ਅਭਿਧਮ੍ਮਦੁਕਮਾਤਿਕਤ੍ਥਵਣ੍ਣਨਾ
ਦੁਕਮਾਤਿਕਾਯ ਪਨ ਹੇਟ੍ਠਾ ਅਨਾਗਤਪਦਤ੍ਥਵਣ੍ਣਨਂਯੇਵ ਕਰਿਸ੍ਸਾਮ. ਹੇਤੁਗੋਚ੍ਛਕੇ ਤਾਵ ਹੇਤੂ ਧਮ੍ਮਾਤਿ ਏਤ੍ਥ ਹੇਤੁਹੇਤੁ ਪਚ੍ਚਯਹੇਤੁ ਉਤ੍ਤਮਹੇਤੁ ਸਾਧਾਰਣਹੇਤੂਤਿ ਚਤੁਬ੍ਬਿਧਾ ਹੇਤੂ. ਤਤ੍ਥ ਅਲੋਭਾਦਯੋ ਛ ਧਮ੍ਮਾ ਹੇਤੁਹੇਤੂ ਨਾਮ, ਉਪਾਦਾਰੂਪਾਦੀਨਂ ਮਹਾਭੂਤਾਦਯੋ ਪਚ੍ਚਯਹੇਤੂ ਨਾਮ, ਵਿਪਾਕੁਪ੍ਪਤ੍ਤਿਯਂ ਕੁਸਲਾਕੁਸਲਂ, ਇਟ੍ਠਾਨਿਟ੍ਠਾਰਮ੍ਮਣਞ੍ਚ ਉਤ੍ਤਮਹੇਤੂ ਨਾਮ, ਸਙ੍ਖਾਰਾਦੀਨਂ ਅਵਿਜ੍ਜਾਦਯੋ ਸਾਧਾਰਣਹੇਤੂ ਨਾਮ. ਇਧ ਪਨ ਹੇਤੁਹੇਤੁ ਅਧਿਪ੍ਪੇਤੋ. ਹੇਤੂ ਧਮ੍ਮਾਤਿ ਮੂਲਟ੍ਠੇਨ ਹੇਤੁਸਙ੍ਖਾਤਾ ਧਮ੍ਮਾ, ‘‘ਹੇਤੁਧਮ੍ਮਾ’’ਤਿਪਿ ਪਾਠੋ, ਸੋਯੇਵਤ੍ਥੋ. ਨ ਹੇਤੂਤਿ ਤੇਸਞ੍ਞੇਵ ਪਟਿਕ੍ਖੇਪਵਚਨਂ.
ਤਤ੍ਥ ਅਲੋਭੋ ਅਦੋਸੋ ਅਮੋਹੋਤਿ ਕੁਸਲਾਬ੍ਯਾਕਤਾ ਤਯੋ, ਲੋਭੋ ਦੋਸੋ ਮੋਹੋਤਿ ਅਕੁਸਲਾ ਤਯੋ ਚਾਤਿ ਇਮੇ ਛ ਧਮ੍ਮਾ ਹੇਤੂ ਨਾਮ. ਇਮੇ ਠਪੇਤ੍ਵਾ ਅਵਸੇਸਾ ਚੇਤਸਿਕਾ, ਸਬ੍ਬਾਨਿ ਚ ਚਿਤ੍ਤਾਨਿ, ਰੂਪਨਿਬ੍ਬਾਨਾਨਿ ਚਾਤਿ ਇਮੇ ਧਮ੍ਮਾ ਨ ਹੇਤੂ ਨਾਮ, ਇਦਞ੍ਚ ਨਿਪ੍ਪਦੇਸਦੁਕਨ੍ਤਿ ਵੇਦਿਤਬ੍ਬਂ. ਹੇਤੁਦੁਕਂ ਪਠਮਂ.
ਸਮ੍ਪਯੋਗਤੋ ਪਵਤ੍ਤੇਨ ਸਹ ਹੇਤੁਨਾਤਿ ਸਹੇਤੁਕਾ. ਤਥੇਵ ਪਵਤ੍ਤੋ ਨਤ੍ਥਿ ਏਤੇਸਂ ਹੇਤੂਤਿ ਅਹੇਤੁਕਾ.
ਤਤ੍ਥ ਅਹੇਤੁਕਚਿਤ੍ਤਵਜ੍ਜਿਤਾਨਿ ਏਕਸਤ੍ਤਤਿ ਚਿਤ੍ਤਾਨਿ ਸਹੇਤੁਕਾ ਨਾਮ. ਤੇਸੁ ਦ੍ਵੇ ਮੋਹਮੂਲਾਨਿ ਮੋਹੇਨੇਵ ਸਹੇਤੁਕਾਨਿ, ਅਟ੍ਠ ਲੋਭਮੂਲਾਨਿ ਲੋਭਮੋਹੇਹਿ ਦ੍ਵੀਹਿ, ਦ੍ਵੇ ਦੋਸਮੂਲਾਨਿ ਦੋਸਮੋਹੇਹਿ, ਦ੍ਵਾਦਸ ਞਾਣਵਿਪ੍ਪਯੁਤ੍ਤਕੁਸਲਾਬ੍ਯਾਕਤਾਨਿ ਅਲੋਭਾਦੋਸੇਹਿ, ਸੇਸਾਨਿ ਸਤ੍ਤਚਤ੍ਤਾਲੀਸ ਅਲੋਭਾਦੀਹਿ ਤੀਹਿਪਿ ਸਹੇਤੁਕਾਨੀਤਿ, ਮੋਹਮੂਲੇਸੁ ਪਨ ਮੋਹੋ, ਦ੍ਵਿਪਞ੍ਚਵਿਞ੍ਞਾਣਂ, ਮਨੋਧਾਤੁ, ਸਨ੍ਤੀਰਣਤ੍ਤਯਂ, ਵੋਟ੍ਠਬ੍ਬਨਂ, ਹਸਿਤੁਪ੍ਪਾਦਕਾਨਿ ਅਟ੍ਠਾਰਸ ਚਿਤ੍ਤਾਨਿ, ਰੂਪਨਿਬ੍ਬਾਨਾਨਿ ਚਾਤਿ ਇਮੇ ਧਮ੍ਮਾ ਅਹੇਤੁਕਾ ਨਾਮ. ਚੇਤਸਿਕੇਸੁ ਪਨ ਲੋਭਦੋਸਾ, ਵਿਚਿਕਿਚ੍ਛਾ ਚ ਮੋਹੇਨੇਵ ਸਹੇਤੁਕਾ, ਦਿਟ੍ਠਿਮਾਨੋ ਲੋਭਮੋਹੇਹਿ ਦ੍ਵੀਹਿ, ਇਸ੍ਸਾਮਚ੍ਛਰਿਯਕੁਕ੍ਕੁਚ੍ਚਾਨਿ ਦੋਸਮੋਹੇਹਿ, ਮੋਹੋ ਪਨ ਸਿਯਾ ਲੋਭੇਨ, ਸਿਯਾ ਦੋਸੇਨਾਤਿ ਦ੍ਵੀਹਿ ਸਹੇਤੁਕੋਪਿ ਮੋਹਮੂਲੇਸੁ ਅਹੇਤੁਕੋਪਿ, ਥਿਨਮਿਦ੍ਧਾਨਿ ਸਿਯਾ ਲੋਭਮੋਹੇਹਿ, ਸਿਯਾ ਦੋਸਮੋਹੇਹੀਤਿ ਤੀਹਿਪਿ ਸਹੇਤੁਕਾਨਿ, ਅਹਿਰਿਕਾਨੋਤ੍ਤਪ੍ਪਉਦ੍ਧਚ੍ਚਾਨਿ ਤਥਾ ਚ ਕੇਵਲਮੋਹੇਨ ਚ, ਅਮੋਹੋ ਪਨ ਅਲੋਭਾਦੋਸੇਹੇਵ ਦ੍ਵੀਹਿ, ਅਲੋਭੋ ਸਿਯਾ ਅਦੋਸਾਮੋਹੇਹਿ, ਸਿਯਾ ਅਦੋਸੇਨਾਤਿ ਦ੍ਵੀਹਿ, ਅਦੋਸੋ ਸਿਯਾ ਅਲੋਭਾਮੋਹੇਹਿ, ਸਿਯਾ ਅਲੋਭੇਨਾਤਿ ਦ੍ਵੀਹਿ, ਸੇਸਾ ਪਨ ਦ੍ਵਾਵੀਸਤਿ ਕੁਸਲਾਬ੍ਯਾਕਤਾ ਸਿਯਾ ਤੀਹਿ, ਸਿਯਾ ਦ੍ਵੀਹਿਪਿ ਹੇਤੂਹਿ ਸਹੇਤੁਕਾ, ਛਨ੍ਦੋ ਪਨ ਯਥਾਯੋਗਂ ਤੀਹਿ, ਪੀਤਿਦੋਸਵਜ੍ਜਿਤੇਹਿ ਪਞ੍ਚਹਿ ਸਿਯਾ ਸਹੇਤੁਕਾਪਿ ਅਹੇਤੁਕਾਪਿ, ਸੇਸਾ ਏਕਾਦਸ ਤਿਜਾਤਿਕਾ ਛਹਿ ਹੇਤੂਹਿ ਸਹੇਤੁਕਾਪਿ ਅਹੇਤੁਕਾਪਿ, ਵੇਦਨਾ ਚੇਤ੍ਥ ਦੋਮਨਸ੍ਸਭੂਤਾ ਦ੍ਵਿਹੇਤੁਕਾਵ, ਸੋਮਨਸ੍ਸਉਪੇਕ੍ਖਾ ਯਥਾਯੋਗਂ ਦੋਸਵਜ੍ਜਿਤੇਹਿ ਪਞ੍ਚਹਿ ਸਹੇਤੁਕਾਪਿ ਅਹੇਤੁਕਾਪਿ, ਸੁਖਦੁਕ੍ਖਭੂਤਾ ਅਹੇਤੁਕਾਵ, ਇਦਞ੍ਚ ਨਿਪ੍ਪਦੇਸਦੁਕਨ੍ਤਿ. ਦੁਤਿਯਂ.
ਏਕੁਪ੍ਪਾਦਾਦਿਤਾਯ ਹੇਤੁਨਾ ਸਮ੍ਪਯੁਤ੍ਤਾਤਿ ਹੇਤੁਸਮ੍ਪਯੁਤ੍ਤਾ. ਹੇਤੁਨਾ ਵਿਪ੍ਪਯੁਤ੍ਤਾਤਿ ਹੇਤੁਵਿਪ੍ਪਯੁਤ੍ਤਾ. ਅਯਂ ਹੇਤੁਸਮ੍ਪਯੁਤ੍ਤਦੁਕੋ ਅਨਨ੍ਤਰੇ ਵੁਤ੍ਤਸਹੇਤੁਕਦੁਕੇਨ ਅਤ੍ਥਤੋ ਨਿਨ੍ਨਾਨਾਕਰਣੋ. ਸਹੇਤੁਕਦੁਕੋ ਏਵ ਹਿ ਭਗਵਤਾ ਦੇਸਨਾਵਿਲਾਸੇਨ, ਤਥਾ ਬੁਜ੍ਝਨਕਪੁਗ੍ਗਲਾਨਂ ਵਾ ਅਜ੍ਝਾਸਯਵਸੇਨ ਹੇਤੁਸਮ੍ਪਯੁਤ੍ਤਦੁਕਭਾਵੇਨਾਪਿ ਵੁਤ੍ਤੋ. ਏਵਂ ਉਪਰਿਪਿ ਸਮਾਨਤ੍ਥਦੁਕਾਨਂ ਵਚਨੇ ਕਾਰਣਂ ਵੇਦਿਤਬ੍ਬਂ. ਤਤਿਯਂ.
ਚਤੁਤ੍ਥਾਦਯੋ ਪਨ ਯਸ੍ਮਾ ਪਠਮਦੁਕਦੁਤਿਯਤਤਿਯਦੁਕੇਸੁ ਪਠਮਪਦੇਨ ਯੋਜੇਤ੍ਵਾ ਦ੍ਵੇ ਦੁਕਾ, ਪਠਮਦੁਕੇ ਚ ਪਚ੍ਛਿਮਪਦਂ ਦੁਤਿਯਦੁਕੇਨ ਯੋਜੇਤ੍ਵਾ ਏਕਂ ਦੁਕਨ੍ਤਿ ਤਯੋ ਦੁਕਾ ਦੇਸਿਤਾ, ਤਸ੍ਮਾ ਤੇਸਂ ਪਦਤ੍ਥੋ ਵੁਤ੍ਤਨਯੋਵ.
ਤਤ੍ਥ ਚ ਯਥੇਵ ‘‘ਹੇਤੂ ਚੇਵ ਧਮ੍ਮਾ ਸਹੇਤੁਕਾ ਚ, ਸਹੇਤੁਕਾ ਚੇਵ ਧਮ੍ਮਾ ਨ ਚ ਹੇਤੂ’’ਤਿ ਅਯਂ ਦੁਕੋ ਸਮ੍ਭਵਤਿ, ਤਥਾ ‘‘ਹੇਤੂ ਚੇਵ ਧਮ੍ਮਾ ਅਹੇਤੁਕਾ ਚ, ਅਹੇਤੁਕਾ ਚੇਵ ਧਮ੍ਮਾ ਨ ਚ ਹੇਤੂ’’ਤਿ ਅਯਮ੍ਪਿ ਸਮ੍ਭਵਤਿ. ਇਮਿਨਾ ਨਯੇਨ ਹੇਤੁਸਮ੍ਪਯੁਤ੍ਤਦੁਕੇਨ ਯੋਜਨਾਯਪਿ ਏਕੋ ਲਬ੍ਭਤਿ. ਯਥਾ ਚ ‘‘ਨ ਹੇਤੂ ਖੋ ਪਨ ਧਮ੍ਮਾ ਸਹੇਤੁਕਾਪਿ, ਅਹੇਤੁਕਾਪੀ’’ਤਿ ਅਯਂ ਲਬ੍ਭਤਿ, ਤਥਾ ‘‘ਹੇਤੂ ਖੋ ਪਨ ਧਮ੍ਮਾ ਸਹੇਤੁਕਾਪਿ, ਅਹੇਤੁਕਾਪੀ’’ਤਿ ਅਯਮ੍ਪਿ. ਯਥਾ ਚੇਤ੍ਥ ਸਹੇਤੁਕਦੁਕੇ ਦ੍ਵੇ ਦੁਕਾ, ਏਵਂ ਹੇਤੁਸਮ੍ਪਯੁਤ੍ਤਦੁਕੇਪਿ ‘‘ਨ ਹੇਤੂ ਖੋ ਪਨ ਧਮ੍ਮਾ ਹੇਤੁਸਮ੍ਪਯੁਤ੍ਤਾਪਿ, ਹੇਤੁਵਿਪ੍ਪਯੁਤ੍ਤਾਪੀ’’ਤਿ ਚ ‘‘ਹੇਤੂ ਖੋ ਪਨ ਧਮ੍ਮਾ ਹੇਤੁਸਮ੍ਪਯੁਤ੍ਤਾਪਿ, ਹੇਤੁਵਿਪ੍ਪਯੁਤ੍ਤਾਪੀ’’ਤਿ ਚ ਦ੍ਵੇ ਦੁਕਾ ਲਬ੍ਭਨ੍ਤੀਤਿ ਅਪਰੇਪਿ ਪਞ੍ਚ ਦੁਕਾ ਹੇਤੁਗੋਚ੍ਛਕੇ ਯੋਜੇਤੁਂ ਸਕ੍ਕਾ. ਤੇ ਪਨ ਭਗਵਤਾ ਵੁਤ੍ਤਾਨੁਸਾਰੇਨੇਵ ਸਕ੍ਕਾ ਞਾਤੁਨ੍ਤਿ ਛਸੁ ਏਵ ਸਙ੍ਗਹਿਤਾਤਿ ਵੇਦਿਤਬ੍ਬਾ. ਤਤ੍ਥ ਯੇ ਤਾਵ ਏਕਸ੍ਮਿਂ ਚਿਤ੍ਤੇ ਦ੍ਵੇ ਤਯੋ ਹੇਤੂ ਏਕਤੋ ਉਪ੍ਪਜ੍ਜਨ੍ਤਿ, ਤੇ ਹੇਤੂ ਚੇਵ ਅਞ੍ਞੋਞ੍ਞਾਪੇਕ੍ਖਾਯ ਸਹੇਤੁਕਾ ਚ ਨਾਮ. ਸਹੇਤੁਕਚਿਤ੍ਤੇਸੁ ਪਨ ਹੇਤੁਂ ਠਪੇਤ੍ਵਾ ਸੇਸਾ ਚਿਤ੍ਤਚੇਤਸਿਕਾ ਧਮ੍ਮਾ ਸਹੇਤੁਕਾ ਚੇਵ ਨ ਚ ਹੇਤੂ ਨਾਮ. ਇਮਸ੍ਮਿਂ ਦੁਕੇ ਸਬ੍ਬੇ ਅਹੇਤੁਕਧਮ੍ਮਾ ਨ ਵਤ੍ਤਬ੍ਬਾ. ਚੇਤਸਿਕੇਸੁ ਪਨ ਹੇਤੁਵਜ੍ਜਿਤਾ ਅਕੁਸਲਾ ਚੇਵ ਕੁਸਲਾਬ੍ਯਾਕਤਾ ਚ, ਛਨ੍ਦੋ ਚ ਸਹੇਤੁਕੋ ਚੇਵ ਨ ਹੇਤੁ ਏਵ, ਸੇਸਾ ਤਿਜਾਤਿਕਾ, ਤਥਾ ਨਵਤ੍ਤਬ੍ਬਾ ਚ, ਮੋਹੋ ਪਨ ਹੇਤੁ ਚੇਵ ਸਹੇਤੁਕੋ ਚ ਨਵਤ੍ਤਬ੍ਬੋ ਚ. ਚਤੁਤ੍ਥਂ.
ਅਨਨ੍ਤਰਦੁਕੋਪਿ ਇਮਿਨਾ ਦੁਕੇਨ ਸਬ੍ਬਥਾਪਿ ਸਦਿਸੋਵਾਤਿ. ਪਞ੍ਚਮਂ.
ਸਹੇਤੁਕਚਿਤ੍ਤੇਸੁ ਹੇਤੁਵਜ੍ਜਿਤਾ ਚਿਤ੍ਤਚੇਤਸਿਕਾ ਧਮ੍ਮਾ ਨਹੇਤੂ ਸਹੇਤੂ ਨਾਮ, ਅਹੇਤੁਕਚਿਤ੍ਤਰੂਪਨਿਬ੍ਬਾਨਾਨਿ ਨਹੇਤੂ ਅਹੇਤੁਕਾ ਨਾਮ. ਇਮਸ੍ਮਿਂ ਪਨ ਦੁਕੇ ਛ ਹੇਤੂ ਨ ਵਤ੍ਤਬ੍ਬਾ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ. ਛਟ੍ਠਂ.
ਹੇਤੁਗੋਚ੍ਛਕਂ ਨਿਟ੍ਠਿਤਂ.
ਸਤ੍ਤਸੁ ਚੂਲ਼ਨ੍ਤਰਦੁਕੇਸੁ ਅਤ੍ਤਨੋ ਨਿਪ੍ਫਾਦਕੇਨ ਸਹ ਪਚ੍ਚਯੇਨਾਤਿ ਸਪ੍ਪਚ੍ਚਯਾ, ਚਿਤ੍ਤਚੇਤਸਿਕਰੂਪਾਨਿ. ਨਤ੍ਥਿ ਏਤੇਸਂ ਉਪ੍ਪਾਦੇ ਵਾ ਠਿਤਿਯਂ ਵਾ ਪਚ੍ਚਯੋ ਅਹੁਤ੍ਵਾ ਭਵਨਸ੍ਸੇਵਾਭਾਵਾਤਿ ਅਪ੍ਪਚ੍ਚਯਾ, ਨਿਬ੍ਬਾਨਮੇਵ. ਦੇਸਨਾਯ ਪਨੇਤ੍ਥ ਪਰਮਤਾਯ ਸੋਤਪਤਿਤਵਸੇਨ ਬਹੁਵਚਨਨਿਦ੍ਦੇਸੋ ਕਤੋ. ਏਵਂ ਸਨਿਦਸ੍ਸਨਾਦੀਸੁਪਿ. ਇਦਞ੍ਚ ਇਤੋ ਪਰਾਨਿ ਛ ਚ ਨਿਪ੍ਪਦੇਸਦੁਕਾਨੀਤਿ ਵੇਦਿਤਬ੍ਬਾਨਿ. ਤਤੋ ਪਰਞ੍ਚ ਯਤ੍ਥ ‘‘ਇਮੇ ਨ ਵਤ੍ਤਬ੍ਬਾ’’ਤਿ ਨ ਵਕ੍ਖਾਮ, ਤਂ ਨਿਪ੍ਪਦੇਸਨ੍ਤਿ ਗਹੇਤਬ੍ਬਂ. ਸਪ੍ਪਚ੍ਚਯਦੁਕਂ.
