੍ਵਾ ਬ੍ਰਹ੍ਮਤ੍ਤਭਾਵੇ ਠਿਤਾਨਞ੍ਞੇਵ ਨਿਟ੍ਠਾਤਿ ਅਤ੍ਥੋ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ. ਅਯਮੇਤ੍ਥ ਸਙ੍ਖੇਪਤੋ ਪਾਲ਼ਿਨਯੇਨ ਸਦ੍ਧਿਂ ਅਤ੍ਥਨਿਚ੍ਛਯੋ, ਵਿਤ੍ਥਾਰੋ ਪਨ ਪੁਗ੍ਗਲਪਞ੍ਞਤ੍ਤਿਪਾਲ਼ਿਅਟ੍ਠਕਥਾਸੁ (ਪੁ. ਪ. ਮਾਤਿਕਾ ੧ ਆਦਯੋ; ਪੁ. ਪ. ਅਟ੍ਠ. ਮਾਤਿਕਾਵਣ੍ਣਨਾ ੧) ਗਹੇਤਬ੍ਬੋਤਿ.

ਮੋਹਵਿਚ੍ਛੇਦਨਿਯਾ ਅਭਿਧਮ੍ਮਮਾਤਿਕਤ੍ਥਵਣ੍ਣਨਾਯ

ਪੁਗ੍ਗਲਪਞ੍ਞਤ੍ਤਿਮਾਤਿਕਤ੍ਥਵਣ੍ਣਨਾ ਨਿਟ੍ਠਿਤਾ.