ਸੁਤ੍ਤਨ੍ਤਿਕਦੁਕਮਾਤਿਕਤ੍ਥਵਣ੍ਣਨਾ
ਸੁਤ੍ਤਨ੍ਤਿਕਦੁਕੇਸੁ ਵੇਦੇਤਿ, ਵਿਵਿਧੇਨ ਵਾ ਆਕਾਰੇਨ ਜਾਨਾਤੀਤਿ ਵਿਜ੍ਜਾ, ਵਿਪਸ੍ਸਨਾਞਾਣਮਨੋਮਯਿਦ੍ਧਿਛਅਭਿਞ੍ਞਾਵਸਪ੍ਪਵਤ੍ਤਾ ਪਞ੍ਞਾ, ਤਸ੍ਮਿਂ ਵਿਜ੍ਜਾਭਾਗੇ ਵਿਜ੍ਜਾਕੋਟ੍ਠਾਸੇ ਵਿਜ੍ਜਾਸਭਾਵੇ ਵਤ੍ਤਨ੍ਤੀਤਿ ਵਿਜ੍ਜਾਭਾਗਿਨੋ. ਤਾ ਏਵ ਵਿਜ੍ਜਾ, ਤਂ ਵਾ ਵਿਜ੍ਜਂ ਸਮ੍ਪਯੋਗਵਸੇਨ ਭਜਨ੍ਤੀਤਿਪਿ ਵਿਜ੍ਜਾਭਾਗਿਨੋ, ਅਟ੍ਠਵਿਧਵਿਜ੍ਜਾਸਮ੍ਪਯੁਤ੍ਤਧਮ੍ਮਾ. ਤਾਸੁ ਯਾ ਕਾਚਿ ਏਕਾ ਵਿਜ੍ਜਾ ਵਿਜ੍ਜਾ, ਸੇਸਾ ਵਿਜ੍ਜਾਭਾਗਿਨੋਤਿ ਏਵਂ ਵਿਜ੍ਜਾਪਿ ਵਿਜ੍ਜਾਸਮ੍ਪਯੁਤ੍ਤਧਮ੍ਮਾਪਿ ਵਿਜ੍ਜਾਭਾਗਿਨੋਤ੍ਵੇਵ ਵੇਦਿਤਬ੍ਬਾ, ਇਧ ਪਨ ਵਿਜ੍ਜਾਸਮ੍ਪਯੁਤ੍ਤਾ ਧਮ੍ਮਾਵ ਅਧਿਪ੍ਪੇਤਾ. ਨ ਵਿਜਾਨਾਤੀਤਿ ਅਵਿਜ੍ਜਾ, ਚਤੁਸਚ੍ਚਚ੍ਛਾਦਕਵਸੇਨ ਚਤੁਬ੍ਬਿਧੋ ਮੋਹੋ, ਤਸ੍ਮਿਂ ਅਵਿਜ੍ਜਾਭਾਗੇ ਅਵਿਜ੍ਜਾਕੋਟ੍ਠਾਸੇ ਅਵਿਜ੍ਜਾਸਭਾਵੇ ਵਤ੍ਤਨ੍ਤੀਤਿ ਅਵਿਜ੍ਜਾਭਾਗਿਨੋ. ਤਾ ਏਵ ਅਵਿਜ੍ਜਾ, ਤਂ ਵਾ ਅਵਿਜ੍ਜਂ ਸਮ੍ਪਯੋਗਵਸੇਨ ਭਜਨ੍ਤੀਤਿਪਿ ਅਵਿਜ੍ਜਾਭਾਗਿਨੋ, ਅਵਿਜ੍ਜਾਸਮ੍ਪਯੁਤ੍ਤਧਮ੍ਮਾ. ਏਵਂ ਅਵਿਜ੍ਜਾਪਿ ਅਵਿਜ੍ਜਾਸਮ੍ਪਯੁਤ੍ਤਧਮ੍ਮਾਪਿ ਅਵਿਜ੍ਜਾਭਾਗਿਨੋਤ੍ਵੇਵ ਵੇਦਿਤਬ੍ਬਾ, ਇਧ ਪਨ ਅਵਿਜ੍ਜਾਸਮ੍ਪਯੁਤ੍ਤਧਮ੍ਮਾਵ ਅਧਿਪ੍ਪੇਤਾ.
ਤਤ੍ਥ ਅਰਹਤ੍ਤਮਗ੍ਗਚਿਤ੍ਤਂ, ਪਞ੍ਞਾਵਿਰਹਿਤਤਂਸਮ੍ਪਯੁਤ੍ਤਾ ਚ ਵਿਜ੍ਜਾਭਾਗਿਨੋ ਚ ਞਾਣਸਮ੍ਪਯੁਤ੍ਤਕਾਮਾਵਚਰਜਵਨਾਨਿ, ਞਾਣਵਿਰਹਿਤਤਂਸਮ੍ਪਯੁਤ੍ਤਾ ਚ ਵਿਪਸ੍ਸਨਾਭਾਵੇਨ ਪਵਤ੍ਤਿਯਂ ਵਿਜ੍ਜਾਭਾਗਿਨੋ, ਅਞ੍ਞਦਾ ਨ ਵਤ੍ਤਬ੍ਬਾ. ਰੂਪਾਵਚਰਚਤੁਤ੍ਥਜ੍ਝਾਨਿਕਜਵਨਚਿਤ੍ਤਾਨਿ, ਪਞ੍ਞਾਵਿਰਹਿਤਤਂਸਮ੍ਪਯੁਤ੍ਤਾ ਚ ਮਨੋਮਯਿਦ੍ਧਿਭਾਵੇਨ ਚ ਪਞ੍ਚਾਭਿਞ੍ਞਾਭਾਵੇਨ ਚ ਪਵਤ੍ਤਿਯਂ ਵਿਜ੍ਜਾਭਾਗਿਨੋ, ਅਞ੍ਞਦਾ ਨ ਵਤ੍ਤਬ੍ਬਾ. ਤਤ੍ਥ ਦ੍ਵਾਦਸਾਕੁਸਲਚਿਤ੍ਤਾਨਿ, ਅਵਿਜ੍ਜਾਵਿਰਹਿਤਤਂਸਮ੍ਪਯੁਤ੍ਤਾ ਚ ਅਵਿਜ੍ਜਾਭਾਗਿਨੋਵ, ਇਧ ਪਨ ਅਵਿਜ੍ਜਾ, ਸੇਸਚਿਤ੍ਤਰੂਪਨਿਬ੍ਬਾਨਾਨਿ ਚ ਨ ਵਤ੍ਤਬ੍ਬਾਵ. ਚੇਤਸਿਕੇਸੁ ਪਨ ਮੋਹਅਪ੍ਪਮਞ੍ਞਾ ਨ ਵਤ੍ਤਬ੍ਬਾਵ, ਸੇਸਾ ਕੁਸਲਾਬ੍ਯਾਕਤਾ ਸਿਯਾ ਵਿਜ੍ਜਾਭਾਗਿਨੋ, ਸਿਯਾ ਨ ਵਤ੍ਤਬ੍ਬਾ, ਤਿਜਾਤਿਕਾ ਦ੍ਵਿਧਾਪਿ ਨ ਵਤ੍ਤਬ੍ਬਾ ਚ. ਸੇਸਂ ਸੁਵਿਞ੍ਞੇਯ੍ਯਮੇਵ. ਪਠਮਂ.