ਪਚ੍ਚਯੇਹਿ ਸਮਾਗਨ੍ਤ੍ਵਾ ਕਤਾਤਿ ਸਙ੍ਖਤਾ. ਨ ਸਙ੍ਖਤਾਤਿ ਅਸਙ੍ਖਤਾ. ਇਦਞ੍ਚ ਸਬ੍ਬਥਾ ਸਪ੍ਪਚ੍ਚਯਦੁਕਸਦਿਸਮੇਵ. ਸਪ੍ਪਚ੍ਚਯਸਙ੍ਖਤਉਭਯਦੁਕਂ ਸਬ੍ਬਥਾ ਸਦਿਸਮੇਵ. ਸਙ੍ਖਤਦੁਕਂ.
ਰੂਪਾਯਤਨਂ ਸਨਿਦਸ੍ਸਨਂ ਨਾਮ. ਸੇਸਰੂਪਚਿਤ੍ਤਚੇਤਸਿਕਨਿਬ੍ਬਾਨਾਨਿ ਅਨਿਦਸ੍ਸਨਾ ਨਾਮ. ਸਨਿਦਸ੍ਸਨਦੁਕਂ.
ਪਸਾਦਵਿਸਯਰੂਪਾਨਿ ਦ੍ਵਾਦਸ ਸਪ੍ਪਟਿਘਾ ਨਾਮ. ਸੇਸਰੂਪਚਿਤ੍ਤਚੇਤਸਿਕਨਿਬ੍ਬਾਨਾਨਿ ਅਪ੍ਪਟਿਘਾ ਨਾਮ. ਸਪ੍ਪਟਿਘਦੁਕਂ.
ਅਵਿਨਿਬ੍ਭੋਗਵਸੇਨ ਰੂਪਂ ਏਤੇਸਂ ਅਤ੍ਥੀਤਿ ਰੂਪਿਨੋ, ਰੁਪ੍ਪਨਲਕ੍ਖਣਂ ਵਾ ਰੂਪਂ, ਤਂ ਏਤੇਸਂ ਅਤ੍ਥੀਤਿ ਰੂਪਿਨੋ, ਭੂਤੋਪਾਦਾਯਰੂਪਮੇਵ. ਨ ਰੂਪਿਨੋ ਅਰੂਪਿਨੋ, ਚਿਤ੍ਤਚੇਤਸਿਕਨਿਬ੍ਬਾਨਾਨਿ. ਰੂਪਿਦੁਕਂ.
ਲੋਕੋ ਵੁਚ੍ਚਤਿ ਲੁਜ੍ਜਨਪਲੁਜ੍ਜਨਟ੍ਠੇਨ ਵਟ੍ਟਂ, ਤਸ੍ਮਿਂ ਪਰਿਯਾਪਨ੍ਨਭਾਵੇਨ ਲੋਕੇ ਨਿਯੁਤ੍ਤਾਤਿ ਲੋਕਿਯਾ, ਪਞ੍ਚੁਪਾਦਾਨਕ੍ਖਨ੍ਧਾ. ਤਤੋ ਲੋਕਤੋ ਤਤ੍ਥ ਅਪਰਿਯਾਪਨ੍ਨਭਾਵੇਨ ਉਤ੍ਤਿਣ੍ਣਾਤਿ ਲੋਕੁਤ੍ਤਰਾ, ਅਰਿਯਮਗ੍ਗਫਲਨਿਬ੍ਬਾਨਾਨਿ. ਚੇਤਸਿਕੇਸੁ ਪਨੇਤ੍ਥ ਯਂ ਵਤ੍ਤਬ੍ਬਂ, ਤਂ ਅਸੇਖਤ੍ਤਿਕੇ ਵੁਤ੍ਤਨਯੇਨ ਵੇਦਿਤਬ੍ਬਂ. ਲੋਕਿਯਦੁਕਂ.
ਕੇਨਚਿ ਵਿਞ੍ਞੇਯ੍ਯਾਤਿ ਚਕ੍ਖੁਵਿਞ੍ਞਾਣਾਦੀਸੁ ਕੇਨਚਿ ਏਕੇਨ ਚਕ੍ਖੁਵਿਞ੍ਞਾਣੇਨ ਵਾ ਸੋਤਵਿਞ੍ਞਾਣਾਦਿਨਾ ਵਾ ਵਿਜਾਨਿਤਬ੍ਬਾ. ਕੇਨਚਿ ਨ ਵਿਞ੍ਞੇਯ੍ਯਾਤਿ ਤੇਨੇਵ ਚਕ੍ਖੁਵਿਞ੍ਞਾਣੇਨ ਵਾ ਸੋਤਵਿਞ੍ਞਾਣਾਦਿਨਾ ਵਾ ਨ ਕੇਨਚਿ ਵਿਜਾਨਿਤਬ੍ਬਾਨਿ. ਏਵਂ ਹਿ ਸਤਿ ਦ੍ਵਿਨ੍ਨਮ੍ਪਿ ਪਦਾਨਂ ਅਤ੍ਥਨਾਨਤ੍ਤਤੋ ਦੁਕੋ ਹੋਤਿ. ਪਦਭਾਜਨੀਯਸ੍ਮਿਮ੍ਪਿ ‘‘ਯੇ ਤੇ ਧਮ੍ਮਾ ਚਕ੍ਖੁਵਿਞ੍ਞੇਯ੍ਯਾ, ਨ ਤੇ ਧਮ੍ਮਾ ਸੋਤਵਿਞ੍ਞੇਯ੍ਯਾ’’ਤਿ (ਧ. ਸ. ੧੧੦੧) ਏਤ੍ਤਕਂ ਏਕਦੁਕਨ੍ਤਿ ਅਗ੍ਗਹੇਤ੍ਵਾ ‘‘ਯੇ ਤੇ ਧਮ੍ਮਾ ਚਕ੍ਖੁਵਿਞ੍ਞੇਯ੍ਯਾ, ਨ ਤੇ ਧਮ੍ਮਾ ਸੋਤਵਿਞ੍ਞੇਯ੍ਯਾ, ਯੇ ਵਾ ਪਨ ਤੇ ਧਮ੍ਮਾ ਸੋਤਵਿਞ੍ਞੇਯ੍ਯਾ, ਨ ਤੇ ਧਮ੍ਮਾ ਚਕ੍ਖੁਵਿਞ੍ਞੇਯ੍ਯਾ’’ਤਿ (ਧ. ਸ. ੧੧੦੧) ਅਯਮੇਕੋ ਦੁਕੋਤਿ ਵੇਦਿਤਬ੍ਬੋ. ਤਸ੍ਸ ਪਨ ਰੂਪਂ ਚਕ੍ਖੁਵਿਞ੍ਞੇਯ੍ਯਂ, ਸਦ੍ਦੋ ਨ ਚਕ੍ਖੁਵਿਞ੍ਞੇਯ੍ਯੋਤਿ ਅਯਮਤ੍ਥੋ. ਏਵਂ ਸੇਸੇਸੁਪਿ ਦੁਕਪਰਿਚ੍ਛੇਦੋ ਞਾਤਬ੍ਬੋ. ਤਤ੍ਥ ਰੂਪਾਯਤਨਂ ਚਕ੍ਖੁਨਾ ਵਾ ਚਕ੍ਖੁਵਿਞ੍ਞਾਣੇਨ ਵਾ ਵਿਞ੍ਞੇਯ੍ਯਂ ਨਾਮ. ਸੇਸਰੂਪਾਰੂਪਧਮ੍ਮਾ ਤੇਨੇਵ ਚਕ੍ਖੁਨਾ ਵਾ ਚਕ੍ਖੁਵਿਞ੍ਞਾਣੇਨ ਵਾ ਕੇਨਚਿ ਨਵਿਞ੍ਞੇਯ੍ਯਾ. ਏਵਂ ਸੋਤਘਾਨਜਿਵ੍ਹਾਕਾਯਤਬ੍ਬਿਞ੍ਞਾਣਮੂਲਿਕਾਸੁਪਿ ਚਤੂਸੁ ਯੋਜਨਾਸੁ ਵਿਭਾਗੋ ਯਥਾਨੁਰੂਪਂ ਞਾਤਬ੍ਬੋ. ਰੂਪਾਦਯੋ ਪਨ ਪਞ੍ਚਵਿਸਯਾ ਮਨੋਧਾਤੁਤ੍ਤਯੇਨ ਕੇਨਚਿ ਵਿਞ੍ਞੇਯ੍ਯਾ. ਸੇਸਰੂਪਾਰੂਪਧਮ੍ਮਾ ਤੇਨੇਵ ਮਨੋਧਾਤੁਤ੍ਤਯੇਨ ਕੇਨਚਿ ਨਵਿਞ੍ਞੇਯ੍ਯਾ. ਕਿਞ੍ਚਾਪਿ ਸਾਮਞ੍ਞਤੋ ਮਨੋਵਿਞ੍ਞਾਣੇਨ ਅਵਿਞ੍ਞੇਯ੍ਯਸ੍ਸ ਅਭਾਵਤੋ ਪਾਲ਼ਿਯਂ ਮਨੋਵਿਞ੍ਞਾਣਵਿਞ੍ਞੇਯ੍ਯਵਸੇਨ ਦੁਕੋ ਨ ਵੁਤ੍ਤੋ, ਤਥਾਪਿ ਵਿਸੇਸਤੋ ਵਤ੍ਤਬ੍ਬੋਵ. ਤਥਾ ਹਿ ਛਬ੍ਬਿਧਾਪਿ ਕਾਮਾਵਚਰਧਮ੍ਮਾ ਕਾਮਾਵਚਰਵਿਪਾਕਾਦਿਨਾ ਮਨੋਵਿਞ੍ਞਾਣੇਨ ਕੇਨਚਿ ਵਿਞ੍ਞੇਯ੍ਯਾ, ਰੂਪਾਰੂਪਾਵਚਰਲੋਕੁਤ੍ਤਰਪਞ੍ਞਤ੍ਤਿਯੋ ਤੇਨੇਵ ਕੇਨਚਿ ਨਵਿਞ੍ਞੇਯ੍ਯਾ. ਤਥਾ ਕਾਮਰੂਪਾਰੂਪਾਵਚਰਪਞ੍ਞਤ੍ਤਿਯੋ ਅਕੁਸਲਾਦਿਨਾ ਕੇਨਚਿ ਵਿਞ੍ਞੇਯ੍ਯਾ, ਲੋਕੁਤ੍ਤਰਾ ਤੇਨੇਵ ਕੇਨਚਿ ਨਵਿਞ੍ਞੇਯ੍ਯਾ. ਤਥਾ ਨਿਬ੍ਬਾਨਂ ਲੋਕੁਤ੍ਤਰੇਨ ਕੇਨਚਿ ਵਿਞ੍ਞੇਯ੍ਯਂ, ਸੇਸਲੋਕਿਯਲੋਕੁਤ੍ਤਰਾ ਤੇਨੇਵ ਕੇਨਚਿ ਨਵਿਞ੍ਞੇਯ੍ਯਾਤਿ ਇਮਿਨਾ ਨਯੇਨ ਰੂਪਾਰੂਪਾਵਚਰਾਦਿਭੇਦੇਨ ਮਨੋਵਿਞ੍ਞਾਣੇਨ ਕੇਨਚਿ ਵਿਞ੍ਞੇਯ੍ਯਾਵਿਞ੍ਞੇਯ੍ਯਧਮ੍ਮਾ ਯਥਾਯੋਗਂ ਯੋਜੇਤਬ੍ਬਾ. ਏਵਂ ਸਬ੍ਬੇ ਧਮ੍ਮਾ ਕੇਨਚਿ ਵਿਞ੍ਞੇਯ੍ਯਾ, ਕੇਨਚਿ ਨ ਵਿਞ੍ਞੇਯ੍ਯਾ ਨਾਮ. ਇਮਸ੍ਮਿਞ੍ਚ ਦੁਕੇ ਪਞ੍ਞਤ੍ਤਿਯੋਪਿ ਲਬ੍ਭਨ੍ਤੀਤਿ ਵੇਦਿਤਬ੍ਬਾਤਿ. ਕੇਨਚਿਵਿਞ੍ਞੇਯ੍ਯਦੁਕਂ.
ਚੂਲ਼ਨ੍ਤਰਦੁਕਾ ਨਿਟ੍ਠਿਤਾ.
ਆਸਵਗੋਚ੍ਛਕੇ ਆਸਮਨ੍ਤਤੋ ਸਵਨ੍ਤੀਤਿ ਆਸਵਾ, ਚਕ੍ਖੁਤੋਪਿ…ਪੇ… ਮਨਤੋਪਿ ਸਵਨ੍ਤਿ, ਪਵਤ੍ਤਨ੍ਤੀਤਿ ਵੁਤ੍ਤਂ ਹੋਤਿ. ਧਮ੍ਮਤੋ ਯਾਵਗੋਤ੍ਰਭੁਂ, ਓਕਾਸਤੋ ਯਾਵਭਵਗ੍ਗਾ ਸਵਨ੍ਤੀਤਿ ਵਾ ਆਸਵਾ, ਏਤੇ ਧਮ੍ਮੇ, ਏਤਞ੍ਚ ਓਕਾਸਂ ਅਨ੍ਤੋਕਰਿਤ੍ਵਾ ਪਵਤ੍ਤਨ੍ਤੀਤਿ ਅਤ੍ਥੋ. ਅਨ੍ਤੋਕਰਣਤ੍ਥੋ ਹਿ ਅਯਂ ਆ-ਕਾਰੋ. ਚਿਰਪਾਰਿਵਾਸਿਯਟ੍ਠੇਨ ਮਦਿਰਾਦਿਆਸਵਾ ਵਿਯਾਤਿਪਿ ਆਸਵਾ. ਯਦਿ ਚ ਚਿਰਪਾਰਿਵਾਸਿਯਟ੍ਠੇਨ ਆਸਵਾ, ਏਤੇ ਏਵ ਭਵਿਤੁਂ ਅਰਹਨ੍ਤਿ. ਅਨਾਦਿਤ੍ਤਾ ਆਯਤਂ ਵਾ ਸਂਸਾਰਦੁਕ੍ਖਂ ਸਵਨ੍ਤਿ ਪਸਵਨ੍ਤੀਤਿਪਿ ਆਸਵਾ. ਤਤੋ ਅਞ੍ਞੇ ਨੋ ਆਸਵਾ ਨਾਮ.
ਤਤ੍ਥ ਕਾਮਾਸਵੋ ਭਵਾਸਵੋ ਦਿਟ੍ਠਾਸਵੋ ਅਵਿਜ੍ਜਾਸਵੋਤਿ ਇਮੇ ਚਤ੍ਤਾਰੋ ਆਸਵਾ ਨਾਮ. ਤਤ੍ਥ ਅਟ੍ਠਸੁ ਲੋਭਸਹਗਤਚਿਤ੍ਤੇਸੁ ਉਪ੍ਪਨ੍ਨੋ ਸਬ੍ਬੋਪਿ ਲੋਭੋ ਕਾਮਾਸਵੋ ਨਾਮ. ਅਟ੍ਠਸਾਲਿਨਿਯਂ ਪਨ ‘‘ਪਞ੍ਚਕਾਮਗੁਣਿਕੋ ਰਾਗੋ ਕਾਮਾਸਵੋ’’ਤਿ (ਧ. ਸ. ਅਟ੍ਠ. ੧੧੦੨) ਚ, ‘‘ਦਿਟ੍ਠਿਸਹਜਾਤੋ ਰਾਗੋ ਕਾਮਾਸਵੋ ਨ ਹੋਤਿ, ਦਿਟ੍ਠਿਰਾਗੋ ਨਾਮ ਹੋਤੀ’’ਤਿ (ਧ. ਸ. ਅਟ੍ਠ. ੧੧੦੫) ਚ, ‘‘ਯੋ ਬ੍ਰਹ੍ਮਾਨਂ ਵਿਮਾਨਕਪ੍ਪਰੁਕ੍ਖਾਭਰਣੇਸੁ ਛਨ੍ਦਰਾਗੋ ਉਪ੍ਪਜ੍ਜਤਿ, ਸੋ ਕਾਮਾਸਵੋ ਨ ਹੋਤਿ ਪਞ੍ਚਕਾਮਗੁਣਿਕਸ੍ਸ ਰਾਗਸ੍ਸ ਇਧੇਵ ਪਹੀਨਤ੍ਤਾ’’ਤਿ ਚ ਵੁਤ੍ਤਂ. ਪਾਲ਼ਿਯਂ ਪਨ ‘‘ਕਾਮਾਸਵੋ ਅਟ੍ਠਸੁ ਲੋਭਸਹਗਤੇਸੁ ਚਿਤ੍ਤੁਪ੍ਪਾਦੇਸੁ ਉਪ੍ਪਜ੍ਜਤੀ’’ਤਿ (ਧ. ਸ. ੧੪੬੫) ਚ, ‘‘ਕਾਮਾਸਵਂ ਪਟਿਚ੍ਚ ਦਿਟ੍ਠਾਸਵੋ ਅਵਿਜ੍ਜਾਸਵੋ’’ਤਿ (ਪਟ੍ਠਾ. ੩.੩.੧) ਚ ਵੁਤ੍ਤਤ੍ਤਾ ਭਵਾਸਵਂ ਠਪੇਤ੍ਵਾ ਅਵਸੇਸੋ ਸਬ੍ਬੋਪਿ ਲੋਭੋ ਕਾਮਾਸਵੋਤਿ ਪਞ੍ਞਾਯਤਿ ਦਿਟ੍ਠਿਸਮ੍ਪਯੁਤ੍ਤਰਾਗਸ੍ਸ, ਬ੍ਰਹ੍ਮਾਨਂ ਵਤ੍ਥਾਭਰਣਾਦੀਸੁ ਰਾਗਸ੍ਸ ਚ ਭਵਾਸਵਤ੍ਤਾਭਾਵਾ. ਦਿਟ੍ਠਿਵਿਪ੍ਪਯੁਤ੍ਤਰਾਗੋ ਏਵ ਹਿ ਰੂਪਾਰੂਪਭਵਪਤ੍ਥਨਾਵਸੇਨ ਪਵਤ੍ਤਿਯਂ ਭਵਾਸਵੋ ਹੋਤਿ ‘‘ਰੂਪਧਾਤੁਯਾ ਅਰੂਪਧਾਤੁਯਾ ਏਤ੍ਥ ਭਵਰਾਗਾਨੁਸਯੋ ਅਨੁਸੇਤੀ’’ਤਿਆਦਿਵਚਨਤੋ (ਯਮ. ੨.ਅਨੁਸਯਯਮਕ.੨), ਨ ਚ ਕਾਮਾਸਵਭਵਾਸਵਵਿਨਿਮੁਤ੍ਤੋ ਲੋਭੋ ਅਤ੍ਥਿ. ਯਦਿ ਸਿਯਾ, ‘‘ਲੋਭੋ ਸਿਯਾ ਆਸਵੋ, ਸਿਯਾ ਨੋ ਆਸਵੋ’’ਤਿ ਪਾਲ਼ਿਯਂ ਵਤ੍ਤਬ੍ਬੋ ਭਵੇਯ੍ਯ, ‘‘ਦਿਟ੍ਠਿਵਿਪ੍ਪਯੁਤ੍ਤਲੋਭੇਨ ਸਮ੍ਪਯੁਤ੍ਤੋ ਅਵਿਜ੍ਜਾਸਵੋ ਸਿਯਾ ਆਸਵਸਮ੍ਪਯੁਤ੍ਤੋ, ਸਿਯਾ ਆਸਵਵਿਪ੍ਪਯੁਤ੍ਤੋ’’ਤਿ ਚ ਵਤ੍ਤਬ੍ਬੋ ਸਿਯਾ. ਪਦਭਾਜਨੀਯੇ ਚ ਕਾਮਾਸਵਨਿਦ੍ਦੇਸੇ ਆਗਤਸ੍ਸ ‘‘ਕਾਮੇਸੁ ਕਾਮਚ੍ਛਨ੍ਦੋ’’ਤਿ (ਧ. ਸ. ੧੧੦੩) ਇਮਸ੍ਸ ਪਦਸ੍ਸ ਅਟ੍ਠਸਾਲਿਨਿਯਂ ‘‘ਪਞ੍ਚਕਾਮਗੁਣੇਸੁ ਕਾਮਚ੍ਛਨ੍ਦੋ’’ਤਿ (ਧ. ਸ. ਅ. ੧੧੦੩) ਅਤ੍ਥੋ ਵੁਤ੍ਤੋ, ਤਸ੍ਸ ਪਨ ਪਦਸ੍ਸ ਵਤ੍ਥੁਕਾਮੇਸੁ ਕਿਲੇਸਕਾਮੋਤਿਪਿ ਅਤ੍ਥਯੋਜਨਾ ਸਕ੍ਕਾ ਕਾਤੁਂ ਤੇਭੁਮਕਸ੍ਸ ਧਮ੍ਮਸ੍ਸ ਵਤ੍ਥੁਕਾਮਤ੍ਤਾ, ਤਤ੍ਥ ਸਬ੍ਬਤ੍ਥ ਰਾਗਸ੍ਸ ਚ ਕਿਲੇਸਕਾਮਤ੍ਤਾ. ਵੁਤ੍ਤਂ ਹੇਤਂ ਧਮ੍ਮਸੇਨਾਪਤਿਨਾ ਮਹਾਨਿਦ੍ਦੇਸੇ –
‘‘ਕਤਮੇ ਵਤ੍ਥੁਕਾਮਾ? ਮਨਾਪਿਕਾ ਰੂਪਾ…ਪੇ… ਸਬ੍ਬੇਪਿ ਕਾਮਾਵਚਰਾ ਧਮ੍ਮਾ, ਸਬ੍ਬੇਪਿ ਰੂਪਾਵਚਰਾ ਧਮ੍ਮਾ, ਸਬ੍ਬੇਪਿ ਅਰੂਪਾਵਚਰਾ ਧਮ੍ਮਾ…ਪੇ… ਇਮੇ ਵੁਚ੍ਚਨ੍ਤਿ ਵਤ੍ਥੁਕਾਮਾ.
