੩੩. ਪਰਾਯਨਸੁਤ੍ਤਂ

੪੦੯. ‘‘ਪਰਾਯਨਞ੍ਚ [ਪਰਾਯਣਞ੍ਚ (ਪੀ. ਸੀ. ਅਟ੍ਠ.)] ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਪਰਾਯਨਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਪਰਾਯਨਂ? ਯੋ, ਭਿਕ੍ਖਵੇ, ਰਾਗਕ੍ਖਯੋ ਦੋਸਕ੍ਖਯੋ ਮੋਹਕ੍ਖਯੋ – ਇਦਂ ਵੁਚ੍ਚਤਿ, ਭਿਕ੍ਖਵੇ, ਪਰਾਯਨਂ. ਕਤਮੋ ਚ, ਭਿਕ੍ਖਵੇ, ਪਰਾਯਨਗਾਮੀ ਮਗ੍ਗੋ? ਕਾਯਗਤਾਸਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਪਰਾਯਨਗਾਮਿਮਗ੍ਗੋ. ਇਤਿ ਖੋ, ਭਿਕ੍ਖਵੇ, ਦੇਸਿਤਂ ਵੋ ਮਯਾ ਪਰਾਯਨਂ, ਦੇਸਿਤੋ ਪਰਾਯਨਗਾਮਿਮਗ੍ਗੋ. ਯਂ, ਭਿਕ੍ਖਵੇ, ਸਤ੍ਥਾਰਾ ਕਰਣੀਯਂ ਸਾਵਕਾਨਂ ਹਿਤੇਸਿਨਾ ਅਨੁਕਮ੍ਪਕੇਨ ਅਨੁਕਮ੍ਪਂ ਉਪਾਦਾਯ, ਕਤਂ ਵੋ ਤਂ ਮਯਾ. ਏਤਾਨਿ, ਭਿਕ੍ਖਵੇ, ਰੁਕ੍ਖਮੂਲਾਨਿ, ਏਤਾਨਿ ਸੁਞ੍ਞਾਗਾਰਾਨਿ. ਝਾਯਥ, ਭਿਕ੍ਖਵੇ, ਮਾ ਪਮਾਦਤ੍ਥ; ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥ. ਅਯਂ ਵੋ ਅਮ੍ਹਾਕਂ ਅਨੁਸਾਸਨੀ’’ਤਿ. (ਯਥਾ ਅਸਙ੍ਖਤਂ ਤਥਾ ਵਿਤ੍ਥਾਰੇਤਬ੍ਬਂ). ਤੇਤ੍ਤਿਂਸਤਿਮਂ.

ਦੁਤਿਯੋ ਵਗ੍ਗੋ.

ਤਸ੍ਸੁਦ੍ਦਾਨਂ –

ਅਸਙ੍ਖਤਂ ਅਨਤਂ ਅਨਾਸਵਂ, ਸਚ੍ਚਞ੍ਚ ਪਾਰਂ ਨਿਪੁਣਂ ਸੁਦੁਦ੍ਦਸਂ;

ਅਜਜ੍ਜਰਂ ਧੁਵਂ ਅਪਲੋਕਿਤਂ, ਅਨਿਦਸ੍ਸਨਂ ਨਿਪ੍ਪਪਞ੍ਚ ਸਨ੍ਤਂ.

ਅਮਤਂ ਪਣੀਤਞ੍ਚ ਸਿਵਞ੍ਚ ਖੇਮਂ, ਤਣ੍ਹਾਕ੍ਖਯੋ ਅਚ੍ਛਰਿਯਞ੍ਚ ਅਬ੍ਭੁਤਂ;

ਅਨੀਤਿਕਂ ਅਨੀਤਿਕਧਮ੍ਮਂ, ਨਿਬ੍ਬਾਨਮੇਤਂ ਸੁਗਤੇਨ ਦੇਸਿਤਂ.

ਅਬ੍ਯਾਪਜ੍ਝੋ ਵਿਰਾਗੋ ਚ, ਸੁਦ੍ਧਿ ਮੁਤ੍ਤਿ ਅਨਾਲਯੋ;

ਦੀਪੋ ਲੇਣਞ੍ਚ ਤਾਣਞ੍ਚ, ਸਰਣਞ੍ਚ ਪਰਾਯਨਨ੍ਤਿ.

ਅਸਙ੍ਖਤਸਂਯੁਤ੍ਤਂ ਸਮਤ੍ਤਂ.