ਪੁਨ ਅਨਜ੍ਝੋਤ੍ਥਰਣਵਸੇਨ ਕਿਲੇਸਨ੍ਧਕਾਰਂ ਵਿਦ੍ਧਂਸੇਤੁਂ ਅਸਮਤ੍ਥਤਾਯ ਵਿਜ੍ਜੁ ਉਪਮਾ ਏਤੇਸਨ੍ਤਿ ਵਿਜ੍ਜੂਪਮਾ, ਆਦਿਤੋ ਤੀਸੁ ਮਗ੍ਗੇਸੁ ਞਾਣਂਵ. ਨਿਸ੍ਸੇਸਂ ਵਿਦ੍ਧਂਸਨਸਮਤ੍ਥਤਾਯ ਵਜਿਰਂ ਉਪਮਾ ਏਤੇਸਨ੍ਤਿ ਵਜਿਰੂਪਮਾ, ਅਰਹਤ੍ਤਮਗ੍ਗੇ ਞਾਣਂ. ਯਥਾ ਹਿ ਮੇਘਨ੍ਧਕਾਰੇ ਮਗ੍ਗਪਟਿਪਨ੍ਨਸ੍ਸ ਪਟਿਚ੍ਛਾਦਨਅਨ੍ਧਕਾਰਂ ਵਿਧਮਿਤ੍ਵਾ ਵਿਜ੍ਜੁਯਾ ਉਪ੍ਪਨ੍ਨਕ੍ਖਣੇ ਚਾਤੁਦਿਸਾ ਮਗ੍ਗਾ ਪਾਕਟਾ ਹੋਨ੍ਤਿ, ਵਿਜ੍ਜੁਯਾ ਨਿਰੁਦ੍ਧਾਯ ਪੁਨ ਅਨ੍ਧਕਾਰੋ ਓਤ੍ਥਰਿਤ੍ਵਾ ਮਗ੍ਗਂ ਪਟਿਚ੍ਛਾਦੇਤਿ, ਏਵਂ ਵਿਪਸ੍ਸਨਾਯਾਨਿਕਸ੍ਸ ਯਥਾਸਕਂ ਸਚ੍ਚਚ੍ਛਾਦਕਕਿਲੇਸਨ੍ਧਕਾਰਂ ਵਿਧਮਿਤ੍ਵਾ ਤੀਸੁ ਮਗ੍ਗੇਸੁ ਯਥਾਕ੍ਕਮਂ ਉਪ੍ਪਨ੍ਨੇਸੁ ਚਤ੍ਤਾਰਿ ਸਚ੍ਚਾਨਿ ਪਾਕਟਾਨਿ ਹੋਨ੍ਤਿ, ਤੇਸੁ ਨਿਰੁਦ੍ਧੇਸੁ ਪੁਨ ਅਵਸਿਟ੍ਠਕਿਲੇਸਨ੍ਧਕਾਰੋ ਚਤੁਸਚ੍ਚਂ ਪਟਿਚ੍ਛਾਦੇਤਿ, ਤਸ੍ਮਾ ਤੀਸੁ ਮਗ੍ਗੇਸੁ ਪਞ੍ਞਾ ਵਿਜ੍ਜੂਪਮਾ ਵੁਤ੍ਤਾ. ਯਥਾ ਪਨ ਵਜਿਰਸ੍ਸ ਅਭੇਜ੍ਜੋ ਪਾਸਾਣੋ ਨਾਮ ਨਤ੍ਥਿ, ਤਞ੍ਚ ਨਿਸ੍ਸੇਸਤੋ ਵਜਿਰਂ ਖੇਪੇਤਿ, ਵਜਿਰੇਨ ਚ ਗਤਮਗ੍ਗੇ ਪਾਸਾਣਸ੍ਸ ਪੁਨ ਪਾਕਤਿਕਭਾਵੋ ਨਤ੍ਥਿ, ਏਵਂ ਅਰਹਤ੍ਤਮਗ੍ਗਞਾਣਸ੍ਸ ਅਵਜ੍ਝਕਿਲੇਸੋ ਨਾਮ ਨਤ੍ਥਿ, ਤਞ੍ਚ ਨਿਸ੍ਸੇਸਤੋ ਅਰਹਤ੍ਤਮਗ੍ਗਞਾਣਂ ਖੇਪੇਤਿ, ਤੇਨ ਚ ਖੇਪਿਤੇ ਕਿਲੇਸੇ ਅਵਸਿਟ੍ਠਕਿਲੇਸਾਭਾਵਤੋ ਤਸ੍ਸ ਪੁਨ ਪਚ੍ਚੁਦਾਵਤ੍ਤਨਂ ਨਾਮ ਨਤ੍ਥਿ, ਤਸ੍ਮਾ ਚਤੁਤ੍ਥਮਗ੍ਗੇ ਪਞ੍ਞਾ ਵਜਿਰੂਪਮਾ ਵੁਤ੍ਤਾ. ਪਞ੍ਞਾ ਏਵ ਹੇਤ੍ਥ ਸਿਯਾ ਵਿਜ੍ਜੂਪਮਾ, ਸਿਯਾ ਨ ਵਤ੍ਤਬ੍ਬਾ ਚ ਹੋਤਿ. ਸੇਸਚੇਤਸਿਕਚਿਤ੍ਤਰੂਪਨਿਬ੍ਬਾਨਾਨਿ ਪਨ ਸਬ੍ਬਾਨਿ ਨ ਵਤ੍ਤਬ੍ਬਾਨੇਵ. ਦੁਤਿਯਂ.
ਬਾਲੇਸੁ ਠਿਤਤ੍ਤਾ, ਯਤ੍ਥ ਠਿਤਾ ਤਦੁਪਚਾਰੇਨ ਬਾਲਾ, ਬਾਲਕਰਤ੍ਤਾ ਵਾ ਬਾਲਾ, ਦ੍ਵਾਦਸਾਕੁਸਲਚਿਤ੍ਤਾਨਿ. ਇਧ ਪਨ ਅਹਿਰਿਕਞ੍ਚ ਅਨੋਤ੍ਤਪ੍ਪਞ੍ਚ ਬਾਲਾ ਨਾਮ. ਪਣ੍ਡਿਤੇਸੁ ਠਿਤਤ੍ਤਾ ਪਣ੍ਡਿਤਾ, ਪਣ੍ਡਿਤਕਰਤ੍ਤਾ ਵਾ ਪਣ੍ਡਿਤਾ, ਏਕਵੀਸਤਿ ਕੁਸਲਚਿਤ੍ਤਾਨਿ. ਇਧ ਪਨ ਹਿਰੀ ਚ ਓਤ੍ਤਪ੍ਪਞ੍ਚ ਪਣ੍ਡਿਤਾ ਨਾਮ. ਸੇਸਚਿਤ੍ਤਰੂਪਨਿਬ੍ਬਾਨਾਨਿ ਨ ਵਤ੍ਤਬ੍ਬਾਨਿ. ਸੇਸਂ ਸੁਵਿਞ੍ਞੇਯ੍ਯਮੇਵ. ਤਤਿਯਂ.
ਕਣ੍ਹਾਤਿ ਕਾਲ਼ਕਾ, ਚਿਤ੍ਤਸ੍ਸ ਅਪਭਸ੍ਸਰਭਾਵਕਰਣਾ. ਸੁਕ੍ਕਾਤਿ ਓਦਾਤਾ, ਪਭਸ੍ਸਰਭਾਵਕਰਣਾ. ਸੇਸਂ ਸਬ੍ਬਂ ਬਾਲਦੁਕਸਦਿਸਮੇਵ. ਚਤੁਤ੍ਥਂ.
ਇਧ ਚੇਵ ਸਮ੍ਪਰਾਯੇ ਚ ਤਪੇਨ੍ਤੀਤਿ ਤਪਨੀਯਾ. ਨ ਤਪਨੀਯਾ ਅਤਪਨੀਯਾ. ਸੇਸਂ ਬਾਲਦੁਕਸਦਿਸਮੇਵ. ਪਞ੍ਚਮਂ.