‘‘ਕਤਮੇ ਕਿਲੇਸਕਾਮਾ? ਛਨ੍ਦੋ ਕਾਮੋ ਰਾਗੋ ਕਾਮੋ…ਪੇ… ਯੋ ਕਾਮੇਸੁ ਕਾਮਚ੍ਛਨ੍ਦੋ ਕਾਮਰਾਗੋ ਕਾਮਨਨ੍ਦੀ ਕਾਮਤਣ੍ਹਾ ਕਾਮਸ੍ਨੇਹੋ ਕਾਮਪਰਿਲ਼ਾਹੋ ਕਾਮਮੁਚ੍ਛਾ ਕਾਮਜ੍ਝੋਸਾਨਂ ਕਾਮੋਘੋ ਕਾਮਯੋਗੋ ਕਾਮੁਪਾਦਾਨਂ ਕਾਮਚ੍ਛਨ੍ਦਨੀਵਰਣਂ…ਪੇ… ਇਮੇ ਵੁਚ੍ਚਨ੍ਤਿ ਕਿਲੇਸਕਾਮਾ’’ਤਿ (ਮਹਾਨਿ. ੧).
ਅਪਿਚੇਤ੍ਥ ‘‘ਕਾਮੋਘੋ ਕਾਮਯੋਗੋ’’ਤਿਆਦਿਨਾ ਕਿਲੇਸਕਾਮਸ੍ਸ ਕਾਮੋਘਾਦਿਭਾਵਂ ਵਦਤਾ ਧਮ੍ਮਸੇਨਾਪਤਿਨਾ ਵਤ੍ਥੁਕਾਮਤ੍ਤਵਿਸਯਸ੍ਸ ਰਾਗਸ੍ਸ ਆਸਵਾਦਿਭਾਵੋ ਅਨੁਞ੍ਞਾਤੋ, ਨ ਪਞ੍ਚਕਆਮਗੁਣਿਕਸ੍ਸੇਵ ਰਾਗਸ੍ਸ. ਨ ਚ ਓਘਾਸਵੇਸੁ ਕੋਚਿ ਵਿਸੇਸੋ ਅਤ੍ਥਿ. ਅਟ੍ਠਸਾਲਿਨਿਯਮ੍ਪਿ ਹਿ ਉਪਾਦਾਨਗੋਚ੍ਛਕਸ੍ਸ ਪਦਭਾਜਨੀਯੇ ‘‘ਕਾਮੇਸੁ ਕਾਮਚ੍ਛਨ੍ਦੋ’’ਤਿ (ਧ. ਸ. ੧੨੨੦) ਇਮਸ੍ਸ ‘‘ਵਤ੍ਥੁਕਾਮੇਸੁ ਕਾਮਚ੍ਛਨ੍ਦੋ’’ਤਿ (ਧ. ਸ. ਅ. ੧੨੨੦) ਅਯਮੇਵਤ੍ਥੋ ਵੁਤ੍ਤੋ. ਤਤੋ ਅਞ੍ਞੇਸੁ ਹੇਤੁਗਨ੍ਥਕਿਲੇਸਗੋਚ੍ਛਕੇਸੁ ਲੋਭਸ੍ਸੇਵ ਅਨਵਸੇਸਪਰਿਯਾਦਾਨਂ ਵੁਤ੍ਤਂ, ਨ ਇਤਰਗੋਚ੍ਛਕੇਸੁ. ਤੇਸੁ ਚ ਲੋਭਸ੍ਸ ਪਾਲ਼ਿਅਨੁਸਾਰਤੋ ਓਲੋਕਿਯਮਾਨੇ ਕਿਲੇਸਕਾਮਮਤ੍ਤਕੋ. ਅਨਵਸੇਸਲੋਭਪਰਿਯਾਦਾਨਂ ਪਞ੍ਞਾਯਤਿ. ਵੀਮਂਸਿਤ੍ਵਾ ਗਹੇਤਬ੍ਬਂ.
ਚਤੂਸੁ ਪਨ ਦਿਟ੍ਠਿਗਤਵਿਪ੍ਪਯੁਤ੍ਤਚਿਤ੍ਤੇਸੁ ਉਪ੍ਪਨ੍ਨੋ ਰੂਪਾਰੂਪਭਵੇਸੁ ਛਨ੍ਦਰਾਗਭਾਵੇਨ, ਕਾਮਜ੍ਝੋਸਾਨਨਿਕਨ੍ਤਿਭਾਵੇਨ ਚ ਪਵਤ੍ਤੋ ਲੋਭੋ ਭਵਾਸਵੋ ਨਾਮ. ਅਟ੍ਠਸਾਲਿਨਿਯਂ ਪਨ ‘‘ਸਸ੍ਸਤਦਿਟ੍ਠਿਸਹਜਾਤੋ ਰਾਗੋ ਭਵਾਸਵੋ’’ਤਿ (ਧ. ਸ. ਅਟ੍ਠ. ੧੧੦੨) ਵੁਤ੍ਤਂ. ਪਾਲ਼ਿਯਂ ਪਨ ‘‘ਭਵਾਸਵੋ ਚਤੂਸੁ ਦਿਟ੍ਠਿਗਤਵਿਪ੍ਪਯੁਤ੍ਤਲੋਭਸਹਗਤੇਸੂ’’ਤਿ (ਧ. ਸ. ੧੪੬੫) ਨਿਯਮਿਤਤ੍ਤਾ ਨ ਸਕ੍ਕਾ ਗਹੇਤੁਂ, ਅਧਿਪ੍ਪਾਯੋ ਪਨ ਗਵੇਸਿਤਬ੍ਬੋ. ਦ੍ਵਾਸਟ੍ਠਿਪਭੇਦਾ ਸਬ੍ਬਾਪਿ ਦਿਟ੍ਠਿ ਦਿਟ੍ਠਾਸਵੋ ਨਾਮ. ਅਟ੍ਠਵਤ੍ਥੁਕੋ ਸਬ੍ਬੋਪਿ ਮੋਹੋ ਅਵਿਜ੍ਜਾਸਵੋ ਨਾਮ. ਤੇਸੁ ਦਿਟ੍ਠਾਸਵੋ ਪਠਮੇਨ ਮਗ੍ਗੇਨ ਪਹੀਯਤਿ, ਕਾਮਾਸਵੋ ਚਤੂਹਿਪੀਤਿ ਵਤ੍ਤੁਂ ਯੁਤ੍ਤਂ, ‘‘ਤਤਿਯੇਨਾ’’ਤਿ ਪਨ ਵੁਤ੍ਤਂ. ਭਵਾਸਵੋ, ਅਵਿਜ੍ਜਾਸਵੋ ਚ ਚਤੁਤ੍ਥੇਨ ਪਹੀਯਤਿ. ਇਮੇਸਞ੍ਚ ਕਾਮਾਸਵਭਵਾਸਵਾਨਂ ਲੋਭਸਭਾਵਤ੍ਤਾ ਸਭਾਵਤੋ ਤਯੋ ਧਮ੍ਮਾ ਵਿਭਾਗਤੋ ਚਤ੍ਤਾਰੋ ਆਸਵਾ ਨਾਮ ਜਾਤਾ. ਇਮੇ ਠਪੇਤ੍ਵਾ ਸੇਸਾ ਲੋਕਿਯਲੋਕੁਤ੍ਤਰਾ ਸਬ੍ਬੇ ਧਮ੍ਮਾ ਨੋ ਆਸਵਾ ਨਾਮ. ਆਸਵਦੁਕਂ ਪਠਮਂ.
ਅਤ੍ਤਾਨਂ ਆਰਮ੍ਮਣਂ ਕਤ੍ਵਾ ਪਵਤ੍ਤੇਹਿ ਸਹ ਆਸਵੇਹੀਤਿ ਸਾਸਵਾ, ਸਬ੍ਬੇ ਲੋਕਿਯਧਮ੍ਮਾ. ਏਵਂ ਪਵਤ੍ਤਮਾਨਾ ਨਤ੍ਥਿ ਏਤੇਸਂ ਆਸਵਾਤਿ ਅਨਾਸਵਾ, ਨਵ ਲੋਕੁਤ੍ਤਰਧਮ੍ਮਾਵ. ਚੇਤਸਿਕਾ ਪਨੇਤ੍ਥ ਲੋਕਿਯਦੁਕੇ ਵੁਤ੍ਤਸਦਿਸਾਵ. ਸਾਸਵਦੁਕਂ ਦੁਤਿਯਂ.
ਤਤਿਯਾਦੀਨਂ ਚਤੁਨ੍ਨਂ ਦੁਕਾਨਂ ਪਦਤ੍ਥੋ ਵੁਤ੍ਤਨਯੋਵ. ਸੇਸਮੇਤ੍ਥ ਹੇਤੁਗੋਚ੍ਛਕੇ ਵੁਤ੍ਤਨਯੇਨ ਵੇਦਿਤਬ੍ਬਂ. ਅਯਂ ਪਨ ਵਿਸੇਸੋ – ਯਥਾ ਤਤ੍ਥ ‘‘ਨ ਹੇਤੂ ਖੋ ਪਨ ਧਮ੍ਮਾ ਸਹੇਤੁਕਾਪਿ, ਅਹੇਤੁਕਾਪੀ’’ਤਿ ਅਯਂ ਓਸਾਨਦੁਕੋ ਪਠਮਦੁਕੇ ਦੁਤਿਯਪਦਂ ਦੁਤਿਯਦੁਕੇਨ ਯੋਜੇਤ੍ਵਾ ਵੁਤ੍ਤੋ, ਏਵਮਿਧ ‘‘ਨੋ ਆਸਵਾ ਖੋ ਪਨ ਧਮ੍ਮਾ ਸਾਸਵਾਪਿ, ਅਨਾਸਵਾਪੀ’’ਤਿ ਨ ਵੁਤ੍ਤੋ. ਅਯਞ੍ਚ ਤਤ੍ਥ ਤਤ੍ਥ ਵੁਤ੍ਤਨਯੇਨ ਇਹ ਸਙ੍ਗਹਿਤੋਤਿ ਵੇਦਿਤਬ੍ਬੋ. ਯਥਾ ਚੇਤ੍ਥ, ਏਵਂ ਸਞ੍ਞੋਜਨਗੋਚ੍ਛਕਾਦੀਸੁਪਿ ਯਥਾਨੁਰੂਪਂ ਞਾਤਬ੍ਬਂ.
ਤਤ੍ਥ ਦ੍ਵਾਦਸ ਅਕੁਸਲਚਿਤ੍ਤੁਪ੍ਪਾਦਾ ਆਸਵਸਮ੍ਪਯੁਤ੍ਤਾ ਨਾਮ. ਦੋਸਮੋਹਮੂਲਚਿਤ੍ਤੇਸੁ ਮੋਹੋ, ਕੁਸਲਾਬ੍ਯਾਕਤਚਿਤ੍ਤਰੂਪਨਿਬ੍ਬਾਨਾਨਿ ਚ ਆਸਵਵਿਪ੍ਪਯੁਤ੍ਤਾ ਨਾਮ. ਚੇਤਸਿਕੇਸੁ ਪਨ ਮੋਹਂ ਠਪੇਤ੍ਵਾ ਸੇਸਾ ਅਕੁਸਲਾ ਆਸਵਸਮ੍ਪਯੁਤ੍ਤਾਵ, ਮੋਹੋ ਪਨ ਤਿਜਾਤਿਕੋ ਚ ਦ੍ਵਿਧਾਪਿ ਹੋਤਿ, ਸੇਸਾ ਆਸਵਵਿਪ੍ਪਯੁਤ੍ਤਾ ਏਵਾਤਿ. ਤਤਿਯਂ.
ਚਤ੍ਤਾਰੋ ਆਸਵਾ ਆਸਵਾ ਚੇਵ ਸਾਸਵਾ ਚ ਨਾਮ. ਤਦਵਸੇਸਾ ਲੋਕਿਯਧਮ੍ਮਾ ਸਾਸਵਾ ਚੇਵ ਨੋ ਚ ਆਸਵਾ ਨਾਮ. ਇਧ ਪਨ ਲੋਕੁਤ੍ਤਰਾ ਨ ਵਤ੍ਤਬ੍ਬਾ. ਚੇਤਸਿਕੇਸੁ ਪਨ ਆਸਵਾਤਿ ਵੁਤ੍ਤੇਹਿ ਸੇਸਾ ਅਕੁਸਲਾ, ਕਰੁਣਾਮੁਦਿਤਾ ਚ ਸਾਸਵਾ ਚੇਵ ਨੋ ਚ ਆਸਵਾ ਏਵ, ਸੇਸਾ ਤਥਾ ਚ ਨ ਵਤ੍ਤਬ੍ਬਾ ਚ. ਚਤੁਤ੍ਥਂ.
ਯੇ ਪਨ ਲੋਭਮੂਲੇਸੁ ਲੋਭਮੋਹਾ, ਲੋਭਦਿਟ੍ਠਿਮੋਹੋ ਚਾਤਿ ਦ੍ਵੇ ਤਯੋ ਏਕਤੋ ਕਤ੍ਵਾ ਉਪ੍ਪਜ੍ਜਨ੍ਤਿ, ਤੇ ਆਸਵਾ ਚੇਵ ਆਸਵਸਮ੍ਪਯੁਤ੍ਤਾ ਚ ਨਾਮ. ਦ੍ਵਾਦਸ ਅਕੁਸਲਚਿਤ੍ਤਾਨਿ ਚੇਵ ਆਸਵਵਜ੍ਜਿਤਾ ਤਂਸਮ੍ਪਯੁਤ੍ਤਾ ਚ ਆਸਵਸਮ੍ਪਯੁਤ੍ਤਾ ਚੇਵ ਨੋ ਚ ਆਸਵਾ ਨਾਮ. ਇਧ ਪਨ ਆਸਵਵਿਪ੍ਪਯੁਤ੍ਤਾ ਨ ਵਤ੍ਤਬ੍ਬਾ. ਚੇਤਸਿਕੇਸੁ ਪਨ ਆਸਵਵਜ੍ਜਿਤਾ ਅਕੁਸਲਾ ਆਸਵਸਮ੍ਪਯੁਤ੍ਤਾ ਚੇਵ ਨੋ ਚ ਆਸਵਾ ਏਵ, ਮੋਹੋ ਸਿਯਾ ਆਸਵੋ ਚੇਵ ਆਸਵਸਮ੍ਪਯੁਤ੍ਤੋ ਚ, ਸਿਯਾ ਨ ਵਤ੍ਤਬ੍ਬੋ, ਤਿਜਾਤਿਕਾ ਸਿਯਾ ਆਸਵਸਮ੍ਪਯੁਤ੍ਤਾ ਚੇਵ ਨੋ ਚ ਆਸਵਾ, ਸਿਯਾ ਨ ਵਤ੍ਤਬ੍ਬਾ, ਕੁਸਲਾਬ੍ਯਾਕਤਾ ਨ ਵਤ੍ਤਬ੍ਬਾਵ. ਸੇਸਂ ਸੁਵਿਞ੍ਞੇਯ੍ਯਮੇਵ. ਪਞ੍ਚਮਂ.
ਲੋਕੁਤ੍ਤਰਵਜ੍ਜਿਤਾ ਆਸਵਵਿਪ੍ਪਯੁਤ੍ਤਾ ਸਾਸਵਾ ਨਾਮ. ਲੋਕੁਤ੍ਤਰਾ ਆਸਵਵਿਪ੍ਪਯੁਤ੍ਤਾ ਅਨਾਸਵਾ ਨਾਮ. ਇਧ ਪਨ ਆਸਵਸਮ੍ਪਯੁਤ੍ਤਾ ਨ ਵਤ੍ਤਬ੍ਬਾਵ. ਚੇਤਸਿਕੇਸੁ ਪਨ ਕਰੁਣਾਮੁਦਿਤਾ ਆਸਵਵਿਪ੍ਪਯੁਤ੍ਤਾ ਸਾਸਵਾ ਏਵ, ਮੋਹੋ ਤਥਾ ਚ ਨ ਵਤ੍ਤਬ੍ਬੋ ਚ, ਸੇਸਕੁਸਲਾਬ੍ਯਾਕਤਾ ਦ੍ਵਿਧਾਪਿ ਹੋਨ੍ਤਿ, ਤਿਜਾਤਿਕਾ ਦ੍ਵਿਧਾਪਿ ਨ ਵਤ੍ਤਬ੍ਬਾਵ, ਮੋਹਵਜ੍ਜਿਤਾ ਪਨ ਅਕੁਸਲਾ ਨ ਵਤ੍ਤਬ੍ਬਾਵ. ਛਟ੍ਠਂ.
ਆਸਵਗੋਚ੍ਛਕਂ ਨਿਟ੍ਠਿਤਂ.
ਸਂਯੋਜਨਗੋਚ੍ਛਕੇ ਯਸ੍ਸ ਸਂਵਿਜ੍ਜਨ੍ਤਿ, ਤਂ ਪੁਗ੍ਗਲਂ ਵਟ੍ਟਸ੍ਮਿਂ ਸਂਯੋਜੇਨ੍ਤਿ ਬਨ੍ਧਨ੍ਤੀਤਿ ਸਂਯੋਜਨਾ. ਤਤੋ ਅਞ੍ਞੇ ਨੋ ਸਂਯੋਜਨਾ.
ਤਤ੍ਥ ਕਾਮਰਾਗਸਂਯੋਜਨਂ ਭਵਰਾਗਪਟਿਘਮਾਨਦਿਟ੍ਠਿਵਿਚਿਕਿਚ੍ਛਾਸੀਲਬ੍ਬਤਪਰਾਮਾਸਇਸ੍ਸਾਮਚ੍ਛਰਿਯਅਵਿਜ੍ਜਾਸਂਯੋਜਨਨ੍ਤਿ ਇਮੇ ਦਸ ਧਮ੍ਮਾ ਸਂਯੋਜਨਾ ਨਾਮ. ਤੇਸੁ ਕਾਮਭਵਦਿਟ੍ਠਿਅਵਿਜ੍ਜਾਸਂਯੋਜਨਾਨਿ ਆਸਵਗੋਚ੍ਛਕੇ ਵੁਤ੍ਤਨਯਾਨੇਵ. ‘‘ਅਨਤ੍ਥਂ ਮੇ ਅਚਰਿ, ਚਰਤਿ, ਚਰਿਸ੍ਸਤਿ, ਪਿਯਸ੍ਸ ਮੇ ਅਨਤ੍ਥਂ ਅਚਰਿ, ਚਰਤਿ, ਚਰਿਸ੍ਸਤਿ, ਅਪ੍ਪਿਯਸ੍ਸ ਮੇ ਅਤ੍ਥਂ ਅਚਰਿ, ਚਰਤਿ, ਚਰਿਸ੍ਸਤੀ’’ਤਿ (ਧ. ਸ. ੧੦੬੬) ਏਵਂ ਵੁਤ੍ਤੇਹਿ ਨਵਹਿ ਆਕਾਰੇਹਿ ਸਤ੍ਤੇਸੁ, ਅਟ੍ਠਾਨਕੋਪਵਸੇਨ ਸਙ੍ਖਾਰੇਸੁ ਚ ਉਪ੍ਪਜ੍ਜਮਾਨੋ ਸਬ੍ਬੋਪਿ ਦੋਸੋ ਪਟਿਘਸਂਯੋਜਨਂ ਨਾਮ.
‘‘ਸੇਯ੍ਯੋਹਮਸ੍ਮਿ, ਸਦਿਸੋਹਮਸ੍ਮਿ, ਹੀਨੋਹਮਸ੍ਮੀ’’ਤਿ ਏਵਂ ਤੀਹਿ ਆਕਾਰੇਹਿ ਪਵਤ੍ਤੋ ਸਬ੍ਬੋ ਮਾਨੋ ਮਾਨਸਂਯੋਜਨਂ ਨਾਮ. ਤਤ੍ਥ ਸੇਯ੍ਯਸ੍ਸੇਵ ਸਤੋ ਪੁਗ੍ਗਲਸ੍ਸ ‘‘ਸੇਯ੍ਯੋਹਮਸ੍ਮਿ, ਸਦਿਸੋ, ਹੀਨੋ’’ਤਿ ਚ ਤਿਧਾ ਮਾਨੋ ਉਪ੍ਪਜ੍ਜਤਿ, ਤਥਾ ਸਦਿਸਹੀਨਾਨਮ੍ਪਿ. ਤਤ੍ਥ ਸੇਯ੍ਯਸ੍ਸ ਸੇਯ੍ਯਮਾਨੋਵ ਯਾਥਾਵਮਾਨੋ. ਤਥਾ ਸਦਿਸਸ੍ਸ ਸਦਿਸਮਾਨੋ, ਹੀਨਸ੍ਸ ਹੀਨਮਾਨੋ ਚ. ਤਿਣ੍ਣਮ੍ਪਿ ਇਤਰੇ ਦ੍ਵੇ ਦ੍ਵੇ ਮਾਨਾ ਅਯਾਥਾਵਮਾਨਾਤਿ ਞਾਤਬ੍ਬਾ.
ਸਤ੍ਥੁਧਮ੍ਮਸਙ੍ਘਸਿਕ੍ਖਾਸੁ, ਪੁਬ੍ਬਨ੍ਤਾਪਰਨ੍ਤਤਦੁਭਯਪਟਿਚ੍ਚਸਮੁਪ੍ਪਨ੍ਨੇਸੁ ਚ ਕਙ੍ਖਤਾਵਸੇਨ ਪਵਤ੍ਤਾ ਸਬ੍ਬਾਪਿ ਵਿਚਿਕਿਚ੍ਛਾ ਵਿਚਿਕਿਚ੍ਛਾਸਂਯੋਜਨਂ ਨਾਮ.
ਗੋਸੀਲਗੋਵਤਾਦੀਹਿ ਸੁਦ੍ਧੀਤਿ ਗਹਣਾਕਾਰਪ੍ਪਵਤ੍ਤਾ ਦਿਟ੍ਠਿ ਏਵ ਸੀਲਬ੍ਬਤਪਰਾਮਾਸਸਂਯੋਜਨਂ ਨਾਮ.
ਤਦਵਸੇਸਾ ਦਿਟ੍ਠਿ ਦਿਟ੍ਠਿਸਂਯੋਜਨਨ੍ਤਿ ਗਹੇਤਬ੍ਬਂ.
ਪਰਲਾਭਸਕ੍ਕਾਰਗਰੁਕਾਰਮਾਨਨਵਨ੍ਦਨਪੂਜਨਾਦੀਸੁ ਅਸਹਨਾਕਾਰੇਨ ਪਵਤ੍ਤਾ ਇਸ੍ਸਾ ਇਸ੍ਸਾਸਂਯੋਜਨਂ ਨਾਮ. ਆਵਾਸਮਚ੍ਛਰਿਯਂ ਕੁਲਲਾਭਵਣ੍ਣਧਮ੍ਮਮਚ੍ਛਰਿਯਨ੍ਤਿ ਪਞ੍ਚਵਿਧਂ ਮਚ੍ਛਰਿਯਂ ਮਚ੍ਛਰਿਯਸਂਯੋਜਨਂ ਨਾਮ. ਸਕਲਾਰਾਮੇਪਿ ਹਿ ਪਰਿਵੇਣੋਵਰਕਾਦੀਸੁ ਵਾ ਵਸਨ੍ਤੋ ਤਤ੍ਥ ਅਞ੍ਞਸ੍ਸ ਵਤ੍ਤਸਮ੍ਪਨ੍ਨਸ੍ਸ ਪੇਸਲਸ੍ਸ ਭਿਕ੍ਖੁਨੋ ਆਗਮਨਂ ਨ ਇਚ੍ਛਤਿ, ਆਗਤਸ੍ਸਾਪਿ ਖਿਪ੍ਪਂ ਗਮਨਞ੍ਞੇਵ ਇਚ੍ਛਤਿ, ਇਦਂ ਆਵਾਸਮਚ੍ਛਰਿਯਂ ਨਾਮ. ਭਣ੍ਡਨਕਾਰਕਾਦੀਨਂ ਪਨ ਤਤ੍ਥ ਵਾਸਂ ਅਨਿਚ੍ਛਤੋ ਆਵਾਸਮਚ੍ਛਰਿਯਂ ਨਾਮ ਨ ਹੋਤਿ.
ਅਤ੍ਤਨੋ ਪਨ ਉਪਟ੍ਠਾਕਕੁਲੇ ਵਾ ਞਾਤਿਕੁਲੇ ਵਾ ਅਞ੍ਞਸ੍ਸ ਪੇਸਲਸ੍ਸ ਉਪਸਙ੍ਕਮਨਂ ਅਨਿਚ੍ਛਤੋ ਕੁਲਮਚ੍ਛਰਿਯਂ ਹੋਤਿ, ਪਾਪਪੁਗ੍ਗਲਸ੍ਸ ਅਨਿਚ੍ਛਤੋ ਪਨ ਨ ਹੋਤਿ. ਸੋ ਹਿ ਤੇਸਂ ਪਸਾਦਭੇਦਾਯ ਪਟਿਪਜ੍ਜਤੀਤਿ.
ਅਤ੍ਤਨਾ ਲਭਨਟ੍ਠਾਨੇ ਚਤੁਪਚ੍ਚਯਂ ਲਭਨ੍ਤੇ ਸੀਲਵਨ੍ਤੇ ਦਿਸ੍ਵਾ ‘‘ਮਾ ਲਭਨ੍ਤੂ’’ਤਿ ਚਿਨ੍ਤੇਨ੍ਤਸ੍ਸ ਲਾਭਮਚ੍ਛਰਿਯਂ ਹੋਤਿ. ਯੋ ਪਨ ਸਦ੍ਧਾਦੇਯ੍ਯਂ ਵਿਨਿਪਾਤੇਤਿ, ਪੂਤਿਭਾਵਮ੍ਪਿ ਗਚ੍ਛਨ੍ਤਂ ਅਞ੍ਞਸ੍ਸ ਨ ਦੇਤਿ, ਤਂ ਲਭਨ੍ਤਂ ਦਿਸ੍ਵਾ ‘‘ਸਚੇ ਇਮਂ ਅਞ੍ਞੋ ਸੀਲਵਾ ਲਭੇਯ੍ਯ, ਪਰਿਭੋਗਂ ਗਚ੍ਛੇਯ੍ਯਾ’’ਤਿ ਚਿਨ੍ਤੇਨ੍ਤਸ੍ਸ ਮਚ੍ਛਰਿਯਂ ਨਾਮ ਨਤ੍ਥਿ.
ਵਣ੍ਣੋ ਨਾਮ ਅਤ੍ਤਨਾ ਸਦਿਸੋ ਸਰੀਰਵਣ੍ਣੋਪਿ ਗੁਣਵਣ੍ਣੋਪਿ. ਤਤ੍ਥ ‘‘ਰੂਪਵਾ ਪਾਸਾਦਿਕੋ’’ਤਿ ਪਰਸ੍ਸ ਸਰੀਰਵਣ੍ਣਂ, ‘‘ਸੀਲਵਾ, ਧੁਤਵਾ’’ਤਿਆਦਿਨਾ ਗੁਣਵਣ੍ਣਞ੍ਚ ਅਤ੍ਤਨੋ ਵਣ੍ਣਭਣਨਟ੍ਠਾਨੇ ਵੁਚ੍ਚਮਾਨਂ ਅਸਹਨ੍ਤਸ੍ਸ ਦੁਵਿਧਂ ਵਣ੍ਣਮਚ੍ਛਰਿਯਂ ਨਾਮ ਹੋਤਿ, ਅਪੇਸਲਂ ਪਨ ਵਿਪਨ੍ਨਂ ਪਸਂਸਿਤ੍ਵਾ ਪਰਿਸਾਸੁ ਉਪਤ੍ਥਮ੍ਭੇਨ੍ਤਂ ਦਿਸ੍ਵਾ ਪਾਪਗਰਹਿਤਾਯ ਅਸਹਨ੍ਤਸ੍ਸ ਨ ਹੋਤਿ.
ਧਮ੍ਮੋਤਿ ਪਰਿਯਤ੍ਤਿਯੇਵ, ਨ ਪਟਿਵੇਧੋ ਅਰਿਯਾਨਂ ਤਤ੍ਥ ਮਚ੍ਛਰਿਯਾਭਾਵਾ. ਪਰਿਯਤ੍ਤਿਂ ਪਨ ਗੁਲ਼੍ਹਗਨ੍ਥਂ ਅਞ੍ਞੇਸਂ ਅਕਥੇਤੁਕਾਮਸ੍ਸ ਧਮ੍ਮਮਚ੍ਛਰਿਯਂ ਨਾਮ ਹੋਤਿ, ਧਮ੍ਮਾਨੁਗ੍ਗਹੇਨ ਪਨ ਲੋਲਸ੍ਸ, ਕਾਲੇਨ ਸਮਣੋ, ਕਾਲੇਨ ਨਿਗਣ੍ਠਾਦਿ ਚ ਹੁਤ੍ਵਾ ਵਿਚਰਨ੍ਤਸ੍ਸ ਪਵੇਣਿਆਗਤਂ ਤਨ੍ਤਿਂ ‘‘ਸਣ੍ਹਸੁਖੁਮਂ ਧਮ੍ਮਨ੍ਤਰਂ ਭਿਨ੍ਦਿਤ੍ਵਾ ਆਲੁਲ਼ਿਸ੍ਸਤਿ, ਅਮ੍ਹਾਕਂ ਸਮਯਂ ਭਿਨ੍ਦਿਸ੍ਸਤੀ’’ਤਿ ਚ ਨ ਦੇਨ੍ਤਸ੍ਸ, ਪੁਗ੍ਗਲਾਨੁਗ੍ਗਹੇਨ ਵਾ ਪਕਤਿਯਾ ਸਠਸ੍ਸ ਮਾਯਾਵਿਨੋ ‘‘ਸਣ੍ਹਸੁਖੁਮਧਮ੍ਮਂ ਉਗ੍ਗਣ੍ਹਿਤ੍ਵਾ ਅਞ੍ਞਂ ਬ੍ਯਾਕਰਿਤ੍ਵਾ ਨਸ੍ਸਿਸ੍ਸਤੀ’’ਤਿ ਨ ਦੇਨ੍ਤਸ੍ਸ ਚ ਧਮ੍ਮਮਚ੍ਛਰਿਯਂ ਨ ਹੋਤਿ. ਯਥਾ ਚ ਭਿਕ੍ਖੂਨਂ, ਏਵਂ ਗਹਟ੍ਠਾਨਮ੍ਪਿ ਪਞ੍ਚਵਿਧਂ ਮਚ੍ਛਰਿਯਂ ਯਥਾਨੁਰੂਪਂ ਞਾਤਬ੍ਬਂ. ਸਙ੍ਖੇਪਤੋ ਪਨ ਗਹਟ੍ਠਪਬ੍ਬਜਿਤਾਨਂ ਅਤ੍ਤਸਮ੍ਪਤ੍ਤਿਨਿਗੂਹਨਲਕ੍ਖਣਂ ਮਚ੍ਛਰਿਯਂ ਨਾਮਾਤਿ ਗਹੇਤਬ੍ਬਂ.
ਇਮੇਸੁ ਚ ਸਂਯੋਜਨੇਸੁ ਦਿਟ੍ਠਿਵਿਚਿਕਿਚ੍ਛਾਸੀਲਬ੍ਬਤਪਰਾਮਾਸਇਸ੍ਸਾਮਚ੍ਛਰਿਯਾਨਿ ਸੋਤਾਪਤ੍ਤਿਮਗ੍ਗੇਨ ਪਹੀਯਨ੍ਤਿ, ਪਟਿਘੋ ਅਨਾਗਾਮਿਮਗ੍ਗੇਨ, ਕਾਮਰਾਗੋ ਚਤੂਹਿਪੀਤਿ ਵਤ੍ਤਬ੍ਬਂ, ‘‘ਤਤਿਯੇਨਾ’’ਤਿ ਪਨ ਵੁਤ੍ਤਂ. ਮਾਨਭਵਰਾਗਅਵਿਜ੍ਜਾ ਅਰਹਤ੍ਤਮਗ੍ਗੇਨ. ਤਤ੍ਥ ਚ ਅਯਾਥਾਵਮਾਨੋ ਪਠਮਮਗ੍ਗੇਨ ਪਹੀਯਤੀਤਿ ਦਟ੍ਠਬ੍ਬੋ, ਇਮੇਸਂ ਕਾਮਰਾਗਭਵਰਾਗਾਨਂ ਲੋਭਸਭਾਵਤ੍ਤਾ ਦਿਟ੍ਠਿਸੀਲਬ੍ਬਤਪਰਾਮਾਸਾਨਂ ਮਿਚ੍ਛਾਦਿਟ੍ਠਿਸਭਾਵਤ੍ਤਾ ਸਭਾਵਤੋ ਅਟ੍ਠੇਵ ਧਮ੍ਮਾ ਦਸ ਸਂਯੋਜਨਾ ਨਾਮ ਜਾਤਾ. ਇਮੇ ਦਸ ਠਪੇਤ੍ਵਾ ਸੇਸਾ ਲੋਕਿਯਲੋਕੁਤ੍ਤਰਧਮ੍ਮਾ ਨੋ ਸਂਯੋਜਨਾ ਨਾਮ. ਸੇਸਂ ਆਸਵਦੁਕਸਦਿਸਂ. ਸਂਯੋਜਨਦੁਕਂ ਪਠਮਂ.
ਆਰਮ੍ਮਣਭਾਵਂ ਉਪਗਨ੍ਤ੍ਵਾ ਸਂਯੋਜਨਸਂਵਡ੍ਢਨੇਨ ਸਂਯੋਜਨਾਨਂ ਹਿਤਾਤਿ ਸਂਯੋਜਨਿਯਾ, ਸਾਸਵਧਮ੍ਮਾ ਏਵ. ਤਥਾ ਨੀਵਰਣਿਯਾਤਿ ਏਤ੍ਥਾਪਿ. ਨ ਸਂਯੋਜਨਿਯਾ ਅਸਂਯੋਜਨਿਯਾ, ਅਨਾਸਵਾ. ਸੇਸਂ ਸਾਸਵਦੁਕਸਦਿਸਮੇਵ. ਦੁਤਿਯਂ.
ਤਤਿਯਾਦਯੋਪਿ ਆਸਵਗੋਚ੍ਛਕੇ ਤਤਿਯਾਦਿਸਦਿਸਾ ਏਵ, ਵਿਸੇਸਮਤ੍ਤਮੇਵੇਤ੍ਥ ਵਕ੍ਖਾਮ. ਤਤ੍ਥ ਹਿ ਦ੍ਵਾਦਸਾਕੁਸਲਚਿਤ੍ਤਾਨਿ ਸਂਯੋਜਨਸਮ੍ਪਯੁਤ੍ਤਾ ਨਾਮ, ਉਦ੍ਧਚ੍ਚਸਹਗਤੋ ਮੋਹੋ, ਸੇਸਚਿਤ੍ਤਰੂਪਨਿਬ੍ਬਾਨਾਨਿ ਸਂਯੋਜਨਵਿਪ੍ਪਯੁਤ੍ਤਾ ਨਾਮ. ਸੇਸਂ ਸਮਮੇਵ. ਤਤਿਯਂ.
ਦਸ ਸਂਯੋਜਨਾਨਿ ਸਂਯੋਜਨਾ ਚੇਵ ਸਂਯੋਜਨਿਯਾ ਚ ਨਾਮ. ਤਦਵਸੇਸਲੋਕਿਯਧਮ੍ਮਾ ਸਂਯੋਜਨਿਯਾ ਚੇਵ ਨੋ ਚ ਸਂਯੋਜਨਾ ਨਾਮ. ਸੇਸਂ ਸੁਵਿਞ੍ਞੇਯ੍ਯਮੇਵ. ਚਤੁਤ੍ਥਂ.
ਯੇ ਪਨ ਉਦ੍ਧਚ੍ਚਵਿਰਹਿਤੇਸੁ ਏਕਾਦਸਸੁ ਅਕੁਸਲਚਿਤ੍ਤੇਸੁ ਵਿਚਿਕਿਚ੍ਛਾਮੋਹਾ ਦੋਸਮੋਹਾ ਦੋਸਇਸ੍ਸਾਮੋਹਾ ਦੋਸਮਚ੍ਛਰਿਯਮੋਹਾ ਲੋਭਮਾਨਮੋਹਾ ਲੋਭਦਿਟ੍ਠਿਮੋਹਾ ਚਾਤਿ ਦ੍ਵੇ ਤਯੋ ਏਕਤੋ ਉਪ੍ਪਜ੍ਜਨ੍ਤਿ, ਤੇ ਸਂਯੋਜਨਾ ਚੇਵ ਸਂਯੋਜਨਸਮ੍ਪਯੁਤ੍ਤਾ ਚ ਨਾਮ. ਦ੍ਵਾਦਸਾਕੁਸਲਚਿਤ੍ਤਾਨਿ ਚੇਵ ਸਂਯੋਜਨਵਜ੍ਜਿਤਤਂਸਮ੍ਪਯੁਤ੍ਤਾ ਚ ਸਂਯੋਜਨਸਮ੍ਪਯੁਤ੍ਤਾ ਚੇਵ ਨੋ ਚ ਸਂਯੋਜਨਾ ਨਾਮ. ਸੇਸਮਿਧ ਅਨਨ੍ਤਰਦੁਕਞ੍ਚ ਆਸਵਗੋਚ੍ਛਕੇ ਪਞ੍ਚਮਛਟ੍ਠਦੁਕਸਦਿਸਮੇਵ. ਕੇਵਲਂ ਆਸਵਪਦਟ੍ਠਾਨੇ ਸਂਯੋਜਨਪਦਮੇਵ ਵਿਸੇਸੋ. ਪਞ੍ਚਮਛਟ੍ਠਦੁਕਾਨਿ.
ਸਂਯੋਜਨਗੋਚ੍ਛਕਂ ਨਿਟ੍ਠਿਤਂ.
ਗਨ੍ਥਗੋਚ੍ਛਕੇ ਯਸ੍ਸ ਸਂਵਿਜ੍ਜਨ੍ਤਿ, ਤਂ ਚੁਤਿਪਟਿਸਨ੍ਧਿਵਸੇਨ ਵਟ੍ਟਸ੍ਮਿਂ ਗਨ੍ਥੇਨ੍ਤਿ ਘਟੇਨ੍ਤੀਤਿ ਗਨ੍ਥਾ. ਤਤੋ ਅਞ੍ਞੇ ਨੋ ਗਨ੍ਥਾ.