‘‘ਸਿਰਿਵਡ੍ਢਕੋ ਧਨਵਡ੍ਢਕੋ’’ਤਿਆਦਯੋ ਵਿਯ ਵਚਨਮਤ੍ਤਮੇਵ ਅਧਿਕਾਰਂ ਕਤ੍ਵਾ ਪਵਤ੍ਤਾ ਅਧਿਵਚਨਾ ਨਾਮ. ਨਾਮਧੇਯ੍ਯਨ੍ਤਿ ਤੇਸਂ ਤੇਸਂ ਧਮ੍ਮਾਨਂ ਨਾਮਾਨਿ. ਤਾਨਿ ਚਤੁਬ੍ਬਿਧਾਨਿ ਸਾਮਞ੍ਞਨਾਮਂ ਗੁਣਨਾਮਂ ਕਿਤ੍ਤਿਮਨਾਮਂ ਓਪਪਾਤਿਕਨਾਮਨ੍ਤਿ. ਤਤ੍ਥ ਪਠਮਕਪ੍ਪਿਕੇਸੁ ਮਹਾਜਨੇਨ ਸਮ੍ਮਨ੍ਨਿਤ੍ਵਾ ਠਪਿਤਤ੍ਤਾ ‘‘ਮਹਾਸਮ੍ਮਤੋ’’ਤਿ ਰਞ੍ਞੋ ਨਾਮਨ੍ਤਿ ਏਵਰੂਪਂ ਸਾਮਞ੍ਞਨਾਮਂ ਨਾਮ. ‘‘ਧਮ੍ਮਕਥਿਕੋ ਪਂਸੁਕੂਲਿਕੋ ਕਾਲ਼ੋ ਰਸ੍ਸੋ’’ਤਿ ਏਵਰੂਪਂ ਗੁਣਤੋ ਆਗਤਂ, ‘‘ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ’’ਤਿਆਦੀਨਿਪਿ ਤਥਾਗਤਸ੍ਸ ਅਨੇਕਾਨਿ ਨਾਮਸਤਾਨਿ ਗੁਣਨਾਮਂ ਨਾਮ. ਯਂ ਪਨ ਜਾਤਸ੍ਸ ਕੁਮਾਰਸ੍ਸ ਞਾਤਕਾ ਕਪ੍ਪੇਤ੍ਵਾ ਪਕਪ੍ਪੇਤ੍ਵਾ ‘‘ਅਯਂ ਅਸੁਕੋ ਨਾਮਾ’’ਤਿ ਨਾਮਂ ਕਰੋਨ੍ਤਿ, ਇਦਂ ਕਿਤ੍ਤਿਮਨਾਮਂ ਨਾਮ. ਯਾ ਪਨ ਪੁਰਿਮਪਞ੍ਞਤ੍ਤਿ ਅਪਰਪਞ੍ਞਤ੍ਤਿਯਂ ਨਿਪਤਤਿ, ਸੇਯ੍ਯਥਿਦਂ – ਪੁਰਿਮਕਪ੍ਪੇਪਿ ਚਨ੍ਦੋ ਚਨ੍ਦੋ ਏਵ, ਏਤਰਹਿਪਿ ਅਨਾਗਤੇਪਿ ਚਨ੍ਦੋ ਏਵ. ਤਥਾ ‘‘ਸੂਰਿਯੋ ਸਮੁਦ੍ਦੋ ਪਥਵੀ ਰੂਪਂ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਂ ਨਿਬ੍ਬਾਨ’’ਨ੍ਤਿਏਵਮਾਦਿ ਓਪਪਾਤਿਕਨਾਮਂ ਨਾਮ. ਤਾਨਿ ਪੁਨ ਵਿਜ੍ਜਮਾਨਪਞ੍ਞਤ੍ਤਿ ਅਵਿਜ੍ਜਮਾਨਪਞ੍ਞਤ੍ਤਿ ਵਿਜ੍ਜਮਾਨੇਨਅਵਿਜ੍ਜਮਾਨਪਞ੍ਞਤ੍ਤਿ ਅਵਿਜ੍ਜਮਾਨੇਨਵਿਜ੍ਜਮਾਨਪਞ੍ਞਤ੍ਤਿ ਵਿਜ੍ਜਮਾਨੇਨਵਿਜ੍ਜਮਾਨਪਞ੍ਞਤ੍ਤਿ ਅਵਿਜ੍ਜਮਾਨੇਨਅਵਿਜ੍ਜਮਾਨਪਞ੍ਞਤ੍ਤੀਤਿ ਏਵਂ ਨਾਮਪਞ੍ਞਤ੍ਤਿਵਸੇਨ ਛਬ੍ਬਿਧਾਨਿ ਹੋਨ੍ਤਿ.
ਤਤ੍ਥ ਪਰਮਤ੍ਥਤੋ ਉਪਲਬ੍ਭਮਾਨਾ ਯਥਾਵੁਤ੍ਤਦ੍ਵਾਸਤ੍ਤਤਿਵਿਧਾ ਨਾਮਰੂਪਧਮ੍ਮਾ ਵਿਜ੍ਜਮਾਨਾ ਨਾਮ, ਤੇਸਂ ਪਕਾਰੇਹਿ ਞਾਪਨਤੋ ਪਞ੍ਞਤ੍ਤਿ ਵਿਜ੍ਜਮਾਨਪਞ੍ਞਤ੍ਤਿ ਨਾਮ, ‘‘ਚਿਤ੍ਤਂ ਫਸ੍ਸੋ ਪਥਵੀ ਰੂਪਂ ਨਿਬ੍ਬਾਨ’’ਨ੍ਤਿਆਦਯੋ ਪਰਮਤ੍ਥਵਾਚਕਾ ਸਦ੍ਦਾ. ਉਪਾਦਿਨ੍ਨਨਾਮਰੂਪਧਮ੍ਮੇ ਪਨ ਉਪਾਦਾਯ ਪਞ੍ਞਤ੍ਤਾ ਸਤ੍ਤਪੁਗ੍ਗਲਇਤ੍ਥਿਪੁਰਿਸਦੇਵਮਨੁਸ੍ਸਤਿਰਚ੍ਛਾਨਾਦਿਭੇਦਾ, ਅਨੁਪਾਦਿਨ੍ਨਰੂਪਧਮ੍ਮੇ ਉਪਾਦਾਯ ਪਞ੍ਞਤ੍ਤਾ ਭੂਮਿਪਬ੍ਬਤਰੁਕ੍ਖਸਕਟਚਨ੍ਦਸੂਰਿਯਨਕ੍ਖਤ੍ਤਦਿਸਾਕਾਲਕਸਿਣਾਦਿਭੇਦਾ ਚ ਪਰਮਤ੍ਥਤੋ ਅਨੁਪਲਬ੍ਭਮਾਨਾ ਅਵਿਜ੍ਜਮਾਨਾ ਨਾਮ, ਤੇਸਂ ਪਞ੍ਞਤ੍ਤਿ ਅਵਿਜ੍ਜਮਾਨਪਞ੍ਞਤ੍ਤਿ ਨਾਮ. ਤਥਾ ‘‘ਅਤ੍ਤਾ ਭੂਮੀ’’ਤਿਆਦਯੋ ਅਤ੍ਥਪਞ੍ਞਤ੍ਤਿਵਾਚਕਾ ਸਦ੍ਦਾ ਚ ਚਿਤ੍ਤਸਨ੍ਤਤਿਵਣ੍ਣੁਪਗਨ੍ਤਿਆਦਿ ਵਿਜ੍ਜਮਾਨਤ੍ਥਵਾਚਕਾ ਸਦ੍ਦਾ ਵਿਜ੍ਜਮਾਨੇਨਅਵਿਜ੍ਜਮਾਨਪਞ੍ਞਤ੍ਤਿ ਨਾਮ. ‘‘ਪੁਰਿਸਸ੍ਸ ਚਿਤ੍ਤਂ, ਮੇਘਵਣ੍ਣੋ’’ਤਿਆਦੀਸੁ ਅਵਿਜ੍ਜਮਾਨੇਨਵਿਜ੍ਜਮਾਨਪਞ੍ਞਤ੍ਤਿ ਨਾਮ. ‘‘ਚਿਤ੍ਤਲਹੁਤਾ ਪਥਵੀਗਨ੍ਧੋ’’ਤਿਆਦਿ ਵਿਜ੍ਜਮਾਨੇਨਵਿਜ੍ਜਮਾਨਪਞ੍ਞਤ੍ਤਿ ਨਾਮ. ‘‘ਮਨੁਸ੍ਸਸਰੀਰਂ ਰੁਕ੍ਖਸਾਖਾ’’ਤਿਆਦਿ ਅਵਿਜ੍ਜਮਾਨੇਨਅਵਿਜ੍ਜਮਾਨਪਞ੍ਞਤ੍ਤਿ ਨਾਮ. ਏਵਂ ਛਬ੍ਬਿਧਾਪਿ ਚੇਤਾ ਅਧਿਪ੍ਪਾਯਂ ਵਿਞ੍ਞਾਪੇਤੁਕਾਮਤਾਚਿਤ੍ਤਸਮੁਟ੍ਠਾਪਿਤਸਵਿਞ੍ਞਤ੍ਤਿਸਦ੍ਦਾਨੁਸਾਰੇਨ ਞਾਤਸਙ੍ਕੇਤਸ੍ਸ ਸੋਤਵਿਞ੍ਞਾਣਵੀਥਿਅਨਨ੍ਤਰਂ ਉਪ੍ਪਨ੍ਨੇਹਿ ਮਨੋਦ੍ਵਾਰਿਕਵਿਞ੍ਞਾਣੇਹਿ ‘‘ਇਮਸ੍ਸੇਦਂ ਨਾਮ’’ਨ੍ਤਿ ਅਨੇਕਸਦ੍ਦੇਸੁ ਏਕਤ੍ਤਮਾਰੋਪੇਤ੍ਵਾ ਵਵਤ੍ਥਾਪਿਤਾ ਅਤ੍ਥਾਭਿਮੁਖਂ ਨਮਨਤੋ ਪਕਾਰੇਹਿ ਅਤ੍ਥਸ੍ਸ ਞਾਪਨਤੋ ‘‘ਨਾਮਪਞ੍ਞਤ੍ਤੀ’’ਤਿ ਵੁਚ੍ਚਨ੍ਤਿ, ਤੇਸਂ ਅਧਿਵਚਨਾਨਂ ਪਥਾ ਅਤ੍ਥਾ ਅਧਿਵਚਨਪਥਾ, ਸਮ੍ਮੁਤਿਪਰਮਤ੍ਥਭੇਦਾ ਸਬ੍ਬੇ ਧਮ੍ਮਾ ਸਦ੍ਦਵਚਨੀਯਸਭਾਵਾ. ਛਟ੍ਠਂ.