ਤਤ੍ਥ ਅਭਿਜ੍ਝਾਕਾਯਗਨ੍ਥੋ, ਬ੍ਯਾਪਾਦੋ, ਸੀਲਬ੍ਬਤਪਰਾਮਾਸੋ, ਇਦਂਸਚ੍ਚਾਭਿਨਿਵੇਸੋ ਕਾਯਗਨ੍ਥੋਤਿ ਇਮੇ ਚਤ੍ਤਾਰੋ ਧਮ੍ਮਾ ਗਨ੍ਥਾ ਨਾਮ. ਤਤ੍ਥ ਅਭਿਜ੍ਝਾ ਏਵ ਨਾਮਕਾਯਂ ਵੁਤ੍ਤਨਯੇਨ ਗਨ੍ਥੇਤੀਤਿ ਅਭਿਜ੍ਝਾਕਾਯਗਨ੍ਥੋ. ਏਵਂ ਸੇਸੇਸੁਪਿ. ਸਬ੍ਬਞ੍ਞੁਭਾਸਿਤਮ੍ਪਿ ਪਟਿਕ੍ਖਿਪਿਤ੍ਵਾ ‘‘ਸਸ੍ਸਤੋ ਲੋਕੋ, ਇਦਮੇਵ ਸਚ੍ਚਂ, ਮੋਘਮਞ੍ਞ’’ਨ੍ਤਿ ਇਮਿਨਾ ਆਕਾਰੇਨ ਅਭਿਨਿਵਿਸਨਤੋ ਸੀਲਬ੍ਬਤਪਰਾਮਾਸਵਿਰਹਿਤਾ ਸਬ੍ਬਾਪਿ ਦਿਟ੍ਠਿ ਇਦਂਸਚ੍ਚਾਭਿਨਿਵੇਸੋ ਨਾਮ. ਸੇਸਾ ਵੁਤ੍ਤਤ੍ਥਾਵ. ਇਮੇਸੁ ਚ ਪਚ੍ਛਿਮਾ ਦ੍ਵੇ ਗਨ੍ਥਾ ਪਠਮੇਨ ਮਗ੍ਗੇਨ ਪਹੀਯਨ੍ਤਿ, ਬ੍ਯਾਪਾਦੋ ਤਤਿਯੇਨ, ਅਭਿਜ੍ਝਾ ਚਤੂਹਿਪਿ. ਇਮੇ ਚ ਸਭਾਵਤੋ ਤਯੋ ਧਮ੍ਮਾ ਚਤ੍ਤਾਰੋ ਗਨ੍ਥਾ ਨਾਮ ਜਾਤਾ. ਇਮੇ ਪਨ ਠਪੇਤ੍ਵਾ ਸੇਸਾ ਸਬ੍ਬੇ ਧਮ੍ਮਾ ਨੋ ਗਨ੍ਥਾ ਨਾਮ. ਗਨ੍ਥਦੁਕਂ ਪਠਮਂ.
ਆਰਮ੍ਮਣਕਰਣਵਸੇਨ ਗਨ੍ਥੇਹਿ ਗਨ੍ਥਿਤਬ੍ਬਾਤਿ ਗਨ੍ਥਨਿਯਾ. ਨ ਗਨ੍ਥਨਿਯਾ ਅਗਨ੍ਥਨਿਯਾ. ਸੇਸਂ ਸਾਸਵਦੁਕਸਦਿਸਮੇਵ. ਦੁਤਿਯਂ.
ਮੋਹਮੂਲਵਜ੍ਜਿਤਾਨਿ ਦਸ ਅਕੁਸਲਚਿਤ੍ਤਾਨਿ, ਦਿਟ੍ਠਿਵਿਪ੍ਪਯੁਤ੍ਤਚਿਤ੍ਤੇਸੁ ਲੋਭਂ, ਦੋਸਮੂਲੇਸੁ ਚ ਦੋਸਂ ਠਪੇਤ੍ਵਾ ਤਂਸਮ੍ਪਯੁਤ੍ਤਾ ਚ ਗਨ੍ਥਸਮ੍ਪਯੁਤ੍ਤਾ ਨਾਮ. ਯਥਾਵੁਤ੍ਤੋ ਲੋਭੋ, ਦੋਸੋ, ਮੋਹਮੂਲਾਨਿ, ਕੁਸਲਾਬ੍ਯਾਕਤਾਨਿ ਚਿਤ੍ਤਾਨਿ, ਰੂਪਨਿਬ੍ਬਾਨਾਨਿ ਚ ਗਨ੍ਥਵਿਪ੍ਪਯੁਤ੍ਤਾ ਨਾਮ. ਚੇਤਸਿਕੇਸੁ ਪਨ ਦਿਟ੍ਠਿਮਾਨਇਸ੍ਸਾਮਚ੍ਛਰਿਯਕੁਕ੍ਕੁਚ੍ਚਥਿਨਮਿਦ੍ਧਾਨਿ ਗਨ੍ਥਸਮ੍ਪਯੁਤ੍ਤਾ ਏਵ. ਦੋਸਵਿਚਿਕਿਚ੍ਛਾ, ਕੁਸਲਾਬ੍ਯਾਕਤਾ ਚ ਗਨ੍ਥਵਿਪ੍ਪਯੁਤ੍ਤਾ ਏਵ, ਸੇਸਾ ਦ੍ਵਿਧਾਪਿ ਹੋਨ੍ਤਿ. ਤਤਿਯਂ.
ਚਤ੍ਤਾਰੋ ਗਨ੍ਥਾ ਗਨ੍ਥਾ ਚੇਵ ਗਨ੍ਥਨਿਯਾ ਚ ਨਾਮ. ਤਦਵਸੇਸਾ ਲੋਕਿਯਾ ਗਨ੍ਥਨਿਯਾ ਚੇਵ ਨੋ ਚ ਗਨ੍ਥਾ ਨਾਮ. ਤਥਾ ਚੇਤਸਿਕੇਸੁ ਗਨ੍ਥਵਜ੍ਜਿਤਾ ਅਕੁਸਲਾ, ਅਪ੍ਪਮਞ੍ਞਾ ਚ, ਸੇਸਾ ਚੇਤਸਿਕਾ ਪਨ ਤਥਾ ਚ ਨ ਵਤ੍ਤਬ੍ਬਾ ਚ, ਇਧ ਪਨ ਲੋਕੁਤ੍ਤਰਾ ਨ ਵਤ੍ਤਬ੍ਬਾ. ਚਤੁਤ੍ਥਂ.
ਦਿਟ੍ਠਿ ਗਨ੍ਥਾਚੇਵ ਗਨ੍ਥਸਮ੍ਪਯੁਤ੍ਤਾ ਚ ਨਾਮ. ਲੋਭੋ ਤਥਾ ਚ ਨ ਵਤ੍ਤਬ੍ਬੋ ਚ, ਗਨ੍ਥਸਮ੍ਪਯੁਤ੍ਤੇਸੁ ਗਨ੍ਥੇ ਠਪੇਤ੍ਵਾ ਸੇਸਾ ਗਨ੍ਥਸਮ੍ਪਯੁਤ੍ਤਾ ਚੇਵ ਨੋ ਚ ਗਨ੍ਥਾ ਨਾਮ. ਇਧ ਪਨ ਗਨ੍ਥਵਿਪ੍ਪਯੁਤ੍ਤਾ ਨ ਵਤ੍ਤਬ੍ਬਾ. ਚੇਤਸਿਕੇਸੁ ਪਨ ਮਾਨਇਸ੍ਸਾਮਚ੍ਛਰਿਯਕੁਕ੍ਕੁਚ੍ਚਥਿਨਮਿਦ੍ਧਾਨਿ ਗਨ੍ਥਸਮ੍ਪਯੁਤ੍ਤਾ ਚੇਵ ਨੋ ਚ ਗਨ੍ਥਾ ਏਵ, ਮੋਹਾਹਿਰਿਕਾਨੋਤ੍ਤਪ੍ਪਉਦ੍ਧਚ੍ਚਾਨਿ ਤਿਜਾਤਿਕਾ ਚ ਸਿਯਾ, ਤਥਾ ਨਵਤ੍ਤਬ੍ਬਾ ਚ, ਸੇਸਾ ਨ ਵਤ੍ਤਬ੍ਬਾ. ਸੇਸਂ ਸੁਵਿਞ੍ਞੇਯ੍ਯਮੇਵ. ਪਞ੍ਚਮਂ.
ਲੋਕੁਤ੍ਤਰਵਜ੍ਜਿਤਾ ਗਨ੍ਥਵਿਪ੍ਪਯੁਤ੍ਤਾ ਗਨ੍ਥਨਿਯਾ ਨਾਮ. ਲੋਕੁਤ੍ਤਰਾ ਪਨ ਗਨ੍ਥਵਿਪ੍ਪਯੁਤ੍ਤਾ ਅਗਨ੍ਥਨਿਯਾ ਨਾਮ. ਇਧ ਪਨ ਗਨ੍ਥਸਮ੍ਪਯੁਤ੍ਤਾ ਨ ਵਤ੍ਤਬ੍ਬਾ. ਚੇਤਸਿਕੇਸੁ ਪਨ ਦੋਸੋ ਵਿਚਿਕਿਚ੍ਛਾ ਕਰੁਣਾ ਮੁਦਿਤਾ ਗਨ੍ਥਵਿਪ੍ਪਯੁਤ੍ਤਾ ਗਨ੍ਥਨਿਯਾ ਏਵ, ਮੋਹਾਹਿਰਿਕਾਨੋਤ੍ਤਪ੍ਪਉਦ੍ਧਚ੍ਚਲੋਭਾ ਤਥਾ ਨ ਵਤ੍ਤਬ੍ਬਾ ਚ, ਸੇਸਾ ਕੁਸਲਾਬ੍ਯਾਕਤਾ ਦ੍ਵਿਧਾਪਿ ਹੋਨ੍ਤਿ, ਤਿਜਾਤਿਕਾ ਪਨ ਦ੍ਵਿਧਾਪਿ ਨ ਵਤ੍ਤਬ੍ਬਾ ਚ, ਸੇਸਾ ਅਕੁਸਲਾਪਿ ਨ ਵਤ੍ਤਬ੍ਬਾ ਚ. ਛਟ੍ਠਂ.
ਗਨ੍ਥਗੋਚ੍ਛਕਂ ਨਿਟ੍ਠਿਤਂ.
ਓਘਯੋਗਗੋਚ੍ਛਕਾਨਿ ਸਬ੍ਬਥਾ ਆਸਵਗੋਚ੍ਛਕਸਦਿਸਾਨਿ. ਪਦਤ੍ਥਮਤ੍ਤਮੇਵ, ਹੇਤ੍ਥ ਨਾਮਮਤ੍ਤਞ੍ਚ ਵਿਸੇਸੋ. ਤਤ੍ਥ ਯਸ੍ਸ ਸਂਵਿਜ੍ਜਨ੍ਤਿ, ਤਂ ਵਟ੍ਟਸ੍ਮਿਂ ਓਹਨਨ੍ਤਿ ਓਸੀਦਾਪੇਨ੍ਤੀਤਿ ਓਘਾ. ਆਰਮ੍ਮਣਂ ਕਤ੍ਵਾ ਅਤਿਕ੍ਕਮਨੀਯਤੋ ਓਘੇਹਿ ਅਤਿਕ੍ਕਮਿਤਬ੍ਬਾਤਿ ਓਘਨਿਯਾ. ਤਥਾ ਯੋਗਨਿਯਾਤਿ ਏਤ੍ਥਾਪਿ. ਵਟ੍ਟਸ੍ਮਿਂ ਯੋਜੇਨ੍ਤੀਤਿ ਯੋਗਾ. ਸੇਸਂ ਤਾਦਿਸਮੇਵ.
ਓਘਯੋਗਗੋਚ੍ਛਕਾਨਿ ਨਿਟ੍ਠਿਤਾਨਿ.
ਨੀਵਰਣਗੋਚ੍ਛਕੇ ਚਿਤ੍ਤਂ ਨੀਵਰਨ੍ਤਿ ਪਰਿਯੋਨਨ੍ਧਨ੍ਤੀਤਿ ਨੀਵਰਣਾ. ਤਤ੍ਥ ਕਾਮਚ੍ਛਨ੍ਦਨੀਵਰਣਂ ਬ੍ਯਾਪਾਦਨੀਵਰਣਂ ਥਿਨਮਿਦ੍ਧਨੀਵਰਣਂ ਉਦ੍ਧਚ੍ਚਕੁਕ੍ਕੁਚ੍ਚਨੀਵਰਣਂ ਵਿਚਿਕਿਚ੍ਛਾਨੀਵਰਣਂ ਅਵਿਜ੍ਜਾਨੀਵਰਣਨ੍ਤਿ ਇਮੇ ਛ ਨੀਵਰਣਾ ਨਾਮ. ਤਤ੍ਥ ਥਿਨਨ੍ਤਿ ਸਪ੍ਪਿਪਿਣ੍ਡੋ ਵਿਯ ਅਵਿਪ੍ਫਾਰਿਕਤਾਯ ਚਿਤ੍ਤਸ੍ਸ ਘਨਭਾਵੋ, ਥਦ੍ਧਤਾਤਿ ਅਤ੍ਥੋ. ਮੇਧਤੀਤਿ ਮਿਦ੍ਧਂ, ਅਕਮ੍ਮਞ੍ਞਭਾਵੋ, ਪਚਲਾਯਿਕਭਾਵਕਰੋਤਿ ਅਤ੍ਥੋ. ਇਦਞ੍ਚ ਸੇਖਪੁਥੁਜ੍ਜਨਾਨਂ ਨਿਦ੍ਦਾਯ ਪੁਬ੍ਬਭਾਗੇ, ਅਪਰਭਾਗੇ ਚ ਪਚਲਾਯਨਹੇਤੁਕਂ ਉਪ੍ਪਜ੍ਜਤਿ, ਨ ਨਿਦ੍ਦੋਕ੍ਕਮਨਕਾਲੇ. ਖੀਣਾਸਵਾਨਮ੍ਪਿ ਹਿ ਕਰਜਕਾਯਸ੍ਸ ਦੁਬ੍ਬਲਭਾਵੇਨ ਅਸਮ੍ਮਿਸ੍ਸਭਵਙ੍ਗਸਨ੍ਤਤਿਵਸੇਨ ਨਿਦ੍ਦੋਕ੍ਕਮਨਂ ਹੋਤਿ, ਤਂ ਪਨ ਤੇਸਂ ਥਿਨਮਿਦ੍ਧਹੇਤੁਕਂ ਨ ਹੋਤਿ, ਇਤਰੇਸਮੇਵ ਹੋਤਿ.
ਕੇਚਿ ਪਨ ਰੂਪਮੇਵ ‘‘ਮਿਦ੍ਧ’’ਨ੍ਤਿ ਵਦਨ੍ਤਿ, ਤਂ ਨ ਯੁਤ੍ਤਂ, ‘‘ਥਿਨਮਿਦ੍ਧਨੀਵਰਣਂ ਅਵਿਜ੍ਜਾਨੀਵਰਣੇਨ ਨੀਵਰਣਞ੍ਚੇਵ ਨੀਵਰਣਸਮ੍ਪਯੁਤ੍ਤਞ੍ਚਾ’’ਤਿ ਅਰੂਪਧਮ੍ਮੇਹਿ ਸਮ੍ਪਯੋਗਵਚਨਤੋ ਅਰੂਪਮੇਵ. ਅਕੁਸਲਞ੍ਚ ‘‘ਥਿਨਮਿਦ੍ਧਨੀਵਰਣਸ੍ਸ ਪਹੀਨਤ੍ਤਾ’’ਤਿਆਦਿਪਹਾਨਵਚਨਤੋ. ਅਕੁਸਲਾ ਏਵ ਹਿ ਪਹਾਤਬ੍ਬਾ, ਤਸ੍ਮਾ ਆਰੁਪ੍ਪੇਪਿ ਚੇਤਂ ਉਪ੍ਪਜ੍ਜਤਿ. ‘‘ਨੀਵਰਣਂ ਧਮ੍ਮਂ ਪਟਿਚ੍ਚ ਨੀਵਰਣੋ ਧਮ੍ਮੋ ਉਪ੍ਪਜ੍ਜਤਿ ਨ ਪੁਰੇਜਾਤਪਚ੍ਚਯਾ’’ਤਿ (ਪਟ੍ਠਾ. ੩.੮.੮) ਏਤਸ੍ਸ ਵਿਭਙ੍ਗੇ ‘‘ਆਰੁਪ੍ਪੇ ਕਾਮਚ੍ਛਨ੍ਦਨੀਵਰਣਂ ਪਟਿਚ੍ਚ ਥਿਨਮਿਦ੍ਧਉਦ੍ਧਚ੍ਚਅਵਿਜ੍ਜਾਨੀਵਰਣ’’ਨ੍ਤਿ (ਪਟ੍ਠਾ. ੩.੮.੮) ਸਬ੍ਬਂ ਵਿਤ੍ਥਾਰੇਤਬ੍ਬਂ. ‘‘ਸੋਪ੍ਪਂ ਪਚਲਾਯਿਕਾ’’ਤਿ (ਧ. ਸ. ੧੧੬੩) ਪਦਭਾਜਨੀਯੇ ਪਨਸ੍ਸ ਫਲੂਪਚਾਰੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਥਿਨਂ ਮਿਦ੍ਧਞ੍ਚਾਤਿ ਇਦਂ ਦ੍ਵਯਂ ਨੀਵਰਣਟ੍ਠਾਨੇ ਏਕਨੀਵਰਣਂ ਵੁਤ੍ਤਂ, ਤਥਾ ਉਦ੍ਧਚ੍ਚਕੁਕ੍ਕੁਚ੍ਚਞ੍ਚਾਤਿ ਇਦਂ ਦ੍ਵਯਂ. ਤਤ੍ਥ ਕੁਕ੍ਕੁਚ੍ਚਨ੍ਤਿ ‘‘ਅਕਤਂ ਵਤ ਮੇ ਕਲ੍ਯਾਣਂ, ਕਤਂ ਪਾਪ’’ਨ੍ਤਿਆਦਿਨਾ ਉਪ੍ਪਜ੍ਜਮਾਨੋ ਵਿਪ੍ਪਟਿਸਾਰੋ. ਤੇਨੇਵਸ੍ਸ ਪਦਭਾਜਨੀਯੇ ‘‘ਚੇਤਸੋ ਵਿਪ੍ਪਟਿਸਾਰੋ ਮਨੋਵਿਲੇਖੋ’’ਤਿ ਚ ਵੁਤ੍ਤਂ. ‘‘ਅਕਪ੍ਪਿਯੇ ਕਪ੍ਪਿਯਸਞ੍ਞਿਤਾ’’ਤਿਆਦਿ ਪਨ ਕੁਕ੍ਕੁਚ੍ਚਮੂਲਦਸ੍ਸਨਤ੍ਥਂ. ਏਵਂਸਞ੍ਞਿਤਾਯ ਹਿ ਕਤੇ ਵੀਤਿਕ੍ਕਮੇ ਪਚ੍ਛਾ ‘‘ਦੁਟ੍ਠੁ ਮਯਾ ਕਤ’’ਨ੍ਤਿ ਸੁਦਿਨ੍ਨਾਦੀਨਂ ਵਿਯ ਵਿਪ੍ਪਟਿਸਾਰੋ ਉਪ੍ਪਜ੍ਜਤਿ. ਯਂ ਪਨ ਵਿਨਯੇ ‘‘ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ…ਪੇ… ਕੁਕ੍ਕੁਚ੍ਚਾਯਨ੍ਤੋ ਨ ਪਟਿਗ੍ਗਹੇਸੀ’’ਤਿ (ਪਾਚਿ. ੨੦੪) ਕੁਕ੍ਕੁਚ੍ਚਂ ਆਗਤਂ, ਤਂ ਨੀਵਰਣਕੁਕ੍ਕੁਚ੍ਚਂ. ਨ ਹਿ ਅਰਹਤੋ ਨੀਵਰਣਂ ਅਤ੍ਥਿ, ਨੀਵਰਣਵਤਿਰੂਪਕਂ ਪਨ ‘‘ਕਪ੍ਪਤਿ, ਨ ਕਪ੍ਪਤੀ’’ਤਿ ਵੀਮਂਸਨਸਙ੍ਖਾਤਂ ਵਿਨਯਕੁਕ੍ਕੁਚ੍ਚਂ ਨਾਮੇਤਨ੍ਤਿ ਵੇਦਿਤਬ੍ਬਂ. ਸੇਸਨੀਵਰਣਾਨਿ ਵੁਤ੍ਤਤ੍ਥਾਨਿ ਏਵ. ਇਮੇਸੁ ਚ ਕੁਕ੍ਕੁਚ੍ਚਵਿਚਿਕਿਚ੍ਛਾ ਪਠਮੇਨ ਮਗ੍ਗੇਨ ਪਹੀਯਨ੍ਤਿ, ਬ੍ਯਾਪਾਦੋ ਤਤਿਯੇਨ, ਥਿਨਮਿਦ੍ਧੁਦ੍ਧਚ੍ਚਾਵਿਜ੍ਜਾ ਚਤੁਤ੍ਥੇਨ, ਕਾਮਚ੍ਛਨ੍ਦੋ ਚਤੂਹਿਪੀਤਿ ਵਤ੍ਤਬ੍ਬਂ, ‘‘ਤਤਿਯੇਨਾ’’ਤਿ ਪਨ ਵੁਤ੍ਤਂ. ਇਮੇ ਚ ਸਭਾਵਤੋ ਅਟ੍ਠ ਧਮ੍ਮਾ ਛ ਨੀਵਰਣਾ ਨਾਮ ਜਾਤਾ, ਇਮੇ ਪਨ ਠਪੇਤ੍ਵਾ ਸੇਸਾ ਨੋ ਨੀਵਰਣਾ ਨਾਮ. ਨੀਵਰਣਦੁਕਂ ਪਠਮਂ.