ਇਤੋ ਪਰਂ ਦ੍ਵੇ ਦੁਕਾ ਅਧਿਵਚਨਦੁਕਸਦਿਸਾਵ, ਕੇਵਲਂ ਪਦਤ੍ਥਮਤ੍ਤਮੇਵ ਵਿਸੇਸੋ. ਤਤ੍ਥ ਅਭਿਸਙ੍ਖਰੋਨ੍ਤੀਤਿ ਸਙ੍ਖਾਰਾਤਿ ਏਵਂ ਨਿਦ੍ਧਾਰੇਤ੍ਵਾ ਸਹੇਤੁਕਂ ਕਤ੍ਵਾ ਵੁਚ੍ਚਮਾਨਾ ਨਿਰੁਤ੍ਤਿ ਨਾਮ, ‘‘ਤਕ੍ਕੋ ਵਿਤਕ੍ਕੋ ਸਙ੍ਕਪ੍ਪੋ’’ਤਿ ਏਵਂ ਤੇਨ ਤੇਨ ਪਕਾਰੇਨ ਞਾਪਨਤੋ ਪਞ੍ਞਤ੍ਤਿ ਨਾਮ, ਯਥਾਵੁਤ੍ਤਨਾਮਪਞ੍ਞਤ੍ਤਿਯੋਵ. ਨ ਹਿ ਅਧਿਵਚਨਨਿਰੁਤ੍ਤਿਪਞ੍ਞਤ੍ਤੀਸੁ ਅਤ੍ਥਤੋ ਕੋਚਿਪਿ ਭੇਦੋ ਅਤ੍ਥਿ, ਨਿਬ੍ਬਤ੍ਤਿਨਿਮਿਤ੍ਤਭੇਦਦਸ੍ਸਨਤ੍ਥਂ ਪਨ ਨੇਸਂ ਵਿਭਾਗੇਨ ਪਦਤ੍ਥੋ ਦਸ੍ਸਿਤੋ. ਇਮੇਸੁ ਚ ਤੀਸੁ ਦੁਕੇਸੁ ਪਞ੍ਞਤ੍ਤਿਸਹਿਤਾ ਸਬ੍ਬੇ ਧਮ੍ਮਾ ਲਬ੍ਭਨ੍ਤਿ, ਅਨਨ੍ਤਰੇ ਨਾਮਰੂਪਦੁਕੇ ਪਞ੍ਞਤ੍ਤਿਰਹਿਤਾਤਿ ਇਮੇ ਚਤ੍ਤਾਰੋ ਦੁਕਾ ਇਮੇਸੁ ਸੁਤ੍ਤਨ੍ਤਿਕਦੁਕੇਸੁ ਨਿਪ੍ਪਦੇਸਾ, ਸੇਸਾ ਪਨ ਅਟ੍ਠਤਿਂਸਾਪਿ ਸਪ੍ਪਦੇਸਾਤਿ ਵੇਦਿਤਬ੍ਬਾ. ਸਤ੍ਤਮਟ੍ਠਮਾਨਿ.
ਨਾਮਕਰਣਟ੍ਠੇਨ, ਨਮਨਟ੍ਠੇਨ, ਨਾਮਨਟ੍ਠੇਨ ਚ ਨਾਮਂ, ਅਰੂਪਕ੍ਖਨ੍ਧਨਿਬ੍ਬਾਨਾਨਿ. ਤਾਨਿ ਹਿ ਸਬ੍ਬਦਾਪਿ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਂ ਨਿਬ੍ਬਾਨਨ੍ਤਿ ਓਪਪਾਤਿਕਨਾਮਵਸੇਨ ਅਤ੍ਤਨੋ ਨਾਮਂ ਕਰੋਨ੍ਤਾਵ ਪਵਤ੍ਤਨ੍ਤਿ ਚਨ੍ਦਸੂਰਿਯਾਦਯੋ ਵਿਯ. ਨ ਹਿ ਤੇਸਂ ਸਾਮਞ੍ਞਗੁਣਕਿਤ੍ਤਿਮਵਸੇਨ ਨਾਮਕਰਣਕਿਚ੍ਚਂ ਅਤ੍ਥੀਤਿ. ਏਵਂ ਨਾਮਕਰਣਟ੍ਠੇਨ ਨਾਮਂ ਵੇਦਿਤਬ੍ਬਂ. ਆਰਮ੍ਮਣਾਭਿਮੁਖਂ ਪਨ ਨਮਨਟ੍ਠੇਨ, ਅਞ੍ਞਮਞ੍ਞਂ ਤਤ੍ਥ ਨਾਮਨਟ੍ਠੇਨ ਚ ਚਤ੍ਤਾਰੋ ਅਰੂਪਕ੍ਖਨ੍ਧਾਵ ਨਾਮਂ. ਨਿਬ੍ਬਾਨਂ ਪਨ ਆਰਮ੍ਮਣਾਧਿਪਤਿਪਚ੍ਚਯਤਾਯ ਅਤ੍ਤਨਿ ਅਨਵਜ੍ਜਧਮ੍ਮਾਨਂ ਨਾਮਨਟ੍ਠੇਨੇਵ ਨਾਮਂ ਵੇਦਿਤਬ੍ਬਂ. ਰੁਪ੍ਪਨਟ੍ਠੇਨ ਰੂਪਂ, ਰੂਪਕ੍ਖਨ੍ਧੋ. ਨਵਮਂ.
ਅਵਿਜ੍ਜਾਤਿ ਦੁਕ੍ਖਾਦਿਪਟਿਚ੍ਛਾਦਕੋ ਸਬ੍ਬੋ ਮੋਹੋ. ਭਵਤਣ੍ਹਾਤਿ ਭਵਪਤ੍ਥਨਾਵਸੇਨ ਪਵਤ੍ਤੋ ਲੋਭੋ. ਤਥਾ ਅਪ੍ਪਵਤ੍ਤੋ ਪਨੇਤ੍ਥ ਲੋਭੋ, ਸੇਸਚੇਤਸਿਕਚਿਤ੍ਤਰੂਪਨਿਬ੍ਬਾਨਾਨਿ ਚ ਨ ਵਤ੍ਤਬ੍ਬਾਨਿ. ਇਤੋ ਪਰਂ ਪਨ ਏਵਂ ਨਵਤ੍ਤਬ੍ਬਵਿਭਾਗਂ ਅਦਸ੍ਸੇਤ੍ਵਾ ਪਦਤ੍ਥਸਰੂਪਮਤ੍ਤਮੇਵ ਦਸ੍ਸਯਿਸ੍ਸਾਮ, ਦਸ੍ਸਿਤਾਵਸੇਸਾ ਨ ਵਤ੍ਤਬ੍ਬਾਤਿ ਗਹੇਤਬ੍ਬਾ. ਦਸਮਂ.
ਭਵੋ ਵੁਚ੍ਚਤਿ ਸਸ੍ਸਤਂ. ‘‘ਭਵਿਸ੍ਸਤਿ ਅਤ੍ਤਾ ਚ ਲੋਕੋ ਚਾ’’ਤਿ ਸਸ੍ਸਤਵਸੇਨ ਉਪ੍ਪਜ੍ਜਨਕਦਿਟ੍ਠਿ ਭਵਦਿਟ੍ਠਿ ਨਾਮ. ਵਿਭਵੋ ਵੁਚ੍ਚਤਿ ਉਚ੍ਛੇਦੋ. ‘‘ਨ ਭਵਿਸ੍ਸਤਿ ਅਤ੍ਤਾ ਚ ਲੋਕੋ ਚਾ’’ਤਿ ਉਚ੍ਛੇਦਵਸੇਨ ਉਪ੍ਪਜ੍ਜਨਕਦਿਟ੍ਠਿ ਵਿਭਵਦਿਟ੍ਠਿ ਨਾਮ. ਉਭਯੇਨਾਪਿ ਮਿਚ੍ਛਾਦਿਟ੍ਠਿ ਗਹਿਤਾ. ਤਥਾ ਅਨਨ੍ਤਰੇਸੁਪਿ ਤੀਸੁ ਦੁਕੇਸੁ. ਏਕਾਦਸਮਂ.
ਖਨ੍ਧਪਞ੍ਚਕਂ ‘‘ਅਤ੍ਤਾ ਚ ਲੋਕੋ ਚਾ’’ਤਿ ਗਹੇਤ੍ਵਾ ‘‘ਸਸ੍ਸਤੋ ਅਤ੍ਤਾ ਚ ਲੋਕੋ ਚਾ’’ਤਿ ਪਵਤ੍ਤਾ ਦਿਟ੍ਠਿ ਸਸ੍ਸਤਦਿਟ੍ਠਿ ਨਾਮ. ਤਥਾ ‘‘ਉਚ੍ਛਿਜ੍ਜਿਸ੍ਸਤੀ’’ਤਿ ਪਵਤ੍ਤਾ ਦਿਟ੍ਠਿ ਉਚ੍ਛੇਦਦਿਟ੍ਠਿ ਨਾਮ. ‘‘ਅਨ੍ਤਵਾ’’ਤਿ ਪਵਤ੍ਤਾ ਅਨ੍ਤਵਾਦਿਟ੍ਠਿ ਨਾਮ. ‘‘ਅਨਨ੍ਤਵਾ’’ਤਿ ਪਵਤ੍ਤਾ ਅਨਨ੍ਤਵਾਦਿਟ੍ਠਿ ਨਾਮ. ਪੁਬ੍ਬਨ੍ਤਂ ਅਨੁਗਤਾ ਬ੍ਰਹ੍ਮਜਾਲੇ ਵੁਤ੍ਤਨਯੇਨ ਅਤੀਤਕੋਟ੍ਠਾਸਂ ਆਰਮ੍ਮਣਂ ਕਤ੍ਵਾ ਪਵਤ੍ਤਾ ਅਟ੍ਠਾਰਸਵਿਧਾ ਪੁਬ੍ਬਨ੍ਤਾਨੁਦਿਟ੍ਠਿ ਨਾਮ. ਅਪਰਨ੍ਤਂ ਅਨੁਗਤਾ ਤਤ੍ਥੇਵ ਆਗਤਨਯੇਨ ਅਨਾਗਤਕੋਟ੍ਠਾਸਂ ਆਰਮ੍ਮਣਂ ਕਤ੍ਵਾ ਪਵਤ੍ਤਾ ਚਤੁਚਤ੍ਤਾਲੀਸਵਿਧਾ ਅਪਰਨ੍ਤਾਨੁਦਿਟ੍ਠਿ ਨਾਮ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਬ੍ਰਹ੍ਮਜਾਲੇ (ਦੀ. ਨਿ. ੧.੨੮), ਤਦਟ੍ਠਕਥਾਯ (ਦੀ. ਨਿ. ਅਟ੍ਠ. ੧.੨੮) ਚ ਵੇਦਿਤਬ੍ਬੋ. ਦ੍ਵਾਦਸਮਤੇਰਸਮਚੁਦ੍ਦਸਮਾਨਿ.
ਅਹਿਰਿਕਦੁਕਂ, ਹਿਰਿਦੁਕਞ੍ਚ ਸੁਵਿਞ੍ਞੇਯ੍ਯਮੇਵ. ਪਞ੍ਚਦਸਮਸੋਲ਼ਸਮਾਨਿ.
ਦੁਕ੍ਖਂ ਵਚੋ ਏਤਸ੍ਮਿਂ ਵਿਪ੍ਪਟਿਕੂਲਗਾਹਿਮ੍ਹਿ ਵਿਪਚ੍ਚਨੀਕਸਾਤੇ ਅਨਾਦਰੇ ਪੁਗ੍ਗਲੇਤਿ ਦੁਬ੍ਬਚੋ, ਸਹਧਮ੍ਮਿਕਂ ਦਸ੍ਸੇਤ੍ਵਾ ਓਵਦਿਯਮਾਨੇ ਅਨਾਦਰਕਾਰਕੋ ਪੁਗ੍ਗਲੋ, ਤਸ੍ਸ ਕਮ੍ਮਂ ਦੋਵਚਸ੍ਸਂ, ਤਸ੍ਸ ਭਾਵੋ ਦੋਵਚਸ੍ਸਤਾ, ਅਨਾਦਰਵਸੇਨ ਪਵਤ੍ਤਾ ਦ੍ਵੇ ਪਟਿਘਚਿਤ੍ਤਾ, ਤਂਸਮ੍ਪਯੁਤ੍ਤਾ ਚ. ਪਾਪਾ ਅਸ੍ਸਦ੍ਧਾਦਯੋ ਪੁਗ੍ਗਲਾ ਏਤਸ੍ਸ ਮਿਤ੍ਤਾਤਿ ਪਾਪਮਿਤ੍ਤੋ, ਤਸ੍ਸ ਭਾਵੋ ਪਾਪਮਿਤ੍ਤਤਾ, ਪਾਪਪੁਗ੍ਗਲੇਸੁ ਦਲ਼੍ਹਭਤ੍ਤਿਵਸੇਨ, ਕਾਯਚਿਤ੍ਤੇਹਿ ਤਂਸੇਵਨਾਤਨ੍ਨਿਨ੍ਨਤਾਵਸੇਨ ਚ ਪਵਤ੍ਤਾਨਿ ਅਟ੍ਠ ਲੋਭਚਿਤ੍ਤਾਨਿ. ਸਤ੍ਤਰਸਮਂ.
ਸੋਵਚਸ੍ਸਤਾ, ਕਲ੍ਯਾਣਮਿਤ੍ਤਤਾ ਚ ਵੁਤ੍ਤਪਟਿਪਕ੍ਖਵਸੇਨ ਵੇਦਿਤਬ੍ਬਾ. ਅਤ੍ਥਤੋ ਪਨ ਤਥਾਪਵਤ੍ਤਾਨਿ ਸਹੇਤੁਕਕਾਮਾਵਚਰਕੁਸਲਕਿਰਿਯਚਿਤ੍ਤਾਨਿ. ਅਟ੍ਠਾਰਸਮਂ.
ਪਞ੍ਚਸੁ, ਸਤ੍ਤਸੁ ਵਾ ਆਪਤ੍ਤੀਸੁ ਕੁਸਲਭਾਵੋ ਆਪਤ੍ਤਿਕੁਸਲਤਾ, ਸਹ ਵਤ੍ਥੁਨਾ ਤਾਸਂ ਆਪਤ੍ਤੀਨਂ ਆਪਜ੍ਜਨਪਰਿਚ੍ਛੇਦਜਾਨਨਵਸੇਨ ਪਵਤ੍ਤਾ ਕਾਮਾਵਚਰਜਵਨਪਞ੍ਞਾ. ਆਪਤ੍ਤੀਹਿ ਵੁਟ੍ਠਾਨੇ ਕੁਸਲਭਾਵੋ ਆਪਤ੍ਤਿਵੁਟ੍ਠਾਨਕੁਸਲਤਾ, ਵੁਟ੍ਠਾਨਵਿਧਾਨੇਨ ਸਦ੍ਧਿਂ ਆਪਤ੍ਤਿਵੁਟ੍ਠਾਨਪਰਿਚ੍ਛੇਦਜਾਨਨਵਸੇਨ ਪਵਤ੍ਤਾ ਯਥਾਵੁਤ੍ਤਚਿਤ੍ਤਸਮ੍ਪਯੁਤ੍ਤਪਞ੍ਞਾਵ. ਏਕੂਨਵੀਸਤਿਮਂ.
ਸਮਾਪਜ੍ਜਿਤਬ੍ਬਤੋ ਸਮਾਪਤ੍ਤਿ, ਤਾਸੁ ਲੋਕਿਯਲੋਕੁਤ੍ਤਰਾਸੁ ਸਵਿਤਕ੍ਕਸਵਿਚਾਰਾਦੀਸੁ ਸਮਾਪਤ੍ਤੀਸੁ ਕੁਸਲਤਾ ਸਮਾਪਤ੍ਤਿਕੁਸਲਤਾ, ਸਹ ਪਰਿਕਮ੍ਮੇਨ ਅਪ੍ਪਨਾਪਰਿਚ੍ਛੇਦਜਾਨਨਵਸੇਨ ਪਵਤ੍ਤਾ ਪਞ੍ਞਾ. ਸਮਾਪਤ੍ਤੀਹਿ ਵੁਟ੍ਠਾਨੇ ਕੁਸਲਭਾਵੋ ਸਮਾਪਤ੍ਤਿਵੁਟ੍ਠਾਨਕੁਸਲਤਾ, ਯਥਾਪਰਿਚ੍ਛਿਨ੍ਨਕਾਲੇਯੇਵ ਤਾਹਿ ਵੁਟ੍ਠਾਨਕਪਞ੍ਞਾ ਕਾਮਾਵਚਰਜਵਨਪਞ੍ਞਾਵ. ਵੀਸਤਿਮਂ.