ਦੁਤਿਯਂ ਸਾਸਵਦੁਕਸਦਿਸਮੇਵ. ਦ੍ਵਾਦਸ ਅਕੁਸਲਚਿਤ੍ਤਾਨਿ ਨੀਵਰਣਸਮ੍ਪਯੁਤ੍ਤਾ ਨਾਮ. ਸੇਸਚਿਤ੍ਤਰੂਪਨਿਬ੍ਬਾਨਾਨਿ ਨੀਵਰਣਵਿਪ੍ਪਯੁਤ੍ਤਾ ਨਾਮ. ਚੇਤਸਿਕੇਸੁ ਅਕੁਸਲਾ ਨੀਵਰਣਸਮ੍ਪਯੁਤ੍ਤਾਵ, ਕੁਸਲਾਬ੍ਯਾਕਤਾ ਨੀਵਰਣਵਿਪ੍ਪਯੁਤ੍ਤਾਵ, ਸੇਸਾ ਦ੍ਵਿਧਾਪਿ ਹੋਨ੍ਤਿ. ਤਤਿਯਂ.
ਛ ਨੀਵਰਣਾ ਨੀਵਰਣਾ ਚੇਵ ਨੀਵਰਣਿਯਾ ਚ ਨਾਮ. ਸੇਸਾ ਲੋਕਿਯਾ ਨੀਵਰਣਿਯਾ ਚੇਵ ਨੋ ਚ ਨੀਵਰਣਾ ਨਾਮ. ਲੋਕੁਤ੍ਤਰਾ ਨ ਵਤ੍ਤਬ੍ਬਾ. ਸੇਸਂ ਆਸਵਗੋਚ੍ਛਕੇ ਚਤੁਤ੍ਥਸਦਿਸਮੇਵ. ਚਤੁਤ੍ਥਂ.
ਛ ਨੀਵਰਣਾ ਨੀਵਰਣਾ ਚੇਵ ਨੀਵਰਣਸਮ੍ਪਯੁਤ੍ਤਾ ਚ ਨਾਮ. ਤਦਞ੍ਞੇ ਨੀਵਰਣਸਮ੍ਪਯੁਤ੍ਤਾ ਪਨ ਨੀਵਰਣਸਮ੍ਪਯੁਤ੍ਤਾ ਚੇਵ ਨੋ ਚ ਨੀਵਰਣਾ ਨਾਮ. ਤਥਾ ਚੇਤਸਿਕੇਸੁ ਨੀਵਰਣਵਿਰਹਿਤਾ ਅਕੁਸਲਾ, ਤਿਜਾਤਿਕਾ ਪਨ ਤਥਾ ਚ ਨ ਵਤ੍ਤਬ੍ਬਾ ਚ, ਕੁਸਲਾਬ੍ਯਾਕਤਾ ਨ ਵਤ੍ਤਬ੍ਬਾਵ. ਇਧ ਪਨ ਨੀਵਰਣਵਿਪ੍ਪਯੁਤ੍ਤਾ ਸਬ੍ਬੇ ਨ ਵਤ੍ਤਬ੍ਬਾ. ਪਞ੍ਚਮਂ.
ਲੋਕੁਤ੍ਤਰਵਜ੍ਜਿਤਾ ਨੀਵਰਣਵਿਪ੍ਪਯੁਤ੍ਤਾ ਨੀਵਰਣਿਯਾ ਨਾਮ. ਲੋਕੁਤ੍ਤਰਾ ਨੀਵਰਣਵਿਪ੍ਪਯੁਤ੍ਤਾ ਅਨੀਵਰਣਿਯਾ ਨਾਮ. ਇਧ ਪਨ ਨੀਵਰਣਸਮ੍ਪਯੁਤ੍ਤਾ ਨ ਵਤ੍ਤਬ੍ਬਾ. ਚੇਤਸਿਕੇਸੁ ਪਨ ਕਰੁਣਾਮੁਦਿਤਾ ਨੀਵਰਣਵਿਪ੍ਪਯੁਤ੍ਤਾ ਨੀਵਰਣਿਯਾਵ, ਕੁਸਲਾਬ੍ਯਾਕਤਾ ਦ੍ਵਿਧਾਪਿ ਹੋਨ੍ਤਿ, ਤਿਜਾਤਿਕਾ ਤਥਾ ਚ ਨ ਵਤ੍ਤਬ੍ਬਾ ਚ, ਅਕੁਸਲਾ ਪਨ ਨ ਵਤ੍ਤਬ੍ਬਾਵ. ਛਟ੍ਠਂ.
ਨੀਵਰਣਗੋਚ੍ਛਕਂ ਨਿਟ੍ਠਿਤਂ.
ਪਰਾਮਾਸਗੋਚ੍ਛਕੇ ਧਮ੍ਮਾਨਂ ਯਥਾਭੂਤਂ ਅਨਿਚ੍ਚਾਦਿਆਕਾਰਂ ਅਤਿਕ੍ਕਮਿਤ੍ਵਾ ‘‘ਨਿਚ੍ਚ’’ਨ੍ਤਿਆਦਿਵਸੇਨ ਪਵਤ੍ਤਮਾਨਾ ਪਰਤੋ ਆਮਸਨ੍ਤੀਤਿ ਪਰਾਮਾਸਾ. ਮਿਚ੍ਛਾਦਿਟ੍ਠਿ. ਬਹੁਵਚਨਨਿਦ੍ਦੇਸੇ ਕਾਰਣਂ ਵੁਤ੍ਤਮੇਵ. ਤਦਞ੍ਞੇ ਸਬ੍ਬੇ ਧਮ੍ਮਾ ਨੋ ਪਰਾਮਾਸਾ ਨਾਮ. ਪਰਾਮਾਸਦੁਕਂ ਪਠਮਂ.
ਪਰਾਮਾਸੇਹਿ ਆਰਮ੍ਮਣਕਰਣਵਸੇਨ ਪਰਾਮਟ੍ਠਤ੍ਤਾ ਪਰਾਮਟ੍ਠਾ. ਸੇਸਂ ਆਸਵਦੁਕਸਦਿਸਮੇਵ. ਦੁਤਿਯਂ.
ਦਿਟ੍ਠਿਸਮ੍ਪਯੁਤ੍ਤਚਿਤ੍ਤੇਸੁ ਦਿਟ੍ਠਿਵਿਰਹਿਤਾ ਧਮ੍ਮਾ ਪਰਾਮਾਸਸਮ੍ਪਯੁਤ੍ਤਾ ਨਾਮ. ਸੇਸਚਿਤ੍ਤਰੂਪਨਿਬ੍ਬਾਨਾਨਿ ਪਰਾਮਾਸਵਿਪ੍ਪਯੁਤ੍ਤਾ ਨਾਮ. ਇਧ ਪਨ ਦਿਟ੍ਠਿ ਨ ਵਤ੍ਤਬ੍ਬਾ, ਸੇਸਚੇਤਸਿਕੇਸੁ ਪਨ ਮਾਨਦੋਸਇਸ੍ਸਾਮਚ੍ਛਰਿਯਕੁਕ੍ਕੁਚ੍ਚਵਿਚਿਕਿਚ੍ਛਾ, ਕੁਸਲਾਬ੍ਯਾਕਤਾ ਚ ਪਰਾਮਾਸਵਿਪ੍ਪਯੁਤ੍ਤਾ ਏਵ, ਸੇਸਾ ਦ੍ਵਿਧਾਪਿ ਹੋਨ੍ਤਿ. ਤਤਿਯਂ.
ਦਿਟ੍ਠਿ ਏਵ ਪਰਾਮਾਸਾ ਚੇਵ ਪਰਾਮਟ੍ਠਾ ਚ ਨਾਮ. ਸੇਸਲੋਕਿਯਾ ਪਰਾਮਟ੍ਠਾ ਚੇਵ ਨੋ ਚ ਪਰਾਮਾਸਾ ਨਾਮ. ਇਧ ਪਨ ਲੋਕੁਤ੍ਤਰਾ ਨ ਵਤ੍ਤਬ੍ਬਾ. ਸੇਸਂ ਸੁਵਿਞ੍ਞੇਯ੍ਯਮੇਵ. ਚਤੁਤ੍ਥਂ.
ਇਮਸ੍ਮਿਂ ਪਨ ਗੋਚ੍ਛਕੇ ‘‘ਪਰਾਮਾਸਾ ਚੇਵ ਧਮ੍ਮਾ ਪਰਾਮਾਸਸਮ੍ਪਯੁਤ੍ਤਾ ਚਾ’’ਤਿ ਅਯਂ ਦੁਕੋ ਨ ਲਬ੍ਭਤਿ. ਨ ਹਿ ਦਿਟ੍ਠਿ ਦਿਟ੍ਠਿਯਾ ਸਮ੍ਪਯੁਜ੍ਜਤਿ. ਪਚ੍ਛਿਮਦੁਕੇ ਲੋਕੁਤ੍ਤਰਵਜ੍ਜਿਤਾ ਪਰਾਮਾਸਵਿਪ੍ਪਯੁਤ੍ਤਾ ਪਰਾਮਟ੍ਠਾ ਨਾਮ. ਲੋਕੁਤ੍ਤਰਾ ਪਰਾਮਾਸਵਿਪ੍ਪਯੁਤ੍ਤਾ ਅਪਰਾਮਟ੍ਠਾ ਨਾਮ. ਇਧ ਪਨ ਪਰਾਮਾਸੋ, ਤਂਸਮ੍ਪਯੁਤ੍ਤਾ ਚ ਨ ਵਤ੍ਤਬ੍ਬਾ. ਸੇਸਂ ਵੁਤ੍ਤਨਯਮੇਵ.
ਪਰਾਮਾਸਗੋਚ੍ਛਕਂ ਨਿਟ੍ਠਿਤਂ.
ਮਹਨ੍ਤਰਦੁਕੇਸੁ ਆਰਮ੍ਮਣਂ ਅਗ੍ਗਹੇਤ੍ਵਾ ਅਪ੍ਪਵਤ੍ਤਿਤੋ ਸਹ ਆਰਮ੍ਮਣੇਨਾਤਿ ਸਾਰਮ੍ਮਣਾ, ਚਿਤ੍ਤਚੇਤਸਿਕਾ. ਨਤ੍ਥਿ ਆਰਮ੍ਮਣਮੇਤੇਸਨ੍ਤਿ ਅਨਾਰਮ੍ਮਣਾ, ਰੂਪਨਿਬ੍ਬਾਨਾਨਿ. ਸਾਰਮ੍ਮਣਦੁਕਂ.
ਚਿਨ੍ਤਨਟ੍ਠੇਨ ਚਿਤ੍ਤਂ, ਚਿਤ੍ਤਤਾਯ ਵਾ ਚਿਤ੍ਤਂ. ਤਂ ਹਿ ਵਤ੍ਥੁਦ੍ਵਾਰਾਰਮ੍ਮਣਕਿਚ੍ਚਾਦਿਭੇਦਤੋ, ਅਤੀਤਾਦਿਭੇਦਤੋ ਚ ਅਤ੍ਤਨੋ ਵਿਚਿਤ੍ਤਤਾਯ ਚਿਤ੍ਤਨ੍ਤਿ ਵੁਚ੍ਚਤਿ ਚਿਤ੍ਤਕਰਣਤਾਯ ਵਾ. ਲੋਕਸ੍ਮਿਂ ਹਿ ਚਿਤ੍ਤਕਮ੍ਮਤੋ ਉਤ੍ਤਰਿਤਰਂ ਚਿਤ੍ਤਂ ਨਾਮ ਨਤ੍ਥਿ, ਤਸ੍ਮਿਮ੍ਪਿ ਚਰਣਂ ਨਾਮ ਚਿਤ੍ਤਂ ਅਤਿਚਿਤ੍ਤਂ ਹੋਤਿ. ਯਂ ਵਾ ਪਨਞ੍ਞਮ੍ਪਿ ਲੋਕੇ ਸਿਪ੍ਪਜਾਤਂ, ਸਬ੍ਬਂ ਤਂ ਚਿਤ੍ਤੇਨੇਵ ਕਰੀਯਤਿ. ਏਵਂ ਤਸ੍ਸ ਤਸ੍ਸ ਚਿਤ੍ਤਸ੍ਸ ਨਿਪ੍ਫਾਦਕਂ ਚਿਤ੍ਤਮ੍ਪਿ ਤਥੇਵ ਚਿਤ੍ਤਂ ਹੋਤਿ. ਯਥਾ ਚਿਨ੍ਤਿਤਸ੍ਸ ਵਾ ਅਨਵਸੇਸਸ੍ਸ ਅਨਿਪ੍ਫਜ੍ਜਨਤੋ ਤਤੋਪਿ ਚਿਤ੍ਤਮੇਵ ਚਿਤ੍ਤਤਰਂ, ਤਥਾ ਯਦੇਤਂ ਦੇਵਮਨੁਸ੍ਸਨਿਰਯਤਿਰਚ੍ਛਾਨਭੇਦਾਸੁ ਗਤੀਸੁ ਕੁਸਲਾਕੁਸਲਕਮ੍ਮਨਾਨਤ੍ਤਂ, ਤੇਨ ਤਾਸੁ ਗਤੀਸੁ ਅਪਦਦ੍ਵਿਪਦਾਦਿਉਚ੍ਚਤ੍ਤਨੀਚਤ੍ਤਾਦਿਨਾਨਤ੍ਤਂ, ਤਸ੍ਮਿਂ ਤਸ੍ਮਿਂ ਅਤ੍ਤਭਾਵੇ ਦੀਘਰਸ੍ਸਥੂਲਾਥੂਲਸੁਵਣ੍ਣਦੁਬ੍ਬਣ੍ਣਾਦਿਲਾਭਾਲਾਭਾਦਿ ਚਾਤਿ ਏਵਮਾਦਿ ਅਜ੍ਝਤ੍ਤਂ ਚਿਤ੍ਤਂ, ਬਹਿਦ੍ਧਾ ਚ ਪਥਵੀਪਬ੍ਬਤਤਿਣਰੁਕ੍ਖਲਤਾਦਿਦੇਵਬ੍ਰਹ੍ਮਵਿਮਾਨਕਪ੍ਪਰੁਕ੍ਖਾਦਿਭੂਤਂ ਕਮ੍ਮਪਚ੍ਚਯਂ ਚਿਤ੍ਤਂ, ਤਮ੍ਪਿ ਚਿਤ੍ਤੇਨੇਵ ਕਤਂ, ਤਤੋ ਚਿਤ੍ਤਮੇਵ ਚਿਤ੍ਤਤਰਂ ਚਿਨ੍ਤਿਤਨਿਯਾਮੇਨ ਸਬ੍ਬਾਕਾਰਸ੍ਸ ਅਸਮ੍ਭਵਤੋ. ਏਵਂ ਚਿਨ੍ਤਨਟ੍ਠੇਨ, ਚਿਤ੍ਤਵਿਚਿਤ੍ਤਟ੍ਠੇਨ, ਚਿਤ੍ਤਕਰਣਟ੍ਠੇਨ ਚ ‘‘ਚਿਤ੍ਤ’’ਨ੍ਤਿ ਵਿਞ੍ਞਾਣਂ ਵੇਦਿਤਬ੍ਬਂ, ਤਦੇਵ ਵਿਞ੍ਞਾਣਂ ਚਿਤ੍ਤਂ ਨਾਮ. ਚੇਤਸਿਕਰੂਪਨਿਬ੍ਬਾਨਾਨਿ ਨੋ ਚਿਤ੍ਤਾ ਨਾਮ. ਚਿਤ੍ਤਦੁਕਂ.
ਅਵਿਪ੍ਪਯੋਗਵਸੇਨ ਚੇਤਸਿ ਨਿਯੁਤ੍ਤਾ ਚੇਤਸਿਕਾ, ਫਸ੍ਸਾਦਯੋ ਦ੍ਵਿਪਞ੍ਞਾਸ ਧਮ੍ਮਾ. ਚਿਤ੍ਤਰੂਪਨਿਬ੍ਬਾਨਾਨਿ ਅਚੇਤਸਿਕਾ ਨਾਮ. ਚੇਤਸਿਕਦੁਕਂ.
ਚੇਤਸਿਕਾ ਏਵ ਚਿਤ੍ਤਸਮ੍ਪਯੁਤ੍ਤਾ ਨਾਮ. ਰੂਪਨਿਬ੍ਬਾਨਾਨਿ ਚਿਤ੍ਤਵਿਪ੍ਪਯੁਤ੍ਤਾ ਨਾਮ, ਇਧ ਪਨ ਚਿਤ੍ਤਂ ਨ ਵਤ੍ਤਬ੍ਬਂ. ਚਿਤ੍ਤਸਮ੍ਪਯੁਤ੍ਤਦੁਕਂ.
ਨਿਰਨ੍ਤਰਭਾਵੂਪਗਮਨਤਾਯ ਉਪ੍ਪਾਦਤੋ ਯਾਵ ਭਙ੍ਗਾਚਿਤ੍ਤੇਨ ਸਂਸਟ੍ਠਾਤਿ ਚਿਤ੍ਤਸਂਸਟ੍ਠਾ. ਏਕਤੋ ਵਤ੍ਤਮਾਨਾਪਿ ਨਿਰਨ੍ਤਰਭਾਵਂ ਅਨੁਪਗਮਨਤਾਯ ਚਿਤ੍ਤੇਨ ਵਿਸਂਸਟ੍ਠਾਤਿ ਚਿਤ੍ਤਵਿਸਂਸਟ੍ਠਾ. ਸੇਸਂ ਅਨਨ੍ਤਰਦੁਕਸਦਿਸਮੇਵ. ਚਿਤ੍ਤਸਂਸਟ੍ਠਦੁਕਂ.
ਸਮੁਟ੍ਠਹਨ੍ਤਿ ਏਤੇਨਾਤਿ ਸਮੁਟ੍ਠਾਨਂ, ਚਿਤ੍ਤਂ ਸਮੁਟ੍ਠਾਨਂ ਏਤੇਸਨ੍ਤਿ ਚਿਤ੍ਤਸਮੁਟ੍ਠਾਨਾ, ਚੇਤਸਿਕਾਨਿ ਚੇਵ ਚਿਤ੍ਤਜਰੂਪਕਲਾਪਾ ਚ. ਚਿਤ੍ਤਂ, ਪਨ ਅਚਿਤ੍ਤਜਰੂਪਕਲਾਪਾ, ਨਿਬ੍ਬਾਨਞ੍ਚ ਨੋ ਚਿਤ੍ਤਸਮੁਟ੍ਠਾਨਾ ਨਾਮ. ਚਿਤ੍ਤਸਮੁਟ੍ਠਾਨਦੁਕਂ.
ਸਹ ਭਵਨ੍ਤੀਤਿ ਸਹਭੁਨੋ, ਚਿਤ੍ਤੇਨ ਸਹਭੁਨੋ ਚਿਤ੍ਤਸਹਭੁਨੋ, ਚੇਤਸਿਕਾਨਿ ਚੇਵ ਕਾਯਵਚੀਵਿਞ੍ਞਤ੍ਤਿਯੋ ਚ. ਚਿਤ੍ਤਂ, ਪਨ ਵਿਞ੍ਞਤ੍ਤਿਵਜ੍ਜਿਤਰੂਪਨਿਬ੍ਬਾਨਾਨਿ ਚ ਨੋ ਚਿਤ੍ਤਸਹਭੁਨੋ ਨਾਮ. ਚਿਤ੍ਤਸਹਭੁਦੁਕਂ.
ਅਨੁਪਰਿਵਤ੍ਤਨ੍ਤੀਤਿ ਅਨੁਪਰਿਵਤ੍ਤਿਨੋ, ਕਿਂ ਅਨੁਪਰਿਵਤ੍ਤਨ੍ਤਿ? ਚਿਤ੍ਤਂ, ਚਿਤ੍ਤਸ੍ਸ ਅਨੁਪਰਿਵਤ੍ਤਿਨੋ ਚਿਤ੍ਤਾਨੁਪਰਿਵਤ੍ਤਿਨੋ. ਸੇਸਂ ਅਨਨ੍ਤਰਦੁਕਸਦਿਸਮੇਵ. ਚਿਤ੍ਤਾਨੁਪਰਿਵਤ੍ਤਿਦੁਕਂ.