ਅਟ੍ਠਾਰਸਸੁ ਧਾਤੂਸੁ ਕੁਸਲਭਾਵੋ ਧਾਤੁਕੁਸਲਤਾ, ਸਵਨਧਾਰਣਪਟਿਵੇਧਪਚ੍ਚਵੇਕ੍ਖਣਪਞ੍ਞਾ. ਤਾਸਞ੍ਞੇਵ ਧਾਤੂਨਂ ਮਨਸਿਕਾਰੇ ਕੁਸਲਭਾਵੋ ਮਨਸਿਕਾਰਕੁਸਲਤਾ, ਤਾਸਂ ਸਮ੍ਮਸਨਪਟਿਵੇਧਪਚ੍ਚਵੇਕ੍ਖਣਪਞ੍ਞਾ. ਏਸ ਨਯੋ ਆਯਤਨਕੁਸਲਤਾਯਪਿ. ਤਤ੍ਥ ਹਿ ਸਵਨਧਾਰਣਪਚ੍ਚਵੇਕ੍ਖਣਾ ਕਾਮਾਵਚਰਾਵ, ਪਟਿਵੇਧੋ ਲੋਕੁਤ੍ਤਰੋਵ, ਸਮ੍ਮਸਨਂ ਕਾਮਾਵਚਰਲੋਕੁਤ੍ਤਰਂ. ਅਞ੍ਞਮਞ੍ਞਂ ਪਟਿਚ੍ਚ ਸਹਿਤਂ ਫਲਂ ਉਪ੍ਪਾਦੇਤੀਤਿ ਪਟਿਚ੍ਚਸਮੁਪ੍ਪਾਦੋ, ਅਵਿਜ੍ਜਾਦੀਹਿ ਨਿਦ੍ਦਿਟ੍ਠੋ ਪਚ੍ਚਯਸਮੂਹੋ, ਤਸ੍ਮਿਂ ਦ੍ਵਾਦਸਙ੍ਗੇ ਅਨੁਲੋਮਪਟਿਚ੍ਚਸਮੁਪ੍ਪਾਦੇ ਕੁਸਲਭਾਵੋ ਪਟਿਚ੍ਚਸਮੁਪ੍ਪਾਦਕੁਸਲਤਾ, ‘‘ਇਮਿਨਾ ਪਚ੍ਚਯੇਨ ਇਦਂ ਹੋਤੀ’’ਤਿ ਜਾਨਨਵਸੇਨ ਪਵਤ੍ਤਾ ਲੋਕਿਯਜਵਨਪਞ੍ਞਾਵ. ਏਕਵੀਸਤਿਮਦ੍ਵਾਵੀਸਤਿਮਾਨਿ.
ਤਿਟ੍ਠਤਿ ਏਤ੍ਥ ਫਲਂ ਤਦਾਯਤ੍ਤਵੁਤ੍ਤਿਤਾਯਾਤਿ ਠਾਨਂ, ਕਾਰਣਂ, ਤਸ੍ਮਿਂ ਠਾਨੇ ਕੁਸਲਤਾ ਠਾਨਕੁਸਲਤਾ. ਨ ਠਾਨੇ ਕੁਸਲਤਾ ਅਟ੍ਠਾਨਕੁਸਲਤਾ. ਤੇਵੀਸਤਿਮਂ.
ਉਜੁਭਾਵੋ ਅਜ੍ਜਵੋ. ਮੁਦੁਭਾਵੋ ਮਦ੍ਦਵੋ. ਕਾਯਚਿਤ੍ਤੁਜੁਕਤਾਮੁਦੁਕਤਾਦ੍ਵਯਂ. ਚਤੁਵੀਸਤਿਮਂ.
ਅਧਿਵਾਸਨਸਙ੍ਖਾਤਾ ਖਮਨਂ ਖਨ੍ਤਿ, ਤਥਾਪਵਤ੍ਤਕਾਮਾਵਚਰਜਵਨਾਨਿ. ਪਾਪਤੋ ਸੁਟ੍ਠੁ ਓਰਤੋ ਵਿਰਤੋਤਿ ਸੋਰਤੋ, ਤਸ੍ਸ ਭਾਵੋ ਸੋਰਚ੍ਚਂ. ਕਾਯਵਚੀਮਨੋਸਂਵਰਸੀਲਸਙ੍ਖਾਤਾਨਿ ਲੋਕਿਯਲੋਕੁਤ੍ਤਰਜਵਨਾਨਿ. ਪਞ੍ਚਵੀਸਤਿਮਂ.
ਸਮ੍ਮੋਦਕਪਿਯਵਾਦਿਤਾਸਙ੍ਖਾਤੋ ਸਖਿਲਭਾਵੋ ਸਾਖਲ੍ਯਂ, ਯਥਾ ਪਰੇਹਿ ਸਦ੍ਧਿਂ ਅਤ੍ਤਨੋ ਛਿਦ੍ਦਂ ਵਿਵਰਂ ਨ ਹੋਤਿ, ਏਵਂ ਧਮ੍ਮਾਮਿਸੇਹਿ ਪਟਿਸਨ੍ਥਰਣਂ ਪਟਿਚ੍ਛਾਦਨਂ ਪਟਿਸਨ੍ਥਾਰੋ. ਆਗਨ੍ਤੁਕਸ੍ਸ ਹਿ ਪਚ੍ਚੁਗ੍ਗਮਨਪਤ੍ਤਚੀਵਰਪਟਿਗ੍ਗਹਣਆਸਨਦਾਨਬੀਜਨਪਾਦਧੋਵਨਮਕ੍ਖਨਾਦਿਨਾ, ਪਾਨੀਯੇਨ ਆਪੁਚ੍ਛਨੇਨ, ਕਾਲੇ ਆਗਤਸ੍ਸ ਯਾਗੁਆਦੀਨਂ, ਵਿਕਾਲੇ ਪਾਨਕਾਦੀਨਞ੍ਚ ਦਾਨੇਨ, ਪੁਨਦਿਵਸੇ ਪਿਣ੍ਡਾਯ ਚਰਣਟ੍ਠਾਨਦਸ੍ਸਨਪਵੇਸਨਨਿਕ੍ਖਮਨਕਾਲਾਰੋਚਨਾਦਿਨਾ ਚ ਪਬ੍ਬਜਿਤਾ, ਗਹਟ੍ਠਾਨਞ੍ਚ ਵਿਨਯੇ ਆਗਤਨਯੇਨ ਯਥਾਨੁਰੂਪਂ ਆਮਿਸਪਟਿਸਨ੍ਥਾਰੋ ਕਾਤਬ੍ਬੋ. ਆਗਨ੍ਤੁਕਂ ਪਨ ਉਪਸਙ੍ਕਮਿਤ੍ਵਾ ‘‘ਤੁਮ੍ਹੇ ਕਤਰਭਾਣਕਾ’’ਤਿ ਅਪੁਚ੍ਛਿਤ੍ਵਾ ‘‘ਆਚਰਿਯੁਪਜ੍ਝਾਯਾ ਵੋ ਕਤਰਂ ਗਨ੍ਥਂ ਵਲ਼ਞ੍ਜੇਨ੍ਤੀ’’ਤਿ ਪੁਚ੍ਛਿਤ੍ਵਾ ਤਸ੍ਸ ਵਿਸਯੇ ਪਞ੍ਹਪੁਚ੍ਛਨੇਨ ਸਚੇ ਨ ਸਕ੍ਕੋਤਿ, ਸਯਂ ਕਥੇਤ੍ਵਾ ਦਾਨੇਨ, ਧਮ੍ਮਕਥਨਪਞ੍ਹਵਿਸ੍ਸਜ੍ਜਨਕਮ੍ਮਟ੍ਠਾਨਕਥਨਕੁਕ੍ਕੁਚ੍ਚਦਿਟ੍ਠਿਵਿਨੋਦਨਾਦਿਨਾ, ਪਰਿਵਾਸਾਦਿਵਿਨਯਕਮ੍ਮਕਰਣੇਨ, ਪਬ੍ਬਾਜਨਉਪਸਮ੍ਪਦਾਦਿਨਾ ਚ ਧਮ੍ਮਪਟਿਸਨ੍ਥਾਰੋ ਕਾਤਬ੍ਬੋ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨਾਯਂ ਸਦ੍ਧਿਂ ਆਨਿਸਂਸਦੀਪਕਵਤ੍ਥੂਹਿ ਅਟ੍ਠਸਾਲਿਨਿਯਂ (ਧ. ਸ. ਅਟ੍ਠ. ੧੩੫੧) ਞਾਤਬ੍ਬੋ. ਏਤਸ੍ਮਿਂ ਦੁਵਿਧੇ ਪਟਿਸਨ੍ਥਾਰੇ ਕੁਸਲਭਾਵੋ ਪਟਿਸਨ੍ਥਾਰਕੁਸਲਤਾ, ਤਥਾਪਵਤ੍ਤਕਾਮਾਵਚਰਜਵਨਾਨਿ ਏਵ. ਛਬ੍ਬੀਸਤਿਮਂ.
ਇਨ੍ਦ੍ਰਿਯੇਸੁ ਮਨਚ੍ਛਟ੍ਠੇਸੁ ਆਪਾਥਗਤਰੂਪਾਦੀਸੁ ਆਰਮ੍ਮਣੇਸੁ ਨਿਮਿਤ੍ਤਗਹਣਾਦਿਨਾ ਇਨ੍ਦ੍ਰਿਯਸਂਵਰਭੇਦਸਙ੍ਖਾਤੋ ਅਗੁਤ੍ਤਦ੍ਵਾਰਭਾਵੋ ਇਨ੍ਦ੍ਰਿਯੇਸੁ ਅਗੁਤ੍ਤਦ੍ਵਾਰਤਾ. ਪਟਿਗ੍ਗਹਣਪਰਿਭੋਗਵਸੇਨ ਭੋਜਨੇ ਮਤ੍ਤਂ ਅਜਾਨਨਭਾਵੋ ਭੋਜਨੇ ਅਮਤ੍ਤਞ੍ਞੁਤਾ, ਤਥਾਪਵਤ੍ਤਅਕੁਸਲਚਿਤ੍ਤਾਨਿ. ਸਤ੍ਤਵੀਸਤਿਮਂ.
ਅਨਨ੍ਤਰਦੁਕੇਪਿ ਵੁਤ੍ਤਪਟਿਪਕ੍ਖਵਸੇਨ ਕਾਮਾਵਚਰਸਹੇਤੁਕਕੁਸਲਕਿਰਿਯਚਿਤ੍ਤਾਨਿ ਵੇਦਿਤਬ੍ਬਾਨਿ. ਅਟ੍ਠਵੀਸਤਿਮਂ.
ਸਤਿਵਿਪ੍ਪਵਾਸਸਙ੍ਖਾਤੋ ਮੁਟ੍ਠਸਤਿਭਾਵੋ ਮੁਟ੍ਠਸ੍ਸਚ੍ਚਂ, ਸਬ੍ਬੇ ਅਕੁਸਲਾ ਧਮ੍ਮਾ, ਅਸਮ੍ਪਜਾਨਨਭਾਵੋ ਅਸਮ੍ਪਜਞ੍ਞਂ, ਮੋਹੋ. ਏਕੂਨਤਿਂਸਤਿਮਂ.
ਅਨਨ੍ਤਰਦੁਕੇ ਚਤੁਭੂਮਿਕਾ ਸਤਿਪਞ੍ਞਾਵ ਵੁਤ੍ਤਾ. ਤਿਂਸਤਿਮਂ.
ਅਪ੍ਪਟਿਸਙ੍ਖਾਨੇ ਅਪ੍ਪਟਿਵਾਨਸਙ੍ਖਾਤੇ ਅਕਮ੍ਪਿਯਟ੍ਠੇਨ ਯੋਨਿਸੋਦਸ੍ਸਨਸਙ੍ਖਾਤਂ ਪਟਿਸਙ੍ਖਾਨਮੇਵ ਬਲਨ੍ਤਿ ਪਟਿਸਙ੍ਖਾਨਬਲਂ, ਕਾਮਾਵਚਰਪਞ੍ਞਾਵ. ਸਤ੍ਤਬੋਜ੍ਝਙ੍ਗਾਦਿਭਾਵਨਾਵਸੇਨ ਪਵਤ੍ਤਾ ਚਤੁਭੂਮਕਧਮ੍ਮਾ ਭਾਵਨਾਬਲਂ. ਏਕਤਿਂਸਤਿਮਂ.
ਪਚ੍ਚਨੀਕਧਮ੍ਮੇ ਸਮੇਤੀਤਿ ਸਮਥੋ, ਸੋ ਤਿਵਿਧੋ ਚਿਤ੍ਤਸਮਥੋ ਅਧਿਕਰਣਸਮਥੋ ਸਬ੍ਬਸਙ੍ਖਾਰਸਮਥੋਤਿ. ਤਤ੍ਥ ਚ ਪੁਬ੍ਬਭਾਗਾਸੁ ਅਟ੍ਠਸਮਾਪਤ੍ਤੀਸੁ ਏਕਗ੍ਗਤਾ ਚਿਤ੍ਤਸਮਥੋ ਨਾਮ, ਸਮ੍ਮੁਖਾਵਿਨਯਾਦਿ ਸਤ੍ਤਵਿਧੋ ਅਧਿਕਰਣਸਮਥੋ ਨਾਮ, ਨਿਬ੍ਬਾਨਂ ਸਬ੍ਬਸਙ੍ਖਾਰਸਮਥੋ ਨਾਮ. ਇਧ ਪਨ ਚਤੁਭੂਮਕੋ ਸਮਾਧਿ ਅਧਿਪ੍ਪੇਤੋ. ਅਨਿਚ੍ਚਾਦਿਵਸੇਨ ਵਿਵਿਧੇਨਾਕਾਰੇਨ ਪਸ੍ਸਤੀਤਿ ਵਿਪਸ੍ਸਨਾ, ਲੋਕਿਯਲੋਕੁਤ੍ਤਰਾ ਵਿਪਸ੍ਸਨਾਪਞ੍ਞਾਵ. ਬਾਤ੍ਤਿਂਸਤਿਮਂ.
ਸਮਥੋਵ ਤਂ ਆਕਾਰਂ ਗਹੇਤ੍ਵਾ ਪੁਨ ਪਵਤ੍ਤੇਤਬ੍ਬਸ੍ਸ ਸਮਥਸ੍ਸ ਨਿਮਿਤ੍ਤਨ੍ਤਿ ਸਮਥਨਿਮਿਤ੍ਤਂ. ਪਗ੍ਗਾਹਨਿਮਿਤ੍ਤੇਪਿ ਏਸੇਵ ਨਯੋ. ਚਤੁਭੂਮਕਸਮਾਧਿਵੀਰਿਯਾਨਿ ਏਵ. ਤੇਤ੍ਤਿਂਸਤਿਮਂ.
ਅਨਨ੍ਤਰਦੁਕੇਪਿ ਵੀਰਿਯਸਮਾਧੀ ਏਵ ਵੁਤ੍ਤਾ. ਚਤੁਤ੍ਤਿਂਸਤਿਮਂ.
ਸੀਲਵਿਨਾਸਿਕਾ ਅਸਂਵਰਸਙ੍ਖਾਤਾ ਸੀਲਸ੍ਸ ਵਿਪਤ੍ਤੀਤਿ ਸੀਲਵਿਪਤ੍ਤਿ, ਤਥਾਪਵਤ੍ਤਾ ਅਕੁਸਲਧਮ੍ਮਾ. ਸਮ੍ਮਾਦਿਟ੍ਠਿਯਾ ਵਿਪਤ੍ਤਿ ਦਿਟ੍ਠਿਵਿਪਤ੍ਤਿ, ਮਿਚ੍ਛਾਦਿਟ੍ਠਿ ਏਵ. ਪਞ੍ਚਤਿਂਸਤਿਮਂ.
ਸੋਰਚ੍ਚਮੇਵ ਸੀਲਸ੍ਸ ਸਮ੍ਪਾਦਨਤੋ ਸੀਲਪਰਿਪੂਰਣਤੋ ਸੀਲਸ੍ਸ ਸਮ੍ਪਦਾਤਿ ਸੀਲਸਮ੍ਪਦਾ. ਦਿਟ੍ਠਿਪਾਰਿਪੂਰਿਭੂਤਂ ਞਾਣਮੇਵ ਦਿਟ੍ਠਿਯਾ ਸਮ੍ਪਦਾਤਿ ਦਿਟ੍ਠਿਸਮ੍ਪਦਾ. ਚਤੁਭੂਮਕਾ ਸੀਲਪਞ੍ਞਾਵ. ਤਥਾ ਅਨਨ੍ਤਰਦੁਕੇਪਿ. ਛਤ੍ਤਿਂਸਤਿਮਂ.