ਇਤੋ ਪਰੇ ਪਨ ਤਯੋ ਦੁਕਾ ਚੇਤਸਿਕਦੁਕਸਦਿਸਾਵ, ਕੇਵਲਂ ਪਦਤ੍ਥਮਤ੍ਤਮੇਵ ਵਿਸੇਸੋ. ਤਤ੍ਥ ਚਿਤ੍ਤਸਂਸਟ੍ਠਾ ਚ ਤੇ ਚਿਤ੍ਤਸਮੁਟ੍ਠਾਨਾ ਏਵ ਚਾਤਿ ਚਿਤ੍ਤਸਂਸਟ੍ਠਸਮੁਟ੍ਠਾਨਾ. ਚਿਤ੍ਤਸਂਸਟ੍ਠਾ ਚ ਤੇ ਚਿਤ੍ਤਸਮੁਟ੍ਠਾਨਾ ਚ ਚਿਤ੍ਤਸਹਭੁਨੋ ਏਵ ਚਾਤਿ ਚਿਤ੍ਤਸਂਸਟ੍ਠਸਮੁਟ੍ਠਾਨਸਹਭੁਨੋ, ਚਿਤ੍ਤਸਂਸਟ੍ਠਾ ਚ ਤੇ ਚਿਤ੍ਤਸਮੁਟ੍ਠਾਨਾ ਚ ਚਿਤ੍ਤਾਨੁਪਰਿਵਤ੍ਤਿਨੋ ਏਵ ਚਾਤਿ ਚਿਤ੍ਤਸਂਸਟ੍ਠਸਮੁਟ੍ਠਾਨਾਨੁਪਰਿਵਤ੍ਤਿਨੋ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਤਦਨਨ੍ਤਰੇ ਪਨ ਅਜ੍ਝਤ੍ਤਿਕਦੁਕੇ ਅਜ੍ਝਤ੍ਤਜ੍ਝਤ੍ਤਂ ਅਜ੍ਝਤ੍ਤਤ੍ਤਿਕੇ ਵੁਤ੍ਤਵਸੇਨ ਅਜ੍ਝਤ੍ਤਾਵ ਅਜ੍ਝਤ੍ਤਿਕਾ. ਪਸਾਦਰੂਪਚਿਤ੍ਤਸਙ੍ਖਾਤਾਨਿ ਛ ਅਜ੍ਝਤ੍ਤਿਕਾਨਿ ਆਯਤਨਾਨਿ. ਤਤੋ ਬਹਿਭੂਤਾ ਬਾਹਿਰਾ. ਸੇਸਰੂਪਚੇਤਸਿਕਨਿਬ੍ਬਾਨਪਞ੍ਞਤ੍ਤਿਸਙ੍ਖਾਤਾਨਿ ਛ ਬਾਹਿਰਾਯਤਨਾਨਿ, ਇਧ ਪਨ ਪਞ੍ਞਤ੍ਤਿਯੋਪਿ ਲਬ੍ਭਨ੍ਤਿ. ਅਜ੍ਝਤ੍ਤਿਕਦੁਕਂ.
ਉਪਾਦਿਯਨ੍ਤੇਵ ਭੂਤਾਨਿ, ਨ ਭੂਤਾ ਵਿਯ ਉਪਾਦਿਯਨ੍ਤੀਤਿ ਉਪਾਦਾ, ਚਤੁਵੀਸਤਿ ਉਪਾਦਾਰੂਪਾਨਿ ਏਵ. ਨ ਉਪਾਦਿਯਨ੍ਤੀਤਿ ਨੋ ਉਪਾਦਾ, ਚਤੁਮਹਾਭੂਤਚਿਤ੍ਤਚੇਤਸਿਕਨਿਬ੍ਬਾਨਾਨਿ. ਉਪਾਦਾਦੁਕਂ.
ਦ੍ਵਤ੍ਤਿਂਸ ਲੋਕਿਯਵਿਪਾਕਚਿਤ੍ਤਾਨਿ, ਕਮ੍ਮਜਰੂਪਞ੍ਚ ਉਪਾਦਿਨ੍ਨਾ ਨਾਮ. ਸੇਸਲੋਕਿਯਲੋਕੁਤ੍ਤਰਾਨਿ, ਨਿਬ੍ਬਾਨਞ੍ਚ ਅਨੁਪਾਦਿਨ੍ਨਾ ਨਾਮ. ਸੇਸਂ ਉਪਾਦਿਨ੍ਨੁਪਾਦਾਨਿਯਤ੍ਤਿਕੇ ਵੁਤ੍ਤਾਨੁਸਾਰੇਨ ਞਾਤਬ੍ਬਂ. ਉਪਾਦਿਨ੍ਨਦੁਕਂ.
ਮਹਨ੍ਤਰਦੁਕਾ ਨਿਟ੍ਠਿਤਾ.
ਉਪਾਦਾਨਗੋਚ੍ਛਕੇਭੁਸਂ ਆਦਿਯਨ੍ਤੀਤਿ ਉਪਾਦਾਨਾ, ਦਲ਼੍ਹਗ੍ਗਾਹਂ ਗਣ੍ਹਨ੍ਤੀਤਿ ਅਤ੍ਥੋ. ਦਲ਼੍ਹਤ੍ਥੋ ਹਿ ਏਤ੍ਥ ਉਪ-ਸਦ੍ਦੋ ‘‘ਉਪਾਯਾਸੋ’’ਤਿਆਦੀਸੁ ਵਿਯ. ਤਤੋ ਅਞ੍ਞੇ ਨੋ ਉਪਾਦਾਨਾ. ਤਤ੍ਥ ਕਾਮੁਪਾਦਾਨਂ ਦਿਟ੍ਠੁਪਾਦਾਨਂ ਸੀਲਬ੍ਬਤੁਪਾਦਾਨਂ ਅਤ੍ਤਵਾਦੁਪਾਦਾਨਨ੍ਤਿ ਇਮੇ ਉਪਾਦਾਨਾ ਨਾਮ. ਤਤ੍ਥ ਵਤ੍ਥੁਕਾਮੇਸੁ ਉਪ੍ਪਨ੍ਨੋ ਕਿਲੇਸਕਾਮੋਵ ਵੁਤ੍ਤਨਯੇਨ ਉਪਾਦਾਨਨ੍ਤਿ ਕਾਮੁਪਾਦਾਨਂ. ਏਵਂ ਸੇਸੇਸੁਪਿ. ਤਤ੍ਥ ਵੀਸਤਿਵਤ੍ਥੁਕਾ ਸਕ੍ਕਾਯਦਿਟ੍ਠਿ ਅਤ੍ਤਵਾਦੁਪਾਦਾਨਂ ਨਾਮ. ਸੇਸਾਨਿ ਪੁਬ੍ਬੇ ਵੁਤ੍ਤਾਨੇਵ. ਪਚ੍ਛਿਮਾਨਿ ਪਨੇਤ੍ਥ ਤੀਣਿ ਉਪਾਦਾਨਾਨਿ ਤਥਾਪਵਤ੍ਤਦਿਟ੍ਠਿ ਏਵ. ਤਾਨਿ ਚ ਪਠਮੇਨ ਮਗ੍ਗੇਨ ਪਹੀਯਨ੍ਤਿ, ਕਾਮੁਪਾਦਾਨਂ ਚਤੂਹਿਪਿ. ਇਮੇ ਚ ਸਭਾਵਤੋ ਦ੍ਵੇ ਧਮ੍ਮਾ ਵਿਭਾਗਤੋ ਚਤੁਰੁਪਾਦਾਨਾ ਨਾਮ ਜਾਤਾ. ਇਮੇ ਪਨ ਠਪੇਤ੍ਵਾ ਸੇਸਾ ਸਬ੍ਬੇ ਧਮ੍ਮਾ ਨੋ ਉਪਾਦਾਨਾ ਨਾਮ. ਉਪਾਦਾਨਦੁਕਂ ਪਠਮਂ.
ਉਪਾਦਾਨਿਯਦੁਕੋ ਸਂਯੋਜਨਿਯਦੁਕਸਦਿਸੋਵ. ਦੁਤਿਯਂ.
ਅਟ੍ਠਲੋਭਸਹਗਤਚਿਤ੍ਤਾਨਿ, ਤਂਸਮ੍ਪਯੁਤ੍ਤੇਸੁ ਦਿਟ੍ਠਿਵਿਪ੍ਪਯੁਤ੍ਤਲੋਭਂ ਠਪੇਤ੍ਵਾ ਸੇਸਾ ਚ ਉਪਾਦਾਨਸਮ੍ਪਯੁਤ੍ਤਾ ਨਾਮ. ਦਿਟ੍ਠਿਵਿਪ੍ਪਯੁਤ੍ਤਲੋਭਦੋਸਮੋਹਮੂਲਾਨਿ, ਕੁਸਲਾਬ੍ਯਾਕਤਾਨਿ ਚ ਚਿਤ੍ਤਾਨਿ, ਰੂਪਨਿਬ੍ਬਾਨਾਨਿ ਚ ਉਪਾਦਾਨਵਿਪ੍ਪਯੁਤ੍ਤਾ ਨਾਮ. ਚੇਤਸਿਕੇਸੁ ਪਨ ਦਿਟ੍ਠਿਮਾਨਾ ਉਪਾਦਾਨਸਮ੍ਪਯੁਤ੍ਤਾਵ, ਦੋਸਇਸ੍ਸਾਮਚ੍ਛਰਿਯਕੁਕ੍ਕੁਚ੍ਚਵਿਚਿਕਿਚ੍ਛਾ, ਕੁਸਲਾਬ੍ਯਾਕਤਾ ਚ ਉਪਾਦਾਨਵਿਪ੍ਪਯੁਤ੍ਤਾ ਏਵ. ਸੇਸਾ ਦੁਵਿਧਾਪਿ ਹੋਨ੍ਤਿ. ਤਤਿਯਂ.
ਚਤ੍ਤਾਰਿ ਉਪਾਦਾਨਾਨਿ ਉਪਾਦਾਨਾ ਚੇਵ ਉਪਾਦਾਨਿਯਾ ਚ ਨਾਮ. ਤਦਵਸੇਸਾ ਲੋਕਿਯਾ ਉਪਾਦਾਨਿਯਾ ਚੇਵ ਨੋਚ ਉਪਾਦਾਨਾ ਨਾਮ. ਇਧ ਪਨ ਲੋਕੁਤ੍ਤਰਾ ਨ ਵਤ੍ਤਬ੍ਬਾ. ਸੇਸਂ ਵੁਤ੍ਤਨਯਮੇਵ. ਚਤੁਤ੍ਥਂ.
ਪਞ੍ਚਮਛਟ੍ਠਦੁਕਾ ਪਾਠਤੋ ਗਨ੍ਥਗੋਚ੍ਛਕੇ ਪਞ੍ਚਮਛਟ੍ਠਦੁਕਸਦਿਸਾਵ, ਕੇਵਲਂ ਪਞ੍ਚਮਦੁਕੇ ‘‘ਚੇਤਸਿਕੇਸੁ ਮਾਨੋ ਉਪਾਦਾਨਸਮ੍ਪਯੁਤ੍ਤੋ ਚੇਵ ਨੋ ਚ ਉਪਾਦਾਨੋ ਏਵ, ਮੋਹਾਹਿਰਿਕਾਨੋਤ੍ਤਪ੍ਪਉਦ੍ਧਚ੍ਚਥਿਨਮਿਦ੍ਧਾਨਿ ਤਿਜਾਤਿਕਾਨਿ ਤਥਾ ਚ ਨ ਵਤ੍ਤਬ੍ਬਾ ਚਾ’’ਤਿ ਇਦਞ੍ਚ, ਛਟ੍ਠਦੁਕੇ ‘‘ਚੇਤਸਿਕੇਸੁ ਦੋਸਇਸ੍ਸਾਮਚ੍ਛਰਿਯਕੁਕ੍ਕੁਚ੍ਚਵਿਚਿਕਿਚ੍ਛਾ ਅਪ੍ਪਮਞ੍ਞਾ ਉਪਾਦਾਨਵਿਪ੍ਪਯੁਤ੍ਤਾ ਉਪਾਦਾਨਿਯਾ ਏਵ, ਮੋਹਾਹਿਰਿਕਾਨੋਤ੍ਤਪ੍ਪਉਦ੍ਧਚ੍ਚਲੋਭਥਿਨਮਿਦ੍ਧਾਨਿ ਤਥਾ ਚ ਨ ਵਤ੍ਤਬ੍ਬਾਨਿ ਚਾ’’ਤਿ ਏਤ੍ਤਕਮੇਵ ਪਾਠਤੋ ਵਿਸੇਸੋ, ਅਤ੍ਥਤੋ ਪਨ ਨਾਮਮਤ੍ਤਕੋਵ ਵਿਸੇਸੋ. ਸੇਸੋ ਸੁਵਿਞ੍ਞੇਯ੍ਯੋਵ. ਪਞ੍ਚਮਛਟ੍ਠਾਨਿ.
ਉਪਾਦਾਨਗੋਚ੍ਛਕਂ ਨਿਟ੍ਠਿਤਂ.
ਕਿਲੇਸਗੋਚ੍ਛਕੇ ਸਂਕਿਲਿਟ੍ਠਤ੍ਤਿਕੇ ਵੁਤ੍ਤਨਯੇਨ ਪਦਤ੍ਥੋ ਵੇਦਿਤਬ੍ਬੋ. ਲੋਭੋ ਦੋਸੋ ਮੋਹੋ ਮਾਨੋ ਦਿਟ੍ਠਿ ਵਿਚਿਕਿਚ੍ਛਾ ਥਿਨਂ ਉਦ੍ਧਚ੍ਚਂ ਅਹਿਰਿਕਂ ਅਨੋਤ੍ਤਪ੍ਪਨ੍ਤਿ ਇਮੇ ਦਸ ਧਮ੍ਮਾ ਕਿਲੇਸਾ ਨਾਮ. ਇਮੇ ਚ ਵੁਤ੍ਤਤ੍ਥਾ ਏਵ, ਇਧ ਪਨ ਲੋਭੋ, ਹੇਤੁਗਨ੍ਥਨੀਵਰਣਉਪਾਦਾਨਗੋਚ੍ਛਕੇਸੁ ਲੋਭੋ ਚ ਨਿਪ੍ਪਦੇਸਤੋ ਚਤੁਮਗ੍ਗਵਜ੍ਝੋਪਿ ਏਕੇਨੇਵ ਕੋਟ੍ਠਾਸੇਨ ਠਿਤੋ, ਸੇਸਗੋਚ੍ਛਕੇਸੁ ਸੋ ਸਬ੍ਬੋਪਿ ਲੋਭੋ ‘‘ਕਾਮਾਸਵੋ ਭਵਾਸਵੋ’’ਤਿਆਦਿਨਾ ਦ੍ਵੇ ਦ੍ਵੇ ਕੋਟ੍ਠਾਸਾ ਹੁਤ੍ਵਾ ਠਿਤੋ, ਇਮਿਨਾ ਪਨ ਅਟ੍ਠਕਥਾਵਚਨੇਨਾਪਿ ਭਵਾਸਵਾਦਿਬ੍ਯਤਿਰਿਤ੍ਤੋ ਸਬ੍ਬੋ ਚਤੁਮਗ੍ਗਵਜ੍ਝੋਪਿ ਰਾਗੋ ਕਾਮਾਸਵਾਦੀਸੁ ਸਙ੍ਗਹਿਤੋ. ਕਾਮਚ੍ਛਨ੍ਦਨੀਵਰਣਂ ਪਨ ਭਵਰਾਗੋਪਿ ਨ ਪਞ੍ਚਕਾਮਗੁਣਿਕਰਾਗਮਤ੍ਤੋਵਾਤਿ ਪਞ੍ਞਾਯਤਿ, ‘‘ਆਰੁਪ੍ਪੇ ਕਾਮਚ੍ਛਨ੍ਦਨੀਵਰਣਂ ਪਟਿਚ੍ਚ ਥਿਨਮਿਦ੍ਧਨੀਵਰਣ’’ਨ੍ਤਿਆਦਿਪਾਲ਼ਿਤੋ (ਪਟ੍ਠਾ. ੩.੮.੮) ਚੇਤਂ ਦਟ੍ਠਬ੍ਬਂ ਪਞ੍ਚਕਾਮਗੁਣਿਕਰਾਗਸ੍ਸ ਰੂਪਾਰੂਪਭੂਮੀਸੁ ਅਨੁਪ੍ਪਜ੍ਜਨਤੋ. ਇਮੇਸੁ ਚ ਕਿਲੇਸੇਸੁ ਦਿਟ੍ਠਿਵਿਚਿਕਿਚ੍ਛਾ ਪਠਮੇਨ ਮਗ੍ਗੇਨ ਪਹੀਯਨ੍ਤਿ, ਦੋਸੋ ਤਤਿਯੇਨ, ਲੋਭਾਦਯੋ ਚਤੂਹਿਪਿ. ਇਮੇ ਪਨ ਦਸ ਧਮ੍ਮੇ ਠਪੇਤ੍ਵਾ ਸੇਸਾ ਨੋ ਕਿਲੇਸਾ ਨਾਮ. ਕਿਲੇਸਦੁਕਂ ਪਠਮਂ.
ਸਂਕਿਲੇਸਿਕਦੁਕੋ ਸਾਸਵਦੁਕਸਦਿਸੋਵ. ਦੁਤਿਯਂ.
ਸਂਕਿਲਿਟ੍ਠਦੁਕੋ, ਕਿਲੇਸਸਮ੍ਪਯੁਤ੍ਤਦੁਕੋ ਚਾਤਿ ਦ੍ਵੇਪਿ ਸਮਾਨਤ੍ਥਾਵ. ਤੇ ਚ ਨੀਵਰਣਗੋਚ੍ਛਕੇ ਤਤਿਯਦੁਕਸਦਿਸਾਵ. ਤਤਿਯਚਤੁਤ੍ਥਾਨਿ.
ਦਸ ਕਿਲੇਸਾ ਕਿਲੇਸਾ ਚੇਵ ਸਂਕਿਲੇਸਿਕਾ ਚ ਨਾਮ. ਸੇਸਾ ਲੋਕਿਯਧਮ੍ਮਾ ਸਂਕਿਲੇਸਿਕਾ ਚੇਵ ਨੋ ਚ ਕਿਲੇਸਾ ਨਾਮ. ਇਧ ਪਨ ਲੋਕੁਤ੍ਤਰਾ ਨ ਵਤ੍ਤਬ੍ਬਾ. ਸੇਸਂ ਨੀਵਰਣਗੋਚ੍ਛਕੇ ਚਤੁਤ੍ਥਦੁਕਸਦਿਸਮੇਵ. ਪਞ੍ਚਮਂ.
ਛਟ੍ਠਸਤ੍ਤਮਦੁਕਾਨਿਪਿ ਅਞ੍ਞਮਞ੍ਞਂ ਸਮਾਨਤ੍ਥਾਨੇਵ. ਤਾਨਿ ਛਟ੍ਠਸਤ੍ਤਮਾਨਿ ਨੀਵਰਣਗੋਚ੍ਛਕੇ ਯਥਾਕ੍ਕਮਂ ਪਾਠਤੋ ਪਞ੍ਚਮਛਟ੍ਠਦੁਕਸਦਿਸਾਨਿ, ਅਤ੍ਥਤੋ ਪਨ ਨਾਮਮਤ੍ਤਕੋਵ ਵਿਸੇਸੋ. ਸੇਸੋ ਸੁਵਿਞ੍ਞੇਯ੍ਯੋ. ਛਟ੍ਠਸਤ੍ਤਮਅਟ੍ਠਮਾਨਿ.
ਕਿਲੇਸਗੋਚ੍ਛਕਂ ਨਿਟ੍ਠਿਤਂ.
ਪਿਟ੍ਠਿਦੁਕੇਸੁ ਆਦਿਤੋ ਚਤ੍ਤਾਰੋ ਦੁਕਾ ਦਸ੍ਸਨੇਨਪਹਾਤਬ੍ਬਤ੍ਤਿਕੇ, ਦਸ੍ਸਨੇਨਪਹਾਤਬ੍ਬਹੇਤੁਕੇ ਚ ਵੁਤ੍ਤਨਯੇਨ ਵੇਦਿਤਬ੍ਬਾ. ਕੇਵਲਂ ਪਨ ਤਤ੍ਥ ਪਠਮਤ੍ਤਿਕੇ ਵੁਤ੍ਤੇਸੁ ਦਸ੍ਸਨੇਨਪਹਾਤਬ੍ਬੇ ਧਮ੍ਮੇ ਠਪੇਤ੍ਵਾ ਸੇਸਾ ਇਧ ਪਠਮਦੁਕਸ੍ਸ ਦੁਤਿਯਪਦੇ ਦਸ੍ਸਨੇਨਪਹਾਤਬ੍ਬੇਸੁ ਪਵਿਸਨ੍ਤਿ, ਭਾਵਨਾਯਪਹਾਤਬ੍ਬੇ ਠਪੇਤ੍ਵਾ ਸੇਸਾ ਇਧ ਦੁਤਿਯਦੁਕੇ ਨਭਾਵਨਾਯਪਹਾਤਬ੍ਬੇਸੁ ਪਵਿਸਨ੍ਤਿ. ਤਤ੍ਥ ਚ ਦੁਤਿਯਤ੍ਤਿਕੇ ਵੁਤ੍ਤੇਸੁ ਦਸ੍ਸਨੇਨਪਹਾਤਬ੍ਬਹੇਤੁਕੇ ਠਪੇਤ੍ਵਾ ਸੇਸਾ ਇਧ ਤਤਿਯਦੁਕੇ ਨਦਸ੍ਸਨੇਨਪਹਾਤਬ੍ਬਹੇਤੁਕੇ, ਭਾਵਨਾਯਪਹਾਤਬ੍ਬਹੇਤੁਕੇ ਚ ਠਪੇਤ੍ਵਾ ਸੇਸਾ ਇਧ ਚਤੁਤ੍ਥਦੁਕੇ ਨਭਾਵਨਾਯਪਹਾਤਬ੍ਬਹੇਤੁਕੇਸੁ ਪਵਿਸਨ੍ਤਿ.