ਵਿਸੁਦ੍ਧਿਭਾਵਂ ਸਮ੍ਪਤ੍ਤਾ ਸੀਲਸਙ੍ਖਾਤਾ ਸੀਲਸ੍ਸ ਵਿਸੁਦ੍ਧਿ ਸੀਲਵਿਸੁਦ੍ਧਿ. ਨਿਬ੍ਬਾਨਸਙ੍ਖਾਤਂ ਵਿਸੁਦ੍ਧਿਂ ਪਾਪੇਤੁਂ ਸਮਤ੍ਥਾ ਦਸ੍ਸਨਸਙ੍ਖਾਤਾ ਦਿਟ੍ਠਿਯਾ ਵਿਸੁਦ੍ਧਿ ਦਿਟ੍ਠਿਵਿਸੁਦ੍ਧਿ. ਸਤ੍ਤਤ੍ਤਿਂਸਤਿਮਂ.
ਕਮ੍ਮਸ੍ਸਕਤਾਸਚ੍ਚਾਨੁਲੋਮਿਕਮਗ੍ਗਫਲਸਮ੍ਪਯੁਤ੍ਤਪਞ੍ਞਾ ਦਿਟ੍ਠਿ ਵਿਸੁਦ੍ਧਿ ਨਾਮ. ਯਥਾਦਿਟ੍ਠਿਸ੍ਸ ਤਦਨੁਰੂਪਂ ਪਧਾਨਂ ਯਥਾਦਿਟ੍ਠਿਸ੍ਸ ਚ ਪਧਾਨਂ ਨਾਮ. ਅਟ੍ਠਤਿਂਸਤਿਮਂ.
ਸਂਵੇਗਜਨਕਾਨਿ ਜਾਤਿਜਰਾਬ੍ਯਾਧਿਮਰਣਸਙ੍ਖਾਤਾਨਿ ਕਾਰਣਾਨਿ ਸਂਵੇਜਨੀਯਟ੍ਠਾਨਾਨਿ ਨਾਮ, ਤੇਸੁ ਜਾਤਿਆਦਿਪਟਿਚ੍ਚਸਮੁਪ੍ਪਨ੍ਨਭਯਸਙ੍ਖਾਤਂ ਸਂਵਿਜਨਂ ਸਂਵੇਗੋ ਨਾਮ, ਤਥਾਪਵਤ੍ਤਕੁਸਲਾਦਿ ਏਵ. ਏਵਂ ਸਂਵੇਗਜਾਤਸ੍ਸ ਯੋਨਿਸੋ ਉਪਾਯੇਨ ਪਧਾਨਂ ਸਂਵਿਗ੍ਗਸ੍ਸ ਯੋਨਿਸੋ ਪਧਾਨਂ, ਲੋਕਿਯਲੋਕੁਤ੍ਤਰਵੀਰਿਯਮੇਵ. ਏਕੂਨਚਤ੍ਤਾਲੀਸਤਿਮਂ.
ਕੁਸਲਧਮ੍ਮਪੂਰਣੇ ਅਸਨ੍ਤੁਟ੍ਠਿਭਾਵੋ ਅਸਨ੍ਤੁਟ੍ਠਿਤਾ. ਯੋ ਪਨ ਦਾਨਂ ਦਤ੍ਵਾ ਤਤੋ ਤੇਨ ਅਸਨ੍ਤੁਟ੍ਠੋ ਹੁਤ੍ਵਾ ਸਰਣਗਮਨਂ ਆਕਙ੍ਖਤਿ, ਤਤੋ ਪਞ੍ਚਸੀਲਾਦਿਂ, ਪਬ੍ਬਜ੍ਜਂ, ਬੁਦ੍ਧਵਚਨਾਨਂ ਉਗ੍ਗਣ੍ਹਨਂ, ਸਮਥਵਿਪਸ੍ਸਨਂ, ਤਤੋ ਤੇਨਾਪਿ ਅਸਨ੍ਤੁਟ੍ਠੋ ਅਨੁਕ੍ਕਮੇਨ ਅਰਹਤ੍ਤਂ ਗਣ੍ਹਾਤਿ, ਅਯਂ ਅਸਨ੍ਤੁਟ੍ਠਿਤਾ ਕੁਸਲੇਸੁ ਧਮ੍ਮੇਸੁ. ਅਧਿਕੁਸਲਧਮ੍ਮਾਨਂ ਭਾਵਨਾਯ ਉਕ੍ਕਣ੍ਠਮਾਨੋ ਪਧਾਨਂ ਪਟਿਵਾਪੇਤਿ ਨਿਵਤ੍ਤਾਪੇਤੀਤਿ ਪਟਿਵਾਨਿ, ਨ ਪਟਿਵਾਨਿ ਅਪ੍ਪਟਿਵਾਨਿ, ਤਸ੍ਸ ਭਵੋ ਅਪ੍ਪਟਿਵਾਨਿਤਾ. ਅਰਹਤ੍ਤਂ ਅਪ੍ਪਤ੍ਵਾ ਪਧਾਨਸ੍ਮਿਂ ਅਨਿਵਤ੍ਤਨਤਾ ਅਨੋਸਕ੍ਕਨਤਾ, ਤਥਾਪਵਤ੍ਤਲੋਕਿਯਲੋਕੁਤ੍ਤਰਕੁਸਲਾ ਧਮ੍ਮਾ. ਚਤ੍ਤਾਲੀਸਤਿਮਂ.
ਵਿਜਾਨਨਤੋ ਵਿਜ੍ਜਾ, ਪੁਬ੍ਬੇਨਿਵਾਸਚੁਤੂਪਪਾਤਆਸਵਕ੍ਖਯਞਾਣਾਨਿ. ਵਿਮੁਚ੍ਚਨਤੋ ਵਿਮੁਤ੍ਤਿ, ਅਟ੍ਠ ਸਮਾਪਤ੍ਤਿਯੋ, ਨਿਬ੍ਬਾਨਞ੍ਚ. ਅਟ੍ਠ ਸਮਾਪਤ੍ਤਿਯੋ ਹਿ ਆਰਮ੍ਮਣੇ ਅਧਿਮੁਚ੍ਚਨਤੋ, ਸਯਂ ਵਿਕ੍ਖਮ੍ਭਿਤਕਿਲੇਸੇਹਿ ਵਿਮੁਚ੍ਚਨਟ੍ਠੇਨ ਚ ਵਿਮੁਤ੍ਤੀਤਿ ਵੁਤ੍ਤਾ, ਨਿਬ੍ਬਾਨਂ ਪਨ ਸਬ੍ਬਕਿਲੇਸੇਹਿ ਅਚ੍ਚਨ੍ਤਵਿਮੁਚ੍ਚਨਟ੍ਠੇਨ. ਏਕਚਤ੍ਤਾਲੀਸਤਿਮਂ.
ਕਿਲੇਸਕ੍ਖਯਕਰੇਸੁ ਚਤੂਸੁ ਅਰਿਯਮਗ੍ਗੇਸੁ ਞਾਣਂ ਖਯੇ ਞਾਣਂ ਨਾਮ. ਪਟਿਸਨ੍ਧਿਵਸੇਨ ਅਨੁਪ੍ਪਾਦਭੂਤੇ ਤਂਤਂਮਗ੍ਗਵਜ੍ਝਕਿਲੇਸਾਨਂ ਅਨੁਪ੍ਪਾਦਪਰਿਯੋਸਾਨੇ ਉਪ੍ਪਨ੍ਨਅਰਿਯਫਲੇ ਞਾਣਂ ਅਨੁਪ੍ਪਾਦੇ ਞਾਣਂ ਨਾਮ. ਸੇਸਂ ਸਬ੍ਬਤ੍ਥ ਸੁਵਿਞ੍ਞੇਯ੍ਯਮੇਵ. ਦ੍ਵਾਚਤ੍ਤਾਲੀਸਤਿਮਂ.
ਸੁਤ੍ਤਨ੍ਤਿਕਦੁਕਮਾਤਿਕਤ੍ਥਵਣ੍ਣਨਾ ਨਿਟ੍ਠਿਤਾ.
ਮੋਹਵਿਚ੍ਛੇਦਨਿਯਾ ਅਭਿਧਮ੍ਮਮਾਤਿਕਤ੍ਥਵਣ੍ਣਨਾਯ
ਧਮ੍ਮਸਙ੍ਗਣੀਮਾਤਿਕਤ੍ਥਵਣ੍ਣਨਾ ਨਿਟ੍ਠਿਤਾ.