ਪਦਤ੍ਥੋ ਚ ਦਸ੍ਸਨੇਨ ਪਹਾਤਬ੍ਬੋ ਹੇਤੁ ਏਤੇਸਂ ਅਤ੍ਥੀਤਿ ਦਸ੍ਸਨੇਨਪਹਾਤਬ੍ਬਹੇਤੁਕਾ. ਏਵਂ ਭਾਵਨਾਯਪਹਾਤਬ੍ਬਹੇਤੁਕਾਤਿ ਏਤ੍ਥਾਪਿ ਅਤ੍ਥੋ ਵੇਦਿਤਬ੍ਬੋ. ਏਵਂ ਹਿ ਸਤਿ ਅਹੇਤੁਕਾਨਂ ਅਗ੍ਗਹਣਂ ਸਿਯਾਤਿ ਏਤ੍ਤਕਮੇਵ ਵਿਸੇਸੋ. ਤਿਕਦ੍ਵਯਮੇਵ ਹਿ ਭਗਵਾ ਦੇਸਨਾਵਿਲਾਸੇਨ ਚਤ੍ਤਾਰੋ ਦੁਕੇ ਕਤ੍ਵਾ ਦੇਸੇਸਿ. ਸੇਸਂ ਤਾਦਿਸਮੇਵ. ਚਤ੍ਤਾਰੋ ਦੁਕਾ ਨਿਟ੍ਠਿਤਾ.
ਪਞ੍ਚਪਞ੍ਞਾਸਸਵਿਤਕ੍ਕਚਿਤ੍ਤੇਸੁ ਵਿਤਕ੍ਕਵਿਰਹਿਤਾ ਚਿਤ੍ਤਚੇਤਸਿਕਾ ਧਮ੍ਮਾ ਸਵਿਤਕ੍ਕਾ ਨਾਮ. ਵਿਤਕ੍ਕੋ, ਪਨ ਸੇਸਚਿਤ੍ਤਰੂਪਨਿਬ੍ਬਾਨਾਨਿ ਚ ਅਵਿਤਕ੍ਕਾ ਨਾਮ. ਪਞ੍ਚਮਂ.
ਛਸਟ੍ਠਿਯਾ ਸਵਿਚਾਰਚਿਤ੍ਤੇਸੁ ਵਿਚਾਰਵਿਰਹਿਤਾ ਧਮ੍ਮਾ ਸਵਿਚਾਰਾ ਨਾਮ. ਵਿਚਾਰੋ, ਪਨ ਸੇਸਚਿਤ੍ਤਰੂਪਨਿਬ੍ਬਾਨਾਨਿ ਚ ਅਵਿਚਾਰਾ ਨਾਮ. ਸੇਸਂ ਇਧ, ਅਨਨ੍ਤਰੇ ਵੁਤ੍ਤਦੁਕੇ ਚ ਵਿਤਕ੍ਕਤ੍ਤਿਕੇ ਵੁਤ੍ਤਾਨੁਸਾਰੇਨ ਞਾਤਬ੍ਬਂ. ਛਟ੍ਠਂ.
ਇਤੋ ਪਰੇਸੁ ਸਪ੍ਪੀਤਿਕਦੁਕੋ, ਪੀਤਿਸਹਗਤਦੁਕੋ ਚ ਸਮਾਨਤ੍ਥਾਵ, ਤੇ ਚ ਸੁਖਸਹਗਤਉਪੇਕ੍ਖਾਸਹਗਤਦੁਕਾ ਚਾਤਿ ਚਤ੍ਤਾਰੋਪਿ ਦੁਕਾ ਪੀਤਿਤ੍ਤਿਕੇ ਵੁਤ੍ਤਨਯਾਵ. ਕੇਵਲਂ ਪਨੇਤੇਸਂ ਦੁਕਾਨਂ ਪਠਮਂ ਪਦਂ ਤਤ੍ਥ ਪਵਿਸਤਿ, ਪੀਤਿਤ੍ਤਿਕੇ ਇਤਰੀਤਰਪਦਦ੍ਵਯਸਙ੍ਗਹਿਤਾ, ਅਸਙ੍ਗਹਿਤਾ ਚ ਸਬ੍ਬੇ ਅਤ੍ਥਾ ਹੇਟ੍ਠਾ ਵੁਤ੍ਤਨਯੇਨੇਤ੍ਥ ਦੁਕਾਨਂ ਦੁਤਿਯਪਦੇਸੁ ਅਤ੍ਥਤੋ ਸਙ੍ਗਹਿਤਾ, ਇਮੇ ਚ ਨਿਪ੍ਪਦੇਸਦੁਕਾਤਿ ਅਯਮੇਵ ਵਿਸੇਸੋ. ਸਤ੍ਤਮਅਟ੍ਠਮਨਵਮਦਸਮਾ.
ਤਦਨਨ੍ਤਰੇਸੁ ਕਾਮਾਵਚਰਾਤਿ ਏਤ੍ਥ ‘‘ਹੇਟ੍ਠਤੋ ਅਵੀਚਿਨਿਰਯਂ ਪਰਿਯਨ੍ਤਂ ਕਰਿਤ੍ਵਾ ਉਪਰਿਤੋ ਪਰਨਿਮ੍ਮਿਤਵਸਵਤ੍ਤੀ ਦੇਵੇ ਅਨ੍ਤੋ ਕਰਿਤ੍ਵਾ ਯਂ ਤਸ੍ਮਿਂ ਅਨ੍ਤਰੇ ਏਤ੍ਥਾਵਚਰਾ ਏਤ੍ਥ ਪਰਿਯਾਪਨ੍ਨਾ’’ਤਿ ਏਵਂ (ਧ. ਸ. ੧੨੮੭) ਪਾਲ਼ਿਯਂ ਪਰਿਚ੍ਛਿਨ੍ਨਾਨਂ ਚਤੁਨ੍ਨਂ ਅਪਾਯਾਨਂ, ਮਨੁਸ੍ਸਾਨਂ, ਛਨ੍ਨਂ ਦੇਵਲੋਕਾਨਞ੍ਚ ਵਸੇਨ ਓਕਾਸਤੋ ਏਕਾਦਸਵਿਧੋ ਕਾਮਭਵੋ ‘‘ਕਾਮੋ’’ਤਿ ਵੁਚ੍ਚਤਿ ਉਤ੍ਤਰਪਦਲੋਪੇਨ ਯਥਾ ‘‘ਰੂਪੂਪਪਤ੍ਤਿਯਾ’’ਤਿਆਦੀਸੁ ਰੂਪਭਵੋ ‘‘ਰੂਪ’’ਨ੍ਤਿ. ਤਸ੍ਮਿਂ ਕਾਮੇ ਅਵਚਰਨ੍ਤਿ ਪਵਤ੍ਤਨ੍ਤੀਤਿ ਕਾਮਾਵਚਰਾ. ਯੇਭੁਯ੍ਯਤੋ ਚੇਤਂ ਵੁਤ੍ਤਂ ਰੂਪਾਰੂਪੇਸੁ ਚੇਤੇਸਞ੍ਚ ਇਧ ਪਵਤ੍ਤਿਤੋ ‘‘ਥਲਚਰਾ’’ਤਿਆਦੀਸੁ ਵਿਯ. ਕਾਮਭਵਸਙ੍ਖਾਤੇ ਵਾ ਕਾਮੇ ਪਟਿਸਨ੍ਧਿਂ ਅਵਚਾਰੇਨ੍ਤੀਤਿਪਿ ਕਾਮਾਵਚਰਾ, ਕੁਸਲਾਕੁਸਲਾਨਿ. ਉਦ੍ਧਚ੍ਚਸਹਗਤਚਿਤ੍ਤਂ ਪਨ ਅਬ੍ਯਾਕਤਚਿਤ੍ਤਸਦਿਸਂ. ਤਦਾਯਤ੍ਤਤਾਯ, ਆਰਮ੍ਮਣਕਰਣਵਸੇਨ ਵਾ ਕਿਲੇਸਕਾਮੋ ਏਤ੍ਥ ਅਵਚਰਤੀਤਿਪਿ ਕਾਮਾਵਚਰਂ. ਕਾਮਞ੍ਚੇਸ ਰੂਪਾਰੂਪਾਵਚਰਧਮ੍ਮੇਸੁਪਿ ਅਵਚਰਤਿ, ਰੁਲ਼੍ਹਿਤੋ ਪਨ ‘‘ਵਦਤੀਤਿ ਵਚ੍ਛੋ’’ਤਿਆਦੀਸੁ ਵਿਯ ਇਮੇ ਏਵ ‘‘ਕਾਮਾਵਚਰਾ’’ਤਿ ਵੁਚ੍ਚਨ੍ਤਿ. ਅਪਿਚ ਕਾਮਤਣ੍ਹਾ ਰੂਪਤਣ੍ਹਾ ਅਰੂਪਤਣ੍ਹਾਤਿ ਏਤ੍ਥ ਵੁਤ੍ਤਕਾਮਤਣ੍ਹਾਸਙ੍ਖਾਤੋ ਕਾਮੋ ਏਤ੍ਥ ਅਵਚਰਤੀਤਿਪਿ ਕਾਮਾਵਚਰਾ. ਏਵਂ ਬ੍ਰਹ੍ਮਾਨਂ ਵਿਮਾਨਾਭਰਣਾਦੀਸੁ ਛਨ੍ਦਰਾਗਸ੍ਸਾਪਿ ਕਾਮਤਣ੍ਹਾਭਾਵੋ ਸਿਦ੍ਧੋ, ਰੂਪਤਣ੍ਹਾਵਿਸਯਾਨਮ੍ਪਿ ਚ ਬ੍ਰਹ੍ਮਾਨਂ ਕਮ੍ਮਜਰੂਪਾਦੀਨਂ ਕਾਮਤਣ੍ਹਾਯਪਿ ਵਿਸਯਤਾਯ ਕਾਮਾਵਚਰਤਾ ਸਿਦ੍ਧਾ ਹੋਤਿ. ਨ ਰੂਪਾਰੂਪਾਵਚਰਾਨਂ ਤਦਭਾਵਤੋ ਤਦਞ੍ਞੇ ਨ ਕਾਮਾਵਚਰਾ. ਇਮਿਨਾ ਨਯੇਨ ਰੂਪਾਵਚਰਾਦਿਦੁਕਾਨਮ੍ਪਿ ਪਦਤ੍ਥੋ ਯਥਾਰਹਂ ਞਾਤਬ੍ਬੋ. ਤਤ੍ਥ ਚਤੁਪਞ੍ਞਾਸ ਕਾਮਾਵਚਰਚਿਤ੍ਤਾਨਿ, ਸਬ੍ਬਞ੍ਚ ਰੂਪਂ ਕਾਮਾਵਚਰਾ ਨਾਮ. ਸੇਸਚਿਤ੍ਤਨਿਬ੍ਬਾਨਾਨਿ ਨ ਕਾਮਾਵਚਰਾ ਨਾਮ. ਚੇਤਸਿਕੇਸੁ ਵਤ੍ਤਬ੍ਬਂ ਪਰਿਯਾਪਨ੍ਨਦੁਕੇ ਏਵ ਆਵਿ ਭਵਿਸ੍ਸਤਿ. ਏਕਾਦਸਮਂ.
ਪਨ੍ਨਰਸ ਰੂਪਾਵਚਰਚਿਤ੍ਤਾਨਿ ਰੂਪਾਵਚਰਾ ਨਾਮ. ਸੇਸਚਿਤ੍ਤਰੂਪਨਿਬ੍ਬਾਨਾਨਿ ਨ ਰੂਪਾਵਚਰਾ ਨਾਮ. ਦ੍ਵਾਦਸਮਂ.
ਦ੍ਵਾਦਸ ਅਰੂਪਾਵਚਰਚਿਤ੍ਤਾਨਿ ਅਰੂਪਾਵਚਰਾ ਨਾਮ. ਸੇਸਚਿਤ੍ਤਰੂਪਨਿਬ੍ਬਾਨਾਨਿ ਨ ਅਰੂਪਾਵਚਰਾ ਨਾਮ. ਤੇਰਸਮਂ.
ਤੇਭੂਮਕਵਟ੍ਟੇ ਪਰਿਯਾਪਨ੍ਨਾ ਅਨ੍ਤੋਗਧਾਤਿ ਪਰਿਯਾਪਨ੍ਨਾ, ਲੋਕਿਯਧਮ੍ਮਾਵ. ਤਤ੍ਥ ਨ ਪਰਿਯਾਪਨ੍ਨਾਤਿ ਅਪਰਿਯਾਪਨ੍ਨਾ, ਲੋਕੁਤ੍ਤਰਾ. ਚੇਤਸਿਕੇਸੁ ਪਨ ਕਾਮਾਵਚਰਾਦਿਦੁਕਾਨਂ ਚਤੁਨ੍ਨਮ੍ਪਿ ਸਾਧਾਰਣੋ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋ – ਅਕੁਸਲਚੇਤਸਿਕਾ ਕਾਮਾਵਚਰਾਵ, ਅਪ੍ਪਮਞ੍ਞਾ ਕਾਮਰੂਪਾਵਚਰਾ, ਵਿਰਤਿਯੋ ਪਨ ਕਾਮਾਵਚਰਪਰਿਯਾਪਨ੍ਨਾ, ਵਿਤਕ੍ਕਵਿਚਾਰਪੀਤਿਯੋ ਪਨ ਕਾਮਰੂਪਾਵਚਰਪਰਿਯਾਪਨ੍ਨਾ, ਸੇਸਾ ਚਤੁਭੂਮਕਾਤਿ. ਚੁਦ੍ਦਸਮਂ.
ਵਟ੍ਟਮੂਲਂ ਛਿਨ੍ਦਨ੍ਤਾ ਨਿਬ੍ਬਾਨਂ ਆਰਮ੍ਮਣਂ ਕਤ੍ਵਾ ਵਟ੍ਟਤੋ ਨੀਯਨ੍ਤੀਤਿ ਨਿਯ੍ਯਾਨਿਕਾ, ਚਤ੍ਤਾਰਿ ਲੋਕੁਤ੍ਤਰਮਗ੍ਗਚਿਤ੍ਤਾਨਿ. ਇਮਿਨਾ ਲਕ੍ਖਣੇਨ ਨ ਨਿਯ੍ਯਨ੍ਤੀਤਿ ਅਨਿਯ੍ਯਾਨਿਕਾ, ਸੇਸਚਿਤ੍ਤਰੂਪਨਿਬ੍ਬਾਨਾਨਿ. ਸੇਸਂ ਸੁਵਿਞ੍ਞੇਯ੍ਯਮੇਵ. ਪਞ੍ਚਦਸਮਂ.
ਚੁਤਿਯਾ ਵਾ ਅਤ੍ਤਨੋ ਵਾ ਪਵਤ੍ਤਿਯਾ ਅਨਨ੍ਤਰਂ ਫਲਦਾਨੇ ਨਿਯਤਤ੍ਤਾ ਨਿਯਤਾ, ਮਿਚ੍ਛਤ੍ਤਨਿਯਤਾ, ਸਮ੍ਮਤ੍ਤਨਿਯਤਾ ਚ. ਤਥਾ ਅਨਿਯਤਤ੍ਤਾ ਅਨਿਯਤਾ, ਸੇਸਧਮ੍ਮਾ. ਸੇਸਂ ਵੁਤ੍ਤਨਯਮੇਵ. ਸੋਲ਼ਸਮਂ.
ਅਞ੍ਞੇ ਧਮ੍ਮੇ ਉਤ੍ਤਰਨ੍ਤਿ ਅਤਿਕ੍ਕਮਨ੍ਤੀਤਿ ਉਤ੍ਤਰਾ, ਅਤ੍ਤਾਨਂ ਉਤ੍ਤਰਿਤੁਂ ਸਮਤ੍ਥੇਹਿ ਸਹ ਉਤ੍ਤਰੇਹੀਤਿ ਸਉਤ੍ਤਰਾ, ਲੋਕਿਯਾਵ. ਨਤ੍ਥਿ ਏਤੇਸਂ ਉਤ੍ਤਰਾਤਿ ਅਨੁਤ੍ਤਰਾ, ਲੋਕੁਤ੍ਤਰਾ. ਸਤ੍ਤਰਸਮਂ.
ਰਣਨ੍ਤਿ ਕਨ੍ਦਨ੍ਤਿ ਏਤੇਹੀਤਿ ਰਣਾ, ਯੇਹਿ ਅਭਿਭੂਤਾ ਸਤ੍ਤਾ ਨਾਨਪ੍ਪਕਾਰਤੋ ਪਰਿਦੇਵਨ੍ਤਿ, ਤੇਸਂ ਅਕੁਸਲਮੂਲਾਨਂ ਏਤਂ ਅਧਿਵਚਨਂ, ਤੇਹਿ ਸਮ੍ਪਯੋਗਵਸੇਨ, ਪਹਾਨੇਕਟ੍ਠਤਾਵਸੇਨ ਚ ਸਹ ਰਣੇਹੀਤਿ ਸਰਣਾ. ਏਤੇਨਾਕਾਰੇਨ ਨਤ੍ਥਿ ਏਤੇਸਂ ਰਣਾਤਿ ਅਰਣਾ.
ਤਤ੍ਥ ਦ੍ਵਾਦਸ ਅਕੁਸਲਚਿਤ੍ਤਾਨਿ ਸਰਣਾ ਨਾਮ. ਸਰਣਧਮ੍ਮੇਸੁ ਚੇਤ੍ਥ ਲੋਭਦੋਸਮੋਹਾ ਰਣਾ ਚੇਵ ਸਰਣਾ ਚ, ਤੇਸੁ ਲੋਭਦੋਸਾ ਮੋਹੇਨੇਵ ਸਮ੍ਪਯੋਗਤੋ ਸਰਣਾ, ਤਥਾ ਵਿਚਿਕਿਚ੍ਛੁਦ੍ਧਚ੍ਚਸਹਗਤਚਿਤ੍ਤਂ, ਤਂਸਮ੍ਪਯੁਤ੍ਤਾ ਚ. ਮੋਹੋ ਪਨ ਤੇਸੁ ਸਮ੍ਪਯੋਗਤੋ ਸਰਣੋ, ਦਿਟ੍ਠਿਸਮ੍ਪਯੁਤ੍ਤਰਾਗੇਨ, ਪਨ ਭਵਰਾਗੇਨ ਚ ਰਣਭੂਤੇਨ ਪਹਾਨੇਕਟ੍ਠਤਾਵਸੇਨੇਵ ਸਰਣੋ. ਲੋਭਦੋਸਮੋਹਮੂਲਸਮ੍ਪਯੁਤ੍ਤੇਸੁ ਪਨ ਮੋਹੋ ਲੋਭੇਨ ਚੇਵ ਦੋਸੇਨ ਚ, ਸੇਸਾ ਲੋਭਮੋਹੇਨ ਚੇਵ ਦੋਸਮੋਹੇਨ ਚ ਸਮ੍ਪਯੋਗਤੋ ਸਰਣਾਤਿ ਵੇਦਿਤਬ੍ਬਾ. ਸਬ੍ਬਾਨਿ ਕੁਸਲਾਬ੍ਯਾਕਤਚਿਤ੍ਤਾਨਿ, ਰੂਪਨਿਬ੍ਬਾਨਾਨਿ ਚ ਅਰਣਾ ਨਾਮ. ਚੇਤਸਿਕੇਸੁ ਪਨ ਅਕੁਸਲਾ ਸਰਣਾਵ, ਕੁਸਲਾਬ੍ਯਾਕਤਾ ਅਰਣਾਵ, ਤਿਜਾਤਿਕਾ ਪਨ ਦ੍ਵਿਧਾਪਿ ਹੋਨ੍ਤੀਤਿ. ਅਟ੍ਠਾਰਸਮਂ.
ਪਿਟ੍ਠਿਦੁਕਾ ਨਿਟ੍ਠਿਤਾ.
ਅਭਿਧਮ੍ਮਦੁਕਮਾਤਿਕਤ੍ਥਵਣ੍ਣਨਾ ਨਿਟ੍ਠਿਤਾ.